.. শ্রী ঋভুগীতা ..
প্রথমোঽধ্যাযঃ |
শ্রী গুরুমূর্তিঃ |
পুনর্জ্ঞানং প্রবক্ষ্যামি যথাবত্পদ্মসম্ভব |
যেনৈব সর্বে মুচ্যন্তে জনাস্সংসারবন্ধনাত্ || ১. ০১||
বিধে পুরা নিদাঘাখ্যো মুনিঃ পপ্রচ্ছ সদ্গুরুম্ |
ঋভুসংজ্ঞং মহাপ্রাজ্ঞং তদ্বদামি তবাধুনা || ১. ০২||
নিদাঘঃ |
আত্মানাত্মবিবেকং মে কৃপযা ব্রূহি সদ্গুরো |
যেন সংসারপাদোধিং তরিষ্যামি সুখেন বৈ || ১. ০৩||
ঋভুরেবং তদা পৃষ্ট উবাচ সকলার্থবিত্ |
সর্ববেদান্তসারজ্ঞস্সর্বপূজ্যো মহত্তমঃ || ১. ০৪||
ঋভুঃ |
সর্ববাচোঽবধির্ব্রহ্ম সর্বচিন্তাঽবধির্গুরুঃ |
সর্বকারণকার্যাত্মা কার্যকারণবর্জিতঃ || ১. ০৫||
সর্বসংকল্পরহিতস্সর্বনাদমযশ্শিবঃ |
সর্ববর্জিতচিন্মাত্রস্সর্বানন্দমযঃ পরঃ || ১. ০৬||
সর্বতেজঃ প্রকাশাত্মা নাদানন্দমযাত্মকঃ |
সর্বানুভবনির্মুক্তঃ সর্বধ্যানবিবর্জিতঃ || ১. ০৭||
সর্বনাদকলাতীত এষ আত্মাঽহমব্যযঃ |
আত্মানাত্মবিবেকাদি ভেদাভেদবিবর্জিতঃ || ১. ০৮||
শান্তাশান্তাদিহীনাত্মা নাদান্তর্জ্যোতিরাত্মকঃ |
মহাবাক্যার্থতো দূরো ব্রহ্মাস্মীত্যতি দূরগঃ || ১. ০৯||
তচ্ছব্দবর্জ্যস্ত্বংশব্দহীনো বাক্যার্থবর্জিতঃ |
ক্ষরাক্ষরবিহীনো যো নাদান্তর্জ্যোতিরেব সঃ || ১. ১০||
অখণ্ডৈকরসো বাঽহমানন্দোস্মীতি বর্জিতঃ |
সর্বাতীতস্বভাবাত্মা নাদান্তর্জ্যোতিরেব সঃ || ১. ১১||
আত্মেতি শব্দহীনো য আত্মশব্দার্থবর্জিতঃ |
সচ্চিদানন্দহীনো য এষৈবাত্মা সনাতনঃ || ১. ১২||
ননির্দেষ্টুং চ শক্নো যো বেদবাক্যৈরগম্যকঃ |
যস্য কিন্চিদ্বহির্নাস্তি কিন্চিদন্তঃ কিযন্নচ || ১. ১৩||
যস্য লিগং প্রপংচং বা ব্রহ্মৈবাত্মা ন সংশযঃ |
নাস্তি যস্য শরীরং বা জীবো বা ভূতভৌতিকঃ || ১. ১৪||
নামরূপাঽদিকং নাস্তি ভোজ্যং বা ভোগভুক্চ বা |
স্দ্বাঽসদ্বা স্থিতির্বাঽপি যস্য নাস্তি ক্ষরাক্ষরম্ || ১. ১৫||
গুণং বা বিগুণং বাঽপি সম আসীন্ ন সংশযঃ |
যস্য বাচ্যং বাচকং বা শ্রবণং মননং চ বা || ১. ১৬||
গুরুশিষ্যাঽদি ভেদং বা দেবলোকাস্সুরাসুরাঃ |
যত্র ধর্মমধর্মং বা শুদ্ধং বাঽশুদ্ধমণ্বপি || ১. ১৭||
যত্র কালমকালং বা নিশ্চযং সংশযং নহি |
যত্র মন্ত্রমমন্ত্রং বা বিদ্যাঽবিদ্যে ন বিদ্যতে || ১. ১৮||
দ্রষ্টৃদর্শনদৃশ্যং বা ঈষণ্মাত্রং কলাদিকম্ |
অনাত্মেতি প্রসংগো বা হ্যনাত্মেতি মনোপি বা || ১. ১৯||
অনাত্মেতি জগদ্বাঽপি নাস্তি নাস্তীতি নিশ্চিনু |
সর্বসংকল্পশূন্যত্বাত্ সর্বকার্যবিবর্জনাত্ || ১. ২০||
কেবলং ব্রহ্মমাত্রত্বাত্ নাস্ত্যনাত্মেতি নিশ্চিনু |
দেহত্রযবিহীনত্বাত্ কালত্রযবিবর্জনাত্ || ১. ২১||
লোকত্রযবিহীনত্বাত্ সর্বমাত্মেতি শাসনাত্ |
চিত্তাভাবান্নচিন্তাস্তি দেহাভাবাজ্জরা ন চ || ১. ২২||
পাদাভাবাদ্গতির্নাস্তি হস্তাভাবাত্ ক্রিযা ন চ |
মৃত্যুর্নাস্তি জরাঽভাবাত্ বুদ্ধ্যভাবাত্ সুখাদিকম্ || ১. ২৩||
ধর্মো নাস্তি শুচির্নাস্তি সত্যং নাস্তি ভযং ন চ |
অক্ষরোচ্চারণম্ নাস্তি গুরুশিষ্যাদি নাস্ত্যপি || ১. ২৪||
একাভাবে দ্বিতীযং ন ন দ্বিতীযে নচৈকতা |
সত্যত্বমস্তিচেত্ কিংচিদসত্যং ন চ সংভবেত্ || ১. ২৫||
অসত্যত্বং যদি ভবেত্ সত্যত্বং ন বদিষ্যতি |
শুভং যদ্যশুভং বিদ্ধি অশুভাচ্চুভমিষ্যতে || ১. ২৬||
ভযং যদ্যভযং বিদ্ধি অভযাদ্ভযমাপতেত্ |
বন্ধত্বমপিচেন্মোক্ষো বন্ধাভাবে ন মোক্ষতা || ১. ২৭||
মরণম্ যদি চেজ্জন্ম জন্মাভাবে মৃতির্নচ |
ত্বমিত্যপি ভবেচ্চাহং ত্বং নো চেদহমেব ন || ১. ২৮||
ইদং যদি তদেবাস্তি তদভাবাদিদং ন চ |
অস্তীতি চেন্নাস্তি তদা নাস্তিচেদস্তি কিন্চন || ১. ২৯||
কার্যং চেত্কারণম্ কিংচিত্ কার্যাভাবে ন কারণম্ |
দ্বৈতং যদি তদাঽদ্বৈতং দ্বৈতাভাবেঽদ্বযং ন চ || ১. ৩০||
দৃশ্যং যদি দৃগপ্যস্তি দৃশ্যাভাবে দৃগেব ন |
অন্তর্যদি বহিস্সত্যমন্তাভাবে বহির্নচ || ১. ৩১||
পূর্ণত্বমস্তি চেদ্কিংচিদপূর্ণত্বং প্রসজ্যতে |
তস্মাদেতদ্ক্বচিন্নাস্তি ত্বং চাহং বা ইমে ইদম্ || ১. ৩২||
নাস্তি দৃষ্টান্তকস্সত্যে নাস্তিদার্ষ্টান্তিকং হ্যজে |
পরং ব্রহ্মাহমস্মীতি স্মরণস্য মনো নহি || ১. ৩৩||
ব্রহ্মমাত্রং জগদিদং ব্রহ্মমাত্রং ত্বমপ্যহম্ |
চিন্মাত্রং কেবলং চাহং নাস্ত্যনাত্মেতি নিশ্চিনু || ১. ৩৪||
ইদং প্রপংচং নাস্ত্যেব নোত্পন্নং নোস্থিতং ক্বচিত্ |
চিত্তং প্রপংচমিত্যাহুর্নাস্তি নাস্ত্যেব সর্বদা || ১. ৩৫||
ন প্রপংচং ন চিত্তদি নাহংকারো ন জীবকঃ |
মাযাকার্যাদিকং নাস্তি মাযা নাস্তি ভযং ন চ || ১. ৩৬||
কর্তা নাস্তি ক্রিযা নাস্তি শ্রবণং মননং ন হি |
সমাধি দ্বিতযং নাস্তি মাতৃমানাদি নাস্তি হি || ১. ৩৭||
