ঊরূদ্বৃত্তং ততঃ কুর্যাদাক্ষিপ্তং পুনরেব হি .
নিতম্বং করিহস্তং চ কটিচ্ছিন্নং তথৈব চ .. ২০১..
পার্শ্বস্বস্তিক ইত্যেষ হ্যঙ্গহারঃ প্রকীর্তিতঃ .
বৃশ্চিকং করণং কৃত্বা লতাখ্যং হস্তমেব চ .. ২০২..
তমেব চ করং ভূযো নাসাগ্রে সন্নিকুঞ্চযেত্ .
তমেবোদ্বেষ্টিতং কৃত্বা নিতম্বং পরিবর্তযেত্ .. ২০৩..
করিহস্তং কটিচ্ছিন্নং বৃশ্চিকাপসৃতে ভবেত্ .
কৃত্বা নূপুরপাদং তু তথাক্ষিপ্তকমেব চ .. ২০৪..
পরিচ্ছিন্নং চ কর্তব্যং সূচীপাদং তথৈব চ .
নিতম্বং করিহস্তং চাপ্যুরোমণ্ডলকং তথা .. ২০৫ ..
কটীচ্ছিন্নং ততশ্চৈব ভ্রমরঃ স তু সংজ্ঞিতঃ .
মতল্লিকরণং কৃত্বা করমাবর্ত্য দক্ষিণম্ .. ২০৬..
কপোলস্য প্রদেশে তু কার্যং সম্যঙ্নিকুঞ্চিতম্
অপবিদ্ধং দ্রুতং চৈব তলসংস্ফোটসংযুতম্ .. ২০৭..
করিহস্তং কটিচ্ছিন্নং মত্তস্খলিতকে ভবেত্ .
দোলৈঃ করৈঃ প্রচলিতৈঃ স্বস্তিকাপসৃতৈঃ পদৈঃ .. ২০৮..
অঞ্চিতৈর্বলিতৈর্হস্তৈস্তলসঙ্ঘট্টিতৈস্তথা .
নিকুট্টিতং চ কর্তব্যমূরূদ্বৃতং তথৈব চ .. ২০৯..
করিহস্তং কটিচ্ছিন্নং মদাদ্বিলসিতে ভবেত্ .
মণ্ডলং স্থানকং কৃত্বা তথা হস্তৌ চ রেচিতৌ .. ২১০..
উদ্ঘট্টিতেন পাদেন মত্তল্লিকরণং ভবেত্ .
আক্ষিপ্তং করণং চৈব হ্যুরোমণ্ডলমেব চ .. ২১১..
কটিচ্ছিন্নং তথা চৈব ভবেত্তু গতিমণ্ডলে .
সমপাদং প্রযুজ্যাথ পরিচ্ছিন্নং ত্বনন্তরম্ .. ২১২..
আবিদ্ধেন তু পাদেন বাহ্যভ্রমরকং তথা .
বামসূচ্যা ত্বতিক্রান্তং ভুজঙ্গত্রাসিতং তথা .. ২১৩..
করিহস্তং কটিচ্ছিন্নং পরিচ্ছিন্নে বিধীযতে .
শিরসস্তূপরি স্থাপ্যৌ স্বস্তিঅকৌ বিচ্যুতৌ করৌ . ২১৪..
ততঃ সব্যং করং চাপি গাত্রমানম্য রেচযেত্ .
পুনরুত্থাপযেত্তত্র গাত্রমুন্নম্য রেচিতম্ .. ২১৫..
লতাখ্যৌ চ করৌ কৃত্বা বৃশ্চিকং সম্প্রযোজযেত্ .
রেচিতং করিহস্তং চ ভুজঙ্গত্রাসিতং তথা .. ২১৬..
আক্ষিপ্তকং প্রযুঞ্জীত স্বস্তিকং পাদমেব চ .
পরাঙ্গ্মুখবিধির্ভূয এবমেব ভবেদিহ .. ২১৭..
