উতথ্যগীতা

.. উতথ্যগীতা..

যানঙ্গিরাঃ ক্ষত্রধর্মানুতথ্যো ব্রহ্ম বিত্তমঃ .
মান্ধাত্রে যৌবনাশ্বায প্রীতিমানভ্যভাষত .. ১..
স যথানুশশাসৈনমুতথ্যো ব্রহ্ম বিত্তমঃ .
তত্তে সর্বং প্রবক্ষ্যামি নিখিলেন যুধিষ্ঠির .. ২..
ধর্মায রাজা ভবতি ন কামকরণায তু .
মান্ধাতরেবং জানীহি রাজা লোকস্য রক্ষিতা .. ৩..
রাজা চরতি বৈ ধর্মং দেবত্বাযৈব গচ্ছতি .
ন চেদ্ধর্মং স চরতি নরকাযৈব গচ্ছতি .. ৪..
ধর্মে তিষ্ঠন্তি ভূতানি ধর্মো রাজনি তিষ্ঠতি .
তং রাজা সাধু যঃ শাস্তি স রাজা পৃথিবীপতিঃ .. ৫..
রাজা পরমধর্মাত্মা লক্ষ্মীবান্পাপ উচ্যতে .
দেবাশ্চ গর্হাং গচ্ছন্তি ধর্মো নাস্তীতি চোচ্যতে .. ৬..
অধর্মে বর্তমানানামর্থসিদ্ধিঃ প্রদৃশ্যতে .
তদেব মঙ্গলং সর্বং লোকঃ সমনুবর্ততে .. ৭..
উচ্ছিদ্যতে ধর্মবৃত্তমধর্মো বর্ততে মহান্ .
ভযমাহুর্দিবারাত্রং যদা পাপো ন বার্যতে .. ৮..
ন বেদাননুবর্তন্তি ব্রতবন্তো দ্বিজাতযঃ .
ন যজ্ঞাংস্তন্বতে বিপ্রা যদা পাপো ন বার্যতে .. ৯..
বধ্যানামিব সর্বেষাং মনো ভবতি বিহ্বলম্ .
মনুষ্যাণাং মহারাজ যদা পাপো ন বার্যতে .. ১০..
উভৌ লোকাবভিপ্রেক্ষ্য রাজানমৃষযঃ স্বযম্ .
অসৃজন্সুমহদ্ভূতমযং ধর্মো ভবিষ্যতি .. ১১..
যস্মিন্ধর্মো বিরাজেত তং রাজানং প্রচক্ষতে .
যস্মিন্বিলীযতে ধর্মং তং দেবা বেষলং বিদুঃ .. ১২..
বৃষো হি ভগবান্ধর্মো যস্তস্য কুরুতে হ্যলম্ .
বৃষলং তং বিদুর্দেবাস্তস্মাদ্ধর্মং ন লোপযেত্ .. ১৩..
ধর্মে বর্ধতি বর্ধন্তি সর্বভূতানি সর্বদা .
তস্মিন্হ্রসতি হীযন্তে তস্মাদ্ধর্মং প্রবর্ধযেত্ .. ১৪..
ধনাত্স্রবতি ধর্মো হি ধারণাদ্বেতি নিশ্চযঃ .
অকার্যাণাং মনুষ্যেন্দ্র স সীমান্ত করঃ স্মৃতঃ .. ১৫..
প্রভবার্থং হি ভূতানাং ধর্মঃ সৃষ্টঃ স্বযং ভুবা .
তস্মাত্প্রবর্ধযেদ্ধর্মং প্রজানুগ্রহ কারণাত্ .. ১৬..
তস্মাদ্ধি রাজশার্দূল ধর্মঃ শ্রেষ্ঠ ইতি স্মৃতঃ .
স রাজা যঃ প্রজাঃ শাস্তি সাধু কৃত্পুরুষর্ষভঃ .. ১৭..
কামক্রোধাবনাদৃত্য ধর্মমেবানুপালযেত্ .
ধর্মঃ শ্রেযঃ করতমো রাজ্ঞাং ভরতসত্তম .. ১৮..
ধর্মস্য ব্রাহ্মণা যোনিস্তস্মাত্তান্পূজযেত্সদা .
ব্রাহ্মণানাং চ মান্ধাতঃ কামান্কুর্যাদমত্সরী .. ১৯..
তেষাং হ্যকাম করণাদ্রাজ্ঞঃ সঞ্জাযতে ভযম্ .
