.. হঠ-যোগ-প্রদীপিকা ..
|| ১|| প্রথমোপদেশঃ
শ্রী-আদি-নাথায় নমোঽস্তু তস্মৈ
যেনোপদিষ্টা হঠ-যোগ-বিদ্যা |
বিভ্রাজতে প্রোন্নত-রাজ-যোগম্
আরোঢুমিচ্ছোরধিরোহিণীব || ১||
প্রণম্য শ্রী-গুরুং নাথং স্বাত্মারামেণ যোগিনা |
কেবলং রাজ-যোগায় হঠ-বিদ্যোপদিশ্যতে || ২||
ভ্রান্ত্যা বহুমত-ধ্বান্তে রাজ-যোগমজানতাম্ |
হঠ-প্রদীপিকাং ধত্তে স্বাত্মারামঃ কৃপাকরঃ || ৩||
হঠ-বিদ্যাং হি মৎস্যেন্দ্র-গোরক্ষাদ্যা বিজানতে |
স্বাত্মারামোঽথবা যোগী জানীতে তৎ-প্রসাদতঃ || ৪||
শ্রী-আদিনাথ-মৎস্যেন্দ্র-শাবরানন্দ-ভৈরবাঃ |
চৌরঙ্গী-মীন-গোরক্ষ-বিরূপাক্ষ-বিলেশয়াঃ || ৫||
মন্থানো ভৈরবো যোগী সিদ্ধির্বুদ্ধশ্চ কন্থডিঃ |
কোরংটকঃ সুরানন্দঃ সিদ্ধপাদশ্চ চর্পটিঃ || ৬||
কানেরী পূজ্যপাদশ্চ নিত্য-নাথো নিরঞ্জনঃ |
কপালী বিন্দুনাথশ্চ কাকচণ্ডীশ্বরাহ্বয়ঃ || ৭||
অল্লামঃ প্রভুদেবশ্চ ঘোডা চোলী চ টিংটিণিঃ |
ভানুকী নারদেবশ্চ খণ্ডঃ কাপালিকস্তথা || ৮||
ইত্যাদয়ো মহাসিদ্ধা হঠ-যোগ-প্রভাবতঃ |
খণ্ডয়িৎবা কাল-দণ্ডং ব্রহ্মাণ্ডে বিচরন্তি তে || ৯||
অশেষ-তাপ-তপ্তানাং সমাশ্রয়-মঠো হঠঃ |
অশেষ-যোগ-যুক্তানামাধার-কমঠো হঠঃ || ১০||
হঠ-বিদ্যা পরং গোপ্যা যোগিনা সিদ্ধিমিচ্ছতা |
ভবেদ্বীর্যবতী গুপ্তা নির্বীর্যা তু প্রকাশিতা || ১১||
সুরাজ্যে ধার্মিকে দেশে সুভিক্ষে নিরুপদ্রবে |
ধনুঃ প্রমাণ-পর্যন্তং শিলাগ্নি-জল-বর্জিতে |
একান্তে মঠিকা-মধ্যে স্থাতব্যং হঠ-যোগিনা || ১২||
অল্প-দ্বারমরন্ধ্র-গর্ত-বিবরং নাত্যুচ্চ-নীচায়তং
সম্যগ্-গোময়-সান্দ্র-লিপ্তমমলং নিঃশেস-জন্তূজ্ঝিতম্ |
বাহ্যে মণ্ডপ-বেদি-কূপ-রুচিরং প্রাকার-সংবেষ্টিতং
প্রোক্তং যোগ-মঠস্য লক্ষণমিদং সিদ্ধৈর্হঠাভ্যাসিভিঃ || ১৩||
এবং বিধে মঠে স্থিৎবা সর্ব-চিন্তা-বিবর্জিতঃ |
গুরূপদিষ্ট-মার্গেণ যোগমেব সমভ্যসেৎ || ১৪||
অত্যাহারঃ প্রয়াসশ্চ প্রজল্পো নিয়মাগ্রহঃ |
জন-সঙ্গশ্চ লৌল্যং চ ষড্ভির্যোগো বিনশ্যতি || ১৫||
উৎসাহাৎসাহসাদ্ধৈর্যাত্তত্ত্ব-জ্ঞানাশ্চ নিশ্চয়াৎ |
জন-সঙ্গ-পরিত্যাগাৎষড্ভির্যোগঃ প্রসিদ্ধ্যতি || ১৬||
অথ যম-নিয়মাঃ
অহিংসা সত্যমস্তেয়ং ব্রহ্মচর্যং ক্ষমা ধৃতিঃ |
দয়ার্জবং মিতাহারঃ শৌচং চৈব যমা দশ || ১৭||
তপঃ সন্তোষ আস্তিক্যং দানমীশ্বর-পূজনম্ |
সিদ্ধান্ত-বাক্য-শ্রবণং হ্রীমতী চ তপো হুতম্ |
নিয়মা দশ সম্প্রোক্তা যোগ-শাস্ত্র-বিশারদৈঃ || ১৮||
অথ আসনম্
হঠস্য প্রথমাঙ্গৎবাদাসনং পূর্বমুচ্যতে |
কুর্যাত্তদাসনং স্থৈর্যমারোগ্যং চাঙ্গ-লাঘবম্ || ১৯||
বশিষ্ঠাদ্যৈশ্চ মুনিভির্মৎস্যেন্দ্রাদ্যৈশ্চ যোগিভিঃ |
অঙ্গীকৃতান্যাসনানি কথ্যন্তে কানিচিন্ময়া || ২০||
জানূর্বোরন্তরে সম্যক্কৃৎবা পাদ-তলে উভে |
ঋজু-কায়ঃ সমাসীনঃ স্বস্তিকং তৎপ্রচক্ষতে || ২১||
সব্যে দক্ষিণ-গুল্কং তু পৃষ্ঠ-পার্শ্বে নিয়োজয়েৎ |
দক্ষিণেঽপি তথা সব্যং গোমুখং গোমুখাকৃতিঃ || ২২||
একং পাদং তথৈকস্মিন্বিন্যসেদুরুণি স্থিরম্ |
ইতরস্মিংস্তথা চোরুং বীরাসনমিতীরিতম্ || ২৩||
গুদং নিরুধ্য গুল্ফাভ্যাং ব্যুৎক্রমেণ সমাহিতঃ |
কূর্মাসনং ভবেদেতদিতি যোগ-বিদো বিদুঃ || ২৪||
পদ্মাসনং তু সংস্থাপ্য জানূর্বোরন্তরে করৌ |
নিবেশ্য ভূমৌ সংস্থাপ্য ব্যোমস্থং কুক্কুটাসনম্ || ২৫||
কুক্কুটাসন-বন্ধ-স্থো দোর্ভ্যাং সম্বদ্য কন্ধরাম্ |
ভবেদ্কূর্মবদুত্তান এতদুত্তান-কূর্মকম্ || ২৬||
পাদাঙ্গুষ্ঠৌ তু পাণিভ্যাং গৃহীৎবা শ্রবণাবধি |
ধনুরাকর্ষণং কুর্যাদ্ধনুর্-আসনমুচ্যতে || ২৭||
বামোরু-মূলার্পিত-দক্ষ-পাদং
জানোর্বহির্বেষ্টিত-বাম-পাদম্ |
প্রগৃহ্য তিষ্ঠেৎপরিবর্তিতাঙ্গঃ
শ্রী-মত্য্সনাথোদিতমাসনং স্যাৎ || ২৮||
মৎস্যেন্দ্র-পীঠং জঠর-প্রদীপ্তিং
প্রচণ্ড-রুগ্মণ্ডল-খণ্ডনাস্ত্রম্ |
অভ্যাসতঃ কুণ্ডলিনী-প্রবোধং
চন্দ্র-স্থিরৎবং চ দদাতি পুংসাম্ || ২৯||
প্রসার্য পাদৌ ভুবি দণ্ড-রূপৌ
দোর্ভ্যাং পদাগ্র-দ্বিতয়ং গৃহীৎবা |
জানূপরিন্যস্ত-ললাট-দেশো
বসেদিদং পশ্চিমতানমাহুঃ || ৩০||
ইতি পশ্চিমতানমাসনাগ্র্যং
পবনং পশ্চিম-বাহিনং করোতি |
উদয়ং জঠরানলস্য কুর্যাদ্
উদরে কার্শ্যমরোগতাং চ পুংসাম্ || ৩১||
ধরামবষ্টভ্য কর-দ্বয়েন
তৎ-কূর্পর-স্থাপিত-নাভি-পার্শ্বঃ |
উচ্চাসনো দণ্ডবদুত্থিতঃ খে
মায়ূরমেতৎপ্রবদন্তি পীঠম্ || ৩২||
হরতি সকল-রোগানাশু গুল্মোদরাদীন্
অভিভবতি চ দোষানাসনং শ্রী-ময়ূরম্ |
বহু কদশন-ভুক্তং ভস্ম কুর্যাদশেষং
জনয়তি জঠরাগ্নিং জারয়েৎকাল-কূটম্ || ৩৩||
উত্তানং শববদ্ভূমৌ শয়নং তচ্ছবাসনম্ |
শবাসনং শ্রান্তি-হরং চিত্ত-বিশ্রান্তি-কারকম্ || ৩৪||
চতুরশীত্যাসনানি শিবেন কথিতানি চ |
তেভ্যশ্চতুষ্কমাদায় সারভূতং ব্রবীম্যহম্ || ৩৫||
সিদ্ধং পদ্মং তথা সিংহং ভদ্রং বেতি চতুষ্টয়ম্ |
শ্রেষ্ঠং তত্রাপি চ সুখে তিষ্ঠেৎসিদ্ধাসনে সদা || ৩৬||
অথ সিদ্ধাসনম্
যোনি-স্থানকমঙ্ঘ্রি-মূল-ঘটিতং কৃৎবা দৃঢং বিন্যসেৎ
মেণ্ঢ্রে পাদমথৈকমেব হৃদয়ে কৃৎবা হনুং সুস্থিরম্ |
স্থাণুঃ সংযমিতেন্দ্রিয়োঽচল-দৃশা পশ্যেদ্ভ্রুবোরন্তরং
হ্যেতন্মোক্ষ-কপাট-ভেদ-জনকং সিদ্ধাসনং প্রোচ্যতে || ৩৭||
মেণ্ঢ্রাদুপরি বিন্যস্য সব্যং গুল্ফং তথোপরি |
গুল্ফান্তরং চ নিক্ষিপ্য সিদ্ধাসনমিদং ভবেৎ || ৩৮||
এতৎসিদ্ধাসনং প্রাহুরন্যে বজ্রাসনং বিদুঃ |
মুক্তাসনং বদন্ত্যেকে প্রাহুর্গুপ্তাসনং পরে || ৩৯||
যমেষ্বিব মিতাহারমহিংসা নিয়মেষ্বিব |
মুখ্যং সর্বাসনেষ্বেকং সিদ্ধাঃ সিদ্ধাসনং বিদুঃ || ৪০||
চতুরশীতি-পীঠেষু সিদ্ধমেব সদাভ্যসেৎ |
দ্বাসপ্ততি-সহস্রাণাং নাডীনাং মল-শোধনম্ || ৪১||
আত্ম-ধ্যায়ী মিতাহারী যাবদ্দ্বাদশ-বৎসরম্ |
সদা সিদ্ধাসনাভ্যাসাদ্যোগী নিষ্পত্তিমাপ্নুয়াৎ || ৪২||
কিমন্যৈর্বহুভিঃ পীঠৈঃ সিদ্ধে সিদ্ধাসনে সতি |
প্রাণানিলে সাবধানে বদ্ধে কেবল-কুম্ভকে |
উৎপদ্যতে নিরায়াসাৎস্বয়মেবোন্মনী কলা || ৪৩||
তথৈকাস্মিন্নেব দৃঢে সিদ্ধে সিদ্ধাসনে সতি |
বন্ধ-ত্রয়মনায়াসাৎস্বয়মেবোপজায়তে || ৪৪||
নাসনং সিদ্ধ-সদৃশং ন কুম্ভঃ কেবলোপমঃ |
ন খেচরী-সমা মুদ্রা ন নাদ-সদৃশো লয়ঃ || ৪৫||
অথ পদ্মাসনম্
বামোরূপরি দক্ষিণং চ চরণং সংস্থাপ্য বামং তথা
দক্ষোরূপরি পশ্চিমেন বিধিনা ধৃৎবা করাভ্যাং দৃঢম্ |
অঙ্গুষ্ঠৌ হৃদয়ে নিধায় চিবুকং নাসাগ্রমালোকয়েৎ
