অভিজ্ঞানশাকুন্তলম্ ০৭

সপ্তমোঽঙ্কঃ |

( ততঃ প্রবিশত্যাকাশযানেন রথাধিরূঢো রাজা মাতলিশ্চ )
রাজাঃ – – মাতলে অনুষ্ঠিতনিদেশোঽপি মঘবতঃ
সত্ক্রিযাবিশেষাদনুপযুক্তমিবাত্মানং সমর্থযে |
মাতলিঃ – – ( সস্মিতম্ )
আযুষ্মন্ উভযমপ্যপরিতোষং সমর্থযে |
প্রথমোপকৃতং মরুত্বতঃ প্রতিপত্ত্যা লঘু মন্যতে ভবান্ |
গণযত্যবদানবিস্মিতো ভবতঃ সোঽপি ন সত্ক্রিযাগুণান্||১||
রাজাঃ – – মাতলে মা মৈবম্ | স খলু
মনোরথানামপ্যভূমির্বিসর্জনাবসরসত্কারঃ | মম হি দিবৌকসাং
সমক্ষমর্ধাসনোপবেশিতস্য |
অন্তর্গতপ্রার্থনমন্তিকস্থং জযন্তমুদ্বীক্ষ্য কৃতস্মিতেন |
আমৃষ্টবক্ষোহরিচন্দনাঙ্কা মন্দারমালা হরিণা পিনদ্ধা||২||
মাতলিঃ – – কিমিব নামাযুষ্মানমরেশ্বরান্নার্হতি | পশ্য |
সুখপরস্য হরেরুভযৈঃ কৃতং ত্রিদিবমুদ্ধৃতদানবকণ্টকম্ |
তব শরৈরধুনা নতপর্বভিঃ পুরুষকেসরিণশ্চ পুরা নখৈঃ||৩||
রাজাঃ – – অত্র খলু শতক্রতোরেব মহিমা স্তুত্যঃ |
সিধ্যন্তি কর্মসু মহত্স্বপি যন্নিযোজ্যাঃ |
সংভাবনাগুণমবেহি তমীশ্বরাণাম্ |
কিং বাঽভবিষ্যদরুণস্তমসাং বিভেত্তা
তং চেত্সহস্রকিরণো ধুরি নাকরিষ্যত্||৪||
মাতলিঃ – – সদৃশং তবৈতত্ |
( স্তোকমন্তরমতীত্য )
আযুষ্মন্ ইতঃ পশ্য নাকপৃষ্ঠপ্রতিষ্ঠিতস্য সৌভাগ্যমাত্মযশসঃ
|
বিচ্ছিত্তিশেষৈঃ সুরসুন্দরীণাং বর্ণৈরমী কল্পলতাংশুকেষু |
বিচিন্ত্য গীতক্ষমমর্থজাতং দিবৌকসস্ত্বচ্চরিতং লিখন্তি||৫||
রাজাঃ – – মাতলে অসুরসংপ্রহারোত্সুকেন পূর্বেদ্যুর্দিবমধিরোহতা মযা
ন লক্ষিতঃ স্বর্গমার্গঃ | কতমস্মিন্মরুতাং পথি বর্তামহে |
মাতলিঃ – –
ত্রিস্রোতসং বহতি যো গগনপ্রতিষ্ঠাং জ্যোতীংষি বর্তযতি চ
প্রবিভক্তরশ্মিঃ |
তস্য দ্বিতীযহরিবিক্রমনিস্তমস্কং বাযোরিমং পরিবহস্য বদন্তি মার্গম্
||৬||
রাজাঃ – – মাতলে অতঃ খলু সবাহ্যান্তঃকরণো মমান্তরাত্মা প্রসীদতি
|
( রথাঙ্গমবলোক্য )
মেঘপদবীমবতীর্ণৌ স্বঃ |
মাতলিঃ – – কথমবগম্যতে |
রাজাঃ – – অযমরবিবরেভ্যশ্চাতকৈর্নিষ্পতদ্ভির্হরিভিরচিরভাসাং
তেজসা চানুলিপ্তৈঃ |
গতমুপরি ঘনানাং বারিগর্ভোদরাণাং
পিশুনযতি রথস্তে শীকরক্লিন্ননেমিঃ||৭||
মাতলিঃ – – ক্ষণাদাযুষ্মান্স্বাধিকারভূমৌ বর্তিষ্যতে |
রাজাঃ – – ( অধোঽবলোক্য )
মাতলে বেগাবতরণাদাশ্চর্যদর্শনঃ সংলক্ষ্যতে মনুষ্যলোকঃ | তথা
হি |
শৈলানামবরোহতীব শিখরাদুন্মজ্জতাং মেদিনী |
পর্ণাভ্যন্তরলীনতাং বিজহতি স্কন্ধোদযাত্পাদপাঃ |
সংতানৈস্তনুভাবনষ্টসলিলা ব্যক্তিং ভজন্ত্যাপগাঃ |
