অষ্টাবক্র গীতা

.. অষ্টাবক্র গীতা ..
.. শ্রী..

অথ শ্রীমদষ্টাবক্রগীতা প্রারভ্যতে ..

জনক উবাচ ..
কথং জ্ঞানমবাপ্নোতি কথং মুক্তির্ভবিষ্যতি .
বৈরাগ্যং চ কথং প্রাপ্তং এতদ্ ব্রূহি মম প্রভো .. ১- ১..
অষ্টাবক্র উবাচ ..
মুক্তিং ইচ্ছসি চেত্তাত বিষযান্ বিষবত্ত্যজ .
ক্ষমার্জবদযাতোষসত্যং পীযূষবদ্ ভজ .. ১- ২..
ন পৃথ্বী ন জলং নাগ্নির্ন বাযুর্দ্যৌর্ন বা ভবান্ .
এষাং সাক্ষিণমাত্মানং চিদ্রূপং বিদ্ধি মুক্তযে .. ১- ৩..
যদি দেহং পৃথক্ কৃত্য চিতি বিশ্রাম্য তিষ্ঠসি .
অধুনৈব সুখী শান্তো বন্ধমুক্তো ভবিষ্যসি .. ১- ৪..
ন ত্বং বিপ্রাদিকো বর্ণো নাশ্রমী নাক্ষগোচরঃ .
অসঙ্গোঽসি নিরাকারো বিশ্বসাক্ষী সুখী ভব .. ১- ৫..
ধর্মাধর্মৌ সুখং দুঃখং মানসানি ন তে বিভো .
ন কর্তাসি ন ভোক্তাসি মুক্ত এবাসি সর্বদা .. ১- ৬..
একো দ্রষ্টাসি সর্বস্য মুক্তপ্রাযোঽসি সর্বদা .
অযমেব হি তে বন্ধো দ্রষ্টারং পশ্যসীতরম্ .. ১- ৭..
অহং কর্তেত্যহংমানমহাকৃষ্ণাহিদংশিতঃ .
নাহং কর্তেতি বিশ্বাসামৃতং পীত্বা সুখী ভব .. ১- ৮..
একো বিশুদ্ধবোধোঽহং ইতি নিশ্চযবহ্নিনা .
প্রজ্বাল্যাজ্ঞানগহনং বীতশোকঃ সুখী ভব .. ১- ৯..
যত্র বিশ্বমিদং ভাতি কল্পিতং রজ্জুসর্পবত্ .
আনন্দপরমানন্দঃ স বোধস্ত্বং সুখং ভব .. ১- ১০..
মুক্তাভিমানী মুক্তো হি বদ্ধো বদ্ধাভিমান্যপি .
কিংবদন্তীহ সত্যেযং যা মতিঃ সা গতির্ভবেত্ .. ১- ১১..
আত্মা সাক্ষী বিভুঃ পূর্ণ একো মুক্তশ্চিদক্রিযঃ .
অসংগো নিঃস্পৃহঃ শান্তো ভ্রমাত্সংসারবানিব .. ১- ১২..
কূটস্থং বোধমদ্বৈতমাত্মানং পরিভাবয .
আভাসোঽহং ভ্রমং মুক্ত্বা ভাবং বাহ্যমথান্তরম্ .. ১- ১৩..
দেহাভিমানপাশেন চিরং বদ্ধোঽসি পুত্রক .
বোধোঽহং জ্ঞানখংগেন তঃনিকৃত্য সুখী ভব .. ১- ১৪..
নিঃসংগো নিষ্ক্রিযোঽসি ত্বং স্বপ্রকাশো নিরংজনঃ .
অযমেব হি তে বন্ধঃ সমাধিমনুতিষ্ঠতি .. ১- ১৫..
ত্বযা ব্যাপ্তমিদং বিশ্বং ত্বযি প্রোতং যথার্থতঃ .
শুদ্ধবুদ্ধস্বরূপস্ত্বং মা গমঃ ক্ষুদ্রচিত্ততাম্ .. ১- ১৬..
নিরপেক্ষো নির্বিকারো নির্ভরঃ শীতলাশযঃ .
অগাধবুদ্ধিরক্ষুব্ধো ভব চিন্মাত্রবাসনঃ .. ১- ১৭..
সাকারমনৃতং বিদ্ধি নিরাকারং তু নিশ্চলং .
এতত্তত্ত্বোপদেশেন ন পুনর্ভবসংভবঃ .. ১- ১৮..
যথৈবাদর্শমধ্যস্থে রূপেঽন্তঃ পরিতস্তু সঃ .
তথৈবাঽস্মিন্ শরীরেঽন্তঃ পরিতঃ পরমেশ্বরঃ .. ১- ১৯..
একং সর্বগতং ব্যোম বহিরন্তর্যথা ঘটে .
নিত্যং নিরন্তরং ব্রহ্ম সর্বভূতগণে তথা .. ১- ২০..
——————————————————————————–
জনক উবাচ ..
অহো নিরংজনঃ শান্তো বোধোঽহং প্রকৃতেঃ পরঃ .
এতাবন্তমহং কালং মোহেনৈব বিডংবিতঃ .. ২- ১..
যথা প্রকাশযাম্যেকো দেহমেনং তথা জগত্ .
অতো মম জগত্সর্বমথবা ন চ কিংচন .. ২- ২..
স শরীরমহো বিশ্বং পরিত্যজ্য মযাধুনা .
কুতশ্চিত্ কৌশলাদ্ এব পরমাত্মা বিলোক্যতে .. ২- ৩..
যথা ন তোযতো ভিন্নাস্তরংগাঃ ফেনবুদ্বুদাঃ .
আত্মনো ন তথা ভিন্নং বিশ্বমাত্মবিনির্গতম্ .. ২- ৪..
তন্তুমাত্রো ভবেদ্ এব পটো যদ্বদ্ বিচারিতঃ .
আত্মতন্মাত্রমেবেদং তদ্বদ্ বিশ্বং বিচারিতম্ .. ২- ৫..
যথৈবেক্ষুরসে ক্লৃপ্তা তেন ব্যাপ্তৈব শর্করা .
তথা বিশ্বং মযি ক্লৃপ্তং মযা ব্যাপ্তং নিরন্তরম্ .. ২- ৬..
আত্মজ্ঞানাজ্জগদ্ ভাতি আত্মজ্ঞানান্ন ভাসতে .
রজ্জ্বজ্ঞানাদহির্ভাতি তজ্জ্ঞানাদ্ ভাসতে ন হি .. ২- ৭..
প্রকাশো মে নিজং রূপং নাতিরিক্তোঽস্ম্যহং ততঃ .
যদা প্রকাশতে বিশ্বং তদাহং ভাস এব হি .. ২- ৮..
অহো বিকল্পিতং বিশ্বমজ্ঞানান্মযি ভাসতে .
রূপ্যং শুক্তৌ ফণী রজ্জৌ বারি সূর্যকরে যথা .. ২- ৯..
মত্তো বিনির্গতং বিশ্বং ময্যেব লযমেষ্যতি .
মৃদি কুংভো জলে বীচিঃ কনকে কটকং যথা .. ২- ১০..
অহো অহং নমো মহ্যং বিনাশো যস্য নাস্তি মে .
ব্রহ্মাদিস্তংবপর্যন্তং জগন্নাশোঽপি তিষ্ঠতঃ .. ২- ১১..
অহো অহং নমো মহ্যং একোঽহং দেহবানপি .
ক্বচিন্ন গন্তা নাগন্তা ব্যাপ্য বিশ্বমবস্থিতঃ .. ২- ১২..
অহো অহং নমো মহ্যং দক্ষো নাস্তীহ মত্সমঃ .
অসংস্পৃশ্য শরীরেণ যেন বিশ্বং চিরং ধৃতম্ .. ২- ১৩..
অহো অহং নমো মহ্যং যস্য মে নাস্তি কিংচন .
অথবা যস্য মে সর্বং যদ্ বাঙ্মনসগোচরম্ .. ২- ১৪..
জ্ঞানং জ্ঞেযং তথা জ্ঞাতা ত্রিতযং নাস্তি বাস্তবং .
অজ্ঞানাদ্ ভাতি যত্রেদং সোঽহমস্মি নিরংজনঃ .. ২- ১৫..
দ্বৈতমূলমহো দুঃখং নান্যত্তস্যাঽস্তি ভেষজং .
দৃশ্যমেতন্ মৃষা সর্বং একোঽহং চিদ্রসোমলঃ .. ২- ১৬..
বোধমাত্রোঽহমজ্ঞানাদ্ উপাধিঃ কল্পিতো মযা .
এবং বিমৃশতো নিত্যং নির্বিকল্পে স্থিতির্মম .. ২- ১৭..
ন মে বন্ধোঽস্তি মোক্ষো বা ভ্রান্তিঃ শান্তো নিরাশ্রযা .
অহো মযি স্থিতং বিশ্বং বস্তুতো ন মযি স্থিতম্ .. ২- ১৮..
