ত্রিপাদ্বিভূতিমহানারাযণ

.. ত্রিপাদ্বিভূতিমহানারাযণোপনিষত্  ..

যত্রাপহ্নবতাং যাতি স্বাবিদ্যাপদবিভ্রমঃ .
তত্ত্রিপান্নারাযণাখ্যং স্বমাত্রমবশিষ্যতে ..
ॐ ভদ্রং কর্ণেভিঃ শ্রুণুযাম দেবাঃ . ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ ..
অথ পরমতত্ত্বরহস্যং জিজ্ঞাসুঃ পরমেষ্ঠী দেবমানেন
সহস্রসংবত্সরং তপশ্চচার . সহস্রবর্ষেঽতীতেঽত্যুগ্রতীব্রতপসা
প্রসন্নং ভগবন্তং মহাবিষ্ণুং ব্রহ্মা পরিপৃচ্ছতি
ভগবন্ পরমতত্ত্বরহস্যং মে ব্রূহীতি . পরমতত্ত্বরহস্যবক্তা
ত্বমেব নান্যঃ কশ্চিদস্তি তত্কথমিতি . তদেবোচ্যতে . ত্বমেব সর্বজ্ঞঃ .
ত্বমেব সর্বশক্তিঃ . ত্বমেব সর্বাধারঃ . ত্বমেব সর্বস্বরূপঃ .
ত্বমেব সর্বেশ্বরঃ . ত্বমেব সর্বপ্রবর্তকঃ . ত্বমেব সর্বপালকঃ .
ত্বমেব সর্বনিবর্তকঃ . ত্বমেব সদসদাত্মকঃ . ত্বমেব সদসদ্বিলক্ষণঃ .
ত্বমেবান্তর্বহির্ব্যাপকঃ . ত্বমেবাতিসূক্ষ্মতরঃ . ত্বমেবাতিমহতো মহীযান্ .
ত্বমেব সর্বমূলাবিদ্যানিবর্তকঃ . ত্বমেবাবিদ্যাবিহারঃ .
ত্বমেবাবিদ্যাধারকঃ .ত্বমেব বিদ্যাবেদ্যঃ . ত্বমেব বিদ্যাস্বরূপঃ .
ত্বমেব বিদ্যাতীতঃ . ত্বমেব সর্বকারণহেতুঃ . ত্বমেব সর্বকারণসমষ্টিঃ .
ত্বমেব সর্বকারণব্যষ্টিঃ . ত্বমেবাখণ্ডানন্দঃ . ত্বমেব পরিপূর্ণানন্দঃ .
ত্বমেব নিরতিশযানন্দঃ . ত্বমেব তুরীযতুরীযঃ . ত্বমেব তুরীযাতীতঃ .
ত্বমেব অনন্তোপনিষদ্বিমৃগ্যঃ . ত্বমেবাখিলশাস্ত্রৈর্বিমৃগ্যঃ .
ত্বমেব ব্রহ্মেশানপুরন্দরপুরোগমৈরখিলামরৈরখিলাগমৈর্বিমৃগ্যঃ .
ত্বমেব সর্বমুমুক্ষুভির্বিমৃগ্যঃ . ত্বমেবামৃতমযৈর্বিমৃগ্যঃ .
ত্বমেবামৃতমযস্ত্বমেবামৃতমযস্ত্বমেবামৃতমযঃ . ত্বমেব সর্বং
ত্বমেব সর্বং ত্বমেব সর্বম্ . ত্বমেব মোক্ষস্ত্বমেব মোক্ষদস্ত্বমেবাখিলমোক্ষসাধনম্ .
ন কিঞ্চিদস্তি ত্বদ্ব্যতিরিক্তম্ . ত্বদ্ব্যতিরিক্তং যত্কিংচিত্প্রতীযতে তত্সর্বং
বাধিতমিতি নিশ্চযম্ . তস্মাত্ত্বমেব বক্তা ত্বমেবগুরুস্ত্বমেব পিতা
ত্বমেব সর্বনিযন্তা ত্বমেব সর্বং ত্বমেব সদা ধ্যেয ইতি সুনিশ্চিতঃ .
পরমতত্ত্বজ্ঞস্তমুবাচ মহাবিষ্ণুরতিপ্রসন্নো ভূত্বা সাধুসাধ্বিতি
সাধুপ্রশংসাপূর্বং সর্বং পরমতত্ত্বরহস্যং তে কথযামি . সাবধানেন শ্রুণু .
ব্রহ্মন্ দেবদর্শীত্যাখ্যাথর্বণশাখাযাং পরমতত্ত্বরহস্যাখ্যাথর্বণ-
মহানারাযণোপনিষদি গুরুশিষ্যসংবাদঃ পুরাতনঃ প্রসিদ্ধতযা জাগর্তি .
পুরা তত্স্বরূপজ্ঞানেন মহান্তঃ সর্বং ব্রহ্মভাবং গতাঃ . যস্য শ্রবণেন
সর্ববন্ধঃ প্রবিনশ্যন্তি . যস্য জ্ঞানেন সর্বরহস্যং বিদিতং ভবতি .
তত্স্বরূপং কথমিতি . শান্তো দান্তোঽতিবিরক্তঃ সুশুদ্ধো গুরুভক্তস্তপোনিষ্ঠঃ
শিষ্যো ব্রহ্মনিষ্ঠং গুরুমাসাদ্য প্রদক্ষিণপূর্বকং দণ্ডবত্প্রণম্য
প্রাঞ্জলির্ভূত্বা বিনযেনোপসংগম্য ভগবন্ গুরো মে পরমতত্ত্বরহস্যং
বিবিচ্য বক্তব্যমিতি . অত্যাদরপূর্বকমিতি হর্ষেণ শিষ্যং বহূকৃত্য গুরুর্বদতি .
পরমতত্ত্বরহস্যোপনিষত্ক্রমঃ কথ্যতে সবাধানেন শ্রূযতাম্ .কথং ব্রহ্ম . কালত্রযাবাধিতং ব্রহ্ম . সর্বকালাবাধিতং
ব্রহ্ম . সগুণনির্গুণস্বরূপং ব্রহ্ম . আদিমধ্যান্তশূন্যং ব্রহ্ম .
সর্বং খল্বিদং ব্রহ্ম . মাযাতীতং গুণাতীতং ব্রহ্ম .
অনন্তমপ্রমেযাখণ্ডপরিপূর্ণং ব্রহ্ম . অদ্বিতীযপরমানন্দশুদ্ধবুদ্ধ-
মুক্তসত্যস্বরূপব্যাপকাভিন্নাপরিচ্ছিনং ব্রহ্ম .
সচ্চিদানন্দস্বপ্রকাশং ব্রহ্ম . মনোবাচামগোচরং ব্রহ্ম .
অমিতবেদান্তবেদ্যং ব্রহ্ম . দেশতঃ কালতো বস্তুতঃ পরিচ্ছেদরহিতং ব্রহ্ম .
সর্বপরিপূর্ণং ব্রহ্ম তুরীযং নিরাকারমেকং ব্রহ্ম . অদ্বৈতমনির্বাচ্যং
ব্রহ্ম . প্রণবাত্মকং ব্রহ্ম . প্রণবাত্মকত্বেনোক্তং ব্রহ্ম .
প্রণবাদ্যখিলমন্ত্রাত্মকং ব্রহ্ম . পাদচতুষ্টযাত্মকং ব্রহ্ম .
কিং তত্পাদচতুষ্টযং ব্রহ্ম ভবতি . অবিদ্যাপাদঃ
সুবিদ্যাপাদশ্চানন্দপাদস্তুরীযপাদস্তুরীয ইতি .
তুরীযপাদস্তুরীযতুরীযং তুরীযাতীতং চ . কথং পাদচতুষ্টযস্য
ভেদঃ . অবিদ্যাপদঃ প্রথমঃ পাদো বিদ্যাপাদো দ্বিতীযঃ
আনন্দপাদস্তৃতীযস্তুরীযপাদস্তুরীয ইতি . মূলাবিদ্যা প্রথমপাদে
নান্যত্র . বিদ্যানন্দতুরীযাংশাঃ সর্বেষু পাদেষু ব্যাপ্য তিষ্ঠন্তি .
এবং তর্হি বিদ্যাদীনাং ভেদঃ কথমিতি . তত্তত্প্রাধান্যেন
তত্তদ্ব্যপদেশঃ . বস্তুতস্ত্বভেদ এব . তত্রাধস্তনমেকং
পাদমবিদ্যাশবলং ভবতি . উপরিতনপাদত্রযং শুদ্ধবোধানন্দ-
লক্ষণমমৃতং ভবতি . তচ্চানির্বাচ্যমনির্দেশ্যমখণ্ডান-
ন্দৈকরসাত্মকং ভবতি .
তত্র মধ্যমপাদমধ্যপ্রদেশেঽমিততেজঃপ্রবাহাকারতযা
নিত্যবৈকুণ্ঠং বিভাতি . তচ্চ নিরতিশযানন্দাখণ্ডব্রহ্মানন্দ-
নিজমূর্ত্যাকারেণ জ্বলতি . অপরিচ্ছিন্নমণ্ডলানি যথা দৃশ্যন্তে
তদ্বদখণ্ডানন্দামিতবৈষ্ণবদিব্যতেজোরাশ্যন্তর্গতবিলস-
ন্মহাবিষ্ণোঃ পরমং পদং বিরাজতে . দুগ্ধোদধিমধ্যস্থিতামৃতা-
মৃতকলশবদ্বৈষ্ণবং ধাম পরমং সংদৃশ্যতে .
সুদর্শনদিব্যতেজোঽন্তর্গতঃ সুদর্শনপুরুষো যথা সূর্যমণ্ডলান্তর্গতঃ
সূর্যনারাযণোঽমিতাপরিচ্ছিন্নাদ্বৈতপরমানন্দলক্ষণ-
তেজোরাশ্যন্তর্গত আদিনারাযণস্তথা সংদৃশ্যতে . স এব তুরীযং ব্রহ্ম
স এব তুরীযাতীতঃ স এব বিষ্ণুঃ স এব সমস্তব্রহ্মবাচকবাচ্যঃ
স এব পরংজ্যোতিঃ স এব মাযাতীতঃ স এব গুণাতীতঃ স এব কালাতীতঃ
স এব অখিলকর্মাতীতঃ স এব সত্যোপাধিরহিতঃ স এব পরমেশ্বরঃ
স এব চিরন্তনঃ পুরুষঃ প্রণবাদ্যখিলমন্ত্রবাচকবাচ্য
আদ্যন্তশূন্য আদিদেশকালবস্তুতুরীযসংজ্ঞানিত্যপরিপূর্ণঃ
পূর্ণঃ সত্যসংকল্প আত্মারামঃ কালত্রযাবাধিতনিজস্বরূপঃ
স্বযংজ্যোতিঃ স্বযংপ্রকাশমযঃ স্বসমানাধিকরণশূন্যঃ
স্বসমানাধিকশূন্যো ন দিবারাত্রিবিভাগো ন সংবত্সরাদিকালবিভাগঃ
স্বানন্দমযানন্তাচিন্ত্যবিভব আত্মান্তরাত্মা পরমাত্মা
জ্ঞানাত্মা তুরীযাত্মেত্যাদিবাচকবাচ্যোঽদ্বৈতপরমানন্দো
বিভুর্নিত্যো নিষ্কলঙ্কো নির্বিকল্পো নিরঞ্জনো নিরাখ্যাতঃ শুদ্ধো দেব
একো নারাযণো ন দ্বিতীযোঽস্তি কশ্চিদিতি য এবং বেদ স পুরুষস্তদীযোপাসনযা
তস্য সাযুজ্যমেতীত্যসংশযমিত্যুপনিষত্ ..
ইত্যাথর্বণমহানারাযণোপনিষদি পাদচতুষ্টযস্বরূপনিরূপণং
নাম প্রথমোঽধ্যাযঃ .. ১..
অথেতি হোবাচ চ্ছাত্রো গুরুং ভগবন্তম্ .
ভগবন্বৈকুণ্ঠস্য নারাযণস্য চ নিত্যত্বমুক্ত্বম্ .
স এব তুরীযমিত্যুক্তমেব . বৈকুণ্ঠঃ সাকারো নারাযণঃ সাকারশ্চ .
তুরীযং তু নিরাকারম্ . সাকারঃ সাবযবো নিরবযবং নিরাকারম্ .
তস্মাত্সাকারমনিত্যং নিত্যং নিরাকারমিতি শ্রুতেঃ .
যদ্যত্সাবযবং তত্তদনিত্যমিত্যনুমানাচ্চেতি প্রত্যক্ষেণ
দৃষ্টত্বাচ্চ . অতস্তযোরনিত্যত্বমেব বক্তুমুচিতং ভবতি .
কথমুক্তং নিত্যত্বমিতি . তুরীযমক্ষরমিতি শ্রুতেঃ .
তুরীযস্য নিত্যত্বং প্রসিদ্ধম্ . নিত্যত্বানিত্যত্বে পরস্পরবিরুদ্ধধর্মৌ . তযোরেকস্মিন্ব্রহ্মণ্যত্যন্তবিরুদ্ধং ভবতি . তস্মাদ্বৈকুণ্ঠস্য চ নারাযণস্য চ নিত্যত্বমেব বক্তুমুচিতং ভবতি . সত্যমেব ভবতীতি দেশিকং পরিহরতি . সাকারস্তু দ্বিবিধঃ . সোপাধিকো নিরুপাধিকশ্চ . তত্র সোপাধিকঃ সাকারঃ কথমিতি . আবিদ্যকমখিলকার্যকরণজামবিদ্যাপাদ এব নান্যত্র . তস্মাত্সমস্তাবিদ্যোপাধিঃ সাকারঃ সাবযব এব . সাবযবত্বাদবশ্যমনিত্যং ভবত্যেব . সোপাধিকসাকারো বর্ণিতঃ . তর্হি নিরুপাধিক সাকারঃ কথমিতি . নিরুপাধিকসাকারস্ত্রিবিধঃ . ব্রহ্মবিদ্যাসাকারশ্চানন্দসাকারুভযাত্মকসাকারশ্চেতি .

ব্রহ্মবিদ্যাসাকারশ্চানন্দসাকার উভযাত্মকসাকারশ্চেতি .

ত্রিবিধসাকারোঽপি পুনর্দ্বিবিধো ভবতি . নিত্যসাকারো মুক্তসাকারশ্চেতি .
নিত্যসাকারস্ত্বাদ্যন্তশূন্যঃ শাশ্বতঃ . উপাসনযা যে মুক্তিং
গতাস্তেষাং সাকারো মুক্তসাকারঃ . তস্যাখণ্ডজ্ঞানেনাবির্ভাবো
ভবতি . সোঽপি শাশ্বতঃ . মুক্তসাকারস্ত্বৈচ্ছিক ইতি . অন্যে বদন্তি
শাশ্বতত্বং কথমিতি . অদ্বৈতাখণ্ডপরিপূর্ণনিরতিশযপরমানন্দ-
শুদ্ধবুদ্ধমুক্তসত্যাত্মকব্রহ্ম চৈতন্যসাকারত্বাত্
নিরুপাধিকসাকারস্য নিত্যত্বং সিদ্ধমেব . তস্মাদেব নিরুপাধিকসাকারস্য
নিরবযবত্বাত্স্বাধিকমপি দূরতো নিরস্তমেব . নিরবযবং ব্রহ্মচৈতন্যমিতি
সর্বোপনিষত্সু সর্বশাস্ত্রসিদ্ধান্তেষু শ্রূযতে . অথ চ
বিদ্যানন্দতুরীযাণামভেদ এব শ্রূযতে . সর্বত্র বিদ্যাদিসাকারভেদঃ
কথমিতি . সত্যমেবোক্তমিতি দেশিকঃ পরিহরতি . বিদ্যাপ্রাধান্যেন বিদ্যাসাকারঃ
আনন্দপ্রাধান্যেনানন্দসাকারঃ উভযপ্রাধান্যেনোভযাত্মকসাকারশ্চেতি .
