চাণক্যনীতি – অধ্যায় ০২

অনৃতং সাহসং মায়া মূর্খৎবমতিলোভিতা |
অশৌচৎবং নির্দয়ৎবং স্ত্রীণাং দোষাঃ স্বভাবজাঃ || ০২-০১
ভোজ্যং ভোজনশক্তিশ্চ রতিশক্তির্বরাঙ্গনা |
বিভবো দানশক্তিশ্চ নাল্পস্য তপসঃ ফলম্ || ০২-০২
যস্য পুত্রো বশীভূতো ভার্যা ছন্দানুগামিনী |
বিভবে যশ্চ সন্তুষ্টস্তস্য স্বর্গ ইহৈব হি || ০২-০৩
তে পুত্রা যে পিতুর্ভক্তাঃ স পিতা যস্তু পোষকঃ |
তন্মিত্রং যত্র বিশ্বাসঃ সা ভার্যা যত্র নির্বৃতিঃ || ০২-০৪
পরোক্ষে কার্যহন্তারং প্রত্যক্ষে প্রিয়বাদিনম্ |
বর্জয়েত্তাদৃশং মিত্রং বিষকুম্ভং পয়োমুখম্ || ০২-০৫
ন বিশ্বসেৎকুমিত্রে চ মিত্রে চাপি ন বিশ্বসেৎ |
কদাচিৎকুপিতং মিত্রং সর্বং গুহ্যং প্রকাশয়েৎ || ০২-০৬
মনসা চিন্তিতং কার্যং বাচা নৈব প্রকাশয়েৎ |
মন্ত্রেণ রক্ষয়েদ্গূঢং কার্যে চাপি নিয়োজয়েৎ || ০২-০৭
কষ্টং চ খলু মূর্খৎবং কষ্টং চ খলু যৌবনম্ |
কষ্টাৎকষ্টতরং চৈব পরগেহনিবাসনম্ || ০২-০৮
শৈলে শৈলে চ মাণিক্যং মৌক্তিকং ন গজে গজে |
সাধবো ন হি সর্বত্র চন্দনং ন বনে বনে || ০২-০৯
পুত্রাশ্চ বিবিধৈঃ শীলৈর্নিয়োজ্যাঃ সততং বুধৈঃ |
নীতিজ্ঞাঃ শীলসম্পন্না ভবন্তি কুলপূজিতাঃ || ০২-১০
মাতা শত্রুঃ পিতা বৈরী যাভ্যাং বালা ন পাঠিতাঃ |
সভামধ্যে ন শোভন্তে হংসমধ্যে বকো যথা || ০২-১১
লালনাদ্বহবো দোষাস্তাডনে বহবো গুণাঃ |
তস্মাৎপুত্রং চ শিষ্যং চ তাডয়েন্ন তু লালয়েৎ || ০২-১২
শ্লোকেন বা তদর্ধেন তদর্ধার্ধাক্ষরেণ বা |
অবন্ধ্যং দিবসং কুর্যাদ্দানাধ্যয়নকর্মভিঃ || ০২-১৩
কান্তাবিয়োগঃ স্বজনাপমানং
ঋণস্য শেষং কুনৃপস্য সেবা |
দারিদ্র্যভাবাদ্বিমুখং চ মিত্রং
বিনাগ্নিনা পঞ্চ দহন্তি কায়ম্ || ০২-১৪
নদীতীরে চ যে বৃক্ষাঃ পরগেহেষু কামিনী |
মন্ত্রহীনাশ্চ রাজানঃ শীঘ্রং নশ্যন্ত্যসংশয়ম্ || ০২-১৫
বলং বিদ্যা চ বিপ্রাণাং রাজ্ঞাং সৈন্যং বলং তথা |
বলং বিত্তং চ বৈশ্যানাং শূদ্রাণাং পারিচর্যকম্ || ০২-১৬
নির্ধনং পুরুষং বেশ্যা প্রজা ভগ্নং নৃপং ত্যজেৎ |
খগা বীতফলং বৃক্ষং ভুক্ত্বা চাভ্যাগতো গৃহম্ || ০২-১৭
গৃহীৎবা দক্ষিণাং বিপ্রাস্ত্যজন্তি যজমানকম্ |
প্রাপ্তবিদ্যা গুরুং শিষ্যা দগ্ধারণ্যং মৃগাস্তথা || ০২-১৮
দুরাচারী দুরাদৃষ্টির্দুরাবাসী চ দুর্জনঃ |
যন্মৈত্রী ক্রিয়তে পুংভির্নরঃ শীঘ্রং বিনশ্যতি || ০২-১৯
সমানে শোভতে প্রীতিঃ রাজ্ঞি সেবা চ শোভতে |
বাণিজ্যং ব্যবহারেষু দিব্যা স্ত্রী শোভতে গৃহে || ০২-২০