|| নাট্যশাস্ত্রম্ অধ্যায় ২৯ ততাতোদ্যবিধানং ||
|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ একোনত্রিংশত্তমোঽধ্যায়ঃ
ষড্জোদীচ্যবতী চৈব ষড্জমধ্যা তথৈব চ |
মধ্যপঞ্চমবাহুল্যাৎ কার্যা শৃঙ্গারহাস্যয়োঃ || ১||
ষাড্জী ৎবথার্ষভী চৈব স্বস্বরাংশপরিগ্রহাৎ |
বীররৌদ্রাদ্ভুতেষ্বেতে প্রয়োজ্যে গানয়োক্তৃভিঃ || ২||
নিষাদেঽংশে তু নৈষাদী গান্ধারে ষড্জকৈশিকী |
করুণে তু রসে কার্যা জাতিগানবিশারদৈঃ || ৩||
ধৈবতী ধৈবতাংশে তু বীভৎসে সভয়ানকে |
ধ্রুবাবিধানে কর্তব্যা জাতির্গানে প্রয়ত্নতঃ |
রসং কার্যমবস্থাং চ জ্ঞাৎবা যোজ্যা প্রয়োক্তৃভিঃ |
ষড্জগ্রামাশ্রিতা হ্যেতাঃ প্রয়োজ্যা জাতয়ো বুধৈঃ || ৪||
অতঃ পরং প্রবক্ষ্যামি মধ্যমগ্রামসংশ্রয়াঃ |
গান্ধারীরক্তগান্ধার্যৌ গান্ধারাংশোপপত্তিতঃ |
করুণে তু রসে কার্যে নিষাদেঽংশে তথৈব চ || ৫||
মধ্যমা পঞ্চমী চৈব নন্দয়ন্তী তথৈব চ |
গান্ধারপঞ্চমী চৈব মধ্যমোদীচ্যবা তথা |
মধ্যমপঞ্চমবাহুল্যাৎ কার্যাঃ শৃঙ্গারহাস্যয়োঃ || ৬||
কার্মারবী তথা চান্ধ্রী গান্ধারোদীচ্যবা তথা |
বীরে রৌদ্রেঽদ্ভুতে কার্যাঃ ষড্জর্ষভাংশয়োজিতাঃ |
কৈশিকী ধৈবতাংশে তু বীভৎসে সভয়ানকে || ৭||
একৈব ষড্জমধ্যা জ্ঞেয়া সর্বরসসংশ্রয়া জাতিঃ |
তস্যাস্ত্বংশাঃ সর্বে স্বরাস্তু বিহিতাঃ প্রয়োগবিধৌ || ৮||
যো যদা বলবান্ যস্মিন্ স্বরো জাতিসমাশ্রয়াৎ |
তৎপ্রবৃত্তং রসে কার্যং গানং গেয়ে প্রয়োক্তৃভিঃ || ৯||
মধ্যপঞ্চমভূয়িষ্ঠং গানং শৃঙ্গারহাস্যয়োঃ |
ষড্জর্ষভপ্রায়কৃতং বীররৌদ্রাদ্ভুতেষু চ || ১০||
গান্ধারঃ সপ্তমশ্চায়ং করুণে গানমিষ্যতে |
তথা ধৈবতভূয়িষ্ঠং বীভৎসে সভয়ানকে || ১১||
একৈব ষড্জমধ্যা বিজ্ঞেয়াখিলরসাশ্রয়া জাতিঃ |
তস্যাস্ত্বংশাঃ সর্বে স্বরাশ্চ বিহিতাঃ প্রয়োগবিধৌ || ১২||
সর্বেষ্বংশেষু রসা নিয়মবিধানেন সম্প্রয়োক্তব্যাঃ |
কাকল্যন্তরবিহিতা বিশেষয়ুক্তাস্তু বলবন্তঃ |
এবমেতা বুধৈর্জ্ঞেয়া জাতয়ো নাট্যসংশ্রয়াঃ || ১৩||
পাঠ্যপ্রয়োগবিহিতান্ স্বরাংশ্চাপি নিবোধত |
হাস্যশৃঙ্গারয়োঃ কার্যৌ স্বরৌ মধ্যমপঞ্চমৌ |
ষড্জর্ষভৌ চ কর্তব্যৌ বীররৌদ্রাদ্ভুতেষ্বথ ||
গান্ধারশ্চ নিষাদশ্চ কর্তব্যৌ করুণে রসে |