প্রাধান্যেনাত্র ভেদ এব . স ভেদো বস্তুতস্ত্বভেদ এব .
ভগবন্নখণ্ডাদ্বৈতপরমানন্দলক্ষণপরব্রহ্মণঃ সাকারনিরাকারৌ
বিরুদ্ধধর্মৌ . বিরুদ্ধোভযাত্মকত্বং কথমিতি . সত্যমেবেতি গুরুঃ পরিহরতি .
যথা সর্বগতস্য নিরাকারস্য মহাবাযোশ্চ তদাত্মকস্য ত্বক্পতিত্বেন
প্রসিদ্ধস্য সাকারস্য মহাবাযুদেবস্য চাভেদ এব শ্রূযতে সর্বত্র .
যথা পৃথীব্যাদীনাং ব্যাপকশরীরাণাং দেববিশেষণাং চ
তদ্বিলক্ষণতদভিন্নব্যাপকা পরিচ্ছিন্না নিজমূর্ত্যাকারদেবতাঃ
শ্রূযন্তে সর্বত্র তদ্বত্পরব্রহ্মণঃ সর্বাত্মকস্য সাকারনিরাকারভেদবিরোধো
নাস্ত্যেব বিবিধবিচিত্রানন্তশক্তেঃ পরব্রহ্মণঃ
স্বরূপজ্ঞানেনবিরোধো ন বিদ্যতে .
তদভাবে সত্যনন্তবিরোধো ভবতি . অথ চ
রামকৃষ্ণাদ্যবতারেষ্বদ্বৈতপরমানন্দলক্ষণপরব্রহ্মণঃ
পরমতত্ত্বপরমবিভবানুসন্ধানং স্বীযত্বেন শ্রূযতে সর্বত্র .
সর্বপরিপূর্ণস্যাদ্বৈতপরমানন্দলক্ষণপরব্রহ্মণস্তু কিং
বক্তব্যম্ . অন্যথা সর্বপরিপূর্ণস্য পরব্রহ্মণঃ পরমার্থতঃ
সাকারং বিনা কেবল নিরাকারত্বং যদ্যভিমতং তর্হি কেবলনিরাকারস্য
গগনস্যেব পরব্রহ্মণোঽপি জডত্বমাপদ্যেত . তস্মাত্পরব্রহ্মণঃ
পরমার্থতঃ সাকারনিরাকারৌ স্বভাবসিদ্ধৌ .
তথাবিধস্যাদ্বৈতপরমানন্দলক্ষণস্যাদিনারাযণস্যোন্মেষনিমেষাভ্যাং
মূলাবিদ্যোদযস্থিতিলযা জাযন্তে .
কদাচিদাত্মারামস্যাখিলপরিপূর্ণস্যাদিনারাযণস্য
স্বেচ্ছানুসারেণোন্মেষো ভবতি . অব্যক্তান্মূলাবির্ভাবো
মূলাবিদ্যাবির্ভাবশ্চ .
তস্মাদেব সচ্ছব্দবাচ্যং ব্রহ্মাবিদ্যাশবলং ভবতি . ততো মহত্ .
মহতোঽহঙ্কারঃ . অহঙ্কারাত্পঞ্চতন্মাত্রাণি . পঞ্চতন্মাত্রেভ্যঃ
পঞ্চমহাভূতানি . পঞ্চমহাভূতেভ্যো
ব্রহ্মৈকপাদব্যাপ্তমেকমবিদ্যাণ্ডং
জাযতে . তত্র তত্ত্বতো গুণাতীতশুদ্ধসত্ত্বমযো
লীলাগৃহীতনিরতিশযানন্দলক্ষণো
মাযোপাধিকো নারাযণ আসীত্ . স এব নিত্যপরিপূর্ণঃ
পাদবিভূতিবৈকুণ্ঠনারাযণঃ .
স চানন্তকোটিব্রহ্মাণ্ডানামুদযস্থিতিলযাদ্যখিলকার্যকারণজাল-
পরমকারণকারণভূতো মহামাযাতীতস্তুরীযঃ পরমেশ্বরো জযতি .
তস্মাত্স্থূলবিরাট্স্বরূপো জাযতে . সসর্বকারণমূলং
বিরাট্স্বরূপো ভবতি .
স চানন্তশীর্ষা পুরুষ অনন্তাক্ষিপাণিপাদো ভবতি .
অনন্তশ্রবণঃ সর্বমাবৃত্য তিষ্ঠতি . সর্বব্যাপকো ভবতি .
সগুণনির্গুণস্বরূপো ভবতি . জ্ঞানবলৈশ্বর্যশক্তিতেজঃস্বরূপো ভবতি .
বিবিধবিচিত্রানন্তজগদাকারো ভবতি .
নিরতিশযনিরঙ্কুশসর্বজ্ঞসর্বশক্তিসর্বনিযন্তৃত্বা-
দ্যনন্তকল্যাণগুণাকারো ভবতি .
বাচামগোচরানন্তদিব্যতেজোরাশ্যাকারো
ভবতি . সমস্তাবিদ্যাণ্ডব্যাপকো ভবতি .
স চানন্তমহামাযাবিলাসানামধিষ্ঠানবিশেষ-
নিরতিশযাদ্বৈতপরমানন্দ-
লক্ষণপরব্রহ্মবিলাসবিগ্রহো ভবতি .
অস্যৈকৈকরোমকূপান্তরেষ্বনন্তকোটি-
ব্রহ্মাণ্ডানি স্থাবরাণি চ জাযন্তে . তেষ্বণ্ডেষু
সর্বেষ্বেকৈকনারাযণাবতারো জাযতে . নারাযণাদ্ধিরণ্যগর্ভো
জাযতে . নারাযণাদণ্ডবিরাট্স্বরূপো জাযতে .
নারাযণাদখিললোকস্রষ্টৃপ্রজাপতযো
জাযন্তে . নারাযণাদেকাদশরুদ্রাশ্চ জাযন্তে .
নারাযণাদখিললোকাশ্চ
জাযন্তে . নারাযণাদিন্দ্রো জাযতে . নারাযণাত্সর্বেদেবাশ্চ জাযন্তে .
নারাযণাদ্দ্বাদশাদিত্যাঃ সর্বে বসবঃ সর্বে ঋষযঃ
সর্বাণি ভূতানি সর্বাণি ছন্দাংসি নারাযণাদেব সমুত্পদ্যন্তে .
নারাযণাত্প্রবর্তন্তে . নারাযণে প্রলীযন্তে . অথ নিত্যোঽক্ষরঃ
পরমঃ স্বরাট্ . ব্রহ্মা নারাযণঃ . শিবশ্চ নারাযণঃ .
শক্রশ্চ নারাযণঃ . দিশশ্চ নারাযণঃ . বিদিশশ্চ
নারাযণঃ . কালশ্চ নারাযণঃ . কর্মাখিলং চ নারাযণঃ .
মূর্তামূর্তং চ নারাযণঃ . কারণাত্মকং সর্বং কার্যাত্মকং
সকলং নারাযণঃ . তদুভযবিলক্ষণো নারাযণঃ . পরংজ্যোতিঃ
স্বপ্রকাশমযো ব্রহ্মানন্দমযো নিত্যো নির্বিকল্পো নিরঞ্জনো
নিরাখ্যাতঃ শুদ্ধো দেব একো নারাযণো ন দ্বিতীযোঽস্তি কশ্চিত্ .
ন স সমানাধিক ইত্যসংশযং পরমার্থতো য এবং বেদ .
সকলবন্ধাংশ্ছিত্ত্বা মৃত্যুং তীর্ত্বা স মুক্তো ভবতি স মুক্তো
ভবতি . য এবং বিদিত্বা সদা তমুপাস্তে পুরুষঃ স নারাযণো
ভবতি স নারাযণো ভবতীত্যুপনিষত্ ..
ইত্যাথর্বণমহানারাযণোপনিষদি পরব্রহ্মণঃ
সাকারনিরাকারস্বরূপনিরূপণং নাম দ্বিতীযোঽধ্যাযঃ .. ২..
অথ ছাত্রস্তথেতিহোবাচ . ভগবন্দেশিক পরমতত্ত্বজ্ঞ
সবিলাসমহামূলাঽবিদ্যোদযক্রমঃ কথিতঃ .
তদু প্রপঞ্চোত্পত্তিক্রমঃ কীদৃশো ভবতি . বিশেষেণ
কথনীযঃ . তস্য তত্ত্বং বেদিতুমিচ্ছামি . তথেত্যুক্ত্বা
গুরুরিত্যুবাচ .যথানাদিসর্বপ্রপঞ্চো দৃশ্যতে .
নিত্যোঽনিত্যো বেতি সংশয্যেতে . প্রপঞ্চোঽপি দ্বিবিধঃ .
বিদ্যাপ্রপঞ্চশ্চাবিদ্যাপ্রপঞ্চশ্চেতি .
বিদ্যাপ্রপঞ্চস্য নিত্যত্বং সিদ্ধমেব নিত্যানন্দ-
চিদ্বিলাসাত্মকত্বাত্ . অথ চ শুদ্ধবুদ্ধমুক্ত-
সত্যানন্দস্বরূপত্বাচ্চ . অবিদ্যাপ্রপঞ্চস্য
নিত্যত্বমনিত্যত্বং বা কথমিতি . প্রবাহতো নিত্যত্বং
বদন্তি কেচন . প্রলযাদিকং শ্রূযমাণত্বাদনিত্যত্বং
বদন্ত্যন্যে . উভযং ন ভবতি . পুনঃ কথমিতি .
সংকোচবিকাসাত্মকমহামাযাবিলাসাত্মক এব
সর্বোঽপ্যবিদ্যাপ্রপঞ্চঃ . পরমার্থতো ন কিংচিদস্তি
ক্ষণশূন্যানাদিমূলাঽবিদ্যাবিলাসত্বাত্ . তত্কথমিতি .
একমেবাদ্বিতীযং ব্রহ্ম . নেহ নানাস্তি কিংচন .
তস্মাদ্ব্রহ্মব্যতিরিক্তং সর্বং বাধিতমেব . সত্যমেব
পরংব্রহ্ম সত্যং জ্ঞানমনন্তং ব্রহ্ম .
ততঃ সবিলাসমূলাঽবিদ্যোপসংহারক্রমঃ কথমিতি .
অত্যাদরপূর্বকমতিহর্ষেণ দেশিক উপদিশতি .
চতুর্যুগসহস্রাণি ব্রহ্মণো দিবা ভবতি .
তাবতা কালেন পুনস্তস্য রাত্রির্ভবতি . দ্বে অহোরাত্রে একং
দিনং ভবতি . তস্মিন্নেকস্মিন্দিনে আসত্যলোকান্তমুদযস্থিতিলযা
জাযন্তে . পঞ্চদশদিনানি পক্ষো ভবতি . পক্ষদ্বযং মাসো
ভবতি . মাসদ্বযমৃতুর্ভবতি . ঋতুত্রযমযনং ভবতি .
অযনদ্বযং বত্সরো ভবতি . বত্সরশতং ব্রহ্মমানেন
ব্রহ্মণঃ পরমাযুঃপ্রমাণম্ .তাবত্কালস্তস্য স্থিতিরুচ্যতে .
স্থিত্যন্তেঽণ্ডবিরাট্পুরুষঃ স্বাংশং হিরণ্যগর্ভমভ্যেতি .
হিরণ্যগর্ভস্য কারণং পরমাত্মানমণ্ডপরিপালকনারাযণমভ্যেতি .
পুনর্বত্সরশতং তস্য প্রলযো ভবতি . তদা জীবাঃ সর্বে
প্রকৃতৌ প্রলীযন্তে . প্রলযং সর্বশূন্যং ভবতি . তস্য
ব্রহ্মণঃ স্থিতিপ্রলযাবাদিনারাযণস্যাংশেনাবতীর্ণ-
স্যাণ্ডপরিপালকস্য মহাবিষ্ণোরহোরাত্রিসংজ্ঞকৌ .
তে অহোরাত্রে একং দিনং ভবতি . এবং দিনপক্ষমাস-
সংবত্সরাদিভেদাচ্চ তদীযমানেন শতকোটিবত্সরকালস্তস্য
স্থিতিরুচ্যতে . স্থিত্যন্তে স্বাংশং মহাবিরাট্পুরুষমভ্যেতি .
ততঃ সাবরণং ব্রহ্মাণ্ডং বিনাশমেতি . ব্রহ্মাণ্ডাবরণং
বিনশ্যতি তদ্ধি বিষ্ণোঃ স্বরূপম্ . তস্য তাবত্প্রলযো ভবতি .
প্রলযে সর্বশূন্যং ভবতি . অণ্ডপরিপালকমহাবিষ্ণোঃ
স্থিতিপ্রলযাবাদিবিরাট্পুরুষস্যাহোরাত্রিসংজ্ঞকৌ তে অহোরাত্রে
একং দিনং ভবতি . এবং দিনপক্ষমাসসংবত্সরাদিভেদাচ্চ
তদীযমানেন শতকোটিবত্সরকালস্তস্য স্থিতিরুচ্যতে . স্থিত্যন্তে
আদিবিরাট্পুরুষঃ স্বাংশমাযোপাধিকনারাযণমভ্যেতি .
তস্য বিরাট্পুরুষস্য যাবত্স্থিতিকালস্তাবত্প্রলযো ভবতি . প্রলযে
সর্বশূন্যং ভবতি . বিরাট্স্থিতিপ্রলযৌ মূলাবিদ্যাণ্ডপরিপালক-
স্যাদিনারাযণস্যাহোরাত্রিসংজ্ঞকৌ . তে অহোরাত্রে একং দিনং ভবতি .
এবং দিনপক্ষমাসসংবত্সরাদিভেদাচ্চ তদীযমানেন
শতকোটিবত্সরকালস্তস্য স্থিতিরুচ্যতে . স্থিত্যন্তে ত্রিপাদ্বিভূতিনারাযণ
স্যেচ্ছাবশান্নিমেষো জাযতে . তস্মান্মূলাবিদ্যাণ্ডস্য
সাবরণস্য বিলযো ভবতি . ততঃ সবিলাসমূলবিদ্যা
সর্বকার্যোপাধিসমন্বিতা সদসদ্বিলক্ষণানির্বাচ্যা
লক্ষণশূন্যাবির্ভাবতিরোভাবাত্মিকানাদ্যখিলকারণ-
কারণানন্তমহামাযাবিশেষণবিশেষিতা
পরমসূক্ষ্মমূলকারণমব্যক্তং বিশতি . অব্যক্তং
বিশেদ্ব্রহ্মণি নিরিন্ধনো বৈশ্বানরো যথা . তস্মান্মাযোপাধিক
আদিনারাযণস্তথা স্বস্বরূপং ভজতি . সর্বে জীবাশ্চ
স্বস্বরূপং ভজন্তে . যথা জপাকুসুমসান্নিধ্যাদ্রক্তস্ফটিক-
প্রতীতিস্তদভাবে শুদ্ধস্ফটিকপ্রতীতিঃ . ব্রহ্মণোপি
মাযোপাধিবশাত্সগুণপরিচ্ছিন্নাদিপ্রতীতিরুপাধি-
বিলযান্নির্গুণনিরবযবাদিপ্রতীতিরিত্যুপনিষত্ ..
ইত্যাথর্বণমহানারাযণোপনিষদি
মূলাবিদ্যাপ্রলযস্বরূপণং নাম তৃতীযোঽধ্যাযঃ .. ৩..
ॐ ততস্তস্মান্নির্বিশেষমতিনির্মলং ভবতি .
