ঋষভগীতা

.. .. ঋষভগীতা.. ..

১২৪
য্
ইমে জনা নরশ্রেষ্ঠ প্রশংসন্তি সদা ভুবি .
ধর্মস্য শীলমেবাদৌ ততো মে সংশযো মহান্ .. ১..
যদি তচ্ছক্যমস্মাভির্জ্ঞাতুং ধর্মভৃতাং বর .
শ্রোতুমিচ্ছামি তত্সর্বং যথৈতদুপলভ্যতে .. ২..
কথং নু প্রাপ্যতে শীলং শ্রোতুমিচ্ছামি ভারত .
কিং লক্ষণং চ তত্প্রোক্তং ব্রূহি মে বদতাং বর .. ৩..
ভ্
পুরা দুর্যোধনেনেহ ধৃতরাষ্ট্রায মানদ .
আখ্যাতং তপ্যমানেন শ্রিযং দৃষ্ট্বা তথাগতাম্ .. ৪..
ইন্দ্রপ্রস্থে মহারাজ তব স ভ্রাতৃকস্য হ .
সভাযাং চাবহসনং তত্সর্বং শৃণু ভারত .. ৫..
ভবতস্তাং সভাং দৃষ্ট্বা সমৃদ্ধিং চাপ্যনুত্তমাম্ .
দুর্যোধনস্তদাসীনঃ সর্বং পিত্রে ন্যবেদযত্ .. ৬..
শ্রুত্বা চ ধৃতরাষ্ট্রোঽপি দুর্যোধন বচস্তদা .
অব্রবীত্কর্ণ সহিতং দুর্যোধনমিদং বচঃ .. ৭..
কিমর্থং তপ্যসে পুত্র শ্রোতুমিচ্ছামি তত্ত্বতঃ .
শ্রুত্বা ত্বামনুনেষ্যামি যদি সম্যগ্ভবিষ্যসি .. ৮..
যথা ত্বং মহদৈশ্বর্যং প্রাপ্তঃ পরপুরঞ্জয .
কিঙ্করা ভ্রাতরঃ সর্বে মিত্রাঃ সম্বন্ধিনস্তথা .. ৯..
আচ্ছাদযসি প্রাবারানশ্নাসি পিশিতৌদনম্ .
আজানেযা বহন্তি ত্বাং কস্মাচ্ছোচসি পুত্রক .. ১০..
দ্
দশ তানি সহস্রাণি স্নাতকানাং মহাত্মনাম্ .
ভুঞ্জতে রুক্মপাত্রীষু যুধিষ্ঠির নিবেশনে .. ১১..
দৃষ্ট্বা চ তাং সভাং দিব্যাং দিব্যপুষ্পফলান্বিতাম্ .
অশ্বাংস্তিত্তির কল্মাষান্রত্নানি বিবিধানি চ .. ১২..
দৃষ্ট্বা তাং পাণ্ডবেযানামৃদ্ধিমিন্দ্রোপমাং শুভাম্ .
অমিত্রাণাং সুমহতীমনুশোচামি মানদ .. ১৩..
ধ্
যদীচ্ছসি শ্রিযং তাত যাদৃশীং তাং যুধিষ্ঠিরে .
বিশিষ্টাং বা নরব্যাঘ্র শীলবান্ভব পুত্রক .. ১৪..
শীলেন হি ত্রযো লোকাঃ শক্যা জেতুং ন সংশযঃ .
ন হি কিং চিদসাধ্যং বৈ লোকে শীলবতাং ভবেত্ .. ১৫..
একরাত্রেণ মান্ধাতা ত্র্যহেণ জনমেজযঃ .
সপ্তরাত্রেণ নাভাগঃ পৃথিবীং প্রতিপেদিবান্ .. ১৬..
এতে হি পার্থিবাঃ সর্বে শীলবন্তো দমান্বিতাঃ .
অতস্তেষাং গুণক্রীতা বসুধা স্বযমাগমত্ .. ১৭..
অত্রাপ্যুদাহরন্তীমমিতিহাসং পুরাতনম্ .
নারদেন পুরা প্রোক্তং শীলমাশ্রিত্য ভারত .. ১৮..
প্রহ্রাদেন হৃতং রাজ্যং মহেন্দ্রস্য মহাত্মনঃ .
শীলমাশ্রিত্য দৈত্যেন ত্রৈলোক্যং চ বশীকৃতম্ .. ১৯..
ততো বৃহস্পতিং শক্রঃ প্রাঞ্জলিঃ সমুপস্থিতঃ .
