নীতিশতকম্

.. ভর্তৃহরিকৃত নীতিশতকম্ ..
|| শ্রী ||

দিক্কালাদ্যনবচ্ছিন্নানন্তচিন্মাত্রমূর্তযে .
স্বানুভূত্যেকনামায নমঃ শান্তায তেজসে .. ১..

যাং চিন্তযামি সততং মযি সা বিরক্তা
সাপ্যন্যমিচ্ছতি জনং স জনোঽন্যসক্তঃ .
অস্মত্কৃতে চ পরিশুষ্যতি কাচিদন্যা
ধিক্ তাং চ তং চ মদনং চ ইমাং চ মাং চ .. ২..

অজ্ঞঃ সুখমারাধ্যঃ সুখতরমারাধ্যতে বিশেষজ্ঞঃ .
জ্ঞানলবদুর্বিগ্ধং ব্রহ্মাপি নরং ন রঞ্জযতি .. ৩..

প্রাযঃ কন্দুকপাতেনোত্পতত্যার্যঃ পতন্নপি .
তথা পতত্যনার্যস্তু মৃত্পিণ্ডপতনং তথা .. ৪..

লভেত সিকতাসু তৈলমপি যত্নতঃ পীড্যন্পিবেচ্চ
মৃগতৃষ্ণিকাসু সলিলং পিপাসার্দিতঃ .
কদাচিদপি পর্যটন্শশবিষাণমাসাদযেন্নতু
প্রতিনিবিষ্টমূর্খজনচিত্তমারাধযেত্ .. ৫..

ব্যালং বালমৃণালতন্তুভিরসৌ রোদ্ধুং সমুজ্জৃম্ভতে
ছেত্তুং বজ্রমণীং শিরীষকুসুমপ্রান্তেন সন্নহ্যতি .
মাধুর্যং মধুবিন্দুনা রচযিতুং ক্ষারাম্বুধেরীহতে
নেতুং বাঞ্ছতি যঃ খলান্পথি সতাং সূক্তৈর্সুধাস্যন্দিভিঃ .. ৬..

স্বাযত্তমেকান্তগুণং বিধাত্রা
বিনির্মিতং ছদনমজ্ঞাতাযাঃ .
বিশেষতঃ সর্ববিদাং সমাজে
বিভূষণং মৌনমপণ্ডিতানাম্ .. ৭..

যদা কিঞ্চিতজ্ঞোঽহং দ্বিপ ইব মদান্ধঃ সমভবম্
তদা সর্বজ্ঞোঽস্মীত্যভবদবলিপ্তং মম মনঃ .
যদা কিঞ্চিত্কিঞ্চিদ্বুধজনসকাশাদবগতম্
তদা মূর্খোঽস্মীতি জ্বর ইব মদোমে ব্যপগতঃ .. ৮..

কৃমিকুলচিতং লালাক্লিন্নং বিগন্ধি জুগুপ্সিতং
নিরুপমরসং প্রীত্যা খাদন্নরাস্থি নিরামিষম্ .
সুরপিতমপি শ্বা পার্শ্বস্থং বিলোক্য ন শঙ্কতে
ন হি গণযতি ক্ষুদ্রো জন্তুঃ পরিগ্রহফল্গুতাম্ .. ৯..

শিরঃ শার্বং স্বর্গাত্ পশুপতিশিরস্তঃ ক্ষিতিধরং
মহীধ্রাদুত্তুঙ্গাদবনিমবনেশ্চাপি জলধিম্ .
অধোঽধো গঙ্গেযং পদমুপগতা স্তোকমথবা
বিবেকভ্রষ্টানাং ভবতি বিনিপাতঃ শতমুখঃ .. ১০..

শক্যো বারযিতুং জলেন হুতভুক্ ছত্রেণ সূর্যাতপ্তো
নাগেন্দ্রো নিশিতাঙ্কুশেন সমদো দণ্ডেন গোগর্দভৌ .
ব্যাধির্ভেষজসঙ্গ্রহৈশ্চ বিবিধৈর্মন্ত্রপ্রযোগৈর্বিষং
সর্বস্যৌষধমস্তি শাস্ত্রবিহিতং মূর্খস্য নাস্ত্যৌষধম্ .. ১১..

সাহিত্যসঙ্গীতকলাবিহীনঃ, সাক্ষাত্পশুঃ পুচ্ছবিষাণহীনঃ .
তৃণং ন খাদন্নপি জীবমানঃ, তদ্ভাগধেযং পরমম্পশুনাম্ .. ১২..

যেষাং ন বিদ্যা ন তপো ন দানং
জ্ঞানং ন শীলং ন গুণঃ ন ধর্মঃ .
তে মর্ত্যলোকে ভুবি ভারভূতাঃ
মনুষ্যরূপেণ মৃগাঃ চরন্তি .. ১৩..

বরং পর্বতদুর্গেষু ভ্রান্তং বনচরৈঃ সহ .
ন মূর্খজনসম্পর্কঃ সুরেন্দ্রভবনেষ্বপি .. ১৪..