অবিদ্যাপাদমতিশুদ্ধং ভবতি . শুদ্ধবোধানন্দ-
লক্ষণকৈবল্যং ভবতি . ব্রহ্মণঃ পাদচতুষ্টযং
নির্বিশেষং ভবতি . অখণ্ডলক্ষণাখণ্ডপরিপূর্ণ-
সচ্চিদানন্দস্বপ্রকাশং ভবতি . অদ্বিতীযমনীশ্বরং
ভবতি . অখিলকার্যকারণস্বরূপমখণ্ডচিদ্ঘনানন্দ-
স্বরূপমতিদিব্যমঙ্গলাকারং নিরতিশযানন্দতেজোরাশি-
বিশেষং সর্বপরিপূর্ণানন্তচিন্মযস্তগ্ভাকারং
শুদ্ধবোধানন্দবিশেষাকারমনন্তচিদ্বিলাসবিভূতি-
সমষ্ট্যাকারমদ্ভুতানন্দাশ্চর্যবিভূতিবিশেষাকারমনন্ত-
পরিপূর্ণানন্দদিব্যসৌদামিনীনিচযাকারম্ .
এবমাকারমদ্বিতীযাখণ্ডানন্দব্রহ্মস্বরূপং নিরূপিতম্ .
অথ ছাত্রো বদতি .
ভগবন্পাদভেদাদিকং কথং কথমদ্বৈতস্বরূপমিতি
নিরূপিতম্ . দেশিকঃ পরিহরতি . বিরোধো ন বিদ্যতে ব্রহ্মাদ্বিতীযমেব
সত্যম্ . তথৈবোক্তং চ . ব্রহ্মভেদো ন কথিতো ব্রহ্মব্যতিরিক্তং
ন কিংচিদস্তি . পাদভেদাদিকথনং তু ব্রহ্মস্বরূপকথনমেব .
তদেবোচ্যতে . পাদচতুষ্টযাত্মকং ব্রহ্ম তত্রৈকমবিদ্যাপাদম্ .
পাদত্রযমমৃতং ভবতি . শাখান্তরোপনিষত্স্বরূপমেব নিরূপিতম্ .
তমসস্তু পরং জ্যোতিঃ পরমানন্দলক্ষণম্ . পাদত্রযাত্মকং ব্রহ্ম
কৈবল্যং শাশ্বতং পরমিতি . বেদাহমেতং পুরুষং মহান্তমাদিত্যবর্ণং
তমসঃ পরস্তাত্ . তমেবংবিদ্বানমৃতৈহ ভবতি . নান্যঃ পন্থা
বিদ্যতেঽযনায . সর্বেষাং জ্যোতিষাং জ্যোতিস্তমসঃ পরমুচ্যতে .
সর্বস্য ধাতারমচিন্ত্যরূপমাদিত্যবর্ণং পরংজ্যোতিস্তমস উপরি বিভাতি .
যদেকমব্যক্তমনন্তরূপং বিশ্বং পুরাণং তমসঃ পরস্তাত্ .
তদেবর্তং তদু সত্যমাহুস্তদেব সত্যং তদেব ব্রহ্ম পরমং বিশুদ্ধং
কথ্যতে . তমশ্শব্দেনাবিদ্যা . পাদোঽস্য বিশ্বা ভূতানি .
ত্রিপাদস্যামৃতং দিবি . ত্রিপাদূর্ধ্ব উদৈত্পুরুষঃ .
পাদোঽস্যেহাভবত্পুনঃ . ততো বিশ্বঙ্ ব্যক্রামত্ .
সাশনাঽনশনে অভি .
বিদ্যানন্দতুরীযাখ্যপাদত্রযমমৃতং ভবতি .
অবশিষ্টমবিদ্যাশ্রযমিতি .
আত্মারামস্যানাদিনারাযণস্য কীদৃশাবুন্মেষনিমেষৌ তযোঃ
স্বরূপং কথমিতি . গুরুর্বদতি . পরাগ্দৃষ্টিরুন্মেষঃ .
প্রত্যগ্দৃষ্টির্নিমেষঃ . প্রত্যগ্দৃষ্ট্যা স্বস্বরূপচিন্তনমেব
নিমেষঃ . পরাগ্দৃষ্ট্যা স্বস্বরূপচিন্তনমেবোন্মেষঃ .
যাবদুন্মেষকালস্তাবন্নিমেষকালো ভবতি . অবিদ্যাযাঃ
স্থিতিরুন্মেষকালে নিমেষকালে তস্যাঃ প্রলযো ভবতি . যথা
উন্মেষো জাযতে তথা চিরন্তনাতিসূক্ষ্মবাসনাবলাত্পুনরবিদ্যাযা
উদযো ভবতি . যথাপূর্বমবিদ্যাকার্যাণি জাযন্তে .
কার্যকারণোপাধিভেদাজ্জীবেশ্বরভেদোঽপি দৃশ্যতে .
কার্যোপাধিরযং জীবঃ কারণোপাধিরীশ্বরঃ . ঈশ্বরস্য মহামাযা
তদাজ্ঞাবশবর্তিনী . তত্সংকল্পানুসারিণী বিবিধানন্তমহামাযা-
শক্তিসংসবেতিনানন্তমহামাযা জালজননমন্দিরা মহাবিষ্ণোঃ
ক্রীডাশরীররূপিণী ব্রহ্মাদীনামগোচরা . এতাং মহামাযাং
তরন্ত্যেব যে বিষ্ণুমেব ভজন্তি নান্যে তরন্তি কদাচন .
বিবিধোপযৈরপি অবিদ্যাকার্যাণ্যন্তঃকরণান্যতীত্য কালাননু তানি
জাযন্তে . ব্রহ্মচৈতন্যং তেষু প্রতিবিম্বিতং ভবতি . প্রতিবিম্বা এব
জীবা ইতি কথ্যন্তে . অন্তঃকরণোপাধিকাঃ সর্বে জীবা ইত্যেবং বদন্তি .
মহাভূতোত্থসূক্ষ্মাঙ্গোপাধিকাঃ সর্বে জীবা ইত্যেকে বদন্তি .
বুদ্ধিপ্রতিবিম্বিতচৈতন্যং জীবা ইত্যপরে মন্যন্তে .
এতেষামুপাধীনামত্যন্তভেদো ন বিদ্যতে . সর্বপরিপূর্ণো
নারাযণস্ত্বনযা নিজযা ক্রীডতি স্বেচ্ছযা সদা .
তদ্বদবিদ্যমানফল্গুবিষযসুখাশযাঃ সর্বে জীবাঃ
প্রভাবন্ত্যসারসংসারচক্রে . এবমনাদিপরম্পরা
বর্ততেঽনাদিসংসারবিপরীতভ্রমাদিত্যুপনিষত্ ..
ইত্যথর্বণশাখাযাং ত্রিপাদ্বিভূতিমহানারাযণোপনিষদি
মহামাযাতীতাখণ্ডাদ্বৈতপরমানন্দলক্ষণপরব্রহ্মণঃ
পরমতত্ত্বস্বরূপনিরূপণং নাম চতুর্থোঽধ্যাযঃ .. ৪..
পূর্বকাণ্ডঃ সমাপ্তঃ ..
অথ শিষ্যো বদতি গুরুং ভগবন্তং নমস্কৃত্য
ভগবন্ সর্বাত্মনা নষ্টাযা অবিদ্যাযাঃ
পুনরুদযঃ কথম্ . সত্যমেবেতি গুরুরিতি হোবাচ .
প্রাবৃট্কালপ্রারম্ভে যথা মণ্ডূকাদীনাং
প্রাদুর্ভাবস্তদ্বত্সর্বাত্মনা নষ্টাযা অবিদ্যাযা
উন্মেষকালে পুনরুদযো ভবতি . ভগবন্ কথং
জীবানামনাদিসংসারভ্রমঃ . তন্নিবৃত্তির্বা কথমিতি .
কথং মোক্ষমার্গস্বরূপং চ . মোক্ষসাধনং
কথমিতি . কো বা মোক্ষোপাযঃ . কীদৃশং মোক্ষস্বরূপম্ .
কা বা সাযুজ্যমুক্তিঃ . এতত্সর্বং তত্ত্বতঃ কথনীযমিতি .
অত্যাদরপূর্বকমতিহর্ষেণ শিষ্যং বহূকৃত্য
গুরুর্বদতি শ্রূযতাং সাবধানেন .
কুত্সিতানন্তজন্মাভ্যস্তাত্যন্তোত্কৃষ্ট-
বিবিধবিচিত্রানন্তদুষ্কর্মবাসনাজালবিশেষৈর্দেহাত্মবিবেকো
ন জাযতে . তস্মাদেব দৃঢতরদেহাত্মভ্রমো ভবতি .
অহমজ্ঞঃ কিংচিজ্জ্ঞোঽহমহং জীবোঽহমত্যন্তদুঃখাকারো.
অহমনাদিসংসারীতি ভ্রমবাসনাবলাত্সংসার এব
প্রবৃত্তিস্তন্নিবৃত্ত্যুপাযঃ কদাপি ন বিদ্যতে .
মিথ্যাভূতান্স্বপ্নতুল্যান্বিষযভোগাননুভূয
বিবিধানসংখ্যানতিদুর্লভান্মনোরথাননবরতমাশাস্যমানঃ
অতৃপ্তঃ সদা পরিধাবতি . বিবিধবিচিত্রস্থূলসূক্ষ্মোত্কৃষ্ট-
নিকৃষ্টানন্তদেহান্পরিগৃহ্য তত্তদেহবিহিতবিবিধবিচিত্রাঽনেক-
শুভাশুভপ্রারব্ধকর্মাণ্যনুভূয তত্তত্কর্মফল-
বাসনাজালবাসিতান্তঃকরণানাং পুনঃপুনস্তত্তত্কর্মফল-
বিষযপ্রবৃত্তিরেব জাযতে . সংসারনিবৃত্তিমার্গপ্রবৃত্তিঃ
কদাপি ন জাযতে . তস্মাদনিষ্টমেবেষ্টমিব ভাতি .
ইষ্টমেবাঽনিষ্টমিব ভাত্যনাদিসংসারবিপরীতভ্রমাত্ .
তস্মাত্সর্বেষাং জীবানামিষ্টবিষযে বুদ্ধিঃ
সুখবুদ্ধির্দুঃখবুদ্ধিশ্চ ভবতি . পরমার্থতস্ত্ববাধিত-
ব্রহ্মসুখবিষযে প্রবৃত্তিরেব ন জাযতে . তত্স্বরূপজ্ঞানাভাবাত্ .
তত্কিমিতি ন বিদ্যতে . কথং বন্ধঃ কথং মোক্ষ ইতি বিচারাভাবাচ্চ .
তত্কথমিতি . অজ্ঞানপ্রাবল্যাত্ . কস্মাদজ্ঞানপ্রাবল্যমিতি .
ভক্তিজ্ঞানবৈরাগ্যবাসনাভাবাচ্চ . তদভাবঃ কথমিতি .
অত্যন্তান্তঃকরণমলিনবিশেষাত্ . অতঃ সংসারতরণোপাযঃ
কথমিতি . দেশিকস্তমেব কথযতি . সকলবেদশাস্ত্রসিদ্ধান্তরহস্য-
জন্মাভ্যস্তাত্যন্তোত্কৃষ্টসুকৃতপরিপাকবশাত্সদ্ভিঃ
সঙ্গো জাযতে . তস্মাদ্বিধিনিষেধবিবেকো ভবতি . ততঃ
সদাচারপ্রবৃত্তির্জাযতে . সদাচারাদখিলদুরিতক্ষযো
ভবতি . তস্মাদন্তঃকরণমতিবিমলং ভবতি .
ততঃ সদ্গুরুকটাক্ষমন্তঃকরণমাকাঙ্ক্ষতি .
তস্মাত্সদ্গুরুকটাক্ষলেশবিশেষেণ সর্বসিদ্ধযঃ সিদ্ধ্যন্তি .
সর্ববন্ধাঃ প্রবিনশ্যন্তি . শ্রেযোবিঘ্নাঃ সর্বে প্রলযং যান্তি .
সর্বাণি শ্রেযাংসি স্বযমেবাযান্তি .
যথা জাত্যন্ধস্য রূপজ্ঞানং ন বিদ্যতে
তথা গুরূপদেশেন বিনা কল্পকোটিভিস্তত্ত্বজ্ঞানং
ন বিদ্যতে . তস্মাত্সদ্গুরুকটাক্ষলেশবিশেষেণাচিরাদেব
তত্ত্বজ্ঞানং ভবতি . যদা সদ্গুরুকটাক্ষো ভবতি তদা
ভগবত্কথাশ্রবণধ্যানাদৌ শ্রদ্ধা জাযতে .
তস্মাদ্ধৃদযস্থিতানাদিদুর্বাসনাগ্রন্থিবিনাশো ভবতি .
ততো হৃদযস্থিতাঃ কামাঃ সর্বে বিনশ্যন্তি .
তস্মাদ্ধৃদযপুণ্ডরীককর্ণিকাযাং পরমাত্মাবির্ভাবো
ভবতি . ততো দৃঢতরা বৈষ্ণবী ভক্তির্জাযতে . ততো
বৈরাগ্যমুদেতি . বৈরাগ্যাদ্বুদ্ধিবিজ্ঞানাবির্ভাবো ভবতি .
অভ্যাসাত্তজ্জ্ঞানং ক্রমেণ পরিপক্বং ভবতি .
পক্ববিজ্ঞানাজ্জীবন্মুক্তো ভবতি . ততঃ শুভাশুভকর্মাণি
সর্বাণি সবাসনানি নশ্যন্তি . ততো দৃঢতরশুদ্ধসাত্ত্বিক-
বাসনযা ভক্ত্যতিশযো ভবতি . ভক্ত্যতিশযেন নারাযণঃ
সর্বমযঃ সর্বাবস্থাসু বিভাতি . সর্বাণি জগন্তি
নারাযণমযানি প্রবিভান্তি . নারাযণব্যতিরিক্তং ন কিংচিদস্তি .
ইত্যেতদ্বুদ্ধ্বা বিহরত্যুপাসকঃ সর্বত্র . নিরন্তরসমাধিপরম্পরাভি-
র্জগদীশ্বরাকারাঃ সর্বত্র সর্বাবস্থাসু প্রবিভান্তি . অস্য
মহাপুরুষস্য ক্বচিত্ক্বচিদীশ্বরসাক্ষাত্কারো ভবতি .
