.. নাট্যশাস্ত্রম্ অধ্যায ৯ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ ষষ্ঠোঽধ্যাযঃ .
অথ নবমোঽধ্যাযঃ .
এবমেতচ্ছিরোনেত্রভ্রুনাসোষ্ঠকপোলজম্ .
কর্ম লক্ষণসংযক্তমুপাঙ্গানা.ম্ মযোদিতম্ .. ১..
হস্তোরপার্শ্বজঠরকটীজঙ্ঘোরুপাদতঃ .
লক্ষণ.ম্ সম্প্রবক্ষ্যামি বিনিযোগং চ তত্ত্বতঃ .. ২..
হস্তাদীনাং প্রবক্ষ্যামি কর্ম নাট্যপ্রযোজকম্
যথা যেনাভিনেযং চ তন্মে নিগদতঃ শৃণু .. ৩..
পতাকস্ত্রিপতাকশ্চ তথা বৈ কর্তরীমুখঃ .
অর্ধচন্দ্রো হ্যরালশ্চ শুকতুণ্ডস্তথৈব চ .. ৪..
মুষ্টিশ্চ শিখরাখ্যশ্চ কপিত্থঃ খটকামুখঃ .
সূচ্যাস্যঃ পদ্মকোশশ্চ তথা বৈ সর্পশীর্ষকঃ .. ৫..
মৃগশীর্ষঃ পরো জ্ঞেযো হস্তাভিনযযোক্তৃভিঃ .
কাঙ্গুলকোঽলপদ্মশ্চ চতুরো ভ্রমরস্তথ .. ৬..
হংসাস্যো হংসপক্ষশ্চ সন্দংশো মুকুলস্তথা .
ঊর্ণনাভস্তাম্রচূডচতুর্বিংশতিরীরিতাঃ .. ৭..
অসংযুতাঃ সংযুতাশ্চ গদতো মে নিবোধত .
অঞ্জলিশ্চ কপোতশ্চ কর্কটঃ স্বস্তিকস্তথা .. ৮..
খটকাবর্ধমানশ্চ হ্যুত্সংগো নিষধস্তথা .
দোলঃ পুষ্পপুটশ্চৈব তথা মকর এব চ .. ৯..
গজদন্তোঽবহিত্থশ্চ বর্ধমানস্তথৈব চ .
এতে তু সংযুতা হস্তা মযা প্রোক্তাস্ত্রযোদশ .. ১০..
নৃত্তহস্তানতশ্চোর্ধ্ব গদতো মে নিবোধত .
চতুরস্রৌ তথোদ্বৃত্তৌ তথা তলমুখৌ স্মৃতৌ .. ১১..
স্বস্তিকৌ বিপ্রকীর্ণৌ চাপ্যরালখটকামুখৌ .
আবিদ্ধবক্রৌ সূচ্যাস্যৌ রেচিতাবর্ধরেচিতৌ .. ১২..
উত্তানাবঞ্চিতৌ বাপি পল্লবৌ চ তথা করৌ .
নিতম্বৌ চাপি বিজ্ঞেযৌ কেশবন্ধৌ তথৈব চ .. ১৩..
সম্প্রোক্তৌ করিহস্তৌ চ লতাখ্যৌ চ তথৈব চ .
পক্ষবঞ্চিতকৌ চৈব পক্ষপ্রদ্যোতকৌ তথা .. ১৪..
জ্ঞেযো গরুডপক্ষৌ চ হংসপক্ষৌ তথৈব চ .
ঊর্ধ্বমণ্ডলিনৌ চৈব পার্শ্বমণ্ডলিনৌ তথা .. ১৫..
উরোমণ্ডলিনৌ চৈব উরঃপার্শ্বার্ধমণ্ডলৌ .
মুষ্টিকস্বস্তিকৌ চাপি নলিনীপদ্মকোশকৌ .. ১৬..
অলপদ্মাবুল্বনৌ চ ললিতৌ বলিতৌ তথা .
সপ্তষষ্টিকরা হ্যেতে নামতোঽভিহিতা মযা .. ১৭..