উবাচ চ মহাপ্রাজ্ঞঃ শ্রেয ইচ্ছামি বেদিতুম্ .. ২০..
ততো বৃহস্পতিস্তস্মৈ জ্ঞানং নৈঃশ্রেযসং পরম্ .
কথযামাস ভগবান্দেবেন্দ্রায কুরূদ্বহ .. ২১..
এতাবচ্ছ্রেয ইত্যেব বৃহস্পতিরভাষত .
ইন্দ্রস্তু ভূযঃ পপ্রচ্ছ ক্ব বিশেষো ভবেদিতি .. ২২..
ব্
বিশেষোঽস্তি মহাংস্তাত ভার্গবস্য মহাত্মনঃ .
তত্রাগময ভদ্রং তে ভূয এব পুরন্দর .. ২৩..
ধ্
আত্মনস্তু ততঃ শ্রেযো ভার্গবাত্সুমহাযশাঃ .
জ্ঞানমাগমযত্প্রীত্যা পুনঃ স পরমদ্যুতিঃ .. ২৪..
তেনাপি সমনুজ্ঞাতো ভাগবেণ মহাত্মনা .
শ্রেযোঽস্তীতি পুনর্ভূযঃ শুক্রমাহ শতক্রতুঃ .. ২৫..
ভার্গবস্ত্বাহ ধর্মজ্ঞঃ প্রহ্রাদস্য মহাত্মনঃ .
জ্ঞানমস্তি বিশেষেণ ততো হৃষ্টশ্ চ সোঽভবত্ .. ২৬..
স ততো ব্রাহ্মণো ভূত্বা প্রহ্রাদং পাকশাসনঃ .
সৃত্বা প্রোবাচ মেধাবী শ্রেয ইচ্ছামি বেদিতুম্ .. ২৭..
প্রহ্রাদস্ত্বব্রবীদ্বিপ্রং ক্ষণো নাস্তি দ্বিজর্ষভ .
ত্রৈলোক্যরাজ্যে সক্তস্য ততো নোপদিশামি তে .. ২৮..
ব্রাহ্মণস্ত্বব্রবীদ্বাক্যং কস্মিন্কালে ক্ষণো ভবেত্ .
ততোপদিষ্টমিচ্ছামি যদ্যত্কার্যান্তরং ভবেত্ .. ২৯..
ততঃ প্রীতোঽভবদ্রাজা প্রহ্রাদো ব্রহ্মবাদিনে .
তথেত্যুক্ত্বা শুভে কালে জ্ঞানতত্ত্বং দদৌ তদা .. ৩০..
ব্রাহ্মণোঽপি যথান্যাযং গুরুবৃত্তিমনুত্তমাম্ .
চকার সর্বভাবেন যদ্বত্স মনসেচ্ছতি .. ৩১..
পৃষ্ঠশ্চ তেন বহুশঃ প্রাপ্তং কথমরিন্দম .
ত্রৈলোক্যরাজ্যং ধর্মজ্ঞ কারণং তদ্ব্রবীহি মে .. ৩২..
প্
নাসূযামি দ্বিজশ্রেষ্ঠ রাজাস্মীতি কদা চন .
কব্যানি বদতাং তাত সংযচ্ছামি বহামি চ .. ৩৩..
তে বিস্রব্ধাঃ প্রভাষন্তে সংযচ্ছন্তি চ মাং সদা .
তে মা কব্য পদে সক্তং শুশ্রূষুমনসূযকম্ .. ৩৪..
ধর্মাত্মানং জিতক্রোধং সংযতং সংযতেন্দ্রিযম্ .
সমাচিন্বন্তি শাস্তারঃ ক্ষৌদ্রং মধ্বিব মক্ষিকাঃ .. ৩৫..
সোঽহং বাগগ্রপিষ্টানাং রসানামবলেহিতা .
স্বজাত্যানধিতিষ্ঠামি নক্ষত্রাণীব চন্দ্রমাঃ .. ৩৬..
এতত্পৃথিব্যামমৃতমেতচ্চক্ষুরনুত্তমম্ .
যদ্ব্রাহ্মণ মুখে কব্যমেতচ্ছ্রুত্বা প্রবর্ততে .. ৩৭..
ধ্
এতাবচ্ছ্রেয ইত্যাহ প্রহ্রাদো ব্রহ্মবাদিনম্ .
শুশ্রূষিতস্তেন তদা দৈত্যেন্দ্রো বাক্যমব্রবীত্ .. ৩৮..
যথাবদ্গুরুবৃত্ত্যা তে প্রীতোঽস্মি দ্বিজসত্তম .
