নাট্যশাস্ত্রম্ অধ্যায ০৫ – ২

তস্য ভাণ্ডসমঃ কার্যস্তজ্জ্ঞৈর্গতিপরিক্রমঃ .
ন তত্র গানং কর্তব্যং তত্র স্তোভক্রিযা ভবেত্ .. ১০১..
চতুর্থকারঃ পূজাং তু স কৃত্বান্তর্হিতো ভবেত্ .
ততো গেযাবকৃষ্টা তু চতুরশ্রা স্থিতা ধ্রুবা .. ১০২..
গুরুপ্রাযা তু সা কার্যা তথা চৈবাবপাণিকা .
স্থাযিবর্ণাশ্রযোপেতা কলাষ্টকবিনির্মিতা .. ১০৩..
[চতুর্থং পঞ্চমং চৈব সপ্তমং চাষ্টমং তথা .
লঘূনি পাদে পঙ্ক্ত্যান্তু সাবকৃষ্টা ধ্রুবা স্মৃতা .. ]
সূত্রধারঃ পঠেত্তত্র মধ্যমং স্বরমাশ্রিতঃ .
নান্দীং পদৈর্দ্বাদশভিরষ্টভির্বাঽপ্যলঙ্কৃতাম্ .. ১০৪..
নমোঽস্তু সর্বদেবেভ্যো দ্বিজাতিভ্যঃ শুভং তথা .
জিতং সোমেন বৈ রাজ্ঞা শিবং গোব্রাহ্মণায চ .. ১০৫..
ব্রহ্মোত্তরং তথৈবাস্তু হতা ব্রহ্মদ্বিষস্তথা .
প্রশাস্ত্বিমাং মহারাজঃ পৃথিবীং চ সসাগরাম্ .. ১০৬..
রাষ্ট্রং প্রবর্ধতাং চৈব রঙ্গস্যাশা সমৃদ্ধ্যতু .
প্রেক্ষাকর্তুর্মহান্ধর্মো ভবতু ব্রহ্মভাষিতঃ .. ১০৭..
কাব্যকর্তুর্যশশ্চাস্তু ধর্মশ্চাপি প্রবর্ধতাম্ .
ইজ্যযা চানযা নিত্যং প্রীযন্তাং দেবতা ইতি .. ১০৮..
নান্দীপদান্তরেষ্বেষু হ্যেবমার্যেতি নিত্যশঃ .
বদেতাং সম্যগুক্তাভির্বাগ্ভিস্তৌ পারিপার্শ্বিকৌ .. ১০৯..
এবং নান্দী বিধাতব্যা যথাবল্লক্ষণান্বিতা .
ততশ্শুষ্কাবকৃষ্টা স্যাজ্জর্জরশ্লোকদর্শিকা .. ১১০..
নবং গুর্বাক্ষরাণ্যাদৌ ষড্লঘূনি গুরুত্রযম্ .
শুষ্কাবকৃষ্টা তু ভবেত্কলা হ্যষ্টৌ প্রমাণতঃ .. ১১১..
যথা –
দিগ্লে দিগ্লে দিগ্লে দিগ্লে জম্বুকপলিতকতে তেচাম্ .
কৃত্বা শুষ্কাবকৃষ্টাং তু যথাবদ্দ্বিজসত্তমাঃ .. ১১২..
ততঃ শ্লোকং পঠেদেকং গম্ভীরস্বরসংযুতম্ .
দেবস্তোত্রং পুরস্কৃত্য যস্য পূজা প্রবর্ততে .. ১১৩..
রাজ্ঞো বা যত্র ভক্তিঃ স্যাদথ বা ব্রহ্মণস্স্তবম্ .
গদিত্বা জর্জরশ্লোকং রঙ্গদ্বারে চ যত্স্মৃতম্ .. ১১৪..
পঠেদন্যং পুনঃ শ্লোকং জর্জরস্য বিনাশনম্ .
জর্জরং নমযিত্বা তু ততশ্চারীং প্রযোজযেত্ .. ১১৫..
