.. নাট্যশাস্ত্রম্ অধ্যায ৪ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ চতুর্থোঽধ্যাযঃ .
এবং তু পূজনং কৃত্বা মযা প্রোক্তঃ পিতামহঃ .
আজ্ঞাপয প্রভো ক্ষিপ্রং কঃ প্রযোগঃ প্রযুজ্যতাম্ .. ১..
ততোঽস্ম্যুক্তো ভগবতা যোজযামৃতমন্থনম্ .
এতদুত্সাহজননং সুরপ্রীতিকরং তথা .. ২..
যোঽযং সমবকারস্তু ধর্মকামার্থসাধকঃ .
মযা প্রাগ্গ্রথিতো বিদ্বন্স প্রযোগঃ প্রযুজ্যতাম্ .. ৩..
তস্মিন্সমবকারে তু প্রযুক্তে দেবদানবাঃ .
হৃষ্টাঃ সমভবন্সর্বে কর্মভাবানুদর্শনাত্ .. ৪..
কস্যচিত্বথ কালস্য মামাহাম্বুজসম্ভবঃ
নাট্যং সন্দর্শযামোঽদ্য ত্রিনেত্রায মহাত্মনে .. ৫..
ততঃ সার্ধং সুরৈর্গত্বা বৃষভাঙ্কনিবেশনম্ .
সমভ্যর্চ্য শিবং পশ্চাদুবাচেদং পিতামহঃ .. ৬..
মযা সমবাকরস্তু যোঽযং সৃষ্টঃ সুরোত্তম .
শ্রবণে দর্শনে চাস্য প্রসাদং কর্তুমর্হসি .. ৭..
পশ্যাম ইতি দেবেশো দ্রুহিণং বাক্যমব্রবীত্ .
ততো মামাহ ভগবান্ সজ্জো ভব মহামতে .. ৮..
ততো হিমবতঃ পৃষ্ঠে নানানাগসমাকুলে .
বহুভূতগণাকীর্ণে রম্যকন্দরনির্জ্হরে .. ৯..
পূর্বরঙ্গঃ কৃতঃ পূর্বং তত্রাযং দ্বিজসত্তমাঃ .
তথা ত্রিপুরদাহশ্চ ডিমসংজ্ঞঃ প্রযোজিতঃ .. ১০..
ততো ভূতগণা হৃষ্টাঃ কর্নভাবানুকীর্তনাত্ .
মহাদেবশ্চ সুপ্রীতঃ পিতামহমথাব্রবীত্ .. ১১..
অহো নাট্যমিদং সম্যক্ ত্বযা সৃষ্টং মহামতে .
যশস্যং চ শুভার্থং চ পুণ্যং বুদ্ধিবিবর্ধনম্ .. ১২..
মযাপীদং স্মৃতং নৃত্যং সন্ধ্যাকালেষু নৃত্যতা .
নানাকরণসংযুক্তৈরঙ্গহারৈর্বিভূষিতম্ .. ১৩..
পূর্বরঙ্গবিধাবস্মিংস্ত্বযা সম্যক্প্রযোজ্যতাম্ .
বর্ধমানকযোগেষু গীতেষ্বাসারিতেষু চ .. ১৪..
মহাগীতেষু চৈবার্থান্সম্যগেবাভিনেষ্যসি .
যশ্চাযং পূর্বরঙ্গস্তু ত্বযা শুদ্ধঃ প্রযোজিতঃ .. ১৫..
এভির্বিমিশ্রিতশ্চাযং চিত্রো নাম ভবিষ্যতি .
শ্রুত্বা মহেশ্বরবচঃ প্রত্যুক্তস্তু স্বযংভুবা .. ১৬..
প্রযোগমঙ্গহারাণামাচক্ষ্ব সুরসত্তম .
ততস্তণ্ডুং সমাহূয প্রোক্তবান্ ভুবনেশ্বরঃ .. ১৭..