শাস্ত্রোপস্কৃতশব্দসুন্দরগিরঃ শিষ্যপ্রদেযগমা
বিখ্যাতাঃ কবযোঃ বসন্তি বিষযে যস্য প্রভোর্নির্ধনাঃ .
তজ্জাড্যং বসুধাধিপস্য কবযস্ত্বর্থং বিনাপীশ্বরাঃ
কুত্স্যাঃ স্যুঃ কুপরীক্ষকা কি মণযো যৈর্ঘতঃ পাতিতাঃ .. ১৫..

হর্তুর্যাতি ন গোচরং কিমপি শং পুষ্ণাতি যত্ সর্বদা-
ঽপ্যর্থিভ্যঃ প্রতিপাদ্যমানমনিশং প্রাপ্নোতি বৃদ্ধিং পরাম্ .
কল্পান্তেষ্বপি ন প্রযাতি নিধনং বিদ্যাখ্যমন্তর্ধনং
যেষাং তান্ প্রতি মানমুজ্ঝত নৃপাঃ কস্তৈঃ সহ স্পর্ধতে .. ১৬..

অধিগতপরমার্থান্ পণ্ডিতান্ মাবমংস্তা-
স্তৃণমিব লঘু লক্ষ্মীর্নৈব তান্ সংরুণদ্ধি .
অভিনবমদলেখাশ্যামগণ্ড্ অস্থলানাং
ন ভবতি বিসতন্তুর্নিবারণং বারণানাম্ .. ১৭..

অম্ভোজিনীবনবিহারবিলাসমেব
হংসস্য হন্তি নিতরাং কুপিতো বিধাতা .
ন ত্বস্য দুগ্ধজলভেদবিধৌ প্রসিদ্ধাং
বৈদগ্ধ্যকীর্তিমপহর্তুমসৌ সমর্থঃ .. ১৮..

কেযূরাণি ন ভূষযন্তি পুরুষং হারা ন চন্দ্রোজ্জ্বলা
ন স্নানং ন বিলেপনং ন কুসুমং নালঙ্কৃতা মূর্ধজাঃ .
বাণ্যেকা সমলঙ্করোতি পুরুষং যা সংস্কৃতা ধার্যতে
ক্ষীযন্তে খলু ভূষণানি সততং বাগ্ভূষণং ভূষণম্ .. ১৯..

বিদ্যা নাম নরস্য রূপং অধিকং প্রচ্ছন্নগুপ্তং ধনং
বিদ্যা ভোগকরী যশস্সুখকরী বিদ্যা গুরূণাং গুরুঃ .
বিদ্যা বন্ধুজনো বিদেশগমনে বিদ্যা পরা দেবতা
বিদ্যা রাজসু পূজিতা ন তু ধনং বিদ্যাবিহীনঃ পশুঃ .. ২০..

ক্ষান্তিশ্চেত্ কবচেন কিং কিমরিভিঃ ক্রোধোঽস্তি চেদ্ দেহিনাং
জ্ঞাতিশ্চেদনলেন কিং যদি সুহৃদ্ দিব্যৌষধৈঃ কিং ফলম্ .
কিং সর্পৈর্যদি দুর্জনাঃ কিমু ধনৈর্বিদ্যানবদ্যা যদি
ব্রিডা চেত্ কিমু ভূষণৈঃ সুকবিতা যদ্যস্তি রাজ্যেন কিম্ .. ২১..

দাক্ষিণ্যং স্বজনে দযা পরজনে শাঠ্যং সদা দুর্জনে
প্রীতিঃ সাধুজনে নযো নৃপজনে বিদ্বজ্জনে চার্জবম্ .
শৌর্যং শত্রুজনে ক্ষমা গুরুজনে কান্তাজনে ধৃষ্টতা
যে চৈব পুরুষাঃ কলাসু কুশলাস্তেষ্বেব লোকস্থিতিঃ .. ২২..

জাড্যং ধিযো হরতি সিঞ্চতি বাচি সত্যং
মানোন্নতিং দিশতি পাপমপাকরোতি .
চেতঃ প্রসাদযতি দিক্ষু তনোতি কীর্তিং
সত্সঙ্গতিঃ কথয কিং ন করোতি পুংসাম্ .. ২৩..

জযন্তি তে সুকৃতিনঃ রসসিদ্ধাঃ কবীশ্বরাঃ .
নাস্তি যেষাং যশঃকাযে জরামরণজং ভযম্ .. ২৪..

সূনুঃ সচ্চরিতঃ সতী প্রিযতমা স্বামী প্রসাদোন্মুখঃ
স্নিগ্ধং মিত্রমবঞ্চকঃ পরিজানো নিষ্ক্লেশলেশ মনঃ .
আকারো রুচিরঃ স্থিরশ্চ বিভবো বিদ্যাবদাতং মুখং
তুষ্টে বিষ্টপকষ্টহারিণি হরৌ সম্প্রাপ্যতে দেহিনা .. ২৫..

প্রাণাঘাতান্নিবৃত্তিঃ পরধনহরণে সংযমঃ সত্যবাক্যং
কালে শক্ত্যা প্রদানং যুবতিজনকথামূকভাবঃ পরেষাম্ .
তৃষ্ণাস্রোতোবিভঙ্গো গুরুষু চ বিনযঃ সর্বভূতানুকম্পা
সামান্যঃ সর্বশাস্ত্রেষ্বনুপহতবিধিঃ শ্রেযসামেষ পন্থাঃ .. ২৬..

