অষ্টমোঽধ্যাযঃ
ভাবাশ্রয ফল
লগ্নেঽর্কেঽল্পকচঃ ক্রিযালসতমঃ ক্রোধী প্রচণ্ডোন্নতো
মানী লোচনরূক্ষচঃ কৃশতনুঃ শূরোঽক্ষমো নির্ঘৃণঃ |
স্ফোটাক্ষঃ শশিভে ক্রিযে সতিমিরঃ সিংহে নিশান্ধঃ পুমন্
দরিদ্র্যোপহতো বিনষ্টতনযো জাংতস্তুলাযং ভবেত্ || ১||
বিগতবিদ্যা বিনযবিত্তং স্খলিতবাচং ধনগতঃ
সবলশৌর্য শ্রিযমুদারং স্বজনশত্রুং সহজগঃ |
জনযতীমং সুহৃদি সূর্যো বিসুখবন্ধুক্ষিতিসুহৃদ্
ভবনসুক্তং নৃপতিসেবা জনকসংপদ্ব্যযকরম্ || ২||
সুখধনাযুস্তনযহীনং সুমতিমাত্মন্যটবিগং
প্রথিতমুর্বীপতিমরিস্থঃ সুগুণসংপদ্বিজযগম্ |
নৃপবিরুদ্ধং কুতনুমস্তেঽধ্বগমদারং হ্যবমতং
হতধনাযুঃ সুহৃদমর্কো বিগতদৃষ্টি নিধনগঃ || ৩||
বিজনকোঽর্কে সৌতবন্ধুস্তপসি দেবদ্বিজমনাঃ
সসুতযানস্তুতিমতিশ্রীবলযশাঃ খে ক্ষিতিপতিঃ |
ভবগতেঽর্কে বহুধনাযুর্বিগতশোকো জনপতিঃ
পিতুরমিত্রং বিকলনেত্রো বিধনপুত্রো ব্যযগতে || ৪||
সিতে চন্দ্রে লগ্নে দৃঢতনুরদভ্রাযুরভযো
বলিষ্ঠো লক্ষ্মীবান্ ভবতি বিপরীতং ক্ষযগতে |
ধনাঢযোঽন্তর্বাণির্বিষযসুখবান্ বাচি বিকলঃ
সহোত্যে সভ্রাতৃপ্রমদবলশৌর্যোঽতিকৃপণঃ || ৫||
সুখী ভোগী ত্যাগী সুহৃদি সসুহৃদ্বাহনযশাঃ
সুপুত্রো মেধাবী মৃদুগতিরমাত্যঃ সুতগতে |
ক্ষতেঽল্পাযুশ্চন্দ্রেঽমতিরুদররোগী পরিভবী
স্মরে দৃষ্টেঃ সৌম্যো বরযুবতিকান্তোঽতিসুভগঃ || ৬||
মৃতৌ রোগ্যল্পাযুস্তপসি শুভধর্মাত্মসুতবান্
জযী সিদ্দারম্ভো নভসি শুভকৃত্সত্প্রিযকরঃ |
মনস্বী বহ্বাযুর্ধনতনযভৃত্যৈঃ সহ ভবে
ব্যযে দ্বেষ্যো দুহ্খী শশিনি পরিভূতোঽলসতমঃ || ৭||
ক্ষততনুরতিক্রূরোঽল্পাযুস্তনৌ ধনসাহসী
বচসি বিমুখো নির্বিদ্যার্থঃ কুজে কুজনাশ্রিতঃ |
সুগুণধনবাঞ্ছূরোঽধৃষ্যঃ সুখী ব্যনুজোঽনুজে
সুহৃদি বিসুহৃন্মতৃক্ষোণীসুখালযবাহনঃ || ৮||
বিসুখতনযোঽনর্থপ্রাযঃ সুতে পিশুনোঽল্পধীঃ
প্রবলমদনঃ শ্রীমান্ খ্যাতো রিপৌ বিজযী নৃপঃ |
অনুচিতকরো রোগার্তোঽস্তেধ্বগো নৃতদারবান্
কুতনুরধনোঽল্পাযুশ্ছিদ্রে কুজে জননিন্দিতঃ || ৯||
নৃপসুহৃদপি দ্বেষ্যোঽতাতঃ শুভ জনঘতকো
নভসি নৃপতি ক্রূরো দাতা প্রধানজনস্তুতঃ |
ধনসুখযুতোঽশোকঃ শূরো ভবে সুশীলঃ কুজে
নযনবিকৃতঃ ক্রূরোঽদারো ব্যযে পিশুনোঽধমঃ || ১০||
দীর্ঘযুর্জন্মনি জ্ঞে মধুরচতুরবাক্ সর্বশাস্ত্রার্থবোধঃ
স্যাদ্বুদ্ধ্যোপার্জিতস্বঃ কবিরমলবচা বাচি মিষ্টান্নভোক্তা
শৌর্যে শূরঃ সমাযুঃ সুসহজসহিনঃ সশ্রমো দৈন্যযুক্তঃ
সংখ্যাবণ্ চাটুবাক্যঃ সুহৃদি সুক্রসুহৃত্ক্ষেত্রধান্যার্থভোগী || ১১||