করিহস্তং কটিচ্ছিন্নং পরিবৃত্তকরেচিতেএ .
রেচিতৌ সহ গাত্রেণ হ্যপবিদ্ধৌ করৌ যদা .. ২১৮..
পুনস্তেনৈব দেশেন গাত্রমুন্নম্য রেচযেত্ .
কুর্যান্নূপুরপাদং চ ভুজঙ্গত্রাসিতং তথা .. ২১৯..
রেচিতং মণ্ডলং চৈব বাহুশীর্ষে নিকুঞ্চযেত্ .
ঊরূদ্বৃত্তং তথাক্ষিপ্তমুরোমণ্ডলমেব চ .. ২২০..
করিহস্তং কটিচ্ছিন্নং কুর্যাদ্বৈশাখরেচিতে .
আদ্যং তু জনিতং কৃত্বা পাদমেকং প্রসারযেত্ ..২২১..
তথৈবালাতকং কুর্যাত্ ত্রিকং তু পরিবর্তযেত্ .
অঞ্চিতং বামহস্তং চ গণ্ডদেশে নিকুট্টযেত্ .. ২২২..
কটিচ্ছিন্নং তথা চৈব পরাবৃত্তে প্রযোজযেত্ .
স্বস্তিকং করণং কৃত্বা ব্যংসিতৌ চ করৌ পুনঃ .. ২২৩..
অলাতকং প্রযুঞ্জীত হ্যূর্ধ্বজানু নিকুঞ্চিতম্ .
অর্ধসূচী চ বিক্ষিপ্তমুদ্বৃত্তাক্ষিপ্তকে তথা .. ২২৪..
করিহস্তং কটিচ্ছিন্নমঙ্গহারে হ্যলাতকে .
নিকুট্য বক্ষসি করাবূর্ধ্বজানু প্রযোজযেত্ .. ২২৫..
আক্ষিপ্তস্বস্তিকং কৃত্বা ত্রিকং তু পরিবর্তযেত্ .
উরোমণ্ডলকৌ হস্তৌ নিতম্বং করিহস্তকম্ .. ২২৬..
কটিচ্ছিন্নং তথা চৈব পার্শ্বচ্ছেদে বিধীযতে .
সূচীবামপদং দধ্যাদ্বিদ্যুদ্ভ্রান্তং চ দক্ষিণম্ .. ২২৭..
দক্ষিণেন পুনঃ সূচী বিদ্যুদ্ভ্রান্তং চ বামতঃ .
পরিচ্ছিন্নং তথা চৈব হ্যতিক্রান্তং চ বামকম্ .. ২২৮..
লতাখ্যং সকটিচ্ছিন্নং বিদ্যুদ্ভ্রান্তশ্চ স স্মৃতঃ .
কৃত্বা নূপুরপাদং তু সব্যবামৌ প্রলম্বিতৌ .. ২২৯..
করৌ পার্শ্বে ততস্তাভ্যাং বিক্ষিপ্তং সম্প্রযোজযেত্ .
তাভ্যাং সূচী তথা চৈব ত্রিকং তু পরিবর্তযেত্ .. ২৩০..
লতাখ্যং সকটিচ্ছিন্নং কুর্তাদুদ্বৃত্তকে সদা .
আলীঢব্যংসিতৌ হস্তৌ বাহুশীর্ষে নিকুট্টযেত্ .. ২৩১..
নূপুরশ্চরণো বামস্তথালাতশ্চ দক্ষিণঃ .
তেনৈবাক্ষিপ্তকং কুর্যাদুরোমণ্ডলকৌ করৌ ..২৩২..
করিহস্তং কটিচ্ছিন্নমালীঢে সম্প্রযোজযেত্ .
হস্তং তু রেচিতং কৃত্বা পার্শ্বমানস্য রেচযেত্ .. ২৩৩..
