দশমোঽধ্যাযঃ
কলত্র ভব
শুভাধিপযুতেক্ষিতে সুতকলত্রভে লগ্নতো
বিধোরপি তযোঃ শুভং ত্বিতরথান সিদ্ধিস্তযোঃ |
সিতাব্দ্যযসুখাষ্টগৈঃ খরখগৈরসন্নধ্যগে
সিতেঽপ্যথ শুভেতরেক্ষিতযুতে চ জাযাবধঃ || ১||
দারেশে সুতগে প্রণষ্টবনিতোঽপুত্রোঽথবা ধীশ্বরো
দ্যূনে বা নিধনেশ্শ্বরোঽপি কুরুতে পত্নীবিনাশং ধ্রুবম্ |
ক্ষীণেন্দৌ সুতগে ব্যযাস্ততনুগৈঃ পাপৈরদারাত্মজঃ
স্ত্রীসংগাদ্ধননাশনং মদগযাঃ স্বর্ভনুভান্বোর্বদেত্ || ২||
শুক্রে দৃশ্চকগে মদে মৃতবধূঃ কামে বৃষস্থে বুধে
স্ত্রীনাশস্ত্বথ নীচগে সুরগুরৌ দ্যূনাধিরুঢে তথা |
জামিত্রে ভুষগে শনৌ সতি তথা ভৌমেঽথবা স্ত্রীমৃতি-
শ্চন্দ্রক্ষেত্রগযোর্মদেঽর্কিকুজযোঃ পত্নী সতি শোভনা || ৩||
অস্তে বাস্তপতাবসদ্গ্রহযুতে দৃষ্টেঽপ্যসন্মধ্যগে
নীচারাতিগৃহেঽর্ককান্ত্যভিহতে ব্রূযাত্কলত্রচ্যুতিম্ |
কমে বা সুতভাগ্যযোর্বিকলদারোঽসৌ সপাপে ভৃগৌ
শুক্রে বা কুজমন্দবর্গসহিতে দৃষ্টে পরস্ত্রীরতঃ || ৪||
ভৌমার্ক্যস্তে ভৄগুজশশিনোর্দাহীনোঽসুতো বা
ক্লীবেঽস্তে বা ভবতি ভবগৌ দ্বৌ গ্রহৌ স্ত্রীদ্বযং স্যাত্ |
দ্বন্দ্বর্ক্ষাশে মদপতিসিতৌ তস্য জাযাদ্বযং স্যাত্
তাম্যাং যুক্তৈর্গগননিলযৈর্দারসংখ্যাং বদন্তু || ৫||
স্ত্রীসংখ্যাং মদগৈর্গ্রহৈর্মৃর্তিমসত্খেটৈশ্চ সব্ধিঃ স্থিতী
দ্যূনেশে সবলে শুভে সতি বধুঃ সাধ্বী সুপুত্রান্বিতা |
পাপোঽপি স্বগৃহং গতঃ শুভকরঃ পত্ন্যাশ্চকামস্থিতা
হিত্বা ষড্ব্যযরন্ধ্রপান্মদনগাঃ সৌম্যাস্তু সৌখ্যাবহাঃ || ৬||
ভার্যানাশস্ত্বশুভসহিতৌ বীক্ষিতৌ বার্থকামৌ
তত্র প্রাহুস্ত্বশুভফলদাং ক্রূরদৃষ্টি বিশেষাত্ |
এবং পত্ন্যা অপি সতি মদে চাষ্মে বাস্তি দোষঃ
সৌম্যৈর্দৃষ্টে সতি শুভযুতে দংপতী ভাগ্যবন্তৌ || ৭||
চন্দ্রে সমন্দে মদগে পুন্রভূঃ
পতির্ভবেদ্বাপ্যসুতো বিদারঃ |
নীচারিভস্থৈরশুভৈর্মদে স্ত্রী-
পুংসোর্মৃতিঃ স্যান্নিধনে ধনে বা || ৮||
লগ্নাত্কলত্রভবনে সমরাশিসংজ্ঞে
ভাবাধিপেঽপি চ তথৈব গতেঽসুরেড্যে |
সূর্যাভিতপ্তরহিতে সুতদারনাথে
বীর্যন্বিতে তু জননং সসুতং কলত্রং || ৯||
কুটুম্বদারব্যযরাশিনাথা
জীবেক্ষিতাঃ কোণচতুষ্টযস্থাঃ |
দারেশ্চরাদ্বিত্তকলত্রলাভে
সৌম্যাঃ কলত্রং সসুতং সুখাঢ্যম্ || ১০||
লগ্নাস্তনাথস্থিতভাংশকোণে
নীচোচ্চভে স্ত্রীজননং চ পত্যুঃ |
চন্দ্রাষ্টবর্গেধিককিন্দুরাশৌ
কলত্রজন্মেতি তথা ধবস্য || ১১||
কামস্থকামাধিপ্ভার্গবানা
মৃক্ষং দিশং শংসতি তস্য পত্ন্যাঃ |
শুক্রোঽস্তপো বা নতুনাথভাংশ-
ত্রিকোণমাযাতি তদা বিবাহঃ || ১২||
কলত্রসংস্থস্য কলত্রদৃষ্টে
দর্শাগমেবাথ কলত্রপস্য |
যদা বিলগ্নাধিপতিঃ প্রযাতি
কলত্রভং তত্র কলত্রলাভঃ || ১৩||
কলত্রনাথস্থিতভাংশকেশযোঃ
সিতক্ষপানাযকযোর্বলীযসঃ |
দশাগমে দ্যূনপযুক্তভাংশক-
লত্রিকোণগে দেবগুরৌ করগ্রহঃ || ১৪||
কলত্রনাথে রিপুনীচসংস্থে
মূঢেঽথবা পাপনিরীক্ষিতে বা
কলত্রভে পাপযুতেঽথ দৃষ্টে
কলত্রহানী প্রবদন্তি সন্তঃ || ১৫||
