|| সূতগীতা ||
শ্রীমৎসূতসংহিতায়াং | চতুর্থস্য যজ্ঞবৈভবখণ্ডস্যোপরিভাগে
সূতগীতাপ্রারম্ভঃ |
প্রথমোঽধ্যায়ঃ | ১. সূতগীতিঃ | ১-২৮
দ্বিতীয়োঽধ্যায়ঃ | ২. আত্মনা সৃষ্টিকথনম্ | ১-৮০
তৃতীয়োঽধ্যায়ঃ | ৩. সামান্যসৃষ্টিকথনম্ | ১-৬৫
চতুর্থোঽধ্যায়ঃ | ৪. বিশেষসৃষ্টিকথনম্ | ১-৪৯
পঞ্চমোঽধ্যায়ঃ | ৫. আত্মস্বরূপকথনম্ | ১-৭৪
ষষ্ঠোঽধ্যায়ঃ | ৬. সর্বশাস্ত্রার্থসঙ্গ্রহবর্ণনম্ | ১-৩৭
সপ্তমোঽধ্যায়ঃ | ৭. রহস্যবিচারঃ | ১-৩৪
অষ্টমোঽধ্যায়ঃ | ৮. সর্ববেদান্তসঙ্গ্রহঃ || ১-৯১
Total chapters 8 versess 458
অথ প্রথমোঽধ্যায়ঃ |
১. সূতগীতিঃ |
ঐশ্বরং পরমানন্দমনন্তং সত্যচিদ্ঘনম্ |
আত্মৎবেনৈব পশ্যন্তং নিস্তরঙ্গসমুদ্রবৎ || ১||
নির্বিকল্পং সুসম্পূর্ণং সুপ্রসন্নং শুচিস্মিতম্ |
ভাসয়ন্তং জগদ্ভাসা ভানুমন্তমিবাপরম্ || ২||
প্রণম্য মুনয়ঃ সূতং দণ্ডবৎপৃথিবীতলে |
কৃতঞ্জলিপুটা ভূৎবা তুষ্টুবুঃ পরয়া মুদা || ৩||
নমস্তে ভগবন্ শম্ভুপ্রসাদাবাপ্তবেদন |
নমস্তে ভগবন্ শম্ভুচরণাম্ভোজবল্লভ || ৪||
নমস্তে শম্ভুভক্তানামগ্রগণ্য সমাহিত |
নমস্তে শম্ভুভক্তানামতীব হিতবোধক || ৫||
নমস্তে বেদবেদান্তপদ্মখণ্ডদিবাকর |
ব্যাসবিজ্ঞানদীপস্য বর্তিভূতায় তে নমঃ || ৬||
পুরাণমুক্তামালায়াঃ সূত্রভূতায় তে নমঃ |
অস্মাকং ভববৃক্ষস্য কুঠারায় নমোঽস্তু তে || ৭||
কৃপাসাগর সর্বেষাং হিতপ্রদ নমোঽস্তু তে |
নমোঽবিজ্ঞাতদোষায় নমো জ্ঞানগুণায় তে || ৮||
মাতৃভূতায় মর্ত্যানাং ব্যাসশিষ্যায় তে নমঃ |
ধর্মিষ্ঠায় নমস্তুভ্যং ব্রহ্মনিষ্ঠায় তে নমঃ || ৯||
সমায় সর্বজন্তূনাং সারভূতায় তে নমঃ |
সাক্ষাৎসত্যপরাণাং তু সত্যভূতায় তে নমঃ || ১০||
নমো নমো নমস্তুভ্যং পুনর্ভূয়ো নমো নমঃ |
অস্মাকং গুরবে সাক্ষান্নমঃ স্বাত্মপ্রদায়িনে || ১১||
এবং গোত্রর্ষয়ঃ স্তুৎবা সূতং সর্বহিতপ্রদম্ |
প্রশ্নং প্রচক্রিরে সর্বে সর্বলোকহিতৈষিণঃ || ১২||
সোঽপি সূতঃ স্বতঃ সিদ্ধঃ স্বরূপানুভবাৎপরাৎ |
উত্থায় স্বগুরুং ব্যাসং দধ্যৌ সর্বহিতে রতম্ || ১৩||
অস্মিন্নবসরে ব্যাসঃ সাক্ষাৎসত্যবতীসুতঃ |
ভস্মোদ্ধূলিতসর্বাঙ্গস্ত্রিপুণ্ড্রাঙ্কিতমস্তকঃ || ১৪||
কৃষ্ণাজিনী সোত্তরীয় আষাঢেন বিরাজিতঃ |
রুদ্রাক্ষমালাভরণস্তত্রৈবাবিরভূৎস্বয়ম্ || ১৫||
তং দৃষ্ট্বা দেশিকেন্দ্রাণাং দেশিকং করুণাকরম্ |
সূতঃ সত্যবতীসূনুং স্বশিষ্যৈঃ সহ সত্তমৈঃ || ১৬||
প্রণম্য দণ্ডবদ্ভূমৌ প্রসন্নেন্দ্রিয়মানসঃ |
যথার্হং পূজয়ামাস দত্ত্বা চাঽঽসনমুত্তমম্ || ১৭||
ভদ্রমস্তু সুসম্পূর্ণং সূত শিষ্য মমাঽঽস্তিক |
তবৈষামপি কিং কার্যং ময়া তদ্ব্রূহি মেঽনঘ || ১৯||
এবং ব্যাসবচঃ শ্রুৎবা সূতঃ পৌরাণিকোত্তমঃ |
উবাচ মধুরং বাক্যং লোকানাং হিতমুত্তমম্ || ২০||
সূত উবাচ –
ইমে হি মুনয়ঃ শুদ্ধাঃ সত্যধর্মপরায়ণাঃ |
মদ্গীতাশ্রবণে চৈষামস্তি শ্রদ্ধা মহত্তরা || ২১||
ভবৎপ্রসাদে সত্যেব শক্যতে সা বিভাষিতুম্ |
যদি প্রসন্নো ভগবন্ বদেত্যাজ্ঞাপয়াদ্য মাম্ || ২২||
ইতি সূতবচঃ শ্রুৎবা ভগবান্ করুণানিধিঃ |
ৎবদীয়ামদ্য তাং গীতাং বদৈষামর্থিনাং শুভাম্ || ২৩||
ইত্যুক্ত্বা শিষ্যমালিঙ্গ্য হৃদয়ং তস্য সংস্পৃশন্ |
সাম্বং সর্বেশ্বরং ধ্যাৎবা নিরীক্ষ্যৈনং কৃপাবলাৎ || ২৪||
স্থাপয়িৎবা মহাদেবং হৃদয়ে তস্য সুস্থিরম্ |
তস্য মূর্ধানমাঘ্রায় ভগবানগমদ্গুরুঃ || ২৫||
সোঽপি সূতঃ পুনঃ সাম্বং ধ্যাৎবা দেবং ত্র্যম্বকম্ |
প্রণম্য দণ্ডবদ্ভূমৌ স্মৃৎবা ব্যাসং চ সদ্গুরুম্ || ২৬||
কৃতাঞ্জলিপুটো ভূৎবা মন্ত্রমাদ্যং ষডক্ষরম্ |
জপিৎবা শ্রদ্ধয়া সার্ধং নিরীক্ষ্য মুনিপুঙ্গবন্ || ২৭||
কৃতপ্রণামো মুনিভিঃ স্বগীতামতিনির্মলাম্ |
বক্তুমারভতে সূত সর্বলোকহিতে রতঃ || ২৮||
|| ইতি শ্রীসূতসংহিতায়াং যজ্ঞবৈভবখণ্ডস্যোপরিভাগে
সূতগীতায়াং সূতগীতির্নাম প্রথমোঽধ্যায়ঃ || ১ ||
অথ দ্বিতীয়োঽধ্যায়ঃ ||
২. আত্মনা সৃষ্টিকথনম্ |
সূত উবাচ –
শ্রুণুত ব্রহ্মবিচ্ছ্রেষ্ঠা ভাগ্যবন্তঃ সমাহিতাঃ |
বক্ষ্যামি পরমং গুহ্যং বিজ্ঞানং বেদসংমতম্ || ১||
অস্তি কশ্চিৎস্বত সিদ্ধঃ সত্যজ্ঞানসুখাদ্বয়ঃ |
বিশ্বস্য জগতঃ কর্তা পশুপাশবিলক্ষণঃ || ২||
আকাশাদীনি ভূতানি পঞ্চ তেষাং প্রকীর্তিতাঃ |
গুণাঃ শব্দাদয়ঃ পঞ্চ পঞ্চ কর্মেন্দ্রিয়াণি চ || ৩||
জ্ঞানেন্দ্রিয়াণি পঞ্চৈব প্রাণাদ্যা দশ বায়বঃ |
মনো বুদ্ধিরহঙ্কারশ্চিত্তং চেতি চতুষ্টয়ম্ || ৪||
তেষাং কারণভূতৈকাঽবিদ্যা ষট্ত্রিংশকঃ পশুঃ |
বিশ্বস্য জগতঃ কর্তা পশোরন্যঃ পরঃ শিবঃ || ৫||
আত্মানঃ পশবঃ সর্বে প্রোক্তা অজ্ঞানিনঃ সদা |
অজ্ঞানমাত্মনামেষামনাদ্যেব স্বভাবতঃ || ৬||
সংসারবীজমজ্ঞানং সংসার্যজ্ঞঃ পুমান্যতঃ |
জ্ঞানাত্তস্য নিবৃত্তিঃ স্যাৎপ্রকাশাত্তমসো যথা || ৭||
অজ্ঞানাকারভেদেনাবিদ্যাখ্যেনৈব কেবলম্ |
পশূনামাত্মনাং ভেদঃ কল্পিতো ন স্বভাবতঃ || ৮||
অজ্ঞানাকারভেদেন মায়াখ্যেনৈব কেবলম্ |
বিভাগঃ কল্পিতো বিপ্রাঃ পরমাতৎবলক্ষণঃ || ৯||
ঘটাকাশমহাকাশবিভাগঃ কল্পিতো যথা |
তথৈব কল্পিতো ভেদো জীবাত্মপরমাত্মনোঃ || ১০||
যথা জীববহুৎবং তু কল্পিতং মুনিপুঙ্গবাঃ |
তথা পরবহুৎবং চ কল্পিতং ন স্বভাবতঃ || ১০||
যথোচ্চাবচভাবস্তু জীবভেদে তু কল্পিতঃ |
তথোচ্চাবচভাবশ্চ পরভেদে চ কল্পিতঃ || ১২||
দেহেন্দ্রিয়াদিসঙ্ঘাতবাসনাভেদভেদিতা |
অবিদ্যা জীবভেদস্য হেতুর্নান্যঃ প্রকীর্তিতঃ || ১৩||
গুণানাং বাসনাভেদভেদিতা যা দ্বিজর্ষভাঃ |
মায়া সা পরভেদস্য হেতুর্নান্যঃ প্রকীর্তিতঃ || ১৪||
যস্য মায়াগতং সত্ত্বং শরীরং স্যাত্তমোগুণঃ |
সংহারায় ত্রিমূর্তীনাং স রুদ্রঃ স্যান্ন চাপরঃ || ১৫||
তথা যস্য তমঃ সাক্ষাচ্ছরীরং সাত্ত্বিকো গুণঃ |
পালনায় ত্রিমূর্তীনাং স বিষ্ণুঃ স্যান্ন চাপরঃ || ১৬||
রজো যস্য শরীরং স্যাত্তদেবোৎপাদনায় চ |
ত্রিমূর্তীনাং স বৈ ব্রহ্মা ভবেদ্বিপ্রা ন চাপরঃ || ১৭||
রুদ্রস্য বিগ্রহং শুক্লং কৃষ্ণং বিষ্ণোশ্চ বিগ্রহম্ |
ব্রহ্মণো বিগ্রহং রক্তং চিন্তয়েদ্ভুক্তিমুক্তয়ে || ১৮||
শৌক্ল্যং সত্ত্বগুণাজ্জাতং রাগো জাতো রজোগুণাৎ |
কার্ষ্ণ্যং তমোগুণাজ্জাতমিতি বিদ্যাৎসমাসতঃ || ১৯||
পরতত্ত্বৈকতাবুদ্ধ্যা ব্রহ্মাণং বিষ্ণুমীশ্বরম্ |
পরতত্ত্বতয়া বেদা বদন্তি স্মৃতয়োঽপি চ || ২০||
পুরাণানি সমস্তানি ভারতপ্রমুখান্যপি |
পরতত্ত্বৈকতাবুদ্ধ্যা তাৎপর্যং প্রবদন্তি চ || ২১||
ব্রহ্মবিষ্ণ্বাদিরূপেণ কেবলং মুনিপুঙ্গবাঃ |
ব্রহ্মবিষ্ণ্বাদয়স্ত্বেব ন পরং তত্ত্বমাস্তিকাঃ || ২২||
তথাঽপি রুদ্রঃ সর্বেষামুৎকৃষ্টঃ পরিকীর্তিতঃ |
স্বশরীরতয়া যস্মান্মনুতে সত্ত্বমুত্তমম্ || ২৩||
রজসস্তমসঃ সত্ত্বমুৎকৃষ্টং হি দ্বিজোত্তমাঃ |
সত্ত্বাৎসুখং চ জ্ঞানং চ যৎকিঞ্চিদপরং পরম্ || ২৪||
পরতত্ত্বপ্রকাশস্তু রুদ্র্স্যৈব মহত্তরঃ |
ব্রহ্মবিষ্ণ্বাদিদেবানাং ন তথা মুনিপুঙ্গবাঃ || ২৫||
পরতত্ত্বতয়া রুদ্রঃ স্বাত্মানং মনুতে ভৃশম্ |
পরতত্ত্বপ্রকাশেন ন তথা দেবতান্তরম্ || ২৬||
হরিব্রহ্মাদিরূপেণ স্বাত্মানং মনুতে ভৃশম্ |
হরিব্রহ্মাদয়ো দেবা ন তথা রুদ্রমাস্তিকাঃ || ২৭||
রুদ্রঃ কথংচিৎকার্যার্থং মনুতে রুদ্ররূপতঃ |
