সমাপ্তশ্চায়ং শ্রাদ্ধকল্পঃ |
বসিষ্ঠ উবাচ
ইত্থং প্রবর্ত্তমানস্য জমদগ্নের্মহাত্মনঃ |
বর্ষাণি কতিচিদ্রাজন্ব্যতীয়ুরমিতৌজসঃ || ২. ২১. ১||
রামোঽপি নৃপশার্দূল সর্বধর্মভৃতাং বরঃ |
বেদবেদাঙ্গতত্ত্বজ্ঞঃ সর্বশাস্ত্রবিশারদঃ || ২. ২১. ২||
পিত্রোশ্চকার শুশ্রূষাং বিনীতাত্মা মহামতিঃ |
প্রীতিং চ নিজচেষ্টাভিরন্বহং পর্যবর্ত্তয়ৎ || ২. ২১. ৩||
ইত্থং প্রবর্ত্তমানস্য বর্ষাণি কতিচিন্নৃপ |
পিত্রোঃ শুশ্রূষয়ানৈষীদ্রামো মতিমতাং বরঃ || ২. ২১. ৪||
স কদাচিন্মহাতেজাঃ পিতামহ গুহং প্রতি |
গন্তুং ব্যবসিতো রাজন্দৈবেন চ নিয়োজিতঃ || ২. ২১. ৫||
নিপীড্য শিরসা পিত্রোশ্চরণৌ ভৃগুপুঙ্গবঃ |
উবাচ প্রাঞ্জলির্ভূতবা সপ্রশ্রয়মিদং বচঃ || ২. ২১. ৬||
কঞ্চিদর্থমহং তাত মাতরং ৎবাং চ সাম্প্রতম্ |
বিজ্ঞাপয়িতুমিচ্ছামি মম তচ্ছ্রোতুমর্হথঃ || ২. ২১. ৭||
পিতামহমহং দ্রষ্টুমুৎকণ্ঠিতমনাশ্চিরম্ |
তস্মাত্তৎপার্শ্বমধুনা গমিষ্যে বামনুজ্ঞয়া || ২. ২১. ৮||
আহূতশ্চাসকৃত্তাত সোৎকণ্ঠং প্রীয়মাণয়া |
পিতামহ্যা বহুমুখৈরিচ্ছন্ত্যা মম দর্শনম্ || ২. ২১. ৯||
পিৎৠন্পিতামহস্যাপি প্রিয়মেব প্রদর্শনম্ |
সদীয়ং তেন তৎপার্শ্বং গন্তুং মামনুজানত || ২. ২১. ১০||
বসিষ্ঠ উবাচ
ইতি তস্য বচঃ শ্রুৎবা সংভ্রান্তং সমুদীরিতম্ |
হর্ষেণ মহতা যুক্তৌ সাশ্রুনেত্রৌ বভূবতুঃ || ২. ২১. ১১||
তমালিঙ্গ্য মহাভাগং মূর্ধ্ন্যুপাঘ্রায় সাদরম্ |
অভিনন্দ্যাশিষা তাত হ্যুভৌ তাবিদমাহতুঃ || ২. ২১. ১২||
পিতামহগৃহং তাত প্রয়াহি ৎবং যথাসুখম্ |
পিতামহপিতামহ্যোঃ প্রীতয়ে দর্শনায় চ || ২. ২১. ১৩||
তত্র গৎবা যথান্যায়ং তং শুশ্রূষা পরায়ণঃ |
কঞ্চিৎকালং তয়োর্বৎস প্রীতয়ে বস তদ্গৃহে || ২. ২১. ১৪||
স্থিৎবা নাতিচিরং কালং তয়োর্ভূয়োঽপ্যনুশয় |
অত্রাগচ্ছ মহাভাগ ক্ষেমেণাস্মদ্দিদৃক্ষয়া || ২. ২১. ১৫||
ক্ষণার্দ্ধমপি শক্তাঃ স্থো ন বিনা পুত্রদর্শনম্ |
তস্মাৎপিতামহ গৃহে ন চিরাৎস্থাতুমর্হসি || ২. ২১. ১৬||
তদাজ্ঞয়াথ বা পুত্র প্রপিতামহসন্নিধিম্ |
গতোঽপি শীঘ্রমাগচ্ছ ক্রমেণ তদনুজ্ঞয়া || ২. ২১. ১৭||
বসিষ্ঠ উবাচ
ইত্যুক্তস্তৌ পরিক্রম্য প্রণম্য চ মহামতিঃ |
পিতরাবপ্যনুজ্ঞাপ্য পিতামহগৃহং ততঃ || ২. ২১. ১৮||
স গৎবা ভৃগুবর্যস্য ঋচীকস্য মহাত্মনঃ |
প্রবিবেশাশ্রমং রামো মুনিশিষ্যোপশোভিতম্ || ২. ২১. ১৯||
স্বাধ্যায়ঘোষৈর্বিপুলৈঃ সর্বতঃ প্রতিনাদিতম্ |
প্রশান্তবৈর সত্ত্বাঢ্যং সর্বসত্ত্বমনোহরম্ || ২. ২১. ২০||
স প্রবিশ্যশ্রমং রম্যমৃচীকং স্থিতমাসনে |
দদর্শ রামো রাজেন্দ্র স পিতামহমগ্রতঃ || ২. ২১. ২১||
জাজ্বল্যমানং তপসা ধিষ্ণ্যস্থমিব পাবকম্ |
উপাসিতং সত্যবত্যা যথা দক্ষিণায়ঽধ্বরম্ || ২. ২১. ২২||
স্বসমীপমুপায়ান্তং রামমালোক্য তৌ নৃপ |
সুচিরং তং বিমর্শেতাং সমাজ্ঞাপূর্বদর্শনৌ || ২. ২১. ২৩||
কোঽযমেষ তপোরাশিঃ সর্বলত্রণপূজিতঃ |
বালোঽযং বলবান্ভাতিগাংভীর্যাৎপ্রশ্রয়েণ চ || ২. ২১. ২৪||
এবং তয়োশ্চিন্তয়তোঃ সহর্ষং হৃদি কৌতুকাৎ |
আসসাদ শনৈ রামঃ সমীপে বিনয়ান্বিতঃ || ২. ২১. ২৫||
স্বনামগোত্রে মতিমানুক্ত্বা পিত্রোর্মুদান্বিতঃ |
সংস্পৃশংশ্চরণৌ মূর্ধ্না হস্তাভ্যাং চাভ্যবাদয়ৎ || ২. ২১. ২৬||
ততস্তৌ প্রীতমনসৌ সমুথাপ্য চ সত্তমম্ |
আশীর্ভিরভিনন্দেতাং পৃথক্ পৃথগুভাবপি || ২. ২১. ২৭||
তমাশ্লিষ্যাঙ্কমারোপ্য হর্ণাশ্রুপ্লুতলোচনৌ |
বীক্ষন্তৌ তন্মুখাংভোজং পরং হর্ষমবাপতুঃ || ২. ২১. ২৮||
ততঃ সুখোপবিষ্টং তমাত্মবংশসমুদ্বহম্ |
অনাময়মপৃচ্ছেতাং তাবুভৌ দংপতী তদা || ২. ২১. ২৯||
পিতরৌ তে কুশলিনো বৎস কিংভ্রাতরস্তথা |
অনায়াসেন তে বৃত্তির্বর্ততে চাথ কর্হিচিৎ || ২. ২১. ৩০||
সমস্তাভ্যাং ততো রাজন্নাচচক্ষে যথোদিতঃ |
তথা স্বানুগতং পিত্রোর্ভ্রাৎৠণাং চৈব চেষ্টিতম্ || ২. ২১. ৩১||
এবং তয়োর্মহারাজ সৎপ্রীতিজনিতৈগুণৈঃ |
প্রীয়মাণোঽবসদ্রামঃ পিতুঃ পিত্রোর্ন্নিবেশনে || ২. ২১. ৩২||
স তস্মিন্সর্বভূতানাং মনোনয়ননন্দনঃ |
উবাস কতিচিন্মাসাংস্তচ্ছুশ্রূষাপরায়ণঃ || ২. ২১. ৩৩||
অথানুজ্ঞাপ্য তৌ রাজন্ভৃগুবর্যো মহামনাঃ |
পিতামহগুরোর্গন্তুমিয়েষাশ্রয়মাশ্রমম্ || ২. ২১. ৩৪||
স তাভ্যাং প্রীতিয়ুক্তাভ্যামাশীর্ভিরভিনন্দিতঃ |
যথা চাভ্যাং প্রদিষ্টেন যয়া বৌর্বাশ্রমং প্রতি || ২. ২১. ৩৫||
তং নমস্কৃত্য বিধিবচ্চ্যবনং চ মহাতপাঃ |
সপ্রহর্ষং তদাজ্ঞাতঃ প্রয়য়াবাশ্রমং ভৃগোঃ || ২. ২১. ৩৬||
স গৎবামুনিমুখ্যস্য ভৃগোরাশ্রমমণ্ডলম্ |
দদর্শ শান্তচেতোভির্মুনিভিঃ সর্বতো বৃতম্ || ২. ২১. ৩৭||
সুস্নিগ্ধশীতলচ্ছায়ৈঃ সর্বর্তুকগুণান্বিতৈঃ |
তরুভিঃ সংবৃতং প্রীতঃ ফলপুষ্পোত্তরান্বিতৈঃ || ২. ২১. ৩৮||
নানাখগকুলারাবৈর্মনঃশ্রোত্রসুখাবহৈঃ |
ব্রহ্মঘোষৈশ্চ বিবিধৈঃ সর্বতঃ প্রতিনাদিতম্ || ২. ২১. ৩৯||
সমন্ত্রাহুতিহোমোত্থধূমগন্ধেন সর্বতঃ |
নিরস্তনিখিলাঘৌঘং বনান্তরবিসর্পিণা || ২. ২১. ৪০||
সমিৎকুশাহরৈর্দণ্ডমেখলাজিনমণ্ডিতৈঃ |
অভিতঃ শোভিতং রাজন্রম্যৈর্মুনিকুমারকৈঃ || ২. ২১. ৪১||
প্রসূনজলসংপূর্মপাত্রহস্তাভিরন্তরা |
শোভিতং মুনিকল্যাভিশ্চরন্তীভিরিতস্ততঃ || ২. ২১. ৪২||
সপোতহরিণীয়ূথৈর্বিস্রংভাদবিশঙ্কিভিঃ |
উটজাঙ্গণপর্যন্ততরুচ্ছায়াস্বধিষ্ঠিতম্ || ২. ২১. ৪৩||
রোমন্থতঃ পরামৃষ্টিয়ূথ সাক্ষিকমুৎপ্রদৈঃ |
প্রারব্ধতাণ্ডবং কেকীময়ূরৈর্মধুরস্বরৈঃ || ২. ২১. ৪৪||
প্রবিকীর্ণকণোদ্দেশং মৃগশব্দৈঃ সমীপগৈঃ |
অনালীঢাতপচ্ছায়াশুষ্যন্নীবাররাশিভিঃ || ২. ২১. ৪৫||
হূয়মানানলং কালে পূজ্যমানাতিথিব্রজম্ |
অভ্যস্যমানচ্ছন্দৌঘং চিন্ত্যমানগমোদিতম্ || ২. ২১. ৪৬||
পঠ্যমানাখিলস্মার্ত্তং শ্রৌতার্থপ্রবিচারণম্ |
প্রারব্ধপিতৃদেবেজ্যং সর্বভূতমনোহরম্ || ২. ২১. ৪৭||
তপস্বিজনভূয়িষ্ঠমাকাপুরুষসেবিতম্ |
তপোবৃদ্ধিকরং পুণ্যং সর্বসত্ত্বসুখাস্পদম্ || ২. ২১. ৪৮||
তপোধনানন্দকরং ব্রহ্মলোকমিবাপরম্ |
প্রসূনসৌরভভ্রাম্যন্মধুপারাবনাদিতম্ || ২. ২১. ৪৯||
সর্বতো বীজ্যমানেন বিবিধেন নভস্বতা |
এবংবিধগুণোপেতং পশ্যন্নাশ্রমমুত্তমম্ || ২. ২১. ৫০||
প্রবিবেশ বিনীতাত্মা সুকৃতীবামরালয়ম্ |
সংপ্রবিশ্যশ্রমোপান্তং রামঃ স্বপ্রপিতামহম্ || ২. ২১. ৫১||
দদর্শ পরিতো রাজন্মুনিশিষ্যশতাবৃতম্ |
ব্যাখ্যানবেদিকামধ্যে নিবিষ্টং কুশবিষ্টরে |
সিতশ্মশ্রুজটাকূর্চব্রহ্মসূত্রোপশোভিতম্ || ২. ২১. ৫২||
বামেতরোরুমধ্যাস্ত বামজঙ্ঘেন জানুনা || ২. ২১. ৫৩||
যোগপট্টেন সংবীতস্বদেহমৃষিপুঙ্গবম্ |
ব্যাখ্যানমুদ্রাবিলসৎসব্যপাণিতলাংবুজম্ || ২. ২১. ৫৪||
যোগপট্টোপরিন্যস্তবিভ্রাজদ্বামপাণিকম্ |
সম্যগারণ্যবাক্যানাং সূক্ষ্মতত্ত্বার্থসংহতিম্ || ২. ২১. ৫৫||
বিবৃত্য মুনিমুখ্যেভ্যঃ শ্রাবয়ন্তং তপোনিধিম্ |
পিতুঃ পিতামহং দ্দষ্ট্বা রামস্তস্য মহাত্মনঃ || ২. ২১. ৫৬||
শনৈরিবমহারাজ সমীপং সমুপাগমৎ |
তমাগতমুপালক্ষ্য তৎপ্রভাবপ্রধর্ষিতাঃ || ২. ২১. ৫৭||
শঙ্কামবাপুর্মুনয়ো দূরাদেবাখিলা নৃপ |
তাবদূভৃগুরমেয়াত্মা তদাগমনতোষিতঃ || ২. ২১. ৫৮||
নিবৃত্তান্যকথালাপস্তং পশ্যন্নাস পার্থিব |
রামোঽপি তমুপাগম্য বিনয়াবনতাননঃ || ২. ২১. ৫৯||
অবন্দত যথান্যয়মুপেন্দ্র ইব বেধসম্ |
অভিবাদ্য যথান্যায়ং খ্যাতিং চ বিনয়ান্বিতঃ || ২. ২১. ৬০||
তাংশ্চ সংভাবয়ামাস মুনীন্রামোয়থাবয়ঃ |
তৈশ্চ সর্বৈর্মুদোপেতৈরাশীর্ভিরভিবর্দ্ধিতঃ || ২. ২১. ৬১||
উপাবিবেশ মেধাবী ভূমৌ তেষামনুজ্ঞয়া |
উপবিষ্টং ততো রামমাশীর্ভিরভিনন্দিতম্ || ২. ২১. ৬২||
পপ্রচ্ছকুশলপ্রশ্নং তমালোক্য ভৃগুস্তদা |
কুশলং খলু তে বৎস পিত্রোশ্চ কিমনাময়ম্ || ২. ২১. ৬৩||
ভ্রাৎৠণাং চৈব ভবতঃপিতুঃ পিত্রোস্তথৈব চ |
কিমর্থমাগতোঽত্র ৎবমধুনামম সন্নিধিম্ || ২. ২১. ৬৪||
কেনাপি বা ৎবমাদিষ্টঃ স্বয়মেবাথবাগতঃ |
ততোরামো যথান্যায়ং তস্মৈ সর্বমশেষতঃ || ২. ২১. ৬৫||
কথয়ামাস যৎপৃষ্টং তদা তেন মহাত্মনা |
পিতুর্মাতুশ্চ বৃত্তান্ত ভ্রাৎৠণাং চ মহাত্মনাম্ || ২. ২১. ৬৬||
পিতুঃ প্রিত্রোশ্চকৌশল্য দর্শনং চ তয়োর্নৃপ |
এতদন্যচ্চ সকলং ভৃগোঃ সপ্রশ্রয়ং মুদা || ২. ২১. ৬৭||
ন্যবেদয়দ্যথান্যায়মাত্মনশ্চ সমীহিতম্ |
শ্রুৎবৈতদখিলং রাজন্রামেণ সমুদীরিতম্ || ২. ২১. ৬৮||
তং চ দৃষ্ট্বা বিশেষেণ ভৃগুঃ প্রীতোঽভ্যনন্দত |
এবং তস্য প্রিয়ং কুর্বন্নুৎকৃষ্টৈরাত্মকর্মভিঃ || ২. ২১. ৬৯||
তত্রাশ্রমেঽবসদ্রামো দিনানি কতিচিন্নৃপ |
ততঃ কদাচিদেকান্তে রামং মুনিবরোত্তমঃ || ২. ২১. ৭০||
বৎসাগচ্ছেতি তং রাজন্নুপাহ্বয়দুপহ্বরে |
সোঽভিগম্য তমাসীনমভিবাদ্য কৃতাঞ্জলিঃ || ২. ২১. ৭১||
তস্থৌ তৎপুরতো রামঃ সুপ্রীতেনান্তরাত্মনা |
আশীর্ভিরভিনন্দ্যাথ ভৃগুস্তং প্রীত মানসঃ || ২. ২১. ৭২||
প্রাহ নাধিগতাশঙ্কং রামমালোক্য সাদরম্ |
শ্রুণু বৎস বচো মহ্য যত্ত্বাং বক্ষ্যামি সাংপ্রতম্ || ২. ২১. ৭৩||
হিতার্থং সর্বলোকানাং তব চাস্মাকমেব চ |
গচ্ছ পুত্র মমাদেশাদ্ধিমবন্তং মহাগিরিম্ || ২. ২১. ৭৪||
অধুনৈবাশ্রমাদস্মাত্তপসে ধৃতমানসঃ |
তত্রগৎবা মহাভাগ কৃৎবাশ্রমাপদং শুভম্ || ২. ২১. ৭৫||
আরাধয় মহাদেবং তপসা নিয়মেন চ |
প্রীতিমুৎপাদ্য তস্য ৎবং ভক্ত্যানন্যগয়া চিরাৎ || ২. ২১. ৭৬||
শ্রেয়ো মহদবাপ্নোষি নাত্র কার্যা বিজারণা |
তরসা তব ভক্ত্যা চ প্রীতো ভবতি শঙ্করঃ || ২. ২১. ৭৭||
করিষ্যতি চ তে সর্বং মনসা যদ্যদিচ্ছসি |
তুষ্টে তস্মিঞ্জগন্নাথে শঙ্করে ভক্তবৎসলে || ২. ২১. ৭৮||
অস্ত্রগ্রামমশেষং ৎবং বণু পুত্র যথেপ্সিতম্ |
ৎবয়া হিতার্থং দেবানাং করণীয়ং সুদুষ্করম্ || ২. ২১. ৭৯||
বিদ্যতেঽভ্যধিকং কর্ম শস্ত্রসাধ্যমনেকশঃ |
তস্মাত্ত্বং দেবদেবেশং সমারাধয় শঙ্করম্ || ২. ২১. ৮০||
ভক্ত্যা পরময়া যুক্তস্ততোঽভীষ্টমবাপ্স্যসি || ২. ২১. ৮১||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয় উপোদ্ধাতপাদে একবিংশতি তমৌধ্যায়ঃ || ২১||
বসিষ্ঠ উবাচ
ইত্যেবমুক্তো ভৃগুণা তথেত্যুক্ত্বা প্রণম্য চ |
রামস্তেনাভ্যনুজ্ঞাতশ্চকার গমনে মনঃ || ২. ২২. ১||
ভৃগুং খ্যাতিং চ বিধিবৎপরিক্রম্য প্রণম্যচ |
পরিষ্বক্তস্তথা তাভ্যামাশীর্ভিরাভিনন্দিতঃ || ২. ২২. ২||
মুনীংশ্চ তান্নমস্কৃত্য তৈঃ সর্বৈরনুমোদিতঃ |
নিশ্চক্রমাশ্রমাত্তস্মাত্তপসে কৃতনিশ্চয়ঃ || ২. ২২. ৩||
ততো গুরুনিয়োগেন তদুক্তেনৈব বর্ত্মনা |
হিমবন্তং গিরিবরং যয়ৌ রামো মহামনাঃ || ২. ২২. ৪||
সোঽতীত্য বিবিধান্দেশান্পর্বতান্সরিতস্তথা |
বনানি মুনিমুখ্যানামাবাসাংশ্চাত্যগাচ্ছনৈঃ || ২. ২২. ৫||
তত্রতত্র নিবাসেষু মুনীনাং নিবসন্পথি |
তীর্থেষু ক্ষেত্রমুখ্যেষু নিবসন্বা যয়ৌ শনৈঃ || ২. ২২. ৬||
অতীত্য সুবহূন্দেশান্পশ্যন্নপি মনোরমান্ |
আসসাদচ লশ্রেষ্ঠং হিমবন্তমনুত্তমম্ || ২. ২২. ৭||
স গৎবা পর্বতবরং নানাদ্রুমলতাস্থিতম্ |
দদর্শ বিপুলৈঃ শৃঙ্গৈরুল্লিখন্তমিবাংবরম্ || ২. ২২. ৮||
নানাধাতুবিচিত্রৈশ্চ প্রদেশৈরুপশোভিতম্ |
রত্নৌষধীভিরভিতঃ স্ফুরদ্ভিরভিশোভিতম্ || ২. ২২. ৯||
মরুৎসংঘট্টনাঘৃষ্টনীরসাংঘ্রিপজন্মনা |
সানিলেনানলেনোচ্ছৈর্দহ্যমানং নবং ক্বচিৎ || ২. ২২. ১০||
ক্বচিদ্রবিকরামর্শজ্বলদর্কেপলাগ্নিভিঃ |
দ্রবদ্ধিমাশিলাজাতুজলশান্তদবানলম্ || ২. ২২. ১১||
স্ফটিকাঞ্জনদুর্বর্ণস্বর্ণরাশিপ্রভাকরৈঃ |