প্রযোগমঙ্গহারাণামাচক্ষ্ব ভরতায বৈ .
ততো যে তণ্ডুনা প্রোক্তাস্ত্বঙ্গহারা মহাত্মনা.. ১৮..
তান্বঃ করণসংযুক্তান্ব্যাখ্যাস্যামি সরেচকান্ .
স্থিরহস্তোঽঙ্গহারস্তু তথা পর্যস্তকঃ স্মৃতঃ .. ১৯..
সূচিবিদ্ধস্তথা চৈব হ্যপবিদ্ধস্তথৈব চ .
আক্ষিপ্তকোঽথ বিজ্ঞেযস্তথা চোদ্ধট্টিতঃ স্মৃতঃ .. ২০..
বিষ্কম্ভশ্চৈব সম্প্রোক্তস্তথা চৈবাপরাজিতঃ .
বিষ্কম্ভাপসৃতশ্চৈঅব মত্তাক্রীডস্তথৈব চ .. ২১..
স্বস্তিকো রেচিতশ্চৈব পার্শ্বস্বস্তিক এব চ .
বৃশ্চিকাপসৃতঃ প্রোক্তো ভ্রমরশ্চ তথাপরঃ .. ২২..
মত্তস্খলিতকশ্চৈব মদাদ্বিলসিতস্তথা .
গতিমণ্ডলকো জ্ঞেযঃ পরিচ্ছিন্নস্তথৈব চ .. ২৩..
পরিবৃত্তচিতোঽথ স্যাত্তথা বৈশাখরেচিতঃ .
পরাবৃত্তোঽথ বিজ্ঞেযস্তথা চৈবাপ্যলাতকঃ .. ২৪..
পার্শ্বচ্ছেদোঽথ সম্প্রোক্তো বিদ্যুদ্ভ্রান্তস্তথৈব চ .
ঊরূদ্বৃত্তস্তথা চৈব স্যাদালীঢস্তথৈব চ .. ২৫..
রেচিতশ্চাপি বিজ্ঞেযস্তথৈবাচ্ছুরিতঃ স্মৃতঃ .
আক্ষিপ্তরেচিতশ্চৈব সম্ভ্রান্তশ্চ তথাপরঃ .. ২৬..
অপসর্পস্তু বিজ্ঞেযস্তথা চার্ধনিকুট্টকঃ .
দ্বাত্রিংশদেতে সম্প্রোক্তা অঙ্গহারাস্তু নামতঃ .. ২৭..
এতেষাং তু প্রবক্ষ্যামি প্রযোগং করণাশ্রযম্ .
হস্তপাদপ্রচারশ্চ যথা যোজ্যঃ প্রযোক্তৃভিঃ .. ২৮..
অঙ্গহারেষু বক্ষ্যামি করণেষু চ বৈ দ্বিজাঃ .
সর্বেষামঙ্গহারাণাং নিষ্পত্তিঃ করণৈর্যতঃ .. ২৯..
তান্যতঃ সম্প্রবক্ষ্যামি নামতঃ কর্মতস্তথা .
হস্তপাদসমাযোগো নৃত্যস্য করণং ভবেত্ .. ৩০..
দ্বে নৃত্তকরণে চৈব ভবতো নৃত্তমাতৃকা .
দ্বাভ্যাং ত্রিভিশ্চতুর্ভির্বাপ্যঙ্গহারস্তু মাতৃভিঃ .. ৩১..
ত্রিভিঃ কলাপকং চৈব চতুর্ভিঃ ষণ্ডকং ভবেত্ .
পঞ্চৈব করণানি স্যুঃ সঙ্ঘাতক ইতি স্মৃতঃ .. ৩২..
ষড্ভির্বা সপ্তভির্বাপি অষ্টভির্নবভিস্তথা .
করণৈরিহ সংযুক্তা অঙ্গহারাঃ প্রকীর্তাঃ .. ৩৩..
এতেষামেব বক্ষ্যামি হস্তপাদবিকল্পনম্ .
