কুমারসম্ভবম্ সর্গঃ ০৭

কুমারসম্ভবম্ সর্গঃ ০৭

অথৌষধীনামধিপস্য বৃদ্ধৌ তিথৌ চ জামিত্রগুণান্বিতায়াম্ |
সমেতবন্ধুর্হিমবান্সুতায়া বিবাহদীক্ষাবিধিমন্বতিষ্ঠৎ || ৭.১||
বৈবাহিকৈঃ কৌতুকসংবিধানৈর্গৃহে গৃহে ব্যগ্রপুরন্ধ্রিবর্গম্ |
আসীৎপুরং সানুমতো | অনুরাগাদন্তঃপুরং চৈককুলোপমেয়ম্ || ৭.২||
সন্তানকাকীর্ণমহাপথং তচ্চীনাংশুকৈঃ কল্পিতকেতুমালম্ |
ভাসা জ্বলৎকাঞ্চনতোরণানাং স্থানান্তরস্বর্গ ইবাবভাসে || ৭.৩||
একৈব সত্যামপি পুত্রপঙ্ক্তৌ চিরস্য দৃষ্টেব মৃতোত্থিতেব |
আসন্নপাণিগ্রহণেতি পিত্রোরুমা বিশেষোচ্ছ্বসিতং বভূব || ৭.৪||
অঙ্কাদ্যয়াবঙ্কমুদীরিতাশীঃ সা মণ্ডনান্মণ্ডনমন্বভুঙ্ক্ত |
সম্বন্ধিভিন্নো | অপি গিরেঃ কুলস্য স্নেহস্তদেকায়তনং জগাম || ৭.৫||
মৈত্রে মুহূর্তে শশলাঞ্ছনেন যোগং গতাসূত্তরফল্গুনীষু |
তস্যাঃ শরীরে প্রতিকর্ম চক্রুর্বন্ধুস্ত্রিয়ো যাঃ পতিপুত্রবত্যঃ || ৭.৬||
সা গৌরসিদ্ধার্থনিবেশবদ্ভির্দূর্বাপ্রবালৈঃ প্রতিভিন্নরাগম্ |
নির্নাভিকৌশেয়মুপাত্তবাণমভ্যঙ্গনেপথ্যমলঞ্চকার || ৭.৭||
বভৌ চ সম্পর্কমুপেত্য বালা নবেন দীক্ষাবিধিসায়কেন |
করেণ ভানোর্বহুলাবসানে সন্ধুক্ষ্যমাণেব শশাঙ্কলেখা || ৭.৮||
তাং লোধ্রকল্কেন হৃতাঙ্গতৈলামাশ্যানকালেয়কৃতাঙ্গরাগাম্ |
বাসো বসানামভিষেকয়োগ্যং নার্যশ্চতুষ্কাভিমুখং ব্যনৈষুঃ || ৭.৯||
বিন্যস্তবৈদূর্যশিলাতলে | অস্মিন্নবিদ্ধমুক্তাফলভক্তিচিত্রে |
আবর্জিতাষ্টাপদকুম্ভতোয়াঃ সতূর্যমেনাং স্নপয়াং বভূবুঃ || ৭.১০||
সা মঙ্গলস্নানবিশুদ্ধগাত্রী গৃহীতপত্যুদ্গমনীয়বস্ত্রা |
নির্বৃত্তপর্জন্যজলাভিষেকা প্রফুল্লকাশা বসুধেব রেজে || ৭.১১||
তস্মাৎপ্রদেশাচ্চ বিতানবন্তং যুক্তং মণিস্তম্ভচতুষ্টয়েন |
পতিব্রতাভিঃ পরিগৃহ্য নিন্যে কৢপ্তাসনং কৌতুকবেদিমধ্যম্ || ৭.১২||
তাং প্রাঙ্মুখীং তত্র নিবেশ্য তন্বীং ক্ষণং ব্যলম্বন্ত পুরো নিষণ্ণাঃ |
ভূতার্থশোভাহ্রিয়মাণনেত্রাঃ প্রসাধনে সন্নিহিতে | অপি নার্যঃ || ৭.১৩||
