.. প্রমাণলক্ষণ ( মাধব) ..
.. প্রমাণলক্ষণম্ ..
.. শ্রী গুরুভ্যো নমঃ হরিঃ ॐ ..
অশেষগুরুমীশেশং নারাযণমনামযম্ .
সংপ্রণম্য প্রবক্ষ্যামি প্রমাণানাং স্বলক্ষণম্ .. ..
যথার্থং প্রমাণম্ . .
তদ্দ্বিবিধম্ . কেবলমনুপ্রমাণং চ . .
যথার্থজ্ঞানং কেবলম্ . .
তত্সাধনমনুপ্রমাণম্ . .
কেবলং চতুর্বিধম্ . ঈশলক্ষ্মীযোগ্যোগিভেদেন . .
পূর্বদ্বযমনাদিনিত্যম্ . .
স্বাতংত্রপারতংত্রাভ্যাং তদ্বিশেষঃ . পূর্বং
স্বপরগতাখিলবিশেষ বিষযম্ . দ্বিতীযং
ঈশেঽন্যেভ্যোঽধিকম্ . .
অসার্বত্রিকম্ . অন্যত্র সর্ববিষযম্ . স্পষ্টত্বে ভেদঃ . .
যোগিজ্ঞানং ঋজূনামনাদিনিত্যম্ . ঈশে জীবেভ্যোঽধিকম্ .
অন্যত্রালোচনে সর্ববিশযম্ . ক্রমেণ বর্ধমানম্ .
আমুক্তেঃ . ততোঽব্যযম্ . .
ততোঽর্বাক্ক্রমেণ হ্রসিতম্ . সাদি চ তাত্ত্বিকেভ্যোঽন্যত্র . .
অযোগিজ্ঞানং উত্পত্তিবিনাশবত্ . অল্পম্ . .
অনুপ্রমাণং ত্রিবিধম্ . প্রতক্ষমনুমানমাগমং ইতি . .
নির্দোষার্থেন্দ্রিযসন্নিকর্ষঃ প্রত্যক্ষম্ .
নির্দোষোপপত্তিরনুমানম্ . নির্দোষঃ শব্দঃ আগমঃ . .
অর্থাপত্ত্যুপমে অনুমা বিশেষঃ . .
অভাবোঽনুমাপ্রত্যক্ষং চ . .
পরামর্শাপরামর্শবিশেষাত্ . .
সংভবপরিশেষানুমা . .
আত্মান্যোন্যাশ্রয চক্রকানবস্থাকল্পনাগৌরব
শ্রুতদৃষ্টহানাদযোদূষণানুমা . .
উপক্রমোপসংহার তদৈকরূপাভ্যাসাপূর্বতাফলার্থবাদাশ্চ . .
উপপত্তিবিশেষাঃ . .
ত এব সোপপত্তযো লিঙ্গানি . .
সমাখ্যা বাক্যপ্রকরণস্থানানি চ . লিঙ্গবিশেষাঃ . .
ব্যাপ্তিরুপপপত্তিমূলম্ . .
সা প্রতিজ্ঞাহেতুদৃষ্টাংতরূপা . .
হেতুগর্ভা প্রতিজ্ঞা কেবলাঽপি . .
সিদ্ধৌ প্রতিজ্ঞাযাং হেতুমাত্রং চ . .
দৃষ্টাংতঃ স প্রতিজ্ঞো হেতুগর্ভঃ . .
উপপত্তিদোষৌ বিরোধাসঙ্গতি . .
ন্যূনাধিকে বাচনিকে . .
সংবাদানুক্তিযুতাস্তু এব নিগ্রহাঃ . .
প্রত্যক্ষং সপ্তবিধম্ . সাক্ষি ষডিন্দ্রিযভেদেন . .
মানস প্রত্যক্ষজা স্মৃতিঃ . .
স্মৃত্যনুবাদযোর্নাপ্রামাণ্যম্ . .
যথার্থত্বানুভবাত্ . .
অহানেশ্চ . .
বিরোধো মানস্ববাক্যাভ্যাম্ . .
স্ববাক্যবিরোধোঽপসিদ্ধাংতজাতিরূপেণ . .
