|| নাট্যশাস্ত্রম্ অধ্যায় ৩৬ নাট্যশাপঃ ||
|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ ষট্ত্রিংশোঽধ্যায়ঃ
অথাত্রেয়ো বসিষ্ঠশ্চ পুলস্ত্যঃ পুলহঃ ক্রতুঃ |
অঙ্গিরা গৌতমোঽগস্ত্যো মনুরায়ুস্তথাত্মবান্ || ১||
বিশ্বামিত্রঃ স্থূলশিরাঃ সংবর্তঃ প্রমতির্দনুঃ |
উশনা বৃহস্পতির্ব্যাসশ্চ্যবনঃ কাশ্যপো ধ্রুবঃ || ২||
দুর্বাসা জামদগ্ন্যশ্চ মার্কণ্ডেয়োঽথ গালবঃ |
ভরদ্বাজশ্চ রৈভ্যশ্চ যবক্রীতস্তথৈব চ || ৩||
স্থূলাক্ষঃ শকলাক্ষশ্চ কাণ্বো মেঘাতিথিঃ ক্রতুঃ |
নারদঃ পর্বতশ্চৈব সুবর্মাথৈকজো দ্বিজঃ || ৪||
নিতম্বুর্ভুবনঃ সৌম্যঃ শতানন্দঃ কৃতব্রণঃ |
জামদগ্ন্যস্তথা রামঃ কচশ্চেত্যেবমাদয়ঃ || ৫||
এবং তে মুনয়ঃ শ্রুৎবা সর্বজ্ঞং ভরতং ততঃ |
পুনরূচুরিদং বাক্যং কুতূহলপুরোগমম্ || ৬||
যস্ত্বয়া গদিতো হ্যেষ নাট্যবেদঃ পুরাতনঃ |
একচিত্তৈঃ স চাস্মাভিঃ সম্যক্ সমুপধারিতঃ || ৭||
একশ্চ সংশয়োঽস্মাকং তং নো ব্যাখ্যাতুমর্হসি |
কো বান্যো নাট্যবেদস্য নিশ্চয়ং বক্তুমর্হতি || ৮||
ন বয়ং পরিহাসেন ন বিরোধেন ন চের্ষ্যয়া |
পৃচ্ছামো ভগবন্ নাট্যমুপদেশার্থমেব তু || ৯||
অস্মাভিশ্চ তদা নোক্তং কথাচ্ছেদো ভবেদিতি |
ইদানীং তূপশিক্ষার্থং নাট্যগুহ্যং নিদর্শয় || ১০||
লোকস্য চরিতং নাট্যমিত্যবোচস্ত্বমীদৃশম্ |
তেষাং তু লোকং গুহ্যানাং নিশ্চয়ং বক্তুমর্হসি || ১১||
দেবস্য কস্য চরিতং পূর্বরঙ্গে দ্বিজর্ষভ |
কিমর্থং ভুজ্যতে হ্যেষ প্রয়ুক্তঃ কিং করোতি বা || ১২||
কস্মাচ্চৈব পুনঃ শৌচং সম্যক্ চরতি সূত্রদৃক্ |
কথমুর্বীতলে নাট্যং স্বর্গান্নিপতিতং বিভো || ১৩||
কথং তবায়ং বংশশ্চ নটসঞ্জ্ঞঃ প্রতিষ্ঠিতঃ |
সর্বমেব যথাতত্ত্বং কথয়স্ব মহামুনে || ১৪||
তেষং তু বচনং শ্রুৎবা মুনীনাং ভরতো মুনিঃ |
প্রত্যুবাচ পুনর্বাক্যং গুহ্যার্থাভিনয়ং প্রতি || ১৫||
ব্রবীমি বঃ কথাং গুহ্যাং যন্মাং পৃচ্ছন্ সুব্রতাঃ |
পূর্বরঙ্গবিধানস্য তাং চ মে সন্নিবোধত || ১৬||
প্রোক্তবানস্মি যৎপূর্বং শুভং বিঘ্ননিবর্হণম্ |