পারিপার্শ্বিকযোশ্চ স্যাত্পশ্চিমেনাপসর্পণম্ .
অঙ্কিতা চাত্র কর্তব্যা ধ্রুবা মধ্যলযান্বিতা .. ১১৬..
চতুর্ভিঃ সন্নিপাতৈশ্চ চতুরশ্রা প্রমাণতঃ .
আদ্যমন্ত্যং চতুর্থং চ পঞ্চমং চ তথা গুরু .. ১১৭..
যস্যাং হ্রস্বানি শেষাণি সা জ্ঞেযা ত্বঙ্কিতা বুধৈঃ .
অস্যাঃ প্রযোগং বক্ষ্যামি যথা পূর্বং মহেশ্বরঃ .. ১১৮..
সহোমযা ক্রীডিতবান্নানাভাববিচেষ্টতৈঃ .
কৃত্বাঽবহিত্থং স্থানং তু বামং চাধোমুখং ভুজম্ .. ১১৯..
চতুরশ্রমুরঃ কার্যমঞ্চিতশ্চাপি মস্তকঃ .
নাভিপ্রদেশে বিন্যস্য জর্জরং চ তুলাধৃতম্ .. ১২০..
বামপল্লবহস্তেন পাদৈস্তালান্তরোত্থিতৈঃ .
গচ্ছেত্পঞ্চপদীং চৈব সবিলাসাঙ্গচেষ্টিতৈঃ .. ১২১..
বামবেধস্তু কর্তব্যো বিক্ষেপো দক্ষিণস্য চ .
শৃঙ্গাররসসংযুক্তাং পঠেদার্যাং বিচক্ষণঃ .. ১২২..
চারীশ্লোকং গদিত্বা তু কৃত্বা চ পরিবর্তনম্ .
তৈরেব চ পদঃ কার্যং পশ্চিমেনাপসর্পণম্ .. ১২৩..
পারিপার্শ্বিকহস্তে তু ন্যস্য জর্জরমুত্তমম্ .
মহাচারীং ততশ্চৈব প্রযুঞ্জীত যথাবিধি .. ১২৪..
চতুরশ্রা ধ্রুবা তত্র তথা দ্রুতলযান্বিতা .
চতুর্ভিস্সন্নিপাতৈশ্চ কলা হ্যষ্টৌ প্রমাণতঃ .. ১২৫..
আদ্যং চতুর্থমন্ত্যং চ সপ্তমং দশমং গুরু .
লঘু শেষং ধ্রুবাপাদে চতুর্বিংশতিকে ভবেত্ .. ১২৬..
(যথা-)
পাদতলাহতিপাতিতশৈলং
ক্ষোভিতভূতসমগ্রসমুদ্রম্ .
তাণ্ডবনৃত্যমিদং প্রলযান্তে
পাতু জগত্সুখদাযি হরস্য .. ১২৭..
ভাণ্ডোন্মুখেন কর্তব্যং পাদবিক্ষেপণং ততঃ .
সূচীং কৃত্বা পুনঃ কুর্যাদ্বিক্ষেপপরিবর্তনম্ .. ১২৮..
অতিক্রান্তৈঃ সললিতৈঃ পাদৈর্দ্রুতলযান্বিতৈঃ .
ত্রিতালান্তরমুত্ক্ষেপৈর্গচ্ছেত্পঞ্চপদীং ততঃ .. ১২৯..
তত্রাপি বামবেধস্তু বিক্ষেপো দক্ষিণস্য চ .
তৈরেব চ পদৈঃ কার্যং প্রাঙ্মুখেনাপসর্পণম্ .. ১৩০..
পুনঃ পদানি ত্রীণ্যেব গচ্ছেত্প্রাঙ্মুখ এব তু .
ততশ্চ বামবেধঃ স্যাদ্বিক্ষেপো দক্ষিণস্য চ .. ১৩১..
ততো রৌদ্ররসং শ্লোকং পাদসংহরণং পঠেত্ .