বরং বৃণীষ্ব ভদ্রং তে প্রদাতাস্মি ন সংশযঃ .. ৩৯..
কৃতমিত্যেব দৈত্যেন্দ্রমুবাচ স চ বৈ দ্বিজঃ .
প্রহ্রাদস্ত্বব্রবীত্প্রীতো গৃহ্যতাং বর ইত্যুত .. ৪০..
ব্র্
যদি রাজন্প্রসন্নস্ত্বং মম চেচ্ছসি চেদ্ধিতম্ .
ভবতঃ শীলমিচ্ছামি প্রাপ্তুমেষ বরো মম .. ৪১..
ধ্
ততঃ প্রীতশ্চ দৈত্যেন্দ্রো ভযং চাস্যাভবন্মহত্ .
বরে প্রদিষ্টে বিপ্রেণ নাল্পতেজাযমিত্যুত .. ৪২..
এবমস্ত্বিতি তং প্রাহ প্রহ্রাদো বিস্মিতস্তদা .
উপাকৃত্য তু বিপ্রায বরং দুঃখান্বিতোঽভবত্ .. ৪৩..
দত্তে বরে গতে বিপ্রে চিন্তাসীন্মহতী ততঃ .
প্রহ্রাদস্য মহারাজ নিশ্চযং ন চ জগ্মিবান্ .. ৪৪..
তস্য চিন্তযতস্তাত ছাযা ভূতং মহাদ্যুতে .
তেজো বিগ্রহবত্তাত শরীরমজহাত্তদা .. ৪৫..
তমপৃচ্ছন্মহাকাযং প্রহ্রাদঃ কো ভবানিতি .
প্রত্যাহ ননু শীলোঽস্মি ত্যক্তো গচ্ছাম্যহং ত্বযা .. ৪৬..
তস্মিন্দ্বিজ বরে রাজন্বত্স্যাম্যহমনিন্দিতম্ .
যোঽসৌ শিষ্যত্বমাগম্য ত্বযি নিত্যং সমাহিতঃ .
ইত্যুক্ত্বান্তর্হিতং তদ্বৈ শক্রং চান্ববিশত্প্রভো .. ৪৭..
তস্মিংস্তেজসি যাতে তু তাদৃগ্রূপস্ততোঽপরঃ .
শরীরান্নিঃসৃতস্তস্য কো ভবানিতি চাব্রবীত্ .. ৪৮..
ধর্মং প্রহ্রাদ মাং বিদ্ধি যত্রাসৌ দ্বিজসত্তমঃ .
তত্র যাস্যামি দৈত্যেন্দ্র যতঃ শীলং ততো হ্যহম্ .. ৪৯..
ততোঽপরো মহারাজ প্রজ্বজন্নিব তেজসা .
শরীরান্নিঃসৃতস্তস্য প্রহ্রাদস্য মহাত্মনঃ .. ৫০..
কো ভবানিতি পৃষ্টশ্চ তমাহ স মহাদ্যুতিঃ .
সত্যমস্ম্যসুরেন্দ্রাগ্র্য যাস্যেঽহং ধর্মমন্বিহ .. ৫১..
তস্মিন্ননুগতে ধর্মং পুরুষে পুরুষোঽপরঃ .
নিশ্চক্রাম ততস্তস্মাত্পৃষ্ঠশ্চাহ মহাত্মনা .
বৃত্তং প্রহ্রাদ মাং বিদ্ধি যতঃ সত্যং ততো হ্যহম্ .. ৫২..
তস্মিন্গতে মহাশ্বেতঃ শরীরাত্তস্য নির্যযৌ .
পৃষ্টশ্চাহ বলং বিদ্ধি যতো বৃত্তমহং ততঃ .
ইত্যুক্ত্বা চ যযৌ তত্র যতো বৃত্তং নরাধিপ .. ৫৩..
ততঃ প্রভামযী দেবী শরীরাত্তস্য নির্যযৌ .
তামপৃচ্ছত্স দৈত্যেন্দ্রঃ সা শ্রীরিত্যেবমব্রবীত্ .. ৫৪..
উষিতাস্মি সুখং বীর ত্বযি সত্যপরাক্রমে .
ত্বযা ত্যক্তা গমিষ্যামি বলং যত্র ততো হ্যহম্ .. ৫৫..
ততো ভযং প্রাদুরাসীত্প্রহ্রাদস্য মহাত্মনঃ .
অপৃচ্ছত চ তাং ভূযঃ ক্ব যাসি কমলালযে .. ৫৬..