অস্য দেহত্যাগেচ্ছা যদা ভবতি তদা বৈকুণ্ঠপার্ষদাঃ সর্বে
সমাযান্তি . ততো ভগবদ্ধ্যানপূর্বকং হৃদযকমলে
ব্যবস্থিতমাত্মানং সংচিত্য সম্যগুপচারৈরভ্যর্চ্য
হংসমন্ত্রমুচ্চরন্ত্সর্বাণি দ্বারাণি সংযম্য সম্যঙ্মনো
নিরুধ্য চোর্ধ্বগেন বাযুনা সহ প্রণবেন প্রণবানুসন্ধানপূর্বকং
শনৈঃ শনৈরাব্রহ্মরন্ধ্রাদ্বিনির্গত্য সোঽহমিতি মন্ত্রেণ
দ্বাদশান্তস্থিতজ্ঞানাত্মানমেকীকৃত্য পঞ্চোপচারৈরভ্যর্চ্য
পুনঃ সোঽহমিতি মন্ত্রেণ ষোডশান্তস্থিতজ্ঞানাত্মানমেকীকৃত্য
সম্যগুপচারৈরভ্যর্চ্য প্রাকৃতপূর্বদেহং পরিত্যজ্য
পুনঃকল্পিতমন্ত্রমযশুদ্ধব্রহ্মতেজোমযনিরতিশযানন্দময-
মহাবিষ্ণূসারূপ্যবিগ্রহং পরিগৃহ্য সূর্যমণ্ডলান্তর্গতানন্ত-
দিব্যচরণারবিন্দাঙ্গুষ্ঠনির্গতনিরতিশযানন্দমযাপরনদী-
প্রবাহমাকৃষ্য ভাবনযাত্র স্নাত্বা বস্ত্রাভরণাদ্যুপচারৈ-
রাত্মপূজাং বিধায সাক্ষান্নারাযণো ভূত্বা ততো
গুরুনমস্কারপূর্বকং প্রণবগরুডং ধ্যাত্বা ধ্যানেনাবির্ভূত-
মহাপ্রণবগরুডং পঞ্চোপচারৈরারাধ্য গুর্বনুজ্ঞযা
প্রদক্ষিণনমস্কারপূর্বকং প্রণবগরুডমারুহ্য মহাবিষ্ণোঃ
সমস্তাসাধারণচিহ্নচিহ্নিতো মহাবিষ্ণোঃ
সমস্তাসাধারণদিব্যভূষণৈর্ভূষিতঃ সুদর্শনপুরুষং
পুরস্কৃত্য বিষ্বক্সেনপরিপালিতো বৈকুণ্ঠপার্ষদৈঃ পরিবেষ্টিতো
নভোমার্গমাবিশ্য পার্শ্বদ্বযস্থিতানেকপুণ্যলোকানতিক্রম্য
তত্রত্যৈঃ পুণ্যপুরুষৈরভিপূজিতঃ সত্যলোকমাবিশ্য
ব্রহ্মাণমভ্যর্চ্য ব্রহ্মণা চ সত্যলোকবাসিভিঃ
সর্বৈরভিপূজিতঃ শৈবমীশানকৈবল্যমাসাদ্য শিবং ধ্যাত্বা
শিবমভ্যর্চ্য শিবগণৈঃ সর্বৈঃ শিবেন চাভিপূজিতো
মহর্ষিমণ্ডলান্যতিক্রম্য সূর্যসোমমণ্ডলে ভিত্ত্বা
কীলকনারাযণং ধ্যাত্বা ধ্রুবমণ্ডলস্য দর্শনং কৃত্বা
ভগবন্তং ধ্রুবমভিপূজ্য ততঃ শিংশুমারচক্রং
বিভিদ্য শিংশুমারপ্রজাপতিমভ্যর্চ্য
চক্রমধ্যগতং সর্বাধারং সনাতনং
মহাবিষ্ণুমারাধ্য তেন পূজিতস্তত
উপর্যুপরি গত্বা পরমানন্দং প্রাপ্য প্রকাশতে .
ততো বৈকুণ্ঠবাসিনঃ সর্বে সমাযান্তি
তান্ত্সর্বান্সুসংপূজ্য তৈঃ সর্বৈরভিপূজিত-
শ্চোপর্যুপরি গত্বা বিরজানদীং প্রাপ্য
তত্র স্নাত্বা ভগবদ্ধ্যানপূর্বকং পুনর্নিমজ্জ্য
তত্রাপঞ্চীকৃতভূতোত্থং সূক্ষ্মাঙ্গভোগ-
সাধনং সূক্ষ্মশরীরমুত্সৃজ্য কেবলমন্ত্রমযদিব্যতেজোময-
নিরতিশযানন্দমযমহাবিষ্ণুসারূপ্যবিগ্রহং
পরিগৃহ্য তত উন্মজ্যাত্মপূজাং বিধায
প্রদক্ষিণনমস্কারপূর্বকং ব্রহ্মমযবৈকুণ্ঠমাবিশ্য
তত্রত্যান্বিশেষেণ সংপূজ্য তন্মধ্যে চ
ব্রহ্মানন্দমযানন্তপ্রাকারপ্রাসাদতোরণ-
বিমানোপবনাবলিভির্জ্বলচ্ছিখরৈরুপলক্ষিতো
নিরুপমনিত্যনিরবদ্যনিরতিশযনিরবধিক-
ব্রহ্মানন্দাচলো বিরাজতে . তদুপরি জ্বলতি
নিরতিশযানন্দদিব্যতেজোরাশিঃ . তদভ্যন্তরসংস্থানে
শুদ্ধবোধানন্দলক্ষণং বিভাতি . তদন্তরালে চিন্মযবেদিকা
আনন্দবেদিকানন্দবনবিভূষিতা . তদভ্যন্তরে
অমিততেজোরাশিস্তদুপরিজ্বলতি . পরমমঙ্গলাসনং
বিরাজতে . তত্পদ্মকর্ণিকাযাং শুদ্ধশেষভোগাসনং
বিরাজতে . তস্যোপরি সমাসীনমানন্দপরিপালকমাদিনারাযণং
ধ্যাত্বা তমীশ্বরং বিবিধোপচারৈরারাধ্য
প্রদক্ষিণনমস্কারান্বিধায তদনুজ্ঞাতশ্চোপর্যুপরি গত্বা
পঞ্চবৈকুণ্ঠানতীত্যাণ্ডবিরাট্কৈবল্যং প্রাপ্য তং
সমারাধোপাসকঃ পরমানন্দং প্রাপেত্যুপনিষত্ ..
ইত্যাথর্বণমহানারাযণোপনিষদি সংসারতরণোপাযকথনদ্বারা
পরমমোক্ষমার্গস্বরূপনিরূপণং নাম পঞ্চমোঽধ্যাযঃ .. .. ৫..
যত উপাসকঃ পরমানন্দং প্রাপ সাবরণং
ব্রহ্মাণ্ডং চ ভিত্ত্বা পরিতঃ সমবলোক্য
ব্রহ্মাণ্ডস্বরূপং নিরীক্ষ্য পরমার্থতস্তত্স্বরূপং
ব্রহ্মজ্ঞানেনাববুধ্য সমস্তবেদশাস্ত্রেতিহাসপুরাণানি
সমস্তবিদ্যাজালানি ব্রহ্মাদযঃ সুরাঃ সর্বে সমস্তাঃ
পরমর্ষযশ্চাণ্ডাভ্যন্তরপ্রপঞ্চৈকদেশমেব
বর্ণযন্তি . অণ্ডস্বরূপং ন জানন্তি . ব্রহ্মাণ্ডাদ্বহিঃ
প্রপঞ্চজ্ঞানং ন জানত্যেব . কুতোঽণ্ডান্তরান্তরর্বহিঃ
প্রপঞ্চজ্ঞানং দূরতো মোক্ষপ্রপঞ্চজ্ঞানমবিদ্যা
চেতি কথং ব্রহ্মাণ্ডস্বরূপমিতি . কুক্কুটাণ্ডাকারং
মহদাদিসমষ্ট্যাকারণমণ্ডং তপনীযমযং
তপ্তজাম্বূনদপ্রভমুদ্যত্কোটিদিবাকরাভং
চতুর্বিধসৃষ্ট্যুপলক্ষিতং মহাভূতৈঃ
পঞ্চভিরাবৃতং মহদহঙ্কৃতিতমোভিশ্চ
মূলপ্রকৃত্যা পরিবেষ্টিতম্ . অণ্ডভীতিবিশালং
সপাদকোটিযোজনপ্রমাণম্ . একৈকাবরণং তথৈব .
অণ্ডপ্রমাণং পরিতোঽযুতদ্বযকোটিযোজনপ্রমাণং
মহামণ্ডূকাদ্যনন্তশক্তিভিরধিষ্ঠিতং
নারাযণক্রীডাকন্তুকং পরমাণুবদ্বিষ্ণুলোকসুসংলগ্ন-
মদৃষ্টশ্রুতবিবিধবিচিত্রানন্তবিশেষৈরুপলক্ষিতম্ .
অস্য ব্রহ্মাণ্ডস্য সমন্ততঃ স্থিতান্যেতাদৃশান্যনন্ত-
কোটিব্রহ্মাণ্ডানি সাবরণানি জ্বলন্তি .
চতুর্মুখপঞ্চমুখষণ্মুখসপ্তমুখ-
অষ্টমুখাদিসংখ্যাক্রমেণ সহস্রাবধিমুখা-
ন্তৈর্নারাযণাংশৈ রজোগুণপ্রধানৈরেকৈকসৃষ্টি-
কর্তৃভিরধিষ্ঠিতানি বিষ্ণুমহেশ্বরাখ্যৈর্নারাযণাংশৈঃ
সত্ত্বতমোগুণপ্রধানৈরেকৈকস্থিতিসংহারকর্তৃভিরধিষ্ঠিতানি
মহাজলৌঘমত্স্যবুদ্বুদানন্তসঙ্ঘবদ্ভ্রমন্তি .
ক্রীডাসক্তজালককরতলামলকবৃন্দবন্মহাবিষ্ণোঃ
করতলে বিলসন্ত্যনন্তকোটিব্রহ্মাণ্ডানি . জলযন্ত্রস্থঘটমালিকা-
জালবন্মহাবিষ্ণোরেকৈকরোমকূপান্তরেষ্বনন্তকোটিব্রহ্মাণ্ডানি
সাবরণানি ভ্রমন্তি . সমস্তব্রহ্মাণ্ডান্তর্বহিঃ প্রপঞ্চরহস্যং
ব্রহ্মজ্ঞানেনাববুধ্য বিবিধবিচিত্রানন্তপরমবিভূতিসমষ্টি-
বিশেষন্ত্সমবলোক্যাত্যাশ্চর্যামৃতসাগরে নিমজ্জ্য
নিরতিশযানন্দপারাবারো ভূত্বা সমস্তব্রহ্মাণ্ডজালানি
সমুল্লঙ্ঘ্যামিতাপরিচ্ছিন্নানন্ততমঃ সাগরমৃত্তীর্য
মূলাবিদ্যাপুরং দৃষ্ট্বা বিবিধবিচিত্রানন্তমহামাযা-
বিশেষৈঃ পরিবেষ্টিতামনন্তমহামাযাশক্তিসমষ্ট্যাকারামনন্তদিব্য-
তেজোজ্বালাজালৈরলঙ্কৃতামনন্তমহামাযাবিলসানাং
পরমাধিষ্ঠানবিশেষাকারাং শশ্বদমিতানন্দাচলোপরি
বিহারিণীং মূলপ্রকৃতিজননীমবিদ্যালক্ষ্মীমেবং ধ্যাত্বা
বিবিধোপচারৈরারাধ্য সমস্তব্রহ্মাণ্ডসমষ্টিজননীং
বৈষ্ণবীং মহামাযাং নমস্কৃত্য তযা চানুজ্ঞাতশ্চোপর্যুপরি
গত্বা মহাবিরাট্পদং প্রাপ ..
মহাবিরাট্স্বরূপং কথমিতি . সমস্তাবিদ্যাপাদকো
বিরাট্ . বিশ্বতশ্চক্ষুরুত বিশ্বতোমুখো বিশ্বতোহস্ত
উত বিশ্বতস্পাত্ . সংবাহুভ্যাং নমতি সংপতত্রৈ-
র্দ্যাবাপৃথিবী জনযন্দেব একঃ . ন সন্দৃশে তিষ্ঠতি
রূপমস্য ন চক্ষুষা পশ্যতি কশ্চনৈনম্ .
হৃদা মনীষা মনসাভিক্লৃপ্তো য এনং বিদুরমৃতাস্তে
ভবন্তি . মনোবাচামগোচরমাদিবিরাট্স্বরূপং
ধ্যাত্বা বিবিধোপচারৈরারাধ্য তদনুজ্ঞাতশ্চোপর্যুপরি
গত্বা বিবিধবিচিত্রানন্তমূলাবিদ্যাবিলাসানবলোক্যোপাসকঃ
পরমকৌতুকং প্রাপ . অখণ্ডপরিপূর্ণপরমানন্দলক্ষণ-
পরব্রহ্মণঃ সমস্তস্বরূপবিরোধকারিণ্যপরিচ্ছিন্ন-
তিরস্করিণ্যাকারা বৈষ্ণবী মহাযোগমাযা মূর্তিমদ্ভিরনন্ত-
মহামাযাজালবিশেষৈঃ পরিষেবিতা তস্যাঃ পুরমতিকৌতুক-
মত্যাশ্চর্যসাগরানন্দলক্ষণমমৃতং ভবতি .
অবিদ্যাসাগরপ্রতিবিম্বিতনিত্যবৈকুণ্ঠপ্রতিবৈকুণ্ঠমিব বিভাতি .
উপাসকস্তত্পুরং প্রাপ্য যোগলক্ষ্মীমংগমাযাং ধ্যাত্বা
বিবিধোপচারৈরারাধ্য তযা সংপূজিতশ্চানুজ্ঞাত-
শ্চোপর্যুপরি গত্বানন্তমাযাবিলাসানবলোক্যোপাসকঃ
পরমকৌতুকং প্রাপ .. তত উপরি পাদবিভূতিবৈকুণ্ঠপুর-
মাভাতি . অত্যাশ্চর্যানন্তবিভূতিসমষ্ট্যাকার-
মানন্দরসপ্রবাহৈরলঙ্কৃতমভিতস্তরঙ্গিণ্যাঃ
প্রবাহৈরতিমঙ্গলং ব্রহ্মতেজোবিশেষাকারৈরনন্ত-
ব্রহ্মবনৈরভিতস্ততমনন্তনিত্যমুক্তৈরভিব্যাপ্তমনন্ত-
চিন্মযপ্রাসাদজালসংকুলমনাদিপাদবিভূতিবৈকুণ্ঠ-
মেবমাভাতি . তন্মধ্যে চ চিদানন্দাচলো বিভাতি ..
তদুপরি জ্বলতি নিরতিশযানন্দদিব্যতেজোরাশিঃ .
তদভ্যন্তরে পরমানন্দবিমানং বিভাতি .
তদভ্যন্তরসংস্থানে চিন্মযাসনং বিরাজতে .
তত্পদ্মকর্ণিকাযাং নিরতিশযদিব্যতেজোরাশ্যন্তর-
সমাসীনমাদিনারাযণং ধ্যাত্বা বিবিধোপচারৈস্তং
সমারাধ্য তেনাভিপূজিতস্তদনুজ্ঞাতশ্চোপর্যুপরিগত্বা
সাবরণমবিদ্যাণ্ডং চ ভিত্ত্বা বিদ্যাপাদমুল্লঙ্ঘ্য
বিদ্যাবিদ্যযোঃ সন্ধৌ বিশ্বক্সেনবৈকুণ্ঠপুরমাভাতি ..
অনন্তদিব্যতেজোজ্বালাজালৈরভিতোঽনীকং প্রজ্বলন্তমনন্ত-
বোধানন্তবোধানন্দব্যূহৈরভিতস্ততং শুদ্ধবোধ-
বিমানাবলিভির্বিরাজিতমনন্তানন্দপর্বতৈঃ পরমকৌতুক-
মাভাতি . তন্মধ্যে চ কল্যাণাচলোপরি শুদ্ধানন্দ-
বিমানং বিভাতি . তদভ্যন্তরে দিব্যমঙ্গলাসনং বিরাজতে .
তত্পদ্মকর্ণিকাযাং ব্রহ্মতেজোরাশ্যভ্যন্তরসমাসীনং
ভগবদনন্তবিভূতিবিধিনিষেধপরিপালকং সর্বপ্রবৃত্তি-
সর্বহেতুনিমিত্তিকং নিরতিশযলক্ষণমহাবিষ্ণূস্বরূপ-
মখিলাপবর্গপরিপালকমমিতবিক্রমমেবংবিধং বিশ্বক্সেনং
ধ্যাত্বা প্রদক্ষিণনমস্কারান্বিধায বিবিধোপচারৈ-
রারাধ্য তদনুজ্ঞাতশ্চোপর্যুপরি গত্বা বিদ্যাবিভূতিং প্রাপ্য
বিদ্যামযানন্তবৈকুণ্ঠান্পরিতোঽবস্থিতান্ব্রহ্মতেজোমযা-
নবলোক্যোপাসকঃ পরমানন্দং প্রাপ ..