তস্যানুবন্ধেন ময়া পূর্বরঙ্গঃ প্রকীর্তিতঃ || ১৭||
শস্ত্রাণাং প্রতিকারার্থং শরীরাবরণং যথা |
ক্রিয়তে হি তথা পাপং হুতেনৈব প্রশাম্যতি || ১৮||
এবং জপ্যৈশ্চ হোমৈশ্চ দেবতাভ্যর্চনেন চ |
সর্বাতোদ্যবিধানৈশ্চ তথা গীতস্বনেন চ || ১৯||
স্তুত্যাশীর্বচনৈঃ শান্তৈঃ কর্মভাবানুকীর্তনৈঃ |
ময়া পাপাপহরণৈঃ কৃতে বিঘ্ননিবর্হণে || ২০||
স্তুতিগীতাদিসংসৃষ্টৈর্দেবৈরভিহিতোঽস্ম্যহম্ |
নিতরাং পরিতুষ্টাঃ স্মঃ প্রয়োগেণামুনা চ তে || ২১||
দেবতাসুরমানন্দ্য যস্মাঁল্লোকশ্চ নন্দতি |
তস্মাদয়ং প্রয়োগস্তু নান্দীনামা ভবিষ্যতি || ২২||
গীতবাদ্যানুনাদো হি যত্র কাকুস্বনঃ শুভঃ |
তস্মিন্ দেশে বিপাপ্মানো মাঙ্গল্যং চ ভবিষ্যতি || ২৩||
যাবত্তং পূরয়েদ্দেশং ধ্বনির্নাট্যসমাশ্রয়ঃ |
ন স্থাস্যন্তি হি রক্ষাংসি তং দেশং ন বিনায়কাঃ || ২৪||
আবাহে চ বিবাহে চ যজ্ঞে নৃপতিমঙ্গলে |
নান্দীশব্দমুপশ্রুত্য হিংস্রা নশ্যন্তি চৈব হি || ২৫||
পাঠ্যং নাট্যং তথা গেয়ং চিত্রবাদিত্রমেব চ |
বেদমন্ত্রার্থবচনৈঃ সমং হ্যেতদ্ ভবিষ্যতি || ২৬||
শ্রুতং ময়া দেবদেবাৎ তত্ত্বতঃ শঙ্করাদ্ধিতম্ |
স্নানজপ্যসহস্রেভ্যঃ পবিত্রং গীতবাদিতম্ || ২৭||
যস্মিন্নাতোদ্যনাট্যস্য গীতপাঠ্যধ্বনিঃ শুভঃ |
ভবিষ্যত্যশুভং দেশে নৈব তস্মিন্ কদাচন || ২৮||
এবং পূজাধিকারার্থং পূর্বরঙ্গঃ কৃতো ময়া |
নানাস্তুতিকৃতৈর্বাক্যৈর্দেবতাভ্যর্চনেন চ || ২৯||
যতোঽভিবাদনং ক্লিষ্টং শিষ্টং তদ্রঙ্গমণ্ডলে |
ততস্তস্য হি তচ্ছৌচং বিহিতং তু দ্বিজোত্তমাঃ || ৩০||
শৌচং কৃৎবা যতো মন্ত্রং পূজনং জর্জরস্য তু |
উচ্যতে পূর্বরঙ্গেঽস্মিন্ তস্মাচ্ছৌচং প্রকীর্তিতম্ || ৩১||
যথাবতারিতং চৈব নাট্যমেতন্মহীতলে |
বক্তব্যং সর্বমেতদ্ধি ন শক্যং হি নিগূহিতুম্ || ৩২||
মমৈতে তনয়াঃ সর্বে নাট্যবেদসমন্বিতাঃ |
সর্বলোকং প্রহসনৈঃ বাধন্তে নাট্যসংশ্রয়ৈঃ || ৩৩||
কস্যচিত্ত্বথ কালস্য শিল্পকং গ্রাম্যধর্মকম্ |
ঋষীণাং ব্যঙ্গ্যকরণং কুর্বদ্ভির্গুণসংশ্রয়ম্ || ৩৪||
অশ্রাব্যং তদ্দুরাচারং গ্রাম্যধর্মপ্রবর্তিতম্ |