তস্যান্তে তু ত্রিপদ্যাথ ব্যাহরেত্পারিপার্শ্বিকৌ .. ১৩২..
তযোরাগমনে কার্যং গানং নর্কুটকং বুধৈঃ .
তথা চ ভারতীভেদে ত্রিগতং সম্প্রযোজযেত্ .. ১৩৩..
বিদূষকস্ত্বেকপদাং সুত্রধারস্মিতাবহাম্ .
অসম্বদ্ধকথাপ্রাযাং কুর্যাত্কথনিকা ততঃ .. ১৩৪..
(বিতণ্ডাং গণ্ডসংযুক্তাং তালিকাঞ্চ প্রযোজযেত্ .
কস্তিষ্ঠতি জিতং কেনেত্যাদিকাব্যপ্ররূপিণীম্ ..
পারিপার্শ্বকসঞ্জল্পো বিদূষকবিরূপিতঃ .
স্থাপিতঃ সূত্রধারেণ ত্রিগতং সম্প্রযুজ্যতে ..)
প্ররোচনা চ কর্তব্যা সিদ্ধেনোপনিমত্রণম্ .
রঙ্গসিদ্ধৌ পুনঃ কার্যং কাব্যবস্তুনিরূপণম্ .. ১৩৫..
সর্বমেব বিধিং কৃত্বা সূচীবেধকৃতৈরথ .
পাদৈরনাবিদ্ধগতৈর্নিষ্ক্রামেযুঃ সমং ত্রযঃ .. ১৩৬..
এবমেষ প্রযোক্তব্যঃ পূর্বরঙ্গো যথাবিধি .
চতুরশ্রো দ্বিজশ্রেষ্ঠাস্ত্র্যশ্রং চাপি নিবোধত .. ১৩৭..
অযমেব প্রযোগঃ স্যাদঙ্গান্যেতানি চৈব হি .
তালপ্রমাণং সংক্ষিপ্তং কেবলং তু বিশেষকৃত্ .. ১৩৮..
শম্যা তু দ্বিকলা কার্যা তালো হ্যেককলস্তথা .
পুনশ্চৈককলা শম্যা সন্নিপাতঃ কলাদ্বযম্ .. ১৩৯..
অনেন হি প্রমাণেন কলাতাললযান্বিতঃ .
কর্তব্যঃ পূর্বরঙ্গস্তু ত্র্যশ্রোঽপ্যুত্থাপনাদিকঃ .. ১৪০..
আদ্যং চতুর্থং দশমমষ্টমং নৈধনং গুরু .
যস্যাস্তু জাগতে পাদে সা ত্র্যশ্রোত্থাপিনী ধ্রুবা .. ১৪১..
বাদ্যং গতিপ্রচারশ্চ ধ্রুবা তালস্তথৈব চ .
সংক্ষিপ্তান্যেব কার্যাণি ত্র্যশ্রে নৃত্তপ্রবেদিভিঃ .. ১৪২..
বাদ্যগীতপ্রমাণেন কুর্যাদঙ্গবিচেষ্টিতম্ .
বিস্তীর্ণমথ সংক্ষিপ্তং দ্বিপ্রমাণবিনির্মিতম্ .. ১৪৩..
হস্তপাদপ্রচারস্তু দ্বিকলঃ পরিকীর্তিতঃ .
চতুরশ্রে পরিক্রান্তে পাতাঃ স্যুঃ ষোডশৈব তু .. ১৪৪..
ত্র্যশ্রে দ্বাদশ পাতাস্তু ভবন্তি করপাদযোঃ .
এতত্প্রমাণং বিজ্ঞেযমুভযোঃ পূর্বরঙ্গযোঃ .. ১৪৫..
কেবলং পরিবর্তে তু গমনে ত্রিপদী ভবেত্ .
দিগ্বন্দনে পঞ্চপদী চতুরশ্রে বিধীযতে .. ১৪৬..