মিত্রাণি চ ন বর্ধন্তে তথামিত্রী ভবন্ত্যপি .. ২০..
ব্রাহ্মণান্বৈ তদাসূযাদ্যদা বৈরোচনো বলিঃ .
অথাস্মাচ্ছ্রীরপাক্রামদ্যাস্মিন্নাসীত্প্রতাপিনী .. ২১..
ততস্তস্মাদপক্রম্য সাগচ্ছত্পাকশাসনম্ .
অথ সোঽন্বতপত্পশ্চাচ্ছ্রিযং দৃষ্ট্বা পুরন্দরে .. ২২..
এতত্ফলমসূযাযা অভিমানস্য চাভিভো .
তস্মাদ্বুধ্যস্ব মান্ধাতর্মা ত্বা জহ্যাত্প্রতাপিনী .. ২৩..
দর্পো নাম শ্রিযঃ পুত্রো জজ্ঞেঽধর্মাদিতি শ্রুতিঃ .
তেন দেবাসুরা রাজন্নীতাঃ সুবহুশো বশম্ .. ২৪..
রাজর্ষযশ্চ বহবস্তস্মাদ্বুধ্যস্ব পার্থিব .
রাজা ভবতি তং জিত্বা দাসস্তেন পরাজিতঃ .. ২৫..
স যথা দর্পসহিতমধর্মং নানুসেবতে .
তথা বর্তস্ব মান্ধাতশ্চিরং চেত্স্থাতুমিচ্ছসি .. ২৬..
মত্তাত্প্রমত্তাত্পোগণ্ডাদুন্মত্তাচ্চ বিশেষতঃ .
তদভ্যাসাদুপাবর্তাদহিতানাং চ সেবনাত্ .. ২৭..
নিগৃহীতাদমাত্যাচ্চ স্ত্রীভ্যশ্চৈব বিশেষতঃ .
পর্বতাদ্বিষমাদ্দুর্গাদ্ধস্তিনোঽশ্বাত্সরীসৃপাত্ .. ২৮..
এতেভ্যো নিত্যযত্তঃ স্যান্নক্তঞ্চর্যাং চ বর্জযেত্ .
অত্যাযং চাতি মানং চ দম্ভং ক্রোধং চ বর্জযেত্ .. ২৯..
অবিজ্ঞাতাসু চ স্ত্রীষু ক্লীবাসু স্বৈরিণীষু চ .
পরভার্যাসু কন্যাসু নাচরেন্মৈথুনং নৃপঃ .. ৩০..
কুলেষু পাপরক্ষাংসি জাযন্তে বর্ণসঙ্করাত্ .
অপুমাংসোঽঙ্গহীনাশ্চ স্থূলজিহ্বা বিচেতসঃ .. ৩১..
এতে চান্যে চ জাযন্তে যদা রাজা প্রমাদ্যতি .
তস্মাদ্রাজ্ঞা বিশেষেণ বর্তিতব্যং প্রজাহিতে .. ৩২..
ক্ষত্রিযস্য প্রমত্তস্য দোষঃ সঞ্জাযতে মহান্ .
অধর্মাঃ সম্প্রবর্তন্তে প্রজা সঙ্করকারকাঃ .. ৩৩..
অশীতে বিদ্যতে শীতং শীতে শীতং ন বিদ্যতে .
অবৃষ্টিরতি বৃষ্টিশ্চ ব্যাধিশ্চাবিশতি প্রজাঃ .. ৩৪..
নক্ষত্রাণ্যুপতিষ্ঠন্তি গ্রহা ঘোরাস্তথাপরে .
উত্পাতাশ্চাত্র দৃশ্যন্তে বহবো রাজনাশনাঃ .. ৩৫..
অরক্ষিতাত্মা যো রাজা প্রজাশ্চাপি ন রক্ষতি .
প্রজাশ্চ তস্য ক্ষীযন্তে তাশ্চ সোঽনু বিনশ্যতি .. ৩৬..
দ্বাবাদদাতে হ্যেকস্য দ্বযোশ্ চ বহবোঽপরে .
কুমার্যঃ সম্প্রলুপ্যন্তে তদাহুর্নৃপ দূষণম্ .. ৩৭..
মমৈতদিতি নৈকস্য মনুষ্যেষ্ববতিষ্ঠতে .
ত্যক্ত্বা ধর্মং যদা রাজা প্রমাদমনুতিষ্ঠতি .. ৩৮..
৯২
কালবর্ষী চ পর্জন্যো ধর্মচারী চ পার্থিবঃ .
