নাট্যশাস্ত্রম্ অধ্যায় ১৬ বাগভিনয়ে কাব্যলক্ষণো

 || নাট্যশাস্ত্রম্ অধ্যায় ১৬ বাগভিনয়ে কাব্যলক্ষণো||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ ষোডশোঽধ্যায়ঃ
বিভূষণং চাক্ষরসংহতিশ্চ শোভাভিমানৌ গুণকীর্তনং চ |
প্রোৎসাহনোদাহরণে নিরুক্তং গুণানুবাদোঽতিশয়শ্চ হেতুঃ || ১||
সারূপ্যমিথ্যাধ্যবসায়সিদ্ধি
পদোচ্চয়াক্রন্দমনোরথাশ্চ |
আখ্যানয়াঞ্চাপ্রতিষেধপৃচ্ছা
দৃষ্টান্তনির্ভাসনসংশয়াশ্চ || ২||
আশীঃ প্রিয়োক্তিঃ কপটঃ ক্ষমা চ
প্রাপ্তিশ্চ পশ্চাত্তপনং তথৈব |
অর্থানুবৃত্তির্হ্যুপপত্তিয়ুক্তী
কার্যোঽনুনীতিঃ পরিদেবনং চ || ৩||
ষট্ত্রিংশদেতানি হি লক্ষণানি
প্রোক্তানি বৈ ভূষণসংমিতানি |
কাব্যেষু ভাবার্থগতানি তজ্জ্ঞৈঃ
সম্যগ্ প্রয়োজ্যানি যথারসং তু || ৪||
অলঙ্কারৈর্গুণৈশ্চৈব বহুভিঃ সমলঙ্কৃতম্ |
ভূষণৈরিব বিন্যস্তৈস্তদ্ ভূষণমিতি স্মৃতম্ || ৫||
যত্রাল্পৈরক্ষরৈঃ শ্লিষ্টৈর্বিচিত্রমুপবর্ণ্যতে |
তমপ্যক্ষরসঙ্ঘাতং বিদ্যাল্লক্ষণসঞ্জ্ঞিতম্ || ৬||
সিদ্ধৈরর্থৈস্সমং কৃৎবা হ্যসিদ্ধোঽর্থঃ প্রসাধ্যতে |
যত্র শ্লক্ষ্ণবিচিত্রার্থা সা শোভেত্যভিধীয়তে || ৭||
ধার্যমাণস্তু বহুভির্বচনৈঃ কার্যয়ুক্তিভিঃ |
ন যঃ পর্যবতিষ্ঠেত সোঽভিমানস্তু সঞ্জ্ঞিতঃ || ৮||
কীর্ত্যমানৈর্গুণৈর্যত্র বিবিধার্থসমুদ্ভবৈঃ |
দোষা ন পরিকথ্যন্তে তজ্জ্ঞেয়ং গুণকীর্তনম্ || ৯||
লোকে গুণাতিরিক্তানাং বহূনাং যত্র নামভিঃ |
একোঽভিশব্দ্যতে যস্তু বিজ্ঞেয়ং গুণকীর্তনম্ || ১০||
উৎসাহজননৈঃ স্পষ্টৈরর্থৈরোপম্যসংশ্রয়ৈঃ |
প্রসিদ্ধৈরুপগূঢং চ জ্ঞেয়ং প্রোৎসাহনং বুধৈঃ || ১১||
যত্রৈকস্যাপি শব্দস্য দর্শনাৎসুবহূন্যপি |
যান্তি সিদ্ধিমনুক্তানি তদুদাহরণং স্মৃতম্ || ১২||
নিরুক্তং দ্বিবিধং প্রোক্তং তথ্যং চাতথ্যমেব বা |
সিদ্ধিপ্রসাধিতং তথ্যমতথ্যং চাপ্রসাধিতম্ || ১৩||
গুণানুবাদো হীনানামুত্তমৈরুপমাকৃতঃ |
উত্তমার্থবিশেষো যঃ স চাপ্যতিশয়ঃ স্মৃতঃ || ১৪||
বহূনাং ভাষমাণানামেকস্যার্থবিনির্ণয়াৎ |
সিদ্ধোপমানবচনং হেতুরিত্যভিসঞ্জ্ঞিতঃ || ১৫||
অপদেশস্তু পরোক্ষো যস্মাদুৎপদ্যতেঽনুকরণেন |
লক্ষণসমানকরণাৎ সারূপ্যং তত্তু নির্দেশ্যম্ || ১৬||
অভূতপূর্বৈর্যত্রার্থৈস্তুল্যস্যার্থস্য নির্ণয়ঃ |
স মিথ্যাধ্যবসায়স্তু প্রোচ্যতে কাব্যলক্ষণে || ১৭||
বহূনাং তু প্রধানানাং মধ্যে যন্নাম কীর্ত্যতে |
একার্থসাধনকৃতং সা সিদ্ধিরিতি কীর্ত্যতে || ১৮||
গুণৈর্বহুভিরেকার্থৈঃ পদৈর্যঃ সম্প্রশস্যতে |
পদোচ্চয়ং তু তদ্বিদ্যান্নানার্থগ্রথনাত্মকম্ || ১৯||
আত্মভাবমুপন্যস্য পরসাদৃশ্যয়ুক্তিভিঃ |
তীব্রার্থভাষণং যৎস্যাদাক্রন্দঃ স তু কীর্তিতঃ || ২০||