তলপুষ্পপুটং পূর্বং বর্তিতং বলিতোরু চ .. ৩৪..
অপবিদ্ধং সমনখং লীনং স্বস্তিকরেচিতম্ .
মণ্ডলস্বস্তিকং চৈব নিকুট্টকমথাপি চ .. ৩৫..
তথৈবার্ধনিকুট্টং চ কটিচ্ছিন্নং তথৈব চ .
অর্ধরেচিতকং চৈব বক্ষঃস্বস্তিকমেব চ .. ৩৬..
উন্মত্তং স্বস্তিকং চৈব পৃষ্ঠস্বস্তিকমেব চ .
দিক্স্বস্তিকমলাতং চ তথৈব চ কটীসমম্ .. ৩৭..
আক্ষিপ্তরেচিতং চৈব বিক্ষিপ্তাক্ষিপ্তকং তথা .
অর্ধস্বস্তিকমুদ্দিষ্টমঞ্চিতং চ তথাপরম্ .. ৩৮..
ভুজঙ্গত্রাসিতং প্রোক্তমূর্ধ্বজানু তথৈব চ .
নিকুঞ্চিতং চ মত্তল্লি ত্বর্ধমত্তল্লি চৈব হি .. ৩৯..
স্যাদ্রেচকনিক্কুট্টং চ তথা পাদাপবিদ্ধকম্ .
বলিতং ঘূর্ণিতং চৈব ললিতং চ তথাপরম্ .. ৪০..
দণ্ডপক্ষং তথা চৈব ভুজঙ্গত্রস্তরেচিতম্ .
নূপুরং চৈব সম্প্রোক্তং তথা বৈশাখরেচিতম্ .. ৪১..
ভ্রমরং চতুরং চৈব ভুজঙ্গাঞ্চিতমেব চ .
দণ্ডরেচিতকং চৈব তথা বৃশ্চিককুট্টিতম্ ..৪২..
কটিভ্রান্তং তথা চৈব লতাবৃশ্চিকমেব চ .
ছিন্নং চ করণং প্রোক্তং তথা বৃশ্চিকরেচিতম্ .. ৪৩..
বৃশ্চিকং ব্যংসিতং চৈব তথা পার্শ্বনিকুট্টকম্ .
ললাটতিলকং ক্রান্তং কুঞ্চিতং চক্রমণ্ডলম্ .. ৪৪..
উরোমণ্ডলমাক্ষিপ্তং তথা তলবিলাসিতম্ .
অর্গলং চাথ বিক্ষিপ্তমাবৃত্তং দোলপাদকম্ .. ৪৫..
বিবৃত্তং বিনিবৃত্তং চ পার্শ্বক্রান্তং নিশুম্ভিতম্ .
বিদ্যুত্ভ্রান্তমতিক্রান্তং বিবর্তিতকমেব চ .. ৪৬..
গজক্রীডিতকং চৈব তলসংস্ফোটিতং তথা .
গরুডপ্লুতকং চৈব গণ্ডসূচি তথাপরম্ .. ৪৭..
পরিবৃত্তং সমুদ্দিষ্টং পার্শ্বজানু তথৈব চ .
গৃধ্রাবলীনকং চৈব সন্নতং সূচ্যথাপি চ .. ৪৮..
অর্ধসূচীতি করণং সূচিবিদ্ধং তথৈব চ .
অপক্রান্তং চ সম্প্রোক্তং মযূরললিতং তথা .. ৪৯..
সর্পিতং দণ্ডপাদং চ হরিণপ্লুতমেব চ .
প্রেঙ্খোলিতং নিতম্বং চ স্খলিতং করিহস্তকম্ .. ৫০..
প্রসর্পিতকমুদ্দিষ্টং সিংহবিক্রীডতং তথা .
সিংহাকর্ষিতমুদ্বৃত্তং তথোপসৃতমেব চ .. ৫১..
তলসংঘট্টিতং চৈব জনিতং চাবহিত্থকম্ .