ধূপোষ্মণা ত্যাজিতমার্দ্রভাবং কেশান্তমন্তঃকুসুমং তদীয়ম্ |
পর্যাক্ষিপৎকাচিদুদারবন্ধং দূর্বাবতা পাণ্ডুমধূকদাম্না || ৭.১৪||
বিন্যস্তশুক্লাগুরু চক্রুরস্যা গোরোচনাপত্রবিভঙ্গমঙ্গম্ |
সা চক্রবাকাঙ্কিতসৈকতায়াস্ত্রিস্রোতসঃ কান্তিমতীত্য তস্থৌ || ৭.১৫||
লগ্নদ্বিরেফং পরিভূয় পদ্মং সমেঘলেখং শশিনশ্চ বিম্বম্ |
তদাননশ্রীরলকৈঃ প্রসিদ্ধৈশ্চিচ্ছেদ সাদৃশ্যকথাপ্রসঙ্গম্ || ৭.১৬||
কর্ণার্পিতো লোধ্রকষায়রূক্ষে গোরোচনাক্ষেপনিতান্তগৌরে |
তস্যাঃ কপোলে পরভাগলাভাদ্ববন্ধ চক্ষূংষি যবপ্ররোহঃ || ৭.১৭||
রেখাবিভক্তশ্চ বিভক্তগাত্র্যাঃ কিঞ্চিন্মধূচ্ছিষ্টবিমৃষ্টরাগঃ |
কামপ্যভিখ্যাং স্ফুরিতৈরপুষ্যদাসন্নলাবণ্যফলো | অধ্ররোষ্ঠঃ || ৭.১৮||
পত্যুঃ শিরশ্চন্দ্রকলামনেন স্পৃশেতি সখ্যা পরিহাসপূর্বম্ |
সা রঞ্জয়িৎবা চরণৌ কৃতাশীর্মাল্যেন তাং নির্বচনং জঘান || ৭.১৯||
তস্যাঃ সুজাতোৎপলপত্রকান্তে প্রসাধিকাভির্নয়নে নিরীক্ষ্য |
ন চক্ষুষোঃ কান্তিবিশেষবুদ্ধ্যা কালাঞ্জনং মঙ্গলমিত্যুপাত্তম্ || ৭.২০||
সা সম্ভবদ্ভিঃ কুসুমৈর্লতেব জ্যোতির্ভিরুদ্যদ্ভিরিব ত্রিয়ামা |
সরিদ্বিহঙ্গৈরিব লীয়মানৈরামুচ্যমানাভরণা চকাসে || ৭.২১||
আত্মানমালোক্য চ শোভমানমাদর্শবিম্বে স্তিমিতায়তাক্ষী |
হরোপয়ানে ৎবরিতা বভূব স্ত্রীণাং প্রিয়ালোকফলো হি বেষঃ || ৭.২২||
অথাঙ্গুলিভ্যাং হরিতালমার্দ্রং মাঙ্গল্যমাদায় মনঃশিলাং চ |
কর্ণাবসক্তামলদন্তপত্রং মাতা তদীয়ং মুখমুন্নময়্য || ৭.২৩||
উমাস্তনোদ্ভেদমনুপ্রবৃদ্ধো মনোরথো যঃ প্রথমো বভূব |
তমেব মেনা দুহিতুঃ কথঞ্চিদ্বিবাহদীক্ষাতিলকং চকার || ৭.২৪||
ববন্ধ চাস্রাকুলদৃষ্টিরস্যাঃ স্থানান্তরে কল্পিতসন্নিবেশম্ |
ধাত্র্যঙ্গুলীভিঃ প্রতিসার্যমাণমূর্ণময়ং কৌতুকহস্তসূত্রম্ || ৭.২৫||
ক্ষীরোদবেলেব সফেনপুঞ্জা পর্যাপ্তচন্দ্রেব শরত্ত্রিয়ামা |
নবং নবক্ষৌমনিবাসিনী সা ভূয়ো বভৌ দর্পণমাদধানা || ৭.২৬||
তামর্চিতাভ্যঃ কুলদেবতাভ্যঃ কুলপ্রতিষ্টঃাং প্রণময়্য মাতা |
অকারয়ৎকারয়িতব্যদক্ষা ক্রমেণ পাদগ্রহণং সতীনাম্ || ৭.২৭||