বিদ্যাসৌখ্যপ্রতাপঃ প্রচুরসুতযুতো মান্ত্রিকঃ পঞ্চমস্থে
জাতক্রোধো বিবাদির্দ্বীষি রিপুবলহন্তালসো নিষ্ঠুরোক্তিঃ |
প্রাজ্ঞোঽস্তে চারুবেষঃ সসকলমহিমা যাতি ভার্যাং সবিত্তাং
বিখ্যাতাখ্যশ্চিরাযুঃ কুলভৃদধিপতির্জ্ঞেঽষ্টম দণ্দনেতা || ১২||
বিদ্যার্থাচারধর্মৈঃ সহ তপসি বুধে স্যাত্প্রবীণোঽতিবাগ্মী
সিদ্ধারম্ভঃ সুবিদ্যাবলমতিসুখসত্কর্মসত্যান্বিতঃ খে |
বহ্বাযুঃ সত্যসন্ধো বিপুলধনসুখী লাভগে ভৃত্যযুক্তো
দীনো বিদ্যাবিহীনঃ পরিভব সহিতোঽন্ত্যে নৃশংসোঽলসশ্চ || ১৩||
শোভাবান্ সুকৃতী চিরাযুরভযো লগ্নে সুরৌ সাত্মজো
বাগ্মী ভোজনসারবাংশ্চ সুমুখো বিতে ধনী কোবিদঃ
সাবজ্ঞঃ কৃপণঃ প্রতীতসহজঃ শৌর্যেঽঘকৃদ্দুষ্টধী-
র্বন্ধৌ মতৃসুহৃত্পরিচ্ছদসুতস্ত্রীসৌখ্যধান্যান্বিতঃ || ১৪||
পুত্রৈঃ ক্লেশযুতো মহীশসচিবো ধীমান্ সুতস্থে গুরৌ
ষষ্ঠে স্যাদলসোঽরিহা পরিভবী মন্ত্রাভিচারে পদুঃ |
সত্পত্নীসুতবান্মদেঽতিসুভগস্তাতাদুদারোঽধিকো
দীনো জীবতি সেবযা কলুষভগ্দীর্ঘযুরিজ্যেঽষ্টমে || ১৫||
খ্যাতঃ সন্ সচিবঃ শুভেঽর্থসুতবান্ স্যাদ্ধর্মকার্যোত্সুকঃ
স্বাচারঃ সুযশা নভস্যতিধনী জিবে মহীশপ্রিযঃ |
আযস্থে ধনিকোঽভযোঽল্পতনযো জৈবাতৃকো যানগো
দ্বেষ্যো ধিক্কৃতবাগ্ব্যযে বিতনযঃ সাধোঽলসঃ সেবকঃ || ১৬||
তনৌ সুতনুদৃক্প্রিযং সুখিনমেব দীর্ঘযুষং
করোতি কবিরর্থগঃ কবিমনেকবিত্তান্বিতম্ |
বিদারসুখসম্পদং কৃপণমপ্রিযং বিক্রমে
সুবাহনসুমন্দিরাভরণ বস্ত্রগন্ধং সুখে || ১৭||
অখণ্ডিতধনং নৃপং সুমতিমাত্মজে সাত্মজং
বিশত্রুমধনং ক্ষেতে যুবতিদূষিতং বিক্লবং |
সুভার্যমসতীরতং নৃতকলত্রমাঢ্যং মদে
চিরাযুষমিলাধিপং ধনিনমষ্টমে সংস্থিতঃ || ১৮||
সদারসুহৃদাত্মজং ক্ষিতিপলব্ধভাগ্যং শুভে
নভস্যতিযশঃ সুহৃত্সুখিতবৃত্তিযুক্তং প্রভুম্
ধনাঢ্যমিতরাঙ্গনারতমনেকসৌখ্যা ভবে
ভৃগুর্জনযতি ব্যযে সরতিসৌখ্যবিত্তদ্যুতিম্ || ১৯||
স্বোচ্চে স্বকীযভবনে ক্ষিতিপালতুল্যো
লগ্নেঽর্কজে ভবতি দেশপুরাধিনাথঃ |
শেষেষু দুখপরিপীডিত এব বাল্যে
দারিদ্র্যদুঃখবশগো মলিনোঽলসশ্চ || ২০||
বিমুখমধনমর্থেঽন্যাযবন্তং চ পশ্চা
দিতরজনপদস্থং যানভোগার্থযুক্তম্ |
বিপুলমতিমুদারং দারসৌখ্যং চ শৌর্যে
জনযতি রবিপুত্রশ্চালসং বিক্লবং চ || ২১||
দুঃখী স্যাদ্গৃহযানমাতৃবিযুতো বাল্যে সরুগ্বন্ধুভে
ভ্রান্তো জ্ঞানসুতার্থহর্ষরহিতো ধীস্থে শটো দুর্মতিঃ |
বহ্বাশী দ্রবিণান্বিতো রিপুহতো ধৃষ্টশ্চ মানী রিপো
