কঠ

.. কঠোপনিষত্  ..
      ॐ
   .. অথ কঠোপনিষদ্ ..
ॐ সহ নাববতু . সহ নৌ ভুনক্তু . সহবীর্যং করবাবহৈ .
তেজস্বি নাবধীতমস্তু . মা বিদ্বিষাবহৈ ..
   ॐ শান্তিঃ শান্তিঃ শান্তিঃ .

       পর্ব ১
       কাণ্ড ১    

ॐ উশন্ হ বৈ বাজশ্রবসঃ সর্ববেদসং দদৌ .
তস্য হ নচিকেতা নাম পুত্র আস .. ১..
তঁ হ কুমারঁ সন্তং দক্ষিণাসু
নীযমানাসু শ্রদ্ধাবিবেশ সোঽমন্যত .. ২..
পীতোদকা জগ্ধতৃণা দুগ্ধদোহা নিরিন্দ্রিযাঃ .
অনন্দা নাম তে লোকাস্তান্ স গচ্ছতি তা দদত্ .. ৩..
স হোবাচ পিতরং তত কস্মৈ মাং দাস্যসীতি .
দ্বিতীযং তৃতীযং তঁ হোবাচ মৃত্যবে ত্বা দদামীতি .. ৪..
বহূনামেমি প্রথমো  বহূনামেমি মধ্যমঃ .
কিঁ স্বিদ্যমস্য কর্তব্যং যন্মযাঽদ্য করিষ্যতি .. ৫..
অনুপশ্য যথা পূর্বে প্রতিপশ্য তথাঽপরে .
সস্যমিব মর্ত্যঃ পচ্যতে সস্যমিবাজাযতে পুনঃ .. ৬..
বৈশ্বানরঃ প্রবিশত্যতিথির্ব্রাহ্মণো গৃহান্ .
তস্যৈতাঁ শান্তিং কুর্বন্তি হর বৈবস্বতোদকম্ .. ৭..
আশাপ্রতীক্ষে সংগতঁ সূনৃতাং
    চেষ্টাপূর্তে পুত্রপশূঁশ্চ সর্বান্ .
এতদ্বৃঙ্ক্তে পুরুষস্যাল্পমেধসো
    যস্যানশ্নন্বসতি ব্রাহ্মণো গৃহে .. ৮..
তিস্রো রাত্রীর্যদবাত্সীর্গৃহে মে-
    ঽনশ্নন্ ব্রহ্মন্নতিথির্নমস্যঃ .
নমস্তেঽস্তু ব্রহ্মন্ স্বস্তি মেঽস্তু
    তস্মাত্প্রতি ত্রীন্বরান্বৃণীষ্ব .. ৯..
শান্তসংকল্পঃ সুমনা যথা স্যাদ্
    বীতমন্যুর্গৌতমো মাঽভি মৃত্যো .
ত্বত্প্রসৃষ্টম্ মাঽভিবদেত্প্রতীত
    এতত্ ত্রযাণাং প্রথমং বরং বৃণে .. ১০..
যথা পুরস্তাদ্ ভবিতা প্রতীত
    ঔদ্দালকিরারুণির্মত্প্রসৃষ্টঃ .
সুখঁ রাত্রীঃ শযিতা বীতমন্যুঃ
    ত্বাং দদৃশিবান্মৃত্যুমুখাত্ প্রমুক্তম্ .. ১১..
স্বর্গে লোকে ন ভযং কিংচনাস্তি
    ন তত্র ত্বং ন জরযা বিভেতি .
উভে তীর্ত্বাঽশনাযাপিপাসে
    শোকাতিগো মোদতে স্বর্গলোকে .. ১২..
স ত্বমগ্নিঁ স্বর্গ্যমধ্যেষি মৃত্যো
    প্রব্রূহি ত্বঁ শ্রদ্দধানায মহ্যম্ .
স্বর্গলোকা অমৃতত্বং ভজন্ত
    এতদ্ দ্বিতীযেন বৃণে বরেণ .. ১৩..
প্র তে ব্রবীমি তদু মে নিবোধ
    স্বর্গ্যমগ্নিং নচিকেতঃ প্রজানন্ .
অনন্তলোকাপ্তিমথো প্রতিষ্ঠাং
    বিদ্ধি ত্বমেতং নিহিতং গুহাযাম্ .. ১৪..
লোকাদিমগ্নিং তমুবাচ তস্মৈ
    যা ইষ্টকা যাবতীর্বা যথা বা .