সশরীরমিদং বিশ্বং ন কিংচিদিতি নিশ্চিতং .
শুদ্ধচিন্মাত্র আত্মা চ তত্কস্মিন্ কল্পনাধুনা .. ২- ১৯..
শরীরং স্বর্গনরকৌ বন্ধমোক্ষৌ ভযং তথা .
কল্পনামাত্রমেবৈতত্ কিং মে কার্যং চিদাত্মনঃ .. ২- ২০..
অহো জনসমূহেঽপি ন দ্বৈতং পশ্যতো মম .
অরণ্যমিব সংবৃত্তং ক্ব রতিং করবাণ্যহম্ .. ২- ২১..
নাহং দেহো ন মে দেহো জীবো নাহমহং হি চিত্ .
অযমেব হি মে বন্ধ আসীদ্যা জীবিতে স্পৃহা .. ২- ২২..
অহো ভুবনকল্লোলৈর্বিচিত্রৈর্দ্রাক্ সমুত্থিতং .
ময্যনংতমহাংভোধৌ চিত্তবাতে সমুদ্যতে .. ২- ২৩..
ময্যনংতমহাংভোধৌ চিত্তবাতে প্রশাম্যতি .
অভাগ্যাজ্জীববণিজো জগত্পোতো বিনশ্বরঃ .. ২- ২৪..
ময্যনন্তমহাংভোধাবাশ্চর্যং জীববীচযঃ .
উদ্যন্তি ঘ্নন্তি খেলন্তি প্রবিশন্তি স্বভাবতঃ .. ২- ২৫..
——————————————————————————–
অষ্টাবক্র উবাচ ..
অবিনাশিনমাত্মানং একং বিজ্ঞায তত্ত্বতঃ .
তবাত্মজ্ঞানস্য ধীরস্য কথমর্থার্জনে রতিঃ .. ৩- ১..
আত্মাজ্ঞানাদহো প্রীতির্বিষযভ্রমগোচরে .
শুক্তেরজ্ঞানতো লোভো যথা রজতবিভ্রমে .. ৩- ২..
বিশ্বং স্ফুরতি যত্রেদং তরঙ্গা ইব সাগরে .
সোঽহমস্মীতি বিজ্ঞায কিং দীন ইব ধাবসি .. ৩- ৩..
শ্রুত্বাপি শুদ্ধচৈতন্য আত্মানমতিসুন্দরং .
উপস্থেঽত্যন্তসংসক্তো মালিন্যমধিগচ্ছতি .. ৩- ৪..
সর্বভূতেষু চাত্মানং সর্বভূতানি চাত্মনি .
মুনের্জানত আশ্চর্যং মমত্বমনুবর্ততে .. ৩- ৫..
আস্থিতঃ পরমাদ্বৈতং মোক্ষার্থেঽপি ব্যবস্থিতঃ .
আশ্চর্যং কামবশগো বিকলঃ কেলিশিক্ষযা .. ৩- ৬..
উদ্ভূতং জ্ঞানদুর্মিত্রমবধার্যাতিদুর্বলঃ .
আশ্চর্যং কামমাকাঙ্ক্ষেত্ কালমন্তমনুশ্রিতঃ .. ৩- ৭..
ইহামুত্র বিরক্তস্য নিত্যানিত্যবিবেকিনঃ .
আশ্চর্যং মোক্ষকামস্য মোক্ষাদ্ এব বিভীষিকা .. ৩- ৮..
ধীরস্তু ভোজ্যমানোঽপি পীড্যমানোঽপি সর্বদা .
আত্মানং কেবলং পশ্যন্ ন তুষ্যতি ন কুপ্যতি .. ৩- ৯..
চেষ্টমানং শরীরং স্বং পশ্যত্যন্যশরীরবত্ .
সংস্তবে চাপি নিন্দাযাং কথং ক্ষুভ্যেত্ মহাশযঃ .. ৩- ১০..
মাযামাত্রমিদং বিশ্বং পশ্যন্ বিগতকৌতুকঃ .
অপি সন্নিহিতে মৃত্যৌ কথং ত্রস্যতি ধীরধীঃ .. ৩- ১১..
নিঃস্পৃহং মানসং যস্য নৈরাশ্যেঽপি মহাত্মনঃ .
তস্যাত্মজ্ঞানতৃপ্তস্য তুলনা কেন জাযতে .. ৩- ১২..
স্বভাবাদ্ এব জানানো দৃশ্যমেতন্ন কিংচন .
ইদং গ্রাহ্যমিদং ত্যাজ্যং স কিং পশ্যতি ধীরধীঃ .. ৩- ১৩..
অংতস্ত্যক্তকষাযস্য নির্দ্বন্দ্বস্য নিরাশিষঃ .
যদৃচ্ছযাগতো ভোগো ন দুঃখায ন তুষ্টযে .. ৩- ১৪..
——————————————————————————–
অষ্টাবক্র উবাচ ..
হন্তাত্মজ্ঞানস্য ধীরস্য খেলতো ভোগলীলযা .
ন হি সংসারবাহীকৈর্মূঢৈঃ সহ সমানতা .. ৪- ১..
যত্ পদং প্রেপ্সবো দীনাঃ শক্রাদ্যাঃ সর্বদেবতাঃ .
অহো তত্র স্থিতো যোগী ন হর্ষমুপগচ্ছতি .. ৪- ২..
তজ্জ্ঞস্য পুণ্যপাপাভ্যাং স্পর্শো হ্যন্তর্ন জাযতে .
ন হ্যাকাশস্য ধূমেন দৃশ্যমানাপি সঙ্গতিঃ .. ৪- ৩..
আত্মৈবেদং জগত্সর্বং জ্ঞাতং যেন মহাত্মনা .
যদৃচ্ছযা বর্তমানং তং নিষেদ্ধুং ক্ষমেত কঃ .. ৪- ৪..
আব্রহ্মস্তংবপর্যন্তে ভূতগ্রামে চতুর্বিধে .
বিজ্ঞস্যৈব হি সামর্থ্যমিচ্ছানিচ্ছাবিবর্জনে .. ৪- ৫..
আত্মানমদ্বযং কশ্চিজ্জানাতি জগদীশ্বরং .
যদ্ বেত্তি তত্স কুরুতে ন ভযং তস্য কুত্রচিত্ .. ৪- ৬..
——————————————————————————–
অষ্টাবক্র উবাচ ..
ন তে সংগোঽস্তি কেনাপি কিং শুদ্ধস্ত্যক্তুমিচ্ছসি .
সংঘাতবিলযং কুর্বন্নেবমেব লযং ব্রজ .. ৫- ১..
উদেতি ভবতো বিশ্বং বারিধেরিব বুদ্বুদঃ .
ইতি জ্ঞাত্বৈকমাত্মানং এবমেব লযং ব্রজ .. ৫- ২..
প্রত্যক্ষমপ্যবস্তুত্বাদ্ বিশ্বং নাস্ত্যমলে ত্বযি .
রজ্জুসর্প ইব ব্যক্তং এবমেব লযং ব্রজ .. ৫- ৩..
সমদুঃখসুখঃ পূর্ণ আশানৈরাশ্যযোঃ সমঃ .
সমজীবিতমৃত্যুঃ সন্নেবমেব লযং ব্রজ .. ৫- ৪..
——————————————————————————–
অষ্টাবক্র উবাচ ..
আকাশবদনন্তোঽহং ঘটবত্ প্রাকৃতং জগত্ .
ইতি জ্ঞানং তথৈতস্য ন ত্যাগো ন গ্রহো লযঃ .. ৬- ১..
মহোদধিরিবাহং স প্রপংচো বীচিসঽন্নিভঃ .
ইতি জ্ঞানং তথৈতস্য ন ত্যাগো ন গ্রহো লযঃ .. ৬- ২..
অহং স শুক্তিসঙ্কাশো রূপ্যবদ্ বিশ্বকল্পনা .
ইতি জ্ঞানং তথৈতস্য ন ত্যাগো ন গ্রহো লযঃ .. ৬- ৩..
অহং বা সর্বভূতেষু সর্বভূতান্যথো মযি .
ইতি জ্ঞানং তথৈতস্য ন ত্যাগো ন গ্রহো লযঃ .. ৬- ৪..
——————————————————————————–
জনক উবাচ ..
ময্যনংতমহাংভোধৌ বিশ্বপোত ইতস্ততঃ .
ভ্রমতি স্বাংতবাতেন ন মমাস্ত্যসহিষ্ণুতা .. ৭- ১..
ময্যনংতমহাংভোধৌ জগদ্বীচিঃ স্বভাবতঃ .
উদেতু বাস্তমাযাতু ন মে বৃদ্ধির্ন চ ক্ষতিঃ .. ৭- ২..
ময্যনংতমহাংভোধৌ বিশ্বং নাম বিকল্পনা .
অতিশাংতো নিরাকার এতদেবাহমাস্থিতঃ .. ৭- ৩..