এতদ্ব্যাধি-বিনাশ-কারি যমিনাং পদ্মাসনং প্রোচ্যতে || ৪৬||
উত্তানৌ চরণৌ কৃৎবা ঊরু-সংস্থৌ প্রয়ত্নতঃ |
ঊরু-মধ্যে তথোত্তানৌ পাণী কৃৎবা ততো দৃশৌ || ৪৭||
নাসাগ্রে বিন্যসেদ্রাজদ্-অন্ত-মূলে তু জিহ্বয়া |
উত্তম্ভ্য চিবুকং বক্ষস্যুত্থাপ্য্ পবনং শনৈঃ || ৪৮||
ইদং পদ্মাসনং প্রোক্তং সর্ব-ব্যাধি-বিনাশনম্ |
দুর্লভং যেন কেনাপি ধীমতা লভ্যতে ভুবি || ৪৯||
কৃৎবা সম্পুটিতৌ করৌ দৃঢতরং বদ্ধ্বা তু পদ্মমাসনং
গাঢং বক্ষসি সন্নিধায় চিবুকং ধ্যায়ংশ্চ তচ্চেতসি |
বারং বারমপানমূর্ধ্বমনিলং প্রোৎসারয়ন্পূরিতং
ন্যঞ্চন্প্রাণমুপৈতি বোধমতুলং শক্তি-প্রভাবান্নরঃ || ৫০||
পদ্মাসনে স্থিতো যোগী নাডী-দ্বারেণ পূরিতম্ |
মারুতং ধারয়েদ্যস্তু স মুক্তো নাত্র সংশয়ঃ || ৫১||
অথ সিংহাসনম্
গুল্ফৌ চ বৃষণস্যাধঃ সীবন্ত্যাঃ পার্শ্বয়োঃ ক্ষিপেৎ |
দক্ষিণে সব্য-গুল্ফং তু দক্ষ-গুল্ফং তু সব্যকে || ৫২||
হস্তৌ তু জান্বোঃ সংস্থাপ্য স্বাঙ্গুলীঃ সম্প্রসার্য চ |
ব্যাত্ত-বক্তো নিরীক্ষেত নাসাগ্রং সুসমাহিতঃ || ৫৩||
সিংহাসনং ভবেদেতৎপূজিতং যোগি-পুঙ্গবৈঃ |
বন্ধ-ত্রিতয়-সন্ধানং কুরুতে চাসনোত্তমম্ || ৫৪||
অথ ভদ্রাসনম্
গুল্ফৌ চ বৃষণস্যাধঃ সীবন্ত্যাঃ পার্শ্বয়োঃ ক্ষিপ্তে |
সব্য-গুল্ফং তথা সব্যে দক্ষ-গুল্ফং তু দক্ষিণে || ৫৫||
পার্শ্ব-পাদৌ চ পাণিভ্যাং দৃঢং বদ্ধ্বা সুনিশ্চলম্ |
ভদ্রাসনং ভবেদেতৎসর্ব-ব্যাধি-বিনাশনম্ |
গোরক্ষাসনমিত্যাহুরিদং বৈ সিদ্ধ-যোগিনঃ || ৫৬||
এবমাসন-বন্ধেষু যোগীন্দ্রো বিগত-শ্রমঃ |
অভ্যসেন্নাডিকা-শুদ্ধিং মুদ্রাদি-পবনী-ক্রিয়াম্ || ৫৭||
আসনং কুম্ভকং চিত্রং মুদ্রাখ্যং করণং তথা |
অথ নাদানুসন্ধানমভ্যাসানুক্রমো হঠে || ৫৮||
ব্রহ্মচারী মিতাহারী ত্যাগী যোগ-পরায়ণঃ |
অব্দাদূর্ধ্বং ভবেদ্সিদ্ধো নাত্র কার্যা বিচারণা || ৫৯||
সুস্নিগ্ধ-মধুরাহারশ্চতুর্থাংশ-বিবর্জিতঃ |
ভুজ্যতে শিব-সম্প্রীত্যৈ মিতাহারঃ স উচ্যতে || ৬০||
কট্বাম্ল-তীক্ষ্ণ-লবণোষ্ণ-হরীত-শাক-
সৌবীর-তৈল-তিল-সর্ষপ-মদ্য-মৎস্যান্ |
আজাদি-মাংস-দধি-তক্র-কুলত্থকোল-
পিণ্যাক-হিঙ্গু-লশুনাদ্যমপথ্যমাহুঃ || ৬১||
ভোজনমহিতং বিদ্যাৎপুনরস্যোষ্ণী-কৃতং রূক্ষম্ |
অতিলবণমম্ল-যুক্তং কদশন-শাকোৎকং বর্জ্যম্ || ৬২||
বহ্নি-স্ত্রী-পথি-সেবানামাদৌ বর্জনমাচরেৎ || ৬৩||
তথা হি গোরক্ষ-বচনম্
বর্জয়েদ্দুর্জন-প্রান্তং বহ্নি-স্ত্রী-পথি-সেবনম্ |
প্রাতঃ-স্নানোপবাসাদি কায়-ক্লেশ-বিধিং তথা || ৬৪||
গোধূম-শালি-যব-ষাষ্টিক-শোভনান্নং
ক্ষীরাজ্য-খণ্ড-নবনীত-সিদ্ধা-মধূনি |
শুণ্ঠী-পটোল-কফলাদিক-পঞ্চ-শাকং
মুদ্গাদি-দিব্যমুদকং চ যমীন্দ্র-পথ্যম্ || ৬৫||
পুষ্টং সুমধুরং স্নিগ্ধং গব্যং ধাতু-প্রপোষণম্ |
মনোভিলষিতং যোগ্যং যোগী ভোজনমাচরেৎ || ৬৬||
যুবো বৃদ্ধোঽতিবৃদ্ধো বা ব্যাধিতো দুর্বলোঽপি বা |
অভ্যাসাৎসিদ্ধিমাপ্নোতি সর্ব-যোগেষ্বতন্দ্রিতঃ || ৬৭||
ক্রিয়া-যুক্তস্য সিদ্ধিঃ স্যাদক্রিয়স্য কথং ভবেৎ |
ন শাস্ত্র-পাঠ-মাত্রেণ যোগ-সিদ্ধিঃ প্রজায়তে || ৬৮||
ন বেষ-ধারণং সিদ্ধেঃ কারণং ন চ তৎ-কথা |
ক্রিয়ৈব কারণং সিদ্ধেঃ সত্যমেতন্ন সংশয়ঃ || ৬৯||
পীঠানি কুম্ভকাশ্চিত্রা দিব্যানি করণানি চ |
সর্বাণ্যপি হঠাভ্যাসে রাজ-যোগ-ফলাবধি || ৭০||
ইতি হঠ-প্রদীপিকায়াং প্রথমোপদেশঃ |
|| ২|| দ্বিতীয়োপদেশঃ
অথাসনে দৃধে যোগী বশী হিত-মিতাশনঃ |
গুরূপদিষ্ট-মার্গেণ প্রাণায়ামান্সমভ্যসেৎ || ১||
চলে বাতে চলং চিত্তং নিশ্চলে নিশ্চলং ভবেৎ||
যোগী স্থাণুৎবমাপ্নোতি ততো বায়ুং নিরোধয়েৎ || ২||
যাবদ্বায়ুঃ স্থিতো দেহে তাবজ্জীবনমুচ্যতে |
মরণং তস্য নিষ্ক্রান্তিস্ততো বায়ুং নিরোধয়েৎ || ৩||
মলাকলাসু নাডীষু মারুতো নৈব মধ্যগঃ |
কথং স্যাদুন্মনীভাবঃ কার্য-সিদ্ধিঃ কথং ভবেৎ || ৪||
শুদ্ধমেতি যদা সর্বং নাডী-চক্রং মলাকুলম্ |
তদৈব জায়তে যোগী প্রাণ-সংগ্রহণে ক্ষমঃ || ৫||
প্রাণায়ামং ততঃ কুর্যান্নিত্যং সাত্ত্বিকয়া ধিয়া |
যথা সুষুম্ণা-নাডীস্থা মলাঃ শুদ্ধিং প্রয়ান্তি চ || ৬||
বদ্ধ-পদ্মাসনো যোগী প্রাণং চন্দ্রেণ পূরয়েৎ |
ধারয়িৎবা যথা-শক্তি ভূয়ঃ সূর্যেণ রেচয়েৎ || ৭||
প্রাণং সূর্যেণ চাকৃষ্য পূরয়েদুদরং শনৈঃ |
বিধিবৎকুম্ভকং কৃৎবা পুনশ্চন্দ্রেণ রেচয়েৎ || ৮||
যেন ত্যজেত্তেন পীৎবা ধারয়েদতিরোধতঃ |
রেচয়েচ্চ ততোঽন্যেন শনৈরেব ন বেগতঃ || ৯||
প্রাণং চেদিডয়া পিবেন্নিয়মিতং ভূয়োঽন্যথা রেচয়েৎ
পীৎবা পিঙ্গলয়া সমীরণমথো বদ্ধ্বা ত্যজেদ্বাময়া |
সূর্য-চন্দ্রমসোরনেন বিধিনাভ্যাসং সদা তন্বতাং
শুদ্ধা নাডি-গণা ভবন্তি যমিনাং মাস-ত্রয়াদূর্ধ্বতঃ || ১০||
প্রাতর্মধ্যন্দিনে সায়মর্ধ-রাত্রে চ কুম্ভকান্ |
শনৈরশীতি-পর্যন্তং চতুর্বারং সমভ্যসেৎ || ১১||
কনীয়সি ভবেদ্স্বেদ কম্পো ভবতি মধ্যমে |
উত্তমে স্থানমাপ্নোতি ততো বায়ুং নিবন্ধয়েৎ || ১২||
জলেন শ্রম-জাতেন গাত্র-মর্দনমাচরেৎ |
দৃঢতা লঘুতা চৈব তেন গাত্রস্য জায়তে || ১৩||
অভ্যাস-কালে প্রথমে শস্তং ক্ষীরাজ্য-ভোজনম্ |
ততোঽভ্যাসে দৃঢীভূতে ন তাদৃঙ্-নিয়ম-গ্রহঃ || ১৪||
যথা সিংহো গজো ব্যাঘ্রো ভবেদ্বশ্যঃ শনৈঃ শনৈঃ |
তথৈব সেবিতো বায়ুরন্যথা হন্তি সাধকম্ || ১৫||
প্রাণায়ামেন যুক্তেন সর্ব-রোগ-ক্ষয়ো ভবেৎ |
অয়ুক্তাভ্যাস-যোগেন সর্ব-রোগ-সমুদ্গমঃ || ১৬||
হিক্কা শ্বাসশ্চ কাসশ্চ শিরঃ-কর্ণাক্ষি-বেদনাঃ |
ভবন্তি বিবিধাঃ রোগাঃ পবনস্য প্রকোপতঃ || ১৭||
যুক্তং যুক্তং ত্যজেদ্বায়ুং যুক্তং যুক্তং চ পূরয়েৎ |
যুক্তং যুক্তং চ বধ্নীয়াদেবং সিদ্ধিমবাপ্নুয়াৎ || ১৮||
যদা তু নাডী-শুদ্ধিঃ স্যাত্তথা চিহ্নানি বাহ্যতঃ |
কায়স্য কৃশতা কান্তিস্তদা জায়তে নিশ্চিতম্ || ১৯||
যথেষ্টং ধারণং বায়োরনলস্য প্রদীপনম্ |
নাদাভিব্যক্তিরারোগ্যং জায়তে নাডি-শোধনাৎ || ২০||
মেদ-শ্লেষ্মাধিকঃ পূর্বং ষট্-কর্মাণি সমাচরেৎ |
অন্যস্তু নাচরেত্তানি দোষাণাং সমভাবতঃ || ২১||
ধৌতির্বস্তিস্তথা নেতিস্ত্রাটকং নৌলিকং তথা |
কপাল-ভাতিশ্চৈতানি ষট্-কর্মাণি প্রচক্ষতে || ২২||
কর্ম ষট্কমিদং গোপ্যং ঘট-শোধন-কারকম্ |
বিচিত্র-গুণ-সন্ধায় পূজ্যতে যোগি-পুঙ্গবৈঃ || ২৩||
তত্র ধৌতিঃ
চতুর্-অঙ্গুল-বিস্তারং হস্ত-পঞ্চ-দশায়তম্ |
গুরূপদিষ্ট-মার্গেণ সিক্তং বস্ত্রং শনৈর্গ্রসেৎ |