ন তথা দেবতাঃ সর্বা ব্রহ্মস্ফূর্ত্যল্পতাবলাৎ || ২৮||
ব্রহ্মবিষ্ণ্বাদয়ো দেবাঃ স্বাত্মানং মন্বতেঽঞ্জসা |
ন কশ্চিত্তত্ত্বরূপেণ ন তথা রুদ্র আস্তিকাঃ || ২৯||
ব্রহ্মবিষ্ণ্বাদয়ো দেবাঃ স্বাত্মানং মন্বতেঽঞ্জসা |
কথংচিত্তত্ত্বরূপেণ ন তথা রুদ্র আস্তিকাঃ || ৩০||
তত্ত্ববুদ্ধিঃ স্বতঃসিদ্ধা রুদ্রস্যাস্য তপোধনাঃ |
হরিব্রহ্মাদিবুদ্ধিস্তু তেষাং স্বাভাবিকী মতা || ৩১||
হরিব্রহ্মাদিদেবান্যে পূজয়ন্তি যথাবলম্ |
অচিরান্ন পরপ্রাপ্তিস্তেষামস্তি ক্রমেণ হি || ৩২||
রুদ্রং যে বেদবিচ্ছ্রেষ্ঠাঃ পূজয়ন্তি যথাবলম্ |
তেষামস্তি পরপ্রাপ্তিরচিরান্ন ক্রমেণ তু || ৩৩||
রুদ্রাকারতয়া রুদ্রো বরিষ্ঠো দেবতান্তরাৎ |
ইতি নিশ্চয়বুদ্ধিস্তু নরাণাং মুক্তিদায়িনী || ৩৪||
গুণাভিমানিনো রুদ্রাদ্ধরিব্রহ্মাদিদেবতাঃ |
বরিষ্ঠা ইতি বুদ্ধিস্তু সত্যং সংসারকারণম্ || ৩৫||
পরতত্ত্বাদপি শ্রেষ্ঠো রুদ্রো বিষ্ণুঃ পিতামহঃ |
ইতি নিশ্চয়বুদ্ধিস্তু সত্যং সংসারকারণম্ || ৩৬||
রুদ্রো বিষ্ণুঃ প্রজানাথঃ স্বরাট্সম্রাট্পুরন্দরঃ |
পরতত্ত্বমিতি জ্ঞানং নরাণাং মুক্তিকারণম্ || ৩৭||
অমাত্যে রাজবুদ্ধিস্তু ন দোষায় ফলায় হি |
তস্মাদ্ব্রহ্মমতির্মুখ্যা সর্বত্র ন হি সংশয়ঃ || ৩৮||
তথাঽপি রুদ্রে বিপ্রেন্দ্রাঃ পরতত্ত্বমতির্ভৃশম্ |
বরিষ্ঠা ন তথাঽন্যেষু পরস্ফূর্ত্যল্পতাবলাৎ || ৩৯||
অস্তি রুদ্রস্য বিপ্রেন্দ্রা অন্তঃ সত্ত্বং বহিস্তমঃ |
বিষ্ণোরন্তস্তমঃ সত্ত্বং বহিরস্তি রজোগুণঃ || ৪০||
অন্তর্বহিশ্চ বিপ্রেন্দ্রা অস্তি তস্য প্রজাপতেঃ |
অতোঽপেক্ষ্য গুণং সত্ত্বং মনুষ্যা বিবদন্তি চ || ৪১||
হরিঃ শ্রেষ্ঠো হরঃ শ্রেষ্ঠ ইত্যহো মোহবৈভবম্ |
সত্ত্বাভাবাৎপ্রজানাথং বরিষ্ঠং নৈব মন্বতে || ৪২||
অনেকজন্মসিদ্ধানাং শ্রৌতস্মার্তানুবর্তিনাম্ |
হরঃ শ্রেষ্ঠো হরেঃ সাক্ষাদিতি বুদ্ধিঃ প্রজায়তে || ৪৩||
মহাপাপবতাং নৄণাং হরিঃ শ্রেষ্ঠো হরাদিতি |
বুদ্ধির্বিজায়তে তেষাং সদা সংসার এব হি || ৪৪||
নির্বিকল্পে পরে তত্ত্বে শ্রদ্ধা যেষাং বিজায়তে |
অয়ত্নসিদ্ধা পরমা মুক্তিস্তেষাং ন সংশয়ঃ || ৪৫||
নির্বিকল্পং পরং তত্ত্বং নাম সাক্ষাচ্ছিবঃ পরঃ |
সোঽযং সাম্বস্ত্রিনেত্রশ্চ চন্দ্রার্ধকৃতশেখরঃ || ৪৬||
স্বাত্মতত্ত্বসুখস্ফূর্তিপ্রমোদাত্তাণ্ডবপ্রিয়ঃ |
রুদ্রবিষ্ণুপ্রজানাথৈরুপাস্যো গুণমূর্তিভিঃ || ৪৭||
ঈদৃশী পরমা মূর্তির্যস্যাসাধারণী সদা |
তদ্ধি সাক্ষাৎপরং তত্ত্বং নান্যৎসত্যং ময়োদিতম্ || ৪৮||
বিষ্ণুং ব্রহ্মাণমন্যং বা স্বমোহান্মন্বতে পরম্ |
ন তেষাং মুক্তিরেষাঽস্তি ততস্তে ন পরং পদম্ || ৪৯||
তস্মাদেষা পরা মূর্তির্যস্যাসাধারণী ভবেৎ |
স শিবঃ সচ্চিদানন্দঃ সাক্ষাত্তত্ত্বং ন চাপরঃ || ৫০||
ব্রহ্মা বিষ্ণুশ্চ রুদ্রশ্চ বিভক্তা অপি পণ্ডিতাঃ |
পরমাত্মবিভাগস্থা ন জীবব্যূহসংস্থিতাঃ || ৫১||
অবিদ্যোপাধিকো জীবো ন মায়োপাধিকঃ খলু |
মায়োপাধিকচৈতন্যং পরমাত্মা হি নাপরম্ || ৫২||
মায়াকার্যগুণচ্ছন্না ব্রহ্মবিষ্ণুমহেশ্বরাঃ |
মায়োপাধিপরব্যূহা ন জীবব্যূহসংস্থিতাঃ || ৫৩||
পরমাত্মবিভাগৎবং ব্রহ্মাদীনাং দ্বিজর্ষভাঃ |
সমানমপি রুদ্রস্তু বরিষ্ঠো নাত্র সংশয়ঃ || ৫৪||
ব্রহ্মা বিষ্ণুশ্চ রুদ্রস্য স্বাসাধারণরূপতঃ |
স্ববিভূত্যাত্মনা চাপি কুর্বাতে এব সেবনম্ || ৫৫||
রুদ্র স্বেনৈব রূপেণ বিষ্ণোশ্চ ব্রহ্মণস্তথা |
সেবনং নৈব কুরুতে বিভূতের্বা দ্বয়োরপি || ৫৬||
কেবলং কৃপয়া রুদ্রো লোকানাং হিতকাম্যয়া |
স্ববিভূত্যাত্মনা বিষ্ণোর্ব্রহ্মণশ্চাপরস্য চ || ৫৭||
করোতি সেবাং হে বিপ্রাঃ কদাচিৎসত্যমীরিতম্ |
ন তথা ব্রহ্মণা বিষ্ণুর্ন ব্রহ্মা ন পুরন্দরঃ || ৫৮||
এতাবন্মাত্রমালম্ব্য রুদ্রং বিষ্ণুং প্রজাপতিম্ |
মন্বতে হি সমং মর্ত্যা মায়য়া পরিমোহিতাঃ || ৫৯||
কেচিদেষাং মহায়াসাৎসাম্যং বাঞ্ছন্তি মোহিতাঃ |
হরেরজস্য চোৎকর্ষং হরাদ্বাঞ্ছন্তি কেচন || ৬০||
রুদ্রেণ সাম্যমন্যেষাং বাঞ্ছন্তি চ বিমোহিতাঃ |
তে মহাপাতকৈর্যুক্তা যাস্যন্তি নরকার্ণবম্ || ৬১||
রুদ্রাদুৎকর্ষমন্যেষাং যে বাঞ্ছন্তি মোহিতাঃ |
পচ্যন্তে নরকে তীব্রে সদা তে ন হি সংশয়ঃ || ৬২||
কেচিদদ্বৈতমাশ্রিত্য বৈডালব্রতিকা নরাঃ |
সাম্যং রুদ্রেণ সর্বেষাং প্রবদন্তি বিমোহিতাঃ || ৬৩||
দেহাকারেণ চৈকৎবে সত্যপি দ্বিজপুঙ্গবাঃ |
শিরসা পাদয়োঃ সাম্যং সর্বথা নাস্তি হি দ্বিজাঃ || ৬৪||
যথাঽঽস্যাপানয়োঃ সাম্যং ছিদ্রতোঽপি ন বিদ্যতে |
তথৈকৎবেঽপি সর্বেষাং রুদ্রসাম্যং ন বিদ্যতে || ৬৫||
বিষ্ণুপ্রজাপতীন্দ্রাণামুৎকর্ষং শঙ্করাদপি |
প্রবদন্তীব বাক্যানি শ্রৌতানি প্রতিভান্তি চ || ৬৬||
পৌরাণিকানি বাক্যানি স্মার্তানি প্রতিভান্তি চ |
তানি তত্ত্বাত্মনা তেষামুৎকর্ষং প্রবদন্তি হি || ৬৭||
বিষ্ণুপ্রজাপতীন্দ্রেভ্যো রুদ্রস্যোৎকর্ষমাস্তিকাঃ |
বদন্তি যানি বাক্যানি তানি সর্বাণি হে দ্বিজাঃ || ৬৮||
প্রবদন্তি স্বরূপেণ তথা তত্ত্বাত্মনাঽপি চ |
নৈবং বিষ্ণ্বাদিদেবানামিতি তত্ত্বব্যবস্থিতিঃ || ৬৯||
বহুনোক্তেন কিং জীবাস্ত্রিমূর্তীনাং বিভূতয়ঃ |
বরিষ্ঠা হি বিভূতিভ্যস্তে বরিষ্ঠা ন সংশয়ঃ || ৭০||
তেষু রুদ্রো বরিষ্ঠশ্চ ততো মায়ী পরঃ শিবঃ |
মায়াবিশিষ্টাৎসর্বজ্ঞঃ সাম্বঃ সত্যাদিলক্ষণঃ || ৭১||
বরিষ্ঠো মুনয়ঃ সাক্ষাচ্ছিবো নাত্র বিচারণা |
শিবাদ্বরিষ্ঠো নৈবাস্তি ময়া সত্যমুদীরিতম্ || ৭২||
শিবস্বরূপমালোড্য প্রবদামি সমাসতঃ |
শিবাদন্যতয়া ভাতং শিব এব ন সংশয়ঃ || ৭৩||
শিবাদন্যতয়া ভাতং শিবং যো বেদ বেদতঃ |
স বেদ পরমং তত্ত্বং নাস্তি সংশয়কারণম্ || ৭৪||
যঃ শিবঃ সকলং সাক্ষাদ্বেদ বেদান্তবাক্যতঃ |
স মুক্তো নাত্র সন্দেহঃ সত্যমেব ময়োদিতম্ || ৭৫||
ভাসমানমিদং সর্বং ভানমেবেতি বেদ যঃ |
স ভানরূপং দেবেশং যাতি নাত্র বিচারণা || ৭৬||
প্রতীতমখিলং শম্ভুং তর্কতশ্চ প্রমাণতঃ |
স্বানুভূত্যা চ যো বেদ স এব পরমার্থবিৎ || ৭৭||
জগদ্রূপতয়া পশ্যন্নপি নৈব প্রপশ্যতি |
প্রতীতমখিলং ব্রহ্ম সম্পশ্যন্ন হি সংশয়ঃ || ৭৮||
প্রতীতমপ্রতীতং চ সদসচ্চ পরঃ শিবঃ |
ইতি বেদান্তবাক্যানাং নিষ্ঠাকাষ্ঠা সুদুর্লভা || ৭৯||
ইতি সকলং কৃপয়া ময়োদিতং বঃ
শ্রুতিবচস কথিতং যথা তথৈব |
যদি হৃদয়ে নিহিতং সমস্তমেত-
ৎপরমগতির্ভবতামিহৈব সিদ্ধা || ৮০||
|| ইতি শ্রীসূতসংহিতায়াং যজ্ঞবৈভবখণ্ডস্যোপরিভাগে
সূতগীতায়াং আত্মনা সৃষ্টিকথনং নাম দ্বিতীয়োঽধ্যায়ঃ || ২||
অথ তৃতীয়োঽধ্যায়ঃ |
৩. সামান্যসৃষ্টিকথনম্ |
সূত উবাচ –
শিবাৎসত্যপরানন্দপ্রকাশৈকস্বলক্ষণাৎ |
আবির্ভূতমিদং সর্বং চেতনাচেতনাত্মকম্ || ১||
অদ্বিতীয়োঽবিকারী চ নির্মলঃ স শিবঃ পরঃ |
তথাঽপি সৃজতি প্রাজ্ঞাঃ সর্বমেতচ্চরাচরম্ || ২||
মণিমন্রৌষধাদীনাং স্বভাবোঽপি ন শক্যতে |
কিমু বক্তব্যমাশ্চর্যং বিভোরস্য পরাত্মনঃ || ৩||
শ্রুতিঃ সনাতনী সাধ্বী সর্বমানোত্তমোত্তমা |
প্রাহ চাদ্বৈতনৈর্মল্যং নির্বিকারৎবমাত্মনঃ || ৪||
সর্গস্থিত্যন্তমপ্যাহ চেতনাচেতনস্য চ |
অতীন্দ্রিয়ার্থবিজ্ঞানে মানং নঃ শ্রুতিরেব হি || ৫||
শ্রুত্যৈকগম্যে সূক্ষ্মার্থে স তর্কঃ কিং করিষ্যতি |
