॥ ঈশ্বরগীতা কূর্মপুরাণে ॥
প্রথমোঽধ্যায়ঃ
ঋষয় ঊচুঃ
ভবতা কথিতঃ সম্যক্ সর্গঃ স্বায়ম্ভুবস্ততঃ ।
ব্রহ্মাণ্ডস্যাস্য বিস্তারো মন্বন্তরবিনিশ্চয়ঃ ॥ ১.১॥
তত্রেশ্বরেশ্বরো দেবো বর্ণিভির্ধর্মতত্পরৈঃ ।
জ্ঞানয়োগরতৈর্নিত্যমারাধ্যঃ কথিতস্ত্বয়া ॥ ১.২॥
তদ্বদাশেষসংসারদুঃখনাশমনুত্তমম্ ।
জ্ঞানং ব্রহ্মৈকবিষয়ং য়েন পশ্যেম তত্পরম্ ॥ ১.৩॥
ত্বং হি নারায়ণ সাক্ষাত্ কৃষ্ণদ্বৈপায়নাত্ প্রভো ।
অবাপ্তাখিলবিজ্ঞানস্তত্ত্বাং পৃচ্ছামহে পুনঃ ॥ ১.৪॥
শ্রুত্বা মুনীনাং তদ্ বাক্যং কৃষ্ণদ্বৈপায়নাত্ প্রভুম্ ।
সূতঃ পৌরাণিকঃ স্মৃত্বা ভাষিতুং হ্যুপচক্রমে ॥ ১.৫॥
অথাস্মিন্নন্তরে ব্যাসঃ কৃষ্ণদ্বৈপায়নঃ স্বয়ম্ ।
আজগাম মুনিশ্রেষ্ঠা য়ত্র সত্রং সমাসতে ॥ ১.৬॥
তং দৃষ্ট্বা বেদবিদ্বাংসং কালমেঘসমদ্যুতিম্ ।
ব্যাসং কমলপত্রাক্ষং প্রণেমুর্দ্বিজপুঙ্গবাঃ ॥ ১.৭॥
পপাত দণ্ডবদ্ ভূমৌ দৃষ্ট্বাঽসৌ লোমহর্ষণঃ ।
প্রদক্ষিণীকৃত্য গুরুং প্রাঞ্জলিঃ পার্শ্বগোঽভবত্ ॥ ১.৮॥
পৃষ্টাস্তেঽনাময়ং বিপ্রাঃ শৌনকাদ্যা মহামুনিম্ ।
সমাশ্বাস্যাসনং তস্মৈ তদ্যোগ্যং সমকল্পয়ন্ ॥ ১.৯॥
অথৈতানব্রবীদ্ বাক্যং পরাশরসুতঃ প্রভুঃ ।
কচ্চিন্ন তপসো হানিঃ স্বাধ্যায়স্য শ্রুতস্য চ ॥ ১.১০॥
ততঃ স সূতঃ স্বগুরুং প্রণম্যাহ মহামুনিম্ ।
জ্ঞানং তদ্ ব্রহ্মবিষয়ং মুনীনাং বক্তুমর্হসি ॥ ১.১১॥
ইমে হি মুনয়ঃ শান্তাস্তাপসা ধর্মতত্পরাঃ ।
শুশ্রূষা জায়তে চৈষাং বক্তুমর্হসি তত্ত্বতঃ ॥ ১.১২॥
জ্ঞানং বিমুক্তিদং দিব্যং য়ন্মে সাক্ষাত্ ত্বয়োদিতম্ ।
মুনীনাং ব্যাহৃতং পূর্বং বিষ্ণুনা কূর্মরূপিণা ॥ ১.১৩॥
৩শ্রুত্বা সূতস্য বচনং মুনিঃ সত্যবতীসুতঃ
প্রণম্য শিরসা রুদ্রং বচঃ প্রাহ সুখাবহম্ ॥ ১.১৪॥
ব্যাস উবাচ
বক্ষ্যে দেবো মহাদেবঃ পৃষ্টো য়োগীশ্বরৈঃ পুরা ।
সনত্কুমারপ্রমুখৈঃ স স্বয়ং সমভাষত ॥ ১.১৫॥
সনত্কুমারঃ সনকস্তথৈব চ সনন্দনঃ ।
অঙ্গিরা রুদ্রসহিতো ভৃগুঃ পরমধর্মবিত্ ॥ ১.১৬॥
কণাদঃ কপিলো য়োগী বামদেবো মহামুনিঃ ।
শুক্রো বসিষ্ঠো ভগবান্ সর্বে সংয়তমানসাঃ ॥ ১.১৭॥
পরস্পরং বিচার্যৈতে সংশয়াবিষ্টচেতসঃ ।
তপ্তবন্তস্তপো ঘোরং পুণ্যে বদরিকাশ্রমে ॥ ১.১৮॥
অপশ্যংস্তে মহায়োগমৃষিং ধর্মসুতং শুচিম্ ।
নারায়ণমনাদ্যন্তং নরেণ সহিতং তদা ॥ ১.১৯॥
সংস্তূয় বিবিধৈঃ স্তোত্রৈঃ সর্বে বেদসমুদ্ভবৈঃ ।
প্রণেমুর্ভক্তিসংয়ুক্তা য়োগিনো য়োগবিত্তমম্ ॥ ১.২০॥
বিজ্ঞায় বাঞ্ছিতং তেষাং ভগবানপি সর্ববিত্ ।
প্রাহ গম্ভীরয়া বাচা কিমর্থং তপ্যতে তপঃ ॥ ১.২১॥
অব্রুবন্ হৃষ্টমনসো বিশ্বাত্মানং সনাতনম্ ।
সাক্ষান্নারায়ণং দেবমাগতং সিদ্ধিসূচকম্ ॥ ১.২২॥
বয়ং সংশয়মাপন্নাঃ সর্বে বৈ ব্রহ্মবাদিনঃ ।
ভবন্তমেকং শরণং প্রপন্নাঃ পুরুষোত্তমম্ ॥ ১.২৩॥
ত্বং হি বেত্সি পরমং গুহ্যং সর্বন্তু ভগবানৃষিঃ ।
নারায়ণঃ স্বয়ং সাক্ষাত্ পুরাণোঽব্যক্তপূরুষঃ ॥ ১.২৪॥
নহ্যন্যো বিদ্যতে বেত্তা ত্বামৃতে পরমেশ্বরম্ ।
শুশ্রূষাঽস্মাকমখিলং সংশয়ং ছেত্তুমর্হসি ॥ ১.২৫॥
কিং কারণমিদং কৃত্স্নং কোঽনুসংসরতে সদা ।
কশ্চিদাত্মা চ কা মুক্তিঃ সংসারঃ কিংনিমিত্তকঃ ॥ ১.২৬॥
কঃ সংসারপতীশানঃ কো বা সর্বং প্রপশ্যতি ।
কিং তত্ পরতরং ব্রহ্ম সর্বং নো বক্তুমর্হসি ॥ ১.২৭॥
এবমুক্তা তু মুনয়ঃ প্রাপশ্যন্ পুরুষোত্তমম্ ।
বিহায় তাপসং রূপং সংস্থিতং স্বেন তেজসা ॥ ১.২৮॥
বিভ্রাজমানং বিমলং প্রভামণ্ডলমণ্ডিতম্ ।
শ্রীবত্সবক্ষসং দেবং তপ্তজাম্বূনদপ্রভম্ ॥ ১.২৯॥
শঙ্খচক্রগদাপাণিং শার্ঙ্গহস্তং শ্রিয়াবৃতম্ ।
ন দৃষ্টস্তত্ক্ষণাদেব নরস্তস্যৈব তেজসা ॥ ১.৩০॥
তদন্তরে মহাদেবঃ শশাঙ্কাঙ্কিতশেখরঃ ।
প্রসাদাভিমুখো রুদ্রঃ প্রাদুরাসীন্মহেশ্বরঃ ॥ ১.৩১॥
নিরীক্ষ্য তে জগন্নাথং ত্রিনেত্রং চন্দ্রভূষণম্ ।
তুষ্টবুর্হৃষ্টমনসো ভক্ত্যা তং পরমেশ্বরম্ ॥ ১.৩২॥
জয়েশ্বর মহাদেব জয় ভূতপতে শিব ।
জয়াশেষমুনীশান তপসাঽভিপ্রপূজিত ॥ ১.৩৩॥
সহস্রমূর্তে বিশ্বাত্মন্ জগদ্যন্ত্রপ্রবর্ত্তক ।
জয়ানন্ত জগজ্জন্মত্রাণসংহারকারক ॥ ১.৩৪॥
সহস্রচরণেশান শম্ভো য়োগীন্দ্রবন্দিত ।
জয়াম্বিকাপতে দেব নমস্তে পরমেশ্বর ॥ ১.৩৫॥
সংস্তুতো ভগবানীশস্ত্র্যম্বকো ভক্তবত্সলঃ ।
সমালিঙ্গ্য হৃষীকেশং প্রাহ গম্ভীরয়া গিরা ॥ ১.৩৬॥
কিমর্থং পুণ্ডরীকাক্ষ মুনীন্দ্রা ব্রহ্মবাদিনঃ ।
ইমং সমাগতা দেশং কিং বা কার্যং ময়াঽচ্যুত ॥ ১.৩৭॥
আকর্ণ্য ভগবদ্বাক্যং দেবদেবো জনার্দনঃ ।
প্রাহ দেবো মহাদেবং প্রসাদাভিমুখং স্থিতম্ ॥ ১.৩৮॥
ইমে হি মুনয়ো দেব তাপসাঃ ক্ষীণকল্পষাঃ ।
অভ্যাগতানাং শরণং সম্যগ্দর্শনকাঙ্ক্ষিণাম্ ॥ ১.৩৯॥
য়দি প্রসন্নো ভগবান্ মুনীনাং ভাবিতাত্মনাম্ ।
সন্নিধৌ মম তজ্জ্ঞানং দিব্যং বক্তুমিহার্হসি ॥ ১.৪০॥
ত্বং হি বেত্সি স্বমাত্মানং ন হ্যন্যো বিদ্যতে শিব ।
ততস্ত্বমাত্মনাত্মানং মুনীন্দ্রেভ্যঃ প্রদর্শয় ॥ ১.৪১॥
এবমুক্ত্বা হৃষীকেশঃ প্রোবাচ মুনিপুঙ্গবান্ ।
প্রদর্শয়ন্ য়োগসিদ্ধিং নিরীক্ষ্য বৃষভধ্বজম্ ॥ ১.৪২॥
সন্দর্শনান্মহেশস্য শঙ্করস্যাথ শূলিনঃ ।
কৃতার্থং স্বয়মাত্মানং জ্ঞাতুমর্হথ তত্ত্বতঃ ॥ ১.৪৩॥
দ্রষ্টুমর্হথ বিশ্বেশং প্রত্যক্ষং পুরতঃ স্থিতম্ ।
মমৈব সন্নিধাবেব য়থাবদ্ বক্তুমীশ্বরঃ ॥ ১.৪৪॥
নিশম্য বিষ্ণোর্বচনং প্রণম্য বৃষভধ্বজম্ ।
সনত্কুমারপ্রমুখাঃ পৃচ্ছন্তি স্ম মহেশ্বরম্ ॥ ১.৪৫॥
অথাস্মিন্নন্তরে দিব্যমাসনং বিমলং শিবম্ ।
কিমপ্যচিন্ত্যং গগনাদীশ্বরার্থে সমুদ্বভৌ ॥ ১.৪৬॥
তত্রাসসাদ য়োগাত্মা বিষ্ণুনা সহ বিশ্বকৃত্ ।
তেজসা পূরয়ন্ বিশ্বং ভাতি দেবো মহেশ্বরঃ ॥ ১.৪৭॥
ততো দেবাদিদেবেশং শঙ্করং ব্রহ্মবাদিনঃ ।
বিভ্রাজমানং বিমলে তস্মিন্ দদৃশুরাসনে ॥ ১.৪৮॥
য়ং প্রপশ্যন্তিয়োগস্থাঃ স্বাত্মন্যাত্মানমীশ্বরমা ।
অনন্যতেজসং শান্তং শিবং দদৃশিরে কিল ॥ ১.৪৯॥
য়তঃ প্রসূতির্ভূতানাং য়ত্রৈতত্ প্রবিলীয়তে ।
তমাসনস্থং ভূতানামীশং দদৃশিরে কিল ॥ ১.৫০॥
য়দন্তরা সর্বমেতদ্ য়তোঽভিন্নমিদং জগত্ ।
সবাসুদেবমাসীনং তমীশং দদৃশুঃ কিল ॥ ১.৫১॥
প্রোবাচ পৃষ্টো ভগবান্ মুনীনাং পরমেশ্বরঃ ।
নিরীক্ষ্য পুণ্ডরীকাক্ষং স্বাত্ময়োগমনুত্তমম্ ॥ ১.৫২॥
তচ্ছৃণুধ্বং য়থান্যায়মুচ্যমানং ময়াঽনঘাঃ ।
প্রশান্তমানসাঃ সর্বে জ্ঞানমীশ্বরভাষিতম্ ॥ ১.৫৩॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) প্রথমোঽধ্যায়ঃ ॥ ১॥
দ্বিতীয়োঽধ্যায়ঃ
ঈশ্বর উবাচ ।
অবাচ্যমেতদ্ বিজ্ঞানমাত্মগুহ্যং সনাতনম্ ।
য়ন্ন দেবা বিজানন্তি য়তন্তোঽপি দ্বিজাতয়ঃ ॥ ২.১॥
ইদং জ্ঞানং সমাশ্রিত্য ব্রহ্মভূতা দ্বিজোত্তমাঃ ।
ন সংসারং প্রপদ্যন্তে পূর্বেঽপি ব্রহ্মবাদিনঃ ॥ ২.২॥
গুহ্যাদ্ গুহ্যতমং সাক্ষাদ্ গোপনীয়ং প্রয়ত্নতঃ ।
বক্ষ্যে ভক্তিমতামদ্য য়ুষ্মাকং ব্রহ্মবাদিনাম্ ॥ ২.৩॥
আত্মায়ঃ কেবলঃ স্বচ্ছঃ শুদ্ধঃ সূক্ষ্মঃ সনাতনঃ ।
অস্তি সর্বান্তরঃ সাক্ষাচ্চিন্মাত্রস্তমসঃ পরঃ ॥ ২.৪॥
সোঽন্তর্যামী স পুরুষঃ স প্রাণঃ স মহেশ্বরঃ ।
স কালোঽত্রস্তদব্যক্তং স এবেদমিতি শ্রুতিঃ ॥ ২.৫॥
অস্মাদ্ বিজায়তে বিশ্বমত্রৈব প্রবিলীয়তে ।
স মায়ী মায়য়া বদ্ধঃ করোতি বিবিধাস্তনূঃ ॥ ২.৬॥
ন চাপ্যয়ং সংসরতি ন চ সংসারময়ঃ প্রভুঃ ।
নায়ং পৃথ্বী ন সলিলং ন তেজঃ পবনো নভঃ ॥ ২.৭॥
ন প্রাণে ন মনোঽব্যক্তং ন শব্দঃ স্পর্শ এব চ ।
ন রূপরসগন্ধাশ্চ নাহং কর্ত্তা ন বাগপি ॥ ২.৮॥
ন পাণিপাদৌ নো পায়ুর্ন চোপস্থং দ্বিজোত্তমাঃ ।
ন কর্ত্তা ন চ ভোক্তা বা ন চ প্রকৃতিপূরুষৌ ॥ ২.৯॥
ন মায়া নৈব চ প্রাণা চৈতন্যং পরমার্থতঃ ।
য়থা প্রকাশতমসোঃ সম্বন্ধো নোপপদ্যতে ॥ ২.১০॥
তদ্বদৈক্যং ন সম্বন্ধঃ প্রপঞ্চপরমাত্মনোঃ
ছায়াতপৌ য়থা লোকে পরস্পরবিলক্ষণৌ ॥ ২.১১॥
তদ্বত্ প্রপঞ্চপুরুষৌ বিভিন্নৌ পরমার্থতঃ ।
তথাত্মা মলিনোঽসৃষ্টো বিকারী স্যাত্ স্বভাবতঃ ॥ ২.১২॥