প্রারভ্যতে ন খলু বিঘ্নভযেন নীচৈঃ
প্রারভ্য বিঘ্নবিহতা বিরমন্তি মধ্যাঃ ..
বিঘ্নৈঃ পুনঃ পুনরপি প্রতিহন্যমানাঃ
প্রারব্ধমুত্তমগুণা ন পরিত্যজন্তি .. ২৭..

অসন্তো নাভ্যর্থ্যাঃ সুহৃদপি ন যাচ্যঃ কৃশধনঃ
প্রিযা ন্যায্যা বৃত্তির্মলিনমসুভঙ্গেঽপ্যসুকরম্ .
বিপদ্যুচ্চৈঃ স্থেযং পদমনুবিধেযং চ মহতাং
সতাং কেনোদ্দিষ্টং বিষমমসিধারাব্রতমিদম্ .. ২৮..

ক্ষুত্ক্ষামোঽপি জরাকৃশোঽপি শিথিলপ্রাযোঽপি কষ্টাং
দশামাপন্নোপি বিপন্নদীধিতিরপি প্রাণেষু গচ্ছত্স্বপি .
মত্তেভেন্দ্রবিভিন্নকুম্ভকবলগ্রাসৈকবদ্ধস্পৃহঃ
কিং জীর্ণং তৃণমত্তি মানমহতামগ্রেসরঃ কেসরি .. ২৯..

স্বল্পস্নাযুবসাবশেষমলিনং নির্মাংসমপ্যস্থিকং
শ্বা লব্ধ্বা পরিতোষমেতি ন তু তত্তস্য ক্ষুধাশান্তযে .
সিংহো জম্বুকমঙ্কমাগতমপি ত্যক্ত্বা নিহন্তি দ্বিপং
সর্বঃ কৃচ্ছ্রগতোঽপি বঞ্ছতি জনঃ সত্বানুরুপং ফলম্ .. ৩০..

লান্ঙ্গুলচালনমধশ্চরণাবপাতং
ভূমৌ নিপত্য বদনোদরদর্শনং চ .
শ্বা পিণ্ডদস্য কুরুতে গজপুঙ্গবস্তু
ধীরং বিলোকযতি চাটুশতৈশ্চ ভুঙ্ক্তে .. ৩১..

পরিবর্তিনি সংসারে মৃতঃ কো ব ন জাযতে ..
স জাতঃ যেন জাতেন যাতি বংশঃ সমুন্নতিং . ৩২..

কুসুমস্তবকস্যেব দ্বযী বৃত্তির্মনস্বিনঃ .
মূর্ধ্নি বা সর্বলোকস্য বিশীর্যেত বনেঽথবা .. ৩৩..

সন্ত্যন্যেঽপি বৃহস্পতিপ্রভৃতযঃ সম্ভাবিতাঃ পঞ্চষাঃ
তান্ প্রত্যেষ বিশেষবিক্রমরুচী রাহুর্ন বৈরাযতে .
দ্বাবেব গ্রসতে দিবাকরনিশাপ্রাণেশ্বরৌ ভাস্বরৌ
ভ্রাতঃ পর্বণি পশ্য দানবপতিঃ শীর্ষাবশেষাকৃতিঃ .. ৩৪..

বহতি ভুবনশ্রেণিং শেষঃ ফণাফলস্থিতাং
কমঠপতিনা মধ্যে পৃষ্ঠং সদা চ ধার্ত্যতে .
তমপি কুরুতে ক্রোডাধীনং পযোধিরনাদরা-
দহহ মহতাং নিঃসীমানশ্চরিত্রবিভূতযঃ .. ৩৫..

বরং পক্ষচ্ছেদঃ সমদমঘবন্মুক্তকুলিশ
প্রহরৈরুদ্গচ্ছদ্বহুলদহনোদ্গারগুরুভিঃ .
তুষারাদ্রেঃ সূনোরহহ পিতরি ক্লেশবিবশে
ন চাসৌ সম্পাতঃ পযসি পযসাং পত্যুরুচিতঃ .. ৩৬..

যদচেতনোঽপি পাদৈঃ স্পৃষ্টঃ প্রজ্বলতি সবিতুরিনকান্তঃ .
তত্তেজস্বী পুরুষঃ পরঋতনিকৃতিং কথং সহতে .. ৩৭..

সিংহঃশিশুরপি নিপততি মদমলিনকপোলভিত্তিষু গজেষু .
প্রকৃতিরিযং সত্ববতাং ন খলু বযস্তেজসো হেতুঃ .. ৩৮..

জাতির্যাতু রসাতালং গুণগণৈস্তত্রাপ্যধো গম্যতাং
শীলং শৈলতটাত্ পতত্বভিজনঃ সন্দহ্যতাং বহ্নিনা .
শৌর্যে বৈরিণি বজ্রমাশু নিপতত্বর্থোঽস্তু নঃ কেবলং
যেনৈকেন বিনা গুণাস্তৃণলবপ্রাযাঃ সমস্তা ইমে .. ৩৯..

তানীন্দ্রিযাণ্যবিকলানি তদেব নাম
সা বুদ্ধিরপ্রতিহতা বচনং তদেব .
অর্থোষ্মণা বিরহিতঃ পুরুষঃ ক্ষণেন
সোঽপ্যন্য এব ভবতীতি বিচিত্রমেতত্ .. ৪০..