স্ফুরৎপরস্পরচ্ছায়াশরৈর্দ্দীপ্তবনং ক্বচিৎ || ২. ২২. ১২||
উপত্যকশিলাপৃষ্ঠবালাতপনিষেবিভিঃ |
তুষারক্লিন্নসিদ্ধৌঘৌরুদ্ভাসিতবনং ক্বচিৎ || ২. ২২. ১৩||
ক্বচিদর্কাশুসংভিন্নশ্চামীকরশিলাশ্রিতৈঃ |
যক্ষৌঘৈর্ভাসিতোপান্তং বিশদ্ভিরিবপাবকম্ || ২. ২২. ১৪||
দরীমুখবিনিষ্ক্রান্ততরক্ষূৎপতনাকুলৈঃ |
মৃগয়ূথার্ত্তসন্নাদৈরাপূরিতগুহং ক্বচিৎ || ২. ২২. ১৫||
যুদ্ধ্যদ্বরাহশার্দূলয়ূথপৈরিত স্তেরম্ |
প্রসভোন্মৃষ্টকান্তোরুশিলাতরুতটং ক্বচিৎ || ২. ২২. ১৬||
কলভোন্মেষণাকৃষ্টকরিণীভিরনুদ্রুতৈঃ |
গবয়ৈঃ খুরসংক্ষুণ্ণশিলাপ্রস্থতটঙ্ক্বচিৎ || ২. ২২. ১৭||
বাসিতর্থেঽভিসংবৃদ্ধমদোন্মত্তমতঙ্গজৈঃ |
যুদ্ধ্যদ্ভিশ্চূর্ণিতানেকগণ্ডশৈলবনং ক্বচিৎ || ২. ২২. ১৮||
বৃংহিতশ্রবণামর্ষান্মাতং গানভিধাবতাম্ |
সিংহানাং চরণক্ষুণ্ণনখভিন্নোপরং ক্বচিৎ || ২. ২২. ১৯||
সহসা নিপতৎসিংহনখনির্ভিন্নমস্তকৈঃ |
গজৈরাক্রন্দনাদেন পূর্যমামং বনং ক্বচিৎ || ২. ২২. ২০||
অষ্টপাদবলাকৃষ্টকেসরা দারুণাখৈঃ |
ভেদ্যমানাখিলশিলাগংভীরকুহরং ক্বচিৎ || ২. ২২. ২১||
সংরব্ধা নেকশবরপ্রসক্তৈরৃয়ূথপৈঃ |
ইতরেতরসংমর্দং বিপ্রভগ্নদৃষৎক্বচিৎ || ২. ২২. ২২||
গিরিকুঞ্জেষু সংক্রীডৎকরিণীমদ্বিপং ক্বচিৎ |
করেণুমাদ্রবন্মত্তগজাকলিতকাননম্ || ২. ২২. ২৩||
স্বপৎসিংহমুখশ্বাসমরুৎপুর্মদরীশতম্ |
গহনেষু গুরুত্রাসসাশঙ্কবিহরন্মৃগম্ || ২. ২২. ২৪||
কণ্টাকশ্লিষ্টলাঙ্গূললোমত্রুটনকাতরৈঃ |
ক্রীডিতং চমরীয়ূথৈর্মন্দমন্দবিচারিভিঃ || ২. ২২. ২৫||
গিরিকন্দরসংসক্তকিন্নরীসমুদীরিতৈঃ |
সতালনাদৈরুদিনৈর্ভৃতাশেষদিশামুখম্ || ২. ২২. ২৬||
অরণ্যদেবতানাং চ চরেতীনামিতস্ততঃ |
অলক্তকরসক্লিন্নচরণাঙ্কিতভূতলম্ || ২. ২২. ২৭||
ময়ূরকেকিরীবৃন্দৈঃ সংগীত মধুরস্বরৈঃ |
প্রবৃত্তনৃত্তং পরিতো বিততোদগ্রবর্হিভিঃ || ২. ২২. ২৮||
জলস্থলরুহানেককুসুমোৎকরবর্ষিভিঃ |
গাত্রাহ্লাদকরৈর্মন্দং বীজ্যমানং বনানিলৈঃ || ২. ২২. ২৯||
ভূতার্ত্তবরসাস্বাদমাদ্যৎপুংস্কোকিলারবৈঃ |
আকুলীকৃতপর্যন্তসহকারবনান্তরম্ || ২. ২২. ৩০||
নানাপুষ্পাসবোন্মাদ্যদ্ভৃঙ্গসংগীতনাদিতম্ |
অনেকবিহগারাববধিরীকৃতকাননম্ || ২. ২২. ৩১||
মধুদ্রবার্দ্রাবিরলপ্রত্যগ্রকুসুমোৎকরৈঃ |
বনান্তমারুতাকীর্ণৈরলঙ্কৃতমহীতলম্ || ২. ২২. ৩২||
উপরিষ্টান্নিপততাং বিষমোপলসংকটে |
নির্ঝরাণাং মহারাবৈঃ সমন্তাদ্বধিরীকৃতম্ || ২. ২২. ৩৩||
বিততানেকসংসক্তশাখাগ্রাবিরলচ্ছদৈঃ |
পাটলৈর্বিটপচ্ছায়ৈরুপশল্যসমুত্থিতৈঃ || ২. ২২. ৩৪||
কদংবনিংবহিন্তালসর্জবেধূকতিন্দুকৈঃ |
কপিত্থপনসাশোকসহকারেগুদাশনৈঃ || ২. ২২. ৩৫||
নাগচংপকপুন্নাগকোবিদারপ্রিয়ঙ্গুভিঃ |
প্রিয়ালনীপবকুলবন্ধূকাক্ষতমালকৈঃ || ২. ২২. ৩৬||
দ্রাক্ষামধূকামলকজংবূকঙ্কোলজাতিভিঃ |
বিল্বার্জুনকরঞ্জাম্রবীজপূরাঙ্ঘ্রিপৈরপি || ২. ২২. ৩৭||
পিচুলাংবষ্ঠকনকবৈকঙ্কতশমীধবৈঃ |
পুত্রজীবাভয়ারিষ্টলোহোদুংবরপিপ্পলৈঃ || ২. ২২. ৩৮||
অন্যৈশ্চ বিবিধৈর্বৃক্ষৈঃ সমন্তাদুপশোভিতম্ |
নিরন্তরতরুচ্ছায়াসুদূরবিনিবারিতৈঃ || ২. ২২. ৩৯||
সমন্তাদর্ককিরণৈরনাসাদিতভূতলম্ |
নানাপক্বফলাস্বাদবলপুষ্টৈঃ প্লবেগমৈঃ || ২. ২২. ৪০||
আক্রান্তচকিতানেকবনপঙ্ক্তিশতাকুলম্ |
তত্র তত্রাতিরম্যৈশ্চ শিলাকুহরনির্গতৈঃ || ২. ২২. ৪১||
প্রতাপবিষমৈরাজন্হ্রাস্যমানং সরিচ্ছতৈঃ |
সারোবরৈশ্চ বিপুলৈঃ কুমুদোৎপলমণ্ডিতৈঃ || ২. ২২. ৪২||
নানাবিহগসংঘুষ্টৈঃ সমন্তাদুপশোভিতম্ |
সমাসাদ্যথ শৈলেন্দ্রং তুষারশিশিরং গিরিম্ || ২. ২২. ৪৩||
আরুরোহ ভগুশ্রেষ্ঠস্তরসা তং মুদান্বিতঃ |
তস্য প্রবিশ্য গহনং বনং রামো মহামনাঃ || ২. ২২. ৪৪||
বিচচার শনৈ রাজন্নুপশল্যমহীরুহম্ |
স তত্র বিচরন্দিক্ষু হরিণীভিঃ সমন্ততঃ || ২. ২২. ৪৫||
বিক্ষ্যমাণো মুদং লেভে সাশঙ্কং মুগ্ধদৃষ্টিভিঃ |
স তত্র কুসুমামোদগন্ধিভির্বনবায়ুভিঃ || ২. ২২. ৪৬||
বীজ্যমানো জহর্ষে স বীক্ষ্যোদারাং বনশ্রিয়ম্ |
বিবিধাশ্চ স্থরীঃ সূক্ষ্মমুপরিক্রম্য ভার্গবঃ || ২. ২২. ৪৭||
দ্বন্দ্বাংশ্চ ধাতূন্বিবিধান্পশ্যন্নেবমতর্কয়ৎ |
অহোঽযং সর্বশৈলানামাধিপত্যেঽভিষেচিতঃ || ২. ২২. ৪৮||
ব্রহ্মণা যজ্ঞভাক্চৈব স্থানে সংপ্রতিপাদিতঃ |
অস্য শৈলাধিরাজৎবং সুব্যক্তমভিলক্ষ্যতে || ২. ২২. ৪৯||
রবৈঃ কীচকবেণুনাং মধুরীকৃতকাননঃ |
নিতংবস্থলসংসক্ততুষারনিচয়ৈগ্যম্ || ২. ২২. ৫০||
বিভাতীবাহিতস্বচ্ছপরীতধবলাংশুকঃ |
নিবিডশ্রিতনীহারনিকরেণ তথোপরি || ২. ২২. ৫১||
নানাবর্ণোত্তরাসংগাবৃত্তাঙ্গ ইবল্ক্ষ্যতে |
চন্দনাগুরুকর্পূরকস্তূরীকুঙ্কুমাদিভিঃ || ২. ২২. ৫২||
অলঙ্কৃতাগঃ সুব্যক্তং দৃশ্যতেঽহী বিলাসিবৎ |
মৃগেন্দ্রাহতদন্তীন্দ্রকুংভস্থলপরিচ্যুতৈঃ || ২. ২২. ৫৩||
স্থূলমুক্তোৎকরৈরেষ বিভাতি পরিতো গিরিঃ |
নানাবৃক্ষলতাবল্লীপুষ্পালঙ্কৃতমূর্দ্ধজঃ || ২. ২২. ৫৪||
নীরন্ধ্রাঞ্চিতমে ঘৌঘবিতানসমলঙ্কৃতঃ |
নানাধাতুবিচিত্রাঙ্গঃ সর্বরত্নবিভূষিতঃ || ২. ২২. ৫৫||
কৈলাসব্যাজবিলসৎসিতচ্ছত্রবিরাজিতঃ |
গজাশ্বমুখয়ূথৈশ্চ সমন্তাৎপরিবারিতঃ || ২. ২২. ৫৬||
রত্নদ্বীপমহাদ্বারশিলাকন্দরমন্দিরঃ |
বিবিক্তগহ্বরাস্থানমধ্যসিংহাসনাশ্রয়ঃ || ২. ২২. ৫৭||
সমন্তাৎপ্রতিসংসক্ততরুবেত্রবতাং শনৈঃ |
দৃষ্ট্বা জনৈরনাসাদ্যো মহারাজাধিরাজবৎ || ২. ২২. ৫৮||
দোধূয়মানো বিচরচ্চমরীচা রুচামরৈঃ |
ময়ূরৈরুপনৃত্যদ্ভির্গায়দ্ভিশ্চৈব কিন্নরৈঃ || ২. ২২. ৫৯||
সত্ত্বজাতৈরনেকৈশ্চ সেব্যমানো বিরাজতে |
ব্যক্তমেবাচলেন্দ্রাণামধিরাজ্যপদে স্থিতঃ || ২. ২২. ৬০||
ভুনক্ত্যাক্রম্য বসুধাং সমগ্রাং শ্রিয়মোজসা |
এবং সংচিন্তয়ানঃ স হিমাদ্রিবনগহ্বরে || ২. ২২. ৬১||
বিচচার চিরং রামো মুদা পরময়া যুতঃ |
আসসাদ বনে তস্মিন্বিপুলে ভৃগুপুঙ্গবঃ || ২. ২২. ৬২||
সরোবরং মহারাজ বিপুলং বিমলোদকম্ |
কুমুদোৎপলকহ্লারনিকরৈরুপসোভিতম্ || ২. ২২. ৬৩||
পঙ্কজৈরুৎপলৈশ্চৈব রক্তপীতৈঃ সিতাসিতৈঃ |
অন্যৈশ্চ জলচৈর্বক্ষৈঃ সর্বতঃ সমলঙ্কৃতম্ || ২. ২২. ৬৪||
হংসসারসদাত্যূহকারণ্ডবশতৈরপি |
জীবজীবকচক্রাহ্বকুররভ্রমরোৎকরৈঃ || ২. ২২. ৬৫||
সংঘুষ্যমাণং পরিতঃ সেবিতং মন্দবায়ুনা |
শফরীমৎস্যসংঘৈশ্চ বিচরদ্ভিরিতস্ততঃ || ২. ২২. ৬৬||
অন্তর্জনিতকল্লোলৈর্নৃত্যমানমিবাভিতঃ |
আসসাদ ভৃগুশ্রেষ্ঠস্তৎসরোবরমুত্তমম্ || ২. ২২. ৬৭||
নানাপতত্র্রিবিরুতৈর্মধুরীকৃতদিক্তটম্ |
স তস্য তীরে বিপুলং কৃৎবাশ্রমপদং শুভম্ || ২. ২২. ৬৮||
রামো মতিমতাং শ্রেষ্ঠস্তপসে চ মনো দধে |
শাকমূলফলাহারো নিয়তং নিয়তেন্দ্রিয়ঃ || ২. ২২. ৬৯||
তপশ্চচার দেবেশং বিনিবেশ্যাত্মমানসে |
ভৃগূপদিষ্টমার্গেণ ভক্ত্যা পরময়া যুতঃ || ২. ২২. ৭০||
পূজয়ামাস দেবেশমেকাগ্রমনসা নৃপ |
অনিকেতঃ স বর্ষাসু শিশিরে জলসংশ্রয়ঃ || ২. ২২. ৭১||
গ্রীষ্মে পঞ্জাগ্নিমধ্যস্থশ্চচারৈবং তপশ্চিরম্ |
রিপূন্নির্জিত্য কামাদীনূর্মিষষট্কং বিধূয় চ || ২. ২২. ৭২||
দ্বন্দ্বৈরনুদ্বেজিতধীস্তাপদোষৈরনাকুলঃ |
যমৈঃ সনিয়মৈশ্চৈব শুদ্ধদেহঃ সমাহিতঃ || ২. ২২. ৭৩||
বশী চকার পবনং প্রাণায়ামেন দেহগম্ |
জিতপদ্মাসনো মৌনী স্থিরচিত্তো মহামুনিঃ || ২. ২২. ৭৪||
বশী চকার চাক্ষাণি প্রত্যাহারপরায়ণঃ |
ধারণাভিঃ স্থিরীচক্রে মনশ্চঞ্চলমাত্মবান্ || ২. ২২. ৭৫||
ধ্যানেন দেবদেবেশং দদর্শ পরমেশ্বরম্ |
স্বস্থান্তঃ করণো মৈত্রঃ সর্ববাধাবিবর্জিতঃ || ২. ২২. ৭৬||
চিন্তয়ামাস দেবেশং ধ্যানে দৃষ্ট্বা জগদ্গুরুম্ |
ধ্যেয়াবস্থি তচিত্তাত্মা নিশ্চলেদ্রিয়দেহবান্ || ২. ২২. ৭৭||
আকালাবধি সোঽতিষ্ঠন্নিবাতস্থপ্রদীপবৎ |
জপংশ্চ দেবদেবেশং ধ্যায়ংশ্চ স্বমনীষয়া || ২. ২২. ৭৮||
আরাধয়দমেয়াত্মা সর্বভাবস্থমীশ্বরম্ |
ততঃ স নিষ্ফলং রূপমৈশ্বরং যন্নিরঞ্জনম্ || ২. ২২. ৭৯||
পরং জ্যোতিরচিন্ত্যং যদ্যোগিধ্যেয়মনুত্ত মম্ |
নিত্যং শুদ্ধং সদা শান্তমতীন্দ্রিয়মনৌপমম্ |
আনন্দমাত্রমচলং ব্যাপ্তাশেষচরাচরম্ || ২. ২২. ৮০||
চিন্তয়ামাস তদ্রূপং দেবদেবস্য ভার্গবঃ |
নিত্যং শুদ্ধং সদা শান্তমতীন্দ্রিয়মনৌপমম্ || ২. ২২. ৮১||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয়ে উপোদ্ধাতপাদে বসিষ্ঠসগরসংবাদে অর্চুনোপাখ্যানে জামদগ্ন্যতপশ্চরণং নাম দ্বাবিংশতিতমোঽধ্যায়ঃ || ২২||
বসিষ্ঠ উবাচ
তপস্বিনং তদা রামমেকাগ্রমনসং ভবে |
রহস্যেকান্তনিরতং নিয়তং শংসিতব্রতম্ || ২. ২৩. ১||
শ্রুৎবা তমৃষয়ঃ সর্বে তপোনির্ধূতকল্মষাঃ |
জ্ঞানকর্মবয়োবৃদ্ধা মহান্তঃ শংসিতব্রতাঃ || ২. ২৩. ২||
দিদৃক্ষবঃ সমাজগ্মুঃ কুতূহলসমন্বিতাঃ |
খ্যাপয়ন্তস্তপঃ শ্রেষ্ঠং তস্য রাজন্মহাত্মনঃ || ২. ২৩. ৩||
ভৃগ্বত্রিক্রতুজাবালিবামদেবমৃকণ্ডবঃ |
সংভাবয়ন্তস্তে রামং মুনয়ো বৃদ্ধসংমতাঃ || ২. ২৩. ৪||
আজগ্মুরাশ্রমং তস্য রামস্য তপসস্তপঃ |
দূরাদেব মহান্তস্তে পুণ্যক্ষেত্রনিবাসিনঃ || ২. ২৩. ৫||
গরীয়ঃ সর্বলোকেষু তপোঽগ্র্যং জ্ঞানমেব চ |
প্রশস্য তস্য তে সর্বেপ্রয়য়ুঃ স্বং স্বমাশ্রমম্ || ২. ২৩. ৬||
এবং প্রবর্ত্ততস্তস্য রামস্য ভগবাঞ্ছিবঃ |
প্রসন্নচেতা নিতরাং বভূব নৃপসত্তম || ২. ২৩. ৭||
জিজ্ঞাসুস্তস্য ভগবান্ ভক্তিমাত্মনি শঙ্করঃ |
মৃগব্যাধবপুর্ভূৎবা যয়ৌ রাজংস্তদন্তিকম্ || ২. ২৩. ৮||
ভিন্নাঞ্জনচয়প্রখ্যো রক্তান্তায়তলোচনঃ |
শরচাপধরঃ প্রাংশুর্বজ্রসংহননো যুবা || ২. ২৩. ৯||
উত্তুঙ্গহনুবাহ্বংসঃ পিঙ্গলশ্মশ্রুমূর্দ্ধজঃ |
মাংসবিস্রবসাগন্ধী সর্বপ্রাণিবিহিংসকঃ || ২. ২৩. ১০||
সকণ্টকুলতাস্পর্শক্ষতারূষিতবিগ্রহঃ |
সামটক্সংচর্বমাণশ্চ মাংসখণ্ডমনেকশঃ || ২. ২৩. ১১||
মাংসভারদ্বয়ালংবিবিধানানতকন্ধরঃ |
আরুজংস্তরসা বৃক্ষানূরুবেগেন সংঘশঃ || ২. ২৩. ১২||
অভ্যবর্ত্তত তং দেশং পাদচারীব পর্বতঃ |
আসাদ্য সরসস্তস্য তীরং কুসুমিতদ্রুমম্ || ২. ২৩. ১৩||
ন্যদধান্মাসভারং চ স মূলে কস্যচিত্তরোঃ |
নিষসাদ ক্ষণন্তত্র তরুচ্ছায়ামুপাশ্রিতঃ || ২. ২৩. ১৪||
তিষ্ঠন্তং সরসস্তীরে সোঽপশ্যদ্ভৃগুনন্দনম্ |
ততঃ স শীঘ্রমুত্থায় সমীপমুপসৃত্য চ || ২. ২৩. ১৫||
রামায় সেষুচাপাভ্যাং করাভ্যাং বিদধেংঽজলিম্ |
সজলাংভোদসন্নাদগংভীরেণ স্বরেণ চ || ২. ২৩. ১৬||
জগাদ ভৃগুশার্দূলং গুহান্তরবিসর্পিণা |
তোষপ্রবর্ষব্যাধোঽহং বসাম্যস্মিন্মহাবনে || ২. ২৩. ১৭||
ঈশোঽহমস্য দেশস্য সপ্রাণিতরুবীরুধঃ |
চরামি সমচিত্তাত্মা নানাসত্ত্বা মিষাশনঃ || ২. ২৩. ১৮||
সমশ্চ সর্বভূতেষু ন চ পিত্রাদয়োঽপি মে |
অভক্ষ্যাগম্যপেয়াদিচ্ছন্দবস্তুষু কুত্রচিৎ || ২. ২৩. ১৯||
কৃত্যাকৃত্যবিধৌচৈব ন বিশেষিতধীরহম্ |
প্রপন্নো নাভিগমনং নিবাসমপি কস্যচিৎ || ২. ২৩. ২০||
শক্রস্যাপি বলেনাহমনুমন্যে ন সংশয়ঃ |
জানতে তধ্যথা সর্বে দেশোঽযং মদুপাশ্রয়ঃ || ২. ২৩. ২১||
তস্মান্ন কশ্চিদায়াতি মমাত্রানুমতিং বিনা |
ইত্যেষ মম বৃত্তান্তঃ কার্ত্স্ন্যেন কথিতস্তব || ২. ২৩. ২২||
ৎবং চ মে ব্রূহি তত্ত্বেন নিজবৃত্তমশেষতঃ |
কস্ত্বং কস্মাদিহায়াতঃ কিমর্থমিহ ধিষ্ঠিতঃ |
উদ্যতোঽন্যত্র বা গন্তুং কিং বা তব চিকীর্ষিতম্ || ২. ২৩. ২৩||
বসিষ্ঠ উবাচ
ইত্যেবমুক্তঃ প্রহসংস্তেন রামো মহাদ্যুতিঃ |
তূষ্ণীং ক্ষণমিব স্থিৎবা দধ্যৌ কিঞ্চিদবাঙ্মুখঃ || ২. ২৩. ২৪||
কোঽযমেব দুরাধর্ষঃ সজলাংভোদনিস্বনঃ |
ব্রবীতি চ গিরোঽত্যর্থং বিস্পষ্টার্থপদাক্ষরাঃ || ২. ২৩. ২৫||
