গণেশ গীতা

 || গণেশ গীতা ||

ক্রমাংক অধ্যায় নাম শ্লোকসংখ্যা ৪১৪
১ সাংখ্যসারার্থয়োগ ৬৯
২ কর্ময়োগ ৪৩
৩ বিজ্ঞানপ্রতিপাদন ৫০
৪ বৈধসংন্যাসয়োগ ৩৭
৫ যোগাবৃত্তিপ্রশংসন ২৭
৬ বুদ্ধিয়োগ
২১
৭ উপাসনায়োগ ২৫
৮ বিশ্বরূপদর্শন ২৬
৯ ক্ষেত্রজ্ঞাতৃজ্ঞেয়বিবেকয়োগ ৪১
১০ উপদেশয়োগ ২৩
১১ ত্রিবিধবস্তুবিবেকনিরূপণ ৫২

|| ওঁ নমঃ শ্রীগণেশায় ||
|| অথ শ্রীমদ্গণেশগীতা প্রারভ্যতে ||
১
|| প্রথমোঽধ্যায়ঃ ||
|| সাঙ্খ্যসারার্থ যোগঃ ||
ক উবাচ –
এবমেব পুরা পৃষ্টঃ শৌনকেন মহাত্মনা |
স সূতঃ কথয়ামাস গীতাং ব্যাসমুখাচ্ছ্রুতাম্ || ১ ||
সূত উবাচ –
অষ্টাদশপুরাণোক্তমমৃতং প্রাশিতং ৎবয়া |
ততোঽতিরসবৎপাতুমিচ্ছাম্যমৃতমুত্তমম্ || ২ ||
যেনামৃতময়ো ভূৎবা পুমান্ব্রহ্মামৃতং যতঃ |
যোগামৃতং মহাভাগ তন্মে করুণয়া বদ || ৩ ||
ব্যাস উবাচ –
অথ গীতাং প্রবক্ষ্যামি যোগমার্গপ্রকাশিনীম্ |
নিয়ুক্তা পৃচ্ছতে সূত রাজ্ঞে গজমুখেন যা || ৪ ||
বরেণ্য উবাচ –
বিঘ্নেশ্বর মহাবাহো সর্ববিদ্যাবিশারদ |
সর্বশাস্ত্রার্থতত্ত্বজ্ঞ যোগং মে বক্তুমর্হসি || ৫ ||
শ্রীগজানন উবাচ –
সম্যগ্ব্যবসিতা রাজন্মতিস্তেঽনুগ্রহান্মম |
শৃণু গীতাং প্রবক্ষ্যামি যোগামৃতময়ীং নৃপ || ৬ ||
ন যোগং যোগমিত্যাহুর্যোগো যোগো ন চ শ্রিয়ঃ |
ন যোগো বিষয়ৈর্যোগো ন চ মাত্রাদিভিস্তদা || ৭ ||
যোগো যঃ পিতৃমাত্রাদের্ন স যোগো নরাধিপ |
যো যোগো বন্ধুপুত্রাদের্যশ্চাষ্টভূতিভিঃ সহ || ৮ ||
ন স যোগস্ত্রিয়া যোগো জগদদ্ভুতরূপয়া |
রাজ্যয়োগশ্চ নো যোগো ন যোগো গজবাজিভিঃ || ৯ ||
যোগো নেন্দ্রপদস্যাপি যোগো যোগার্থিনঃ প্রিয়ঃ |
যোগো যঃ সত্যলোকস্য ন স যোগো মতো মম || ১০ ||
শৈবস্য যোগো নো যোগো বৈষ্ণবস্য পদস্য যঃ |
ন যোগো ভূপ সূর্যৎবং চন্দ্রৎবং ন কুবেরতা || ১১ ||
নানিলৎবং নানলৎবং নামরৎবং ন কালতা |
ন বারুণ্যং ন নৈরৃত্যং যোগো ন সার্বভৌমতা || ১২ ||
যোগং নানাবিধং ভূপ যুঞ্জন্তি জ্ঞানিনস্ততম্ |
ভবন্তি বিতৃষা লোকে জিতাহারা বিরেতসঃ || ১৩ ||
পাবয়ন্ত্যখিলান্লোকান্বশীকৃতজগত্ত্রয়াঃ |
করুণাপূর্ণহৃদয়া বোধয়ন্ত্যপি কাংশ্চন || ১৪ ||
জীবন্মুক্তা হৃদে মগ্নাঃ পরমানন্দরূপিণি |
নিমীল্যাক্ষীণি পশ্যন্তঃ পরং ব্রহ্ম হৃদি স্থিতম্ || ১৫ ||
ধ্যায়ন্তঃ পরমং ব্রহ্ম চিত্তে যোগবশীকৃতম্ |
ভূতানি স্বাত্মনা তুল্যং সর্বাণি গণয়ন্তি তে || ১৬ ||
যেন কেনচিদাচ্ছিন্না যেন কেনচিদাহতাঃ |
যেন কেনচিদাকৃষ্টা যেন কেনচিদাশ্রিতাঃ || ১৭ ||
করুণাপূর্ণহৃদয়া ভ্রমন্তি ধরণীতলে |
অনুগ্রহায় লোকানাং জিতক্রোধা জিতেন্দ্রিয়াঃ || ১৮ ||
দেহমাত্রভৃতো ভূপ সমলোষ্টাশ্মকাঞ্চনাঃ |
এতাদৃশা মহাভাগ্যাঃ স্যুশ্চক্ষুর্গোচরাঃ প্রিয় || ১৯ ||
তমিদানীমহং বক্ষ্যে শৃণু যোগমনুত্তমম্ |
শ্রুৎবা যং মুচ্যতে জন্তুঃ পাপেভ্যো ভবসাগরাৎ || ২০ ||
শিবে বিষ্ণৌ চ শক্তৌ চ সূর্যে ময়ি নরাধিপ |
যাঽভেদবুদ্ধির্যোগঃ স সম্যগ্যোগো মতো মম || ২১ ||
অহমেব জগদ্যস্মাৎসৃজামি পালয়ামি চ |
কৃৎবা নানাবিধং বেষং সংহরামি স্বলীলয়া || ২২ ||
অহমেব মহাবিষ্ণুরহমেব সদাশিবঃ |
অহমেব মহাশক্তিরহমেবার্যমা প্রিয় || ২৩ ||
অহমেকো নৃণাং নাথো জাতঃ পঞ্চবিধঃ পুরা |
অজ্ঞানান্মা ন জানন্তি জগৎকারণকারণম্ || ২৪ ||
মত্তোঽগ্নিরাপো ধরণী মত্ত আকাশমারুতৌ |
ব্রহ্মা বিষ্ণুশ্চ রুদ্রশ্চ লোকপালা দিশো দশ || ২৫ ||
বসবো মনবো গাবো মনবঃ পশবোঽপি চ |
সরিতঃ সাগরা যক্ষা বৃক্ষাঃ পক্ষিগণা অপি || ২৬ ||
তথৈকবিংশতিঃ স্বর্গা নাগাঃ সপ্ত বনানি চ |
মনুষ্যাঃ পর্বতাঃ সাধ্যাঃ সিদ্ধা রক্ষোগণাস্তথা || ২৭ ||
অহং সাক্ষী জগচ্চক্ষুরলিপ্তঃ সর্বকর্মভিঃ |
অবিকারোঽপ্রমেয়োঽহমব্যক্তো বিশ্বগোঽব্যয়ঃ || ২৮ ||
অহমেব পরং ব্রহ্মাব্যয়ানন্দাত্মকং নৃপ |
মোহয়ত্যখিলান্মায়া শ্রেষ্ঠান্মম নরানমূন্ || ২৯ ||
সর্বদা ষড্বিকারেষু তানিয়ং যোজয়েৎ ভৃশম্ |
হিৎবাজাপটলং জন্তুরনেকৈর্জন্মভিঃ শনৈঃ || ৩০ ||
বিরজ্য বিন্দতি ব্রহ্ম বিষয়েষু সুবোধতঃ |
অচ্ছেদ্যং শস্ত্রসঙ্ঘাতৈরদাহ্যমনলেন চ || ৩১ ||
অক্লেদ্যং ভূপ ভুবনৈরশোষ্যং মারুতেন চ |
অবধ্যং বধ্যমানেঽপি শরীরেঽস্মিন্নরাধিপ || ৩২ ||
যামিমাং পুষ্পিতাং বাচং প্রশংসন্তি শ্রুতীরিতাম্ |
ত্রয়ীবাদরতা মূঢাস্ততোঽন্যন্মন্বতেঽপি ন || ৩৩ ||
কুর্বন্তি সততং কর্ম জন্মমৃত্যুফলপ্রদম্ |
স্বর্গৈশ্বর্যরতা ধ্বস্তচেতনা ভোগবুদ্ধয়ঃ || ৩৪ ||
সম্পাদয়ন্তি তে ভূপ স্বাত্মনা নিজবন্ধনম্ |
সংসারচক্রং যুঞ্জন্তি জডাঃ কর্মপরা নরাঃ || ৩৫ ||
যস্য যদ্বিহিতং কর্ম তৎকর্তব্যং মদর্পণম্ |
ততোঽস্য কর্মবীজানামুচ্ছিন্নাঃ স্যুর্মহাঙ্কুরাঃ || ৩৬ ||
চিত্তশুদ্ধিশ্চ মহতী বিজ্ঞানসাধিকা ভবেৎ |
বিজ্ঞানেন হি বিজ্ঞাতং পরং ব্রহ্ম মুনীশ্বরৈঃ || ৩৭ ||
তস্মাৎকর্মাণি কুর্বীত বুদ্ধিয়ুক্তো নরাধিপ |
ন ৎবকর্মা ভবেৎকোঽপি স্বধর্মত্যাগবাংস্তথা || ৩৮ ||
জহাতি যদি কর্মাণি ততঃ সিদ্ধিং ন বিন্দতি |
আদৌ জ্ঞানে নাধিকারঃ কর্মণ্যেব স যুজ্যতে || ৩৯ ||
কর্মণা শুদ্ধহৃদয়োঽভেদবুদ্ধিমুপৈষ্যতি |
স চ যোগঃ সমাখ্যাতোঽমৃতৎবায় কল্পতে || ৪০ ||
যোগমন্যং প্রবক্ষ্যামি শৃণু ভূপ তমুত্তমম্ |
পশৌ পুত্রে তথা মিত্রে শত্রৌ বন্ধৌ সুহৃজ্জনে || ৪১ ||
বহির্দৃষ্ট্যা চ সময়া হৃৎস্থয়ালোকয়েৎপুমান্ |
সুখে দুঃখে তথাঽমর্ষে হর্ষে ভীতৌ সমো ভবেৎ || ৪২ ||
রোগাপ্তৌ চৈব ভোগাপ্তৌ জয়ে বা বিজয়েঽপি চ |
শ্রিয়োঽযোগে চ যোগে চ লাভালাভে মৃতাবপি || ৪৩ ||
সমো মাং বস্তুজাতেষু পশ্যন্নন্তর্বহিঃস্থিতম্ |
সূর্যে সোমে জলে বহ্নৌ শিবে শক্তৌ তথানিলে || ৪৪ ||
দ্বিজে হৃদি মহানদ্যাং তীর্থে ক্ষেত্রেঽঘনাশিনি |
বিষ্ণৌ চ সর্বদেবেষু তথা যক্ষোরগেষু চ || ৪৫ ||
গন্ধর্বেষু মনুষ্যেষু তথা তির্যগ্ভবেষু চ |
সততং মাং হি যঃ পশ্যেৎসোঽযং যোগবিদুচ্যতে || ৪৬ ||
সম্পরাহৃত্য স্বার্থেভ্য ইন্দ্রিয়াণি বিবেকতঃ |
সর্বত্র সমতাবুদ্ধিঃ স যোগো ভূপ মে মতঃ || ৪৭ ||
আত্মানাত্মবিবেকেন যা বুদ্ধির্দৈবয়োগতঃ |
স্বধর্মাসক্তচিত্তস্য তদ্যোগো যোগ উচ্যতে || ৪৮ ||
ধর্মাধরমৌ জহাতীহ তয়া যুক্ত উভাবপি |
অতো যোগায় যুঞ্জীত যোগো বৈধেষু কৌশলম্ || ৪৯ ||
ধর্মাধর্মফলে ত্যক্ত্বা মনীষী বিজিতেন্দ্রিয়ঃ |
জন্মবন্ধবিনির্মুক্তঃ স্থানং সংযাত্যনাময়ম্ || ৫০ ||
যদা হ্যজ্ঞানকালুষ্যং জন্তোর্বুদ্ধিঃ ক্রমিষ্যতি |
তদাসৌ যাতি বৈরাগ্যং বেদবাক্যাদিষু ক্রমাৎ || ৫১ ||
ত্রয়ীবিপ্রতিপন্নস্য স্থাণুৎবং যাস্যতে যদা |
