সূত উবাচ
এবং প্রজাসু সৃষ্টাসু কশ্যপেন মহাত্মনা |
প্রতিষ্ঠিতাসু সর্বাসু চরাসু স্থাবরাসু চ || ২. ৮. ১||
অভিষিচ্যাধিপত্যেষু তেষাং মুখ্যান্প্রজাপতিঃ |
ততঃ ক্রমেণ রাজ্যানি আদেষ্টুমুপচক্রমে || ২. ৮. ২||
দ্বিজানাং বীরুধাং চৈব নক্ষত্রাণাং গ্রহৈঃ সহ |
যজ্ঞানাং তপসাং চৈব সোমং রাজ্যেঽভ্যষেচয়ৎ || ২. ৮. ৩||
বৃহস্পতিং তু বিশ্বেষাং দদাবঙ্গিরসাং পতিম্ |
ভৃগূণামধিপং চৈব কাব্যং রাজ্যেঽভ্যষেচয়ৎ || ২. ৮. ৪||
আদিত্যানাং পুনর্বিষ্ণুং বসূনামথ পাবকম্ |
প্রজাপতীনাং দক্ষং চ মরুতামথ বাসবম্ || ২. ৮. ৫||
দৈত্যানামথ রাজানং প্রহ্রাদং দিতিনন্দনম্ |
নারায়ণং তু সাধ্যানাং রুদ্রণাং চ বৃষধ্বজম্ || ২. ৮. ৬||
বিপ্রচিত্তিং চ রাজানং দানবানামথাদিশৎ |
অপাং চ বরুণং রাজ্যে রাজ্ঞাং বৈশ্রবণং তথা || ২. ৮. ৭||
যক্ষাণাং রাক্ষসানাং চ পার্থিবানাং ধনস্য চ |
বৈবস্বতং পিৎৠণাং চ যমং রাজ্যেঽভ্যষেচয়ৎ || ২. ৮. ৮||
সর্বভূতপিশাচানা গিরিশং শূলপাণিনম্ |
শৈলানাং হিমবন্তং চ নদীনামথ সাগরম্ || ২. ৮. ৯||
গন্ধর্বাণামধিপতিং চক্রে চিত্ররথং তথা |
উচ্চৈঃশ্রবসমশ্বানাং রাজানং চাভ্যষেচয়ৎ || ২. ৮. ১০||
মৃগাণামথ শার্দূলং গোবৃষং চ ককুদ্মিনাম্ |
পক্ষিণামথ সর্বেষাং গরুডং পততাং বরম্ || ২. ৮. ১১||
গন্ধানাং মরুতাং চৈব ভূতানামশরীরিণাম্ |
সমকালবলানাং চ বায়ুং বলবতাং বরম্ || ২. ৮. ১২||
সর্বেষাং দংষ্ট্রিণাং শেষং নাগানামথ বাসুকিম্ |
সরীসৃপাণাং সর্পাণাং পন্নগানাং চ তক্ষকম্ || ২. ৮. ১৩||
সাগরাণাং নদীনাং চ মেঘানাং বর্ষিতস্য চ |
আদিত্যানামন্যতমং পর্জন্যমভিষিক্তবান্ || ২. ৮. ১৪||
সর্বাপ্সরোগণানাং চ কামদেবং তথা প্রভুম্ |
ঋতূনামথ মাসানামার্ত্তবানাং তথৈব চ || ২. ৮. ১৫||
যক্ষাণাং চ বিপক্ষাণাং মুহূর্ত্তানাং চ পর্বণাম্ |
কলাকাষ্ঠাপ্রমাণানাং গতেরয়নয়োস্তথা || ২. ৮. ১৬||
গণিতস্যাথ যোগস্য চক্রে সংবৎসরং প্রভুম্ |
প্রজাপতের্বিরজসঃ পূর্বস্যাং দিশি বিশ্রুতম্ || ২. ৮. ১৭||
পুত্রং নাম্না সুধন্বানং রাজানং সোঽভ্যষেচয়ৎ |
দক্ষিণাস্যাং দিশি তথা কর্দমস্য প্রজাপতেঃ || ২. ৮. ১৮||
পুত্রাং শঙ্খপদং নাম রাজানং সোভ্যষেচয়ৎ |
পস্চিমস্যাং দিশি তথা রজসঃ পুত্রমচ্যুতম্ || ২. ৮. ১৯||
কেতুমন্তং মহাত্মানং রাজানং চাভ্যষেচয়ৎ |
তথা হিরণ্যরোমাণং পর্জন্যস্য প্রজাপতেঃ || ২. ৮. ২০||
উদীচ্যাং দিশি দুর্দ্ধর্ষপুত্রং রাজ্যেঽভ্যষেচয়ৎ |
মনুষ্যাণামধিপতিং চক্রে বৈবস্বতং মনুম্ || ২. ৮. ২১||
তৈরিয়ং পৃথিবী সর্বা সপ্তদ্বীপা সপত্তনা |
যথাপ্রদেশমদ্যাপি ধর্মেণ পরিপাল্যতে || ২. ৮. ২২||
স্বায়ংভুবেন্তরে পূর্বং ব্রহ্মণা তেঽভিষেচিতাঃ |
নৃপাশ্চৈতেঽভিষিচ্যন্তে মনবো যে ভবন্তি বৈ || ২. ৮. ২৩||
মন্বন্তরেষ্বতীতেষু গতা হ্যেতেষু পার্থিবাঃ |
এবমন্যেঽভিষিচ্যন্তে প্রাপ্তে মন্বন্তরে পুনঃ || ২. ৮. ২৪||
অতীতানাগতাঃ সর্বে স্মৃতা মন্বন্তরেশ্বরাঃ |
রাজসূয়েঽভিষিক্তশ্চ পৃথু রেভির্নরোত্তমঃ || ২. ৮. ২৫||
বেদদৃষ্টেন বিধিনা হ্যধিরাজঃ প্রতাপবান্ |
এতানুৎপাদ্য পুত্রাংস্তু প্রজাসন্তানকারণাৎ || ২. ৮. ২৬||
পুনরেব মহা ভাগঃ প্রজানাং পতিরীশ্বরঃ |
কশ্যপো গোত্রকামস্তু চচার পরমং তপঃ || ২. ৮. ২৭||
পুত্রৌ গোত্রকরৌ মহ্যং ভবেতামিতি চিন্তয়ন্ |
তস্যপ্রধ্যায়মানস্য কশ্যপস্য মহাত্মনঃ || ২. ৮. ২৮||
ব্রহ্মণোংঽশৌ সুতৌ পশ্চাৎপ্রাদুর্ভূতৌ মহৌজসৌ |
বৎসারশ্চাসিতশ্চৈব তাবুভৌ ব্রহ্ম বাদনা || ২. ৮. ২৯||
বৎসারান্নিধ্রুবো জজ্ঞে রেভ্যশ্চ সুহমায়শাঃ |
রেভ্যস্য রৈভ্যো বিজ্ঞেয়ো নিধ্রুবস্য নিবোধত || ২. ৮. ৩০||
চ্যবনস্য সুকন্যায়া সুমেধাঃ সমপদ্যত |
নিধ্রুবস্য তু যা পত্নী মাতা বৈ কুণ্ডপায়িরাম্ || ২. ৮. ৩১||
অসিতস্যৈকপর্ণায়াং ব্রহ্মিষ্ঠঃ সমপদ্যত |
শাণ্ডিল্যানাং বরঃ শ্রীমান্ দেবলঃ সুমহায়শাঃ || ২. ৮. ৩২||
নিধ্রুবাঃ শাণ্ডিলা রৈভ্যাস্ত্রয়ঃ পক্ষাস্তু কাশ্যপাঃ |
বজ্রিপ্রভৃতয়ো দেবা দেবাস্তস্য প্রজা স্বিমাঃ || ২. ৮. ৩৩||
চতুর্যুগে ৎবতিক্রান্তে মনোর্হ্যেকাদশে প্রভোঃ |
অথাবশিষ্টে তস্মিংস্তু দ্বাপরে সংপ্রর্ত্তিতে || ২. ৮. ৩৪||
মরুত্তস্য নরিষ্যং তস্তস্য পুত্রো দমঃ কিল |
রাজ্যবর্দ্ধনকস্তস্য সুধৃতিস্তৎসুতো নরঃ || ২. ৮. ৩৫||
কেবলশ্চ ততস্তস্য বন্ধুমান্বেগবাংস্ততঃ |
বুধস্তস্যা ভবদ্যস্যা তৃণবিন্দুর্মহীপতিঃ || ২. ৮. ৩৬||
ত্রেতায়ুগমুখে রাজা তৃতীয়ে স বভূব হ |
তস্য চেলবিলা কন্যালংবুষাগর্ভসংভবা || ২. ৮. ৩৭||
তস্যাং জাতো বিশ্রবাস্তু বৌলস্ত্যকুলবর্দ্ধনঃ |
বৃহস্পতিবৃর্হৎকীর্তির্দেবাচার্যস্তু কীর্ত্তিতঃ || ২. ৮. ৩৮||
কন্যাং তস্যোপয়েমে স নাম্না বৈ দেববর্ণিনীম্ |