নহি তস্য ভবেন্মুক্তির্জন্মান্তরশতৈরপি ।
পশ্যন্তি মুনয়ো য়ুক্তাঃ স্বাত্মানং পরমার্থতঃ ॥ ২.১৩॥
বিকারহীনং নির্দুঃ খমানন্দাত্মানমব্যয়ম্ ।
অহ কর্ত্তা সুখী দুঃখী কৃশঃ স্থূলেতি য়া মতিঃ ॥ ২.১৪॥
সা চাহঙ্কারকর্তৃত্বাদাত্মন্যারোপ্যতে জনৈঃ ।
বদন্তি বেদবিদ্বাংসঃ সাক্ষিণং প্রকৃতেঃ পরম্ ॥ ২.১৫॥
ভোক্তারমক্ষরং শুদ্ধং সর্বত্র সমবস্থিতম্ ।
তস্মাদজ্ঞানমূলো হি সংসারঃ সর্বদেহিনাম্ ॥ ২.১৬॥
অজ্ঞানাদন্যথা জ্ঞানাত্ তত্বং প্রকৃতিসঙ্গতম্ ।
নিত্যোদিতং স্বয়ং জ্যোতিঃ সর্বগঃ পুরুষঃ পরঃ ॥ ২.১৭॥
অহঙ্কারাবিবেকেন কর্ত্তাহমিতি মন্যতে ।
পশ্যন্তি ঋষয়োঽব্যক্তং নিত্যং সদসদাত্মকম্ ॥ ২.১৮॥
প্রধানং প্রকৃতিং বুদ্ধ্বা কারণং ব্রহ্মবাদিনঃ ।
তেনায়ং সঙ্গতো হ্যাত্মা কূটস্থোঽপি নিরঞ্জনঃ ॥ ২.১৯॥
স্বাত্মানমক্ষরং ব্রহ্ম নাববুদ্ধ্যেত তত্ত্বতঃ ।
অনাত্মন্যাত্মবিজ্ঞানং তস্মাদ্ দুঃখং তথেতরত্ ॥ ২.২০॥
রগদ্বেষাদয়ো দোষাঃ সর্বে ভ্রান্তিনিবন্ধনাঃ ।
কর্মাণ্যস্য ভবেদ্ দোষঃ পুণ্যাপুণ্যমিতি স্থিতিঃ ॥ ২.২১॥
তদ্বশাদেব সর্বেষাং সর্বদেহসমুদ্ভবঃ ।
নিত্যঃ সর্বত্রগো হ্যাত্মা কূটস্থো দোষবর্জিতঃ ॥ ২.২২॥
একঃ স ভিদ্যতে শক্ত্যা মায়য়া ন স্বভাবতঃ ।
তস্মাদদ্বৈতমেবাহুর্মুনয়ঃ পরমার্থতঃ ॥ ২.২৩॥
ভেদো ব্যক্তস্বভাবেন সা চ মায়াত্মসংশ্রয়া ।
য়থা হি ধূমসম্পর্কান্নাকাশো মলিনো ভবেত্ ॥ ২.২৪॥
অন্তঃ করণজৈর্ভাবৈরাত্মা তদ্বন্ন লিপ্যতে ।
য়থা স্বপ্রভয়া ভাতি কেবলঃ স্ফটিকোঽমলঃ ॥ ২.২৫॥
উপাধিহীনো বিমলস্তথৈবাত্মা প্রকাশতে ।
জ্ঞানস্বূপমেবাহুর্জগদেতদ্ বিচক্ষণাঃ ॥ ২.২৬॥
অর্থস্বরূপমেবান্যে পশ্যন্ত্যন্যে কুদৃষ্টয়ঃ ।
কূটস্থো নির্গুণো ব্যাপী চৈতন্যাত্মা স্বভাবতঃ ॥ ২.২৭॥
দৃশ্যতে হ্যর্থরূপেণ পুরুষৈর্জ্ঞানদৃষ্টিভিঃ ।
য়থা স লক্ষ্যতে রক্তঃ কেবলঃ স্ফটিকো জনৈঃ ॥ ২.২৮॥
রক্তিকাদ্যুপধানেন তদ্বত্ পরমপূরুষঃ ।
তস্মাদাত্মাঽক্ষরঃ শুদ্ধো নিত্যঃ সর্বগতোঽব্যয়ঃ ॥ ২.২৯॥
উপাসিতব্যো মন্তব্যঃ শ্রোতব্যশ্চ মুমুক্ষুভিঃ ।
য়দা মনসি চৈতন্যং ভাতি সর্বত্রগং সদা ॥ ২.৩০॥
য়োগিনোঽব্যবধানেন তদা সম্পদ্যতে স্বয়ম্ ।
য়দা সর্বাণি ভূতানি স্বাত্মন্যেবাভিপশ্যতি ॥ ২.৩১॥
সর্বভূতেষু চাত্মানং ব্রহ্ম সম্পদ্যতে তদা ।
য়দা সর্বাণি ভূতানি সমাধিস্থো ন পশ্যতি ॥ ২.৩২॥
একীভূতঃ পরেণাসৌ তদা ভবতি কেবলম্ ।
য়দা সর্বে প্রমুচ্যন্তে কামা য়েঽস্য হৃদি স্থিতাঃ ॥ ২.৩৩॥
তদাঽসাবমৃতীভূতঃ ক্ষেমং গচ্ছতি পণ্ডিতঃ ।
য়দা ভূতপৃথগ্ভাবমেকস্থমনুপশ্যতি ॥ ২.৩৪॥
তত এব চ বিস্তারং ব্রহ্ম সম্পদ্যতে তদা ।
য়দা পশ্যতি চাত্মানং কেবলং পরমার্থতঃ ॥ ২.৩৫॥
মায়ামাত্রং জগত্ কৃত্স্নং তদা ভবতি নির্বৃতঃ ॥ ২.৩৬॥
য়দা জন্মজরাদুঃখব্যাধীনামেকভেষজম্ ।
কেবলং ব্রহ্মবিজ্ঞানং জায়তেঽসৌ তদা শিবঃ ॥ ২.৩৭॥
য়থা নদীনদা লোকে সাগরেণৈকতাং য়য়ুঃ ।
তদ্বদাত্মাঽক্ষরেণাসৌ নিষ্কলেনৈকতাং ব্রজেত্ ॥ ২.৩৮॥
তস্মাদ্ বিজ্ঞানমেবাস্তি ন প্রপঞ্চো ন সংসৃতিঃ ।
অজ্ঞানেনাবৃতং লোকো বিজ্ঞানং তেন মুহ্যতি ॥ ২.৩৯॥
তজ্জ্ঞানং নির্মলং সূক্ষ্মং নির্বিকল্পং তদব্যয়ম্ ।
অজ্ঞানমিতরত্ সর্বং বিজ্ঞানমিতি তন্মতম্ ॥ ২.৪০॥
এতদ্বঃ কথিতং সাঙ্খ্যং ভাষিতং জ্ঞানমুত্তমম্ ।
সর্ববেদান্তসারং হি য়োগস্তত্রৈকচিত্ততা ॥ ২.৪১॥
য়োগাত্ সঞ্জায়তে জ্ঞানং জ্ঞানাদ্ য়োগঃ প্রবর্ত্ততে ।
য়োগজ্ঞানাভিয়ুক্তস্য নাবাপ্যং বিদ্যতে ক্বচিত্ ॥ ২.৪২॥
য়দেব য়োগিনো য়ান্তি সাঙ্খ্যৈস্তদধিগম্যতে ।
একং সাঙ্খ্যং চ য়োগং চ য়ঃ পশ্যতি স তত্ত্ববিত্ ॥ ২.৪৩॥
অন্যে চ য়োগিনো বিপ্রা ঐশ্বর্যাসক্তচেতসঃ ।
মজ্জন্তি তত্র তত্রৈব য়ে চান্যেকুণ্টবুদ্ধয়ঃ ॥ ২.৪৪॥
য়ত্তত্ সর্বগতং দিব্যমৈশ্বর্যমচলং মহত্ ।
জ্ঞানয়োগাভিয়ুক্তস্তু দেহান্তে তদবাপ্নুয়াত্ ॥ ২.৪৫॥
এষ আত্মাঽহমব্যক্তো মায়াবী পরমেশ্বরঃ ।
কীর্তিতঃ সর্ববেদেষু সর্বাত্মা সর্বতোমুখঃ ॥ ২.৪৬॥
সর্বকামঃ সর্বরসঃ সর্বগন্ধোঽজরোঽমরঃ ।
সর্বতঃ পাণিপাদোঽহমন্তর্যামী সনাতনঃ ॥ ২.৪৭॥
অপাণিপাদো জবনো গ্রহীতা হৃদি সংস্থিতঃ ।
অচক্ষুরপি পশ্যামি তথাঽকর্ণঃ শ্রৃণোম্যহম্ ॥ ২.৪৮॥
বেদাহং সর্বমেবেদং ন মাং জানাতি কশ্চন ।
প্রাহুর্মহান্তং পুরুষং মামেকং তত্ত্বদর্শিনঃ ॥ ২.৪৯॥
পশ্যন্তি ঋষয়ো হেতুমাত্মনঃ সূক্ষ্মদর্শিনঃ ।
নির্গুণামলরূপস্য য়ত্তদৈশ্বর্যমুত্তমম্ ॥ ২.৫০॥
য়ন্ন দেবা বিজানন্তি মোহিতা মম মায়য়া ।
বক্ষ্যে সমাহিতা য়ূয়ং শ্রৃণুধ্বং ব্রহ্মবাদিনঃ ॥ ২.৫১॥
নাহং প্রশাস্তা সর্বস্য মায়াতীতঃ স্বভাবতঃ ।
প্রেরয়ামি তথাপীদং কারণং সূরয়ো বিদুঃ ॥ ২.৫২॥
য়ন্মে গুহ্যতমং দেহং সর্বগং তত্ত্বদর্শিনঃ ।
প্রবিষ্টা মম সায়ুজ্যং লভন্তে য়োগিনোঽব্যয়ম্ ॥ ২.৫৩॥
তেষাং হি বশমাপন্না মায়া মে বিশ্বরূপিণী ।
লভন্তে পরমং শুদ্ধং নির্বাণং তে ময়া সহ ॥ ২.৫৪॥
ন তেষাং পুনরাবৃত্তিঃ কল্পকোটিশতৈরপি ।
প্রসাদান্মম য়োগীন্দ্রা এতদ্ বেদানুসাসনম্ ॥ ২.৫৫॥
তত্পুত্রশিষ্যয়োগিভ্যো দাতব্যং ব্রহ্মবাদিভিঃ ।
মদুক্তমেতদ্ বিজ্ঞানং সাঙ্খ্যং য়োগসমাশ্রয়ম্ ॥ ২.৫৬॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) দ্বিতীয়োঽধ্যায়ঃ ॥ ২॥
তৃতীয়োঽধ্যায়ঃ
ঈশ্বর উবাচ
অব্যক্তাদভবত্ কালঃ প্রধানং পুরুষঃ পরঃ ।
তেভ্যঃ সর্বমিদং জাতং তস্মাদ্ ব্রহ্মময়ং জগত্ ॥ ৩.১॥
সর্বতঃ পাণিপাদান্তং সর্বতোঽক্ষিশিরোমুখম্ ।
সর্বতঃ শ্রুতিমল্লোকে সর্বমাবৃত্য তিষ্ঠতি ॥ ৩.২॥
সর্বেন্দ্রিয়গুণাভাসং সর্বেন্দ্রিয়বিবর্জিতম্ ।
সর্বাধারং সদানন্দমব্যক্তং দ্বৈতবর্জিতম্ ॥ ৩.৩॥
সর্বোপমানরহিতং প্রমাণাতীতগোচরম্ ।
নির্বকল্পং নিরাভাসং সর্বাবাসং পরামৃতম্ ॥ ৩.৪॥
অভিন্নং ভিন্নসংস্থানং শাশ্বতং ধ্রুবমব্যয়ম্ ।
নির্গুণং পরমং ব্যোম তজ্জ্ঞানং সূরয়ো বিদুঃ ॥ ৩.৫॥
স আত্মা সর্বভূতানাং স বাহ্যাভ্যন্তরঃ পরঃ ।
সোঽহং সর্বত্রগঃ শান্তো জ্ঞানাত্মা পরমেশ্বরঃ ॥ ৩.৬॥
ময়া ততমিদং বিশ্বং জগদব্যক্তমূর্তিনা ।
মত্স্থানি সর্বভূতানি য়স্তং বেদ স বেদবিত্ ॥ ৩.৭॥
প্রধানং পুরুষং চৈব তদ্বস্তু সমুদাহৃতম্ ।
তয়োরনাদিরুদ্দিষ্টঃ কালঃ সংয়োগজঃ পরঃ ॥ ৩.৮॥
ত্রয়মেতদনাদ্যন্তমব্যক্তে সমবস্থিতম্ ।
তদাত্মকং তদন্যত্ স্যাত্ তদ্রূপং মামকং বিদুঃ ॥ ৩.৯॥
মহদাদ্যং বিশেষান্তং সম্প্রসূতেঽখিলং জগত্ ।
য়া সা প্রকৃতিরুদ্দিষ্টা মোহিনী সর্বদেহিনাম্ ॥ ৩.১০॥
পুরুষঃ প্রকৃতিস্থো হি ভুঙ্ক্তেয়ঃ প্রাকৃতান্ গুণান্ ।
অহঙ্কারবিমুক্তত্বাত্ প্রোচ্যতে পঞ্চবিংশকঃ ॥ ৩.১১॥
আদ্যো বিকারঃ প্রকৃতের্মহানিতি চ কথ্যতে ।
বিজ্ঞাতৃশক্তির্বিজ্ঞানাত্ হ্যহঙ্কারস্তদুত্থিতঃ ॥ ৩.১২॥
এক এব মহানাত্মা সোঽহঙ্কারোঽভিধীয়তে ।
স জীবঃ সোঽন্তরাত্মেতি গীয়তে তত্ত্বচিন্তকৈঃ ॥ ৩.১৩॥
তেন বেদয়তে সর্বং সুখং দুঃ খং চ জন্মসু ।
স বিজ্ঞানাত্মকস্তস্য মনঃ স্যাদুপকারকম্ ॥ ৩.১৪॥
তেনাপি তন্ময়স্তস্মাত্ সংসারঃ পুরুষস্য তু ।
স চাবিবেকঃ প্রকৃতৌ সঙ্গাত্ কালেন সোঽভবত্ ॥ ৩.১৫॥
কালঃ সৃজতি ভূতানি কালঃ সংহরতি প্রজাঃ ।
সর্বে কালস্য বশগা ন কালঃ কস্যচিদ্ বশে ॥ ৩.১৬॥
সোঽন্তরা সর্বমেবেদং নিয়চ্ছতি সনাতনঃ ।
প্রোচ্যতে ভগবান্ প্রাণঃ সর্বজ্ঞঃ পুরুষোত্তমঃ ॥ ৩.১৭॥
সর্বেন্দ্রিয়েভ্যঃ পরমং মন আহুর্মনীষিণঃ ।
মনসশ্চাপ্যহঙ্কারমহঙ্কারান্মহান্ পরঃ ॥ ৩.১৮॥
মহতঃ পরমব্যক্তমব্যক্তাত্ পুরুষঃ পরঃ ।
পুরুষাদ্ ভগবান্ প্রাণস্তস্য সর্বমিদং জগত্ ॥ ৩.১৯॥
প্রাণাত্ পরতরং ব্যোম ব্যোমাতীতোঽগ্নিরীশ্বরঃ ।
সোঽহং ব্রহ্মাব্যয়ঃ শান্তো জ্ঞানাত্মা পরমেশ্বরঃ ।
নাস্তি মত্তঃ পরং ভূতং মাং বিজ্ঞায় মুচ্যতে ॥ ৩.২০॥
নিত্যং হি নাস্তি জগতি ভূতং স্থাবরজঙ্গমম্ ।
ঋতে মামেকমব্যক্তং ব্যোমরূপং মহেশ্বরম্ ॥ ৩.২১॥