হৃদয়স্থস্য ভাবস্য সুস্পষ্টার্থপ্রদর্শনম্ |
অন্যাপদেশকথনৈর্মনোরথ ইতি স্মৃতঃ || ২১||
অপৃষ্টৈরথবা পৃষ্টৈর্নির্ণয়ঃ ক্রিয়তে তু যঃ |
আখ্যানমিতি তজ্জ্ঞেয়ং লক্ষণং নাটকাশ্রয়ম্ || ২২||
আদৌ যৎক্রোধজননমন্তে হর্ষপ্রবর্ধনম্ |
যত্তু প্রিয়ং পুনর্বাক্যং সা যাঞ্চা পরিকীর্তিতা || ২৩||
কার্যেষু বিপরীতেষু যদি কিঞ্চিৎ প্রবর্ততে |
নিবার্যতে চ কার্যজ্জ্ঞৈঃ প্রতিষেধঃ প্রকীর্তিতঃ || ২৪||
যত্রাকারোদ্ভবৈর্বাক্যৈরাত্মানমথবা পরম্ |
পৃচ্ছন্নিবাভিধত্তেঽর্থং সা পৃচ্ছেত্যভিসঞ্জ্ঞিতা || ২৫||
বিদ্বান্ পূর্বোপলব্ধৌ যৎসমৎবমুপপাদয়েৎ |
নিদর্শনকৃতস্তজ্জ্ঞৈঃ স দৃষ্টান্ত ইতি স্মৃতঃ || ২৬||
অনেকয়ুক্তিমদ্বাক্যমনেকার্থপ্রসাধকম্ |
অনেকবাক্যসংযুক্তং তন্নির্ভাসনমুচ্যতে || ২৭||
অপরিজ্ঞাততত্ত্বার্থং যত্র বাক্যং সমাপ্যতে |
সোঽনেকৎবাদ্বিচারাণাঅং সংশয়ঃ পরিকীর্তিতঃ || ২৮||
যত্র শাস্ত্রার্থসম্পন্নাং মনোরথসমুদ্ভবাম্ |
অপ্রার্থনীয়ামন্যাং বা বিদুস্তামাশিষং বুধাঃ || ২৯||
আদৌ যৎ ক্রোধজননমন্তে হর্ষপ্রবর্ধনম্ |
তৎ প্রিয়ং বচনং জ্ঞেয়মাশীর্বাদসমন্বিতম্ || ৩০||
ছলয়ুক্ত্যা ৎবন্যেষামভিসন্ধানাভিভাবকঙ্কপটম্ |
দ্বিত্রিপ্রয়োগয়ুক্তো বিজ্ঞেয়ঃ কপটসঙ্ঘাতঃ || ৩১||
দুর্জনোদাহৃতৈ রূক্ষৈঃ সভামধ্যেঽতিতাডিতঃ |
অক্রোধঃ ক্রোধজননৈর্বাক্যৈর্যঃ সা ক্ষমা ভবেৎ || ৩২||
দৃষ্ট্বৈবাবয়বং কঞ্চিদ্ভাবো যত্রানুমীয়তে |
প্রাপ্তিং তামভিজানীয়াল্লক্ষণং নাটকাশ্রয়ম্ || ৩৩||
অকার্যং সহসা কৃৎবাঽকৃৎবা কার্যমথাপি বা |
সন্তাপো মনসো যস্তু পশ্চাত্তাপঃ প্রকীর্তিতঃ || ৩৪||
প্রশ্রয়েণার্থসংযুক্তং যৎপরস্যানুবর্তনম্ |
স্নেহাদ্দাক্ষিণ্যয়োগাদ্বা সানুবৃত্তিস্তু সঞ্জ্ঞিতা || ৩৫||
প্রাপ্তানাং যত্র দোষাণাং ক্রিয়তে শমনং পুনঃ |
সা জ্ঞেয়া হ্যুপপত্তিস্তু লক্ষণং নাটকাশ্রয়ম্ || ৩৬||
সাধ্যতে যোঽর্থসম্বন্ধো মহদ্ভিঃ সমবায়তঃ |
পরস্পরানুকূল্যেন সা যুক্তিঃ পরিকীর্তিতা || ৩৭||
যত্রাপসারয়ন্ দোষং গুণমর্থেন যোজয়েৎ |
গুণাভিবাদং দোষান্ বা কার্যং তল্লক্ষণং বিদুঃ || ৩৮||
অপূর্বক্রোধজনিতমপরাধং প্রমৃজ্য যৎ |
সেবার্থং মধুরং বাক্যমনুনীতিঃ প্রকীর্তিতা || ৩৯||
দোষৈর্যদন্যনামোক্তৈঃ প্রসিদ্ধার্থৈঃ প্রয়োজয়েৎ |
অন্যত্রার্থেন সম্বদ্ধং জ্ঞেয়ং তৎ পরিদেবনম্ || ৪০||
উপমা রূপকং চৈব দীপকং যমকং তথা |
অলঙ্কারাস্তু বিজ্ঞেয়া চৎবারো নাটকাশ্রয়াঃ || ৪১||
যৎকিঞ্চিৎ কাব্যবন্ধেষু সাদৃশ্যেনোপমীয়তে |
উপমা নাম সা জ্ঞেয়া গুণাকৃতিসমাশ্রয়া || ৪২||
একস্যৈকেন সা কার্যা হ্যনেকেনাথবা পুনঃ |
অনেকস্য তথৈকেন বহূনাং বহুভিস্তথা || ৪৩||