অজ্ঞানং চাপি নাস্ত্যেব হ্যবিবেকঃ কদা চ ন |
অনুবন্ধচতুষ্কং ন সংবন্ধত্রযমেব ন || ১. ৩৮||
ন গংগা ন গযা সেতুর্ন ভূতং নান্যদস্তি হি |
ন ভূমির্ন জলং নাগ্নির্ন বাযুর্ন চ খং ক্বচিত্ || ১. ৩৯||
ন দেবো ন চ দিক্পালা ন বেদা ন গুরুঃ ক্বচিত্ |
ন দূরং নাতিকং নান্তং ন মধ্যং ন ক্বচিত্ স্থিতম্ || ১. ৪০||
নাদ্বৈতদ্বৈতসত্যং বা হ্যসত্যং বা ইদং চ ন |
বন্ধমোক্ষাদিকং নাস্তি সদ্বাঽসদ্বা সুখাদি বা || ১. ৪১||
জাতির্নাস্তি গতির্নাস্তি বর্ণো নাস্তি ন লৌকিকম্ |
সর্বং ব্রহ্মেতি নাস্ত্যেব ব্রহ্ম ইত্যেব নাস্তি হি || ১. ৪২||
চিদিত্যেবেতি নাস্ত্যেব চিদহং ভাষণং নহি |
অহং ব্রহ্মাস্মি নাস্ত্যেব নিত্যশুদ্ধোস্মি ন ক্বচিত্ || ১. ৪৩||
বাচা যদুচ্যতে কিংচিন্ মনসা মনুতে ক্বচিত্ |
বুদ্ধ্যা নিশ্চিনুতে নাস্তি চিত্তেন জ্ঞাযতে নহি || ১. ৪৪||
যোগিযোগাদিকং নাস্তি সদা সর্বং সদা ন চ |
অহোরাত্রাদিকং নাস্তি স্নানধ্যানাদিকং নহি || ১. ৪৫||
ভ্রান্ত্যভ্রান্ত্যাদিকং নাস্তি নাস্ত্যনাত্মেতি নিশ্চিনু |
বেদশ্শাস্ত্রং পুরাণং চ কার্যং কারণমীশ্বরঃ || ১. ৪৬||
লোকো ভূতং জনস্ত্বৈক্যং সর্বং মিথ্যা ন সংশযঃ |
বাচা বদতি যত্কিংচিত্সংকল্পৈঃ কল্প্যতে চ যত্ || ১. ৪৭||
মনসা চিন্ত্যতে যদ্যত্ সর্বং মিথ্যা ন সংশযঃ |
বুদ্ধ্যা নিশ্চীযতে কিংচিচ্চিত্তে নিশ্চীযতে ক্বচিত্ || ১. ৪৮||
শাস্ত্রৈঃ প্রপংচ্যতে যদ্যত্ নেত্রেণৈব নিরীক্ষ্যতে |
শ্রোত্রাভ্যাং শ্রূযতে যদ্যদন্যত্সদ্ভাবমেব চ || ১. ৪৯||
ত্বমহং তদিদং সোঽহমন্যত্ সদ্ভাবমেব চ |
নেত্রং শ্রোত্রং গাত্রমেব মিথ্যেতি চ সুনিশ্চিতম্ || ১. ৫০||
ইদং মিধ্যৈবনির্দিষ্টমযমিত্যেব কল্প্যতে |
যদ্যত্সংভাব্যতে লোকে সর্বং সংকল্পসংভ্রমঃ || ১. ৫১||
সর্বাধ্যাসং সর্বগোপ্যং সর্বভোগপ্রভেদকম্ |
সর্বদোষপ্রভেদং চ নাস্ত্যনাত্মেতি নিশ্চিনু || ১. ৫২||
মদীযং চ ত্বদীযং চ মমেতি চ তবেতি চ |
মহ্যং তুভ্যং মযেত্যাদি তত্সর্বং বিতথং ভবেত্ || ১. ৫৩||
রক্ষকো বিষ্ণুরিত্যাদি ব্রহ্মা সৃষ্টেস্তু কারণম্ |
সংহারে রুদ্র ইত্যেবং সর্বং মিথ্যেতি নিশ্চিনু || ১. ৫৪||
স্নানং জপস্তপো হোমস্স্বাধ্যাযো দেবপূজনম্ |
মন্ত্রং তন্ত্রং চ সত্সঙ্গো গুণদোষবিজৃভণম্ || ১. ৫৫||
অন্তঃকরণ সদ্ভাবোঽবিদ্যাযাশ্চ সংভবঃ |
অনেককোটিব্রহ্মাণ্ডং সর্বং মিথ্যেতি নিশ্চিনু || ১. ৫৬||
সর্বদেশিকবাক্যোক্তির্যেনকেনাপি নিশ্চিতা |
দৃশ্যতে জগতি যদ্যত্ যদ্যজ্জগতি বীক্ষ্যতে || ১. ৫৭||
বর্ততে জগতি যদ্যত্ সর্বং মিথ্যেতি নিশ্চিনু |
যেনেকেনাক্ষরেণোক্তং যেনেকেন বিবর্ণিতম্ || ১. ৫৮||
যেনেকেনাপি গদিতং যেনেকেনাপি মোদিতম্ |
যেনেকেনাপি যদ্দত্তং যেনকেনাপি যত্কৃতম্ || ১. ৫৯||
যত্রযত্র শুভং কর্ম যত্রযত্র চ দুষ্কৃতম্ |
যদ্যত্করোতি সত্যেন সর্বং মিথ্যেতি নিশ্চিনু || ১. ৬০||
ইদং প্রপংচং যত্কিংচিত্ যদ্যজ্জগতি বিদ্যতে |
দৃশ্যরূপং চ দৃগ্রূপং সর্বং শশবিষাণবত্ || ১. ৬১||
শ্রী গুরুমূর্তিঃ |
এবং শ্রুত্বা নিদাঘস্স ব্রহ্মন্ সংশযবেষ্টিতঃ |
ঋভুং পপ্রচ্ছ পুনরপ্যাত্মবিজ্ঞানসিদ্ধযে || ১. ৬২||
নিদাঘঃ |
স্বামিন্ মুমুক্ষোস্সংসারান্ মমারূপেণ বস্তুনা |
প্রপংচিতেন ন ফলং ভবেদিতি মে মতিঃ || ১. ৬৩||
যতস্ত্বদ্কথিতং ব্রহ্ম তত্ত্বমস্যাদ্যগোচরম্ |
অখণ্ডৈকরসাতীতং মোক্ষাতীতং চ সদ্গুরো || ১. ৬৪||
জ্ঞেযত্বাদিবিহীনং তত্ কথং জ্ঞাস্যাম্যহং নু বা |
তজ্জ্ঞানেন ফলং কিং বা মোক্ষস্যৈব ফলত্বতঃ || ১. ৬৫||
ফলমাস্তিক্যবুদ্ধ্যা স্যান্ ন চৈবংভূতবস্তুনঃ |
ত্বদুক্ত নিশ্চযে সর্বসাংকর্যং চ প্রসজ্যতে || ১. ৬৬||
যদ্যুক্ত ব্যতিরিক্তানাং সর্বেষাং স্যাদনাত্মতা |
হেযত্বান্নৈব জিজ্ঞাস্যং কিংচিদপ্যত্র সিদ্ধ্যতি || ১. ৬৭||
শশশৃংগ সমানত্বং যথাপ্রোক্তমনাত্মনাম্ |
অত্যন্তারূপবত্ত্বেন তথা তত্সিদ্ধিরাত্মনঃ || ১. ৬৮||
অথবা তত্ তথৈবাস্তাম্ অন্যথাবাপি মে গুরো |
যজ্জ্ঞানেন ভবান্মুক্তির্ভবেত্ তদ্ ব্রূহি বেদিতুম্ || ১. ৬৯||
এবম্ উক্তো নিদাঘেন কুশাগ্রমতিনা পরম্ |
ঋভুস্সন্তুষ্টহৃদযঃ পুনরেবাব্রবীদিদম্ || ১. ৭০||
ঋভুঃ |
নিদাঘ সত্যমেবৈতত্ত্বদুক্তং যুক্তিগর্ভিতম্ |
তথাপি যুক্তং মদ্বাক্যং ত্রৈবিদ্ধ্যাজ্জ্ঞেযবস্তুনঃ || ১. ৭১||
সগুণং নির্গুণং তাভ্যাম্ অন্যন্নিষ্প্রতিযোগিকম্ |
ব্রহ্মৈবং ত্রিবিধং লিন্গৈর্বেদান্তেষু হি বিশ্রুতম্ || ১. ৭২||
তত্রাদ্যং হেযগুণকং সোপাধিত্বান্মুমুক্ষুভিঃ |
তত্ত্বমস্যাদিবাচ্যত্বাজ্জ্ঞেযং হেযতযাগ্রতঃ || ১. ৭৩||
