.. লক্ষ্মীনৃসিংহপঞ্চরত্নম্ ..
ত্বত্প্রভুজীবপ্রিযমিচ্ছসি চেন্নরহরিপূজাং কুরু সততং
প্রতিবিম্বালংকৃতিধৃতিকুশলো বিম্বালংকৃতিমাতনুতে |
চেতোভৃঙ্গ ভ্রমসি বৃথা ভবমরুভূমৌ বিরসাযাং
ভজ ভজ লক্ষ্মীনরসিংহানঘপদসরসিজমকরন্দম্ || ১||
শুক্ত্তৌ রজতপ্রতিভা জাতা কতকাদ্যর্থসমর্থা চে-
দ্দুঃখমযী তে সংসৃতিরেষা নির্বৃতিদানে নিপুণা স্যাত্ |
চেতোভৃঙ্গ ভ্রমসি বৃথা ভবমরুভূমৌ বিরসাযাং
ভজ ভজ লক্ষ্মীনরসিংহানঘপদসরসিজমকরন্দম্ || ২||
আকৃতিসাম্যাচ্ছাল্মলিকুসুমে স্থলনলিনত্বভ্রমমকরোঃ
গন্ধরসাবিহ কিমু বিদ্যেতে বিফলং ভ্রাম্যসি ভৃশবিরসেস্মিন্ |
চেতোভৃঙ্গ ভ্রমসি বৃথা ভবমরুভূমৌ বিরসাযাং
ভজ ভজ লক্ষ্মীনরসিংহানঘপদসরসিজমকরন্দম্ || ৩||
স্রক্চন্দনবনিতাদীন্বিষযান্সুখদান্মত্বা তত্র বিহরসে
গন্ধফলীসদৃশা ননু তেমী ভোগানন্তরদুঃখকৃতঃ স্যুঃ |
চেতোভৃঙ্গ ভ্রমসি বৃথা ভবমরুভূমৌ বিরসাযাং
ভজ ভজ লক্ষ্মীনরসিংহানঘপদসরসিজমকরন্দম্ || ৪||
তব হিতমেকং বচনং বক্ষ্যে শৃণু সুখকামো যদি সততং
স্বপ্নে দৃষ্টং সকলং হি মৃষা জাগ্রতি চ স্মর তদ্বদিতি|
চেতোভৃঙ্গ ভ্রমসি বৃথা ভবমরুভূমৌ বিরসাযাং
ভজ ভজ লক্ষ্মীনরসিংহানঘপদসরসিজমকরন্দম্ || ৫||
ইতি শ্রীমত্পরমহংসপরিব্রাজকাচার্যস্য
শ্রী গোবিন্দ ভগবত্পূজ্যপাদ শিষ্যস্য
শ্রীমচ্ছংকর ভগবতঃ কৃতৌ
লক্ষ্মীনৃসিংহ পঞ্চরত্নম্ সম্পূর্ণম্ ..