সোঽহং সৃজামি সকলং সংহরামি সদা জগত্ ।
মায়ী মায়াময়ো দেবঃ কালেন সহ সঙ্গতঃ ॥ ৩.২২॥
মত্সন্নিধাবেষ কালঃ করোতি সকলং জগত্ ।
নিয়োজয়ত্যনন্তাত্মা হ্যেতদ্ বেদানুশাসনম্ ॥ ৩.২৩॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) তৃতীয়োঽধ্যায়ঃ ॥ ৩॥
চতুর্থোঽধ্যায়ঃ
ঈশ্বর উবাচ ।
বক্ষ্যে সমাহিতা য়ূয়ং শ্রৃণুধ্বং ব্রহ্মবাদিনঃ ।
মাহাত্ম্যং দেবদেবস্য য়েনে সর্বং প্রবর্ত্ততে ॥ ৪.১॥
নাহং তপোভির্বিবিধৈর্ন দানেন ন চেজ্যয়া ।
শক্যো হি পুরুষৈর্জ্ঞাতুমৃতে ভক্তিমনুত্তমাম্ ॥ ৪.২॥
অহং হি সর্বভাবানামন্তস্তিষ্ঠামি সর্বগঃ ।
মাং সর্বসাক্ষিণং লোকো ন জানাতি মুনীশ্বরাঃ ॥ ৪.৩॥
য়স্যান্তরা সর্বমিদং য়ো হি সর্বান্তকঃ পরঃ ।
সোঽহন্ধাতা বিধাতা চ কালোঽগ্নির্বিশ্বতোমুখঃ ॥ ৪.৪॥
ন মাং পশ্যন্তি মুনয়ঃ সর্বে পিতৃদিবৌকসঃ ।
ব্রহ্মা চ মনবঃ শক্রো য়ে চান্যে প্রথিতৌজসঃ ॥ ৪.৫॥
গৃণন্তি সততং বেদা মামেকং পরমেশ্বরম্ ।
য়জন্তি বিবিধৈরগ্নিং ব্রাহ্মণা বৈদিকৈর্মখৈঃ ॥ ৪.৬॥
সর্বে লোকা নমস্যন্তি ব্রহ্মা লোকপিতামহঃ ।
ধ্যায়ন্তি য়োগিনো দেবং ভূতাধিপতিমীশ্বরম্ ॥ ৪.৭॥
অহং হি সর্বহবিষাং ভোক্তা চৈব ফলপ্রদঃ ।
সর্বদেবতনুর্ভূত্বা সর্বাত্মা সর্বসম্প্লুতঃ ॥ ৪.৮॥
মাং পশ্যন্তীহ বিদ্বাংশো ধার্মিকা বেদবাদিনঃ ।
তেষাং সন্নিহিতো নিত্যং য়ে ভক্ত্যা মামুপাসতে ॥ ৪.৯॥
ব্রাহ্মণাঃ ক্ষত্রিয়া বৈশ্যা ধার্মিকা মামুপাসতে ।
তেষাং দদামি তত্ স্থানমানন্দং পরমং পদম্ ॥ ৪.১০॥
অন্যেঽপি য়ে স্বধর্মস্থাঃ শূদ্রাদ্যা নীচজাতয়ঃ ।
ভক্তিমন্তঃ প্রমুচ্যন্তে কালেন ময়ি সঙ্গতাঃ ॥ ৪.১১॥
ন মদ্ভক্তা বিনশ্যন্তি মদ্ভক্তা বীতকল্মষাঃ ।
আদাবেব প্রতিজ্ঞাতং ন মে ভক্তঃ প্রণশ্যতি ॥ ৪.১২॥
য়ো বৈ নিন্দতি তং মূঢো দেবদেবং স নিন্দতি ।
য়ো হি পূজয়তে ভক্ত্যা স পূজয়তি মাং সদা ॥ ৪.১৩॥
পত্রং পুষ্পং ফলং তোয়ং মদারাধনকারণাত্ ।
য়ো মে দদাতি নিয়তং স মে ভক্তঃ প্রিয়ো মতঃ ॥ ৪.১৪॥
অহং হি জগতামাদৌ ব্রহ্মাণং পরমেষ্ঠিনম্ ।
বিদধৌ দত্তবান্ বেদানশেষানাত্মনিঃ সৃতান্ ॥ ৪.১৫॥
অহমেব হি সর্বেষাং য়োগিনাং গুরুরব্যয়ঃ ।
ধার্মিকাণাং চ গোপ্তাঽহং নিহন্তা বেদবিদ্বিষাম্ ॥ ৪.১৬॥
অহং বৈ সর্বসংসারান্মোচকো য়োগিনামিহ ।
সংসারহেতুরেবাহং সর্বসংসারবর্জিতঃ ॥ ৪.১৭॥
অহমেব হি সংহর্ত্তা সংস্রষ্টা পরিপালকঃ ।
মায়াবী মামীকা শক্তির্মায়া লোকবিমোহিনী ॥ ৪.১৮॥
মমৈব চ পরা শক্তির্যা সা বিদ্যতে গীয়তে ।
নাশয়ামি চ তাং মায়াং য়োগিনাং হৃদি সংস্থিতঃ ॥ ৪.১৯॥
অহং হি সর্বশক্তীনাং প্রবর্ত্তকনিবর্ত্তকঃ ।
আধারভূতঃ সর্বাসাং নিধানমমৃতস্য চ ॥ ৪.২০॥
একা সর্বান্তরা শক্তিঃ করোতি বিবিধং জগত্ ।
আস্থায় ব্রহ্মাণো রূপং মন্ময়ী মদধিষ্ঠিতা ॥ ৪.২১॥
অন্যা চ শক্তির্বিপুলা সংস্থাপয়তি মে জগত্ ।
ভূত্বা নারায়ণোঽনন্তো জগন্নাথো জগন্ময়ঃ ॥ ৪.২২॥
তৃতীয়া মহতী শক্তির্নিহন্তি সকলং জগত্ ।
তামসী মে সমাখ্যাতা কালাখ্যা রুদ্ররূপিণী ॥ ৪.২৩॥
ধ্যানেন মাং প্রপশ্যন্তি কেচিজ্জ্ঞানেন চাপরে ।
অপরে ভক্তিয়োগেন কর্ময়োগেন চাপরে ॥ ৪.২৪॥
সর্বেষামেব ভক্তানামিষ্টঃ প্রিয়তমো মম ।
য়ো হি জ্ঞানেন মাং নিত্যমারাধয়তি নান্যথা ॥ ৪.২৫॥
অন্যে চ হরয়ে ভক্তা মদারাধনকাঙ্ক্ষিণঃ ।
তেঽপি মাং প্রাপ্নুবন্ত্যেব নাবর্ত্তন্তে চ বৈ পুনঃ ॥ ৪.২৬॥
ময়া ততমিদং কৃত্সনং প্রধানপুরুষাত্মকম্ ।
ময়্যেব সংস্থিতং চিত্তং ময়া সম্প্রের্যতে জগত্ ॥ ৪.২৭॥
নাহং প্রেরয়িতা বিপ্রাঃ পরমং য়োগমাশ্রিতঃ ।
প্রেরয়ামি জগত্কৃত্স্নমেতদ্যো বেদ সোঽমৃতঃ ॥ ৪.২৮॥
পশ্যাম্যশেষমেবেদং বর্ত্তমানং স্বভাবতঃ ।
করোতি কালো ভগবান্ মহায়োগেশ্বরঃ স্বয়ম্ ॥ ৪.২৯॥
য়োগঃ সম্প্রোচ্যতে য়োগী মায়ী শাস্ত্রেষু সূরিভিঃ ।
য়োগেশ্বরোঽসৌ ভগবান্ মহাদেবো মহান্ প্রভুঃ ॥ ৪.৩০॥
মহত্ত্বং সর্বতত্ত্বানাং বরত্বাত্ পরমেষ্ঠিনঃ ।
প্রোচ্যতে ভগবান্ ব্রহ্মা মহান্ ব্রহ্ময়োঽমলঃ ॥ ৪.৩১॥
য়ো মামেবং বিজানাতি মহায়োগেশ্বরেশ্বরম্ ।
সোঽবিকল্পেন য়োগেন য়ুজ্যতে নাত্র সংশয়ঃ ॥ ৪.৩২॥
সোঽহং প্রেরয়িতা দেবঃ পরমানন্দমাশ্রিতঃ ।
নৃত্যামি য়োগী সততং য়স্তদ্ বেদ স বেদবিত্ ॥ ৪.৩৩॥
ইতি গুহ্যতমং জ্ঞানং সর্ববেদেষু নিষ্ঠিতম্ ।
প্রসন্নচেতসে দেয়ং ধার্মিকায়াহিতাগ্নয়ে ॥ ৪.৩৪॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) চতুর্থোঽধ্যায়ঃ ॥ ৪॥
পঞ্চমোঽধ্যায়ঃ
ব্যাস উবাচ ।
এতাবদুক্ত্বা ভগবান্ য়োগিনাং পরমেশ্বরঃ ।
ননর্ত্ত পরমং ভাবমৈশ্বরং সম্প্রদর্শয়ন্ ॥ ৫.১॥
তং তে দদৃশুরীশানং তেজসাং পরমং নিধিম্ ।
নৃত্যমানং মহাদেবং বিষ্ণুনা গগনেঽমলে ॥ ৫.২॥
য়ং বিদুর্যোগতত্ত্বজ্ঞা য়োগিনো য়তমানসাঃ ।
তমীশং সর্বভূতানামাকশে দদৃশুঃ কিল ॥ ৫.৩॥
য়স্য মায়াময়ং সর্বং য়েনেদং প্রের্যতে জগত্ ।
নৃত্যমানঃ স্বয়ং বিপ্রৈর্বিশ্বেশঃ খলু দৃশ্যতে ॥ ৫.৪॥
য়ত্ পাদপঙ্কজং স্মৃত্বা পুরুষোঽজ্ঞানজং ভয়ম্ ।
জহতি নৃত্যমানং তং ভূতেশং দদৃশুঃ কিল ॥ ৫.৫॥
য়ং বিনিদ্রা জিতশ্বাসাঃ শান্তা ভক্তিসমন্বিতাঃ ।
জ্যোতির্ময়ং প্রপশ্যন্তি স য়োগী দৃশ্যতে কিল ॥ ৫.৬॥
য়োঽজ্ঞানান্মোচয়েত্ ক্ষিপ্রং প্রসন্নো ভক্তবত্সলঃ ।
তমেব মোচনং রুদ্রমাকাশে দদৃশুঃ পরম্ ॥ ৫.৮॥
সহস্রশিরসং দেবং সহস্রচরণাকৃতিম্ ।
সহস্রবাহুং জটিলং চন্দ্রার্ধকৃতশেখরম্ ॥ ৫.৮॥
বসানং চর্ম বৈয়াঘ্রং শূলাসক্তমহাকরম্ ।
দণ্ডপাণিং ত্রয়ীনেত্রং সূর্যসোমাগ্নিলোচনম্ ॥ ৫.৯॥
ব্রহ্মাণ্ডং তেজসা স্বেন সর্বমাবৃত্য চ স্থিতম্ ।
দংষ্ট্রাকরালং দুর্দ্ধর্ষং সূর্যকোটিসমপ্রভম্ ॥ ৫.১০॥
অণ্ডস্থং চাণ্ডবাহ্যস্থং বাহ্যমভ্যন্তরং পরম্ ।
সৃজন্তমনলজ্বালং দহন্তমখিলং জগত্ ।
নৃত্যন্তং দদৃশুর্দেবং বিশ্বকর্মাণমীশ্বরম্ ॥ ৫.১১॥
মহাদেবং মহায়োগং দেবানামপি দৈবতম্ ।
পশূনাং পতিমীশানং জ্যোতিষাং জ্যোতিরব্যয়ম্ ॥ ৫.১২॥
পিনাকিনং বিশালাক্ষং ভেষজং ভবরোগিণাম্ ।
কালাত্মানং কালকালং দেবদেবং মহেশ্বরম্ ॥ ৫.১৩॥
উমাপতিং বিরূপাক্ষং য়োগানন্দময়ং পরম্ ।
জ্ঞানবৈরাগ্যনিলয়ং জ্ঞানয়োগং সনাতনম্ ॥ ৫.১৪॥
শাশ্বতৈশ্বর্যবিভবং ধর্মাধারং দুরাসদম্ ।
মহেন্দ্রোপেন্দ্রনমিতং মহর্ষিগণবন্দিতম্ ॥ ৫.১৫॥
আধারং সর্বশক্তীনাং মহায়োগেশ্বরেশ্বরম্ ।
য়োগিনাং পরমং ব্রহ্ম য়োগিনাং য়োগবন্দিতম্ ।
য়োগিনাং হৃদি তিষ্ঠন্তং য়োগমায়াসমাবৃতম্ ॥॥
ক্ষণেন জগতো য়োনিং নারায়ণমনাময়ম্ ॥ ৫.১৬॥
ঈশ্বরেণৈকতাপন্নমপশ্যন্ ব্রহ্মবাদিনঃ ।
দৃষ্ট্বা তদৈশ্বরং রূপং রুদ্রনারায়ণাত্মকম্ ।
কৃতার্থং মেনিরে সন্তঃ স্বাত্মানং ব্রহ্মবাদিনঃ ॥ ৫.১৮॥
সনত্কুমারঃ সনকো ভৃগুশ্চসনাতনশ্চৈব সনন্দনশ্চ ।
রৈভ্যোঽঙ্গিরা বামদেবোঽথ শুক্রো মহর্ষিরত্রিঃ কপিলো মরীচিঃ ॥ ৫.১৮॥
দৃষ্ট্বাঽথ রুদ্রং জগদীশিতারন্তং পদ্মনাভাশ্রিতবামভাগম্ ।
ধ্যাত্বা হৃদিস্থং প্রণিপত্য মূর্ধ্নাবদ্ধ্বাঞ্জলিং স্বেষু
শিরঃ সু ভূয়ঃ ॥ ৫.১৯॥
ওঙ্কারমুচ্চার্য বিলোক্য দেব-মন্তঃ শরীরে নিহিতং গুহায়াম্ ।
সমস্তুবন্ ব্রহ্মময়ৈর্বচোভি-রানন্দপূর্ণায়তমানসাস্তে ॥ ৫.২০॥
মুনয় ঊচুঃ
ত্বামেকমীশং পুরুষং পুরাণম্প্রাণেশ্বরং রুদ্রমনন্তয়োগম্ ।
নমাম সর্বে হৃদি সন্নিবিষ্টম্প্রচেতসং ব্রহ্মময়ং পবিত্রম্ ॥ ৫.২১॥
ত্বাং পশ্যন্তি মুনয়ো ব্রহ্ময়োনিন্দান্তাঃ শান্তা বিমলং রুক্মবর্ণম্ ।
ধ্যাত্বাত্মস্থমচলং স্বে শরীরে কবিং পরেভ্যঃ পরমং পরং চ ॥ ৫.২২॥
ত্বত্তঃ প্রসূতা জগতঃ প্রসূতিঃ সর্বাত্মভূস্ত্বং পরমাণুভূতঃ ।
অণোরণীয়ান্ মহতো মহীয়াং-স্ত্বামেব সর্বং প্রবদন্তি সন্তঃ ॥ ৫.২৩॥
হিরণ্যগর্ভো জগদন্তরাত্মা ত্বত্তোঽধিজাতঃ পুরুষঃ পুরাণঃ ।
সঞ্জায়মানো ভবতা বিসৃষ্টো য়থাবিধানং সকলং সসর্জ ॥ ৫.২৪॥