যস্যাস্তি বিত্তং স নরঃ কুলীনঃ
স পণ্ডিতঃ স শ্রুতবান্ গুণজ্ঞঃ .
স এব বক্তা স চ দর্শনীযঃ
সর্বে গুণাঃ কাঞ্চনমাশ্রযন্তি .. ৪১..

দৌর্মন্ত্র্যান্নৃপতির্বিনশ্যতি যতিঃ সঙ্গাত্ সুতো লালনাদ্
বিপ্রোঽনধ্যনাত্ কুলং কুতনযাচ্ছীলং খলোপাসনাত্ .
হ্রীর্মদ্যানবেক্ষণাদপি কৃষিঃ স্নেহঃ প্রাবাসাশ্র-
যান্মৈত্রী চাপ্রণযাত্ সমৃদ্ধিরনযাত্ ত্যাগপ্রমাদাদ্ধনম্ .. ৪২..

দানং ভোগো নাশস্তিস্রো গতযো ভবন্তি বিত্তস্য .
যো ন দদাতি ন ভূঙ্ক্তে তস্য তৃতীযা গতির্ভবতি .. ৪৩..

মণিঃ শণোল্লীঢঃ সমরবিজযী হেতিদলিতো
মদক্ষীবো নাগঃ শরদি সরিতঃ শ্যানপুলিনাঃ .
কলাশেষশ্চন্দ্রঃ সুরতমৃদিতা বালবনিতা
তনিম্না শোভন্তে গলিতবিভবাশ্চার্থিষু নরাঃ .. ৪৪..

পরিক্ষীণঃ কশ্চিত্ স্পৃহযতি যবানাং প্রসৃতযে
স পশ্চাত্ সম্পূর্ণঃ কলযতি ধরিত্রীং তৃণসমাম্ .
অতশ্চানৈকান্ত্যাদ্ গুরুলঘুতযাঽর্থেষু ধনিনা-
মবস্থা বস্তূনি প্রথযতি চ সঙ্কোচযতি চ .. ৪৫..

রাজন্ দুধুক্ষসি যদি ক্ষিতিধেনুম্ এতাং
তেনাদ্য বত্সমিব লোকমমুং পুষাণ .
তস্মিংশ্চ সম্যগনিশং পরিপোষ্যমাণে
নানাফলৈঃ ফলতি কল্পলতেব ভূমিঃ .. ৪৬..

সত্যানৃতা চ পরুষা প্রিযবাদিনী চ
হিংস্ত্রা দযালুরপি চার্থপরা বদান্যা .
নিত্যব্যযা প্রচুরনিত্যধনাগমা চ
বারাঙ্গনেব নৃপনীতিরনেকরুপা .. ৪৭..

আজ্ঞা কীর্তিঃ পালনং ব্রাহ্মণানাং দানং ভোগঃ মিত্রসংরক্ষণং চ .
যেষামেতে ষড্গুণা ন প্রবৃতাঃ কোঽর্থস্তেষং পার্থিবোপাশ্রযেণ .. ৪৮..

যদ্ধাত্রা নিজভালপট্টলিখিতং স্তোকং বা মহদ্বা ধনং
তত্ প্রাপ্নোতি মরুস্থলেঽপি নিতরাং মেরৌ ততো নাধিকম্ .
তদ্ধীরো ভব বিত্তবত্সু কৃপণাং বৃত্তিং বৃথা মা কৃথা
কূপে পশ্য পযোনিধাবপি ঘটো গৃহ্ণাতি তুল্যং জলম্ .. ৪৯..

ত্বমেব চাতকাধার ইতি কেষাং ন গোচরঃ .
কিমম্ভোদ বদাস্মাকং কার্পণ্যোক্তিং প্রতীক্ষসে .. ৫০..

রে রে চাতক সাবধানমনসা মিত্র ক্ষণং শ্রুযতাম্
অম্ভোদাঃ বহবো বসন্তি গগনে সর্বেপিনৈকাদৃশাঃ .
কেচিদ্বৃষ্টীভিরাদ্রযন্তি ধরণীং গর্জন্তি কেচিদ্বৃথা
যং যং পশ্যসি তস্য তস্য পুরতো মা ব্রুহি দীনং বচঃ .. ৫১..

অকরুণত্বমকারণবিগ্রহঃ পরধনে পরযোষিতি চ স্পৃহা .
সুজনবন্ধুজনেষ্বসহিষ্ণুতা প্রকৃতিসিদ্ধমিদং হি দুরাত্মনাম্ .. ৫২..

দুর্জনঃ পরিহর্তব্যো বিদ্যযালঙ্কৃতোঽপি সন্ .
মণিনা ভূষিতঃ সর্পঃ কিমসৌ ন ভযঙ্করঃ .. ৫৩..

লোভশ্চেদগুণেন কিং পিশুনতা যদ্যস্তি কিং পাতকৈঃ
সত্যং চেত্ তপসা চ কিং শুচি মনো যদ্যস্তি তীর্থেন কিম্ .
সৌজন্যং যদি কিং গুণৈঃ সুমহিমা যদ্যস্তি কিং মণ্ডনৈঃ
সদ্বিদ্যা যদি কিং ধনৈরপযশো যদ্যস্তি কিং মৃত্যুনা .. ৫৫..