পুনস্তেনৈব যোগেন গাত্রমানস্য রেচযেত্ .
রেচিতং করণং কার্যমুরোমণ্ডলমেব চ .. ২৩৪..
কটিচ্ছিন্নং তু কর্তব্যমঙ্গহারে তু রেচিতে .
নূপুরং চরণং কৃত্বা ত্রিকং তু পরিবর্তযেত্ ..২৩৫..
ব্যংসিতেন তু হস্তেন ত্রিকমেব বিবর্তযেত্ .
বামং চালাতকং কৃত্বা সূচীমত্রৈব যোজযেত্ ..২৩৬..
করিহস্তং কটিচ্ছিন্নং কুর্যাদাচ্ছুরিতে সদা .
রেচিতৌ স্বস্তিকৌ পাদৌ রেচিতৌ স্বস্তিকৌ করৌ .. ২৩৭..
কৃত্বা বিশ্লেষমেবং তু তেনৈব বিধিনা পুনঃ .
পুনরুত্ক্ষেপণং চৈব রেচিতৈরেব কারযেত্ .. ২৩৮..
উদ্বৃত্তাক্ষিপ্তকে চৈব হ্যুরোমণ্ডলমেব চ .
নিতম্বং করিহস্তং চ কটিচ্ছিন্নং তথৈব চ .. ২৩৯..
আক্ষিপ্তরেচিতো হ্যেষ করণানাং বিধিঃ স্মৃতঃ .
বিক্ষিপ্ত করণং কৃত্বা হস্তপাদং মুখাগমম্ .. ২৪০..
বামসূচিসহকৃতং বিক্ষিপেদ্বামকং করম্ .
বক্ষঃস্থানে ভবেত্সব্যো বলিতং ত্রিকমেব চ .. ২৪১..
নূপুরাক্ষিপ্তকে চৈব হ্যর্ধস্বস্তিকমেব চ .
নিতম্বং করিহস্তং চ হ্যুরোমণ্ডলকং তথা .. ২৪২..
কটিচ্ছিন্নং চ কর্তব্যং সম্ভ্রান্তে নৃত্তযোক্তৃভিঃ .
অপক্রান্তক্রমং কৃত্বা ব্যংসিতং হস্তমেব চ .. ২৪৩..
কুর্যাদুদ্বেষ্টিতং চৈব হ্যর্ধসূচীং তথৈব চ .
বিক্ষিপ্তং সকটিচ্ছিন্নমুদ্বৃত্তাক্ষিপ্তকে তথা .. ২৪৪..
করিহস্তং কটিচ্ছিন্নং কর্তব্যমপসর্পিতে .
কৃত্বা নূপুরপাদং চ দ্রুতমাক্ষিপ্য চ ক্রমম্ .. ২৪৫..
পাদস্য চানুগৌ হস্তৌ ত্রিকং চ পরিবর্তযেত্ .
নিকুট্য করপাদং চাপ্যুরোমণ্ডলকং পুনঃ .. ২৪৬..
করিহস্তং কটিচ্ছিন্নং কার্যমর্ধনিকুট্টকে .
দ্বাত্রিংশদেতে সম্প্রোক্তা হ্যঙ্গহারা দ্বিজোত্তমাঃ .. ২৪৭..
চতুরো রেচকাংশ্চাপি গদতো মে নিবোধত .
পাদরেচক একঃ স্যাত্ দ্বিতীযঃ কটিরেচকঃ .. ২৪৮..
কররেচকস্তৃতীযস্তু চতুর্থঃ কণ্ঠরেচকঃ .
[রেচিতাখ্যঃ পৃথগ্ভাবে বলনে চাভিধীযতে ..
উদ্বাহনাত্পৃথগ্ভাবাচ্চলনাচ্চাপি রেচকঃ .
পার্শ্বাত্পার্শ্বে তু গমনং স্খলিতৈশ্চলিতৈঃ পদৈঃ ..