অখণ্ডিতং প্রেম লভস্ব পত্যুরিত্যুচ্যতে তাভিরুমা স্ম নম্রা |
তয়া তু তস্যার্ধশরীরভাজা পশ্চাৎকৃতাঃ স্নিগ্ধজনাশিষো | অ পি || ৭.২৮||
ইচ্ছাবিভূত্যোরনুরূপমদ্রিস্তস্যাঃ কৃতী কৃত্যমশেষয়িৎবা |
সভ্যঃ সভায়াং সুহৃদাস্থিতায়াং তস্থৌ বৃষাঙ্কাগমনপ্রতীক্ষঃ || ৭.২৯||
তাবদ্বরস্যাপি কুবেরশৈলে তৎপূর্বপাণিগ্রহণানুরূপম্ |
প্রসাধনং মাতৃভিরাদৃতাভির্ন্যস্তং পুরস্তাৎপুরশাসনস্য || ৭.৩০||
তদ্গৌরবান্মঙ্গলমণ্ডনশ্রীঃ সা পস্পৃশে কেবলমীশ্বরেণ |
স্ব এব বেষঃ পরিণেতুরিষ্টং ভাবান্তরং তস্য বিভোঃ প্রপেদে || ৭.৩১||
বভূব ভস্মৈব সিতাঙ্গরাগঃ কপালমেবামলশেখরশ্রীঃ |
উপান্তভাগেষু চ রোচনাঙ্কো গজাজিনস্যৈব দুকূলভাবঃ || ৭.৩২||
শঙ্খান্তরদ্যোতি বিলোচনং যদন্তর্নিবিষ্টামলপিঙ্গতারম্ |
সান্নিধ্যপক্ষে হরিতালময়্যাস্তদেব জাতং তিলকক্রিয়ায়াঃ || ৭.৩৩||
যথাপ্রদেশং ভুজগেশ্বরাণাং করিশ্যতামাভরণান্তরৎবম্ |
শরীরমাত্রং বিকৃতিং প্রপেদে তথৈব তস্থুঃ ফণরত্নশোভাঃ || ৭.৩৪||
দিবাপি নিষ্ঠ্যূতমরীচিভাসা বাল্যাদনাবিষ্কৃতলাঞ্ছনেন |
চন্দ্রেণ নিত্যং প্রতিভিন্নমৌলেশ্চূডামণেঃ কিং গ্রহণং হরস্য || ৭.৩৫||
ইত্যদ্ভুতৈকপ্রভবঃ প্রভাবাৎপ্রসিদ্ধনেপথ্যবিধের্বিধাতা |
আত্মানমাসন্নগণোপনীতে খড্গে নিষক্তপ্রতিমং দদর্শ || ৭.৩৬||
স গোপতিং নন্দিভুজাবলম্বী শার্দূলচর্মান্তরিতোরুপৃষ্ঠম্ |
তদ্ভক্তিসঙ্ক্ষিপ্তবৃহৎপ্রমাণমারুহ্য কৈলাসমিব প্রতস্থে || ৭.৩৭||
তং মাতরো দেবমনুব্রজন্ত্যঃ স্ববাহনক্ষোভচলাবতংসাঃ |
মুখৈঃ প্রভামণ্ডলরেণুগৌরৈঃ পদ্মাকরং চক্রুরিবান্তরীক্ষম্ || ৭.৩৮||
তাসাং চ পশ্চাৎকনকপ্রভাণাং কালী কপালাভরণা চকাসে |
বলাকিনী নীলপয়োদরাজী দূরং পুরঃক্ষিপ্তশতহ্রদেব || ৭.৩৯||
ততো গণৈঃ শূলভৃতঃ পুরোগৈরুদীরিতো মঙ্গলতূর্যঘোষঃ |
বিমানশৃঙ্গাণ্যবগাহমানঃ শশংস সেবাবসরং সুরেভ্যঃ || ৭.৪০||
উপাদদে তস্য সহস্ররশ্মিস্ত্বষ্ট্রা নবং নির্মিতমাতপত্রম্ |
স তদ্দুকূলাদবিদূরমৌলির্বভৌ পতদ্গঙ্গ ইবোত্তমাঙ্গে || ৭.৪১||