পুষ্পোৎকটাং চ বাকাং চ সুতে মাল্যবতস্তথা || ২. ৮. ৩৯||
কৈকসীং মালিনঃ কন্যাং তাসাং তু শৃণুত প্রজাঃ |
জ্যেষ্ঠং বৈশ্রবণং তস্য সুষুবে দেববর্ণিনী || ২. ৮. ৪০||
দিব্যেন বিধিনা যুক্তমার্ষেণ চ শ্রুতেন চ |
রাক্ষসেন চ রূপেণ আসুরেণ বলেন চ || ২. ৮. ৪১||
ত্রিপাদং সুমহা কায়ং স্থূলশীর্ষং মহাহনুম্ |
অষ্টদংষ্ট্রং হরিছ্মশ্রুং শঙ্কুকর্ণং বিলোহিতম্ || ২. ৮. ৪২||
হ্রস্ববাহুং প্রবাহুং চ পিগলং সুদ্বিভীষণম্ |
বৈবর্ত্তজ্ঞানসংপন্নং সংবুদ্ধং চৈব সংভবাৎ || ২. ৮. ৪৩||
পিতা দৃষ্ট্বাব্রবীত্তং তু কুবেরোঽযমিতি স্বয়ম্ |
কুৎসায়াং ক্বিতি শব্দোঽযং শরীরং বেরমুচ্যতে || ২. ৮. ৪৪||
কুবেরঃ কুশরীরৎবান্নাম্না বৈ তেন সোংঽকিতঃ |
যস্মাদ্বিশ্রবসোঽপত্যং সাদৃশ্যাদ্বিশ্রবা ইব || ২. ৮. ৪৫||
তস্মাদ্বৈশ্রবণো নাম নাম্না তেন ভবিষ্যতি |
ঋদ্রয়াং কুবেরোঽজনয়দ্বিশ্রুতং নলকূবরম্ || ২. ৮. ৪৬||
রাবণং কুম্ভকর্ণং চ কন্যাং শূর্পণখীং তথা |
বিভীষণচতুর্থাংস্তু কৈকস্যজনয়ৎসুতান্ || ২. ৮. ৪৭||
শঙ্কুকর্ণো দশগ্রীবঃ পিঙ্গলো রক্তমূর্দ্ধজঃ |
চতুষ্পাদ্বিংশতিভুজো মহাকায়ো মহাবলঃ || ২. ৮. ৪৮||
জাত্যঞ্জ ননিভো দংষ্ট্রী লোহিতগ্রীব এব চ |
রাক্ষসেনৌজসা যুক্তো রূপেণ চ বলেন চ || ২. ৮. ৪৯||
সত্ত্ববুদ্ধিজিতৈর্চঙ্ক্ষরা অসৈরেব রাবণঃ |
বিসর্গদারুণঃ ক্রূরো রাবণো দ্রাবণস্তু সঃ || ২. ৮. ৫০||
হিরণ্যকশিপুর্হ্যাসীদ্রাবণঃ পূর্বজন্মনি |
চতুর্যুগানি রাজাভূৎ ত্রয়োদশ স রাক্ষসঃ || ২. ৮. ৫১||
তাঃ পঞ্চকোট্যো বর্ষাণাং সংখ্যাতাঃ সংখ্যয়া দ্বিজাঃ |
নিয়ুতান্যেকষষ্টিং চ শরদাং গণিতানি বৈ || ২. ৮. ৫২||
ষষ্টিং চৈব সহস্রাণি বর্ষাণাং বৈ স রাবণঃ |
দেবতানামৃষীণাং চ ঘোরং কৃৎবা প্রজাগরম্ || ২. ৮. ৫৩||
ত্রেতায়ুগে চতুর্বিংশে রাবণস্তপসঃ ক্ষয়াৎ |
রামং দাশরথিং প্রাপ্য সগণঃ ক্ষয়মীয়িবান্ || ২. ৮. ৫৪||
মহোদরঃ প্রহস্তশ্চ মহাপার্শ্বঃ খরস্তথা |
পুষ্পোৎকটায়াঃ পুত্রাস্তে কন্যা কুম্ভীনসী তথা || ২. ৮. ৫৫||
ত্রিশিরা দূষণশ্চৈব বিদ্যুজ্জিহ্বঃ সরাক্ষসঃ |
কন্যানুপালিকা চৈব বাকায়াঃ প্রসবঃ স্মৃতঃ || ২. ৮. ৫৬||
ইত্যেতে ক্রূর কর্মাণঃ পৌলস্ত্যা রাক্ষসা দশ |
দারুণাভিজনাঃ সর্বে দেবৈরপি দুরাসদাঃ || ২. ৮. ৫৭||
সর্বে লব্ধবরাঃ শূরাঃ পুত্রপৌত্রৈঃ সমন্বিতাঃ |
যক্ষাণাং চৈব সর্বেষাং পৌলস্ত্যা চে চ রাক্ষসাঃ || ২. ৮. ৫৮||
আগস্ত্যবৈশ্বামিত্রাণাং ক্রূরাণাং ব্রহ্মরক্ষসাম্ |
বেদাধ্যয়নশীলানাং তপোব্রতনিষেবিণাম্ || ২. ৮. ৫৯||
তেষামৈডবিডো রাজা পৌলস্ত্যঃ সব্যপিঙ্গলঃ |
ইতরে যে যজ্ঞজুষস্তে বৈ রক্ষোগণাস্ত্রয়ঃ || ২. ৮. ৬০||
যাতুধানা ব্রহ্মধানা বার্ত্তাশ্চৈব দিবাচরাঃ |
নিশাচরগণাস্তেষাং চৎবারঃ কবিভিঃ স্মৃতাঃ || ২. ৮. ৬১||
পৌলস্ত্যা নৈরৃতাশ্চৈব আগস্ত্যাঃ কৌশিকাস্তথা |
ইত্যেতাঃ সপ্ত তেষাং বৈ জাতয়ো রাক্ষসাঃ স্মৃতাঃ || ২. ৮. ৬২||
তেষাং রুপং প্রবক্ষ্যামি স্বাভাব্যেন ব্যবস্থিতম্ |
বৃত্তাক্ষাঃ পিঙ্গলাশ্চৈব মহাকায়া মহোদরাঃ || ২. ৮. ৬৩||
অষ্টদংষ্ট্রাঃ শঙ্কুকার্ণা ঊর্দ্ধ্বরোমাণ এব চ |
আকর্ণা হারিতস্যাশ্চ মুঞ্জধূম্রোর্ধ্বমূর্ধজাঃ || ২. ৮. ৬৪||
স্থূলশীর্ষাঃ সিতাভাশ্চ হ্রস্বসক্থিপ্রবাহবঃ |
তাম্রাস্যা লংবজিহ্বোষ্ঠা লংবভ্রূস্থূলনাসিকাঃ || ২. ৮. ৬৫||
নীলাঙ্গা লোহিতগ্রীবা গংভীরাক্ষা বিভীষণাঃ |
মহাঘোরস্বরাশ্চৈব বিকটোদ্বদ্ধপিণ্ডিকাঃ || ২. ৮. ৬৬||
স্থূলাশ্চ তুঙ্গনাসাশ্চ শিলাসংহননা দৃঢাঃ |
দারুণাভিজনাঃ ক্রূরাঃ প্রায়শঃ ক্লিষ্টকর্মিণঃ || ২. ৮. ৬৭||
সকুণ্ডলাঙ্গদাপীডা মুকুটোষ্ণীষধারিণঃ |
বিচিত্রাভরণাশ্চিত্রমাল্যগন্ধানুলেপনাঃ || ২. ৮. ৬৮||
অন্নাদাঃ পিশিতাদাশ্চ পুরুষাদাশ্চ তে স্মৃতাঃ |
ইত্যেতদ্রূপসাধর্ম্যং রাক্ষসানাং স্মৃতং বুধৈঃ || ২. ৮. ৬৯||
ন সমাস্তে বলে বুদ্ধৌ যুদ্ধে মায়া কৃতে তদা |
পুলহস্য মৃগাঃ পুত্রাঃ সর্বে ব্যালাশ্চ দংষ্ট্রিণঃ || ২. ৮. ৭০||
ভূতাঃ সর্প্পাঃ পিশাচাশ্চ সৃমরা হস্তিনস্তথা |
বানরাঃ কিন্নরাশ্চেব মায়ুঃ কিংপুরুষাস্তথা || ২. ৮. ৭১||
প্রাগপ্যেতে পরিক্রান্তা ময়া ক্রোধবশান্বয়াঃ |
অনপত্যঃ ক্রতুর্হ্যস্মিন্স্মৃতো বৈবস্বতেংঽতরে || ২. ৮. ৭২||
ন তস্য পত্ন্যঃ পুত্রা বা তেজঃ সংক্ষিব্য চ স্থিতঃ |
অত্রের্বশং প্রবক্ষ্যামি তৃতীয়স্য প্রজাপতেঃ || ২. ৮. ৭৩||
তস্য পত্ন্যস্তু সুন্দর্যোং দশৈবাসন্পতিব্রতাঃ |
বদ্রাশ্বস্য ঘৃতাচ্যাং বৈ দশাপ্সরসি সূনবঃ || ২. ৮. ৭৪||
ভদ্রা শূদ্রা চ মদ্রা চ শালভা মলদা তথা |
বলা হলা চ সপ্তৈতা যা চ গোচপলাঃ স্মৃতাঃ || ২. ৮. ৭৫||
তথা তামরসা চৈব রত্নকূটা চ তাদৃশঃ |
তত্র যো বংশকৃচ্চাসৌ তস্য নাম প্রভাকরঃ || ২. ৮. ৭৬||