কিং তু মে মহতীং শঙ্কাং তনুরস্য তনোতি বৈ |
বিজাতিসংশ্রয়ৎবেন রমণীয়া তথা শরাঃ || ২. ২৩. ২৬||
এবং চিন্তয়তস্তস্য নিমিত্তানি শুভানি বৈ |
বভূবুর্ভুবি দেহে চ স্বাভিপ্রেতার্থদান্যলম্ || ২. ২৩. ২৭||
ততো বিমৃশ্য বহুশো মনসাভৃগুপুঙ্গবঃ |
উবাচ শনকৈর্ব্যাধং বচনং সূনৃতাক্ষরম্ || ২. ২৩. ২৮||
জামদগ্ন্যোঽস্মি ভদ্রং তে রামো নাম্না তু ভার্গবঃ |
তপশ্চর্তুমিহায়াতঃ সাংপ্রতং গুরুশাসনাৎ || ২. ২৩. ২৯||
তপসা সর্বলোকেশং ভক্ত্যা চ নিয়মেন চ |
আরাধয়িতুমস্মিংস্তু চিরায়াহং সমুদ্যতঃ || ২. ২৩. ৩০||
তস্মাত্মর্বেশ্বরং সর্বশরণ্যমভয়প্রদম্ |
ত্রিনেত্রং পাপদমনং শঙ্করং ভক্তবৎসলম্ || ২. ২৩. ৩১||
তপসা তোষয়িষ্যামি সর্বজ্ঞং ত্রিপুরান্তকম্ |
আশ্রমেঽস্মিনসরস্তীরে নিয়মং সমুপাশ্রিতঃ || ২. ২৩. ৩২||
ভক্তানুকংপী ভগবান্যাবৎপ্রত্যক্ষতাং হরঃ |
উপৈতি তাবদত্রৈব স্থাস্যামীতি মতির্মম || ২. ২৩. ৩৩||
তস্মাদিতস্ত্বয়াদ্যৈব গন্তুমন্যত্র যুজ্যতে |
ন চেদ্ভবতি মে হানিঃ স্বকৃতের্নিয়মস্য চ || ২. ২৩. ৩৪||
মাননীয়োঽথ বাহং তে ভক্ত্যা দেশান্তরাতিথিঃ |
স্বনিবাসমুপায়াতস্তপস্বী চ তথা মুনিঃ || ২. ২৩. ৩৫||
ৎবতসংনিধৌ নিবাসো মে ভবেৎপাপায় কেবলম্ |
তব চাপ্যসুখোদর্কং মৎসমীপনিষেবণম্ || ২. ২৩. ৩৬||
স ৎবংমদাশ্রমোপান্তে পরিচঙ্ক্রমণাদিকম্ |
পরিত্যজ্য সুখীভূয়া লোকয়োরুভয়োরপি || ২. ২৩. ৩৭||
বসিষ্ঠ উবাচ
ইতি তস্য বচঃ শ্রুৎবা স ভূয়ো ভৃগুপুঙ্গবম্ |
উবাচ রোষতাম্রাক্ষস্তাম্রাক্ষমিদমুত্তরম্ || ২. ২৩. ৩৮||
ব্রহ্মন্ কিমিদমত্যর্থং সমীপে বসতিং মম |
পরিগর্হয়সে যেন কৃতঘ্নস্যেব কাংপ্রতম্ || ২. ২৩. ৩৯||
কিং ময়াপকৃতং লোকে ভবতোঽন্যস্য বা ক্বচিৎ |
অনাগস্কারিণং দান্তং কোঽবমন্যেত নামতঃ || ২. ২৩. ৪০||
সন্নিধিঃ পরিহর্ত্তব্যো যদি মে বিপ্রপুঙ্গব |
দর্শনং সহ সংবাসঃ সংভাষণমথাপি চ || ২. ২৩. ৪১||
আয়ুষ্মতাধুনৈবাস্মাদপসর্ত্তব্যমাশ্রমাৎ |
স্বসংশ্রয়ং পরিত্যজ্য ক্বাহং যাস্যে বুভুক্ষিতঃ || ২. ২৩. ৪২||
স্বাধিবাসং পরিত্যজ্য ভবতা যোদিতঃ কথম্ |
ইতোঽন্যস্মিন্ গামিষ্যামি দূরে নাহং বিশেষতঃ || ২. ২৩. ৪৩||
গম্যতাং ভবতান্যত্র স্থীয়তামত্র বেচ্ছয়া |
নাহং চালয়িতুং শক্যঃ স্থানাদস্মাৎকথঞ্চন || ২. ২৩. ৪৪||
বসিষ্ঠ উবাচ
তচ্ছ্রুৎবা বচনং তস্য কিঞ্চিৎকোপসমন্বিতঃ |
তমুবাচ পুনর্বাক্যমিদং রাজন্ভৃগূদ্বহঃ || ২. ২৩. ৪৫||
ব্যাধজাতিরিয়ং ক্রূরা সর্বসত্ত্বভয়াবহা |
খলকর্মরতা নিত্যং ধিক্কৃতা সর্বজন্তুভিঃ || ২. ২৩. ৪৬||
তস্যাং জাতোঽসি পাপীয়ান্সর্বপ্রাণিবিহিংসকঃ |
স কথং ন পরিত্যাজ্যঃ সুজনৈঃ স্যাত্তু দুর্মতে || ২. ২৩. ৪৭||
তস্মাদ্বিহীনজাতীয়ং বিদিৎবাত্মানমব্যথ |
শীঘ্রমস্মাদ্ব্রজান্যত্র নাত্র কার্যা বিচারণা || ২. ২৩. ৪৮||
শরীরত্রাণকারুণ্যাৎসমীপং নোপসর্পসি |
যথা ৎবং কণ্টকাদীনামসহিষ্ণুতয়া ব্যথাম্ || ২. ২৩. ৪৯||
তথাবেহি সমস্তানাং প্রিয়াঃ প্রাণাঃ শরীরিণাম্ |
ব্যথা চাভিহতানাং তু বিদ্যতে ভবতোঽন্যথা || ২. ২৩. ৫০||
অহিংসা সর্বভূতানামিতি ধর্মঃ সনাতনঃ |
এতদ্বিরুদ্ধাচরণান্নিত্যং সদ্ভির্বিগর্হিতঃ || ২. ২৩. ৫১||
আত্মপ্রাণাভিরক্ষার্থং ৎবমশেষশরীরিণঃ |
হনিষ্যসি কথং সৎসুনাপ্নোষি বচনীয়তাম্ || ২. ২৩. ৫২||
তস্মাচ্ছীঘ্রং তু ভোগচ্ছ ৎবমেব পুরুষাধম |
ৎবয়া মে কৃত্যদোষস্য হানিশ্চ ন ভবিষ্যতি || ২. ২৩. ৫৩||
ন চৎস্বয়মিতো গচ্ছেশ্ততস্তব বলাদপি |
অপসর্পণতাবুদ্ধিমহমুৎপাদয়ে স্ফুটম্ || ২. ২৩. ৫৪||
ক্ষণার্দ্ধমপি তে পাপ শ্রেয়সী নেহ সংস্থিতিঃ |
বিরুদ্ধাচরণো নিত্যং ধর্মদ্রিষ্ কো লভেচ্চ শাম্ || ২. ২৩. ৫৫||
বসিষ্ঠ উবাচ
রামস্য বচনং শ্রুৎবা প্রীতোঽপি তমিদং বচঃ |
উবাচ সংক্রুদ্ধ ইব ব্যাধরূপী পিনাকধৃক্ || ২. ২৩. ৫৬||
সর্বমেতদহং মন্যং ব্যর্থং ব্যবসিতং তব |
কুতস্ত্বং প্রথমো জ্ঞানী কুতঃ শংভুঃ কুতস্তপঃ || ২. ২৩. ৫৭||
কুতস্ত্বং ক্লিশ্যসে মূঢ তপসা তেন তেঽধুনা |
ঘ্রুবং মিথ্যাপ্রবৃত্তস্য ন হি তুষ্যতি শঙ্করঃ || ২. ২৩. ৫৮||
বিরুদ্ধলোকাচরণঃ শংভুস্তস্য বিতুষ্টয়ে |
প্রতপত্যবুধো মর্ত্ত্যস্ত্বাং বিনা কঃ মুদুর্মতে || ২. ২৩. ৫৯||
অথ বা চ গতং মেঽদ্য যুক্তমেতদসংশয়ম্ |
সংপূজ্য পূজকবিদ্ধৌ শংভোস্তব চ সংগমঃ || ২. ২৩. ৬০||
ৎবয়া পূজয়িতুং যুক্তঃ স এব ভুবনে রতঃ |
সংপূজকোঽপি তস্য ৎবং যোগ্যো নাত্র বিচারণা || ২. ২৩. ৬১||
পিতামহস্য লোকানাং ব্রহ্মণঃ পরমেষ্ঠিনঃ |
শিরশ্ছিত্ত্বা পুনঃ শংভুর্ব্রহ্মহত্যামবাপ্তবান্ || ২. ২৩. ৬২||
ব্রহ্মহত্যাভিভূতেন প্রায়স্ত্বং শংভুনা দ্বিজ |
উপদিষ্টোঽসি তৎকর্তুং নোচেদেবং কথং কৃথাঃ || ২. ২৩. ৬৩||
তাদাত্ম্যগুণসংযোগান্মন্যং রুদ্রস্য তেঽধুনা |
তপঃ সিদ্ধিরনুপ্রাপ্তা কোলেনাল্পীয়সা মুনে || ২. ২৩. ৬৪||
প্রায়োঽদ্য মাতরং হৎবা সর্বৈলোঙ্কৈর্নিরাকৃতঃ |
তপোব্যাজেন গহনে নির্জনে সংপ্রবর্ত্তসে || ২. ২৩. ৬৫||
গুরুস্ত্রীব্রহ্মহত্যোত্থপাতকক্ষপণায় চ |
তপশ্চরসি নানেন তপসা তৎপ্রণশ্যতি || ২. ২৩. ৬৬||
পাতকানাং কিলান্যেষাং প্রায়শ্চিত্তানি সংত্যপি |
মাতৃদ্রুহামবেহি ৎবং ন ক্বচিৎকিল নিষ্কৃতিঃ || ২. ২৩. ৬৭||
অহিংসালক্ষণো ধর্মো লোকেষু যদি তে মতঃ |
স্বহস্তেন কথং রাম মাতরং কৃত্তবানসি || ২. ২৩. ৬৮||
কৃৎবা মাতৃবধং ঘোরং সর্বলোকবিগর্হিতম্ |
ৎবং পুনর্ধার্মিকো ভূৎবা কামতোঽন্যান্বিনিন্দসি || ২. ২৩. ৬৯||
পশ্যতা হসতামোঘং আত্মদোষমজানতা |
অপর্যাপ্তমহং নন্যং পরং দোষবিমর্শনাম্ || ২. ২৩. ৭০||
স্বধর্মং যদ্যহং ত্যক্ত্বা বর্ত্তেয়মকুলোভয়ম্ |
তর্হি গর্হয় মাং কামং নিরুপ্য মনসা স্বয়ম্ || ২. ২৩. ৭১||
মাতাপিতৃসুতাদীনাং ভরণায়ৈব কেবলম্ |
ক্রিয়তে প্রাণিহননং নিজধর্মতয়া ময়া || ২. ২৩. ৭২||
স্বধর্মাদামিষেণাহং সকুটুম্বো দিনেদিনে |
বর্ত্তামি সাপি মে বৃত্তির্বিধাত্রা বিহিতা পুরা || ২. ২৩. ৭৩||
মাংসেন যাবতা মে স্যান্নিত্যং পিত্রাদি পোষণম্ |
হনিষ্যে চেত্তদধিকং তর্হি যুজ্যেয়মেনসা || ২. ২৩. ৭৪||
যাবৎপোষণঘাতেন ন বয়ং স্যাম নিন্দিতাঃ |
তদেতৎসংপ্রধার্য ৎবং নিন্দবা মাং প্রশংস বা || ২. ২৩. ৭৫||
সাধু বাসাধু বা কর্ম যস্য যদ্বিহিতং পুরা |
তদেব তেন কর্ত্তব্যমাপদ্যপি কথঞ্চন || ২. ২৩. ৭৬||
নিরূপয় স্বভুদ্ধ্যা ৎবমাত্মনো মম চান্তরম্ |
অহং তু সর্বভাবেন মিত্রাদিভরণে রতঃ || ২. ২৩. ৭৭||
সংত্যজ্য পিতরং বৃদ্ধং বিনিহত্য চ মাতরম্ |
ভূৎবা তু ধার্মিকস্ত্বং তু তপশ্চর্তুমিহাগতঃ || ২. ২৩. ৭৮||
যে তু মূলবিদস্তেষাং বিস্পষ্টং যত্র দর্শনম্ |
যথাজিহ্বং ভবেন্নাত্র বচসাপি সমীহিতুম্ || ২. ২৩. ৭৯||
অহং তু সম্যগ্জানামি তব বৃত্তমশেষতঃ |
তস্মাদলং তে তপসা নিষ্ফলেন ভৃগূদ্বহ || ২. ২৩. ৮০||
সুখমিচ্ছসি চেত্ত্যক্ত্বা কায়ক্লেশকরং তপঃ |
যাহি রাম ৎবমন্যত্র যত্র বা ন বিদুর্জনাঃ || ২. ২৩. ৮১||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয় উপোদ্ধাতপাদে ত্রয়োবিংশতিতমোঽধ্যায়ঃ
বসিষ্ঠ উবাচ
ইত্যুক্তস্তেন ভূপাল রামো মতিমতাং বরঃ |
নিরূপ্য মনসা ভূয়স্তমুবাচাভিবিস্মিতম্ || ২. ২৪. ১||
রাম উবাচ
কস্ত্বং ব্রূহি মহাভাগ ন বৈ প্রাকৃতপূরুষঃ |
ইন্দ্রস্যেবানুভাবেন বপুরালক্ষ্যতে তব || ২. ২৪. ২||
বিচিত্রার্থপদৌদার্যগুণগাংভীর্যজাতিভিঃ |
সর্বজ্ঞস্যৈব তে বাণী শ্রূয়তেঽতিমনোহরা || ২. ২৪. ৩||
ইন্দ্রো বহ্নির্যমো ধাতা বরুণো বা ধনাধিপঃ |
ঈশানস্তপনো ব্রহ্মা বায়ুঃ সোমো গুরুর্গুহঃ || ২. ২৪. ৪||
এষামন্যতমঃ প্রায়ো ভবান্ভবিতুমর্হতি |
অনুভাবেন জাতিস্তে হৃদিশঙ্কাং তনোতি মে || ২. ২৪. ৫||
মায়াবী ভগবান্বিষ্ণুঃ শ্রূয়তে পুরুষোত্তমঃ |
কো বা ৎবং বপুষানেন ব্রূহি মাং সমুপাগতঃ || ২. ২৪. ৬||
অথ বা জগতাং নাথঃ সর্বজ্ঞঃ পরমেশ্বরঃ |
পরমাত্মাত্মসংভূতিরাত্মারামঃ সনাতনঃ || ২. ২৪. ৭||
স্বচ্ছন্দচারী ভগবাঞ্ছিবঃ সর্বজগন্ময়ঃ |
বপুষানেন সংযুক্তে ভবান্ভবিতুমর্হতি || ২. ২৪. ৮||
নান্যস্যেদৃগ্ভবেল্লোকে প্রভাবানুগতং বপুঃ |
জাত্যর্থসৌষ্ঠবোপেতা বাণী চৌদার্যশালিনী || ২. ২৪. ৯||
মন্যেঽহং ভক্তবাৎসল্যাদ্বানেন বপুষাহরঃ |
প্রত্যক্ষতামুপগতো সংদেহোঽস্মৎপরীক্ষয়া || ২. ২৪. ১০||
ন কেবলং ভবান্ ব্যাধস্তেষাং নেদৃগ্বিধাকৃতিঃ |
তস্মাত্তুভ্যং নমস্তস্মৈ সুরুপং সংপ্রদর্শয় || ২. ২৪. ১১||
আবিষ্কুর্বন্প্রসীদাত্মমহিমানুগুণং বপুঃ |
মমানেকবিধা শঙ্কামুচ্যেত যেন মানসী || ২. ২৪. ১২||
প্রসীদ সর্বভাবেন বুদ্ধিমোহৌ মমাধুনা |
প্রণাশয় স্বরূপস্য গ্রহণাদেব কেবলম্ || ২. ২৪. ১৩||
প্রার্থয়েৎবাং মহাভাগ প্রণম্য শিরসাসকৃৎ |
কস্ত্বং মে দর্শয়াত্মানং বদ্ধোঽযং তে ময়াঞ্জলিঃ || ২. ২৪. ১৪||
ইত্যুক্ত্বা তং মহাভাগ জ্ঞাতুমিচ্ছন্ভৃগূদ্বহঃ |
উপবিশ্য ততো ভূমৌ ধ্যানমাস্তে সমাহিতঃ || ২. ২৪. ১৫||
বদ্ধপদ্মাসনো মৌনী যতবাক্কায়মানসঃ |
নিরুদ্ধপ্রাণসংচারো দধ্যৌ চিরমুদারধীঃ || ২. ২৪. ১৬||
সন্নিয়ম্যেন্দ্রিয়গ্রামং মনো হৃদি নিরুধ্য চ |
চিন্তয়ামাস দেবেশং ধ্যানদৃষ্ট্যা জগদ্গুরুম্ || ২. ২৪. ১৭||
অপশ্যচ্চ জগন্নাথমাত্মসংধানচক্ষুষা |
স্বভক্তানুগ্রহকরং মৃগব্যাধস্বরূপিণম্ || ২. ২৪. ১৮||
তত উন্মীল্য নয়নে শীঘ্রমুত্থায় ভার্গবঃ |
দদর্শ দেবং তেনৈব বপুষা পুরতঃ স্থিতম্ || ২. ২৪. ১৯||
আত্মনোঽনুগ্রহার্থায় শরণ্যং ভক্তবৎসলম্ |
আবির্ভূতং মহারাজ দৃষ্ট্বা রামঃ সসংভ্রমম্ || ২. ২৪. ২০||
রোমাঞ্ছোদ্ভিন্নসর্বাঙ্গো হর্ষাশ্রুপ্লুতলোচনঃ |
পপাত পাদয়োর্ভূমৌ ভক্ত্যা তস্য মহামতিঃ || ২. ২৪. ২১||
স গদ্গদমুবাচৈনং সংভ্রমাকুলয়া গিরা |
শরণং ভব শর্বেতি শঙ্করেত্যসকৃন্নৃপ || ২. ২৪. ২২||
ততঃ স্বরুপধৃক্ শংভুস্তদ্ভক্তিপরিতোষিতঃ |
রামমুত্থাপয়ামাস প্রণা মাবনতং ভুবি || ২. ২৪. ২৩||
উত্থাপিতো জগদ্ধাত্রা স্বহস্তাভ্যাং ভৃগূদ্বহঃ |
তুষ্টাব দেবদেবেশং পুরঃ স্থিৎবা কৃতাজলিঃ || ২. ২৪. ২৪||
রাম উবাচ
নমস্তে দেবদেবায় শঙ্করায়াদিমূর্ত্তয়ে |
নমঃ শর্বায় শান্তায় শাশ্বতায় নমোনমঃ || ২. ২৪. ২৫||
নমস্তে নীলকণ্ঠায় নীললোহিতমূর্ত্তয়ে |
নমস্তে ভূতনাথায় ভূতবাসায় তে নমঃ || ২. ২৪. ২৬||
ব্যক্তাব্যক্তস্বরূপায় মহাদেবায় মীঢুষে |
শিবায় বহুরূপায় ত্রিনেত্রায় নমোনমঃ || ২. ২৪. ২৭||
শরণং ভব মে শর্ব ৎবদ্ভক্তস্য জগৎপতে |
ভূয়োঽনন্যাশ্রয়াণাং তু ৎবমেব হি পরায়ণম্ || ২. ২৪. ২৮||
যন্ময়াপকৃতং দেব দুরুক্তং বাপি শঙ্কর |
অজানতা ৎবাং ভগবন্মম তৎক্ষন্তুমর্হসি || ২. ২৪. ২৯||
অনন্যবেদ্যরুপস্য সদ্ভাবমিহকঃ পুমান্ |
ৎবামৃতে তব সর্বেশ সম্যক্ শক্রোতি বেদিতুম্ || ২. ২৪. ৩০||
তস্মাত্ত্বং সর্বভাবেন প্রসীদ মম শঙ্কর |
নান্যাস্তি মে গতিস্তুভ্যং নমো ভূয়ো নমো নমঃ || ২. ২৪. ৩১||
বসিষ্ঠ উবাচ
ইতি সংস্তূয়মানস্তু কৃতাঞ্জলিপুটং পুরঃ |
তিষ্ঠন্তমাহ ভগবান্প্রসন্নাত্মা জগন্ময়ঃ || ২. ২৪. ৩২||
ভগবানুবাচ
প্রীতোঽস্মি ভবতে তাত তপসানেন সাংপ্রতম্ |
ভক্ত্যা চৈবানপায়িন্যা হ্যপি ভার্গবসত্তম || ২. ২৪. ৩৩||
দাস্যে চাভি মতং সবে ভবতেঽহং ৎবয়া বৃতম্ |
ভক্তো হি মে ৎবমত্যর্থং নাত্র কার্যা বিচারণা || ২. ২৪. ৩৪||
ময়ৈবাবগতং সর্বং ৎদৃদি বত্তেঽদ্যবর্ত্ততে |