স চাপি তত্প্রত্যবদদ্যথোক্তং
    অথাস্য মৃত্যুঃ পুনরেবাহ তুষ্টঃ .. ১৫..
তমব্রবীত্ প্রীযমাণো মহাত্মা
    বরং তবেহাদ্য দদামি ভূযঃ .
তবৈব নাম্না ভবিতাঽযমগ্নিঃ
    সৃঙ্কাং চেমামনেকরূপাং গৃহাণ .. ১৬..
ত্রিণাচিকেতস্ত্রিভিরেত্য সন্ধিং
    ত্রিকর্মকৃত্তরতি জন্মমৃত্যূ .
ব্রহ্মজজ্ঞং দেবমীড্যং বিদিত্বা
    নিচায্যেমাঁ শান্তিমত্যন্তমেতি .. ১৭..
ত্রিণাচিকেতস্ত্রযমেতদ্বিদিত্বা
    য এবং বিদ্বাঁশ্চিনুতে নাচিকেতম্ .
স মৃত্যুপাশান্ পুরতঃ প্রণোদ্য
    শোকাতিগো মোদতে স্বর্গলোকে .. ১৮..
এষ তেঽগ্নির্নচিকেতঃ স্বর্গ্যো
    যমবৃণীথা দ্বিতীযেন বরেণ .
এতমগ্নিং তবৈব প্রবক্ষ্যন্তি জনাসঃ
    তৃতীযং বরং নচিকেতো বৃণীষ্ব .. ১৯..
যেযং প্রেতে বিচিকিত্সা মনুষ্যে-
    ঽস্তীত্যেকে নাযমস্তীতি চৈকে .
এতদ্বিদ্যামনুশিষ্টস্ত্বযাঽহং
    বরাণামেষ বরস্তৃতীযঃ .. ২০..
দেবৈরত্রাপি বিচিকিত্সিতং পুরা
    ন হি সুবিজ্ঞেযমণুরেষ ধর্মঃ .
অন্যং বরং নচিকেতো বৃণীষ্ব
    মা মোপরোত্সীরতি মা সৃজৈনম্ .. ২১..
দেবৈরত্রাপি বিচিকিত্সিতং কিল
    ত্বং চ মৃত্যো যন্ন সুজ্ঞেযমাত্থ .
বক্তা চাস্য ত্বাদৃগন্যো ন লভ্যো
    নান্যো বরস্তুল্য এতস্য কশ্চিত্ .. ২২..
শতাযুষঃ পুত্রপৌত্রান্বৃণীষ্বা
    বহূন্পশূন্ হস্তিহিরণ্যমশ্বান্ .
ভূমের্মহদাযতনং বৃণীষ্ব
    স্বযং চ জীব শরদো যাবদিচ্ছসি .. ২৩..
এতত্তুল্যং যদি মন্যসে বরং
    বৃণীষ্ব বিত্তং চিরজীবিকাং চ .
মহাভূমৌ নচিকেতস্ত্বমেধি
    কামানাং ত্বা কামভাজং করোমি .. ২৪..
যে যে কামা দুর্লভা মর্ত্যলোকে
    সর্বান্ কামাঁশ্ছন্দতঃ প্রার্থযস্ব .
ইমা রামাঃ সরথাঃ সতূর্যা
    ন হীদৃশা লম্ভনীযা মনুষ্যৈঃ .
আভির্মত্প্রত্তাভিঃ পরিচারযস্ব
    নচিকেতো মরণং মাঽনুপ্রাক্ষীঃ .. ২৫..
শ্বোভাবা মর্ত্যস্য যদন্তকৈতত্
    সর্বেংদ্রিযাণাং জরযংতি তেজঃ .
অপি সর্বং জীবিতমল্পমেব
    তবৈব বাহাস্তব নৃত্যগীতে .. ২৬..
ন বিত্তেন তর্পণীযো মনুষ্যো
    লপ্স্যামহে বিত্তমদ্রাক্ষ্ম চেত্ত্বা .
জীবিষ্যামো যাবদীশিষ্যসি ত্বং
    বরস্তু মে বরণীযঃ স এব .. ২৭..
অজীর্যতামমৃতানামুপেত্য
    জীর্যন্মর্ত্যঃ ক্বধঃস্থঃ প্রজানন্ .
অভিধ্যাযন্ বর্ণরতিপ্রমোদান্
    অতিদীর্ঘে জীবিতে কো রমেত .. ২৮..