ত্বত্তো বেদাঃ সকলাঃ সম্প্রসূতা-স্ত্বয়্যেবান্তে সংস্থিতিং তে লভন্তে ।
পশ্যামস্ত্বাং জগতো হেতুভূতং নৃত্যন্তং স্বে হৃদয়ে সন্নিবিষ্টম্ ॥ ৫.২৫॥
ত্বয়ৈবেদং ভ্রাম্যতে ব্রহ্মচক্রংমায়াবী ত্বং জগতামেকনাথঃ ।
নমামস্ত্বাং শরণং সম্প্রপন্নায়োগাত্মানং চিত্পতিং দিব্যনৃত্যম্ ॥ ৫.২৬॥
পশ্যামস্ত্ত্বাং পরমাকাশমধ্যেনৃত্যন্তং তে মহিমানং স্মরামঃ ।
সর্বাত্মানং বহুধা সন্নিবিষ্টম্ব্রহ্মানন্দমনুভূয়ানুভূয় ॥ ৫.২৮॥
ওঁকারস্তে বাচকো মুক্তিবীজন্ত্বমক্ষরং প্রকৃতৌ গূঢরূপম্ ।
তত্ত্বাং সত্যং প্রবদন্তীহ সন্তঃস্বয়ম্প্রভং ভবতো য়ত্প্রভাবম্ ॥ ৫.২৮॥
স্তুবন্তি ত্বাং সততং সর্ববেদানমন্তি ত্বামৃষয়ঃ ক্ষীণদোষাঃ ।
শান্তাত্মানঃ সত্যসন্ধং বরিষ্ঠবিশন্তি ত্বাং য়তয়ো ব্রহ্মনিষ্ঠাঃ ॥ ৫.২৯॥
একো বেদো বহুশাখো হ্যনন্তস্ত্বামেবৈকং বোধয়ত্যেকরূপম্ ।
বংন্দ্যং ত্বাং য়ে শরণং সম্প্রপন্না-স্তেষাং শান্তিঃ শাশ্বতী
নেতরেষাম্ ॥ ৫.৩০॥
ভবানীশোঽনাদিমাংস্তেজোরাশি-র্ব্রহ্মা বিশ্বং পরমেষ্ঠী বরিষ্টঃ ।
স্বাত্মানন্দমনুভূয় বিশন্তেস্বয়ং জ্যোতিরচলো নিত্যমুক্তাঃ ॥ ৫.৩১॥
একো রুদ্রস্ত্বং করোষীহ বিশ্বন্ত্বং পালয়স্যখিলং বিশ্বরূপম্ ।
ত্বামেবান্তে নিলয়ং বিন্দতীদং নমামস্ত্বাং শরণং সম্প্রপন্নাঃ ॥ ৫.৩২॥
ত্বামেকমাহুঃ কবিমেকরুদ্রম্ব্রহ্মং বৃহন্তং হরিমগ্নিমীশম্ ।
ইন্দ্রং মৃত্যুমনিলং চেকিতানন্ধাতারমাদিত্যমনেকরূপম্ ॥ ৫.৩৩॥
ত্বমক্ষরং পরমং বেদিতব্যং ত্বমস্য বিশ্বস্য পরং নিধানম্ ।
ত্বমব্যয়ঃ শাশ্বতধর্মগোপ্তাসনাতনস্ত্বং পুরুষোত্তমোঽসি ॥ ৫.৩৪॥
ত্বমেব বিষ্ণুশ্চতুরাননস্ত্বং ত্বমেব রুদ্রো ভগবানপীশঃ ।
ত্বং বিশ্বনাথঃ প্রকৃতিঃ প্রতিষ্ঠাসর্বেশ্বরস্ত্বং
পরমেশ্বরোঽসি ॥ ৫.৩৫॥
ত্বামেকমাহুঃ পুরুষং পুরাণ-মাদিত্যবর্ণং তমসঃ পরস্তাত্ ।
চিন্মাত্রমব্যক্তমচিন্ত্যরূপঙ্খং ব্রহ্ম শূন্যং প্রকৃতিং নির্গুণং
চ ॥ ৫.৩৬॥
য়দন্তরা সর্বমিদং বিভাতি য়দব্যয়ং নির্মলমেকরূপম্ ।
কিমপ্যচিন্ত্যং তব রূপমেতত্ তদন্তরা য়ত্প্রতিভাতি তত্ত্বম্ ॥ ৫.৩৮॥
য়োগেশ্বরং ভদ্রমনন্তশক্তিম্পরায়ণং ব্রহ্মতনুং পুরাণম্ ।
নমাম সর্বে শরণার্থিনস্ত্বাম্প্রসীদ ভূতাধিপতে মহেশ ॥ ৫.৩৮॥
ত্বত্পাদপদ্মস্মরণাদশেষ-সংসারবীজং নিলয়ং প্রয়াতি ।
মনো নিয়ম্য প্রণিধায় কায়ম্প্রসাদয়ামো বয়মেকমীশম্ ॥ ৫.৩৯॥
নমো ভবায়াস্তু ভবোদ্ভবায়কালায় সর্বায় হরায় তুম্যম্ ।
নমোঽস্তু রুদ্রায় কপর্দিনে তে নমোঽগ্নয়ে দেব নমঃ শিবায় ॥ ৫.৪০॥
ততঃ স ভগবান্ প্রীতঃ কপর্দী বৃষবাহনঃ ।
সংহৃত্য পরমং রূপং প্রকৃতিস্থোঽভবদ্ ভবঃ ॥ ৫.৪১॥
তে ভবং বূতভব্যেশং পূর্ববত্ সমবস্থিতম্ ।
দৃষ্ট্বা নারায়ণং দেবং বিস্মিতং বাক্যমব্রুবন্ ॥ ৫.৪২॥
ভগবন্ ভূতভব্যেশ গোবৃষাঙ্কিতশাসন ।
দৃষ্ট্বা তে পরমং রূপং নির্বৃতাঃ স্ম সনাতন ॥ ৫.৪৩॥
ভবত্প্রসাদাদমলে পরস্মিন্ পরমেশ্বরে ।
অস্মাকং জায়তে ভক্তিস্ত্বয়্যেবাব্যভিচারিণী ॥ ৫.৪৪॥
ইদানীং শ্রোতুমিচ্ছামো মাহাত্ম্যং তব শঙ্কর ।
ভূয়োঽপি তারয়ন্নিত্যং য়াথাত্ম্যং পরমেষ্ঠিনঃ ॥ ৫.৪৫॥
স তেষাং বাক্যমাকর্ণ্য য়োগিনাং য়োগসিদ্ধিদঃ ।
প্রাহঃ গম্ভীরয়া বাচা সমালোক্য চ মাধবম্ ॥ ৫.৪৬॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) পঞ্চমোঽধ্যায়ঃ ॥ ৫॥
ষষ্ঠোঽধ্যায়ঃ
ঈশ্বর উবাচ ।
শ্রৃণুধ্বমৃষয়ঃ সর্বে য়থাবত্ পরমেষ্ঠিনঃ ।
বক্ষ্যামীশস্য মাহাত্ম্যং য়ত্তদ্বেদবিদো বিদুঃ ॥ ৬.১॥
সর্বলোকৈকনির্মাতা সর্বলোকৈকরক্ষিতা ।
সর্বলোকৈকসংহর্ত্তা সর্বাত্মাঽহং সনাতনঃ ॥ ৬.২॥
সর্বেষামেব বস্তূনামন্তর্যামী মহেশ্বরঃ ।
মধ্যে চান্তঃ স্থিতং সর্বং নাহং সর্বত্র সংস্থিতঃ ॥ ৬.৩॥
ভবদ্ভিরদ্ভুতং দৃষ্টং য়ত্স্বরূপং তু মামকম্ ।
মমৈষা হ্যুপমা বিপ্রা মায়য়া দর্শিতা ময়া ॥ ৬.৪॥
সর্বেষামেব ভাবানামন্তরা সমবস্থিতঃ ।
প্রেরয়ামি জগত্ কৃত্স্নং ক্রিয়াশাক্তিরিয়ং মম ॥ ৬.৫॥
য়য়েদং চেষ্টতে বিশ্বং তত্স্বভাবানুবর্ত্তি চ ।
সোঽহং কালো জগত্ কৃত্স্নং প্রেরয়ামি কলাত্মকম্ ॥ ৬.৬॥
একাংশেন জগত্ কৃত্স্নং করোমি মুনিপুঙ্গবাঃ ।
সংহরাম্যেকরূপেণ স্থিতাঽবস্থা মমৈব তু ॥ ৬.৭॥
আদিমধ্যান্তনির্মুক্তো মায়াতত্ত্বপ্রবর্ত্তকঃ ।
ক্ষোভয়ামি চ সর্গাদৌ প্রধানপুরুষাবুভৌ ॥ ৬.৮॥
তাভ্যাং সঞ্জায়তে বিশ্বং সংয়ুক্তাভ্যাং পরস্পরম্ ।
মহদাদিক্রমেণৈব মম তেজো বিজৃম্ভতে ॥ ৬.৯॥
য়ো হি সর্বজগত্সাক্ষী কালচক্রপ্রবর্ত্তকঃ ।
হিরণ্যগর্ভো মার্ত্তণ্ডঃ সোঽপি মদ্দেহসম্ভবঃ ॥ ৬.১০॥
তস্মৈ দিব্যং স্বমৈশ্বর্যং জ্ঞানয়োগং সনাতনম্ ।
দত্তবানাত্মজান্ বেদান্ কল্পাদৌ চতুরো দ্বিজাঃ ॥ ৬.১১॥
স মন্নিয়োগতো দেবো ব্রহ্মা মদ্ভাবভাবিতঃ ।
দিব্যং তন্মামকৈশ্বর্যং সর্বদা বহতি স্বয়ম্ ॥ ৬.১২॥
স সর্বলোকনির্মাতা মন্নিয়োগেন সর্ববিত্ ।
ভূত্বা চতুর্মুখঃ সর্গং সৃজত্যেবাত্মসম্ভবঃ ॥ ৬.১৩॥
য়োঽপি নারায়ণোঽনন্তো লোকানাং প্রভবাব্যয়ঃ ।
মমৈব পরমা মূর্তিঃ করোতি পরিপালনম্ ॥ ৬.১৪॥
য়োঽন্তকঃ সর্বভূতানাং রুদ্রঃ কালাত্মকঃ প্রভুঃ ।
মদাজ্ঞয়াঽসৌ সততং সংহরিষ্যতি মে তনুঃ ॥ ৬.১৫॥
হব্যং বহতি দেবানাং কব্যং কব্যাশিনামপি ।
পাকং চ কুরুতে বহ্নিঃ সোঽপি মচ্ছক্তিনোদিতঃ ॥ ৬.১৬॥
ভুক্তমাহারজাতং চ পচতে তদহর্নিশম্ ।
বৈশ্বানরোঽগ্নির্ভগবানীশ্বরস্য নিয়োগতঃ ॥ ৬.১৭॥
য়োঽপি সর্বাম্ভসাং য়োনির্বরুণো দেবপুঙ্গবঃ ।
সোঽপি সঞ্জীবয়েত্ কৃত্স্নমীশস্যৈব নিয়োগতঃ ॥ ৬.১৮॥
য়োঽন্তস্তিষ্ঠতি ভূতানাং বহির্দেবঃ প্রভঞ্জনঃ ।
মদাজ্ঞয়াঽসৌ ভূতানাং শরীরাণি বিভর্তি হি ॥ ৬.১৯॥
য়োঽপি সঞ্জীবনো নৄণাং দেবানামমৃতাকরঃ ।
সোমঃ স মন্নিয়োগেন চোদিতঃ কিল বর্ততে ॥ ৬.২০॥
য়ঃ স্বভাসা জগত্ কৃত্স্নং প্রকাশয়তি সর্বদা ।
সূর্যো বৃষ্টিং বিতনুতে শাস্ত্রেণৈব স্বয়ম্ভুবঃ ॥ ৬.২১॥
য়োঽপ্যশেষজগচ্ছাস্তা শক্রঃ সর্বামরেশ্বরঃ ।
য়জ্বনাং ফলদো দেবো বর্ত্ততেঽসৌ মদাজ্ঞয়া ॥ ৬.২২॥
য়ঃ প্রশাস্তা হ্যসাধূনাং বর্ত্ততে নিয়মাদিহ ।
য়মো বৈবস্বতো দেবো দেবদেবনিয়োগতঃ ॥ ৬.২৩॥
য়োঽপি সর্বধনাধ্যক্ষো ধনানাং সম্প্রদায়কঃ ।
সোঽপীশ্বরনিয়োগেন কুবেরো বর্ত্ততে সদা ॥ ৬.২৪॥
য়ঃ সর্বরক্ষসাং নাথস্তামসানাং ফলপ্রদঃ ।
মন্নিয়োগাদসৌ দেবো বর্ত্ততে নিরৃতিঃ সদা ॥ ৬.২৫॥
বেতালগণভূতানাং স্বামী ভোগফলপ্রদঃ ।
ঈশানঃ কিল ভক্তানাং সোঽপি তিষ্ঠন্মমাজ্ঞয়া ॥ ৬.২৬॥
য়ো বামদেবোঽঙ্গিরসঃ শিষ্যো রুদ্রগণাগ্রণীঃ ।
রক্ষকো য়োগিনাং নিত্যং বর্ত্ততেঽসৌ মদাজ্ঞয়া ॥ ৬.২৭॥
য়শ্চ সর্বজগত্পূজ্যো বর্ত্ততে বিঘ্নকারকঃ ।
বিনায়কো ধর্মরতঃ সোঽপি মদ্বচনাত্ কিল ॥ ৬.২৮॥
য়োঽপি ব্রহ্মবিদাং শ্রেষ্ঠো দেবসেনাপতিঃ প্রভুঃ ।
স্কন্দোঽসৌ বর্ত্ততে নিত্যং স্বয়ম্ভূর্বিধিচোদিতঃ ॥ ৬.২৯॥
য়ে চ প্রজানাং পতয়ো মরীচ্যাদ্যা মহর্ষয়ঃ ।
সৃজন্তি বিবিধং লোকং পরস্যৈব নিয়োগতঃ ॥ ৬.৩০॥
য়া চ শ্রীঃ সর্বভূতানাং দদাতি বিপুলাং শ্রিয়ম্ ।
পত্নী নারায়ণস্যাসৌ বর্ত্ততে মদনুগ্রহাত্ ॥ ৬.৩১॥
বাচং দদাতি বিপুলাং য়া চ দেবী সরস্বতী ।
সাঽপীশ্বরনিয়োগেন চোদিতা সম্প্রবর্ত্ততে ॥ ৬.৩২॥
য়াঽশেষপুরুষান্ ঘোরান্নরকাত্ তারয়িষ্যতি ।
সাবিত্রী সংস্মৃতা দেবী দেবাজ্ঞাঽনুবিধায়িনী ॥ ৬.৩৩॥
পার্বতী পরমা দেবী ব্রহ্মবিদ্যাপ্রদায়িনী ।
য়াঽপি ধ্যাতা বিশেষেণ সাপি মদ্বচনানুগা ॥ ৬.৩৪॥
য়োঽনন্তমহিমাঽনন্তঃ শেষোঽশেষামরপ্রভুঃ ।
দধাতি শিরসা লোকং সোঽপি দেবনিয়োগতঃ ॥ ৬.৩৫॥
য়োঽগ্নিঃ সংবর্ত্তকো নিত্যং বডবারূপসংস্থিতঃ ।
পিবত্যখিলমম্ভোধিমীশ্বরস্য নিয়োগতঃ ॥ ৬.৩৬॥
য়ে চতুর্দশ লোকেঽস্মিন্ মনবঃ প্রথিতৌজসঃ ।
পালয়ন্তি প্রজাঃ সর্বাস্তেঽপি তস্য নিয়োগতঃ ॥ ৬.৩৭॥
আদিত্যা বসবো রুদ্রা মরুতশ্চ তথাঽশ্বিনৌ ।
অন্যাশ্চ দেবতাঃ সর্বা মচ্ছাস্ত্রেণৈব নিষ্ঠিতাঃ ॥ ৬.৩৮॥
