কুমারসম্ভবম্ সর্গঃ ০৬
অথ বিশ্বাত্মনে গৌরী সন্দিদেশ মিথঃ সখীম্ |
দাতা মে ভূভৃতাং নাথঃ প্রমাণীক্রিয়তামিতি || ৬.১||
তয়া ব্যাহৃতসন্দেশা সা বভৌ নিভৃতা প্রিয়ে |
চূতয়ষ্টিরিবাভ্যাষ্যে মধৌ পরভৃতামুখী || ৬.২||
স তথেতি প্রতিজ্ঞায় বিসৃজ্য কথমপ্যুমাম্ |
ঋষীঞ্জ্যোতির্ময়ান্সপ্ত সস্মার স্মরশাসনঃ || ৬.৩||
তে প্রভামণ্ডলৈর্ব্যোম দ্যোতয়ন্তস্তপোধনাঃ |
সারুন্ধতীকাঃ সপদি প্রাদুরাসন্পুরঃ প্রভোঃ || ৬.৪||
আপ্লুতাস্তীরমন্দার-কুসুমোৎকিরবীচিষু |
আকাশগঙ্গাস্রোতস্সু দিঙ্নাগমদগন্ধিষু || ৬.৫||
মুক্তায়জ্ঞোপবীতানি বিভ্রতো হৈমবল্কলাঃ |
রত্নাক্ষসূত্রাঃ প্রব্রজ্যাং কল্পবৃক্ষা ইবাশ্রিতাঃ || ৬.৬||
অধঃপ্রবর্ত্তিতাশ্বেন সমাবর্জিতকেতুনা |
সহস্ররশ্মিনা শশ্বৎসপ্রমাণমুদীক্ষিতাঃ || ৬.৭||
আসক্তবাহুলতয়া সার্ধমুদ্ধৃতয়া ভুবা |
মহাবরাহদংষ্ট্রায়াং বিশ্রান্তাঃ প্রলয়াপদি || ৬.৮||
সর্গশেষপ্রণয়নাদ্বিশ্বয়োনেরনন্তরম্ |
পুরাতনাঃ পুরাবিদ্ভির্ধাতার ইতি কীর্তিতাঃ || ৬.৯||
প্রাক্তনানাং বিশুদ্ধানাং পরিপাকমুপেয়ুষাম্ |
তপসামুপভুঞ্জানাঃ ফলান্যপি তপস্বিনঃ || ৬.১০||
তেষাং মধ্যগতা সাধ্বী পত্যুঃ পাদার্পিতেক্ষণা |
সাক্ষাদিব তপঃসিদ্ধির্বভাসে বহ্বরুন্ধতী || ৬.১১||
তামগৌরবভেদেন মুনীংশ্চাপশ্যদীশ্বরঃ |
স্ত্রী পুমানিত্যনাস্থৈষা বৃত্তং হি মহিতং সতাম্ || ৬.১২||
তদ্দর্শনাদভূচ্ছম্ভোর্ভূয়ান্দারার্থমাদরঃ |
ক্রিয়াণাং খলু ধর্ম্যাণাং সৎপত্ন্যো মূলসাধনম্ || ৬.১৩||
ধর্মেণাপি পদং শর্বে কারিতে পার্বতীং প্রতি |
পূর্বাপরাধভীতস্য কামস্যোচ্ছ্বাসিতং মনঃ || ৬.১৪||
অথ তে মুনয়ঃ সর্বে মানয়িৎবা জগদ্গুরুম্ |
ইদমূচুরনূচানাঃ প্রীতিকণ্টকিতৎবচঃ || ৬.১৫||
যদ্ব্রহ্ম সম্যগাম্নাতং যদগ্নৌ বিধিনা হুতম্ |
যচ্চ তপ্তং তপস্তস্য বিপক্বং ফলমদ্য নঃ || ৬.১৬||
যদধ্যক্ষেণ জগতাং বয়মারোপিতাস্ত্বয়া |
মনোরথস্যাবিষয়ং মনোবিষয়মাত্মনঃ || ৬.১৭||
যস্য চেতসি বর্তেথাঃ স তাবৎকৃতিনাং বরঃ |
কিং পুনর্ব্রহ্ময়োনের্যস্তব চেতসি বর্ততে || ৬.১৮||
সত্যমর্কাচ্চ সোমাচ্চ পরমধ্যাস্মহে পদম্ |
অদ্য তূচ্চৈস্তরং তস্মাৎস্মরণানুগ্রহাত্তব || ৬.১৯||