পুনঃ প্রত্যাহরেচ্চৈতদুদিতং ধৌতি-কর্ম তৎ || ২৪||
কাস-শ্বাস-প্লীহ-কুষ্ঠং কফরোগাশ্চ বিংশতিঃ |
ধৌতি-কর্ম-প্রভাবেণ প্রয়ান্ত্যেব ন সংশয়ঃ || ২৫||
অথ বস্তিঃ
নাভি-দঘ্ন-জলে পায়ৌ ন্যস্ত-নালোৎকটাসনঃ |
আধারাকুঞ্চনং কুর্যাৎক্ষালনং বস্তি-কর্ম তৎ || ২৬||
গুল্ম-প্লীহোদরং চাপি বাত-পিত্ত-কফোদ্ভবাঃ |
বস্তি-কর্ম-প্রভাবেণ ক্ষীয়ন্তে সকলাময়াঃ || ২৭||
ধান্ত্বদ্রিয়ান্তঃ-করণ-প্রসাদং
দধাচ্চ কান্তিং দহন-প্রদীপ্তম্ |
অশেষ-দোষোপচয়ং নিহন্যাদ্
অভ্যস্যমানং জল-বস্তি-কর্ম || ২৮||
অথ নেতিঃ
সূত্রং বিতস্তি-সুস্নিগ্ধং নাসানালে প্রবেশয়েৎ |
মুখান্নির্গময়েচ্চৈষা নেতিঃ সিদ্ধৈর্নিগদ্যতে || ২৯||
কপাল-শোধিনী চৈব দিব্য-দৃষ্টি-প্রদায়িনী |
জত্রূর্ধ্ব-জাত-রোগৌঘং নেতিরাশু নিহন্তি চ || ৩০||
অথ ত্রাটকম্
নিরীক্ষেন্নিশ্চল-দৃশা সূক্ষ্ম-লক্ষ্যং সমাহিতঃ |
অশ্রু-সম্পাত-পর্যন্তমাচার্যৈস্ত্রাটকং স্মৃতম্ || ৩১||
মোচনং নেত্র-রোগাণাং তন্দাদ্রীণাং কপাটকম্ |
যত্নতস্ত্রাটকং গোপ্যং যথা হাটক-পেটকম্ || ৩২||
অথ নৌলিঃ
অমন্দাবর্ত-বেগেন তুন্দং সব্যাপসব্যতঃ |
নতাংসো ভ্রাময়েদেষা নৌলিঃ সিদ্ধৈঃ প্রশস্যতে || ৩৩||
মন্দাগ্নি-সন্দীপন-পাচনাদি-
সন্ধাপিকানন্দ-করী সদৈব |
অশেষ-দোষ-ময়-শোষণী চ
হঠ-ক্রিয়া মৌলিরিয়ং চ নৌলিঃ || ৩৪||
অথ কপালভাতিঃ
ভস্ত্রাবল্লোহ-কারস্য রেচ-পূরৌ সসম্ভ্রমৌ |
কপালভাতির্বিখ্যাতা কফ-দোষ-বিশোষণী || ৩৫||
ষট্-কর্ম-নির্গত-স্থৌল্য-কফ-দোষ-মলাদিকঃ |
প্রাণায়ামং ততঃ কুর্যাদনায়াসেন সিদ্ধ্যতি || ৩৬||
প্রাণায়ামৈরেব সর্বে প্রশুষ্যন্তি মলা ইতি |
আচার্যাণাং তু কেষাংচিদন্যৎকর্ম ন সংমতম্ || ৩৭||
অথ গজ-করণী
উদর-গত-পদার্থমুদ্বমন্তি
পবনমপানমুদীর্য কণ্ঠ-নালে |
ক্রম-পরিচয়-বশ্য-নাডি-চক্রা
গজ-করণীতি নিগদ্যতে হঠজ্ঞৈঃ || ৩৮||
ব্রহ্মাদয়োঽপি ত্রিদশাঃ পবনাভ্যাস-তৎপরাঃ |
অভূবন্নন্তক-ভ্যাত্তস্মাৎপবনমভ্যসেৎ || ৩৯||
যাবদ্বদ্ধো মরুদ্-দেশে যাবচ্চিত্তং নিরাকুলম্ |
যাবদ্দৃষ্টির্ভ্রুবোর্মধ্যে তাবৎকাল-ভয়ং কুতঃ || ৪০||
বিধিবৎপ্রাণ-সংযামৈর্নাডী-চক্রে বিশোধিতে |
সুষুম্ণা-বদনং ভিত্ত্বা সুখাদ্বিশতি মারুতঃ || ৪১||
অথ মনোন্মনী
মারুতে মধ্য-সংচারে মনঃ-স্থৈর্যং প্রজায়তে |
যো মনঃ-সুস্থিরী-ভাবঃ সৈবাবস্থা মনোন্মনী || ৪২||
তৎ-সিদ্ধয়ে বিধানজ্ঞাশ্চিত্রান্কুর্বন্তি কুম্ভকান্ |
বিচিত্র কুম্ভকাভ্যাসাদ্বিচিত্রাং সিদ্ধিমাপ্নুয়াৎ || ৪৩||
অথ কুম্ভক-ভেদাঃ
সূর্য-ভেদনমুজ্জায়ী সীৎকারী শীতলী তথা |
ভস্ত্রিকা ভ্রামরী মূর্চ্ছা প্লাবিনীত্যষ্ট-কুম্ভকাঃ || ৪৪||
পূরকান্তে তু কর্তব্যো বন্ধো জালন্ধরাভিধঃ |
কুম্ভকান্তে রেচকাদৌ কর্তব্যস্তূড্ডিয়ানকঃ || ৪৫||
অধস্তাৎকুঞ্চনেনাশু কণ্ঠ-সঙ্কোচনে কৃতে |
মধ্যে পশ্চিম-তানেন স্যাৎপ্রাণো ব্রহ্ম-নাডিগঃ || ৪৬||
আপানমূর্ধ্বমুত্থাপ্য প্রাণং কণ্ঠাদধো নয়েৎ |
যোগী জরা-বিমুক্তঃ সন্ষোডশাব্দ-বয়া ভবেৎ || ৪৭||
অথ সূর্য-ভেদনম্
আসনে সুখদে যোগী বদ্ধ্বা চৈবাসনং ততঃ |
দক্ষ-নাড্যা সমাকৃষ্য বহিঃস্থং পবনং শনৈঃ || ৪৮||
আকেশাদানখাগ্রাচ্চ নিরোধাবধি কুম্ভয়েৎ |
ততঃ শনৈঃ সব্য-নাড্যা রেচয়েৎপবনং শনৈঃ || ৪৯||
কপাল-শোধনং বাত-দোষ-ঘ্নং কৃমি-দোষ-হৃৎ |
পুনঃ পুনরিদং কার্যং সূর্য-ভেদনমুত্তমম্ || ৫০||
অথ উজ্জায়ী
মুখং সংযম্য নাডীভ্যামাকৃষ্য পবনং শনৈঃ |
যথা লগতি কণ্ঠাত্তু হৃদয়াবধি স-স্বনম্ || ৫১||
পূর্ববৎকুম্ভয়েৎপ্রাণং রেচয়েদিডয়া তথা |
শ্লেষ্ম-দোষ-হরং কণ্ঠে দেহানল-বিবর্ধনম্ || ৫২||
নাডী-জলোদরাধাতু-গত-দোষ-বিনাশনম্ |
গচ্ছতা তিষ্ঠতা কার্যমুজ্জায়্যাখ্যং তু কুম্ভকম্ || ৫৩||
অথ সীৎকারী
সীৎকাং কুর্যাত্তথা বক্ত্রে ঘ্রাণেনৈব বিজৃম্ভিকাম্ |
এবমভ্যাস-যোগেন কাম-দেবো দ্বিতীয়কঃ || ৫৪||
যোগিনী চক্র-সংমান্যঃ সৃষ্টি-সংহার-কারকঃ |
ন ক্ষুধা ন তৃষা নিদ্রা নৈবালস্যং প্রজায়তে || ৫৫||
ভবেৎসত্ত্বং চ দেহস্য সর্বোপদ্রব-বর্জিতঃ |
অনেন বিধিনা সত্যং যোগীন্দ্রো ভূমি-মণ্ডলে || ৫৬||
অথ শীতলী
জিহ্বয়া বায়ুমাকৃষ্য পূর্ববৎকুম্ভ-সাধনম্ |
শনকৈর্ঘ্রাণ-রন্ধ্রাভ্যাং রেচয়েৎপবনং সুধীঃ || ৫৭||
গুল্ম-প্লীহাদিকান্রোগান্জ্বরং পিত্তং ক্ষুধাং তৃষাম্ |
বিষাণি শীতলী নাম কুম্ভিকেয়ং নিহন্তি হি || ৫৮||
অথ ভস্ত্রিকা
ঊর্বোরুপরি সংস্থাপ্য শুভে পাদ-তলে উভে |
পদ্মাসনং ভবেদেতৎসর্ব-পাপ-প্রণাশনম্ || ৫৯||
সম্যক্পদ্মাসনং বদ্ধ্বা সম-গ্রীবোদরঃ সুধীঃ |
মুখং সংযম্য যত্নেন প্রাণং ঘ্রাণেন রেচয়েৎ || ৬০||
যথা লগতি হৃৎ-কণ্ঠে কপালাবধি স-স্বনম্ |
বেগেন পূরয়েচ্চাপি হৃৎ-পদ্মাবধি মারুতম্ || ৬১||
পুনর্বিরেচয়েত্তদ্বৎপূরয়েচ্চ পুনঃ পুনঃ |
যথৈব লোহকারেণ ভস্ত্রা বেগেন চাল্যতে || ৬২||
তথৈব স্ব-শরীর-স্থং চালয়েৎপবনং ধিয়া |
যদা শ্রমো ভবেদ্দেহে তদা সূর্যেণ পূরয়েৎ || ৬৩||
যথোদরং ভবেৎপূর্ণমনিলেন তথা লঘু |
ধারয়েন্নাসিকাং মধ্যা-তর্জনীভ্যাং বিনা দৃঢম্ || ৬৪||
বিধিবৎকুম্ভকং কৃৎবা রেচয়েদিডয়ানিলম্ |
বাত-পিত্ত-শ্লেষ্ম-হরং শরীরাগ্নি-বিবর্ধনম্ || ৬৫||
কুণ্ডলী বোধকং ক্ষিপ্রং পবনং সুখদং হিতম্ |
ব্রহ্ম-নাডী-মুখে সংস্থ-কফাদ্য্-অর্গল-নাশনম্ || ৬৬||
সম্যগ্গাত্র-সমুদ্ভূত-গ্রন্থি-ত্রয়-বিভেদকম্ |
বিশেষেণৈব কর্তব্যং ভস্ত্রাখ্যং কুম্ভকং ৎবিদম্ || ৬৭||
অথ ভ্রামরী
বেগাদ্ঘোষং পূরকং ভৃঙ্গ-নাদং
ভৃঙ্গী-নাদং রেচকং মন্দ-মন্দম্ |
যোগীন্দ্রাণমেবমভ্যাস-যোগাচ্
চিত্তে জাতা কাচিদানন্দ-লীলা || ৬৮||
অথ মূর্চ্ছা
পূরকান্তে গাঢতরং বদ্ধ্বা জালন্ধরং শনৈঃ |
রেচয়েন্মূর্চ্ছাখ্যেয়ং মনো-মূর্চ্ছা সুখ-প্রদা || ৬৯||
অথ প্লাবিনী
অন্তঃ প্রবর্তিতোদার-মারুতাপূরিতোদরঃ |
পয়স্যগাধেঽপি সুখাৎপ্লবতে পদ্ম-পত্রবৎ || ৭০||
প্রাণায়ামস্ত্রিধা প্রোক্তো রেচ-পূরক-কুম্ভকৈঃ |
সহিতঃ কেবলশ্চেতি কুম্ভকো দ্বিবিধো মতঃ || ৭১||
যাবৎকেবল-সিদ্ধিঃ স্যাৎসহিতং তাবদভ্যসেৎ |
রেচকং পূরকং মুক্ত্বা সুখং যদ্বায়ু-ধারণম্ || ৭২||
প্রাণায়ামোঽযমিত্যুক্তঃ স বৈ কেবল-কুম্ভকঃ |
কুম্ভকে কেবলে সিদ্ধে রেচ-পূরক-বর্জিতে || ৭৩||
ন তস্য দুর্লভং কিংচিত্ত্রিষু লোকেষু বিদ্যতে |
শক্তঃ কেবল-কুম্ভেন যথেষ্টং বায়ু-ধারণাৎ || ৭৪||