বিবিধৈশ্চৈব পাদস্য পাদরেচক উচ্যতে .
ত্রিকস্যোদ্বর্তনং চৈব ছটীবলনমেব চ ..
তথাঽপসর্পণং চৈব কটিরেচক উচ্যতে .
উদ্বর্তনং পরিক্ষেপো বিক্ষেপঃ পরিবর্তনম্ ..
বিসর্পণং চ হস্তস্য হস্তরেচক উচ্যতে .
উদ্বাহনং সন্নমনং তথা পার্শ্বস্য সন্নতিঃ ..
ভ্রমণং চাপি বিজ্ঞেযো গ্রীবাযা রেচকো বুধৈঃ . ]
রেচকৈরঙ্গহারৈশ্চ নৃত্যন্তং বীক্ষ্য শঙ্করম্ .. ২৪৯..
সুকুমারপ্রযোগেণ নৃত্যন্তীং চৈব পাঅর্বতীম্ .
মৃদঞ্গভেরীপটহৈর্ভাণ্ডডিণ্ডিমগোমুখৈঃ ..২৫০..
পণবৈর্দদুরৈশ্চৈব সর্বাতোদ্যৈঃ প্রবাদিতৈঃ .
দক্ষযজ্ঞে বিনিহতে সন্ধ্যাকালে মহেশ্বরঃ .. ২৫১..
নানাঙ্গহারৈঃ প্রানৃত্যল্লযতালবশানুগৈঅঃ .
পিণ্ডিবন্ধাংস্ততো দৃষ্ট্বা নন্দিভদ্রমুখা গণাঃ .. ২৫২..
চক্রুস্তে নাম পিণ্ডীনাং বন্ধমাসাং সলক্ষণম্ .
ঈশ্বরস্যেশ্বরী পিন্ডী নন্দিনশ্চাপি পট্টসী .. ২৫৩..
চণ্ডিকাযা ভবেত্পিণ্ডী তথা বৈ সিংহবাহিনী .
তার্ক্ষ্যপিণ্ডী ভবেদ্বিষ্ণোঃ পদ্মপিণ্ডী স্বযংভুবঃ .. ২৫৪..
শক্রস্যৈরাবতী পিণ্ডী ঝষপিণ্ডী তু মান্মথী .
শিখিপিণ্ডী কুমারস্য রূপপিণ্ডী ভবেচ্ছ্রিযঃ .. ২৫৫..
ধারাপিণ্ডী চ জাহ্নব্যাঃ পাশপিণ্ডী যমস্য চ ..
বারুণী চ নদীপিণ্ডী যাক্ষী স্যাদ্ধনদস্য তু .. ২৫৬..
হলপিণ্ডী বলস্যাপি সর্পপিণ্ডী তু ভোগিনাম্ .
গাণেশ্বরী মহাপিণ্ডী দক্ষযজ্ঞবিমর্দিনী..২৫৭..
ত্রিশূলাকৃতিসংস্থানা রৌদ্রী স্যাদন্ধকদ্বিষঃ .
এবমন্যাস্বপি তথা দেবতাসু যথাক্রমম্ .. ২৫৮..
ধ্বজভূতাঃ প্রযোক্তব্যাঃ পিণ্ডীবন্ধাঃ সুচিহ্নিতাঃ .
রেচকা অঙ্গহারাশ্চ পিণ্ডীবন্ধাতস্থৈব চ .. ২৫৯..
সৃষ্ট্বা ভগবতা দত্তাস্তণ্ডবে মুনযে তদা .
তেনাপি হি ততঃ সম্যগ্গানভাণ্ডসমন্বিতঃ .. ২৬০..
নৃত্তপ্রযোগঃ সৃষ্টো যঃ স তাণ্ডব ইতি স্মৃতঃ .
ঋষয ঊচুঃ –
যদা প্রাপ্ত্যর্থমর্থানাং তজ্জ্ঞৈরভিনযঃ কৃতঃ .. ২৬১..