নাত্মা ভাবেষু নো ভাবস্তত্রানন্তে নিরংজনে .
ইত্যসক্তোঽস্পৃহঃ শান্ত এতদেবাহমাস্তিতঃ .. ৭- ৪..
অহো চিন্মাত্রমেবাহং ইন্দ্রজালোপমং জগত্ .
ইতি মম কথং কুত্র হেযোপাদেযকল্পনা .. ৭- ৫..
——————————————————————————–
অষ্টাবক্র উবাচ ..
তদা বন্ধো যদা চিত্তং কিন্চিদ্ বাংছতি শোচতি .
কিংচিন্ মুংচতি গৃণ্হাতি কিংচিদ্ দৃষ্যতি কুপ্যতি .. ৮- ১..
তদা মুক্তির্যদা চিত্তং ন বাংছতি ন শোচতি .
ন মুংচতি ন গৃণ্হাতি ন হৃষ্যতি ন কুপ্যতি .. ৮- ২..
তদা বন্ধো যদা চিত্তং সক্তং কাশ্বপি দৃষ্টিষু .
তদা মোক্ষো যদা চিত্তমসক্তং সর্বদৃষ্টিষু .. ৮- ৩..
যদা নাহং তদা মোক্ষো যদাহং বন্ধনং তদা .
মত্বেতি হেলযা কিংচিন্মা গৃহাণ বিমুংচ মা .. ৮- ৪..
——————————————————————————–
অষ্টাবক্র উবাচ ..
কৃতাকৃতে চ দ্বন্দ্বানি কদা শান্তানি কস্য বা .
এবং জ্ঞাত্বেহ নির্বেদাদ্ ভব ত্যাগপরোঽব্রতী .. ৯- ১..
কস্যাপি তাত ধন্যস্য লোকচেষ্টাবলোকনাত্ .
জীবিতেচ্ছা বুভুক্ষা চ বুভুত্সোপশমঃ গতাঃ .. ৯- ২..
অনিত্যং সর্বমেবেদং তাপত্রযদূষিতং .
অসরং নিন্দিতং হেযমিতি নিশ্চিত্য শাম্যতি .. ৯- ৩..
কোঽসৌ কালো বযঃ কিং বা যত্র দ্বন্দ্বানি নো নৃণাং .
তান্যুপেক্ষ্য যথাপ্রাপ্তবর্তী সিদ্ধিমবাপ্নুযাত্ .. ৯- ৪..
না মতং মহর্ষীণাং সাধূনাং যোগিনাং তথা .
দৃষ্ট্বা নির্বেদমাপন্নঃ কো ন শাম্যতি মানবঃ .. ৯- ৫..
কৃত্বা মূর্তিপরিজ্ঞানং চৈতন্যস্য ন কিং গুরুঃ .
নির্বেদসমতাযুক্ত্যা যস্তারযতি সংসৃতেঃ .. ৯- ৬..
পশ্য ভূতবিকারাংস্ত্বং ভূতমাত্রান্ যথার্থতঃ .
তত্ক্ষণাদ্ বন্ধনির্মুক্তঃ স্বরূপস্থো ভবিষ্যসি .. ৯- ৭..
বাসনা এব সংসার ইতি সর্বা বিমুংচ তাঃ .
তত্ত্যাগো বাসনাত্যাগাত্স্থিতিরদ্য যথা তথা .. ৯- ৮..
——————————————————————————–
অষ্টাবক্র উবাচ ..
বিহায বৈরিণং কামমর্থং চানর্থসংকুলং .
ধর্মমপ্যেতযোর্হেতুং সর্বত্রাদরং কুরু .. ১০- ১..
স্বপ্নেন্দ্রজালবত্ পশ্য দিনানি ত্রীণি পংচ বা .
মিত্রক্ষেত্রধনাগারদারদাযাদিসংপদঃ .. ১০- ২..
যত্র যত্র ভবেত্তৃষ্ণা সংসারং বিদ্ধি তত্র বৈ .
প্রৌঢবৈরাগ্যমাশ্রিত্য বীততৃষ্ণঃ সুখী ভব .. ১০- ৩..
তৃষ্ণামাত্রাত্মকো বন্ধস্তন্নাশো মোক্ষ উচ্যতে .
ভবাসংসক্তিমাত্রেণ প্রাপ্তিতুষ্টির্মুহুর্মুহুঃ .. ১০- ৪..
ত্বমেকশ্চেতনঃ শুদ্ধো জডং বিশ্বমসত্তথা .
অবিদ্যাপি ন কিংচিত্সা কা বুভুত্সা তথাপি তে .. ১০- ৫..
রাজ্যং সুতাঃ কলত্রাণি শরীরাণি সুখানি চ .
সংসক্তস্যাপি নষ্টানি তব জন্মনি জন্মনি .. ১০- ৬..
অলমর্থেন কামেন সুকৃতেনাপি কর্মণা .
এভ্যঃ সংসারকান্তারে ন বিশ্রান্তমভূন্ মনঃ .. ১০- ৭..
কৃতং ন কতি জন্মানি কাযেন মনসা গিরা .
দুঃখমাযাসদং কর্ম তদদ্যাপ্যুপরম্যতাম্ .. ১০- ৮..
——————————————————————————–
অষ্টাবক্র উবাচ ..
ভাবাভাববিকারশ্চ স্বভাবাদিতি নিশ্চযী .
নির্বিকারো গতক্লেশঃ সুখেনৈবোপশাম্যতি .. ১১- ১..
ঈশ্বরঃ সর্বনির্মাতা নেহান্য ইতি নিশ্চযী .
অন্তর্গলিতসর্বাশঃ শান্তঃ ক্বাপি ন সজ্জতে .. ১১- ২..
আপদঃ সংপদঃ কালে দৈবাদেবেতি নিশ্চযী .
তৃপ্তঃ স্বস্থেন্দ্রিযো নিত্যং ন বান্ছতি ন শোচতি .. ১১- ৩..
সুখদুঃখে জন্মমৃত্যূ দৈবাদেবেতি নিশ্চযী .
সাধ্যাদর্শী নিরাযাসঃ কুর্বন্নপি ন লিপ্যতে .. ১১- ৪..
চিন্তযা জাযতে দুঃখং নান্যথেহেতি নিশ্চযী .
তযা হীনঃ সুখী শান্তঃ সর্বত্র গলিতস্পৃহঃ .. ১১- ৫..
নাহং দেহো ন মে দেহো বোধোঽহমিতি নিশ্চযী .
কৈবল্যং ইব সংপ্রাপ্তো ন স্মরত্যকৃতং কৃতম্ .. ১১- ৬..
আব্রহ্মস্তংবপর্যন্তং অহমেবেতি নিশ্চযী .
নির্বিকল্পঃ শুচিঃ শান্তঃ প্রাপ্তাপ্রাপ্তবিনির্বৃতঃ .. ১১- ৭..
নাশ্চর্যমিদং বিশ্বং ন কিংচিদিতি নিশ্চযী .
নির্বাসনঃ স্ফূর্তিমাত্রো ন কিংচিদিব শাম্যতি .. ১১- ৮..
——————————————————————————–
জনক উবাচ ..
কাযকৃত্যাসহঃ পূর্বং ততো বাগ্বিস্তরাসহঃ .
অথ চিন্তাসহস্তস্মাদ্ এবমেবাহমাস্থিতঃ .. ১২- ১..
প্রীত্যভাবেন শব্দাদেরদৃশ্যত্বেন চাত্মনঃ .
বিক্ষেপৈকাগ্রহৃদয এবমেবাহমাস্থিতঃ .. ১২- ২..
সমাধ্যাসাদিবিক্ষিপ্তৌ ব্যবহারঃ সমাধযে .
এবং বিলোক্য নিযমং এবমেবাহমাস্থিতঃ .. ১২- ৩.. .
হেযোপাদেযবিরহাদ্ এবং হর্ষবিষাদযোঃ .
অভাবাদদ্য হে ব্রহ্মন্ন্ এবমেবাহমাস্থিতঃ .. ১২- ৪..
আশ্রমানাশ্রমং ধ্যানং চিত্তস্বীকৃতবর্জনং .
বিকল্পং মম বীক্ষ্যৈতৈরেবমেবাহমাস্থিতঃ .. ১২- ৫..
কর্মানুষ্ঠানমজ্ঞানাদ্ যথৈবোপরমস্তথা .
বুধ্বা সম্যগিদং তত্ত্বং এবমেবাহমাস্থিতঃ .. ১২- ৬..
অচিংত্যং চিংত্যমানোঽপি চিন্তারূপং ভজত্যসৌ .
ত্যক্ত্বা তদ্ভাবনং তস্মাদ্ এবমেবাহমাস্থিতঃ .. ১২- ৭..
এবমেব কৃতং যেন স কৃতার্থো ভবেদসৌ .
এবমেব স্বভাবো যঃ স কৃতার্থো ভবেদসৌ .. ১২- ৮..
——————————————————————————–
জনক উবাচ ..