ধৈবতশ্চ প্রয়োগজ্ঞৈর্বীভৎসে সভয়ানকে ||
অত ঊর্ধ্বং প্রবক্ষ্যামি বর্ণালঙ্কারলক্ষণম্ |
আরোহী চাবরোহী চ স্থায়িসঞ্চারিণৌ তথা |
বর্ণাশ্চৎবার এবৈতে হ্যলঙ্কারাস্তদাশ্রয়াঃ || ১৪||
আরোহন্তি স্বরা যত্রারোহীতি স তু সঞ্জ্ঞিতঃ |
যত্র চৈবাবরোহন্তি সোঽবরোহী প্রকীর্তিতঃ || ১৫||
স্থিরাঃ স্বরাঃ সমা যত্র স্থায়ী বর্ণঃ স উচ্যতে |
সঞ্চরন্তি স্বরা যত্র স সঞ্চারীতি কীর্তিতঃ || ১৬||
শারীরস্বরসম্ভূতাস্ত্রিস্থানগুণগোচরাঃ |
চৎবারো লক্ষণোপেতা বর্ণাস্তত্র প্রকীর্তিতাঃ || ১৭||
এবং লক্ষণসংযুক্তং যদা বর্ণোঽনুকর্ষতি |
তদা বর্ণস্য নিষ্পত্তির্জ্ঞেয়া স্বরসমুদ্ভবা || ১৮||
এতে বর্ণাস্তু বিজ্ঞেয়াশ্চৎবারো গীতয়োজকাঃ |
এতান্ সমাশ্রিতান্ সম্যগলঙ্কারান্ নিবোধত || ১৯||
প্রসন্নাদিঃ প্রসন্নান্তঃ প্রসন্নাদ্যন্ত এব চ |
প্রসন্নমধ্যশ্চ তথা ক্রমরেচিত এব চ |
প্রস্তারশ্চ প্রসাদশ্চ সপ্তৈতে স্থায়িবর্ণগাঃ || ২০||
অথ সঞ্চারিজান্ ভূয়ঃ কীর্ত্যমানান্নিবোধত |
মন্দ্রস্তথা প্রসন্নাদিঃ প্রেঙ্খিতো বিন্দুরেব চ |
সন্নিবৃত্তঃ প্রবৃত্তশ্চ রেচিতঃ কম্পিতঃ সমঃ || ২১||
কুহরশ্চৈব বেণুশ্চ রঞ্চিতো হ্যবলোকিতঃ |
আবর্তকঃ পরাবৃত্তঃ সঞ্চারিণ্যশ্চতুর্দশ || ২২||
নিষ্কর্ষোভ্যুচয়শ্চৈব হসিতো বিন্দুরেব চ |
প্রেঙ্খোলিতস্তথাক্ষিপ্তো বিস্তীর্ণোদ্ধটিতস্তথা || ২৩||
হ্রাদমানঃ সম্প্রদানঃ সন্ধিঃ প্রচ্ছাদনস্তথা |
প্রসন্নাদিঃ প্রসন্নান্ত ইত্যারোহে ত্রয়োদশ || ২৪||
বিধূতশ্চ ত্রিবর্ণশ্চ তথোদ্বাহিত এব চ |
উদ্গীতশ্চ তথা বেণির্বিজ্ঞেয়া হ্যবরোহিণঃ || ২৫||
সপ্তরূপগতা জ্ঞেয়া অলঙ্কারা বুধৈস্ত্বিমে |
নৈতে সর্বে ধ্রুবাস্বিষ্টাঃ শ্রুতিবর্ণপ্রকর্ষণাৎ || ২৬||
ন হি বর্ণপ্রকর্ষস্তু ধ্রুবাণাং সিদ্ধিরিষ্যতে |
শ্যেনো বাপ্যথবা বিন্দুর্যে চান্যেতি প্রকর্ষিণঃ || ২৭||
তে ধ্রুবাণাং প্রয়োগেষু ন কার্যাঃ স্বপ্রমাণতঃ |
তদ্ধ্রুবাণাং প্রয়োগে তু কার্যা হ্যারোহিণঃ স্বরাঃ || ২৮||
যস্মাদর্থানুরূপা হি ধ্রুবা কার্যার্থদর্শিকা |
বর্ণানাং তু পুনঃ কার্যং কৃশৎবং পদসংশ্রয়ম্ || ২৯||
যেঽত্র প্রয়োগে গচ্ছন্তি তাংশ্চ বর্ণান্ নিবোধত |
প্রসন্নাদিঃ প্রসন্নান্তঃ প্রসন্নাদ্যন্ত এব চ || ৩০||