কস্মানৃত্তং কৃতং হ্যেতত্কং স্বভাবমপেক্ষতে .
ন গীতকার্থসম্বদ্ধং ন চাপ্যর্থস্য ভাবকম্ .. ২৬২..
কস্মান্নৃত্তং কৃতং হ্যেতদ্গীতেষ্বাসারিতেষু চ .
ভরতঃ –
অত্রোচ্যতে ন খল্বর্থং কঞ্চিন্নৃত্তমপেক্ষতে .. ২৬৩..
কিং তু শোভাং প্রজনযেদিতি নৃত্তং প্রবর্তিতম্ .
প্রাযেণ সর্বলোকস্য নৃত্তমিষ্টং স্বভাবতঃ .. ২৬৪..
মঙ্গলমিতি কৃত্বা চ নৃত্তমেতত্প্রকীর্তিতম্ .
বিবাঅহপ্রসবাবাহপ্রমোদাভ্যুঅদযাদিষু .. ২৬৫..
বিনোদকারণং চেতি নৃত্তমেতত্প্রবর্তিতম্ .
অতশ্চৈব প্রতিক্ষেপাদ্ভূতসঙ্ঘৈঃ প্রবর্তিতাঃ.. ২৬৬..
যে গীতকাদৌ যুজ্যন্তে সম্যঙ্নৃত্তবিভাগকাঃ.
দেবেন চাপি সম্প্রোক্তস্তণ্ডুস্তাণ্ডবপূর্বকম্ .. ২৬৭..
গীতপ্রযোগমাশ্রিত্য নৃত্তমেতত্প্রবর্ত্যতাম্ .
প্রাযেণ তাণ্ডববিধির্দেবস্তুত্যাশ্রযো ভবেত্ ..২৬৮..
সুকুমারপ্রযোগশ্চ শৃঙ্গাররসসম্ভবঃ .
তস্য তণ্ডুপ্রযুক্তস্য তাণ্ডবস্য বিধিক্রিযাম্..২৬৯..
বর্ধমানকমাসাদ্য সম্প্রবক্ষ্যমি লক্ষণম্ .
কলানাং বৃদ্ধিমাসাদ্য হ্যক্ষরাণাং চ বর্ধনাত্ .. ২৭০..
লযস্য বর্ধনাচ্চাপি বর্ধমানকমুচ্যতে .
কৃত্ত্বা কুতপবিন্যাসং যথাবদ্দ্বিজসত্তমাঃ .. ২৭১..
আসারিতপ্রযোগস্তু ততঃ কার্যঃ প্রযোক্তৃভিঃ .
তত্র তূপোহনং কৃত্ত্বা তন্ত্রীগানসমন্বিতম্ .. ২৭২..
কার্যঃ প্রবেশো নর্তক্যা ভাণ্ডবাদ্যসমন্বিতঃ .
বিশুদ্ধকরণাযাং তু জাত্যাং বাদ্যং প্রযোজযেত্ ..২৭৩..
গত্যা বাদ্যানুসারিণ্যা তস্যাশ্চারীং প্রযোজযেত্ .
বৈশাখস্থানকেনেহ সর্বরেচকচারিণী .. ২৭৪..
পুষ্পাঞ্জলিধরা ভূত্বা প্রবিশেদ্রঙ্গমণ্ডপম্ .
পুষ্পাঞ্জলিং বিসৃজ্যাথ রঙ্গপীঠং পরীত্য চ .. ২৭৫..
প্রণম্য দেবতাভ্যশ্চ ততোঽভিনযমাচরেত্ .
যত্রাভিনেযং গীতং স্যাত্তত্র বাদ্যং ন যোজযেত্ .. ২৭৬..
অঙ্গহারপ্রযোগে তু ভাণ্ডবাদ্যং বিধীযতে .