মদ্রায়াং জনয়ামাস সোমং পুত্রং যশস্বিনম্ |
স্বর্ভানুনা হতে সূর্যে পতমানে দিবো মহীম্ || ২. ৮. ৭৭||
তমোঽভিভূতে লোকেঽস্মিন্প্রভা যেন প্রবর্ত্তিতা |
স্বস্তি তেস্ত্বিতি চৌক্তো বৈ পতন্নিহ দিবাকরঃ || ২. ৮. ৭৮||
ব্রহ্মর্ষের্বচনাত্তস্য ন পপাত দিবো মহীম্ |
অত্রিশ্রেষ্ঠানি গোত্রাণি যশ্চকার মহাতপাঃ || ২. ৮. ৭৯||
যজ্ঞেষ্বনিধনং চৈব সুরৈর্যস্য প্রবর্তিতম্ |
স তাসু জনয়ামাস পুত্রানাত্মসমানকান্ || ২. ৮. ৮০||
দশ তান্বৈ সুমহতা তপসা ভাবিতঃ প্রভুঃ |
স্বস্ত্যাত্রেয়া ইতি খ্যাতা ঋষয়ো বেদপারগাঃ || ২. ৮. ৮১||
তেষাং দ্বৌ খ্যাতয়শসৌ ব্রহ্মিষ্ঠৌ সুমহৌজসৌ |
দত্তো হ্যনুমতো জ্যেষ্ঠো দুর্বাসাস্তস্য চানুজঃ || ২. ৮. ৮২||
যবীয়সী সুতা তেষামবলা ব্রহ্মবাদিনী |
অত্রাপ্যুদাহরন্তীমং শ্লোকং পৌরাণিকাঃ পুরা || ২. ৮. ৮৩||
অত্রেঃ পুত্রং মহাত্মানং শান্তাত্মানমকল্মষম্ |
দত্তাত্রেয়ং তনুং বিষণোঃ পুরাণজ্ঞাঃ প্রজক্ষতে || ২. ৮. ৮৪||
তস্য গোত্রান্বয়জ্জাতাশ্চৎবারঃ প্রথিতা ভুবি |
শ্যাবাশ্বা মুদ্গলাশ্চৈব বাগ্ভূতকগবি স্থিরাঃ || ২. ৮. ৮৫||
এতেঽত্রীণাং তু চৎবারঃ স্মৃতাঃ পক্ষা মহৌজসঃ |
কাশ্যপো নারদশ্চৈব পর্বতোঽরুন্ধতী তথা || ২. ৮. ৮৬||
জজ্ঞিরে মানসা হ্যেতেঽরুধত্যাস্তন্নিবোধত |
নারদস্তু বসিষ্ঠায়ারুন্ধতী প্রত্যপাদয়ৎ || ২. ৮. ৮৭||
ঊর্দ্ধ্বরেতা মহাতেজা দক্ষশাপাত্তু নারদঃ |
পুরা দেবাসুরে তস্মিন্সংগ্রামে তারকাময়ে || ২. ৮. ৮৮||
অনাবৃষ্ট্যা হতে লোকে ব্যগ্রে শস্তে সুরৈঃ সহ |
বসিষ্ঠস্তপসা ধীমাঞ্জীবয়ামাস বৈ প্রজাঃ || ২. ৮. ৮৯||
অনেকফলমূলিন্য ঔষধীশ্চ প্রবর্তয়ন্ |
তাস্তেন জীবয়ামাস কারুণ্যাদৌষধেন সঃ || ২. ৮. ৯০||
অরুন্ধত্যাং বসিষ্টস্তু শক্তিমুৎপাদয় ৎসুতম্ |
স্বাঙ্গজ জনয়চ্ছক্তিরদৃশ্যন্ত্যাং পরাশরম্ || ২. ৮. ৯১||
কাল্যাং পরাশরাজ্জজ্ঞে কৃষ্ণদ্বৈপায়নঃ প্রভুঃ |
দ্বৈপায়নাদরণ্যাং বৈ শুকো জজ্ঞে গুণান্বিতঃ || ২. ৮. ৯২||
উদপদ্যন্ত ষডিমে পীবর্যাং শুকসূনবঃ |
ভূরিশ্রবাঃ প্রভুঃ শংভুঃ কৃষ্ণো গৌরশ্চ পঞ্চমঃ || ২. ৮. ৯৩||
কন্যা কীর্তিমতী চৈব যোগমাতা ধৃতব্রতা |
জননী ব্রহ্মদত্তস্য পত্নী সা ৎবণুহস্য চ || ২. ৮. ৯৪||
শ্বেতাঃ কৃষ্ণাশ্চ পৌরাশ্চ শ্যামধূম্রাশ্চ চণ্ডিনঃ |
ঊষ্মাদা দারিকাশ্চৈব নীলাশ্চৈব পরাশরাঃ || ২. ৮. ৯৫||
পরাশরাণামষ্টৌ তে পক্ষাঃ প্রোক্তা মহাত্মনাম্ |
অত ঊর্দ্ধ্ব নিবোধ ৎবমিন্দ্রপ্রমতি সংভবম্ || ২. ৮. ৯৬||
বসিষ্ঠস্য কপিঞ্জল্যাং ঘৃতাচ্যামুদপদ্যত |
কুণীতি যঃ সমাখ্যাত ইন্দ্রপ্রমতিরুচ্যতে || ২. ৮. ৯৭||
পৃথোঃ সুতায়াং সংভূতঃ পুত্রস্তস্যাভবদ্বসুঃ |
উপমন্যুঃ সুতস্তস্য যস্যেমে হ্যৌপমন্যবঃ || ২. ৮. ৯৮||
মিত্রাবরুণয়োশ্চৈব কুণ্ডিনেয়াঃ পরিশ্রুতাঃ |
একার্ষেয়াস্তথা চান্যে বসিষ্ঠা নাম বিশ্রুতাঃ || ২. ৮. ৯৯||
এতে পক্ষা বসিষ্ঠানাং স্মৃতা হ্যেকাদশৈব তু |
ইত্যেতে ব্রহ্মণঃ পুত্রা মানসা অষ্ট বিশ্রুতাঃ || ২. ৮. ১০০||
ভ্রাতরঃ সুমহাভাগা যেষাং বংশাঃ প্রতিষ্ঠিতাঃ |
ত্রীংল্লোকান্ধারয়ন্তীমান্দেবর্ষিগণসংকুলান্ || ২. ৮. ১০১||
তেষাং পুত্রাশ্চ পৌত্রাশ্চ শতশোঽথ সহস্রশঃ |
ব্যাপ্তা যেস্তু ত্রয়ো লোকাঃ সূর্যস্যেব গভস্তিভিঃ || ২. ৮. ১০২||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয় উপোদ্ধাতপাদে ঋষিবংশবর্ণনং নামাষ্টমোঽধ্যায়ঃ || ৮||
ঋষয় ঊচুঃ
কথং দ্বিবারাবুৎপন্না ভবানী প্রাক্সতী তু যা |
আসীদ্দাক্ষায়ণী পূর্বমুমা কথমজায়ত || ২. ৯. ১||
মেনায়াং পিতৃকন্যায়াং জনয়ঞ্ছৈলরাট্ স্বয়ম্ |
কে বৈ তে পিতরো নাম যেষাং মেনা তু মানসী || ২. ৯. ২||
মৈনাকশ্চৈব দোহিত্রো দৌহিত্রী চ তথা হ্যুমা |
একপর্ণা তথা চৈব তথা চৈবৈকপাটলা || ২. ৯. ৩||
গঙ্গা চাপি সরিচ্ছ্রেষ্ঠা সর্বাসাং পূর্বজা তথা |
সর্বমেতৎবয়োদ্দিষ্টং নির্দেশং তস্য নো বদ || ২. ৯. ৪||
শ্রোতুমিচ্ছামি ভদ্রং তে শ্রাদ্ধস্য চ বিধিং পরম্ |
পুত্রাশ্চ কে স্মৃতাস্তেষাং কথং চ পিতরস্তু তে || ২. ৯. ৫||
কথং বা তে সমুৎপন্নাঃ কিংনা মানঃ কিমাত্মকাঃ |
স্বর্গে বৈ পিতরো হ্যেতে দেবানামপি দেবতাঃ || ২. ৯. ৬||
এবং বেদিতুমিচ্ছামি পিৎৠণাং সর্গমুত্তমমা |
যথা চ দত্তমস্মাভিঃ সার্দ্ধং প্রীণাতি বৈ পিৎৠন্ || ২. ৯. ৭||
যদর্থং তে ন দৃশ্যন্তে তত্র কিং কারণং স্মৃতম্ |
স্বর্গে তু কে চ বর্ত্তন্তে পিতরো নরকে ব কে || ২. ৯. ৮||
অভিসংভাষ্য পিতরং পিতুশ্চ পিতরং তথা |
প্রতিতামহং তথা চৈব ত্রিষু পিণ্ডেষু নামতঃ || ২. ৯. ৯||
নাম্না দত্তানি শ্রাদ্ধানি কথং গচ্ছন্তি বৈ পিৎৠন্ |
কথং চ শক্তাস্তে দাতুং নরকস্থাঃ ফলং পুনঃ || ২. ৯. ১০||
কে চ তে পিতরো নাম কান্যজামো বয়ং পুনঃ |