প্রসন্নমধ্যমশ্চৈব বিন্দুঃ কম্পিতরেচিতৌ |
তারশ্চৈব হি মন্দ্রশ্চ তথা তারতরঃ পুনঃ |
প্রেঙ্খোলিতস্তারমন্দ্রো মন্দ্রতারঃ সমস্তথা || ৩১||
সন্নিবৃত্তঃ প্রবৃত্তশ্চ প্রসাদোঽপাঙ্গ এব চ |
ঊর্মিঃ প্রেঙ্খোঽবলোকশ্চ ইত্যেতে সর্ববর্ণগাঃ || ৩২||
স্থায়িবর্ণাদৃতে চৈষাং সম্প্রবক্ষ্যামি লক্ষণম্ |
ক্রমশো দীপিতো যঃ স্যাৎ প্রসন্নাদিঃ স কথ্যতে || ৩৩||
ব্যস্তোচ্চারিত এবৈষ প্রসন্নান্তো বিধীয়তে |
আদ্যন্তয়োঃ প্রসন্নৎবাৎ প্রসন্নাদ্যন্ত ইষ্যতে || ৩৪||
প্রসন্নমধ্যো মধ্যে তু প্রসন্নৎবাদুদাহৃতঃ |
সর্বসাম্যাৎ সমো জ্ঞেয়ঃ স্থিতস্ত্বেকস্বরোঽপি যঃ || ৩৫||
আদিমধ্যলয়ো যত্র স চোর্মিরিতি সঞ্জ্ঞিতঃ |
শ্রুতয়োঽন্ত্যাদ্ দ্বিতীয়স্য মৃদুমধ্যায়তাঃ স্বরাঃ || ৩৬||
আয়তৎবং ভবেন্নীচে মৃদুৎবং তু বিপর্যয়ে |
স্বে স্বরে মধ্যমৎবং চ মৃদুমধ্যময়োস্তথা |
দীপ্তায়তে করুণানাং শ্রুতীনামেষ নিশ্চয়ঃ || ৩৭||
বিন্দুরেককলো জ্ঞেয়ঃ কম্পিতশ্চ কলাদ্বয়ম্ |
গতাগতপ্রবৃত্তো যঃ স প্রেঙ্খোলিত ইষ্যতে || ৩৮||
যস্তু কণ্ঠে স্বরোঽধঃ স্যাৎ স তু তারঃ প্রকীর্তিতঃ |
উরোগতস্তথা মন্দ্রো মূর্ধ্নি তারতরস্তথা || ৩৯||
ক্রমাগতস্তু যস্তারঃ ষষ্ঠঃ পঞ্চম এব বা |
তারমন্দ্রপ্রসন্নস্তু জ্ঞেয়ো মন্দ্রগতঃ স চ || ৪০||
লঙ্ঘয়িৎবা পরান্ মন্দ্রাৎ পরাং তারগতিং গতঃ |
মন্দ্রতারপ্রসন্নস্তু বিজ্ঞেয়ো হ্যবরোহণাৎ || ৪১||
প্রসন্নান্তঃ স্বরো যত্র প্রসাদঃ স তু সঞ্জ্ঞিতঃ |
অপাঙ্গকিস্তু বিজ্ঞেয়ঃ স্বরাণামথ সঞ্চরাৎ || ৪২||
রেচিতঃ শিরসি জ্ঞেয়ঃ কম্পিতং তু কলাত্রয়ম্ |
কণ্ঠে নিরুদ্ধপবনঃ কুহরো নাম জায়তে || ৪৩||
এবমেতে ৎবলঙ্কারা বিজ্ঞেয়া বর্ণসংশ্রয়াঃ |
অথ গীতীঃ প্রবক্ষ্যামি ছন্দোঽক্ষরসমন্বিতাঃ || ৪৪||
শশিনা রহিতেব নিশা বিজলেব নদী লতা বিপুষ্পেব |
অবিভূষিতেব চ স্ত্রী গীতিরলঙ্কারহীনা স্যাৎ || ৪৫||
প্রথমা মাগধী জ্ঞেয়া দ্বিতীয়া চার্ধমাগধী |
সম্ভাবিতা তৃতীয়া তু চতুর্থী পৃথুলা স্মৃতা || ৪৬||
ত্রিনিবৃত্তপ্রগীতা যা গীতিঃ সা মাগধী স্মৃতা |
অর্ধতঃ সন্নিবৃত্তা চ বিজ্ঞেয়া হ্যর্ধমাগধী || ৪৭||
সম্ভাবিতা চ বিজ্ঞেয়া গুর্বক্ষরসমন্বিতা |