মানানুগ্রাহকস্তর্কো ন স্বতন্ত্রঃ কদাচন || ৬||
শ্রুতিঃ সনাতনী শম্ভোরভিব্যক্তা ন সংশয়ঃ |
শঙ্করেণ প্রণীতেতি প্রবদন্ত্যপরে জনাঃ || ৭||
যদা সাঽনাদিভূতৈব তদা মানমতীব সা |
স্বতশ্চ পরতো দোষো নাস্তি যস্মাদ্দ্বিজর্ষভাঃ || ৮||
স্বতো দোষো ন বেদস্য বিদ্যতে সূক্ষ্মদর্শনে |
অস্তি চেদ্ব্যবহারস্য লোপ এব প্রসজ্যতে || ৯||
পরতশ্চ ন দোষোঽস্তি পরস্যাভাবতো দ্বিজাঃ |
স্বতো দুষ্টোঽপি শব্দস্তু মানমেবাঽঽপ্তসঙ্গমাৎ || ১০||
ইতি বার্তাঽপি বার্তৈব মুনীন্দ্রাঃ সূক্ষ্মদর্শনে |
স্বতো দুষ্টঃ কথং মানং ভবত্যন্যস্য সঙ্গমাৎ || ১১||
যৎসম্বন্ধেন যো ভাবো যস্য প্রাজ্ঞাঃ প্রসিদ্ধ্যতি |
স তস্য ভ্রান্তিরেব স্যান্ন স্বভাবঃ কথংচন || ১২||
জপাকুসুমলৌহিত্যং বিভাতি স্ফটিকে ভৃশম্ |
তথাঽপি তস্য লৌহিত্যং ভ্রান্তিরেব ন বাস্তবম্ || ১৩||
বহ্নিপাকজলৌহিত্যমিষ্টকায়াং ন বাস্তবম্ |
লৌহিত্যং তৈজসাংশস্তু নেষ্টকায়া নিরূপণে || ১৪||
অন্যত্রান্যস্য ধর্মস্তু প্রতীতো বিভ্রমো মতঃ |
আপ্তাপেক্ষী তু শব্দস্তু প্রামাণ্যায় ন সর্বথা || ১৫||
অনাপ্তয়োগাচ্ছব্দস্য প্রামাণ্যং মুনিপুঙ্গবাঃ |
স্বতঃসিদ্ধং তিরোভূতং স্বনাশায় হি কেবলম্ || ১৬||
যদা সা শঙ্কএরেণোক্তা তদাঽপি শ্রুতিরাস্তিকাঃ |
প্রমাণং সুতরামাপ্ততম এব মহেশ্বরঃ || ১৭||
সর্বদোষবিহীনস্য মহাকারুণিকস্য চ |
সর্বজ্ঞস্যৈব শুদ্ধস্য কথং দোষঃ প্রকল্প্যতে || ১৮||
সর্বদোষবিশিষ্টস্য নির্ঘৃণস্য দুরাত্মনঃ |
অল্পজ্ঞস্য চ জীবস্য দৃষ্টাঽনাপ্তির্হি সত্তমাঃ || ১৯||
যস্য স্মরণমাত্রেণ সমলো নির্মলো ভবেৎ |
ব্রূত সত্যতপোনিষ্ঠাঃ কথং স মলিনো ভবেৎ || ২০||
অতঃ পক্ষদ্বয়েনাপি বেদো মানং ন সংশয়ঃ |
বেদোঽনাদিঃ শিবস্তস্য ব্যঞ্জকঃ পরমার্থতঃ || ২১||
অভিব্যক্তিমপেক্ষ্যৈব প্রণেতেত্যুচ্যতে শিবঃ |
তস্মাদ্বেদোপদিষ্টার্থো যথার্থো নাত্র সংশয়ঃ || ২২||
ইহ তাবন্ময়া প্রোক্তমদ্বিতীয়ঃ পরঃ শিবঃ |
তথাঽপি তেন সকলং নির্মিতং তৎস এব হি || ২৩||
চিৎস্বরূপঃ শিবশ্চেত্যং জগৎসর্বং চরাচরম্ |
তথা সতি বিরুদ্ধং তজ্জগচ্ছম্ভুঃ কথং ভবেৎ || ২৪||
ইত্যেবমাদিচোদ্যস্য দ্বিজেন্দ্রা নাস্তি সম্ভবঃ |
যত্র বেদবিরোধঃ স্যাত্তত্র চোদ্যস্য সম্ভবঃ || ২৫||
চোদনালক্ষণে ধর্মে ন যথা চোদ্যসম্ভবঃ |
তথা ন চোদনাগম্যে শিবে চোদ্যস্য সম্ভবঃ || ২৬||
বাধ্যবাধকভাবস্তু ব্যাধিভেষজয়োর্যথা |
শাস্ত্রেণ গম্যতে তদ্বদয়মর্থোঽপি নান্যতঃ || ২৭||
ঈশ্বরস্য স্বরূপে চ জগৎসর্গাদিষু দ্বিজাঃ |
অতীন্দ্রিয়ার্থেষ্বন্যেষু মানং নঃ শ্রুতিরেব হি || ২৮||
অথবা দেবদেবস্য সর্বদুর্ঘটকারিণী |
শক্তিরস্তি তয়া সর্বং ঘটতে মায়য়াঽনঘাঃ || ২৯||
প্রতীতিসিদ্ধা সা মায়া তত্ত্বতোঽত্র ন সংশয়ঃ |
তয়া দুর্ঘটকারিণ্যা সর্বং তস্যোপপদ্যতে || ৩০||
সা তিষ্ঠতু মহামায়া সর্বদুর্ঘটকারিণী |
বেদমানেন সংসিদ্ধং সর্বং তদ্গ্রাহ্যমেব হি || ৩১||
চোদ্যানর্হে তু বেদার্থে চোদ্যং কুর্বন্ পতত্যধঃ |
অতঃ সর্বং পরিত্যজ্য বেদমেকং সমাশ্রয়েৎ || ৩২||
রূপাবলোকনে চক্ষুর্যথাঽসাধারণং ভবেৎ |
তথা ধর্মাদিবিজ্ঞানে বেদোঽসাধারণঃ পরঃ || ৩৩||
রূপাবলোকনস্যেদং যথা ঘ্রাণং ন কারণম্ |
তথা ধর্মাদিবুদ্ধেস্তু দ্বিজাস্তর্কো ন কারণম্ || ৩৪||
তস্মাদ্বেদোদিতেনৈব প্রকারেণ মহেশ্বরঃ |
অদ্বিতীয়ঃ স্বয়ং শুদ্ধস্তথাঽপীদং জগত্ততঃ || ৩৫||
আবির্ভূতং তিরোভূতং স এব সকলং জগৎ |
বৈভবং তস্য বিজ্ঞাতুং ন শক্যং ভাষিতুং ময়া || ৩৬||
স এব সাহসী সাক্ষাৎসর্বরূপতয়া স্থিতঃ |
পরিজ্ঞাতুং চ বক্তুং চ সমর্থো নাপরঃ পুমান্ || ৩৭||
যথাঽযঃ পাবকেনেদ্ধং ভাতীব দহতীব চ |
তথা বেদঃ শিবেনেদ্ধঃ সর্বং বক্তীব ভাসতে || ৩৮||
অয়োঽবয়বসঙ্ক্রান্তো যথা দহতি পাবকঃ |
তথা বেদেষু সঙ্ক্রান্তঃ শিবঃ সর্বার্থসাধকঃ || ৩৯||
তথাঽপি বেদরহিতঃ স্বয়ং ধর্মাদিবস্তুনি |
ন প্রমাণং বিনা তেন বেদোঽপি দ্বিজপুঙ্গবাঃ || ৪০ ||
তস্মাদ্বেদো মহেশেদ্ধঃ প্রমাণং সর্ববস্তুনি |
অন্যথা ন জডঃ শব্দোঽতীন্দ্রিয়ার্থস্য সাধকঃ || ৪১||
মেরুপার্শ্বে তপস্তপ্ত্বা দৃষ্ট্বা শম্ভুং জগদ্গুরুম্ |
অয়মর্থো ময়া জ্ঞাতস্ততস্তস্য প্রসাদতঃ || ৪২||
তদাজ্ঞয়ৈব বিপ্রেন্দ্রাঃ সংহিতেয়ং ময়োদিতা |
অহং ক্ষুদ্রোঽপি যুষ্মাকং মহতামপি দেশিকঃ || ৪৩||
অভবং সা শিবস্যাঽঽজ্ঞা লঙ্ঘনীয়া ন কেনচিৎ |
শিবস্যাঽঽজ্ঞাবলাদ্বিষ্ণুর্জায়তে ম্রিয়তেঽপি চ || ৪৪||
ব্রহ্মা সর্বজগৎকর্তা বিরাট্সম্রাট্স্বরাডপি |
খরোষ্ট্রতরবঃ ক্ষুদ্রা ব্রহ্মবিষ্ণ্বাদয়োঽভবন্ || ৪৫||
তস্মাদ্ গুরুৎবং মে বিপ্রা যুজ্যতে ন হি সংশয়ঃ |
শিষ্যৎবং চাপি যুষ্মাকং স্বতন্ত্রঃ খলু শঙ্করঃ || ৪৬||
মহাদেবস্য ভক্তাশ্চ তদ্ভক্তা অপি দেহিনঃ |
স্বতন্ত্রা বেদবিচ্ছ্রেষ্ঠাঃ কিং পুনঃ স মহেশ্বরঃ || ৪৭||
স্বাতন্ত্র্যাদ্ধি শিবেনৈব বিষং ভুক্তং বিনাঽমৃতম্ |
ব্রহ্মণশ্চ শিরশ্ছিন্নং বিষ্ণোরপি তথৈব চ || ৪৮||
স্বাতন্ত্র্যাদ্ধি কৃতং তেন মুনীন্দ্রা ব্রহ্মবাদিনঃ |
তৎপ্রসাদান্ময়া সর্বং বিদিতং করবিল্ববৎ || ৪৯||
প্রসাদবলতঃ সাক্ষাৎসত্যার্থঃ কথিতো ময়া |
প্রসাদেন বিনা বক্তুং কো বা শক্তো মুনীশ্বরাঃ || ৫০||
তস্মাৎসর্বং পরিত্যজ্য শ্রদ্ধয়া পরয়া সহ |
মদুক্তং পরমাদ্বৈতং বিদ্যাদ্বেদোদিতং বুধঃ || ৫১||
বিজ্ঞানেন বিনাঽন্যেন নাস্তি মুক্তির্ন সংশয়ঃ |
অতো যূয়মপি প্রাজ্ঞা ভবতাদ্বৈতবাদিনঃ || ৫২||
পরমাদ্বৈতবিজ্ঞানং সিদ্ধং স্বানুভবেন চ |
শ্রুতিস্মৃতিপুরাণাদ্যৈস্তর্কৈর্বেদানুসারিভিঃ || ৫৩||
পরমাদ্বৈতবিজ্ঞানমেব গ্রাহ্যং যথাস্থিতম্ |
নান্যতর্কৈশ্চ হন্তব্যমিদমাম্নায়বাক্যজম্ || ৫৪||
বিনৈব পরমাদ্বৈতং ভেদং কেচন মোহিতাঃ |
কল্পয়ন্তি তদা শম্ভুঃ সদ্বিতীয়ো ভবিষ্যতি || ৫৫||
আম্নায়ার্থং মহাদ্বৈতং নৈব জানন্তি যে জনাঃ |
বেদসিদ্ধং মহাদ্বৈতং কো বা বিজ্ঞাতুমর্হতি || ৫৬||
ভিন্নাভিন্নতয়া দেবং পরমাদ্বৈতলক্ষণম্ |
কল্পয়ন্তি মহামোহাৎকেচিত্তচ্চ ন সঙ্গতম্ || ৫৭||
ভেদাভেদেঽপি ভেদাংশো মিথ্যা ভবতি সত্তমাঃ |
ভেদানিরূপণাদেব ধর্ম্যাদেরনিরূপণাৎ || ৫৮||
তস্মান্নাস্তীশ্বরাদন্যৎকিঞ্চিদপ্যাস্তিকোত্তমাঃ |
দ্বিতীয়াদ্বৈ ভয়ং জন্তোর্ভবতীত্যাহ হি শ্রুতিঃ || ৫৯||
কো মোহস্তত্র কঃ শোক একৎবমনুপশ্যতঃ |
ইতি চাঽঽহ হি সা সাধ্বী শ্রুতিরদ্বৈতমাস্তিকাঃ || ৬০||
একৎবমেব বাক্যার্থো নাপরঃ পরমাস্তিকাঃ |
স্তুতিনিন্দে বিরুধ্যেতে ভেদো যদি বিবক্ষিতঃ || ৬১||
অতীব শুদ্ধচিত্তানাং কেবলং করুণাবলাৎ |
পরমাদ্বৈতমাম্নায়াৎপ্রভাতি শ্রদ্ধয়া সহ || ৬২||
শিবভট্টারকস্যৈব প্রসাদে পুষ্কলে সতি |
পরমাদ্বৈতমাভাতি যথাবন্নান্যহেতুনা || ৬৩||
ন ভাতি পরমাদ্বৈতং প্রসাদরহিতস্য তু |
দুর্লভঃ খলু দেবস্য প্রসাদঃ পরমাস্তিকাঃ || ৬৪||
অতশ্চ বেদোদিতবর্ত্মনৈব
বিহায় বাদান্তরজন্মবুদ্ধিম্ |
বিমুক্তিকামঃ পরমাদ্বিতীয়ং
সমাশ্রয়েদেব শিবস্বরূপম্ || ৬৫||
|| ইতি শ্রীসূতসংহিতায়াং যজ্ঞবৈভবখণ্ডস্যোপরিভাগে
সূতগীতায়াং সামান্যসৃষ্টিকথনং নাম তৃতীয়োঽধ্যায়ঃ || ৩||
অথ চতুর্থোঽধ্যায়ঃ |
৪. বিশেষসৃষ্টিকথনম্ |
সূত উবাচ –
ঈশ্বরো জগতঃ কর্তা মায়য়া স্বীয়য়া পুরা |