জাতির্ন মেযে মানাপেক্ষেত্যাদিকা . .
মেযে মানাপেক্ষাস্তীতি চ তেনৈব ন্যাযেন সিদ্ধত্বাত্ . .
মানবিরোধশ্চ . .
ছলমসঙ্গতি . .
অন্যচ্চ . .
অন্যচ্চ . .
গৃষ্টিবিবক্ষযা গামানযেত্যুক্তে পৃথিবী বিবক্ষযা
গবানযনমশক্যমিতিবত্ . .
ত্রিবিধো বিরোধঃ . প্রতিজ্ঞাহেতুদৃষ্টাংতভেদেন . .
প্রমাণবিরুদ্ধার্থপ্রতিজ্ঞা প্রতিজ্ঞাবিরোধঃ . .
হেতুস্বরূপাসিদ্ধিরব্যাপ্তিশ্চেতি হেতুবিরোধঃ . .
সাধ্যস্য সাধনস্য বাঽননুগমো দৃষ্টাংত বিরোধঃ . .
প্রতিজ্ঞাযাঃ সমবলবিরোধ এব সপ্রতিসাধনঃ . .
স এবোপাধি দোষোঽপি . .
সর্ব এতে দৃশ্যত্বানুমানে দৃষ্টব্যাঃ . .
প্রত্যক্ষাগমাদিভির্জগতঃ সত্যত্বাত্ . .
তত্পক্ষে দৃশ্যত্বস্য চ মিথ্যাত্বাত্ . .
অনির্বচনীযস্য প্রতিবাদিনোঽসিদ্ধত্বাত্ . .
অনির্বচনীযস্যেতি . .
আত্মনোঽপি দৃশ্যত্বাত্ . .
শুক্তিরজতাদেরনির্বচনীযত্বাভাবাত্ . .
অনির্বচনীয দৃশ্যত্বাভাবাত্ . .
মানসিদ্ধত্বাদিতি সপ্রতিসাধনত্বাত্ . .
জগত্সত্যত্বগ্রাহি প্রত্যক্ষস্য বর্তমানমাত্রগ্রাহিত্বে
অনুমানাগমপ্রামাণ্য গ্রাহিণোঽপি প্রত্যক্ষত্বাবিশেষাদুত্তরক্ষণে
প্রামাণ্যং ন সেত্স্যতীতি ভেদাদিবাক্যানামেব প্রামাণ্যং স্যাত্ . .
তস্য সাক্ষিসিদ্ধত্বং চেজ্জগত্সত্যত্বমপি সাক্ষিসিদ্ধম্ . .
ব্যভিচারিশ্চেদাগমার্থানুমানির্দোষত্বাধ্যবসাযে চ সমঃ . .
অত উত্তরদিবসেঽভেদবাক্যস্য ভেদোঽর্থঃ স্যাত্ . .
নির্দোষানুমাযাঃ সদোষত্বম্ . .
সদোষানুমাযাঃ নির্দোষত্বম্ . .
ইত্যব্যবস্থা . .
আশ্রযসাধ্যবধিকরণাসিদ্ধযো ন দূষণম্ . .
অতিপ্রসঙ্গাভাবাত্ . .
অতিপ্রসঙ্গেন হি দোষত্বাদোষত্বে কল্প্যে . .
ব্যাপ্তিরেব হি প্রযোজিকা . .
অসত্যপি ব্যাপ্তিরস্ত্যেব . .
অসদাশ্রযস্য সাধকত্বং নেত্যপি ব্যাপ্তিং বিনা
কথং নিবার্যতে . .
অসদাশ্রযমিত্যাদি বিশেষণত্বসংভবে কথমব্যাপ্তিঃ . .
ন চাত্যংতাভাবোঽপি সর্বধর্মরহিতঃ . প্রমেযত্বাদ্যনুভবাত্ . .
পরিশেষার্থাপত্তিপ্রামাণ্যাভ্যুপগমাচ্চ . .
বিমতং সকর্তৃকমিত্যত্র সর্বজ্ঞত্বস্য পক্ষধর্মতা বলেন
সিদ্ধ্যঙ্গীকারাত্ . .