পৃথুলাখ্যা চ বিজ্ঞেয়া নিত্যং লঘ্বক্ষরান্বিতা || ৪৮||
এতাস্তু গীতয়ো জ্ঞেয়া ধ্রুবায়োগং বিনৈব হি |
গান্ধর্ব এব যোজ্যাস্তু নিত্যং গানপ্রয়োক্তৃভিঃ || ৪৯||
গীতয়ো গদিতাঃ সম্যগ্ ধাতূংশ্চৈব নিবোধত |
বিস্তারঃ করণশ্চ স্যাদাবিদ্ধো ব্যঞ্জনস্তথা |
চৎবারো ধাতবো জ্ঞেয়া বাদিত্রকরণাশ্রয়াঃ || ৫০||
সঙ্ঘাতজোঽথ সমবায়জশ্চ বিস্তারজোঽনুবন্ধকৃতঃ |
জ্ঞেতশ্চতুষ্প্রকারো ধাতুর্বিস্তারসঞ্জ্ঞশ্চ || ৫১||
বিধয়স্তু স্মৃতাস্তস্য পূর্বং বিস্তার এব চ |
সঙ্ঘাতসমবায়ৌ তু বিজ্ঞেয়ৌ তৌ দ্বিঅত্রিকৌ || ৫২||
পূর্বশ্চতুর্বিধস্তত্র পশ্চিমোঽষ্টবিধঃ স্মৃতঃ |
করণানাং বিশেষেণ বিজ্ঞেয়ৌ তৌ পৃথক্ পৃথক্ || ৫৩||
অধশ্চোর্ধ্বং চ বিজ্ঞেয়াবধরোত্তরজৌ স্বরৌ |
সঙ্ঘাতজো বিধিস্ত্বেষ বিজ্ঞেয়ো বাদনং প্রতি || ৫৪||
দ্বিরুত্তরো দ্বিরধরস্ত্বধরাদিশ্চোত্তরাবসানশ্চ |
জ্ঞেয়স্তথোত্তরাদিঃ পুনরপ্যধরাবসানশ্চ || ৫৫||
সমবায়জস্তথা স্যাৎ ত্রিরুত্তরস্ত্রিরধরশ্চ বিজ্ঞেয়ঃ |
দ্বিরধরোত্তরাধরান্তো দ্বিরধরশ্চোত্তরবিরামশ্চ || ৫৬||
উত্তরমুখো দ্বিরধরো দ্বিরুত্তরাবসানশ্চ |
মধ্যোত্তরো দ্বিরধরো দ্বিরুত্তরোঽপ্যধরমধ্যশ্চ || ৫৭||
অনুবন্ধস্তু জ্ঞেয়ো ব্যাসসমাসাচ্চ নিয়তমেষাং হি |
এবং চতুর্দশবিধো বিস্তারো ধাতুরাখ্যাতঃ || ৫৮||
রিভিতোচ্চয়নীরিভিতো হ্রাদস্তু তথানুবন্ধঃ স্যাৎ |
পঞ্চবিধো বিজ্ঞেয়ো বীণাবাদ্যে করণধাতুঃ || ৫৯||
ত্রিকপঞ্চসপ্তনবকৈর্যথাক্রমং সংযুতো ভবেদ্বাদ্যে |
সর্বৈরনুবন্ধকৃতৈর্গুর্বন্তঃ স্যাৎ করণধাতুঃ || ৬০||
ক্ষেপঃ প্লুতোঽতিপাতোঽতিকীর্ণমনুবন্ধসঞ্জ্ঞিতশ্চৈব |
আবিদ্ধো বিষ্টো যো ধাতুর্বৈ পঞ্চবিধ এব || ৬১||
দ্বিত্রিচতুষ্কনবকৈঃ প্রহারৈঃ ক্রমশঃ কৃতৈঃ |
আবিদ্ধধাতুর্বিজ্ঞেয়ঃ সানুবন্ধবিভূষিতঃ || ৬২||
ব্যঞ্জনধাতোঃ পুষ্পং কলতলনিষ্কোটিতং তথোদ্ধৃষ্টম্ |
রেফোঽনুবন্ধসঞ্জ্ঞোঽনুস্বনিতং বিন্দুরবমৃষ্টম্ || ৬৩||
কনিষ্ঠাঙ্গুষ্ঠসংযুক্তং পুষ্পমিত্যভিসঞ্জ্ঞিতম্ |
অঙ্গুষ্ঠাভ্যাং সমং তন্ত্র্যোঃ স্পর্শনং যৎ কলং তু তৎ || ৬৪||
বামেন পীডনং কৃৎবা দক্ষিণেনাহতিস্তলে |
সব্যাঙ্গুষ্ঠপ্রহারস্তু নিষ্কোটিতমিহোচ্যতে || ৬৫||
প্রহারো বামতর্জন্যা উদ্ধৃষ্টমিতি সঞ্জ্ঞিতম্ |