যস্মিন্নিদং বিচিকিত্সন্তি মৃত্যো
    যত্সাম্পরাযে মহতি ব্রূহি নস্তত্ .
যোঽযং বরো গূঢমনুপ্রবিষ্টো
    নান্যং তস্মান্নচিকেতা বৃণীতে .. ২৯..
.. ইতি কাঠকোপনিষদি প্রথমাধ্যাযে প্রথমা বল্লী ..
——————————————————————————–
            পর্ব ১
            কাণ্ড ২

অন্যচ্ছ্রেযোঽন্যদুতৈব প্রেয-
    স্তে উভে নানার্থে পুরুষঁ সিনীতঃ .
তযোঃ শ্রেয আদদানস্য সাধু
    ভবতি হীযতেঽর্থাদ্য উ প্রেযো বৃণীতে .. ১..
শ্রেযশ্চ প্রেযশ্চ মনুষ্যমেতঃ
    তৌ সম্পরীত্য বিবিনক্তি ধীরঃ .
শ্রেযো হি ধীরোঽভি প্রেযসো বৃণীতে
    প্রেযো মন্দো যোগক্ষেমাদ্বৃণীতে .. ২..
স ত্বং প্রিযান্প্রিযরূপাংশ্চ কামান্
    অভিধ্যাযন্নচিকেতোঽত্যস্রাক্ষীঃ .
নৈতাং সৃঙ্কাং বিত্তমযীমবাপ্তো
    যস্যাং মজ্জন্তি বহবো মনুষ্যাঃ .. ৩..
দূরমেতে বিপরীতে বিষূচী
    অবিদ্যা যা চ বিদ্যেতি জ্ঞাতা .
বিদ্যাভীপ্সিনং নচিকেতসং মন্যে
    ন ত্বা কামা বহবোঽলোলুপন্ত .. ৪..
অবিদ্যাযামন্তরে বর্তমানাঃ
    স্বযং ধীরাঃ পণ্ডিতংমন্যমানাঃ .
দন্দ্রম্যমাণাঃ পরিযন্তি মূঢা
    অন্ধেনৈব নীযমানা যথান্ধাঃ .. ৫..
ন সাম্পরাযঃ প্রতিভাতি বালং
    প্রমাদ্যন্তং বিত্তমোহেন মূঢম্ .
অযং লোকো নাস্তি পর ইতি মানী
    পুনঃ পুনর্বশমাপদ্যতে মে .. ৬..
শ্রবণাযাপি বহুভির্যো ন লভ্যঃ
    শৃণ্বন্তোঽপি বহবো যং ন বিদ্যুঃ .
আশ্চর্যো বক্তা কুশলোঽস্য লব্ধা
    আশ্চর্যো জ্ঞাতা কুশলানুশিষ্টঃ .. ৭..
ন নরেণাবরেণ প্রোক্ত এষ
    সুবিজ্ঞেযো বহুধা চিন্ত্যমানঃ .
অনন্যপ্রোক্তে গতিরত্র নাস্তি
    অণীযান্ হ্যতর্ক্যমণুপ্রমাণাত্ .. ৮..
নৈষা তর্কেণ মতিরাপনেযা
    প্রোক্তান্যেনৈব সুজ্ঞানায প্রেষ্ঠ .
যাং ত্বমাপঃ সত্যধৃতির্বতাসি
    ত্বাদৃঙ্নো ভূযান্নচিকেতঃ প্রষ্টা .. ৯..
জানাম্যহং শেবধিরিত্যনিত্যং
    ন হ্যধ্রুবৈঃ প্রাপ্যতে হি ধ্রুবং তত্ .
ততো মযা নাচিকেতশ্চিতোঽগ্নিঃ
    অনিত্যৈর্দ্রব্যৈঃ প্রাপ্তবানস্মি নিত্যম্ .. ১০..
কামস্যাপ্তিং জগতঃ প্রতিষ্ঠাং
    ক্রতোরানন্ত্যমভযস্য পারম্ .
স্তোমমহদুরুগাযং প্রতিষ্ঠাং দৃষ্ট্বা
    ধৃত্যা ধীরো নচিকেতোঽত্যস্রাক্ষীঃ .. ১১..
তং দুর্দর্শং গূঢমনুপ্রবিষ্টং
    গুহাহিতং গহ্বরেষ্ঠং পুরাণম্ .