অভেদেন স্থিতঃ পূর্বকল্পবাসনয়ান্বিতঃ || ১||
কালকর্মানুগুণ্যেন স্বাভিন্নস্বীয়মায়য়া |
অভিন্নোঽপি তয়া স্বস্য ভেদং কল্পয়তি প্রভুঃ || ২||
কল্পিতোঽযং দ্বিজা ভেদো নাভেদং বাধতে সদা |
কল্পিতানামবস্তুৎবাদবিরোধশ্চ সিধ্যতে || ৩||
পুনঃ পূর্বক্ষণোৎপন্নবাসনাবলতোঽনঘাঃ |
ঈক্ষিতা পূর্ববদ্ভূৎবা স্বশক্ত্যা পরয়া যুতঃ || ৪||
মায়ায়া গুণভেদেন রুদ্রং বিষ্ণুং পিতামহম্ |
সৃষ্ট্বানুপ্রাবিশত্তেষামন্তর্যামিতয়া হরঃ || ৫||
তেষাং রুদ্রঃ পরাভেদাৎপরতত্ত্ববদেব তু |
করোতি সর্গস্থিত্যন্তং রুদ্ররূপেণ সত্তমাঃ || ৬||
সংহরত্যবিশেষেণ জগৎসর্বং চরাচরম্ |
বিষ্ণুরপ্যাস্তিকাঃ সাক্ষাৎপরভেদেন কেবলম্ || ৭||
করোতি সর্গস্থিত্যন্তং বিষ্ণুরূপেণ হে দ্বিজাঃ |
পালয়ত্যবিশেষেণ জগৎসর্বং চরাচরম্ || ৮||
ব্রহ্মাঽপি মুনিশার্দূলাঃ পরাভেদেন কেবলম্ |
করোতি সর্গস্থিত্যন্তং ব্রহ্মরূপেণ সত্তমাঃ |
করোতি বিবিধং সর্বং জগৎপূর্বং যথা তথা || ৯||
শব্দাদিভূতসৃষ্টিস্তুপরস্যৈব শিবস্য তু || ১০||
সর্বান্তঃকরণানাং তু সমষ্টেঃ সৃষ্টিরাস্তিকাঃ |
ত্রিমূর্তীনাং হরস্যৈব প্রাধান্যেন ন সংশয়ঃ || ১১||
প্রাণানামপি সর্বেষাং সমষ্টেঃ সৃষ্টিরাস্তিকাঃ |
অপি রুদ্রস্য তস্যৈব প্রাধান্যেন ন সংশয়ঃ || ১২||
সর্বজ্ঞানেন্দ্রিয়াণাং তু সমষ্টীনাং জনির্দ্বিজাঃ |
ত্রিমূর্তীনাং হরস্যৈব প্রাধান্যেন ন সংশয়ঃ || ১৩||
সর্বকর্মেন্দ্রিয়াণাং তু সমষ্টীনাং জনির্দ্বিজাঃ |
ত্রিমূর্তীনাং হরস্যৈব প্রাধান্যেন ন সংশয়ঃ || ১৪||
তথাঽপি পরমং তত্ত্বং ত্রিমূর্তীনাং তু কারণম্ |
ব্রহ্মবিষ্ণুমহেশানাং সৃষ্টাবুপকরোতি চ || ১৫||
উপচারতয়া তেঽপি স্রষ্টার ইতি শব্দিতাঃ |
তত্রাপি তত্ত্বতঃ স্রষ্টৃ ব্রহ্মৈবাদ্বয়মাস্তিকাঃ || ১৬||
ব্যষ্টয়স্তু সমষ্টিভ্যো জায়ন্তে ব্রহ্মণানঘাঃ |
সমষ্টিষু বিজায়ন্তে দেবতাঃ পূর্বকল্পবৎ || ১৭||
সমষ্টিব্যষ্টিরূপাণাং সৃষ্টানাং পালকো হরিঃ |
রুদ্রস্তেষাং তু সংহর্তা দ্বিজা রূপান্তরেণ চ || ১৮||
যা দেবতাঽন্তঃকরণসমষ্টৌ পূর্বকল্পবৎ |
বিজাতা স মুনিশ্রেষ্ঠা রুক্মগর্ভ ইতীরিতঃ || ১৯||
জাতা প্রাণসমষ্টৌ যা স সূত্রাত্মসমাহ্বয়ঃ |
দিগ্বায়্বর্কজলাধ্যক্ষপৃথিব্যাখ্যাস্তু দেবতাঃ |
জায়ন্তে ক্রমশঃ শ্রোত্রপ্রমুখেষু সমষ্টিষু || ২০||
পাদপাণ্যাদিষু প্রাজ্ঞাঃ কর্মেন্দ্রিয় সমষ্টিষু |
ত্রিবিক্রমেন্দ্রপ্রমুখা জায়ন্তে দেবতাঃ ক্রমাৎ || ২১||
সমষ্টিষু বিজাতা যা দেবতাস্তা যথাক্রমম্ |
ব্যষ্টিভূতেন্দ্রিয়াণাং তু নিয়ন্ত্র্যো দেবতা দ্বিজাঃ || ২২||
মারুতস্ত্বগধিষ্ঠাতা দিগ্দেবী কর্ণদেবতা || ২৩||
নেত্রাভিমানী সূর্যঃ স্যাজ্জিহ্বায়া বরুণস্তথা |
ঘ্রাণাভিমানিনী দেবী পৃথিবীতি প্রকীর্তিতা || ২৪||
পায়োর্মিত্রোঽভিমান্যাত্মা পাদস্যাপি ত্রিবিক্রমঃ |
ইন্দ্রো হস্তনিয়ন্তা স্যাচ্ছিবঃ সর্বনিয়ামকঃ || ২৫||
মনো বুদ্ধিরহঙ্কারশ্চিত্তং চেতি চতুর্বিধম্ |
স্যাদন্তঃকরণং প্রাজ্ঞাঃ ক্রমাত্তেষাং হি দেবতাঃ || ২৬||
চন্দ্রো বাচস্পতির্বিপ্রাঃ সাক্ষাৎকালাগ্নিরুদ্রকঃ |
শিবশ্চেতি ময়া প্রোক্তাঃ সাক্ষাবেদান্তপারগাঃ || ২৭||
আকাশাদীনি ভূতানি স্থূলানি পুনরাস্তিকাঃ |
জায়ন্তে সূক্ষ্মভূতেভ্যঃ পূর্বকল্পে যথা তথা || ২৮||
অণ্ডভেদস্তথা লোকভেদাস্তেষু চ চেতনাঃ |
অচেতনানি চান্যানি ভৌতিকানি চ পূর্ববৎ || ২৯||
বিজায়ন্তে চ ভোগার্থং চেতনানাং শরীরিণাম্ |
ভোক্তারঃ পশবঃ সর্বে শিবো ভোজয়িতা পরঃ || ৩০||
সুখদুঃখাদিসংসারো ভোগঃ সর্বমিদং সুরাঃ |
স্বপ্নবদ্দেবদেবস্য মায়য়ৈব বিনির্মিতম্ || ৩১||
মায়য়া নির্মিতং সর্বং মায়ৈব হি নিরূপণে |
কারণব্যতিরেকেণ কার্যং নেতি হি দর্শিতম্ || ৩২||
মায়াঽপি কারণৎবেন কল্পিতা মুনিপুঙ্গবাঃ |
অধিষ্ঠানাতিরেকেণ নাস্তি তত্ত্বনিরূপণে || ৩৩||
ব্যবহারদৃশা মায়াকল্পনা নৈব বস্তুতঃ |
বস্তুতঃ পরমাদ্বৈতং ব্রহ্মৈবাস্তি ন চেতরৎ || ৩৪||
মায়ারূপতয়া সাক্ষাদ্ব্রহ্মৈব প্রতিভাসতে |
জগজ্জীবাদিরূপেণাপ্যহো দেবস্য বৈভবম্ || ৩৫||
স্বস্বরূপাতিরেকেণ ব্রহ্মণো নাস্তি কিংচন |
তথাঽপি স্বাতিরেকেণ ভাতি হা দৈববৈভবম্ || ৩৬||
জগদাত্মতয়া পশ্যন্বধ্যতে ন বিমুচ্যতে || ৩৭||
সর্বমেতৎপরং ব্রহ্ম পশ্যন্স্বানুভবেন তু |
মুচ্যতে ঘোরসংসারাৎসদ্য এব ন সংশয়ঃ || ৩৮||
সর্বমেতৎপরং ব্রহ্ম বিদিৎবা সুদৃঢং বুধাঃ |
মানতর্কানুভূত্যৈব গুরূক্ত্যা চ প্রসাদতঃ |
জ্ঞানপ্রাকট্যবাহুল্যাজ্জ্ঞানং চ স্বাত্মনৈব তু || ৩৯||
স্বাত্মনা কেবলেনৈব তিষ্ঠন্মুচ্যেত বন্ধনাৎ |
য এবং বেদ বেদার্থং মুচ্যতে স তু বন্ধনাৎ || ৪০||
সোপানক্রমতশ্চৈবং পশ্যন্নাত্মানমদ্বয়ম্ |
সর্বং জগদিদং বিপ্রাঃ পশ্যন্নপি ন পশ্যতি || ৪১||
ভাসমানমিদং সর্বং ভানরূপং পরং পদম্ |
পশ্যন্বেদান্তমানেন সদ্য এব বিমুচ্যতে || ৪২||
এবমাত্মানমদ্বৈতমপশ্যন্নেব পশ্যতঃ |
জগদাত্মতয়া ভানমপি স্বাত্মৈব কেবলম্ || ৪৩||
বিদিৎবৈবং মহায়োগী জগদ্ভানেঽপি নিশ্চলঃ |
যথাভাতমিদং সর্বমনুজানাতি চাঽঽত্মনা || ৪৪||
নিষেধতি চ তৎসিদ্ধিরনুজ্ঞাতস্য কেবলম্ |
তদসিদ্ধির্নিষেধোঽস্য সিদ্ধ্যসিদ্ধী চ তস্য ন || ৪৫||
প্রকাশাত্মতয়া সাক্ষাৎস্থিতিরেবাস্য কেবলম্ |
বিদ্যতে নৈব বিজ্ঞানং নাজ্ঞানং ন জগৎসদা || ৪৬||
প্রকাশাত্মতয়া সাক্ষাৎস্থিতিরত্যপি ভাষণম্ |
অহং বদামি মোহেন তচ্চ তস্মিন্ন বিদ্যতে || ৪৭||
তস্য নিষ্ঠা ময়া বক্তুং বিজ্ঞাতুং চ ন শক্যতে |
শ্রদ্ধামাত্রেণ যৎকিংচিজ্জপ্যতে ভ্রান্তচেতসা || ৪৮||
ইতি গুহ্যমিদং কথিতং ময়া
নিখিলোপনিষদ্ধৃদয়ঙ্গমম্ |
হরপঙ্কজলোচনপালিতং
বিদিঅতং যদি বেদবিদেব সঃ || ৪৯||
|| ইতি শ্রীসূতসংহিতায়াং যজ্ঞবৈভবখণ্ডস্যোপরিভাভাগে
সূতগীতায়াং বিশেষসৃষ্টিকথনংনাম চতুর্থোঽধ্যায়ঃ || ৪||
অথ পঞ্চমোঽধ্যায়ঃ |
৫. আত্মস্বরূপকথনম্ |
সূত উবাচ –
বক্ষ্যামি পরমং গুহ্যং যুষ্মাকং মুনিপুঙ্গবাঃ |
বিজ্ঞানং বেদসম্ভূতং ভক্তানামুত্তমোত্তমম্ || ১||
রুদ্র বিষ্ণুপ্রজানাথপ্রমুখাঃ সর্বচেতনাঃ |
স্বরসেনাহমিত্যাহুরিদমিত্যপি চ স্বতঃ || ২||
ইদংবুদ্ধিশ্চ বাহ্যার্থে ৎবহংবুদ্ধিস্তথাঽঽত্মনি |
প্রসিদ্ধা সর্বজন্তূনাং বিবাদোঽত্র ন কশ্চন || ৩||
ইদমর্থে ঘটাদ্যর্থেঽনাত্মৎবং সর্বদেহিনাম্ |
অহমর্থে তথাঽঽত্মৎবমপি সিদ্ধং স্বভাবতঃ || ৪||
এবং সমস্তজন্তূনামনুভূতির্ব্যবস্থিতা |
ভ্রান্তা অপি ন কুর্বন্তি বিবাদং চাত্র সত্তমাঃ || ৫||
এবং ব্যবস্থিতে হ্যর্থে সতি বুদ্ধিমতাং বরাঃ |
সংসারবিষবৃক্ষস্য মূলচ্ছেদনকাঙ্ক্ষিভিঃ || ৬||
যত্র যত্রেদমিত্যেষা বুদ্ধির্দৃষ্টা স্বভাবতঃ |
তত্র তত্র ৎবনাত্মৎবং বিজ্ঞাতব্যং বিচক্ষণৈঃ || ৭||
যত্র যত্রাহমিত্যেষা বুদ্ধির্দৃষ্টা স্বভাবতঃ |
তত্র তত্র তথাত্মৎবং বিজ্ঞাতব্যং মনীষিভিঃ || ৮||
শরীরে দৃশ্যতে সর্বৈরিদংবুদ্ধিস্তথৈব চ |
অহংবুদ্ধিশ্চ বিপ্রেন্দ্রাস্ততস্তে ভিন্নগোচরে || ৯||
শরীরালম্বনা বুদ্ধিরিদমিত্যাস্তিকোত্তমাঃ |
চিদাত্মলম্বনা সাক্ষাদহংবুদ্ধির্ন সংশয়ঃ || ১০||
ইদমর্থে শরীরে তু যাঽহমিত্যুদিতা মতিঃ |
সা মহাভ্রান্তিরেব স্যাদতস্মিংস্তদ্গ্রহৎবতঃ || ১১||