মূর্তে চ গঙ্গায়মুনে তদানীং সচামরে দেবমসেবিষাতাম্ |
সমুদ্রগারূপবিপর্যয়ে | অপি সহংসপাতে ইব লক্ষ্যমাণে || ৭.৪২||
তমন্বগচ্ছৎপ্রথমো বিধাতা শ্রীবৎসলক্ষ্মা পুরুষশ্চ সাক্ষাৎ |
জয়েতি বাচা মহিমানমস্য সংবর্ধয়ন্ত্যা হবিষেব বহ্নিম্ || ৭.৪৩||
একৈব মূর্তির্বিভিদে ত্রিধা সা সামান্যমেষাং প্রথমাবরৎবম্ |
বিষ্ণোর্হরস্তস্য হরিঃ কদাচিদ্বেধাস্তয়োস্তাবপি ধাতুরাদ্যৌ || ৭.৪৪||
তং লোকপালাঃ পুরুহূতমুখ্যাঃ শ্রীলক্ষণোৎসর্গবিনীতবেষাঃ |
দৃষ্টিপ্রদানে কৃতনন্দিসঞ্জ্ঞাস্তদ্দর্শিতাঃ প্রাঞ্জলয়ঃ প্রণেমুঃ || ৭.৪৫||
কম্পেন মূর্ধ্নঃ শতপত্রয়োনিং বাচা হরিং বৃত্রহণং স্মিতেন |
আলোকমাত্রেণ সুরানশেষান্সম্ভাবয়ামাস যথাপ্রধানম্ || ৭.৪৬||
তস্মৈ জয়াশীঃ সসৃজে পুরস্তাৎসপ্তর্ষিভিস্তান্স্মিতপূর্বমাহ |
বিবাহয়জ্ঞে বিততে | অত্র যূয়মধ্বর্যবঃ পূর্ববৃতা ময়েতি || ৭.৪৭||
বিশ্বাবসুপ্রাগ্রহরৈঃ প্রবীণৈঃ সঙ্গীয়মানত্রিপুরাবদানঃ |
অধ্বানমধ্বান্তবিকারলঙ্ঘ্যস্ততার তারাধিপখণ্ডধারী || ৭.৪৮||
খে খেলগামী তমুবাহ বাহঃ সশব্দচামীকরকিঙ্কিণীকঃ |
তটাভিঘাতাদিব লগ্নপঙ্কে ধুন্বন্মুহুঃ প্রোতঘনে বিষাণে || ৭.৪৯||
স প্রাপদপ্রাপ্তপরাভিয়োগং নগেন্দ্রগুপ্তং নগরং মুহূর্তাৎ |
পুরো বিলগ্নৈর্হরদৃষ্টিপাতৈঃ সুবর্ণসূত্রৈরিব কৃষ্যমাণঃ || ৭.৫০||
তস্যোপকণ্ঠে ঘননীলকণ্টঃঃ কুতূহলাদুন্মুখপৌরদৃষ্টঃ |
স্ববাণচিহ্নাদবতীর্য মার্গাদাসন্নভূপৃষ্ঠমিয়ায় দেবঃ || ৭.৫১||
তমৃদ্ধিমদ্বন্ধুজনাধিরূঢৈর্বৃন্দৈর্গজানাং গিরিচক্রবর্তী |
প্রত্যুজ্জগামাগমনপ্রতীতঃ প্রফুল্লবৃক্ষৈঃ কটকৈরিব স্বৈঃ || ৭.৫২||
বর্গাবুভৌ দেবমহীধরাণাং দ্বারে পুরস্যোদ্ঘটিতাপিধানে |
সমীয়তুর্দূরবিসর্পিঘোষৌ ভিন্নৈকসেতূ পয়সামিবৌঘৌ || ৭.৫৩||
হ্রীমানভূদ্ভূমিধরো হরেণ ত্রৈলোক্যবন্দ্যেন কৃতপ্রণামঃ |
পূর্বং মহিম্না স হি তস্য দূরমাবর্জিতং নাত্মশিরো বিবেদ || ৭.৫৪||
স প্রীতিয়োগাদ্বিকসন্মুখশ্রীর্জামাতুরগ্রেসরতামুপেত্য |