পরাত্মন্যচলা বুদ্ধিস্তদাসৌ যোগমাপ্নুয়াৎ || ৫২ ||
মানসানখিলান্কামান্যদা ধীমাংস্ত্যজেৎপ্রিয় |
স্বাত্মনি স্বেন সন্তুষ্টঃ স্থিরবুদ্ধিস্তদোচ্যতে || ৫৩ ||
বিতৃষ্ণঃ সর্বসৌখ্যেষু নোদ্বিগ্নো দুঃখসঙ্গমে |
গতসাধ্বসরুড্রাগঃ স্থিরবুদ্ধিস্তদোচ্যতে || ৫৪ ||
যথাঽযং কমঠোঽঙ্গানি সংকোচয়তি সর্বতঃ |
বিষয়েভ্যস্তথা খানি সংকর্পেদ্যোগতৎপরঃ || ৫৫ ||
ব্যাবর্তন্তেঽস্য বিষয়াস্ত্যক্তাহারস্য বর্ষ্মিণঃ |
বিনা রাগং চ রাগোঽপি দৃষ্ট্বা ব্রহ্ম বিনশ্যতি || ৫৬ ||
বিপশ্চিদ্যততে ভূপ স্থিতিমাস্থায় যোগিনঃ |
মন্থয়িৎবেন্দ্রিয়াণ্যস্য হরন্তি বলতো মনঃ || ৫৭ ||
যুক্তস্তানি বশে কৃৎবা সর্বদা মৎপরো ভবেৎ |
সংযতানীন্দ্রিয়াণীহ যস্যাসৌ কৃতধীর্মতঃ || ৫৮ ||
চিন্তয়ানস্য বিষয়ান্সংগস্তেষূপজায়তে |
কামঃ সংজায়তে তস্মাত্ততঃ ক্রোধোঽভিবর্ততে || ৫৯ ||
ক্রোধাদজ্ঞানসম্ভূতির্বিভ্রমস্তু ততঃ স্মৃতেঃ |
ভ্রংশাৎস্মৃতের্মতের্ধ্বংসস্তদ্ধ্বংসাৎসোঽপি নশ্যতি || ৬০ ||
বিনা দ্বেষং চ রাগং চ গোচরান্যস্তু খৈশ্চরেৎ |
স্বাধীনহৃদয়ো বশ্যৈঃ সংতোষং স সমৃচ্ছতি || ৬১ ||
ত্রিবিধস্যাপি দুঃখস্য সংতোষে বিলয়ো ভবেৎ |
প্রজ্ঞয়া সংস্থিতশ্চায়ং প্রসন্নহৃদয়ো ভবেৎ || ৬২ ||
বিনা প্রসাদং ন মতির্বিনা মত্যা ন ভাবনা |
বিনা তাং ন শমো ভূপ বিনা তেন কুতঃ সুখম্ || ৬৩ ||
ইন্দ্রিয়াশ্বান্বিচরতো বিষয়াননু বর্ততে |
যন্মনস্তন্মতিং হন্যাদপ্সু নাবং মরুদ্যথা || ৬৪ ||
যা রাত্রিঃ সর্বভূতানাং তস্যাং নিদ্রাতি নৈব সঃ |
ন স্বপন্তীহ তে যত্র সা রাত্রিস্তস্য ভূমিপ || ৬৫ ||
সরিতাং পতিমায়ান্তি বনানি সর্বতো যথা |
আয়ান্তি যং তথা কামা ন স শান্তিং ক্বচিল্লভেৎ || ৬৬ ||
অতস্তানীহ সংরুধ্য সর্বতঃ খানি মানবঃ |
স্বস্বার্থেভ্যঃ প্রধাবন্তি বুদ্ধিরস্য স্থিরা তদা || ৬৭ ||
মমতাহঙ্কৃতী ত্যক্ত্বা সর্বান্কামাংশ্চ যস্ত্যজেৎ |
নিত্যং জ্ঞানরতো ভূৎবা জ্ঞানান্মুক্তিং স যাস্যতি || ৬৮ ||
এবং ব্রহ্মধিয়ং ভূপ যো বিজানাতি দৈবতঃ |
তুর্যামবস্থাং প্রাপ্যাপি জীবন্মুক্তিং প্রয়াস্যতি || ৬৯ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
সাংখ্যসারার্থয়োগো নাম প্রথমোঽধ্যায়ঃ ||
২
|| দ্বিতীয়োঽধ্যায়ঃ ||
|| কর্ময়োগঃ ||
বরেণ্য উবাচ –
জ্ঞাননিষ্ঠা কর্মনিষ্ঠা দ্বয়ং প্রোক্তং ৎবয়া বিভো |
অবধার্য বদৈকং মে নিঃশ্রেয়সকরং নু কিম্ || ১ ||
গজানন উবাচ –
অস্মিংশ্চরাচরে স্থিত্যৌ পুরোক্তে দ্বে ময়া প্রিয় |
সাংখ্যানাং বুদ্ধিয়োগেন বৈধয়োগেন কর্মিণাম্ || ২ ||
অনারম্ভেণ বৈধানাং নিষ্ক্রিয়ঃ পুরুষো ভবেৎ |
ন সিদ্ধিং যাতি সংত্যাগাৎকেবলাৎকর্মণো নৃপ || ৩ ||
কদাচিদক্রিয়ঃ কোঽপি ক্ষণং নৈবাবতিষ্ঠতে |
অস্বতন্ত্রঃ প্রকৃতিজৈর্গুণৈঃ কর্ম চ কার্যতে || ৪ ||
কর্মকারীন্দ্রিয়গ্রামং নিয়ম্যাস্তে স্মরন্পুমান্ |
তদ্গোচরান্মন্দচিত্তো ধিগাচারঃ স ভাষ্যতে || ৫ ||
তদ্গ্রামং সংনিয়ম্যাদৌ মনসা কর্ম চারভেৎ |
ইন্দ্রিয়ৈঃ কর্ময়োগং যো বিতৃষ্ণঃ স পরো নৃপ || ৬ ||
অকর্মণঃ শ্রেষ্ঠতমং কর্মানীহাকৃতং তু যৎ |
বর্ষ্মণঃ স্থিতিরপ্যস্যাকর্মণো নৈব সেৎস্যতি || ৭ ||
অসমর্প্য নিবধ্যন্তে কর্ম তেন জনা ময়ি |
কুর্বীত সততং কর্মানাশোঽসঙ্গো মদর্পণম্ || ৮ ||
মদর্থে যানি কর্মাণি তানি বধ্নন্তি ন ক্বচিৎ |
সবাসনমিদং কর্ম বধ্নাতি দেহিনং বলাৎ || ৯ ||
বর্ণান্সৃষ্ট্বাবদং চাহং সয়জ্ঞাংস্তান্পুরা প্রিয় |
যজ্ঞেন ঋধ্যতামেষ কামদঃ কল্পবৃক্ষবৎ || ১০ ||
সুরাংশ্চান্নেন প্রীণধ্বং সুরাস্তে প্রীণয়ন্তু বঃ |
লভধ্বং পরমং স্থানমন্যোন্যপ্রীণনাৎস্থিরম্ || ১১ ||
ইষ্টা দেবাঃ প্রদাস্যন্তি ভোগানিষ্টান্সুতর্পিতাঃ |
তৈর্দত্তাংস্তান্নরস্তেভ্যোঽদৎবা ভুঙ্ক্তে স তস্করঃ || ১২ ||
হুতাবশিষ্টভোক্তারো মুক্তাঃ স্যুঃ সর্বপাতকৈঃ |
অদন্ত্যেনো মহাপাপা আত্মহেতোঃ পচন্তি যে || ১৩ ||
ঊর্জো ভবন্তি ভূতানি দেবাদন্নস্য সম্ভবঃ |
যজ্ঞাচ্চ দেবসম্ভূতিস্তদুৎপত্তিশ্চ বৈধতঃ || ১৪ ||
ব্রহ্মণো বৈধমুৎপন্নং মত্তো ব্রহ্মসমুদ্ভবঃ |
অতো যজ্ঞে চ বিশ্বস্মিন্ স্থিতং মাং বিদ্ধি ভূমিপ || ১৫ ||
সংসৃতীনাং মহাচক্রং ক্রামিতব্যং বিচক্ষণৈঃ |
স মুদা প্রীণতে ভূপেন্দ্রিয়ক্রীডোঽধমো জনঃ || ১৬ ||
অন্তরাত্মনি যঃ প্রীত আত্মারামোঽখিলপ্রিয়ঃ |
আত্মতৃপ্তো নরো যঃ স্যাত্তস্যার্থো নৈব বিদ্যতে || ১৭
কার্যাকার্যকৃতীনাং স নৈবাপ্নোতি শুভাশুভে |
কিংচিদস্য ন সাধ্যং স্যাৎসর্বজন্তুষু সর্বদা || ১৮ ||
অতোঽসক্ততয়া ভূপ কর্তব্যং কর্ম জন্তুভিঃ |
সক্তোঽগতিমবাপ্নোতি মামবাপ্নোতি তাদৃশঃ || ১৯ ||
পরমাং সিদ্ধিমাপন্নাঃ পুরা রাজর্ষয়ো দ্বিজাঃ |
সংগ্রহায় হি লোকানাং তাদৃশং কর্ম চারভেৎ || ২০ ||
শ্রেয়ান্যৎকুরুতে কর্ম তৎকরোত্যখিলো জনঃ |
মনুতে যৎপ্রমাণং স তদেবানুসরত্যসৌ || ২১ ||
বিষ্টপে মে ন সাধ্যোঽস্তি কশ্চিদর্থো নরাধিপ |
অনালব্ধশ্চ লব্ধব্যঃ কুর্বে কর্ম তথাপ্যহম্ || ২২ ||
ন কুর্বেঽহং যদা কর্ম স্বতন্ত্রোঽলসভাবিতঃ |
করিষ্যন্তি মম ধ্যানং সর্বে বর্ণা মহামতে || ২৩ ||
ভবিষ্যন্তি ততো লোকা উচ্ছিন্নাঃ সম্প্রদায়িনঃ |
হংতা স্যামস্য লোকস্য বিধাতা সংকরস্য চ || ২৪ ||
কামিনো হি সদা কামৈরজ্ঞানাৎকর্মকারিণঃ |
লোকানাং সংগ্রহায়ৈতদ্বিদ্বান্ কুর্যাদসক্তধীঃ || ২৫ ||
বিভিন্নৎবমতিং জহ্যাদজ্ঞানাং কর্মচারিণাম্
.ভাগাদ্গুণকর্ম
যোগয়ুক্তঃ সর্বকর্মাণ্যর্পয়েন্ময়ি কর্মকৃৎ || ২৬ ||
অবিদ্যাগুণসাচিব্যাৎকুর্বন্কর্মাণ্যতন্দ্রিতঃ |
অহংকারাদ্ভিন্নবুদ্ধিরহংকর্তেতি যোঽব্রবীৎ || ২৭ ||
যস্তু বেত্ত্যাত্মনস্তত্ত্বং বিভাগাদ্গুণকর্মণোঃ |
করণং বিষয়ে বৃত্তমিতি মৎবা ন সজ্জতে || ২৮ ||
কুর্বন্তি সফলং কর্ম গুণৈস্ত্রিভির্বিমোহিতাঃ |
অবিশ্বস্তঃ স্বাত্মদ্রুহো বিশ্ববিন্নৈব লংঘয়েৎ || ২৯ ||
নিত্যং নৈমিত্তিকং তস্মান্ময়ি কর্মার্পয়েদ্বুধঃ |
ত্যক্ত্বাহংমমতাবুদ্ধিং পরাং গতিমবাপ্নুয়াৎ || ৩০ ||
অনীর্ষ্যন্তো ভক্তিমন্তো যে ময়োক্তমিদং শুভম্ |
অনুতিষ্ঠন্তি যে সর্বে মুক্তাস্তেঽখিলকর্মভিঃ || ৩১ ||
যে চৈব নানুতিষ্ঠন্তি ৎবশুভা হতচেতসঃ |
ঈর্ষ্যমাণান্মহামূঢান্নষ্টাংস্তান্বিদ্ধি মে রিপূন্ || ৩২ ||
তুল্যং প্রকৃত্যা কুরুতে কর্ম যজ্জ্ঞানবানপি |
অনুয়াতি চ তামেবাগ্রহস্তত্র মুধা মতঃ || ৩৩ ||
কামশ্চৈব তথা ক্রোধঃ খানামর্থেষু জায়তে |
নৈতয়োর্বশ্যতাং যায়াদম্যবিধ্বংসকৌ যতঃ || ৩৪ ||
শস্তোঽগুণো নিজো ধর্মঃ সাংগাদন্যস্য ধর্মতঃ |