জীবেশ্বরবিভাগেন সগুণং দ্বিবিধং ভবেত্ |
জীবশ্চ ত্রিবিধস্তদ্বদ্ ঈশশ্চাস্তাম্ ইদং তথা || ১. ৭৪||
উপাদেযং দ্বিতীযং স্যান্নির্গুণং মোক্ষকাংক্ষিভিঃ |
তত্ত্বমস্যাদিলক্ষ্যত্বাজ্জ্ঞেযং চাত্মতযা ততঃ || ১. ৭৫||
হেযোপাদেযশূন্যং তত্তৃতীযং প্রকৃতং যতঃ |
মুক্তৈঃ প্রাপ্যম্ অতশ্শব্দমপি জ্ঞেযং মুমুক্ষুভিঃ || ১. ৭৬||
ইদন্ত্বেনাপ্যহন্ত্বেন স্বত্বেনাপি নবেদ্যতা |
তথাপ্যস্যাস্তি বেদ্যত্বং শ্রুত্যুক্তত্বান্ন নাস্তিতা || ১. ৭৭||
মুক্তস্য স্বগতো ভেদো যদনাপ্তৌ ন নশ্যতি |
তজ্জ্ঞানে ফলমেতত্স্যাত্ সর্বভেদনিবর্হণম্ || ১. ৭৮||
অতোঽস্যালক্ষণত্বেন সদসদ্পরতাস্ত্যপি |
শশশৃংগসমানত্বং নিদাঘাশক্যমীরিতুম্ || ১. ৭৯||
বিশেষসত্তাঽভাবেপি সত্তাসামান্যতা যতঃ |
নির্দ্বন্দ্বত্বেন সংসিদ্ধা ততস্সত্ত্বাদিকং ভবেত্ || ১. ৮০||
অথবা শশশৃংগাদি সাদৃশ্যং ভবতু স্বতঃ |
সিদ্ধান্ততা শ্রুতিপ্রোক্তা নৈরাশ্যস্য হি সুব্রত || ১. ৮১||
ন তাবতা বিরোধোস্তি কশ্চিদপ্যধুনা তব |
সংসারমোক্ষসিদ্ধ্যর্থম্ অস্যানুক্ততযা মযা || ১. ৮২||
|| ইতি শ্রী গুরুজ্ঞানবাসিষ্ঠে তত্ত্বনারাযণে
জ্ঞানকাণ্ডস্য প্রথমপাদে তৃতীযোঽধ্যাযঃ এবং
শ্রী ঋভুগীতা প্রথমোঽধ্যাযঃ সমাপ্তঃ ||
——————————————————————————–
দ্বিতীযোঽধ্যাযঃ |
অথাতস্সংপ্রবক্ষ্যামি নিদাঘ শৃণু সাদরম্ |
সংসারমোক্ষসিদ্ধ্যর্থং সরূপং ব্রহ্ম নির্গুণম্ || ২. ০১ ||
তত্ত্বমস্যাদিবাক্যৈর্যল্লক্ষ্যং জীবাদিকারণম্ |
নিত্যশুদ্ধবিবুদ্ধং চ নিত্যমুক্তং চ শাশ্বতম্ || ২. ০২ ||
যত্সর্ববেদসিদ্ধান্তং যজ্জ্ঞানেনৈব মুক্ততা |
জীবস্য যচ্চ সংপূর্ণং তত্ত্বমেবাসি নির্মলম্ || ২. ০৩ ||
ত্বমেব পরমাত্মাসি ত্বমেব পরমোগুরুঃ |
ত্বমেবাকাশরূপোসি সাক্ষিহীনোসি সর্বদা || ২. ০৪ ||
ত্বমেব সর্বভাবোসি ত্বং ব্রহ্মাসি নসংশযঃ |
কালহীনোসি কালোসি সদা ব্রহ্মাসি চিদ্ঘনঃ || ২. ০৫ ||
সর্বতস্সর্বরূপোসি চৈতন্যঘনবানসি |
সর্বভূতান্তরস্থোসি কর্মাধ্যক্ষোসি নির্গুণঃ || ২. ০৬ ||
সত্যোসি সিদ্ধোসি সনাতনোসি মুক্তোসি মোক্ষোসি মুদাঽমৃতোসি |
দেবোসি শান্তোসি নিরামযোসি ব্রহ্মাসি পূর্ণোসি পরাত্পরোসি || ২. ০৭ ||
সমোসি সচ্চসি চিরন্তনোসি সত্যাদিবক্যৈঃ প্রতিবোধিতোসি |
সর্বাঙ্গহীনোসি সদাস্থিতোসি ব্রহ্মেন্দ্ররুদ্রাদিবিভাবিতোসি || ২. ০৮ ||
সর্বপ্রপংচভ্রমবর্জিতোসি সর্বেষু ভূতেষু চ ভাবিতোসি |
সর্বত্র সঙ্কল্পবিবর্জিতোসি সর্বাগমান্তার্থবিভাবিতোসি || ২. ০৯ ||
সর্বত্র সন্তোষসুখাসনোসি সর্বত্র গত্যাদিবিবর্জিতোসি |
সর্বত্র লক্ষ্যাদি বিবর্জিতোসি ধ্যাতোসি বিষ্ণ্বাদিসুরৈরজস্রম্ || ২. ১০ ||
চিদাকার স্বরূপোসি চিন্মাত্রোসি নিরঙ্কুশঃ |
আত্মন্যেব স্থিতোসি ত্বং সর্বশূন্যোসি নিশ্চলঃ || ২. ১১ ||
আনন্দোসি পরোসি ত্বমেকমেবাদ্বিতীযকঃ |
চিদ্ঘনানন্দরূপোসি পরিপূর্ণস্বরূপকঃ || ২. ১২ ||
সদসি ত্বমভিজ্ঞোসি সোসি জানাসি বীক্ষ্যসি |
সচ্চিদানন্দরূপোসি বাসুদেবোসি বৈ প্রভুঃ || ২. ১৩ ||
অমৃতোসি বিভুশ্চসি চঞ্চলোস্যচলোহ্যসি |
সর্বোসি সর্বহীনোসি শান্তাশান্তবিবর্জিতঃ || ২. ১৪ ||
সত্তামাত্রপ্রকাশোসি সত্তাসামান্যকোহ্যসি |
নিত্যসিদ্ধস্বরূপোসি সর্বসিদ্ধিবিবর্জিতঃ || ২. ১৫ ||
ঈষণ্মাত্রবিশূন্যোসি হ্যণুমাত্রবিবর্জিতঃ |
অস্তিত্ববর্জিতোসি ত্বং নাস্তিত্বাদিবিবর্জিতঃ || ২. ১৬ ||
লক্ষ্যলক্ষণহীনোসি নির্বিকারো নিরামযঃ |
সর্বনাদান্তরোসি ত্বং কলাকাষ্ঠাদিবর্জিতঃ || ২. ১৭ ||
ব্রহ্মবিষ্ণ্বীশহীনোসি স্বস্বরূপং প্রপশ্যসি |
স্বস্বরূপাবশেষোসি স্বানন্দাব্ধৌ নিমজ্জসি || ২. ১৮ ||
স্বাত্মরাজ্যে স্বমেবাসি স্বযংভাববিবর্জিতঃ |
শিষ্টপূর্ণস্বরূপোসি স্বস্মাত্কিঞ্চিন্নপশ্যসি || ২. ১৯ ||
স্বস্বরূপান্নচলসি স্বস্বরূপেণ জৃংভসি |
স্বস্বরূপাদনন্যোসি হ্যহমেবাসি নিশ্চিনু || ২. ২০ ||
ইদং প্রপঞ্চং যত্কিঞ্চিদ্যদ্যজ্জগতি বিদ্যতে |
দৃশ্যরূপং চ দৃগ্রূপং সর্বং শশবিষাণবত্ || ২. ২১ ||
লক্ষ্যলক্ষণহীনত্বাদ্যুক্ত্যানিষ্প্রতিযোগিকম্ |
ন মন্তব্যং যথাযোগ্যং লৌকিকৈস্ত্বং বিনিশ্চিনু || ২. ২২ ||
নির্গুণং নির্মলং শান্তং ব্রহ্মসপ্রতিযোগিকম্ |
শুদ্ধান্তঃকরণজ্ঞেযং বেদোক্তং প্রকৃতং খলু || ২. ২৩ ||
আত্মস্ত্বং সচ্চিদানন্দলক্ষ্ণৈর্লক্ষ্যমদ্বযম্ |
ব্রহ্মৈবাস্মি ন দেহোঽযমিতি চিত্তেঽবধারয || ২. ২৪ ||
দেহোঽহমিতি সঙ্কল্পস্তদন্তঃকরণং স্মৃতম্ |
দেহোঽহমিতি সঙ্কল্পো মহান্ সংসার উচ্যতে || ২. ২৫ ||
দেহোঽহমিতি সঙ্কল্পস্তদ্বন্ধ ইতি চোচ্যতে |