বিদ্যামযাননন্তসমুদ্রানতিক্রম্য ব্রহ্মবিদ্যা-
তরঙ্গিণীমাসাদ্য তত্র স্নাত্বা ভগবদ্ধ্যানপূর্বকং
পুনর্নিমজ্জ্য মন্ত্রমযশরীরমুত্সৃজ্য বিদ্যানন্দ-
মযামৃতদিব্যশরীরং পরিগৃহ্য নারাযণসারূপ্যং
প্রাপ্যাত্মপূজাং বিধায ব্রহ্মমযবৈকুণ্ঠবাসিভিঃ
সর্বৈর্নিত্যমুক্তৈঃ সুপূজিতস্ততো ব্রহ্মবিদ্যাপ্রবাহৈরানন্দ-
রসনির্ভরৈঃ ক্রীডানন্তপর্বতৈরনন্তৈরভিব্যাপ্তং
ব্রহ্মবিদ্যামহৈঃ সহস্রপ্রাকারৈরানন্দামৃতমযৈ-
র্দিব্যগন্ধস্বভাবৈশ্চিন্মযৈরনন্তব্রহ্মবনৈরতিশোভিত-
মুপাসকস্ত্বেবংবিধং ব্রহ্মবিদ্যাবৈকুণ্ঠমাবিশ্য
তদভ্যন্তরস্থিতাত্যন্তোন্নতবোধানন্দপ্রাসাদাগ্রস্থিত-
প্রণববিমানোপরিস্থিতামপারব্রহ্মবিদ্যাসাম্রাজ্যাধিদেবতা-
মমোঘনিজমন্দকটাক্ষেণানাদিমূলাবিদ্যাপ্রলযকরীমদ্বিতীযা-
মেকামনন্তমোক্ষসাম্রাজ্যক্ষ্মীমেবং ধ্যাত্বা
প্রদক্ষিণনমস্কারান্বিধায বিবিধোপচারৈরারাধ্য
পুষ্পাঞ্জলিং সমর্প্য স্তুত্বা স্তোত্রবিশেষৈস্তযাভিপূজিত-
স্তদনুগতশ্চোপর্যুপরি গত্বা ব্রহ্মবিদ্যাতীরে গত্বা
বোধানন্দমযাননন্তবৈকুণ্ঠানবলোক্য নিরতিশযানন্দং প্রাপ্য
বোধানন্দমযাননন্তসমুদ্রানতিক্রম্য গত্বাগত্বা ব্রহ্মবনেষু
পরমমঙ্গলাচলশ্রোণীষু ততো বোধানন্দবিমানপরম্পরা-
সূপাসকঃ পরমানন্দং প্রাপ ..
ততঃ শ্রীতুলসীবৈকুণ্ঠপুরমাভাতি পরমকল্যাণমনন্ত-
বিভবমমিততেজোরাশ্যাকারমনন্তব্রহ্মতেজোরাশি-
সমষ্ট্যাকারং চিদানন্দমযানেকপ্রাকারবিশেষৈঃ
পরিবেষ্টিতমমিতবোধানন্দাচলোপরিস্থিতং বোধানন্দ-
তরঙ্গিণ্যাঃ প্রবাহৈরতিমঙ্গলং নিরতিশযানন্দৈরনন্ত-
বৃন্দাবনৈরতিশোভিতমখিলপবিত্রাণাং পরমপবিত্রং
চিদ্রূপৈরনন্তনিত্যমুক্তৈরভিব্যাপ্তমানন্দমযানন্ত-
বিমানজলৈরলঙ্কৃতমমিততেজোরাশ্যন্তর্গতদিব্যতেজোরাশি-
বিশেষমুপাসকস্ত্বেবমাকারং তুলসীবৈকুণ্ঠং প্রবিশ্য
তদন্তর্গতদিব্যবিমানোপরিস্থিতাং সর্বপরিপূর্ণস্য মহাবিষ্ণোঃ
সর্বাঙ্গেষু বিহারিণীং নিরতিশযসৌন্দর্যলাবণ্যাধিদেবতাং
বোধানন্দমযৈরনন্তনিত্যপরিজনৈঃ পরিষেবিতাং শ্রীসখীং
তুলসীমেবং লক্ষ্মীং ধ্যাত্বা প্রদক্ষিণনমস্কারান্বিধায
বিবিধোপচারৈরারাধ্য স্তুত্বা স্তোত্রবিশেষৈস্তযাভিপূজিত-
স্তদনুজ্ঞাতশ্চোপর্যুপরিগত্বা পরমানন্দতরঙ্গিণ্যাস্তীরে
গত্বা তত্র পরিতোঽবস্থিতাঞ্ছুদ্ধবোধানন্দমযাননন্ত-
বৈকুণ্ঠানবলোক্য নিরতিশযানন্দং প্রাপ্য তত্রৈত্যৈশ্চিদ্রূপৈঃ
পুরাণপুরুষৈশ্চাভিপূজিতস্ততো গত্বাগত্বা ব্রহ্মবনেষু
দিব্যগন্ধানন্দপুষ্পবৃষ্টিভিঃ সমন্বিতেষু দিব্য-
মঙ্গলালযেষু নিরতিশযানন্দামৃতসাগরেষ্বমিততেজো-
রাশ্যাকারেষু কল্লোলবনসংকুলেষু ততোঽনন্তশুদ্ধবোধ-
বিমানজালসংকুলানন্দাচলশ্রোণীষূপাসকস্তত উপর্যুপরি
গত্বা বিমানপরম্পরাস্বনন্ততেজঃপর্বতরাজিষ্বেবং ক্রমেণ
প্রাপ্য বিদ্যানন্দমযোঃ সন্ধিং তত্রানদতরঙ্গিণ্যাঃ প্রবাহেষু স্নাত্বা
বোধানন্দবনং প্রাপ্য শুদ্ধবোধপরমানন্দানন্দাকারবনং
সন্ততামৃতপুষ্পবৃষ্টিভিঃ পরিবেষ্টিতং
পরমানন্দপ্রবাহৈরভিব্যাপ্তং মূর্তিমদ্ভিঃ
পরমমঙ্গলৈঃ পরমকৌতুকমপরিচ্ছিন্নানন্দ-
সাগরাকারং ক্রীডানন্দপর্বতৈরভিশোভিতং তন্মধ্যে চ
শুদ্ধবোধানন্দবৈকুণ্ঠং যদেব ব্রহ্মবিদ্যাপাদবৈকুণ্ঠং
সহস্রানন্দপ্রাকারৈঃ সমুজ্জ্বলতি .
অনন্তানন্দবিমানজালসংকুলমনন্তবোধসৌধ-
বিশেষৈরভিতোঽনিশং প্রজ্বলন্তং ক্রীডানন্তমণ্ডপ-
বিশেষৈর্বিশেষিতং বোধানন্দমযানন্তপরমচ্ছত্র-
ধ্বজচামরবিতানতোরণৈরলঙ্কৃতং পরমানন্দব্যূহৈ-
র্নিত্যমুক্তৈরভিতস্ততমনন্তদিব্যতেজঃপর্বতসমষ্ট্যাকার-
মপরিচ্ছিন্নানন্তশুদ্ধবোধানন্তমণ্ডলং
বাচামগোচরানন্দব্রহ্মতেজোরাশিমণ্ডলমাখণ্ডলবিশেষং
শুদ্ধানন্দসমষ্টিমণ্ডলবিশেষমখণ্ডচিদ্ঘনানন্দ-
বিশেষমেবং তেজোমণ্ডলবিধং বোধানন্দবৈকুণ্ঠমুপাসকঃ
প্রবিশ্য তত্রত্যৈঃ সর্বৈরভিপূজিতঃ পরমানন্দাচলোপর্যখণ্ড-
বোধবিমানং প্রজ্বলতি . তদভ্যন্তরে চিন্মযাসনং বিরাজতে .
তদুপরি বিভাত্যখণ্ডানন্দতেজোমণ্ডলম্ . তদভ্যন্তরে সমাসীন-
মাদিনারাযণং ধ্যাত্বা প্রদক্ষিণনমস্কারান্বিধায
বিবিধোপচারৈঃ সুসংপূজ্য পুষ্পাঞ্জলিং সমর্প্য স্তুত্বা
স্তোত্রবিশেষৈঃ স্বরূপেণাবস্থিতমুপাসকমবলোক্য তমুপাসক-
মাদিনারাযণঃ স্বসিংহাসনে সুসংস্থাপ্য তদ্বৈকুণ্ঠবাসিভিঃ
সর্বৈঃ সমন্বিতঃ সমস্তমোক্ষসাম্রাজ্যপট্টাভিষেকমুদ্দিশ্য
মন্ত্রপূতৈরপাসকমানন্দকলশৈরভিষিচ্য দিব্যমঙ্গল-
মহাবাদ্যপুরঃসরং বিবিধোপচারৈরভ্যর্চ্য মূর্তিমদ্ভিঃ
সর্বৈঃ স্বচিহ্নৈরলঙ্কৃত্য প্রদক্ষিণনমস্কারান্বিধায
ত্বং ব্রহ্মাসি অহং ব্রহ্মাস্মি আবযোরন্তরং ন বিদ্যতে ত্বমেবাহম্
অহমেবত্বম্ ইত্যভিধাযেত্যুক্ত্বাদিনারাযণস্তিরোদধে তদেত্যুপনিষত্ ..
ইত্যাথর্বণমহানারাযণোপনিষদি পরমমোক্ষমার্গস্বরূপনিরূপণং
নাম ষষ্ঠোধ্যাযঃ .. ৬..
অথোপাসকস্তদাজ্ঞযা নিত্যং গরুডমারুহ্য
বৈকুণ্ঠবাসিভিঃ সর্বৈঃ পরিবেষ্টিতো মহাসুদর্শনং
পুরস্কৃত্য বিশ্বক্সেনপরিপালিতশ্চোপর্যুপরি গত্বা
ব্রহ্মানন্দবিভূতিং প্রাপ্য সর্বত্রাবস্থিতাব্রহ্মানন্দ-
মযাননন্তবৈকুণ্ঠানবলোক্য নিরতিশযানন্দসাগরো
ভূত্বাত্মারামানন্দবিভূতিপুরুষাননন্তানবলোক্য
তান্সর্বানুপচারৈঃ সমভ্যর্চ্য তৈঃ সর্বৈরভিপূজিত-
শ্চোপাসকস্তত উপর্যুপরি গত্বা ব্রহ্মানন্দবিভূতিং
প্রাপ্যানন্তদিব্যতেজঃপর্বতৈরলঙ্কৃতান্পরমানন্দ-
লহরীবনশোভিতানসংখ্যাকানানন্দসমুদ্রানতিক্রম্য
বিবিধবিচিত্রানন্তপরমতত্ত্ববিভূতিসমষ্টিবিশেষা-
ন্পরমকৌতুকান্ব্রহ্মানন্দবিভূতিবিশেষনতিক্রম্যোপাসকঃ
পরমকৌতুকং প্রাপ..
ততঃ সুদর্শনবৈকুণ্ঠপুরমাভাতি নিত্যমঙ্গলমনন্তবিভবং
সহস্রানন্দপ্রকারপরিবেষ্টিতমযুতকুক্ষ্যুপলক্ষিত-
মনন্তোত্কটজ্বলদরমণ্ডলং নিরতিশযদিব্যতেজোমণ্ডলং
বৃন্দারকপরমানন্দং শুদ্ধবুদ্ধস্বরূপমনন্তানন্দ-
সৌদামিনীপরমবিলাসং নিরতিশযপরমানন্দপারাবার-
মনন্তৈরানন্দপুরুষৈশ্চিদ্রূপৈরধিষ্ঠিতম্ . তন্মধ্যে চ
সুদর্শনং মহাচক্রম্ . চরণং পবিত্রং বিততং পুরাণং
যেন পূতস্তরতি দুষ্কৃতানি . তেন পবিত্রেণ শুদ্ধেন পূতা
অতিপাপ্মানমরাতিং তরেম . লোকস্য দ্বারমর্চিমত্পবিত্রম্ .
জ্যোতিষ্মদ্ভ্রাজমানং মহস্বত্ . অমৃতস্য ধারা বহুধা
দোহমানম্ . চরণং নো লোকে সুধিতাং দধাতু . অযুতারং
জ্বলন্তমযুতারসমষ্ট্যাকরং নিরতিশযবিক্রমবিলাসমনন্ত-
দিব্যাযুধদিব্যশক্তিসমষ্টিরূপং মহাবিষ্ণোরনর্গলপ্রতাপ-
বিগ্রহমযুতাযুতকোটিযোজনবিশালমনন্তজ্বালজালৈরলঙ্কৃতং
সমস্তদিব্যমঙ্গলনিদানমনন্তদিব্যতীর্থানাং নিজমন্দিরমেবং
সুদর্শনং মহাচক্রং প্রজ্বলতি .
তস্য নাভিমণ্ডলসংস্থানে উপলক্ষ্যতে নিরতিশযানন্দ-
দিব্যতেজোরাশিঃ . তন্মধ্যে চ সহস্রারচক্রং প্রজ্বলতি .
তদখণ্ডদিব্যতেজোমণ্ডলাকারং পরমানন্দসৌদামিনী-
নিচযোজ্জ্বলম্ . তদভ্যন্তরসংস্থানে ষট্শতারচক্রং
প্রজ্বলতি . তস্যামিতপরমতেজঃ পরমবিহারসংস্থানবিশেষং
বিজ্ঞানঘনস্বরূপম্ . তদন্তরালে ত্রিশতারচক্রং বিভাতি .
তচ্চ পরমকল্যাণবিলাসবিশেষমনন্তচিদাদিত্যসমষ্ট্যাকরম্ .
তদভ্যন্তরে শতারচক্রমাভাতি . তচ্চ পরমতেজোমণ্ডল-
বিশেষম্ . তন্মধ্যে ষষ্ট্যরচক্রমাভাতি . তচ্চ
ব্রহ্মতেজঃপরমবিলাসবিশেষম্ . তদভ্যন্তরসংস্থানে
ষট্কোণচক্রং প্রজ্বলতি . তচ্চাপরিচ্ছিন্নানন্তদিব্যতেজো-
রাশ্যাকরম্ . তদভ্যন্তরে মহানন্দপদং বিভাতি . তত্কর্ণিকাযাং
সূর্যেন্দুবহ্নিমণ্ডলানি চিন্মযানি জ্বলন্তি . তত্রোপলক্ষ্যতে
নিরতিশযদিব্যতেজোরাশিঃ . তদভ্যন্তরসংস্থানে যুঅগপদুদিতা-
নন্তকোটিরবিপ্রকাশঃ সুদর্শনপুরুষো বিরাজতে . সুদর্শনপুরুষো
মহাবিষ্ণুরেব . মহবিষ্ণোঃ সমস্তাসাধারণচিহ্নচিহ্নিতঃ .
এবমুপাসকঃ সুদর্শনপুরুষ ধ্যাত্বা বিবিধোপচারৈরারাধ্য
প্রদক্ষিণনমস্কারান্বিধাযোপাসকস্তেনাভিপূজিতস্তদনুজ্ঞাত-
শ্চোপর্যুপরি গত্বা পরমানন্দমযানন্তবৈকুণ্ঠানবলোক্যোপাসকঃ
পরমানন্দং প্রাপ . তত উপরি বিবিধবিচিত্রানন্তচিদ্বিলাসবিভূতি-
বিশেষানতিক্রম্যানন্তপরমানন্দবিভূতিসমষ্টিবিশেষানন্ত-
নিরতিশযানন্তসমুদ্রানতীত্যোপাসকঃ ক্রমেণাদ্বৈতসংস্থানং প্রাপ ..