অচিদ্রূপমহংবুদ্ধেএঃ পিণ্ডং নাঽলম্বনং ভবেৎ |
মৃৎপিণ্ডাদিষ্বদৃষ্টৎবাত্ততোঽনাত্মৈব বিগ্রহঃ || ১২||
অচিত্ত্বাদিন্দ্রিয়াণাং চ প্রাণস্য মনসস্তথা |
আলম্বনৎবং নাস্ত্যেব বুদ্ধেশ্চাহংমতিং প্রতি || ১৩||
বুদ্ধেরচিত্ত্বং সঙ্গ্রাহ্যং দৃষ্টৎবাজ্জন্মনাশয়োঃ |
অচিদ্রূপস্য কুড্যাদেঃ খলু জন্মাবনাশনম্ || ১৪||
অহঙ্কারস্য চাচিত্ত্বাচ্চিত্তস্য চ তথৈব চ |
আলম্বনৎবং নাস্ত্যেব সদাঽহংপ্রত্যয়ং প্রতি || ১৫||
সর্বপ্রত্যয়রূপেণ সদাঽহঙ্কার এব হি |
নিবর্ততেঽতোহঙ্কারস্ত্বনাত্মৈব শরীরবৎ || ১৬||
পরিণামস্বভাবস্য ক্ষীরাদের্দ্বিজপুঙ্গবাঃ |
অচেতনৎবং লোকেঽস্মিন্প্রসিদ্ধং খলু সন্ততম্ || ১৭||
তস্মাচ্চিদ্রূপ এবাঽঽত্মাঽহংবুদ্ধেরর্থ আস্তিকাঃ |
অচিদ্রূপমিদংবুদ্ধেরনাত্মৈবার্তহ্ ঈরুতঃ || ১৮||
সত্যপি প্রত্যয়ার্থৎবে প্রত্যগাত্মা স্বয়ংপ্রভঃ |
বৃত্ত্যধীনতয়া নৈব বিভাতি ঘটকুড্যবৎ || ১৯||
স্বচ্ছবৃত্তিমনুপ্রাপ্য বৃত্তেঃ সাক্ষিতয়া স্থিতঃ |
বৃত্ত্যা নিবর্ত্যমজ্ঞানং গ্রসতে তেন তেজসা || ২০||
অনুপ্রবিষ্টচৈতন্যসম্বন্ধাৎ বৃত্তিরাস্তিকাঃ |
জডরূপং ঘটাদ্যর্থং ভাসয়ত্যাত্মরূপবৎ || ২১||
অতোঽহংপ্রত্যয়ার্থেঽপি নাঅনাত্মা স্যাদ্ঘটাদিবৎ |
স্বয়ংপ্রকাশরূপেণ সাক্ষাদাত্মৈব কেবলম্ || ২২||
যৎসম্বন্ধাদহংবৃত্তিঃ প্রত্যয়ৎবেন ভাসতে |
স কথং প্রত্যয়াধীনপ্রকাশঃ স্যাৎস্বয়ংপ্রভঃ || ২৩||
অহংবৃত্তিঃ স্বতঃসিদ্ধচৈতন্যেদ্ভাঽবভাসতে |
তৎসম্বন্ধাদহঙ্কারঃ প্রত্যয়ীব প্রকাশতে || ২৪||
আত্মাঽহংপ্রত্যয়াকারসম্বন্ধভ্রান্তিমাত্রতঃ |
কর্তা ভোক্তা সুখী দুঃখী জ্ঞাতেতি প্রতিভাসতে || ২৫||
বস্তুতস্তস্য নাস্ত্যেব চিন্মাত্রাদপরং বপুঃ |
চিদ্রূপমেব স্বাজ্ঞানাদন্যথা প্রতিভাসতে || ২৬||
সর্বদেহেষ্বহংরূপঃ প্রত্যয়ো যঃ প্রকাশতে |
তস্য চিদ্রূপ এবাঽঽত্মা সাক্ষাদর্থো ন চাপরঃ || ২৭||
গৌরিতি প্রত্যয়স্যার্থো যথা গোৎবং তু কেবলম্ |
তথাঽহংপ্রত্যয়স্যার্থশ্চিদ্রূপাঅত্মৈব কেবলম্ || ২৮||
ব্যক্তিসম্বন্ধরূপেণ গোৎবং ভিন্নং প্রতীয়তে |
চিদহঙ্কারসম্বন্ধাদ্ভেদেন প্রতিভাতি চ || ২৯||
যথৈবৈকোঽপি গোশব্দো ভিন্নার্থো ব্যক্তিভেদতঃ |
তথৈবৈকোঽপ্যহংশব্দো ভিন্নার্থো ব্যক্তিভেদতঃ || ৩০||
যথা প্রতীত্যা গোব্যক্তির্গোশব্দার্থো ন তত্ত্বতঃ |
তত্ত্বতো গোৎবমেবার্থঃ সাক্ষাদ্বেদবিদাং বরাঃ || ৩১||
তথা প্রতীত্যাঽহংকারোঽহংশব্দার্থো ন তত্ত্বতঃ |
তত্ত্বতঃ প্রত্যগাত্মৈব স এবাখিলসাধকঃ || ৩২||
একৎবেঽপি পৃথক্ত্বেন ব্যপদেশোঽপি যুজ্যতে |
অন্তঃকরণভেদেন সাক্ষিণঃ প্রত্যগাত্মনঃ || ৩৩||
রুদ্রবিষ্ণুপ্রজানাথপ্রমুখাঃ সর্বচেতনাঃ |
চিন্মাত্রাত্মন্যহংশব্দং প্রয়ুঞ্জন্তে হি তত্ত্বতঃ || ৩৪||
সুষুপ্তোঽস্মীতি সর্বোঽযং সুষুপ্তাদুত্থিতো জনঃ |
সুষুপ্তিকালীনস্বাত্মন্যহংশব্দং দ্বিজোত্তমাঃ || ৩৫||
প্রয়ুঙ্ক্তে তত্র দেহাদিবিশেষাকারভাসনম্ |
ন হি কেবলচৈতন্যং সুষুপ্তেঃ সাধকং স্বতঃ || ৩৬||
প্রতিভাতি ততস্তস্মিংশ্চিন্মাত্রে প্রত্যগাত্মনি |
অহংশব্দপ্রবৃত্তিঃ স্যান্ন তু সোপাধিকাত্মনি || ৩৭||
যথাঽযো দহতীত্যুক্তে বহ্নির্দহতি কেবলম্ |
নায়স্তদ্বদহংশব্দশ্চৈতন্যস্যৈব বাচকঃ || ৩৮||
প্রতীত্যা বহ্নিসম্বন্ধাদ্যথাঽযো দাহকং তথা |
চিৎসম্বন্ধাদহঙ্কারোঽহংশব্দার্থঃ প্রকীর্তিতঃ || ৩৯||
চৈতন্যেদ্ধাহম স্পর্শাদ্দেহাদৌ ভ্রান্তচেতসাম্ |
অহংশব্দপ্রয়োগঃ স্যাত্তথাঽহংপ্রত্যয়োঽপি চ || ৪০||
ইত্থং বিবেকতঃ সাক্ষ্যং দেহাদিপ্রাণপূর্বকম্ |
অন্তঃকরণমাত্মানং বিভজ্য স্বাত্মনঃ পৃথক্ || ৪১||
সর্বসাক্ষিণমাত্মানং স্বয়ংজ্যোতিঃস্বলক্ষণম্ |
সত্যমানন্দমদ্বৈতমহমর্থং বিচিন্তয়েৎ || ৪২||
রুদ্রবিষ্ণুপ্রজানাথপ্রমুখাঃ সর্বচেতনাঃ |
অহমেব পরং ব্রহ্মেত্যাহুরাত্মানমেব হি || ৪৩||
তে তু চিন্মাত্রমদ্বৈতমহমর্থতয়া ভৃশম্ |
অঙ্গীকৃত্যাহমদ্বৈতং ব্রহ্মেত্যাহুর্ন দেহতঃ || ৪৪||
চিন্মাত্রং সর্বগং সত্যং সম্পূর্ণসুখমদ্বয়ম্ |
সাক্ষাদ্ব্রহ্মৈব নৈবান্যদিতি তত্ত্ববিদাং স্থিতিঃ || ৪৫||
শাস্ত্রং সত্যচিদানন্দমনন্তং বস্তু কেবলম্ |
শুদ্ধং ব্রহ্মেতি সশ্রদ্ধং প্রাহ বেদবিদাং বরাঃ || ৪৬||
প্রত্যগাত্মাঽযমদ্বন্দ্বঃ সাক্ষী সর্বস্য সর্বদা |
সত্যজ্ঞানসুখানন্তলক্ষণঃ সর্বদাঽনঘাঃ || ৪৭||
অতোঽযং প্রত্যগাত্মৈব স্বানুভূত্যেকগোচরঃ |
শাস্ত্রসিদ্ধং পরং ব্রহ্ম নাপরং পরমার্থতঃ || ৪৮||
এবং তর্কপ্রমাণাভ্যামাচার্যোক্ত্যা চ মানবঃ |
অবিজ্ঞায় শিবাত্মৈক্যং সংসারে পততি ভ্রমাৎ || ৪৯||
শাস্ত্রাচার্যোপদেশেন তর্কৈঃ শাস্ত্রানুসারিভিঃ |
সর্বসাক্ষিতয়াঽঽত্মানং সম্যঙ্ নিশ্চিত্য সুস্থিরঃ || ৫০||
স্বাত্মনোঽন্যতয়া ভাতং সমস্তমবিশেষতঃ |
স্বাত্মমাত্রতয়া বুদ্ধ্বা পুনঃ স্বাত্মানমদ্বয়ম্ || ৫১||
শুদ্ধং ব্রহ্মেতি নিশ্চিত্য স্বয়ং স্বানুভবেন চ |
নিশ্চয়ং চ স্বচিন্মাত্রে বিলাপ্যাবিক্রিয়েঽদ্বয়ে || ৫২||
বিলাপনং চ চিদ্রূপং বুদ্ধ্বা কেবলরূপতঃ |
স্বয়ং তিষ্ঠেদয়ং সাক্ষাদ্ব্রহ্মবিৎপ্রবরো মুনিঃ || ৫৩||
ঈদৃশী পরমা নিষ্ঠা শ্রৌতী স্বানুভবাত্মিকা |
দেশিকালোকনেনৈব কেবলেন হি সিধ্যতি || ৫৪||
দেশিকালোকনং চাপি প্রসাদাৎপারমেশ্বরাৎ |
সিধ্যত্যয়ত্নতঃ প্রাজ্ঞাঃ সত্যমেব ময়োদিতম্ || ৫৫||
সত্যং সত্যং পুনঃ সত্যমুদ্ধৃত্য ভুজমুচ্যতে |
প্রসাদাদেব সর্বেষাং সর্বসিদ্ধির্মহেশিতুঃ || ৫৬||
প্রসাদে শাম্ভবে সিদ্ধে সর্বং শম্ভুতয়া স্বতঃ |
বিভাতি নান্যথা বিপ্রাঃ সত্যমেব ময়োদিতম্ || ৫৭||
যদা শম্ভুতয়া সর্বং বিভাতি স্বত এব তু |
তদা হি শাম্ভবঃ সাক্ষাৎপ্রসাদঃ সত্যমীরিতম্ || ৫৮||
শিবাদন্যতয়া কিংচিদপি ভাতি যদা দ্বিজাঃ |
তদা ন শাঙ্করো বোধঃ সংজাত ইতি মে মতিঃ || ৫৯||
শিবাদন্যতয়া সর্বং প্রতীতমপি পণ্ডিতঃ |
তত্ত্বদৃষ্ট্যা শিবং সর্বং সুস্থিরং পরিপশ্যতি || ৬০||
শিবাকারেণ বা নিত্যং প্রপঞ্চাকারতোঽপি বা |
জীবাকারেণ বা ভাতং যত্তদ্ব্রহ্ম বিচিন্তয়েৎ || ৬১||
শম্ভুরেব সদা ভাতি সর্বাকারেণ নাপরঃ |
ইতি বিজ্ঞানসম্পন্নঃ শাঙ্করজ্ঞানিনাং বরঃ || ৬২||
শম্ভুরূপতয়া সর্বং যস্য ভাতি স্বভাবতঃ |
ন তস্য বৈদিকং কিংচিত্তান্ত্রিকং চাস্তি লৌকিকম্ || ৬৩||
যথাভাতস্বরূপেণ শিবং সর্বং বিচিন্তয়ন্ |
যোগী চরতি লোকানামুপকারায় নান্যথা || ৬৪||
স্বস্বরূপাতিরেকেণ নিষিদ্ধং বিহিতং তু বা |
ন পশ্যতি মহায়োগী ভাতি স্বাত্মতয়াঽখিলম্ || ৬৫||
চণ্ডালগেহে বিপ্রাণাং গৃহে বা পরমার্থবিৎ |
ভক্ষ্যভোজ্যাদিবৈষম্যং ন কিংচিদপি পশ্যতি || ৬৬||
যথেষ্টং বর্ততে যোগী শিবং সর্বং বিচিন্তয়ন্ |
তাদৃশো হি মহায়োগী কো বা তস্য নিবারকঃ || ৬৭||
বহুনোক্তেন কিং সাক্ষাদ্দেশিকস্য নিরীক্ষণাৎ |
প্রসাদাদেব রুদ্রস্য পরশক্তেস্তথৈব চ || ৬৮||
শ্রুতিভক্তিবলাৎপুণ্যপরিপাকবলাদপি |
শিবরূপতয়া সর্বং স্বভাবাদেব পশ্যতি || ৬৯||
শিবঃ সর্বমিতি জ্ঞানং শাঙ্করং শোকমোহনুৎ |
অয়মেব হি বেদার্থো নাপরঃ সত্যমীরিতম্ || ৭০||
শ্রুতৌ ভক্তির্গুরৌ ভক্তিঃ শিবে ভক্তিশ্চ দেহিনাম্ |
সাধনং সত্যবিদ্যায়াঃ সত্যমেব ময়োদিতম্ || ৭১||
সোপানক্রমতো লব্ধং বিজ্ঞানং যস্য সুস্থিরম্ |