ত্বং হি সত্যব্রতা দেবী লোকস্য পরমেশ্বরী .
কশ্চাসৌ ব্রাহ্মণশ্রেষ্ঠস্তত্ত্বমিচ্ছামি বেদিতুম্ .. ৫৭..
জ্রী
স শক্রো ব্রহ্ম চারী চ যস্ত্বযা চোপশিক্ষিতঃ .
ত্রৈলোক্যে তে যদৈশ্বর্যং তত্তেনাপহৃতং প্রভো .. ৫৮..
শীলেন হি ত্বযা লোকাঃ সর্বে ধর্মজ্ঞ নির্জিতাঃ .
তদ্বিজ্ঞায মহেন্দ্রেণ তব শীলং হৃতং প্রভো .. ৫৯..
ধর্মঃ সত্যং তথা বৃত্তং বলং চৈব তথা হ্যহম্ .
শীলমূলা মহাপ্রাজ্ঞ সদা নাস্ত্যত্র সংশযঃ .. ৬০..
ভ্
এবমুক্ত্বা গতা তু শ্রীস্তে চ সর্বে যুধিষ্ঠির .
দুর্যোধনস্তু পিতরং ভূয এবাব্রবীদিদম্ .. ৬১..
শীলস্য তত্ত্বমিচ্ছামি বেত্তুং কৌরবনন্দন .
প্রাপ্যতে চ যথা শীলং তমুপাযং বদস্ব মে .. ৬২..
ধ্
সোপাযং পূর্বমুদ্দিষ্টং প্রহ্রাদেন মহাত্মনা .
সঙ্ক্ষেপতস্তু শীলস্য শৃণু প্রাপ্তিং নরাধিপ .. ৬৩..
অদ্রোহঃ সর্বভূতেষু কর্মণা মনসা গিরা .
অনুগ্রহশ্চ দানং চ শীলমেতত্প্রশস্যতে .. ৬৪..
যদন্যেষাং হিতং ন স্যাদাত্মনঃ কর্ম পৌরুষম্ .
অপত্রপেত বা যেন ন তত্কুর্যাত্কথং চন .. ৬৫..
তত্তু কর্ম তথা কুর্যাদ্যেন শ্লাঘেত সংসদি .
এতচ্ছীলং সমাসেন কথিতং কুরুসত্তম .. ৬৬..
যদ্যপ্যশীলা নৃপতে প্রাপ্নুবন্তি ক্ব চিচ্ছ্রিযম্ .
ন ভুঞ্জতে চিরং তাত স মূলাশ্ চ পতন্তি তে .. ৬৭..
এতদ্বিদিত্বা তত্ত্বেন শীলবান্ভব পুত্রক .
যদীচ্ছসি শ্রিযং তাত সুবিশিষ্টাং যুধিষ্ঠিরাত্ .. ৬৮..
ভ্
এতত্কথিতবান্পুত্রে ধৃতরাষ্ট্রো নরাধিপ .
এতত্কুরুষ্ব কৌন্তেয ততঃ প্রাপ্স্যসি তত্ফলম্ .. ৬৯..

১২৫
য্
শীলং প্রধানং পুরুষে কথিতং তে পিতামহ .
কথমাশা সমুত্পন্না যা চ সা তদ্বদস্ব মে .. ১..
সংশযো মে মহানেষ সমুত্পন্নঃ পিতামহ .
ছেত্তা চ তস্য নান্যোঽস্তি ত্বত্তঃ পরপুরঞ্জয .. ২..
পিতামহাশা মহতী মমাসীদ্ধি সুযোধনে .
প্রাপ্তে যুদ্ধে তু যদ্যুক্তং তত্কর্তাযমিতি প্রভো .. ৩..
সর্বস্যাশা সুমহতী পুরুষস্যোপজাযতে .
তস্যাং বিহন্যমানাযাং দুঃখো মৃত্যুরসংশযম্ .. ৪..
সোঽহং হতাশো দুর্বুদ্ধিঃ কৃতস্তেন দুরাত্মনা .
ধার্তরাষ্ট্রেণ রাজেন্দ্র পশ্য মন্দাত্মতাং মম .. ৫..
আশাং মহত্তরাং মন্যে পর্বতাদপি স দ্রুমাত্ .
আকাশাদপি বা রাজন্নপ্রমেযৈব বা পুনঃ .. ৬..
এষা চৈব কুরুশ্রেষ্ঠ দুর্বিচিন্ত্যা সুদুর্লভা .
দুর্লভত্বাচ্চ পশ্যামি কিমন্যদ্দুর্লভং ততঃ .. ৭..