দেবা অপি পিৎৠন্ স্বর্গে যজন্তীতি হি নঃ শ্রুতম্ || ২. ৯. ১১||
এতদিচ্ছামি বৈ শ্রোতুং বিস্তরেণ বহুশ্রুতম্ |
স্পষ্টাভিধান মপি বৈ তদ্ভবান্বক্তুমর্হসি || ২. ৯. ১২||
সূত উবাচ
অত্র বো কীর্তয়িষ্যামি যথাপ্রজ্ঞং যথাশ্রুতম্ |
মন্বন্তরেষু জায়ন্তে পিতরো দেবসূনবঃ || ২. ৯. ১৩||
অতীতানাগতাঃ শ্রেষ্ঠাঃ কনিষ্ঠাঃ ক্রমশস্তু বৈ |
দেবৈঃ সার্দ্ধং পুরাতীতাঃ পিতরোঽন্যেন্তরেষু বৈ || ২. ৯. ১৪||
বর্তন্তে সাংপ্রতং চে তু তান্বৈ পক্ষ্যামি নিশ্চয়াৎ |
শ্রাদ্ধক্রিয়াং মনুশ্চৈষাং শ্রাদ্ধদেবঃ প্রবর্ত্তয়েৎ || ২. ৯. ১৫||
দেবান্সৃজত ব্রহ্মা মাং যক্ষ্যন্তীতি চ প্রভুঃ |
তমুৎসৃজ্য তদাত্মানময়জংস্তে ফলার্থিনঃ || ২. ৯. ১৬||
তে শপ্তা ব্রহ্মণা মূঢা নষ্টসংজ্ঞা ভবিষ্যথ |
তস্মাৎকিঞ্চিন্ন জানীত ততো লোকেষু মুহ্যত || ২. ৯. ১৭||
তে ভূয়ঃ প্রণতাঃ সর্বে যাচন্তি স্ম পিতামহম্ |
অনুগ্রহায় লোকানাং পুনস্তানব্রবীৎপ্রভুঃ || ২. ৯. ১৮||
প্রায়শ্চিত্তং চরধ্বং বৈ ব্যভিচারো হি বঃ কৃতঃ |
পুত্রান্স্বান্পরিপৃচ্ছধ্বং ততো জ্ঞানমবাপ্স্যথ || ২. ৯. ১৯||
ততস্ত স্বসুতাংশ্চৈব প্রয়শ্চিত্তজি ঘৃক্ষবঃ |
অপৃচ্ছন্সংযতাত্মানো বিধিবচ্চ মিথো মিথঃ || ২. ৯. ২০||
তেভ্যস্তে নিয়তাত্মানঃ পুত্রাঃ শংসুরনেকধা |
প্রয়শ্চিত্তানি ধর্মজ্ঞাবাঙ্মনঃ কর্মজানি চ || ২. ৯. ২১||
তে পুত্রানব্রুবন্প্রীতা লব্ধসংজ্ঞা দিবৌকসঃ |
যূয়ং বৈ পিতরোঽস্মাকং যৈর্বয়ং প্রতিবোধিতাঃ || ২. ৯. ২২||
ধর্মং জ্ঞানং চ বৈরাগ্যং কো বরো বঃ প্রদীয়তাম্ |
পুস্তানব্রবীদ্ব্রহ্মা যূয়ং বৈ সত্যবাদিনঃ || ২. ৯. ২৩||
তস্মাদ্যদুক্তং যুষ্মাভিস্তত্তথা ন তদন্যথা |
উক্তং চ পিতরোঽস্মাকং চেতি বৈ তনয়াঃ স্বকাঃ || ২. ৯. ২৪||
পিতরস্তে ভবিষ্যন্তি তেভ্যোঽযং দীয়তাং বরঃ |
তেনৈব বচসা তে বৈ ব্রহ্মণঃ পরমেষ্ঠিনঃ || ২. ৯. ২৫||
পুত্রাঃ পিতৃৎবমাজগ্মুঃ পুত্রৎবং পিতরঃ পুনঃ |
তস্মাত্তে পিতরঃ পুত্রাঃ পিতৃৎবং তেষু তৎস্মৃতম্ || ২. ৯. ২৬||
এবং স্মৃৎবা পিৎৠন্পুত্রাঃ পুত্রাংশ্চৈব পিৎৠংস্তথা |
ব্যাজহার পুনর্ব্রহ্মা বিৎৠনাত্মবিবৃদ্ধয়ে || ২. ৯. ২৭||
যো হ্য নিষ্টান্পিৎৠঞ্শ্রাদ্ধি ক্রিয়াং কাঞ্চিতকরিষ্যতি |
রাক্ষসা দানবাশ্বৈব ফলং প্রাপ্স্যন্তি তস্য তৎ || ২. ৯. ২৮||
শ্রাদ্ধৈরাপ্যায়িতাশ্চৈব পিতরঃ সোমমব্যয়ম্ |
আপ্যায়মানা যুষ্মাভির্বর্দ্ধয়িষ্যন্তি নিত্যশঃ || ২. ৯. ২৯||
শ্রাদ্ধৈরাপ্যায়িতঃ সোমো লোকানাপ্যায়য়িষ্যতি |
কৃৎস্নং সপর্বতবনং জঙ্গমাজঙ্গমৈর্বৃতম্ || ২. ৯. ৩০||
শ্রাদ্ধানি পুষ্টিকামাশ্চ যে করিষ্যন্তি মানবাঃ |
তেভ্যঃ পুষ্টিং প্রজাশ্চৈব দাস্যন্তি পিতরঃ সদা || ২. ৯. ৩১||
শ্রাদ্ধে যেভ্যঃ প্রদাস্যন্তি ত্রীন্পিণ্ডান্নামগোত্রতঃ |
সর্বত্র বর্তমানাস্তে পিতরঃ প্রপিতামহাঃ || ২. ৯. ৩২||
তেষামাপ্যায়য়িষ্যন্তি শ্রাদ্ধদানেন বৈ প্রজাঃ |
এবমাজ্ঞা কৃতা পূর্বং ব্রহ্মণা পরমেষ্ঠিনা || ২. ৯. ৩৩||
তেনৈতৎসর্বথা সিদ্ধং দানমধ্যয়নং তপঃ |
তে তু জ্ঞানপ্রদাতারঃ পিতরো বো ন সংশয়ঃ || ২. ৯. ৩৪||
ইত্যেতে পিতরো দেবা দেবাশ্চ পিতরঃ পুনঃ |
অন্যোন্যপিতরো হ্যেতে দেবাশ্চ পিতরশ্চ হ || ২. ৯. ৩৫||
এতদ্ব্রহ্মবচঃ শ্রুৎবা সূতস্য বিদিতাত্মনঃ |
পপ্রচ্ছুর্মুনয়ো ভূয়ঃ সূতং তস্মাদ্যদুত্তরম্ || ২. ৯. ৩৬||
ঋষয় ঊচুঃ
কিয়ন্তো বৈ মুনিগণাঃ কস্মিন্কালে চ তে গণাঃ |
পূর্বে তু দেবপ্রবরা দেবানাং সোমবর্দ্ধনাঃ || ২. ৯. ৩৭||
সূত উবাচ
এতদ্বোঽহং প্রবক্ষ্যামি পিতৃসর্গমনুত্তমম্ |
শংযুঃ পপ্রচ্ছ যৎপূর্বং পিতরং বৈ বৃহস্পতিম্ || ২. ৯. ৩৮||
বৃহস্পতিমুপাসীনং সর্বজ্ঞানার্থকোবিদম্ |
পুত্রঃ শংযুরিমং প্রশ্নং পপ্রচ্ছ বিনয়ান্বিতঃ || ২. ৯. ৩৯||
ক এতে পিতরো নাম কিয়ন্তঃ কে চ নামতঃ |
সমুদ্ভূতাঃ কথং চৈতে পিতৃৎবং সমুপাগতাঃ || ২. ৯. ৪০||
কস্মাচ্চ পিতরঃ পূর্বং যজ্ঞং পুষ্ণন্তি নিত্যশঃ |
ক্রিয়াশ্চ সর্বা বর্ত্তন্তে শ্রাদ্ধপূর্বা মহাত্মনাম্ || ২. ৯. ৪১||
কস্মৈ শ্রাদ্ধানি দেয়ানি কিং চ দত্তে মহাফলম্ |
কেষু চাপ্যক্ষয়ং শ্রাদ্ধং তীর্থেষু চ নদীষু চ || ২. ৯. ৪২||
কেষু বৈ সর্বমাপ্তোতি শ্রাদ্ধং কৃৎবা দ্বিজোত্তমঃ |
কশ্চ কালো ভবেচ্ছ্রাদ্ধে বিধিঃ কশ্চানুবর্ত্ততে || ২. ৯. ৪৩||
এতদিচ্ছামি ভগবন্বিস্তরেণ যথা তথা |
ব্যাখ্যাতমানুপূর্ব্যেণ যত্র চোদাহৃতং ময়া || ২. ৯. ৪৪||
বৃহস্পতিরিদং সম্যগেবং পৃষ্টো মহামতিঃ |
ব্যাজহারানুপূর্ব্যেণ প্রশ্নং প্রশ্নবিদাং বরঃ || ২. ৯. ৪৫||
বৃহস্পতিরুবাচ
কথ যিষ্যামি তে তাত যন্মাং ৎবং পরিপৃচ্ছসি |
বিনয়েন যথান্যায়ং গম্ভীরং প্রশ্নমুত্তমম্ || ২. ৯. ৪৬||
দ্যৌরংরিক্ষং পৃথিবী নক্ষত্রাণি দিশস্ত থা |