তুল্যং তে শশিনা বক্ত্রমিত্যেকেনৈকসংশ্রয়া |
শশাঙ্কবৎ প্রকাশন্তে জ্যোতীংষীতি ভবেত্তু যা || ৪৪||
একস্যানেকবিষয়া সোপমা পরিকীর্তিতা |
শ্যেনবর্হিণভাসানাং তুল্যার্থমিতি যা ভবেৎ || ৪৫||
একস্য বহুভিঃ সাম্যাদুপমা নাটকাশ্রয়া |
বহূনাং বহুভির্জ্ঞেয়া ঘনা ইব গজা ইতি || ৪৬||
প্রশংসা চৈব নিন্দা চ কল্পিতা সদৃশী তথা |
যা কিঞ্চিৎসদৃশী জ্ঞেয়া সোপমা পঞ্চধা বুধৈঃ || ৪৭||
প্রশংসা যথা –
দৃষ্ট্বা তু তাং বিশালাক্ষীং তুতোষ মনুজাধিপঃ |
মুনিভিঃ সাধিতাং কৃচ্ছ্রাৎ সিদ্ধিং মূর্তিমতীমিব || ৪৮||
নিন্দা যথা –
সা তং সর্বগুণৈর্হীনং সস্বজে কর্কশচ্ছবিম্ |
বনে কণ্টকিনং বল্লী দাবদগ্ধমিব দ্রুমম্ || ৪৯||
কল্পিতা যথা –
ক্ষরন্তো দানসলিলং লালামন্থরগামিনঃ |
মতঙ্গজা বিরাজন্তে জঙ্গমা ইব পর্বতাঃ || ৫০||
সদৃশী যথা –
যত্ত্বয়াদ্য কৃতং কর্ম পরিচিত্তানুরোধিনা |
সদৃশং তত্তবৈব স্যাদতিমানুষকর্মণঃ || ৫১||
কিঞ্চিৎসদৃশী যথা –
সম্পূর্ণচন্দ্রবদনা নীলোৎপলদলেক্ষণা |
মত্তমাতঙ্গগমনা সম্প্রাপ্তেয়ং সখী মম || ৫২||
উপমায়া বুধৈরেতে ভেদা জ্ঞেয়াঃ সমাসতঃ |
শেষা যে লক্ষণৈর্নোক্তাস্তে গ্রাহ্যাঃ কাব্যলোকতঃ || ৫৩||
নানাধিকরণার্থানাং শব্দানাং সম্প্রদীপকম্ |
একবাক্যেন সংযুক্তং তদ্দীপকমুচ্যতে || ৫৪||
প্রসৃতং মধুরং চাপি গুণৈঃ সর্বৈরলঙ্কৃতম্ |
কাব্যে যন্নাটকে বিপ্রাস্তদ্দীপকমিতি স্মৃতম্ || ৫৫||
যথা -সরাংসি হংসৈঃ কুসুমৈশ্চ বৃক্ষা
মত্তৈর্দ্বিরেফৈশ্চ সরোরুহাণি |
গোষ্ঠীভিরুদ্যানবনানি চৈব
তস্মিন্নশূন্যানি সদা ক্রিয়ন্তে || ৫৬||
স্ববিকল্পেন রচিতং তুল্যাবয়বলক্ষণম্ |
কিঞ্চিৎসাদৃশ্যসম্পন্নং যদ্রূপং রূপকং তু তৎ || ৫৭||
নানাদ্রব্যানুরাগাদ্যৈর্যদৌপম্যগুণাশ্রয়ম্ |
রূপনির্বর্ণনায়ুক্তং তদ্রূপকমিতি স্মৃতম্ || ৫৮||
যথা -পদ্মাননাস্তাঃ কুমুদপ্রহাসা বিকাসিনীলোৎপলচারুনেত্রাঃ |
বাপীস্ত্রিয়ো হংসকুলৈর্নঃ
স্বনদ্ভির্বিরেজুরন্যোন্যমিবাহ্বয়ন্ত্যঃ || ৫৯||
শব্দাভ্যাসস্তু যমকং পদাদিষু বিকল্পিতম্ |
বিশেষদর্শনঞ্চাস্য গদতো মে নিবোধত || ৬০||
পাদান্তয়মকং চৈব কাঞ্চীয়মকমেব চ |
সমুদ্গয়মকং চৈব বিক্রান্তয়মকং তথা || ৬১||
যমকং চক্রবালং চ সন্দষ্টয়মকং তথা |
পদাদিয়মকঞ্চৈব হ্যাম্রেডিতমথাপি চ || ৬২||
চতুর্ব্যবসিতঞ্চৈব মালায়মকমেব চ |
এতাদৃশবিধং জ্ঞেয়ং যমকং নাটকাশ্রয়ম্ || ৬৩||
চতুর্ণাং যত্র পাদানামন্তে স্যাৎসমমক্ষরম্ |
তদ্বৈ পাদান্তয়মকং বিজ্ঞেয়ং নামতো যথা || ৬৪||
দিনক্ষয়াৎ সংহৃতরশ্মিমণ্ডলং
দিবীব লগ্নং তপনীয়মণ্ডলম্ |
বিভাতি তাম্রং দিবি সূর্যমণ্ডলং
যথা তরুণ্যাঃ স্তনভারমণ্ডলম্ || ৬৫||