ভ্
অত্র তে বর্তযিষ্যামি যুধিষ্ঠির নিবোধ তত্ .
ইতিহাসং সুমিত্রস্য নির্বৃত্তমৃষভস্য চ .. ৮..
সুমিত্রো নাম রাজর্ষির্হৈহযো মৃগযাং গতঃ .
সসার স মৃগং বিদ্ধ্বা বাণেন নতপর্বণা .. ৯..
স মৃগো বাণমাদায যযাবমিতবিক্রমঃ .
স চ রাজা বলী তূর্ণং সসার মৃগমন্তিকাত্ .. ১০..
ততো নিম্নং স্থলং চৈব স মৃগোঽদ্রবদাশুগঃ .
মুহূর্তমেব রাজেন্দ্র সমেন স পথাগমত্ .. ১১..
ততঃ স রাজা তারুণ্যাদৌরসেন বলেন চ .
সসার বাণাসনভৃত্সখড্গো হংসবত্তদা .. ১২..
তীর্ত্বা নদান্নদীংশ্চৈব পল্বলানি বনানি চ .
অতিক্রম্যাভ্যতিক্রম্য সসারৈব বনেচরন্ .. ১৩..
স তু কামান্মৃগো রাজন্নাসাদ্যাসাদ্য তং নৃপম্ .
পুনরভ্যেতি জবনো জবেন মহতা ততঃ .. ১৪..
স তস্য বাণৈর্বহুভিঃ সমভ্যস্তো বনেচরঃ .
প্রক্রীডন্নিব রাজেন্দ্র পুনরভ্যেতি চান্তিকম্ .. ১৫..
পুনশ্চ জবমাস্থায জবনো মৃগযূথপঃ .
অতীত্যাতীত্য রাজেন্দ্র পুনরভ্যেতি চান্তিকম্ .. ১৬..
তস্য মর্মচ্ছিদং ঘোরং সুমিত্রোঽমিত্রকর্শনঃ .
সমাদায শরশ্রেষ্ঠং কার্মুকান্নিরবাসৃজত্ .. ১৭..
ততো গব্যূতি মাত্রেণ মৃগযূথপ যূথপঃ .
তস্য বান পথং ত্যক্ত্বা তস্থিবান্প্রহসন্নিব .. ১৮..
তস্মিন্নিপতিতে বাণে ভূমৌ প্রজলিতে ততঃ .
প্রবিবেশ মহারণ্যং মৃগো রাজাপ্যথাদ্রবত্ .. ১৯..
প্রবিশ্য তু মহারণ্যং তাপসানামথাশ্রমম্ .
আসসাদ ততো রাজা শ্রান্তশ্চোপাবিশত্পুনঃ .. ২০..
তং কার্মুকধরং দৃষ্ট্বা শ্রমার্তং ক্ষুধিতং তদা .
সমেত্য ঋষযস্তস্মিন্পূজাং চক্রুর্যথাবিধি .. ২১..
ঋষযো রাজশার্দূলমপৃচ্ছন্স্বং প্রযোজনম্ .
কেন ভদ্র মুখার্থেন সম্প্রাপ্তোঽসি তপোবনম্ .. ২২..
পদাতির্বদ্ধনিস্ত্রিংশো ধন্বী বাণী নরেশ্বর .
এতদিচ্ছাম বিজ্ঞাতুং কুতঃ প্রাপ্তোঽসি মানদ .
কস্মিন্কুলে হি জাতস্ত্বং কিংনামাসি ব্রবীহি নঃ .. ২৩..
ততঃ স রাজা সর্বেভ্যো দ্বিজেভ্যঃ পুরুষর্ষভ .
আচখ্যৌ তদ্যথান্যাযং পরিচর্যাং চ ভারত .. ২৪..
হৈহযানাং কুলে জাতঃ সুমিত্রো মিত্রনন্দনঃ .
চরামি মৃগযূথানি নিঘ্নন্বাণৈঃ সহস্রশঃ .
বলেন মহতা গুপ্তঃ সামাত্যঃ সাবরোধনঃ .. ২৫..
মৃগস্তু বিদ্ধো বাণেন মযা সরতি শল্যবান্ .
তং দ্রবন্তমনু প্রাপ্তো বনমেতদ্যদৃচ্ছযা .
ভবত্সকাশে নষ্টশ্রীর্হতাশঃ শ্রমকর্শিতঃ .. ২৬..
কিং নু দুঃখমতোঽন্যদ্বৈ যদহং শ্রমকর্শিতঃ .
