চাণক্যনীতি – অধ্যায় ০৭
অর্থনাশং মনস্তাপং গৃহে দুশ্চরিতানি চ |
বঞ্চনং চাপমানং চ মতিমান্ন প্রকাশয়েৎ || ০৭-০১
ধনধান্যপ্রয়োগেষু বিদ্যাসঙ্গ্রহণে তথা |
আহারে ব্যবহারে চ ত্যক্তলজ্জঃ সুখী ভবেৎ || ০৭-০২
সন্তোষামৃততৃপ্তানাং যৎসুখং শান্তিরেব চ |
ন চ তদ্ধনলুব্ধানামিতশ্চেতশ্চ ধাবতাম্ || ০৭-০৩
সন্তোষস্ত্রিষু কর্তব্যঃ স্বদারে ভোজনে ধনে |
ত্রিষু চৈব ন কর্তব্যোঽধ্যয়নে জপদানয়োঃ || ০৭-০৪
বিপ্রয়োর্বিপ্রবহ্ন্যোশ্চ দম্পত্যোঃ স্বামিভৃত্যয়োঃ |
অন্তরেণ ন গন্তব্যং হলস্য বৃষভস্য চ || ০৭-০৫
পাদাভ্যাং ন স্পৃশেদগ্নিং গুরুং ব্রাহ্মণমেব চ |
নৈব গাং ন কুমারীং চ ন বৃদ্ধং ন শিশুং তথা || ০৭-০৬
শকটং পঞ্চহস্তেন দশহস্তেন বাজিনম্ |
গজং হস্তসহস্রেণ দেশত্যাগেন দুর্জনম্ || ০৭-০৭
হস্তী অঙ্কুশমাত্রেণ বাজী হস্তেন তাড্যতে |
শৃঙ্গী লগুডহস্তেন খড্গহস্তেন দুর্জনঃ || ০৭-০৮
তুষ্যন্তি ভোজনে বিপ্রা ময়ূরা ঘনগর্জিতে |
সাধবঃ পরসম্পত্তৌ খলাঃ পরবিপত্তিষু || ০৭-০৯
অনুলোমেন বলিনং প্রতিলোমেন দুর্জনম্ |
আত্মতুল্যবলং শত্রুং বিনয়েন বলেন বা || ০৭-১০
বাহুবীর্যং বলং রাজ্ঞাং ব্রহ্মণো ব্রহ্মবিদ্বলী |
রূপয়ৌবনমাধুর্যং স্ত্রীণাং বলমনুত্তমম্ || ০৭-১১
নাত্যন্তং সরলৈর্ভাব্যং গৎবা পশ্য বনস্থলীম্ |
ছিদ্যন্তে সরলাস্তত্র কুব্জাস্তিষ্ঠন্তি পাদপাঃ || ০৭-১২
যত্রোদকং তত্র বসন্তি হংসা-
স্তথৈব শুষ্কং পরিবর্জয়ন্তি |
ন হংসতুল্যেন নরেণ ভাব্যং
পুনস্ত্যজন্তঃ পুনরাশ্রয়ন্তে || ০৭-১৩
উপার্জিতানাং বিত্তানাং ত্যাগ এব হি রক্ষণম্ |
তডাগোদরসংস্থানাং পরীবাহ ইবাম্ভসাম্ || ০৭-১৪
যস্যার্থাস্তস্য মিত্রাণি যস্যার্থাস্তস্য বান্ধবাঃ |
যস্যার্থাঃ স পুমাঁল্লোকে যস্যার্থাঃ স চ পণ্ডিতঃ || ০৭-১৫
স্বর্গস্থিতানামিহ জীবলোকে
চৎবারি চিহ্নানি বসন্তি দেহে |
দানপ্রসংগো মধুরা চ বাণী
দেবার্চনং ব্রাহ্মণতর্পণং চ || ০৭-১৬
অত্যন্তকোপঃ কটুকা চ বাণী
দরিদ্রতা চ স্বজনেষু বৈরম্ |
নীচপ্রসংগঃ কুলহীনসেবা
চিহ্নানি দেহে নরকস্থিতানাম্ || ০৭-১৭
গম্যতে যদি মৃগেন্দ্রমন্দিরং
লভ্যতে করিকপালমৌক্তিকম্ |
জম্বুকালয়গতে চ প্রাপ্যতে
বৎসপুচ্ছখরচর্মখণ্ডনম্ || ০৭-১৮
শুনঃ পুচ্ছমিব ব্যর্থং জীবিতং বিদ্যয়া বিনা |
ন গুহ্যগোপনে শক্তং ন চ দংশনিবারণে || ০৭-১৯
বাচাং শৌচং চ মনসঃ শৌচমিন্দ্রিয়নিগ্রহঃ |
সর্বভূতদয়াশৌচমেতচ্ছৌচং পরার্থিনাম্ || ০৭-২০
পুষ্পে গন্ধং তিলে তৈলং কাষ্ঠেঽগ্নিং পয়সি ঘৃতম্ |
ইক্ষৌ গুডং তথা দেহে পশ্যাত্মানং বিবেকতঃ || ০৭-২১