সমং রক্তং বিভক্তং চ স্ফুটং শুদ্ধপ্রহারজম্ ..২৭৭..
নৃত্তাঙ্গগ্রাহি বাদ্যজ্ঞৈর্বাদ্যং যোজ্যং তু তাণ্ডবে .
প্রযুজ্য গীতবাদ্যে তু নিষ্ক্রামেন্নর্তকী ততঃ .. ২৭৮..
অনেনৈব বিধানেন প্রবিশন্ত্যপরাঃ পৃথক্ .
অন্যাশ্চানুক্রমেণাথ পিণ্ডীং বধ্নন্তি যাঃ স্ত্রিযঃ .. ২৭৯..
তাবত্পর্যস্তকঃ কার্যো যাবত্পিণ্ডী ন বধ্যতে .
পিণ্ডীং বদ্ধ্বা ততঃ সর্বা নিষ্ক্রামেযুঃ স্ত্রিযস্তু তাঃ .. ২৮০..
পিণ্ডীবন্ধেষু বাদ্যং তু কর্তব্যমিহ বাদকৈঅঃ .
পর্যস্তকপ্রমাণেন চিত্রৌঘকরণান্বিতম্ .. ২৮১..
তত্রোপবাহনং ভূযঃ কার্যং পূর্ববদেব হি .
ততশ্চাসারিতং ভূযো গাযনং তু প্রযোজযেত্ .. ২৮২..
পূর্বেণৈব বিধানেন প্রবিশেচ্চাপি নর্তকী .
গীতকার্থং ত্বভিনযেদ্ দ্বিতীযাসারিতস্য তু .. ২৮৩..
তদেব চ পুনর্বস্তু নৃত্তেনাপি প্রদর্শযেত্ .
আসারিতে সমাপ্তে তু নিষ্ক্রামেন্নর্তকী ততঃ .. ২৮৪..
পূর্ববত্প্রবিশন্ত্যন্যাঃ প্রযোগঃ স্যাত্স এব হি .
এবং পদে পদে কার্যো বিধিরাসারিতস্য তু .. ২৮৫..
ভাণ্ডবাদ্যকৃতে চৈব তথা গানকৃতেঽপি চ .
একা তু প্রথমং যোজ্যা দ্বে দ্বিতীযং তথৈব চ .. ২৮৬..
তিস্রো বস্তু তৃতীযং তু চতস্রস্তু চতুর্থকম্ .
পিণ্ডীনাং বিধযশ্চৈব চত্বারঃ সম্প্রকীর্তিতাঃ .. ২৮৭..
পিণ্ডী শৃঙ্খলিকা চৈব লতাবন্ধোঽথ ভেদ্যকঃ .
পিণ্ডীবন্ধস্তু পিণ্ডত্বাদ্গুল্মঃ শৃঙ্খলিকা ভবেত্ .. ২৮৮..
জালোপনদ্ধা চ লতা সনৃত্তো ভেদ্যকঃ স্মৃতঃ .
পিণ্ডীবন্ধঃ কনিষ্ঠে তু শৃঙ্খলা তু লযান্তরে .. ২৮৯..
মধ্যমে চ লতাবন্ধো জ্যেষ্ঠে চৈবাথ ভেদ্যকঃ .
পিণ্ডীনাং বিবিধা যোনির্যন্ত্রং ভদ্রাসনং তথা .. ২৯০..
শিক্ষাযোগস্তথা চৈব প্রযোক্তব্যঃ প্রযোক্তৃভিঃ .
এবং প্রযোগঃ কর্তব্যো বর্ধমানে তপোধনাঃ .. ২৯১..
গীতানাং ছন্দকানাং চ ভূযো বক্ষ্যাম্যহং বিধিম্ .
যানি বস্তুনিবদ্ধানি যানি চাঙ্গিকৃতানি তু .. ২৯২..
গীতানি তেষাং বক্ষ্যামি প্রযোগং নৃত্তবাদ্যযোঃ .