শশী দিবসধূসরো গলিতযৌবনা কামিনী
সরো বিগতবারিজং মুখমনক্ষরং স্বাকৃতেঃ .
প্রভুর্ধনপরাযণঃ সততদুর্গতঃ সজ্জনো
নৃপাঙ্গণগতঃ খলো মনসি সপ্ত শল্যানি মে .. ৫৬..

ন কশ্চিচ্চণ্ডকোপানামাত্মীযো নাম ভূভুজাম্ .
হোতারমপি জুহ্বানং স্পৃষ্টো দহতি পাবকঃ .. ৫৭..

মৌনান্মূকঃ প্রবচনপটুর্বাতুলো জল্পকো বা
ধৃষ্টঃ পার্শ্বে বসতি চ সদা দূরতশ্চাপ্রগল্ভঃ .
ক্ষান্ত্যা ভীরুর্যদি ন সহতে প্রাযশো নাভিজাতঃ
সেবাধর্মঃ পরমগহনো যোগিনামপ্যগম্যঃ .. ৫৮..

উদ্ভাসিতাখিলখলস্য বিশ্রুঙ্খলস্য
প্রাগ্জাতবিস্তৃতনিজাধমকর্মবৃত্তেঃ .
দৈবাদবাপ্তবিভবস্য গুণদ্বিষোঽস্য
নীচস্য গোচরগতৈঃ সুখমাপ্যতে কৈঃ .. ৫৯..

আরম্ভগুর্বী ক্ষযিণী ক্রমেণ
লঘ্বী পুরা বৃদ্ধিমতী চ পশ্চাত্ .
দিনস্য পূর্বার্ধপরার্ধভিন্না
ছাযেব মৈত্রী খলসজ্জনানাম্ .. ৬০..

মৃগমীনসজ্জনানাং তৃণজলসন্তোষবিহিতবৃত্তিনাম্ .
লুব্ধকধীবরপিশুনা নিষ্কারণবৈরিণো জগতি .. ৬১..

বাঞ্ছা সজ্জনসঙ্গমে পরগুণে প্রীতির্গুরৌ নম্রতা
বিদ্যাযাং ব্যসনং স্বযোষিতি রতির্লোকাপবাদাদ্ভযম্ .
ভক্তিঃ শূলিনি শক্তিরাত্মদমনে সংসর্গমুক্তিঃ খলে
যেষ্বেতে নিবসন্তি নির্মলগুণাস্তেভ্যো নরেভ্যো নমঃ .. ৬২..

বিপদি ধৈর্যমথাভ্যুদযে ক্ষমা সদসী বাক্পটুতা যুধি বিক্রমঃ .
যশসি চাভিরুচির্ব্যসনং শ্রুতৌ প্রকৃতিসিদ্ধমিদং হি মহাত্মনাম্ .. ৬৩..

প্রদানং প্রচ্ছন্নং গৃহমুপগতে সম্ভ্রমবিধিঃ
প্রিযং কৃত্বা মৌনং সদসি কথনং চাপ্যুপকৃতে .
অনুত্সেকো লক্ষ্ম্যামনভিভবগন্ধাঃ পরকথাঃ
সতাং কেনোদ্দিষ্টং বিষমমসিধারাব্রতমিদম্ .. ৬৪..

করে শ্লাঘ্যস্ত্যাগঃ শিরসি গুরুপাদপ্রণযিতা
মুখে সত্যা বাণী বিজযি ভুজযোর্বীর্যমতুলম্ .
হৃদি স্বচ্ছা বৃত্তিঃ শ্রুতমধিগতং চ শ্রবণযোঃ
বিনাপ্যৈশ্বর্যেণ প্রকৃতিমহতাং মণ্ডনমিদম্ .. ৬৫..

সম্পত্সু মহতাং চিত্তং ভবত্যুত্পলকোমলম্ .
আপত্সু চ মহাশৈলশিলাসঙ্ঘাতকর্কশম্ .. ৬৬..

সন্তপ্তাযসি সংস্থিতস্য পযসো নামাপি ন জ্ঞাযতে
মুক্তাকারতযা তদেব নলিনীপত্রস্থিতং রাজতে .
স্বাত্যাং সাগরশুক্তিমধ্যপতিতং তন্মৌক্তিকং জাযতে
প্রাযেণাধমমধ্যমোত্তমগুণঃ সংসর্গতো জাযতে .. ৬৭..

প্রীণাতি যঃ সুচরিতঃ পিতরং স পুত্রো
যদ্ভর্তুরেব হিতমিচ্ছতি তত্ কলত্রম্ .
তন্মিত্রমাপদি সুখে চ সমক্রিযং যদ্
এতত্ ত্রযং জগতি পুণ্যকৃতো লভন্তে .. ৬৮..

একো দেবঃ কেশবো বা শিবো বা
হ্যেকং মিত্রং ভূপতির্বা যতির্বা .
একো বাসঃ পত্তনে বা বনে বা
হ্যেকা ভার্যা সুন্দরী বা দরী বা .. ৬৯..