সর্বাঙ্গুলিসমাক্ষেপো রেফ ইত্যভিসঞ্জ্ঞিতঃ | ৬৬||
তলস্থানেঽধস্তন্ত্রীণামনুস্বনিতমুচ্যতে |
গুর্বক্ষরকৃতা তন্ত্রী বিন্দুরিত্যভিসঞ্জ্ঞিতঃ || ৬৭||
কনিষ্ঠাঙ্গুষ্ঠকাভ্যাং তু দক্ষিণাভ্যামধোমুখম্ |
তন্ত্রীষু ত্রিপ্রহারং চাপ্যবমৃষ্টং প্রকীর্তিতম্ || ৬৮||
ব্যাসসমাসাদেষামনুবন্ধঃ সার্বধাতুকো জ্ঞেয়ঃ |
ইতি দশবিধঃ প্রয়োজ্যো বীণায়াং ব্যঞ্জনো ধাতুঃ || ৬৯||
ইত্যেতে ধাতবঃ প্রোক্তাশ্চৎবারো লক্ষণান্বিতাঃ |
তিসৃণামপি বৃত্তীনাং যেষু বাদ্যং প্রতিষ্ঠিতম্ || ৭০||
তিস্রস্তু বৃত্তয়শ্চিত্রাদক্ষিণাবৃত্তিসঞ্জ্ঞিতাঃ |
বাদ্যগীতোভয়গুণা নির্দিষ্টান্তা যথাক্রমম্ || ৭১||
তিস্রো গীতিবৃত্তয়ঃ প্রাধান্যেন গ্রাহ্যাঃ | চিত্রা বৃত্তির্দক্ষিণা চেতি
| তাসাং তালগীতিলয়য়তিমার্গপ্রাধান্যানি যথাস্বং ব্যঞ্জকানি
ভবন্তি | তত্র চিত্রায়াং
সঙ্ক্ষিপ্তবাদ্যতালদ্রুতলয়সমায়ত্য্নাগতগ্রহাণাং প্রাধান্যম্ | তথা
বৃত্তৌ গীতবাদিত্রদ্বিকলাতালমধ্যলয়স্রোতোগতায়তিসমগ্রহমার্গাণাং
প্রাধান্যম্ | দক্ষিণায়াং
গীতিচতুষ্কলতালবিলম্বিতলয়গোপুচ্ছায়ত্যতীতগ্রহমার্গাণাং
প্রাধান্যম্ |
সর্বাসামেব বৃত্তীনাং ললিতাদ্যাস্তু জাতয়ঃ |
ধাতুভিঃ সহ সংযুক্তা ভবন্তি গুণবত্তরাঃ || ৭২||
এতেষাং ধাতূনাং সমবায়াজ্জাতয়স্তু জায়ন্তে |
স্যাদুদাত্তললিতরিভিতঘনসঞ্জ্ঞাশ্চতস্রস্তু || ৭৩||
তত্রোদাতা বিস্তারধাতুবিষয়া হ্যুদাত্তৎবাৎ |
ললিতা ব্যঞ্জনধাতোর্ললিতৎবাদেব সম্প্রয়োক্তব্যা || ৭৪||
আবিদ্ধধাতুবিষয়া রিভিতা লঘুসঞ্চয়াদ্ বিনির্দিষ্টা |
করণবিষয়া চ ঘনসঞ্জ্ঞা গুরুলঘুসঞ্চয়াত্তু স্যাৎ || ৭৫||
ত্রিবিধং গীতে কার্যং বাদ্যং বীণাসমুদ্ভবং তজ্জ্ঞৈঃ |
তত্ত্বং হ্যনুগতমোঘঃ স্থানৈককরণসমায়ুক্তাঃ || ৭৬||
লয়তালবর্ণপদয়তিগীত্যক্ষরভাবকং ভবেৎ তত্ত্বম্ |
গীতং তু যদনুগচ্ছত্যনুগতমিতি তদ্ভবেদ্বাদ্যম্ || ৭৭||
আবিদ্ধকরণবহুলং হ্যুপর্যুপরিপাণিকং দ্রুতলয়ং চ |
অনপেক্ষিতগীতার্থং বাদ্যং ৎবোঘে বিধাতব্যম্ || ৭৮||
এবং জ্ঞেয়া বৈণে বাদ্যবিধানে তু ধাতবস্তজ্জ্ঞৈঃ |
লক্ষ্যাম্যতঃ পরমহং নির্গীতবিধানসমবায়ম্ || ৭৯||
আশ্রাবণা তথাঽরম্ভো বক্ত্রপাণিস্তথৈব চ |
সঙ্খোটনা তথা কার্যং পুনশ্চ পরিঘট্টনা || ৮০||