সম্পদ্যদৈষা ভবতি সা বিভর্তি সুখং প্রজাঃ .. ১..
যো ন জানাতি নির্হন্তুং বস্ত্রাণাং রজকো মলম্ .
রক্তানি বা শোধযিতুং যথা নাস্তি তথৈব সঃ .. ২..
এবমেব দ্বিজেন্দ্রাণাং ক্ষত্রিযাণাং বিশাম্ অপি .
শূদ্রাশ্চতুর্ণাং বর্ণানাং নানা কর্মস্ববস্থিতাঃ .. ৩..
কর্ম শূদ্রে কৃষির্বৈশ্যে দণ্ডনীতিশ্চ রাজনি .
ব্রহ্মচর্যং তপো মন্ত্রাঃ সত্যং চাপি দ্বিজাতিষু .. ৪..
তেষাং যঃ ক্ষত্রিযো বেদ বস্ত্রাণামিব শোধনম্ .
শীলদোষান্বিনির্হন্তুং স পিতা স প্রজাপতিঃ .. ৫..
কৃতং ত্রেতা দ্বাপরশ্চ কলিশ্চ ভরতর্ষভ .
রাজবৃত্তানি সর্বাণি রাজৈব যুগমুচ্যতে .. ৬..
চাতুর্বর্ণ্যং তথা বেদাশ্চাতুরাশ্রম্যমেব চ .
সর্বং প্রমুহ্যতে হ্যেতদ্যদা রাজা প্রমাদ্যতি .. ৭..
রাজৈব কর্তা ভূতানাং রাজৈব চ বিনাশকঃ .
ধর্মাত্মা যঃ স কর্তা স্যাদধর্মাত্মা বিনাশকঃ .. ৮..
রাজ্ঞো ভার্যাশ্চ পুত্রাশ্চ বান্ধবাঃ সুহৃদস্তথা .
সমেত্য সর্বে শোচন্তি যদা রাজা প্রমাদ্যতি .. ৯..
হস্তিনোঽশ্বাশ্চ গাবশ্চাপ্যুষ্ট্রাশ্বতর গর্দভাঃ .
অধর্মবৃত্তে নৃপতৌ সর্বে সীদন্তি পার্থিব .. ১০..
দুর্বলার্থং বলং সৃষ্টং ধাত্রা মান্ধাতরুচ্যতে .
অবলং তন্মহদ্ভূতং যস্মিন্সর্বং প্রতিষ্ঠিতম্ .. ১১..
যচ্চ ভূতং স ভজতে ভূতা যে চ তদন্বযাঃ .
অধর্মস্থে হি নৃপতৌ সর্বে সীদন্তি পার্থিব .. ১২..
দুর্বলস্য হি যচ্চক্ষুর্মুনেরাশীবিষস্য চ .
অবিষহ্য তমং মন্যে মা স্ম দুর্বলমাসদঃ .. ১৩..
দুর্বলাংস্তাত বুধ্যেথা নিত্যমেবাবিমানিতান্ .
মা ত্বাং দুর্বলচক্ষূংষি প্রদহেযুঃ স বান্ধবম্ .. ১৪..
ন হি দুর্বলদগ্ধস্য কুলে কিং চিত্প্ররোহতি .
আমূলং নির্দহত্যেব মা স্ম দুর্বলমাসদঃ .. ১৫..
অবলং বৈ বলাচ্ছ্রেযো যচ্চাতি বলবদ্বলম্ .
বলস্যাবল দগ্ধস্য ন কিং চিদবশিষ্যতে .. ১৬..
বিমানিতো হতোত্ক্রুষ্টস্ত্রাতারং চেন্ন বিন্দতি .
অমানুষ কৃতস্তত্র দণ্ডো হন্তি নরাধিপম্ .. ১৭..
মা স্ম তাত বলে স্থেযা বাধিষ্ঠা মাপি দুর্বলম্ .
মা ত্বা দুর্বলচক্ষূংষি ধক্ষ্যন্ত্যগ্নিরিবাশ্রযম্ .. ১৮..
যানি মিথ্যাভিশস্তানাং পতন্ত্যশ্রূণি রোদতাম্ .
তানি পুত্রান্পশূন্ঘ্নন্তি তেষাং মিথ্যাভিশাসতাম্ .. ১৯..
যদি নাত্মনি পুত্রেষু ন চেত্পৌত্রেষু নপ্তৃষু .
ন হি পাপং কৃতং কর্ম সদ্যঃ ফলতি গৌরিব .. ২০..