নম্রত্বেনোন্নমন্তঃ পরগুণকথনৈঃ স্বান্ গুণান্ খ্যাপযন্তঃ
স্বার্থান্ সম্পাদযন্তো বিততপৃথুতরারম্ভযত্নাঃ পরার্থে .
ক্ষান্ত্যৈবাক্ষেপরুক্ষাক্ষরমুখরমুখান্ দুর্জনান্ দূষযন্তঃ
সন্তঃ সাশ্চর্যচর্যা জগতি বহুমতাঃ কস্য নাভ্যর্চনীযাঃ .. ৭০..

ভবন্তি নম্রাস্তরবঃ ফলোদ্গমৈঃ
নবাম্বুভির্দূরবিলম্বিনো ঘনাঃ .
অনুদ্ধতাঃ সত্পুরুষাঃ সমৃদ্ধিভিঃ
স্বভাব এবৈষ পরোপকারিণাম্ .. ৭১..

শ্রোত্রং শ্রুতেনৈব ন কুণ্ডলেন
দানেন পাণির্ন তু কঙ্কণেন .
বিভাতি কাযঃ করুণাপরাণাং
পরোপকারৈর্ন তু চন্দনেন .. ৭২..

পাপান্নিবারযতি যোজযতে হিতায
গুহ্যং নিগূহতি গুণান্ প্রকটীকরোতি .
আপদ্গতং চ ন জহাতি দদাতি কালে
সন্মিত্রলক্ষণমিদং নিগদন্তি সন্তঃ .. ৭৩..

পদ্মাকরং দিনকরো বিকচীকরোতি
চন্দ্রো বিকাসযতি কৈরবচক্রবালম্ .
নাভ্যর্থিতো জলধরোঽপি জলং দদাতি
সন্তঃ স্বযং পরহিতে বিহিতাভিযোগাঃ .. ৭৪..

এতে সত্পুরুষাঃ পরার্থঘটকাঃ স্বার্থং পরিত্যজ্য যে .
সামান্যাস্তু পরার্থমুদ্যমভৃতঃ স্বার্থাবিরোধেন যে ..
তেঽমী মানবরাক্ষসাঃ পরহিতং স্বার্থায বিঘ্নন্তি যে .
যে বিঘ্নন্তি নিরর্থকং পরহিতং তে কে ন জানীমহে .. ৭৫..

ক্ষীরেণাত্মগতোদকায হি গুণা দত্তাঃ পুরা তেঽখিলাঃ
ক্ষীরোত্তপমবেক্ষ্য তেন পযসা স্বাত্মা কৃশানৌ হুতঃ .
গন্তুং পাবকমুন্মনস্তদভবদ্ দৃষ্ট্বা তু মিত্রাপদং
যুক্তং তেন জলেন শাম্যতি সতাং মৈত্রী পুনস্ত্বীদৃশী .. ৭৬..

ইতঃ স্বপিতি কেশবঃ কুলমিতস্তদীযদ্বীষা
মিতশ্চ শরণার্থিনাং শিখরিণাং গণাঃ শেরতে .
ইতোঽপি বডবানলঃ সহ সমস্তসংবর্তকৈঃ
অহো বিততমূর্জিতং ভারসহং চ সিন্ধোর্বপুঃ .. ৭৭..

তৃষ্ণাং ছিন্ধি ভজ ক্ষমাং জহি মদং পাপে রতিং মা কৃথাঃ
সত্যং ব্রূহ্যনুযাহি সাধুপদবীং সেবস্ব বিদ্বজ্জনম্ .
মান্যান্ মানয বিদ্বিষোঽপ্যনুনয প্রখ্যাপয প্রশ্রযং
কীর্তিং পালয দুঃখিতে কুরু দযামেতত্ সতাং চেষ্টিতম্ .. ৭৮..

মনসি বচসি কাযে পুণ্যপীযুষপূর্ণাঃ
ত্রিভুবনমুপকারশ্রেণিভিঃ প্রীণযন্তঃ .
পরগুণপরমাণূন্ পর্বতীকৃত্য নিত্যং
নিজহৃদি বিকসন্তঃ সন্তি সন্তঃ কিযন্তঃ .. ৭৯..

কিং তেন হেমগিরিণা রজতাদ্রিণা বা
যত্রাশ্রিতাশ্চ তরবস্তরবত এব .
মন্যামহে মলযমেব যদাশ্রযেণ
কঙ্কোলনিম্বকুটজা অপি চন্দনাঃ স্যুঃ .. ৮০..

রত্নৈর্মহার্হৈস্তুতুষুর্ন দেবা
ন ভেজিরে ভীমবিষেণ ভীতিম্ .
সুধাং বিনা ন প্রযযুর্বিরামং
ন নিশ্চিতার্থাদ্ বিরমন্তি ধীরাঃ .. ৮১..

ক্বচিত্ পৃথ্বীশয্যঃ ক্বচিদপি চ পর্যঙ্কশযনঃ
ক্বচিচ্ছাকাহারঃ ক্বচিদপি চ শাল্যোদনরুচিঃ .
ক্বচিত্ কন্থাধারী ক্বচিদপি চ দিব্যাম্বরধরো
মনস্বী কার্যার্থী ন গণযতি দুঃখং ন চ সুখম্ .. ৮২..

ঐশ্বর্যস্য বিভূষণং সুজনতা শৌর্যস্য বাক্সংযমো
জ্ঞানস্যোপশমঃ শ্রুতস্য বিনযো বিত্তস্য পাত্রে ব্যযঃ .
অক্রোধস্তপসঃ ক্ষমা প্রভবীতুর্ধর্মস্য নির্ব্যাজতা
সর্বেষামপি সর্বকারণমিদং শীলং পরং ভূষণম্ .. ৮৩..