কেনাপ্যুত্ক্ষিপতেব পশ্য ভুবনং মত্পার্শ্বমানীযতে||৮||
মাতলিঃ – – সাধু দৃষ্টম্ |
( সবহুমানমবলোক্য )
অহো উদাররমণীযা পৃথিবী |
রাজাঃ – – মাতলে কতমোঽযং পূর্বাপরসমুদ্রাবগাঢঃ
কনকরসনিস্যন্দী সাংধ্য ইব মেঘপরিঘঃ সানুমানালোক্যতে |
মাতলি – – আযুষ্মন্ এষ খলু হেমকূটো নাম
কিংপুরুষপর্বতস্তপঃসংসিদ্ধিক্ষেত্রম্ | পশ্য |
স্বাযংভুবান্মরীচের্যঃ প্রবভূব প্রজাপতিঃ |
সুরাসুরগুরুঃ সোঽত্র সপত্নীকস্তপস্যতি||৯||
রাজাঃ – – তেন হ্যনতিক্রমণীযানি শ্রেযাংসি | প্রদক্ষিণীকৃত্য
ভগবন্তং গন্তুমিচ্ছামি |
মাতলিঃ – – প্রথমঃ কল্পঃ |
( নাট্যেনাবতীর্ণৌ )
রাজাঃ – – ( সবিস্মযম্ )
উপোঢশব্দা ন রথাঙ্গনেমযঃ প্রবর্তমানং ন চ দৃশ্যতে রজঃ |
অভূতলস্পর্শনতযাঽনিরুদ্ধতস্তবাবতীর্ণোঽপি রথো ন লক্ষ্যতে||১০||
মাতলিঃ – – এতাবানেব শতক্রতোরাযুষ্মতশ্চ বিশেষঃ |
রাজাঃ – – মাতলে কতমস্মিন্প্রদেশে মারীচাশ্রমঃ |
মাতলিঃ – – ( হস্তেন দর্শযন্ )
বল্মীকার্ধনিমগ্নমূর্তিরুরসা সংদষ্টসর্পত্বচা
কণ্ঠে জীর্ণলতাপ্রতানবলযেনাত্যর্থসংপীডিতঃ |
অংসব্যাপি শকুন্তনীডনিচিতং বিভ্রজ্জটামণ্ডলং
যত্র স্থাণুরিবাচলো মুনিরসাবভ্যর্কবিম্বং স্থিতঃ||১১||
রাজাঃ – – নমস্তে কষ্টতপসে |
মাতলিঃ – – ( সংযতপ্রগ্রহং রথং কৃত্বা )
এতৌ অদিতিপরিবর্ধিতমন্দারবৃক্ষং প্রজাপতেরাশ্রমং প্রবিষ্টৌ স্বঃ |
রাজাঃ – – স্বর্গাদধিকতরং নির্বৃতিস্থানম্
অমৃতহৃদমিবাবগাঢোঽস্মি |
মাতলিঃ – – ( রথং স্থাপযিত্বা )
অবতরত্বাযুষ্মান্ |
রাজাঃ – – ( অবতীর্য )
মাতলে ভবান্কথমিদানীম্ |
মাতলিঃ – – সংযন্ত্রিতো মযা রথঃ | বযমপ্যবতরামঃ |
( তথা কৃত্বা )
ইত আযুষ্মন্ |
( পরিক্রম্য )
দৃশ্যন্তামত্রভবতামৃষীণাং তপোবনভূমযঃ |
রাজাঃ – – ননু বিস্মযাদবলোকযামি |
প্রাণানামনিলেন বৃত্তিরুচিতা সত্কল্পবৃক্ষে বনে
তোযে কাঞ্চনপদ্মরেণুকপিশে ধর্মাভিষেকক্রিযা |
ধ্যানং রত্নশিলাতলেষু বিবুধস্ত্রীসংনিধৌ সংযমো
যত্কাঙ্ক্ষন্তি তপোভিরন্যমুনযস্তস্মিংস্তপস্যন্ত্যমী||১২||
মাতলিঃ – – উত্সর্পিণী খলু মহতাং প্রার্থনা |
( পরিক্রম্য | আকাশে )
অযে বৃদ্ধশাকল্য কিমনুতিষ্ঠতি ভগবান্মারীচঃ | কিং ব্রবীষি |
দাক্ষাযণ্যা প্রতিব্রতার্ধমধিকৃত্য পৃষ্টস্তস্যৈ
মহর্ষিপত্নীসহিতাযৈ কথযতীতি |
রাজাঃ – – ( কর্ণং দত্ত্বা )
অযে প্রতিপাল্যাবসরঃ খলু প্রস্তাবঃ |
মাতলিঃ – – ( রাজানমবলোক্য )