গন্ধর্বা গরুডা ঋক্ষাঃ সিদ্ধাঃ সাধ্যাশ্চচারণাঃ ।
য়ক্ষরক্ষঃ পিশাচাশ্চ স্থিতাঃ সৃষ্টাঃ স্বয়ম্ভুবঃ ॥ ৬.৩৯॥
কলাকাষ্ঠানিমেষাশ্চ মুহূর্ত্তা দিবসাঃ ক্ষপাঃ ।
ঋতবঃ পক্ষমাসাশ্চ স্থিতাঃ শাস্ত্রে প্রজাপতেঃ ॥ ৬.৪০॥
য়ুগমন্বন্তরাণ্যেব মম তিষ্ঠন্তি শাসনে ।
পরাশ্চৈব পরার্ধাশ্চ কালভেদাস্তথা পরে ॥ ৬.৪১॥
চতুর্বিধানি বূতানি স্থাবরাণি চরাণি চ ।
নিয়োগাদেব বর্ত্তন্তে দেবস্য পরমাত্মনঃ ॥ ৬.৪২॥
পাতালানি চ সর্বাণি ভুবনানি চ শাসনাত্ ।
ব্রহ্মাণ্ডানি চ বর্ত্তন্তে সর্বাণ্যেব স্বয়ম্ভুবঃ ॥ ৬.৪৩॥
অতীতান্যপ্যসঙ্খ্যানি ব্রহ্মাণ্ডানি মমাজ্ঞয়া ।
প্রবৃত্তানি পদার্থৌঘৈঃ সহিতানি সমন্ততঃ ॥ ৬.৪৪॥
ব্রহ্মাণ্ডানি ভবিষ্যন্তি সহ বস্তুভিরাত্মগৈঃ ।
বহিষ্যন্তি সদৈবাজ্ঞাং পরস্য পরমাত্মনঃ ॥ ৬.৪৫॥
ভূমিরাপোঽনলো বায়ুঃ খং মনো বুদ্ধিরেব চ ।
ভূতাদিরাদিপ্রকৃতির্নিয়োগে মম বর্ত্ততে ॥ ৬.৪৬॥
য়োঽশেষজগতাং য়োনির্মোহিনী সর্বদেহিনাম্ ।
মায়া বিবর্ত্ততে নিত্যং সাপীশ্বরনিয়োগতঃ ॥ ৬.৪৭॥
য়ো বৈ দেহভৃতাং দেবঃ পুরুষঃ পঠ্যতে পরঃ ।
আত্মাঽসৌ বর্ত্ততে নিত্যমীশ্বরস্য নিয়োগতঃ ॥ ৬.৪৮॥
বিধূয় মোহকলিলং য়য়া পশ্যতি তত্ পদম্ ।
সাঽপি বুদ্ধির্মহেশস্য নিয়োগবশবর্ত্তিনী ॥ ৬.৪৯॥
বহুনাঽত্র কিমুক্তেন মম শক্ত্যাত্মকং জগত্ ॥॥
ময়ৈব প্রের্যতে কৃত্স্নং ময়্যেব প্রলয়ং ব্রজেত্ ॥ ৬.৫০॥
অহং হি ভগবানীশঃ স্বয়ং জ্যোতিঃ সনাতনঃ ।
পরমাত্মার পরং ব্রহ্ম মত্তো হ্যন্যো ন বিদ্যতে ॥ ৬.৫১॥
ইত্যেতত্ পরমং জ্ঞানং য়ুষ্মাকং কথিতং ময়া ।
জ্ঞাত্বা বিমুচ্যতে জন্তুর্জন্মসংসারবন্ধনাত্ ॥ ৬.৫২॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) ষষ্ঠোঽধ্যায়ঃ ॥ ৬॥
সপ্তমোঽধ্যায়ঃ
ঈশ্বর উবাচ ।
শ্রৃণুধ্বমৃষয়ঃ সর্বে প্রভাবং পরমেষ্ঠিনঃ ।
য়ং জ্ঞাত্বা পুরুষো মুক্তো ন সংসারে পতেত্ পুনঃ ॥ ৭.১॥
পরাত্ পরতরং ব্রহ্ম শাশ্বতং নিষ্কলং পরম্ ।
নিত্যানন্দং নির্বিকল্পং তদ্ধাম পরমং মম ॥ ৭.২॥
অহং ব্রহ্মবিদাং ব্রহ্মা স্বয়ম্ভূর্বিশ্বতোমুখঃ ।
মায়াবিনামহং দেবঃ পুরাণো হরিরব্যয়ঃ ॥ ৭.৩॥
য়োগিনামস্ম্যহং শম্ভুঃ স্ত্রীণাং দেবী গিরীন্দ্রজা ।
আদিত্যানামহং বিষ্ণুর্বসূনামস্মি পাবকঃ ॥ ৭.৪॥
রুদ্রাণাং শঙ্করশ্চাহং গরুডঃ পততামহম্ ।
ঐরাবতো গজেন্দ্রাণাং রামঃ শস্ত্রপ্রভৃতামহম্ ॥ ৭.৫॥
ঋষীণাং চ বসিষ্ঠোঽহং দেবানাং চ শতক্রতুঃ ।
শিল্পিনাং বিশ্বকর্মাঽহং প্রহ্লাদোঽস্ম্যমরদ্বিষাম্ ॥ ৭.৬॥
মুনীনামপ্যহং ব্যাসো গণানাং চ বিনায়কঃ ।
বীরাণাং বীরভদ্রোঽহং সিদ্ধানাং কপিলো মুনিঃ ॥ ৭.৭॥
পর্বতানামহং মেরুর্নক্ষত্রাণাং চ চন্দ্রমাঃ ।
বজ্রং প্রহরণানাং চ ব্রতানাং সত্যমস্ম্যহম্ ॥ ৭.৮॥
অনন্তো ভোগিনাং দেবঃ সেনানীনাং চ পাবকিঃ ।
আশ্রমাণাং চ গৃহস্থোঽহমীশ্বরাণাং মহেশ্বরঃ ॥ ৭.৯॥
মহাকল্পশ্চ কল্পানাং য়ুগানাং কৃতমস্ম্যহম্ ।
কুবেরঃ সর্বয়ক্ষাণাং গণেশানাং চ বীরুকঃ ॥ ৭.১০॥
প্রজাপতীনাং দক্ষোঽহং নিরৃতিঃ সর্বরক্ষসাম্ ।
বায়ুর্বলবতামস্মি দ্বীপানাং পুষ্করোঽস্ম্যহম্ ॥ ৭.১১॥
মৃগেন্দ্রাণাং চ সিংহোঽহং য়ন্ত্রাণাং ধনুরেব চ ।
বেদানাং সামবেদোঽহং য়জুষাং শতরুদ্রিয়ম্ ॥ ৭.১২॥
সাবিত্রী সর্বজপ্যানাং গুহ্যানাং প্রণবোঽস্ম্যহম্ ।
সূক্তানাং পৌরুষং সূক্তং জ্যেষ্ঠসাম চ সামসু ॥ ৭.১৩॥
সর্ববেদার্থবিদুষাং মনুঃ স্বায়ম্ভুবোঽস্ম্যহম্ ।
ব্রহ্মাবর্ত্তস্তু দেশানাং ক্ষেত্রাণামবিমুক্তকম্ ॥ ৭.১৪॥
বিদ্যানামাত্মবিদ্যাঽহং জ্ঞানানামৈশ্বরং পরম্ ।
ভূতানামস্ম্যহং ব্যোম সত্ত্বানাং মৃত্যুরেব চ ॥ ৭.১৫॥
পাশানামস্ম্যহং মায়া কালঃ কলয়তামহম্ ।
গতীনাং মুক্তিরেবাহং পরেষাং পরমেশ্বরঃ ॥ ৭.১৬॥
য়চ্চান্যদপি লোকেঽস্মিন্ সত্ত্বং তেজোবলাধিকম্ ।
তত্সর্বং প্রতিজানীধ্বং মম তেজোবিজৃম্ভিতম্ ॥ ৭.১৭॥
আত্মানঃ পশবঃ প্রোক্তাঃ সর্বে সংসারবর্ত্তিনঃ ।
তেষাং পতিরহং দেবঃ স্মৃতঃ পশুপতির্বুধৈঃ ॥ ৭.১৮॥
মায়াপাশেন বধ্নামি পশূনেতান্ স্বলীলয়া ।
মামেব মোচকং প্রাহুঃ পশূনাং বেদবাদিনঃ ॥ ৭.১৯॥
মায়াপাশেন বদ্ধানাং মোচকোঽন্যো ন বিদ্যতে ।
মামৃতে পরমাত্মানং ভূতাধিপতিমব্যয়ম্ ॥ ৭.২০॥
চতুর্বিশতিতত্ত্বানি মায়া কর্ম গুণা ইতি ।
এতে পাশাঃ পশুপতেঃ ক্লেশাশ্চ পশুবন্ধনাঃ ॥ ৭.২১॥
মনো বুদ্ধিরহঙ্কারঃ খানিলাগ্নিজলানি ভূঃ ।
এতাঃ প্রকৃতয়স্ত্বষ্টৌ বিকারাশ্চ তথাপরে ॥ ৭.২২॥
শ্রোত্রং ত্বক্চক্ষুষী জিহ্বা ঘ্রাণং চৈব তু পঞ্চমম্ ।
পায়ূপস্থং করৌ পাদৌ বাক্ চৈব দশমী মতা ॥ ৭.২৩॥
শব্দঃ স্পর্শশ্চ রূপং চ রসো গন্ধস্তথৈব চ ।
ত্রয়োবিংশতিরেতানি তত্ত্বানি প্রাকৃতানি ॥ ৭.২৪॥
চতুর্বিংশকমব্যক্তং প্রধানং গুণলক্ষণম্ ।
অনাদিমধ্যনিধনং কারণং জগতঃ পরম্ ॥ ৭.২৫॥
সত্ত্বং রজস্তমশ্চেতি গুণত্রয়মুদাহৃতম্ ।
সাম্যাবস্থিতিমেতেষামব্যক্তং প্রকৃতিং বিদুঃ ॥ ৭.২৬॥
সত্ত্বং জ্ঞানং তমোঽজ্ঞানং রজো মিশ্রমুদাহৃতম্ ।
গুণানাং বুদ্ধিবৈষম্যাদ্ বৈষম্যং কবয়ো বিদুঃ ॥ ৭.২৭॥
ধর্মাধর্মাবিতি প্রোক্তৌ পাশৌ দ্বৌ কর্মসঞ্জ্ঞিতৌ ।
ময়্যর্পিতানি কর্মাণি নবন্ধায় বিমুক্তয়ে ॥ ৭.২৮॥
অবিদ্যামস্মিতাং রাগং দ্বেষং চাভিনিবেশকম্ ।
ক্লেশাখ্যাংস্তান্ স্বয়ং প্রাহ পাশানাত্মনিবন্ধনান্ ॥ ৭.২৯॥
এতেষামেব পাশানাং মায়া কারণমুচ্যতে ।
মূলপ্রকৃতিরব্যক্তা সা শক্তির্ময়ি তিষ্ঠতি ॥ ৭.৩০॥
স এব মূলপ্রকৃতিঃ প্রধানং পুরুষোঽপি চ ।
বিকারা মহদাদীনি দেবদেবঃ সনাতনঃ ॥ ৭.৩১॥
স এব বন্ধঃ স চ বন্ধকর্ত্তাস এব পাশঃ পশুভৃত্স এব ।
স বেদ সর্বং ন চ তস্য বেত্তাতমাহুরাদ্যং পুরুষং পুরাণম্ ॥ ৭.৩২॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) সপ্তমোঽধ্যায়ঃ ॥ ৭॥
অষ্টমোঽধ্যায়ঃ
ঈশ্বর উবাচ ।
অন্যদ্ গুহ্যতমং জ্ঞানং বক্ষ্যে ব্রাহ্মণপুঙ্গবাঃ ।
য়েনাসৌ তরতে জন্তুর্ঘোরং সংসারসাগরম্ ॥ ৮.১॥
অহং ব্রহ্মময়ঃ শান্তঃ শাশ্বতো নির্মলোঽব্যয়ঃ ।
একাকী ভগবানুক্তঃ কেবলঃ পরমেশ্বরঃ ॥ ৮.২॥
মম য়োনির্মহদ্ ব্রহ্ম তত্র গর্ভং দধাম্যহম্ ।
মূল মায়াভিধানং তং ততো জাতমিদং জগত্ ॥ ৮.৩॥
প্রধানং পুরুষো হ্যত্মা মহান্ ভূতাদিরেব চ ।
তন্মাত্রাণি মহাভূতানীন্দ্রিয়াণি চ জজ্ঞিরে ॥ ৮.৪॥
ততোঽণ্ডমভবদ্ধৈমং সূর্যকোটিসমপ্রভম্ ।
তস্মিন্ জজ্ঞে মহাব্রহ্মা মচ্ছক্ত্যা চোপবৃংহিতঃ ॥ ৮.৫॥
য়ে চান্যে বহবো জীবা মন্ময়াঃ সর্ব এব তে ।
ন মাং পশ্যন্তি পিতরং মায়য়া মম মোহিতাঃ ॥ ৮.৬॥
য়াসু য়োনিষু সর্বাসু সম্ভবন্তি হি মূর্ত্তয়ঃ ।
তাসাং মায়া পরা য়োনির্মামেব পিতরং বিদুঃ ॥ ৮.৭॥
য়ো মামেবং বিজানাতি বীজিনং পিতরং প্রভুম্ ।
স ধীরঃ সর্বলোকেষু ন মোহমধিগচ্ছতি ॥ ৮.৮॥
ঈশানঃ সর্ববিদ্যানাং ভূতানাং পরমেশ্বরঃ ।
ওঙ্কারমূর্তির্ভগবানহং ব্রহ্মা প্রজাপতিঃ ॥ ৮.৯॥
সমং সর্বেষু ভূতেষু তিষ্ঠন্তং পরমেশ্বরম্ ।
বিনশ্যত্স্ববিনশ্যন্তং য়ঃ পশ্যতি স পশ্যতি ॥ ৮.১০॥
সমং পশ্যন্ হি সর্বত্র সমবস্থিতমীশ্বরম্ ।
ন হিনস্ত্যাত্মনাত্মানং ততো য়াতি পরাঙ্গতিম্ ॥ ৮.১১॥
বিদিত্বা সপ্ত সূক্ষ্মাণি ষডঙ্গং চ মহেশ্বরম্ ।
প্রধানবিনিয়োগজ্ঞঃ পরং ব্রহ্মাধিগচ্ছতি ॥ ৮.১২॥
সর্বজ্ঞতা তৃপ্তিরনাদিবোধঃ স্বতন্দতা নিত্যমলুপ্তশক্তিঃ ।
অনন্তশক্তিশ্চ বিভোর্বিদিত্বা ষডাহুরঙ্গানি মহেশ্বরস্য ॥ ৮.১৩॥
তন্মাত্রাণি মন আত্মা চ তানি সূক্ষ্মাণ্যাহুঃ সপ্ততত্ত্বাত্মকানি ।
য়া সা হেতুঃ প্রকৃতিঃ সা প্রধানম্বন্ধঃ প্রোক্তো বিনিয়োগোঽপি তেন ॥ ৮.১৪॥
য়া সা শক্তিঃ প্রকৃতৌ লীনরূপাবেদেষূক্তা কারণং ব্রহ্ময়োনিঃ ।
তস্যা একঃ পরমেষ্ঠী পুরস্তা-ন্মহেশ্বরঃ পুরুষঃ সত্যরূপঃ ॥ ৮.১৫॥
ব্রহামা য়োগী পরমাত্মা মহীয়ান্ ব্যোমব্যাপী বেদবেদ্যঃ পুরাণঃ ।
একো রুদ্রো মৃত্যুমব্যক্তমেকম্বীজং বিশ্বং দেব একঃ স এব ॥ ৮.১৬॥