তস্য মুক্তিঃ পরা সিদ্ধা সত্যমেব ময়োদিতম্ || ৭২||
নিত্যমুক্তস্য সংসারো ভ্রান্তিসিদ্ধঃ সদা খলু |
তস্মাজ্জ্ঞানেন নাশঃ স্যাৎসংসারস্য ন কর্মণা || ৭৩||
জ্ঞানলাভায় বেদোক্তপ্রকারেণ সমাহিতঃ |
মহাকারুণিকং সাক্ষাদ্গুরুমেব সমাশ্রয়েৎ || ৭৪||
|| ইতি শ্রীসূতসংহিতায়াং যজ্ঞবৈভবখণ্ডস্যোপরিভাগে
সূতগীতায়াং আত্মস্বরূপকথনং নাম পঞ্চমোঽধ্যায়ঃ || ৫||
অথ ষষ্ঠোঽধ্যায়ঃ |
৬. সর্বশাস্ত্রার্থসংগ্রহবর্ণনম্ |
সূত উবাচ –
বক্ষ্যামি পরমং গুহ্যং সর্বশাস্ত্রার্থসঙ্গ্রহম্ |
যং বিদিৎবা দ্বিজা মর্ত্যো ন পুনর্জায়তে ভুবি || ১||
সাক্ষাৎপরতরং তত্ত্বং সচ্চিদানন্দলক্ষণম্ |
সর্বেষাং নঃ সদা সাক্ষাদাত্মভূতমপি স্বতঃ || ২||
দুর্দর্শমেব সূক্ষ্মৎবাদ্দেবানাং মহতামপি |
রুদ্রঃ স্বাত্মতয়া ভাতং তৎসদা পরিপশ্যতি || ৩||
বিষ্ণুঃ কদাচিত্তত্ত্বং কথংচিৎপরিপশ্যতি |
তথা কথংচিদ্ব্রহ্মাঽপি কদাচিৎপরিপশ্যতি || ৪||
ত্রিমূর্তীনাং তু যজ্জ্ঞানং ব্রহ্মৈকবিষয়ং পরম্ |
তস্যাপি সাধকং তত্ত্বং সাক্ষিৎবান্নৈব গোচরম্ || ৫||
প্রসাদাদেব তস্যৈব পরতত্ত্বস্য কেবলম্ |
দেবাদয়োঽপি পশ্যন্তি তত্রাপি ব্রহ্ম সাধকম্ || ৬||
অতঃ প্রসাদসিদ্ধ্যর্থং পরয়া শ্রদ্ধয়া সহ |
ধ্যেয়মেব পরং তত্ত্বং হৃদয়াম্ভোজমধ্যগম্ || ৭||
ত্রিমূর্তীনাং তু রুদ্রোঽপি শিবং পরমকারণম্ |
সদা মূর্ত্যাত্মনা প্রীত্যা ধ্যায়তি দ্বিজপুঙ্গবাঃ || ৮||
ত্রিমূর্তীনাং তু বিষ্ণুশ্চ শিবং পরমকারণম্ |
সদা মূর্ত্যাত্মনা প্রীত্যা ধ্যায়তি দ্বিজপুঙ্গবাঃ || ৯||
ত্রিমূর্তীনাং বিরিঞ্চোঽপি শিবং পরমকারণম্ |
সদা মূর্ত্যাত্মনা প্রীত্যা ধ্যায়তি দ্বিজপুঙ্গবাঃ || ১০||
ব্রহ্মবিষ্ণুমহেশানাং ত্রিমূর্তীনাং বিচক্ষণাঃ |
বিভূতিরূপা দেবাশ্চ ধ্যায়ন্তি প্রীতিসংযুতাঃ || ১১||
ঘৃতকাঠিন্যবন্মূর্তিঃ সচ্চিদানন্দলক্ষণা |
শিবাদ্ভেদেন নৈবাস্তি শিব এব হি সা সদা || ১২||
ব্রহ্মবিষ্ণুমহেশাদ্যাঃ শিবধ্যানপরা অপি |
পরমাত্মবিভাগস্থা ন জীবব্যূহসংস্থিতাঃ || ১৩||
ব্রহ্মবিষ্ণুমহেশানামাবির্ভাবা অপি দ্বিজাঃ |
পরমাত্মবিভাগস্থা ন জীবব্যূহসংস্থিতাঃ || ১৪||
পরতত্ত্ব পরং ব্রহ্ম জীবাত্মপরমাত্মনোঃ |
ঔপাধিকেন ভেদেন দ্বিধাভূতমিব স্থিতম্ || ১৫||
পুণ্যপাপাবৃতা জীবা রাগদ্বেষমলাবৃতাঃ |
জন্মনাশাভিভূতাশ্চ সদা সংসারিণোঽবশাঃ || ১৬||
ব্রহ্মবিষ্ণুমহেশানাং তথা তেষাং দ্বিজর্ষভাঃ |
আবির্ভাববিশেষাণাং পুণ্যপাপাদয়ো ন হি || ১৭||
আজ্ঞয়া পরতত্ত্বস্য জীবানাং হিতকাম্যয়া |
আবির্ভাবতিরোভাবৌ তেষাং কেবলমাস্তিকাঃ || ১৮||
হরিব্রহ্মহরাস্তেষামাবির্ভাবাশ্চ সুব্রতাঃ |
সদা সংসারিভির্জীবৈরুপাস্যা ভুক্তিমুক্তয়ে || ১৯||
উপাস্যৎবে সমানেঽপি হরঃ শ্রেষ্ঠো হরেরজাৎ |
ন সমো ন বিহীনশ্চ নাস্তি সন্দেহকারণম্ || ২০||
বিহীনং বা সমং বাঽপি হরিণা ব্রহ্মণা হরম্ |
যে পশ্যন্তি সদা তে তু পচ্যন্তে নরকানলে || ২১||
হরিব্রহ্মাদিদেবেভ্যঃ শ্রেষ্ঠং পশ্যন্তি যে হরম্ |
তে মহাঘোরসংসারান্মুচ্যন্তে নাত্র সংশয়ঃ || ২২||
প্রাধান্যেন পরং তত্ত্বং মূর্তিদ্বারেণ যোগিভিঃ |
ধ্যেয়ং মুমুক্ষিভির্নিত্যং হৃদয়াম্ভোজমধ্যমে || ২৩||
কার্যভূতা হরিব্রহ্মপ্রমুখাঃ সর্বদেবতাঃ |
অপ্রধানতয়া ধ্যেয়া ন প্রধানতয়া সদা || ২৪||
সর্বৈশ্বর্যেণ সম্পন্নঃ সর্বেশঃ সর্বকারণম্ |
শম্ভুরেব সদা সাম্বো ন বিষ্ণুর্ন প্রজাপতিঃ || ২৫||
তস্মাত্তৎকারণং ধ্যেয়ং প্রাধান্যেন মুমুক্ষুভিঃ |
ন কার্যকোটিনিক্ষিপ্তা ব্রহ্মবিষ্ণুমহেশ্বরাঃ || ২৬||
শিবংকরৎবং সর্বেষাং দেবানাং বেদবিত্তমাঃ |
স্ববিভূতিমপেক্ষ্যৈব ন পরব্রহ্মবৎসদা || ২৭||
শিবংকরৎবং সম্পূর্ণং শিবস্যৈব পরাত্মনঃ |
সাম্বমূর্তিধরস্যাস্য জগতঃ কারণস্য হি || ২৮||
অতোঽপি স শিবো ধ্যেয়ঃ প্রাধান্যেন শিবংকরঃ |
সর্বমন্যৎপরিত্যজ্য দৈবতং পরমেশ্বরাৎ || ২৯||
সাক্ষাৎপরশিবস্যৈব শেষৎবেনাম্বিকাপতেঃ |
দেবতাঃ সকলা ধ্যেয়া ন প্রাধান্যেন সর্বদা || ৩০||
শিখাঽপ্যাথর্বণী সাধ্বী সর্ববেদোত্তমোত্তমা |
অস্মিন্নর্থে সমাপ্তা সা শ্রুতয়শ্চাপরা অপি || ৩১||
যথা সাক্ষাৎপরং ব্রহ্ম প্রতিষ্ঠা সকলস্য চ |
তথৈবাথর্বণো বেদঃ প্রতিষ্ঠৈবাখিলশ্রুতেঃ || ৩২||
কন্দস্তারস্তথা বিন্দুঃ শক্তিস্তারো মহাদ্রুমঃ |
স্কন্ধশাখা অকারাদ্যা বর্ণা যদ্বত্তথৈব তু || ৩৩||
তারস্কন্দঃ শ্রুতের্জাতিঃ শক্তিরাথর্বণো দ্রুমঃ |
স্কন্ধশাখাস্ত্রয়ো বেদাঃ পর্ণাঃ স্মৃতিপুরাণকাঃ || ৩৪||
অঙ্গানি শাখাবরণং তর্কাস্তস্যৈবরক্ষকাঃ |
পুষ্পং শিবপরিজ্ঞানং ফলং মুক্তিঃ পরা মতা || ৩৫||
বহুনোক্তেন কিং বিপ্রাঃ শিবো ধ্যেয়ঃ শিবংকরঃ |
সর্বমন্যৎপরিত্যজ্য দৈবতং ভুক্তিমুক্তয়ে || ৩৬||
সর্বমুক্তং সমাসেন সারাৎসারতরং বুধাঃ |
শিবধ্যানং সদা যূয়ং কুরুধ্বং যত্নতঃ সদা || ৩৭||
|| ইতি শ্রীসূতসংহিতায়াং যজ্ঞবৈভবখণ্ডস্যোপরিভাগে
সূতগীতায়াং সর্বশাস্ত্রার্থসঙ্গ্রহো নাম ষষ্ঠোঽধ্যায়ঃ || ৬ ||
অথ সপ্তমোঽধ্যায়ঃ |
৭. রহস্যবিচারঃ |
সূত উবাচ –
রহস্যং সংপ্রবক্ষ্যামি সমাসেন ন বিস্তরাৎ |
শ্রুণুত শ্রদ্ধয়া বিপ্রাঃ সর্বসিদ্ধ্যর্থমুত্তমম্ || ১||
দেবতাঃ সর্বদেহেষু স্থিতাঃ সত্যতপোধনাঃ |
সর্বেষাং কারণং সাক্ষাৎপরতত্ত্বমপি স্থিতম্ || ২||
পঞ্চভূতাত্মকে দেহে স্থূলে ষাট্কৌশিকে সদা |
পৃথিব্যাদিক্রমেণৈব বর্তন্তে পঞ্চ দেবতাঃ || ৩||
কার্যং ব্রহ্মা মহীভাগে কার্যং বিষ্ণুর্জলাংশকে |
কার্যং রুদ্রোঽগ্নিভাগে চ বায়্বংশে চেশ্বরঃ পরঃ |
আকাশাংশে শরীরস্য স্থিতঃ সাক্ষাৎসদাশিবঃ || ৪||
শরীরস্য বহির্ভাগে বিরাডাত্মা স্থিতঃ সদা || ৫||
অন্তর্ভাগে স্বরাডাত্মা সম্রাড্দেহস্য মধ্যমে |
জ্ঞানেন্দ্রিয়সমাখ্যেষু শ্রোত্রাদিষু যথাক্রমাৎ || ৬||
দিগ্বায়্বর্কজলাধ্যক্ষভূমিসংজ্ঞাশ্চ দেবতাঃ |
কর্মেন্দ্রিয়সমাখ্যেষু পাদপাণ্যাদিষু ক্রমাৎ || ৭||
ত্রিবিক্রমেন্দ্রবহ্ন্যাখ্যা দেবতাশ্চ প্রজাপতিঃ |
মিত্রসংজ্ঞশ্চ বর্তন্তে প্রাণে সূত্রাত্মসংজ্ঞিতঃ || ৮||
হিরণ্যগর্ভো ভগবানন্তঃকরণসংজ্ঞিতে |
তদবস্থাপ্রভেদেষু চন্দ্রমা মনসি স্থিতঃ || ৯||
বুদ্ধৌ বৃহস্পতির্বিপ্রাঃ স্থিতঃ কালাগ্নিরুদ্রকঃ |
অহঙ্কারে শিবশ্চিত্তে রোমসু ক্ষুদ্রদেবতাঃ || ১০||
ভূতপ্রেতাদয়ঃ সর্বে দেহস্যাস্থিষু সংস্থিতাঃ |
পিশাচা রাক্ষসাঃ সর্বে স্থিতাঃ স্নায়ুষু সর্বশঃ || ১১||
মজ্জাখ্যে পিতৃগন্ধর্বাস্ত্বঙ্মাংসরুধিরেষু চ |
বর্তন্তে তত্র সংসিদ্ধা দেবতাঃ সকলা দ্বিজাঃ || ১২||
ত্রিমূর্তীনাং তু যো ব্রহ্মা তস্য ঘোরা তনুর্দ্বিজাঃ |
দক্ষিণাক্ষিণি জন্তূনামন্তর্ভাগে রবির্বহিঃ || ১৩||
ত্রিমূর্তীনাং তু যো ব্রহ্মা তস্য শান্তা তনুর্দ্বিজাঃ |
বর্ততে বামনেত্রান্তর্ভাগে বাহ্যে নিশাকরঃ || ১৪||
ত্রিমূর্তীনাং তু যো বিষ্ণুঃ স কণ্ঠে বর্ততে সদা |
অন্তঃ শান্ততনুর্ঘোরা তনুর্বাহ্যে দ্বিজর্ষভাঃ || ১৫||
ত্রিমূর্তীনাং তু যো রুদ্রো হৃদয়ে বর্ততে সদা |
অন্তঃ শান্ততনুর্ঘোরা তনুর্বাহ্যে দ্বিজর্ষভাঃ || ১৬||
সর্বেষাং কারণং যত্তদ্ব্রহ্ম সত্যাদিলক্ষণম্ |
ব্রহ্মরন্ধ্রে মহাস্থানে বর্ততে সততং দ্বিজাঃ || ১৭||