অস্মিন্নশোকবৃক্ষমূলে তাবদাস্তামাযুষ্মান্ যাবত্ত্বামিন্দ্রগুরবে
নিবেদযিতুমন্তরান্বেষী ভবামি |
রাজাঃ – – যথা ভবান্মন্যতে |
( ইতি স্থিতঃ )
মাতলিঃ – – আযুষ্মন্ সাধযাম্যহম্ |
( ইতি নিষ্ক্রান্তঃ )
রাজাঃ – – ( নিমিত্তং সূচযিত্বা )
মনোরথায নাশংসে কিং বাহো স্পন্দসে বৃথা |
পূর্বাবধীরিতং শ্রেযো দুঃখং হি পরিবর্ততে||১৩||
( নেপথ্যে )
মা খলু চাপলং কুরু | কথং গত এবাত্মনঃ প্রকৃতিম্ |
রাজাঃ – – ( কর্ণং দত্ত্বা )
অভূমিরিযমবিনযস্য | কো নু খল্বেষ নিষিধ্যতে |
( শব্দানুসারেণাবলোক্য | সবিস্মযম্ )
অযে কো নু খল্বযমনুবধ্যমানস্তপস্বিনীভ্যামবালসত্ত্বো বালঃ |
অর্ধপীতস্তনং মাতুরামর্দক্লিষ্টকেসরম্ |
প্রক্রীডিতুং সিংহশিশুং বলাত্কারেণ কর্ষতি||১৪||
( ততঃ প্রবিশতি যথানির্দিষ্টকর্মা তপস্বিনীভ্যাং বালঃ )
বালঃ – – জৃম্ভস্ব সিংহ দন্তাংস্তে গণযিষ্যে |
প্রথমা – – অবিনীত কিং নোঽপত্যনির্বিশেষাণি সত্ত্বানি বিপ্রকরোষি |
হন্ত বর্ধতে তে সংরম্ভঃ | স্থানে খলু ঋষিজনেন সর্বদমন ইতি
কৃতনামধেযোঽসি |
রাজাঃ – – কিং নু খলু বালেঽস্মিন্নৌরস ইব পুত্রে স্নিহ্যতি মে মনঃ |
নূনমনপত্যতা মাং বত্সলযতি |
দ্বিতীযা – – এষা খলু কেসরিণী ত্বাং লঙ্ঘযতি যদ্যস্যাঃ পুত্রকং ন
মুঞ্চসি |
বালঃ – – ( সস্মিতম্ )
অহো বলীযঃ খলু ভীতোঽস্মি |
( ইত্যধরং দর্শযতি )
রাজাঃ – –
মহতস্তেজসো বীজং বালোঽযং প্রতিভাতি মে |
স্ফুলিঙ্গাবস্থযা বহ্নিরেধাপেক্ষ ইব স্থিতঃ||১৫||
প্রথমা – – বত্স এনং বালমৃগেন্দ্রং মুঞ্চ | অপরং তে ক্রীডনকং
দাস্যামি |
বালঃ – – কুত্র | দেহ্যেতত্ |
( ইতি হস্তং প্রসারযতি )
রাজাঃ – – কথং চক্রবর্তিলক্ষণমপ্যনেন ধার্যতে | তথা হ্যস্য |
প্রলোভ্যবস্তুপ্রণযপ্রসারিতো বিভাতি জালগ্রথিতাঙ্গুলিঃ করঃ |
অলক্ষ্যপত্রান্তরমিদ্ধরাগযা নবোষসা ভিন্নমিবৈকপঙ্কজম্||১৬||
দ্বিতীযা – – সুব্রতে ন শক্য এষ বাচামাত্রেণ বিরমযিতুম্ | গচ্ছ
ত্বম্ | মদীয উটজে মার্কণ্ডেযস্যর্ষিকুমারস্য বর্ণচিত্রিতো
মৃত্তিকামযূরস্তিষ্ঠতি | তমস্যোপহর |
প্রথমা – – তথা |
( ইতি নিষ্ক্রান্তা )
বালঃ – – অনেনৈব তাবত্ক্রীডিষ্যামি |
( ইতি তাপসীং বিলোক্য হসতি )
রাজাঃ – – স্পৃহযামি খলু দুর্ললিতাযস্মৈ |
আলক্ষ্যদন্তমুকুলাননিমিত্তহাসৈরব্যক্তবর্ণরমণীযবচঃপ্রবৃত্তীন্ |
অঙ্কাশ্রযপ্রণযিনস্তনযান্বহন্তো ধন্যাস্তদঙ্গরজসা মলিনীভবন্তি||
১৭||
তাপসী – – ভবতু | ন মামযং গণযতি |
( পার্শ্বমবলোক্য )