সূর্যাচন্দ্রমসৌ চৈব তথাহোরাত্রমেব চ || ২. ৯. ৪৭||
ন বভূবুস্তদা তাত তমোভূতমভূজ্জগৎ |
ব্রহ্মৈকো দুশ্চরং তত্র ততাপ পরমং তপঃ || ২. ৯. ৪৮||
শংযুস্তমব্রবীদ্ভূয়ঃ পিতরং ব্রহ্মবিত্তমম্ |
সর্ববেদব্রতস্নাতঃ সর্বজ্ঞানবিদাং বরঃ |
কীদৃশং সর্বভূতেশস্তপস্তেপে প্রজা পতিঃ || ২. ৯. ৪৯||
বৃহস্পতিরুবাচ
সর্বেষাং তপসাং যত্তত্তপো যোগমনুত্তমম্ |
ধ্যায়ংস্তদা স ভগবাংস্তেন লোকানবাসৃজৎ || ২. ৯. ৫০||
জ্ঞানানি ভূতভব্যানি লোকা বেদাশ্চ সর্বশঃ |
যোগামৃতাস্তদা সৃষ্টা ব্রহ্মণা লোকচক্ষুষা || ২. ৯. ৫১||
লোকাঃ সংতানকা নাম যত্র তিষ্ঠন্তি ভাস্বরাঃ |
বৈরাজা ইতি বিখ্যাতা দেবানাং দিবি দেবতা| || ৫২||
যোগেন তপসা যুক্তঃ পূর্বমেব তদা প্রভুঃ |
দেবানসৃজত ব্রহ্মা যোগয়ুক্তান্সনাতনান্ || ২. ৯. ৫৩||
আদিদেবা ইতি খ্যাতা মহাসত্ত্বা মহৌজসঃ |
সর্বকামপ্রদাঃ পূজ্যা দেবাদানবমানবৈঃ || ২. ৯. ৫৪||
তেষাং সপ্ত সমাখ্যাতা গণাস্ত্রৈলোক্যপূজিতাঃ |
অমূর্ত্তয়স্ত্রয়স্তেষাং চৎবারস্তু সমূর্ত্তয়ঃ || ২. ৯. ৫৫||
উপরিষ্টাৎ ত্রয়স্তেষাং বর্ত্তন্তে ভাবমূর্ত্তয়ঃ |
তেষামধস্তাদ্বর্ত্তন্তে চৎবারঃ সূক্ষ্মমূর্ত্তয়ঃ || ২. ৯. ৫৬||
ততো দেবাস্ততো ভূমিরেষা লোকপরংপরা |
লোকে বর্ষন্তি তে হ্যস্মিংস্তেভ্যঃ পর্জন্যসংভবঃ || ২. ৯. ৫৭||
অন্নং ভবতি বৈ বৃষ্ট্যা লোকানাং সংভবস্ততঃ |
আপ্যায়য়ন্তি তে যস্মাৎসোমং চান্নং চ যোগতঃ || ২. ৯. ৫৮||
ঊচুস্তান্বৈ পিৎৠংস্ত স্মাল্লোকানাং লোকসত্তমাঃ |
মনোজবাঃ স্বধাভক্ষ্যঃ সর্বকামপরিষ্কৃতাঃ || ২. ৯. ৫৯||
লোভমোহভয়োপেতা নিশ্চিন্তাঃ শোক বর্জিতাঃ |
এতে যোগং পরিত্যজ্য প্রাপ্তা লোকান্সুদর্শনান্ || ২. ৯. ৬০||
দিব্যাঃ পুণ্যা বিপাপ্মানো মহাত্মানো ভবন্ত্যুত |
ততো যুগসহস্রান্তে জায়ন্তে ব্রহ্মবাদিনঃ || ২. ৯. ৬১||
প্রতিলভ্য পুনর্যোগং মোক্ষং গচ্ছন্ত্যমূর্ত্তয়ঃ |
ব্যক্তাব্যক্তং পরিত্যজ্য মহায়োগবলেন চ || ২. ৯. ৬২||
নশ্যন্ত্যুল্কেব গগনে ক্ষণদ্বিদ্যুৎপ্রভেব চ |
উৎসৃজ্য দেহজালানি মহায়োগবলেন চ || ২. ৯. ৬৩||
নিরাখ্যোপাস্যতা যান্তি সরিতং সাগরং যথা |
ক্রিয়য়া গুরুপূজাভির্যাগং কুর্বন্তি যত্নতঃ || ২. ৯. ৬৪||
শ্রাদ্ধে প্রীতাস্ততঃ সোমং পিতরো যোগমাস্থিতাঃ |
আপ্যায়য়ন্তি যোগেন ত্রৈলোক্যং যেন জীবতি || ২. ৯. ৬৫||
তস্মাচ্ছ্রাদ্ধানি দেয়ানি যোগানাং যত্নতঃ সদা |
পিৎৠণাং হি বলং যোগো যোগাৎসোমঃ প্রবর্ত্ততে || ২. ৯. ৬৬||
সহস্রশতবিপ্রান্বৈ ভোজয়েদ্যাবদাগতান্ |
একস্তানপি মন্ত্রজ্ঞঃ সর্বানর্হতি তচ্ছৃণু || ২. ৯. ৬৭||
এতানেব চ মন্ত্রজ্ঞান্ভোজয়েদ্যঃ সমাগতান্ |
একস্তান্স্নাতকঃ প্রিতঃ সর্বানর্হতি তচ্ছৃণু || ২. ৯. ৬৮||
মন্ত্রজ্ঞানাং সহস্রেণ স্নাতকানাং শতেন চ |
যোগাচার্যেণ যদ্ভুক্তং ত্রায়তে মহাতো ভয়াৎ || ২. ৯. ৬৯||
গৃহস্থানাং সহস্রেণ বানপ্রস্থশতেন চ |
ব্রহ্মচারিসহস্রেণ যোগ এব বিশিষ্যতে || ২. ৯. ৭০||
নাস্তিকো বাপ্যধর্মো বা সংকীর্মস্তস্করোঽপি বা |
নান্যত্র তারণং দানং যোগেষ্বাহ প্রজাপতিঃ || ২. ৯. ৭১||
পিতরস্তস্য তুষ্যন্তি সুবৃষ্টেনৈব কর্ষকাঃ |
পুত্রো বাপ্যথ বা পৌত্রো ধ্যানিনং ভোজয়িষ্যতি || ২. ৯. ৭২||
অলাভে ধ্যাননিষ্ঠানাং ভোজয়েদ্ব্রহ্মচারিণম্ |
তদলাভে উদসীনং গূহস্থমপি ভোজয়েৎ || ২. ৯. ৭৩||
যস্তিষ্ঠেদেকপাদেন বায়ুভক্ষঃ শতং সমাঃ |
ধ্যানয়োগী পরস্তস্মাদিতি ব্রহ্মানুশাসনম্ || ২. ৯. ৭৪||
আদ্য এষ গণঃ প্রোক্তঃ পিৎৠণামমিতৌজসাম্ |
ভাবয়ন্সর্বলোকান্বৈ স্থিত এষ গণঃ সদা || ২. ৯. ৭৫||
অত ঊর্ধ্বং প্রবক্ষ্যামি সর্বানপি গণান্পুনঃ |
সংততিং সংস্থিতিং চৈব ভাবনাং চ যথাক্রমম্ || ২. ৯. ৭৬||
এতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয়
উপোদ্ধাতপাদে পিতৃকল্পো নাম নবমোঽধ্যায়ঃ || ৯||
বৃহস্পতিরুবাচ
সপ্তৈতে জয়তাং শ্রেষ্ঠাঃ স্বর্গে পিতৃগণাঃ স্মৃতাঃ |
চৎবারো মুর্ত্তিমন্তশ্চ ত্রয়স্তেষামমূর্ত্তয়ঃ || ২. ১০. ১||
তেষাং লোকান্বিসর্গং চ কীর্ত্তয়িষ্যে নিবোধত |
যাবৈ দুহিতরস্তেষাং দৌহিত্রাশ্চেব যে স্মৃতাঃ || ২. ১০. ২||
লোকাঃ সংতানকা নাম যত্র তিষ্ঠন্তি ভাস্বরাঃ |
অমূর্ত্তয়ঃ পিতৃগণাস্তে বৈ পুত্রাঃ প্রজাপতেঃ || ২. ১০. ৩||
বিরাজস্য দ্বিজশ্রেষ্ঠা বৈরাজা ইতি বিশ্রুতাঃ |
এতে বৈ পিতরস্তাত যোগানাং যোগবর্ধনাঃ || ২. ১০. ৪||
অপ্যায়য়ন্তি যে নিত্যং যোগায়োগবলেন তু |
শ্রাদ্ধৈরাপ্যায়িতাস্তে বৈ সোমমাপ্যায়য়ন্তি চ || ২. ১০. ৫||
আপ্যায়িতস্ততঃ সোমো লোকানাপ্যায়য়ত্যুত |
এতেষাং মানসী কন্যা মেনা নাম মহাগিরেঃ || ২. ১০. ৬||
পত্নী হিমবতঃ পুত্রো যস্যা মৈনাক উচ্যতে |
পর্বতপ্রবরঃ সোঽথ ক্রৈঞ্চশ্চাস্য গিরেঃ সুতঃ || ২. ১০. ৭||