দেহোঽহমিতি সঙ্কল্পস্তদ্দুঃখমিতি চোচয্তে || ২. ২৬ ||
দেহোঽহমিতি যজ্জ্ঞানং তদেব নরকং স্মৃতম্ |
দেহোঽহমিতি সঙ্কল্পো জগত্সর্বং সমীর্যতে || ২. ২৭ ||
দেহোঽহমিতি সঙ্কল্পো হৃদযগ্রন্ধিরীরিতঃ |
দেহোঽহমিতি যজ্জ্ঞানং তদসজ্জ্ঞানমেবচ || ২. ২৮ ||
দেহোঽহমিতি যদ্বুদ্ধিঃ সাচবিদ্যেতি ভণ্যতে |
দেহোঽহমিতি যজ্জ্ঞানং তদেব দ্বৈতমুচ্যতে || ২. ২৯ ||
দেহোঽহমিতি সঙ্কল্পস্সত্যজীবস্স এব চ |
দেহোঽহমিতি যজ্জ্ঞানং পরিচ্ছিন্নমিতীরিতম্ || ২. ৩০ ||
দেহোঽহমিতি সঙ্কল্পো মহাপাপমিতি স্ফুটম্ |
দেহোঽহমিতি যা বুদ্ধিস্তৃষ্ণাদোষাঽঽমযঃ কিল || ২. ৩১ ||
যত্কিঞ্চিদপি সঙ্কল্পস্তাপত্রযমিতীরিতম্ |
তচ্চ সর্বং মনুষ্যাণাং মানসং হি নিগদ্যতে || ২. ৩২ ||
কামং ক্রোধং বন্ধনং সর্বদুঃখং বিশ্বং দোষং কালনানাস্বরূপম্ |
যত্কিঞ্চেদং সর্বসঙ্কল্পজাতং তত্কিঞ্চেদং মানসং সোম্য বিদ্ধি || ২. ৩৩ ||
মন এব জগত্সর্বং মন এব মহারিপুঃ |
মন এব হি সংসারো মন এব জগত্ত্রযম্ || ২. ৩৪ ||
মন এব মহদ্দুঃখং মন এব জরাদিকম্ |
মন এব হি কালশ্চ মন এব মলং তথা || ২. ৩৫ ||
মন এব হি সঙ্কল্পো মন এব চ জীবকঃ |
মন এব হি চিত্তং চ মনোঽহঙ্কার এব চ || ২. ৩৬ ||
মন এব মহান্ বন্ধো মনোঽন্তঃকরণং চ তত্ |
মন এব হি ভূমিশ্চ মন এব হি তজ্জলম্ || ২. ৩৭ ||
মন এব হি তেজশ্চ মন এব মরুন্মহান্ |
মন এব হি চকাশো মন এব হি শব্দকঃ || ২. ৩৮ ||
স্পর্শরূপরসা গন্ধঃ কোশাঃ পঞ্চ মনোভবাঃ |
জাগ্রত্স্বপ্নসুষুপ্ত্যাদি মনোমযমিতীরিতম্ || ২. ৩৯ ||
দিক্পালা বসবো রুদ্রা আদিত্যাশ্চ মনোমযাঃ |
দৃশ্যং বন্ধং দ্বন্দ্বজাতমজ্ঞানং মানসং স্মৃতম্ || ২. ৪০ ||
সঙ্কল্পমেব যত্কিঞ্চিত্তত্তন্নাস্তীতি নিশ্চিনু |
নাস্তি নাস্তি জগত্সর্বং গুরুশিষ্যাদিকং নিহি || ২. ৪১ ||
ব্যবহারদশাযাং হি গুরুশিষ্যাদিকং ভবেত্ |
পরমার্থদশাযাং তত্ কথং মুক্তৌ প্রসিদ্ধ্যতি || ২. ৪২ ||
মুক্ত্যতীত দশাযাং চ প্রোচ্যতে পরমার্থতা |
তথাপ্যসত্যহংতৃত্বান্মুক্তেরেবাস্তি মুখ্যযাঃ || ২. ৪৩ ||
মনসা কল্পিতং সর্বং মনসা পরিপালিতম্ |
মনসা সংস্মৃতং তস্মান্মন এবাস্তি কারণম্ || ২. ৪৪ ||
মনসা সংস্মৃতং সর্বং মনসৈব চ বিস্মৃতম্ |
মনসা ভাবিতং সর্বং মনসৈব হ্যভাবিতং || ২. ৪৫ ||
মনসা দূষিতং সর্বং মনসৈব চ ভূষিতম্ |
মনসা সুখবৃত্তিস্স্যান্মনসা দুঃখসঞ্চযঃ || ২. ৪৬ ||
তস্মাত্সর্বনিদানং তন্মনস্সূক্ষ্মং পরাত্মনি |
ত্বযি সচ্চিত্সুখাংবোধৌ কল্পিতং বিদ্ধি মাযযা || ২. ৪৭ ||
ত্বদন্যস্য চ সর্বস্য কল্পিতত্বাদবোধতঃ |
ত্বমেব সর্বসাক্ষী সন্ স্বযং ভাসি নিরন্তরম্ || ২. ৪৮ ||
তব বোধস্বরূপত্বাত্ ত্বয্যবোধস্য কা গতিঃ |
মন্দবুদ্ধ্যা গতৌ সত্যামপি নাশস্স্বযং ভবেত্ || ২. ৪৯ ||
নিত্যবোধস্বরূপস্ত্বং হ্যবোধপ্রতিযোগিকঃ |
ত্বযি তত্সন্নিবর্তেত তমস্সূর্যোদযে যথা || ২. ৫০ ||
জ্ঞাতৃজ্ঞানেপ্রকল্প্যেতে যত্র জ্ঞেযেঽদ্বযে ত্বযি |
তস্যাখণ্ডস্বরূপত্বাত্ সর্বাধিষ্ঠানতোচিতা || ২. ৫১ ||
মুমুক্ষুভিশ্চ বিজ্ঞেযাস্স্বধর্মাস্সচ্চিদাদযঃ |
সন্মযশ্চিন্মযশ্চত্মা তথানন্দমযো যতঃ || ২. ৫২ ||
চিদ্রূপস্য তবাত্মত্বাদনাত্মানস্ত্বচিন্মযাঃ |
অনাত্মনাং বিকারিত্বান্নির্বিকারস্ত্বমিষ্যসে || ২. ৫৩ ||
বিকারস্য সমস্তস্যাপ্যবিদ্যাকল্পিতত্বতঃ |
বিলযে নির্বিকারস্ত্বং বিদ্যাবানবশিষ্যসে || ২. ৫৪ ||
বৃহদ্ ব্রহ্মাবশেষো হি নাশঃ কল্পিতবস্তুনঃ |
যচ্ছেষাস্স্যুরিমে সর্বে স শেষী নিত্যতাং ব্রজেত্ || ২. ৫৫ ||
শেষস্য শেষ্যনন্যত্বং বাস্তবং সর্বসম্মতম্ |
শেষিণস্তু তবান্যত্বান্ন শেষস্যাস্তি নিত্যতা || ২. ৫৬ ||
শেষিণশ্শেষসাপেক্ষ্যান্ন স্বাতন্ত্র্যেণ শেষিতা |
ইতি বক্তুং ন শক্যং হি স্বমহিম্নি স্থিতত্বতঃ || ২. ৫৭ ||
স্বস্যৈষ মহিমা সর্বব্যাপকত্বাদিলক্ষণঃ |
সর্বশৃত্যাদি সংসিদ্ধঃ কাভীর্হীযেত যুক্তিভিঃ || ২. ৫৮ ||
ব্যাপ্যসাপেক্ষতা তস্য ব্যাপকস্যেতিচেচ্ছৃণু |
ব্যাপ্যানপেক্ষং সিদ্ধির্হি ব্যাপকস্য নিজাশ্রযাত্ || ২. ৫৯ ||
ব্যাপ্যস্যৈব হি জীবস্য বিকারাপেক্ষযা তথা |
ব্যাপকাপেক্ষযা চ স্যাত্ স্থিতির্ন ব্যাপকস্যতু || ২. ৬০ ||
বিকারালংবনাভাবাত্স্বালংবনতযাপি চ |
সর্বালংবনতা সিদ্ধা ন স্বহানেশ্চ সঙ্গতিঃ || ২. ৬১ ||
সর্বাধারস্য নাধারোঽপেক্ষ্যতেপি ক্বচিদ্বিভোঃ |
স চেদাধারসাপেক্ষো ন সর্বাধারতাং ব্রজেত্ || ২. ৬২ ||
সর্বাধারস্য চ ব্যোম্নো যথাত্মাধার ইষ্যতে |
তথাত্মনোপি কশ্চিত্স্যাদিতি চেদ্বাঢমুচ্যতে || ২. ৬৩ ||
আত্মৈবাত্মন আধার আত্মন্যেবাত্মনস্স্থিতেঃ |