অধ্যাত্মযোগাধিগমেন দেবং
    মত্বা ধীরো হর্ষশোকৌ জহাতি .. ১২..
এতচ্ছ্রুত্বা সম্পরিগৃহ্য মর্ত্যঃ
    প্রবৃহ্য ধর্ম্যমণুমেতমাপ্য .
স মোদতে মোদনীযঁ হি লব্ধ্বা
    বিবৃতঁ সদ্ম নচিকেতসং মন্যে .. ১৩..
অন্যত্র ধর্মাদন্যত্রাধর্মা-
    দন্যত্রাস্মাত্কৃতাকৃতাত্ .
অন্যত্র ভূতাচ্চ ভব্যাচ্চ
    যত্তত্পশ্যসি তদ্বদ .. ১৪..
সর্বে বেদা যত্পদমামনন্তি
    তপাঁসি সর্বাণি চ যদ্বদন্তি .
যদিচ্ছন্তো ব্রহ্মচর্যং চরন্তি
    তত্তে পদঁ সংগ্রহেণ ব্রবীম্যোমিত্যেতত্ .. ১৫..
এতদ্ধ্যেবাক্ষরং ব্রহ্ম এতদ্ধ্যেবাক্ষরং পরম্ .
এতদ্ধ্যেবাক্ষরং জ্ঞাত্বা যো যদিচ্ছতি তস্য তত্ .. ১৬..
এতদালম্বনঁ শ্রেষ্ঠমেতদালম্বনং পরম্ .
এতদালম্বনং জ্ঞাত্বা ব্রহ্মলোকে মহীযতে .. ১৭..
ন জাযতে ম্রিযতে বা বিপশ্চিন্
    নাযং কুতশ্চিন্ন বভূব কশ্চিত্ .
অজো নিত্যঃ শাশ্বতোঽযং পুরাণো
    ন হন্যতে হন্যমানে শরীরে .. ১৮..
হন্তা চেন্মন্যতে হন্তুঁ হতশ্চেন্মন্যতে হতম্ .
উভৌ তৌ ন বিজানীতো নাযঁ হন্তি ন হন্যতে .. ১৯..
অণোরণীযান্মহতো মহীযা-
    নাত্মাঽস্য জন্তোর্নিহিতো গুহাযাম্ .
তমক্রতুঃ পশ্যতি বীতশোকো
    ধাতুপ্রসাদান্মহিমানমাত্মনঃ .. ২০..
আসীনো দূরং ব্রজতি শযানো যাতি সর্বতঃ .
কস্তং মদামদং দেবং মদন্যো জ্ঞাতুমর্হতি .. ২১..
অশরীরঁ শরীরেষ্বনবস্থেষ্ববস্থিতম্ .
মহান্তং বিভুমাত্মানং মত্বা ধীরো ন শোচতি .. ২২..
নাযমাত্মা প্রবচনেন লভ্যো
    ন মেধযা ন বহুনা শ্রুতেন .
যমেবৈষ বৃণুতে তেন লভ্যঃ
    তস্যৈষ আত্মা বিবৃণুতে তনূঁ স্বাম্ .. ২৩..
নাবিরতো দুশ্চরিতান্নাশান্তো নাসমাহিতঃ .
নাশান্তমানসো বাঽপি প্রজ্ঞানেনৈনমাপ্নুযাত্ .. ২৪..
যস্য ব্রহ্ম চ ক্ষত্রং চ উভে ভবত ওদনঃ .
মৃত্যুর্যস্যোপসেচনং ক ইত্থা বেদ যত্র সঃ .. ২৫..
  ইতি কাঠকোপনিষদি প্রথমাধ্যাযে দ্বিতীযা বল্লী ..
——————————————————————————–
          পর্ব ১
         কাণ্ড ৩

ঋতং পিবন্তৌ সুকৃতস্য লোকে
    গুহাং প্রবিষ্টৌ পরমে পরার্ধে .
ছাযাতপৌ ব্রহ্মবিদো বদন্তি
    পঞ্চাগ্নযো যে চ ত্রিণাচিকেতাঃ .. ১..
যঃ সেতুরীজানানামক্ষরং ব্রহ্ম যত্ পরম্ .
অভযং তিতীর্ষতাং পারং নাচিকেতঁ শকেমহি .. ২..
আত্মানঁ রথিতং বিদ্ধি শরীরঁ রথমেব তু .