তিস্রঃ কন্যাস্তু মেনায়াং জনয়ামাস শৈলারাট্ |
অপর্ণামেকপর্ণাং চ তৃতীয়ামেকপাটলাম্ || ২. ১০. ৮||
ন্যগ্রোধমে কপর্ণা তু পাঠলং ৎবেকপাটলা |
আশিতে দ্বে অপর্ণা তু হ্যনিকেতা তপোঽচরৎ || ২. ১০. ৯||
শতং বর্ষসহস্রাণাং দুশ্চরং দেবদানবৈঃ |
আহারমেকপর্ণেন হ্যেকপর্ণা সমাচরৎ || ২. ১০. ১০||
পাটলেনৈব চৈকেন ব্যদধাদেকপাটলা |
পূর্ণে বর্ষসহস্রে দ্বে চাহারং বৈ প্রজক্রতুঃ || ২. ১০. ১১||
একা তত্র নিরাহারা তাং মাতা প্রত্যভাষত |
নিষেধয়ন্তী সোমেতি মাতৃস্রেহেন দুঃখিতা || ২. ১০. ১২||
সা তথোক্তা তদাপর্ণা দেবী দুশ্চরচারিণী |
উমেতি হি মহাভাগা ত্রিষু লোকেষু বিশ্রুতা || ২. ১০. ১৩||
তথৈব নাম্না তেনাসৌ নিরুক্তোক্তেন কর্মণা |
এতত্তু ত্রিকুমারীকং জগৎস্থাবরজঙ্গ মম্ || ২. ১০. ১৪||
এতাসাং তপসা সৃষ্টং যাবদ্ভূমির্দ্ধরিষ্যতি |
তপঃশরীরাস্তাঃ সর্বাস্থিস্রো যোগবলান্বিতাঃ || ২. ১০. ১৫||
সর্বাস্তাঃ সুমহাভাগাঃ সর্বাশ্চ স্থিরয়ৌবনাঃ |
সর্বাশ্চ ব্রহ্মবাদিন্যঃ সর্বাশ্চৈবোর্ধ্বরেতসঃ || ২. ১০. ১৬||
উমা তাসাং বরিষ্ঠা চ শ্রেষ্ঠা চ বরবর্ণিনী |
মহায়োগবলোপেতা মহাদেবমুপস্থিতা || ২. ১০. ১৭||
দত্তকশ্চোশান্স্তস্যাঃ পুত্রো বৈ ভৃগুনন্দনঃ |
অসিতস্যৈকপর্ণা তু পত্নী সাধ্বী পতিব্রতা || ২. ১০. ১৮||
দত্তা হিমবতা তস্মৈ যোগাচার্যায় ধীমতে |
দেবলং সুষুবে সা তু ব্রহ্মিষ্ঠং জ্ঞানসংযুতা || ২. ১০. ১৯||
যা বৈ তাসাং কুমারীণাং তৃতীয়া চৈকপাটলা |
পুত্রং শতশলাকস্য জৈগীষব্যমুপস্থিতা || ২. ১০. ২০||
তস্যাপি শঙ্খলিশিতৌ স্মৃতৌ পুত্রাবয়োনিজৌ |
ইত্যেতা বৈ মহাভাগাঃ কন্যা হিমবতঃ শুভাঃ || ২. ১০. ২১||
রুদ্রাণী সা তু প্রবরা স্বৈর্গুণৈরতিরিচ্যতে |
অন্যোন্যপ্রীতমনসোরুমাশঙ্করয়োরথ || ২. ১০. ২২||
শ্লেষং সংসক্তয়োর্জ্ঞাৎবা শঙ্কিতঃ কিল বৃত্রহা |
তাভ্যাং মৈথুনশক্তাভ্যামপত্যোদ্ভবভীরুণা || ২. ১০. ২৩||
তয়োঃ সকাশমিন্দ্রেণ প্রেষিতো হব্যবাহনঃ |
অনায়ো রতিবিঘ্নং চ ৎবমাচর হুতাশন || ২. ১০. ২৪||
সর্বত্র গত এব ৎবং ন দোষো বিদ্যতে তব |
ইত্যেবমুক্তে তু তদা বহ্নিনা চ তথা কৃতম্ || ২. ১০. ২৫||
উমাং দেবঃ সমুৎসৃজ্য শুক্রং ভূমৌ ব্যসর্জয়ৎ |
ততো রুষিতয়া সদ্যঃ শপ্তোঽগ্নিরুময়া তয়া || ২. ১০. ২৬||
ইদং চোক্তবতী বহ্নিং রোষগদ্গদয়া গিরা |
যস্মান্নাববিতৃপ্তাভ্যাং রতিবিঘ্নং হুতাশন || ২. ১০. ২৭||
কৃতবানস্য কর্ত্তব্যং তস্মাত্ত্বমসি দুর্মতিঃ |
যদেবং বিগতং গর্ভং রৌদ্রং শুক্রং মহাপ্রভম্ || ২. ১০. ২৮||
গর্ভে ৎবং ধারয়স্বৈবমেষা তে দণ্ডধারণা |
স শাপদোষাদ্রুদ্রাণ্যা অন্তর্গর্ভো হুতাশনঃ || ২. ১০. ২৯||
বহূন্বর্ষগণান্গর্ভং ধারয়ামাস বৈ দ্বিজ |
স গঙ্গামভিগম্যাহ শ্রূয়তাং সরিদুত্তমে || ২. ১০. ৩০||
সুমহান্পরিখেদো মে জায়তে গর্ভধারণাৎ |
মদ্ধিতার্থ মথো গর্ভমিমং ধারয় নিম্নগে || ২. ১০. ৩১||
মৎপ্রসাদাচ্চ তনয়ো বরদস্তে ভবিষ্যতি |
তথেত্যুক্ত্বা তদা সা তু সংপ্রৎদৃষ্টা মহানদী || ২. ১০. ৩২||
তং গর্ভং ধারয়ামাস দহ্যমানেন চেতসা |
সাপি কৃচ্ছ্রেণ মহতা খিদ্যমানা মহানদী || ২. ১০. ৩৩||
প্রকৃষ্টং ব্যসৃজদ্গর্ভং দীপ্যমান মিবানলম্ |
রুদ্রাগ্নিগঙ্গাতনয়স্তত্র জাতোঽরুণপ্রভঃ || ২. ১০. ৩৪||
আদিত্যশতসংকাশো মহাতেজাঃ প্রতাপবান্ |
তস্মিঞ্জাতে মহাভাগে কুমারে জাহ্নবীসুতে || ২. ১০. ৩৫||
বিমানয়ানৈরাকাশং পতত্র্রিভিরিবাবৃতম্ |
দেবদুন্দুভয়ো নেদুরাকাশে মধুরস্বনাঃ || ২. ১০. ৩৬||
মুমুচুঃ পুষ্পবর্ষং চ খেচরাঃ সিদ্ধচারণাঃ |
জগুর্গন্ধর্বমুখ্যাশ্চ সর্বশস্তত্র তত্র হ || ২. ১০. ৩৭||
যক্ষা বিদ্যাধরাঃ সিদ্ধাঃ কিন্নরাশ্চৈব সর্বশঃ |
মহানাগসহস্রাণি প্রবরাশ্চ পতত্র্রিণঃ || ২. ১০. ৩৮||
উপতস্থুর্মহাভাগমাগ্নেয়ং শঙ্করাত্মজম্ |
প্রভাবেণ হতাস্তেন দৈত্যবানররাক্ষসাঃ || ২. ১০. ৩৯||
স হি সপ্তর্ষিভার্যাভিরারাদেবাগ্নিসংভবঃ |
অভিষেকপ্রয়াতাভির্দৃষ্টো বর্জ্য ৎবরুন্ধতীম্ || ২. ১০. ৪০||
তাভিঃ স বালার্কনিভো রৌদ্রঃ পরিবৃতঃ প্রভুঃ |
স্নিহ্যমানাভিরত্যর্থং স্বকভিরিব মাতৃভিঃ || ২. ১০. ৪১||
যুগপৎসর্বদেবীভির্দিধিৎসুর্জাহ্নবীং সুতঃ |
ষণ্মুখান্যসৃজচ্ছ্রীমাংস্তেনায়ং ষণ্মুখঃ স্মৃতঃ || ২. ১০. ৪২||
তেন জাতেন মহাতা দেবানামসহিষ্ণবঃ |
স্কন্দিতা দানবগণাস্তস্মাৎস্কন্দঃ প্রতাপবান্ || ২. ১০. ৪৩||
কৃত্তিকাভিস্তু যস্মাৎস বর্দ্ধিতো হি পুরাতনঃ |
কার্ত্তিকেয় ইতি খ্যাতস্তস্মাদসুরসূদনঃ || ২. ১০. ৪৪||
জৃংভতস্তস্য দৈত্যারের্জ্বালা মালাকুলা তদা |
মুখাদ্বিনির্গতা তস্য স্বশক্তিরপরাজিতা || ২. ১০. ৪৫||
ক্রীডার্থং চৈব স্কন্দস্য বিষ্ণুনা প্রভবিষ্ণুনা |
গরুডাদতিসৃষ্টৌ হি পক্ষিণৌ দ্বৌ প্রভদ্রকৌ || ২. ১০. ৪৬||