চিচ্ছক্তিঃ পরমা দেহমধ্যমে সুপ্রতিষ্ঠিতা |
মায়াশক্তির্ললাটাগ্রভাগে ব্যোমাম্বুজাদধঃ || ১৮||
নাদরূপা পরা শক্তির্ললাটস্য তু মধ্যমে |
ভাগে বিন্দুময়ী শক্তির্ললাটস্যাপরাংশকে || ১৯||
বিন্দুমধ্যে তু জীবাত্মা সূক্ষ্মরূপেণ বর্ততে |
হৃদয়ে স্থূলরূপেণ মধ্যমেন তু মধ্যমে || ২০||
দেবী সরস্বতী সাক্ষাদ্ব্রহ্মপত্নী সনাতনী |
জিহ্বাগ্রে বর্ততে নিত্যং সর্ববিদ্যাপ্রদায়িনী || ২১||
বিষ্ণুপত্নী মহালক্ষ্মীর্বর্ততেঽনাহতে সদা |
রুদ্রপত্নী তু রুদ্রেণ পার্বতী সহ বর্ততে || ২২||
সর্বত্র বর্ততে সাক্ষাচ্ছিবঃ সাম্বঃ সনাতনঃ |
সত্যাদিলক্ষণঃ শুদ্ধঃ সর্বদেবনমস্কৃতঃ || ২৩||
সম্যগ্জ্ঞানবতাং দেহে দেবতাঃ সকলা অমূঃ |
প্রত্যগাত্মতয়া ভান্তি দেবতারূপতোঽপি চ || ২৪||
বেদ মার্গৈকনিষ্ঠানাং বিশুদ্ধানাং তু বিগ্রহে |
দেবতারূপতো ভান্তি দ্বিজা ন প্রত্যগাত্মনা || ২৫||
তান্ত্রিকাণাং শরীরে তু দেবতাঃ সকলা অমূঃ |
বর্তন্তে ন প্রকাশন্তে দ্বিজেন্দ্রাঃ শুদ্ধ্যভাবতঃ || ২৬||
যথাজাতজনানাং তু শরীরে সর্বদেবতাঃ |
তিরোভূততয়া নিত্যং বর্তন্তে মুনিসত্তমাঃ || ২৭||
অতশ্চ ভোগমোক্ষার্থী শরীরং দেবতাময়ম্ |
স্বকীয়ং পরকীয়ং চ পূজয়েত্তু বিশেষতঃ || ২৮||
নাবমানং সদা কুর্যান্মোহতো বাঽপি মানবঃ |
যদি কুর্যাৎপ্রমাদেন পতত্যেব ভবোদধৌ || ২৯||
দুর্বৃত্তমপি মূর্খং চ পূজয়েদ্দেবতাত্মনা |
দেবতারূপতঃ পশ্যন্মুচ্যতে ভববন্ধনাৎ || ৩০||
মোহেনাপি সদা নৈব কুর্যাদপ্রিয়ভাষণম্ |
যদি কুর্যাৎপ্রমাদেন হন্তি তং দেবতা পরা || ৩১||
ন ক্ষতং বিগ্রহে কুর্যাদস্ত্রশস্ত্রনখাদিভিঃ |
তথা ন লোহিতং কুর্যাদ্যদি কুর্যাৎপতত্যধঃ || ৩২||
স্বদেহে পরদেহে বা ন কুর্যাদঙ্কনং নরঃ |
যদি কুর্যাচ্চ চক্রাদ্যৈঃ পতত্যেব ন সংশয়ঃ || ৩৩||
রহস্যং সর্বশাস্ত্রাণাং ময়া প্রোক্তং সমাসতঃ |
শরীরং দেবতারূপং ভজধ্বং যূয়মাস্তিকঃ || ৩৪||
|| ইতি শ্রীসূতসংহিতায়াং যজ্ঞবৈভবখণ্ডস্যোপরিভাগে
সূতগীতায়াং রহস্যবিচারো নাম সপ্তমোঽধ্যায়ঃ || ৭||
অথ অষ্টমোঽধ্যায়ঃ |
৮. সর্ববেদান্তসঙ্গ্রহঃ |
সূত উবাচ –
অথ বক্ষ্যে সমাসেন সর্ববেদান্তসঙ্গ্রহম্ |
যং বিদিৎবা নরঃ সাক্ষান্নির্বাণমধিগচ্ছতি || ১||
পরাৎপরতরং তত্ত্বং শিবঃ সত্যাদিলক্ষণঃ |
তস্যাসাধারণী মূর্তিরম্বিকাসহিতা সদা || ২||
স্বস্বরূপমহানন্দপ্রমোদাত্তাণ্ডবপ্রিয়া |
শিবাদিনামান্যেবাস্য নামানি মুনিপুঙ্গবাঃ || ৩||
ব্রহ্মা বিষ্ণুশ্চ রুদ্রশ্চ পরতত্ত্ববিভূতয়ঃ |
ত্রিমূর্তীনাং তু রুদ্রস্তু বরিষ্ঠো ব্রহ্মণো হরেঃ || ৪||
সংসারকারণং মায়া সা সদা সদ্বিলক্ষণা |
প্রতীত্যৈব তু সদ্ভাবস্তস্যা নৈব প্রমাণতঃ || ৫||
সাঽপি ব্রহ্মাতিরেকেণ বস্তুতো নৈব বিদ্যতে |
তত্ত্বজ্ঞানেন মায়ায়া বাধো নান্যেন কর্মণা || ৬||
জ্ঞানং বেদান্তবাক্যোত্থং ব্রহ্মাত্মৈকৎবগোচরম্ |
তচ্চ দেবপ্রসাদেন গুরোঃ সাক্ষান্নিরীক্ষণাৎ |
জায়তে শক্তিপাতেন বাক্যাদেবাধিকারিণাম্ || ৭||
জ্ঞানেচ্ছাকারণং দানং যজ্ঞাশ্চ বিবিধা অপি |
তপাংসি সর্ববেদানাং বেদান্তানাং তথৈব চ || ৮||
পুরাণানাং সমস্তানাং স্মৃতীনাং ভারতস্য চ |
বেদাঙ্গানাং চ সর্বেষামপি বেদার্থপারগাঃ || ৯||
অধ্যাপনং চাধ্যয়নং বেদার্থে ৎবরমাণতা |
উপেক্ষা বেদবাহ্যার্থে লৌকিকেষ্বখিলেষ্বপি || ১০||
শান্তিদান্ত্যাদয়ো ধর্মা জ্ঞানস্যাঙ্গানি সুব্রতাঃ || ১১||
জ্ঞানাঙ্গেষু সমস্তেষু ভক্ত্যা লিঙ্গে শিবার্চনম্ |
প্রতিষ্ঠা দেবদেবস্য শিবস্থাননিরীক্ষণম্ || ১২||
শিবভক্তস্য পূজা চ শিবভক্তিস্তথৈব চ |
রুদ্রাক্ষধারণং ভক্ত্যা কর্ণে কণ্ঠে তথা করে || ১৩||
অগ্নিরিত্যাদিভির্মন্ত্রৈর্ভস্মনৈবাবগুণ্ঠনম্ |
ত্রিপুণ্ড্রধারণং চাপি ললাটাদিস্থলেষু চ || ১৪||
বেদবেদান্তনিষ্ঠস্য মহাকারুণিকস্য চ |
গুরোঃ শুশ্রূষণং নিত্যং বরিষ্ঠং পরিকীর্তিতম্ || ১৫||
চিন্মন্ত্রস্য পদাখ্যস্য হংসাখ্যস্য মনোর্জপঃ |
ষডক্ষরস্য তারস্য বরিষ্ঠঃ পরিকীর্তিতঃ || ১৬||
অবিমুখ্যসমাখ্যং চ স্থানং ব্যাঘ্রপুরাভিধম্ |
শ্রীমদ্দক্ষিণকৈলাসসমাখ্যং চ সুশোভনম্ || ১৭||
মার্গান্তরোদিতাচারাৎস্মার্তো ধর্মঃ সুশোভনঃ |
স্মার্তাচ্ছ্রৌতঃ পরো ধর্মঃ শ্রৌতাচ্ছ্রেষ্ঠো ন বিদ্যতে || ১৮||
অতীন্দ্রিয়ার্থে ধর্মাদৌ শিবে পরমকারণে |
শ্রুতিরেব সদা মানং স্মৃতিস্তদনুসারিণী || ১৯||
আস্তিক্যং সর্বধর্মস্য কন্দভূতং প্রকীর্তিতম্ |
প্রতিষিদ্ধক্রিয়াত্যাগঃ কন্দস্যাপি চ কারণম্ || ২০||
শিবঃ সর্বমিতি জ্ঞানং সর্বজ্ঞানোত্তমোত্তমম্ |
তত্তুল্যং তৎপরং চাপি ন কিংচিদপি বিদ্যতে || ২১||
বক্তব্যং সকলং প্রোক্তং ময়াঽতিশ্রদ্ধয়া সহ |
অতঃ পরং তু বক্তব্যং ন পশ্যামি মুনীশ্বরাঃ || ২২||
ইত্যুক্ত্বা ভগবান্সূতো মুনীনাং ভাবিতাত্মনাম্ |
সাম্বং সর্বেশ্বরং ধ্যাৎবা ভক্ত্যা পরবশোঽভবৎ || ২৩||
অথ পরশিবভক্ত্যা সচ্চিদানন্দপূর্ণং
পরশিবমনুভূয় ৎবাত্মরূপেণ সূতঃ |
মুনিগণমবলোক্য প্রাহ সাক্ষাদ্ঘৃণাব্ধি-
র্জনপদহিতরূপং বেদিতব্যং তু কিংচিৎ || ২৪||
শ্রুতিপথগলিতানাং মানুষাণাং তু তন্ত্রং
গুরুগুরুরখিলেশঃ সর্ববিৎপ্রাহ শম্ভুঃ |
শ্রুতিপথনিরতানাং তত্র নৈবাস্তি কিংচি-
দ্ধিতকরমিহ সর্বং পুষ্কলং সত্যমুক্তম্ || ২৫||
শ্রুতিরপি মনুজানাং বর্ণধর্মং বভাষে
পরগুরুরখিলেশঃ প্রাহ তন্ত্রেষু তদ্বৎ |
শ্রুতিপথগলিতানাং বর্ণধর্মং ঘৃণাব্ধিঃ
শ্রুতিপথনিরতানাং নৈব তৎসেবনীয়ম্ || ২৬||
শ্রুতিপথনিরতানামাশ্রমা যদ্বদুক্তাঃ
পরগুরুরখিলেশস্তদ্বদাহাঽঽশ্রমাংশ্চ |
শ্রুতিপথগলিতানাং মানুষাণাং তু তন্ত্রং
হরিরপি মুনিমুখ্যাঃ প্রাহ তন্ত্রে স্বকীয়ে || ২৭||
বিধিরপি মনুজানামাহ বর্ণাশ্রমাংশ্চ
শ্রুতিপথগলিতানামেব তন্ত্রে স্বকীয়ে |
শ্রুতিপথনিরতানাং তে ন সংসেবনীয়াঃ |
শ্রুতিপথসমমার্গৌ নৈব সত্যং ময়োতম্ || ২৮||
হরহরিবিধিপূজা কীর্তিতা সর্বতন্ত্র
শ্রুতিপথনিরতানং যদ্বদুক্তাতু পূজা |
শ্রুতিপথগলিতানাংযদ্বদুক্তা তু পূজা |
শ্রুতিপথগলিতানামেব তন্ত্রোক্তপূজা
শ্রুতিপথনিরতানাং সর্ববেদোদিতৈব || ২৯||
শ্রুতিপথগলিতানাং সর্বতন্ত্রেষু লিঙ্গং
কথিতমখিলদুঃখধ্বংসধ্বংসকং তত্র তত্র |
শ্রুতিপথনিরতানাং তৎসদা নৈব ধার্যং
শ্রুতিরপিমনুজানামাহ লিঙ্গং বিশুদ্ধম্ || ৩০||
শিবাগমোক্তাশ্রমনিষ্ঠমানব-
স্ত্রিপুণ্ড্রলিঙ্গং তু সদৈব ধারয়েৎ |
তদুক্ততন্ত্রেণ ললাটমধ্যমে
মহাদরেণৈব সিতেন ভস্মনা || ৩১||
বিষ্ণ্বাগমোক্তাশ্রমনিষ্ঠমানব-
স্তথৈব পুণ্ড্রান্তরমূর্ধ্বরূপকম্ |
ত্রিশূলরূপং চতুরশ্রমেব বা
মৃদা ললাটে তু সদৈব ধারয়েৎ || ৩২||
ব্রহ্মাগমোক্তাশ্রমনিষ্ঠমানবো
ললাটমধ্যেঽপি চ বর্তুলাকৃতিম্ |
তদুক্তমন্ত্রেণ সিতেন ভস্মনা
মৃদাঽথবা চন্দনস্তু ধারয়েৎ || ৩৩||
অশ্বত্থপত্রসদৃশং হরিচন্দনেন
মধ্যেললাটমতিশোভনমাদরেণ |
বুদ্ধাগমে মুনিবরা যদি সংস্কৃতশ্চে-
ন্মৃদ্বারিণা সততমেব তু ধারয়েচ্চ || ৩৪||
ঊর্ধ্বপুণ্ড্রত্রয়ং নিত্যং ধারয়েদ্ভস্মনা মৃদা |
ললাটে হৃদয়ে বাহ্বোশ্চন্দনেনাথবা নরঃ || ৩৫||
সিতেন ভস্মনা তির্যক্ত্রিপুণ্ড্রস্য চ ধারণম্ |
সর্বাগমেষু নিষ্ঠানাং তত্তন্মন্ত্রেণ শোভনম্ || ৩৬||
শিবাগমেষু নিষ্ঠানাং ধার্যং তির্যক্ত্রিপুণ্ড্রকম্ |