আচার্যবুদ্ধ্যা কর্তব্যস্ত্র্যশ্রস্তালপ্রমাণতঃ .
তস্মান্ন লক্ষণং প্রোক্তং পুনরুক্তং ভবেদ্যতঃ .. ১৪৭..
এবমেষ প্রযোক্তব্যঃ পূর্বরঙ্গো দ্বিজোত্তমাঃ .
ত্র্যশ্রশ্চ চতুরশ্রশ্চ শুদ্ধো ভারত্যুপাশ্রযঃ .. ১৪৮..
এবং তাবদযং শুদ্ধঃ পূর্বরঙ্গো মযোদিতঃ .
চিত্রত্বমস্য বক্ষ্যামি যথাকার্যং প্রযোক্তৃভিঃ .. ১৪৯..
বৃত্তে হ্যুত্থাপনে বিপ্রাঃ কৃতে চ পরিবর্তনে .
চতুর্থকারদত্তাভিঃ সুমনোভিরলঙ্কৃতে .. ১৫০..
উদাত্তৈর্গানৈর্গন্ধর্বৈঃ পরিগীতে প্রমাণতঃ .
দেবদুন্দুভযশ্চৈব নিনদৈযুর্ভৃশং যতঃ .. ১৫১..
সিদ্ধাঃ কুসুমমালাভির্বিকিরেযুঃ সমন্ততঃ .
অঙ্গহারৈশ্চ দেব্যস্তা উপনৃত্যেযুরগ্রতঃ .. ১৫২..
যস্তাণ্ডববিধিঃ প্রোক্তো নৃতে পিণ্ডীসমন্বিতঃ .
রেচকৈরঙ্গহারৈশ্চ ন্যাসোপন্যাসসংযুতঃ .. ১৫৩..
নান্দীপদানাং মধ্যে তু একৈকস্মিন্পৃথক্পৃথক্ .
প্রযোক্তব্যো বুধৈঃ সম্যক্চিত্রভাবমভীপ্সুভিঃ .. ১৫৪..
এবং কৃত্বা যথান্যাযং শুদ্ধং চিত্রং প্রযত্নতঃ .
ততঃপরং প্রযুঞ্জীত নাটকং লক্ষণান্বিতম্ .. ১৫৫..
ততস্ত্বন্তর্হিতাঃ সর্বা ভবেযুর্দিব্যযোষিতঃ .
নিষ্ক্রান্তাসু চ সর্বাসু নর্তকীষু ততঃ পরম্ .. ১৫৬..
পূর্বরঙ্গে প্রযোক্তব্যমঙ্গজাতমতঃপরম্ .
এবং শুদ্ধো ভবেচ্চিত্রঃ পূর্বরঙ্গো বিধানতঃ .. ১৫৭..
কার্যো নাতিপ্রসঙ্গোঽত্র নৃতাগীতবিধিং প্রতি .
গীতে বাদ্যে চ নৃত্তে চ প্রবৃত্তেঽতিপ্রসঙ্গতঃ .. ১৫৮..
খেদো ভবেত্প্রযোক্তৄণাং প্রেক্ষকাণাং তথৈব চ .
খিন্নানাং রসভাবেষু স্পষ্টতা নোপজাযতে .. ১৫৯..
ততঃ শেষপ্রযোগস্তু ন রাগজনকো ভবেত্ .
(লক্ষনেন বিনা বাহ্যলক্ষণাদ্বিস্তৃতং ভবেত্ ..
লোকশাস্ত্রানুসারেণ তস্মান্নাট্যং প্রবর্ততে .. )
ত্র্যশ্রং বা চতুরশ্রং বা শুদ্ধং চিত্রমথাপি বা .. ১৬০..
প্রযুজ্য রঙ্গান্নিষ্ক্রামেত্সূত্রধারঃ সহানুগঃ .
(দেবপার্থিবরঙ্গানামাশীর্বচনসংযুতাম্ ..
কবের্নামগুণোপেতাং বস্তূপক্ষেপরূপিকাম্ .