অকিংচনভবং স্বাস্থং কৌপীনত্বেঽপি দুর্লভং .
ত্যাগাদানে বিহাযাস্মাদহমাসে যথাসুখম্ .. ১৩- ১..
কুত্রাপি খেদঃ কাযস্য জিহ্বা কুত্রাপি খেদ্যতে .
মনঃ কুত্রাপি তত্ত্যক্ত্বা পুরুষার্থে স্থিতঃ সুখম্ .. ১৩- ২..
কৃতং কিমপি নৈব স্যাদ্ ইতি সংচিন্ত্য তত্ত্বতঃ .
যদা যত্কর্তুমাযাতি তত্ কৃত্বাসে যথাসুখম্ .. ১৩- ৩..
কর্মনৈষ্কর্ম্যনির্বন্ধভাবা দেহস্থযোগিনঃ .
সংযোগাযোগবিরহাদহমাসে যথাসুখম্ .. ১৩- ৪..
অর্থানর্থৌ ন মে স্থিত্যা গত্যা ন শযনেন বা .
তিষ্ঠন্ গচ্ছন্ স্বপন্ তস্মাদহমাসে যথাসুখম্ .. ১৩- ৫..
স্বপতো নাস্তি মে হানিঃ সিদ্ধির্যত্নবতো ন বা .
নাশোল্লাসৌ বিহাযাস্মদহমাসে যথাসুখম্ .. ১৩- ৬..
সুখাদিরূপা নিযমং ভাবেষ্বালোক্য ভূরিশঃ .
শুভাশুভে বিহাযাস্মাদহমাসে যথাসুখম্ .. ১৩- ৭..
——————————————————————————–
জনক উবাচ ..
প্রকৃত্যা শূন্যচিত্তো যঃ প্রমাদাদ্ ভাবভাবনঃ .
নিদ্রিতো বোধিত ইব ক্ষীণসংস্মরণো হি সঃ .. ১৪- ১..
ক্ব ধনানি ক্ব মিত্রাণি ক্ব মে বিষযদস্যবঃ .
ক্ব শাস্ত্রং ক্ব চ বিজ্ঞানং যদা মে গলিতা স্পৃহা .. ১৪- ২..
বিজ্ঞাতে সাক্ষিপুরুষে পরমাত্মনি চেশ্বরে .
নৈরাশ্যে বংধমোক্ষে চ ন চিংতা মুক্তযে মম .. ১৪- ৩..
অংতর্বিকল্পশূন্যস্য বহিঃ স্বচ্ছন্দচারিণঃ .
ভ্রান্তস্যেব দশাস্তাস্তাস্তাদৃশা এব জানতে .. ১৪- ৪..
——————————————————————————–
অষ্টাবক্র উবাচ ..
যথাতথোপদেশেন কৃতার্থঃ সত্ত্ববুদ্ধিমান্ .
আজীবমপি জিজ্ঞাসুঃ পরস্তত্র বিমুহ্যতি .. ১৫- ১..
মোক্ষো বিষযবৈরস্যং বন্ধো বৈষযিকো রসঃ .
এতাবদেব বিজ্ঞানং যথেচ্ছসি তথা কুরু .. ১৫- ২..
বাগ্মিপ্রাজ্ঞানমহোদ্যোগং জনং মূকজডালসং .
করোতি তত্ত্ববোধোঽযমতস্ত্যক্তো বুভুক্ষভিঃ .. ১৫- ৩..
ন ত্বং দেহো ন তে দেহো ভোক্তা কর্তা ন বা ভবান্ .
চিদ্রূপোঽসি সদা সাক্ষী নিরপেক্ষঃ সুখং চর .. ১৫- ৪..
রাগদ্বেষৌ মনোধর্মৌ ন মনস্তে কদাচন .
নির্বিকল্পোঽসি বোধাত্মা নির্বিকারঃ সুখং চর .. ১৫- ৫..
সর্বভূতেষু চাত্মানং সর্বভূতানি চাত্মনি .
বিজ্ঞায নিরহংকারো নির্মমস্ত্বং সুখী ভব .. ১৫- ৬..
বিশ্বং স্ফুরতি যত্রেদং তরংগা ইব সাগরে .
তত্ত্বমেব ন সন্দেহশ্চিন্মূর্তে বিজ্বরো ভব .. ১৫- ৭..
শ্রদ্ধস্ব তাত শ্রদ্ধস্ব নাত্র মোঽহং কুরুষ্ব ভোঃ .
জ্ঞানস্বরূপো ভগবানাত্মা ত্বং প্রকৃতেঃ পরঃ .. ১৫- ৮..
গুণৈঃ সংবেষ্টিতো দেহস্তিষ্ঠত্যাযাতি যাতি চ .
আত্মা ন গংতা নাগংতা কিমেনমনুশোচসি .. ১৫- ৯..
দেহস্তিষ্ঠতু কল্পান্তং গচ্ছত্বদ্যৈব বা পুনঃ .
ক্ব বৃদ্ধিঃ ক্ব চ বা হানিস্তব চিন্মাত্ররূপিণঃ .. ১৫- ১০..
ত্বয্যনংতমহাংভোধৌ বিশ্ববীচিঃ স্বভাবতঃ .
উদেতু বাস্তমাযাতু ন তে বৃদ্ধির্ন বা ক্ষতিঃ .. ১৫- ১১..
তাত চিন্মাত্ররূপোঽসি ন তে ভিন্নমিদং জগত্ .
অতঃ কস্য কথং কুত্র হেযোপাদেযকল্পনা .. ১৫- ১২..
একস্মিন্নব্যযে শান্তে চিদাকাশেঽমলে ত্বযি .
কুতো জন্ম কুতো কর্ম কুতোঽহংকার এব চ .. ১৫- ১৩..
যত্ত্বং পশ্যসি তত্রৈকস্ত্বমেব প্রতিভাসসে .
কিং পৃথক্ ভাসতে স্বর্ণাত্ কটকাংগদনূপুরম্ .. ১৫- ১৪..
অযং সোঽহমযং নাহং বিভাগমিতি সংত্যজ .
সর্বমাত্মেতি নিশ্চিত্য নিঃসঙ্কল্পঃ সুখী ভব .. ১৫- ১৫..
তবৈবাজ্ঞানতো বিশ্বং ত্বমেকঃ পরমার্থতঃ .
ত্বত্তোঽন্যো নাস্তি সংসারী নাসংসারী চ কশ্চন .. ১৫- ১৬..
ভ্রান্তিমাত্রমিদং বিশ্বং ন কিংচিদিতি নিশ্চযী .
নির্বাসনঃ স্ফূর্তিমাত্রো ন কিংচিদিব শাম্যতি .. ১৫- ১৭..
এক এব ভবাংভোধাবাসীদস্তি ভবিষ্যতি .
ন তে বন্ধোঽস্তি মোক্ষো বা কৃত্যকৃত্যঃ সুখং চর .. ১৫- ১৮..
মা সঙ্কল্পবিকল্পাভ্যাং চিত্তং ক্ষোভয চিন্ময .
উপশাম্য সুখং তিষ্ঠ স্বাত্মন্যানন্দবিগ্রহে .. ১৫- ১৯..
ত্যজৈব ধ্যানং সর্বত্র মা কিংচিদ্ হৃদি ধারয .
আত্মা ত্বং মুক্ত এবাসি কিং বিমৃশ্য করিষ্যসি .. ১৫- ২০..
——————————————————————————–
অষ্টাবক্র উবাচ ..
আচক্ষ্ব শৃণু বা তাত নানাশাস্ত্রাণ্যনেকশঃ .
তথাপি ন তব স্বাস্থ্যং সর্ববিস্মরণাদ্ ঋতে .. ১৬- ১..
ভোগং কর্ম সমাধিং বা কুরু বিজ্ঞ তথাপি তে .
চিত্তং নিরস্তসর্বাশমত্যর্থং রোচযিষ্যতি .. ১৬- ২..
আযাসাত্সকলো দুঃখী নৈনং জানাতি কশ্চন .
অনেনৈবোপদেশেন ধন্যঃ প্রাপ্নোতি নির্বৃতিম্ .. ১৬- ৩..
ব্যাপারে খিদ্যতে যস্তু নিমেষোন্মেষযোরপি .
তস্যালস্য ধুরীণস্য সুখং নন্যস্য কস্যচিত্ .. ১৬- ৪..
ইদং কৃতমিদং নেতি দ্বংদ্বৈর্মুক্তং যদা মনঃ .
ধর্মার্থকামমোক্ষেষু নিরপেক্ষং তদা ভবেত্ .. ১৬- ৫..
বিরক্তো বিষযদ্বেষ্টা রাগী বিষযলোলুপঃ .
গ্রহমোক্ষবিহীনস্তু ন বিরক্তো ন রাগবান্ .. ১৬- ৬..
হেযোপাদেযতা তাবত্সংসারবিটপাংকুরঃ .