ৎবৎসম্ভাবিতমাত্মানং বহু মন্যামহে বয়ম্ |
প্রায়ঃ প্রত্যয়মাধত্তে স্বগুণেষূত্তমাদরঃ || ৬.২০||
যা নঃ প্রীতির্বিরূপাক্ষ ৎবদনুধ্যানসম্ভবা |
সা কিমাবেদ্যতে তুভ্যমন্তরাত্মাসি দেহিনাম্ || ৬.২১||
সাক্ষাদ্দৃষ্টো | অসি ন পুনর্বিদ্মস্ত্বাং বয়মঞ্জসা |
প্রসীদ কথয়াত্মানং ন ধিয়াং পথি বর্তসে || ৬.২২||
কিং যেন সৃজসি ব্যক্তমুত যেন বিভর্ষি তৎ |
অথ বিশ্বস্য সংহর্তা ভাগঃ কতম এষ তে || ৬.২৩||
অথবা সুমহত্যেষা প্রার্থনা দেব তিষ্ঠতু |
চিন্তিতোপস্থিতাংস্তাবচ্ছাধি নঃ করবাম কিম্ || ৬.২৪||
অথ মৌলিগতস্যেন্দোর্বিশদৈর্দশনাংশুভিঃ |
উপচিন্বন্প্রভাং তন্বীং প্রত্যাহ পরমেশ্বরঃ || ৬.২৫||
বিদিতং বো যথা স্বার্থা ন মে কাশ্চিৎপ্রবৃত্তয়ঃ |
ননু মূর্তিভিরষ্টাভিরিত্থম্ভূতো | অস্মি সূচিতঃ || ৬.২৬||
সো | অহং তৃষ্ণাতুরৈর্বৃষ্টিং বিদ্যুৎবানিব চাতকৈঃ |
অরিবিপ্রকৃতৈর্দেবৈঃ প্রসূতিং প্রতি যাচিতঃ || ৬.২৭||
অত আহর্তুমিচ্ছামি পার্বতীমাত্মজন্মনে |
উৎপত্তয়ে হবির্ভোক্তুর্যজমান ইবারণিম্ || ৬.২৮||
তামস্মদর্থে যুষ্মাভির্যাচিতব্যো হিমালয়ঃ |
বিক্রিয়ায়ৈ ন কল্পন্তে সম্বন্ধাঃ সদনুষ্ঠিতাঃ || ৬.২৯||
উন্নতেন স্থিতিমতা ধুরমুদ্বহতা ভুবঃ |
তেন যোজিতসম্বন্ধং বিত্ত মামপ্যবঞ্চিতম্ || ৬.৩০||
এবং বাচ্যঃ স কন্যার্থমিতি বো নোপদিশ্যতে |
ভবৎপ্রণীতমাচারমামনন্তি হি সাধবঃ || ৬.৩১||
আর্যাপ্যরুন্ধতী তত্র ব্যাপারং কর্তুং অর্হতি |
প্রায়েণৈবংবিধে কার্যে পুরন্ধ্রীণাং প্রগল্ভতা || ৬.৩২||
তৎপ্রয়াতৌষধিপ্রস্থং সিদ্ধয়ে হিমবৎপুরম্ |
মহাকোশীপ্রপাতে | অস্মিন্সঙ্গমঃ পুনরেব নঃ || ৬.৩৩||
তস্মিন্সংযমিনামাদ্যে জাতে পরিণয়োন্মুখে |
জহুঃ পরিগ্রহব্রীডাং প্রাজাপত্যাস্তপস্বিনঃ || ৬.৩৪||
ততঃ পরমমিত্যুক্ত্বা প্রতস্থে মুনিমণ্ডলম্ |
ভগবানপি সম্প্রাপ্তঃ প্রথমোদ্দিষ্টমাস্পদম্ || ৬.৩৫||
তে চাকাশমসিশ্যামমুৎপত্য পরমর্ষয়ঃ |
আসেদুরোষধিপ্রস্থং মনসা সমরংহসঃ || ৬.৩৬||
অলকামতিবাহ্যেব বসতিং বসুসম্পদাম্ |
স্বর্গাভিষ্যন্দবমনং কৃৎবেবোপনিবেশিতম্ || ৬.৩৭||
গঙ্গাস্রোতঃপরিক্ষিপ্ত-বপ্রান্তর্জ্বলিতৌষধি |
বৃহন্মণিশিলাসালং গুপ্তাবপি মনোহরম্ || ৬.৩৮||