প্রাবেশয়ন্মন্দিরমৃদ্ধমেনমাগুল্ফকীর্ণাপণমার্গপুষ্পম্ || ৭.৫৫||
তস্মিন্মুহূর্তে পুরসুন্দরীণামীশানসন্দর্শনলালসানাম্ |
প্রাসাদমালাসু বভূবুরিত্থং ত্যক্তান্যকার্যাণি বিচেষ্টিতানি || ৭.৫৬||
আলোকমার্গং সহসা ব্রজন্ত্যা কয়াচিদুদ্বেষ্টনবান্তমাল্যঃ |
বন্ধুং ন সম্ভাবিত এব তাবৎকরেণ রুদ্ধো | অপি ন কেশপাশঃ || ৭.৫৭||
প্রসাধিকালম্বিতমগ্রপাদমাক্ষিপ্য কাচিদ্দ্রবরাগমেব |
উৎসৃষ্টলীলাগতিরাগবাক্ষাদলক্তকাঙ্কাং পদবীং ততান || ৭.৫৮||
বিলোচনং দক্ষিণমঞ্জনেন সম্ভাব্য তদ্বঞ্চিতবামনেত্রা |
তথৈব বাতায়নসন্নিকর্ষং যয়ৌ শলাকামপরা বহন্তী || ৭.৫৯||
জালান্তরপ্রেষিতদৃষ্তিরন্যা প্রস্থানভিন্নাং ন ববন্ধ নীবীম্ |
নাভিপ্রবিষ্টাভরণপ্রভেণ হস্তেন তস্থাববলম্ব্য বাসঃ || ৭.৬০||
অর্ধাচিতা সৎবরমুত্থিতায়াঃ পদে পদে দুর্নিমিতে গলন্তী |
কস্যাশ্চিদাসীদ্রশনা তদানীমঙ্গুষ্ঠমূলার্পিতসূত্রশেষা || ৭.৬১||
তাসাং মুখৈরাসবগন্ধগর্ভৈর্ব্যাপ্তান্তরাঃ সান্দ্রকুতূহলানাম্ |
বিলোলনেত্রভ্রমরৈর্গবাক্ষাঃ সহস্রপত্রাভরণা ইবাসন্ || ৭.৬২||
তাবৎপতাকাকুলমিন্দুমৌলিরুত্তোরণং রাজপথং প্রপেদে |
প্রাসাদশৃঙ্গাণি দিবাপি কুর্বঞ্জ্যোৎস্নাভিষেকদ্বিগুণদ্যুতীনি || ৭.৬৩||
তমেকদৃশ্যং নয়নৈঃ পিবন্ত্যো নার্যো ন জগ্মুর্বিষয়ান্তরাণি |
তথা হি শেষেন্দ্রিয়বৃত্তিরাসাং সর্বাত্মনা চক্ষুরিব প্রবিষ্টা || ৭.৬৪||
স্থানে তপো দুশ্চরমেতদর্থমপর্ণয়া পেলবয়াপি তপ্তম্ |
যা দাস্যমপ্যস্য লভেত নারী সা স্যাৎকৃতার্থা কিমুতাঙ্কশয়্যাম্ || ৭.৬৫||
পরস্পরেণ স্পৃহণীয়শোভং ন চেদিদং দ্বন্দ্বময়োজয়িষ্যৎ |
অস্মিন্দ্বয়ে রূপবিধানয়ত্নঃ পত্যুঃ প্রজানাং বিফলো | অভবিশ্যৎ || ৭.৬৬||
ন নূনমারূঢরুষা শরীরমনেন দগ্ধং কুসুমায়ুধস্য |
ব্রীডাদমুং দেবমুদীক্ষ্য মন্যে সন্ন্যস্তদেহঃ স্বয়মেব কামঃ || ৭.৬৭||
অনেন সম্বন্ধমুপেত্য দিষ্ট্যা মনোরথপ্রার্থিতমীশ্বরেণ |
মূর্ধানমালি ক্ষিতিধারণোচ্চমুচ্চৈস্তরাং বক্ষ্যতি শৈলরাজঃ || ৭.৬৮||