একমেব সদা ভূত্যা নৈব পুণ্ড্রান্তরং বুধাঃ || ৩৭||
বেদমার্গৈকনিষ্ঠানাং বেদোক্তেনৈব বর্ত্মনা |
ললাটে ভস্মনা তির্যক্ত্রিপুণ্ড্রং ধার্যমেব হি || ৩৮||
ললাটে ভস্মনা তির্যক্ত্রিপুণ্ড্রস্য তু ধারণম্ |
বিনা পুণ্ড্রান্তরং মোহাদ্ধারয়ন্পততি দ্বিজঃ || ৩৯||
বিষ্ণ্বাগমাদিতন্ত্রেষু দীক্ষিতানাং বিধীয়তে |
শঙ্খচক্রগদাপূর্বৈরঙ্কনং নান্যদেহিনাম্ || ৪০||
দীক্ষিতানাং তু তন্ত্রেষু নরাণামঙ্কন দ্বিজাঃ |
উপকারকমেবোক্তং ক্রমেণ মুনিপুঙ্গবাঃ || ৪১||
পুণ্ড্রান্তরস্য তন্ত্রেষু ধারণং দীক্ষিতস্য তু |
উপকারকমেবোক্তং ক্রমেণ মুনিপুঙ্গবাঃ || ৪২||
বেদমার্গৈকনিষ্ঠস্তু মোহেনাপ্যঙ্কিতো যদি |
পতত্যেব ন সন্দেহস্তথা পুণ্ড্রান্তরাদপি || ৪৩||
নাঙ্কনং বিগ্রহে কুর্যাদ্বেদপন্থানমাশ্রিতঃ |
পুণ্ড্রান্তরং ভ্রমাদ্বাপি ললাটে ন ধারয়েৎ || ৪৪||
তন্ত্রোক্তেন প্রকারেণ দেবতা যা প্রতিষ্ঠিতা |
সাঽপি বন্দ্যা সুসেব্যা চ পূজনীয়া চ বৈদিকৈঃ || ৪৫||
শুদ্ধমেব হি সর্বত্র দেবতারূপমাস্তিকাঃ |
তত্তত্তন্ত্রোক্তপূজা তু তন্ত্রনিষ্ঠস্য কেবলম্ || ৪৬||
তন্ত্রেষু দীক্ষিতো মর্ত্যো বৈদিকং ন স্পৃশেৎসদা |
বৈদিকশ্চাপি তন্ত্রেষু দীক্ষিতং ন স্পৃশেৎসদা || ৪৭||
রাজা তু বৈদিকান্সর্বাংস্তান্ত্রিকানখিলানপি |
অসংকীর্ণতয়া নিত্যং স্থাপয়েন্মতিমত্তমাঃ || ৪৮||
অন্নপানাদিভির্বস্ত্রৈঃ সর্বান্ রাজাঽভিরক্ষয়েৎ |
বৈদিকাংস্তু বিশেষেণ জ্ঞানিনং তু বিশেষতঃ || ৪৯||
মহাদেবসমো দেবো যথা নাস্তি শ্রুতৌ স্মৃতৌ |
তথা বৈদিকতুল্যস্তু নাস্তি তন্ত্রাবলম্বিষু || ৫০||
শিবজ্ঞানসমং জ্ঞানং যথা নাস্তি শ্রুতৌ স্মৃতৌ |
তথা বৈদিকতুল্যস্তু নাস্তি তন্ত্রাবলম্বিষু || ৫১||
যথা বারাণসী তুল্যা পুরী নাস্তি শ্রুতৌ স্মৃতৌ |
তথা বৈদিকতুল্যস্তু নাস্তি তন্ত্রাবলম্বিষু || ৫২||
ষডক্ষরোসমো মন্ত্রো যথা নাস্তি শ্রুতৌ স্মৃতৌ |
তথা বৈদিকতুল্যস্তু নাস্তি তন্ত্রাবলম্বিষু || ৫৩||
যথা ভাগীরথীতুল্যা নদী নাস্তি শ্রুতৌ স্মৃতৌ |
তথা বৈদিকতুল্যস্তু নাস্তি তন্ত্রাবলম্বিষু || ৫৪||
ওদনেন সমং ভোজ্যং যথা লোকে ন বিদ্যতে |
তথা বৈদিকতুল্যস্তু নাস্তি তন্ত্রাবলম্বিষু || ৫৫||
দেবদেবো মহাদেবো যথা সর্বৈঃ প্রপূজ্যতে |
তথৈব বৈদিকো মর্ত্যঃ পূজ্যঃ সর্বজনৈরপি || ৫৬||
আদিত্যেন বিহীনং তু জগদন্ধং যথা ভবেৎ |
তথা বৈদিকহীনং তু জগদন্ধং ন সংশয়ঃ || ৫৭||
প্রাণেন্দ্রিয়াদিহীনং তু শরীরং কুণপং যথা |
তথা বৈদিকহীনং তু জগদ্ব্যর্থং ন সংশয়ঃ || ৫৮||
অহো বৈদিকমাহাত্ম্যং ময়া বক্তুং ন শক্যতে |
বেদ এব তু মাহাত্ম্যং বৈদিকস্যাব্রবীন্মুদা || ৫৯||
স্মৃতয়শ্চ পুরাণানি ভারতাদীনি সুব্রতাঃ |
বৈদিকস্য তু মাহাত্ম্যং প্রবদন্তি সদা মুদা || ৬০||
বেদোক্তং তান্ত্রিকাঃ সর্বে স্বীকুর্বন্তি দ্বিজর্ষভাঃ |
নোপজীবন্তি তন্ত্রোক্তং বেদ সাক্ষাৎসনাতনঃ || ৬১||
ইত্যুক্ত্বা ভগবান্সূতঃ স্বগুরুং ব্যাসসংজ্ঞিতম্ |
স্মৃৎবা ভক্ত্যা বশো ভূৎবা পপাত ভুবি দণ্ডবৎ || ৬২||
অস্মিন্নবসরে শ্রীমান্মুনিঃ সত্যবতীসুতঃ |
শিষ্যস্মৃত্যঙ্কুশাকৃষ্টস্তত্রৈবাঽঽবিরভূৎস্বয়ম্ || ৬৩||
তং দৃষ্ট্বা মুনয়ঃ সর্বে সন্তোষাদ্গদ্গদস্বরাঃ |
নিশ্চেষ্টা নিতরাং ভূমৌ প্রণম্য করুণানিধিম্ || ৬৪||
স্তোত্রৈঃ স্তুৎবা মহাত্মানং ব্যাসং সত্যবতীসুতম্ |
পূজয়ামাসুরত্যর্থং বন্যপুষ্পফলাদিভিঃ || ৬৫||
ভগবানপি সর্বজ্ঞঃ করুণাসাগরঃ প্রভুঃ |
উবাচ মধুরং বাক্যং মুনীনালোক্য সুব্রতান্ || ৬৬||
ব্যাস উবাচ –
শিবমস্তু মুনীন্দ্রাণাং নাশিবং তু কদাচন |
অহো ভাগ্যমহো ভাগ্যং ময়া বক্তুং ন শক্যতে || ৬৭||
শ্রূয়তাং মুনয়ঃ সর্বে ভাগ্যবন্তঃ সমাহিতাঃ |
প্রসাদাদেব রুদ্রস্য প্রভোঃ কারুণিকস্য চ || ৬৮||
পুরাণানাং সমস্তানামহং কর্তা পুরাঽভবম্ |
মৎপ্রসাদাদয়ং সূতস্ত্বভবদ্রুদ্রবল্লভঃ || ৬৯||
রুদ্রস্যাঽঽজ্ঞাবলাদেব প্রভোঃ কারুণিকস্য চ |
পুরাণসংহিতকর্তা দেশিকশ্চাভবদ্ভৃশম্ || ৭০||
পুরা কৃতেন পুণ্যেন ভবন্তোঽপীশ্বরাজ্ঞয়া |
সূতাদস্মাচ্ছ্রুতেরর্থং শ্রুতবন্তো যথাতথম্ || ৭১||
কৃতার্থাশ্চ প্রসাদশ্চ রৌদ্রঃ কিং ন করিষ্যতি |
আজ্ঞয়া কেবলং শম্ভোরহং বেদার্থবেদনে || ৭২||
সম্পূর্ণঃ সর্ববেদান্তবাক্যানামর্থনিশ্চয়ে |
সমর্থশ্চ নিয়ুক্তশ্চ সূত্রারম্ভকৃতেঽপি চ || ৭৩||
আজ্ঞয়া দেবদেবস্য ভবতামপি যোগিনাম্ |
জ্ঞানে গুরুগুরুশ্চাহমভবং মুনিপুঙ্গবাঃ || ৭৪||
ভবন্তোঽপি শিবজ্ঞানে বেদসিদ্ধে বিশেষতঃ |
ভক্ত্যা পরময়া যুক্তা নিষ্ঠা ভবত সর্বদা || ৭৫||
ইত্যুক্ত্বা ভগবান্ ব্যাসঃ স্বশিষ্যং সূতমুত্তমম্ |
উত্থাপ্যাঽঽলিঙ্গ্য দেবেশং স্মৃৎবা নৎবাঽগমদ্গুরুঃ || ৭৬||
পুনশ্চ সূতঃ সর্বজ্ঞঃ স্বশিষ্যানবলোক্য চ |
প্রাহ গম্ভীরয়া বাচা ভবতাং শিবমস্ত্বিতি || ৭৭||
ময়োক্তা পরমা গীতা পঠিতা যেন তস্য তু |
আয়ুরারোগ্যমৈশ্বর্যং বিজ্ঞানং চ ভবিষ্যতি || ৭৮||
শিবপ্রসাদঃ সুলভো ভবিষ্যতি ন সংশয়ঃ |
গুরুৎবং চ মনুষ্যাণাং ভবিষ্যতি ন সংশয়ঃ || ৭৯||
বিদ্যারূপা যা শিবা বেদবেদ্যা
সত্যানন্দানন্তসংবিৎস্বরূপা |
তস্যা বাচঃ সর্বলোকৈক মাতু-
র্ভক্ত্যা নিত্যং চম্বিকায়াঃ প্রসাদাৎ || ৮০||
গুরুপ্রসাদাদপি সুব্রতা ময়া
শিবপ্রসাদাদপি চোত্তমোত্তমাৎ |
বিনায়কস্যাপি মহাপ্রসাদাৎ
ষডাননস্যাপি মহাপ্রসাদাৎ || ৮১||
যজ্ঞবৈভবসমাহ্বয়ঃ কৃতঃ
সর্ববেদমথনেন সত্তমাঃ |
অত্র মুক্তিরপি শোভনা পরা
সুস্থিতৈব ন হি তত্র সংশয়ঃ || ৮২||
যজ্ঞবৈভবসমাহ্বয়ং পরং
খণ্ডমত্র বিমলং পঠেন্নরঃ |
সত্যবোধসুখলক্ষণং
সত্যমেব ঝটিতি প্রয়াতি হি || ৮৩||
মদুক্তসংহিতা পরা সমস্তদুঃখহারিণী
নরস্য মুক্তিদায়িনী শিবপ্রসাদকারিণী |
সমস্তবেদসারতঃ সুনির্মিতাঽতিশোভনা
মহত্তরানুভূতিমদ্ভিরাদৃতা ন চাপরৈঃ || ৮৪||
মদুক্তসংহিতা তু যা তয়া বিরুদ্ধমস্তি চে-
দনর্থকং হি তদ্বুধা বচঃ প্রয়োজনায় ন |
শ্রুতিপ্রমাণরূপিণী সুসংহিতা ময়োদিতা
শ্রুতিপ্রমাণমেব সা মহাজনস্য সন্ততম্ || ৮৫||
মদুক্তসংহিতামিমামতিপ্রিয়েণ মানবঃ
পঠন্ন যাতি সংসৃতিং প্রয়াতি শঙ্করং পরম্ |
অতশ্চ শোভনামিমামহর্নিশং সমাহিতঃ
শ্রুতিপ্রমাণবৎপঠেদতন্দ্রিতঃ স্বমুক্তয়ে || ৮৬||
পুরাণসংহিতামিমামতিপ্রিয়েণ যঃ পুমান্
শ্রুণোতি সংসৃতিং পুনর্ন যাতি যাতি শঙ্করম্ |
পরানুভূতিরদ্বয়া বিজায়তে চ তস্য সা
শিবা চ বাচি নৃত্যতি প্রিয়েণ শঙ্করোঽপি চ || ৮৭||
সত্যপূর্ণসুখবোধলক্ষণং
তত্ত্বমর্থবিভবং সনাতনম্ |
সৎস্বরূপমশুভাপহং শিবং
ভক্তিগম্যমমলং সদা নুমঃ || ৮৮||
যাঽনুভূতিরমলা সদোদিতা
বেদমাননিরতা শুভাবহা |
তামতীব সুখদামহং শিবাং
কেশবাদিজনসেবিতাং নুমঃ || ৮৯||
বেদপদ্মনিকরস্য ভাস্করং
দেবদেবসদৃশং ঘৃণানিধিম্ |
ব্যাসমিষ্টফলদং গুরুং নুমঃ
শোকমোহবিষরোগভেষজম্ || ৯০||
যে বেদবেদান্তধনা মহাজনাঃ
শিবাভিমানৈকনিরস্তকিল্বিষাঃ |
নমামি বাচা শিরসা হৃদা চ তান্
ভবাহিবেগস্য নিবারকানহম্ || ৯১||
|| ইতি শ্রীস্কান্দপুরাণে সূতসংহিতায়াং চতুর্থস্য
যজ্ঞবৈভবখণ্ডস্যোপরিভাগে সূতগীতায়াং
সর্ববেদান্তসঙ্গ্রহো নামাষ্টমোঽধ্যায়ঃ || ৮||
সূতগীতা সমাপ্তা |
ওঁ তৎসৎ