নিবেশমেলকাক্রীডমূরূদ্বৃত্তং তথৈব চ .. ৫২..
মদস্খলিতকং চৈব বিষ্ণুক্রান্তমথাপি চ .
সম্ভ্রান্তমথ বিষ্কম্ভমুদ্ঘট্টিতমথাপি চ .. ৫৩..
বৃষভক্রীডিতং চৈব লোলিতং চ তথাপরম্ .
নাগাপসর্পিতং চৈব শকটাস্যং তথৈব চ .. ৫৪..
গঙ্গাবতরণং চৈবেত্যুক্তমষ্টাধিকং শতম্ .
অষ্টোত্তরশতং হ্যেতত্করণানাং মযোদিতম্ .. ৫৫..
নৃত্যে যুদ্ধে নিযুদ্ধে চ তথ গতিপরিক্রমে .
গতিপ্রচারে বক্ষ্যামি যুদ্ধচারীবিকল্পনম্ .. ৫৬..
যত্র তত্রাপি সংযোজ্যমাচার্যৈর্নাট্যশক্তিনঃ .
প্রাযেণ করণে কার্যো বামো বক্ষঃস্থিতঃ করঃ .. ৫৭..
চরণস্যানুগশ্চাপি দক্ষিণস্তু ভবেত্করঃ .
হস্তপাদপ্রচারন্তু কটিপার্শ্বোরুসংযুতম্ .. ৫৮..
উরঃপৃষ্ঠোদরোপেতং বক্ষ্যমাণং নিবোধত .
যানি স্থানানি যাশ্চার্যো নৃত্যহস্তাস্তথৈব চ .. ৫৯..
সা মাতৃকেতি বিজ্ঞেযা তদ্যোগাত্করণং ভবেত্ .
কটী কর্ণসমা যত্র কোর্পরাংসশিরস্তথা .. ৬০..
সমুন্নতমুরশ্চৈব সৌষ্ঠবং নাম তদ্ভবেত্ .
বামে পুষ্পপুটঃ পার্শ্বে পাদোঽগ্রতলসঞ্চরঃ .. ৬১..
তথা চ সন্নতং পার্শ্বং তলপুষ্পপুটং ভবেত্ .
কুঞ্চিতৌ মণিবন্ধে তু ব্যাবৃত্তপরিবর্তিতৌ .. ৬২..
হস্তৌ নিপতিতৌ চোর্বোর্বর্তিতং করণং তু তত্ .
শুকতুণ্ডৌ যদা হস্তৌ ব্যাবৃত্তপরিবর্তিতৌ .. ৬৩..
উরূ চ বলিতৌ যস্মিন্বলিতোরুকমুচ্যতে .
আবর্ত্য শুকতুণ্ডাখ্যমূরুপৃষ্ঠে নিপাতযেত্ .. ৬৪..
বামহতশ্চ বক্ষঃস্থোঽপ্যপবিদ্ধং তু তদ্ভবেত্ .
শ্লিষ্টৌ সমনখৌ পদৌ করৌ চাপি প্রলিম্বিতৌ .. ৬৫..
দেহঃ স্বাভাবিকো যত্র ভবেত্সমনখং তু তত্ .
পতাকাঞ্জলি বক্ষঃস্থং প্রসারিতশিরোধরম্ .. ৬৬..
নিহঞ্চিতাংসকূটং চ তল্লিনং করণং স্মৃতম্ .
স্বস্তিকৌ রেচিতাবিদ্ধৌ বিশ্লিষ্টৌ কটিসংশ্রিতৌ .. ৬৭..
যত্র তত্করণং জ্ঞেযং বুধৈঃ স্বস্তিকরেচিতম্ .
স্বস্তিকৌ তু করৌ কৃত্বা প্রাঙ্গমুখোর্ধ্বতলৌ সমৌ .. ৬৮..
তথা চ মণ্ডলং স্থানং মণ্ডলস্বস্তিকং তু তত্ .