রাজ-যোগ-পদং চাপি লভতে নাত্র সংশয়ঃ |
কুম্ভকাৎকুণ্ডলী-বোধঃ কুণ্ডলী-বোধতো ভবেৎ |
অনর্গলা সুষুম্ণা চ হঠ-সিদ্ধিশ্চ জায়তে || ৭৫||
হঠং বিনা রাজয়োগো রাজ-যোগং বিনা হঠঃ |
ন সিধ্যতি ততো যুগ্মমানিষ্পত্তেঃ সমভ্যসেৎ || ৭৬||
কুম্ভক-প্রাণ-রোধান্তে কুর্যাচ্চিত্তং নিরাশ্রয়ম্ |
এবমভ্যাস-যোগেন রাজ-যোগ-পদং ব্রজেৎ || ৭৭||
বপুঃ কৃশৎবং বদনে প্রসন্নতা
নাদ-স্ফুটৎবং নয়নে সুনির্মলে |
অরোগতা বিন্দু-জয়োঽগ্নি-দীপনং
নাডী-বিশুদ্ধির্হঠ-সিদ্ধি-লক্ষণম্ || ৭৮||
ইতি হঠ-প্রদীপিকায়াং দ্বিতীয়োপদেশঃ |
|| ৩|| তৃতীয়োপদেশঃ
স-শৈল-বন-ধাত্রীণাং যথাধারোঽহি-নায়কঃ |
সর্বেষাং যোগ-তন্ত্রাণাং তথাধারো হি কুণ্ডলী || ১||
সুপ্তা গুরু-প্রসাদেন যদা জাগর্তি কুণ্ডলী |
তদা সর্বাণি পদ্মানি ভিদ্যন্তে গ্রন্থয়োঽপি চ || ২||
প্রাণস্য শূন্য-পদবী তদা রাজপথায়তে |
তদা চিত্তং নিরালম্বং তদা কালস্য বঞ্চনম্ || ৩||
সুষুম্ণা শূন্য-পদবী ব্রহ্ম-রন্ধ্রঃ মহাপথঃ |
শ্মশানং শাম্ভবী মধ্য-মার্গশ্চেত্যেক-বাচকাঃ || ৪||
তস্মাৎসর্ব-প্রয়ত্নেন প্রবোধয়িতুমীশ্বরীম্ |
ব্রহ্ম-দ্বার-মুখে সুপ্তাং মুদ্রাভ্যাসং সমাচরেৎ || ৫||
মহামুদ্রা মহাবন্ধো মহাবেধশ্চ খেচরী |
উড্ডীয়ানং মূলবন্ধশ্চ বন্ধো জালন্ধরাভিধঃ || ৬||
করণী বিপরীতাখ্যা বজ্রোলী শক্তি-চালনম্ |
ইদং হি মুদ্রা-দশকং জরা-মরণ-নাশনম্ || ৭||
আদিনাথোদিতং দিব্যমষ্টৈশ্বর্য-প্রদায়কম্ |
বল্লভং সর্ব-সিদ্ধানাং দুর্লভং মরুতামপি || ৮||
গোপনীয়ং প্রয়ত্নেন যথা রত্ন-করণ্ডকম্ |
কস্যচিন্নৈব বক্তব্যং কুল-স্ত্রী-সুরতং যথা || ৯||
অথ মহা-মুদ্রা
পাদ-মূলেন বামেন যোনিং সম্পীড্য দক্ষিণাম্ |
প্রসারিতং পদং কৃৎবা করাভ্যাং ধারয়েদ্দৃঢম্ || ১০||
কণ্ঠে বন্ধং সমারোপ্য ধারয়েদ্বায়ুমূর্ধ্বতঃ |
যথা দণ্ড-হতঃ সর্পো দণ্ডাকারঃ প্রজায়তে || ১১||
ঋজ্বীভূতা তথা শক্তিঃ কুণ্ডলী সহসা ভবেৎ |
তদা সা মরণাবস্থা জায়তে দ্বিপুটাশ্রয়া || ১২||
ততঃ শনৈঃ শনৈরেব রেচয়েন্নৈব বেগতঃ |
মহা-মুদ্রাং চ তেনৈব বদন্তি বিবুধোত্তমাঃ || ১৩||
ইয়ং খলু মহামুদ্রা মহা-সিদ্ধৈঃ প্রদর্শিতা |
মহা-ক্লেশাদয়ো দোষাঃ ক্ষীয়ন্তে মরণাদয়ঃ |
মহা-মুদ্রাং চ তেনৈব বদন্তি বিবুধোত্তমাঃ || ১৪||
চন্দ্রাঙ্গে তু সমভ্যস্য সূর্যাঙ্গে পুনরভ্যসেৎ |
যাবৎ-তুল্যা ভবেৎসঙ্খ্যা ততো মুদ্রাং বিসর্জয়েৎ || ১৫||
ন হি পথ্যমপথ্যং বা রসাঃ সর্বেঽপি নীরসাঃ |
অপি ভুক্তং বিষং ঘোরং পীয়ূষমপি জীর্যতি || ১৬||
ক্ষয়-কুষ্ঠ-গুদাবর্ত-গুল্মাজীর্ণ-পুরোগমাঃ |
তস্য দোষাঃ ক্ষয়ং যান্তি মহামুদ্রাং তু যোঽভ্যসেৎ || ১৭||
কথিতেয়ং মহামুদ্রা মহা-সিদ্ধি-করা নৄণাম্ |
গোপনীয়া প্রয়ত্নেন ন দেয়া যস্য কস্যচিৎ || ১৮||
অথ মহা-বন্ধঃ
পার্ষ্ণিং বামস্য পাদস্য যোনি-স্থানে নিয়োজয়েৎ |
বামোরূপরি সংস্থাপ্য দক্ষিণং চরণং তথা || ১৯||
পূরয়িৎবা ততো বায়ুং হৃদয়ে চুবুকং দৃঢম্ |
নিষ্পীড্যং বায়ুমাকুঞ্চ্য মনো-মধ্যে নিয়োজয়েৎ || ২০||
ধারয়িৎবা যথা-শক্তি রেচয়েদনিলং শনৈঃ |
সব্যাঙ্গে তু সমভ্যস্য দক্ষাঙ্গে পুনরভ্যসেৎ || ২১||
মতমত্র তু কেষাংচিৎকণ্ঠ-বন্ধং বিবর্জয়েৎ |
রাজ-দন্ত-স্থ-জিহ্বায়া বন্ধঃ শস্তো ভবেদিতি || ২২||
অয়ং তু সর্ব-নাডীনামূর্ধ্বং গতি-নিরোধকঃ |
অয়ং খলু মহা-বন্ধো মহা-সিদ্ধি-প্রদায়কঃ || ২৩||
কাল-পাশ-মহা-বন্ধ-বিমোচন-বিচক্ষণঃ |
ত্রিবেণী-সঙ্গমং ধত্তে কেদারং প্রাপয়েন্মনঃ || ২৪||
রূপ-লাবণ্য-সম্পন্না যথা স্ত্রী পুরুষং বিনা |
মহা-মুদ্রা-মহা-বন্ধৌ নিষ্ফলৌ বেধ-বর্জিতৌ || ২৫||
অথ মহা-বেধঃ
মহা-বন্ধ-স্থিতো যোগী কৃৎবা পূরকমেক-ধীঃ |
বায়ূনাং গতিমাবৃত্য নিভৃতং কণ্ঠ-মুদ্রয়া || ২৬||
সম-হস্ত-যুগো ভূমৌ স্ফিচৌ সনাডয়েচ্ছনৈঃ |
পুট-দ্বয়মতিক্রম্য বায়ুঃ স্ফুরতি মধ্যগঃ || ২৭||
সোম-সূর্যাগ্নি-সম্বন্ধো জায়তে চামৃতায় বৈ |
মৃতাবস্থা সমুৎপন্না ততো বায়ুং বিরেচয়েৎ || ২৮||
মহা-বেধোঽযমভ্যাসান্মহা-সিদ্ধি-প্রদায়কঃ |
বলী-পলিত-বেপ-ঘ্নঃ সেব্যতে সাধকোত্তমৈঃ || ২৯||
এতত্ত্রয়ং মহা-গুহ্যং জরা-মৃত্যু-বিনাশনম্ |
বহ্নি-বৃদ্ধি-করং চৈব হ্যণিমাদি-গুণ-প্রদম্ || ৩০||
অষ্টধা ক্রিয়তে চৈব যামে যামে দিনে দিনে |
পুণ্য-সংভার-সন্ধায় পাপৌঘ-ভিদুরং সদা |
সম্যক্-শিক্ষাবতামেবং স্বল্পং প্রথম-সাধনম্ || ৩১||
অথ খেচরী
কপাল-কুহরে জিহ্বা প্রবিষ্টা বিপরীতগা |
ভ্রুবোরন্তর্গতা দৃষ্টির্মুদ্রা ভবতি খেচরী || ৩২||
ছেদন-চালন-দোহৈঃ কলাং ক্রমেণাথ বর্ধয়েত্তাবৎ |
সা যাবদ্ভ্রূ-মধ্যং স্পৃশতি তদা খেচরী-সিদ্ধিঃ || ৩৩||
স্নুহী-পত্র-নিভং শস্ত্রং সুতীক্ষ্ণং স্নিগ্ধ-নির্মলম্ |
সমাদায় ততস্তেন রোম-মাত্রং সমুচ্ছিনেৎ || ৩৪||
ততঃ সৈন্ধব-পথ্যাভ্যাং চূর্ণিতাভ্যাং প্রঘর্ষয়েৎ |
পুনঃ সপ্ত-দিনে প্রাপ্তে রোম-মাত্রং সমুচ্ছিনেৎ || ৩৫||
এবং ক্রমেণ ষণ্-মাসং নিত্যং যুক্তঃ সমাচরেৎ |
ষণ্মাসাদ্রসনা-মূল-শিরা-বন্ধঃ প্রণশ্যতি || ৩৬||
কলাং পরাঙ্মুখীং কৃৎবা ত্রিপথে পরিয়োজয়েৎ |
সা ভবেৎখেচরী মুদ্রা ব্যোম-চক্রং তদুচ্যতে || ৩৭||
রসনামূর্ধ্বগাং কৃৎবা ক্ষণার্ধমপি তিষ্ঠতি |
বিষৈর্বিমুচ্যতে যোগী ব্যাধি-মৃত্যু-জরাদিভিঃ || ৩৮||
ন রোগো মরণং তন্দ্রা ন নিদ্রা ন ক্ষুধা তৃষা |
ন চ মূর্চ্ছা ভবেত্তস্য যো মুদ্রাং বেত্তি খেচরীম্ || ৩৯||
পীড্যতে ন স রোগেণ লিপ্যতে ন চ কর্মণা |
বাধ্যতে ন স কালেন যো মুদ্রাং বেত্তি খেচরীম্ || ৪০||
চিত্তং চরতি খে যস্মাজ্জিহ্বা চরতি খে গতা |
তেনৈষা খেচরী নাম মুদ্রা সিদ্ধৈর্নিরূপিতা || ৪১||
খেচর্যা মুদ্রিতং যেন বিবরং লম্বিকোর্ধ্বতঃ |
ন তস্য ক্ষরতে বিন্দুঃ কামিন্যাঃ শ্লেষিতস্য চ || ৪২||
চলিতোঽপি যদা বিন্দুঃ সম্প্রাপ্তো যোনি-মণ্ডলম্ |
ব্রজত্যূর্ধ্বং হৃতঃ শক্ত্যা নিবদ্ধো যোনি-মুদ্রয়া || ৪৩||
ঊর্ধ্ব-জিহ্বঃ স্থিরো ভূৎবা সোমপানং করোতি যঃ |
মাসার্ধেন ন সন্দেহো মৃত্যুং জয়তি যোগবিৎ || ৪৪||
নিত্যং সোম-কলা-পূর্ণং শরীরং যস্য যোগিনঃ |
তক্ষকেণাপি দষ্টস্য বিষং তস্য ন সর্পতি || ৪৫||
ইন্ধনানি যথা বহ্নিস্তৈল-বর্তি চ দীপকঃ |
তথা সোম-কলা-পূর্ণং দেহী দেহং ন মুঞ্চতি || ৪৬||
গোমাংসং ভক্ষয়েন্নিত্যং পিবেদমর-বারুণীম্ |