তস্মাদ্ব্রবীমি যত্ত্বাহং তৎকুরুষ্বাবিশঙ্কিতম্ || ২. ২৪. ৩৫||
নাস্ত্রাণাং ধারণে বৎস বিদ্যতে শক্তিরদ্য তে |
রৌদ্রাণাং তেন ভূয়োঽপি তপো ঘোরং সমাচর || ২. ২৪. ৩৬||
পরীত্য পৃথিবীং সর্বাং সর্বতীর্থেষু চ ক্রমাৎ |
স্রাৎবা পবিত্রদেহস্ত্তবং সর্বাণ্যস্ত্রাণ্যবাপ্স্যসি || ২. ২৪. ৩৭||
ইত্যুক্ত্বান্তর্দধে দেবস্তেনৈব বপুষা বিভুঃ |
রামস্য পশ্যতো রাজন্ক্ষণেন ভবভাগকৃৎ || ২. ২৪. ৩৮||
অন্তর্হিতে জগন্নাথে রামো নৎবা তু শঙ্করম্ |
পরীত্যবসুধাং সর্বাং তীর্থস্নানেঽকরোন্মনঃ || ২. ২৪. ৩৯||
ততঃ স পৃথিবীং সর্বাং পরিক্রম্য যথাক্রমম্ |
চকার সর্বতীর্থেষু স্নানং বিধিবদাত্মবান্ || ২. ২৪. ৪০||
তীর্থেষু ক্ষেত্রমুখ্যেষু তথা দেবালয়েষু চ |
পিৎৠন্দেবাংশ্চ বিধিবদতর্পয়দতন্দ্রিতঃ || ২. ২৪. ৪১||
উপবাসতপোহোমজপস্নানাদিসুক্রিয়াঃ |
তীর্থেষু বিধিবৎকুর্বন্পরিচক্রাম মেদিনীম্ || ২. ২৪. ৪২||
এবং ক্রমেণ তীর্থেষু স্নাৎবা চৈব বসুংধরাম্ |
প্রদক্ষিণীকৃত্য শনৈঃ শুদ্ধদেহোঽভবন্নৃপ || ২. ২৪. ৪৩||
পরীত্যৈবং বসুমতীং ভার্গবঃ শংভুশাসনাৎ |
জগাম্ ভূয়স্তং দেশং যত্র পূর্বমুবাস সঃ || ২. ২৪. ৪৪||
গৎবা রাজন্সতত্রৈব স্থিৎবা দেবমুমাপতিম্ |
ভক্ত্যা সংপূজয়ামাস তপোভির্ন্নিয়মৈরপি || ২. ২৪. ৪৫||
এতস্মিন্নেব কালে তু দেবানামসুরৈঃ সহ |
বভূব সুচিরং রাজন্সংগ্রামো রোমহর্ষণঃ || ২. ২৪. ৪৬||
ততো দেবান্পরাজিত্য যুদ্ধেঽতিবলিনোঽসুরাঃ |
অবাপুরমরৈশ্বর্যমশেষমকুতোভয়াঃ || ২. ২৪. ৪৭||
যুদ্ধে পরাজিতা দেবাঃ সকলা বাসবাদয়ঃ |
শঙ্করং শরণং চগ্মুর্হতৈশ্বর্যা হ্যরাতিভিঃ || ২. ২৪. ৪৮||
তোষয়িৎবা জগন্নাথং প্রণামজয় সংস্তবৈঃ |
প্রার্থয়ামাসুরসুরান্হন্তুং দেবাঃ পিনাকিনম্ || ২. ২৪. ৪৯||
ততস্তেষাং প্রতিশ্রুত্য দানবানাং বধং নৃপ |
দেবানাং বরদঃ শংভুর্মহো দরমুবাচ হ || ২. ২৪. ৫০||
হিমদ্রের্দক্ষিণে ভাগে রামো নাম মহাতপাঃ |
মুনিপুত্রোঽতিতেজস্বী মামুদ্দিশ্য তপস্যতি || ২. ২৪. ৫১||
তত্র গৎবাৎবমদ্যৈব নিবেদ্য মম শাসনম্ |
মহোদর তপস্যন্তং তমিহানয় মাচিরম্ || ২. ২৪. ৫২||
ইত্যাজ্ঞপ্রস্তথেত্যুক্ত্বা প্রণভ্যেশং মহোদরঃ |
জগাম বায়ুবেগেন যত্র রামো ব্যবস্থিতঃ || ২. ২৪. ৫৩||
সমাসাদ্য স তং দেশং দৃষ্ট্বা রামং মহামুনিম্ |
তপস্যন্তমিদং বাক্যমুবাচ বিনয়ান্বিতঃ || ২. ২৪. ৫৪||
দ্রষ্টুমিচ্ছতি শম্ভুস্ত্বাং ভৃগুবর্যং তদাজ্ঞয়া |
আগতোঽহং তদাগচ্ছ তৎপাদাংবুজসন্নিধিম্ || ২. ২৪. ৫৫||
তচ্ছ্রুৎবা বচনং তস্য শীঘ্রমুত্থায় ভার্গবঃ |
তদাজ্ঞাং শিরসানন্দ্য তথেতি প্রত্যভাষত || ২. ২৪. ৫৬||
ততো রামং ৎবরোপেতঃ শংভুপার্শ্বং মহোদরঃ |
প্রাপয়ামাস সহসা কৈলাসে নাগসত্তমে || ২. ২৪. ৫৭||
সহিতং সকলৈর্ভূতৈরিন্দ্রাদ্যৈশ্চ সহামরৈঃ |
দদর্শ ভার্গবশ্রেষ্ঠঃ শঙ্করং ভক্তবৎসলম্ || ২. ২৪. ৫৮||
সংস্তূয়মানং মুনিভির্নারদাদ্যৈস্তপোধনৈঃ |
গন্ধর্বৈরুপগায়দ্ভির্নৃত্যদ্ভিশ্চাপ্সরোগণৈঃ || ২. ২৪. ৫৯||
উপাস্যমানং দেবেশং গজচর্মধৃতাম্বরম্ |
ভস্মোদ্ধূলিতসর্বাঙ্গং ত্রিনেত্রং চন্দ্রশেখরম্ || ২. ২৪. ৬০||
ধৃতপিঙ্গজটাভারং নাগাভরমভূষিতম্ |
প্রলম্বোষ্ঠভুজং সৌম্যং প্রসন্নমুখপঙ্কজম্ || ২. ২৪. ৬১||
আস্থিতং কাঞ্চনে পট্টে গীর্বাণসমিতৌ নৃপ |
উপাসর্পত্তু দেবেশং ভৃগুবর্যঃ কৃতাঞ্জলিঃ || ২. ২৪. ৬২||
শ্রীকণ্ঠদর্শনোদ্বত্তরোমাঞ্চাঞ্চিতবিগ্রহঃ |
বাষ্পত্তু সিক্তকায়েন স তু গৎবা হরান্তিকম্ || ২. ২৪. ৬৩||
ভক্ত্যা সসংভ্রমং বাচা হর্ষগদ্গদয়াসকৃৎ |
নমস্তে দেবদেবেতি ব্যালপন্নাকুলাক্ষরম্ || ২. ২৪. ৬৪||
পপাত সংস্পৃশন্মূর্ধ্না চরণৌ পুরবিদ্বিষঃ |
পশ্যতাং দেববৃন্দানাং মধ্যে ভৃগুকুলোদ্বহম্ || ২. ২৪. ৬৫||
তমুত্থাপ্য শিবঃ প্রীতঃ প্রসন্নমুখপঙ্কজম্ |
রামং মধুরয়া বাচা প্রহসন্নাহ সাদরম্ || ২. ২৪. ৬৬||
ইমে দৈত্যগণৈঃ ক্রান্তাঃ স্বাধিষ্ঠানাৎপরিচ্যুতাঃ |
অশক্রুবন্তস্তান্হন্তুং গীর্বাণা মামুপাগতাঃ || ২. ২৪. ৬৭||
তস্মান্মমাজ্ঞয়া রাম দেবানাং চ প্রিয়েপ্সয়া |
জহি দৈত্যগণান্সর্বান্সমর্থস্ত্বং হি মে মতঃ || ২. ২৪. ৬৮||
ততো রামোঽব্রবীচ্ছর্বং প্রণিপত্য কৃতাঞ্জলিঃ |
শৃণ্বতাং সর্বদেবানাং সপ্রশ্রয়মিদং বচঃ || ২. ২৪. ৬৯||
স্বামিন্ন বিদিতং কিং তে সর্বজ্ঞস্যাখিলাত্মনঃ |
তথাপি বিজ্ঞাপয়তো বচনং মেঽবধারয় || ২. ২৪. ৭০||
যদি শক্রাদিভির্দেবৈরখিলৈরমরারয়ঃ |
ন শক্যা হন্তুমেকস্য শক্যাঃ স্যস্তে কথং মম || ২. ২৪. ৭১||
অনস্ত্রজ্ঞোঽস্মি দেবেশ যুদ্ধানামপ্যকোবিদঃ |
কথং হনিষ্যে সকলান্সুরশত্রূননায়ুধঃ || ২. ২৪. ৭২||
ইত্যুক্তস্তেন দেবেশঃ সিতং কালাগ্নিসপ্রভম্ |
শৈবমস্ত্রময়ং তেজো দদৌ তস্মৈ মহাত্মনে || ২. ২৪. ৭৩||
আত্মীয়ং পরশুং দৎবা সর্বশস্ত্রাভিভাবকম্ |
রামপাহ প্রসন্নাত্মা গীর্বাণানাং তু শৃণ্বতম্ || ২. ২৪. ৭৪||
মৎপ্রসাদেন সকলান্সুরশত্রূন্বিনিঘ্নতঃ |
শক্তির্ভবতু তে সৌম্য সমস্তারিদুরাসদা || ২. ২৪. ৭৫||
অনেনৈবায়ুধেন ৎবং গচ্ছ যুধ্যস্ব শত্রুভিঃ |
স্বয়মেব চ বেৎসি ৎবং যথাবদ্যুদ্ধকৌশলম্ || ২. ২৪. ৭৬||
বসিষ্ঠ উবাচ
এবমুক্তস্ততো রামঃ শংভুনা তং প্রণম্য চ |
জগ্রাহ পরশুং শৈব বিবুধারিবধোদ্যতঃ || ২. ২৪. ৭৭||
ততঃ স শুশুভে রামো বিষ্ণুতের্ঞ্জোঽশসংভবঃ |
রুদ্রভক্ত্যা সমায়ুক্তো দ্যুত্যেব সবিতুর্মহঃ || ২. ২৪. ৭৮||
সোঽনুজ্ঞাতস্ত্রিনেত্রেণ দেবৈঃ সর্বৈঃ সমন্বিতঃ |
জগাম হন্তুমসুরান্যুদ্ধায় কৃতনিশ্চয়ঃ || ২. ২৪. ৭৯||
ততোঽভবৎপুনর্যুদ্ধং দেবানামসুরৈঃ সহ |
ত্রৈলোক্যবিজয়োদ্যুক্তৈ রাজন্নতিভয়ঙ্করম্ || ২. ২৪. ৮০||
অথ রামো মহাবাহুস্তস্মিন্যুদ্ধে সুদারুণে |
কুদ্ধঃ পরশুনা তেন নিজঘান মহাসুরান্ || ২. ২৪. ৮১||
প্রহারৈরশনিপ্রখ্যৈর্নিঘ্নন্দৈত্যান্সহস্রশঃ |
চচার সমরে রামঃ ক্রুদ্ধঃ কাল ইবাপরঃ || ২. ২৪. ৮২||
হৎবা তু সকলান্দৈত্যান্দেবান্সর্বানহর্ষয়ৎ |
ক্ষণেন নাশয়ামাস রামঃ প্রহরতাং বরঃ || ২. ২৪. ৮৩||
রামেণ হন্যমা নাস্তু সমস্তা দৈত্যদানবাঃ |
দদৃশুঃ সর্বতো রামং হতশেষা ভয়ান্বিতাঃ || ২. ২৪. ৮৪||
হতেষ্বসুরসংঘেষু বিদ্রুতেষু চ কৃৎস্নশঃ |
রামমামন্ত্র্য বিবুধাঃ প্রয়য়ুস্ত্রিদিবং পুনঃ || ২. ২৪. ৮৫||
রামোঽপি হৎবা দিতিজানভ্যনুজ্ঞাপ্য চামরান্ |
স্বমাশ্রমং সমাপেদে তপস্যাসক্তমানসঃ || ২. ২৪. ৮৬||
মৃগব্যাধপ্রতিকৃতিং কৃৎবা শম্ভোর্মহামতিঃ |
ভক্ত্যা সংপূজয়ামাস স তস্মিন্নাশ্রমেবশী || ২. ২৪. ৮৭||
গন্ধৈঃ পুষ্পৈস্তথা হৃদ্যৈর্নৈবেদ্যৈরভিবন্দনৈঃ |
স্তোত্রৈশ্চ বিধিবদ্ভক্ত্যা পরাং প্রীতিমুপানয়ৎ || ২. ২৪. ৮৮||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয় উপোদ্ধাতপাদের্ঽজুনোপাখ্যানে চতুর্বিংশতিতমোঽধ্যায়ঃ || ২৪||
বসিষ্ঠ উবাচ
ততস্ত দ্রক্তিয়োগেন স প্রীতাত্মা জগৎপতিঃ |
প্রত্যক্ষমগমত্তস্য সর্বৈঃ সহ মরুদ্গণৈঃ || ২. ২৫. ১||
তং দৃষ্ট্বা দেবদেবেশং ত্রিনেত্রং চন্দ্রশেখরম্ |
বৃষেন্দ্রবাহনং শংভুং ভূতকোটিসমন্বিতম্ || ২. ২৫. ২||
সসংভ্রমং সমুত্থায় হর্ষেণাকুললোচনঃ |
প্রণামমকরোদ্ভক্ত্যা শর্বায় ভুবি ভার্গবঃ || ২. ২৫. ৩||
উত্থায়োত্থায় দেবেশং প্রণম্য শিরসাসকৃৎ |
কৃতাঞ্জলিপুটো রামস্তুষ্টাব চ জগৎপতিম্ || ২. ২৫. ৪||
রাম উবাচ
নমস্তে দেবদেবেশ নমস্তে পরমেশ্বর |
নমস্তে জগতো নাথ নমস্তে ত্রিপুরান্তক || ২. ২৫. ৫||
নমস্তে সকলাধ্যক্ষ নমস্তে ভক্তবৎসল |
নমস্তে সর্বভূতেশ নমস্তে বৃষভধ্বজ || ২. ২৫. ৬||
নমস্তে সকলাধীশ নমস্তে করুণাকর |
নমস্তে সকলাবাস নমস্তে নীললোহিত || ২. ২৫. ৭||
নমঃ সকলদেবারিগণনাশায় শূলিনে |
কপালিনে নমস্তুভ্যং সর্বলোকৈকপালিনে || ২. ২৫. ৮||
শ্মশানবাসিনে নিত্যং নমঃ কৈলাসবাসিনে |
নমোঽস্তু পাশিনে তুভ্যং কালকূটবিষাশিনে || ২. ২৫. ৯||
বিভবেঽমরবন্দ্যায় প্রভবে তে স্বয়ংভুবে |
নমোঽখিলজগৎকর্মসাক্ষিভূতায় শংভবে || ২. ২৫. ১০||
নমস্ত্রিপথ গাফেনভাসিগার্দ্ধন্দুমৌলিনে |
মহাভোগীন্দ্রহারায় শিবায় পরমাত্মনে || ২. ২৫. ১১||
ভস্মসংচ্ছন্নদেহায় নমোর্ঽকাগ্নীন্দুচক্ষুষে |
কপর্দিনে নমস্তুভ্যমন্ধকাসুরমর্দ্দিনে || ২. ২৫. ১২||
ত্রিপুরধ্বংসিনে দক্ষয়জ্ঞবিধ্বংসিনে নমঃ |
গিরিজাকুচকাশ্মীরবিরঞ্জিতমহোরসে || ২. ২৫. ১৩||
মহাদেবায় মহ তে নমস্তে কৃত্তিবাসসে |
যোগিধ্যেয়স্বরূপায় শিবায়াচিন্ত্যতেজসে || ২. ২৫. ১৪||
স্বভক্তহৃদয়াংভোজকর্ণিকামধ্যবর্ত্তিনে |
সকলাগমসিদ্ধান্তসাররূপায় তে নমঃ || ২. ২৫. ১৫||
নমো নিখিলয়োগেন্দ্রবোধনায়ামৃতাত্মনে |
শঙ্করায়াখিলব্যাপ্তমহিম্নে পরমাত্মনে || ২. ২৫. ১৬||
নমঃ শর্বায় শান্তায় ব্রহ্মণে বিশ্বরুপিণে |
আদিমধ্যান্তহীনায় নিত্যায়াব্যক্তমূর্ত্তয়ে || ২. ২৫. ১৭||
ব্যক্তাব্যক্তস্বরূপায় স্থূলসূক্ষ্মাত্মনে নমঃ |
নমো বেদান্তবেদ্যায় বিশ্ববিজ্ঞানরূপিণে || ২. ২৫. ১৮||
নমঃ সুরাসুরশ্রেণিমৌলিপুষ্পার্চিতাঙ্ঘ্রয়ে |
শ্রীকণ্ঠায় জগদ্ধাত্রে লোককর্ত্রে নমোনমঃ || ২. ২৫. ১৯||
রজোগুণাত্মনে তুভ্যং বিশ্বসৃষ্টিবিধায়িনে |
হিরণ্যগর্ভরূপায় হরায় জগদাদয়ে || ২. ২৫. ২০||
নমো বিশ্বাত্মনে লোকস্থিতিব্যা পারকারিণে |
সত্ত্ববিজ্ঞানরুপায় পরায় প্রত্যগাত্মনে || ২. ২৫. ২১||
তমোগুণবিকারায় জগৎসংহারকারিণে |
ক্ল্পান্তে রুদ্ররূপায় পরাপর বিদে নমঃ || ২. ২৫. ২২||
অবিকারায় নিত্যায় নমঃ সদসদাত্মনে |
বুদ্ধিবুদ্ধিপ্রবোধায় বুদ্ধীন্দ্রিয়বিকারিণে || ২. ২৫. ২৩||
বস্বাদিত্যমরুদ্ভিশ্চ সাধ্যরুদ্রাশ্বিভেদতঃ |
যন্মায়াভিন্নমতয়ো দেবাস্তস্মৈ নমোনমঃ || ২. ২৫. ২৪||
অবিকারমজং নিত্যং সূক্ষ্মরূপমনৌপমম্ |
তব যত্তন্ন জানন্তি যোগিনোঽপি সদামলাঃ || ২. ২৫. ২৫||
ৎবামবিজ্ঞায় দুর্জ্ঞেয়ং সম্যগ্ব্রহ্মাদয়োঽপি হি |
সংসরন্তি ভবে নূনং ন তৎকর্মাত্মকাশ্চিরম্ || ২. ২৫. ২৬||
যাবন্নোপৈতি চরণৌ তবাজ্ঞানবিঘাতিনঃ |
তাবদ্ভ্রমতি সংসারে পণ্ডিতোঽচেতনোঽপি বা || ২. ২৫. ২৭||
স এব দক্ষঃ স কৃতী স মুনিঃ স চ পণ্ডিতঃ |
ভবতশ্চরণাংভোজে যেন বুদ্ধিঃ স্থিরীকৃতা || ২. ২৫. ২৮||
সুসূক্ষ্মৎবেন গহনঃ সদ্ভাবস্তে ত্রয়ীময়ঃ |
বিদুষামপি মূঢেন স ময়া জ্ঞায়তে কথম্ || ২. ২৫. ২৯||
অশব্দগোজরৎবেন মহিম্নস্তব সাংপ্রতম্ |
স্তোতুমপ্যনলং সম্যক্ত্বা মহং জডধীর্যতঃ || ২. ২৫. ৩০||
তস্মাদজ্ঞানতো বাপি ময়া ভক্ত্যৈব সংস্তুতঃ |
প্রীতশ্চ ভব দেবেশ ননু ৎবং ভক্তবৎসলঃ || ২. ২৫. ৩১||
বসিষ্ঠ উবাচ
ইতি স্তুতস্তদা তেন ভক্ত্যা রামেণ শঙ্করঃ |
মেঘগংভীরয়া বাচা তমুবাচ হসন্নিব || ২. ২৫. ৩২||
ভগবানুবাচ
রামাহং সুপ্রসন্নোঽস্মি শোর্ংযশালিতয়া তব |
তপসা ময়ি ভক্ত্যা চ স্তোত্রেণ চ বিশেষতঃ || ২. ২৫. ৩৩||
বরং বরয় তস্মাত্ত্বং যদ্যদিচ্ছসি চেতসা |
তুভ্যং তত্তদশেষেণ দাস্যাম্যহমশেষতঃ || ২. ২৫. ৩৪||
বসিষ্ঠ উবাচ
ইত্যুক্তো দেবদেবেন তং প্রণম্য ভৃগূদ্বহঃ |
কৃতাঞ্জলিপুটো ভূৎবা রাজন্নিদমুবাচ হ || ২. ২৫. ৩৫||
যদি দেব প্রসন্নস্ত্বং বারর্হেঽস্মি চ যদ্যহম্ |
ভবতস্তদভীপ্সামি হেতুমস্ত্রাণ্যশেষতঃ || ২. ২৫. ৩৬||
অস্ত্রে শস্ত্রে চ শাস্ত্রে চ ন মত্তোঽভ্যধিকো ভবেৎ |
লোকেষু মাংরণেজেতা ন ভবেত্ত্বৎপ্রসাদতঃ || ২. ২৫. ৩৭||
বসিষ্ঠ উবাচ
তথেত্যুক্ত্বা ততঃ শংভুরস্ত্রশস্ত্রাণ্যশেষতঃ |
দদৌ রামায় সুপ্রীতঃ সমন্ত্রাণি ক্রমান্নৃপ || ২. ২৫. ৩৮||