নিন্দন্তু নীতিনিপুণা যদি বা স্তুবন্তু
লক্ষ্মিঃ সমাবিশতু গচ্ছতু ব যথেষ্টম্ .
অদ্যৈব বা মরণমস্তু যুগান্তরে বা
ন্যায্যাত্পথঃ প্রবিচলন্তি পদং ন ধীরাঃ .. ৮৪..

পাতিতোঽপি করাঘাতৈরুত্পতত্যেব কন্দুকঃ .
প্রাযেণ সাধুবৃত্তনামস্থাযিন্যো বিপত্তযঃ .. ৮৫..

আলস্যং হি মনুষ্যাণাম্ শরীরস্থো মহান্রিপুঃ .
নাস্ত্যুদ্যমসমো বন্ধুঃ কুর্বাণো নাবসীদতি .. ৮৬..

ছিন্নোঽপি রোহতি তরুস্চন্দ্রঃ ক্ষীণোঽপি বর্ধতে লোকে .
ইতি বিমৃশন্তঃ সন্তঃ সন্তপ্যন্তে ন লোকেঽস্মিন্ .. ৮৭..

নেতা যস্য বৃহস্পতিঃ প্রহরণং বজ্রং সুরাঃ সৈনিকাঃ
স্বর্গো দুর্গমনুগ্রহঃ খলু হরেরৈরাবতো বারণঃ .
ইত্যৈশ্বর্যবলান্বিতোঽপি বলভিদ্ ভগ্নঃ পরৈঃ সঙ্গরে
তদ্ ব্যক্তং ননু দৈবমেব শরণং ধিগ্ ধিগ্ বৃথা পৌরুষম্ .. ৮৮..

ভগ্নাশস্য করণ্ডপিণ্ডিততনোর্ম্লানেন্দ্রিযস্য ক্ষুধা
কৃত্বাখুর্বিবরং স্বযং নিপতিতো নক্তং মুখে ভোগিনঃ .
তৃপ্তস্তত্পিশিতেন সত্বরমসৌ তেনৈব যাতঃ পথা
লোকাঃ পশ্যত দৈবমেব হি নৃণাং বৃদ্ধৌ ক্ষযে কারণম্ . ৮৯..

কার্যাযত্তং ফলং পুংসাং বুদ্ধিঃ কর্মানুসারিণী .
তথাপি সুধিযা ভাব্যং সুবিচার্যৈব কুর্বতা .. ৯০..

খল্বাটো দিবসেশ্বরস্য কিরণৈঃ সন্তাপিতো মস্তকে
বাঞ্ছন্দেশমনাতপং বিধিবশাত্তালস্য মূলং গতঃ .
তত্রোচ্চৈর্মহতা ফলেন পততা ভগ্নং সশব্দং শিরঃ
প্রাযো গচ্ছতি যত্র ভাগ্যরহিতস্তত্রাপদাং ভাজনম্ .. ৯১..

রবিনিশাকরযোর্গ্রহপীডনং গজভুজঙ্গমযোরপি বন্ধনং .
মতিমতাং চ বিলোক্য দরিদ্রতাং বিধিরহো বলবানিতি মে মতিঃ .. ৯২..

সৃজতি তাবদশেষগুণাকরং পুরুষরত্নমলঙ্করণং ভুবঃ .
তদপি তত্ক্ষণভঙ্গি করোতি চেদহহ কষ্টমপণ্ডিততা বিধেঃ .. ৯৩..

পত্রং নৈব যদা করীরবিটপে দোষো বসন্তস্য কিং
নোলূকোঽপ্যবলোকতে যদি দিবা সূর্যস্য কিং দূষণম্ .
ধারা নৈব পতন্তি চাতকমুখে মেঘস্য কিং দূষণং
যত্পূর্বং বিধিনা ললাটলিখিতং তন্মার্জিতুং কঃ ক্ষমঃ .. ৯৪..

নমস্যামো দেবান্ননু হতবিধেস্তেঽপি বশগা
বিধির্বন্দ্যঃ সোঽপি প্রতিনিযতকর্মৈকফলদঃ .
ফলং কর্মাযত্তং যদি কিমমরৈঃ কিঞ্চ বিধিনা
নমস্তত্কর্মভ্যো বিধিরপি ন যেভ্যঃ প্রভবতি .. ৯৫..

ব্রহ্মা যেন কুলালবন্নিযমিতো ব্রহ্মাণ্ড্ভাণ্ডোদরে
বিষ্ণুর্যেন দশাবতারগহনে ক্ষিপ্তো মহাসঙ্কটে .
রুদ্রো যেন কপালপাণিপুটকে ভীক্ষাটনং কারিতঃ
সূর্যো ভ্রাম্যতি নিত্যমেব গগনে তস্মৈ নমঃ কর্মণে .. ৯৬..

নৈবাকৃতিঃ ফলতি নৈব কুলং ন শীলং
বিদ্যাপি নৈব ন চ যত্নকৃতাপি সেবা .
ভাগ্যানি পূর্বতপসা খলু সঞ্চিতানি
কালে ফলন্তি পুরুষস্য যথৈব বৃক্ষাঃ .. ৯৭..