ময়ূরঃ কুক্কুটশ্চৈব পতাকা চৈব বায়ুনা |
যস্য দত্তা সরস্বত্যা মহাবীণা মহাস্বনা || ২. ১০. ৪৭||
অজঃ স্বয়ংভুবা দত্তো মেষো দত্তশ্চ শংভুনা |
মায়াবিহরণে বিপ্র গিরৌ ক্রৈঞ্চে নিপাতিতে || ২. ১০. ৪৮||
তারকে চাসুরবরে সমুদীর্ণে নিপাতিতে |
সেংদ্রোপেন্দ্রৈর্মহাভাগৈর্দেবৈরগ্নিসুতঃ প্রভুঃ || ২. ১০. ৪৯||
সেনাপত্যেন দৈত্যারিরভিষিক্তঃ প্রতাপবান্ |
দেবসেনাপতিস্ত্বেষ পঠ্যতে সুরনায়কঃ || ২. ১০. ৫০||
দেবারিস্কন্দনঃ স্কন্দঃ সর্বলোকেশ্বরঃ প্রভুঃ |
প্রমথৈর্বিধৈর্দেবস্তথা ভূতগণৈরপি || ২. ১০. ৫১||
মাতৃভির্বিবিধাভিশ্চ বিনায়কগণৈস্ততঃ |
লোকাঃ সোমপদা নাম মরীচের্যত্র বৈ সুতাঃ || ২. ১০. ৫২||
তত্র তে দিবি বর্ত্তন্তে দেবাস্তান্পূজয়ন্ত্যুত |
শ্রুতা বর্হিষদো নাম পিতরঃ সোমপাস্তু তে || ২. ১০. ৫৩||
এতেষাং মানসী কন্যা অচ্ছোদা নাম নিম্নগা |
অচ্ছৌদং নাম তদ্দিব্যং সরো যস্মাৎসমুত্থিতা || ২. ১০. ৫৪||
তথা ন দৃষ্টপূর্বাস্তু বিতরস্তে কদাচন |
সংভূতা মানসী তেষাং পিৎৠন্স্বান্নাভিজানতী || ২. ১০. ৫৫||
সা ৎবন্যং পিতরং বব্রে তানতিক্রম্য বৈ পিৎৠন্ |
অমাবসুমিতি খ্যাতমৈলপুত্রং নভশ্চরম্ || ২. ১০. ৫৬||
অদ্রিকাপ্সরসা যুক্তং বিমানাধিষ্ঠিতং দিবি |
সা তেন ব্যভিচারেণ গগনে নাপ্রজারিণী || ২. ১০. ৫৭||
পিতরং প্রার্থয়িৎবান্যং যোগভ্রষ্টা পপাত হ |
ত্রীণ্যবশ্যদ্বিমানানি পতন্তী সা দিবশ্চ্যুতা || ২. ১০. ৫৮||
ত্রসরেণুপ্রমাণানি তেষু চাবস্থিতান্পিৎৠন্ |
সুসূক্ষ্মানপরিব্যক্তানগ্নীনগ্নিষ্বিবাহিতান্ || ২. ১০. ৫৯||
ত্রায়ধ্বমিত্যুবাচার্তা পততী চাপ্যবাক্ষিরাঃ |
তৈরুকা সা তু মা ভৈষী রিত্যতোঽধিষ্ঠিতাভবৎ || ২. ১০. ৬০||
ততঃ প্রসাদয়ৎসা বৈ সীদন্তী ৎবনয়া গিরা |
ঊচুস্তে পিতরঃ কন্যাং ভ্রষ্টৈশ্বর্যাং ব্যতিক্রমাৎ || ২. ১০. ৬১||
ভ্রষ্টৈশ্বর্যাং স্বদোষেণ পতসি ৎবং শুচিস্মিতে |
যৈরাচরন্তি কর্মণি শরীরৈরিহ দেবতাঃ || ২. ১০. ৬২||
তৈরেব তৎকর্মভলং প্রাপ্নুবন্তি সদা স্ম হ |
সদ্যঃ ফলন্তি কর্মাণি দেবৎবে প্রেত্য মানুষে || ২. ১০. ৬৩||
তস্মাৎস্বতপসঃ পুত্রি প্রেত্য সংপ্রাপ্স্যসে ফলম্ |
ইত্যুক্তয়া তু পিতরঃ পুনস্তে তু প্রসাদিতাঃ || ২. ১০. ৬৪||
ধ্যাৎবা প্রসাদং তে চক্রুস্তস্যাস্তদনুকংপয়া |
অবশ্যং ভাবিনং দৃষ্ট্বা হ্যর্থমূচুস্তদা তু তাম্ || ২. ১০. ৬৫||
সোমপাঃ পিতরঃ কন্যাং রজ্ঞোঽস্যৈব ৎবমাবসোঃ |
উৎপন্নস্য পৃথিব্যাং তু মানুষেষু মহাত্মনঃ || ২. ১০. ৬৬||
কন্যা ভূৎবা ৎবিমাংল্লোকান্পুনঃ প্রাপ্স্যসি ভামিনি |
অষ্টাবিংশে ভবিত্রী ৎবং দ্বাপরে মৎস্যয়োনিজা || ২. ১০. ৬৭||
অস্যৈব রাজ্ঞো দুহিতা হ্যদ্রিকায়ামমাবসোঃ |
পরাশরস্য দায়াদমৃষিং ৎবং জনয়িষ্যসি || ২. ১০. ৬৮||
স বেদমেকং ব্রহ্মর্ষি শ্চতুর্দ্ধা বিভজিষ্যতি |
মহাভিষস্য পুত্রৌ দ্বৌ শন্তনোঃ কীর্ত্তিবর্দ্ধনৌ || ২. ১০. ৬৯||
বিচিত্রবীর্যং ধর্মজ্ঞং ৎবমেবোৎপাদয়িষ্যসি |
চিত্রাঙ্গদং চ রাজানং সর্বসত্ত্ববলান্বিতম্ || ২. ১০. ৭০||
এতানুৎপাদয়িৎবাথ পুনর্লোকানবা প্স্যসি |
ব্যভিচারাৎপিৎৠণাং ৎবং প্রাপ্স্যসে জন্ম কুৎসিতম্ || ২. ১০. ৭১||
তস্যৈব রাজ্ঞস্ত্বং কন্যা অদ্রিকায়াং ভবিষ্যসি |
কন্যা ভূৎবা ততশ্চ ৎবমিমাংল্লোকানবাপ্স্যসি || ২. ১০. ৭২||
এবমুকৎবা তু দাশেয়ী জাতা সত্যবতী তু সা |
অদ্রিকায়াঃ সুতা মৎস্যা সুতা জাতা হ্যমাবসোঃ || ২. ১০. ৭৩||
অদিকামৎস্যসংভূতা গঙ্গায়মুনসংগমে |
তস্যা রাজ্ঞো হি সা কন্যা রাজ্ঞো বীর্যেণ চৈব হি || ২. ১০. ৭৪||
বিরজানাম তে লোকা দিবি রোচন্তি তে গণাঃ |
অগ্নিষ্বাত্তাঃ স্মৃতাস্তত্র পিতরো ভাস্করপ্রভাঃ পুলহস্য প্রজাপতেঃ |
এতেষাং মানসী কন্যা পীবরী নাম বিশ্রুতা || ২. ১০. ৭৭||
যোগিনী যোগপত্নী চ যোগমাতা তথৈব চ |
ভবিতা দ্বাপরং প্রাপ্য অষ্টাবিংশতিমেব তু || ২. ১০. ৭৮||
শ্রীমান্ব্যাসো মহায়োগী যোগস্তস্মিন্দ্বিজোত্তমাঃ |
ব্যাসাদরণ্যাং সংভূতো বিধূম ইব পাবকঃ || ২. ১০. ৭৯||
পরাশরকুলোদ্ভূতঃ শুকো নাম মহাতপাঃ |
স তস্যাং পিতৃকন্যায়াং পীবর্যাং জনয়দ্বিভুঃ || ২. ১০. ৮০||
পুত্রান্পঞ্চ যোগচর্যাপরিবুর্ণান্পরিশ্রুতান্ |
কৃষ্ণা গৌরং প্রভুং শংভুং তথা ভূরিশ্রুতং চ বৈ || ২. ১০. ৮১||
কন্যাং কীর্তিমতীং চৈব যোগিনীং যোগমাতরম্ |
ব্রহ্মদত্তস্য চননী মহিষী ৎবণুহস্য সা || ২. ১০. ৮২||
আদিত্যকিরণোপেতমপুনর্মার্গমাস্থিতঃ |
সর্বব্যাপী বিনির্মুক্তো ভবিষ্যতি মহামুনিঃ || ২. ১০. ৮৩||
ত্রয় এতে গাণাঃ প্রোক্তাশ্চতুঃ শেষান্নিবোধত |
তান্বক্ষ্যামি দ্বিজশ্রেষ্ঠাঃ প্রভামূর্ত্তিমতো গণান্ || ২. ১০. ৮৪||
উৎপন্নাস্তু স্বধায়াং তে কাব্যা হ্যগ্নেঃ কবেঃ সুতাঃ |