সপ্রয়োগং সসংহারমস্ত্রগ্রামং চতুর্বিধম্ |
প্রসাদাভিমুখো রামং গ্রাহয়ামাস শঙ্করঃ || ২. ২৫. ৩৯||
অসংগবেগং শুভ্রাশ্বং সুধ্বজং চ রথোত্তমম্ |
ইষুধী চাক্ষয়শরৌ দদৌ রামায় শঙ্করঃ || ২. ২৫. ৪০||
অভেদ্যমজরং দিব্যং দৃঢজ্যং বিজয়ং ধনুঃ |
সর্বশস্ত্রসহং চিত্রং কবচং চ মহাধনম্ || ২. ২৫. ৪১||
অজেয়ৎবং চ যুদ্ধেষু শৌর্যং চাপ্রতিমং ভুবি |
স্বেচ্ছয়া ধারণে শাক্তিং প্রাণানাং চ নরাধিপ || ২. ২৫. ৪২||
খ্যাতিং চ বীজমেত্রেণ তন্নাম্না সর্বলৌকিকীম্ |
তপঃ প্রভাবং চ মহৎপ্রদদৌ ভার্গবায় সঃ || ২. ২৫. ৪৩||
ভক্তি চাত্মনি রামায় দত্ত্বা রাজন্যথোচিতাম্ |
সহিতঃ সকলৈর্ভূতৈশ্চামরৈশ্চন্দ্রশেখরঃ || ২. ২৫. ৪৪||
তেনৈব বপুষা শংভুঃ ক্ষিপ্রমন্তরধাদ্ধরঃ |
কৃতকৃত্যস্ততো রামো লব্ধ্বা সর্বমভীপ্সিতম্ || ২. ২৫. ৪৫||
অদৃশ্যতাং গতে শর্বে মহোদরমুবাচ হ |
মহোদর মদর্থে ৎবমিদং সর্বমশেষতঃ || ২. ২৫. ৪৬||
রথচাপাদিকং তাবৎপরিরক্ষিতুমর্হসি |
যদা কৃত্যং মমৈতেন তদানীং ৎবং ময়া স্মৃতঃ |
রথচাপাদিকং সর্বং প্রহিণু ৎবং মদন্তিকম্ || ২. ২৫. ৪৭||
বসিষ্ঠ উবাচ
তথেত্যুক্ত্বা গতে তস্মিন্ভৃগুবর্যো মহোদরে |
কৃতকৃত্যো গুরুজনং দ্রষ্টুং গন্তুমিয়েষ সঃ || ২. ২৫. ৪৮||
গচ্ছন্নথ তদাসৌ তু হিমাদ্রিবনগহ্বরে |
বিবেশ কন্দরং রামো ভাবিকর্মপ্রচোদিতঃ || ২. ২৫. ৪৯||
স তত্র দদৃশে বালং ধৃতপ্রাণমনুদ্রুতম্ |
ব্যাঘ্রেণ বিপ্রতনয়ং রুদন্তং ভীতভীতবৎ || ২. ২৫. ৫০||
দৃষ্ট্বানুকংপহৃদয়স্তৎপরিত্রাণকাতরঃ |
তিষ্ঠতিষ্ঠেতি তং ব্যাঘ্রং বদন্নুচ্চৈরথান্বয়াৎ || ২. ২৫. ৫১||
তমনুদ্রুত্য বেগেন চিরাদিব ভৃগূদ্বহঃ |
আসসাদ বনে ঘোরং শার্দূলমতিভীষণম্ || ২. ২৫. ৫২||
ব্যাঘ্রেণানুদ্রুতঃ সোঽপি পলায়ন্বনগহ্বরে |
নিপপাত দ্বিজসুতস্ত্রস্তঃ প্রাণভয়াতুরঃ || ২. ২৫. ৫৩||
রামোঽপি ক্রোধরক্তাক্ষো বিপ্রপুত্রপরীপ্সয়া |
তৃণমূলং সমাদায় কুশাস্ত্রেণাভ্যমন্ত্রয়ৎ || ২. ২৫. ৫৪||
তাবত্তরক্ষুর্বলবানাদ্রবৎপতিতং দ্বিজম্ |
দৃষ্ট্বা ননাদসুভৃশং রোদসী কম্পয়ন্নিব || ২. ২৫. ৫৫||
দগ্ধ্বা ৎবস্ত্রাগ্নিনা ব্যাঘ্রং প্রহরন্তং নখাঙ্কুরৈঃ |
অকৃতব্রণমেবাশু মোক্ষয়ামাস তং দ্বিজম্ || ২. ২৫. ৫৬||
সোঽপি ব্রহ্মাগ্নিনির্দগ্ধদেহঃ পাপ্মা নভস্তলে |
গান্ধর্বং বপুরাস্থায় রামমাহেতি সাদরম্ || ২. ২৫. ৫৭||
বিপ্রশাপেন ভোপূর্বমহং প্রাপ্তস্তরক্ষুতাম্ |
গচ্ছামি মোচিতঃ শাপাত্ত্বয়াহমধুনা দিবম্ || ২. ২৫. ৫৮||
ইত্যুক্ত্বা তু গতে তস্মিন্রামো বেগেন বিস্মিতঃ |
পতিতং দ্বিজপুত্রং তং কৃপয়া ব্যবপদ্যত || ২. ২৫. ৫৯||
মাভৈরেবং বদন্বাণীমারাদেব দ্বিজাত্মজম্ |
পরমৃশত্তদঙ্গানি শনৈরুজ্জীবয়ন্নৃপ || ২. ২৫. ৬০||
রামেণোত্থাপিতশ্চৈবং স তদোন্মীল্য লোচনে |
বিলোকয়ন্দদর্শাগ্রে ভৃগুশ্রেষ্ঠমবস্থিতম্ || ২. ২৫. ৬১||
ভস্মীকৃতং চ শার্দূলং দৃষ্টবা বিস্ময়মাগতঃ |
গতভীরাহ কস্ত্বং ভোঃ কথং বেহ সমাগতঃ || ২. ২৫. ৬২||
কেন বায়ং নিহন্তুং মামুদ্যতো ভস্মসাৎকৃতঃ |
তরক্ষুর্ভীষণাকারঃ সাক্ষান্মৃত্যুরিবাপরঃ || ২. ২৫. ৬৩||
ভয়সংমূঢমনমো মমাদ্যাপি মহামতে |
হতেঽপি তস্মিন্নখিলা ভান্তি বৈ তন্ময়া দিশঃ || ২. ২৫. ৬৪||
ৎবামেব মন্যে সকলং পিতা মাতা সুৎদৃদ্গুরূ |
পরমাপদমাপন্নং ৎবং মাং সমুপজীবয়ন্ || ২. ২৫. ৬৫||
আসীন্মুনিবরঃ কশ্চিচ্ছান্তো নাম মহাতপাঃ |
পুত্রস্তস্যাস্মি তীর্থার্থী শালগ্রামময়াসিষম্ || ২. ২৫. ৬৬||
তস্মাৎসংপ্রস্থিতশ্শৈলং দিদৃক্ষুর্গন্ধমাদনম্ |
নানামুনিগণৈর্জুষ্টং পুণ্যং বদরিকাশ্রমম্ || ২. ২৫. ৬৭||
গন্তুকামোঽপহায়াহং পন্থানং তু হিমাচলে |
প্রবিশন্গহনং রম্যং প্রদেশালোকনাকুলম্ || ২. ২৫. ৬৮||
দিশংপ্রাচীং সমুদ্দিশ্য ক্রোশমাত্রময়াসিষম্ |
ততো দিষ্টবশেনাহং প্রাদ্রবং ভয়পীডিতঃ || ২. ২৫. ৬৯||
পতিতশ্চ ৎবয়া ভূয়োভূমেরুত্থাপিতোঽধুনা |
পিত্রেব নিতরাং পুত্রঃ প্রেম্ণাত্যর্থং দয়ালুনা |
ইত্যেষ মম বৃত্তান্তঃ সাকল্যেনোদিতস্তব || ২. ২৫. ৭০||
বসিষ্ঠ উবাচ
ইতি পৃষ্টস্তদা তেন স্ববৃত্তান্তমশেষতঃ |
কথয়ামাস রাজেন্দ্র রামস্তস্মৈ যথাক্রমম্ || ২. ২৫. ৭১||
ততস্তৌ প্রীতিসংযুক্তৌ কথয়ন্তৌ পরস্পরম্ |
স্থিৎবা নাতিচিরং কালমথ গন্তুমিয়েষ সঃ || ২. ২৫. ৭২||
অন্বীয়মানস্তেনাথ রামস্তস্মাদ্গুহামুখাৎ |
নিষ্ক্রম্যাবসথং পিত্রোঃ সংপ্রতস্থে মুদান্বিতঃ || ২. ২৫. ৭৩||
অকৃতব্রণ এবাসৌ ব্যাঘ্রেণ ভুবি পাতিতঃ |
রামেণ রক্ষিতশ্চাভুদ্যস্মাদ্ধ্যাঘ্রং বিনিঘ্নতা || ২. ২৫. ৭৪||
তস্মাত্তদেব নামাস্য বভূব প্রথিতং ভুবি |
বিপ্রপুত্রস্য রাজেন্দ্র তদেতৎসোঽকৃতব্রণঃ || ২. ২৫. ৭৫||
তদা প্রভৃতি রামস্য চ্ছায়েবাতপগা ভুবি |
বভূব মিত্রমত্যর্থং সর্বাবস্থাসু পার্থিব || ২. ২৫. ৭৬||
স তেনানুগতো রাজন্ভৃগোরাসাদ্য সন্নিধিম্ |
দৃষ্ট্বা খ্যাতিং চ সোঽভ্যেত্য বিনয়েনাভ্যবাদয়ৎ || ২. ২৫. ৭৭||
স তাভ্যাং প্রিয়মাণাভ্যামাশীর্ভিরভিনন্দিতঃ |
দিনানি কতিচিত্তত্র ন্যবসত্তৎপ্রিয়েপ্সয়া || ২. ২৫. ৭৮||
ততস্তয়োরনুমতে চ্যবনস্য মহামুনেঃ |
আশ্রমং প্রতিচক্রাম শিষ্যসংঘৈঃ সমাবৃতম্ || ২. ২৫. ৭৯||
নিয়ন্ত্রিতান্তঃ করণং তং চ সংশান্তমানসম্ |
সুকন্যাচাপি তদ্ভার্যামবন্দত মহামনাঃ || ২. ২৫. ৮০||
তাভ্যাং চ প্রীতিয়ুক্তাভ্যাং রামঃ সমভিনন্দিতঃ |
ঔর্বাশ্রমং সমাপেদে দ্রষ্টুকামস্তপোনিধিম্ || ২. ২৫. ৮১||
তং চাভিবাদ্য মেধাবী তেন চ প্রতিনন্দিতঃ |
উবাস তত্র তৎপ্রীত্যা দিনানি কতিচিন্নৃপ || ২. ২৫. ৮২||
বিসৃষ্টস্তেন শনকৈরৃচীকভবনং মুদা |
প্রতস্থে ভার্গবঃ শ্রীমানকৃতব্রণসংযুতঃ || ২. ২৫. ৮৩||
অবন্দত পিতুঃ পিত্রোর্নৎবা পাদৌ পৃথক্ পৃথক্ |
তৌ চ তং নৃপ সংহর্ষাচ্চাশিষা প্রত্যনন্দতাম্ || ২. ২৫. ৮৪||
পৃষ্টশ্চ তাভ্যামখিলং নিজবৃত্তমুদারধীঃ |
কথয়ামাস রাজেন্দ্র যথাবৃত্তমনুক্রমাৎ || ২. ২৫. ৮৫||
স্থিৎবা দিনানি কতিচিত্তত্রাপি তদনুজ্ঞয়া |
জগামাবসথং পিত্রোর্মুদা পরময়া যুতঃ || ২. ২৫. ৮৬||
অভ্যেত্য পিতরৌ রাজন্নাসী নাবাশ্রমোত্তমে |
অবন্দত তয়োঃ পাদৌ যথাবদ্ভৃগুনন্দন || ২. ২৫. ৮৭||
পাদপ্রণামাবনতং সমুত্থাপ্য চ সাদরম্ |
আশ্লিষ্য নেত্রসলিলৈর্নন্দন্তৌ পর্যষিঞ্চতাম্ || ২. ২৫. ৮৮||
আশীর্ভিরভিনন্দ্যাঙ্কে সমারোপ্য সুহুর্মুখম্ |
বিক্ষন্তৌ তস্য চাঙ্গানি পরিস্পৃশ্যাপতুর্মুদম্ || ২. ২৫. ৮৯||
অপৃচ্ছতাঞ্চ তৌ রামং কলেনৈতাবতা ৎবয়া |
কিং কৃতং পুত্র কো বায়ং কুত্র বা ৎবমুপস্থিতঃ || ২. ২৫. ৯০||
কথং সহ সকাশে ৎবমাস্থিতো বাত্র বাগতঃ |
ৎবয়েতদখিলং বৎস কথ্যতাং তথ্যমাবয়োঃ || ২. ২৫. ৯১||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয় উপোদ্ধাতপাদের্ঽজুনোপাখ্যানে ভার্গবচরিতে পঞ্চবিংশতিতমোঽধ্যায়ঃ || ২৫||
বশিষ্ঠ উবাচ
ইতি পৃষ্টস্তদা তাভ্যাং রামো রাজন্কৃতাঞ্জলিঃ |
তয়োরকথয়ৎসর্বমাত্মনা যদনুষ্ঠিতম্ || ২. ২৬. ১||
নিদেশাদ্বৈ কুলগুরোস্তপশ্চরণমাত্মনঃ |
শংভোর্নিদেশাত্তীর্থানামটনং চ যথাক্রমম্ || ২. ২৬. ২||
তদাজ্ঞয়ৈব দৈত্যনাং বধং চামরকারণাৎ |
হরপ্রসাদাদত্রাপি হ্যকৃতব্রণদর্শনম্ || ২. ২৬. ৩||
এতৎসর্বমশেষেণ যদন্যচ্চাত্মনা কৃতম্ |
কথয়ামাস তদ্রামঃ পিত্রোঃ সংপ্রীয়মাণয়োঃ || ২. ২৬. ৪||
তৌ চ তেনোদিতং সর্বং শ্রুৎবা তৎকর্ম বিস্তরম্ |
হৃষ্টৌ হর্ষান্তরং ভূয়ো রাজন্নাপ্নুবতাবুভৌ || ২. ২৬. ৫||
এবং পিত্রোর্মহারাজ শুশ্রূষাং ভৃগুপুঙ্গবঃ |
প্রকুর্বংস্তদ্বিধেয়াত্মা ভ্রাৎৠণাং চাবিশেষতঃ || ২. ২৬. ৬||
এতস্মিন্নেব কালে তু কদাচিদ্ধৈহয়েশ্বরঃ |
ইত্যেষ মৃগয়াং গান্তুং চতুরঙ্গবলান্বিতঃ || ২. ২৬. ৭||
সংরজ্যমানে গগনে বন্ধূককুসুমারুণৈঃ |
তারাজালদ্যুতিহরৈঃ সমন্তাদরুণাংশুভিঃ || ২. ২৬. ৮||
মন্দং বীজতি প্রোদ্ধূতকেতকীবনরাজিভিঃ |
প্রাভাতিকে গন্ধবহে কুমুদাকরসংস্পৃশি || ২. ২৬. ৯||
বয়াংসি নর্মদাতীরতরুনীডাশ্রয়েষু চ |
ব্যাহরন্স্বাকুলা বাচো মনঃশ্রোত্রসুখাবহাঃ || ২. ২৬. ১০||
নর্মদাতীরতীর্থং তদবতীর্যাঘহারিণি |
তত্তোয়ে মুনিবৃন্দেষু গৃণাৎসুব্রহ্ম শাশ্বতম্ || ২. ২৬. ১১||
বিধিবৎকৃতমৈত্রেষু সন্নিবৃত্য সরিত্তটাৎ |
আশমং প্রতি গচ্ছৎসু মুনিমুখ্যেষু কর্মিষু || ২. ২৬. ১২||
প্রত্যেকং বীরপত্নীষু ব্যগ্রাসু গৃহকর্মসু |
হোমার্থং মুনিকল্পাভির্দুহ্যমানাসু ধেনুষু || ২. ২৬. ১৩||
স্থানে মুনিকুমারেষু তং দোহং হি নয়ৎসু চ |
অগ্নিহোত্রাকুলে জাতে সর্বভূতসুখাবহে || ২. ২৬. ১৪||
বিকসৎসু সরোজেষু গায়ৎসু ভ্রমরেষু চ |
বাশৎসু নীডান্নিষ্পত্য পতত্রিষু সমন্ততঃ || ২. ২৬. ১৫||
অনতি ব্যগ্রমত্তেভতুরঙ্গরথগামিনাম্ |
গাত্রাল্হাদবিবর্দ্ধন্যাং বেলায়াং মন্দবায়ুনা || ২. ২৬. ১৬||
গচ্ছৎসু চাশ্রমোপান্তং প্রসূনজলহারিষু |
স্বাধ্যা যদক্ষৈর্বহুভিরজিনাংবরধারিভিঃ || ২. ২৬. ১৭||
সম্যক্ প্রয়োজ্যমানেষু মন্ত্রেষূচ্চাবচেষু চ |
প্রৈষেষূচ্চার্যমাণেষু হূয়মানেষু বহ্নিষু || ২. ২৬. ১৮||
যথা বন্মন্ত্রতন্ত্রোক্তক্রিয়াসু বিততাসু চ |
জ্বলদগ্নিশিখাকারে তমস্তপনতেজসি || ২. ২৬. ১৯||
প্রতিহত্য দিশঃ সর্বা বিবৃণ্বানে চ মেদিনীম্ |
সবিতর্যুদয়ং যাতি নৈশে তমসি নশ্যতি || ২. ২৬. ২০||
তারকাসু বিলীনাসু কাষ্ঠাসু বিমলাসু চ |
কৃতমৈত্রাদিকো রাজা মৃগয়াং হৈহয়েশ্বরঃ || ২. ২৬. ২১||
নির্যয়ৌ নগরাত্তস্মাৎপুরোহিতসমন্বিতঃ |
বলৈঃ সর্বৈঃ সমুদিতৈঃ সবাজিরথকুঞ্জরৈঃ || ২. ২৬. ২২||
সচিবঃ সহিতঃ শ্রীমান্ সবয়োভিশ্চ রাজভিঃ |
মহতা বলভারেণ নময়ন্বসুধাতলম্ || ২. ২৬. ২৩||
নাদয়ন্রথঘোষেণ ককুভঃ সর্বতো নৃপঃ |
স্ববলৌঘপদক্ষেপপ্রক্ষুণ্ণাবনিরেণুভিঃ || ২. ২৬. ২৪||
যয়ৌ সংচ্ছাদয়ন্ব্যোম বিমানশতসংকুলম্ |
সংপ্রবশ্য বনং ঘোরং বিন্ধ্যোদ্রের্বলসংচয়ৈঃ || ২. ২৬. ২৫||
ভৃশং বিলোলয়া মাস সমন্তাদ্রাজসত্তমঃ |
পরিবার্য বনং তত্তু স রাজা নিজসৈনিকৈঃ || ২. ২৬. ২৬||
মৃগান্নানাবিধান্হিংস্রান্নিজঘান শিতৈঃ শরৈঃ |
আকর্ণকৃষ্টকোদণ্ডয়োধমুক্তৈঃ শিতেষুভিঃ || ২. ২৬. ২৭||
নিকৃত্তগাত্রাঃ শার্দূলা ন্যপতন্ভুবি কেচন |
উদগ্রবেগপাদাতখড্গখণ্ডিতবিগ্রহাঃ || ২. ২৬. ২৮||
বরাহয়ূথপাঃ কেচিদ্রুধিরার্দ্রা ধরামগুঃ |
প্রচণ্ডশাক্তিকোন্মুক্তশক্তিনির্ভিন্নমস্তকাঃ || ২. ২৬. ২৯||
মৃগৌঘাঃ প্রত্যপদ্যন্ত পর্বতা ইব মেদিনীম্ |
নারাচা বিদ্ধসর্বাঙ্গাঃ সিংহর্ক্ষশরভাদয়ঃ || ২. ২৬. ৩০||
বসুধামন্বকীর্যন্ত শোণিতার্দ্রাঃ সমন্ততঃ |
এবং সবাগুরৈঃ কৈশ্চিৎপতদ্ভিঃ পতিতৈরপি || ২. ২৬. ৩১||
শ্বভিশ্চানুদ্রুতৈঃ কৈশ্চিদ্ধাবমানৈস্তথা মৃগৈঃ |
আত্তৈর্বিক্রোশমানৈশ্চ ভীতৈঃ প্রাণভয়াতুরৈঃ || ২. ২৬. ৩২||
যুগাপায়ে যথাত্যর্থং বনমাকুলমাবভৌ |
বরাহসিংহশার্দূলশ্বাবিচ্ছশকুলানি চ || ২. ২৬. ৩৩||
চমরীরুরুগোমায়ুগবয়র্ক্ষবৃকান্বহূন্ |
কৃষ্ণসারান্দ্বীপিমৃগান্রক্তখড্গমৃগানবি || ২. ২৬. ৩৪||
বিচিত্রাঙ্গান্মৃগানন্যান্ন্যঙ্কূনপি চ সর্বশঃ |
বালান্স্তনন্ধয়ান্যূনঃ স্থবিরান্মিথুনান্গণান্ || ২. ২৬. ৩৫||
নিজঘ্নুর্নিশিতৈঃ শস্ত্রৈঃ শস্ত্রবধ্যান্হি সৈনিকাঃ |
এবং হৎবা মৃগান্ ঘোরান্হিংস্রপ্রায়ানশেষতঃ || ২. ২৬. ৩৬||
শ্রমেণ মহতা যুক্তা বভূবুর্নৃপসৈনিকাঃ |
মধ্যে দিনকরে প্রাপ্তে সসৈন্যঃ স তদা নৃপঃ || ২. ২৬. ৩৭||