লোকানাং প্রভবিষ্ণুর্দৈত্যেন্দ্রগদানিপাতনসহিষ্ণুঃ |
জয়তি সুরদৈত্যজিষ্ণুর্ভগবানসুরবরমথনকারী বিষ্ণুঃ || ৬৬||
পাদস্যান্তে তথা চাদৌ স্যাতাং যত্র সমে পদে |
তৎকাঞ্চীয়মকং চৈব বিজ্ঞেয়ং সূরিভির্যথা || ৬৭||
যামং যামং চন্দ্রবতীনাং দ্রবতীনাং
ব্যক্তাব্যক্তা সারজনীনাং রজনীনাম্ |
ফুল্লে ফুল্লে সম্ভ্রমরে বাভ্রমরে বা
রামা রামা বিস্ময়তে চ স্ময়তে চ || ৬৮||
অর্ধেনৈকেন যদ্বৃত্তং সর্বমেব সমাপ্যতে |
সমুদ্গয়মকং নাম তজ্জ্ঞেয়ং পণ্ডিতৈর্যথা || ৬৯||
কেতকীকুসুমপাণ্ডুরদন্তঃ
শোভতে প্রবরকাননহস্তী |
কেতকীকুসুমপাণ্ডুরদন্তঃ
শোভতে প্রবরকাননহস্তী || ৭০||
একৈকং পাদমুৎক্রম্য দ্বৌ পাদৌ সদৃশৌ যদি |
বিক্রান্তয়মকং নাম তদ্বিজ্ঞেয়মিদং যথা || ৭১||
স পূর্বং বারণো ভূৎবা দ্বিশৃঙ্গ ইব পর্বতঃ |
অভবদ্দন্তবৈকল্যাদ্বিশৃঙ্গ ইব পর্বতঃ || ৭২||
পূর্বস্যান্তেন পাদস্য পরস্যাদির্যদা সমঃ |
চক্রবচ্চক্রবালং তু বিজ্ঞেয়ং নামতো যথা || ৭৩||
তুল্যাৎপাদদ্বয়াদন্ত্যাদেকেনাদির্যদা সমঃ |
সর্বত্র চক্রবালন্তু তদ্বিজ্ঞেয়ং বুধৈর্যথা || ৭৪||
শৈলা যথা শত্রুভিরাহতা হতা
হতাশ্চ ভূয়স্ত্বনুপুঙ্খপুঙ্খগৈঃ |
খগৈশ্চ সর্বৈর্যুধি সঞ্চিতাশ্চিতা-
শ্চিতাধিরূঢা নিহিতাস্তলৈস্তলৈঃ || ৭৫||
আদৌ দ্বৌ যত্র পাদৌ তু ভবেতামক্ষরে সমৌ |
সন্দষ্টয়মকং নাম বিজ্ঞেয়ং তদ্বুধৈর্যথা || ৭৬||
পশ্য পশ্য রমণস্য মে গুণান্
যেন যেন বশগাং করোতি মাম্ |
যেন যেন হি সমেতি দর্শনং
তেন তেন বশগাং করোতি মাম্ || ৭৭||
আদৌ পাদস্য তু যত্র স্যাৎ সমাবেশঃ সমাক্ষরঃ |
পাদাদিয়মকং নাম তদ্বিজ্ঞেয়ং বুধৈর্যথা || ৭৮||
বিষ্ণুঃ সৃজতি ভূতানি বিষ্ণুঃ সংহরতে প্রজাঃ |
বিষ্ণুঃ প্রসূতে ত্রৈলোক্যং বিষ্ণুর্লোকাধিদৈবতম্ || ৭৯||
পাদস্যান্তং পদং যত্র দ্বির্দ্বিরেকমিহোচ্যতে |
জ্ঞেয়মাম্রেডিতং নাম যমকং তত্র সূরিভিঃ || ৮০||
বিজৃম্ভিতং নিঃশ্বসিতং মুহুর্মুহুঃ
কথং বিধেয়ং স্মরণং পদে পদে |
যথা চ তে ধ্যানমিদং পুনঃ পুন-
র্ধুবঙ্গতা তে রজনী বিনা বিনা || ৮১||
সর্বে পাদাঃ সমা যত্র ভবন্তি নিয়তাক্ষরাঃ |
চতুর্ব্যবসিতং নাম তদ্বিজ্ঞেয়ং বুধৈর্যথা || ৮২||
বারণানাময়মেব কালো
বারণানাময়মেব কালঃ |
বারণানাময়মেব কালো
বারণানাময়মেব কালঃ || ৮৩||
নানারূপৈঃ স্বরৈর্যুক্তং যত্রৈকং ব্যঞ্জনং ভবেৎ |
তন্মালায়মকং নাম বিজ্ঞেয়ং পণ্ডিতৈর্যথা || ৮৪||
ললী বলী হলী মালী খেলী মালী সলী জলী |
খলো বলোঽবলো মালী মুসলী ৎবাভিরক্ষতু || ৮৫||
অসৌ হি রামা রতিবিগ্রহপ্রিয়া
রহঃপ্রগল্ভা রমণং মনোগতম্ |
রতেন রাত্রিং রময়েৎ পরেণ বা
ন চেদুদেষ্যত্তরুণঃ পরো রিপুঃ || ৮৬||