কোঽত্র ঋষিকুমারাণাম্ |
( রাজানমবলোক্য )
ভদ্রমুখ এহি তাবত্ | মোচযানেন দুর্মোচহস্তগ্রহেণ ডিম্ভলীলযা
বাধ্যমানং বালমৃগেন্দ্রম্ | ( – দুর্মোক- )
রাজাঃ – – ( উপগম্য | সস্মিতম্ )
অযি ভো মহর্ষিপুত্র |
এবমাশ্রমবিরুদ্ধবৃত্তিনা সংযমঃ কিমিতি জন্মতস্ত্বযা |
সত্ত্বসংশ্রয সুখোঽপি দূষ্যতে কৃষ্ণসর্পশিশুনেব চন্দনঃ||১৮
||
তাপসী – – ভদ্রমুখ ন খল্বযমৃষিকুমারঃ |
রাজাঃ – – আকারসদৃশং চেষ্টিতমেবাস্য কথযতি |
স্থানপ্রত্যযাত্তু বযমেবংতর্কিণঃ |
( যথাভ্যর্থিতমনুতিষ্ঠন্বালস্পর্শমুপলভ্য | আত্মগতম্ )
অনেন কস্যাপি কুলাঙ্কুরেণ স্পৃষ্টস্য গাত্রেষু সুখং মমৈবম্ |
কাং নির্বৃতিং চেতসি তস্য কুর্যাদ্যস্যাযমঙ্কাত্কৃতিনঃ প্ররূঢঃ||১৯
||
তাপসী – – ( উভৌ নির্বর্ণ্য )
আশ্চর্যমাশ্চর্যম্ |
রাজাঃ – – আর্যে কিমিব |
তাপসী – – অস্য বালকস্য তেঽপি সংবাদিন্যাকৃতিরিতি বিস্মিতাঽস্মি |
অপরিচিতস্যাপি তেঽপ্রতিলোমঃ সংবৃত্ত ইতি |
রাজাঃ – – ( বালকমুপলালযন্ )
ন চেন্মুনিকুমারোঽযমথ কো স্য ব্যপদেশঃ |
তাপসী – – পুরুবংশঃ |
রাজাঃ – – ( আত্মগতম্ )
কথমেকান্বযো মম | অতঃ খলু মদনুকারিণমেনমত্রভবতী মন্যতে |
অস্ত্যেতত্পৌরবাণামন্ত্যং কুলব্রতম্ |
ভবনেষু রসাধিকেষু পূর্বং ক্ষিতিরক্ষার্থমুশন্তি যে নিবাসম্ |
নিযতৈকব্রতিযতানি পশ্চাত্তরুমূলানি গৃহীভবন্তি তেষাম্||২০||
( প্রকাশম্ )
ন পুনরাত্মগত্যা মানুষাণামেষ বিষযঃ |
তাপসী – – যথা ভদ্রমুখো ভণতি | অপ্সরঃসম্বন্ধেনাস্য জনন্যত্র
দেবগুরোস্তপোবনে প্রসূতা |
রাজাঃ – – ( অপবার্য )
হন্ত দ্বিতীযমিদমাশাজননম্ |
( প্রকাশম্ )
অথ সা তত্রভবতী কিমাখ্যস্য রাজর্ষেঃ পত্নী |
তাপসী – – কস্তস্য ধর্মদারপরিত্যাগিনো নাম সংকীর্তযিতুং
চিন্তযিষ্যতি |
রাজাঃ – – ( স্বগতম্ )
ইযং খলু কথা মামেব লক্ষ্যীকরোতি | যদি তাবদস্য শিশোর্মাতরং
নামতঃ পৃচ্ছামি | অথ বাঽনার্যঃ পরদারব্যবহারঃ |
( প্রবিষ্য মৃন্মযূরহস্তা )
তাপসী – – সর্বদমন শকুংতলাবণ্যং প্রেক্ষস্ব |
বালঃ – – ( সদৃষ্টিক্ষেপম্ )
কুত্র বা মম মাতা |
উভে – – নামসাদৃশ্যেন বঞ্চিতো মাতৃবত্সলঃ |
দ্বিতীযা – – বত্স অস্য মৃত্তিকামযূরস্য রম্যত্বং পশ্যেতি ভণিতোঽসি |
রাজাঃ – – ( আত্মগতম্ )
কিং বা শকুন্তলেত্যস্যা মাতুরাখ্যা | সন্তি পুনর্নামধেযসাদৃশ্যানি |
অপি নাম মৃগতৃষ্ণিকেব
নামমাত্রপ্রস্তাবো মে বিষাদায কল্পতে |
বালঃ – – মাতঃ রোচতে ম এষ ভদ্রমযূরঃ |