যথা লক্ষণমেতেষাং কর্মাণি চ নিবোধত .
প্রসারিতাঃ সমাঃ সর্বা যস্যাঙ্গুল্যো ভবন্তি হি .
কুঞ্চিতশ্চ তথাঙ্গুষ্ঠঃ স পতাক ইতি স্মৃতঃ .. ১৮..
এষ প্রহারপাতে প্রতাপন নোদনে প্রহর্ষে চ .
গর্বেঽপ্যহমিতি তজ্জ্ঞৈললাটদেশোত্থিতঃ কার্যঃ .. ১৯..
এষোঽগ্নিবর্ষধারানিরূপণে পুষ্পবৃষ্টিপতনে চ .
সংযুতকরণঃ কার্যঃ প্রবিরলচলিতাঙ্গুলির্হস্তঃ .. ২০..
স্বস্তিকবিচ্যুতিকরণাত্ পল্লবপুষ্পোপহারশষ্পাণি .
বিরচিতমুর্বীসংস্থং যদ্ দ্রব্য তচ্চ নির্দ্দেশ্যম্ .. ২১..
স্বস্তিকবিচ্যুতিকরণাত্ পুনরেবাধোমুখেন কর্তব্যম্ .
সংবৃতবিবৃতং পাল্যং ছন্নং নিবিডং চ গোপ্যং চ .. ২২..
অস্যৈব চাঙ্গুলীভিরধোমুখপ্রস্থিতোত্থিতচলাভিঃ .
বাযূর্মিবেগবেলাক্ষোভশ্চৌঘশ্চ কর্তব্যঃ .. ২৩..
উত্সাহনং বহু তথা মহাজনপ্রাংশুপুষ্করপ্রহতম্ .
পক্ষোত্ক্ষেপাভিনযং রেচককরণেন চাভিনযেত্ .. ২৪..
পরিঘৃষ্টতলস্থেন তু ধৌতং মৃদিতং প্রমৃষ্টপিষ্টে চ .
পুনরেব শৈলধারণমুদ্ঘাটনমেব চাভিনযেত্ .. ২৫..
এবমেষ প্রযোক্তব্যঃ স্ত্রীপুংসাভিনযে করঃ .
পতাকাভ্যাং তু হস্তাভ্যামভিনেযঃ প্রযোক্তৃভিঃ .. ২৬..
দশাখ্যশ্চ শতাখ্যশ্চ সহস্রাখ্যস্তথৈব চ .
অতঃ পরং প্রবক্ষ্যামি ত্রিপতাকস্য লক্ষণম্ .. ২৭..
পতাকে তু যদা বক্রাঽনামিকা ত্বঙ্গুলির্ভবেত্ .
ত্রিপতাকঃ স বিজ্ঞেযঃ কর্ম চাস্য নিবোধত .. ২৮..
আবাহনমবতরণং বিসর্জনং বারণং প্রবেশশ্চ .
উন্নামনং প্রণামো নিদর্শনং বিবিধবচনং চ .. ২৯..
মঙ্গল্যদ্রব্যাণাং স্পর্শঃ শিরসোঽথ সন্নিবেশশ্চ .
উষ্ণীষমুকুটধারণং নাসাস্যশ্রোত্রসংবরণম্ .. ৩০..
অস্যৈব চাঙ্গুলীভ্যামধোমুখপ্রস্থিতোত্থিতচলাভ্যাম্ .
লঘুপবনস্রোতোভুজগভ্রমরাদিকান্ কুর্যাত্ .. ৩১..
অশ্রুপ্রমার্জনে তিলকবিরচনং রোচনযালম্ভকং চ
ত্রিপতাকানামিকযা স্পর্শনমলকস্য কার্যঞ্চ .. ৩২..
স্বস্তিকৌ ত্রিপতাকৌ তু গুরূণাং পাদবন্দনে .
বিচ্যুতৌ চলিতাবস্থৌ কার্যাবুদ্বাহদর্শনে .. ৩৩..
পরস্পরাগ্রসংশ্লিষ্টৌ কর্তব্যৌ নৃপদর্শনে .