কথমদ্বৈতসংস্থানম্ . অখণ্ডানন্দস্বরূপ-
মনির্বাচ্যমতিবোধসাগরমমিতানন্দসমুদ্রং
বিজাতীযবিশেষবিবর্জিতং সজাতীযবিশেষবিশেষিতং
নিরবযবং নিরাধারং নির্বিকারং নিরঞ্জনমনন্ত-
ব্রহ্মানন্দসমষ্টিকন্দং পরমচিদ্বিলাস-
সমষ্ট্যাকারং নির্মলং নিরবদ্যং নিরাশ্রয-
মতিনির্মলানন্তকোটিরবিপ্রকাশৈকস্ফুলিঙ্গমন-
ন্তোপনিষদর্থস্বরূপমখিলপ্রমাণাতীতং
মনোবাচামগোচরং নিত্যমুক্তস্বরূপমনাধার-
মাদিমধ্যান্তশূন্যং কৈবল্যং পরমং শান্তং
সূক্ষ্মতরং মহতো মহত্তরমপরিমিতানন্দবিশেষং
শুদ্ধবোধানন্দবিভূতিবিশেষমনন্তানন্দবিভূতি-
বিশেষসমষ্টিরূপমক্ষরমনির্দেশ্যং কূটস্থ-
মচলং ধ্রুবমদিগ্দেশকালমন্তর্বহিশ্চ তত্সর্বং
ব্যাপ্য পরিপূর্ণং পরমযোগিভির্বিমৃগ্যং দেশতঃ
কালতো বস্তুতঃ পরিচ্ছেদরহিতং নিরন্তরাভিনবং
নিত্যপরিপূর্ণমখণ্ডানন্দামৃতবিশেষং শাশ্বতং
পরমং পদং নিরতিশযানন্দানন্ততটিত্পর্বতাকার-
মদ্বিতীযং স্বযংপ্রকাশমনিশং জ্বলতি . পরমানন্দ-
লক্ষণাপরিচ্ছিন্নানন্তপরংজ্যোতিঃ শাশ্বতং শশ্বদ্বিভাতি .
তদভ্যন্তরসংস্থানেঽমিতানন্দচিদ্রূপাচল-
মখণ্ডপরমানন্দবিশেষং বোধানন্দমহোজ্জ্বলং
নিত্যমঙ্গলমন্দিরং চিন্মথনাবির্ভূতং
চিত্সারমনন্তাশ্চর্যসাগরমমিততেজোরাশ্যন্তর্গত-
তেজোবিশেষমনন্তানন্দপ্রবাহৈরলঙ্কৃতং
নিরতিশযানন্দপারাবারাকারং নিরুপমনিত্যনিরবদ্য-
নিরতিশযনিরবধিকতেজোরাশিবিশেষং নিরতিশযানন্দ-
সহস্রপ্রাকারৈরলঙ্কৃতং শুদ্ধবোধসৌধাবলি-
বিশেষৈরলঙ্কৃতং চিদানন্দমযানন্তদিব্যারামৈঃ
সুশোভিতং শশ্বদমিতপুষ্পবৃষ্টিভিঃ সমন্ততঃ
সন্ততম্ . তদেব ত্রিপাদ্বিভূতি বৈকুণ্ঠস্থানং তদেব
পরমকৈবল্যম্ . তদেবাবাধিতপরমতত্ত্বম্ . তদেবানন্তো-
পনিষদ্বিমৃগ্যম্ . তদেব পরমযোগিভির্মুমুক্ষিভিঃ
সর্বৈরাশাস্যমানম্ . তদেব সদ্ঘনম্ . তদেব চিদ্ঘনম্ .
তদেবানন্দঘনম্ . তদেব শুদ্ধবোধঘনবিশেষ-
মখণ্ডানন্দব্রহ্মচৈতন্যাধিদেবতাস্বরূপম্ .
সর্বাধিষ্ঠানমদ্বযপরব্রহ্মবিহারমণ্ডলং
নিরতিশযানন্দতেজোমণ্ডলমদ্বৈতপরমানন্দলক্ষণ-
পরব্রহ্মণঃ পরমাধিষ্ঠানমণ্ডলং নিরতিশয-
পরমানন্দপরমমূর্তিবিশেষমণ্ডলমনন্তপরম-
মূর্তিসমষ্টিমণ্ডলং নিরতিশযপরমানন্দলক্ষণ-
পরব্রহ্মণঃ পরমমূর্তিপরমতত্ত্ববিলাসবিশেষমণ্ডলং
বোধানন্দমযানন্তপরমবিলাসবিভূতিবিশেষসমষ্টি-
মণ্ডলমনন্তচিদ্বিলাসবিভূতিবিশেষসমষ্টিমণ্ডল-
মখণ্ডশুদ্ধচৈতন্যনিজমূর্তিবিশেষবিগ্রহং
বাচামগোচরানন্তশুদ্ধবোধবিশেষবিগ্রহমনন্তানন্দ-
সমুদ্রসমষ্ট্যাকারমনন্তবোধাচলৈরধিষ্ঠিতং
নিরতিশযানন্দপরমমঙ্গলবিশেষসমষ্ট্যাকার-
মখণ্ডাদ্বৈতপরমানন্দলক্ষণপরব্রহ্মণঃ পরমমূর্তি-
পরমতেজঃপুঞ্জপিণ্ডবিশেষং চিদ্রূপাদিত্যমণ্ডলং
দ্বাত্রিংশদ্ব্যূহভেদৈরধিষ্ঠিতম্ .
ব্যূহভেদাশ্চ কেশবাদিচতুর্বিংশতিঃ .
সুদর্শনাদিন্যাসমন্ত্রাঃ . সুদর্শনাদি যন্ত্রোদ্ধারঃ .
অনন্তগরুডবিশ্বক্সেনাশ্চ নিরতিশযানন্দাশ্চ .
আনন্দব্যূহমধ্যে সহস্রকোটিযোজনাযতোন্নত-
চিন্মযপ্রাসাদং ব্রহ্মানন্দমযবিমানকোটিভি-
রতিমঙ্গলমনন্তোপনিষদর্থারামজালসংকুলং
সামহংসকূজিতৈরতিশোভিতমানন্দমযানন্তশিখরৈ-
রলঙ্কৃতং চিদানন্দরসনির্ঝরৈরভিব্যাপ্তমখণ্ডা-
নন্দতেজোরাশ্যন্তরস্থিতমনন্তানন্দাশ্চর্যসাগরং
তদভ্যন্তরসংস্থানেঽনন্তকোটিরবিপ্রকাশাতিশয-
প্রাকারং নিরতিশযানন্দলক্ষণং প্রণবাখ্যং
বিমানং বিরাজতে . শতকোটিশিখরৈরানন্দমযৈঃ
সমুজ্জ্বলতি . তদন্তরালে বোধানন্দাচলোপর্যষ্টাক্ষরী-
মণ্টপো বিভাতি . তন্মধ্যে চ চিদানন্দমযবেদিকানন্দ-
বনবিভূষিতা . তদুপরি জ্বলতি নিরতিশযানন্দতেজোরাশিঃ .
তদভ্যন্তরসংস্থানেঽষ্টাক্ষরীপদ্মবিভূষিতং
চিন্মযাসনং বিরাজতে . প্রণবকর্ণিকাযাং সূর্যেন্দু-
বহ্নিমণ্ডলানি চিন্মযানি জ্বলন্তি . তত্রাখণ্ডানন্দ-
তেজোরাশ্যন্তর্গতং পরমমঙ্গলাকারমনন্তাসনং
বিরাজতে . তস্যোপরি চ মহাযন্ত্রং প্রজ্বলতি . নিরতিশয-
ব্রহ্মানন্দপরমমূর্তিমহাযন্ত্রং সমস্তব্রহ্ম-
তেজোরাশিসমষ্টিরূপং চিত্স্বরূপং নিরঞ্জনং পরব্রহ্ম-
স্বরূপং পরব্রহ্মণঃ পরমরহস্যকৈবল্যং মহাযন্ত্রময-
পরমবৈকুণ্ঠনারাযণযন্ত্রং বিজযতে . তত্স্বরূপং কথমিতি .
দেশিকস্তথেতি হোবাচ . আদৌ ষট্কোণচক্রম্ . তন্মধ্যে
ষট্দলপদ্মম্ . তত্কর্ণিকাযাং প্রণব ॐইতি . প্রণবমধ্যে
নারাযণবীজমিতি . তত্সাধ্যগর্ভিতং মম সর্বাভীষ্টসিদ্ধিং
কুরুকুরু স্বাহেতি . তত্পদ্মদলেষু বিষ্ণুনৃসিংহষডক্ষর-
মন্ত্রৌ ॐ নমো বিষ্ণবে ঐং ক্লীং শ্রীং হ্রীং ক্ষ্মৌং ফট্ .
তদ্দলকপোলেষু রামকৃষ্ণষডক্ষরমন্ত্রৌ . রাং
রামায নমঃ . ক্লীং কৃষ্ণায নমঃ . ষট্কোণেষু
সুদর্শনষডক্ষরমন্ত্রঃ . সহস্রার হুং ফডিতি . ষট্কোণ-
কপোলেষু প্রণবযুক্তশিবপঞ্চাক্ষরমন্ত্রঃ . ॐ নমঃ
শিবাযেতি . তদ্বহিঃ প্রণবমালাযুক্তং বৃত্তম্ . বৃত্তাদ্বহি-
রষ্টদলপদ্মম্ . তেষু দলেষু নারাযণনৃসিংহ-
অষ্টাক্ষরমন্ত্রৌ . ॐ নমো নারাযণায . জযজয নরসিংহ .
তদ্দলসন্ধিষু রামকৃষ্ণশ্রীকরাষ্টাক্ষরমন্ত্রাঃ .
ॐ রামায হুং ফট্ স্বাহা . ক্লীং দামোদরায নমঃ .
উত্তিষ্ঠ শ্রীকরস্বাহা . তদ্বহিঃ প্রণবমালাযুক্তং বৃত্তম্ .
বৃত্তদ্বহির্নবদলপদ্মম্ . তেষু দলেষু রামকৃষ্ণ-
হযগ্রীবনবাক্ষরমন্ত্রাঃ . ॐ রামচন্দ্রায নমॐ .
ক্লীং কৃষ্ণায গোবিন্দায ক্লীম্ . হ্লৌং হযগ্রীবায নমো
হ্লৌং . তদ্দলকপোলেষু দক্ষিণামূর্তিরীশ্বরম্ . তদ্বহি-
র্নারাযণবীজযুক্তং বৃত্তম্ . বৃত্তদ্বহির্দশদলপদ্মম্ .
তেষু দলেষু রামকৃষ্ণদশাক্ষরমন্ত্রৌ . হুং জানকী-
বল্লভায স্বাহা . গোপীজনবল্লভায স্বাহা . তদ্দলসন্ধিষু
নৃসিংহমালামন্ত্রঃ . ॐ নমো ভগবতে শ্রীমহানৃসিংহায
করালদংষ্ট্রবদনায মম বিঘ্নাত্পচপচ স্বাহা .
তদ্বহির্নৃসিংহৈকাক্ষরযুক্তং বৃত্তম্ . ক্ষ্মৌং ইত্যেকাক্ষরম্ .
বৃত্তাদ্বহির্দ্বাদশদলপদ্মম্ . তেষু দলেষু নারাযণ-
বাসুদেবদ্বাদশাক্ষরমন্ত্রৌ . ॐ নমো ভগবতে নারাযণায .
ॐ নমো ভগবতে বাসুদেবায . তদ্দলকপোলেষু মহাবিষ্ণু-
রামকৃষ্ণদ্বাদশাক্ষরমন্ত্রাশ্চ . ॐ নমো ভগবতে
মহাবিষ্ণবে . ॐ হ্রীং ভরতাগ্রজ রাম ক্লীং স্বাহা .
শ্রীং হ্রীং ক্লীং কৃষ্ণায গোবিন্দায নমঃ . তদ্বহির্জগন্মোহন-
বীজযুক্তং বৃত্তং ক্লীং ইতি . বৃত্তদ্বহিশ্চতুর্দশদলপদ্মম্ .
তেষু দলেষু লক্ষ্মীনারাযণহযগ্রীবগোপালদধিবামন-
মন্ত্রাশ্চ . ॐ হ্রীং হ্রীং শ্রীং শ্রীং লক্ষ্মীবাসুদেবায নমঃ .
ॐ নমঃ সর্বকোটিসর্ববিদ্যারাজায ক্লীং কৃষ্ণায
গোপালচূডামণযে স্বাহা . ॐ নমো ভগবতে দধিবামনায ॐ .
তদ্দলসন্ধিষ্বন্নপূর্ণেশ্বরীমন্ত্রঃ . হ্রীং পদ্মাবত্যন্নপূর্ণে
মাহেশ্বরী স্বাহা . তদ্বহিঃ প্রণবমালাযুক্তং বৃত্তম্ .
বৃত্তাদ্বহিঃ ষোডশদলপদ্মম্ . তেষু দলেষু শ্রীকৃষ্ণ-
সুদর্শনষোডশাক্ষরমন্ত্রৌ চ . ॐ নমো ভগবতে
রুক্মিণীবল্লভায স্বাহা . ॐ নমো ভগবতে মহাসুদর্শনায
হুং ফট্ . তদ্দলসন্ধিষু স্বরাঃ সুদর্শনমালামন্ত্রাশ্চ .
অ আ ই ঈ উ ঊ ঋ ৠ লৃ লৄ এ ঐ ও ঔ অং অঃ .
সুদর্শনমহাচক্রায দীপ্তরূপায সর্বতো
মাং রক্ষরক্ষ সহস্রার হুং ফট্ স্বাহা .
তদ্বহির্বরাহবীজযুক্তং বৃত্তম্ . তদ্ধুমিতি .
বৃত্তদ্বহিরষ্টাদশদলপদ্মম্ .
তেষু দলেষু শ্রীকৃষ্ণবামনাষ্টাদশাক্ষরমন্ত্রৌ .
ক্লীং কৃষ্ণায গোবিন্দায গোপীজনবল্লভায স্বাহা .
ॐ নমো বিষ্ণবে সুরপতযে মহাবলায স্বাহা .
তদ্দলকপোলেষু গরুডপঞ্চাক্ষরীমন্ত্রো গরুডমালামন্ত্রশ্চ .
ক্ষিপ ॐ স্বাহা . ॐ নমঃ পক্ষিরাজায সর্ববিষভূতরক্ষঃ-
কৃত্যাদিভেদনায সর্বেষ্টসাধকায স্বাহা .
তদ্বহির্মাযাবীজযুক্তং বৃত্তম্ . বৃত্তদ্বহিঃ পুনরষ্টদলপদ্মম্ .
তেষু দলেষু শ্রীকৃষ্ণবামনাষ্টাক্ষরমন্ত্রৌ .
ॐ নমো দামোদরায . ॐ বামনায নমঃ ॐ .
তদ্দলকপোলেষু নীলকণ্ঠত্র্যক্ষরীগরুডপঞ্চাক্ষরীমন্ত্রৌ চ .
প্রেং রীং ঠঃ . নমোঽণ্ডজায . তদ্বহির্মন্মথবীজযুক্তং বৃত্তম্ .
বৃত্তদ্বহিশ্চতুর্বিংশতিদলপদ্মম্ . তেষু দলেষু শরণাগত-
নারাযণমন্ত্রৌ নারাযণহযগ্রীবগাযত্রী মন্ত্রৌ চ .
শ্রীমন্নারাযণচরণৌ শরণং প্রপদ্যে শ্রীমতে নারাযণায নমঃ .
নারাযাণায বিদ্মহে বাসুদেবায ধীমহি .
তন্নো বিষ্ণুঃ প্রচোদযাত্ .
বাগীশ্বরায বিদ্মহে হযগ্রীবায ধীমহি .
তন্নো হংসঃ প্রচোদযাত্ .
তদ্দলকপোলেষু নৃসিংহসুদর্শনগাযত্রীমন্ত্রাশ্চ .
বজ্রনখায বিদ্মহে তীক্ষ্ণদংষ্ট্রায ধীমহি .
তন্নো নৃসিংহঃ প্রচোদযাত্ .
সুদর্শনায বিদ্মহে হেতিরাজায ধীমহি .
তন্নশ্চক্রঃ প্রচোদযাত্ .
তত্সবিতুর্বরেণ্যং ভর্গো দেবস্য ধীমহি .
ধিযো যো নঃ প্রচোদযাত্ .
তদ্বহির্হযগ্রীবৈকাক্ষরযুক্তং বৃত্তং হ্লোহ্সৌমিতি .
বৃত্তাদ্বহির্দ্বাত্রিংশদ্দলপদ্মম্ .
তেষু দলেষু নৃসিংহহযগ্রীবানুষ্টুভমন্ত্রৌ উগ্রং
বীরং মহাবিষ্ণুং জ্বলন্তং সর্বতোমুখম্ .