জিতসিংহভয়া নাগা যত্রাশ্বা বিলয়োনয়ঃ |
যক্ষাঃ কিম্পুরুষাঃ পৌরা যোষিতো বনদেবতাঃ || ৬.৩৯||
শিখরাসক্তমেঘানাং ব্যজন্তে যত্র বেশ্মনাম্ |
অনুগর্জিতসন্দিগ্ধাঃ করণৈর্মুরজস্বনাঃ || ৬.৪০||
যত্র কল্পদ্রুমৈরেব বিলোলবিটপাংশুকৈঃ |
গৃহয়ন্ত্রপতাকাশ্রীরপৌরাদরনির্মিতা || ৬.৪১||
যত্র স্ফটিকহর্ম্যেষু নক্তমাপানভূমিষু |
জ্যোতিষাং প্রতিবিম্বানি প্রাপ্নুবন্ত্যুপহারতাম্ || ৬.৪২||
যত্রৌষধিপ্রকাশেন নক্তং দর্শিতসঞ্চরাঃ |
অনভিজ্ঞাস্তমিস্রাণাং দুর্দিনেষ্বভিসারিকাঃ || ৬.৪৩||
যৌবনান্তং বয়ো যস্মিন্নাতঙ্কঃ কুসুমায়ুধঃ |
রতিখেদসমুৎপন্না নিদ্রা সঞ্জ্ঞাবিপর্যয়ঃ || ৬.৪৪||
ভ্রূভেদিভিঃ সকম্পোষ্ঠৈর্ললিতাঙ্গুলিতর্জনৈঃ |
যত্র কোপৈঃ কৃতাঃ স্ত্রীণামাপ্রসাদার্থিনঃ প্রিয়াঃ || ৬.৪৫||
সন্তানকতরুচ্ছায়া-সুপ্তবিদ্যাধরাধ্বগম্ |
যস্য চোপবনং বাহ্যং সুগন্ধির্গন্ধমাদনঃ || ৬.৪৬||
অথ তে মুনয়ো দিব্যাঃ প্রেক্ষ্য হৈমবতং পুরম্ |
স্বর্গাভিসন্ধিসুকৃতং বঞ্চনামিব মেনিরে || ৬.৪৭||
তে সদ্মনি গিরের্বেগাদুন্মুখদ্বাঃস্থবীক্ষিতাঃ |
অবতেরুর্জটাভারৈর্লিখিতানলনিশ্চলৈঃ || ৬.৪৮||
গগনাদবতীর্ণা সা যথাবৃদ্ধপুরস্সরা |
তোয়ান্তর্ভাস্করালীব রেজে মুনিপরম্পরা || ৬.৪৯||
তানর্ঘ্যানর্ঘ্যমাদায় দূরাৎপ্রত্যুদ্যয়ৌ গিরিঃ |
নময়ন্সারগুরুভিঃ পাদন্যাসৈর্বসুন্ধরাম্ || ৬.৫০||
ধাতুতাম্রাধরঃ প্রাংশুর্দেবদারুবৃহদ্ভুজঃ |
প্রকৃত্যৈব শিলোরস্কঃ সুব্যক্তো হিমবানিতি || ৬.৫১||
বিধিপ্রয়ুক্তসৎকারৈঃ স্বয়ং মার্গস্য দর্শকঃ |
স তৈরাক্রময়ামাস শুদ্ধান্তং শুদ্ধকর্মভিঃ || ৬.৫২||
তত্র বেত্রাসনাসীনান্কৃতাসনপরিগ্রহঃ |
ইত্যুবাচেশ্বরান্বাচং প্রাঞ্জলিঃ পৃথিবীধরঃ || ৬.৫৩||
অপমেঘোদয়ং বর্ষমদৃষ্টকুসুমং ফলম্ |
অতর্কিতোপপন্নং বো দর্শনং প্রতিভাতি মে || ৬.৫৪||
মূঢং বুদ্ধমিবাত্মানং হৈমীভূতমিবায়সম্ |
ভূমের্দিবমিবারূঢং মন্যে ভবদনুগ্রহাৎ || ৬.৫৫||
অদ্যপ্রভৃতি ভূতানামধিগম্যো | অস্মি শুদ্ধয়ে |
যদধ্যাসিতমর্হদ্ভিস্তদ্ধি তীর্থং প্রচক্ষতে || ৬.৫৬||
অবৈমি পূতমাত্মানং দ্বয়েনৈব দ্বিজোত্তমাঃ |
মূর্ধ্নি গঙ্গাপ্রপাতেন ধৌতপাদাম্ভসা চ বঃ || ৬.৫৭||