তির্যক্ স্বস্তিকস্ম্বদ্ধৌ স্যাতাং তৌ গ্রহদর্শনে .. ৩৪..
তপস্বিদর্শনে কার্যাবূর্ধ্বৌ চাপি পরাঙ্মুখৌ .
পরস্পরাভিমুখৌ চ কর্তব্যৌ বরদর্শনে .. ৩৫..
উত্তানাধোমুখৌ কার্যাবগ্রে বক্ত্রস্য সংস্থিতৌ .
বডবানলসঙ্গ্রামমকরাণাং চ দর্শনে .. ৩৬..
অভিনযাস্ত্বনেনৈঅব বানরপ্লবনোর্মযঃ .
পবনশ্চ স্ত্রিযশ্চৈব নাট্যে নাট্যবিচক্ষণৈঃ .. ৩৭..
সংমুখপ্রসৃতাঙ্গুষ্ঠঃ কার্যো বালেন্দুদর্শনে .
পরাঙ্গ্মুখস্তু কর্তব্যো যানে নৃণাং প্রযোক্তৃভিঃ .. ৩৮..
ত্রিপতাকে যদা হস্তে ভবেত্ পৃষ্ঠাবলোকনী
তর্জনী মধ্যমাযাশ্চ তদাসৌ কর্তরীমুখঃ .. ৩৯..
পথি চরণরচনরঞ্জনরঙ্গণকরণান্যধোমুখেনৈব .
ঊর্ধ্বমুখেন তু কুর্যাত্ দষ্টং শৃঙ্গং চ লেখ্যং চ .. ৪০..
পতনমরণব্যতিক্রমপরিবৃত্তবিতর্কিত তথ ন্যস্তম্ .
ভিন্নবলিতেন কুর্যাত্ কর্তর্যাস্যাঙ্গুলিমুখেন .. ৪১..
সংযুতকরণো ব স্যাদসংযুতো বা প্রযুজ্যতে তজ্জ্ঞৈঃ .
রুরুচমরমহিষসুরগজবৃষগোপুরশৈলশিখরেষু .. ৪২..
যস্যাঙ্গুল্যস্তু বিনতাঃ সহাঙ্গুষ্ঠেন চাপবত্ .
সোঽর্ধচন্দ্রো হি বিজ্ঞেযঃ করঃ কর্মাস্য বক্ষ্যতে .. ৪৩..
এতেন বালতরবঃ শশিলেখাম্বুকলশবলযানি .
নির্ঘাটনমাযস্তং মধ্যৌপম্যং চ পীনং চ .. ৪৪..
রশনাজঘনকটীনামাননতলপত্রকুণ্ডলাদীনাম্ .
কর্তব্যো নারীণামভিনযযোগোঽর্ধচন্দ্রেণ .. ৪৫..
আদ্যা ধনুর্নতা কার্যা কুঞ্চিতাঙ্গুষ্ঠকস্তথা .
শেষা ভিন্নোর্ধ্ববলিতা হ্যরালেঽঙ্গুলযঃ করে .. ৪৬..
এতেন সত্ত্বশৌণ্ডীর্যবীর্যধৃতিকান্তিদিব্যগাম্ভীয্রম্ .
আশীর্বাদাশ্চ তথা ভাবা হিতসংজ্ঞকাঃ কার্যাঃ .. ৪৭..
এতেন পুনঃ স্ত্রীণাং কেশানাং সংগ্রহোত্কর্ষৌ .
সর্বাঙ্গিকং তথৈব চ নির্বর্ণনমাত্মনঃ কার্যম্ .. ৪৮..
কৌতুকবিবাহযোগং প্রদক্ষিণেনৈব সংপ্রযোগং চ .
অঙ্গুল্যগ্রস্বস্তিকযোগান্ পরিমণ্ডলেনৈব .. ৪৯..
প্রাদ্ক্ষিণ্য< পরিমণ্ডলং চ কুর্যান্ মহাজনং চৈব .
যচ্চ মহীতলরচিতং দ্রব্যং তচ্চাভিনেযং স্যাত্ .. ৫০..
আহ্বানে চ নিবারণনির্মাণে চাপ্যনেকবচনে চ .