তমেবৈকং প্রাহুরন্যেঽপ্যনেকং ত্বেকাত্মানং কেচিদন্যন্তমাহুঃ ।
অণোরণীয়ান্ মহতো মহীয়ান্ মহাদেবঃ প্রোচ্যতে বেদবিদ্ভিঃ ॥ ৮.১৭॥
এবম্ হি য়ো বেদ গুহাশয়ং পরং প্রভুং পুরাণং পুরুষং বিশ্বরূপম্ ।
হিরণ্ময়ং বুদ্ধিমতাং পরাং গতিংসবুদ্ধিমান্ বুদ্ধিমতীত্য তিষ্ঠতি ॥ ৮.১৮॥
ইতি শ্রীকূর্মপারাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) অষ্টমোঽধ্যায়ঃ ॥ ৮॥
নবমোঽধ্যায়ঃ
ঋষয় ঊচুঃ ।
নিষ্কলো নির্মলো নিত্যো নিষ্ক্রিয়ঃ পরমেশ্বরঃ ।
তন্নো বদ মহাদেব বিশ্বরূপঃ কথং ভবান্ ॥ ৯.১॥
ঈশ্বর উবাচ ।
নাহং বিশ্বো ন বিশ্বং চ মামৃতে বিদ্যতে দ্বিজাঃ ।
মায়ানিমিত্তমত্রাস্তি সা চাত্মনি ময়া শ্রিতা ॥ ৯.২॥
অনাদিনিধনা শক্তির্মায়াঽব্যক্তসমাশ্রয়া ।
তন্নিমিত্তঃ প্রপঞ্চোঽয়মব্যক্তাদভবত্ খলু ॥ ৯.৩॥
অব্যক্তং কারণং প্রাহুরানন্দং জ্যোতিরক্ষরম্ ।
অহমেব পরং ব্রহ্ম মত্তো হ্যন্যন্ন বিদ্যতে ॥ ৯.৪॥
তস্মান্মে বিশ্বরূপত্বং নিশ্চিতং ব্রহ্মবাদিভিঃ ।
একত্বে চ পৃথক্ত্বং চ প্রোক্তমেতন্নিদর্শনম্ ॥ ৯.৫॥
অহং তত্ পরমং ব্রহ্ম পরমাত্মা সনাতনঃ ।
অকারণং দ্বিজাঃ প্রোক্তো ন দোষো হ্যাত্মনস্তথা ॥ ৯.৬॥
অনন্তা শক্তয়োঽব্যক্তা মায়য়া সংস্থিতা ধ্রুবাঃ ।
তস্মিন্ দিবি স্থিতং নিত্যমব্যক্তং ভাতি কেবলম্ ॥ ৯.৭॥
য়াভিস্তল্লক্ষ্যতে ভিন্নং ব্রগ্মাব্যক্তং সনাতনম্ ।
একয়া মম সায়ুজ্যমনাদিনিধনং ধ্রুবম্ ॥ ৯.৮॥
পুংসোঽন্যাভূদ্যথা ভূতিরন্যয়া ন তিরোহিতম্ ।
অনাদিমধ্যং তিষ্ঠন্তং চেষ্টতেঽবিদ্যয়া কিল ॥ ৯.৯॥
তদেতত্ পরমং ব্যক্তং প্রভামণ্ডলমণ্ডিতম্ ।
তদক্ষরং পরং জ্যোতিস্তদ্ বিষ্ণোঃ পরমং পদম্ ॥ ৯.১০॥
তত্র সর্বমিদং প্রোতমোতং চৈবাখিলং জগত্ ।
তদেব চ জগত্ কৃত্স্নং তদ্ বিজ্ঞায় বিমুচ্যতে ॥ ৯.১১॥
য়তো বাচো নিবর্ত্তন্তে অপ্রাপ্য মনসা সহ ।
আনন্দং ব্রহ্মণো বিদ্বান্ বিভেতি ন কুতশ্চন ॥ ৯.১২॥
বেদাহমেতং পুরুষং মহান্ত-
মাদিত্যবর্ণং তমসঃ পরস্তাত্ ।
তদ্ বিজ্ঞায় পরিমুচ্যেত বিদ্বান্
নিত্যানন্দী ভবতি ব্রহ্মভূতঃ ॥ ৯.১৩॥
য়স্মাত্ পরং নাপরমস্তি কিঞ্চিত্
য়জ্জ্যোতিষাং জ্যোতিরেকং দিবিস্থম্ ।
তদেবাত্মানং মন্যমানোঽথ বিদ্বা-
নাত্মনন্দী ভবতি ব্রহ্মভূতঃ ॥ ৯.১৪॥
তদপ্যয়ং কলিলং গূঢদেহং
ব্রহ্মানন্দমমৃতং বিশ্বধামা ।
বদন্ত্যেবং ব্রাহ্মণা ব্রহ্মনিষ্ঠা
য়ত্র গত্বা ন নিবর্ত্তেত ভূয়ঃ ॥ ৯.১৫॥
হিরণ্ময়ে পরমাকাশতত্ত্বে
য়দর্চিষি প্রবিভাতীব তেজঃ ।
তদ্বিজ্ঞানে পরিপশ্যন্তি ধীরা
বিভ্রাজমানং বিমলং ব্যোম ধাম ॥ ৯.১৬॥
ততঃ পরং পরিপশ্যন্তি ধীরা
আত্মন্যাত্মানমনুভূয় সাক্ষাত্ ।
স্বয়ম্প্রভুঃ পরমেষ্ঠী মহীয়ান্
ব্রহ্মানন্দী ভগবানীশ এষঃ ॥ ৯.১৭॥
একো দেবঃ সর্বভূতেষু গূঢঃ
সর্বব্যাপী সর্বভূতান্তরাত্মা ।
তমেবৈকং য়েঽনুপশ্যন্তি ধীরা-
স্তেষাং শান্তিঃ শাশ্বতীনেতরেষাম্ ॥ ৯.১৮॥
সর্বায়নশিরোগ্রীবঃ সর্বভূতগুহাশয়ঃ ।
সর্বব্যাপী চ ভগবান্ ন তস্মাদন্যদিষ্যতে ॥ ৯.১৯॥
ইত্যেতদৈশ্বরং জ্ঞানমুক্তং বো মুনিপুঙ্গবাঃ ।
গোপনীয়ং বিশেষেণ য়োগিনামপি দুর্লভম্ ॥ ৯.২০॥
ইতি শ্রীকূর্মপারাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) নবমোঽধ্যায়ঃ ॥ ৯॥
দশমোঽধ্যায়ঃ
ঈশ্বর উবাচ ।
অলিঙ্গমেকমব্যক্তং লিঙ্গং ব্রহ্মেতি নিশ্চিতম্ ।
স্বয়ঞ্জ্যোতিঃ পরং তত্ত্বং পরে ব্যোম্নি ব্যবস্থিতম্ ॥ ১০.১॥
অব্যক্তং কারণং য়ত্তদক্ষরং পরমং পদম্ ।
নির্গুণং শুদ্ধবিজ্ঞানং তদ্ বৈ পশ্যন্তি সূরয়ঃ ॥ ১০.২॥
তন্নিষ্ঠাঃ শান্তসঙ্কল্পা নিত্যং তদ্ভাবভাবিতাঃ ।
পশ্যন্তি তত্ পরং ব্রহ্ম য়ত্তল্লিঙ্গমিতি শ্রুতিঃ ॥ ১০.৩॥
অন্যথা নহি মাং দ্রষ্টুং শক্যং বৈ মুনিপুঙ্গবাঃ ।
নহি তদ্ বিদ্যতে জ্ঞানং য়তস্তজ্জ্ঞায়তে পরম্ ॥ ১০.৪॥
এতত্তত্পরমং জ্ঞানং কেবলং কবয়ো বিদুঃ ।
অজ্ঞানমিতরত্ সর্বং য়স্মান্মায়াময়ং জগত্ ॥ ১০.৫॥
য়জ্জ্ঞানং নির্মলং শুদ্ধং নির্বিকল্পং য়দব্যয়ম্ ।
মমাত্মাঽসৌ তদেবেমিতি প্রাহুর্বিপশ্চিতঃ ॥ ১০.৬॥
য়েঽপ্যনেকং প্রপশ্যন্তি তেঽপি পশ্যন্তি তত্পরম্ ।
আশ্রিতাঃ পরমাং নিষ্ঠাং বুদ্ধ্বৈকং তত্ত্বমব্যয়ম্ ॥ ১০.৭॥
য়ে পুনঃ পরমং তত্ত্বমেকং বানেকমীশ্বরম্ ।
ভক্ত্যা মাং সম্প্রপশ্যন্তি বিজ্ঞেয়াস্তে তদাত্মকাঃ ॥ ১০.৮॥
সাক্ষাদেব প্রপশ্যন্তি স্বাত্মানং পরমেশ্বরম্ ।
নিত্যানন্দং নির্বিকল্পং সত্যরূপমিতি স্থিতিঃ ॥ ১০.৯॥
ভজন্তে পরমানন্দং সর্বগং জগদাত্মকম্ ।
স্বাত্মন্যবস্থিতাঃ শান্তাঃ পরঽব্যক্তে পরস্য তু ॥ ১০.১০॥
এষা বিমুক্তিঃ পরমা মম সায়ুজ্যমুত্তমম্ ।
নির্বাণং ব্রহ্মণা চৈক্যং কৈবল্যং কবয়ো বিদুঃ ॥ ১০.১১॥
তস্মাদনাদিমধ্যান্তং বস্ত্বেকং পরমং শিবম্ ।
স ঈশ্বরো মহাদেবস্তং বিজ্ঞায় প্রমুচ্যতে ॥ ১০.১২॥
ন তত্র সূর্যঃ প্রবিভাতীহ চন্দ্রো
নক্ষত্রাণাং গণো নোত বিদ্যুত্ ।
তদ্ভাসিতং হ্যখিলং ভাতি বিশ্বং
অতীবভাসমমলং তদ্বিভাতি ॥ ১০.১৩॥
বিশ্বোদিতং নিষ্কলং নির্বিকল্পং
শুদ্ধং বৃহন্তং পরমং য়দ্বিভাতি ।
অত্রান্তরে ব্রহ্মবিদোঽথ নিত্যং
পশ্যন্তি তত্ত্বমচলং য়ত্ স ঈশঃ ॥ ১০.১৪॥
নিত্যানন্দমমৃতং সত্যরূপং
শুদ্ধং বদন্তি পুরুষং সর্ববেদাঃ ।
তমোমিতি প্রণবেনেশিতারং
ধায়ায়ন্তি বেদার্থবিনিশ্চিতার্থাঃ ॥ ১০.১৫॥
ন ভূমিরাপো ন মনো ন বহ্নিঃ
প্রাণোঽনিলো গগনং নোত বুদ্ধিঃ ।
ন চেতনোঽন্যত্ পরমাকাশমধ্যে
বিভাতি দেবঃ শিব এব কেবলঃ ॥ ১০.১৬॥
ইত্যেতদুক্তং পরমং রহস্যং
জ্ঞানামৃতং সর্ববেদেষু গূঢম্ ।
জানাতি য়োগী বিজনেঽথ দেশে
য়ুঞ্জীত য়োগং প্রয়তো হ্যজস্ত্রম্ ॥ ১০.১৭॥
ইতী শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) দশমোঽধ্যায়ঃ ॥ ১০॥
একাদশোঽধ্যায়ঃ
ঈশ্বর উবাচ ।
অতঃ পরং প্রবক্ষ্যামি য়োগং পরমদুর্লভম্ ।
য়েনাত্মানং প্রপশ্যন্তি ভানুমন্তমিবেশ্বরম্ ॥ ১১.১॥
য়োগাগ্নির্দহতি ক্ষিপ্রমশেষং পাপপঞ্জরম্ ।
প্রসন্নং জায়তে জ্ঞানং সাক্ষান্নির্বাণসিদ্ধিদম্ ॥ ১১.২॥
য়োগাত্সঞ্জায়তে জ্ঞানং জ্ঞানাদ্ য়োগঃ প্রবর্ত্ততে ।
য়োগজ্ঞানাভিয়ুক্তস্য প্রসীদতি মহেশ্বরঃ ॥ ১১.৩॥
এককালং দ্বিকালং বা ত্রিকালং নিত্যমেব বা ।
য়ে য়ুঞ্জন্তি মহায়োগং তে বিজ্ঞেয়া মহেশ্বরাঃ ॥ ১১.৪॥
য়োগস্তু দ্বিবিধো জ্ঞেয়ো হ্যভাবঃ প্রথমো মতঃ ।
অপরস্তু মহায়োগঃ সর্বয়োগোত্তমোত্তমঃ ॥ ১১.৫॥
শূন্যং সর্বনিরাভাসং স্বরূপং য়ত্র চিন্ত্যতে ।
অভাবয়োগঃ স প্রোক্তো য়েনাত্মানং প্রপশ্যতি ॥ ১১.৬॥
য়ত্র পশ্যতি চাত্মানং নিত্যানন্দং নিরঞ্জনম্ ।
ময়ৈক্যং স মহায়োগো ভাষিতঃ পরমেশ্বরঃ ॥ ১১.৭॥
য়ে চান্যে য়োগিনাং য়োগাঃ শ্রূয়ন্তে গ্রন্থবিস্তরে ।
সর্বে তে ব্রহ্ময়োগস্য কলাং নার্হন্তি ষোডশীম্ ॥ ১১.৮॥
য়ত্র সাক্ষাত্ প্রপশ্যন্তি বিমুক্তা বিশ্বমীশ্বরম্ ।
সর্বেষামেব য়োগানাং স য়োগঃ পরমো মতঃ ॥ ১১.৯॥
সহস্রশোঽথ শতশো য়ে চেশ্বরবহিষ্কৃতাঃ ।
ন তে পশ্যন্তি মামেকং য়োগিনো য়তমানসাঃ ॥ ১১.১০॥
প্রাণায়ামস্তথা ধ্যানং প্রত্যাহারোঽথ ধারণা ।
সমাধিশ্চ মুনিশ্রেষ্ঠা য়মো নিয়ম আসনম্ ॥ ১১.১১॥
ময়্যেকচিত্ততায়োগো বৃত্ত্যন্তরনিরোধতঃ ।
তত্সাধনানি চান্যানি য়ুষ্মাকং কথিতানি তু ॥ ১১.১২॥
অহিংসা সত্যমস্তেয়ং ব্রহ্মচর্যাপরিগ্রহৌ ।
য়মাঃ সঙ্ক্ষেপতঃ প্রোক্তাশ্চিত্তশুদ্ধিপ্রদা নৃণাম্ ॥ ১১.১৩॥
কর্মণা মনসা বাচা সর্বভূতেষু সর্বদা ।
অক্লেশজননং প্রোক্তা ত্বহিংসা পরমর্ষিভিঃ ॥ ১১.১৪॥
অহিংসায়াঃ পরো ধর্মো নাস্ত্যহিংসা পরং সুখম্ ।
বিধিনা য়া ভবেদ্ধিংসা ত্বহিংসৈব প্রকীর্ত্তিতা ॥ ১১.১৫॥
সত্যেন সর্বমাপ্নোতি সত্যে সর্বং প্রতিষ্ঠিতম্ ।
য়থার্থকথনাচারঃ সত্যং প্রোক্তং দ্বিজাতিভিঃ ॥ ১১.১৬॥
পরদ্রব্যাপহরণং চৌর্যাদঽথ বলেন বা ।
স্তেয়ং তস্যানাচরণাদস্তেয়ং ধর্মসাধনম্ ॥ ১১.১৭॥
কর্মণা মনসা বাচা সর্বাবস্থাসু সর্বদা ।