কুলীনং তমহং মন্যে চেতরে কুল-ঘাতকাঃ || ৪৭||
গো-শব্দেনোদিতা জিহ্বা তৎপ্রবেশো হি তালুনি |
গো-মাংস-ভক্ষণং তত্তু মহা-পাতক-নাশনম্ || ৪৮||
জিহ্বা-প্রবেশ-সম্ভূত-বহ্নিনোৎপাদিতঃ খলু |
চন্দ্রাৎস্রবতি যঃ সারঃ সা স্যাদমর-বারুণী || ৪৯||
চুম্বন্তী যদি লম্বিকাগ্রমনিশং জিহ্বা-রস-স্যন্দিনী
স-ক্ষারা কটুকাম্ল-দুগ্ধ-সদৃশী মধ্বাজ্য-তুল্যা তথা |
ব্যাধীনাং হরণং জরান্ত-করণং শস্ত্রাগমোদীরণং
তস্য স্যাদমরৎবমষ্ট-গুণিতং সিদ্ধাঙ্গনাকর্ষণম্ || ৫০||
মূর্ধ্নঃ ষোডশ-পত্র-পদ্ম-গলিতং প্রাণাদবাপ্তং হঠাদ্
ঊর্দ্ব্হাস্যো রসনাং নিয়ম্য বিবরে শক্তিং পরাং চিন্তয়ন্ |
উৎকল্লোল-কলা-জলং চ বিমলং ধারাময়ং যঃ পিবেন্
নির্ব্যাধিঃ স মৃণাল-কোমল-বপুর্যোগী চিরং জীবতি || ৫১||
যৎপ্রালেয়ং প্রহিত-সুষিরং মেরু-মূর্ধান্তর-স্থং
তস্মিংস্তত্ত্বং প্রবদতি সুধীস্তন্-মুখং নিম্নগানাম্ |
চন্দ্রাৎসারঃ স্রবতি বপুষস্তেন মৃত্যুর্নরাণাং
তদ্বধ্নীয়াৎসুকরণমধো নান্যথা কায়-সিদ্ধিঃ || ৫২||
সুষিরং জ্ঞান-জনকং পঞ্চ-স্রোতঃ-সমন্বিতম্ |
তিষ্ঠতে খেচরী মুদ্রা তস্মিন্শূন্যে নিরঞ্জনে || ৫৩||
একং সৃষ্টিময়ং বীজমেকা মুদ্রা চ খেচরী |
একো দেবো নিরালম্ব একাবস্থা মনোন্মনী || ৫৪||
অথ উড্ডীয়ান-বন্ধঃ
বদ্ধো যেন সুষুম্ণায়াং প্রাণস্তূড্ডীয়তে যতঃ |
তস্মাদুড্ডীয়নাখ্যোঽযং যোগিভিঃ সমুদাহৃতঃ || ৫৫||
উড্ডীনং কুরুতে যস্মাদবিশ্রান্তং মহা-খগঃ |
উড্ডীয়ানং তদেব স্যাত্তব বন্ধোঽভিধীয়তে || ৫৬||
উদরে পশ্চিমং তানং নাভেরূর্ধ্বং চ কারয়েৎ |
উড্ডীয়ানো হ্যসৌ বন্ধো মৃত্যু-মাতঙ্গ-কেসরী || ৫৭||
উড্ডীয়ানং তু সহজং গুরুণা কথিতং সদা |
অভ্যসেৎসততং যস্তু বৃদ্ধোঽপি তরুণায়তে || ৫৮||
নাভেরূর্ধ্বমধশ্চাপি তানং কুর্যাৎপ্রয়ত্নতঃ |
ষণ্মাসমভ্যসেন্মৃত্যুং জয়ত্যেব ন সংশয়ঃ || ৫৯||
সর্বেষামেব বন্ধানাং উত্তমো হ্যুড্ডীয়ানকঃ |
উড্ডিয়ানে দৃঢে বন্ধে মুক্তিঃ স্বাভাবিকী ভবেৎ || ৬০||
অথ মূল-বন্ধঃ
পার্ষ্ণি-ভাগেন সম্পীড্য যোনিমাকুঞ্চয়েদ্গুদম্ |
অপানমূর্ধ্বমাকৃষ্য মূল-বন্ধোঽভিধীয়তে || ৬১||
অধো-গতিমপানং বা ঊর্ধ্বগং কুরুতে বলাৎ |
আকুঞ্চনেন তং প্রাহুর্মূল-বন্ধং হি যোগিনঃ || ৬২||
গুদং পার্ষ্ণ্যা তু সম্পীড্য বায়ুমাকুঞ্চয়েদ্বলাৎ |
বারং বারং যথা চোর্ধ্বং সমায়াতি সমীরণঃ || ৬৩||
প্রাণাপানৌ নাদ-বিন্দূ মূল-বন্ধেন চৈকতাম্ |
গৎবা যোগস্য সংসিদ্ধিং যচ্ছতো নাত্র সংশয়ঃ || ৬৪||
অপান-প্রাণয়োরৈক্যং ক্ষয়ো মূত্র-পুরীষয়োঃ |
যুবা ভবতি বৃদ্ধোঽপি সততং মূল-বন্ধনাৎ || ৬৫||
অপান ঊর্ধ্বগে জাতে প্রয়াতে বহ্নি-মণ্ডলম্ |
তদানল-শিখা দীর্ঘা জায়তে বায়ুনাহতা || ৬৬||
ততো যাতো বহ্ন্য্-অপানৌ প্রাণমুষ্ণ-স্বরূপকম্ |
তেনাত্যন্ত-প্রদীপ্তস্তু জ্বলনো দেহজস্তথা || ৬৭||
তেন কুণ্ডলিনী সুপ্তা সন্তপ্তা সম্প্রবুধ্যতে |
দণ্ডাহতা ভুজঙ্গীব নিশ্বস্য ঋজুতাং ব্রজেৎ || ৬৮||
বিলং প্রবিষ্টেব ততো ব্রহ্ম-নাড্যং তরং ব্রজেৎ |
তস্মান্নিত্যং মূল-বন্ধঃ কর্তব্যো যোগিভিঃ সদা || ৬৯||
অথ জলন্ধর-বন্ধঃ
কণ্ঠমাকুঞ্চ্য হৃদয়ে স্থাপয়েচ্চিবুকং দৃঢম্ |
বন্ধো জালন্ধরাখ্যোঽযং জরা-মৃত্যু-বিনাশকঃ || ৭০||
বধ্নাতি হি সিরাজালমধো-গামি নভো-জলম্ |
ততো জালন্ধরো বন্ধঃ কণ্ঠ-দুঃখৌঘ-নাশনঃ || ৭১||
জালন্ধরে কৃতে বন্ধে কণ্ঠ-সংকোচ-লক্ষণে |
ন পীয়ূষং পতত্যগ্নৌ ন চ বায়ুঃ প্রকুপ্যতি || ৭২||
কণ্ঠ-সংকোচনেনৈব দ্বে নাড্যৌ স্তম্ভয়েদ্দৃঢম্ |
মধ্য-চক্রমিদং জ্ঞেয়ং ষোডশাধার-বন্ধনম্ || ৭৩||
মূল-স্থানং সমাকুঞ্চ্য উড্ডিয়ানং তু কারয়েৎ |
ইডাং চ পিঙ্গলাং বদ্ধ্বা বাহয়েৎপশ্চিমে পথি || ৭৪||
অনেনৈব বিধানেন প্রয়াতি পবনো লয়ম্ |
ততো ন জায়তে মৃত্যুর্জরা-রোগাদিকং তথা || ৭৫||
বন্ধ-ত্রয়মিদং শ্রেষ্ঠং মহা-সিদ্ধৈশ্চ সেবিতম্ |
সর্বেষাং হঠ-তন্ত্রাণাং সাধনং যোগিনো বিদুঃ || ৭৬||
যৎকিংচিৎস্রবতে চন্দ্রাদমৃতং দিব্য-রূপিণঃ |
তৎসর্বং গ্রসতে সূর্যস্তেন পিণ্ডো জরায়ুতঃ || ৭৭||
অথ বিপরীত-করণী মুদ্রা
তত্রাস্তি করণং দিব্যং সূর্যস্য মুখ-বঞ্চনম্ |
গুরূপদেশতো জ্ঞেয়ং ন তু শাস্ত্রার্থ-কোটিভিঃ || ৭৮||
ঊর্ধ্ব-নাভেরধস্তালোরূর্ধ্বং ভানুরধঃ শশী |
করণী বিপরীতাখা গুরু-বাক্যেন লভ্যতে || ৭৯||
নিত্যমভ্যাস-যুক্তস্য জঠরাগ্নি-বিবর্ধনী |
আহারো বহুলস্তস্য সম্পাদ্যঃ সাধকস্য চ || ৮০||
অল্পাহারো যদি ভবেদগ্নির্দহতি তৎ-ক্ষণাৎ |
অধঃ-শিরাশ্চোর্ধ্ব-পাদঃ ক্ষণং স্যাৎপ্রথমে দিনে || ৮১||
ক্ষণাচ্চ কিংচিদধিকমভ্যসেচ্চ দিনে দিনে |
বলিতং পলিতং চৈব ষণ্মাসোর্ধ্বং ন দৃশ্যতে |
যাম-মাত্রং তু যো নিত্যমভ্যসেৎস তু কালজিৎ || ৮২||
অথ বজ্রোলী
স্বেচ্ছয়া বর্তমানোঽপি যোগোক্তৈর্নিয়মৈর্বিনা |
বজ্রোলীং যো বিজানাতি স যোগী সিদ্ধি-ভাজনম্ || ৮৩||
তত্র বস্তু-দ্বয়ং বক্ষ্যে দুর্লভং যস্য কস্যচিৎ |
ক্ষীরং চৈকং দ্বিতীয়ং তু নারী চ বশ-বর্তিনী || ৮৪||
মেহনেন শনৈঃ সম্যগূর্ধ্বাকুঞ্চনমভ্যসেৎ |
পুরুষোঽপ্যথবা নারী বজ্রোলী-সিদ্ধিমাপ্নুয়াৎ || ৮৫||
যত্নতঃ শস্ত-নালেন ফূৎকারং বজ্র-কন্দরে |
শনৈঃ শনৈঃ প্রকুর্বীত বায়ু-সংচার-কারণাৎ || ৮৬||
নারী-ভগে পদদ্-বিন্দুমভ্যাসেনোর্ধ্বমাহরেৎ |
চলিতং চ নিজং বিন্দুমূর্ধ্বমাকৃষ্য রক্ষয়েৎ || ৮৭||
এবং সংরক্ষয়েদ্বিন্দুং জয়তি যোগবিৎ |
মরণং বিন্দু-পাতেন জীবনং বিন্দু-ধারণাৎ || ৮৮||
সুগন্ধো যোগিনো দেহে জায়তে বিন্দু-ধারণাৎ |
যাবদ্বিন্দুঃ স্থিরো দেহে তাবৎকাল-ভয়ং কুতঃ || ৮৯||
চিত্তায়ত্তং নৄণাং শুক্রং শুক্রায়ত্তং চ জীবিতম্ |
তস্মাচ্ছুক্রং মনশ্চৈব রক্ষণীয়ং প্রয়ত্নতঃ || ৯০||
ঋতুমত্যা রজোঽপ্যেবং নিজং বিন্দুং চ রক্ষয়েৎ |
মেঢ্রেণাকর্ষয়েদূর্ধ্বং সম্যগভ্যাস-যোগ-বিৎ || ৯১||
অথ সহজোলিঃ
সহজোলিশ্চামরোলির্বজ্রোল্যা ভেদ একতঃ |
জলে সুভস্ম নিক্ষিপ্য দগ্ধ-গোময়-সম্ভবম্ || ৯২||
বজ্রোলী-মৈথুনাদূর্ধ্বং স্ত্রী-পুংসোঃ স্বাঙ্গ-লেপনম্ |
আসীনয়োঃ সুখেনৈব মুক্ত-ব্যাপারয়োঃ ক্ষণাৎ || ৯৩||
সহজোলিরিয়ং প্রোক্তা শ্রদ্ধেয়া যোগিভিঃ সদা |
অয়ং শুভকরো যোগো ভোগ-যুক্তোঽপি মুক্তিদঃ || ৯৪||
অয়ং যোগঃ পুণ্যবতাং ধীরাণাং তত্ত্ব-দর্শিনাম্ |
নির্মৎসরাণাং বৈ সিধ্যেন্ন তু মৎসর-শালিনাম্ || ৯৫||