স্বেদস্যা চাপনযনে গন্ধাঘ্রাণে শুভঃ শুভে চৈষ .. ৫১..
ত্রিপতাকহস্তজানি তু পূর্বং যান্যভিহিতানি কর্মাণি .
তানি ত্বরালযোগাত্ স্ত্রীভিঃ সম্যক্ প্রযোজ্যানি .. ৫২..
অরালস্য যদা বক্রাঽনামিকাত্বঙ্গুলির্ভবেত্ .
শুকতুণ্ডস্তু স করঃ কর্ম চাস্য নিবোধত .. ৫৩..
এতেন ত্বভিনেযং নাহং ন ত্বং ন কৃত্যমিতি চার্যে .
আবাহনে বিসর্গে ধিগিতি বচনে চ সাবজ্ঞম্ .. ৫৪..
অঙ্গুল্যো যস্য হস্তস্য তলমধ্যেগ্রসংস্থিতাঃ .
তাসামুপরি চাঙ্গুষ্ঠঃ সঃ মুষ্টিরিতি সংজ্ঞিতঃ .. ৫৫…
এষ প্রহারে ব্যাযামে নির্গমে পীডনে তথা .
সংবাহনেঽসিযষ্টীনাং কুন্তদণ্ডগ্রহে তথা .. ৫৬..
অস্যৈব তু যদা মুষ্টেরূর্ধ্বোঙ্গুষ্ঠঃ প্রযুজ্যতে .
হস্তঃ স শিখরো নাম তদা জ্ঞেযঃ প্রযোক্তৃভিঃ .. ৫৭..
রশ্মিকুশাঙ্কুশধনুষাং তোমরশক্তিপ্রমোক্ষণে চৈব .
অধরোষ্ঠপাদরঞ্জনমলকস্যোত্ক্ষেপণং চৈব .. ৫৮..
অস্যৈব শিখরাখ্যস্য হ্যঙ্গুষ্ঠকনিপীডিতা .
যদা প্রদেশিনী বক্রা স কপিত্থস্তদা স্মৃতঃ .. ৫৯..
অসিচাপচক্রতোমরকুন্তগদাশক্তিবজ্রবাণানি .
শস্ত্রাণ্যভিনেযানি তু কার্যং সত্যং চ পথ্যং চ .. ৬০..
উত্ক্ষিপ্তবক্রা তু যদানামিকা সকনীযসী .
অস্যৈব তু কপিত্থস্য তদাসো খটকামুখঃ .. ৬১..
হোত্রং হব্যং ছত্রং প্রগ্রহপরিকর্ষণং ব্যজনকঞ্চ .
আদর্শধারণং খণ্ডনং তথা পেষণং চৈব .. ৬২..
আযতদণ্ডগ্রহণং মুক্তাপ্রালম্বসংগ্রহং চৈব .
স্রগ্দামপুষ্পমালা বস্ত্রান্তালম্বনং চৈব .. ৬৩..
মন্মথশরাবকর্ষ্ণপুষ্পবচযপ্রতোদকার্যাণি .
অঙ্কুশরজ্বাকর্ষণস্ত্রীদর্শনমেব কার্যং চ .. ৬৪..
খটকাখ্যে যদা হস্তে তর্জনী সম্প্রসারিতা .
হস্তঃ সূচীমুখো নাম তদা জ্ঞেযঃ প্রযোক্তৃভিঃ .. ৬৫..
অস্য বিবিধান্ যোগান্ বক্ষ্যামি সমাসতঃ প্রদেশিন্যাঃ ..
ঊর্ধ্বনতলোলকম্পিতবিজৃংভিতোদ্বাহিতচলাযাঃ .. ৬৬..
চক্রং তডিত্পতাকামঞ্জর্যঃ কর্ণচূলিকাশ্চৈব .
কুটিলগতযশ্চ সর্বে নির্দেশ্যাঃ সাধুবাদাশ্চ .. ৬৭..
বালোরগবল্যবধূপদীপবল্লীলতাশিখণ্ডাশ্চ .