নৃসিংহং ভীষণং ভদ্রং মৃত্যুমৃত্যুং নমাম্যহম্ .
ঋগ্যজুঃসামরূপায বেদাহরণকর্মণে .
প্রণবোদ্গীথবপুষে মহাশ্বশিরসে নমঃ .
তদ্দলকপোলেষু রামকৃষ্ণানুষ্টুভমন্ত্রৌ .
রামভদ্র মহেশ্বাস রঘুবীর নৃপোত্তম .
ভো দশাস্যান্তকাস্মাকং রক্ষাং দেহি শ্রিযং চ মে .
দেবকীসুত গোবিন্দ বাসুদেব জগত্পতে .
দেহি মে তনযং কৃষ্ণ ত্বামহং শরণং গতঃ .
তদ্বহিঃ প্রণবসংপুটিতাগ্নিবীজযুক্তং বৃত্তম্ .
ॐ রমোমিতি . বৃত্তদ্বহিঃ ষট্ত্রিংশদ্দলপদ্মম্ .
তেষু দলেষু হযগ্রীবষট্ত্রিংশদক্ষরমন্ত্রঃ
পুনরষ্টত্রিংশদক্ষর মন্ত্রশ্চ . হংসঃ .
বিশ্বোত্তীর্ণস্বরূপায চিন্মযানন্দরূপিণে .
তুভ্যং নমো হযগ্রীব বিদ্যারাজায বিষ্ণবে . সোঽহম্ .
হ্লৌং ॐ নমো ভগবতে হযগ্রীবায সর্ববাগীশ্বরেশ্বরায
সর্ববেদমযায সর্ববিদ্যাং মে দেহি স্বাহা .
তদ্দলকপোলেষু প্রণবাদিনমোন্তাশ্চ তুর্থ্যন্তাঃ
কেশবাদিচতুর্বিংশতিমন্ত্রাশ্চ .
অবশিষ্টদ্বাদশস্থানেষু রামকৃষ্ণগাযত্রীদ্বয-
বর্ণচতুষ্টযমেকৈকস্থলে .
ॐ কেশবায নমঃ . ॐ নারাযণায নমঃ .
ॐ মাধবায নমঃ . ॐ গোবিন্দায নমঃ .
ॐ বিষ্ণবে নমঃ . ॐ মধুসূদনায নমঃ .
ॐ ত্রিবিক্রমায নমঃ . ॐ বামনায নমঃ .
ॐ শ্রীধরায নমঃ . ॐ হৃষীকেশায নমঃ .
ॐ পদ্মনাভায নমঃ . ॐ দামদরায নমঃ .
ॐ সঙ্কর্ষণায নমঃ . ॐ বাসুদেবায নমঃ .
ॐ প্রদ্যুম্নায নমঃ . ॐ অনিরুদ্ধায নমঃ .
ॐ পুরুষোত্তমায নমঃ . ॐ অধোক্ষজায নমঃ .
ॐ নারসিংহায নমঃ . ॐ অচ্যুতায নমঃ .
ॐ জনার্দনায নমঃ . ॐ উপেন্দ্রায নমঃ .
ॐ হরযে নমঃ . ॐ শ্রীকৃষ্ণায নমঃ .
দাশরথায বিদ্মহে সীতাবল্লভায ধীমহি .
তন্নো রামঃ প্রচোদযাত্ .
দামোদরায বিদ্মহে বাসুদেবায ধীমহি .
তন্নঃ কৃষ্ণঃ প্রচোদযাত্.
তদ্বহিঃ প্রণবসংপুটিতাঙ্কুশবীজযুক্তং বৃত্তম্ . ॐ ক্রোমিতি .
তদ্বহিঃ পুনর্বৃত্তং তন্মধ্যে দ্বাদশকুক্ষিস্থানানি সান্তরালানি .
তেষু কৌস্তুভবনমালাশ্রীবত্সসুদর্শনগরুডপদ্ম-
ধ্বজানন্তশার্ঙ্গগদাশঙ্খনন্দকমন্ত্রাঃ প্রণবাদি-
নমওন্তাশ্চতুর্থ্যন্তাঃ ক্রমেণ .
ॐ কৌস্তুভায নমঃ . ॐ বনমালায নমঃ .
ॐ শ্রীবত্সায নমঃ . ॐ সুদর্শনায নমঃ .
ॐ গরুডায নমঃ . ॐ পদ্মায নমঃ .
ॐ ধ্বজায নমঃ . ॐ অনন্তায নমঃ .
ॐ শার্ঙ্গায নমঃ . ॐ গদাযৈ নমঃ .
ॐ শঙ্খায নমঃ . ॐ নন্দকায নমঃ .
তদন্তরালেষু—-ॐ বিশ্বক্সেনায নমঃ .
ॐআচক্রায স্বাহা . ॐ বিচক্রায স্বাহা .
ॐ সুচক্রায স্বাহা . ॐ ধীচক্রায স্বাহা .
ॐ সংচক্রায স্বাহা . ॐ জ্বালচক্রায স্বাহা .
ॐ ক্রুদ্ধোল্কায স্বাহা . ॐ মহোত্কায স্বাহা .
ॐ বীর্যোল্কায স্বাহা . ॐ দ্যুল্কায স্বাহা .
ॐ সহস্রোল্কায স্বাহা . ইতি প্রণবাদি মন্ত্রাঃ .
তদ্বহিঃ প্রণবসংপুটিতগরুডপঞ্চাক্ষরযুক্তং বৃত্তম্ .
ॐ ক্ষিপ ॐ স্বাহাম্ . ॐ তচ্চ দ্বাদশবজ্রৈঃ
সান্তরালৈরলঙ্কৃতম্ . তেষু বজ্রেষু
ॐ পদ্মনিধযে নমঃ . ॐ মহাপদ্মনিধযে নমঃ .
ॐ গরুডনিধযে নমঃ . শঙ্খনিধযে নমঃ .
ॐ মকরনিধযে নমঃ . ॐ কচ্ছপনিধযে নমঃ .
ॐ বিদ্যানিধযে নমঃ . ॐ পরমানন্দনিধযে নমঃ .
ॐ মোক্ষনিধযে নমঃ . ॐ লক্ষ্মীনিধযে নমঃ .
ॐ ব্রহ্মনিধযে নমঃ . ॐ শ্রীমুকুন্দনিধযে নমঃ .
ॐ বৈকুণ্ঠনিধযে নমঃ . তত্সন্ধিস্থানেষু—-
ॐ বিদ্যাকল্পকতরবে নমঃ . ॐ মুক্তিকল্পকতরবে নমঃ .
ॐ আনন্দকল্পকতরবে নমঃ . ॐ ব্রহ্মকল্পকতরবে নমঃ .
ॐ মুক্তিকল্পকতরবে নমঃ . ॐ অমৃতকল্পকতরবে নমঃ .
ॐ বোধকল্পকতরবে নমঃ . ॐ বিভূতিকল্পকতরবে নমঃ .
ॐ বৈকুণ্ঠকল্পকতরবে নমঃ . ॐ বেদকল্পকতরবে নমঃ .
ॐ যোগকল্পকতরবে নমঃ . ॐ যজ্ঞকল্পকতরবে নমঃ .
ॐ পদ্মকল্পকতরবে নমঃ .
তচ্চ শিবগাযত্রীপরব্রহ্মমন্ত্রাণাং
বর্ণৈর্বৃত্তাকারেণ সংবেষ্ট্য .
তত্পুরুষায বিদ্মহে মহাদেবায ধীমহি .
তন্নো রুদ্রঃ প্রচোদযাত্ .
শ্রিঅমন্নারাযণো জ্যোতিরাত্মা নারাযণঃ পরঃ .
নারাযণপরং ব্রহ্ম নারাযণ নমোস্তু তে .
তদ্বহিঃ প্রণবসংপুটিতশ্রীবীজযুক্তং বৃত্তম্ .
ॐ শ্রীমোমিতি . বৃত্তাদ্বহিশ্চত্বারিংশদ্দলপদ্মম্ .
তেষু দলেষু ব্যাহৃতিশিরঃসংপুটিতবেদগাযত্রী-
পাদচতুষ্টযসূর্যাষ্টাক্ষরমন্ত্রৌ .
ॐ ভূঃ . ॐ ভুবঃ . ॐ সুবঃ . ॐ মহঃ .
ॐ জনঃ . ॐ তপঃ . ॐ সত্যম্ .
ॐ তত্সবিতুর্বরেণ্যম্ . ॐ ভর্গো দেবস্য ধীমহি .
ॐ ধিযো যো নঃ প্রচোদযাত্ . ॐ পরোরজসে সাবদোম্ .
ॐ আপোজ্যোতী রসোঽমৃতং ব্রহ্ম ভূর্ভুবঃ সুবরোম্ .
ॐ ঘৃণিঃ সূর্য আদিত্যঃ . তদ্দলসন্ধিষু
প্রণবশ্রীবীজসংপুটিতনারাযণবীজং সর্বত্র .
ॐ শ্রীমং শ্রীমোম্ . তদ্বহিরষ্টশূলাঙ্কিতভূচক্রম্ .
চক্রান্তশ্চক্ষুর্দিক্ষু হংসঃসোহংমন্ত্রৌ প্রণবসংপুটিতা
নারাযণাস্ত্রমন্ত্রাশ্চ . ॐ হংসঃ সোহম্ .
ॐ নমো নারাযণায হুং ফট্ . তদ্বহিঃ প্রণবমালাসংযুক্তং
বৃত্তম্ . বৃত্তাদ্বহিঃ পঞ্চাশদ্দলপদ্মম্ .
তেষু দলেষু মাতৃকা পঞ্চাশদক্ষরমালা লকারবর্জ্যা .
তদ্দলসন্ধিষু প্রণবশ্রীবীজসংপুটিতরামকৃষ্ণমালামন্ত্রৌ .
ॐ শ্রীমোং নমো ভগবতে রঘুনন্দনায রক্ষোঘ্নবিশদায
মধুরপ্রসন্নবদনাযামিততেজসে বলায রামায বিষ্ণবে নমঃ .
শ্রীমোং নমঃ কৃষ্ণায দেবকীপুত্রায বাসুদেবায
নির্গলচ্ছেদনায সর্বলোকাধিপতযে সর্বজগন্মোহনায বিষ্ণবে
কামিতার্থদায স্বাহা শ্রীমোম্ . তদ্বহিরষ্টশূলাঙ্কিতভূচক্রম্ .
তেষু প্রণবসংপুটিতমহানীলকণ্ঠমন্ত্রবর্ণানি .
ॐমোং নমো নীলকণ্ঠায . ॐ শূলাগ্রেষু লোকপালমন্ত্রাঃ
প্রণবাদিনমোন্তাশ্চতুর্থ্যন্তাঃ ক্রমেণ .
ॐ ইন্দ্রায নমঃ . ॐ অগ্নযে নমঃ . ॐ যমায নমঃ .
ॐ নিরৃতযে নমঃ . ॐ বরুণায নমঃ . ॐ বাযবে নমঃ .
ॐ সোমায নমঃ . ॐ ঈশানায নমঃ .
তদ্বহিঃ প্রণবমালাযুক্তং বৃত্তত্রযম্ .
তদ্বহির্ভূপুরচতুষ্টযং চতুর্দ্বারযুতং
চক্রকোণচতুষ্টযমহাবজ্রবিভূষিতম্
তেষু বজ্রেষু প্রণবশ্রীবীজসংপুটিতামৃতবীজদ্বযম্ .
ॐ শ্রীং ঠং বং শ্রীমোমিতি . বহির্ভূপুরবীথ্যাম্ —-
ॐ আধারশক্ত্যৈ নমঃ . ॐ মূলপ্রকৃত্যৈ নমঃ .
ॐ আদিকূর্মায নমঃ . ॐ অনন্তায নমঃ .
ॐ পৃথিব্যৈ নমঃ . মধ্যভূপুরবীথ্যাম্—-
ॐ ক্ষীরসমুদ্রায নমঃ . ॐ রত্নদ্বীপায নমঃ .
ॐ মণিমণ্ডপায নমঃ . ॐ শ্বেতচ্ছত্রায নমঃ .
ॐ কল্পকবৃক্ষায নমঃ . ॐ রত্নসিংহাসনায নমঃ .
প্রথমভূপুরবীথ্যামোং ধর্মজ্ঞানবৈরাগ্যৈশ্ব-
র্যাধর্মাজ্ঞানাবৈরাগ্যানৈশ্বর্যসত্বরজস্তমোমাযা-
বিদ্যানন্তপদ্মাঃ প্রণবাদিনমোন্তাশ্চতুর্থ্যন্তাঃ ক্রমেণ .
অন্তবৃত্তবীথ্যামোমনুগ্রহাযৈ নমঃ . ॐ নমো ভগবতে
বিষ্ণবে সর্বভূতাত্মনে বাসুদেবায সর্বাত্মসংযোগ-
যোগপীঠাত্মনে নমঃ . বৃত্তবকাশেষু—-বীজং প্রাণং
চ শক্তিং চ দৃষ্টিং বশ্যাদিকং তথা .
মন্ত্রযন্ত্রাখ্যগাযত্রীপ্রাণস্থাপনমেব চ .
ভূতদিক্পালবীজানি যন্ত্রস্যাঙ্গানি বৈ দশ .
মূলমন্ত্রমালামন্ত্রকবচদিগ্বন্ধনমন্ত্রাশ্চ .
এবংবিধমেতদ্যন্ত্রং মহামন্ত্রমযং যোগধীরান্তৈঃ
পরমন্ত্রৈরলঙ্কৃতং ষোডশোপচারৈরভ্যর্চিতং
জপহোমাদিনা সাধিতমেতদ্যন্ত্রং শুদ্ধব্রহ্মতেজোমযং
সর্বাভযঙ্করং সমস্তদুরিতক্ষযকরং সর্বাভীষ্ট-
সংপাদকং সাযুজ্যমুক্তিপ্রদমেতত্পরমবৈকুণ্ঠ-
মহানারাযণযন্ত্রং প্রজ্বলতি . তস্যোপরি চ নিরতিশযানন্দ-
তেজোরাশ্যভ্যন্তরসমাসীনং বাচামগোচরানন্দ-
তেজোরাশ্যাকারং চিত্সারাবির্ভূতানন্দবিগ্রহং বোধানন্দ-
স্বরূপং নিরতিশযসৌন্দর্যপারাবারং তুরীযস্বরূপং
তুরীযাতীতং চাদ্বৈতপরমানন্দনিরন্তরাতিতুরীযনিরতিশয-
সৌন্দর্যানন্দপারাবারং লাবণ্যবাহিনীকল্লোলতটিদ্ভাসুরং
দিব্যমঙ্গলবিগ্রহং মূর্তিমদ্ভিঃ পরমমঙ্গলৈরুপসেব্যমানং
চিদানন্দমযৈরনন্তকোটিরবিপ্রকাশৈরনন্তভূষণৈরলঙ্কৃতং
সুদর্শনপাঞ্চজন্যপদ্মগদাসিশার্ঙ্গমুসলপরিঘাদ্যৈ-
শ্চিন্মযৈরনেকাযুধগণৈর্মূর্তিমদ্ভিঃ সুসেবিতম্ .
বাহ্যবৃত্তবীথ্যাং বিমলোত্কর্ষিণী জ্ঞান ক্রিযা যোগ প্রহ্বী
সত্যেশানা প্রণবাদিনমোন্তাশ্চতুর্থ্যন্তাঃ ক্রমেণ .