নিকুট্টিতৌ যদা হস্তৌ স্ববাহুশিরসোঽন্তরে .. ৬৯..
পাদৌ নিকুট্টিতৌ চৈব জ্ঞেযং তত্তু নিকুট্টকম্ .
অঞ্চিতৌ বাহুশিরসি হস্তস্ত্বভিমুখাঙ্গুলিঃ .. ৭০..
নিকুঞ্চিতার্ধযোগেন ভবেদর্থনিকুট্টকম্ .
পর্যাযশঃ কটিশ্ছিন্না বাহ্বোঃ শিরসি পল্লবৌ .. ৭১..
পুনঃপুনশ্চ করণং কটিচ্ছিনং তু তদ্ভবেত্ .
অপবিদ্ধকরঃ সূচ্যা পাদশ্চৈব নিকুট্টিতঃ .. ৭২..
সংন্নতং যত্র পার্শ্বং চ তদ্ভবেঅর্ধরেচিতম্ .
স্বস্তিকৌ চরণৌ যত্র করৌ বক্ষসি রেচিতৌ .. ৭৩..
নিকুঞ্চিতং তথা বক্ষো বক্ষস্স্বস্তিকমেব তত্ .
আঞ্চিতেন তু পাদেন রেচিতৌ তু করৌ যদা .. ৭৪..
উন্মতং করণং তত্তু বিজ্ঞেযং নৃত্যকোবিদৈঃ .
হস্তাভ্যামথ পাদাভ্যাং ভবতঃ স্বস্তিকৌ যদা .. ৭৫..
তত্স্বস্তিকমিতি প্রোক্তং করণং করণার্থিভিঃ .
বিক্ষিপ্তাক্ষিপ্তবাহুভ্যাং স্বস্তিকৌ চরণৌ যদা .. ৭৬..
অপক্রান্তার্ধসূচিভ্যাং তত্পৃষ্ঠস্বস্তিকং ভবেত্ .
পার্শ্বযোরগ্রতশ্চৈব যত্র শ্লিষ্টঃ করো ভবেত্ .. ৭৭..
স্বস্তিকৌ হস্তপাদাভ্যাং তদ্দিক্স্বস্তিকমুচ্যতে .
অলাতং চরণং কৃত্বা ব্যংসযেদ্দক্ষিণং করম্ .. ৭৮..
ঊর্ধ্বজানুক্রমং কুর্যাদলাতকমিতি স্মৃতম্ .
স্বস্তিকাপসৃতঃ পাদঃ করৌ নাভিকটিস্থিতৌ .. ৭৯..
পার্শ্বমুদ্বাহিতং চৈব করণং তত্কটীসমম্ .
হস্তৌ হৃদি ভবেদ্বামঃ সব্যশ্চাক্ষিপ্তরেচিতঃ ..৮০..
রেচিতশ্চাপবিদ্ধশ্চ তত্স্যাদাক্ষিপ্তরেচিতম্ .
বিক্ষিপ্তং হস্তপাদং চ তসৈবাক্ষেপণং পুনঃ .. ৮১..
যত্র তত্করণং জ্ঞেযং বিক্ষিপ্তাক্ষিপ্তপ্তকং দ্বিজাঃ .
স্বস্তিকৌ চরণৌ কৃত্বা করিহস্তং চ দক্ষিণম্ .. ৮২..
বক্ষস্থানে তথা বামমর্ধস্বস্তিকমাদিশেত্ .
ব্যাবৃত্তপরিবৃত্তস্তু স এব তু করো যদা .. ৮৩..
অঞ্চিতো নাসিকাগ্রে তু তদঞ্চিতমুদাহৃতম্ .
কুঞ্চিতং পাদমুত্ক্ষিপ্য ত্র্যশ্রমূরুং বিবর্তযেত্ .. ৮৪..
কটিজানুবিবর্তাচ্চ ভুজঙ্গত্রাসিতং ভবেত্ .