নিজে তস্মিন্মৃতিঃ শ্রেয়োঽপরত্র ভয়দঃ পরঃ || ৩৫ ||
বরেণ্য উবাচ –
পুমান্যৎকুরুতে পাপং স হি কেন নিয়ুজ্যতে |
অকাঙ্ক্ষন্নপি হেরম্ব প্রেরিতঃ প্রবলাদিব || ৩৬ ||
শ্রীগজানন উবাচ –
কামক্রোধৌ মহাপাপৌ গুণদ্বয়সমুদ্ভবৌ |
নয়ন্তৌ বশ্যতাং লোকান্ বিদ্ধ্যেতৌ দ্বেষিণৌ বরৌ || ৩৭ ||
আবৃণোতি যথা মায়া জগদ্বাষ্পো জলং যথা |
বর্ষামেঘো যথা ভানুং তদ্বৎকামোঽখিলাংশ্চ রুট্ || ৩৮ ||
প্রতিপত্তিমতো জ্ঞানং ছাদিতং সততং দ্বিষা |
ইচ্ছাত্মকেন তরসা দুষ্পোষ্যেণ চ শুষ্মিণা || ৩৯ ||
আশ্রিত্য বুদ্ধিমনসী ইন্দ্রিয়াণি স তিষ্ঠতি |
তৈরেবাচ্ছাদিতপ্রজ্ঞো জ্ঞানিনং মোহয়ত্যসৌ || ৪০ ||
তস্মান্নিয়ম্য তান্যাদৌ সমনাংসি নরো জয়েৎ |
জ্ঞানবিজ্ঞানয়োঃ শান্তিকরং পাপং মনোভবম্ || ৪১ ||
যতস্তানি পরাণ্যাহুস্তেভ্যশ্চ পরমং মনঃ |
ততোঽপি হি পরা বুদ্ধিরাত্মা বুদ্ধেঃ পরো মতঃ || ৪২ ||
বুদ্ধ্বৈবমাত্মনাত্মানং সংস্তভ্যাত্মানমাত্মনা |
হৎবা শত্রুং কামরূপং পরং পদমবাপ্নুয়াৎ || ৪৩ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
কর্ময়োগো নাম দ্বিতীয়োঽধ্যায়ঃ ||
৩
|| তৃতীয়োঽধ্যায়ঃ ||
|| বিজ্ঞানপ্রতিপাদন ||
শ্রীগজানন উবাচ –
পুরা সর্গাদিসময়ে ত্রৈগুণ্যং ত্রিতনূরুহম্ |
নির্মায় চৈনমবদং বিষ্ণবে যোগমুত্তমম্ || ১ ||
অর্যম্ণে সোঽব্রবীৎসোঽপি মনবে নিজসূনবে |
ততঃ পরম্পরায়াতং বিদুরেনং মহর্ষয়ঃ || ২ ||
কালেন বহুনা চায়ং নষ্টঃ স্যাচ্চরমে যুগে |
অশ্রদ্ধেয়ো হ্যবিশ্বাস্যো বিগীতব্যশ্চ ভূমিপ || ৩ ||
এবং পুরাতনং যোগং শ্রুতবানসি মন্মুখাৎ |
গুহ্যাদ্গুহ্যতরং বেদরহস্যং পরমং শুভম্ || ৪ ||
বরেণ্য উবাচ –
সাম্প্রতং চাবতীর্ণোঽসি গর্ভতস্ত্বং গজানন |
প্রোক্তবান্কথমেতং ৎবং বিষ্ণবে যোগমুত্তমম্ || ৫ ||
গণেশ উবাচ –
অনেকানি চ তে জন্মান্যতীতানি মমাপি চ |
সংস্মরে তানি সর্বাণি ন স্মৃতিস্তব বর্ততে || ৬ ||
মত্ত এব মহাবাহো জাতা বিষ্ণ্বাদয়ঃ সুরাঃ |
ময়্যেব চ লয়ং যান্তি প্রলয়েষু যুগে যুগে || ৭ ||
অহমেব পরো ব্রহ্ম মহারুদ্রোঽহমেব চ |
অহমেব জগৎসর্বং স্থাবরং জঙ্গমং চ যৎ || ৮ ||
অজোঽব্যয়োঽহং ভূতাত্মাঽনাদিরীশ্বর এব চ |
আস্থায় ত্রিগুণাং মায়াং ভবামি বহুয়োনিষু || ৯ ||
অধর্মোপচয়ো ধর্মাপচয়ো হি যদা ভবেৎ |
সাধূন্সংরক্ষিতুং দুষ্টাংস্তাডিতুং সম্ভবাম্যহম্ || ১০ ||
উচ্ছিদ্যাধর্মনিচয়ং ধর্মং সংস্থাপয়ামি চ |
হন্মি দুষ্টাংশ্চ দৈত্যাংশ্চ নানালীলাকরো মুদা || ১১ ||
বর্ণাশ্রমান্মুনীন্সাধূন্পালয়ে বহুরূপধৃক্ |
এবং যো বেত্তি সম্ভূতির্মম দিব্যা যুগে যুগে || ১২ ||
তত্তৎকর্ম চ বীর্যং চ মম রূপং সমাসতঃ |
ত্যক্তাহংমমতাবুদ্ধিং ন পুনর্ভূঃ স জায়তে || ১৩ ||
নিরীহা নির্ভিয়োরোষা মৎপরা মদ্ব্যপাশ্রয়াঃ |
বিজ্ঞানতপসা শুদ্ধা অনেকে মামুপাগতাঃ || ১৪ ||
যেন যেন হি ভাবেন সংসেবন্তে নরোত্তমাঃ |
তথা তথা ফলং তেভ্যঃ প্রয়চ্ছাম্যব্যয়ঃ স্ফুটম্ || ১৫ ||
জনাঃ স্যুরিতরে রাজন্মম মার্গানুয়ায়িনঃ |
তথৈব ব্যবহারং তে স্বেষু চান্যেষু কুর্বতে || ১৬ ||
কুর্বন্তি দেবতাপ্রীতিং কাঙ্ক্ষন্তঃ কর্মণাং ফলম্ |
প্রাপ্নুবংতীহ তে লোকে শীঘ্রং সিদ্ধিং হি কর্মজাম্ || ১৭ ||
চৎবারো হি ময়া বর্ণা রজঃসত্ত্বতমোংঽশতঃ |
কর্মাংশতশ্চ সংসৃষ্টা মৃত্যুলোকে ময়ানঘ || ১৮ ||
কর্তারমপি তেষাং মামকর্তারং বিদুর্বুধাঃ |
অনাদিমীশ্বরং নিত্যমলিপ্তং কর্মজৈর্গুণৈঃ || ১৯ ||
নিরীহং যোঽভিজানাতি কর্ম বধ্নাতি নৈব তম্ |
চক্রুঃ কর্মাণি বুদ্ধ্যৈবং পূর্বং পূর্বং মুমুক্ষবঃ || ২০ ||
বাসনাসহিতাদাদ্যাৎসংসারকারণাদ্দৃঢাৎ |
অজ্ঞানবন্ধনাজ্জন্তুর্বুদ্ধ্বায়ং মুচ্যতেঽখিলাৎ || ২১ ||
তদকর্ম চ কর্মাপি কথয়াম্যধুনা তব |
যত্র মৌনং গতা মোহাদৃষয়ো বুদ্ধিশালিনঃ || ২২ ||
তত্ত্বং মুমুক্ষুণা জ্ঞেয়ং কর্মাকর্মবিকর্মণাম্ |
ত্রিবিধানীহ কর্মাণি সুনিম্নৈষাং গতিঃ প্রিয় || ২৩ ||
ক্রিয়ায়ামক্রিয়াজ্ঞানমক্রিয়ায়াং ক্রিয়ামতিঃ |
যস্য স্যাৎস হি মর্ত্যেঽস্মিঁল্লোকে মুক্তোঽখিলার্থকৃৎ || ২৪ ||
কর্মাংকুরবিয়োগেন যঃ কর্মাণ্যারভেন্নরঃ |
তত্ত্বদর্শননির্দগ্ধক্রিয়মাহুর্বুধা বুধম্ || ২৫ ||
ফলতৃষ্ণাং বিহায় স্যাৎসদা তৃপ্তো বিসাধনঃ |
উদ্যুক্তোঽপি ক্রিয়াং কর্তুং কিংচিন্নৈব করোতি সঃ || ২৬ ||
নিরীহো নিগৃহীতাত্মা পরিত্যক্তপরিগ্রহঃ |
কেবলং বৈ গৃহং কর্মাচরন্নায়াতি পাতকম্ || ২৭ ||
অদ্বন্দ্বোঽমৎসরো ভূৎবা সিদ্ধ্যসিদ্ধ্যোঃ সমশ্চ যঃ |
যথাপ্রাপ্ত্যেহ সংতুষ্টঃ কুর্বন্কর্ম ন বধ্যতে || ২৮ ||
অখিলৈর্বিষয়ৈর্মুক্তো জ্ঞানবিজ্ঞানবানপি |
যজ্ঞার্থং তস্য সকলং কৃতং কর্ম বিলীয়তে || ২৯ ||
অহমগ্নির্হবির্হোতা হুতং যন্ময়ি চার্পিতম্ |
ব্রহ্মাপ্তব্যং চ তেনাথ ব্রহ্মণ্যেব যতো রতঃ || ৩০ ||
যোগিনঃ কেচিদপরে দিষ্টং যজ্ঞং বদন্তি চ |
ব্রহ্মাগ্নিরেব যজ্ঞো বৈ ইতি কেচন মেনিরে || ৩১ ||
সংযমাগ্নৌ পরে ভূপ ইন্দ্রিয়াণ্যুপজুহ্বতি |
খাগ্নিষ্বন্যে তদ্বিষয়াংশ্ছব্দাদীনুপজুহ্বতি || ৩২ ||
প্রাণানামিন্দ্রিয়াণাং চ পরে কর্মাণি কৃৎস্নশঃ |
নিজাত্মরতিরূপেঽগ্নৌ জ্ঞানদীপ্তে প্রজুহ্বতি || ৩৩ ||
দ্রব্যেণ তপসা বাপি স্বাধ্যায়েনাপি কেচন |
তীব্রব্রতেন যতিনো জ্ঞানেনাপি যজন্তি মাম্ || ৩৪ ||
প্রাণেঽপানং তথা প্রাণমপানে প্রক্ষিপন্তি যে |
রুদ্ধ্বা গতীশ্চোভয়স্তে প্রাণায়ামপরায়ণাঃ || ৩৫ ||
জিৎবা প্রাণান্প্রাণগতীরুপজুহ্বতি তেষু চ |
এবং নানায়জ্ঞরতা যজ্ঞধ্বংসিতপাতকাঃ || ৩৬ ||
নিত্যং ব্রহ্ম প্রয়ান্ত্যেতে যজ্ঞশিষ্টামৃতাশিনঃ |
অয়জ্ঞকারিণো লোকো নায়মন্যঃ কুতো ভবেৎ || ৩৭ ||
কায়িকাদিত্রিধাভূতান্যজ্ঞান্বেদে প্রতিষ্ঠিতান্ |
জ্ঞাৎবা তানখিলান্ভূপ মোক্ষ্যসেঽখিলবন্ধনাৎ || ৩৮ ||
সর্বেষাং ভূপ যজ্ঞানাং জ্ঞানয়জ্ঞঃ পরো মতঃ |
অখিলং লীয়তে কর্ম জ্ঞানে মোক্ষস্য সাধনে || ৩৯ ||
তজ্জ্ঞেয়ং পুরুষব্যাঘ্র প্রশ্নেন নতিতঃ সতাম্ |
শুশ্রূষয়া বদিষ্যন্তি সংতস্তত্ত্ববিশারদাঃ || ৪০ ||
নানাসংগাঞ্জনঃ কুর্বন্নৈকং সাধুসমাগমম্ |
করোতি তেন সংসারে বন্ধনং সমুপৈতি সঃ || ৪১ ||
সৎসংগাদ্গুণসম্ভূতিরাপদাং লয় এব চ |
স্বহিতং প্রাপ্যতে সর্বৈরিহ লোকে পরত্র চ || ৪২ ||
ইতরৎসুলভং রাজন্সৎসংগোঽতীব দুর্লভঃ |
যজ্জ্ঞাৎবা পুনর্বেধমেতি জ্ঞেয়ং ততস্ততঃ || ৪৩ ||
ততঃ সর্বাণি ভূতানি স্বাত্মন্যেবাভিপশ্যতি |
অতিপাপরতো জংতুস্ততস্তস্মাৎপ্রমুচ্যতে || ৪৪ ||
দ্বিবিধান্যপি কর্মাণি জ্ঞানাগ্নির্দহতি ক্ষণাৎ |
প্রসিদ্ধোঽগ্নির্যথা সর্বং ভস্মতাং নয়তি ক্ষণাৎ || ৪৫ ||