অথ অমরোলী
পিত্তোল্বণৎবাৎপ্রথমাম্বু-ধারাং
বিহায় নিঃসারতয়ান্ত্যধারাম্ |
নিষেব্যতে শীতল-মধ্য-ধারা
কাপালিকে খণ্ডমতেঽমরোলী || ৯৬||
অমরীং যঃ পিবেন্নিত্যং নস্যং কুর্বন্দিনে দিনে |
বজ্রোলীমভ্যসেৎসম্যক্সামরোলীতি কথ্যতে || ৯৭||
অভ্যাসান্নিঃসৃতাং চান্দ্রীং বিভূত্যা সহ মিশ্রয়েৎ |
ধারয়েদুত্তমাঙ্গেষু দিব্য-দৃষ্টিঃ প্রজায়তে || ৯৮||
পুংসো বিন্দুং সমাকুঞ্চ্য সম্যগভ্যাস-পাটবাৎ |
যদি নারী রজো রক্ষেদ্বজ্রোল্যা সাপি যোগিনী || ৯৯||
তস্যাঃ কিংচিদ্রজো নাশং ন গচ্ছতি ন সংশয়ঃ |
তস্যাঃ শরীরে নাদশ্চ বিন্দুতামেব গচ্ছতি || ১০০||
স বিন্দুস্তদ্রজশ্চৈব একীভূয় স্বদেহগৌ |
বজ্রোল্য্-অভ্যাস-যোগেন সর্ব-সিদ্ধিং প্রয়চ্ছতঃ || ১০১||
রক্ষেদাকুঞ্চনাদূর্ধ্বং যা রজঃ সা হি যোগিনী |
অতীতানাগতং বেত্তি খেচরী চ ভবেদ্ধ্রুবম্ || ১০২||
দেহ-সিদ্ধিং চ লভতে বজ্রোল্য্-অভ্যাস-যোগতঃ |
অয়ং পুণ্য-করো যোগো ভোগে ভুক্তেঽপি মুক্তিদঃ || ১০৩||
অথ শক্তি-চালনম্
কুটিলাঙ্গী কুণ্ডলিনী ভুজঙ্গী শক্তিরীশ্বরী |
কুণ্ডল্যরুন্ধতী চৈতে শব্দাঃ পর্যায়-বাচকাঃ || ১০৪||
উদ্ঘাটয়েৎকপাটং তু যথা কুংচিকয়া হঠাৎ |
কুণ্ডলিন্যা তথা যোগী মোক্ষদ্বারং বিভেদয়েৎ || ১০৫||
যেন মার্গেণ গন্তব্যং ব্রহ্ম-স্থানং নিরাময়ম্ |
মুখেনাচ্ছাদ্য তদ্বারং প্রসুপ্তা পরমেশ্বরী || ১০৬||
কন্দোর্ধ্বে কুণ্ডলী শক্তিঃ সুপ্তা মোক্ষায় যোগিনাম্ |
বন্ধনায় চ মূঢানাং যস্তাং বেত্তি স যোগবিৎ || ১০৭||
কুণ্ডলী কুটিলাকারা সর্পবৎপরিকীর্তিতা |
সা শক্তিশ্চালিতা যেন স মুক্তো নাত্র সংশয়ঃ || ১০৮||
গঙ্গা-যমুনয়োর্মধ্যে বাল-রণ্ডাং তপস্বিনীম্ |
বলাৎকারেণ গৃহ্ণীয়াত্তদ্বিষ্ণোঃ পরমং পদম্ || ১০৯||
ইডা ভগবতী গঙ্গা পিঙ্গলা যমুনা নদী |
ইডা-পিঙ্গলয়োর্মধ্যে বালরণ্ডা চ কুণ্ডলী || ১১০||
পুচ্ছে প্রগৃহ্য ভুজঙ্গীং সুপ্তামুদ্বোধয়েচ্চ তাম্ |
নিদ্রাং বিহায় সা শক্তিরূর্ধ্বমুত্তিষ্ঠতে হঠাৎ || ১১১||
অবস্থিতা চৈব ফণাবতী সা
প্রাতশ্চ সায়ং প্রহরার্ধ-মাত্রম্ |
প্রপূর্য সূর্যাৎপরিধান-যুক্ত্যা
প্রগৃহ্য নিত্যং পরিচালনীয়া || ১১২||
ঊর্ধ্বং বিতস্তি-মাত্রং তু বিস্তারং চতুরঙ্গুলম্ |
মৃদুলং ধবলং প্রোক্তং বেষ্টিতাম্বর-লক্ষণম্ || ১১৩||
সতি বজ্রাসনে পাদৌ করাভ্যাং ধারয়েদ্দৃঢম্ |
গুল্ফ-দেশ-সমীপে চ কন্দং তত্র প্রপীডয়েৎ || ১১৪||
বজ্রাসনে স্থিতো যোগী চালয়িৎবা চ কুণ্ডলীম্ |
কুর্যাদনন্তরং ভস্ত্রাং কুণ্ডলীমাশু বোধয়েৎ || ১১৫||
ভানোরাকুঞ্চনং কুর্যাৎকুণ্ডলীং চালয়েত্ততঃ |
মৃত্যু-বক্ত্র-গতস্যাপি তস্য মৃত্যু-ভয়ং কুতঃ || ১১৬||
মুহূর্ত-দ্বয়-পর্যন্তং নির্ভয়ং চালনাদসৌ |
ঊর্ধ্বমাকৃষ্যতে কিংচিৎসুষুম্ণায়াং সমুদ্গতা || ১১৭||
তেন কুণ্ডলিনী তস্যাঃ সুষুম্ণায়া মুখং ধ্রুবম্ |
জহাতি তস্মাৎপ্রাণোঽযং সুষুম্ণাং ব্রজতি স্বতঃ || ১১৮||
তস্মাৎসংচালয়েন্নিত্যং সুখ-সুপ্তামরুন্ধতীম্ |
তস্যাঃ সংচালনেনৈব যোগী রোগৈঃ প্রমুচ্যতে || ১১৯||
যেন সংচালিতা শক্তিঃ স যোগী সিদ্ধি-ভাজনম্ |
কিমত্র বহুনোক্তেন কালং জয়তি লীলয়া || ১২০||
ব্রহ্মচর্য-রতস্যৈব নিত্যং হিত-মিতাশিনঃ |
মণ্ডলাদ্দৃশ্যতে সিদ্ধিঃ কুণ্ডল্য্-অভ্যাস-যোগিনঃ || ১২১||
কুণ্ডলীং চালয়িৎবা তু ভস্ত্রাং কুর্যাদ্বিশেষতঃ |
এবমভ্যস্যতো নিত্যং যমিনো যম-ভীঃ কুতঃ || ১২২||
দ্বা-সপ্ততি-সহস্রাণাং নাডীনাং মল-শোধনে |
কুতঃ প্রক্ষালনোপায়ঃ কুণ্ডল্য্-অভ্যসনাদৃতে || ১২৩||
ইয়ং তু মধ্যমা নাডী দৃঢাভ্যাসেন যোগিনাম্ |
আসন-প্রাণ-সংযাম-মুদ্রাভিঃ সরলা ভবেৎ || ১২৪||
অভ্যাসে তু বিনিদ্রাণাং মনো ধৃৎবা সমাধিনা |
রুদ্রাণী বা পরা মুদ্রা ভদ্রাং সিদ্ধিং প্রয়চ্ছতি || ১২৫||
রাজ-যোগং বিনা পৃথ্বী রাজ-যোগং বিনা নিশা |
রাজ-যোগং বিনা মুদ্রা বিচিত্রাপি ন শোভতে || ১২৬||
মারুতস্য বিধিং সর্বং মনো-যুক্তং সমভ্যসেৎ |
ইতরত্র ন কর্তব্যা মনো-বৃত্তির্মনীষিণা || ১২৭||
ইতি মুদ্রা দশ প্রোক্তা আদিনাথেন শম্ভুনা |
একৈকা তাসু যমিনাং মহা-সিদ্ধি-প্রদায়িনী || ১২৮||
উপদেশং হি মুদ্রাণাং যো দত্তে সাম্প্রদায়িকম্ |
স এব শ্রী-গুরুঃ স্বামী সাক্ষাদীশ্বর এব সঃ || ১২৯||
তস্য বাক্য-পরো ভূৎবা মুদ্রাভ্যাসে সমাহিতঃ |
অণিমাদি-গুণৈঃ সার্ধং লভতে কাল-বঞ্চনম্ || ১৩০||
ইতি হঠ-প্রদীপিকায়াং তৃতীয়োপদেশঃ |
|| ৪|| চতুর্থোপদেশঃ
নমঃ শিবায় গুরবে নাদ-বিন্দু-কলাত্মনে |
নিরঞ্জন-পদং যাতি নিত্যং তত্র পরায়ণঃ || ১||
অথেদানীং প্রবক্ষ্যামি সমাধিক্রমমুত্তমম্ |
মৃত্যুঘ্নং চ সুখোপায়ং ব্রহ্মানন্দ-করং পরম্ || ২||
রাজ-যোগঃ সমাধিশ্চ উন্মনী চ মনোন্মনী |
অমরৎবং লয়স্তত্ত্বং শূন্যাশূন্যং পরং পদম্ || ৩||
অমনস্কং তথাদ্বৈতং নিরালম্বং নিরঞ্জনম্ |
জীবন্মুক্তিশ্চ সহজা তুর্যা চেত্যেক-বাচকাঃ || ৪||
সলিলে সৈন্ধবং যদ্বৎসাম্যং ভজতি যোগতঃ |
তথাত্ম-মনসোরৈক্যং সমাধিরভিধীয়তে || ৫||
যদা সংক্ষীয়তে প্রাণো মানসং চ প্রলীয়তে |
তদা সমরসৎবং চ সমাধিরভিধীয়তে || ৬||
তৎ-সমং চ দ্বয়োরৈক্যং জীবাত্ম-পরমাত্মনোঃ |
প্রনষ্ট-সর্ব-সঙ্কল্পঃ সমাধিঃ সোঽভিধীয়তে || ৭||
রাজ-যোগস্য মাহাত্ম্যং কো বা জানাতি তত্ত্বতঃ |
জ্ঞানং মুক্তিঃ স্থিতিঃ সিদ্ধির্গুরু-বাক্যেন লভ্যতে || ৮||
দুর্লভো বিষয়-ত্যাগো দুর্লভং তত্ত্ব-দর্শনম্ |
দুর্লভা সহজাবস্থা সদ্-গুরোঃ করুণাং বিনা || ৯||
বিবিধৈরাসনৈঃ কুভৈর্বিচিত্রৈঃ করণৈরপি |
প্রবুদ্ধায়াং মহা-শক্তৌ প্রাণঃ শূন্যে প্রলীয়তে || ১০||
উৎপন্ন-শক্তি-বোধস্য ত্যক্ত-নিঃশেষ-কর্মণঃ |
যোগিনঃ সহজাবস্থা স্বয়মেব প্রজায়তে || ১১||
সুষুম্ণা-বাহিনি প্রাণে শূন্যে বিশতি মানসে |
তদা সর্বাণি কর্মাণি নির্মূলয়তি যোগবিৎ || ১২||
অমরায় নমস্তুভ্যং সোঽপি কালস্ত্বয়া জিতঃ |
পতিতং বদনে যস্য জগদেতচ্চরাচরম্ || ১৩||
চিত্তে সমৎবমাপন্নে বায়ৌ ব্রজতি মধ্যমে |
তদামরোলী বজ্রোলী সহজোলী প্রজায়তে || ১৪||
জ্ঞানং কুতো মনসি সম্ভবতীহ তাবৎ
প্রাণোঽপি জীবতি মনো ম্রিয়তে ন যাবৎ |
প্রাণো মনো দ্বয়মিদং বিলয়ং নয়েদ্যো
মোক্ষং স গচ্ছতি নরো ন কথংচিদন্যঃ || ১৫||
জ্ঞাৎবা সুষুম্ণাসদ্-ভেদং কৃৎবা বায়ুং চ মধ্যগম্ |