( ইতি ক্রীডনকমাদত্তে )
প্রথমা – – ( বিলোক্য | সোদ্বেগম্ )
অহো রক্ষাকরণ্ডকমস্য মণিবন্ধে ন দৃশ্যতে |
রাজাঃ – – অলমাবেগেন | নন্বিদমস্য সিংহশাববিমর্দাত্পরিভ্রষ্টম্ |
( ইত্যাদাতুমিচ্ছতি )
উভে – – মা খল্বেতদবলম্ব্য কথম্ | গৃহীতমনেন |
( ইতি বিস্মযাদুরোনিহিতহস্তে পরস্পরমবলোকযতঃ )
রাজাঃ – – কিমর্থং প্রতিষিদ্ধাঃ স্মঃ |
প্রথমা – – শৃণোতু মহারাজঃ | এষাঽপরাজিতা নামৌষধিরস্য
জাতকর্মসমযে ভগবতা মারীচেন দত্তা | এতাং কিল
মাতাপিতরাবাত্মানং চ বর্জযিত্বাঽপরো ভূমিপতিতাং ন গৃহ্ণাতি |
রাজাঃ – – অথ গৃহ্ণাতি |
প্রথমা – – ততস্তং সর্পো ভূত্বা দশতি |
রাজাঃ – – ভবতীভ্যাং কদাচিদস্যাঃ প্রত্যক্ষীকৃতা বিক্রিযা |
উভে – – অনেকশঃ |
রাজাঃ – – ( সহর্ষম্ | আত্মগতম্ )
কথমিব সংপূর্ণমপি মে মনোরথং নাভিনন্দামি |
( ইতি বালং পরিষ্বজতে )
দ্বিতীযা – – সুব্রতে এহি | ইমং বৃত্তান্তং নিযমব্যাপৃতাযৈ
শকুংতলাযৈ নিবেদযাবঃ |
( ইতি নিষ্ক্রান্তে )
বালঃ – – মুঞ্চ মাম্ | যাবন্মাতুঃ সকাশং গমিষ্যামি |
রাজাঃ – – পুত্রক মযা সহৈব মাতরমভিনন্দিষ্যসি |
বালঃ – – মম খলু তাতো দুষ্যন্তঃ | ন ত্বম্ |
রাজাঃ – – ( সস্মিতম্ )
এষ বিবাদ এব প্রত্যাযযতি |
( ততঃ প্রবিশত্যেকবেণীধরা শকুংতলা )
শকুংতলা – – বিকারকালেঽপি প্রকৃতিস্থাং সর্বদমনস্যৌষধিং
শ্রুত্বা ন মে আশাঽঽসীদাত্মনো ভাগধেযেষু | অথ বা যথা
সানুমত্যাঽঽখ্যাতং তথা সম্ভাব্যত এতত্ |
রাজাঃ – – ( শকুংতলাং বিলোক্য )
অযে সেযমত্রভবতী শকুংতলা যৈষা
বসনে পরিধূসরে বসানা নিযমক্ষামমুখী ধৃতৈকবেণিঃ |
অতিনিষ্করুণস্য শুদ্ধশীলা মম দীর্ঘং বিরহব্রতং বিভর্তি||২১||
শকুংতলা – – ( পশ্চাত্তাপবিবর্ণং রাজানং দৃষ্ট্বা )
ন খল্বার্যপুত্র ইব | ততঃ ক এষ ইদানীং কৃতরক্ষামঙ্গলং
দারকং মে গাত্রসংসর্গেণ দূষযতি |
বালঃ – – ( মাতরমুপেত্য )
মাতঃ এষ কোঽপি পুরুষো মাং পুত্র ইত্যালিঙ্গতি |
রাজাঃ – – প্রিযে ক্রৌর্যমপি মে ত্বযি প্রযুক্তমনুকূলপরিণামং সংবৃত্তং
যদহমিদানীং ত্বযা প্রত্যভিজ্ঞাতমাত্মানং পশ্যামি |
শকুংতলা – – ( আত্মগতম্ )
হৃদয সমাশ্বসিহি সমাশ্বসিহি |
পরিত্যক্তমত্সরেণানুকম্পিতাস্মি দৈবেন | আর্যপুত্রঃ খল্বেষঃ |
রাজাঃ – – প্রিযে |
স্মৃতিভিন্নমোহতমসো দিষ্ট্যা প্রমুখে স্থিতাসি মে সুমুখি |
উপরাগান্তে শশিনঃ সমুপগতা রোহিণী যোগম্||২২||
শকুংতলা – – জযতু জযত্বার্যপুত্রঃ |
( ইত্যর্ধোক্তে বাষ্পকণ্ঠী বিরমতি)