পিতরো দেবলোকেষু জ্যোতির্ভাসিষু ভাস্বরাঃ || ২. ১০. ৮৫||
সর্বকামসমৃদ্ধেষু দ্বিজাস্তান্ভাবয়ন্ত্যুত |
এতেষাং মানসী কন্যা যোগোৎপত্তিরিতিশ্রুতা || ২. ১০. ৮৬||
দত্তা সনৎকুমারেণ শুক্রস্য মহিষী তু যা |
একশৃঙ্গেতি বিখ্যাতা ভৃগূণাং কীর্তিবর্দ্ধিনী || ২. ১০. ৮৭||
মরীচি গর্ভাস্তে লোকাঃ সমাবৃত্য দিবি স্থিতাঃ |
এতে হ্যঙ্গিরসঃ পুত্রাঃ সাধ্যৈঃ সংবর্দ্ধিতাঃ পুরা || ২. ১০. ৮৮||
উপহূতাঃ স্মৃতাস্তে বৈ পিতরো ভাস্বরা দিবি |
তান্ক্ষত্রিয়গণাঃ সপ্ত ভাবয়ন্তি ফলার্থিনঃ || ২. ১০. ৮৯||
এতেষাং মানসী কন্যা যশোদা নাম বিশ্রুতা |
মতা যা জননী দেবী খট্বাঙ্গস্য মহাত্মনঃ || ২. ১০. ৯০||
যজ্ঞে যস্য পুরা গীতা গাথাগীতৈর্মহর্ষিভিঃ |
অগ্নের্জন্ম তদা দৃষ্ট্বা শাণ্ডিল্যস্য মহাত্মনঃ || ২. ১০. ৯১||
যজমানং দিলীপং যে পশ্যন্ত্যত্র সমাহিতাঃ |
সত্যব্রতং মহাত্মানং তেঽপি স্বর্গজিতো নরাঃ || ২. ১০. ৯২||
আজ্যপা নাম পিতরঃ কর্দমস্য প্রজা পতেঃ |
সমুৎপন্নস্য পুলহাদুৎপন্নাস্তস্য তে সুতাঃ || ২. ১০. ৯৩||
লকিষু তেষু বৈবর্তাঃ কামগোষু বিহঙ্গমাঃ |
এতান্বৈশ্যগণাঃ শ্রাদ্ধে ভাব যন্তি ফলার্থিনঃ || ২. ১০. ৯৪||
এতেষাং মানসী কন্যা বিরজা নাম বিশ্রুতা |
যয়াতের্জননী সাধ্বী পত্নী সা নহুষস্য চ || ২. ১০. ৯৫||
সুকালা নাম পিতরো বসিষ্ঠস্য মহাত্মনঃ |
হৈরণ্যগর্ভস্য সুতাঃ শূদ্রাস্তাং ভাবয়ন্ত্যুত || ২. ১০. ৯৬||
মানসা নাম তে লোকা বর্তন্তে যত্র তে দিবি |
এতেষাং মানসী কন্যা নর্মদা সরিতাং বরা || ২. ১০. ৯৭||
সা ভাবয়তি ভূতানি দক্ষিণাপথগামিনী |
জননী সাত্রসদ্দস্যোঃ পুরুকুৎসপরিগ্রহঃ || ২. ১০. ৯৮||
এতেষামভ্যুপগমান্মনুর্মন্বন্তরেশ্বরঃ |
মন্বন্তরাদৌ শ্রাদ্ধানি প্রবর্তয়তি সর্বশঃ || ২. ১০. ৯৯||
পিৎৠণামানুপূর্ব্যেণ সর্বেষাং দ্বিজসত্তমাঃ |
তস্মাদেতৎস্বধর্মেণ দেয়ং শ্রাদ্ধং চ শ্রদ্ধয়া || ২. ১০. ১০০||
সর্বেষাং রাজতৈঃ পাত্রৈরপি বা রজতান্বিতৈঃ |
দত্তং স্বধাং পুরোধায় শ্রাদ্ধং প্রীণাতি বৈ পিৎৠন্ || ২. ১০. ১০১||
সৌম্যায়নে বাগ্রয়ণে হ্যশ্বমেধং তদপ্নুয়াৎ |
সোমশ্চাপ্যায়নং কৃৎবা হ্যগনের্বেবস্বতস্য চ || ২. ১০. ১০২||
পিৎৠন্প্রীণাতি যো বংশ্যঃ পিতরঃ প্রীণয়ন্তি তম্ |
পিতরঃ পুষ্টিকামস্য প্রজাকামস্য বা পুনঃ || ২. ১০. ১০৩||
পুষ্টিং প্রজাস্তথা স্বর্গং প্রয়চ্ছন্তি ন সংশয়ঃ |
দেবকার্যাদপি সদা পিতৃকার্যং বিশিষ্যতে || ২. ১০. ১০৪||
দেবতাভ্যঃ পিৎৠণাং হি পূর্বমাপ্যায়নং স্মৃতম্ |
ন হি যোগ গতিঃ সূক্ষ্মা পিৎৠণাং ন পিতৃক্ষয়ঃ || ২. ১০. ১০৫||
তপসা বিপ্রসিদ্ধেন দৃশ্যতে মাসচক্ষুষা |
ইত্যেতে পিতরশ্চৈব লোকা দুহিতরশ্চ বৈ || ২. ১০. ১০৬||
দৌহিত্রা যজমানাশ্চ প্রোক্তা যে ভাবয়ন্তি যান্ |
চৎবারো মূর্তিমন্তস্তু ত্রয়স্তেষামমূর্তয়ঃ || ২. ১০. ১০৭||
তেভ্যঃ শ্রাদ্ধানি সৎকৃত্য দেবাঃ কুর্বন্তি যত্নতঃ |
ভক্ত্যা প্রাঞ্জলয়ঃ সর্বেসেংদ্রাস্তদ্গতমানসাঃ || ২. ১০. ১০৮||
বিশ্বে চ সিকতাশ্চৈব পৃশ্নিজাঃ শৃঙ্গিণস্তথা |
কৃষ্ণাঃ শ্বেতাংবুজাশ্চৈব বিধিব ৎপূজয়ন্ত্যুত || ২. ১০. ১০৯||
প্রশস্তা বাতরসনা দিবাকৃত্যাস্তথৈব চ |
মেঘাশ্চ মরুতশ্চৈব ব্রহ্মাদ্যাশ্চ দিবৌকসঃ || ২. ১০. ১১০||
অত্রিভৃগ্বঙ্গিরাদ্যাশ্চ ঋষয়ঃ সর্ব এব তে |
যক্ষা নাগাঃ সুপর্ণাশ্চ কিন্নরা রাক্ষসৈঃ সহ || ২. ১০. ১১১||
পিৎৠংস্তেঽপূজয়ন্সর্বে নিত্যমেব ফলার্থিনঃ |
এবমেতে মহাত্মানঃ শ্রাদ্ধে সৎকৃত্য পূজিতাঃ || ২. ১০. ১১২||
সর্বান্কামান্প্রয়চ্ছন্তি শতশোঽথ সহস্রশঃ |
হিৎবা ত্রৈলোক্যসংসারং জরামৃত্যুময়ং তথা || ২. ১০. ১১৩||
মোক্ষং যোগমথৈশ্বর্যং সূক্ষ্মদেহমদেহিনাম্ |
কৃৎস্নং বৈরাগ্যমানন্ত্যং প্রয়চ্ছন্তি পিতামহাঃ || ২. ১০. ১১৪||
এশ্বর্যং বিহিতং যোগমেশ্বর্যং যোগ উচ্যতে |
যোগৈশ্বর্যমৃতে মোক্ষঃ কথঞ্চিন্নোপপদ্যতে || ২. ১০. ১১৫||
অপক্ষস্যেব গমনং গগনে পক্ষিণো যথা |
বরিষ্ঠঃ সর্বধর্মাণাং মোক্ষধর্মঃ সনাতনঃ || ২. ১০. ১১৬||
পিৎৠণাং হি প্রসাদেন প্রাপ্যতে স মহাত্মনাম্ |
মুক্তাবৈডূর্যবাসাংসি বাজিনাগায়ুতানি চ || ২. ১০. ১১৭||
কোটিশশ্চাপি রত্নানিপ্রয়চ্ছন্তি পিতামহাঃ |
হংসবর্হিণয়ুক্তনি মুক্তাবৈঢূর্যবন্তি চ || ২. ১০. ১১১৮||
কিঙ্কিণীজালনদ্ধানি সদা পুষ্পফলানি চ |
বিমানানাং সহস্রাণি যুক্তান্যপ্সরসাং গণৈঃ || ২. ১০. ১১৯||
সর্বকামসমৃদ্ধানি প্রয়চ্ছন্তি পিতামহাঃ |
প্রজাং পুষ্টিং স্মৃতিং মেধাং রাজ্যমারোগ্যমেব চ |
প্রীতা নিত্যং প্রয়চ্ছন্তি মানুষাণাং পিতামহাঃ || ২. ১০. ১২০||
ইতি শ্রীব্রহ্মাণ্ডে মহাপুরাণে বায়ুপ্রোক্তে মধ্যভাগে তৃতীয়ে উপোদ্ধাতপাদে পিতৃরাজ্য কল্পো নাম দশমোঽধ্যায়ঃ || ১০||