পরিপতনবক্রমণ্ডলমভিনেযান্যূর্ধ্বলোলিতযা .. ৬৮..
বদনাম্যাসে কুঞ্চিতবিজৃম্ভিতা বাক্যরূপণে কার্যা .
ভূযশ্চোর্ধ্ববিরচিতা তারাঘোণৈকদণ্ডযষ্টিষু চ .
বিনতাঃ চ পুনঃ কার্যা দংষ্ট্রিষু চ তথাস্যযোগেন .. ৬৯..
পুনরপি মণ্ডলগতযা সর্বগ্রহণং তথৈব লোকস্য .
প্রণতোন্তেএ চ কার্যে হ্যাদ্যে দীর্ঘে চ দিবসে চ .. ৭০..
[শ্রবণাভ্যাসে বক্রা বিজৃম্ভণা বাক্যরূপণাবসরে ..]
মেতি বদেতি চ যোজ্যা প্রসারিতোত্কম্পিতোত্তানা .. ৭১..
কার্যা প্রকম্পিত রোবদর্শন স্বেদরূপণে চৈব .
কুন্তলকুণ্ডলাঙ্গদগণ্ডাশ্রযেঽভিনয .. ৭২..
গর্বেঽহমিতি ললাটে রিপুদর্শনে তথৈব চ ক্রোধে .
কোঽসাবিতি নির্দেশেঽথ কর্ণকণ্ডুনযনে চৈব .. ৭৩..
সংযুক্তা সংযোগে কার্যা বিশ্লেষিতা বিযোগে চ .
কলহে স্বস্তিকযুপতাং পরস্পরোত্পীডিতা বন্ধে .. ৭৪..
দ্বাভ্যাং তু বাত্মপার্শ্বে দক্ষিণতো নিননিশাবসানানি .
অভিমুখপরাঙ্মুখাভ্যাং বিশ্লিষ্টাভ্যাং প্রযুঞ্জীত .. ৭৫..
পুনরপি চ ভ্রমিতাগ্ররূপা শিলাবর্তযন্ত্রশৈলেষু .
পরিবেষণে তথৈব হি কার্যা চাধোমুখী নিত্যম্ .. ৭৬..
শ্লিষ্টা ললাটপট্টেষ্বধোমুখী শম্ভুরূপণে কর্যা .
শকস্যাপ্যুত্তানা তজ্জ্ঞৈস্তির্যক্স্থিতা কার্যা .. ৭৭..
দ্বাভ্যাং সন্দর্শযেন্নিত্যং সম্পূর্ণ চন্দ্রমণ্ডলম্ .
শ্লিষ্টা ললাটে শক্রস্য কার্যা হ্যুত্তানসংশ্রযা .. ৭৮..
পরিমণ্ডলং ভ্রমিততযা মণ্ডলমাদর্শযেচ্চ চন্দ্রস্য .
হরনযনে চ ললাটে শক্রস্যঽপ্যুগুত্তানা .. ৭৯..
যস্যাঙ্গুল্যস্তু বিততাঃ সহাঙ্গুষ্ঠেন কুঞ্চিতাঃ .
ঊর্ধ্বা হ্যসংগতাগ্রাশ্চ স ভবেত্ পদ্মকোশকঃ .. ৮০..
বিল্বকপিত্থফলানাং গ্রহণে কুচদর্শনশ্চ নারীণাম্ .
গ্রহণে হ্যামিষলাভে ভবন্তি তাঃ কুঞ্চিতাগ্রাস্তু .. ৮১..
বহুজাতিবীজপূরকমামিষখণ্ডং চ নির্দেশ্যম্ .
দেবার্চনবলিহরণে সমুদ্গকে সাগ্রপিণ্ডদানে চ .
কার্যঃ পুষ্পপ্রকরশ্চ পদ্মকোশেন হস্তেন .. ৮২..
মণিবন্ধনবিশ্লিষ্টাভ্যাং প্রবিরলচলিতাঙ্গুলিকরাভ্যাম্ .
কার্যো বিবর্তিতাভ্যাং বিকসিতকমলোত্পলাবিনযঃ .. ৮৩..