সর্বত্র মৈথুনত্যাগং ব্রহ্মচর্যং প্রচক্ষতে ॥ ১১.১৮॥
দ্রব্যাণামপ্যনাদানমাপদ্যপি তথেচ্ছয়া ।
অপরিগ্রহং ইত্যাহুস্তং প্রয়ত্নেন পালয়েত্ ॥ ১১.১৯॥
তপঃ স্বাধ্যায়সন্তোষৌ শৌচমীশ্বরপূজনম্ ।
সমাসান্নিয়মাঃ প্রোক্তা য়োগসিদ্ধিপ্রদায়িনঃ ॥ ১১.২০॥
উপবাসপরাকাদিকৃচ্ছ্রচান্দ্রায়ণাদিভিঃ ।
শরীরশোষণং প্রাহুস্তাপসাস্তপ উত্তমম্ ॥ ১১.২১॥
বেদান্তশতরুদ্রীয়প্রণবাদিজপং বুধাঃ ।
সত্ত্বসিদ্ধিকরং পুংসাং স্বাধ্যায়ং পরিচক্ষতে ॥ ১১.২২॥
স্বাধ্যায়স্য ত্রয়ো ভেদা বাচিকোপাংশুমানসাঃ ।
উত্তরোত্তরবৈশিষ্ট্যং প্রাহুর্বেদার্থবেদিনঃ ॥ ১১.২৩॥
য়ঃ শব্দবোধজননঃ পরেষাং শ্রৃণ্বতাং স্ফুটম্ ।
স্বাধ্যায়ো বাচিকঃ প্রোক্ত উপাংশোরথ লক্ষণম্ ॥ ১১.২৪॥
ওষ্ঠয়োঃ স্পন্দমাত্রেণ পরস্যাশব্দবোধকম্ ।
উপাংশুরেষ নির্দিষ্টঃ সাহস্রবাচিকোজপঃ ॥ ১১.২৫॥
য়ত্পদাক্ষরসঙ্গত্যা পরিস্পন্দনবর্জিতম্ ।
চিন্তনং সর্বশব্দানাং মানসং তং জপং বিদুঃ ॥ ১১.২৬॥
য়দৃচ্ছালাভতো নিত্যমলং পুংসো ভবেদিতি ।
প্রাশস্ত্যমৃষয়ঃ প্রাহুঃ সন্তোষং সুখলক্ষণম্ ॥ ১১.২৭॥
বাহ্যমাভ্যন্তরং শৌচং দ্বিধা প্রোক্তং দ্বিজোত্তমাঃ ।
মৃজ্জলাভ্যাং স্মৃতং বাহ্যং মনঃ শুদ্ধিরথান্তরম্ ॥ ১১.২৮॥
স্তুতিস্মরণপূজাভির্বাঙ্মনঃ কায়কর্মভিঃ ।
সুনিশ্চলা শিবে ভক্তিরেতদীশ্বরপূজনম্ ॥ ১১.২৯॥
য়মাশ্চ নিয়মাঃ প্রোক্তাঃ প্রাণায়ামং নিবোধত ।
প্রাণঃ স্বদেহজো বায়ুরায়ামস্তন্নিরোধনম্ ॥ ১১.৩০॥
উত্তমাধমমধ্যত্বাত্ ত্রিধাঽয়ং প্রতিপাদিতঃ ।
য় এব দ্বিবিধঃ প্রোক্তঃ সগর্ভোঽগর্ভ এব চ ॥ ১১.৩১॥
মাত্রাদ্বাদশকো মন্দশ্চতুর্বিশতিমাত্রকঃ ।
মধ্যমঃ প্রাণসংরোধঃ ষট্ত্রিংশান্মাত্রিকোত্তমঃ ॥ ১১.৩২॥
য়ঃ স্বেদকম্পনোচ্ছ্বাসজনকস্তু য়থাক্রমম্ ।
মন্দমধ্যমমুখ্যানামানন্দাদুত্তমোত্তমঃ ॥ ১১.৩৩॥
সগর্ভমাহুঃ সজপমগর্ভং বিজপং বুধাঃ ।
এতদ্ বৈ য়োগিনামুক্তং প্রাণায়ামস্য লক্ষণম্ ॥ ১১.৩৪॥
সব্যাহৃতিং সপ্রণবাং গায়ত্রীং শিরসা সহ ।
ত্রির্জপেদায়তপ্রাণঃ প্রাণায়ামঃ স উচ্যতে ॥ ১১.৩৫॥
রেচকঃ পূরকশ্চৈব প্রাণায়ামোঽথ কুম্ভকঃ ।
প্রোচ্যতে সর্বশাস্ত্রেষু য়োগিভির্যতমানসৈঃ ॥ ১১.৩৬॥
রেচকো বাহ্যনিশ্বাসঃ পূরকস্তন্নিরোধনঃ ।
সাম্যেন সংস্থিতির্যা সা কুম্ভকঃ পরিগীয়তে ॥ ১১.৩৭॥
ইন্দ্রিয়াণাং বিচরতাং বিষয়েষু স্ববাবতঃ ।
নিগ্রহঃ প্রোচ্যতে সদ্ভিঃ প্রত্যাহারস্তু সত্তমাঃ ॥ ১১.৩৮॥
হৃত্পুণ্ডরীকে নাভ্যাং বা মূর্ধ্নি পর্বসুস্তকে ।
এবমাদিষু দেশেষু ধারণা চিত্তবন্ধনম্ ॥ ১১.৩৯॥
দেশাবস্থিতিমালম্ব্য বুদ্ধের্যা বৃত্তিসন্ততিঃ ।
বৃত্ত্যন্তরৈরসৃষ্টা য়া তদ্ধ্যানং সূরয়ো বিদুঃ ॥ ১১.৪০॥
একাকারঃ সমাধিঃ স্যাদ্ দেশালম্বনবর্জিতঃ ।
প্রত্যয়ো হ্যর্থমাত্রেণ য়োগসাধনমুত্তমম্ ॥ ১১.৪১॥
ধারণা দ্বাদশায়ামা ধ্যানং দ্বাদশধারণাঃ ।
ধ্যানং দ্বাদশকং য়াবত্ সমাধিরভিধীয়তে ॥ ১১.৪২॥
আসনং স্বস্তিকং প্রোক্তং পদ্মমর্দ্ধাসনং তথা ।
সাধনানাং চ সর্বেষামেতত্সাধনমুত্তমম্ ॥ ১১.৪৩॥
ঊর্বোরুপরি বিপ্রেন্দ্রাঃ কৃত্বা পাদতলে উভে ।
সমাসীনাত্মনঃ পদ্মমেতদাসনমুত্তমম্ ॥ ১১.৪৪॥
একং পাদমথৈকস্মিন্ বিষ্টভ্যোরসি সত্তমাঃ ।
আসীনার্দ্ধাসনমিদং য়োগসাধনমুত্তমম্ ॥ ১১.৪৫॥
উভে কৃত্বা পাদতলে জানূর্বোরন্তরেণ হি ।
সমাসীতাত্মনঃ প্রোক্তমাসনং স্বস্তিকং পরম্ ॥ ১১.৪৬॥
অদেশকালে য়োগস্য দর্শনং হি ন বিদ্যতে ।
অগ্ন্যভ্যাসে জলে বাঽপি শুষ্কপর্ণচয়ে তথা ॥ ১১.৪৭॥
জন্তুব্যাপ্তে শ্মশানে চ জীর্ণগোষ্ঠে চতুষ্পথে ।
সশব্দে সভয়ে বাঽপি চৈত্যবল্মীকসঞ্চয়ে ॥ ১১.৪৮॥
অশুভে দুর্জনাক্রান্তে মশকাদিসমন্বিতে ।
নাচরেদ্ দেহবাধে বা দৌর্মনস্যাদিসম্ভবে ॥ ১১.৪৯॥
সুগুপ্তে সুশুভে দেশে গুহায়াং পর্বতস্য তু ।
নদ্যাস্তীরে পুণ্যদেশে দেবতায়তনে তথা ॥ ১১.৫০॥
গৃহে বা সুশুভে রম্যে বিজনে জন্তুবর্জিতে ।
য়ুঞ্জীত য়োগী সততমাত্মানং মত্পরায়ণঃ ॥ ১১.৫১॥
নমস্কৃত্যাথ য়োগীন্দ্রান্ সশিষ্যাংশ্চ বিনায়কম্ ।
গুরুং চৈবাথ মাং য়োগী য়ুঞ্জীত সুসমাহিতঃ ॥ ১১.৫২॥
আসনং স্বস্তিকং বদ্ধ্বা পদ্মমর্দ্ধমথাপি বা ।
নাসিকাগ্রে সমাং দৃষ্টিমীষদুন্মীলিতেক্ষণঃ ॥ ১১.৫৩॥
কৃত্বাঽথ নির্ভয়ঃ শান্তস্ত্যক্ত্বা মায়াময়ং জগত্ ।
স্বাত্মন্যবস্থিতং দেবং চিন্তয়েত্ পরমেশ্বরম্ ॥ ১১.৫৪॥
শিখাগ্রে দ্বাদশাঙ্গুল্যে কল্পয়িত্বাঽথ পঙ্কজম্ ।
ধর্মকন্দসমুদ্ভূতং জ্ঞাননালং সুশোভনম্ ॥ ১১.৫৫॥
ঐশ্বর্যাষ্টদলং শ্বেতং পরং বৈরাগ্যকর্ণিকম্ ।
চিন্তয়েত্ পরমং কোশং কর্ণিকায়াং হিরণ্ময়ম্ ॥ ১১.৫৬॥
সর্বশক্তিময়ং সাক্ষাদ্ য়ং প্রাহুর্দিব্যমব্যয়ম্ ।
ওঙ্কারবাচ্যমব্যক্তং রশ্মিজালসমাকুলম্ ॥ ১১.৫৭॥
চিন্তয়েত্ তত্র বিমলং পরং জ্যোতির্যদক্ষরম্ ।
তস্মিন্ জ্যোতিষি বিন্যস্যস্বাত্মানং তদভেদতঃ ॥ ১১.৫৮॥
ধ্যায়ীতাকাশমধ্যস্থমীশং পরমকারণম্ ।
তদাত্মা সর্বগো ভূত্বা ন কিঞ্চিদপি চিন্তয়েত্ ॥ ১১.৫৯॥
এতদ্ গুহ্যতমং ধ্যানং ধ্যানান্তরমথোচ্যতে ।
চিন্তয়িত্বা তু পূর্বোক্তং হৃদয়ে পদ্মমুত্তমম্ ॥ ১১.৬০॥
আত্মানমথ কর্ত্তারং তত্রানলসমত্বিষম্ ।
মধ্যে বহ্নিশিখাকারং পুরুষং পঞ্চবিংশকম্ ॥ ১১.৬১॥
চিন্তয়েত্ পরমাত্মানং তন্মধ্যে গগনং পরম্ ।
ওঙ্করবোধিতং তত্ত্বং শাশ্বতং শিবমচ্যুতম্ ॥ ১১.৬২॥
অব্যক্তং প্রকৃতৌ লীনং পরং জ্যোতিরনুত্তমম্ ।
তদন্তঃ পরমং তত্ত্বমাত্মাধারং নিরঞ্জনম্ ॥ ১১.৬৩॥
ধ্যায়ীত তন্ময়ো নিত্যমেকরূপং মহেশ্বরম্ ।
বিশোধ্য সর্বতত্ত্বানি প্রণবেনাথবা পুনঃ ॥ ১১.৬৪॥
সংস্থাপ্য ময়ি চাত্মানং নির্মলে পরমে পদে ।
প্লাবয়িত্বাত্মনো দেহং তেনৈব জ্ঞানবারিণা ॥ ১১.৬৫॥
মদাত্মা মন্মনা ভস্ম গৃহীত্বা ত্বগ্নিহোত্রজম্ ।
তেনোদ্ধৃত্য তু সর্বাঙ্গমগ্নিরিত্যাদিমন্ত্রতঃ ॥ ১১.৬৬॥
চিন্তয়েত্ স্বাত্মনীশানং পরং জ্যোতিঃ স্বরূপিণম্ ।
এষ পাশুপতো য়োগঃ পশুপাশবিমুক্তয়ে ॥ ১১.৬৭॥
সর্ববেদান্তসারোঽয়মত্যাশ্রমমিতি শ্রুতিঃ ।
এতত্ পরতরং গুহ্যং মত্সায়ুজ্য প্রদায়কম্ ॥ ১১.৬৮॥
দ্বিজাতীনাং তু কথিতং ভক্তানাং ব্রহ্মচারিণাম্ ।
ব্রহ্মচর্যমহিংসা চ ক্ষমা শৌচং তপো দমঃ ॥ ১১.৬৯॥
সন্তোষঃ সত্যমাস্তিক্যং ব্রতাঙ্গানি বিশেষতঃ ।
একেনাপ্যথ হীনেন ব্রতমস্য তু লুপ্যতে ॥ ১১.৭০॥
তস্মাদাত্মুগুণোপেতো মদ্ব্রতং বোঢুমর্হতি ।
বীতরাগভয়ক্রোধা মন্ময়া মামুপাশ্রিতাঃ ॥ ১১.৭১॥
বহবোঽনেন য়োগেন পূতা মদ্ভাবমাগতাঃ ।
য়ে য়থা মাং প্রপদ্যন্তে তাংস্তথৈব ভজাম্যহম্ ॥ ১১.৭২॥
জ্ঞানয়োগেন মাং তস্মাদ্ য়জেত পরমেশ্বরম্ ।
অথবা ভক্তিয়োগেন বৈরাগ্যেণ পরেণ তু ॥ ১১.৭৩॥
চেতসা বোধয়ুক্তেন পূজয়েন্মাং সদা শুচিঃ ।
সর্বকর্মাণি সংন্যস্য ভিক্ষাশী নিষ্পরিগ্রহঃ ॥ ১১.৭৪॥
প্রাপ্নোতি মম সায়ুজ্যং গুহ্যমেতন্ময়োদিতম্ ।
অদ্বেষ্টা সর্বভূতানাং মৈত্রঃ করুণ এব চ ॥ ১১.৭৫॥
নির্মমো নিরহঙ্কারো য়ো মদ্ভক্তঃ স মে প্রিয়ঃ ।
সন্তুষ্টঃ সততং য়োগী য়তাত্মা দৃঢনিশ্চয়ঃ ॥ ১১.৭৬॥
ময়্যর্পিতমনো বুদ্ধির্যো মদ্ভক্তঃ স মে প্রিয়ঃ ।
য়স্মান্নোদ্বিজতে লোকো লোকান্নোদ্বিজতে চ য়ঃ ॥ ১১.৭৭॥
হর্ষামর্ষভয়োদ্বেগৈর্মুক্তো য়ঃ স হি মে প্রিয়ঃ ।
অনপেক্ষঃ শুচির্দক্ষ উদাসীনো গতব্যথঃ ॥ ১১.৭৮॥
সর্বারম্ভপরিত্যাগী ভক্তিমান্ য়ঃ স মে প্রিয়ঃ ।
তুল্যনিন্দাস্তুতির্মৌনী সন্তুষ্টো য়েন কেনচিত্ ॥ ১১.৭৯॥
অনিকেতঃ স্থিরমতির্মদ্ভক্তো মামুপৈষ্যতি ।
সর্বকর্মাণ্যপি সদা কুর্বাণো মত্পরায়ণঃ ॥ ১১.৮০॥
মত্প্রসাদাদবাপ্নোতি শাশ্বতং পরমং পদম্ ।
চেতসা সর্বকর্মাণি ময়ি সংন্যস্য মত্পরঃ ॥ ১১.৮১॥
নিরাশীর্নির্মমো ভূত্বা মামেকং শরণং ব্রজেত্ ।
ত্যক্ত্বা কর্মফলাসঙ্গং নিত্যতৃপ্তো নিরাশ্রয়ঃ ॥ ১১.৮২॥
কর্মণ্যপিপ্রবৃত্তোঽপি নৈব তেন নিবধ্যতে ।
নিরাশীর্যতচিত্তাত্মা ত্যক্তসর্বপরিগ্রহঃ ॥ ১১.৮৩॥