অনাত্মনো যথাঽনাত্মা কশ্চিদেবাস্তি চশ্রযঃ || ২. ৬৪ ||
আত্মনোঽপি তু নানাত্বে স্যাদনাত্মাবিশেষতা |
ইতি চেন্নৈষ ভেদো হি বিকারাবাশ্রযো ভবেত্ || ২. ৬৫ ||
যথা ভবতি দেহস্য প্রাণ এবাশ্রযঃ পুনঃ |
প্রাণস্য চশ্রযো দেহস্তথাত্মাঽনাত্মনোরপি || ২. ৬৬ ||
অন্যোন্যাশ্রযতা প্রাপ্তা তথা নাশো দ্বযোরপি |
ইতি চেদুক্তমেবৈতদাত্মা হি স্বাশ্রযো মতঃ || ২. ৬৭ ||
আশ্রযাশ্রযি বার্তা চ ব্যবহারে নিগদ্যতে |
পরমার্থদশাযাং তু স্বস্মাদন্যন্নবিদ্যতে || ২. ৬৮ ||
আত্মনস্স্বগতো ভেদো যোস্মিন্নভ্যুপগম্যতে |
স কিং নিত্যোস্ত্যনিত্যোবেত্যেবং প্রশ্নে তু কথ্যতে || ২. ৬৯ ||
লব্ধাত্মসম্যগ্বোধস্য তব যাবদিহস্থিতিঃ |
তাবত্তস্যাবিনাশিত্বান্নিত্য এবেতি নির্ণযঃ || ২. ৭০ ||
পশ্চদনিত্যতাযাশ্চ তব প্রষ্টুরভাবতঃ |
স্বভেদানিত্যবার্তাযা নাবকাশোঽত্র বিদ্যতে || ২. ৭১ ||
আত্মা স কিং ভবেদ্দ্রষ্টা দৃশ্যো বা কিন্নু দর্শনম্ |
দ্রষ্টৃত্বে সতি জীবত্বাত্সংসারিত্বং প্রসজ্যতে || ২. ৭২ ||
দৃশ্যত্বে তু ঘটাদীনামিবস্যাদ্বিষযাত্মতা |
দর্শনত্বে তু বৃত্তিত্বাজ্জাড্যমেব প্রসজ্যতে || ২. ৭৩ ||
অসংসারী পরাত্মাঽসৌ স্বযং নির্বিষযস্তথা |
চৈতন্যরূপ ইত্যেতদ্ব্যর্থমেবেতি চেচ্ছৃণু || ২. ৭৪ ||
দ্রষ্টৃত্বং তস্য বিদ্ধ্যেবং জীবেশাদীক্ষিতৃত্বতঃ |
দৃশ্যত্বং চ তথা বিদ্ধি মুক্তৈর্দ্রষ্টৃত্বতস্স্বতঃ || ২. ৭৫ ||
দর্শনত্বং চ সাক্ষিত্বাদ্দৃগ্রূপত্বাচ্চ তস্য বৈ |
সংসারিত্বাদযো দোষাঃ প্রসজ্যন্তে ন তত্র বৈ || ২. ৭৬ ||
অসংসারিণমাত্মানং সংসার্যাত্মা যদি স্বযং |
পশ্যেত্তদাক্ষিরোগী সংপ্রপশ্যেচ্চ নিরঙ্কুশম্ || ২. ৭৭ ||
অসম্ভবানি সর্বাণি সংভবেযুশ্চ বৈদিকাঃ |
সিদ্ধান্তানিযমাপেতাস্স্বেচ্ছাব্যাহার সংভবাত্ || ২. ৭৮ ||
ইতি চেন্নৈব দোষোঽস্তি সংসারস্যাপবাদতঃ |
বিশুদ্ধসত্বসংপন্নস্সংসারী নির্মলো হি সঃ || ২. ৭৯ ||
যদি জীবস্য সংসারস্স্বতস্সিদ্ধস্তথাঽখিলাঃ |
উক্ত দোষাঃ প্রসজ্যেরন্নজ্ঞানাদ্ধ্যাগতো ন তে || ২. ৮০ ||
জীবস্য যদি সংসারো ব্রহ্মণস্তদভাবতঃ |
ব্রহ্মাত্মত্বোপদেশোঽযমযুক্ত ইতি চেচ্ছৃণু || ২. ৮১ ||
উক্তজীবৈকদেশস্য হ্যসংসারিত্বমন্বহম্ |
ততস্তত্ত্বোপদেশেস্মিন্ নিদাঘাস্ত্যনবদ্যতা || ২. ৮২ ||
তস্মাত্সর্বগতং সত্যসুখবোধৈকলক্ষণম্ |
ব্রহ্মাস্মীতি বিজানীহি কেবলং ত্বমসংশযম্ || ২. ৮৩ ||
মুক্ত্যৈ জ্ঞেযং চ তদ্ ব্রহ্ম সচ্চিদানন্দলক্ষণম্ |
নত্বলক্ষণমন্যত্স্যাদিতি চোক্তং ন বিস্মর || ২. ৮৪ ||
|| ইতি শ্রী গুরুজ্ঞানবাসিষ্ঠে তত্ত্বনারাযণে
জ্ঞানকাণ্ডস্য প্রথমপাদে চতুর্থোঽধ্যাযঃ এবং
শ্রী ঋভুগীতা দ্বিতীযোঽধ্যাযঃ সমাপ্তঃ ||
——————————————————————————–
তৃতীযোঽধ্যাযঃ |
পুনর্জ্ঞানং প্রবক্ষ্যামি নিদাঘ শৃণু সাদরম্ |
ব্রহ্মণোঽতি দুরূহত্বাদসকৃচ্ছ্রাব্যমেব তত্ || ৩. ০১ ||
সর্বং চিন্মযং বিদ্ধি সর্বং সচ্চিন্মযং ততম্ |
সচ্চিদানন্দমদ্বৈতং সচ্চিদানন্দমব্যযম্ || ৩. ০২ ||
সচ্চিদানন্দমাত্রং হি সচ্চিদানন্দমন্যকম্ |
সচ্চিদানন্দরূপোঽহং সচ্চিদানন্দমেব খম্ || ৩. ০৩ ||
সচ্চিদানন্দমেব ত্বং সচ্চিদানন্দকোঽস্ম্যহম্ |
মনোবুদ্ধিরহঙ্কারচিত্তসঙ্ঘাতকা অমী || ৩. ০৪ ||
ন ত্বং নাহং নচন্যদ্বা সর্বং ব্রহ্মৈব কেবলম্ |
ন বাক্যং ন পদং বেদং নাক্ষরং ন জডং ক্বচিত্ || ৩. ০৫ ||
ন মধ্যং নাদি নান্তং বা ন সত্যং ন নিবন্ধনম্ |
ন দুঃখং ন সুখং ভাবং ন মাযা প্রকৃতিস্তথা || ৩. ০৬ ||
ন দেহং ন মুখং ঘ্রাণং ন জিহ্বা ন চ তালুনী |
ন দন্তোষ্ঠৌ ললাটং চ নিশ্বাসোচ্ছ্বাস এব চ || ৩. ০৭ ||
ন স্বেদমস্থিমাসং চ ন রক্তং ন চ মূত্রকম্ |
ন দূরং নান্তিকং নাহং নোদরং ন কিরীটকম্ || ৩. ০৮ ||
ন হস্তপাদচলনং ন শাস্ত্রং ন চ শাসনম্ |
ন বেত্তা বেদনং বেদ্যং ন জাগ্রত্স্বপ্নসুপ্তযঃ || ৩. ০৯ ||
তুর্যাতীতং ন মে কিঞ্চিত্সর্বং সচ্চিন্মযং ততম্ |
নাধ্যাত্মিকং নাধিভূতং নাধিদৈবং ন মাযিকম্ || ৩. ১০ ||
ন বিশ্বস্তৈজসঃ প্রাজ্ঞঃ বিরাট্সূত্রাত্মকেশ্বরাঃ |
ন গমাগমচেষ্টা চ ন নষ্ষ্টং ন প্রযোজনম্ || ৩. ১১ ||
ত্যাজ্যং গ্রাহ্যং ন দূষ্যং বা হ্যমেধ্যং মেধ্যকং তথা |
ন পীনং ন কৃশং ক্লেদং ন কালং দেশভাষণম্ || ৩. ১২ ||
ন সর্বং ন ভযং চৈতন্ন বৃক্ষতৃণপর্বতাঃ |
ন ধ্যানং যোগসংসিদ্ধির্নব্রহ্মক্ষত্রবৈশ্যকম্ || ৩. ১৩ ||
ন পক্ষী ন মৃগো নাগী ন লোভো মোহ এব চ |
ন মদো ন চ মাত্সর্যং কামক্রোধাদযস্তথা || ৩. ১৪ ||
ন স্ত্রীশূদ্রবিডালাদি ভক্ষ্যভোজ্যাদিকং চ যত্ |
ন প্রৌঢহীননাস্তিক্যং ন বার্তাবসরোস্তি হি || ৩. ১৫ ||