জঙ্গমং প্রৈষ্যভাবে বঃ স্থাবরং চরণাঙ্কিতম্ |
বিভক্তানুগ্রহং মন্যে দ্বিরূপমপি মে বপুঃ || ৬.৫৮||
ভবৎসম্ভাবনোত্থায় পরিতোষায় মূর্চ্ছতে |
অপি ব্যাপ্তদিগন্তানি নাঙ্গানি প্রভবন্তি মে || ৬.৫৯||
ন কেবলং দরীসংস্থং ভাস্বতাং দর্শনেন বঃ |
অন্তর্গতমপাস্তং মে রজসো | অপি পরং তমঃ || ৬.৬০||
কর্তব্যং বো ন পশ্যামি স্যাচ্চেৎকিং নোপপদ্যতে |
শঙ্কে মৎপাবনায়ৈব প্রস্থানং ভবতামিহ || ৬.৬১||
তথাপি তাবৎকস্মিংশ্চিদাজ্ঞাং মে দাতুমর্হথ |
বিনিয়োগপ্রসাদা হি কিঙ্করাঃ প্রভবিষ্ণুষু || ৬.৬২||
এতে বয়মমী দারাঃ কন্যেয়ং কুলজীবিতম্ |
ব্রূত যেনাত্র বঃ কার্যমনাস্থা বাহ্যবস্তুষু || ৬.৬৩||
ইত্যূচিবাংস্তমেবার্থং দরীমুখবিসর্পিণা |
দ্বিরিব প্রতিশব্দেন ব্যাজহার হিমালয়ঃ || ৬.৬৪||
অথাঙ্গিরসমগ্রণ্যমুদাহরণবস্তুষু |
ঋষয়শ্চোদয়ামাসুঃ প্রত্যুবাচ স ভূধরম্ || ৬.৬৫||
উপপন্নমিদং সর্বমতঃ পরমপি ৎবয়ি |
মনসঃ শিখরাণাং চ সদৃশী তে সমুন্নতিঃ || ৬.৬৬||
স্থানে ৎবাং স্থাবরাত্মানং বিষ্ণুমাহুস্তথা হি তে |
চরাচরাণাং ভূতানাং কুক্ষিরাধারতাং গতঃ || ৬.৬৭||
গামধাস্যৎকথং নাগো মৃণালমৃদুভিঃ ফণৈঃ |
আ রসাতলমূলাত্ত্বমবালম্বিষ্যথা ন চেৎ || ৬.৬৮||
অচ্ছিন্নামলসন্তানাঃ সমুদ্রোর্ম্যনিবারিতাঃ |
পুনন্তি লোকান্পুণ্যৎবাৎকীর্তয়ঃ সরিতশ্চ তে || ৬.৬৯||
যথৈব শ্লাঘ্যতে গঙ্গা পাদেন পরমেষ্ঠিনঃ |
প্রভবেণ দ্বিতীয়েন তথৈবোচ্ছিরসা ৎবয়া || ৬.৭০||
তির্যগূর্ধ্বমধস্তাচ্চ ব্যাপকো মহিমা হরেঃ |
ত্রিবিক্রমোদ্যতস্যাসীৎস চ স্বাভাবিকস্তব || ৬.৭১||
যজ্ঞভাগভুজাং মধ্যে পদমাতস্থুষা ৎবয়া |
উচ্চৈর্হিরণ্ময়ং শৃঙ্গং সুমেরোর্বিতথীকৃতম্ || ৬.৭২||
কাঠিন্যং স্থাবরে কায়ে ভবতা সর্বমর্পিতম্ |
ইদং তু ভক্তিনম্রং তে সতামারাধনং বপুঃ || ৬.৭৩||
তদাগমনকার্যং নঃ শৃণু কার্যং তবৈব তৎ |
শ্রেয়সামুপদেশাত্তু বয়মত্রাংশভাগিনঃ || ৬.৭৪||
অণিমাদিগুণোপেতমস্পৃষ্টপুরুষান্তরম্ |
শব্দমীশ্বর ইত্যুচ্চৈঃ সার্ধচন্দ্রং বিভর্তি যঃ || ৬.৭৫||
কল্পিতান্যোন্যসামর্থ্যৈঃ পৃথিব্যাদিভিরাত্মনি |
যেনেদং ধ্রিয়তে বিশ্বং ধুর্যৈর্যানমিবাধ্বনি || ৬.৭৬||
যোগিনো যং বিচিন্বন্তি ক্ষেত্রাভ্যন্তরবর্তিনম্ |