কামস্থে রবিজে কুদারনিরতো নিঃস্বোঽধ্বগো বিহ্বলঃ || ২২||
শ্রবৈশ্চরে মৃতিস্থিতে মলীমসোঽশংসোঽবসুঃ |
করালধীর্বুভুক্ষিতঃ সুহৃঞ্জনবমানিতঃ || ২৩||
ভাগ্যার্থত্মজতাতধর্মরহিতো মন্দে শুভে দুর্জনো
মন্ত্রী বা নৃপতির্ধনী কৃষিপরঃ শূরঃ প্রসিদ্ধোঽম্বরে
বহ্বাযুঃ স্থিরসংপদাযসহিতঃ শূরো বিরোগো ধনী
নির্লজ্জার্থসুতো ব্যযেঽঙ্গবিকলো মূর্খো রিপূত্সারিতঃ || ২৪||
লগ্নেঽহাবচিরাযুরর্থবলাবানূর্ধ্বঙ্গরোগান্বিত-
শ্ছন্নোক্তির্মুখরুগ্ঘৃণী নৃপধনী বিত্তে সরোষঃ সুখী |
মানী ভ্রাতৃবিরোধকো দৃঢমতিঃ শৌর্যে চিরাযুর্ধনী
মূর্খো বেশ্মনি দুঃখকৃত্সসুহৃদল্পাযুঃ কদাচিত্সুখী || ২৫||
নাসোদ্যদ্বচনোঽসুতঃ কঠিনহৃদ্রাহৌ সুতে কুক্ষিরু-
গ্দ্বিট্ক্রূরগ্রহপীডিতঃ সগুদরুপছ্রীমাংশ্চিরাযুঃ ক্ষতে |
স্ত্রীসংগাদধনো মদেঽথ বিধুরোঽবীর্যঃ স্বতন্ত্রোঽল্পধী-
রন্ধ্রেঽল্পাযুরশুদ্ধিকৃচ্চ বিকলো বাতামযোঽল্পাত্মজঃ || ২৬||
ধর্মস্থে প্রতিকূলবাগ্গণপুরগ্রামাধিপোঽপুণ্যবান্
খ্যাতঃ খেঽল্পসুতোঽন্যকার্যনিরতঃ সত্কর্মহীনোঽভযঃ |
শ্রীমান্নাতিসুতশ্চিরাযুরসুরে লভে সকর্ণামযঃ
প্রচ্ছন্নাঘরতো বহুব্যযকরো রিঃফেঽম্বুরুক্পীডিতঃ || ২৭||
লগ্নে কৃতঘ্নমসুখং পিশুনং বিবণং
স্থানচ্যুতং বিকলদেহমসত্সমাজম্ |
বিদ্যার্থহীনমধমোক্তিযুতং কুদৃষ্টিং
পাতঃ পরান্ননিরতং কুরুতে ধনস্থঃ || ২৮||
আযুর্বলং ধনযশা প্রমদান্নসৌখ্যং
কেতৌ তৃতিযভবনে সহজপ্রণাশম্
ভূক্ষেত্রযানজননীসুখজন্মভূমি-
নাশং সুখে পরগৃহস্থিতিমেব দত্তে || ২৯||
পুত্রক্ষযং জঠররোগপিশাচপীডাং
দুর্বুদ্ধিমাত্মনি খলপ্রকৃতিং চ পাতঃ |
ঔদার্যমুত্তমগুণং দৃঢতাং প্রসিদ্ধিং
ষষ্ঠে প্রভুত্বমরিমদর্নমিষ্টসিদ্ধিম্ || ৩০||
দ্যূনেঽবমানমসতীরতিমান্ত্ররোগং
পাতঃ স্বদারবিযুতিং মদধাতুহানিম্
স্বল্পাযুরিষ্টবিরহং কলহং চ রন্ধ্রে
শস্ত্রক্ষতং সকলকার্যবিরোধমেব || ৩১||
পাপপ্রবৃত্তমশুভং পিতৃভাগ্যহীনং
দারিদ্রযমার্যজনদূষণমাহ ধর্মে |
সত্কর্মবিঘ্নমশুচিত্বমবদ্যকৃত্যং
তেজস্বিনং নভসি শৌর্যমতিপ্রসিদ্ধিম্ || ৩২||
লাভেঽর্থসংচযমনেকগুণং সুভোগং
সদ্দ্রব্যসোপকরণং সকলার্থসিদ্ধিম্ |
প্রচ্ছন্নপাপমধমব্যযমর্থনাশং
রিঃফে বিরুদ্ধগতিমক্ষিরুজং চ পাতঃ || ৩৩||
উদযর্ক্ষশস্ফুটতুল্যাংশে নিবসন্ পূর্ণং ফলমাধত্তে
শনিবদ্রাহুঃ কুজবত্কেতুঃ ফলদাতা স্যাদিহ সংপ্রোক্তঃ || ৩৪||
ভাবসমাংশকসংস্থা ভাবফলং পূর্ণমেব কলযন্তি |
ন্যূনাধিকাংশবশতঃ ফলবৃদ্ধিহ্লসিতা বাচ্যা || ৩৫||