তত্রাবতরণং কার্যং নর্তক্যাঃ সার্বভাণ্ডিকম্ .. ২৯৩..
ক্ষেপপ্রতিক্ষেপকৃতং ভাণ্ডোপোহনসংস্কৃতম্ .
প্রথমং ত্বভিনেযং স্যদ্গীতকে সর্ববস্তুকম্ .. ২৯৪
তদেব চ পুনর্বস্তু নৃত্তেএনাপি প্রদর্শেযত্ .
যো বিধিঃ পূর্বমুক্তস্তু নৃত্তাভিনযবাদিতে .. ২৯৫..
আসারিতবিধৌ স স্যাদ্গীতানাং বস্তুকেষ্বপি .
এবং বস্তুনিবন্ধানাং গীতকানাং বিধিঃ স্মৃতঃ .. ২৯৬..
শৃণুতাঙ্গনিবদ্ধানাং গীতানামপি লক্ষণম্ .
য এব বস্তুকবিধির্নৃত্তাভিনযবাদিতে .. ২৯৭..
তমেবাঙ্গনিবদ্ধেষু চ্ছন্দকেষ্বপি যোজযেত্ .
বাদ্যং গুর্বক্ষরকৃতং তথাল্পাক্ষরমেব চ .. ২৯৮..
মুখে সোপোহনে কুর্যাদ্বর্ণানাং বিপ্রকর্ষতঃ .
যদা গীতিবশাদঙ্গং ভূযো ভূযো নিবর্ততে .. ২৯৯..
তত্রাদ্যমভিনেযং স্যাচ্ছেষং নৃত্তেন যোজযেত্ .
যদা গীতিবশাদঙ্গং ভূযো ভূযো নিবর্ততে .. ৩০০..
ত্রিপাণিলযসংযুক্তং তত্র বাদ্যং প্রযোজযেত্ .
যথা লযস্তথা বাদ্যং কর্তব্যমিহ বাদকৈঃ .. ৩০১..
[ততং চানুগতং চাপি ওঘং চ করণান্বিতম্ .
স্থিরে তত্ত্বং (তং)প্রযোক্তব্যং মধ্যে চানুগতং ভবেত্ ..
ভূযশ্চৌঘঃ প্রযোক্তব্যস্ত্বেষ বাদ্যগতো বিধিঃ .
ছন্দোগীতকমাসাদ্য ত্বঙ্গানি পরিবর্তযেত্ ..
এষ কার্যো বিধির্নিত্যং নৃত্তাভিনযবাদিতে .
যানি বস্তুনিবদ্ধানি তেষামন্তে গ্রহো ভবেত্ ..
অঙ্গানাং তু পরাবৃত্তাবাদাবেব গ্রহো মতঃ ..]
এবমেষ বিধিঃ কার্যো গীতেষ্বাসারিতেষ্বপি .
দেবস্তুত্যাশ্রযং হ্যেতত্সুকুমারং নিবোধত .. ৩০২..
স্ত্রীপুংসযোস্তু সংলাপো যস্তু কামসমুদ্ভবঃ .
তজ্জ্ঞেযং সুকুমারং হি শৃঙ্গাররসসম্ভবম্ .. ৩০৩..
যস্যাং যস্যামবস্থাযাং নৃত্তং যোজ্যং প্রযোক্তৃভিঃ .
তত্সর্বংং সংপ্রবক্ষ্যামি তচ্চ মে শৃণুত দ্বিজাঃ .. ৩০৪..
অঙ্গবস্তুনিবৃত্তৌ তু তথা বর্ণনিবৃত্তিষু .
তথা চাভুদযস্থানে নৃত্তং তজ্জ্ঞঃ প্রযোজযেত্ .. ৩০৫..
যত্তু সংদৃশ্যতে কিঞ্চিদ্দম্পত্যোর্মদনাশ্রযম্ .