ইত্যোষধিপ্রস্থবিলাসিনীনাং শৃণ্বন্কথাঃ শ্রোত্রসুখাস্ত্রিনেত্রঃ |
কেয়ূরচূর্ণীকৃতলাজমুষ্টিং হিমালয়স্যালয়মাসসাদ || ৭.৬৯||
তত্রাবতীর্যাচ্যুতদত্তহস্তঃ শরদ্ঘনাদ্দীধিতিমানিবোক্ষ্ণঃ |
ক্রান্তানি পূর্বং কমলাসনেন কক্ষ্যান্তরাণ্যদ্রিপতের্বিবেশ || ৭.৭০||
তমন্বগিন্দ্রপ্রমুখাশ্চ দেবাঃ সপ্তর্ষিপূর্বাঃ পরমর্ষয়শ্চ |
গণাশ্চ গির্যালয়মভ্যগচ্ছন্প্রশস্তমারম্ভমিবোত্তমার্থাঃ || ৭.৭১||
তত্রেশ্বরো বিষ্টরভাগ্যথাবৎসরত্নমর্ঘ্যং মধুমচ্চ গব্যম্ |
নবে দুকূলে চ নগোপনীতং প্রত্যগ্রহীৎসর্বমমন্ত্রবর্জম্ || ৭.৭২||
দুকূলবাসাঃ স বধূসমীপং নিন্যে বিনীতৈরবরোধরক্ষৈঃ |
বেলাসমীপং স্ফুটফেনরাজির্নবৈরুদন্বানিব চন্দ্রপাদৈঃ || ৭.৭৩||
তয়া প্রবৃদ্ধাননচন্দ্রকান্ত্যা প্রফুল্লচক্ষুঃকুমুদঃ কুমার্যা |
প্রসন্নচেতঃসলিলঃ শিবো | অভূৎসংসৃজ্যমানঃ শরদেব লোকঃ || ৭.৭৪||
তয়োঃ সমাপত্তিষু কাতরাণি কিঞ্চিদ্ব্যবস্থাপিতসংহৃতানি |
হ্রীয়ন্ত্রণাং তৎক্ষণমন্বভূবন্নন্যোন্যলোলানি বিলোচনানি || ৭.৭৫||
তস্যাঃ করং শৈলগুরূপনীতং জগ্রাহ তাম্রাঙ্গুলিমষ্টমূর্ত্তিঃ |
উমাতনৌ গূঢতনোঃ স্মরস্য তচ্ছঙ্কিনঃ পূর্বমিব প্ররোহম্ || ৭.৭৬||
রোমোদ্গমঃ প্রাদুরভূদুমায়াঃ স্বিন্নাঙ্গুলিঃ পুঙ্গবকেতুরাসীৎ |
বৃত্তিস্তয়োঃ পাণিসমাগমেন সমং বিভক্তেব মনোভবস্য || ৭.৭৭||
প্রয়ুক্তপাণিগ্রহণং যদন্যদ্বধূবরং পুষ্যতি কান্তিমগ্র্যাম্ |
সান্নিধ্যয়োগাদনয়োস্তদানীং কিং কথ্যতে শ্রীরুভয়স্য তস্য || ৭.৭৮||
প্রদক্ষিণপ্রক্রমণাৎকৃশানোরুদর্চিষস্তন্মিথুনং চকাসে |
মেরোরুপান্তেষ্বিব বর্তমানমন্যোন্যসংসক্তমহস্ত্রিয়ামম্ || ৭.৭৯||
তৌ দম্পতী ত্রিঃ পরিণীয় বহ্নিম্করাগ্রসংস্পর্শনিমীলিতাক্ষীম্ |
তাং কারয়ামাস বধূং পুরোধাস্তস্মিন্সমিদ্ধার্চিষি লাজমোক্ষম্ || ৭.৮০||
সা লাজধূমাঞ্জলিমিষ্টগন্ধং গুরূপদেশাদ্বদনং নিনায় |
কপোলসংসর্পিশিখঃ স তস্যা মুহূর্তকর্ণোৎপলতাং প্রপেদে || ৭.৮১||
তদীষদার্দ্রারুণগণ্ডলেখমুচ্ছ্বাসিকালাঞ্জনরাগমক্ষ্ণোঃ |
বধূমুখং ক্লান্তয়বাবতংসমাচারধূমগ্রহণাদ্বভূব || ৭.৮২||