ন লৌকিকো ন লোকোবা ন ব্যাপারো ন মূঢতা |
ন ভোক্তা ভোজনং ভোজ্যং মাতৃমানং ন মেযকম্ || ৩. ১৬||
ন শত্রুমিত্রপুত্রাদি ন মাতা ন পিতা স্বসা|
ন জন্ম ন মৃতির্বৃদ্ধির্ন দেহোঽহমিতি ভ্রমঃ || ৩. ১৭ ||
ন শূন্যং নাপি চশূন্যং নান্তঃকরণসংস্মৃতিঃ |
ন রাত্রির্নদিবা নক্তং ন ব্রহ্মা ন হরিশ্শিবঃ || ৩. ১৮ ||
ন বারপক্ষমাসাদি বত্সরং ন চ চঞ্চলম্ |
ন ব্রহ্মলোকো বৈকুণ্ঠো ন কৈলাসো ন চন্যকঃ || ৩. ১৯ ||
ন স্বর্গো ন চ দেবেন্দ্রো নাগ্নিলোকো ন চগ্নিকঃ |
ন যমো ন যমলোকো বা ন লোকা লোকপালকাঃ || ৩. ২০ ||
ন ভূর্ভুবস্স্বস্ত্রৈলোক্যং ন পাতালং ন ভূতলং |
নাবিদ্যা ন চ বিদ্যা চ ন মাযা প্রকৃতির্ন চ || ৩. ২১ ||
ন স্থিরং ক্ষণিকং নাশো ন গতির্ন চ ধাবনম্ |
ন ধ্যাতব্যং ন মে স্নানং ন মন্ত্রো ন জপঃ ক্বচিত্ || ৩. ২২ ||
ন পদার্থং ন পূজার্হং নাভিষেকং ন চর্চনং |
ন পুষ্পং ন ফলং পত্রং গন্ধপুষ্পাদিধূপকম্ || ৩. ২৩ ||
ন স্তোত্রং ন নমস্কারো ন প্রদক্ষিণমণ্বপি |
ন প্রার্থনা পৃথগ্ভাবো ন হবির্নাস্তি বন্দনম্ || ৩. ২৪ ||
ন হোমো ন চ কর্মাণি ন দুর্বাক্যং সুভাষণম্ |
ন গাযত্রী ন বা সন্ধির্ন মনস্যং ন দুঃস্থিতিঃ || ৩. ২৫ ||
ন দুরাশা ন দুষ্টাত্মা ন চণ্ডালো ন পৌল্কসঃ |
ন দুস্সহং দুরালাপং ন কিরাতো ন কৈতবম্ || ৩. ২৬ ||
ন পক্ষপাতং পক্ষং বা ন বিভূষণতস্করৌ |
ন চ ডংভো ডাংভিকো বা ন হীনো নাধিকো নরঃ || ৩. ২৭ ||
নৈকং দ্বযং ত্রযং তুর্যং ন মহত্বং ন চল্পতা |
ন পূর্ণং ন পরিচ্ছিন্নং ন কাশী ন ব্রতং তপঃ || ৩. ২৮ ||
ন গোত্রং ন কুলং সূত্রং ন বিভুত্বং ন শূন্যতা |
ন স্ত্রীর্ন যোষিন্নো বৃদ্ধা ন কন্যা ন বিতন্তুকা || ৩. ২৯ ||
ন সূতকং ন জাতং বা নান্তর্মুখসুবিভ্রমঃ |
ন মহাবাক্যমৈক্যং বা নাণিমাদিবিভূতযঃ || ৩. ৩০ ||
এবং সলক্ষণং ব্রহ্ম ব্যতিরেকমুখেন বৈ |
নিদাঘ ত্বং বিজানীহি ব্রহ্মেতরনিষেধতঃ || ৩. ৩১ ||
ব্রহ্মণঃ প্রকৃতস্যাত্র দ্বিবিধং প্রতিপাদনং |
অসন্নিষেধরূপং সদ্বিধিরূপং চ তত্র তু || ৩. ৩২ ||
আত্মা নিষেধরূপেণ তুভ্যং সংপ্রতিপাদিতঃ |
অথাদ্য বিধিরূপেণ শৃণু সংপ্রতিপাদ্যতে || ৩. ৩৩ ||
সর্বং চৈতন্যমাত্রত্বাত্সর্বদোষস্সদানহি |
সর্বং সন্মাত্ররূপত্বাত্সচ্চিদানন্দরূপকম্ || ৩. ৩৪ ||
ব্রহ্মৈব সর্বং নান্যোঽস্মি তদহং তদহং তথা |
তদেবাহং তদেবাহং ব্রহ্মৈবাহং সনাতনম্ || ৩. ৩৫ ||
ব্রহ্মৈবাহং ন সংসারী ব্রহ্মৈবাহং ন মে মনঃ |
ব্রহ্মৈবাহং ন মে সিদ্ধির্ব্রহ্মৈবাহং ন চেন্দ্রিযম্ || ৩. ৩৬ ||
ব্রহ্মৈবাহং ন দেহোঽহং ব্রহ্মৈবাহং ন গোচরঃ |
ব্রহ্মৈবাহং ন জীবোঽহং ব্রহ্মৈবাহং ন ভেদ ভূঃ || ৩. ৩৭ ||
ব্রহ্মৈবাহং জডো নাহমহং ব্রহ্ম ন মে মৃতিঃ |
ব্রহ্মৈবাহং ন চ প্রাণো ব্রহ্মৈবাহং পরাত্পরম্ || ৩. ৩৮ ||
ইদং ব্রহ্ম পরং ব্রহ্ম সত্যং ব্রহ্ম প্রভুর্হি সঃ |
কালো ব্রহ্ম কলা ব্রহ্ম সুখং ব্রহ্ম স্বযংপ্রভম্ || ৩. ৩৯ ||
একং ব্রহ্ম দ্বযং ব্রহ্ম মোহো ব্রহ্ম শমাদিকম্ |
দোষো ব্রহ্ম গুণো ব্রহ্ম দিশশ্শান্তর্বিভুঃ প্রভুঃ || ৩. ৪০ ||
লোকা ব্রহ্ম গুরুর্ব্রহ্ম শিষ্যো ব্রহ্ম সদাশিবঃ |
পূর্বং ব্রহ্ম পরং ব্রহ্ম শুদ্ধং ব্রহ্ম শুভাশুভম্ || ৩. ৪১ ||
জীব এব সদা ব্রহ্ম সচ্চিদানন্দমস্ম্যহম্ |
সর্বং ব্রহ্মমযং প্রোক্তং সর্বং ব্রহ্মমযং জগত্ || ৩. ৪২ ||
স্বযং ব্রহ্ম ন সন্দেহঃ স্বস্মাদন্যন্ন কিঞ্চন |
সর্বমাত্মৈব শুদ্ধাত্মা সর্বং চিন্মাত্রমব্যযম্ || ৩. ৪৩ ||
নিত্যনির্মলরূপাত্মা হ্যাত্মনোন্যন্ন কিঞ্চন |
অণুমাত্রলসদ্রূপমণুমাত্রমিদং জগত্ || ৩. ৪৪ ||
অণুমাত্রং শরীরং বা হ্যণুমাত্রমসত্যকম্ |
অণুমাত্রং মনশ্চিত্তমণুমত্রাপ্যহঙ্কৃতিঃ || ৩. ৪৫ ||
অণুমাত্রা চ বুদ্ধিশ্চ হ্যণুমাত্রোঽপি জীবকম্ |
অণুমাত্রমিদং চিত্তং সর্বমপ্যণুমাত্রকম্ || ৩. ৪৬ ||
ব্রহ্মৈব সর্বং চিন্মাত্রং ব্রহ্মমাত্রং জগত্ত্রযম্ |
আনন্দং পরমানন্দমন্যত্কিঞ্চিন্নকিঞ্চন || ৩. ৪৭ ||
চৈতন্যমাত্রমোঙ্কারং ব্রহ্মৈব ভবতি স্বযম্ |
অহমেব জগত্সর্বমহমেব পরংপদম্ || ৩. ৪৮ ||
অহমেব গুণাতীতোস্ম্যহমেব পরাত্পরঃ |
অহমেব পরংব্রহ্ম হ্যহমেব গুরোর্গুরুঃ || ৩. ৪৯ ||
অহমেবাখিলাধারোস্ম্যহমেব সুখাত্সুখম্ |
আত্মনোন্যজ্জগন্নাস্তি হ্যাত্মনোন্যত্সুখং ন চ || ৩. ৫০ ||
আত্মনোন্যা গতির্নাস্তি সর্বমাত্মমযং জগত্ |
আত্মনোন্যন্নহি ক্বাপি আতমনোন্যত্তৃণং ন হি || ৩. ৫১ ||
আত্মনোন্যত্তুষং নাস্তি সর্বমাত্মমযং জগত্ |
ব্রহ্মমাত্রমিদং সর্বং ব্রহ্মমাত্রমসন্ন হি || ৩. ৫২ ||
ব্রহ্মমাত্রমিদং সর্বং স্বযং ব্রহ্মৈব কেবলম্ |