ন জ্ঞানসমতামেতি পবিত্রমিতরন্নৃপ |
আত্মন্যেবাবগচ্ছন্তি যোগাৎকালেন যোগিনঃ || ৪৬ ||
ভক্তিমানিন্দ্রিয়জয়ী তৎপরো জ্ঞানমাপ্নুয়াৎ |
লব্ধ্বা তৎপরমং মোক্ষং স্বল্পকালেন যাত্যসৌ || ৪৭ ||
ভক্তিহীনোঽশ্রদ্দধানঃ সর্বত্র সংশয়ী তু যঃ |
তস্য শং নাপি বিজ্ঞানমিহ লোকোঽথ বা পরঃ || ৪৮ ||
আত্মজ্ঞানরতং জ্ঞাননাশিতাখিলসংশয়ম্ |
যোগাস্তাখিলকর্মাণং বধ্নন্তি ভূপ তানি ন || ৪৯ ||
জ্ঞানখড্গপ্রহারেণ সম্ভূতামজ্ঞতাং বলাৎ |
ছিৎবান্তঃসংশয়ং তস্মাদ্যোগয়ুক্তো ভবেন্নরঃ || ৫০ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
বিজ্ঞানপ্রতিপাদনো নাম তৃতীয়োঽধ্যায়ঃ ||
৪
|| চতুর্থোঽধ্যায়ঃ ||
|| বৈধসংন্যাসয়োগঃ ||
বরেণ্য উবাচ –
সংন্যস্তিশ্চৈব যোগশ্চ কর্মণাং বর্ণ্যতে ৎবয়া |
উভয়োর্নিশ্চিতং ৎবেকং শ্রেয়ো যদ্বদ মে প্রভো || ১ ||
শ্রীগজানন উবাচ –
ক্রিয়ায়োগো বিয়োগশ্চাপ্যুভৌ মোক্ষস্য সাধনে |
তয়োর্মধ্যে ক্রিয়ায়োগস্ত্যাগাত্তস্য বিশিষ্যতে || ২ ||
দ্বন্দ্বদুঃখসহোঽদ্বেষ্টা যো ন কাঙ্ক্ষতি কিংচন |
মুচ্যতে বন্ধনাৎসদ্যো নিত্যং সংন্যাসবান্সুখম্ || ৩ ||
বদন্তি ভিন্নফলকৌ কর্মণস্ত্যাগসংগ্রহৌ |
মূঢাল্পজ্ঞাস্তয়োরেকং সংযুঞ্জীত বিচক্ষণঃ || ৪ ||
যদেব প্রাপ্যতে ত্যাগাত্তদেব যোগতঃ ফলম্ |
সঙ্গ্রহং কর্মণো যোগং যো বিন্দতি স বিন্দতি || ৫ ||
কেবলং কর্মণাং ন্যাসং সংন্যাসং ন বিদুর্বুধাঃ |
কুর্বন্ননিচ্ছয়া কর্ম যোগী ব্রহ্মৈব জায়তে || ৬ ||
নির্মলো যতচিত্তাত্মা জিতখো যোগতৎপরঃ |
আত্মানং সর্বভূতস্থং পশ্যন্কুর্বন্ন লিপ্যতে || ৭ ||
তত্ত্ববিদ্যোগয়ুক্তাত্মা করোমীতি ন মন্যতে |
একাদশানীন্দ্রিয়াণি কুর্বন্তি কর্মসংখ্যয়া || ৮ ||
তৎসর্বমর্পয়েদ্ব্রহ্মণ্যপি কর্ম করোতি যঃ |
ন লিপ্যতে পুণ্যপাপৈর্ভানুর্জলগতো যথা || ৯ ||
কায়িকং বাচিকং বৌদ্ধমৈন্দ্রিয়ং মানসং তথা |
ত্যক্ত্বাশাং কর্ম কুর্বন্তি যোগজ্ঞাশ্চিত্তশুদ্ধয়ে || ১০ ||
যোগহীনো নরঃ কর্ম ফলেহয়া করোত্যলম্ |
বধ্যতে কর্মবীজৈঃ স ততো দুঃখং সমশ্নুতে || ১১ ||
মনসা সকলং কর্ম ত্যক্ত্বা যোগী সুখং বসেৎ |
ন কুর্বন্কারয়ন্বাপি নন্দন্শ্বভ্রে সুপত্তনে || ১২ ||
ন ক্রিয়া ন চ কর্তৃৎবং কস্য চিৎসৃজ্যতে ময়া |
ন ক্রিয়াবীজসম্পর্কঃ শক্ত্যা তৎক্রিয়তেঽখিলম্ || ১৩ ||
কস্যচিৎপুণ্যপাপানি ন স্পৃশামি বিভুর্নৃপ |
জ্ঞানমূঢা বিমুহ্যন্তে মোহেনাবৃতবুদ্ধয়ঃ || ১৪ ||
বিবেকেনাত্মনোঽজ্ঞানং যেষাং নাশিতমাত্মনা |
তেষাং বিকাশমায়াতি জ্ঞানমাদিত্যবৎপরম্ || ১৫ ||
মন্নিষ্ঠা মদ্ধিয়োঽত্যন্তং মচ্চিত্তা ময়ি তৎপরাঃ |
অপুনর্ভবমায়ান্তি বিজ্ঞানান্নাশিতৈনসঃ || ১৬ ||
জ্ঞানবিজ্ঞানসংযুক্তে দ্বিজে গবি গজাদিষু |
সমেক্ষণা মহাত্মানঃ পণ্ডিতাঃ শ্বপচে শুনি || ১৭ ||
বশ্যঃ স্বর্গো জগত্তেষাং জীবন্মুক্তাঃ সমেক্ষণাঃ |
যতোঽদোষং ব্রহ্ম সমং তস্মাত্তৈর্বিষয়ীকৃতম্ || ১৮ ||
প্রিয়াপ্রিয়ে প্রাপ্য হর্ষদ্বেষৌ যে প্রাপ্নুবন্তি ন |
ব্রহ্মাশ্রিতা অসংমূঢা ব্রহ্মজ্ঞাঃ সমবুদ্ধয়ঃ || ১৯ ||
বরেণ্য উবাচ –
কিং সুখং ত্রিষু লোকেষু দেবগন্ধর্বয়োনিষু |
ভগবন্কৃপয়া তন্মে বদ বিদ্যাবিশারদ || ২০ ||
শ্রীগজানন উবাচ –
আনন্দমশ্নুতেঽসক্তঃ স্বাত্মারামো নিজাত্মনি |
অবিনাশি সুখং তদ্ধি ন সুখং বিষয়াদিষু || ২১ ||
বিষয়োত্থানি সৌখ্যানি দুঃখানাং তানি হেতবঃ |
উৎপত্তিনাশয়ুক্তানি তত্রাসক্তো ন তত্ত্ববিৎ || ২২ ||
কারণে সতি কামস্য ক্রোধস্য সহতে চ যঃ |
তৌ জেতুং বর্ষ্মবিরহাৎস সুখং চিরমশ্নুতে || ২৩ ||
অন্তর্নিষ্ঠোঽন্তঃপ্রকাশোঽন্তঃসুখোঽন্তারতির্লভেৎ |
অসংদিগ্ধোঽক্ষয়ং ব্রহ্ম সর্বভূতহিতার্থকৃৎ || ২৪ ||
জেতারঃ ষড্রিপূণাং যে শমিনো দমিনস্তথা |
তেষাং সমন্ততো ব্রহ্ম স্বাত্মজ্ঞানাং বিভাত্যহো || ২৫ ||
আসনেষু সমাসীনস্ত্যক্ত্বেমান্বিষয়ান্বহিঃ |
সংস্তভ্য ভৃকুটীমাস্তে প্রাণায়ামপরায়ণঃ || ২৬ ||
প্রাণায়ামং তু সংরোধং প্রাণাপানসমুদ্ভবম্ |
বদন্তি মুনয়স্তং চ ত্রিধাভূতং বিপশ্চিতঃ || ২৭ ||
প্রমাণং ভেদতো বিদ্ধি লঘুমধ্যমমুত্তমম্ |
দশভির্দ্ব্যধিকৈর্বর্ণৈঃ প্রাণায়ামো লঘুঃ স্মৃতঃ || ২৮ ||
চতুর্বিংশত্যক্ষরো যো মধ্যমঃ স উদাহৃতঃ |
ষট্ত্রিংশল্লঘুবর্ণো য উত্তমঃ সোঽভিধীয়তে || ২৯ ||
সিংহং শার্দূলকং বাপি মত্তেভং মৃদুতাং যথা |
নয়ন্তি প্রাণিনস্তদ্বৎপ্রাণাপানৌ সুসাধয়েৎ || ৩০ ||
পীডয়ন্তি মৃগাস্তে ন লোকান্বশ্যং গতা নৃপ |
দহত্যেনস্তথা বায়ুঃ সংস্তব্ধো ন চ তত্তনুম্ || ৩১ ||
যথা যথা নরঃ কশ্চিৎসোপানাবলিমাক্রমেৎ |
তথা তথা বশীকুর্যাৎপ্রাণাপানৌ হি যোগবিৎ || ৩২ ||
পূরকং কুম্ভকং চৈব রেচকং চ ততোঽভ্যসেৎ |
অতীতানাগতজ্ঞানী ততঃ স্যাজ্জগতীতলে || ৩৩ ||
প্রাণায়ামৈর্দ্বাদশভিরুত্তমৈর্ধারণা মতা |
যোগস্তু ধারণে দ্বে স্যাদ্যোগীশস্তে সদাভ্যসেৎ || ৩৪ ||
এবং যঃ কুরুতে রাজংস্ত্রিকালজ্ঞঃ স জায়তে |
অনায়াসেন তস্য স্যাদ্বশ্যং লোকত্রয়ং নৃপ || ৩৫ ||
ব্রহ্মরূপং জগৎসর্বং পশ্যতি স্বান্তরাত্মনি |
এবং যোগশ্চ সংন্যাসঃ সমানফলদায়িনৌ || ৩৬ ||
জন্তূনাং হিতকর্তারং কর্মণাং ফলদায়িনম্ |
মাং জ্ঞাৎবা মুক্তিমাপ্নোতি ত্রৈলোক্যস্যেশ্বরং বিভুম্ || ৩৭ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
বৈধসংন্যাসয়োগো নাম চতুর্থোঽধ্যায়ঃ ||

৫
|| পঞ্চমোঽধ্যায়ঃ ||
|| যোগাবৃত্তিপ্রশংসনঃ ||
শ্রীগজানন উবাচ –
শ্রৌতস্মার্তানি কর্মাণি ফলং নেচ্ছন্সমাচরেৎ |
শস্তঃ স যোগী রাজেন্দ্র অক্রিয়াদ্যোগমাশ্রিতাৎ || ১ ||
যোগপ্রাপ্ত্যৈ মহাবাহো হেতুঃ কর্মৈব মে মতম্ |
সিদ্ধিয়োগস্য সংসিদ্ধ্যৈ হেতূ শমদমৌ মতৌ || ২ ||
ইন্দ্রিয়ার্থাংশ্চ সংকল্প্য কুর্বন্স্বস্য রিপুর্ভবেৎ |
এতাননিচ্ছন্যঃ কুর্বন্সিদ্ধিং যোগী স সিদ্ধ্যতি || ৩ ||
সুহৃৎবে চ রিপুৎবে চ উদ্ধারে চৈব বন্ধনে |
আত্মনৈবাত্মনি হ্যাত্মা নাত্মা ভবতি কশ্চন || ৪ ||
মানেঽপমানে দুঃখে চ সুখেঽসুহৃদি সাধুষু |
মিত্রেঽমিত্রেঽপ্যুদাসীনে দ্বেষ্যে লোষ্ঠে চ কাঞ্চনে || ৫ ||
সমো জিতাত্মা বিজ্ঞানী জ্ঞানীন্দ্রিয়জয়াবহঃ |
অভ্যসেৎসততং যোগং যদা যুক্ততমো হি সঃ || ৬ ||
তপ্তঃ শ্রান্তো ব্যাকুলো বা ক্ষুধিতো ব্যগ্রচিত্তকঃ |
কালেঽতিশীতেঽত্যুষ্ণে বানিলাগ্ন্যম্বুসমাকুলে || ৭ ||
সধ্বনাবতিজীর্ণে গোঃস্থানে সাগ্নৌ জলান্তিকে |
কূপকূলে শ্মশানে চ নদ্যাং ভিত্তৌ চ মর্মরে || ৮ ||
চৈত্যে সবল্মিকে দেশে পিশাচাদিসমাবৃতে |