ন পুষ্করাক্ষঃ ক্ষতজোক্ষিতাক্ষঃ ক্ষরৎক্ষতেব্যঃ
ক্ষতজন্দুরীক্ষঃ |
ক্ষতৈর্গবাক্ষৈরিব সংবৃতাজ্ঞঃ সাক্ষাৎ
সহস্রাক্ষ ইবাবভাতি || ৮৭||
এভিরর্থক্রিয়াপেক্ষৈঃ কার্যং কাব্যং তু লক্ষণৈঃ |
অতঃ পরং প্রবক্ষ্যামি কাব্যে দোষান্ গুণাংস্তথা || ৮৮||
গূঢার্থমর্থান্তরমর্থহীনং
ভিন্নার্থমেকার্থমভিপ্লুতার্থম্ |
ন্যায়াবপেতং বিষমং বিসন্ধি
শব্দচ্যুতং বৈ দশ কাব্যদোষাঃ || ৮৯||
পর্যায়শব্দাভিহতং গূঢার্থমভিসঞ্জ্ঞিতম্ |
অবর্ণ্যং বর্ণ্যতে যত্র তদর্থান্তরমিষ্যতে || ৯০||
অর্থহীনং ৎবসম্বদ্ধং সাবশেষার্থমেব চ |
ভিন্নার্থমভিবিজ্ঞেয়মসভ্যং গ্রাম্যমেব চ || ৯১||
বিবক্ষিতোঽন্য এবার্থো যত্রান্যার্থেন ভিদ্যতে |
ভিন্নার্থং তদপি প্রাহুঃ কাব্যং কাব্যবিচক্ষণাঃ || ৯২||
অবিশেষাভিধানং যৎ তদেকার্থমিতি স্মৃতম্ |
অভিপ্লুতার্থং বিজ্ঞেয়ং যৎ পদেন সমস্যতে || ৯৩||
ন্যায়াদপেতং বিজ্ঞেয়ং প্রমাণপরিবর্জিতম্ |
বৃত্তভেদো ভবেদ্যত্র বিষমং নাম তদ্ভবেৎ || ৯৪||
অনুপশিষ্টশব্দং যৎ তদ্বিসন্ধীতি কীর্তিতম্ |
শব্দচ্যুতঞ্চ বিজ্ঞেয়মশব্দস্বরয়োজনাৎ || ৯৫||
এতে দোষাস্তু বিজ্ঞেয়াঃ সূরিভির্নাটকাশ্রয়াঃ |
গুণা বিপর্যয়াদেষাং মাধুর্যৌদার্যলক্ষণাঃ || ৯৬||
শ্লেষঃ প্রসাদঃ সমতাসমাধির্মাধুর্যমোজঃ পদসৌকুমার্যম্ |
অর্থস্য চ ব্যক্তিরুদারতা চ কান্তিশ্চ কাব্যস্য গুণা দশৈতে || ৯৭||
ঈপ্সিতেনার্থজাতেন সম্বদ্ধানাং পরস্পরম্ |
শ্লিষ্টতা যা পদানাং হি শ্লেষ ইত্যভিধীয়তে || ৯৮||
বিচারগহনং যৎস্যাৎ স্ফুটঞ্চৈব স্বভাবতঃ |
স্বতঃ সুপ্রতিবদ্ধঞ্চ শ্লিষ্টং তৎ পরিকীর্ত্যতে || ৯৯||
অপ্যনুক্তো বুধৈর্যত্র শব্দোঽর্থো বা প্রতীয়তে |
সুখশব্দার্থসংযোগাৎ প্রসাদঃ পরিকীর্ত্যতে || ১০০||
নাতিচূর্ণপদৈর্যুক্তা ন চ ব্যর্থাভিদায়িভিঃ |
দুর্বোধনৈশ্চ ন কৃতা সমৎবাৎ সমতা মতা || ১০১||
অন্যোন্যসদৃশা যত্র তথা হ্যন্যোন্যভূষণাঃ |
অলঙ্কারা গুণাশ্চৈব সমাঃ স্যুঃ সমতাং মতাঃ || ১০২||
অভিয়ুক্তৈর্বিশেষস্তু যোঽর্থস্যেহোপলক্ষ্যতে |
তেন চার্থেন সম্পন্নঃ সমাধিঃ পরিকীর্ত্যতে || ১০৩||
উপমাস্বিহ দৃষ্টানামর্থানাং যত্নতস্তথা |
প্রাপ্তানাং চাতিসঙ্ক্ষেপাৎ সমাধির্নির্ণয়ো যতঃ || ১০৪||
বহুশো যচ্ছ্রুতং বাক্যমুক্তং বাপি পুনঃ পুনঃ |
নোদ্বেজয়তি যস্মাদ্ধি তন্মাধুর্যমিতি স্মৃতম্ || ১০৫||
সমাসবদ্ভির্বিবিধৈর্বিচিত্রৈশ্চ পদৈর্যুতম্ |
সানুস্বারৈরুদারৈশ্চ তদোজঃ পরিকীর্ত্যতে || ১০৬||
অবগীতোঽপি হীনোঽপি স্যাদুদাত্তাবভাসকঃ |
যত্র শব্দার্থসম্পত্তিস্তদোজঃ পরিকীর্তিতম্ || ১০৭||
সুখপ্রয়োজ্যৈর্যচ্ছব্দৈর্যুক্তং সুশ্লিষ্টসন্ধিভিঃ |
সুকুমারার্থসংযুক্তং সৌকুমার্যং তদুচ্যতে || ১০৮||