অঙ্গুল্যঃ সংহতাঃ সর্বাঃ সহাঙ্গুষ্ঠেন যস্য চ .
তথা নিম্নতলশ্চৈব স তু সর্পশিরাঃ করঃ .. ৮৪..
এষঃ সলিলপ্রদানে ভুজগতৌ তোযসেচনে চৈব .
আস্ফোটনে চ যোজ্যঃ করিকুম্ভাস্ফালনাদ্যেষু .. ৮৫..
অধোমুখীনাং সর্বাসামঙ্গুলীনাং সমাগমঃ .
কনিষ্ঠাঙ্গুষ্ঠকাবূর্ধ্বো স ভবেত্ মৃগশীর্ষকঃ .. ৮৬..
ইহ সাম্প্রতমস্ত্যদ্য শক্তেশ্চোল্লাসনেঽক্ষপাতে চ .
স্বেদাপমার্জনেষু চ কুট্টমিতে প্রচলিতস্তু ভবেত্ .. ৮৭..
ত্রেতাগ্নিসংস্থিতা মধ্যা তর্জন্যাঙ্গুষ্ঠকা যদা .
কাঙ্গুলোঽনামিকা বক্রা যদাশ্চোর্ধ্বা কনীযসী .. ৮৮..
এতেন তরুণফলানি নানাবিধানি চ লঘূনি .
কার্যানি রোষজানি স্ত্রীবচান্যঙ্গুলিক্ষেপৈঃ .. ৮৯..
মরকতবৈদূর্যাদেঃ প্রদর্শনং সুমনসাং চ কর্তব্যম্ .
গ্রাহ্যং মরালপদমিতি তজ্জ্ঞৈরেব প্রযোগেষু .. ৯০..
আবর্তিতাঃ করতলে যস্যাঙ্গুল্যো ভবন্তি হি .
পার্শ্বাগতবিকীর্ণাশ্চ স ভবেদলপল্লবঃ .. ৯১..
প্রতিষেধকৃতে যোজ্যঃ কস্য ত্বন্নাস্তি শূন্যবচনেষু .
পুনরাত্মোপন্যাসঃ স্ত্রীণামেতেন কর্তব্যঃ .. ৯২..
তিস্রঃ প্রসারিতা যত্র তথা চোর্ধ্বা কনীযসী .
তাসাং মধ্যে স্থিতোঙ্গুষ্ঠঃ স করশ্চতুরস্মৃতঃ .. ৯৩..
নযবিনযনিযমসুনিতুণবালাতুরসত্যকৈতবার্থেষু .
বাক্যে যুক্তে পথ্যে সত্যে প্রশমে চ বিনিযোজ্যঃ .. ৯৪..
একেন দ্বাভ্যাং বা কিঞ্চিন্মণ্ডলকৃতেন হস্তেন .
বিকৃতবিচারিতচরিতং বিতর্কিতং লজ্জিতং চৈব .. ৯৫..
নযনৌপম্যং পদ্মদলরূপণং হরিণকর্ণনির্দেশঃ .
সংযুতকরণেনৈব তু চরেণৈতানি কুর্বীত .. ৯৬..
লীলা রতী রুচি চ স্মৃতিবুদ্ধিবিভাবনাঃ ক্ষমাং পুষ্টিং চ .
সঞ্জ্ঞামাত্রং প্রণযং বিচারণং সঙ্গতং শৌচম্ .. ৯৭..
চাতুর্যং মাধুর্যং দাক্ষিণ্যং মার্দবং সুখং শীলম্ .
প্রশ্নং বার্তাযুক্তিং বেষং মৃদুশাদ্বলং স্তোকম্ .. ৯৮..
বিভবাবিভৌ সুরতং গুণাগুণৌ যৌবনং গৃহান্ দারান্ .
নানাবর্ণাশ্চ তথা চতুরেণৈবং প্রযুঞ্জীত .. ৯৯..
সিতমূর্ধ্বেন তু কুর্যাত্ রক্তং পীতং চ মণ্ডলকৃতেন .
পরিমুদিতেন তু নীলং বর্ণাশ্চতুরেণ হস্তেন .. ১০০..