বুদ্ধিং তু সারথিং বিদ্ধি মনঃ প্রগ্রহমেব চ .. ৩..
ইন্দ্রিযাণি হযানাহুর্বিষযাঁ স্তেষু গোচরান্ .
আত্মেন্দ্রিযমনোযুক্তং ভোক্তেত্যাহুর্মনীষিণঃ .. ৪..
যস্ত্ববিজ্ঞানবান্ভবত্যযুক্তেন মনসা সদা .
তস্যেন্দ্রিযাণ্যবশ্যানি দুষ্টাশ্বা ইব সারথেঃ .. ৫..
যস্তু বিজ্ঞানবান্ভবতি যুক্তেন মনসা সদা .
তস্যেন্দ্রিযাণি বশ্যানি সদশ্বা ইব সারথেঃ .. ৬..
যস্ত্ববিজ্ঞানবান্ভবত্যমনস্কঃ সদাঽশুচিঃ .
ন স তত্পদমাপ্নোতি সংসারং চাধিগচ্ছতি .. ৭..
যস্তু বিজ্ঞানবান্ভবতি সমনস্কঃ সদা শুচিঃ .
স তু তত্পদমাপ্নোতি যস্মাদ্ভূযো ন জাযতে .. ৮..
বিজ্ঞানসারথির্যস্তু মনঃ প্রগ্রহবান্নরঃ .
সোঽধ্বনঃ পারমাপ্নোতি তদ্বিষ্ণোঃ পরমং পদম্ .. ৯..
ইন্দ্রিযেভ্যঃ পরা হ্যর্থা অর্থেভ্যশ্চ পরং মনঃ .
মনসস্তু পরা বুদ্ধির্বুদ্ধেরাত্মা মহান্পরঃ .. ১০..
মহতঃ পরমব্যক্তমব্যক্তাত্পুরুষঃ পরঃ .
পুরুষান্ন পরং কিংচিত্সা কাষ্ঠা সা পরা গতিঃ .. ১১..
এষ সর্বেষু ভূতেষু গূঢোঽঽত্মা ন প্রকাশতে .
দৃশ্যতে ত্বগ্র্যযা বুদ্ধ্যা সূক্ষ্মযা সূক্ষ্মদর্শিভিঃ .. ১২..
যচ্ছেদ্বাঙ্মনসী প্রাজ্ঞস্তদ্যচ্ছেজ্জ্ঞান আত্মনি .
জ্ঞানমাত্মনি মহতি নিযচ্ছেত্তদ্যচ্ছেচ্ছান্ত আত্মনি .. ১৩..
উত্তিষ্ঠত জাগ্রত
    প্রাপ্য বরান্নিবোধত .
ক্ষুরস্য ধারা নিশিতা দুরত্যযা
    দুর্গং পথস্তত্কবযো বদন্তি .. ১৪..
অশব্দমস্পর্শমরূপমব্যযং
    তথাঽরসং নিত্যমগন্ধবচ্চ যত্ .
অনাদ্যনন্তং মহতঃ পরং ধ্রুবং
    নিচায্য তন্মৃত্যুমুখাত্ প্রমুচ্যতে .. ১৫..
নাচিকেতমুপাখ্যানং মৃত্যুপ্রোক্তঁ সনাতনম্ .
উক্ত্বা শ্রুত্বা চ মেধাবী ব্রহ্মলোকে মহীযতে .. ১৬..
য ইমং পরমং গুহ্যং শ্রাবযেদ্ ব্রহ্মসংসদি .
প্রযতঃ শ্রাদ্ধকালে বা তদানন্ত্যায কল্পতে .
তদানন্ত্যায কল্পত ইতি .. ১৭..
  ইতি কাঠকোপনিষদি প্রথমাধ্যাযে তৃতীযা বল্লী ..
——————————————————————————–
           পর্ব ২
           কাণ্ড ১

পরাঞ্চি খানি ব্যতৃণত্ স্বযম্ভূ-
    স্তস্মাত্পরাঙ্পশ্যতি নান্তরাত্মন্ .
কশ্চিদ্ধীরঃ প্রত্যগাত্মানমৈক্ষ-
    দাবৃত্তচক্ষুরমৃতত্বমিচ্ছন্ .. ১..
পরাচঃ কামাননুযন্তি বালা-
    স্তে মৃত্যোর্যন্তি বিততস্য পাশম্ .