ব্রহ্মমাত্রং ব্রতং সর্বং ব্রহ্মমাত্রং রসং সুখম্ || ৩. ৫৩ ||
ব্রহ্মমাত্রং চিদাকাশং সচ্চিদানন্দমদ্বযংম্ |
ব্রহ্মণোন্যতরং নাস্তি ব্রহ্মণোন্যন্ন কিঞ্চন || ৩. ৫৪ ||
ব্রহ্মণোন্যদহং নাস্তি ব্রহ্মণোন্যত্ফলং নহি |
ব্রহ্মণোন্যত্পদং নাস্তি ব্রহ্মণোন্যত্পদং নহি || ৩. ৫৫ ||
ব্রহ্মণোন্যদ্গুরুর্নাস্তি ব্রহ্মণোন্যদসদ্বপুঃ |
ব্রহ্মণোন্যন্নচহন্তা ত্বত্তেদং তেন হি ক্বচিত্ || ৩. ৫৬ ||
স্বযং ব্রহ্মাত্মকং বিদ্ধি স্বস্মাদন্যন্নকিঞ্চন |
যত্কিঞ্চিদ্দৃশ্যতে লোকে যত্কিঞ্চিদ্ভাষ্যতে জনৈঃ || ৩. ৫৭ ||
যত্কিঞ্চিত্ক্রিযতে নিত্যং যত্কিঞ্চিদ্গম্যতে জনৈঃ |
যত্কিঞ্চিদ্ভুজ্যতে ক্বাপি তত্সর্বমসদেব হি || ৩. ৫৮ ||
কর্তৃভেদং ক্রিযাভেদং গুণভেদং রসাদিকম্ |
লিঙ্গভেদমিদং সর্বমসদেব সদা সুখম্ || ৩. ৫৯ ||
কালভেদং দেশভেদং বস্তুভেদং জযাজযম্ |
যদ্যদ্ভেদং চ তত্সর্বমসদেবহি কেবলম্ || ৩. ৬০ ||
অসদন্তঃকরণমসদেবেন্দ্রিযাদিকম্ |
অসত্প্রাণাদিকং সর্বং সঙ্ঘাতমসদাত্মকম্ || ৩. ৬১ ||
অসত্যং পঞ্চকোশাখ্যমসত্যাঃ পঞ্চদেবতাঃ |
অসত্যং ষড্বিকারাদি হ্যসত্যমরিবর্গকম্ ||৩. ৬২ ||
অসত্যষ্ষদৃতুশ্চৈব হ্যসত্যষ্ষড্রসস্সদা |
সপ্তর্ষযোপ্যসত্যাস্তেপ্যসত্যাস্সপ্তসাগরাঃ || ৩. ৬৩ ||
সচ্চিদানন্দমাত্রোহমনুত্পন্নমিদং জগত্ |
আত্মৈবাহং পরংসত্যো নান্যাস্সংসারদৃষ্টযঃ || ৩. ৬৪ ||
সত্যমানন্দরূপোহং চিদ্ঘনানন্দবিগ্রহঃ |
অহমেব পরানন্দোঽস্ম্যহমেব পরাত্পরঃ || ৩. ৬৫ ||
জ্ঞানাকারমিদং সর্বং জ্ঞানানন্দোহমদ্বযঃ |
জ্ঞানপ্রকাশরূপোহং জ্ঞানানন্দৈকবিগ্রহঃ || ৩. ৬৬ ||
যেন জ্ঞাতমিদং জ্ঞানমজ্ঞানধ্বান্তনাশকঃ |
জ্ঞানেনাজ্ঞাননাশেন স হি জ্ঞানী সমীর্যতে ||৩. ৬৭ ||
জ্ঞানং যথা দ্বিধা প্রোক্তং স্বরূপং বৃত্তিরিত্যপি |
অজ্ঞানং চ তথা বিদ্ধি মূলং চ প্রতিবন্ধ্কম্ || ৩. ৬৮ ||
যথা জ্ঞানং বিনা লোকে কিঞ্চিদেব ন সিদ্ধ্যতি |
তথা জ্ঞানং বিনা লোকে ক্বচিন্মুক্তির্ন সিদ্ধ্যতি || ৩. ৬৯ ||
জ্ঞানদ্বযং তথাঽজ্ঞানদ্বযমপ্যত্রবর্ষ্মণি |
সর্বদা ভান্তি জীবানং জ্ঞানাজ্ঞানোক্তিদর্শনাত্ || ৩. ৭০ ||
জ্ঞানস্য ক্ব তিরোভাবো জ্ঞানস্যাবির্ভবস্তথা |
দৃষ্টস্সর্বত্র লোকেস্মিন্ দুর্লভোহি বিপর্যযঃ || ৩. ৭১ ||
জ্ঞানং সর্বান্তরং ভাতি কূটস্থাত্মস্বরূপকম্ |
প্রজ্ঞামাত্রমিদং সূক্ষ্মং কোঽপি জানাতি পুণ্যকৃত্ || ৩. ৭২ ||
প্রজ্ঞাযাং কল্পিতাং প্রজ্ঞাং প্রজ্ঞযৈব বিহায যঃ |
প্রজ্ঞামাত্রেণ সন্তিষ্টেত্ স প্রজ্ঞাবানিতীর্যতে || ৩. ৭৩ ||
বহিঃ প্রজ্ঞাং সদোত্সৃজ্যাপ্যন্তঃ প্রজ্ঞাং চ যো বুধঃ |
কযাপি প্রজ্ঞযোপেতঃ প্রজ্ঞাবানিতি কথ্যতে || ৩. ৭৪ ||
প্রজ্ঞৈব যস্য নেত্রং স্যত্ প্রজ্ঞৈব শ্রোত্রমিন্দ্রিযম্ |
অন্যচ্চ সর্বং প্রজ্ঞৈব স প্রাজ্ঞঃ পুরুষোত্তমঃ || ৩. ৭৫ ||
প্রজ্ঞযা জাযতে সর্বং প্রজ্ঞযা পাল্যতেঽখিলম্ |
প্রজ্ঞযা ক্ষীযতে সর্বং তস্মাত্প্রজ্ঞাং সমাশ্রয || ৩. ৭৬ ||
প্রজ্ঞাহীনমসত্সর্বং প্রজ্ঞাহীনং জডং খলু |
প্রজ্ঞাহীনং সদা দুঃখং তস্মাত্প্রজ্ঞাং সমাশ্রয || ৩. ৭৭ ||
ন বিনা প্রজ্ঞযা পুণ্যং ন লোকঃ প্রজ্ঞযা বিনা |
বিনা ন প্রজ্ঞযাঽভীষ্টং তস্মাত্প্রজ্ঞাং সমাশ্রয || ৩. ৭৮ ||
সুসূক্ষ্মযা ধিযা প্রজ্ঞামিমাং তাং জ্ঞপ্তিসঞ্জ্ঞিকাম্ |
জ্ঞাত্বা ভবভবান্মুক্তো নির্গুণব্রহ্মরূপিণীম্ || ৩. ৭৯ ||
জাগ্রদাদ্যাস্ববস্থাসু যা জ্ঞপ্তিস্ত্রিসৃষু স্বযম্ |
আভাসতোপ্যনুস্যূতা জ্ঞপ্তিস্সা নির্মলা স্বতঃ || ৩. ৮০ ||
জ্ঞপ্তিস্সা সাক্ষিণী নিত্যা তুর্যা সর্বশ্রুতীরিতা |
বিষযজ্ঞপ্তিসন্ত্যাগাত্ জ্ঞাযতে বিবুধৈস্স্বতঃ || ৩. ৮১ ||
জ্ঞপ্তিরেব পরংব্রহ্ম জ্ঞপ্তিরেব পরং পদম্ |
জ্ঞপ্তিরেব পরো মোক্ষো জ্ঞপ্তিরেব পরং সুখম্ || ৩. ৮২ ||
জ্ঞপ্তিরেব পরাচার্যো জ্ঞপ্তিরেব পরামৃতম্ |
জ্ঞপ্তিরেব পরাতৃপ্তির্জ্ঞপ্তিরেব পরাগতিঃ || ৩. ৮৩ ||
তস্মাত্জ্ঞপ্তিং সমাশ্রিত্য বিজ্ঞপ্তিধিষণাং ত্যজ |
অজ্ঞপ্তের্দুঃখহেতুত্বাত্সুখার্থীজ্ঞপ্তিমাশ্রয || ৩. ৮৪ ||
অজ্ঞপ্তি বোষযো জীবঃ কূটস্থো জ্ঞপ্তি গোচরঃ |
হেযোপাদেযতা সিদ্ধা ধর্মধর্মিত্বতস্তযোঃ || ৩. ৮৫ ||
অহংপ্রত্যযশব্দাভ্যাং বিজ্ঞেযো জীবসঞ্জ্ঞকঃ |
অস্মত্প্রত্যযশব্দাভ্যাং জ্ঞেযো কূটস্থসঞ্জ্ঞকঃ || ৩. ৮৬ ||
যদহং প্রত্যযী জীবস্তদ্যুষ্মত্প্রত্যযী চ সঃ |
ত্বমহং শব্দযোরৈক্যাত্তত্সাক্ষী প্রত্যগাহ্বযঃ || ৩. ৮৭ ||
অস্মত্প্রত্যযিনং সাক্ষিচৈতন্যাত্মকমদ্বযম্ |
কূটস্থং প্রত্যগাত্মানং সাক্ষাদ্বিষযিণং পরম্ || ৩. ৮৮ ||