নৃত্তং তত্র প্রযোক্তব্যং প্রহর্ষার্থগুণোদ্ভবম্ .. ৩০৬..
যত্র সন্নিহিতে কান্তে ঋতুকাঅলাদিদর্শনম্ .
গীতকার্থাভিসংবদ্ধং নৃত্তং তত্রাপি চেষ্যতে .. ৩০৭..
খণ্ডিঅতা বিপ্রলব্ধা বা কলহান্তরিতাপি বা .
যস্মিন্নঙ্গে তু যুবতির্ন নৃত্তং তত্র ন যোজযেত্ ..৩০৮..
সখীপ্রবৃত্তে সংলাপে তথাঽসন্নিহিতে প্রিযে .
ন হি নৃত্তং প্রযোক্তব্যং যস্যা ন প্রোষিতঃ প্রিযঃ .. ৩০৯..
[দূত্যাশ্রযং যদা তু স্যাদৃতুকালাদি দর্শনম্ .
ঔত্সুক্যচিন্তাসংবদ্ধং ন নৃত্তং তত্র যোজযেত্ ..]
যস্মিন্নঙ্গে প্রসাদং তু গৃহ্নীযান্নাযিকা ক্রমাত্ .
ততঃপ্রভৃতি নৃত্তং তু শেষেষ্বঙ্গেষু যোজযেত্ .. ৩১০..
দেবস্তুত্যাশ্রযকৃতং যদঙ্গং তু ভবেদথ .
মাহেশ্বরৈরঙ্গহারৈরুদ্ধতৈস্তত্প্রযোজযেত্ ..৩১১..
যত্তু শৃঙ্গারসংবদ্ধং গানং স্ত্রীপুরুষাশ্রযম্ .
দেবীকৃতৈরঙ্গহারৈর্ললিতৈস্তত্প্রযোজযেত্ .. ৩১২..
চতুষ্পদা নর্কুটকে খঞ্জকে পরিগীতকে .
বিধানং সম্প্রবক্ষ্যামি ভাণ্ডবাদ্যবিধিং প্রতি .. ৩১৩..
খঞ্জনর্কুটসংযুক্তা ভস্বেদ্যা তু চতুষ্পদা .
পাদান্তে সন্নিপাতে তু তস্যা ভাণ্ডগ্রহো ভবেত্ .. ৩১৪..
যা ধ্রুবা ছন্দসা যক্তা সমপাদা সমাক্ষরা .
তস্যাঃ পাদাবসানে তু প্রদেশিন্যা গ্রহো ভবেত্ ..৩১৫..
কৃত্বৈকং পরিবর্তং তু গানস্যাভিনযস্য চ .
পুনঃ পাদনিবৃত্তিং তু ভাণ্ডবাদ্যেন যোজযেত্ ..৩১৬..
অ~ঙ্গবস্তুনিবৃতৌ তু বর্ণান্তরনিবৃত্তিষু .
তথোপস্থাপনে চৈব ভাণ্ডবাদ্যং প্রযোজযেত্ .. ৩১৭..
যেঽপি চান্তরমার্গাস্স্যুঃ তন্ত্রিবাক্করণৈঃ কৃতাঃ .
তেষু সূচী প্রযোক্তব্যা ভাণ্ডেন সহ তাণ্ডবে .. ৩১৮
মহেশ্বরস্য চরিতং য ইদং সম্প্রযোজযেত্
সর্বপাপবিশুদ্ধাত্মা শিবলোকং স গচ্ছতি .. ৩১৯..
এবমেষ বিধিঃ সৃ(র্দৃ)ষ্টস্তাণ্ডবস্য প্রযোগতঃ .
ভূযঃ কিং কথ্যতামন্যন্নাট্যবেদবিধিং প্রতি .. ৩২০..
ইতি ভারতীযে নাট্যশাস্ত্রে তাণ্ডবলক্ষণং নাম চতুর্থোঽধ্যাযঃ ..
<