রাজাঃ – – সুন্দরি |
বাষ্পেণ প্রতিষিদ্ধেঽপি জযশব্দে জিতং মযা |
যত্তে দৃষ্টমসংস্কারপাটলোষ্ঠপুটং মুখম্||২৩||
বালঃ – – মাতঃ ক এষঃ |
শকুংতলা – – বত্স তে ভাগধেযানি পৃচ্ছ |
রাজাঃ – – ( শকুংতলাযাঃ পাদযোঃ প্রণিপত্য )
সুতনু হৃদযাত্প্রত্যাদেশব্যলীকমপৈতু তে
কিমপি মনসঃ সংমোহো মে তদা বলবানভূত্ |
প্রবলতমসামেবংপ্রাযাঃ শুভেষু হি বৃত্তযঃ
স্রজমপি শিরস্যন্ধঃ ক্ষিপ্তাং ধুনোত্যহিশঙ্কযা||২৪||
শকুংতলা – – উত্তিষ্ঠত্বার্যপুত্রঃ | নূনং মে সুচরিতপ্রতিবন্ধকং
পুরাকৃতং তেষু দিবসেষু পরিণামাভিমুখমাসীদ্যেন
সানুক্রোশোঽপ্যার্যপুত্রো মযি বিরসঃ সংবৃত্তঃ |
( রাজোত্তিষ্ঠতি )
শকুংতলা – – অথ কথমার্যপুত্রেণ স্মৃতো দুঃখভাগ্যযং জনঃ |
রাজাঃ – – উদ্ধৃতবিষাদশল্যঃ কথযিষ্যামি |
মোহান্মযা সুতনু পূর্বমুপেক্ষিতস্তে
যো বদ্ধবিন্দুরধরং পরিবাধমানঃ |
তং তাবদাকুটিলপক্ষ্মবিলগ্নমদ্য
বাষ্পং প্রমৃজ্য বিগতানুশযো ভবেযম্||২৫||
( ইতি যথোক্তমনুতিষ্ঠতি )
শকুংতলা – – ( নামমুদ্রাং দৃষ্ট্বা )
আর্যপুত্র ইদং তদঙ্গুলীযকম্ |
রাজাঃ – – অস্মাদঙ্গুলীযোপলম্ভাত্খলু স্মৃতিরুপলব্ধা |
শকুংতলা – – বিষমং কৃতমনেন যত্তদাঽঽর্যপুত্রস্য প্রত্যযকালে
দুর্লভমাসীত্ |
রাজাঃ – – তেন হি ঋতুসমবাযচিহ্নং প্রতিপদ্যতাং লতা কুসুমম্ |
শকুংতলা – – নাস্য বিশ্বসিমি | আর্যপুত্র এবৈতদ্ধারযতু |
( ততঃ প্রবিশতি মাতলিঃ )
মাতলিঃ – – দিষ্ট্যা ধর্মপত্নীসমাগমেন পুত্রমুখদর্শনেন
চাযুষ্মান্বর্ধতে |
রাজাঃ – – অভূত্সংপাদিতস্বাদুফলো মে মনোরথঃ | মাতলে ন খলু
বিদিতোঽযমাখণ্ডলেন বৃত্তান্তঃ স্যাত্ |
মাতলিঃ – – ( সস্মিতম্ )
কিমীশ্বরাণাং পরোক্ষম্ | এত্বাযুষ্মান্ | ভগবান্মারীচস্তে দর্শনং
বিতরতি |
রাজাঃ – – শকুন্তলে অবলম্ব্যতাং পুত্রঃ | ত্বাং পুরস্কৃত্য ভগবন্তং
দ্রষ্টুমিচ্ছামি |
শকুংতলা – – জিহ্রেম্যার্যপুত্রেণ সহ গুরুসমীপং গন্তুম্ |
রাজাঃ – – অপ্যাচরিতব্যমভ্যুদযকালেষু | এহ্যেহি |
( সর্বে পরিক্রামন্তি )
( ততঃ প্রবিশত্যদিত্যা সার্ধমাসনস্থো মারীচঃ )
মারীচঃ – – ( রাজানমবলোক্য )
দাক্ষাযণি |
পুত্রস্য তে রণশিরস্যযমগ্রযাযী
দুষ্যন্ত ইত্যভিহিতো ভুবনস্য ভর্তা |
চাপেন যস্য বিনিবর্তিতকর্ম জাতং
তত্কোটিমত্কুলিশমাভরণং মঘোনঃ||২৬||
অদিতিঃ – – সংভাবনীযানুভাবাঽস্যাকৃতিঃ |
মাতলিঃ – – আযুষ্মন্ এতৌ পুত্রপ্রীতিপিশুনেন চক্ষুষা দিবৌকসাং