সুপ্রসিদ্ধাভিধানা তু লোককর্মব্যবস্থিতা |
যা ক্রিয়া ক্রিয়তে কাব্যে সার্থব্যক্তিঃ প্রতীয়তে || ১০৯||
যস্যার্থানুপ্রবেশেন মনসা পরিকল্প্যতে |
অনন্তরং প্রয়োগস্তু সাঽর্থব্যক্তিরুদাহৃতা || ১১০||
দিব্যভাবপরীতং যচ্ছৃঙ্গারাদ্ভুতয়োজিতম্ |
অনেকভাবসংযুক্তমুদারৎবং প্রকীর্তিতম্ || ১১১||
অনেকার্থবিশেষৈর্যৎ সূক্তৈঃ সৌষ্ঠবসংযুতৈঃ |
উপেতমতিচিত্রার্থৈঃ উদাত্তং তচ্চ কীর্ত্যতে || ১১২||
যন্মনশ্শ্রোত্রবিষয়মাহ্লাদয়তি হীন্দুবৎ |
লীলাদ্যর্থোপপন্নাং বা তাং কান্তিং কবয়ো বিদুঃ || ১১৩||
যো মনশ্শ্রোত্রবিষয়ঃ প্রসাদজনকো ভবেৎ |
শব্দবন্ধঃ প্রয়োগেণ স কান্ত ইতি ভণ্যতে || ১১৪||
এবমেতে হ্যলঙ্কারা গুণা দোষাশ্চ কীর্তিতাঃ |
প্রয়োগমেষাং চ পুনর্বক্ষ্যামি রসসংশ্রয়ম্ || ১১৫||
লঘ্বক্ষরপ্রায়কৃতমুপমারূপকাশ্রয়ম্ |
কাব্যং কার্যং তু নাট্যজ্ঞৈঃ বীররৌদ্রাদ্ভুতাশ্রয়ম্ || ১১৬||
গুর্বক্ষরপ্রায়কৃতং বীভৎসে করুণে তথা |
কদাচিদ্রৌদ্রবীরাভ্যাং যদাঘর্ষণজং ভবেৎ || ১১৭||
রূপদীপকসংযুক্তমার্যাবৃত্তসমাশ্রয়ম্ |
শৃঙ্গারে চ রসে বীরে কাব্যং স্যান্নাটকাশ্রয়ম্ || ১১৮||
উত্তরোত্তরসংযুক্তং বীরে কাব্যং তু যদ্ভবেৎ |
জগত্যতিজগত্যাং বা সঙ্কৃত্যাং বাপি তদ্ভবেৎ || ১১৯||
তথৈব যুদ্ধসম্ফেটা উৎকৃত্যাং সম্প্রকীর্তিতৌ |
করুণে শক্বরী জ্ঞেয়া তথৈবাতিধৃতির্ভবেৎ || ১২০||
যদ্বীরে কীর্তিতং চ্ছন্দঃ তদ্রৌদ্রেঽপি প্রয়োজয়েৎ |
শেষাণামর্থয়োগেন চ্ছন্দঃ কার্যঃ প্রয়োক্তৃভিঃ || ১২১||
যচ্ছন্দঃ পূর্বমুদ্দিষ্টং বিষমার্ধসমে সমম্ |
উদারমধুরৈঃ শব্দৈস্তৎকার্যং তু রসানুগম্ || ১২২||
শব্দানুদারমধুরান্ প্রমদাভিধেয়ান্
নাট্যাশ্রয়েষু কৃতিষু প্রয়য়েত কর্তুম্ |
তৈর্ভূষিতা বহু বিভান্তি হি কাব্যবন্ধাঃ
পদ্মাকরা বিকসিতা ইব রাজহংসৈঃ || ১২৩||
ত্রিবিধং হ্যক্ষরং কার্যং কবিভির্নাটকাশ্রয়ম্ |
হ্রস্বং দীর্ঘং প্লুতঞ্চৈব রসভাববিভাবকম্ || ১২৪||
একমাত্রং ভবেদ্ হ্রস্বং দ্বিমাত্রং দীর্ঘমিষ্যতে |
প্লুতং চৈব ত্রিমাত্রং স্যাদক্ষরং স্বরয়োজনাৎ || ১২৫||
স্মৃতে চাসূয়িতে চৈব তথা চ পরিদেবিতে |
পঠতাং ব্রাহ্মণানাঞ্চ প্লুতমক্ষরমিষ্যতে || ১২৬||
অকারস্তু স্মৃতে কার্যং ঊকারশ্চাপ্যসূয়িতে |
পরিদেবিতে তু হাকার ওঙ্কারোঽধ্যয়নে তথা || ১২৭||
হ্রস্বদীর্ঘপ্লুতানীহ যথাভাবং যথারসম্ |
কাব্যয়োগেষু সর্বেষু হ্যক্ষরাণি প্রয়োজয়েৎ || ১২৮||
চেক্রীডিতপ্রভৃতিভির্বিকৃতৈস্তু শব্দৈঃ
যুক্তা ন ভান্তি ললিতা ভরতপ্রয়োগাঃ |
যজ্ঞক্রিয়েব রুরুচর্মধুরৈঃ কৃতাক্তৈঃ
বেশ্যা দ্বিজৈরিব কমণ্ডলুদণ্ডহস্তৈঃ || ১২৯||