ভবতামাশ্রমং প্রাপ্তো হতাশো নষ্টলক্ষণঃ .. ২৭..
ন রাজ্যলক্ষণত্যাগো ন পুরস্য তপোধনাঃ .
দুঃখং করোতি তত্তীব্রং যথাশা বিহতা মম .. ২৮..
হিমবান্বা মহাশৈলঃ সমুদ্রো বা মহোদধিঃ .
মহত্ত্বান্নান্বপদ্যেতাং রোদস্যোরন্তরং যথা .
আশাযাস্তপসি শ্রেষ্ঠাস্তথা নান্তমহং গতঃ .. ২৯..
ভবতাং বিদিতং সর্বং সর্বজ্ঞা হি তপোধনাঃ .
ভবন্তঃ সুমহাভাগাস্তস্মাত্প্রক্ষ্যামি সংশযম্ .. ৩০..
আশাবান্পুরুষো যঃ স্যাদন্তরিক্ষমথাপি বা .
কিং নু জ্যাযস্তরং লোকে মহত্ত্বাত্প্রতিভাতি বঃ .
এতদিচ্ছামি তত্ত্বেন শ্রোতুং কিমিহ দুর্লভম্ .. ৩১..
যদি গুহ্যং তপোনিত্যা ন বো ব্রূতেহ মাচিরম্ .
ন হি গুহ্যমতঃ শ্রোতুমিচ্ছামি দ্বিজপুঙ্গবাঃ .. ৩২..
ভবত্তপো বিঘাতো বা যেন স্যাদ্বিরমে ততঃ .
যদি বাস্তি কথা যোগো যোঽযং প্রশ্নো মযেরিতঃ .. ৩৩..
এতত্কারণসামগ্র্যং শ্রোতুমিচ্ছামি তত্ত্বতঃ .
ভবন্তো হি তপোনিত্যা ব্রূযুরেতত্সমাহিতাঃ .. ৩৪..
১২৬
ভ্
ততস্তেষাং সমস্তানামৃষীণামৃষিসত্তমঃ .
ঋষভো নাম বিপ্রর্ষিঃ স্মযন্নিব ততোঽব্রবীত্ .. ১..
পুরাহং রাজশার্দূল তীর্থান্যনুচরন্প্রভো .
সমাসাদিতবান্দিব্যং নরনারাযণাশ্রমম্ .. ২..
যত্র সা বদরী রম্যা হ্রদো বৈহাযসস্তথা .
যত্র চাশ্বশিরা রাজন্বেদান্পঠতি শাশ্বতান্ .. ৩..
তস্মিন্সরসি কৃত্বাহং বিধিবত্তর্পণং পুরা .
পিতৄণাং দেবতানাং চ ততোঽঽশ্রমমিযাং তদা .. ৪..
রেমাতে যত্র তৌ নিত্যং নরনারাযণাবৃষী .
অদূরাদাশ্রমং কং চিদ্বাসার্থমগমং ততঃ .. ৫..
ততশ্চীরাজিনধরং কৃশমুচ্চমতীব চ .
অদ্রাক্ষমৃষিমাযান্তং তনুং নাম তপো নিধিম্ .. ৬..
অন্যৈর্নরৈর্মহাবাহো বপুষাষ্ট গুণান্বিতম্ .
কৃশতা চাপি রাজর্ষে ন দৃষ্টা তাদৃশী ক্ব চিত্ .. ৭..
শরীরমপি রাজেন্দ্র তস্য কানিষ্ঠিকা সমম্ .
গ্রীবা বাহূ তথা পাদৌ কেশাশ্চাদ্ভুতদর্শনাঃ .. ৮..
শিরঃ কাযানুরূপং চ কর্ণৌ নেতে তথৈব চ .
তস্য বাক্চৈব চেষ্টা চ সামান্যে রাজসত্তম .. ৯..
দৃষ্ট্বাহং তং কৃশং বিপ্রং ভীতঃ পরমদুর্মনাঃ .
পাদৌ তস্যাভিবাদ্যাথ স্থিতঃ প্রাঞ্জলিরগ্রতঃ .. ১০..
নিবেদ্য নামগোত্রং চ পিতরং চ নরর্ষভ .
প্রদিষ্টে চাসনে তেন শনৈরহমুপাবিশম্ .. ১১..
ততঃ স কথযামাস কথা ধর্মার্থসংহিতাঃ .
ঋষিমধ্যে মহারাজ তত্র ধর্মভৃতাং বরঃ .. ১২..
তস্মিংস্তু কথযত্যেব রাজা রাজীবলোচনঃ .