স্থিৎবা সদৈব সুস্থানে ব্রহ্ম-রন্ধ্রে নিরোধয়েৎ || ১৬||
সূর্য-চন্দ্রমসৌ ধত্তঃ কালং রাত্রিন্দিবাত্মকম্ |
ভোক্ত্রী সুষুম্না কালস্য গুহ্যমেতদুদাহৃতম্ || ১৭||
দ্বা-সপ্ততি-সহস্রাণি নাডী-দ্বারাণি পঞ্জরে |
সুষুম্ণা শাম্ভবী শক্তিঃ শেষাস্ত্বেব নিরর্থকাঃ || ১৮||
বায়ুঃ পরিচিতো যস্মাদগ্নিনা সহ কুণ্ডলীম্ |
বোধয়িৎবা সুষুম্ণায়াং প্রবিশেদনিরোধতঃ || ১৯||
সুষুম্ণা-বাহিনি প্রাণে সিদ্ধ্যত্যেব মনোন্মনী |
অন্যথা ৎবিতরাভ্যাসাঃ প্রয়াসায়ৈব যোগিনাম্ || ২০||
পবনো বধ্যতে যেন মনস্তেনৈব বধ্যতে |
মনশ্চ বধ্যতে যেন পবনস্তেন বধ্যতে || ২১||
হেতু-দ্বয়ং তু চিত্তস্য বাসনা চ সমীরণঃ |
তয়োর্বিনষ্ট একস্মিন্তৌ দ্বাবপি বিনশ্যতঃ || ২২||
মনো যত্র বিলীয়েত পবনস্তত্র লীয়তে |
পবনো লীয়তে যত্র মনস্তত্র বিলীয়তে || ২৩||
দুগ্ধাম্বুবৎসংমিলিতাবুভৌ তৌ
তুল্য-ক্রিয়ৌ মানস-মারুতৌ হি |
যতো মরুত্তত্র মনঃ-প্রবৃত্তির্
যতো মনস্তত্র মরুৎ-প্রবৃত্তিঃ || ২৪||
তত্রৈক-নাশাদপরস্য নাশ
এক-প্রবৃত্তেরপর-প্রবৃত্তিঃ |
অধ্বস্তয়োশ্চেন্দ্রিয়-বর্গ-বৃত্তিঃ
প্রধ্বস্তয়োর্মোক্ষ-পদস্য সিদ্ধিঃ || ২৫||
রসস্য মনসশ্চৈব চঞ্চলৎবং স্বভাবতঃ |
রসো বদ্ধো মনো বদ্ধং কিং ন সিদ্ধ্যতি ভূতলে || ২৬||
মূর্চ্ছিতো হরতে ব্যাধীন্মৃতো জীবয়তি স্বয়ম্ |
বদ্ধঃ খেচরতাং ধত্তে রসো বায়ুশ্চ পার্বতি || ২৭||
মনঃ স্থৈর্যং স্থিরো বায়ুস্ততো বিন্দুঃ স্থিরো ভবেৎ |
বিন্দু-স্থৈর্যাৎসদা সত্ত্বং পিণ্ড-স্থৈর্যং প্রজায়তে || ২৮||
ইন্দ্রিয়াণাং মনো নাথো মনোনাথস্তু মারুতঃ |
মারুতস্য লয়ো নাথঃ স লয়ো নাদমাশ্রিতঃ || ২৯||
সোঽযমেবাস্তু মোক্ষাখ্যো মাস্তু বাপি মতান্তরে |
মনঃ-প্রাণ-লয়ে কশ্চিদানন্দঃ সম্প্রবর্ততে || ৩০||
প্রনষ্ট-শ্বাস-নিশ্বাসঃ প্রধ্বস্ত-বিষয়-গ্রহঃ |
নিশ্চেষ্টো নির্বিকারশ্চ লয়ো জয়তি যোগিনাম্ || ৩১||
উচ্ছিন্ন-সর্ব-সঙ্কল্পো নিঃশেষাশেষ-চেষ্টিতঃ |
স্বাবগম্যো লয়ঃ কোঽপি জায়তে বাগ্-অগোচরঃ || ৩২||
যত্র দৃষ্টির্লয়স্তত্র ভূতেন্দ্রিয়-সনাতনী |
সা শক্তির্জীব-ভূতানাং দ্বে অলক্ষ্যে লয়ং গতে || ৩৩||
লয়ো লয় ইতি প্রাহুঃ কীদৃশং লয়-লক্ষণম্ |
অপুনর্-বাসনোত্থানাল্লয়ো বিষয়-বিস্মৃতিঃ || ৩৪||
বেদ-শাস্ত্র-পুরাণানি সামান্য-গণিকা ইব |
একৈব শাম্ভবী মুদ্রা গুপ্তা কুল-বধূরিব || ৩৫||
অথ শাম্ভবী
অন্তর্লক্ষ্যং বহির্দৃষ্টির্নিমেষোন্মেষ-বর্জিতা |
এষা সা শাম্ভবী মুদ্রা বেদ-শাস্ত্রেষু গোপিতা || ৩৬||
অন্তর্লক্ষ্য-বিলীন-চিত্ত-পবনো যোগী যদা বর্ততে
দৃষ্ট্যা নিশ্চল-তারয়া বহিরধঃ পশ্যন্নপশ্যন্নপি |
মুদ্রেয়ং খলু শাম্ভবী ভবতি সা লব্ধা প্রসাদাদ্গুরোঃ
শূন্যাশূন্য-বিলক্ষণং স্ফুরতি তত্তত্ত্বং পদং শাম্ভবম্ || ৩৭||
শ্রী-শাম্ভব্যাশ্চ খেচর্যা অবস্থা-ধাম-ভেদতঃ |
ভবেচ্চিত্ত-লয়ানন্দঃ শূন্যে চিৎ-সুখ-রূপিণি || ৩৮||
তারে জ্যোতিষি সংযোজ্য কিংচিদুন্নময়েদ্ভ্রুবৌ |
পূর্ব-যোগং মনো যুঞ্জন্নুন্মনী-কারকঃ ক্ষণাৎ || ৩৯||
কেচিদাগম-জালেন কেচিন্নিগম-সঙ্কুলৈঃ |
কেচিত্তর্কেণ মুহ্যন্তি নৈব জানন্তি তারকম্ || ৪০||
অর্ধোন্মীলিত-লোচনঃ স্থির-মনা নাসাগ্র-দত্তেক্ষণশ্
চন্দ্রার্কাবপি লীনতামুপনয়ন্নিস্পন্দ-ভাবেন যঃ |
জ্যোতী-রূপমশেষ-বীজমখিলং দেদীপ্যমানং পরং
তত্ত্বং তৎ-পদমেতি বস্তু পরমং বাচ্যং কিমত্রাধিকম্ || ৪১||
দিবা ন পূজয়েল্লিঙ্গং রাত্রৌ চৈব ন পূজয়েৎ |
সর্বদা পূজয়েল্লিঙ্গং দিবারাত্রি-নিরোধতঃ || ৪২||
অথ খেচরী
সব্য-দক্ষিণ-নাডী-স্থো মধ্যে চরতি মারুতঃ |
তিষ্ঠতে খেচরী মুদ্রা তস্মিন্স্থানে ন সংশয়ঃ || ৪৩||
ইডা-পিঙ্গলয়োর্মধ্যে শূন্যং চৈবানিলং গ্রসেৎ |
তিষ্ঠতে খেচরী মুদ্রা তত্র সত্যং পুনঃ পুনঃ || ৪৪||
সূর্চ্যাচন্দ্রমসোর্মধ্যে নিরালম্বান্তরে পুনঃ |
সংস্থিতা ব্যোম-চক্রে যা সা মুদ্রা নাম খেচরী || ৪৫||
সোমাদ্যত্রোদিতা ধারা সাক্ষাৎসা শিব-বল্লভা |
পূরয়েদতুলাং দিব্যাং সুষুম্ণাং পশ্চিমে মুখে || ৪৬||
পুরস্তাচ্চৈব পূর্যেত নিশ্চিতা খেচরী ভবেৎ |
অভ্যস্তা খেচরী মুদ্রাপ্যুন্মনী সম্প্রজায়তে || ৪৭||
ভ্রুবোর্মধ্যে শিব-স্থানং মনস্তত্র বিলীয়তে |
জ্ঞাতব্যং তৎ-পদং তুর্যং তত্র কালো ন বিদ্যতে || ৪৮||
অভ্যসেৎখেচরীং তাবদ্যাবৎস্যাদ্যোগ-নিদ্রিতঃ |
সম্প্রাপ্ত-যোগ-নিদ্রস্য কালো নাস্তি কদাচন || ৪৯||
নিরালম্বং মনঃ কৃৎবা ন কিংচিদপি চিন্তয়েৎ |
স-বাহ্যাভ্যন্তরং ব্যোম্নি ঘটবত্তিষ্ঠতি ধ্রুবম্ || ৫০||
বাহ্য-বায়ুর্যথা লীনস্তথা মধ্যো ন সংশয়ঃ |
স্ব-স্থানে স্থিরতামেতি পবনো মনসা সহ || ৫১||
এবমভ্যস্যতস্তস্য বায়ু-মার্গে দিবানিশম্ |
অভ্যাসাজ্জীর্যতে বায়ুর্মনস্তত্রৈব লীয়তে || ৫২||
অমৃতৈঃ প্লাবয়েদ্দেহমাপাদ-তল-মস্তকম্ |
সিদ্ধ্যত্যেব মহা-কায়ো মহা-বল-পরাক্রমঃ || ৫৩||
শক্তি-মধ্যে মনঃ কৃৎবা শক্তিং মানস-মধ্যগাম্ |
মনসা মন আলোক্য ধারয়েৎপরমং পদম্ || ৫৪||
খ-মধ্যে কুরু চাত্মানমাত্ম-মধ্যে চ খং কুরু |
সর্বং চ খ-ময়ং কৃৎবা ন কিংচিদপি চিন্তয়েৎ || ৫৫||
অন্তঃ শূন্যো বহিঃ শূন্যঃ শূন্যঃ কুম্ভ ইবাম্বরে |
অন্তঃ পূর্ণো বহিঃ পূর্ণঃ পূর্ণঃ কুম্ভ ইবার্ণবে || ৫৬||
বাহ্য-চিন্তা ন কর্তব্যা তথৈবান্তর-চিন্তনম্ |
সর্ব-চিন্তাং পরিত্যজ্য ন কিংচিদপি চিন্তয়েৎ || ৫৭||
সঙ্কল্প-মাত্র-কলনৈব জগৎসমগ্রং
সঙ্কল্প-মাত্র-কলনৈব মনো-বিলাসঃ |
সঙ্কল্প-মাত্র-মতিমুৎসৃজ নির্বিকল্পম্
আশ্রিত্য নিশ্চয়মবাপ্নুহি রাম শান্তিম্ || ৫৮||
কর্পূরমনলে যদ্বৎসৈন্ধবং সলিলে যথা |
তথা সন্ধীয়মানং চ মনস্তত্ত্বে বিলীয়তে || ৫৯||
জ্ঞেয়ং সর্বং প্রতীতং চ জ্ঞানং চ মন উচ্যতে |
জ্ঞানং জ্ঞেয়ং সমং নষ্টং নান্যঃ পন্থা দ্বিতীয়কঃ || ৬০||
মনো-দৃশ্যমিদং সর্বং যৎকিংচিৎস-চরাচরম্ |
মনসো হ্যুন্মনী-ভাবাদ্দ্বৈতং নৈবোলভ্যতে || ৬১||
জ্ঞেয়-বস্তু-পরিত্যাগাদ্বিলয়ং যাতি মানসম্ |
মনসো বিলয়ে জাতে কৈবল্যমবশিষ্যতে || ৬২||
এবং নানা-বিধোপায়াঃ সম্যক্স্বানুভবান্বিতাঃ |
সমাধি-মার্গাঃ কথিতাঃ পূর্বাচার্যৈর্মহাত্মভিঃ || ৬৩||
সুষুম্ণায়ৈ কুণ্ডলিন্যৈ সুধায়ৈ চন্দ্র-জন্মনে |
মনোন্মন্যৈ নমস্তুভ্যং মহা-শক্ত্যৈ চিদ্-আত্মনে || ৬৪||
অশক্য-তত্ত্ব-বোধানাং মূঢানামপি সংমতম্ |