নর্মদাং ধর্মসংতপ্তঃ পিপাসুরগমচ্ছনৈঃ |
অবতীয় ততস্তস্যাস্তোয়ে সবলবাহনঃ || ২. ২৬. ৩৮||
বিজাগাহ শুভে রাজা ক্ষুত্তৃষ্ণাপরিপীডিতঃ |
স্নাৎবা পীৎবা চ সলিলং স তস্যাঃ সুখশীতলম্ || ২. ২৬. ৩৯||
বিসাংকুরাণি শুভ্রাণি স্বাদূনি প্রজঘাস চ |
বিক্রীড্য তোয়ে সুচিরমুত্তীর্য সবলো নৃপঃ || ২. ২৬. ৪০||
বিশশ্রাম চ তত্তীরে তরুখণ্ডোপমণ্ডিতে |
আলংবপানে তিগ্মাংশৌ সসৈন্যঃ সানুগো নৃপঃ || ২. ২৬. ৪১||
নিশ্চক্রাম পুরং গন্তুং বিন্ধ্যাদ্রিবনগহ্বরাৎ |
স গচ্ছন্নেব দদৃশে নর্মদা তীরমাশ্রিতম্ || ২. ২৬. ৪২||
আশ্রমং পুণ্যশীলস্য জমদগ্নের্মহাত্মনঃ |
ততো নিবৃত্য সৈন্যানি দূরেঽবস্থাপ্য পার্থিবঃ || ২. ২৬. ৪৩||
পরিচারৈঃ কতিপথৈঃ সহিতোঽযাত্তদাশমম্ |
গৎবা তদাশ্রমং রম্যং পুরোহিতসমন্বিতঃ || ২. ২৬. ৪৪||
উপেত্য মুনিশার্দূলং ননাম শিরসা নৃপঃ |
অভিনং দ্যাশষা তং বৈ জমদগ্নির্নৃপোত্তমম্ || ২. ২৬. ৪৫||
পূজয়ামাস বিধিবদর্ঘপাদ্যাসনাদিভিঃ |
সংভাবয়িৎবা তাং পূজাং বিহিতাং মুনিনা তদা || ২. ২৬. ৪৬||
নিষসাদাসনে শুভ্র পুরস্তস্য মহামুনেঃ |
তমাসীনং নৃপবরং কুশাসনগতো মুনিঃ || ২. ২৬. ৪৭||
পপ্রচ্ছ কুশলপ্রশ্নং পুত্রমিত্রাদিবন্ধুষু |
সহ সংকথয়ংস্তেন রাজ্ঞা মুনিবরোত্তমঃ || ২. ২৬. ৪৮||
স্থিৎবা নাতিচিরং কালমাতিথ্যার্থং ন্যমন্ত্রয়ৎ |
ততঃ স রাজা সুপ্রীতো জমদগ্নি মভাষত || ২. ২৬. ৪৯||
মহর্ষে দেহি মেঽনুজ্ঞাং গমিষ্যামি স্বকং পুরম্ |
সমগ্রবাহনবলো হ্যহং তস্মান্মহামুনে || ২. ২৬. ৫০||
কর্তু ন শক্যমা তিথ্যং ৎবয়া বন্যাশিনা বনে |
অথবা ৎবং তপঃশক্ত্যা কর্তুমাতিথ্যমদ্য মে || ২. ২৬. ৫১||
শক্নোষ্যপি পুরীং গন্তুং মামনুজ্ঞাতুর্হসি |
অন্যথা চেৎখলৈঃ সৈন্যৈরত্যর্থং মুনিসত্তম || ২. ২৬. ৫২||
তপস্বিনাং ভবেৎপীডা নিয়মক্ষয়কারিকা |
বসিষ্ঠ উবাচ
ইত্যেবমুক্তঃ স মুনিস্তং প্রাহস্থীয়তাং ক্ষণম্ || ২. ২৬. ৫৩||
সর্বং সংপাদয়িথ্যেঽহমাতিথ্যং সানুগস্য তে |
ইত্যুক্ত্বাহূয় তাং দোগ্ধ্রীমুবাচায়ং মমাতিথিঃ || ২. ২৬. ৫৪||
উপাগ তস্ত্বয়া তস্মাৎক্রিয়তামদ্য সৎকৃতিঃ |
ইত্যুক্তা মুনিনা দোগ্ধ্রী সাতিথেয়মশেষতঃ |
দুদোহ নৃপতেরাশু যদ্যোগ্যং মুনিগৌরবাৎ || ২. ২৬. ৫৫||
অথাশ্রমং তৎসুররাজসদ্মনিকাশমাসীদ্ভৃগুপুঙ্গবস্য |
বিভূতিভেদৈরবিচিন্ত্যরুপমনন্যসাধ্যং সুরভিপ্রভাবাৎ || ২. ২৬. ৫৬||
অনেকরত্নোজ্জ্বলচিত্রহেমপ্রকাশমালাপরিবীতমুচ্চৈঃ |
পূর্ণেন্দুশুভ্রাভ্রবিষক্তশৃঙ্গৈঃ প্রাসাদসংঘৈঃ পরিবীতমন্তঃ || ২. ২৬. ৫৭||
কাংস্যারকূটারসতাম্রহেমদুর্বর্ণসৌধো পলদারুমৃদ্ভিঃ |
পৃথগ্বিমিশ্রৈর্ভবনৈরনেকৈঃ সদ্ভাসিতং নেত্রমনোভিরামৈঃ || ২. ২৬. ৫৮||
মহার্হরত্নোজ্জ্বলহেমবেদিকানিষ্কূটসোপানকুটীবিটঙ্ককৈঃ |
তুলাকপাটর্গলকুড্যদেহলীনিশান্তশালাজিরশোভিতৈর্ভৃশম্ || ২. ২৬. ৫৯||
বলভ্যলিন্দাঙ্গপাচারুতোরণৈরদভ্রপর্যন্তচতুষ্কিকাদিভিঃ |
স্তংভেষু কুড্যেষু চ দিব্যরত্নবিচিত্রচিত্রৈঃ পরিশোভমানৈঃ || ২. ২৬. ৬০||
উচ্চাবচৈ রত্নবরৈর্বিচিত্রসুবর্ণসিংহাসনপীঠিকাদ্যৈঃ |
স ভক্ষ্যভোজ্যাদিভি রন্নপানৈরুপেতভাণ্ডোপগতৈকদেশৈঃ || ২. ২৬. ৬১||
গৃহৈরমর্ত্যোচিতসর্বসংপৎসমন্বিতৈর্নেত্রমনোঽভিরামৈঃ |
তস্যাশ্রমং সন্নগরোপমানং বভৌ বধূভিশ্চমনোহরাভিঃ || ২. ২৬. ৬২||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয় উপোদ্ধাতপাদের্ঽজুনোপাখ্যানে ষড্বিংশতিতমোঽধ্যায়ঃ || ২৬||
বসিষ্ঠ উবাচ
তস্মিন্পুরে সন্তুলিতামরেদ্রপুরীপ্রভাবে মুনিবর্যধেনুঃ |
বিনির্মমে তেষু গৃহেষু পশ্চাত্তদ্যোগ্যনারীনরবৃন্দজাতম্ || ২. ২৭. ১||
বিচিত্রবেষাভরণপ্রসূনগন্ধাংশুকালঙ্কৃতবিগ্রহাভিঃ |
সহাবভাবাভিরুদারচেষ্টাশ্রীকান্তিসৌন্দর্যগুণান্বিতাভিঃ || ২. ২৭. ২||
মন্দস্ফুরদ্দন্তমরীচিজাল বিদ্যোতিতাননসরোজজিতেন্দুভাভিঃ |
প্রত্যগ্রয়ৌবনভরাসবল্গুগীর্ভিঃ স প্রেমমন্থরকটাক্ষনিরীক্ষণাভিঃ || ২. ২৭. ৩||
প্রীতিপ্রসন্নহৃদয়াভিরতিপ্রভাভিঃ শৃঙ্গারকল্পতরুপুষ্পবিভূষিতাভিঃ |
দেবাঙ্গনাতুলিতসৌভগসৌকুমার্যরূপাভিলাষমধুরাকৃতিরঞ্জিতাভিঃ || ২. ২৭. ৪||
উত্তপ্তহেমকলশোপমচারুপীনবক্ষোরুহদ্বয়ভরানতমধ্যমাভিঃ |
শ্রোণীভরাক্রমণখেদপরিশ্রিতাস্মৃগারক্তপাবকরসারুণিতাঙ্ঘ্রিভূভিঃ || ২. ২৭. ৫||
কেয়ূরহারমণিকঙ্কণহেম কণ্ঠসূত্রামলশ্রবণমণ্ডলমণ্ডিতাভিঃ |
স্রগ্দামচুম্বিতসকুন্তলকেশপাশকাঞ্চীকলাপপরিশিঞ্জিতনূপুরাভিঃ || ২. ২৭. ৬||
আমৃষ্টরোষপরিসাংৎবননর্মহাসকেলীপ্রিয়ালপনভর্ত্সনরোষণেষু |
ভাবেষু পার্থিবনিজপ্রিয়ধৈর্যবন্ধসর্বাপহারচতুরেষু কৃতান্তরাভিঃ || ২. ২৭. ৭||
তন্ত্রীস্বনোপমিতমঞ্জুলসৌম্যগেয়গন্ধর্বতারমধুরারবভাষিণীভিঃ |
বীণাপ্রবীণতরপাণিতলাঙ্গুলীভির্গংভীরচক্রচটুবাদরতোৎসুকাভিঃ || ২. ২৭. ৮||
স্ত্রীভির্মদালস তরাভিরতিপ্রগল্ভভাবাভিরাকুলিতকামুকমানসাভিঃ |
কামপ্রয়োগনিপুণাভিরহীনসংপদৌদার্যরূপগুণশীলসমন্বিতাভিঃ || ২. ২৭. ৯||
সংখ্যাতিগাভিরনিশং গৃহকৃত্যকর্মব্যগ্রাত্মকাভিরপি তৎপরিচারিকাভিঃ |
পুংভিশ্চ তদ্গুণগণোচিতরূপশোভৈরুদ্ভাসিতৈর্গৃহচরৈঃ পরিতঃ পরীতম্ || ২. ২৭. ১০||
সরাজমার্গাপণসৌধসদ্মসোপানদেবালয়চৎবরেষু |
পৌরৈরশেষার্থগুণৈঃ সমন্তাদধ্যাস্যমানং পরিপূর্ণকামৈঃ || ২. ২৭. ১১||
অনেক রত্নোজ্জ্বলিতৈর্বিচিত্রৈঃ প্রাসাদসংঘৈরতুলৈরসংখ্যৈঃ |
রথাশ্বমাতঙ্গখরোষ্ট্রগোজায়োগ্যৈরনেকৈরপি মন্দিরৈশ্চ || ২. ২৭. ১২||
নরেদ্রসামন্তনিষাদিসাদিপদাতিসেনপতিনায়কানাম্ |
বিপ্রাদিকানাং রথিসারথীনাং গৃহৈস্তথা মাগধবন্দিনাং চ || ২. ২৭. ১৩||
বিবিক্তরথ্যাপণচিত্রচৎবরৈরনেকবস্তুক্রয়বিক্রয়ৈশ্চ |
মহাধনোপস্করসাধুনির্মিতৈর্গৃহৈশ্চ শুভ্রৈর্গণিকাজনানাম্ || ২. ২৭. ১৪||
মহার্হরত্নোজ্জ্বলতুঙ্গগোপুরৈঃ সহ শ্বগৃধ্রব্রজনর্তনালয়ৈঃ |
চিত্রৈর্ধ্বচৈশ্চাপি পতাকিকাভিঃ শুভ্রৈঃ পটৈর্মণ্ডপিকাভিরুন্নতৈঃ || ২. ২৭. ১৫||
কহ্লারকঞ্জকুমুদোৎপলরেণুবাসিতৈশ্চকাহ্বহংসকুররীবকসারসানাম্ |
নানারবাঢ্যরমণীয়তটাকবাপীসরোবরৈশ্চাপি জলোপপন্নৈঃ || ২. ২৭. ১৬||
চূতপ্রিয়ালপনসাম্রমধূকজংবূপ্লক্ষৈর্নবৈশ্চ তরুভিশ্চ কৃতালবালৈঃ |
পর্যন্তরোপিতমনোরমনাগকেতকীপুন্নাগচংপকবনৈশ্চ পতত্রিজুষ্টৈঃ || ২. ২৭. ১৭||
মন্দারকুন্দকরবীরমনোজ্ঞয়ূথিকাজাত্যাদিকৈর্বিবিধপুষ্পফলৈশ্চ বৃক্ষৈঃ |
সংলক্ষ্যমাণপরিতোপবনালিভিশ্চ সংশোভিতং জগতি বিস্ময়নীয়রূপৈঃ || ২. ২৭. ১৮||
সর্বর্ত্তুকপ্রবরসৌরভবায়ুমন্দমন্দপ্রচারিভর্ত্সিতধর্মকালম্ |
ইত্থ সুরাসুরমনোরমভোগসংপদ্বিস্পষ্টমানবিভবং নগরং নরেদ্র || ২. ২৭. ১৯||
সৌভাগ্যভোগমমিতং মুনিহোমধেনুঃ সদ্যো বিধায় বিনিবেদয়দাশু তস্মৈ |
জ্ঞাৎবা ততো মুনিবরো দ্বিজহোমধেন্বা সংপাদিতং নরপতে রুচিরাতিথেয়ম্ || ২. ২৭. ২০||
আহূয় কঞ্চন তদন্তিক মাত্মশিষ্যং প্রাস্থাপয়ৎসগুণশালিনমাশু রাজন্ |
গৎবা বিশামধিপতেস্তরসা সমীপং সংপ্রশ্রয়ং মুনিসুতস্তমিদং বভাষে || ২. ২৭. ২১||
আতিথ্যমস্মদুপপাদিতমাশু রাজ্ঞা সংভাবনীয়মিতি নঃ কুলদেশিকাজ্ঞা |
রাজা ততো মুনিবরেণ কৃতাভ্যনুজ্ঞঃ সংপ্রাবিশৎপুরবরং স্বকৃতে কৃতং তৎ || ২. ২৭. ২২||
সর্বোপভোগ্যনিলয়ং মুনিহোমধেনুসামর্থ্যসূচকমশোষবলৈঃ সমেতঃ |
অন্তঃ প্রবিশ্য নগরর্দ্ধিমশেষলোকসংমোহিনীম্ ভিসমীক্ষ্য স রাজবর্যঃ || ২. ২৭. ২৩||
প্রীতিপ্রসন্নবদনঃ সবলস্তু দানী ধীরোঽপি বিস্ময়মবাপ ভৃশং তদানীম্ |
গচ্ছন্সুরস্ত্রীনয়না লিয়ূথপানৈকপাত্রোচিতচারুমূর্ত্তিঃ || ২. ২৭. ২৪||
রেমে স হৈহয়পতিঃ পুররাজমার্গে শক্রঃ কুবেরবসতাবিব সামরৌঘঃ |
তং প্রস্থিতং রাজপথাৎসমন্তাৎপৌরাঙ্গনাশ্চন্দনবারিসিক্তৈঃ || ২. ২৭. ২৫||
প্রসূনলাজাপ্রকরৈরজস্রমবীপৃষন্সৌধগতাঃ সুৎদৃদ্যৈঃ |
অভ্যাগতার্হণসমুৎসুকপৌরকান্তা হস্তারবিন্দগলিতামললাজবর্ষৈঃ || ২. ২৭. ২৬||
কালেয়পঙ্কসুরভীকৃতনন্দনোত্থশুভ্রপ্রসূননিকরৈরলিবৃন্দগীতৈঃ |
তত্রত্যপৌরবনিতাঞ্জনরত্নসারমুক্তাভিরপ্যনুপদং প্রবিকীর্যমামঃ || ২. ২৭. ২৭||
ব্যভ্রাজতাবনিপতির্বিশদৈঃ সমন্তাচ্ছীতাংশুরশ্মিনিকরৈরিব মন্দরাদ্রিঃ |
ব্রাহ্মীং তপঃশ্রিয় মুদারগণমচিন্ত্যাং লোকেষু দুর্লভতরাং স্পৃহণীয়শোভাম্ || ২. ২৭. ২৮||
পশ্যন্বিশামধিপতিঃ পুরসংপদং তামুচ্চৈঃ শশংস মনসা বচসেব রাজন্ |
মেনে চ হৈহয়পতির্ভুবি দুর্লভেয়ং ক্ষাত্রী মনোহরতরা মহিতা হি সংপৎ || ২. ২৭. ২৯||
অস্যাঃ শতাংশতুলনামপি নোপগন্তুং বিপ্রশিয়ঃ প্রভবতীতি সুরার্চিতায়াঃ |
মধ্যেপুরং পুরজনোপচিতাং বিভূতিমালোকয়ন্সহ পুরোহিতমন্ত্রিসার্থৈঃ || ২. ২৭. ৩০||
গচ্ছৎস্বপার্শ্বচর দর্শিতবর্ণসৌধো লেভে মুদং পুরজনৈঃ পরিপূজ্যমানঃ |
রাজা ততো মুনিবরোপচিতাং সপর্যামাত্মানুরূপমিহ সানুচরো লভস্ব || ২. ২৭. ৩১||
ইত্যশ্রমেণ নৃপতির্বিনিবর্ত্তয়িৎবা স্বার্থং প্রাল্পিতগৃহাভিমুখো জগাম |
পৌরেঃ সমেত্য বিবিধার্হণপাণিভিশ্চ মার্গে মুদা বিরচিতাজলিভিঃ সমন্তাৎ || ২. ২৭. ৩২||
সংভাবিতোভ্যনুপদং জয়শব্দঘোষৈস্তূর্যারবৈশ্চ বধিরীকৃতদিগ্বিভাগৈঃ |
কক্ষান্তরাণি নৃপতিঃ শনকৈরতীত্য ত্রীণি ক্রমেণ চ সসংভ্রমকঞ্চুকীনি || ২. ২৭. ৩৩||
দূরপ্রসারিতপৃথগ্জনসংকুলানি সদ্মাবিবেশ সচিবাদরদত্তহৃস্তঃ |
তত্র প্রদীপদধিদর্পণগন্ধপুষ্পদূর্বাক্ষতাদিভিরলং পুরকামিনীভিঃ || ২. ২৭. ৩৪||
নির্যায় রাজভবনান্তরতঃ সলীলমানন্দিতো নরপতির্বহুমান পূর্বকম্ |
তাভিঃ সমাভিবিনিবেশিতমাশু নানারত্নপ্রবেকরুচিজালবিরাজমানম্ || ২. ২৭. ৩৫||
সূক্ষ্মোত্তরচ্ছদমুদারয়শা মনোজ্ঞমধ্যা রুরোহ কনকোত্তরবিষ্টরং তম্ |
তস্মিন্গৃহে নৃপ তদীয়পুরন্ধ্রিবর্গঃ স্বাসীনমাশু নৃপতির্বিবিধার্হণাভিঃ || ২. ২৭. ৩৬||
বাদ্যাদিভিস্তদনুভূষণগন্ধপুষ্পবস্ত্রাদ্যলঙ্কৃতিভিরগ্র্যমুদং ততান |
তস্মিন্নশেষদিবসোচিতকর্ম সর্বং নির্বর্ত্য হৈহয়পতিঃ স্বমতানুসারম্ || ২. ২৭. ৩৭||
নানা বিধালয়ননর্মবিচিত্রকেলীসংপ্রেক্ষিতৈর্দিনমশেষমলং নিনায় |
কৃৎবা দিনান্তসময়োচিতকর্ম চৈব রাজা স্বমন্ত্রিসচিবানুগতঃ সমন্তাৎ || ২. ২৭. ৩৮||
আসন্নভৃত্যকরসংস্থিতদীপকৌধসংশান্তসংতমসমাশু সদঃ প্রপেদে |
তত্রাসনে সমুপবিশ্য পুরোধমন্ত্রিসামন্তনায়কশতৈঃ সমুপাস্যমানঃ || ২. ২৭. ৩৯||
অন্বাস্ত রাজসমিতৌ বিবিধৈর্বিনোদৈর্হৃষ্টঃ সুরেদ্র ইব দেবগণৈরুপেতঃ |
ততশ্চিরং বিবিধবাদ্যবিনোদনৃত্তপ্রেক্ষাপ্রবৃত্তহসনাদিকথাপ্রসংগঃ || ২. ২৭. ৪০||
আসাংচকার গণিকাজন্নর্মহাসক্রীডাবিলাসপরিতোষিতচিত্তবৃত্তিঃ |
ইত্থং বিশামধিপতির্ভৃশমানিশার্দ্ধং নানাবিহারবিভবানুভবৈরনেকৈঃ || ২. ২৭. ৪১||
স্থিৎবানুগান্নরপতীনপি তন্নিবাসং প্রস্থাপ্য বাসভবনং স্বয়মপ্যয়াসীৎ |
তদ্রাজসৈন্যমখিলং নিজবীর্যশৌর্যসংপৎপ্রভাবমহিমানুগুণং গৃহেষু || ২. ২৭. ৪২||
আত্মানুরুপবিভবেষু মহার্হবস্ত্রস্রগ্ভূষণাদিভিরলং মুদিতং বভূব |
সৈন্যানি তানি নৃপতের্বিবিধান্নপানসদ্ভক্ষ্যভোজ্যমধুমাংসপয়োঘৃতাদ্যৈঃ || ২. ২৭. ৪৩||
তৃপ্তান্যবাৎসুরখিলানি সুখোপভৌগৈস্তস্যাং নরেদ্রপুরি দেবগণা দিবীব |
এবং তদা নরপতেরনুয়ায়িনস্তে নানাবিধোচিতসুখানুভবপ্রতীতাঃ || ২. ২৭. ৪৪||
অন্যোন্যমূচুরিতি গেহধনাদিভির্বা কিং সাধ্যতে বয়মিহৈব বসাম সর্বে |
রাজাপি শার্বরবিধানমথো বিধায় নির্বর্ত্য বাসভবনে শয়নীয়মগ্র্যম্ |