কুঞ্চিতং পাদমুত্ক্ষিপ্য জনুস্তনসমং ন্যসেত্ .. ৮৫..
প্রযোগবশগৌ হস্তাবূর্ধ্বজানু প্রকীর্তিতম্ .
বৃশ্চিকং চরণং কৃত্বা করং পার্শ্বে নিকুঞ্চযেত্ .. ৮৬..
নাসাগ্রে দক্ষিণং চৈব জ্ঞেযং তত্তু নিকুঞ্চিতম্ .
বামদক্ষিণপাদাভ্যাং ঘূর্ণমানোপসর্পণৈঃ ..৮৭..
উদ্বেষ্টিতাপবিদ্ধৈশ্চ হস্তৈর্মত্তল্ল্যুদাহৃতম্ .
স্স্খলিতাপসৃতৌ পাদৌ বামহস্তশ্চ রেচিতঃ .. ৮৮..
সব্যহস্তঃ কটিস্থঃ স্যাদর্ধমত্তল্লি তত্স্মৃতম্ .
রেচিতো দক্ষিণো হস্তঃ পাদঃ সব্যো নিকুট্টিতঃ .. ৮৯..
দোলা চৈব ভবেদ্বামস্তদ্রেচিতনিকুট্টিতম্ .
কার্যৌ নাভিতটে হস্তৌ প্রাঙ্মুখৌ খটকামুখৌ .. ৯০..
সূচীবিদ্ধাবপক্রান্তৌ পাদৌ পাদাপবিদ্ধকে .
অপবিদ্ধো ভবেদ্ধস্তঃ সূচীপাদস্তথৈঅব চ .. ৯১..
তথা ত্রিকং বিবৃত্তং চ বলিতং নাম তদ্ভবেত্ .
বর্তিতাঘূর্ণিতঃ সব্যো হস্তো বামশ্চ দোলিতঃ .. ৯২..
স্বস্তিকাপসৃতঃ পাদঃ করণং ঘূর্ণিতং তু তত্ .
করিহস্তো ভবেদ্বামো দক্ষিণশ্চ বিবর্তিতঃ .. ৯৩..
বহুশঃ কুট্টিতঃ পদো জ্ঞেযং তল্ললিতং বুধৈঃ .
ঊর্ধ্বজানুং বিধাযাথ তস্যোপরি লতাং ন্যসেত্ .. ৯৪..
দণ্ড্পক্ষং তত্প্রোক্তং কর্ণং নৃত্যবেদিভিঃ .
ভুজঞ্গত্রাসিতং কৃত্বা যত্রোভাবপি রেচিতৌ .. ৯৫..
বামপার্শ্বস্থ্তৌ হস্তৌ ভুজঙ্গত্রস্তরেচিতম্ .
ত্রিকং সুবলিতং কৃত্বা লতারেচিতকৌ করৌ .. ৯৬..
নূপুর্শ্চ তথা পাদঃ করণে নূপুরে ন্যসেত্ .
রেচিতৌ হস্তপাদৌ চ কটী গ্রীবা চ রেচিতা .. ৯৭..
বৈশাখস্থানকেনৈতদ্ভবেবৈশাখরেচিতম্ .
আক্ষিপ্তঃ স্বস্তিকঃ পাদঃ করৌ চোদ্বেষ্টিতৌ তথা .. ৯৮..
ত্রিকস্য বলনাচ্চৈব জ্ঞেযং ভ্রমরকং তু তত্ .
অঞ্চিতঃ স্যাত্করো বামঃ সব্যশ্চতুর এব তু .. ৯৯..
দক্ষিণঃ কুট্টিতঃ পাদশ্চতুরং তত্প্রকীর্তিতম্ .
ভুজঙ্গত্রাসিতঃ পাদো দক্ষিণো রেচিতঃ করঃ .. ১০০..
লতাখ্যশ্চ করো বামো ভুজঙ্গাঞ্চিতকং ভবেত্ .
