চাণক্যনীতি – অধ্যায় ১২
সানন্দং সদনং সুতাস্তু সুধিয়ঃ কান্তা প্রিয়ালাপিনী
ইচ্ছাপূর্তিধনং স্বয়োষিতি রতিঃ স্বাজ্ঞাপরাঃ সেবকাঃ |
আতিথ্যং শিবপূজনং প্রতিদিনং মিষ্টান্নপানং গৃহে
সাধোঃ সংগমুপাসতে চ সততং ধন্যো গৃহস্থাশ্রমঃ || ১২-০১
আর্তেষু বিপ্রেষু দয়ান্বিতশ্চ
যচ্ছ্রদ্ধয়া স্বল্পমুপৈতি দানম্ |
অনন্তপারমুপৈতি রাজন্
যদ্দীয়তে তন্ন লভেদ্দ্বিজেভ্যঃ || ১২-০২
দাক্ষিণ্যং স্বজনে দয়া পরজনে শাঠ্যং সদা দুর্জনে
প্রীতিঃ সাধুজনে স্ময়ঃ খলজনে বিদ্বজ্জনে চার্জবম্ |
শৌর্যং শত্রুজনে ক্ষমা গুরুজনে নারীজনে ধূর্ততা
ইত্থং যে পুরুষা কলাসু কুশলাস্তেষ্বেব লোকস্থিতিঃ || ১২-০৩
হস্তৌ দানবিবর্জিতৌ শ্রুতিপুটৌ সারস্বতদ্রোহিণৌ
নেত্রে সাধুবিলোকনেন রহিতে পাদৌ ন তীর্থং গতৌ |
অন্যায়ার্জিতবিত্তপূর্ণমুদরং গর্বেণ তুঙ্গং শিরো
রে রে জম্বুক মুঞ্চ মুঞ্চ সহসা নীচং সুনিন্দ্যং বপুঃ || ১২-০৪
যেষাং শ্রীমদ্যশোদাসুতপদকমলে নাস্তি ভক্তির্নরাণাং
যেষামাভীরকন্যাপ্রিয়গুণকথনে নানুরক্তা রসজ্ঞা |
যেষাং শ্রীকৃষ্ণলীলাললিতরসকথাসাদরৌ নৈব কর্ণৌ
ধিক্ তান্ ধিক্ তান্ ধিগেতান্ কথয়তি সততং কীর্তনস্থো মৃদংগঃ || ১২-০৫
পত্রং নৈব যদা করীলবিটপে দোষো বসন্তস্য কিং
নোলূকোঽপ্যবলোকতে যদি দিবা সূর্যস্য কিং দূষণম্ |
বর্ষা নৈব পতন্তি চাতকমুখে মেঘস্য কিং দূষণং
যৎপূর্বং বিধিনা ললাটলিখিতং তন্মার্জিতুং কঃ ক্ষমঃ || ১২-০৬
সৎসঙ্গাদ্ভবতি হি সাধুনা খলানাং
সাধূনাং ন হি খলসংগতঃ খলৎবম্ |
আমোদং কুসুমভবং মৃদেব ধত্তে
মৃদ্গন্ধং নহি কুসুমানি ধারয়ন্তি || ১২-০৭
সাধূনাং দর্শনং পুণ্যং তীর্থভূতা হি সাধবঃ |
কালেন ফলতে তীর্থং সদ্যঃ সাধুসমাগমঃ || ১২-০৮
বিপ্রাস্মিন্নগরে মহান্কথয় কস্তালদ্রুমাণাং গণঃ
কো দাতা রজকো দদাতি বসনং প্রাতর্গৃহীৎবা নিশি |
কো দক্ষঃ পরবিত্তদারহরণে সর্বোঽপি দক্ষো জনঃ
কস্মাজ্জীবসি হে সখে বিষকৃমিন্যায়েন জীবাম্যহম্ || ১২-০৯
ন বিপ্রপাদোদককর্দমাণি
ন বেদশাস্ত্রধ্বনিগর্জিতানি |
স্বাহাস্বধাকারবিবর্জিতানি
শ্মশানতুল্যানি গৃহাণি তানি || ১২-১০
সত্যং মাতা পিতা জ্ঞানং ধর্মো ভ্রাতা দয়া সখা |
শান্তিঃ পত্নী ক্ষমা পুত্রঃ ষডেতে মম বান্ধবাঃ || ১২-১১
অনিত্যানি শরীরাণি বিভবো নৈব শাশ্বতঃ |
নিত্যং সংনিহিতো মৃত্যুঃ কর্তব্যো ধর্মসঙ্গ্রহঃ || ১২-১২
নিমন্ত্রোৎসবা বিপ্রা গাবো নবতৃণোৎসবাঃ |
পত্যুৎসাহয়ুতা ভার্যা অহং কৃষ্ণচরণোৎসবঃ || ১২-১৩
মাতৃবৎপরদারেষু পরদ্রব্যেষু লোষ্ট্রবৎ |
আত্মবৎসর্বভূতেষু যঃ পশ্যতি স পণ্ডিতঃ || ১২-১৪
ধর্মে তৎপরতা মুখে মধুরতা দানে সমুৎসাহতা
মিত্রেঽবঞ্চকতা গুরৌ বিনয়তা চিত্তেঽতিমভীরতা |
আচারে শুচিতা গুণে রসিকতা শাস্ত্রেষু বিজ্ঞানতা
রূপে সুন্দরতা শিবে ভজনতা ৎবয়্যস্তি ভো রাঘব || ১২-১৫
কাষ্ঠং কল্পতরুঃ সুমেরুচলশ্চিন্তামণিঃ প্রস্তরঃ
সূর্যাস্তীব্রকরঃ শশী ক্ষয়করঃ ক্ষারো হি বারাং নিধিঃ |
কামো নষ্টতনুর্বলির্দিতিসুতো নিত্যং পশুঃ কামগৌ-
র্নৈতাংস্তে তুলয়ামি ভো রঘুপতে কস্যোপমা দীয়তে || ১২-১৬
বিদ্যা মিত্রং প্রবাসে চ ভার্যা মিত্রং গৃহেষু চ |
ব্যাধিতস্যৌষধং মিত্রং ধর্মো মিত্রং মৃতস্য চ || ১২-১৭
বিনয়ং রাজপুত্রেভ্যঃ পণ্ডিতেভ্যঃ সুভাষিতম্ |
অনৃতং দ্যূতকারেভ্যঃ স্ত্রীভ্যঃ শিক্ষেত কৈতবম্ || ১২-১৮
অনালোক্য ব্যয়ং কর্তা অনাথঃ কলহপ্রিয়ঃ |
আতুরঃ সর্বক্ষেত্রেষু নরঃ শীঘ্রং বিনশ্যতি || ১২-১৯
নাহারং চিন্তয়েৎপ্রাজ্ঞো ধর্মমেকং হি চিন্তয়েৎ |
আহারো হি মনুষ্যাণাং জন্মনা সহ জায়তে || ১২-২০
ধনধান্যপ্রয়োগেষু বিদ্যাসঙ্গ্রহণে তথা |
আহারে ব্যবহারে চ ত্যক্তলজ্জঃ সুখী ভবেৎ || ১২-২১
জলবিন্দুনিপাতেন ক্রমশঃ পূর্যতে ঘটঃ |
স হেতুঃ সর্ববিদ্যানাং ধর্মস্য চ ধনস্য চ || ১২-২২
বয়সঃ পরিণামেঽপি যঃ খলঃ খল এব সঃ |
সম্পক্বমপি মাধুর্যং নোপয়াতীন্দ্রবারুণম্ || ১২-২৩