অধ্যাস্য রত্ননিকরৈরতি শৈভি ভদ্রং নিদ্রামসেবত নরেদ্র চিরং প্রতীতঃ || ২. ২৭. ৪৫||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয় উপোদ্ধাতপাদের্ঽজুনোপাখ্যানে সপ্তবিংশতিতমোঽধ্যায়ঃ || ২৭||
বসিষ্ঠ উবাচ
স্বপন্তমেত্য রাজানং সূতমাগধবন্দিনঃ |
প্রবোধয়িতুমব্যগ্রা জগুরুচ্চৈর্নিশাত্যয়ে || ২. ২৮. ১||
বীণাবেণুরবোন্মিশ্রকলতালততানুগম্ |
সমস্তশ্রুতিসুশ্রাব্যপ্রশস্তমধুরস্বরম্ || ২. ২৮. ২||
স্নিগ্ধকণ্ঠাঃ সুবিস্পষ্টমূর্চ্ছনাগ্রামসূচিতম্ |
জগুর্গেয়ং মনোহারি তারমন্দ্রলয়ান্বিতম্ || ২. ২৮. ৩||
ঊচুশ্চ তং মহাত্মানং রাজানং সূতমাগধাঃ |
স্বপন্তং বিবিধা বাচো বুবোধয়িষবঃ শনেঃ || ২. ২৮. ৪||
পস্যায়মস্তমভ্যেতি রাজেন্দ্রেন্দুঃ পরাজিতঃ |
বিবর্দ্ধমানয়া নূনং তব বক্ত্রাংবুজশ্রিয়া || ২. ২৮. ৫||
দ্রষ্টুং ৎবদান নাংভোজং সমুৎসুক ইবাধুনা |
তমাংসি ভিন্দন্নাদিত্যঃ সংপ্রাপ্তো হ্যুদয়ং বিভো || ২. ২৮. ৬||
রাজন্নখিলশীতাংশুবংশমৌলিশিখামণে |
নিদ্রয়া লং মহাবুদ্ধে প্রতিবুধ্যস্ব সাংপ্রতম্ || ২. ২৮. ৭||
ইতি তেষাং বচঃ শৃণ্বন্নবুধ্যত মহীপতিঃ |
ক্ষীরাব্দৌ শেষশয়নাদ্যথাপঙ্কজলোচনঃ || ২. ২৮. ৮||
বিনিদ্রাক্ষঃ সমুত্থায় কর্ম নৈত্যকমাদরাৎ |
চকারাবহিতঃ সম্যগ্জয়াদিকমশেষতঃ || ২. ২৮. ৯||
দেবতামভিবন্দ্যেষ্টাং গাং দিব্যস্রগ্গন্ধভূষণঃ |
কৃৎবা দূর্বাঞ্জনাদর্শমঙ্গল্যালম্বনানি চ || ২. ২৮. ১০||
দত্ত্বা দানানি চার্থিভ্যো নৎবা গোব্রহ্মণানপি |
নিষ্ক্রম্য চ পুরাত্তস্মাদুপতস্থে চ ভাস্করম্ || ২. ২৮. ১১||
তাবদভ্যায়য়ুঃ সর্বং মন্ত্রিসামন্তনায়কাঃ |
রচিতাঞ্জলয়ো রাজন্নেমুশ্চ নৃপসত্তমম্ || ২. ২৮. ১২||
ততঃ স তৈঃ পরিবৃতঃ সমুপেত্য তপোনিধিম্ |
ননাম পাদয়োস্তস্য কিরীটেনার্কবর্চসা || ২. ২৮. ১৩||
আশীর্ভিরভিনন্দ্যাথ রাজানং মুনিপুঙ্গবঃ |
প্রশ্রয়াবনতং সাম্না তমুবাচাস্যতামিতি || ২. ২৮. ১৪||
তমাসীনং নরপতিং মহার্ষিঃ প্রীতমানসঃ |
উবাচ রজনী ব্যুষ্টা সুখেন তব কিং নৃপ || ২. ২৮. ১৫||
অস্মাকমেব রাজেন্দ্র বনে বন্যেন জীবতাম্ |
শক্যং মৃগসধর্মাণাং যেন কেনাপি বর্ত্তিতুম্ || ২. ২৮. ১৬||
অরণ্যে নাগরাণাং তু স্থিতিরত্যন্তদুঃসহা |
অনভ্যস্তং হি রাজেন্দ্র ননু সর্বং হি দুষ্করম্ || ২. ২৮. ১৭||
বনবাসপরিক্লেশং ভবান্যৎসানুগোঽসকৃৎ |
আপ্তস্তু ভবতো নূনং সা গৌরবসমুন্নতিঃ || ২. ২৮. ১৮||
ইত্যুক্তস্তেন মুনিনা স রাজা প্রীতিপূর্বকম্ |
প্রহসন্নিব তং ভূয়ো বচনং প্রত্যভাষত || ২. ২৮. ১৯||
ব্রহ্মন্কিমনয়া হ্যুক্ত্যা দৃষ্টস্তে যাদৃশো মহান্ |
অস্মাভিমহিমা যেন বিস্মিতং সকলং জগৎ || ২. ২৮. ২০||
ভবৎপ্রভাবসংজাতবিভবাহতচেতসঃ |
ইতো ন গন্তুমিচ্ছন্তি সৈনিকা মে মহামুনে || ২. ২৮. ২১||
ৎবাদৃশানাং জগন্তীহ প্রভাবৈস্তপসাং বিভো |
ধ্রিয়ন্তে সর্বদা নূনমচিন্ত্যং ব্রহ্মবর্চসম্ || ২. ২৮. ২২||
নৈব চিত্রং তব বিভো শক্রোতি তপসা ভবান্ |
ধ্রুবং কর্ত্তুং হি লোকানামবস্থাত্রিতয়ং ক্রমাৎ || ২. ২৮. ২৩||
সুদৃষ্টা তে তপঃসিদ্ধির্মহতী লোকপূজিতা |
গমিষ্যামি পুরীং ব্রহ্মন্ননুজানাতু মাং ভবান্ || ২. ২৮. ২৪||
বসিষ্ঠ উবাচ
ইত্যুক্তস্তেনস মুনিঃ কার্ত্তবীর্যেণ সাদরম্ |
সংভাবয়িৎবা নিতরাং তথেতি প্রত্যভাষত || ২. ২৮. ২৫||
মুনিনা সমনুজ্ঞাতো বিনিষ্ক্রম্য তদাশ্রমাৎ |
সৈন্যৈঃ পরিবৃতঃ সর্বৈঃ সংপ্রতস্থে পুরীং প্রতি || ২. ২৮. ২৬||
স গচ্ছংশ্চিন্তয়ামাস মনসা পথি পার্থিবঃ |
অহোঽস্য তপসঃ সিদ্ধির্লোক বিস্ময়দায়িনী || ২. ২৮. ২৭||
যয়া লব্ধেদৃশী ধেনুঃ সর্বকামদুহাং বরা |
কিং মে সকলরাজ্যেন যোগর্দ্ধ্যা বাপ্যনল্পয়া || ২. ২৮. ২৮||
গোরত্নভূতা যদিয়ং ধেনুর্মুনিবরে স্থিতা |
অনয়োৎপাদিতা নূনং সংপৎস্বর্গসদামপি || ২. ২৮. ২৯||
ঋদ্ধমৈন্দ্রমপি ব্যক্তং পদং ত্রৈলোক্যপূজিতম্ |
অস্যা ধেনোরহং মন্যে কলাং নার্হতি ষোডশীম্ || ২. ২৮. ৩০||
ইত্যেবং চিন্তয়ানং তং পশ্চাদভ্যেত্য পার্থিবম্ |
চন্দ্রগুপ্তোঽব্রবীন্মন্ত্রী কৃতাঞ্জলি পুটস্তদা || ২. ২৮. ৩১||
কিমর্থং রাজশার্দূল পুরীং প্রতিগমিষ্যসি |
রক্ষিতেন চ রাজ্যেন পুর্যা বা কিং ফলং তব || ২. ২৮. ৩২||
গোরত্নভূতা নৃপতের্যাবর্ধেনুর্ন চালয়ে |
বর্ত্ততে নার্দ্ধমপি তে রাজ্যং শূন্যং তব প্রভো || ২. ২৮. ৩৩||
অন্যচ্চ দৃষ্টমাশ্চর্যং ময়া রাজঞ্ছৃণুষ্ব তৎ |
ভবনানি মনোজ্ঞানি মনোজ্ঞাশ্চ তথা স্ত্রিয়ঃ || ২. ২৮. ৩৪||
প্রাসাদা বিবিধাকারা ধনং চাদৃষ্টসংক্ষয়ম্ |
ধেনো তস্যাং ক্ষণেনৈব বিলীনং পশ্যতো মম || ২. ২৮. ৩৫||
তত্তপোবনমেবাসীদিদানীং রাজসত্তম |
এবংপ্রভাবা সা যস্য তস্য কিং দুর্লং ভবেৎ || ২. ২৮. ৩৬||
তস্মাদ্রত্নার্হসত্ত্বেন স্বীকর্ত্তব্যা হি গৌস্ত্বয়া |
যদি তেঽনুমতং কৃত্যমাখ্যেয়মনুজীবিভিঃ || ২. ২৮. ৩৭||
রাজোবাচ |
এবমেবাহমপ্যেনাং ন জানামীত্যসাংপ্রতম্ |
ব্রহ্মস্বং নাপহর্তব্যমিতি মে শঙ্কতে মনঃ || ২. ২৮. ৩৮||
এবং ব্রুবন্তং রাজানমিদমাহ পুরোহিতঃ |
গর্গো মতিমতাং শ্রেষ্ঠো গর্হয়ন্নিব ভূপতে || ২. ২৮. ৩৯||
ব্রহ্মস্বং নাপহর্ত্তব্যমাপদ্যপি কথঞ্চন |
ব্রহ্মস্বসদৃশং লোকে দুর্জরং নেহ বিদ্যতে || ২. ২৮. ৪০||
বিষং হন্ত্যুপয়োক্তারং লক্ষ্যভূতং তু হৈহয় |
কুলং সমূলং দহতি ব্রহ্মস্বারণিপাবকঃ || ২. ২৮. ৪১||
অনিবার্যমিদং লোকে ব্রহ্মস্বন্দুর্জরং বিষম্ |
পুত্রপৌত্রান্তফলদং বিপাককটু পার্থিব || ২. ২৮. ৪২||
এশ্বর্যমূঢং হি মনঃ প্রভূমমসদাত্মনাম্ |
কিন্নামাসন্ন কুরুতে নেত্রাস দ্বিপ্রলোভিতম্ || ২. ২৮. ৪৩||
বেদান্যস্ত্বামৃতে কোঽন্যো বিনা দানান্নৃপোত্তম |
আদানং চিন্তয়ানো হি বাহ্মণেষ্বভিবাঞ্ছতি || ২. ২৮. ৪৪||
ঈদৃশস্ত্বং মহাবাহো কর্ম সজ্জননিন্দিতম্ |
মা কৃথাস্তদ্ধি লোকেষু যশোহানিকরং তব || ২. ২৮. ৪৫||
বংশে মহতি জাতস্ত্বং বদান্যানাং প্রহীভুজাম্ |
যশাংশি কর্মণানেন সংপ্রতং মাব্যনীবশঃ || ২. ২৮. ৪৬||
অহোঽনুজীবিনঃ কিঞ্চিদ্ভর্তারং ব্যসনার্ণবে |
তৎপ্রসাদসমুন্নদ্ধা মজ্জয়ং ত্যনয়োন্মুখাঃ || ২. ২৮. ৪৭||
শ্রিয়া বিকুর্বন্পুরুষকৃত্যচিন্ত্যে বিচেতনঃ |
তন্মতানুপ্রবৃত্তিশ্চ রাজা সদ্যো বিষীদতি || ২. ২৮. ৪৮||
অজ্ঞাতমুনয়ো মন্ত্রী রাজানমনয়াংবুধৌ |
আত্মনা সহ দুর্বুদ্ধির্লোহনৌরিব মজ্জয়েৎ || ২. ২৮. ৪৯||
তস্মাত্ত্বং রাজশার্দূল মূঢস্য নয়বর্ত্মনি |
মতমস্য সুদুর্বুদ্ধের্নানুবর্ত্তিতুমর্হসি || ২. ২৮. ৫০||
এবং হি বদতস্তস্য স্বামিশ্রেয়স্করং বচঃ |
আক্ষিপ্য মন্ত্রী রাজানমিদং ভূয়ো হ্যভাষত || ২. ২৮. ৫১||
ব্রাহ্মণোঽযং স্বজাতীয়হিতমেব সমীক্ষতে |
মহান্তি রাজকার্যাণি দ্বিজৈর্বেত্তুং ন শক্যতে || ২. ২৮. ৫২||
রাজ্ঞৈব রাজকার্যাণি বেদ্যানি স্বমনীষয়া |
বিনা বৈ ভোজনাদানে কার্যং বিপ্রো ন বিন্দতি || ২. ২৮. ৫৩||
ব্রাহ্মণো নাবমন্তব্যো বন্দনীয়শ্চ নিত্যশঃ |
প্রতিসংগ্রাহয়ণীয়শ্চ নাধিকং সাধিতং ক্বচিৎ || ২. ২৮. ৫৪||
তস্মাৎস্বীকৃত্য তাং ধেনুং প্রয়াহি স্বপুরং নৃপ |
নোচেদ্রাজ্যং পরিত্যজ্য গচ্ছস্বতপসে বনম্ || ২. ২৮. ৫৫||
ক্ষমাবত্ত্বং ব্রাহ্মণানাং দণ্ডঃ ক্ষত্রস্য পার্থিব |
প্রসহ্য হরণে বাপি নাধর্মস্তে ভবিষ্যতি || ২. ২৮. ৫৬||
প্রসহ্য হরণে দোষং যদি সংপশ্যসে নৃপ |
দত্ত্বা মূল্যং গবাশ্বাদ্যমৃষের্থেনুঃ প্রগৃহ্যতাম্ || ২. ২৮. ৫৭||
স্বীকর্তব্যা হি সা ধেনুস্ত্বয়া ৎবং রত্নভাগয়তঃ |
তপোধনানাং হি কুতো রত্নসংগ্রহণাদরঃ || ২. ২৮. ৫৮||
তপোধন বলঃ শান্তঃ প্রীতিমান্স নৃপ ৎবয়ি |
তস্মাত্তে সর্বথা ধেনুং যাচিতঃ সংপ্রদাস্যতি || ২. ২৮. ৫৯||
অথ বা গোহিরণ্যদ্যং যদন্যদভিবাঞ্ছিতম্ |
সংগৃহ্য বিত্তং বিপুলং ধেনুং তাং প্রতিদাস্যতি || ২. ২৮. ৬০||
অনুপেক্ষ্যং মহদ্রত্নং রাজ্ঞা বৈ ভূতিমিচ্ছতা |
ইতি মে বর্ত্ততে বুদ্ধিঃ কথং বা মন্যতে ভবান্ || ২. ২৮. ৬১||
রাজোবাচ |
গৎবা ৎবমেব তং বিপ্রং প্রসাদ্য চ বিশেষতঃ |
দত্ত্বা চাভীপ্সিতং তস্মৈ তাং গামানয় মন্ত্রিক || ২. ২৮. ৬২||
বসিষ্ঠ উবাচ
এবমুক্তস্ততোরাজ্ঞা স মন্ত্রী বিধিচোদিতঃ |
নিবৃত্য প্রয়য়ৌ শীঘ্রং জমদগ্নেরথাশ্রমম্ || ২. ২৮. ৬৩||
গতে তু নৃপতৌ তস্মিন্নকৃতব্রণসংযুতঃ |
সমিদানয়নার্থায় রামোঽপি প্রয়য়ৌ বনম্ || ২. ২৮. ৬৪||
ততঃ স মন্ত্রী সবলঃ সমাসাদ্য তদাশ্রমম্ |
প্রণম্য মুনিশার্দূলমিদং বচনমব্রবীৎ || ২. ২৮. ৬৫||
চন্দ্রগুপ্ত উবাচ
ব্রহ্মন্নৃপতিনাজ্ঞপ্তং রাজা তু ভুবি রত্নভাক্ |
রত্নভূতা চ ধেনুঃ সা ভুবি দোগ্ধ্রীষ্বনুত্তমা || ২. ২৮. ৬৬||
তস্মাদ্রত্নংসুবর্ণং বা মূল্যমুক্ত্বা যথোচিতম্ |
আদায় গোরত্নভূতাং ধেনুং মে দাতুমর্হসি || ২. ২৮. ৬৭||
জমদগ্নিরুবাচ
হোমধেনুরিয়ং মহ্যং ন দাতব্যা হি কস্যচিৎ |
রাজা বদান্যঃ স কথং ব্রহ্মস্বমভিবাঞ্ছতি || ২. ২৮. ৬৮||
মন্ত্র্যুবাচ
রত্নভাক্ত্বংন নৃপতির্দ্ধেনুং তে প্রতিকাঙ্ক্ষতি |
গবায়ুতেন তস্মাত্ত্বং তস্মৈ তাং দাতুমর্হসি || ২. ২৮. ৬৯||
জমদগ্নিরুবাচ
ক্রয়বিক্রয়য়োর্নাহং কর্ত্তা জাতু কথঞ্চন |
হবির্ধানীং চ বৈ তস্মান্নোৎসহে দাতুমঞ্জসা || ২. ২৮. ৭০||
মন্ত্র্যুবাচ
রাজ্যার্ধেনাথ বা ব্রহ্মন্সকলেনাপি ভূভৃতঃ |
দেহি ধেনুমিমামেকাং তত্তে শ্রেয়ো ভবিষ্যতি || ২. ২৮. ৭১||
জমদগ্নিরুবাচ
জীবন্নাহং তু দাস্যামি বাসবস্যাপি দুর্মতে |
গুরুণা যাচিতং কিং তে বচসা নৃপতেঃ পুনঃ || ২. ২৮. ৭২||
মন্ত্র্যুবাচ
ৎবমেব স্বেচ্ছয়া রাজ্ঞে দেহি ধেনুং সুহৃত্তয়া |
যথা বলেন নীতায়াং তস্যাং ৎবং কিং করিষ্যসি || ২. ২৮. ৭৩||
জমদগ্নিরুবাচ
দাতা দ্বিজানাং নৃপতিঃ স যদ্যপ্যাহরিষ্যতি |
বিপ্রোঽহং কিং করিষ্যামি স্বেচ্ছাবিতরণং বিনা || ২. ২৮. ৭৪||
বসিষ্ঠ উবাচ
ইত্যেবমুক্তঃ সংক্রুদ্ধঃ স মন্ত্রী পাপচেতনঃ |
প্রসহ্য নেতুমারেভে মুনেস্তস্য পয়স্বিনীম্ || ২. ২৮. ৭৫||
ইতি শ্রীব্রহ্মাণ্ডে মহাপুরাণে বোয়ুপ্রোক্তে মধ্যভাগে তৃতীয় উপোদ্ধাতপাদেঽষ্টাবিংশতিতমোঽধ্যায়ঃ || ২৮||
বসিষ্ঠ উবাচ
জমদগ্নিস্ততো ভূয়স্তমুবাচ রুষান্বিতঃ |
ব্রহ্মস্বং নাপহর্ত্তব্যং পুরুষেণ বিজানতা || ২. ২৯. ১||
প্রসহ্য গাং মে হরতো পাপমাপ্স্যসি দুর্মতে |
আয়ুর্জানে পরিক্ষীণং ন চেদেতৎকরিষ্যতি || ২. ২৯. ২||
বলাদিচ্ছসি যন্নেতুং তন্ন শক্যং কথঞ্চন |
স্বয়ং বা যদি সায়ুচ্যেদ্বিনশিষ্যতি পার্থিবঃ || ২. ২৯. ৩||
দানং বিনাপহরণং ব্রাহ্মণানাং তপস্বিনাম্ |
শতায়ুষোর্ঽজুনাদন্যঃ কো ন্বিচ্ছতি জিজীবিষুঃ || ২. ২৯. ৪||
ইত্যুক্তস্তেন সংক্রুদ্ধঃ স মন্ত্রীকালচোদিতঃ |
বদ্ধ্বা তাং গাং দৃঢৈঃ পাশৈর্বিচকর্ষ বলান্বিতঃ || ২. ২৯. ৫||
জমদগ্নিরথ ক্রোধাদ্ভাবিকর্মপ্রচোদিতঃ |
রুরোধ তং যথাশক্তি বিকর্ষন্তং পায়স্বিনীম্ || ২. ২৯. ৬||
জীবন্ন প্রতিমোক্ষ্যামি গামেনামিত্যমর্ষিতঃ |
জগ্রাহ সুদৃঢং কণ্ঠে বাহুভ্যাং তাং মহামুনিঃ || ২. ২৯. ৭||
ততঃ ক্রোধপরীতাত্মা চন্দ্রগুপ্তোঽতিনির্ঘৃণঃ |
উৎসারয়ধ্বমিত্যেনমাদিদেশ স্বসৈনিকান্ || ২. ২৯. ৮||
অপ্রধৃষ্যতমং লোকে তমৃষিং রাজকিঙ্করাঃ |
ভর্ত্রাজ্ঞয়া প্রসহ্যৈনং পরিবব্রুঃ সমন্ততঃ || ২. ২৯. ৯||
দণ্ডৈঃ কশাভির্লকুডৈর্বিনিঘ্নন্তশ্চ মুষ্টিভিঃ |
তে সমুৎসারয়ন্ ধেনোঃ সুদূরতরমন্তিকাৎ || ২. ২৯. ১০||
স তথা হন্যমোনোঽপি ব্যথিতঃক্ষময়ান্বিতঃ |
ন চুক্রোধাক্রোধনৎবং সতো হি পরমং ধনম্ || ২. ২৯. ১১||
স চ শক্তঃ স্বতপসা সংহর্ত্তুমপি রক্ষিতুম্ |