নাভ্যসেদ্যোগবিদ্যোগং যোগধ্যানপরায়ণঃ || ৯ ||
স্মৃতিলোপশ্চ মূকৎবং বাধির্যং মন্দতা জ্বরঃ |
জডতা জায়তে সদ্যো দোষাজ্ঞানাদ্ধি যোগিনঃ || ১০ ||
এতে দোষাঃ পরিত্যাজ্যা যোগাভ্যসনশালিনা |
অনাদরে হি চৈতেষাং স্মৃতিলোপাদয়ো ধ্রুবম্ || ১১ ||
নাতিভুঞ্জন্সদা যোগী নাভুঞ্জন্নাতিনিদ্রিতঃ |
নাতিজাগ্রৎসিদ্ধিমেতি ভূপ যোগং সদাভ্যসন্ || ১২ ||
সংকল্পজাংস্ত্যজেৎকামান্নিয়তাহারজাগরঃ |
নিয়ম্য খগণং বুদ্ধ্যা বিরমেত শনৈঃ শনৈঃ || ১৩ ||
ততস্ততঃ কৃষেদেতদ্যত্র যত্রানুগচ্ছতি |
ধৃত্যাত্মবশগং কুর্যাচ্চিত্তং চঞ্চলমাদৃতঃ || ১৪ ||
এবং কুর্বন্সদা যোগী পরাং নির্বৃতিমৃচ্ছতি |
বিশ্বস্মিন্নিজমাত্মানং বিশ্বং চ স্বাত্মনীক্ষতে || ১৫ ||
যোগেন যো মামুপৈতি তমুপৈম্যহমাদরাৎ |
মোচয়ামি ন মুঞ্চামি তমহং মাং স ন ত্যজেৎ || ১৬ ||
সুখে সুখেতরে দ্বেষে ক্ষুধি তোষে সমস্তৃষি |
আত্মসাম্যেন ভূতানি সর্বগং মাং চ বেত্তি যঃ || ১৭ ||
জীবন্মুক্তঃ স যোগীন্দ্রঃ কেবলং ময়ি সংগতঃ |
ব্রহ্মাদীনাং চ দেবানাং স বন্দ্যঃ স্যাজ্জগত্রয়ে || ১৮ ||
বরেণ্য উবাচ –
দ্বিবিধোঽপি হি যোগোঽযমসম্ভাব্যো হি মে মতঃ |
যতোঽন্তঃকরণং দুষ্টং চঞ্চলং দুর্গ্রহং বিভো || ১৯ ||
শ্রীগজানন উবাচ –
যো নিগ্রহং দুর্গ্রহস্য মনসঃ সম্প্রকল্পয়েৎ |
ঘটীয়ন্ত্রসমাদস্মান্মুক্তঃ সংসৃতিচক্রকাৎ || ২০ ||
বিষয়ৈঃ ক্রকচৈরেতৎসংসৃষ্টং চক্রকং দৃঢম্ |
জনশ্ছেত্তুং ন শক্নোতি কর্মকীলঃ সুসংবৃতম্ || ২১ ||
অতিদুঃখং চ বৈরাগ্যং ভোগাদ্বৈতৃষ্ণ্যমেব চ |
গুরুপ্রসাদঃ সৎসঙ্গ উপায়াস্তজ্জয়ে অমী || ২২ ||
অভ্যাসাদ্বা বশীকুর্যান্মনো যোগস্য সিদ্ধয়ে |
বরেণ্য দুর্লভো যোগো বিনাস্য মনসো জয়াৎ || ২৩ ||
বরেণ্য উবাচ –
যোগভ্রষ্টস্য কো লোকঃ কা গতিঃ কিং ফলং ভবেৎ |
বিভো সর্বজ্ঞ মে ছিন্ধি সংশয়ং বুদ্ধিচক্রভৃৎ || ২৪ ||
শ্রীগজানন উবাচ –
দিব্যদেহধরো যোগাদ্ভ্রষ্টঃ স্বর্ভোগমুত্তমম্ |
ভুক্ত্বা যোগিকুলে জন্ম লভেচ্ছুদ্ধিমতাং কুলে || ২৫ ||
পুনর্যোগী ভবত্যেষ সংস্কারাৎপূর্বকর্মজাৎ |
ন হি পুণ্যকৃতাং কশ্চিন্নরকং প্রতিপদ্যতে || ২৬ ||
জ্ঞাননিষ্ঠাত্তপোনিষ্ঠাৎকর্মনিষ্ঠান্নরাধিপ |
শ্রেষ্ঠো যোগী শ্রেষ্ঠতমো ভক্তিমান্ময়ি তেষু যঃ || ২৭ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
যোগাবৃত্তিপ্রশংসনো নাম পঞ্চমোঽধ্যায়ঃ ||
৬
|| ষষ্ঠোঽধ্যায়ঃ ||
|| বুদ্ধিয়োগঃ ||
শ্রীগজানন উবাচ –
ঈদৃশং বিদ্ধি মে তত্ত্বং মদ্গতেনান্তরাত্মনা |
যজ্জ্ঞাৎবা মামসন্দিগ্ধং বেৎসি মোক্ষ্যসি সর্বগম্ || ১ ||
তত্তেঽহং শৃণু বক্ষ্যামি লোকানাং হিতকাম্যয়া |
অস্তি জ্ঞেয়ং যতো নান্যন্মুক্তেশ্চ সাধনং নৃপ || ২ ||
জ্ঞেয়া মৎপ্রকৃতিঃ পূর্বং ততঃ স্যাং জ্ঞানগোচরঃ |
ততো বিজ্ঞানসম্পত্তির্ময়ি জ্ঞাতে নৃণাং ভবেৎ || ৩ ||
ক্বনলৌ খমহঙ্কারঃ কং চিত্তং ধীসমীরণৌ |
রবীন্দূ যাগকৃচ্চৈকাদশধা প্রকৃতির্মম || ৪ ||
অন্যাং মৎপ্রকৃতিং বৃদ্ধা মুনয়ঃ সংগিরন্তি চ |
তথা ত্রিবিষ্টপং ব্যাপ্তং জীবৎবং গতয়ানয়া || ৫ ||
আভ্যামুৎপাদ্যতে সর্বং চরাচরময়ং জগৎ |
সংগাদ্বিশ্বস্য সম্ভূতিঃ পরিত্রাণং লয়োঽপ্যহম্ || ৬ ||
তত্ত্বমেতন্নিবোদ্ধুং মে যততে কশ্চিদেব হি |
বর্ণাশ্রমবতাং পুংসাং পুরা চীর্ণেন কর্মণা || ৭ ||
সাক্ষাৎকরোতি মাং কশ্চিদ্যত্নবৎস্বপি তেষু চ |
মত্তোঽন্যন্নেক্ষতে কিংচিন্ময়ি সর্বং চ বীক্ষতে || ৮ ||
ক্ষিতৌ সুগন্ধরূপেণ তেজোরূপেণ চাগ্নিষু |
প্রভারূপেণ পূষ্ণ্যব্জে রসরূপেণ চাপ্সু চ || ৯ ||
ধীতপোবলিনাং চাহং ধীস্তপোবলমেব চ |
ত্রিবিধেষু বিকারেষু মদুৎপন্নেষ্বহং স্থিতঃ || ১০ ||
ন মাং বিন্দতি পাপীয়ান্মায়ামোহিতচেতনঃ |
ত্রিবিকারা মোহয়তি প্রকৃতির্মে জগত্ত্রয়ম্ || ১১ ||
যো মে তত্ত্বং বিজানাতি মোহং ত্যজতি সোঽখিলম্ |
অনেকৈর্জন্মভিশ্চৈবং জ্ঞাৎবা মাং মুচ্যতে ততঃ || ১২ ||
অন্যে নানাবিধান্দেবান্ভজন্তে তান্ব্রজন্তি তে |
যথা যথা মতিং কৃৎবা ভজতে মাং জনোঽখিলঃ || ১৩ ||
তথা তথাস্য তং ভাবং পূরয়াম্যহমেব তম্ |
অহং সর্বং বিজানামি মাং ন কশ্চিদ্বিবুধ্যতে || ১৪ ||
অব্যক্তং ব্যক্তিমাপন্নং ন বিদুঃ কামমোহিতাঃ |
নাহং প্রকাশতাং যামি অজ্ঞানাং পাপকর্মণাম্ || ১৫ ||
যঃ স্মৃৎবা ত্যজতি প্রাণমন্তে মাং শ্রদ্ধয়ান্বিতঃ |
স যাত্যপুনরাবৃত্তিং প্রসাদান্মম ভূভুজ || ১৬ ||
যং যং দেবং স্মরন্ভক্ত্যা ত্যজতি স্বং কলেবরম্ |
তত্তৎসালোক্যমায়াতি তত্তদ্ভক্ত্যা নরাধিপ || ১৭ ||
অতশ্চাহর্নিশং ভূপ স্মর্তব্যোঽনেকরূপবান্ |
সর্বেষামপ্যহং গম্যঃ স্রোতসামর্ণবো যথা || ১৮ ||
ব্রহ্মবিষ্ণুশিবেন্দ্রাদ্যাঁল্লোকান্প্রাপ্য পুনঃ পতেৎ |
যো মামুপৈত্যসংদিগ্ধঃ পতনং তস্য ন ক্বচিৎ || ১৯ ||
অনন্যশরণো যো মাং ভক্ত্যা ভজতি ভূমিপ |
যোগক্ষেমৌ চ তস্যাহং সর্বদা প্রতিপাদয়ে || ২০ ||
দ্বিবিধা গতিরুদ্দিষ্টা শুক্লা কৃষ্ণা নৃণাং নৃপ |
একয়া পরমং ব্রহ্ম পরয়া যাতি সংসৃতিম্ || ২১ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
বুদ্ধিয়োগো নাম ষষ্ঠোঽধ্যায়ঃ ||
৭
|| সপ্তমোঽধ্যায়ঃ ||
|| উপাসনা যোগঃ ||
বরেণ্য উবাচ –
কা শুক্লা গতিরুদ্দিষ্টা কা চ কৃষ্ণা গজানন |
কিং ব্রহ্ম সংসৃতিঃ কা মে বক্তুমর্হস্যনুগ্রহাৎ || ১ ||
শ্রীগজানন উবাচ –
অগ্নির্জ্যোতিরহঃ শুক্লা কর্মার্হময়নং গতিঃ |
চান্দ্রং জ্যোতিস্তথা ধূমো রাত্রিশ্চ দক্ষিণায়নম্ || ২ ||
কৃষ্ণৈতে ব্রহ্মসংসৃত্যোরবাপ্তেঃ কারণং গতী |
দৃশ্যাদৃশ্যমিদং সর্বং ব্রহ্মৈবেত্যবধারয় || ৩ ||
ক্ষরং পঞ্চাত্মকং বিদ্ধি তদন্তরক্ষরং স্মৃতম্ |
উভাভ্যাং যদতিক্রান্তং শুদ্ধং বিদ্ধি সনাতনম্ || ৪ ||
অনেকজন্মসম্ভূতিঃ সংসৃতিঃ পরিকীর্তিতা |
সংসৃতিং প্রাপ্নুবন্ত্যেতে যে তু মাং গণয়ন্তি ন || ৫ ||
যে মাং সম্যগুপাসন্তে পরং ব্রহ্ম প্রয়ান্তি তে |
ধ্যানাদ্যৈরুপচারৈর্মাং তথা পঞ্চামৃতাদিভিঃ || ৬ ||
স্নানবস্ত্রাদ্যলংকারসুগন্ধধূপদীপকৈঃ |
নৈবেদ্যৈঃ ফলতাম্বূলৈর্দক্ষিণাভিশ্চ যোঽর্চয়েৎ || ৭ ||
ভক্ত্যৈকচেতসা চৈব তস্যেষ্টং পূরয়াম্যহম্ |
এবং প্রতিদিনং ভক্ত্যা মদ্ভক্তো মাং সমর্চয়েৎ || ৮ ||
অথবা মানসীং পূজাং কুর্বীত স্থিরচেতসা |
অথবা ফলপত্রাদ্যৈঃ পুষ্পমূলজলাদিভিঃ || ৯ ||
পূজয়েন্মাং প্রয়ত্নেন তত্তদিষ্টং ফলং লভেৎ |
ত্রিবিধাস্বপি পূজাসু শ্রেয়সী মানসী মতা || ১০ ||
সাপ্যুত্তমা মতা পূজানিচ্ছয়া যা কৃতা মম |
ব্রহ্মচারী গৃহস্থো বা বানপ্রস্থো যতিশ্চ যঃ || ১১ ||
একাং পূজাং প্রকুর্বাণোঽপ্যন্যো বা সিদ্ধিমৃচ্ছতি |