মার্গাসারিতমেতৎ স্যাল্লীলাকৃতমথাপি চ |
আসারিতানি চ তথা ত্রিপ্রকারকৃতানি তু || ৮১||
এতানি তু বহির্গীতান্যাহুর্বাদ্যবিদো জনাঃ |
সতালানি হ্যতালানি চিত্তবৃত্তৌ কৃতানি তু || ৮২||
প্রয়োজনং চ বিজ্ঞেয়ং পূর্বরঙ্গবিধিং প্রতি |
এতেষাং সম্প্রবক্ষ্যামি লক্ষণং সনিদর্শনম্ || ৮৩||
আস্রাবণা নাম |
বিস্তারধাতুবিহিতৈঃ করণৈঃ প্রবিভাগশো দ্বিরভ্যস্তৈঃ |
দ্বিশ্চাপি সন্নিবৃত্তৈঃ করণোপচয়ৈঃ ক্রমেণ স্যাৎ || ৮৪||
গুরুণী ৎবাদাবেকাদশকং চতুর্দশং সপঞ্চদশম্ |
সচতুর্বিংশকমেবং দ্বিগুণীকৃতমেতদেব স্যাৎ || ৮৫||
লঘুনী গুরু চৈব স্যাদথাষ্টমং গুরু ভবেত্তথা চ পুনঃ |
ষট্ চ লঘূনি ততোঽন্ত্যে গুর্বাদ্যাশ্রাবণায়াং তু || ৮৬||
ত্রিঃশম্যোপরিপাণৌ তালাবপ্যেবমেব চৈকিকবান্ |
সমপাণৌ দ্বে শম্যে তালাবপ্যেবমেবাথ || ৮৭||
ভূয়ঃ শম্যাতালাববপাণাবুত্তরস্থা চৈব |
চঞ্চৎপুটস্তথা স্যাদেবং হ্যাশ্রাবণাতালঃ || ৮৮||
অত্রোদাহরণম্ |
জ়্হণ্টুং জগতি যবলিতক জম্বুক ঝণ্টুং তিতি চ লঘু চ ঝণ্টুম্ |
দিঙ্গলে গণপতিপশুপতিজম্বুক দিঙ্গলে বরভুজ দিগিনগি চা |
তিতি চাদিনি নিগিচা পশুপতি নীতিচা ||
অথারম্ভঃ |
দীর্ঘাণ্যাদাবষ্টৌ দ্বাদশ চ লঘূনি নৈধনং চৈব |
চৎবারি গুরূণি তথা হ্রস্বান্যষ্টৌ চ দীর্ঘং চ || ৮৯||
লঘুসঞ্জ্ঞানি চতুর্ধা নিধনং দ্বিগুণীকৃতানি দীর্ঘে দ্বে |
অষ্টৌ লঘূনি নৈধনমিত্যারম্ভেঽক্ষরবিধানম্ || ৯০||
অত্রোদাহরণম্ |
জ়্হণ্টুং ঝণ্টুং ঝণ্টুং ঝণ্টুং জগতি যবলিতক দিগিনিগিচা |
দিঙ্গ্লে দিঙ্গ্লে তিতি ঝঝলকুচঝলজম্বুক তিতিচা |
গণপতি সুরপতি পশুপতি চা ||
অস্য তু বাদ্যম্ |
কার্যং ত্রিপর্বরহিতৈরুদ্বহনৈরপ্যথ সমবরোহৈঃ |
তলরিভিতহ্রাদয়ুতৈঃ করণৈর্বিস্তারভূয়িষ্ঠৈঃ ||
অপচয়য়ুক্তৈর্দ্বিস্ত্রিস্তথা নিবৃত্তৈর্দ্বিরভ্যস্তৈঃ |
আরম্ভোঽপ্যবতরণস্ত্রিপর্বয়ুক্তৈশ্চ কর্তব্যঃ ||
তালস্ত্রিকলস্ত্বাদৌ শম্যৈককলা কলাদ্বয়ে তালঃ |
দ্বিকলা চ পুনঃ শম্যা তালো দ্বিকলশ্চ কর্তব্যঃ || ৯১||
ত্রিকলশ্চ সন্নিপাতঃ পুনঃ পিতাপুত্রকশ্চ ষট্পূর্বঃ |
চঞ্চৎপুটস্তথা স্যাদারম্ভে তালয়োগস্তু || ৯২||
অস্য তু বাদ্যম্ |
কার্যং ত্রিপর্বরহিতৈরুদ্বহনৈরপ্যথ সমবরোহৈঃ |