শারীরং কেবলং কর্ম কুর্বন্নাপ্নোতি তত্পদম্ ।
য়দৃচ্ছালাভতুষ্টস্য দ্বন্দ্বাতীতস্য চৈব হি ॥ ১১.৮৪॥
কুর্বতো মত্প্রসাদার্থং কর্ম সংসারনাশনম্ ।
মন্মনা মন্নমস্কারো মদ্যাজী মত্পরায়ণঃ ॥ ১১.৮৫॥
মামুপাস্তে য়োগীশং জ্ঞাত্বা মাং পরমেশ্বরম্ ।
মদ্বুদ্ধয়ো মাং সততং বোধয়ন্তঃ পরস্পরম্ ॥ ১১.৮৬॥
কথয়ন্তশ্চ মাং নিত্যং মম সায়ুজ্যমাপ্নুয়ুঃ ।
এবং নিত্যাভিয়ুক্তানাং মায়েয়ং কর্মসান্বগম্ ॥ ১১.৮৭॥
নাশয়ামি তমঃ কৃত্স্নং জ্ঞানদীপেন ভাস্বতা ।
মদ্বুদ্ধয়ো মাং সততং পূজয়ন্তীহ য়ে জনাঃ ॥ ১১.৮৮॥
তেষাং নিত্যাভিয়ুক্তানাং য়োগক্ষেমং বহাম্যহম্ ।
য়েঽন্যে চ কামভোগার্থং য়জন্তে হ্যন্যদেবতাঃ ॥ ১১.৮৯॥
তেষাং তদন্তং বিজ্ঞেয়ং দেবতানুগতং ফলম্ ।
য়ে চান্যদেবতাভক্তাঃ পূজয়ন্তীহ দেবতাঃ ॥ ১১.৯০॥
মদ্ভাবনাসমায়ুক্তা মুচ্যন্তে তেঽপি মানবাঃ ।
তস্মাদ্বিনশ্বরানন্যাংস্ত্যক্ত্বা দেবানশেষতঃ ॥ ১১.৯১॥
মামেব সংশ্রয়েদীশং স য়াতি পরমং পদম্ ।
ত্যক্ত্বা পুত্রাদিষু স্নেহং নিঃ শোকো নিষ্পরিগ্রহঃ ॥ ১১.৯২॥
য়জেচ্চামরণাল্লিঙ্গং বিরক্তঃ পরমেশ্বরম্ ।
য়েঽর্চয়ন্তি সদা লিঙ্গং ত্যক্ত্বা ভোগানশেষতঃ ॥ ১১.৯৩॥
একেন জন্মনা তেষাং দদামি পরমৈশ্বরম্ ।
পরাত্মনঃ সদা লিঙ্গং কেবলং সন্নিরঞ্জনম্ ॥ ১১.৯৪॥
জ্ঞানাত্মকং সর্বগতং য়োগিনাং হৃদি সংস্থিতম্ ।
য়ে চান্যে নিয়তা ভক্তা ভাবয়িত্বা বিধানতঃ ॥ ১১.৯৫॥
য়ত্র ক্বচন তল্লিঙ্গমর্চয়ন্তি মহেশ্বরম্ ।
জলে বা বহ্নিমধ্যে বা ব্যোম্নি সূর্যেঽথবাঽন্যতঃ ॥ ১১.৯৬॥
রত্নাদৌ ভাবয়িত্বেশমর্চয়েল্লিঙ্গমৈশ্বরম্ ।
সর্বং লিঙ্গময়ং হ্যেতত্ সর্বং লিঙ্গে প্রতিষ্ঠিতম্ ॥ ১১.৯৭॥
তস্মাল্লিঙ্গেঽর্চয়েদীশং য়ত্র ক্বচন শাশ্বতম্ ।
অগ্নৌ ক্রিয়াবতামপ্সু ব্যোম্নি সূর্যে মনীষিণাম্ ॥ ১১.৯৮॥
কাষ্ঠাদিষ্বেব মূর্খাণাং হৃদি লিঙ্গন্তুয়োগিনাম্ ।
য়দ্যনুত্পন্নিবিজ্ঞানো বিরক্তঃ প্রীতিসংয়ুতঃ ॥ ১১.৯৯॥
য়াবজ্জীবং জপেদ্ য়ুক্তঃ প্রণবং ব্রহ্মণো বপুঃ ।
অথবা শতরুদ্রীয়ং জপেদামরণাদ্ দ্বিজঃ ॥ ১১.১০০॥
একাকী য়তচিত্তাত্মা স য়াতি পরমং পদম্ ।
বসেচ্চামরণাদ্ বিপ্রো বারাণস্যাং সমাহিতঃ ॥ ১১.১০১॥
সোঽপীশ্বরপ্রসাদেন য়াতি তত্ পরমং পদম্ ।
তত্রোত্ক্রমণকালে হি সর্বেষামেব দেহিনাম্ ॥ ১১.১০২॥
দদাতি তত্ পরং জ্ঞানং য়েন মুচ্যতে বন্ধনাত্ ।
বর্ণাশ্রমবিধিং কৃত্স্নং কুর্বাণো মত্পরায়ণঃ ॥ ১১.১০৩॥
তেনৈব জন্মনা জ্ঞানং লব্ধ্বা য়াতি শিবং পদম্ ।
য়েঽপি তত্র বসন্তীহ নীচা বা পাপয়োনয়ঃ ॥ ১১.১০৪॥
সর্বে তরন্তি সংসারমীশ্বরানুগ্রহাদ্ দ্বিজাঃ ।
কিন্তু বিঘ্না ভবিষ্যন্তি পাপোপহতচেতসাম্ ॥ ১১.১০৫॥
ধর্মন্ সমাশ্রয়েত্ তস্মান্মুক্তয়ে নিয়তং দ্বিজাঃ ।
এতদ্ রহস্যং বেদানাং ন দেয়ং য়স্য কস্য চিত্ ॥ ১১.১০৬॥
ধার্মিকায়ৈব দাতব্যং ভক্তায় ব্রহ্মচারিণে ।
ব্যাস উবাচ ।
ইত্যেতদুক্ত্বা ভগবানাত্ময়োগমনুত্তমম্ ॥ ১১.১০৭॥
ব্যাজহার সমাসীনং নারায়ণমনাময়ম্ ।
ময়ৈতদ্ ভাষিতং জ্ঞানং হিতার্থং ব্রহ্মবাদিনাম্ ॥ ১১.১০৮॥
দাতব্যং শান্তচিত্তেভ্যঃ শিষ্যেভ্যো ভবতা শিবম্ ।
উক্ত্বৈবমর্থং য়োগীন্দ্রানব্রবীদ্ ভগবানজঃ ॥ ১১.১০৯॥
হিতায় সর্বভক্তানাং দ্বিজাতীনাং দ্বিজোত্তমাঃ ।
ভবন্তোঽপি হি মজ্জ্ঞানং শিষ্যাণাং বিধিপূর্বকম্ ॥ ১১.১১০॥
উপদেক্ষ্যন্তি ভক্তানাং সর্বেষাং বচনান্মম ।
অয়ং নারায়ণো য়োঽহমীশ্বরো নাত্র সংশয়ঃ ॥ ১১.১১১॥
নান্তরং য়ে প্রপশ্যন্তি তেষাং দেয়মিদং পরম্ ।
মমৈষা পরমা মূর্ত্তির্নারায়ণসমাহ্বয়া ॥ ১১.১১২॥
সর্বভূতাত্মভূতস্থা শান্তা চাক্ষরসঞ্জ্ঞিতা ।
য়ে ত্বন্যথা প্রপশ্যন্তি লোকে ভেদদৃশো জনাঃ ॥ ১১.১১৩॥
তে মুক্তিং প্রপশ্যন্তি জায়ন্তে চ পুনঃ পুনঃ ।
য়ে ত্বেনং বিষ্ণুমব্যক্তং মাঞ্চ দেবং মহেশ্বরম্ ॥ ১১.১১৪॥
একীভাবেন পশ্যন্তি ন তেষাং পুনরুদ্ভবঃ ।
তস্মাদনাদিনিধনং বিষ্ণুমাত্মানমব্যয়ম্ ॥ ১১.১১৫॥
মামেব সম্প্রপশ্যধ্বং পূজয়ধ্বং তথৈব হি ।
য়েঽন্যথা মাং প্রপশ্যন্তি মত্বেবং দেবতান্তরম্ ॥ ১১.১১৬॥
তে য়ান্তি নরকান্ ঘোরান্ নাহং তেষু ব্যবস্থিতঃ ।
মূর্খং বা পণ্ডিতং বাপি ব্রাহ্মণং বা মদাশ্রয়ম্ ॥ ১১.১১৭॥
মোচয়ামি শ্বপাকং বা ন নারায়ণনিন্দকম্ ।
তস্মাদেষ মহায়োগী মদ্ভক্তৈঃ পুরুষোত্তমঃ ॥ ১১.১১৮॥
অর্চনীয়ো নমস্কার্যো মত্প্রীতিজননায় হি ।
এবমুক্ত্বা সমালিঙ্গ্য বাসুদেবং পিনাকধৃক্ ॥ ১১.১১৯॥
অন্তর্হিতোঽভবত্ তেষাং সর্বেষামেব পশ্যতাম্ ।
নারায়ণোঽপি ভগবাংস্তাপসং বেষমুত্তমম্ ॥ ১১.১২০॥
জগ্রাহ য়োগিনঃ সর্বাংস্ত্যক্ত্বা বৈ পরমং বপুঃ ।
জ্ঞানং ভবদ্ভিরমলং প্রসাদাত্ পরমেষ্ঠিনঃ ॥ ১১.১২১॥
সাক্ষাদ্দেব মহেশস্য জ্ঞানং সংসারনাশনম্ ।
গচ্ছধ্বং বিজ্বরাঃ সর্বে বিজ্ঞানং পরমেষ্ঠিনঃ ॥ ১১.১২২॥
প্রবর্ত্তয়ধ্বং শিষ্যেভ্যো ধার্মিকেভ্যো মুনীশ্বরাঃ ।
ইদং ভক্তায় শান্তায় ধার্মিকায়াহিতাগ্নয়ে ॥ ১১.১২৩॥
বিজ্ঞানমৈশ্বরং দেয়ং ব্রাহ্মণায় বিশেষতঃ ।
এবমুক্ত্বা স বিশ্বাত্মা য়োগিনাং য়োগবিত্তমঃ ॥ ১১.১২৪॥
নারায়ণো মহায়োগী জগামাদর্শনং স্বয়ম্ ।
তেঽপি দেবাদিদেবেশং নমস্কৃত্য মহেশ্বরম্ ॥ ১১.১২৫॥
নারায়ণং চ ভূতাদিং স্বানি স্থানানি লেভিরে ।
সনত্কুমারো ভগবান্ সংবর্ত্তায় মহামুনিঃ ॥ ১১.১২৬॥
দত্তবানৈশ্বরং জ্ঞানং সোঽপি সত্যব্রতায় তু ।
সনন্দনোঽপি য়োগীন্দ্রঃ পুলহায় মহর্ষয়ে ॥ ১১.১২৭॥
প্রদদৌ গৌতমায়াথ পুলহোঽপি প্রজাপতিঃ ।
অঙ্গিরা বেদবিদুষে ভরদ্বাজায় দত্তবান্ ॥ ১১.১২৮॥
জৈগীষব্যায় কপিলস্তথা পঞ্চশিখায় চ ।
পরাশরোঽপি সনকাত্ পিতা মে সর্বতত্ত্বদৃক্ ॥ ১১.১২৯॥
লেভেতত্পরমং জ্ঞানং তস্মাদ্ বাল্মীকিরাপ্তবান্ ।
মমোবাচ পুরা দেবঃ সতীদেহভবাঙ্গজঃ ॥ ১১.১৩০॥
বামদেবো মহায়োগী রুদ্রঃ কিল পিনাকধৃক্ ।
নারায়ণোঽপি ভগবান্ দেবকীতনয়ো হরিঃ ॥ ১১.১৩১॥
অর্জুনায় স্বয়ং সাক্ষাত্ দত্তবানিদমুত্তমম্ ।
য়দাহং লব্ধবান্ রুদ্রাদ্ বামদেবাদনুত্তমম্ ॥ ১১.১৩২॥
বিশেষাদ্ গিরিশে ভক্তিস্তস্মাদারভ্য মেঽভবত্ ।
শরণ্যং শরণং রুদ্রং প্রপন্নোঽহং বিশেষতঃ ॥ ১১.১৩৩॥
ভূতেশং গিরশং স্থাণুং দেবদেবং ত্রিশূলিনম্ ।
ভবন্তোঽপি হি তং দেবং শম্ভুং গোবৃষবাহনম্ ॥ ১১.১৩৪॥
প্রপদ্যন্তাং সপত্নীকাঃ সপুত্রাঃ শরণং শিবম্ ।
বর্ত্তধ্বং তত্প্রসাদেন কর্ময়োগেন শঙ্করম্ ॥ ১১.১৩৫॥
পূজয়ধ্বং মহাদেব গোপতিং ব্যালভূষণম্ ।
এবমুক্তে পুনস্তে তু শৌনকাদ্যা মহেশ্বরম্ ॥ ১১.১৩৬॥
প্রণেমুঃ শাশ্বতং স্থাণুং ব্যাসং সত্যবতীসুতম্ ।
অব্রুবন্ হৃষ্টমনসঃ কৃষ্ণদ্বৈপায়নং প্রভুম্ ॥ ১১.১৩৭॥
সাক্ষাদ্দেবং হৃষীকেশং সর্বলোকমহেশ্বরম্ ।
ভবত্প্রসাদাদচলা শরণ্যে গোবৃষধ্বজে ॥ ১১.১৩৮॥
ইদানীং জায়তে ভক্তির্যা দেবৈরপি দুর্লভা ।
কথয়স্ব মুনিশ্রেষ্ঠ কর্ময়োগমনুত্তমম্ ॥ ১১.১৩৯॥
য়েনাসৌ ভগবানীশঃ সমারাধ্যো মুমুক্ষুভিঃ ।
ত্বত্সংনিধাবেব সূতঃ শ্রৃণোতু ভগবদ্বচঃ ॥ ১১.১৪০॥
তদ্বচ্চাখিললোকানাং রক্ষণং ধর্মসঙ্গ্রহম্ ।
য়দুক্তং দেবদেবেন বিষ্ণুনা কূর্মরূপিণা ॥ ১১.১৪১॥
পৃষ্টেন মুনিভিঃ পূর্বং শক্রেণামৃতমন্থনে ।
শ্রুত্বা সত্যবতীসূনুঃ কর্ময়োগং সনাতনম্ ॥ ১১.১৪২॥
মুনীনাং ভাষিতং কৃত্স্নং প্রোবাচ সুসমাহিতঃ ।
য় ইমং পঠতে নিত্যং সংবাদং কৃত্তিবাসসঃ ॥ ১১.১৪৩॥
সনত্কুমারপ্রমুখৈঃ সর্বপাপৈঃ প্রমুচ্যতে ।
শ্রাবয়েদ্ বা দ্বিজান্ শুদ্ধান্ ব্রহ্মচর্যপরায়ণান্ ॥ ১১.১৪৪॥
য়ো বা বিচারয়েদর্থং স য়াতি পরমাং গতিম্ ।
য়শ্চৈতচ্ছৃণুয়ান্নিত্যং ভক্তিয়ুক্তো দৃঢব্রতঃ ॥ ১১.১৪৫॥
সর্বপাপবিনির্মুক্তো ব্রহ্মলোকে মহীয়তে ।
তস্মাত্ সর্বপ্রয়ত্নেন পঠিতব্যো মনীষিভিঃ ॥ ১১.১৪৬॥
শ্রোতব্যশ্চাথ মন্তব্যো বিশেষাদ্ ব্রাহ্মণৈঃ সদা ॥ ১১.১৪৭॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) একাদশোঽধ্যায়ঃ ॥ ১১॥<