উপাযাজ্জবনৈরশ্বৈঃ সবলঃ সাবরোধনঃ .. ১৩..
স্মরন্পুত্রমরণ্যে বৈ নষ্টং পরমদুর্মনাঃ .
ভূরিদ্যুম্ন পিতা ধীমান্রঘুশ্রেষ্ঠো মহাযশাঃ .. ১৪..
ইহ দ্রক্ষ্যামি তং পুত্রং দ্রক্ষ্যামীহেতি পার্থিবঃ .
এবমাশাকৃতো রাজংশ্চরন্বনমিদং পুরা .. ১৫..
দুর্লভঃ স মযা দ্রষ্টুং নূনং পরমধার্মিকঃ .
একঃ পুত্রো মহারণ্যে নষ্ট ইত্যসকৃত্তদা .. ১৬..
দুর্লভঃ স মযা দ্রষ্টুমাশা চ মহতী মম .
তযা পরীতগাত্রোঽহং মুমূর্ষুর্নাত্র সংশযঃ .. ১৭..
এতচ্ছ্রুত্বা স ভগবাংস্তনুর্মুনিবরোত্তমঃ .
অবাক্ষিরা ধ্যানপরো মুহূর্তমিব তস্থিবান্ .. ১৮..
তমনুধ্যান্তমালক্ষ্য রাজা পরমদুর্মনাঃ .
উবাচ বাক্যং দীনাত্মা মন্দং মন্দমিবাসকৃত্ .. ১৯..
দুর্লভং কিং নু বিপ্রর্ষে আশাযাশ্চৈব কিং ভবেত্ .
ব্রবীতু ভগবানেতদ্যদি গুহ্যং ন তন্মযি .. ২০..
মহর্ষির্ভগবাংস্তেন পূর্বমাসীদ্বিমানিতঃ .
বালিশাং বুদ্ধিমাস্থায মন্দভাগ্যতযাত্মনঃ .. ২১..
অর্থযন্কলশং রাজন্কাঞ্চনং বল্কলানি চ .
নির্বিণ্ণঃ স তু বিপ্রর্ষির্নিরাশঃ সমপদ্যত .. ২২..
এবমুক্ত্বাভিবাদ্যাথ তমৃষিং লোকপূজিতম্ .
শ্রান্তো ন্যষীদদ্ধর্মাত্মা যথা ত্বং নরসত্তম .. ২৩..
অর্ঘ্যং ততঃ সমানীয পাদ্যং চৈব মহানৃষিঃ .
আরণ্যকেন বিধিনা রাজ্ঞে সর্বং ন্যবেদযত্ .. ২৪..
ততস্তে মুনযঃ সর্বে পরিবার্য নরর্ষভম্ .
উপাবিশন্পুরস্কৃত্য সপ্তর্ষয ইব ধ্রুবম্ .. ২৫..
অপৃচ্ছংশ্চৈব তে তত্র রাজানমপরাজিতম্ .
প্রযোজনমিদং সর্বমাশ্রমস্য প্রবেশনম্ .. ২৬..
রাজা
বীর দ্যুম্ন ইতি খ্যাতো রাজাহং দিক্ষু বিশ্রুতঃ .
ভূরি দ্যুম্নং সুতং নষ্টমন্বেষ্টুং বনমাগতঃ .. ২৭..
একপুত্রঃ স বিপ্রাগ্র্য বাল এব চ সোঽনঘ .
ন দৃশ্যতে বনে চাস্মিংস্তমন্বেষ্টুং চরাম্যহম্ .. ২৮..
র্সভ
এবমুক্তে তু বচনে রাজ্ঞা মুনিরধোমুখঃ .
তূষ্ণীমেবাভবত্তত্র ন চ প্রত্যুক্তবান্নৃপম্ .. ২৯..
স হি তেন পুরা বিপ্রো রাজ্ঞা নাত্যর্থ মানিতঃ .
আশা কৃশং চ রাজেন্দ্র তপো দীর্ঘং সমাস্থিতঃ .. ৩০..
প্রতিগ্রহমহং রাজ্ঞাং ন করিষ্যে কথং চন .
অন্যেষাং চৈব বর্ণানামিতি কৃত্বা ধিযং তদা .. ৩১..
আশা হি পুরুষং বালং লালাপযতি তস্থুষী .
তামহং ব্যপনেষ্যামি ইতি কৃত্বা ব্যবস্থিতঃ .. ৩২..
র্
আশাযাঃ কিং কৃশত্বং চ কিং চেহ ভুবি দুর্লভম্ .