জগৎসর্বং ক্ষয়ং তস্য চিন্তয়ন্ন প্রচুক্রুধে || ২. ২৯. ১২||
সপূর্বং ক্রোধনোঽত্যর্থং মাতুরর্থে প্রসাদিতঃ |
রামেণাভূত্ততো নিত্যং শান্ত এব মহাতপাঃ || ২. ২৯. ১৩||
স হন্যমানঃ সুভৃশং চূর্ণিতাঙ্গাস্থিবন্ধনঃ |
নিপপাত মহাতেজা ধরণ্যাং গতচেতনঃ || ২. ২৯. ১৪||
তস্মিন্মুনৌ নিপতিতে স দুরাত্মা বিশঙ্কিতঃ |
কিঙ্করানাদিশচ্ছীঘ্রং ধেনোরানয়নে বলাৎ || ২. ২৯. ১৫||
ততঃ সবৎসাং তা ধেনুং বদ্ধ্বা পাশৈর্দৃঢৈর্নৃপঃ |
কশাভিরভিহন্যন্ত চকৃষুশ্চ নিনীষয়া || ২. ২৯. ১৬||
আকৃষ্যমাণা বহুভিঃ কশাভির্লগুডৈরপি |
হন্যমানা ভৃশং তৈশ্চ চুক্রুধে চ পয়স্বিনী || ২. ২৯. ১৭||
ব্যথিতাতিকশাপাতৈঃ ক্রোধেন মহাতান্বিতা |
আকৃষ্য পাশান্ সুদৃঢান্ কৃৎবাত্মানমমোচয়ৎ || ২. ২৯. ১৮||
বিমুক্তপাশবন্ধাসা সর্বতোঽভিবৃতা বলৈঃ |
হুংহারবং প্রকুর্বাণা সর্বতোঽহ্যপতদ্রুষা || ২. ২৯. ১৯||
বিষাণখুরপুচ্ছাগ্রৈরভিহত্য সমন্ততঃ |
রাজমন্ত্রিবলং সর্বং ব্যদ্রাবয়দমর্ষিতা || ২. ২৯. ২০||
বিদ্রাব্য কিঙ্করান্সর্বাংস্তরসৈব পয়স্বিনী |
পশ্যতাং সর্বভূতানাং গগনং প্রত্যপদ্যত || ২. ২৯. ২১||
ততস্তে ভগ্নসংকল্পাঃ সংভগ্নক্ষতবিগ্রহাঃ |
প্রসহ্য বদ্ধ্বা তদ্বৎসং জগ্মুরেবাতিনির্ঘৃণাঃ || ২. ২৯. ২২||
পয়স্বিনীং বিনা বৎসং গৃহীৎবা কিঙ্করৈঃ সহ |
স পাপস্তরসা রাজ্ঞঃ সন্নিধিং সমুপাগমৎ || ২. ২৯. ২৩||
গৎবা সমীপং নৃপতেঃ প্রণম্যাস্মৈ প্রশংসকৃৎ |
তদ্ব্রত্তান্তমশেষেণ ব্যাচচক্ষে সসাধ্বসঃ || ২. ২৯. ২৪||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যমভাগে তৃতীয় উপোদ্ধাতপাদের্ঽজুনোপাখ্যানে একোনত্রিংশত্তমোঽধ্যায়ঃ || ২৯||
বাসিষ্ঠ উবাচ
শ্রুস্বৈতৎসকলং রাজা জমদগ্নিবধাদিকম্ |
উদ্বিগ্নচেতাঃ সুভৃশং চিন্তয়ামাস নৈকধা || ২. ৩০. ১||
অহো মে সুনৃসংসস্য লোকয়োরুভয়োরপি |
ব্রহ্মস্বহরণে বাঞ্ছা তদ্ধত্যা চাতিগর্হিতা || ২. ৩০. ২||
অহো নাশ্রৌষমস্যাহং ব্রাহ্মণস্য বিজানতঃ |
বচনং তর্হি তাং জহ্যাং বিমূঢাত্মা গতত্রপঃ || ২. ৩০. ৩||
ইতি সংচিতয়ন্নংব হৃদয়েন বিদূয়তা |
স্বপুরং প্রতিচক্রাম সবলঃ সানুগস্ততঃ || ২. ৩০. ৪||
পুরীং প্রতিগতে রাজ্ঞি তস্মিন্সপরিবারকে |
আশ্রমাৎসহসা রাজন্বিনিশ্চক্রাম রেণুকা || ২. ৩০. ৫||
অথ সক্ষতসর্বাঙ্গং রুধিরেণ পরিপ্লুতম্ |
নিশ্চেষ্টং পরিতং ভূমৌ দদর্শ পতিমাত্মনঃ || ২. ৩০. ৬||
ততঃ সা বিহতং মৎবা ভর্ত্তারং গতচেতনম্ |
অন্বাহতেবাশনিনা মূর্ছিতান্যপতদ্ভুবি || ২. ৩০. ৭||
চিরাদিব পুনর্ভূমেরুত্থায়াতীব দুঃখিতা |
পতিৎবোত্থায় সা ভূয়ঃ সুস্বরং প্ররুরোদ হ || ২. ৩০. ৮||
বিললাপ চ সাত্যর্থং ধরণীধূলিধূসরা |
অশ্রুপূর্মমুখী দীনা পতিতা শোকসাগরে || ২. ৩০. ৯||
হা নাথ পিয় ধর্মজ্ঞ দাক্ষিণ্যামৃতসাগর |
হা ধিগত্যন্তশান্ত ৎবং নৈব কাঙ্ক্ষেত চেদৃশম্ || ২. ৩০. ১০||
আশ্রমাদভিনিষ্ক্রান্তঃ সহসা ব্যসানর্ণবে |
ক্ষিপ্ত্বানাথামগাধে মাং ক্ব চ যাতোঽসি মানদ || ২. ৩০. ১১||
সতাং সাপ্তপদে মৈত্রে মুষিতাহং ৎবয়া সহ |
যাসি যত্র ৎবমেকাকী তত্র মাং নেতুমর্হসি || ২. ৩০. ১২||
দৃষ্ট্বা ৎবামীদৃশাবস্থমচিরাদ্ধৃদয়ং মম |
ন দীর্যতে মহাভাগ কঠিনাঃ খলু যোষিতঃ || ২. ৩০. ১৩||
ইত্যেবং বিলপন্তী সা রুদতী চ মুহুর্মুহুঃ |
চুক্রোশ রামরামেতি ভৃশং দুঃখপরিপ্লুতা || ২. ৩০. ১৪||
তাবদ্রামোঽপি স বনাৎসমিদ্ভারসমন্বিতঃ |
অকৃতব্রণসংযুক্তঃ স্বাশ্রমায় ন্যবর্ত্তত || ২. ৩০. ১৫||
অপশ্যদ্ভয়শংসীনি নিমিত্তানি বহূনি সঃ |
পশ্যন্নুদ্বিগ্নহৃদয়স্তূর্ণং প্রাপাশ্রমং বিভুঃ || ২. ৩০. ১৬||
তমায়ান্তমভিপ্রেক্ষ্য রুদতী সা ভৃশাতুরা |
নবিভূতেব শোকেন প্রারুদদ্রেণুকা পুনঃ || ২. ৩০. ১৭||
রামস্য পুরতো রাজন্ভর্তৃব্যসনপীডিতা |
উভাভ্যামপি হস্তাভ্যামুদরং সমতাডয়ৎ || ২. ৩০. ১৮||
মার্গে বিদিতবৃত্তান্তঃ সম্যগ্রামোঽপি মাতরম্ |
কুররীমিব শোকার্ত্তা দৃষ্ট্বা দুঃখমুপেয়িবান্ || ২. ৩০. ১৯||
ধৈর্যমারোপ্য মেধাবী দুঃশশোকপরিপ্লুতঃ |
নেত্রাভ্যামশ্রুপূর্ণাভ্যাং তস্থৌ ভূমাবর্ধোমুখঃ || ২. ৩০. ২০||
তং তথাগতমালোক্য রামং প্রাহাকৃতব্রণঃ |
কিমিদং ভৃগুশার্দূল নৈতৎবয়্যুপপাদ্যতে || ২. ৩০. ২১||
ন ৎবাদৃশা মহাভাগ ভৃশং শোচন্তি কুত্রচিৎ |
ধৃতিমন্তো মহান্তস্তু দুঃখং কুর্বতি ন ব্যয়ে || ২. ৩০. ২২||
শোকঃ সর্বেন্দ্রিয়াণাং হি পরিশোষপ্রদায়কঃ |
ত্যজ শোকং মহাবাহো ন তৎপাত্রং ভবদৃশাঃ || ২. ৩০. ২৩||
এহিকামুষ্মিকার্থানাং নূনমেকান্তরোধকঃ |
শোকস্তস্যাবকাশং ৎবং কথং ৎদৃদি নিয়চ্ছসি || ২. ৩০. ২৪||
তত্ত্বং ধৈর্যধনো ভূৎবা পরিসাংৎবয় মাতরম্ |
রুদতীং বত বৈধব্যশং কাপহতচেতনাম্ || ২. ৩০. ২৫||
নৈবাগমনমস্তীহ ব্যতিক্রান্তস্য বস্তুনঃ |
তস্মাদতীতমখিলং ত্যক্ত্বা কৃত্যং বিচিন্তয় || ২. ৩০. ২৬||
ইত্যেবং সাংৎবমানশ্চ তেন দুঃশসমন্বিতঃ |
রামঃ সংস্তংভয়ামাস শনৈরাত্মানমাত্মনা || ২. ৩০. ২৭||
দুঃখশোকপরীতা হি রেণুকা ৎবরুদন্মুহঃ |
ত্রিঃসপ্তকৃৎবো হস্তাভ্যামুদরং সমতাডয়ৎ || ২. ৩০. ২৮||
তাবত্তদন্তিকং রামঃ সমভ্যেত্যাশ্রুলোচনঃ |
রুদতীমলমংবেতি সাংৎবয়ামাস মাতরম্ || ২. ৩০. ২৯||
উবাচাপনয়ন্দুঃখাদ্ভর্তৃশোকপরায়ণাম্ |
ত্রিঃসপ্তকৃৎবো যদিদং ৎবয়া বক্ষঃ সমাহতম্ || ২. ৩০. ৩০||
তাবতসংখ্যমহং তস্মাৎক্ষত্ত্রজারমশেষতঃ |
হনিষ্যে ভুবি সর্বত্র সত্যমেতদ্ব্রবিমি তে || ২. ৩০. ৩১||
তস্মাত্ত্বং শোকমুৎসৃজ্য ধৈর্যমাতিষ্ট সাংপ্রতম্ |
নাস্ত্যেব নূনমায়াতমতিক্রান্তস্য বস্তুনঃ || ২. ৩০. ৩২||
ইত্যুক্তা রেণুকা তেন ভৃশং দুঃখান্বিতাপি সা |
কৃচ্ছ্রাদ্ধৈর্যং সমালংব্য তথেতি প্রত্যভাষত || ২. ৩০. ৩৩||
ততো রামো মহাবাহুঃ পিতুঃ সহ সহোদরৈঃ |
অগ্নৌ সৎকর্ত্তুমারেভে দেহং রাজন্যথবিধি || ২. ৩০. ৩৪||
ভর্তৃশোকপরিতাঙ্গী রেণুকাপি দৃঢব্রতা |
পুত্রান্সর্বান্সমাহূয় ৎবিদং বচনমব্রবীৎ || ২. ৩০. ৩৫||
রেণুকোবাচ |
অহং বপিতরং পুত্রাঃ স্বর্গতং পুণ্যশীলিনম্ |
অনুগন্তুমিহেচ্ছামি তন্মেঽনুজ্ঞাতুমর্হথ || ২. ৩০. ৩৬||
অসহ্যদুঃশং বৈধব্যং সহমানা কথং পুনঃ |
ভর্ত্রা বিরহিতা তেন প্রবর্ত্তিষ্যে বিনিন্দিতা || ২. ৩০. ৩৭||
তস্মাদনুগমিষ্যামি ভর্ত্তারং দয়িতং মম |
যথা তেন প্রবর্ত্তিষ্যে পরত্রাপি সহানিশম্ || ২. ৩০. ৩৮||
জ্বলন্তমিমমেবাগ্নিং সংপ্রবিশ্য চিরাদিব |
ভর্তুর্মম ভবিষ্যামি পিতৃলোকপ্রিয়াতিথিঃ || ২. ৩০. ৩৯||
অনুবাদমৃতে পুত্রা ভবদ্ভিস্তত্র কর্মণি |
প্রতিভূয় ন বক্তব্যং যদি মৎপ্রিয়মিচ্ছথ || ২. ৩০. ৪০||
ইত্যেবমুক্ত্বা বচনং রেণুকা দৃঢনিশ্চয়া |
অগ্নিং প্রবিশ্য ভর্ত্তারমনুগন্তুং মনোদধে || ২. ৩০. ৪১||
এতস্মিন্নেব কালে তু রেণুকাং তনয়ৈঃ সহ |
সমাভাষ্যাতিগংভীরা বাগুবাচাশরীরীণী || ২. ৩০. ৪২||
হে রেণুকে স্বতনয়ৈর্গিরং মেঽবহিতা শৃণু |
মা কার্ষীঃ সাহসং ভদ্রে প্রবক্ষ্যামি প্রিয়ং তব || ২. ৩০. ৪৩||
সাহসো নৈব কর্ত্তব্যঃ কেনাপ্যাত্মহিতৈষিণা |
ন মর্ত্তব্যন্ত্বয়া সর্বো জীবন্ভদ্রাণি পশ্যতি || ২. ৩০. ৪৪||
তস্মাদ্ধৈর্যধনা ভূৎবা ভব ৎবং কালকাঙ্ক্ষিণী |
নিমিত্তমন্তরীকৃত্য কিঞ্চিদেব শুচিস্মিতে || ২. ৩০. ৪৫||
অচিরেণৈব ভর্ত্তা তে ভবিষ্যতি সচেতনঃ |
উৎপন্নজীবিতেন ৎবং কামং প্রাপ্স্যসি শোভনে |
ভবিত্রী চিররাত্রায় বহুকল্যাণ ভাজনম্ || ২. ৩০. ৪৬||
বসিষ্ঠ উবাচ
ইতি তদ্বচনং শ্রুৎবা ধৃতিমালংব্য রেণুকা |
তদ্বাক্যগৌরবাদ্ধর্ষমবাপুস্তনয়াশ্চ তে || ২. ৩০. ৪৭||
ততোনীৎবা পিতুর্দেহমাশ্রমাভ্যন্তরং মুনেঃ |
শায়য়িৎবা নিবাতে তু পরিতঃ সমুপাবিশন্ || ২. ৩০. ৪৮||
তেষাং তত্রোপবিষ্টানামপ্রহৃষ্টাত্মচেতসাম্ |
নিমত্তানি শুভান্যাসন্ননেকানি মহান্তি চ || ২. ৩০. ৪৯||
তেন তে কিঞ্চিদাশ্বস্তচেতসো মুনিপুঙ্গবাঃ |
নিষেদুঃ সহিতা মাত্রা কাঙ্ক্ষন্তো জীবিতং পিতুঃ || ২. ৩০. ৫০||
এতস্মিন্নন্তরে রাজন্ভৃগুবংশধরো মুনিঃ |
বিধের্বলেন মতিমাংস্তত্রাগচ্ছদ্যদৃচ্ছয়া || ২. ৩০. ৫১||
অথর্বণাং বিধিঃ সা ক্ষাদ্বেদবেদাঙ্গপারগঃ |
সর্বশাস্ত্রার্থবিৎপ্রাজ্ঞঃ সকলাসুরবন্দিতঃ || ২. ৩০. ৫২||
মৃতসংজীবিনীং বিদ্যাং যো বেদ মুনিদুর্লভাম্ |
যথাহতান্মৃতান্দেবৈরুত্থাপয়তি দানবান্ || ২. ৩০. ৫৩||
শাস্ত্রমোশনসং যেন রাজ্ঞাং রাজ্যফলপ্রদম্ |
প্রণীতমনুজীবন্তি সর্বেঽদ্যাপীহ পার্থিবাঃ || ২. ৩০. ৫৪||
স তদাশ্রমমাসাদ্য প্রবিষ্টোঽন্তর্মহামুনিঃ |
দদর্শ তদবস্থাংস্তান্সর্বান্দুঃখপরিপ্লুতান্ || ২. ৩০. ৫৫||
অথ তে তু ভৃগুং দৃষ্ট্বা বংশম্য পিতরং মুদা |
উত্থায়াস্মৈ দদুশ্চাপি সৎকৃত্য পরমাসনম্ || ২. ৩০. ৫৬||
স চাশীর্ভিস্তু তান্সর্বানভিনন্দ্য মহামুনিঃ |
পপ্রচ্ছ কিমিদং বৃত্তং তৎসর্বং তে ন্যবেদয়ন্ || ২. ৩০. ৫৭||
তচ্ছ্রুৎবা স ভৃগুঃ শীঘ্রং জলমাদায় মন্ত্রবিৎ |
সংজীবিন্যা বিনয়া তং সিষেচ প্রোচ্চরন্নিদম্ || ২. ৩০. ৫৮||
যজ্ঞস্য তপসো বীয় মমাপি শুভমস্তি চেৎ |
তেনাসৌ জীবতাচ্ছীঘ্রং প্রসুপ্ত ইবচোত্থিতঃ || ২. ৩০. ৫৯||
এবমুক্তে শুভে বাক্যে ভৃগুণা সাধুকারিণা |
সমুত্তস্থাবথার্চীকঃ সাক্ষাদ্গ্ররুরিবাপরঃ || ২. ৩০. ৬০||
দৃষ্ট্বা তত্র স্থিতং বন্দ্যং ভৃগুং স্বস্য পিতামহম্ |
ননাম ভক্ত্যা নৃপতে কৃতাঞ্জলিরুবাচ হ || ২. ৩০. ৬১||
জমদগ্নিরুবাচ
ধন্যোঽহং কৃতকৃত্যোঽহং সফলং জীবিতং চ মে || ২. ৩০. ৬২||
যৎপশ্যে চরণৌ তেঽদ্য সুরাসুরনমস্কৃতৌ |
ভগবন্কিং করোম্যদ্য শুশ্রূষাং তব মানদ || ২. ৩০. ৬৩||
পুনীহ্যাত্মকুলং স্বস্য চরণাংবুকণৈর্বিভো |
ইত্যুক্ত্বা সহসাঽনীতং রামেণার্ধ্যং মুদান্বিতঃ || ২. ৩০. ৬৪||
প্রদদৌ পাদয়োস্তস্য ভক্ত্যান মিতকন্ধরঃ |
তজ্জলং শিরসাধত্ত সকুটুংবো মহামনাঃ || ২. ৩০. ৬৫||
অথ সৎকৃত্য স ভৃগুং পপ্রচ্ছ বিনয়ান্বিতঃ |
ভগবন্ কিং কৃতং তেন রাজ্ঞা দুষ্টেন পাতকম্ || ২. ৩০. ৬৬||
যস্যাতিথ্যং হি কৃতবানহং সম্যগ্বিধানতঃ |
সাধুবুদ্ধ্যাস দুষ্টাত্মা কিং চকার মহামতে || ২. ৩০. ৬৭||
বসিষ্ঠ উবাচ
এবং স পৃষ্টো মতিমান্ভৃগুঃ সর্ববিদীশ্বরঃ |
চিরং ধ্যাৎবা সমালোচ্য কারণং প্রাহ ভূপতে || ২. ৩০. ৬৮||
ভৃগুরুবাচ
শৃণু তাত মহাভাগ বীজমস্য হি কর্মণঃ |
যশ্চ বৈ কৃতবান্পাপং সর্বজ্ঞস্য তবানঘ || ২. ৩০. ৬৯||
শপ্তঃ পুরা বসিষ্ঠেন নাশার্থং স মহীপতিঃ |
দ্বিজাপরাধতো মূঢ বীর্যং তে বিনশিষ্যতে || ২. ৩০. ৭০||
তৎকথং বচনং তস্য ভবিষ্যত্যন্যথা মুনেঃ |
অয়ং রামো মহাবীর্যং প্রসহ্যনৃপপুঙ্গবম্ || ২. ৩০. ৭১||
হনিষ্যতি মহাবাহো প্রতিজ্ঞাং কৃতবান্পুরা |
যস্মাদুরঃ প্রতিহতং ৎবয়া মাতর্মমাগ্রতঃ || ২. ৩০. ৭২||
একবিংশতিবারং হি ভৃশং দুঃখপরীতয়া |
ত্রিঃ সপ্তকৃৎবো নিঃক্ষত্রাং করিষ্যে পৃথিবীমিমাম্ || ২. ৩০. ৭৩||
অতোঽযং বার্যমাণোঽপি ৎবায়া পিত্রা নিরন্তরম্ |
ভাবিনোর্ঽথস্য চ বলাৎকরিষ্যত্যেব মানদ || ২. ৩০. ৭৪||
স তু রাজা মহাভাগো বৃদ্ধানাং পর্যুপাসিতা |
দত্তাত্রেয়াদ্ধরেরংশাল্লব্ধবোধো মহামতিঃ || ২. ৩০. ৭৫||
সাক্ষাদ্ভক্তো মহাত্মা চ তদ্বধে পাতকং ভবেৎ |
এবমুক্ত্বা মহারাজ স ভৃগুর্ব্রহ্মণঃ সুতঃ |
যথাগতং যয়ৌ বিদ্বান্ভবিষ্যৎকালপর্যয়াৎ || ২. ৩০. ৭৬||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যাভাগে তৃতীয় উপোদ্ধাতপাদে ভার্গবচরিতে ত্রিংশত্তমোঽধ্যায়ঃ || ৩০||