পরিশেষোঽর্থাপত্তিরনুমানমিত্যবিশেষঃ . উপপত্তিমাত্রত্বাত্ . .
উপপত্তেশ্চ ব্যাপ্ত্যপেক্ষা সর্বথাঙ্গীকার্যেত্যাগ্রহ মাত্রেণ ভেদঃ . .
উপমানস্যাপি ব্যাপ্তিরূপত্বাত্ . .
ন হি স্বসদৃশেনাসদৃশং ক্বচিদ্দৃষ্টম্ . .
যোগ্যানুপলব্ধেশ্চ লিঙ্গত্বম্ . .
অবিশেষাত্ . .
অবিশেষাত্ . .
অবিশেষাত্ . .
অবিশেষাত্ . .
উক্তদোষেষ্বেবাশেষানুমানদোষাণামংতর্ভাবঃ . .
সাধ্যাবিশিষ্টোঽসিদ্ধিঃ . .
সিদ্ধসাধকোঽসঙ্গতিঃ . .
ন প্রমাসাধনং প্রমাণম্ . .
জ্ঞানব্যতিরিক্তপ্রমাযাং প্রমাণাভাবাত্ . .
ন চাজ্ঞাতপরিচ্ছিত্তিরেব প্রমেত্যত্র কিঞ্চিন্মানম্ . .
যাথার্থ্যমেব প্রামাণ্যমিত্যঙ্গীকারাত্ . .
ন চানুভূতিরেব প্রমাণম্ . স্মৃত্যাদাবব্যাপ্তেঃ . .
বেদানুমানাদি প্রামাণ্যপ্রসিদ্ধেশ্চ . .
স্মৃতিঃ প্রত্যক্ষমৈতিহ্যমনুমানশ্চতুষ্টযম্ .
প্রমাণমিতি বিজ্ঞেযং ধর্মাদ্যর্থে বুভূষুভিঃ ..
ইতি শ্রুতেশ্চ . .
ঐতিহ্যমাগমভেদঃ . .
ন চ সম্যগনুভবসাধনং প্রমাণম্ . ঈশ্বরজ্ঞানাদাবব্যপ্তেঃ . .
অপ্রামাণ্যে প্রমাণাভাবচ্চ . .
প্রামাণ্যজ্ঞানে চ . .
তত্রাপ্যঙ্গীকারেঽনবস্থিতেঃ . .
স্বপ্রকাশাত্মাঙ্গীকারে তত্রাব্যাপ্তেঃ . .
স্মৃতেশ্চ প্রামাণ্যানঙ্গীকারেঽনুভূতং মযেত্যত্র প্রমাণাভাবাত্ . .
লিঙ্গত্বেন প্রামাণ্যে কল্পনাগৌরবম্ . .
দৃষ্টহানিশ্চ . .
স্মৃতিপ্রমাণদ্বৈবিধ্যমাত্রকল্পনে মিথ্যাজ্ঞানাদের্নিরাসাদনুভব
বিরোধঃ . .
তদনুভবাভাব ইত্যুক্তেঽনুভবঃ স্মৃতিশ্চ নাস্তীত্যুক্তে
কিমুত্তরম্ . .
স্বসিদ্ধৈঃ সাধনং পরসিদ্ধৈর্দূষণম্ . .
অতো ন দূষণে অপসিদ্ধাংতাদি . .
ইষ্টাপত্তিঃ সিদ্ধসাধনত্বাদসঙ্গতমেব . .
আনংদতীর্থমুনিনা ব্রহ্মতর্কোক্তমার্গতঃ .
মানলক্ষণমিত্যুক্তং সঙ্ক্ষেপাদ্ব্রহ্মসিদ্ধযে .. ..
অশেষমানমেযৈক সাক্ষিণেঽক্ষযমূর্তযে .
অজেশ পুরুহূতেড্য নমো নারাযণায তে .. ..
ইতি শ্রীমদানংদতীর্থভগবত্পাদাচার্যবিরচিতং
প্রমাণলক্ষনগ্রন্থোত্তমং সংপূর্ণম্
.. ভারতীরমণমুখ্যপ্রাণাংতর্গত শ্রীকৃষ্ণার্পণমস্তু ..
<