বনে রণে শত্রুজলাগ্নিমধ্যে
মহার্ণবে পর্বতমস্তকে বা .
সুপ্তং প্রমত্তং বিষমস্থিতং বা
রক্ষন্তি পুণ্যানি পুরা কৃতানি .. ৯৮

যা সাধূংশ্চ খলান্ করোতি বিদুষো মূর্খান্ হিতান্ দ্বেষিণঃ
প্রত্যক্ষং কুরুতে পরোক্ষমমৃতং হালাহলং তত্ক্ষণাত্ .
তমারাধয সত্ক্রিযাং ভগবতীং ভোক্তুং ফলং বাঞ্ছিতং
হে সাধো ব্যসনৈর্গুণেষু বিপুলেষ্বাস্থাং বৃথা মা কৃথাঃ .. ৯৯..

গুণবদগুণবদ্বা কুর্বতা কার্যজাতং
পরিণতিরবধার্যা যত্নতঃ পণ্ডিতেন .
অতিরভসকৃতানাং কর্মণামাবিপত্তেঃ
ভবতি হৃদযদাহী শল্যতুল্যো বিপাকঃ .. ১০০..

স্থাল্যাং বৈদূর্যময্যাং পচতি তিলকণাংশ্চান্দনৈরিন্ধনৌঘৈঃ
সৌবর্ণৈর্লাঙ্গলাগ্রৈর্বিলিখতি বসুধামর্কমূলস্য হেতোঃ .
কৃত্বা কর্পুরখণ্ডান্ বৃতিমিহ কুরুতে কোদ্রবাণাং সমন্তাত্
প্রাপ্যেমাং কর্মভূমিং ন চরতি মনুজো যস্তপো মন্দভাগ্যঃ .. ১০১..

মজ্জত্বম্ভসি যাতু মেরুশিখরং শত্রূন্ জযত্বাবহে
বাণিজ্যং কৃষিসেবনে চ সকলা বিদ্যাঃ কলাঃ শিক্ষতাম্ .
আকাশং বিপুলং প্রযাতু খগবত্ কৃত্বা প্রযত্নং পরং
নাভাব্যং ভবতীহ কর্মবশতো ভাব্যস্য নাশঃ কুতঃ .. ১০২..

ভীমং বনং ভবতি তস্য পুরং প্রধানং
সর্বো জনঃ স্বজনতামুপাযতি তস্য .
কৃত্স্না চ ভূর্ভবতি সন্নিধিরত্নপূর্ণা
যস্যাস্তি পূর্বসুকৃতং বিপুলং নরস্য .. ১০৩..

কো লাভো গুণিসঙ্গমঃ কিমসুখং প্রাজ্ঞেতরৈঃ সঙ্গতিঃ
কা হানিঃ সমযচ্যুতির্নিপুণতা কা ধর্মতত্বে রতিঃ .
কঃ শূরো বিজিতেন্দ্রিযঃ প্রিযতমা কানুব্রতা কিং ধনং
বিদ্যা কিং সুখমপ্রবাসগমনং রাজ্যং কিমাজ্ঞাফলম্ .. ১০৪..

অপ্রিযবচনদরিদ্রৈঃ প্রিযবচনাঢ্যৈঃ স্বদারপরিতুষ্টৈঃ .
পরপরিবাদনিবৃত্তৈঃ ক্বচিত্ক্বচিন্মণ্ডিতা বসুধা .. ১০৫..

কদর্থিতস্যাপি হি ধৈর্যবৃত্তের্ন শক্যতে ধৈর্যগুণঃ প্রমার্ষ্টুম্ .
অধোমুখস্যাপি কৃতস্য বন্হের্নাধঃ শিখা যাতি কদাচিদেব .. ১০৬..

কান্তাকটাক্ষবিশিখা ন লুনন্তি যস্য
চিত্তং ন নির্দহতি কোপকৃশানিতাপঃ .
কর্ষন্তি ভূরিবিষযাশ্চ ন লোভপাশৈঃ
লোকত্রযং জযতি কৃত্স্নমিদং স ধীরঃ .. ১০৭..

একেনাপি হি শুরেণ পাদাক্রান্তং মহীতলম্ .
ক্রিযতে ভাস্করেণেব স্ফারস্ফুরিততেজসা .. ১০৮..

বহ্নিস্তস্য জলাযতে জলনিধিঃ কুল্যাযতে তত্ক্ষণাত্
মেরুঃ স্বল্পশিলাযতে মৃগপতিঃ সদ্যঃ কুরঙ্গাযতে .
ব্যালো মাল্যগুণাযতে বিষরসঃ পীযূষবর্ষাযতে
যস্যাঙ্গেঽখিললোকবল্লভতমং শীলং সমুন্মীলতি .. ১০৯..

লজ্জাগুণৌঘজননীং জননীমিব স্বাং
অত্যন্তশুদ্ধহৃদযামনুবর্তমানাম্ .
তেজস্বিনঃ সুখমসূনপি সন্ত্যজন্তি
সত্যব্রতব্যসনিনো ন পুনঃ প্রতিজ্ঞাম্ .. ১১০..

.. ইতি নীতিশতকং সংপূর্ণম্..

<