নিষ্ঠুরং চাপ্রস্তুতং চ কাব্যং সংসদি যোজিতম্ || ৩৫||
তচ্ছ্রুৎবা মুনয়ঃ সর্বে ভীমরোষপ্রকম্পিতাঃ |
ঊচুস্তান্ ভরতান্ ক্রুদ্ধা নির্দহন্ত ইবাগ্নয়ঃ || ৩৬||
মা তাবদ্ভো দ্বিজা যুক্তমিদমস্মদ্বিডম্বনম্ |
কো নামায়ং পরিভবঃ কিঞ্চ নাস্মাসু সম্মতম্ || ৩৭||
যস্মাজ্জ্ঞানমদোন্মত্তা ন বেত্থাবিনয়াশ্রিতাঃ |
তস্মাদেতদ্ধি ভবতাং কুজ্ঞানং নাশমেষ্যতি || ৩৮||
ঋষীণাং ব্রাহ্মণানাং চ সমবায়সমাগতাঃ |
নিরাহুতা বিনা হোমৈঃ শূদ্রাচারা ভবিষ্যথ || ৩৯||
অপাঙ্ক্তেয়াঃ কুৎসিতাশ্চাবমা এব ভবিষ্যথ |
যশ্চ বো ভবিতা বংশঃ সর্বাশৌচো ভবিষ্যতি || ৪০||
যে চ বো বংশজাস্তেঽপি ভবিষ্যন্ত্যথ নর্তকাঃ |
পরোপস্থানবন্তশ্চ শস্ত্রপণ্যোপজীবিনঃ || ৪১||
শাপং দত্তং তথা জ্ঞাৎবা সুতেভ্যো মে তদা সুরাঃ |
সর্বে বিমনসো ভূৎবা তানৃষীন্ সমুপস্থিতাঃ || ৪২||
যাচমানৈস্ততঃ প্রোক্তং দেবৈঃ শক্রপুরোগমৈঃ |
ইদানীং দুঃখমুৎপন্নং নাট্যমেতদ্ বিনঙ্ক্ষতি || ৪৩||
ঋষিভিশ্চ ততঃ প্রোক্তং ন চৈতদ্ধি বিনক্ষ্যতি |
শেষমন্যত্র যদ্ প্রোক্তং সর্বমেতদ্ ভবিষ্যতি || ৪৪||
এতচ্ছ্রুৎবা তু বচনং মুনীনামুগ্রতেজসাম্ |
বিষ্ণ্ণাস্তে ততঃ সর্বে শ্রুৎবা মাং সমুপস্থিতাঃ || ৪৫||
প্রোক্তবন্তশ্চ মাং পুত্রাস্ত্বয়াহো নাশিতা বয়ম্ |
অনেন নাট্যদোষেণ শূদ্রাচারা হি যৎ কৃতাঃ || ৪৬||
ময়াপি সান্ত্বয়িৎবোক্তা মা ক্রোধং ব্রজতানঘাঃ |
কৃতান্তবিহিতোঽস্মাকং নূনমেষ বিধিঃ সুতাঃ || ৪৭||
মুনীনাং হি মৃষা বাক্যং ভবিষ্যতি কদাচন |
নিধনে চ মনো মা ভূদ্ যুষ্মাকমিতি সান্ত্বিতাঃ || ৪৮||
জানীধ্বং তত্তথা নাট্যং ব্রহ্মণা সম্প্রবর্তিতম্ |
শিষ্যেভ্যশ্চ তদন্যেভ্যঃ প্রয়চ্ছামঃ প্রয়োগতঃ || ৪৯||
মা বৈ প্রণশ্যতামেতন্নাট্যং দুঃখপ্রবর্তিতম্ |
মহাশ্রয়ং মহাপুণ্যং বেদাঙ্গোপাঙ্গসম্ভবম্ || ৫০||
অপ্সরোভ্য ইদং চৈব যথাতত্ত্বং যথাশ্রুতম্ |
নাট্যং দত্ত্বা ততঃ সর্বে প্রায়শ্চিত্তং চরিষ্যথ || ৫১||
| ইতি ভরতীয়ে নাট্যশাস্ত্রে নাট্যশাপো নাম ষট্ত্রিংশোঽধ্যায়ঃ |