মদন্যদেবং যো ভক্ত্যা দ্বিষন্মামন্যদেবতাম্ || ১২ ||
সোঽপি মামেব যজতে পরং ৎববিধিতো নৃপ |
যো হ্যন্যদেবতাং মাং চ দ্বিষন্নন্যাং সমর্চয়েৎ || ১৩ ||
যাতি কল্পসহস্রং স নিরয়ান্দুঃখভাক্ সদা |
ভূতশুদ্ধিং বিধায়াদৌ প্রাণানাং স্থাপনং ততঃ || ১৪ ||
আকৃষ্য চেতসো বৃত্তিং ততো ন্যাসং উপক্রমেৎ |
কৃৎবান্তর্মাতৃকান্যাসং বহিশ্চাথ ষডঙ্গকম্ || ১৫ ||
ন্যাসং চ মূলমন্ত্রস্য ততো ধ্যাৎবা জপেন্মনুম্ |
স্থিরচিত্তো জপেন্মন্ত্রং যথা গুরুমুখাগতম্ || ১৬ ||
জপং নিবেদ্য দেবায় স্তুৎবা স্তোত্রৈরনেকধা |
এবং মাং য উপাসীত স লভেন্মোক্ষমব্যয়ম্ || ১৭ ||
য উপাসনয়া হীনো ধিঙ্নরো ব্যর্থজন্মভাক্ |
যজ্ঞোঽহমৌষধং মন্রোঽগ্নিরাজ্যং চ হবির্হুতম্ || ১৮ ||
ধ্যানং ধ্যেয়ং স্তুতিং স্তোত্রং নতির্ভক্তিরুপাসনা |
ত্রয়ীজ্ঞেয়ং পবিত্রং চ পিতামহপিতামহঃ || ১৯ ||
আঊঙ্কারঃ পাবনঃ সাক্ষী প্রভুর্মিত্রং গতির্লয়ঃ |
উৎপত্তিঃ পোষকো বীজং শরণং বাস এব চ || ২০ ||
অসন্মৃত্যুঃ সদমৃতমাত্মা ব্রহ্মাহমেব চ |
দানং হোমস্তপো ভক্তির্জপঃ স্বাধ্যায় এব চ || ২১ ||
যদ্যৎকরোতি তৎসর্বং স মে ময়ি নিবেদয়েৎ |
যোষিতোঽথ দুরাচারাঃ পাপাস্ত্রৈবর্ণিকাস্তথা || ২২ ||
মদাশ্রয়া বিমুচ্যন্তে কিং মদ্ভক্ত্যা দ্বিজাদয়ঃ |
ন বিনশ্যতি মদ্ভক্তো জ্ঞাৎবেমা মদ্বিভূতয়ঃ || ২৩ ||
প্রভবং মে বিভূতিশ্চ ন দেবা ঋষয়ো বিদুঃ |
নানাবিভূতিভিরহং ব্যাপ্য বিশ্বং প্রতিষ্ঠিতঃ || ২৪ ||
যদ্যচ্ছ্রেষ্ঠতমং লোকে স বিভূতির্নিবোধ মে || ২৫ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
উপাসনায়োগো নাম সপ্তমোঽধ্যায়ঃ ||
৮
|| অষ্টমোঽধ্যায়ঃ ||

|| বিশ্বরূপদর্শন ||
বরেণ্য উবাচ –
ভগবন্নারদো মহ্যং তব নানা বিভূতয়ঃ |
উক্তবাংস্তা অহং বেদ ন সর্বাঃ সোঽপি বেত্তি তাঃ || ১ ||
ৎবমেব তত্ত্বতঃ সর্বা বেৎসি তা দ্বিরদানন |
নিজং রূপমিদানীং মে ব্যাপকং চারু দর্শয় || ২ ||
শ্রীগজানন উবাচ –
একস্মিন্ময়ি পশ্য ৎবং বিশ্বমেতচ্চরাচরম্ |
নানাশ্চর্যাণি দিব্যানি পুরাঽদৃষ্টানি কেনচিৎ || ৩ ||
জ্ঞানচক্ষুরহং তেঽদ্য সৃজামি স্বপ্রভাবতঃ |
চর্মচক্ষুঃ কথং পশ্যেন্মাং বিভুং হ্যজমব্যয়ম্ || ৪ ||
ক উবাচ –
ততো রাজা বরেণ্যঃ স দিব্যচক্ষুরবৈক্ষত |
ঈশিতুঃ পরমং রূপং গজাস্যস্য মহাদ্ভুতম্ || ৫ ||
অসংখ্যবক্ত্রং ললিতমসংখ্যাংঘ্রিকরং মহৎ |
অনুলিপ্তং সুগন্ধেন দিব্যভূষাম্বরস্রজম্ || ৬ ||
অসংখ্যনয়নং কোটিসূর্যরশ্মিধৃতায়ুধম্ |
তদ্বর্ষ্মণি ত্রয়ো লোকা দৃষ্টাস্তেন পৃথগ্বিধাঃ || ৭ ||
দৃষ্ট্বৈশ্বরং পরং রূপং প্রণম্য স নৃপোঽব্রবীৎ |
বরেণ্য উবাচ –
বীক্ষেঽহং তব দেহেঽস্মিন্দেবানৃষিগণান্পিৎৠন্ || ৮ ||
পাতালানাং সমুদ্রাণাং দ্বীপানাং চৈব ভূভৃতাম্ |
মহর্ষীণাং সপ্তকং চ নানার্থৈঃ সংকুলং বিভো || ৯ ||
ভুবোঽন্তরিক্ষস্বর্গাংশ্চ মনুষ্যোরগরাক্ষসান্ |
ব্রহ্মাবিষ্ণুমহেশেন্দ্রান্দেবান্জন্তূননেকধা || ১০ ||
অনাদ্যনন্তং লোকাদিমনন্তভুজশীর্ষকম্ |
প্রদীপ্তানলসংকাশমপ্রমেয়ং পুরাতনম্ || ১১ ||
কিরীটকুণ্ডলধরং দুর্নিরীক্ষ্যং মুদাবহম্ |
এতাদৃশং চ বীক্ষে ৎবাং বিশালবক্ষসং প্রভুম্ || ১২ ||
সুরবিদ্যাধরৈর্যক্ষৈঃ কিন্নরৈর্মুনিমানুষৈঃ |
নৃত্যদ্ভিরপ্সরোভিশ্চ গন্ধর্বৈর্গানতৎপরৈঃ || ১৩ ||
বসুরুদ্রাদিত্যগণৈঃ সিদ্ধৈঃ সাধ্যৈর্মুদা যুতৈঃ |
সেব্যমানং মহাভক্ত্যা বীক্ষ্যমাণং সুবিস্মিতৈঃ || ১৪ ||
বেত্তারমক্ষরং বেদ্যং ধর্মগোপ্তারমীশ্বরম্ |
পাতালানি দিশঃ স্বর্গান্ভুবং ব্যাপ্যাঽখিলং স্থিতম্ || ১৫ ||
ভীতা লোকাস্তথা চাহমেবং ৎবাং বীক্ষ্য রূপিণম্ |
নানাদংষ্ট্রাকরালং চ নানাবিদ্যাবিশারদম্ || ১৬ ||
প্রলয়ানলদীপ্তাস্যং জটিলং চ নভঃস্পৃশম্ |
দৃষ্ট্বা গণেশ তে রূপমহং ভ্রান্ত ইবাভবম্ || ১৭ ||
দেবা মনুষ্যনাগাদ্যাঃ খলাস্ত্বদুদরেশয়াঃ |
নানায়োনিভুজশ্চান্তে ৎবয়্যেব প্রবিশন্তি চ || ১৮ ||
অব্ধেরুৎপদ্যমানাস্তে যথাজীমূতবিন্দবঃ |
ৎবমিন্দ্রোঽগ্নির্যমশ্চৈব নিরৃতির্বরুণো মরুৎ || ১৯ ||
গুহ্যকেশস্তথেশানঃ সোমঃ সূর্যোঽখিলং জগৎ |
নমামি ৎবামতঃ স্বামিন্প্রসাদং কুরু মেঽধুনা || ২০ ||
দর্শয়স্ব নিজং রূপং সৌম্যং যৎপূর্বমীক্ষিতম্ |
কো বেদ লীলাস্তে ভূমন্ ক্রিয়মাণা নিজেচ্ছয়া || ২১ ||
অনুগ্রহান্ময়া দৃষ্টমৈশ্বরং রূপমীদৃশম্ |
জ্ঞানচক্ষুর্যতো দত্তং প্রসন্নেন ৎবয়া মম || ২২ ||
শ্রীগজানন উবাচ –
নেদং রূপং মহাবাহো মম পশ্যন্ত্যয়োগিনঃ |
সনকাদ্যা নারদাদ্যাঃ পশ্যন্তি মদনুগ্রহাৎ || ২৩ ||
চতুর্বেদার্থতত্ত্বজ্ঞাঃ সর্বশাস্ত্রবিশারদাঃ |
যজ্ঞদানতপোনিষ্ঠা ন মে রূপং বিদন্তি তে || ২৪ ||
শক্যোঽহং বীক্ষিতুং জ্ঞাতুং প্রবেষ্টুং ভক্তিভাবতঃ |
ত্যজ ভীতিং চ মোহং চ পশ্য মাং সৌম্যরূপিণম্ || ২৫ ||
মদ্ভক্তো মৎপরঃ সর্বসংগহীনো মদর্থকৃৎ |
নিষ্ক্রোধঃ সর্বভূতেষু সমো মামেতি ভূভুজ || ২৬ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
বিশ্বরূপদর্শনো নামাষ্টমোঽধ্যায়ঃ ||

৯
|| নবমোঽধ্যায়ঃ ||
|| ক্ষেত্রজ্ঞাতৃজ্ঞেয়বিবেকয়োগঃ ||
বরেণ্য উবাচ –
অনন্যভাবস্ত্বাং সম্যঙ্মূর্তিমন্তমুপাসতে |
যোঽক্ষরং পরমব্যক্তং তয়োঃ কস্তে মতোঽধিকঃ || ১ ||
অসি ৎবং সর্ববিৎসাক্ষী ভূতভাবন ঈশ্বরঃ |
অতস্ত্বাং পরিপৃচ্ছামি বদ মে কৃপয়া বিভো || ২ ||
শ্রীগজানন উবাচ –
যো মাং মূর্তিধরং ভক্ত্যা মদ্ভক্তঃ পরিসেবতে |
স মে মান্যোঽনন্যভক্তির্নিয়ুজ্য হৃদয়ং ময়ি || ৩ ||
খগণং স্ববশং কৃৎবাখিলভূতহিতার্থকৃৎ |
ধ্যেয়মক্ষরমব্যক্তং সর্বগং কূটগং স্থিরম্ || ৪ ||
সোঽপি মামেত্যনির্দেশ্যং মৎপরো য উপাসতে |
সংসারসাগরাদস্মাদুদ্ধরামি তমপ্যহম্ || ৫ ||
অব্যক্তোপাসনাদ্দুঃখমধিকং তেন লভ্যতে |
ব্যক্তস্যোপাসনাৎসাধ্যং তদেবাব্যক্তভক্তিতঃ || ৬ ||
ভক্তিশ্চৈবাদরশ্চাত্র কারণং পরমং মতম্ |
সর্বেষাং বিদুষাং শ্রেষ্ঠো হ্যকিংচিজ্জ্ঞোঽপি ভক্তিমান্ || ৭ ||
ভজন্ভক্ত্যা বিহীনো যঃ স চাণ্ডালোঽভিধীয়তে |
চাণ্ডালোঽপি ভজন্ভক্ত্যা ব্রাহ্মণেভ্যোঽধিকো মতঃ || ৮ ||
শুকাদ্যাঃ সনকাদ্যাশ্চ পুরা মুক্তা হি ভক্তিতঃ |
ভক্ত্যৈব মামনুপ্রাপ্তা নারদাদ্যাশ্চিরায়ুষঃ || ৯ ||
অতো ভক্ত্যা ময়ি মনো বিধেহি বুদ্ধিমেব চ |
ভক্ত্যা যজস্ব মাং রাজংস্ততো মামেব যাস্যসি || ১০ ||
অসমর্থোঽর্পিতুং স্বান্তং এবং ময়ি নরাধিপ |
অভ্যাসেন চে যোগেন ততো গন্তুং যতস্ব মাম্ || ১১ ||
তত্রাপি ৎবমশক্তশ্চেৎকুরু কর্ম মদর্পণম্ |
মামনুগ্রহতশ্চৈবং পরাং নির্বৃতিমেষ্যসি || ১২ ||
