যমক কাব্যং

.. যমক কাব্যং ( ঘটকর্পট) ..

ঘটকর্পর যমক কাব্যম্

নিচিতং খমুপেত্য নীরদাইঃ
প্রিযহীনাহৃদযাবনীরদৈঃ .
সলিলৈর্বিহতং রজঃ ক্ষিতৌ
রবিচন্দ্রাবপি নোপলক্ষিতৌ .. ১..
হংসা নদন্মেঘভযাদ্ দ্রবন্তি
নিশামুখান্যদ্য ন চন্দ্রবন্তি .
নবাম্বুমত্তাঃ শিখিনো নদন্তি
মেঘাগমে কুন্দসমানদন্তি .. ২..

মেঘাবৃতং নিশি ন ভাতি নভো বিতারং
নিদ্রাঽভ্যুপৈতি চ হরিং সুখসেবিতারম্ .
সেন্দ্রাযুধশ্চ জলদোঽদ্য রসন্নিভানাং
সংরম্ভমাবহতি ভূধরসন্নিভানাম্ .. ৩..
সতডিজ্জলদার্পিতং নগেষু
স্বনদম্ভোধরভীতপন্নগেষু .
পরিধীররবং জলং দরীষু
প্রপতত্যদ্ভুতরূপসুন্দরীষু .. ৪..

ক্ষিপ্রং প্রসাদযতি সংপ্রতি কোঽপি তানি
কান্তামুখানি রতিবিগ্রহকোপিতানি .
উত্কণ্ঠযন্তি পথিকাঞ্জলদাঃ স্বনন্তঃ
শোকঃ সমুদ্ভবতি তদ্বনিতাস্বনন্তঃ .. ৫..

ছাদিতে দিনকরস্য ভাবনে
খাজ্জলে পততি শোকভাবনে .
মন্মথে চ হৃদি হন্তুমুদ্যতে
প্রোষিতপ্রমদযেদমুদ্যতে .. ৬..

সর্বকালমতিলঙ্ঘ্য তোযদা
আগতাঃ স্থ দযিতো গতো যদা .
নির্ঘৃণেন পরদেশসেবনা
মারযিষ্যথ ন তেন মা বিনা .. ৭..

ব্রূত তং পথিকপাংশুলং ঘনা
যূযমেব পথিশীঘ্রলঙ্ঘনাঃ .
অন্যদেশরতিরদ্য মুচ্যতাং
সাঽথবা তব বধূ কিমুচ্যতম্ .. ৮..

হংসঃ পঙ্ক্তিরপি নাথ সংপ্রতি
প্রস্থিতা বিযতি মানসম্প্রতি .
চাতকোঽপি তৃষিতোম্বু যাচতে
দুঃখিতা পথিক সা প্রিযা চ তে .. ৯..

নীলশষ্পমতিভাতি কোমলং
বারি বিন্দতি চ চাতকোঽমলম্ .
অম্বুদৈঃ শিখিগণো বিনাদ্যতে
কা রতিঃ প্রিয মযা বিনাঽদ্যতে .. ১০..

মেঘশব্দমুদিতাঃ কলাপিনঃ
প্রোষিতাহৃদযশোকলাপিনঃ .
তোযদাগমকৃশা চ সাঽদ্যতে
দুর্ধরেণ মদনেন সাদ্যতে .. ১১..

কিং কৃপাপি তব নাস্তি কান্তযা
পাণ্ডুগণ্দপতিতালকান্তযা .
শোকসাগরজলেঽদ্য পাতিতাং
ত্বদ্গুণস্মরণমেব পাতি তাম্ .. ১২..

কুসুমিতকুটজেষু কাননেষু
প্রিযরহিতেষু সমুত্সুকাননেষু .
দ্রবতি চ কলুষে জলে নদীনাং
কিমিতি চ মাং সমবেক্ষসে ন দীনাম্ .. ১৩..

মার্গেষু মেঘসলিলেন বিনাশিতেষু
কামো ধনুঃ স্পৃশতি তেন বিনা শিতেষু .
গম্ভীরমেঘরসিতব্যথিতা কদাহং
জহ্যাং সখিপ্রিযবিযোগজশোকদাহম্ .. ১৪..

সুসুগন্ধিতযা বনেঽজিতানাং
স্বনদম্ভোধরবাতবীজিতানাম্ .
মদনস্য কৃতে নিকেতকানাং
প্রতিভান্তীহ বনানি কেতকানাম্ .. ১৫..

তত্সাধু যত্ত্বাং সুতরাং সসর্জ
প্রজাপতিঃ কামনিবাস সর্জ .
ত্বং মঞ্জরীভিঃ প্রবরো বনানাং
নেত্রাত্সবশ্চাসি সযৌবনানাম্ .. ১৬..

নবকদম্ব শিরোঽবনতাস্মি তে
বসতি তে মদনঃ কুসুমস্মিতে .
কুটজ কিং কুসুমৈরুপহস্যতে
প্রণিপতামি চ দুষ্প্রসহস্যতে .. ১৭..

তরুবর বিনতাস্মি তে সদাঽহং
হৃদযং মে প্রকরোষি কিং সদাহম্ .
তব কুসুম নিরীক্সণেঽপ্দেঽহং
বিসৃজেযং সহসৈব নীপ দেহম্ .. ১৮..

কুসুমৈরুপশোভিতাং সিতৈ-
র্ঘনমুক্তাম্বুলবপ্রহাসিতৈঃ .
মধুনঃ সমবেক্ষ্য কালতাং
ভ্রমরশ্চুম্বতি যূথিকালতাম্ .. ১৯..

তাসামৃতুঃ সফল এব হি যা দিনেষু
সেন্দ্রাযুধাম্বুধরগর্জিতদুর্দিনেষু .
রত্যুত্সবং প্রিযতমৈঃ সহ মানযন্তি
মেঘাগমে প্রিযসখীশ্চ সমানযন্তি .. ২০..

কোকিলভ্রমরকোককূজিতে
মন্মথেন সকলে জনে জিতে .
নির্গতোঽসি শঠ মাসি মাধবে
নোপযাসি শযিওঽপি মাধবে .. ২১..

এতন্নিশম্যবিরহানলপীডিতাযা-
স্তস্যা বচঃ খলু দযালুরপীডিতাযা .
স স্বারবেণ কথিতং জলধৈরমোঘৈঃ
প্রত্যাযযৌ সদনমূনদিনৈরমোঘৈঃ .. ২২..

ভাবানুরক্তবনিতাসুরতৈঃ শপেয-
মালম্ব্য চাম্বু তৃশিতঃ করকোশপেযম্ .
জোযেয যেন কবিনা যমকৈঃ পরেণ
তস্মৈ বহেযমুদকং ঘটকর্পরেণ .. ২৩..

.. সমাপ্তমিদং ঘটকর্পর যমক কাব্যম্ ..

<