প্রোক্তং গোরক্ষ-নাথেন নাদোপাসনমুচ্যতে || ৬৫||
শ্রী-আদিনাথেন স-পাদ-কোটি-
লয়-প্রকারাঃ কথিতা জয়ন্তি |
নাদানুসন্ধানকমেকমেব
মন্যামহে মুখ্যতমং লয়ানাম্ || ৬৬||
মুক্তাসনে স্থিতো যোগী মুদ্রাং সন্ধায় শাম্ভবীম্ |
শৃণুয়াদ্দক্ষিণে কর্ণে নাদমন্তাস্থমেকধীঃ || ৬৭||
শ্রবণ-পুট-নয়ন-যুগল
ঘ্রাণ-মুখানাং নিরোধনং কার্যম্ |
শুদ্ধ-সুষুম্ণা-সরণৌ
স্ফুটমমলঃ শ্রূয়তে নাদঃ || ৬৮||
আরম্ভশ্চ ঘটশ্চৈব তথা পরিচয়োঽপি চ |
নিষ্পত্তিঃ সর্ব-যোগেষু স্যাদবস্থা-চতুষ্টয়ম্ || ৬৯||
অথ আরম্ভাবস্থা
ব্রহ্ম-গ্রন্থের্ভবেদ্ভেদো হ্যানন্দঃ শূন্য-সম্ভবঃ |
বিচিত্রঃ ক্বণকো দেহেঽনাহতঃ শ্রূয়তে ধ্বনিঃ || ৭০||
দিব্য-দেহশ্চ তেজস্বী দিব্য-গন্ধস্ত্বরোগবান্ |
সম্পূর্ণ-হৃদয়ঃ শূন্য আরম্ভে যোগবান্ভবেৎ || ৭১||
অথ ঘটাবস্থা
দ্বিতীয়ায়াং ঘটীকৃত্য বায়ুর্ভবতি মধ্যগঃ |
দৃঢাসনো ভবেদ্যোগী জ্ঞানী দেব-সমস্তদা || ৭২||
বিষ্ণু-গ্রন্থেস্ততো ভেদাৎপরমানন্দ-সূচকঃ |
অতিশূন্যে বিমর্দশ্চ ভেরী-শব্দস্তদা ভবেৎ || ৭৩||
অথ পরিচয়াবস্থা
তৃতীয়ায়াং তু বিজ্ঞেয়ো বিহায়ো মর্দল-ধ্বনিঃ |
মহা-শূন্যং তদা যাতি সর্ব-সিদ্ধি-সমাশ্রয়ম্ || ৭৪||
চিত্তানন্দং তদা জিৎবা সহজানন্দ-সম্ভবঃ |
দোষ-দুঃখ-জরা-ব্যাধি-ক্ষুধা-নিদ্রা-বিবর্জিতঃ || ৭৫||
অথ নিষ্পত্ত্য্-অবস্থা
রুদ্র-গ্রন্থিং যদা ভিত্ত্বা শর্ব-পীঠ-গতোঽনিলঃ |
নিষ্পত্তৌ বৈণবঃ শব্দঃ ক্বণদ্-বীণা-ক্বণো ভবেৎ || ৭৬||
একীভূতং তদা চিত্তং রাজ-যোগাভিধানকম্ |
সৃষ্টি-সংহার-কর্তাসৌ যোগীশ্বর-সমো ভবেৎ || ৭৭||
অস্তু বা মাস্তু বা মুক্তিরত্রৈবাখণ্ডিতং সুখম্ |
লয়োদ্ভবমিদং সৌখ্যং রাজ-যোগাদবাপ্যতে || ৭৮||
রাজ-যোগমজানন্তঃ কেবলং হঠ-কর্মিণঃ |
এতানভ্যাসিনো মন্যে প্রয়াস-ফল-বর্জিতান্ || ৭৯||
উন্মন্য্-অবাপ্তয়ে শীঘ্রং ভ্রূ-ধ্যানং মম সংমতম্ |
রাজ-যোগ-পদং প্রাপ্তুং সুখোপায়োঽল্প-চেতসাম্ |
সদ্যঃ প্রত্যয়-সন্ধায়ী জায়তে নাদজো লয়ঃ || ৮০||
নাদানুসন্ধান-সমাধি-ভাজাং
যোগীশ্বরাণাং হৃদি বর্ধমানম্ |
আনন্দমেকং বচসামগম্যং
জানাতি তং শ্রী-গুরুনাথ একঃ || ৮১||
কর্ণৌ পিধায় হস্তাভ্যাং যঃ শৃণোতি ধ্বনিং মুনিঃ |
তত্র চিত্তং স্থিরীকুর্যাদ্যাবৎস্থির-পদং ব্রজেৎ || ৮২||
অভ্যস্যমানো নাদোঽযং বাহ্যমাবৃণুতে ধ্বনিম্ |
পক্ষাদ্বিক্ষেপমখিলং জিৎবা যোগী সুখী ভবেৎ || ৮৩||
শ্রূয়তে প্রথমাভ্যাসে নাদো নানা-বিধো মহান্ |
ততোঽভ্যাসে বর্ধমানে শ্রূয়তে সূক্ষ্ম-সূক্ষ্মকঃ || ৮৪||
আদৌ জলধি-জীমূত-ভেরী-ঝর্ঝর-সম্ভবাঃ |
মধ্যে মর্দল-শঙ্খোত্থা ঘণ্টা-কাহলজাস্তথা || ৮৫||
অন্তে তু কিঙ্কিণী-বংশ-বীণা-ভ্রমর-নিঃস্বনাঃ |
ইতি নানাবিধা নাদাঃ শ্রূয়ন্তে দেহ-মধ্যগাঃ || ৮৬||
মহতি শ্রূয়মাণেঽপি মেঘ-ভের্য্-আদিকে ধ্বনৌ |
তত্র সূক্ষ্মাৎসূক্ষ্মতরং নাদমেব পরামৃশেৎ || ৮৭||
ঘনমুৎসৃজ্য বা সূক্ষ্মে সূক্ষ্মমুৎসৃজ্য বা ঘনে |
রমমাণমপি ক্ষিপ্তং মনো নান্যত্র চালয়েৎ || ৮৮||
যত্র কুত্রাপি বা নাদে লগতি প্রথমং মনঃ |
তত্রৈব সুস্থিরীভূয় তেন সার্ধং বিলীয়তে || ৮৯||
মকরন্দং পিবন্ভৃঙ্গী গন্ধং নাপেক্ষতে যথা |
নাদাসক্তং তথা চিত্তং বিষয়ান্নহি কাঙ্ক্ষতে || ৯০||
মনো-মত্ত-গজেন্দ্রস্য বিষয়োদ্যান-চারিণঃ |
সমর্থোঽযং নিয়মনে নিনাদ-নিশিতাঙ্কুশঃ || ৯১||
বদ্ধং তু নাদ-বন্ধেন মনঃ সন্ত্যক্ত-চাপলম্ |
প্রয়াতি সুতরাং স্থৈর্যং ছিন্ন-পক্ষঃ খগো যথা || ৯২||
সর্ব-চিন্তাং পরিত্যজ্য সাবধানেন চেতসা |
নাদ এবানুসন্ধেয়ো যোগ-সাম্রাজ্যমিচ্ছতা || ৯৩||
নাদোঽন্তরঙ্গ-সারঙ্গ-বন্ধনে বাগুরায়তে |
অন্তরঙ্গ-কুরঙ্গস্য বধে ব্যাধায়তেঽপি চ || ৯৪||
অন্তরঙ্গস্য যমিনো বাজিনঃ পরিঘায়তে |
নাদোপাস্তি-রতো নিত্যমবধার্যা হি যোগিনা || ৯৫||
বদ্ধং বিমুক্ত-চাঞ্চল্যং নাদ-গন্ধক-জারণাৎ |
মনঃ-পারদমাপ্নোতি নিরালম্বাখ্য-খেঽটনম্ || ৯৬||
নাদ-শ্রবণতঃ ক্ষিপ্রমন্তরঙ্গ-ভুজঙ্গমম্ |
বিস্মৃতয় সর্বমেকাগ্রঃ কুত্রচিন্নহি ধাবতি || ৯৭||
কাষ্ঠে প্রবর্তিতো বহ্নিঃ কাষ্ঠেন সহ শাম্যতি |
নাদে প্রবর্তিতং চিত্তং নাদেন সহ লীয়তে || ৯৮||
ঘণ্টাদিনাদ-সক্ত-স্তব্ধান্তঃ-করণ-হরিণস্য |
প্রহরণমপি সুকরং স্যাচ্ছর-সন্ধান-প্রবীণশ্চেৎ || ৯৯||
অনাহতস্য শব্দস্য ধ্বনির্য উপলভ্যতে |
ধ্বনেরন্তর্গতং জ্ঞেয়ং জ্ঞেয়স্যান্তর্গতং মনঃ |
মনস্তত্র লয়ং যাতি তদ্বিষ্ণোঃ পরমং পদম্ || ১০০||
তাবদাকাশ-সঙ্কল্পো যাবচ্ছব্দঃ প্রবর্ততে |
নিঃশব্দং তৎ-পরং ব্রহ্ম পরমাতেতি গীয়তে || ১০১||
যৎকিংচিন্নাদ-রূপেণ শ্রূয়তে শক্তিরেব সা |
যস্তত্ত্বান্তো নিরাকারঃ স এব পরমেশ্বরঃ || ১০২||
ইতি নাদানুসন্ধানম্
সর্বে হঠ-লয়োপায়া রাজয়োগস্য সিদ্ধয়ে |
রাজ-যোগ-সমারূঢঃ পুরুষঃ কাল-বঞ্চকঃ || ১০৩||
তত্ত্বং বীজং হঠঃ ক্ষেত্রমৌদাসীন্যং জলং ত্রিভিঃ |
উন্মনী কল্প-লতিকা সদ্য এব প্রবর্ততে || ১০৪||
সদা নাদানুসন্ধানাৎক্ষীয়ন্তে পাপ-সংচয়াঃ |
নিরঞ্জনে বিলীয়েতে নিশ্চিতং চিত্ত-মারুতৌ || ১০৫||
শঙ্খ-দুন্ধুভি-নাদং চ ন শৃণোতি কদাচন |
কাষ্ঠবজ্জায়তে দেহ উন্মন্যাবস্থয়া ধ্রুবম্ || ১০৬||
সর্বাবস্থা-বিনির্মুক্তঃ সর্ব-চিন্তা-বিবর্জিতঃ |
মৃতবত্তিষ্ঠতে যোগী স মুক্তো নাত্র সংশয়ঃ || ১০৭||
খাদ্যতে ন চ কালেন বাধ্যতে ন চ কর্মণা |
সাধ্যতে ন স কেনাপি যোগী যুক্তঃ সমাধিনা || ১০৮||
ন গন্ধং ন রসং রূপং ন চ স্পর্শং ন নিঃস্বনম্ |
নাত্মানং ন পরং বেত্তি যোগী যুক্তঃ সমাধিনা || ১০৯||
চিত্তং ন সুপ্তং নোজাগ্রৎস্মৃতি-বিস্মৃতি-বর্জিতম্ |
ন চাস্তমেতি নোদেতি যস্যাসৌ মুক্ত এব সঃ || ১১০||
ন বিজানাতি শীতোষ্ণং ন দুঃখং ন সুখং তথা |
ন মানং নোপমানং চ যোগী যুক্তঃ সমাধিনা || ১১১||
স্বস্থো জাগ্রদবস্থায়াং সুপ্তবদ্যোঽবতিষ্ঠতে |
নিঃশ্বাসোচ্ছ্বাস-হীনশ্চ নিশ্চিতং মুক্ত এব সঃ || ১১২||
অবধ্যঃ সর্ব-শস্ত্রাণামশক্যঃ সর্ব-দেহিনাম্ |
অগ্রাহ্যো মন্ত্র-যন্ত্রাণাং যোগী যুক্তঃ সমাধিনা || ১১৩||
যাবন্নৈব প্রবিশতি চরন্মারুতো মধ্য-মার্গে
যাবদ্বিদুর্ন ভবতি দৃঢঃ প্রাণ-বাত-প্রবন্ধাৎ |
যাবদ্ধ্যানে সহজ-সদৃশং জায়তে নৈব তত্ত্বং
তাবজ্জ্ঞানং বদতি তদিদং দম্ভ-মিথ্যা-প্রলাপঃ || ১১৪||
ইতি হঠ-যোগ-প্রদীপিকায়াং সমাধি-লক্ষণং নাম চতুর্থোপদেশঃ |