শ্রীবত্সকৌস্তুভবনমালাঙ্কিতবক্ষসং ব্রহ্মকল্পবনামৃত-
পুষ্পবৃষ্টিভিঃ সন্ততমানন্দং ব্রহ্মানন্দরসনির্ভরৈ-
রসংখ্যৈরতিমঙ্গলং শেষাযুতফণাজালবিপুলচ্ছত্রশোভিতং
তত্ফণামণ্ডলোদর্চির্মণিদ্যোতিতবিগ্রহং তদঙ্গকান্তিনির্ঝরৈস্ততং
নিরতিশযব্রহ্মগন্ধস্বরূপং নিরতিশযানন্দব্রহ্মগন্ধ-
বিশেষকারমনন্তব্রহ্মগন্ধাকারসমষ্টিবিশেষমন্তানন্দ-
তুলসীমাল্যৈরভিনবং চিদানন্দমযানন্তপুষ্পমাল্যৈর্বিরাজমানং
তেজঃপ্রবাহতরঙ্গতত্পরংপরাভির্জ্বলন্তং নিরতিশযানন্দং
কান্তিবিশেষাবর্তৈরভিতোঽনিশং প্রজ্বলন্তং বোধানন্দমযানন্ত-
ধূপদীপাবলিনিরতিশোভিতং নিরতিশযানন্দচামরবিশেষৈঃ
পরিসেবিতং নিরন্তরনিরুপমনিরতিশযোত্কটজ্ঞানানন্দানন্তগুচ্ছ-
ফলৈরলঙ্কৃতং চিন্মযানন্দদিব্যবিমানচ্ছত্রধ্বজরাজিভি-
র্বিরাজমানং পরমমঙ্গলানন্তদিব্যতেজোভির্জ্বলন্তমনিশং
বাচামগোচরমনন্ততেজোরাশ্যন্তর্গতমর্ধমাত্রাত্মকং
তুর্যং ধ্বন্যাত্মকং তুরীযাতীতমবাচ্যং নাদবিন্দুকলাধ্যাত্ম-
স্বরূপং চেত্যাদ্যনন্তাকারেণাবস্থিতং নির্গুণং নিষ্ক্রিযং
নির্মলং নিরবদ্যং নিরঞ্জনং নিরাকারং নিরাশ্রযং নিরতিশযাদ্বৈত-
পরমানন্দলক্ষণমাদিনারাযণং ধ্যাযেদিত্যুপনিষত্ ..
ইত্যাথর্বণমহানারাযণোপনিষদি পরমমোক্ষস্বরূপ-
নিরূপণদ্বারা ত্রিপাদ্বিভূতিপরমবৈকুণ্ঠমহানারাযণ-
যন্ত্রস্বরূপনিরূপণং নাম সপ্তমোঽধ্যাযঃ .. ৭..
ততঃ পিতামহঃ পরিপৃচ্ছতি ভগবন্তং মহাবিষ্ণুং
ভগবঞ্ছুদ্ধাদ্বৈতপরমানন্দলক্ষণপরব্রহ্মণস্তব
কথং বিরুদ্ধবৈকুণ্ঠপ্রাসাদপ্রাকারবিমানাদ্যনন্তবস্তুভেদঃ .
সত্যমেবোক্তমিতি ভগবান্মহাবিষ্ণুঃ পরিহরতি . যথা
শুদ্ধসুবর্ণস্য কটকমুকুটাঙ্গদাদিভেদঃ . যথা
সমুদ্রসলিলস্য স্থূলসূক্ষ্মতরঙ্গফেনবুদ্বুঅদকরলবণ-
পাষাণাদ্যনন্তবস্তুভেদঃ . যথা ভূমেঃ পর্বতবৃক্ষ-
তৃণগুল্মলতাদ্যনন্তবস্তুভেদঃ . তথৈবাদ্বৈতপরমানন্দ-
লক্ষণপরব্রহ্মণো মম সর্বাদ্বৈতমুপপন্নং ভবত্যেব .
মত্স্বরূপমেব সর্বং মদ্ব্যতিরিক্তমণুমাত্রং ন বিদ্যতে .
পুনঃ পিতামহঃ পরিপৃচ্ছতি . ভগবন্ পরমবৈকুণ্ঠ এব
পরমমোক্ষঃ . পরমমোক্ষস্ত্বেক এব শ্রূযতে সর্বত্র .
কথমনন্তবৈকুণ্ঠাশ্চানন্তানন্দসমুদ্রাদযশ্চানন্ত-
মূর্তযঃ সন্তীতি . তথেতি হোবাচ ভগবান্মহাবিষ্ণুঃ .
একস্মিন্নবিদ্যাপাদেঽনন্তকোটিব্রহ্মাণ্ডানি সাবরণানি শ্রূযন্তে .
তস্মিন্নেকস্মিন্নণ্ডে বহবো লোকাশ্চ বহবো বৈকুণ্ঠাশ্চানন্ত-
বিভূতযশ্চ সন্ত্যেব . সর্বাণ্ডেষ্বানন্তলোকাশ্চানন্ত-
বৈকুণ্ঠাঃ সন্তীতি সর্বেষাং খল্বভিমতম্ . পাদত্রযেঽপি
কিং বক্তব্যং নিরতিশযানন্দাবির্ভাবো মোক্ষ ইতি মোক্ষলক্ষণং
পাদত্রযে বর্ততে . তস্মাত্পাদত্রযং পরমমোক্ষঃ . পাদত্রযং
পরমবৈকুণ্ঠঃ . পাদত্রযং পরমকৈবল্যমিতি .
ততঃ শুদ্ধচিদানন্দব্রহ্মবিলাসানন্দাশ্চানন্তপরমানন্দ-
বিভূতযশ্চানন্তবৈকুণ্ঠাশ্চানন্তপরমানন্দসমুদ্রাদযঃ
সন্ত্যেব . উপাসকস্ততোঽভ্যেত্যৈবংবিধং নারাযণং ধ্যাত্বা
প্রদক্ষিণনমস্কারান্বিধায বিবিধোপচারৈরভ্যর্চ্য
নিরতিশযাদ্বৈতপরমানন্দলক্ষণো ভূত্বা তদগ্রে সাবধানেনো-
পবিশ্যাদ্বৈতযোগমাস্থায সর্বাদ্বৈতপরমানন্দলক্ষণা-
খণ্ডামিততেজোরাশ্যাকারং বিভাব্যোপাসকঃ স্বযং শুদ্ধ-
বোধানন্দমযামৃতনিরতিশযানন্দতেজোরাশ্যাকারো ভূত্বা
মহাবাক্যার্থমনুস্মরন্ ব্রহ্মাহমস্মি অহমস্মি
ব্রহ্মাহমস্মি যোঽহমস্মি ব্রহ্মাহমস্মি অহমেবাহং মাং
জুহোমি স্বাহা . অহং ব্রহ্মেতি ভাবনযা যথা পরমতেজোমহানদী-
প্রবাহপরমতেজঃপারাবাএ প্রবিশতি . যথা পরমতেজঃপারাবার-
তরঙ্গাঃ পরমতেজঃপারাবারে প্রবিশন্তি . তথৈব সচ্চিদান-
ন্দাত্মোপাসকঃ সর্বপরিপূর্ণাদ্বৈতপরমানন্দলক্ষণে পরব্রহ্মণি
নারাযণে মযি সচ্চিদাত্মকোঽহমজোঽহং পরিপূর্ণোঽহমস্মীতি
প্রবিবেশ . তত উপাসকো নিস্তরঙ্গাদ্বৈতাপারনিরতিশযসচ্চিদানন্দ
সমুদ্রো বভূব . যস্ত্বনেন মার্গেণ সম্যগাচরতি স নারাযণো
ভবত্যসংশযমেব . অনেন মার্গেণ সর্বে মুনযঃ সিদ্ধিং গতাঃ .
অসংখ্যাতাঃ পরমযোগিনশ্চ সিদ্ধিং গতাঃ .
ততঃ শিষ্যো গুরুং পরিপৃচ্ছতি . ভগবন্ত্সালম্ব-
নিরালম্বযোগৌ কথমিতি ব্রূহীতি . সালম্বস্তু সমস্তকর্মাতি-
দূরতযা করচরণাদিমূর্তিবিশিষ্টং মণ্ডলাদ্যালম্বনং
সালম্বযোগঃ . নিরালম্বস্তু সমস্তনামরূপকর্মাতিদূরতযা
সর্বকামাদ্যন্তঃকরণবৃত্তিসাক্ষিতযা তদালম্বনশূন্যতযা
চ ভাবনং নিরালম্বযোগঃ . অথ চ নিরালম্বযোগাধিকারী
কীদৃশো ভবতি . অমানিত্বাদিলক্ষণোপলক্ষিতো বঃ পুরুষঃ
স এব নিরালম্বযোগাধিকারী কার্যঃ কশ্চিদস্তি . তস্মাত্সর্বেষা-
মধিকারিণামনধিকারিণাং ভক্তিযোগ এব প্রশস্যতে . ভক্তিযোগো
নিরুপদ্রবঃ . ভক্তিযোগান্মুক্তিঃ . বুদ্ধিমতামনাযাসেনাচিরাদেব
তত্ত্বজ্ঞানং ভবতি . তত্কথমিতি . ভক্তবত্সলঃ স্বযমেব সর্বেভ্যো
মোক্ষবিঘ্নেভ্যো ভক্তিনিষ্ঠান্সর্বান্পরিপালযতি . সর্বাভীষ্টা-
ন্প্রযচ্ছতি . মোক্ষং দাপযতি . চতুর্মুখাদীনাং সর্বেষামপি
বিনা বিষ্ণুভক্ত্যা কল্পকোটিভির্মোক্ষো ন বিদ্যতে . কারণেন বিনা
কার্যং নোদেতি . ভক্ত্যা বিনা ব্রহ্মজ্ঞানং কদাপি ন জাযতে .
তস্মাত্ত্বমপি সর্বোপাযান্পরিত্যজ্য ভক্তিমাশ্রয . ভক্তিনিষ্ঠো
ভব . ভক্তিনিষ্ঠো ভব . ভক্ত্যা সর্বসিদ্ধযঃ সিধ্যন্তি .
ভক্ত্যাঽসাধ্যং ন কিংচিদস্তি . এবংবিধং গুরূপদেশমাকর্ণ্য
সর্বং পরমতত্ত্বরহস্যমববুধ্য সর্বসংশযান্বিধূয
ক্ষিপ্রমেব মোক্ষং সাধযামীতি নিশ্চিত্য ততঃ শিষ্যঃ সমুত্থায
প্রদক্ষিণনমস্কারং কৃত্বা গুরুভ্যো গুরুপূজাং বিধায
গুর্বনুজ্ঞযা ক্রমেণ ভক্তিনিষ্ঠো ভূত্বা ভক্ত্যতিশযেন
পক্বং বিজ্ঞানং প্রাপ্য তস্মাদনাযাসেন শিষ্যঃ ক্ষিপ্রমেব
সাক্ষান্নারাযণো বভূবেত্যুপনিষত্ ..
ততঃ প্রোবাচত্ ভগবান্ মহাবিষ্ণুশ্চতুর্মুখমবলোক্য
ব্রহ্মন্ পরমতত্ত্বরহস্যং তে সর্বং কথিতম্ . তত্স্মরণ-
মাত্রেণ মোক্ষো ভবতি . তদনুষ্ঠানেন সর্বমবিদিতং বিদিতং
ভবতি . যত্স্বরূপজ্ঞানিনঃ সর্বমবিদিতং বিদিতং ভবতি . তত্সর্বং
পরমরহস্যং কথিতম্ . গুরুঃ ক ইতি . গুরুঃ সাক্ষাদাদিনারাযণঃ
পুরুষঃ . স আদিনারাযণোঽহমেব . তস্মান্মামেকং শরণং
ব্রজ . মদ্ভক্তিনিষ্ঠো ভব . মদীযোপাসনাং কুরু . মামেব
প্রাপ্স্যসি . মদ্ব্যতিরিক্তং সর্বং বাধিতম্ . মদ্ব্যতিরিক্তমবাধিতং
ন কিংচিদস্তি . নিরতিশযানন্দাদ্বিতীযোঽহমেব . সর্বপরিপূর্ণোঽহমেব .
সর্বাশ্রযোঽহমেব . বাচামগোচরনিরাকারপরব্রহ্মস্বরূপোঽহমেব .
মদ্ব্যতিরিক্তমণুমাত্রং ন বিদ্যতে . ইত্যেবং মহাবিষ্ণোঃ পরমিমমুপদেশং
লব্ধ্বা পিতামহঃ পরমানন্দং প্রাপ . বিষ্ণোঃ করাভিমর্শনেন
দিব্যজ্ঞানং প্রাপ্য পিতামহস্ততঃ সমুত্থায প্রদক্ষিণনমস্কারা-
ন্বিধায বিবিধোপচারৈর্মহাবিষ্ণুং প্রপূজ্য প্রাঞ্জলির্ভূত্বা
বিনযেনোপসংগম্য ভগবন্ ভক্তিনিষ্ঠাং মে প্রযচ্ছ . ত্বদভিন্নং
মাং পরিপালয কৃপালয . তথৈব সাধুসাধ্বিতি সাধুপ্রশংসাপূর্বকং
মহাবিষ্ণুঃ প্রোবাচ . মদুপাসকঃ সর্বোত্কৃষ্টঃ স ভবতি .
মদুপাসনযা সর্বমঙ্গলানি ভবন্তি .
মদুপাসনযা সর্বং জযতি . মদুপাসকঃ সর্ববন্দ্যো ভবতি .
মদীযোপাসকস্যাসাধ্যং ন কিংচিদস্তি . সর্বে বন্ধাঃ
প্রবিনশ্যন্তি . সদ্বৃত্তমিব সর্বে দেবাস্তং সেবন্তে .
মহাশ্রেযাংসি চ সেবন্তে . মদুপাসকস্তস্মান্নিরতিশযা-
দ্বৈতপরমানন্দলক্ষণপরব্রহ্ম ভবতি . যস্তু পরমতত্ত্ব-
রহস্যাথর্বণমহানারাযণোপনিষদমধীতে সর্বেভ্যঃ
পাপেভ্যো মুক্তো ভবতি . জ্ঞানাজ্ঞানকৃতেভ্যঃ পাতকেভ্যো
মুক্তো ভবতি . মহাপাতকেভ্যঃ পূতো ভবতি . রহস্যকৃত-
প্রকাশকৃতচিরকালাত্যন্তকৃতেভ্যস্তেভ্যঃ সর্বেভ্যঃ
পাপেভ্যো মুক্তো ভবতি . স সকললোকাঞ্জযতি . স সকলমন্ত্র-
জপনিষ্ঠো ভবতি . স সকলবেদান্তরহস্যাধিগতপরমার্থজ্ঞো
ভবতি . স সকলভোগভুগ্ভবতি . স সকলযোগবিদ্ভবতি . স সকল-
জগত্পরিপালকো ভবতি . সোঽদ্বৈতপরমানন্দলক্ষণং পরব্রহ্ম
ভবতি . ইদং পরমতত্ত্বরহস্যং ন বাচ্যং গুরুভক্তিবিহীনায .
ন চাশুশ্রূষবে বাচ্যম্ . ন তপোবিহীনায নাস্তিকায .
ন দাম্ভিকায মদ্ভক্তিবিহীনায . মাত্সর্যাঙ্কিততনবে ন
বাচ্যম্ . ন বাচ্যং মদসূযাপরায কৃতঘ্নায . ইদং
পরমরহস্যং যো মদ্ভক্তেষ্বভিধাস্যতি . মদ্ভক্তিনিষ্ঠো
ভূত্বা মামেব প্রাপ্স্যতি . আবযোর্য ইমং সংবাদমধ্যেষ্যতি .
স নরো ব্রহ্মনিষ্ঠো ভবতি . শ্রদ্ধাবাননসূযুঃ শ্রুণুযা-
ত্পঠতি বা য ইমং সংবাদমাবযোঃ স পুরুষো মত্সাযুজ্যমেতি .
ততো মহাবিষ্ণুস্তিরোদধে . ততো ব্রহ্মা স্বস্থানং জগামেত্যুপনিষত্ ..
ইত্যাথর্বণমহানারাযণোপনিষদি পরমসাযুজ্যমুক্তি-
স্বরূপনিরূপণং নামাষ্টমোঽধ্যাযঃ .. ৮..
ইতি ত্রিপাদ্বিভূতিমহানারাযণোপনিষত্সমাপ্তা ..

<