অথ ধীরা অমৃতত্বং বিদিত্বা
    ধ্রুবমধ্রুবেষ্বিহ ন প্রার্থযন্তে .. ২..
যেন রূপং রসং গন্ধং শব্দান্ স্পর্শাঁশ্চ মৈথুনান্ .
এতেনৈব বিজানাতি কিমত্র পরিশিষ্যতে . এতদ্বৈ তত্ .. ৩..
স্বপ্নান্তং জাগরিতান্তং চোভৌ যেনানুপশ্যতি .
মহান্তং বিভুমাত্মানং মত্বা ধীরো ন শোচতি .. ৪..
য ইমং মধ্বদং বেদ আত্মানং জীবমন্তিকাত্ .
ঈশানং ভূতভব্যস্য ন ততো বিজুগুপ্সতে . এতদ্বৈ তত্ .. ৫..
যঃ পূর্বং তপসো জাতমদ্ভ্যঃ পূর্বমজাযত .
গুহাং প্রবিশ্য তিষ্ঠন্তং যো ভূতেভির্ব্যপশ্যত . এতদ্বৈ তত্ .. ৬..
যা প্রাণেন সংভবত্যদিতির্দেবতামযী .
গুহাং প্রবিশ্য তিষ্ঠন্তীং যা ভূতেভির্ব্যজাযত . এতদ্বৈ তত্ .. ৭..
অরণ্যোর্নিহিতো জাতবেদা গর্ভ ইব সুভৃতো গর্ভিণীভিঃ .
দিবে দিবে ঈড্যো জাগৃবদ্ভির্হবিষ্মদ্ভির্মনুষ্যেভিরগ্নিঃ . এতদ্বৈ তত্ .. ৮..
যতশ্চোদেতি সূর্যোঽস্তং যত্র চ গচ্ছতি .
তং দেবাঃ সর্বেঽর্পিতাস্তদু নাত্যেতি কশ্চন . এতদ্বৈ তত্ .. ৯..
যদেবেহ তদমুত্র যদমুত্র তদন্বিহ .
মৃত্যোঃ স মৃত্যুমাপ্নোতি য ইহ নানেব পশ্যতি .. ১০..
মনসৈবেদমাপ্তব্যং নেহ নানাঽস্তি কিংচন .
মৃত্যোঃ স মৃত্যুং গচ্ছতি য ইহ নানেব পশ্যতি .. ১১..
অঙ্গুষ্ঠমাত্রঃ পুরুষো মধ্য আত্মনি তিষ্ঠতি .
ঈশানং ভূতভব্যস্য ন ততো বিজুগুপ্সতে . এতদ্বৈ তত্ .. ১২..
অঙ্গুষ্ঠমাত্রঃ পুরুষো জ্যোতিরিবাধূমকঃ .
ঈশানো ভূতভব্যস্য স এবাদ্য স উ শ্বঃ . এতদ্বৈ তত্ .. ১৩..
যথোদকং দুর্গে বৃষ্টং পর্বতেষু বিধাবতি .
এবং ধর্মান্ পৃথক্ পশ্যংস্তানেবানুবিধাবতি .. ১৪..
যথোদকং শুদ্ধে শুদ্ধমাসিক্তং তাদৃগেব ভবতি .
এবং মুনের্বিজানত আত্মা ভবতি গৌতম .. ১৫..
  ইতি কাঠকোপনিষদি দ্বিতীযাধ্যাযে প্রথমা বল্লী ..
——————————————————————————–
           পর্ব ২
           কাণ্ড ২

পুরমেকাদশদ্বারমজস্যাবক্রচেতসঃ .
অনুষ্ঠায ন শোচতি বিমুক্তশ্চ বিমুচ্যতে . এতদ্বৈ তত্ .. ১..
হঁসঃ শুচিষদ্বসুরান্তরিক্ষসদ্-
    হোতা বেদিষদতিথির্দুরোণসত্ .
নৃষদ্বরসদৃতসদ্ব্যোমসদ্
    অব্জা গোজা ঋতজা অদ্রিজা ঋতং বৃহত্ .. ২..
ঊর্ধ্বং প্রাণমুন্নযত্যপানং প্রত্যগস্যতি .
মধ্যে বামনমাসীনং বিশ্বে দেবা উপাসতে .. ৩..
অস্য বিস্রংসমানস্য শরীরস্থস্য দেহিনঃ .
দেহাদ্বিমুচ্যমানস্য কিমত্র পরিশিষ্যতে . এতদ্বৈ তত্ .. ৪..