স্পৃহা জীবতি যাবদ্ বৈ নির্বিচারদশাস্পদম্ .. ১৬- ৭..
প্রবৃত্তৌ জাযতে রাগো নির্বৃত্তৌ দ্বেষ এব হি .
নির্দ্বন্দ্বো বালবদ্ ধীমান্ এবমেব ব্যবস্থিতঃ .. ১৬- ৮..
হাতুমিচ্ছতি সংসারং রাগী দুঃখজিহাসযা .
বীতরাগো হি নির্দুঃখস্তস্মিন্নপি ন খিদ্যতি .. ১৬- ৯..
যস্যাভিমানো মোক্ষেঽপি দেহেঽপি মমতা তথা .
ন চ জ্ঞানী ন বা যোগী কেবলং দুঃখভাগসৌ .. ১৬- ১০..
হরো যদ্যুপদেষ্টা তে হরিঃ কমলজোঽপি বা .
তথাপি ন তব স্বাথ্যং সর্ববিস্মরণাদৃতে .. ১৬- ১১..
——————————————————————————–
অষ্টাবক্র উবাচ ..
তেন জ্ঞানফলং প্রাপ্তং যোগাভ্যাসফলং তথা .
তৃপ্তঃ স্বচ্ছেন্দ্রিযো নিত্যং একাকী রমতে তু যঃ .. ১৭- ১..
ন কদাচিজ্জগত্যস্মিন্ তত্ত্বজ্ঞা হন্ত খিদ্যতি .
যত একেন তেনেদং পূর্ণং ব্রহ্মাণ্ডমণ্ডলম্ .. ১৭- ২..
ন জাতু বিষযাঃ কেঽপি স্বারামং হর্ষযন্ত্যমী .
সল্লকীপল্লবপ্রীতমিবেভং নিংবপল্লবাঃ .. ১৭- ৩..
যস্তু ভোগেষু ভুক্তেষু ন ভবত্যধিবাসিতা .
অভুক্তেষু নিরাকাংক্ষী তদৃশো ভবদুর্লভঃ .. ১৭- ৪..
বুভুক্ষুরিহ সংসারে মুমুক্ষুরপি দৃশ্যতে .
ভোগমোক্ষনিরাকাংক্ষী বিরলো হি মহাশযঃ .. ১৭- ৫..
ধর্মার্থকামমোক্ষেষু জীবিতে মরণে তথা .
কস্যাপ্যুদারচিত্তস্য হেযোপাদেযতা ন হি .. ১৭- ৬..
বাংছা ন বিশ্ববিলযে ন দ্বেষস্তস্য চ স্থিতৌ .
যথা জীবিকযা তস্মাদ্ ধন্য আস্তে যথা সুখম্ .. ১৭- ৭..
কৃতার্থোঽনেন জ্ঞানেনেত্যেবং গলিতধীঃ কৃতী .
পশ্যন্ শৃণ্বন্ স্পৃশন্ জিঘ্রন্ন্ অশ্নন্নস্তে যথা সুখম্ .. ১৭- ৮..
শূন্যা দৃষ্টির্বৃথা চেষ্টা বিকলানীন্দ্রিযাণি চ .
ন স্পৃহা ন বিরক্তির্বা ক্ষীণসংসারসাগরে .. ১৭- ৯..
ন জগর্তি ন নিদ্রাতি নোন্মীলতি ন মীলতি .
অহো পরদশা ক্বাপি বর্ততে মুক্তচেতসঃ .. ১৭- ১০..
সর্বত্র দৃশ্যতে স্বস্থঃ সর্বত্র বিমলাশযঃ .
সমস্তবাসনা মুক্তো মুক্তঃ সর্বত্র রাজতে .. ১৭- ১১..
পশ্যন্ শৃণ্বন্ স্পৃশন্ জিঘ্রন্ন্ অশ্নন্ গৃণ্হন্ বদন্ ব্রজন্ .
ঈহিতানীহিতৈর্মুক্তো মুক্ত এব মহাশযঃ .. ১৭- ১২..
ন নিন্দতি ন চ স্তৌতি ন হৃষ্যতি ন কুপ্যতি .
ন দদাতি ন গৃণ্হাতি মুক্তঃ সর্বত্র নীরসঃ .. ১৭- ১৩..
সানুরাগাং স্ত্রিযং দৃষ্ট্বা মৃত্যুং বা সমুপস্থিতং .
অবিহ্বলমনাঃ স্বস্থো মুক্ত এব মহাশযঃ .. ১৭- ১৪..
সুখে দুঃখে নরে নার্যাং সংপত্সু বিপত্সু চ .
বিশেষো নৈব ধীরস্য সর্বত্র সমদর্শিনঃ .. ১৭- ১৫..
ন হিংসা নৈব কারুণ্যং নৌদ্ধত্যং ন চ দীনতা .
নাশ্চর্যং নৈব চ ক্ষোভঃ ক্ষীণসংসরণে নরে .. ১৭- ১৬..
ন মুক্তো বিষযদ্বেষ্টা ন বা বিষযলোলুপঃ .
অসংসক্তমনা নিত্যং প্রাপ্তাপ্রাপ্তমুপাশ্নুতে .. ১৭- ১৭..
সমাধানসমাধানহিতাহিতবিকল্পনাঃ .
শূন্যচিত্তো ন জানাতি কৈবল্যমিব সংস্থিতঃ .. ১৭- ১৮..
নির্মমো নিরহংকারো ন কিংচিদিতি নিশ্চিতঃ .
অন্তর্গলিতসর্বাশঃ কুর্বন্নপি করোতি ন .. ১৭- ১৯..
মনঃপ্রকাশসংমোহস্বপ্নজাড্যবিবর্জিতঃ .
দশাং কামপি সংপ্রাপ্তো ভবেদ্ গলিতমানসঃ .. ১৭- ২০..
——————————————————————————–
অষ্টাবক্র উবাচ ..
যস্য বোধোদযে তাবত্স্বপ্নবদ্ ভবতি ভ্রমঃ .
তস্মৈ সুখৈকরূপায নমঃ শান্তায তেজসে .. ১৮- ১..
অর্জযিত্বাখিলান্ অর্থান্ ভোগানাপ্নোতি পুষ্কলান্ .
ন হি সর্বপরিত্যাজমন্তরেণ সুখী ভবেত্ .. ১৮- ২..
কর্তব্যদুঃখমার্তণ্ডজ্বালাদগ্ধান্তরাত্মনঃ .
কুতঃ প্রশমপীযূষধারাসারমৃতে সুখম্ .. ১৮- ৩..
ভবোঽযং ভাবনামাত্রো ন কিংচিত্ পরমর্থতঃ .
নাস্ত্যভাবঃ স্বভাবনাং ভাবাভাববিভাবিনাম্ .. ১৮- ৪..
ন দূরং ন চ সংকোচাল্লব্ধমেবাত্মনঃ পদং .
নির্বিকল্পং নিরাযাসং নির্বিকারং নিরংজনম্ .. ১৮- ৫..
ব্যামোহমাত্রবিরতৌ স্বরূপাদানমাত্রতঃ .
বীতশোকা বিরাজন্তে নিরাবরণদৃষ্টযঃ .. ১৮- ৬..
সমস্তং কল্পনামাত্রমাত্মা মুক্তঃ সনাতনঃ .
ইতি বিজ্ঞায ধীরো হি কিমভ্যস্যতি বালবত্ .. ১৮- ৭..
আত্মা ব্রহ্মেতি নিশ্চিত্য ভাবাভাবৌ চ কল্পিতৌ .
নিষ্কামঃ কিং বিজানাতি কিং ব্রূতে চ করোতি কিম্ .. ১৮- ৮..
অযং সোঽহমযং নাহং ইতি ক্ষীণা বিকল্পনা .
সর্বমাত্মেতি নিশ্চিত্য তূষ্ণীংভূতস্য যোগিনঃ .. ১৮- ৯..
ন বিক্ষেপো ন চৈকাগ্র্যং নাতিবোধো ন মূঢতা .
ন সুখং ন চ বা দুঃখং উপশান্তস্য যোগিনঃ .. ১৮- ১০..
স্বারাজ্যে ভৈক্ষবৃত্তৌ চ লাভালাভে জনে বনে .
নির্বিকল্পস্বভাবস্য ন বিশেষোঽস্তি যোগিনঃ .. ১৮- ১১..
ক্ব ধর্মঃ ক্ব চ বা কামঃ ক্ব চার্থঃ ক্ব বিবেকিতা .
ইদং কৃতমিদং নেতি দ্বন্দ্বৈর্মুক্তস্য যোগিনঃ .. ১৮- ১২..
কৃত্যং কিমপি নৈবাস্তি ন কাপি হৃদি রংজনা .
যথা জীবনমেবেহ জীবন্মুক্তস্য যোগিনঃ .. ১৮- ১৩..
ক্ব মোহঃ ক্ব চ বা বিশ্বং ক্ব তদ্ ধ্যানং ক্ব মুক্ততা .