অথৈতদপ্যনুষ্ঠাতুং ন শক্তোঽসি তদা কুরু |
প্রয়ত্নতঃ ফলত্যাগং ত্রিবিধানাং হি কর্মণাম্ || ১৩ ||
শ্রেয়সী বুদ্ধিরাবৃত্তেস্ততো ধ্যানং পরং মতম্ |
ততোঽখিলপরিত্যাগস্ততঃ শান্তির্গরীয়সী || ১৪ ||
নিরহংমমতাবুদ্ধিরদ্বেষঃ শরণঃ সমঃ |
লাভালাভে সুখে দুঃখে মানামানে স মে প্রিয়ঃ || ১৫ ||
যং বীক্ষ্য ন ভয়ং যাতি জনস্তস্মান্ন চ স্বয়ম্ |
উদ্বেগভীঃ কোপমুদ্ভীরহিতো যঃ স মে প্রিয়ঃ || ১৬ ||
রিপৌ মিত্রেঽথ গর্হায়াং স্তুতৌ শোকে সমঃ সমুৎ |
মৌনী নিশ্চলধীভক্তিরসংগঃ স চ মে প্রিয়ঃ || ১৭ ||
সংশীলয়তি যশ্চৈনমুপদেশং ময়া কৃতম্ |
স বন্দ্যঃ সর্বলোকেষু মুক্তাত্মা মে প্রিয়ঃ সদা || ১৮ ||
অনিষ্টাপ্তৌ চ ন দ্বেষ্টীষ্টপ্রাপ্তৌ চ ন তুষ্যতি |
ক্ষেত্রতজ্জ্ঞৌ চ যো বেত্তি সমে প্রিয়তমো ভবেৎ || ১৯ ||
বরেণ্য উবাচ –
কিং ক্ষেত্রং কশ্চ তদ্বেত্তি কিং তজ্জ্ঞানং গজানন |
এতদাচক্ষ্ব মহ্যং ৎবং পৃচ্ছতে করুণাম্বুধে || ২০ ||
শ্রীগজানন উবাচ –
পঞ্চ ভূতানি তন্মাত্রাঃ পঞ্চ কর্মেন্দ্রিয়াণি চ |
অহংকারো মনো বুদ্ধিঃ পঞ্চ জ্ঞানেন্দ্রিয়াণি চ || ২১ ||
ইচ্ছাব্যক্তং ধৃতিদ্বেষৌ সুখদুঃখে তথৈব চ |
চেতনাসহিতশ্চায়ং সমূহঃ ক্ষেত্রমুচ্যতে || ২২ ||
তজ্জ্ঞং ৎবং বিদ্ধি মাং ভূপ সর্বান্তর্যামিণং বিভুম্ |
অয়ং সমূহোঽহং চাপি যজ্জ্ঞানবিষয়ৌ নৃপ || ২৩ ||
আর্জবং গুরুশুশ্রূষা বিরক্তিশ্চেন্দ্রিয়ার্থতঃ |
শৌচং ক্ষান্তিরদম্ভশ্চ জন্মাদিদোষবীক্ষণম্ || ২৪ ||
সমদৃষ্টির্দৃঢা ভক্তিরেকান্তিৎবং শমো দমঃ |
এতৈর্যচ্চ যুতং জ্ঞানং তজ্জ্ঞানং বিদ্ধি বাহুজ || ২৫ ||
তজ্জ্ঞানবিষয়ং রাজন্ব্রবীমি ৎবং শৃণুষ্ব মে |
যজ্জ্ঞাৎবৈতি চ নির্বাণং মুক্ত্বা সংসৃতিসাগরম্ || ২৬ ||
যদনাদীন্দ্রিয়ৈর্হীনং গুণভুগ্গুণবর্জিতম্ |
অব্যক্তং সদসদ্ভিন্নমিন্দ্রিয়ার্থাবভাসকম্ || ২৭ ||
বিশ্বভৃচ্চাখিলব্যাপি ৎবেকং নানেব ভাসতে |
বাহ্যাভ্যন্তরতঃ পূর্ণমস.ম্গং তমসঃ পরম্ || ২৮ ||
দুর্জ্ঞেয়ং চাতিসূক্ষ্মৎবাদ্দীপ্তানামপি ভাসকম্ |
জ্ঞেয়মেতাদৃশং বিদ্ধি জ্ঞানগম্যং পুরাতনম্ || ২৯ ||
এতদেব পরং ব্রহ্ম জ্ঞেয়মাত্মা পরোঽব্যয়ঃ |
গুণান্প্রকৃতিজান্ভুঙ্ক্তে পুরুষঃ প্রকৃতেঃ পরঃ || ৩০ ||
গুণৈস্ত্রিভিরিয়ং দেহে বধ্নাতি পুরুষং দৃঢম্ |
যদা প্রকাশঃ শান্তিশ্চ বৃদ্ধে সত্ত্বং তদাধিকম্ || ৩১ ||
লোভোঽশমঃ স্পৃহারম্ভঃ কর্মণাং রজসো গুণঃ |
মোহোঽপ্রবৃত্তিশ্চাজ্ঞানং প্রমাদস্তমসো গুণঃ || ৩২ ||
সত্ত্বাধিকঃ সুখং জ্ঞানং কর্মসংগং রজোঽধিকঃ |
তমোঽধিকশ্চ লভতে নিদ্রালস্যং সুখেতরৎ || ৩৩ ||
এষু ত্রিষু প্রবৃদ্ধেষু মুক্তিসংসৃতিদুর্গতীঃ |
প্রয়ান্তি মানবা রাজংস্তস্মাৎসত্ত্বয়ুতো ভব || ৩৪ ||
ততশ্চ সর্বভাবেন ভজ ৎবং মাং নরেশ্বর |
ভক্ত্যা চাব্যভিচারিণ্যা সর্বত্রৈব চ সংস্থিতম্ || ৩৫ ||
অগ্নৌ সূর্যে তথা সোমে যচ্চ তারাসু সংস্থিতম্ |
বিদুষি ব্রাহ্মণে তেজো বিদ্ধি তন্মামকং নৃপ || ৩৬ ||
অহমেবাখিলং বিশ্বং সৃজামি বিসৃজামি চ |
ঔষধীস্তেজসা সর্বা বিশ্বং চাপ্যায়য়াম্যহম্ || ৩৭ ||
সর্বেন্দ্রিয়াণ্যধিষ্ঠায় জাঠরং চ ধনংজয়ম্ |
ভুনজ্মি চাখিলান্ভোগান্পুণ্যপাপবিবর্জিতঃ || ৩৮ ||
অহং বিষ্ণুশ্চ রুদ্রশ্চ ব্রহ্মা গৌরী গণেশ্বরঃ |
ইন্দ্রাদ্যা লোকপালাশ্চ মমৈবাংশসমুদ্ভবাঃ || ৩৯ ||
যেন যেন হি রূপেণ জনো মাং পর্যুপাসতে |
তথা তথা দর্শয়ামি তস্মৈ রূপং সুভক্তিতঃ || ৪০ ||
ইতি ক্ষেত্রং তথা জ্ঞাতা জ্ঞানং জ্ঞেয়ং ময়েরিতম্ |
অখিলং ভূপতে সম্যগুপপন্নায় পৃচ্ছতে || ৪১ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
ক্ষেত্রজ্ঞাতৃজ্ঞেয়বিবেকয়োগো নাম নবমোঽধ্যায়ঃ ||
১০
|| দশমোঽধ্যায়ঃ ||
|| উপদেশয়োগঃ ||
শ্রীগজানন উবাচ –
দৈব্যাসুরী রাক্ষসী চ প্রকৃতিস্ত্রিবিধা নৃণাম্ |
তাসাং ফলানি চিন্হানি সঙ্ক্ষেপাত্তেঽধুনা ব্রুবে || ১ ||
আদ্যা সংসাধয়েন্মুক্তিং দ্বে পরে বন্ধনং নৃপ |
চিন্হং ব্রবীমি চাদ্যায়াস্তন্মে নিগদতঃ শৃণু || ২ ||
অপৈশূন্যং দয়াঽক্রোধশ্চাপল্যং ধৃতিরার্জবম্ |
তেজোঽভয়মহিংসা চ ক্ষমা শৌচমমানিতা || ৩ ||
ইত্যাদি চিন্হমাদ্যায়া আসুর্যাঃ শৃণু সাম্প্রতম্ |
অতিবাদোঽভিমানশ্চ দর্পো জ্ঞানং সকোপতা || ৪ ||
আসুর্যা এবমাদ্যানি চিন্হানি প্রকৃতের্নৃপ |
নিষ্ঠুরৎবং মদো মোহোঽহংকারো গর্ব এব চ || ৫ ||
দ্বেষো হিংসাঽদয়া ক্রোধ ঔদ্ধত্যং দুর্বিনীততা |
আভিচারিককর্তৃৎবং ক্রূরকর্মরতিস্তথা || ৬ ||
অবিশ্বাসঃ সতাং বাক্যেঽশুচিৎবং কর্মহীনতা |
নিন্দকৎবং চ বেদানাং ভক্তানামসুরদ্বিষাম্ || ৭ ||
মুনিশ্রোত্রিয়বিপ্রাণাং তথা স্মৃতিপুরাণয়োঃ |
পাখণ্ডবাক্যে বিশ্বাসঃ সংগতির্মলিনান্মনাম্ || ৮ ||
সদম্ভকর্মকর্তৃৎবং স্পৃহা চ পরবস্তুষু |
অনেককামনাবত্ত্বং সর্বদাঽনৃতভাষণম্ || ৯ ||
পরোৎকর্ষাসহিষ্ণুৎবং পরকৃত্যপরাহতিঃ |
ইত্যাদ্যা বহবশ্চান্যে রাক্ষস্যাঃ প্রকৃতের্গুণাঃ || ১০ ||
পৃথিব্যাং স্বর্গলোকে চ পরিবৃত্য বসন্তি তে |
মদ্ভক্তিরহিতা লোকা রাক্ষসীং প্রকৃতিং শ্রিতাঃ || ১১ ||
তামসীং যে শ্রিতা রাজন্যান্তি তে রৌরবং ধ্রুবম্ |
অনির্বাচ্যং চ তে দুঃখং ভুঞ্জতে তত্র সংস্থিতাঃ || ১২ |
দৈবান্নিঃসৃত্য নরকাজ্জায়ন্তে ভুবি কুব্জকাঃ |
জাত্যন্ধাঃ পঙ্গবো দীনা হীনজাতিষু তে নৃপ || ১৩ ||
পুনঃ পাপসমাচারা ময়্যভক্তাঃ পতন্তি তে |
উৎপতন্তি হি মদ্ভক্তা যাং কাংচিদ্যোনিমাশ্রিতাঃ || ১৪ ||
লভন্তে স্বর্গতিং যজ্ঞৈরন্যৈর্ধর্মশ্চ ভূমিপ |
সুলভাস্তাঃ সকামানাং ময়ি ভক্তিঃ সুদুর্লভা || ১৫ ||
বিমূঢা মোহজালেন বদ্ধাঃ স্বেন চ কর্মণা |
অহং হন্তা অহং কর্তা অহং ভোক্তেতি বাদিনঃ || ১৬ ||
অহমেবেশ্বরঃ শাস্তা অহং বেত্তা অহং সুখী |
এতাদৃশী মতির্নৄণামধঃ পাতয়তীহ তান্ || ১৭ ||
তস্মাদেতৎসমুৎসৃজ্য দৈবীং প্রকৃতিমাশ্রয় |
ভক্তিং কুরু মদীয়াং ৎবমনিশং দৃঢচেতসা || ১৮ ||
সাপি ভক্তিস্ত্রিধা রাজন্সাত্ত্বিকী রাজসীতরা |
যদ্দেবান্ভজতে ভক্ত্যা সাত্ত্বিকী সা মতা শুভা || ১৯ ||
রাজসী সা তু বিজ্ঞেয়া ভক্তির্জন্মমৃতিপ্রদা |
যদ্যক্ষাংশ্চৈব রক্ষাংসি যজন্তে সর্বভাবতঃ || ২০ ||
বেদেনাবিহিতং ক্রূরং সাহংকারং সদম্ভকম্ |
ভজন্তে প্রেতভূতাদীন্কর্ম কুর্বন্তি কামুকম্ || ২১ ||
শোষয়ন্তো নিজং দেহমন্তঃস্থং মাং দৃঢাগ্রহাঃ |
তামস্যেতাদৃশী ভক্তির্নৃণাং সা নিরয়প্রদা || ২২ ||
কামো লোভস্তথা ক্রোধো দম্ভশ্চৎবার ইত্যমী |
মহাদ্বারাণি বীচীনাং তস্মাদেতাংস্তু বর্জয়েৎ || ২৩ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