পিতরাবাযুষ্মন্তমবলোকযতঃ | তাবুপসর্প |
রাজাঃ – – মাতলে |
প্রাহুর্দ্বাদশধা স্থিতস্য মুনযো যত্তেজসঃ কারণং
ভর্তারং ভুবনত্রযস্য সুষুবে যদ্যজ্ঞভাগেশ্বরম্ |
যস্মিন্নাত্মভবঃ পরোঽপি পুরুষশ্চক্রে ভবাযাস্পদং
দ্বন্দ্বং দক্ষমরীচিসংভবমিদং তত্স্রষ্টুরেকান্তরম্||২৭||
মাতলিঃ – – অথ কিম্ |
রাজাঃ – – ( উপগম্য )
উভাভ্যামপি বাসবনিযোজ্যো দুষ্যন্তঃ প্রণমতি |
মারীচ – – বত্স চিরং জীব | পৃথিবীং পালয |
অদিতিঃ – – বত্স অপ্রতিরথো ভব |
শকুংতলা – – দারকসহিতা বাং পাদবদনং করোমি |
মারীচঃ – – বত্সে |
আখণ্ডলসমো ভর্তা জযন্তপ্রতিমঃ সুতঃ |
আশীরন্যা ন তে যোগ্যা পৌলোমীসদৃশী ভব||২৮||
অদিতিঃ – – জাতে ভর্তুর্বহুমতা ভব | অযং চ দীর্ঘাযুর্বত্সক
উভযকুলনন্দনো ভবতু | উপবিশত |
( সর্বে প্রজাপতিমভিত উপবিশন্তি )
মারীচঃ – – ( একৈকং নির্দিংশন্ )
দিষ্ট্যা শকুংতলা সাধ্বী সদপত্যমিদং ভবান্ |
শ্রদ্ধা বিত্তং বিধিশ্চেতি ত্রিতযং তত্সমাগতম্||২৯||
রাজাঃ – – ভগবন্ | প্রাগভিপ্রেতসিদ্ধিঃ | পশ্চাদ্দর্শনম্ |
অতোঽপূর্বঃ খলু বোঽনুগ্রহঃ | কুতঃ |
উদেতি পূর্বং কুসুমং ততঃ ফলং ঘনোদযঃ প্রাক্তদনন্তরং পযঃ |
নিমিত্তনৈমিত্তিকযোরযং ক্রমস্তব প্রসাদস্য পুরস্তু সংপদঃ||৩০||
মাতলিঃ – – এবং বিধাতারঃ প্রসীদন্তি |
রাজাঃ – – ভগবন্ ইমামাজ্ঞাকরীং বো গান্ধর্বেণ বিবাহবিধিনোপযম্য
কস্যচিত্কালস্য বন্ধুভিরানীতাং
স্মৃতিশৈথিল্যাত্প্রত্যাদিশন্নপরাদ্ধোঽস্মি তত্রভবতো
যুষ্মত্সগোত্রস্য কণ্বস্য | পশ্চাদঙ্গুলীযকদর্শনাদূঢপূর্বাং
তদ্দুহিতরমবগতোঽহম্ | তচ্চিত্রমিব মে প্রতিভাতি |
যথা গজো নেতি সমক্ষরূপে তস্মিন্নপক্রামতি সংশযঃ স্যাত্ |
পদানি দৃষ্ট্বা তু ভবেত্প্রতীতিস্তথাবিধো মে মনসো বিকারঃ||৩১||
মারীচঃ – – বত্স অলমাত্মাপরাধশঙ্কযা | সংমোহোঽপি
ত্বয্যনুপপন্নঃ | শ্রূযতাম্ |
রাজাঃ – – অবহিতোঽস্মি |
মারীচঃ – – যদৈবাপ্সরস্তীর্থাবতরণাত্প্রত্যক্ষবৈক্লব্যাং
শকুংতলামাদায মেনকা দাক্ষাযণীমুপগতা তদৈব
ধ্যানাদবগতোঽস্মি দুর্বাসসঃ শাপাদিযং তপস্বিনী
সহধর্মচারিণীত্বযা প্রত্যাদিষ্টা নান্যথেতি | স
চাযমঙ্গুলীযকদর্শনাবসানঃ |
রাজাঃ – – ( সোচ্ছ্বাসম্ )
এষ বচনীযান্মুক্তোঽস্মি |
শকুংতলা – – ( স্বগতম্ )
দিষ্ট্যাঽকারণপ্রত্যাদেশী নার্যপুত্রঃ | ন পুনঃ শপ্তমাত্মানং
স্মরামি | অথ বা প্রাপ্তো মযা স হি শাপো বিরহশূন্যহৃদযযা ন
বিদিতঃ | অতঃ সখীভ্যাং সংদিষ্টাস্মি ভর্তুরঙ্গুলীযকং