ন প্রাণেন নাপানেন মর্ত্যো জীবতি কশ্চন .
ইতরেণ তু জীবন্তি যস্মিন্নেতাবুপাশ্রিতৌ .. ৫..
হন্ত ত ইদং প্রবক্ষ্যামি গুহ্যং ব্রহ্ম সনাতনম্ .
যথা চ মরণং প্রাপ্য আত্মা ভবতি গৌতম .. ৬..
যোনিমন্যে প্রপদ্যন্তে শরীরত্বায দেহিনঃ .
স্থাণুমন্যেঽনুসংযন্তি যথাকর্ম যথাশ্রুতম্ .. ৭..
য এষ সুপ্তেষু জাগর্তি কামং কামং পুরুষো নির্মিমাণঃ .
তদেব শুক্রং তদ্ব্রহ্ম তদেবামৃতমুচ্যতে .
তস্মিঁল্লোকাঃ শ্রিতাঃ সর্বে তদু নাত্যেতি কশ্চন . এতদ্বৈ তত্ .. ৮..
অগ্নির্যথৈকো ভুবনং প্রবিষ্টো
    রূপং রূপং প্রতিরূপো বভূব .
একস্তথা সর্বভূতান্তরাত্মা
    রূপং রূপং প্রতিরূপো বহিশ্চ .. ৯..
বাযুর্যথৈকো ভুবনং প্রবিষ্টো
    রূপং রূপং প্রতিরূপো বভূব .
একস্তথা সর্বভূতান্তরাত্মা
    রূপং রূপং প্রতিরূপো বহিশ্চ .. ১০..
সূর্যো যথা সর্বলোকস্য চক্ষুঃ
    ন লিপ্যতে চাক্ষুষৈর্বাহ্যদোষৈঃ .
একস্তথা সর্বভূতান্তরাত্মা
    ন লিপ্যতে লোকদুঃখেন বাহ্যঃ .. ১১..
একো বশী সর্বভূতান্তরাত্মা
    একং রূপং বহুধা যঃ করোতি .
তমাত্মস্থং যেঽনুপশ্যন্তি ধীরাঃ
    তেষাং সুখং শাশ্বতং নেতরেষাম্ .. ১২..
নিত্যোঽনিত্যানাং চেতনশ্চেতনানাম্
    একো বহূনাং যো বিদধাতি কামান্ .
তমাত্মস্থং যেঽনুপশ্যন্তি ধীরাঃ
    তেষাং শান্তিঃ  শাশ্বতী নেতরেষাম্ .. ১৩..
তদেতদিতি মন্যন্তেঽনির্দেশ্যং পরমং সুখম্ .
কথং নু তদ্বিজানীযাং কিমু ভাতি বিভাতি বা .. ১৪..
ন তত্র সূর্যো ভাতি ন চন্দ্রতারকং
    নেমা বিদ্যুতো ভান্তি কুতোঽযমগ্নিঃ .
তমেব ভান্তমনুভাতি সর্বং
    তস্য ভাসা সর্বমিদং বিভাতি .. ১৫..
  ইতি কাঠকোপনিষদি দ্বিতীযাধ্যাযে দ্বিতীযা বল্লী ..
——————————————————————————–
            পর্ব ২
           কাণ্ড ৩

ঊর্ধ্বমূলোঽবাক্শাখ এষোঽশ্বত্থঃ সনাতনঃ .
তদেব শুক্রং তদ্ব্রহ্ম তদেবামৃতমুচ্যতে .
তস্মিঁল্লোকাঃ শ্রিতাঃ সর্বে তদু নাত্যেতি কশ্চন . এতদ্বৈ তত্ .. ১..
যদিদং কিং চ জগত্ সর্বং প্রাণ এজতি নিঃসৃতম্ .
মহদ্ভযং বজ্রমুদ্যতং য এতদ্বিদুরমৃতাস্তে ভবন্তি .. ২..
ভযাদস্যাগ্নিস্তপতি ভযাত্তপতি সূর্যঃ .
ভযাদিন্দ্রশ্চ বাযুশ্চ মৃত্যুর্ধাবতি পঞ্চমঃ .. ৩..
ইহ চেদশকদ্বোদ্ধুং প্রাক্ষরীরস্য বিস্রসঃ .
ততঃ সর্গেষু লোকেষু শরীরত্বায কল্পতে .. ৪..