বধূং দ্বিজঃ প্রাহ তবৈষ বৎসে বহ্নির্বিবাহং প্রতি পূর্বসাক্ষী |
শিবেন ভর্ত্রা সহ ধর্মচর্যা কার্যা ৎবয়া মুক্তবিচারয়েতি || ৭.৮৩||
আলোচনান্তং শ্রবণে বিতত্য পীতং গুরোস্তদ্বচনং ভবান্যা |
নিদাঘকালোল্বণতাপয়েব মাহেন্দ্রমম্ভঃ প্রথমং পৃথিব্যা || ৭.৮৪||
ধ্রুবেণ ভর্ত্রা ধ্রুবদর্শনায় প্রয়ুজ্যমানা প্রিয়দর্শনেন |
সা দৃষ্ট ইত্যাননমুন্নময়্য হ্রীসন্নকণ্ঠী কথমপ্যুবাচ || ৭.৮৫||
ইত্থং বিধিজ্ঞেন পুরোহিতেন প্রয়ুক্তপাণিগ্রহণোপচারৌ |
প্রণেমতুস্তৌ পিতরৌ প্রজানাং পদ্মাসনস্থায় পিতামহায় || ৭.৮৬||
বধূর্বিধাত্রা প্রতিনন্দ্যতে স্ম কল্যাণি বীরপ্রসবা ভবেতি |
বাচস্পতিঃ সন্নপি সো | অষ্টমূর্ত্তবাশাস্য চিন্তাস্তিমিতো বভূব || ৭.৮৭||
কৢপ্তোপচারাং চতুরস্রবেদীং তাবেত্য পশ্চাট্কনকাসনস্থৌ |
জায়াপতী লৌকিকমেষিতব্যমার্দ্রাক্ষতারোপণমন্বভূতাম্ || ৭.৮৮||
পত্রান্তলগ্নৈর্জলবিন্দুজালৈরাকৃষ্টমুক্তাফলজালশোভম্ |
তয়োরুপর্যায়তনালদণ্ডমাধত্ত লক্ষ্মীঃ কমলাতপত্রম্ || ৭.৮৯||
দ্বিধা প্রয়ুক্তেন চ বাঙ্ময়েন সরস্বতী তন্মিথুনং নুনাব |
সংস্কারপূতেন বরং বরেণ্যং বধূং সুখগ্রাহ্যনিবন্ধনেন || ৭.৯০||
তৌ সন্ধিষু ব্যঞ্জিতবৃত্তিভেদং রসান্তরেষু প্রতিবদ্ধরাগম্ |
অপশ্যতামপ্সরসাং মুহূর্তং প্রয়োগমাদ্যং ললিতাঙ্গহারম্ || ৭.৯১||
দেবাস্তদন্তে হরমূঢভার্যং কিরীটবদ্ধাঞ্জলয়ো নিপত্য |
শাপাবসানে প্রতিপন্নমূর্ত্তের্যয়াচিরে পঞ্চশরস্য সেবাম্ || ৭.৯২||
তস্যানুমেনে ভগবান্বিমন্যুর্ব্যাপারমাত্মন্যপি সায়কানাম্ |
কালে প্রয়ুক্তা খলু কার্যবিদ্ভির্বিজ্ণাপনা ভর্তৃষু সিদ্ধিমেতি || ৭.৯৩||
অথ বিবুধগণাংস্তানিন্দুমৌলির্বিসৃজ্য ক্ষিতিধরপতিকন্যামাদদানঃ করেণ |
কনককলশরক্ষাভক্তিশোভাসনাথং ক্ষিতিবিরচিতশয়্যং কৌতুকাগারমাগাৎ || ৭.৯৪||
নবপরিণয়লজ্জাভূষণাং তত্র গৌরীং বদনমপহরন্তীং তৎকৃতোৎক্ষেপমীশঃ |
অপি শয়নসখীভ্যো দত্তবাচং কথঞ্চিৎপ্রমথমুখবিকারৈর্হাসয়ামাস গূঢম্ || ৭.৯৫||

<