যত্রাবলো বধ্যমানস্ত্রাতারং নাধিগচ্ছতি .
মহান্দৈবকৃতস্তত্র দণ্ডঃ পততি দারুণঃ .. ২১..
যুক্তা যদা জানপদা ভিক্ষন্তে ব্রাহ্মণা ইব .
অভীক্ষ্ণং ভিক্ষুদোষেণ রাজানং ঘ্নন্তি তাদৃশাঃ .. ২২..
রাজ্ঞো যদা জনপদে বহবো রাজপূরুষাঃ .
অনযেনোপবর্তন্তে তদ্রাজ্ঞঃ কিল্বিষং মহত্ .. ২৩..
যদা যুক্তা নযন্ত্যর্থান্কামাদর্থবশেন বা .
কৃপণং যাচমানানাং তদ্রাজ্ঞো বৈশসং মহত্ .. ২৪..
মহাবৃক্ষো জাযতে বর্ধতে চ
তং চৈব ভূতানি সমাশ্রযন্তি .
যদা বৃক্ষশ্ছিদ্যতে দহ্যতে বা
তদাশ্রযা অনিকেতা ভবন্তি .. ২৫..
যদা রাষ্ট্রে ধর্মমগ্র্যং চরন্তি
সংস্কারং বা রাজগুণং ব্রুবাণাঃ .
তৈরেবাধর্মশ্চরিতো ধর্মমোহাত্
তূর্ণং জহ্যাত্সুকৃতং দুষ্কৃতং চ .. ২৬..
যত্র পাপা জ্যাযমানাশ্ চরন্তি
সতাং কলির্বিন্দতি তত্র রাজ্ঞঃ .
যদা রাজা শাস্তি নরান্নশিষ্যান্
ন তদ্রাজ্ঞ্য বর্ধতে ভূমিপাল .. ২৭..
যশ্চামাত্যং মানযিত্বা যথার্হং
মন্ত্রে চ যুদ্ধে চ নৃপো নিযুজ্ঞ্যাত্ .
প্রবর্ধতে তস্য রাষ্ট্রং নৃপস্য
ভুঙ্ক্তে মহীং চাপ্যখিলাং চিরায .. ২৮..
অত্রাপি সুকৃতং কর্ম বাচং চৈব সুভাষিতাম্ .
সমীক্ষ্য পূজযন্রাজা ধর্মং প্রাপ্নোত্যনুত্তমম্ .. ২৯..
সংবিভজ্য যদা ভুঙ্ক্তে ন চান্যানবমন্যতে .
নিহন্তি বলিনং দৃপ্তং স রাজ্ঞো ধর্ম উচ্যতে .. ৩০..
ত্রাযতে হি যদা সর্বং বাচা কাযেন কর্মণা .
পুত্রস্যাপি ন মৃষ্যেচ্চ স রাজ্ঞো ধর্ম উচ্যতে .. ৩১..
যদা শারণিকান্রাজা পুত্র বত্পরিরক্ষতি .
ভিনত্তি ন চ মর্যাদাং স রাজ্ঞো ধর্ম উচ্যতে .. ৩২..
যদাপ্ত দক্ষিণৈর্যজ্ঞৈর্যজতে শ্রদ্ধযান্বিতঃ .
কামদ্বেষাবনাদৃত্য স রাজ্ঞো ধর্ম উচ্যতে .. ৩৩..
কৃপণানাথ বৃদ্ধানাং যদাশ্রু ব্যপমার্ষ্টি বৈ .
হর্ষং সঞ্জনযন্নৄণাং স রাজ্ঞো ধর্ম উচ্যতে .. ৩৪..
বিবর্ধযতি মিত্রাণি তথারীংশ্চাপকর্ষতি .
সম্পূজযতি সাধূংশ্চ স রাজ্ঞো ধর্ম উচ্যতে .. ৩৫..
সত্যং পালযতি প্রাপ্ত্যা নিত্যং ভূমিং প্রযচ্ছতি .
পূজযত্যতিথীন্ভৃত্যান্স রাজ্ঞো ধর্ম উচ্যতে .. ৩৬..
নিগ্রহানুগ্রহৌ চোভৌ যত্র স্যাতাং প্রতিষ্ঠিতৌ .
অস্মিঁল্লোকে পরে চৈব রাজা তত্প্রাপ্নুতে ফলম্ .. ৩৭..
যমো রাজা ধার্মিকাণাং মান্ধাতঃ পরমেশ্বরঃ .