ব্রবীতু ভগবানেতত্ত্বং হি ধর্মার্থদর্শিবান্ .. ৩৩..
র্সভ
ততঃ সংস্মৃত্য তত্সর্বং স্মারযিষ্যন্নিবাব্রবীত্ .
রাজানং ভগবান্বিপ্রস্ততঃ কৃশ তনুস্তনুঃ .. ৩৪..
কৃশত্বে ন সমং রাজন্নাশাযা বিদ্যতে নৃপ .
তস্যা বৈ দুর্লভত্বাত্তু প্রার্থিতাঃ পার্থিবা মযা .. ৩৫..
র্
কৃশাকৃশে মযা ব্রহ্মন্গৃহীতে বচনাত্তব .
দুর্লভত্বং চ তস্যৈব বেদ বাক্যমিব দ্বিজ .. ৩৬..
সংশযস্তু মহাপ্রাজ্ঞ সঞ্জাতো হৃদযে মম .
তন্মে সত্তম তত্ত্বেন বক্তুমর্হসি পৃচ্ছতঃ .. ৩৭..
ত্বত্তঃ কৃশতরং কিং নু ব্রবীতু ভগবানিদম্ .
যদি গুহ্যং ন তে বিপ্র লোকেঽস্মিন্কিং নু দুর্লভম্ .. ৩৮..
ক্র্জাতনু
দুর্লভোঽপ্যথ বা নাস্তি যোঽর্থী ধৃতিমিবাপ্নুযাত্ .
সুদুর্লভতরস্তাত যোঽর্থিনং নাবমন্যতে .. ৩৯..
সংশ্রুত্য নোপক্রিযতে পরং শক্ত্যা যথার্হতঃ .
সক্তা যা সর্বভূতেষু সাশা কৃশতরী মযা .. ৪০..
একপুত্রঃ পিতা পুত্রে নষ্টে বা প্রোষিতে তথা .
প্রবৃত্তিং যো ন জানাতি সাশা কৃশতরী মযা .. ৪১..
প্রসবে চৈব নারীণাং বৃদ্ধানাং পুত্র কারিতা .
তথা নরেন্দ্র ধনিনামাশা কৃশতরী মযা .. ৪২..
র্সভ
এতচ্ছ্রুত্বা ততো রাজন্স রাজা সাবরোধনঃ .
সংস্পৃশ্য পাদৌ শিরসা নিপপাত দ্বিজর্ষভে .. ৪৩..
রাজা
প্রসাদযে ত্বা ভগবন্পুত্রেণেচ্ছামি সঙ্গতিম্ .
বৃণীষ্ব চ বরং বিপ্র যমিচ্ছসি যথাবিধি .. ৪৪..
র্সভ
অব্রবীচ্চ হি তং বাক্যং রাজা রাজীবলোচনঃ .
সত্যমেতদ্যথা বিপ্র ত্বযোক্তং নাস্ত্যতো মৃষা .. ৪৫..
ততঃ প্রহস্য ভগবাংস্তনুর্ধর্মভৃতাং বরঃ .
পুত্রমস্যানযত্ক্ষিপ্রং তপসা চ শ্রুতেন চ .. ৪৬..
তং সমানায্য পুত্রং তু তদোপালভ্য পার্থিবম্ .
আত্মানং দর্শযামাস ধর্মং ধর্মভৃতাং বরঃ .. ৪৭..
সন্দর্শযিত্বা চাত্মানং দিব্যমদ্ভুতদর্শনম্ .
বিপাপ্মা বিগতক্রোধশ্চচার বনমন্তিকাত্ .. ৪৮..
এতদ্দৃষ্টং মযা রাজংস্ততশ্চ বচনং শ্রুতম্ .
আশামপনযস্বাশু ততঃ কৃশতরীমিমাম্ .. ৪৯..
ভ্
স তত্রোক্তো মহারাজ ঋষভেণ মহাত্মনা .
সুমিত্রোঽপনযত্ক্ষিপ্রমাশাং কৃশতরীং তদা .. ৫০..
এবং ত্বমপি কৌন্তেয শ্রুত্বা বাণীমিমাং মম .
স্থিরো ভব যথা রাজন্হিমবানচলোত্তমঃ .. ৫১..
ত্বং হি দ্রষ্টা চ শ্রোতা চ কৃচ্ছ্রেষ্বর্থকৃতেষ্বিহ .
শ্রুত্বা মম মহারাজ ন সন্তপ্তুমিহার্হসি .. ৫২..

.. ইতি ঋষভগীতা সমাপ্তা ..

<