তলরিভিতহ্রাদয়ুতৈঃ করণৈর্বিস্তাভূয়িষ্ঠৈঃ || ৯৩||
অপচয়য়ুক্তৈর্দ্বিস্ত্রিস্তথা নিবৃত্তৈর্দ্বিরভ্যস্তৈঃ |
আরম্ভোঽপ্যবতরণস্ত্রিপর্বয়ুক্তৈশ্চ কর্তব্যঃ || ৯৪||
অথ বক্ত্রপাণিঃ |
গুরূণি পঞ্চ হ্রস্বানি ষড্গুরুশ্চ চতুর্গুণঃ |
গুরুণী দ্বে লঘু ৎবেকং চৎবার্যথ গুরূণি হি || ৯৫||
চৎবার্যথ লঘূনি স্যুস্ত্রীণি দীর্ঘাণি চৈব হি |
লঘূন্যষ্টৌ চ দীর্ঘং চ বক্ত্রপাণৌ ভবেদ্বিধিঃ || ৯৬||
অত্রোদাহরণম্ |
দিঙ্গলে ঝণ্টুং জম্বুক জগতি য ঝণ্টুং দিঙ্গলে |
ঘেন্দৃং ঘেটো ঘাটো ভট্টুনকিটি ইনং দুঙ্ ||
ঘদুগদুকিটমটনম্ |
অস্য বাদ্যম্ |
আবিদ্ধকরণয়ুক্তো দ্ব্যঙ্গঃ স্যাদেকপ্রবৃত্তৌ বা |
অল্পব্যঞ্জনধাতুর্বাদ্যবিধির্বক্ত্রপাণৌ তু || ৯৭||
দ্বিকলে মদ্রকে যত্তু শম্যাতালাদিপাতম্ |
তৎসর্বং বক্ত্রপাণৌ তু কার্যমষ্টকলান্বিতম্ || ৯৮||
তস্যাধস্তাৎ পুনঃ কার্যং পঞ্চপাণিচতুষ্টয়ম্ |
বক্ত্রপাণেরয়ং তালো মুখপ্রতিমুখাশ্রয়ঃ || ৯৯||
অথ সঙ্খোটনা |
গুরুণী লঘূন্যথাষ্টৌ দীর্ঘং দ্বিগুণং তথা চ কর্তব্যম্ |
লঘুদীর্ঘে লঘু চ পুনশ্চতুর্গুণং সম্প্রকর্তব্যম্ || ১০০||
পুনরষ্টৌ হ্রস্বানি স্যুরিহ তথা নৈধনং চ কর্তব্যম্ |
সঙ্খোটনবস্তুবিধৌ হ্রস্বগুরুবিধিঃ সমুদ্দিষ্টঃ || ১০১||
সঙ্খোটনায়া উদাহরণং প্রকল্প্য কৃতম্ |
দিঙ্গলে জগতি য বলতি কতেচাতিচাতিঝ লঘু চঝল পশুপতিচা |
অস্যা বাদ্যবিধিঃ |
অধিদণ্ডং হস্তাভ্যাং বীণাং বিনিগৃহ্য দক্ষিণাঙ্গুল্যা |
অঙ্গুষ্ঠাভ্যাং চ তথা কার্যং সঙ্খোটনাবাদ্যম্ || ১০২||
সঙ্খোটয়েৎ স্বরং বাদিনা তু সংবাদিনা তথাধিবলম্ |
সমবায়িভিশ্চ শেষৈরনুবাদিভিরল্পকৈশ্চাংশৈঃ || ১০৩||
বিস্তারচিত্রকরণৈর্দ্বিস্ত্রির্বিনিবর্তিতৈর্দ্বিরভ্যস্তৈঃ |
উপচয়য়ুক্তৈঃ ক্রমশো বদন্তি সঙ্খোটনাবাদ্যম্ |
তালোঽস্যা গদিতস্তজ্জ্ঞৈঃ শীর্ষবৎ পঞ্চপাণিনা || ১০৪||
অথ পরিঘট্টনা |
দীর্ঘাণ্যাদাবষ্টৌ লঘূনি কুর্যাৎ পুনর্দ্বিগুণিতানি |
হ্রস্বান্যপি চৎবারি দ্বিগুণানি স্যুঃ সদীর্ঘাণি || ১০৫||
ষোডশ লঘূনি চ স্যুঃ সহ নিধনে চৈব কার্যাণি |
এষ পরিঘট্টনায়াং গুরুলঘুবস্তুক্রমঃ প্রোক্তঃ || ১০৬||
এতস্যামপ্যুদাহরণং প্রকল্প্য কৃতম্ |
দিঙ্গলে দিঙ্গলে দিঙ্গলে দিঙ্গলে জগতি য বলতি ক |