সর্বসংকল্পসীমাযাং বিশ্রান্তস্য মহাত্মনঃ .. ১৮- ১৪..
যেন বিশ্বমিদং দৃষ্টং স নাস্তীতি করোতু বৈ .
নির্বাসনঃ কিং কুরুতে পশ্যন্নপি ন পশ্যতি .. ১৮- ১৫..
যেন দৃষ্টং পরং ব্রহ্ম সোঽহং ব্রহ্মেতি চিন্তযেত্ .
কিং চিন্তযতি নিশ্চিন্তো দ্বিতীযং যো ন পশ্যতি .. ১৮- ১৬..
দৃষ্টো যেনাত্মবিক্ষেপো নিরোধং কুরুতে ত্বসৌ .
উদারস্তু ন বিক্ষিপ্তঃ সাধ্যাভাবাত্করোতি কিম্ .. ১৮- ১৭..
ধীরো লোকবিপর্যস্তো বর্তমানোঽপি লোকবত্ .
নো সমাধিং ন বিক্ষেপং ন লোপং স্বস্য পশ্যতি .. ১৮- ১৮..
ভাবাভাববিহীনো যস্তৃপ্তো নির্বাসনো বুধঃ .
নৈব কিংচিত্কৃতং তেন লোকদৃষ্ট্যা বিকুর্বতা .. ১৮- ১৯..
প্রবৃত্তৌ বা নিবৃত্তৌ বা নৈব ধীরস্য দুর্গ্রহঃ .
যদা যত্কর্তুমাযাতি তত্কৃত্বা তিষ্ঠতে সুখম্ .. ১৮- ২০..
নির্বাসনো নিরালংবঃ স্বচ্ছন্দো মুক্তবন্ধনঃ .
ক্ষিপ্তঃ সংস্কারবাতেন চেষ্টতে শুষ্কপর্ণবত্ .. ১৮- ২১..
অসংসারস্য তু ক্বাপি ন হর্ষো ন বিষাদিতা .
স শীতলহমনা নিত্যং বিদেহ ইব রাজযে .. ১৮- ২২..
কুত্রাপি ন জিহাসাস্তি নাশো বাপি ন কুত্রচিত্ .
আত্মারামস্য ধীরস্য শীতলাচ্ছতরাত্মনঃ .. ১৮- ২৩..
প্রকৃত্যা শূন্যচিত্তস্য কুর্বতোঽস্য যদৃচ্ছযা .
প্রাকৃতস্যেব ধীরস্য ন মানো নাবমানতা .. ১৮- ২৪..
কৃতং দেহেন কর্মেদং ন মযা শুদ্ধরূপিণা .
ইতি চিন্তানুরোধী যঃ কুর্বন্নপি করোতি ন .. ১৮- ২৫..
অতদ্বাদীব কুরুতে ন ভবেদপি বালিশঃ .
জীবন্মুক্তঃ সুখী শ্রীমান্ সংসরন্নপি শোভতে .. ১৮- ২৬..
নাবিচারসুশ্রান্তো ধীরো বিশ্রান্তিমাগতঃ .
ন কল্পতে ন জাতি ন শৃণোতি ন পশ্যতি .. ১৮- ২৭..
অসমাধেরবিক্ষেপান্ ন মুমুক্ষুর্ন চেতরঃ .
নিশ্চিত্য কল্পিতং পশ্যন্ ব্রহ্মৈবাস্তে মহাশযঃ .. ১৮- ২৮..
যস্যান্তঃ স্যাদহংকারো ন করোতি করোতি সঃ .
নিরহংকারধীরেণ ন কিংচিদকৃতং কৃতম্ .. ১৮- ২৯..
নোদ্বিগ্নং ন চ সন্তুষ্টমকর্তৃ স্পন্দবর্জিতং .
নিরাশং গতসন্দেহং চিত্তং মুক্তস্য রাজতে .. ১৮- ৩০..
নির্ধ্যাতুং চেষ্টিতুং বাপি যচ্চিত্তং ন প্রবর্ততে .
নির্নিমিত্তমিদং কিংতু নির্ধ্যাযেতি বিচেষ্টতে .. ১৮- ৩১..
তত্ত্বং যথার্থমাকর্ণ্য মন্দঃ প্রাপ্নোতি মূঢতাং .
অথবা যাতি সংকোচমমূঢঃ কোঽপি মূঢবত্ .. ১৮- ৩২..
একাগ্রতা নিরোধো বা মূঢৈরভ্যস্যতে ভৃশং .
ধীরাঃ কৃত্যং ন পশ্যন্তি সুপ্তবত্স্বপদে স্থিতাঃ .. ১৮- ৩৩..
অপ্রযত্নাত্ প্রযত্নাদ্ বা মূঢো নাপ্নোতি নির্বৃতিং .
তত্ত্বনিশ্চযমাত্রেণ প্রাজ্ঞো ভবতি নির্বৃতঃ .. ১৮- ৩৪..
শুদ্ধং বুদ্ধং প্রিযং পূর্ণং নিষ্প্রপংচং নিরামযং .
আত্মানং তং ন জানন্তি তত্রাভ্যাসপরা জনাঃ .. ১৮- ৩৫..
নাপ্নোতি কর্মণা মোক্ষং বিমূঢোঽভ্যাসরূপিণা .
ধন্যো বিজ্ঞানমাত্রেণ মুক্তস্তিষ্ঠত্যবিক্রিযঃ .. ১৮- ৩৬..
মূঢো নাপ্নোতি তদ্ ব্রহ্ম যতো ভবিতুমিচ্ছতি .
অনিচ্ছন্নপি ধীরো হি পরব্রহ্মস্বরূপভাক্ .. ১৮- ৩৭..
নিরাধারা গ্রহব্যগ্রা মূঢাঃ সংসারপোষকাঃ .
এতস্যানর্থমূলস্য মূলচ্ছেদঃ কৃতো বুধৈঃ .. ১৮- ৩৮..
ন শান্তিং লভতে মূঢো যতঃ শমিতুমিচ্ছতি .
ধীরস্তত্ত্বং বিনিশ্চিত্য সর্বদা শান্তমানসঃ .. ১৮- ৩৯..
ক্বাত্মনো দর্শনং তস্য যদ্ দৃষ্টমবলংবতে .
ধীরাস্তং তং ন পশ্যন্তি পশ্যন্ত্যাত্মানমব্যযম্ .. ১৮- ৪০..
ক্ব নিরোধো বিমূঢস্য যো নির্বন্ধং করোতি বৈ .
স্বারামস্যৈব ধীরস্য সর্বদাসাবকৃত্রিমঃ .. ১৮- ৪১..
ভাবস্য ভাবকঃ কশ্চিন্ ন কিংচিদ্ ভাবকোপরঃ .
উভযাভাবকঃ কশ্চিদ্ এবমেব নিরাকুলঃ .. ১৮- ৪২..
শুদ্ধমদ্বযমাত্মানং ভাবযন্তি কুবুদ্ধযঃ .
ন তু জানন্তি সংমোহাদ্যাবজ্জীবমনির্বৃতাঃ .. ১৮- ৪৩..
মুমুক্ষোর্বুদ্ধিরালংবমন্তরেণ ন বিদ্যতে .
নিরালংবৈব নিষ্কামা বুদ্ধির্মুক্তস্য সর্বদা .. ১৮- ৪৪..
বিষযদ্বীপিনো বীক্ষ্য চকিতাঃ শরণার্থিনঃ .
বিশন্তি ঝটিতি ক্রোডং নিরোধৈকাগ্রসিদ্ধযে .. ১৮- ৪৫..
নির্বাসনং হরিং দৃষ্ট্বা তূষ্ণীং বিষযদন্তিনঃ .
পলাযন্তে ন শক্তাস্তে সেবন্তে কৃতচাটবঃ .. ১৮- ৪৬..
ন মুক্তিকারিকাং ধত্তে নিঃশঙ্কো যুক্তমানসঃ .
পশ্যন্ শৃণ্বন্ স্পৃশন্ জিঘ্রন্নশ্নন্নাস্তে যথাসুখম্ .. ১৮- ৪৭..
বস্তুশ্রবণমাত্রেণ শুদ্ধবুদ্ধির্নিরাকুলঃ .
নৈবাচারমনাচারমৌদাস্যং বা প্রপশ্যতি .. ১৮- ৪৮..
যদা যত্কর্তুমাযাতি তদা তত্কুরুতে ঋজুঃ .
শুভং বাপ্যশুভং বাপি তস্য চেষ্টা হি বালবত্ .. ১৮- ৪৯..
স্বাতংত্র্যাত্সুখমাপ্নোতি স্বাতংত্র্যাল্লভতে পরং .
স্বাতংত্র্যান্নির্বৃতিং গচ্ছেত্স্বাতংত্র্যাত্ পরমং পদম্ .. ১৮- ৫০..
অকর্তৃত্বমভোক্তৃত্বং স্বাত্মনো মন্যতে যদা .