মৃদুললিতপদার্থং গূঢশব্দার্থহীনং
বুধজনসুখভোগ্যং যুক্তিমন্নৃত্তয়োগ্যম্ |
বহুরসকৃতমার্গং সন্ধিসন্ধানয়ুক্তং
ভবতি জগতি যোগ্যং নাটকং প্রেক্ষকাণাম্ || ১৩০||

অনুবন্ধঃ
ভূষণাক্ষরসঙ্ঘাতৌ শোভোদাহরণে তথা |
হেতুসংশয়দৃষ্টান্তাঃ প্রাপ্তাভিপ্রায় এব চ || ১৩১||
নিদর্শনং নিরুক্তং চ সিদ্ধিশ্চাথ বিশেষণম্ |
গুণাতিপাতাতিশয়ৌ তুল্যতর্কঃ পদোচ্চয়ঃ || ১৩২||
দৃষ্টং চৈবোপদিষ্টং চ বিচারস্তদ্বিপর্যয়ঃ |
ভ্রংশশ্চানুনয়ো মালা দাক্ষিণ্যং গর্হণং তথা || ১৩৩||
অর্থাপত্তিঃ প্রসিদ্ধিশ্চ পৃচ্ছা সারূপ্যমেব চ |
মনোরথশ্চ লেশশ্চ ক্ষোভোঽথ গুণকীর্তনম্ || ১৩৪||
জ্ঞেয়ান্যনুক্তসিদ্ধিশ্চ প্রিয়ং বচনমেব চ |
ষট্ত্রিংশল্লক্ষণান্যেব কাব্যবন্ধেষু নির্দিশেৎ || ১৩৫||
অলঙ্কারৈর্গুণৈশ্চৈব বহুভিঃ সমলঙ্কৃতম্ |
ভূষণৈরিব চিত্রার্থৈস্তদ্ ভূষণমিতি স্মৃতম্ || ১৩৬||
যত্রাল্পৈরক্ষরৈঃ শ্লিষ্টৈর্বিচিত্রমুপবর্ণ্যতে |
তমপ্যক্ষরসঙ্ঘাতং বিদ্যাল্লক্ষণসঞ্জ্ঞিতম্ || ১৩৭||
সিদ্ধৈরর্থৈঃ সমং কৃৎবা হ্যসিদ্ধোঽর্থঃ প্রয়ুজ্যতে |
যত্র শ্লিষ্টা বিচিত্রার্থা সা শোভেত্যভিধীয়তে || ১৩৮||
যত্র তুল্যার্থয়ুক্তেন বাক্যেনাভিপ্রদর্শনাৎ |
সাধ্যন্তে নিপুণৈরর্থাস্তদুদাহরণং স্মৃতম্ || ১৩৯||
যৎ প্রয়োজনসামর্থ্যাৎ বাক্যমিষ্টার্থসাধকম্ |
সমাসোক্তং মনোগ্রাহি স হেতুরিতি সঞ্জ্ঞিতঃ || ১৪০||
অপরিজ্ঞাততত্ত্বার্থং বাক্যং যত্র সমাপ্যতে |
অনেকৎবাদ্বিচারাণাং স সংশয় ইতি স্মৃতঃ || ১৪১||
সর্বলোকমনোগ্রাহি যস্তু পক্ষার্থসাধকঃ |
হেতোর্নিদর্শনকৃতঃ স দৃষ্টান্ত ইতি স্মৃতঃ || ১৪২||
দৃষ্ট্বৈবাবয়বান্ কাংশ্চিদ্ ভাবো যত্রানুমীয়তে |
প্রাপ্তিং তামপি জানীয়াল্লক্ষণং নাটকাশ্রয়ম্ || ১৪৩||
অভূতপূর্বো যোঽপ্যর্থঃ সাদৃশ্যাৎপরিকল্পিতঃ |
লোকস্য হৃদয়গ্রাহী সোঽভিপ্রায় ইতি স্মৃতঃ || ১৪৪||
যত্রার্থানাং প্রসিদ্ধানাং ক্রিয়তে পরিকীর্তনম্ |
পরাপেক্ষাদ্যুদাসার্থং তন্নিদর্শনমুচ্যতে || ১৪৫||
নিরবদ্যস্য বাক্যস্য পূর্বোক্তার্থপ্রসিদ্ধয়ে |
যদুচ্যতে তু বচনং নিরুক্তং তদুদাহৃতম্ || ১৪৬||
বহূনাং চ প্রধানানাং নাম যত্রাভিকীর্ত্যতে |
অভিপ্রেতার্থসিদ্ধ্যর্থং সা সিদ্ধিরভিধীয়তে || ১৪৭||
সিদ্ধান্ বহূন্ প্রধানার্থান্ উক্ত্বা যত্র প্রয়ুজ্যতে |
বিশেষয়ুক্তং বচনং বিজ্ঞেয়ং তদ্বিশেষণম্ || ১৪৮||
গুণাভিধানৈর্বিবিধৈর্বিপরীতার্থয়োজিতৈঃ |
গুণাতিপাতো মধুরৈর্নিষ্ঠুরার্থৈর্ভবেদথ || ১৪৯||
বহূন্ গুণান্ কীর্তয়িৎবা সামান্যজনসম্ভবান্ |
বিশেষঃ কীর্ত্যতে যস্তু জ্ঞেয়ঃ সোঽতিশয়ো বুধৈঃ || ১৫০||
রূপকৈরুপসাভির্বা তুল্যার্থৈঃ সুপ্রয়োজিতৈঃ |