দর্শযিতব্যমিতি |
মারীচঃ – – বত্সে চরিতার্থাসি | তদিদানীং সহধর্মচারিণং প্রতি
ন ত্বযা মন্যুঃ কার্যঃ | পশ্য |
শাপাদসি প্রতিহতা স্মৃতিরোধরূক্ষে
ভর্তর্যপেততমসি প্রভুতা তবৈব |
ছাযা ন মূর্ছতি মলোপহতপ্রসাদে
শুদ্ধে তু দর্পণতলে সুলভাবকাশা||৩২||
রাজাঃ – – যথাহ ভগবান্ |
মারীচঃ – – বত্স কচ্চিদভিনন্দিতস্ত্বযা
বিধিবদস্মাভিরনুষ্ঠিতজাতকর্মা পুত্র এষ শাকুন্তলেযঃ |
রাজাঃ – – ভগবন্ অত্র খলু মে বংশপ্রতিষ্ঠা |
( ইতি বালং হস্তেন গৃহ্ণাতি )
মারীচঃ – – তথাভাবিনমেনং চক্রবর্তিনমবগচ্ছতু ভবান্ |
পশ্য |
রথেনানুদ্ধাতস্তিমিতগতিনা তীর্ণজলধিঃ
পুরা সপ্তদ্বীপাং জযতি বসুধামপ্রতিরথঃ |
ইহাযং সত্ত্বানাং প্রসভদমনাত্সর্বদমনঃ
পুনর্যাস্যত্যাখ্যাং ভরত ইতি লোকস্য ভরণাত্||৩৩||
রাজাঃ – – ভগবতা কৃতসংস্কারে সর্বমস্মিন্বযমাশাস্মহে |
অদিতিঃ – – ভগবন্ অস্যা দুহিতৃমনোরথসংপত্তেঃ কণ্বোঽপি
তাবত্চ্ছ্রুতবিস্তারঃ ক্রিযতাম্ | দুহিতৃবত্সলা মেনকেহৈবোপচরন্তী
তিষ্ঠতি |
শকুংতলা – – ( আত্মগতম্ )
মনোরথঃ খলু মে ভণিতো ভগবত্যা |
মারীচঃ – – তপঃপ্রভবাত্প্রত্যক্ষং সর্বমেব তত্রভবতঃ |
রাজাঃ – – অতঃ খলু মম নাতিক্রুদ্ধো মুনিঃ |
মারীচঃ – – তথাপ্যসৌ প্রিযমস্মাভিঃ প্রষ্টব্যঃ | কঃ কোঽত্র ভোঃ |
( প্রবিশ্য )
শিষ্যঃ – – ভগবন্ অযমস্মি |
মারীচঃ – – গালব ইদানীমেব বিহাযসা গত্বা মম
বচনাত্তত্রভবতে কণ্বায প্রিযমাবেদয যথা পুত্রবতী শকুংতলা
তচ্ছাপনিবৃত্তৌ স্মৃতিমতা দুষ্যন্তেন প্রতিগৃহীতেতি |
শিষ্যঃ – – যদাজ্ঞাপযতি ভগবান্ |
( ইতি নিষ্ক্রান্তঃ )
মারীচঃ – – বত্স ত্বমপি স্বাপত্যদারসহিতঃ সখ্যুরাখণ্ডলস্য
রথমারুহ্য তে রাজধানীং প্রতিষ্ঠস্ব |
রাজাঃ – – যদাজ্ঞাপযতি ভগবান্ |
মারীচঃ – – অপি চ |
তব ভবতু বিডৌজাঃ প্রাজ্যবৃষ্টিঃ প্রজাসু
ত্বমপি বিততযজ্ঞো বজ্রিণং প্রীণযস্ব |
যুগশতপরিবর্তানেবমন্যোন্যকৃত্যৈর্নযতমু-
ভযলোকানুগ্রহশ্লাঘনীযৈঃ||৩৪||
রাজাঃ – – ভগবন্ যথাশক্তি শ্রেযসে যতিষ্যে |
মারীচঃ – – বত্স কিং তে ভূযঃ প্রিযমুপকরোমি |
রাজাঃ – – অতঃ পরমপি প্রিযমস্তি | যদীহ ভগবান্প্রিযং কর্তুমিচ্ছতি
তর্হীদমস্তু |
( ভরতবাক্যম্ )
প্রবর্ততাং প্রকৃতিহিতায পার্থিবঃ
সরস্বতী শ্রুতমহতাং মহীযতাম্ |
মমাপি চ ক্ষপযতু নীললোহিতঃ
পুনর্ভবং পরিগতশক্তিরাত্মভূঃ||৩৫||
( নিষ্ক্রান্তাঃ সর্বে )

( ইতি সপ্তমোঽঙ্কঃ | )

সমাপ্তমিদমভিজ্ঞানশকুংতলং নাম নাটকম্ |

<