লঘুবর্ণপদোপেতাং বৃত্তৈশ্চিত্রৈরলঙ্কৃতাম্ ..
অন্তর্যবনিকাসংস্থঃ কুর্যাদাশ্রাবণাং ততঃ .
আশ্রাবনাবসানে চ নান্দীং কৃত্বা স সূত্রধৃত্ ..
পুনঃ প্রবিশ্য রঙ্গং তু কুর্যাত্প্রস্তাবনাং ততঃ .)
প্রযুজ্য বিধিনৈবং তু পূর্বর~গং প্রযোগতঃ .. ১৬১..
স্থাপকঃ প্রবিশেত্তত্র সূত্রধারগুণাকৃতিঃ .
স্থানং তু বৈষ্ণবং কৃত্বা সৌষ্ঠবাঞ্গপুরস্কৃতম্ .. ১৬২..
প্রবিশ্য রঙ্গং তৈরেব সূত্রধারপদৈর্ব্রজেত্ .
শ্থাপক্স্য প্রবেশে তু কর্তব্যঽর্থানুগা ধ্রুবা .. ১৬৩..
ত্র্যশ্রা বা চতুরশ্রা বা তজ্জ্ঞৈর্মধ্যলযান্বিতা .
কুর্যাদনন্তরং চারীং দেবরহ্মণশংসিনীম্ .. ১৬৪..
সুবাক্যমধুরৈঃ শ্লোকের্নানাভসবরসান্বিতৈঃ .
প্রসাদ্য রঙ্গং বিধিবত্কবের্নাম চ কীর্তযেত্ .. ১৬৫..
প্রস্তবাঅ. ততঃ কুর্যাত্কাব্যপ্রখ্যাপনাশ্রযাম্ .
উদ্ধাত্যকাদি কর্তব্যং কাব্যোপক্ষেপণাশ্র্যম্ ..১৬৬..
দিব্যে দিব্যাশ্রযো ভূত্বা মানুষে মানুষাশ্রযঃ .
দিব্যমানুষসংযোগে দিব্যো বা মানুষোঽপি বা .. ১৬৭..
মুখবীজানুসদৄশং নানামার্গসমাশ্রযম্ .
আআবিধৈরুপক্ষেপৈঃ কাব্যোপক্ষেপণং ভবেত্ ..১৬৮..
প্রস্তাব্যৈবং তু নিষ্ক্রামেত্কাব্যপ্রস্তাবকস্ততঃ .
এবমেষ প্রযোক্তব্যঃ পূর্বরঙ্গো যথাবিধি .. ১৬৯..
য ইমং পূর্বরঙ্গং তু বিধিনৈব প্রযোজযেত্ .
নাশুভং প্রাপ্নুযাত্কিঞ্চিত্স্বর্গলোকং চ গচ্ছতি .. ১৭০..
যশ্চাপি বিধিমুত্সৃজ্য যথেষ্টং সম্প্রযোজযেত্ .
প্রাপ্নোত্যপচযং ঘোরং তির্যগ্গ্যোনিং চ গচ্ছতি .. ১৭১..
ন তথাঽগ্নিঃ প্রদহতি প্রভঞ্জনসমীরতঃ .
যথা হ্যপ্রযোগস্তু প্রযুক্তো দহতি ক্ষণাত্ .. ১৭২..
ইত্যেবাবন্তিপাঞ্চালদাক্ষিণাত্যৌঢ্রমাগধৈঃ .
কর্তব্য পূর্বরঙ্গস্তু দ্বিপ্রমাণবিনির্মিতঃ .. ১৭৩..
এষ বঃ কথিতো বিপ্রাঃ পূর্বরঙ্গাশ্রিতো বিধিঃ .
ভূযঃ কিং কথ্যতাং সম্যঙ্নাট্যবেদবিধিং প্রতি .. ১৭৪..
ইতি ভারতীযে নাট্যশাস্ত্রে পূর্বরঙ্গপ্রযোগো নাম পঞ্চমোঽধ্যাযঃ .