অপ্রত্যক্ষার্থসংস্পর্শস্তুল্যতর্কঃ প্রকীর্তিতঃ || ১৫১||
বহূনাং চ প্রয়ুক্তানাং পদানাং বহুভিঃ পদৈঃ |
উচ্চয়ঃ সদৃশার্থো যঃ স বিজ্ঞেয়ঃ পদোচ্চয়ঃ || ১৫২||
যথাদেশং যথাকালং যথারূপং চ বর্ণ্যতে |
যৎপ্রত্যক্ষং পরোক্ষং বা দৃষ্টং তদ্বর্ণতোঽপি বা || ১৫৩||
পরিগৃহ্য তু শাস্ত্রার্থং যদ্বাক্যমভিধীয়তে |
বিদ্বন্মনোহরং স্বন্তমুপদিষ্টং তদুচ্যতে || ১৫৪||
পূর্বাশয়সমানার্থৈরপ্রত্যক্ষার্থসাধনৈঃ |
অনেকোপাধিসংযুক্তো বিচারঃ পরিকীর্তিতঃ || ১৫৫||
বিচারস্যান্যথাভাবস্তথা দৃষ্টোপদিষ্টয়োঃ |
সন্দেহাৎকল্প্যতে যস্তু স বিজ্ঞেয়ো বিপর্যয়ঃ || ১৫৬||
বাচ্যমর্থং পরিত্যজ্য দৃষ্টাদিভিরনেকধা |
অন্যস্মিন্নেব পতনাদিহ ভ্রংশঃ স ইষ্যতে || ১৫৭||
উভয়োঃ প্রীতিজননো বিরুদ্ধাভিনিবিষ্টয়োঃ |
অর্থস্য সাধকশ্চৈব বিজ্ঞেয়োঽনুনয়ো বুধৈঃ || ১৫৮||
ঈপ্সিতার্থপ্রসিদ্ধ্যর্থং কীর্ত্যতে যত্র সূরিভিঃ |
প্রয়োজনান্যনেকানি সা মালেত্যভিসঞ্জ্ঞিতা || ১৫৯||
হৃষ্টৈঃ প্রসন্নবদনৈর্যৎপরস্যানুবর্তনম্ |
ক্রিয়তে বাক্যচেষ্টাভিস্তদ্দাক্ষিণ্যমিতি স্মৃতম্ || ১৬০||
যত্র সঙ্কীর্তয়ন্ দোষং গুণমর্থেন দর্শয়েৎ |
গুণাতিপাতাদ্ দোষাদ্বা গর্হণং নাম তদ্ভবেৎ || ১৬১||
অর্থান্তরস্য কথনে যত্রান্যোঽর্থঃ প্রতীয়তে |
বাক্যমাধুর্যসম্পন্না সার্থাপত্তিরুদাহৃতা || ১৬২||
বাক্যৈঃ সাতিশয়ৈরুক্তা বাক্যার্থস্য প্রসাধকৈঃ |
লোকপ্রসিদ্ধৈর্বহুভিঃ প্রসিদ্ধিরিতি কীর্তিতা || ১৬৩||
যত্রাকারোদ্ভবৈর্বাক্যৈরাত্মানমথবা পরম্ |
পৃচ্ছ্যতে চাভিধত্তেঽর্থং সা পৃচ্ছেত্যভিসঞ্জ্ঞিতা || ১৬৪||
দৃষ্টশ্রুতানুভূতার্থকথনাদিসমুদ্ভবম্ |
সাদৃশ্যং ক্ষোভজননং সারূপ্যমিতি সঞ্জ্ঞিতম্ || ১৬৫||
হৃদয়স্থস্য বাক্যস্য গূঢার্থস্য বিভাবকম্ |
অন্যাপদেশৈঃ কথনং মনোরথ ইতি স্মৃতঃ || ১৬৬||
যদ্বাক্যং বাক্যকুশলৈরুপায়েনাভিধীয়তে |
সদৃশার্থাভিনিষ্পত্ত্যাঃ স লেশ ইতি কীর্তিতঃ || ১৬৭||
পরদোষৈর্বিচিত্রার্থৈর্যত্রাত্মা পরিকীর্ত্যতে |
অদৃষ্টোঽপ্যন্যোঽপি বা কশ্চিৎ স তু ক্ষোভ ইতি স্মৃতঃ || ১৬৮||
লোকে গুণাতিরিক্তানাং গুণানাং যত্র নামভিঃ |
একোঽপি শব্দ্যতে তত্তু বিজ্ঞেয়ং গুণকীর্তনম্ || ১৬৯||
প্রস্তাবেনৈব শেষোঽর্থঃ কৃৎস্নো যত্র প্রতীয়তে |
বচনেন বিনানুক্তসিদ্ধিঃ সা পরিকীর্তিতা || ১৭০||
যৎপ্রসন্নেন মনসা পূজ্যং পূজয়িতুং বচঃ |
হৃষ্টপ্রকাশনার্থং তু সা প্রিয়োক্তিরুদাহৃতা || ১৭১||
এতানি কাব্যস্য চ লক্ষণানি
ষট্ত্রিংশদুদ্দেশনিদর্শনানি |
প্রবন্ধশোভাকরণানি তজ্জ্ঞৈঃ
সম্যক্ প্রয়োজ্যানি রসায়নানি || ১৭২||
ইতি ভরতীয়ে নাট্যশাস্ত্রে বাগভিনয়ে
কাব্যলক্ষণো নাম ষোডশোঽধ্যায়ঃ |

<