তদা ক্ষীণা ভবন্ত্যেব সমস্তাশ্চিত্তবৃত্তযঃ .. ১৮- ৫১..
উচ্ছৃংখলাপ্যকৃতিকা স্থিতির্ধীরস্য রাজতে .
ন তু সস্পৃহচিত্তস্য শান্তির্মূঢস্য কৃত্রিমা .. ১৮- ৫২..
বিলসন্তি মহাভোগৈর্বিশন্তি গিরিগহ্বরান্ .
নিরস্তকল্পনা ধীরা অবদ্ধা মুক্তবুদ্ধযঃ .. ১৮- ৫৩..
শ্রোত্রিযং দেবতাং তীর্থমঙ্গনাং ভূপতিং প্রিযং .
দৃষ্ট্বা সংপূজ্য ধীরস্য ন কাপি হৃদি বাসনা .. ১৮- ৫৪..
ভৃত্যৈঃ পুত্রৈঃ কলত্রৈশ্চ দৌহিত্রৈশ্চাপি গোত্রজৈঃ .
বিহস্য ধিক্কৃতো যোগী ন যাতি বিকৃতিং মনাক্ .. ১৮- ৫৫..
সন্তুষ্টোঽপি ন সন্তুষ্টঃ খিন্নোঽপি ন চ খিদ্যতে .
তস্যাশ্চর্যদশাং তাং তাং তাদৃশা এব জানতে .. ১৮- ৫৬..
কর্তব্যতৈব সংসারো ন তাং পশ্যন্তি সূরযঃ .
শূন্যাকারা নিরাকারা নির্বিকারা নিরামযাঃ .. ১৮- ৫৭..
অকুর্বন্নপি সংক্ষোভাদ্ ব্যগ্রঃ সর্বত্র মূঢধীঃ .
কুর্বন্নপি তু কৃত্যানি কুশলো হি নিরাকুলঃ .. ১৮- ৫৮..
সুখমাস্তে সুখং শেতে সুখমাযাতি যাতি চ .
সুখং বক্তি সুখং ভুংক্তে ব্যবহারেঽপি শান্তধীঃ .. ১৮- ৫৯..
স্বভাবাদ্যস্য নৈবার্তির্লোকবদ্ ব্যবহারিণঃ .
মহাহৃদ ইবাক্ষোভ্যো গতক্লেশঃ স শোভতে .. ১৮- ৬০..
নিবৃত্তিরপি মূঢস্য প্রবৃত্তি রুপজাযতে .
প্রবৃত্তিরপি ধীরস্য নিবৃত্তিফলভাগিনী .. ১৮- ৬১..
পরিগ্রহেষু বৈরাগ্যং প্রাযো মূঢস্য দৃশ্যতে .
দেহে বিগলিতাশস্য ক্ব রাগঃ ক্ব বিরাগতা .. ১৮- ৬২..
ভাবনাভাবনাসক্তা দৃষ্টির্মূঢস্য সর্বদা .
ভাব্যভাবনযা সা তু স্বস্থস্যাদৃষ্টিরূপিণী .. ১৮- ৬৩..
সর্বারংভেষু নিষ্কামো যশ্চরেদ্ বালবন্ মুনিঃ .
ন লেপস্তস্য শুদ্ধস্য ক্রিযমাণোঽপি কর্মণি .. ১৮- ৬৪..
স এব ধন্য আত্মজ্ঞঃ সর্বভাবেষু যঃ সমঃ .
পশ্যন্ শৃণ্বন্ স্পৃশন্ জিঘ্রন্ন্ অশ্নন্নিস্তর্ষমানসঃ .. ১৮- ৬৫..
ক্ব সংসারঃ ক্ব চাভাসঃ ক্ব সাধ্যং ক্ব চ সাধনং .
আকাশস্যেব ধীরস্য নির্বিকল্পস্য সর্বদা .. ১৮- ৬৬..
স জযত্যর্থসংন্যাসী পূর্ণস্বরসবিগ্রহঃ .
অকৃত্রিমোঽনবচ্ছিন্নে সমাধির্যস্য বর্ততে .. ১৮- ৬৭..
বহুনাত্র কিমুক্তেন জ্ঞাততত্ত্বো মহাশযঃ .
ভোগমোক্ষনিরাকাংক্ষী সদা সর্বত্র নীরসঃ .. ১৮- ৬৮..
মহদাদি জগদ্দ্বৈতং নামমাত্রবিজৃংভিতং .
বিহায শুদ্ধবোধস্য কিং কৃত্যমবশিষ্যতে .. ১৮- ৬৯..
ভ্রমভৃতমিদং সর্বং কিংচিন্নাস্তীতি নিশ্চযী .
অলক্ষ্যস্ফুরণঃ শুদ্ধঃ স্বভাবেনৈব শাম্যতি .. ১৮- ৭০..
শুদ্ধস্ফুরণরূপস্য দৃশ্যভাবমপশ্যতঃ .
ক্ব বিধিঃ ক্ব বৈরাগ্যং ক্ব ত্যাগঃ ক্ব শমোঽপি বা .. ১৮- ৭১..
স্ফুরতোঽনন্তরূপেণ প্রকৃতিং চ ন পশ্যতঃ .
ক্ব বন্ধঃ ক্ব চ বা মোক্ষঃ ক্ব হর্ষঃ ক্ব বিষাদিতা .. ১৮- ৭২..
বুদ্ধিপর্যন্তসংসারে মাযামাত্রং বিবর্ততে .
নির্মমো নিরহংকারো নিষ্কামঃ শোভতে বুধঃ .. ১৮- ৭৩..
অক্ষযং গতসন্তাপমাত্মানং পশ্যতো মুনেঃ .
ক্ব বিদ্যা চ ক্ব বা বিশ্বং ক্ব দেহোঽহং মমেতি বা .. ১৮- ৭৪..
নিরোধাদীনি কর্মাণি জহাতি জডধীর্যদি .
মনোরথান্ প্রলাপাংশ্চ কর্তুমাপ্নোত্যতত্ক্ষণাত্ .. ১৮- ৭৫..
মন্দঃ শ্রুত্বাপি তদ্বস্তু ন জহাতি বিমূঢতাং .
নির্বিকল্পো বহির্যত্নাদন্তর্বিষযলালসঃ .. ১৮- ৭৬..
জ্ঞানাদ্ গলিতকর্মা যো লোকদৃষ্ট্যাপি কর্মকৃত্ .
নাপ্নোত্যবসরং কর্মং বক্তুমেব ন কিংচন .. ১৮- ৭৭..
ক্ব তমঃ ক্ব প্রকাশো বা হানং ক্ব চ ন কিংচন .
নির্বিকারস্য ধীরস্য নিরাতংকস্য সর্বদা .. ১৮- ৭৮..
ক্ব ধৈর্যং ক্ব বিবেকিত্বং ক্ব নিরাতংকতাপি বা .
অনির্বাচ্যস্বভাবস্য নিঃস্বভাবস্য যোগিনঃ .. ১৮- ৭৯..
ন স্বর্গো নৈব নরকো জীবন্মুক্তির্ন চৈব হি .
বহুনাত্র কিমুক্তেন যোগদৃষ্ট্যা ন কিংচন .. ১৮- ৮০..
নৈব প্রার্থযতে লাভং নালাভেনানুশোচতি .
ধীরস্য শীতলং চিত্তমমৃতেনৈব পূরিতম্ .. ১৮- ৮১..
ন শান্তং স্তৌতি নিষ্কামো ন দুষ্টমপি নিন্দতি .
সমদুঃখসুখস্তৃপ্তঃ কিংচিত্ কৃত্যং ন পশ্যতি .. ১৮- ৮২..
ধীরো ন দ্বেষ্টি সংসারমাত্মানং ন দিদৃক্ষতি .
হর্ষামর্ষবিনির্মুক্তো ন মৃতো ন চ জীবতি .. ১৮- ৮৩..
নিঃস্নেহঃ পুত্রদারাদৌ নিষ্কামো বিষযেষু চ .
নিশ্চিন্তঃ স্বশরীরেঽপি নিরাশঃ শোভতে বুধঃ .. ১৮- ৮৪..
তুষ্টিঃ সর্বত্র ধীরস্য যথাপতিতবর্তিনঃ .
স্বচ্ছন্দং চরতো দেশান্ যত্রস্তমিতশাযিনঃ .. ১৮- ৮৫..
পততূদেতু বা দেহো নাস্য চিন্তা মহাত্মনঃ .
স্বভাবভূমিবিশ্রান্তিবিস্মৃতাশেষসংসৃতেঃ .. ১৮- ৮৬..
অকিংচনঃ কামচারো নির্দ্বন্দ্বশ্ছিন্নসংশযঃ .
অসক্তঃ সর্বভাবেষু কেবলো রমতে বুধঃ .. ১৮- ৮৭..
নির্মমঃ শোভতে ধীরঃ সমলোষ্টাশ্মকাংচনঃ .