তিতিঝলকুচঝলদিগিনিগি গণপতি চা |
চলতি ক গণপতি পশুপতিসুরপতি চা |
বাদ্যং চাস্যাস্তজ্জ্ঞৈঃ সোদ্বহনং হস্তলাঘবাৎ কার্যম্ |
ব্যঞ্জনধাতুসমুত্থং নানাকরণাশ্রয়োপেতম্ || ১০৭||
সম্পিষ্টকবচ্চাস্যাস্তালঃ করণৈস্তু ধাতুসংযুক্তৈঃ |
গুরুলঘুয়োগাদেবং বিহিতঃ কার্যো বুধৈর্নিত্যম্ || ১০৮||
মার্গাসারিতবাদ্যং বিস্তারাবিদ্ধকরণসংযুক্তম্ |
সকলৈঃ সতলৈঃ করণৈরথ গুরুলঘুসঞ্চয়শ্চায়ম্ || ১০৯||
চৎবারি গুরূণি স্যুর্লঘূনি চৎবারি চ দ্বিগুণিতানি |
গুরুণী লঘূন্যথাষ্টৌ গুরুণী চেত্যেতৎ ত্রিধা যোজ্যম্ || ১১০||
অথবা |
চৎবারি তু গুরূণি স্যুর্হ্রস্বান্যষ্টৌ ভবন্তি হি |
গুরুণী নব হ্রস্বানি দীর্ঘমন্ত্যমথাপি চ ||
অত্রোদাহরণম্ |
দিঙ্গলে ঝণ্টুং জগতি য |
থলিতক ঝণ্টুং তিতি |
ঝলকুচ ঝলতিতিচা |
বালাসারিতবচ্চৈব তালোঽস্য পরিকীর্তিতঃ || ১১০||
শ্রবণমধুরাণি লীলাকৃতান্যভিসৃতপরিসৃতান্তরকৃতানি |
তান্যপ্যর্থবশাদিহ কর্তব্যানি প্রয়োগবিধৌ || ১১১||
যথাসারিতানি জ্যেষ্ঠমধ্যকনিষ্ঠানি তালপ্রমাণনির্দিষ্টানি তানি
তালবিধানে বক্ষ্যামঃ |
এবমেতৎ স্বরগতং জ্ঞেয়ং বীণাশরীরজম্ |
বিপঞ্চীবাদ্যয়ুক্তানি করণানি নিবোধত || ১১২||
রূপং কৃতং প্রতিকৃতং প্রতিভেদো রূপশেষমোঘশ্চ |
ষষ্ঠী বৈ প্রতিশুষ্কা ৎবেবং জ্ঞেয়ং করণজাতম্ || ১১৩||
বীণাবাদ্যদ্বিগুণং গুরুলাঘববাদনং ভবেদ্রূপম্ |
রূপং প্রতিভেদকৃতং প্রতিকৃতমিত্যুচ্যতে বাদ্যম্ || ১১৪||
যুগপৎকৃতেঽন্যকরণং প্রতিভেদো দীর্ঘলাঘবকৃতঃ স্যাৎ |
কৃতমেকস্যাং তন্ত্র্যাং প্রতিশুষ্কা নাম বিজ্ঞেয়া || ১১৫||
বীণাবাদ্যবিরামেঽপ্যবিরতকরণং তু রূপশেষঃ স্যাৎ |
আবিদ্ধকরণয়ুক্তো হ্যুপর্যুপরিপাণিকস্ত্বোঘঃ || ১১৬||
কার্যং ধ্রুবাবিধানে প্রায়েণ হি কোণবাদনং তজ্জ্ঞৈঃ |
স্থানপ্রাপ্ত্যর্থং চেদ্যত্তত্র ভবেদয়ং নিয়মঃ || ১১৭||
তচ্চৌঘতুল্যকরণং বাচ্যং কার্যং বিপঞ্চ্যাস্তু |
সপ্ততন্ত্রী ভবেচ্চিত্রা বিপঞ্চী তু ভবেন্নব |
কোণবাদনা বিপঞ্চী স্যাচ্চিত্রা চাঙ্গুলিবাদনা || ১১৮||
ততবাদ্যবিধানমিদং সর্বং প্রোক্তং সমাসয়োগেন |
বক্ষ্যাম্যতশ্চ ভূয়ঃ সুষিরাতোদ্যপ্রয়োগং তু || ১১৯||
|| ইতি ভরতীয়ে নাট্যশাস্ত্রে ততাতোদ্যবিধানং নাম
একোনত্রিংশত্তমোঽধ্যায়ঃ||