উপদেশয়োগো নাম দশমোঽধ্যায়ঃ ||
১১
|| একাদশোঽধ্যায়ঃ ||
|| ত্রিবিধবস্তুবিবেকনিরূপণম্ ||
শ্রীগজানন উবাচ –
তপোঽপি ত্রিবিধং রাজন্কায়িকাদিপ্রভেদতঃ |
ঋজুতার্জবশৌচানি ব্রহ্মচর্যমহিংসনম্ || ১ ||
গুরুবিজ্ঞদ্বিজাতীনাং পূজনং চাসুরদ্বিষাম্ |
স্বধর্মপালনং নিত্যং কায়িকং তপ ঈদৃশম্ || ২ ||
মর্মাস্পৃক্চ প্রিয়ং বাক্যমনুদ্বেগং হিতং ঋতম্ |
অধীতির্বেদশাস্ত্রাণাং বাচিকং তপ ঈদৃশম্ || ৩ ||
অন্তঃপ্রসাদঃ শান্তৎবং মৌনমিন্দ্রিয়নিগ্রহঃ |
নির্মলাশয়তা নিত্যং মানসং তপ ঈদৃশম্ || ৪ ||
অকামতঃ শ্রদ্ধয়া চ যত্তপঃ সাত্ত্বিকং চ তৎ |
ঋধ্যৈ সৎকারপূজার্থং সদম্ভং রাজসং তপঃ || ৫ ||
তদস্থিরং জন্মমৃতী প্রয়চ্ছতি ন সংশয়ঃ |
পরাত্মপীডকং যচ্চ তপস্তামসমুচ্যতে || ৬ ||
বিধিবাক্যপ্রমাণার্থং সৎপাত্রে দেশকালতঃ |
শ্রদ্ধয়া দীয়মানং যদ্দানং তৎসাত্ত্বিকং মতম্ || ৭ ||
উপকারং ফলং বাপি কাঙ্ক্ষদ্ভির্দীয়তে নরৈঃ |
ক্লেশতো দীয়মানং বা ভক্ত্যা রাজসমুচ্যতে || ৮ ||
অকালদেশতোঽপাত্রেঽবজ্ঞয়া দীয়তে তু যৎ |
অসৎকারাচ্চ যদ্দত্তং তদ্দানং তামসং স্মৃতম্ || ৯ ||
জ্ঞানং চ ত্রিবিধং রাজন্ শৃণুষ্ব স্থিরচেতসা |
ত্রিধা কর্ম চ কর্তারং ব্রবীমি তে প্রসংগতঃ || ১০ ||
নানাবিধেষু ভূতেষু মামেকং বীক্ষতে তু যঃ |
নাশবৎসু চ নিত্যং মাং তজ্জ্ঞানং সাৎবিকং নৃপ || ১১ ||
তেষু বেত্তি পৃথগ্ভূতং বিবিধং ভাবমাশ্রিতঃ |
মামব্যয়ং চ তজ্জ্ঞানং রাজসং পরিকীর্তিতম্ || ১২ ||
হেতুহীনমসত্যং চ দেহাত্মবিষয়ং চ যৎ |
অসদল্পার্থবিষয়ং তামসং জ্ঞানমুচ্যতে || ১৩ ||
ভেদতস্ত্রিবিধং কর্ম বিদ্ধি রাজন্ময়েরিতম্ |
কামনাদ্বেষদম্ভৈর্যদ্রহিতং নিত্যকর্ম যৎ || ১৪ ||
কৃতং বিনা ফলেচ্ছাং যৎকর্ম সাত্ত্বিকমুচ্যতে |
যদ্বহুক্লেশতঃ কর্ম কৃতং যচ্চ ফলেচ্ছয়া || ১৫ ||
ক্রিয়মাণং নৃভির্দম্ভাৎকর্ম রাজসমুচ্যতে |
অনপেক্ষ্য স্বশক্তিং যদর্থক্ষয়করং চ যৎ || ১৬ ||
অজ্ঞানাৎক্রিয়মাণং যৎকর্ম তামসমীরিতম্ |
কর্তারং ত্রিবিধং বিদ্ধি কথ্যমানং ময়া নৃপ || ১৭ ||
ধৈর্যোৎসাহী সমোঽসিদ্ধৌ সিদ্ধৌ চাবিক্রিয়স্তু যঃ |
অহংকারবিমুক্তো যঃ স কর্তা সাত্ত্বিকো নৃপ || ১৮ ||
কুর্বন্হর্ষং চ শোকং চ হিংসাং ফলস্পৃহাং চ যঃ |
অশুচির্লুব্ধকো যশ্চ রাজসোঽসৌ নিগদ্যতে || ১৯ ||
প্রমাদাজ্ঞানসহিতঃ পরোচ্ছেদপরঃ শঠঃ |
অলসস্তর্কবান্যস্তু কর্তাসৌ তামসো মতঃ || ২০ ||
সুখং চ ত্রিবিধং রাজন্দুঃখং চ ক্রমতঃ শৃণু |
সাত্ত্বিকং রাজসং চৈব তামসং চ ময়োচ্যতে || ২১ ||
বিষবদ্ভাসতে পূর্বং দুঃখস্যান্তকরং চ যৎ |
ইষ্যমানং তথাঽঽবৃত্ত্যা যদন্তেঽমৃতবদ্ভবেৎ || ২২ ||
প্রসাদাৎস্বস্য বুদ্ধের্যৎসাত্ত্বিকং সুখমীরিতম্ |
বিষয়াণাং তু যো ভোগো ভাসতেঽমৃতবৎপুরা || ২৩ ||
হালাহলমিবান্তে যদ্রাজসং সুখমীরিতম্ |
তন্দ্রিপ্রমাদসম্ভূতমালস্যপ্রভবং চ যৎ || ২৪ ||
সর্বদা মোহকং স্বস্য সুখং তামসমীদৃশম্ |
ন তদস্তি যদেতৈর্যন্মুক্তং স্যাত্ত্রিবিধৈর্গুণৈঃ || ২৫ ||
রাজন্ব্রহ্মাপি ত্রিবিধমোন্তৎসদিতি ভেদতঃ |
ত্রিলোকেষু ত্রিধা ভূতমখিলং ভূপ বর্ততে || ২৬ ||
ব্রহ্মক্ষত্রিয়বিট্শূদ্রাঃ স্বভাবাদ্ভিন্নকর্মিণঃ |
তানি তেষাং তু কর্মাণি সঙ্ক্ষেপাত্তেঽধুনা বদে || ২৭ ||
অন্তর্বাহ্যেন্দ্রিয়াণাং চ বশ্যৎবমার্জবং ক্ষমা |
নানাতপাংসি শৌচং চ দ্বিবিধং জ্ঞানমাত্মনঃ || ২৮ ||
বেদশাস্ত্রপুরাণানাং স্মৃতীনাং জ্ঞানমেব চ |
অনুষ্ঠানং তদর্থানাং কর্ম ব্রাহ্মমুদাহৃতম্ || ২৯ ||
দার্ঢ্যং শৌর্যং চ দাক্ষ্যং চ যুদ্ধে পৃষ্ঠাপ্রদর্শনম্ |
শরণ্যপালনং দানং ধৃতিস্তেজঃ স্বভাবজম্ || ৩০ ||
প্রভুতা মন ঔনত্যং সুনীতির্লোকপালনম্ |
পঞ্চকর্মাধিকারিৎবং ক্ষাত্রং কর্ম সমীরিতম্ || ৩১ ||
নানাবস্তুক্রয়ো ভূমেঃ কর্ষণং রক্ষণং গবাম্ |
ত্রিধা কর্মাধিকারিৎবং বৈশ্যকর্ম সমীরিতম্ || ৩২ ||
দানং দ্বিজানাং শুশ্রূষা সর্বদা শিবসেবনম্ |
এতাদৃশং নরব্যাঘ্র কর্ম শৌদ্রমুদীরিতম্ || ৩৩ ||
স্বস্বকর্মরতা এতে ময়্যর্প্যাখিলকারিণঃ |
মৎপ্রসাদাৎস্থিরং স্থানং যান্তি তে পরমং নৃপ || ৩৪||
ইতি তে কথিতো রাজন্প্রসাদাদ্যোগৌত্তমঃ |
সাংগোপাংগঃ সবিস্তারোঽনাদিসিদ্ধো ময়া প্রিয় || ৩৫ ||
যুঙ্ক্ষ্ব যোগং ময়াখ্যাতং নাখ্যাতং কস্যচিন্নৃপ |
গোপয়ৈনং ততঃ সিদ্ধিং পরাং যাস্যস্যনুত্তমাম্ || ৩৬ ||
ব্যাস উবাচ –
ইতি তস্য বচঃ শ্রুৎবা প্রসন্নস্য মহাত্মনঃ |
গণেশস্য বরেণ্যঃ স চকার চ যথোদিতম্ || ৩৭ ||
ত্যক্ত্বা রাজ্যং কুটুম্বং চ কান্তারং প্রয়য়ৌ রয়াৎ |
উপদিষ্টং যথা যোগমাস্থায় মুক্তিমাপ্নবান্ || ৩৮ ||
ইমং গোপ্যতমং যোগং শৃণোতি শ্রদ্ধয়া তু যঃ |
সোঽপি কৈবল্যমাপ্নোতি যথা যোগী তথৈব সঃ || ৩৯ ||
য ইমং শ্রাবয়েদ্যোগং কৃৎবা স্বার্থং সুবুদ্ধিমান্ |
যথা যোগী তথা সোঽপি পরং নির্বাণমৃচ্ছতি || ৪০ ||
যো গীতাং সম্যগভ্যস্য জ্ঞাৎবা চার্থং গুরোর্মুখাৎ |
কৃৎবা পূজাং গণেশস্য প্রত্যহং পঠতে তু যঃ || ৪১ ||
এককালং দ্বিকালং বা ত্রিকালং বাপি যঃ পঠেৎ |
ব্রহ্মীভূতস্য তস্যাপি দর্শনান্মুচ্যতে নরঃ || ৪২ ||
ন যজ্ঞৈর্ন ব্রতৈর্দানৈর্নাগ্নিহোত্রৈর্মহাধনৈঃ |
ন বেদৈঃ সম্যগভ্যস্তৈঃ সহাঙ্গকৈঃ || ৪৩ ||
পুরাণশ্রবণৈর্নৈব ন শাস্ত্রৈঃ সাধুচিন্তিতৈঃ |
প্রাপ্যতে ব্রহ্ম পরমমনয়া প্রাপ্যতে নরৈঃ || ৪৪ ||
ব্রহ্মঘ্নো মদ্যপঃ স্তেয়ী গুরুতল্পগমোঽপি যঃ |
চতুর্ণাং যস্তু সংসর্গী মহাপাতককারিণাম্ || ৪৫ ||
স্ত্রীহিংসাগোবধাদীনাং কর্তারো যে চ পাপিনঃ |
তে সর্বে প্রতিমুচ্যন্তে গীতামেতাং পঠন্তি চেৎ || ৪৬ ||
যঃ পঠেৎপ্রয়তো নিত্যং স গণেশো ন সংশয়ঃ |
চতুর্থ্যাং যঃ পঠেদ্ভক্ত্যা সোঽপি মোক্ষায় কল্পতে || ৪৭ ||
তত্তৎক্ষেত্রং সমাসাদ্য স্নাৎবাভ্যর্চ্য গজাননম্ |
সকৃদ্গীতাং পঠন্ভক্ত্যা ব্রহ্মভূয়ায় কল্পতে || ৪৮ ||
ভাদ্রে মাসে সিতে পক্ষে চতুর্থ্যাং ভক্তিমান্নরঃ |
কৃৎবা মহীময়ীং মূর্তিং গণেশস্য চতুর্ভুজাম্ || ৪৯ ||
সবাহনাং সায়ুধাং চ সমভ্যর্চ্য যথাবিধি |
যঃ পঠেৎসপ্তকৃৎবস্তু গীতামেতাং প্রয়ত্নতঃ || ৫০ ||
দদাতি তস্য সন্তুষ্টো গণেশো ভোগমুত্তমম্ |
পুত্রান্পৌত্রান্ধনং ধান্যং পশুরত্নাদিসম্পদঃ || ৫১ ||
বিদ্যার্থিনো ভবেদ্বিদ্যা সুখার্থী সুখমাপ্নুয়াৎ |
কামানন্যাঁল্লভেৎকামী মুক্তিমন্তে প্রয়ান্তি তে || ৫২ ||
ইতি শ্রীমদ্গণেশগীতাসূপনিষদর্থগর্ভাসু
যোগামৃতার্থশাস্ত্রে
শ্রীগণেশপুরাণে উত্তরখণ্ডে গজাননবরেণ্যসংবাদে
ত্রিবিধবস্তুবিবেকনিরূপণং নাম একাদশোঽধ্যায়ঃ ||

|| ইতি গণেশ গীতা সমাপ্তা ||

<