সুভিন্নহৃদযগ্রন্থির্বিনির্ধূতরজস্তমঃ .. ১৮- ৮৮..
সর্বত্রানবধানস্য ন কিংচিদ্ বাসনা হৃদি .
মুক্তাত্মনো বিতৃপ্তস্য তুলনা কেন জাযতে .. ১৮- ৮৯..
জানন্নপি ন জানাতি পশ্যন্নপি ন পশ্যতি .
ব্রুবন্ন্ অপি ন চ ব্রূতে কোঽন্যো নির্বাসনাদৃতে .. ১৮- ৯০..
ভিক্ষুর্বা ভূপতির্বাপি যো নিষ্কামঃ স শোভতে .
ভাবেষু গলিতা যস্য শোভনাশোভনা মতিঃ .. ১৮- ৯১..
ক্ব স্বাচ্ছন্দ্যং ক্ব সংকোচঃ ক্ব বা তত্ত্ববিনিশ্চযঃ .
নির্ব্যাজার্জবভূতস্য চরিতার্থস্য যোগিনঃ .. ১৮- ৯২..
আত্মবিশ্রান্তিতৃপ্তেন নিরাশেন গতার্তিনা .
অন্তর্যদনুভূযেত তত্ কথং কস্য কথ্যতে .. ১৮- ৯৩..
সুপ্তোঽপি ন সুষুপ্তৌ চ স্বপ্নেঽপি শযিতো ন চ .
জাগরেঽপি ন জাগর্তি ধীরস্তৃপ্তঃ পদে পদে .. ১৮- ৯৪..
জ্ঞঃ সচিন্তোঽপি নিশ্চিন্তঃ সেন্দ্রিযোঽপি নিরিন্দ্রিযঃ .
সুবুদ্ধিরপি নির্বুদ্ধিঃ সাহংকারোঽনহঙ্কৃতিঃ .. ১৮- ৯৫..
ন সুখী ন চ বা দুঃখী ন বিরক্তো ন সংগবান্ .
ন মুমুক্ষুর্ন বা মুক্তা ন কিংচিন্ন্ন চ কিংচন .. ১৮- ৯৬..
বিক্ষেপেঽপি ন বিক্ষিপ্তঃ সমাধৌ ন সমাধিমান্ .
জাড্যেঽপি ন জডো ধন্যঃ পাণ্ডিত্যেঽপি ন পণ্ডিতঃ .. ১৮- ৯৭..
মুক্তো যথাস্থিতিস্বস্থঃ কৃতকর্তব্যনির্বৃতঃ .
সমঃ সর্বত্র বৈতৃষ্ণ্যান্ন স্মরত্যকৃতং কৃতম্ .. ১৮- ৯৮..
ন প্রীযতে বন্দ্যমানো নিন্দ্যমানো ন কুপ্যতি .
নৈবোদ্বিজতি মরণে জীবনে নাভিনন্দতি .. ১৮- ৯৯..
ন ধাবতি জনাকীর্ণং নারণ্যং উপশান্তধীঃ .
যথাতথা যত্রতত্র সম এবাবতিষ্ঠতে .. ১৮- ১০০..
——————————————————————————–
জনক উবাচ ..
তত্ত্ববিজ্ঞানসন্দংশমাদায হৃদযোদরাত্ .
নাবিধপরামর্শশল্যোদ্ধারঃ কৃতো মযা .. ১৯- ১..
ক্ব ধর্মঃ ক্ব চ বা কামঃ ক্ব চার্থঃ ক্ব বিবেকিতা .
ক্ব দ্বৈতং ক্ব চ বাঽদ্বৈতং স্বমহিম্নি স্থিতস্য মে .. ১৯- ২..
ক্ব ভূতং ক্ব ভবিষ্যদ্ বা বর্তমানমপি ক্ব বা .
ক্ব দেশঃ ক্ব চ বা নিত্যং স্বমহিম্নি স্থিতস্য মে .. ১৯- ৩..
ক্ব চাত্মা ক্ব চ বানাত্মা ক্ব শুভং ক্বাশুভং যথা .
ক্ব চিন্তা ক্ব চ বাচিন্তা স্বমহিম্নি স্থিতস্য মে .. ১৯- ৪..
ক্ব স্বপ্নঃ ক্ব সুষুপ্তির্বা ক্ব চ জাগরণং তথা .
ক্ব তুরিযং ভযং বাপি স্বমহিম্নি স্থিতস্য মে .. ১৯- ৫..
ক্ব দূরং ক্ব সমীপং বা বাহ্যং ক্বাভ্যন্তরং ক্ব বা .
ক্ব স্থূলং ক্ব চ বা সূক্ষ্মং স্বমহিম্নি স্থিতস্য মে .. ১৯- ৬..
ক্ব মৃত্যুর্জীবিতং বা ক্ব লোকাঃ ক্বাস্য ক্ব লৌকিকং .
ক্ব লযঃ ক্ব সমাধির্বা স্বমহিম্নি স্থিতস্য মে .. ১৯- ৭..
অলং ত্রিবর্গকথযা যোগস্য কথযাপ্যলং .
অলং বিজ্ঞানকথযা বিশ্রান্তস্য মমাত্মনি .. ১৯- ৮..
——————————————————————————–
জনক উবাচ ..
ক্ব ভূতানি ক্ব দেহো বা ক্বেন্দ্রিযাণি ক্ব বা মনঃ .
ক্ব শূন্যং ক্ব চ নৈরাশ্যং মত্স্বরূপে নিরংজনে .. ২০- ১..
ক্ব শাস্ত্রং ক্বাত্মবিজ্ঞানং ক্ব বা নির্বিষযং মনঃ .
ক্ব তৃপ্তিঃ ক্ব বিতৃষ্ণাত্বং গতদ্বন্দ্বস্য মে সদা .. ২০- ২..
ক্ব বিদ্যা ক্ব চ বাবিদ্যা ক্বাহং ক্বেদং মম ক্ব বা .
ক্ব বন্ধ ক্ব চ বা মোক্ষঃ স্বরূপস্য ক্ব রূপিতা .. ২০- ৩..
ক্ব প্রারব্ধানি কর্মাণি জীবন্মুক্তিরপি ক্ব বা .
ক্ব তদ্ বিদেহকৈবল্যং নির্বিশেষস্য সর্বদা .. ২০- ৪..
ক্ব কর্তা ক্ব চ বা ভোক্তা নিষ্ক্রিযং স্ফুরণং ক্ব বা .
ক্বাপরোক্ষং ফলং বা ক্ব নিঃস্বভাবস্য মে সদা .. ২০- ৫..
ক্ব লোকং ক্ব মুমুক্ষুর্বা ক্ব যোগী জ্ঞানবান্ ক্ব বা .
ক্ব বদ্ধঃ ক্ব চ বা মুক্তঃ স্বস্বরূপেঽহমদ্বযে .. ২০- ৬..
ক্ব সৃষ্টিঃ ক্ব চ সংহারঃ ক্ব সাধ্যং ক্ব চ সাধনং .
ক্ব সাধকঃ ক্ব সিদ্ধির্বা স্বস্বরূপেঽহমদ্বযে .. ২০- ৭..
ক্ব প্রমাতা প্রমাণং বা ক্ব প্রমেযং ক্ব চ প্রমা .
ক্ব কিংচিত্ ক্ব ন কিংচিদ্ বা সর্বদা বিমলস্য মে .. ২০- ৮..
ক্ব বিক্ষেপঃ ক্ব চৈকাগ্র্যং ক্ব নির্বোধঃ ক্ব মূঢতা .
ক্ব হর্ষঃ ক্ব বিষাদো বা সর্বদা নিষ্ক্রিযস্য মে .. ২০- ৯..
ক্ব চৈষ ব্যবহারো বা ক্ব চ সা পরমার্থতা .
ক্ব সুখং ক্ব চ বা দুখং নির্বিমর্শস্য মে সদা .. ২০- ১০..
ক্ব মাযা ক্ব চ সংসারঃ ক্ব প্রীতির্বিরতিঃ ক্ব বা .
ক্ব জীবঃ ক্ব চ তদ্ব্রহ্ম সর্বদা বিমলস্য মে .. ২০- ১১..
ক্ব প্রবৃত্তির্নির্বৃত্তির্বা ক্ব মুক্তিঃ ক্ব চ বন্ধনং .
কূটস্থনির্বিভাগস্য স্বস্থস্য মম সর্বদা .. ২০- ১২..
ক্বোপদেশঃ ক্ব বা শাস্ত্রং ক্ব শিষ্যঃ ক্ব চ বা গুরুঃ .
ক্ব চাস্তি পুরুষার্থো বা নিরুপাধেঃ শিবস্য মে .. ২০- ১৩..
ক্ব চাস্তি ক্ব চ বা নাস্তি ক্বাস্তি চৈকং ক্ব চ দ্বযং .
বহুনাত্র কিমুক্তেন কিংচিন্নোত্তিষ্ঠতে মম .. ২০- ১৪..

.. ॐ তত্সত্..

<