অনাবৃত্তিভয়ং যস্য পদমাহুর্মনীষিণঃ || ৬.৭৭||
স তে দুহিতরং সাক্ষাৎসাক্ষী বিশ্বস্য কর্মণঃ |
বৃণুতে বরদঃ শম্ভুরস্মৎসঙ্ক্রামিতৈঃ পদৈঃ || ৬.৭৮||
তমর্থমিব ভারত্যা সুতয়া যোক্তুমর্হসি |
অশোচ্যা হি পিতুঃ কন্যা সদ্ভর্ত্রে প্রতিপাদিতা || ৬.৭৯||
যাবদেতানি ভূতানি স্থাবরাণি চরাণি চ |
মাতরং কল্পয়ন্ত্যেনামীশো হি জগতঃ পিতা || ৬.৮০||
প্রণম্য শিতিকণ্ঠায় বিবুধাস্তদনন্তরম্ |
চরণৌ রঞ্জয়ন্ত্যস্যাশ্চূডামণিমরীচিভিঃ || ৬.৮১||
উমা বধূর্ভবান্দাতা যাচিতার ইমে বয়ম্ |
বরঃ শম্ভুরলং হ্যেষ ৎবৎকুলোদ্ভূতয়ে বিধিঃ || ৬.৮২||
অস্তোতুঃ স্তূয়মানস্য বন্দ্যস্যানন্যবন্দিনঃ |
সুতাসম্বন্ধবিধিনা ভব বিশ্বগুরোর্গুরুঃ || ৬.৮৩||
এবং বাদিনি দেবর্ষৌ পার্শ্বে পিতুরধোমুখী |
লীলাকমলপত্রাণি গণয়ামাস পার্বতী || ৬.৮৪||
শৈলঃ সম্পূর্ণকামো | অপি মেনামুখমুদৈক্ষত |
প্রায়েণ গৃহিণীনেত্রাঃ কন্যার্থে হি কুটুম্বিনঃ || ৬.৮৫||
মেনে মেনাপি তৎসর্বং পত্যুঃ কার্যমভীপ্সিতম্ |
ভবন্ত্যব্যভিচারিণ্যো ভর্তুরিষ্টে পতিব্রতাঃ || ৬.৮৬||
ইদমত্রোত্তরং ন্যায়্যমিতি বুদ্ধ্যা বিমৃশ্য সঃ |
আদদে বচসামন্তে মঙ্গলালঙ্কৃতাং সুতাম্ || ৬.৮৭||
এহি বিশ্বাত্মনে বৎসে ভিক্ষাসি পরিকল্পিতা |
অর্থিনো মুনয়ঃ প্রাপ্তং গৃহমেধিফলং ময়া || ৬.৮৮||
এতাবদুক্ত্বা তনয়ামৃষীনাহ মহীধরঃ |
ইয়ং নমতি বঃ সর্বাংস্ত্রিলোচনবধূরিতি || ৬.৮৯||
ঈপ্সিতার্থক্রিয়োদারং তে | অভিনন্দ্য গিরের্বচঃ |
আশীর্ভিরেধয়ামাসুঃ পুরঃপাকাভিরম্বিকাম্ || ৬.৯০||
তাং প্রণামাদরস্রস্ত-জাম্বূনদবতংসকাম্ |
অঙ্কমারোপয়ামাস লজ্জমানামরুন্ধতী || ৬.৯১||
তন্মাতরং চাশ্রুমুখীং দুহিতৃস্নেহবিক্লবাম্ |
বরস্যানন্যপূর্বস্য বিশোকামকরোদ্গুণৈঃ || ৬.৯২||
বৈবাহিকীং তিথিং পৃষ্টাস্তৎক্ষণং হরবন্ধুনা |
তে ত্র্যহাদূর্ধ্বমাখ্যায় চেলুশ্চীরপরিগ্রহাঃ || ৬.৯৩||
তে হিমালয়মামন্ত্র্য পুনঃ প্রেক্ষ্য চ শূলিনম্ |
সিদ্ধং চাস্মৈ নিবেদ্যার্থং তদ্বিসৃষ্টাঃ খমুদ্যয়ুঃ || ৬.৯৪||
পশুপতিরপি তান্যহানি কৃচ্ছ্রাদগময়দদ্রিসুতাসমাগমোৎকঃ |
কমপরমবশং ন বিপ্রকুর্যুর্বিভুমপি তং যদমী স্পৃশন্তি ভাবাঃ || ৬.৯৫||