সংযচ্ছন্ভবতি প্রাণান্ন সংযচ্ছংস্তু পাপকঃ .. ৩৮..
ঋত্বিক্পুরোহিতাচার্যান্সত্কৃত্যানবমন্য চ .
যদা সম্যক্প্রগৃহ্ণাতি স রাজ্ঞো ধর্ম উচ্যতে .. ৩৯..
যমো যচ্ছতি ভূতানি সর্বাণ্যেবাবিশেষতঃ .
তস্য রাজ্ঞানুকর্তব্যং যন্তব্যা বিধিবত্প্রজাঃ .. ৪০..
সহস্রাক্ষেণ রাজা হি সর্ব এবোপমীযতে .
স পশ্যতি হি যং ধর্মং স ধর্মঃ পুরুষর্ষভ .. ৪১..
অপ্রমাদেন শিক্ষেথাঃ ক্ষমাং বুদ্ধিং ধৃতিং মতিম্ .
ভূতানাং সত্ত্বজিজ্ঞাসাং সাধ্বসাধু চ সর্বদা .. ৪২..
সঙ্গ্রহঃ সর্বভূতানাং দানং চ মধুরা চ বাক্ .
পৌরজানপদাশ্চৈব গোপ্তব্যাঃ স্বা যথা প্রজাঃ .. ৪৩..
ন জাত্বদক্ষো নৃপতিঃ প্রজাঃ শক্নোতি রক্ষিতুম্ .
ভরো হি সুমহাংস্তাত রাজ্যং নাম সুদুষ্করম্ .. ৪৪..
তদ্দণ্ডবিন্নৃপঃ প্রাজ্ঞঃ শূরঃ শক্নোতি রক্ষিতুম্ .
ন হি শক্যমদণ্ডেন ক্লীবেনাবুদ্ধিনাপি বা .. ৪৫..
অভিরূপৈঃ কুলে জাতৈর্দক্ষৈর্ভক্তৈর্বহুশ্রুতৈঃ .
সর্বা বুদ্ধীঃ পরীক্ষেথাস্তাপসাশ্রমিণাম্ অপি .. ৪৬..
ততস্ত্বং সর্বভূতানাং ধর্মং বেত্স্যসি বৈ পরম্ .
স্বদেশে পরদেশে বা ন তে ধর্মো বিনশ্যতি .. ৪৭..
ধর্মশ্চার্থশ্চ কামশ্ চ ধর্ম এবোত্তরো ভবেত্ .
অস্মিঁল্লোকে পরে চৈব ধর্মবিত্সুখমেধতে .. ৪৮..
ত্যজন্তি দারান্প্রাণাংশ্চ মনুষ্যাঃ প্রতিপূজিতাঃ .
সঙ্গ্রহশ্চৈব ভূতানাং দানং চ মধুরা চ বাক্ .. ৪৯..
অপ্রমাদশ্চ শৌচং চ তাত ভূতিকরং মহত্ .
এতেভ্যশ্চৈব মান্ধাতঃ সততং মা প্রমাদিথাঃ .. ৫০..
অপ্রমত্তো ভবেদ্রাজা ছিদ্রদর্শী পরাত্মনোঃ .
নাস্য ছিদ্রং পরঃ পশ্যেচ্ছিদ্রেষু পরমন্বিযাত্ .. ৫১..
এতদ্বৃত্তং বাসবস্য যমস্য বরুণস্য চ .
রাজর্ষীণাং চ সর্বেষাং তত্ত্বমপ্যনুপালয .. ৫২..
তত্কুরুষ্ব মহারাজ বৃত্তং রাজর্ষিসেবিতম্ .
আতিষ্ঠ দিব্যং পন্থানমহ্নায ভরতর্ষভ .. ৫৩..
ধর্মবৃত্তং হি রাজানং প্রেত্য চেহ চ ভারত .
দেবর্ষিপিতৃগন্ধর্বাঃ কীর্তযন্ত্যমিতৌজসঃ .. ৫৪..
স এবমুক্তো মান্ধাতা তেনোতথ্যেন ভারত .
কৃতবানবিশঙ্কস্তদেকঃ প্রাপ চ মেদিনীম্ .. ৫৫..
ভবানপি তথা সম্যঙ্মান্ধাতেব মহীপতিঃ .
ধর্মং কৃত্বা মহীং রক্ষন্স্বর্গে স্থানমবাপ্স্যসি .. ৫৬..

.. ইতি উতথ্যগীতা সমাপ্তা ..

<