যথাঽঽদর্শে তথাঽঽত্মনি যথা স্বপ্নে তথা পিতৃলোকে .
যথাঽপ্সু পরীব দদৃশে তথা গন্ধর্বলোকে
   ছাযাতপযোরিব ব্রহ্মলোকে .. ৫..
ইন্দ্রিযাণাং পৃথগ্ভাবমুদযাস্তমযৌ চ যত্ .
পৃথগুত্পদ্যমানানাং মত্বা ধীরো ন শোচতি .. ৬..
ইন্দ্রিযেভ্যঃ পরং মনো মনসঃ সত্ত্বমুত্তমম্ .
সত্ত্বাদধি মহানাত্মা মহতোঽব্যক্তমুত্তমম্ .. ৭..
অব্যক্তাত্তু পরঃ পুরুষো ব্যাপকোঽলিঙ্গ এব চ .
যং জ্ঞাত্বা মুচ্যতে জন্তুরমৃতত্বং চ গচ্ছতি .. ৮..
ন সংদৃশে তিষ্ঠতি রূপমস্য
    ন চক্ষুষা পশ্যতি কশ্চনৈনম্ .
হৃদা মনীষা মনসাঽভিক্লৃপ্তো
    য এতদ্বিদুরমৃতাস্তে ভবন্তি .. ৯..
যদা পঞ্চাবতিষ্ঠন্তে জ্ঞানানি মনসা সহ .
বুদ্ধিশ্চ ন বিচেষ্টতে তামাহুঃ পরমাং গতিম্ .. ১০..
তাং যোগমিতি মন্যন্তে স্থিরামিন্দ্রিযধারণাম্ .
অপ্রমত্তস্তদা ভবতি যোগো হি প্রভবাপ্যযৌ .. ১১..
নৈব বাচা ন মনসা প্রাপ্তুং শক্যো ন চক্ষুষা .
অস্তীতি ব্রুবতোঽন্যত্র কথং তদুপলভ্যতে .. ১২..
অস্তীত্যেবোপলব্ধব্যস্তত্ত্বভাবেন চোভযোঃ .
অস্তীত্যেবোপলব্ধস্য তত্ত্বভাবঃ প্রসীদতি .. ১৩..
যদা সর্বে প্রমুচ্যন্তে কামা যেঽস্য হৃদি শ্রিতাঃ .
অথ মর্ত্যোঽমৃতো ভবত্যত্র ব্রহ্ম সমশ্নুতে .. ১৪..
যথা সর্বে প্রভিদ্যন্তে হৃদযস্যেহ গ্রন্থযঃ .
অথ মর্ত্যোঽমৃতো ভবত্যেতাবদ্ধ্যনুশাসনম্ .. ১৫..
শতং চৈকা চ হৃদযস্য নাড্য-
    স্তাসাং মূর্ধানমভিনিঃসৃতৈকা .
তযোর্ধ্বমাযন্নমৃতত্বমেতি
    বিষ্বঙ্ঙন্যা উত্ক্রমণে ভবন্তি .. ১৬..
অঙ্গুষ্ঠমাত্রঃ পুরুষোঽন্তরাত্মা
    সদা জনানাং হৃদযে সংনিবিষ্টঃ .
তং স্বাচ্ছরীরাত্প্রবৃহেন্মুঞ্জাদিবেষীকাং ধৈর্যেণ .
তং বিদ্যাচ্ছুক্রমমৃতং তং বিদ্যাচ্ছুক্রমমৃতমিতি .. ১৭..
মৃত্যুপ্রোক্তাং নচিকেতোঽথ লব্ধ্বা
    বিদ্যামেতাং যোগবিধিং চ কৃত্স্নম্ .
ব্রহ্মপ্রাপ্তো বিরজোঽভূদ্বিমৃত্যু-
    রন্যোঽপ্যেবং যো বিদধ্যাত্মমেব .. ১৮..
সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ .. ১৯..
   ॐ শান্তিঃ শান্তিঃ শান্তিঃ ..
  ইতি কাঠকোপনিষদি দ্বিতীযাধ্যাযে তৃতীযা বল্লী ..
ॐ সহ নাববতু . সহ নৌ ভুনক্তু . সহবীর্যং করবাবহৈ .
তেজস্বি নাবধীতমস্তু . মা বিদ্বিষাবহৈ ..
   ॐ শান্তিঃ শান্তিঃ শান্তিঃ ..
  ॐ তত্ সত্ ..

<