জহি জ্ঞাত্বা তদন্যং ত্বমহংপ্রত্যযিনং বহিঃ |
সাক্ষ্যং জীবং চিদাভাসং পরাঞ্চং বিষযং স্বতঃ || ৩. ৮৯ ||
দৃগ্দৃশ্যভূতযোরত্র জীবাত্মপ্রত্যগাত্মনোঃ |
বিবেকেন পরং সৌখ্যং নিদাঘ ব্রজ সন্ততম্ || ৩. ৯০ ||
|| ইতি শ্রী গুরুজ্ঞানবাসিষ্ঠে তত্ত্বনারাযণে
জ্ঞানকাণ্ডস্য প্রথমপাদে পঞ্চমোঽধ্যাযঃ এবং
শ্রী ঋভুগীতা তৃতীযোঽধ্যাযঃ সমাপ্তঃ ||
——————————————————————————–
চতুর্থোঽধ্যাযঃ |
পুনর্জ্ঞানং প্রবক্ষ্যামি জাগ্রদাদি বিলক্ষণম্ |
তুরীযব্রহ্মরূপং তদ্যদ্জ্ঞাত্বা মোক্ষ্যসেঽশুভাত্ || ৪. ০১ ||
ঊর্ণনাভির্যথাতন্তূন্ সৃজতে সংহরত্যপি |
জাগ্রত্স্বপ্নে তথা জীবো গচ্ছত্যাগচ্ছতে পুনঃ || ৪. ০২ ||
নেত্রে জাগরিতং বিদ্যাত্কণ্ঠে স্বপ্নং সমাবিশেত্ |
সুষুপ্তং হৃদযস্থং তু তুরীযং মূর্ধ্নি সংস্থিতম্ || ৪. ০৩ ||
যতো বচো নিবর্তন্তে অপ্রাপ্য মনসা সহ |
আনন্দমেতজ্জীবস্য যজ্জ্ঞাত্বা মুচ্যতে বুধঃ || ৪. ০৪ ||
সর্বব্যাপিনমাত্মানং ক্ষীরেসর্পিরিবার্পিতম্ |
আত্মবিদ্যা তপোমূলং তদ্ ব্রহ্মোপনিষত্পদং || ৪. ০৫ ||
শ্রী গুরুমূর্তিঃ |
ঋভুণোক্তমিদং শ্রুত্বা নিদাঘস্সংশযাকুলঃ |
পপ্রচ্ছ সদ্গুরুং শান্তং সাবধানেন চেতসা || ৪. ০৬ ||
নিদাঘঃ |
ভগবন্ ভবতা পূর্বং যতোবাচ ইতি শ্রুতেঃ |
আনন্দো ব্রহ্মণঃ প্রোক্তো জীবস্যত্বধুনোচ্যতে || ৪. ০৭ ||
আনন্দমযসংজ্ঞস্য জীবস্যোক্তশ্চ যদ্যপি |
শ্রুতৌ তথাপি হেযত্বান্নতদীযো ভবেদ্ধি সঃ || ৪. ০৮ ||
নাবাঙ্মনসগম্যত্বং জীবস্য খলু যুজ্যতে |
নানন্দস্য চ বেদ্যত্ববচনাদ্ ব্রহ্মণোহি তত্ || ৪. ০৯ ||
এবং পৃষ্টো মুনিশ্রেষ্টো নিদাঘেন মহাত্মনা |
ঋভুঃ প্রোবাচ সর্বজ্ঞো ব্রহ্মন্ সস্মিতমাদরাত্ || ৪. ১০ ||
ব্রহ্মোক্তং জীবশব্দেন হ্যবাঙ্মনসগোচরম্ |
মোক্ষাতীতদশাযাং যজ্জীবস্তদ্ ব্রহ্মতাং ব্রজেত্ || ৪. ১১ ||
পূর্বোত্তরবিরোধো বা মদ্বাক্যেষু ন তদ্ভবেত্ |
শ্রুত্যর্থস্যোপরোধো বা সম্যগালোচ্য নিশ্চিনু || ৪. ১২ ||
উপসংক্রমিতব্যো যদানন্দময উচ্যতে |
বেদ্যত্বং তস্যচসিদ্ধং পুচ্ছস্যাবিষযত্বতঃ || ৪. ১৩ ||
তস্মাত্স্বযং সদাপূর্ণঃ পঞ্চমস্য বিকারিণঃ |
আত্মস্থানীয আনন্দ ইহ বেদ্য ইতি স্থিতিঃ || ৪. ১৪ ||
ভৃগবে বরুণেনৈবং তৈত্তিরীযাভিদশ্রুতৌ |
পঞ্চমস্য বিকারিত্বং ন প্রোক্তমিতিচেচ্ছৃণু || ৪. ১৫ ||
মযট্প্রযোগাভাবেন হেতুনা নির্বিকারতা |
ন শঙ্ক্যা পূর্বপর্যাযেষ্বন্নাদিষ্বপ্যদর্শনাত্ || ৪. ১৬ ||
অতষ্ষষ্টং পরংব্রহ্ম পঞ্চমেনোপলক্ষিতম্ |
নির্গুণং ভৃগবে পিত্রা প্রোক্তমিত্যবধারয || ৪. ১৭ ||
প্রাচুর্যার্থকতাযাং তু মযটো নির্বিকারিণঃ |
সচ্চিদানন্দরূপস্য ব্রহ্মণো বেদ্যতা ভবেত্ || ৪. ১৮ ||
শারীরত্বাভিদানেন পূর্বানন্দমযস্য তু |
বিকারিত্বং পুনস্স্পষ্টমুপসংক্রমণেন চ || ৪. ১৯ ||
নানুকর্ষশ্চ পুচ্ছস্য পূর্বপূর্বস্য দৃশ্যতে |
উত্তরোত্তরকোশে প্রাক্তত্তদাত্মানুকর্ষণাত্ || ৪. ২০ ||
উপসংক্রমণং চোক্তং মযডন্তস্য কেবলম্ |
আনন্দস্য ততোন্যস্য ন পরাত্মতযা খলু || ৪. ২১ ||
ব্রহ্মবিত্পরমাপ্নোতীত্যাদৌ দ্বৈবিধ্যমীরিতম্ |
যত্তত্সরূপারূপাভ্যাং ব্রহ্মণোন্তে চ নিশ্চিনু || ৪. ২২ ||
আত্মস্থানীযচিদ্রূপানন্দব্রহ্মবিদোমুনে |
প্রারব্ধান্তে পুচ্ছভূতাঽরূপব্রহ্মাপ্তিরিষ্যতে || ৪. ২৩ ||
প্রতিষ্ঠাশব্দগম্যত্বাত্সর্বশেষিত্বতোপি চ |
শাস্ত্রস্যারূপবদ্ ব্রহ্মপ্রাধান্যং যদ্যপি স্থিতম্ || ৪. ২৪ ||
তথাপিবেদ্যতাঽভাবাদরূপস্য মুমুক্ষুভিঃ |
আনন্দরূপবদ্ ব্রহ্মপ্রাধান্যং মুখ্যমিষ্যতে || ৪. ২৫ ||
মোদপ্রমোদযোশ্চৈবং সতি বেদ্যত্বমাপতেত্ |
ইতিচেন্নৈষ দোষোস্তি তযোর্ব্রহ্মাংশতা যতঃ || ৪. ২৬ ||
ব্রহ্মণস্স্বগতে ভেদে নিত্যসিদ্ধে মুমুক্ষুবঃ |
উপেক্ষিতুং সমর্থাস্স্যুর্নিদাঘ কথমত্র তে || ৪. ২৭ ||
স্থূলার্থদর্শিনো যে বৈ শুষ্কাদ্বৈতসমাশ্রযাঃ |
তেষাং সাবযবত্বাদি দোষস্স্ফুরতু চেতসি || ৪. ২৮ ||
ন তাবতা ত্রিপাচ্ছ্রুত্যাদ্যনুরোধেন নিশ্চিতম্ |
স্বভেদং বিদুষাং কিঞ্চিচ্ছিদ্যতে মুক্তজন্মনাম্ || ৪. ২৯ ||
সূক্ষ্মবুদ্ধ্যা বিচরে হি স্বাত্মভেদঃ প্রকাশতে |
অত্যন্তাভেদবার্তাযাং পুচ্ছগাযাং ফলং কিমু || ৪. ৩০ ||
এতে কোশা হি পঞ্চৈব তিস্রোঽবস্থাস্সমীরিতাঃ |
জাগ্রদাদ্যাঃ ক্রমেণৈতদ্ভেদং চ শৃণু সাদরম্ || ৪. ৩১ ||
আদ্যা জাগরিতাঽবস্থা দ্বিতীযা স্বপ্নসংজ্ঞিকা |
তৃতীযা সুপ্তিরূপান্যা তুরীযা চিত্সুখাত্মিকা || ৪. ৩২ ||
আদ্যাভিমানী বিশ্বাখ্যো দ্বিতীযস্তৈজসস্স্মৃতঃ |
তৃতীযঃ প্রাজ্ঞ এতেভ্যো কূটস্থ ইতরঃ প্রভুঃ || ৪. ৩৩ ||
বহিঃপ্রজ্ঞো বিভুর্বিশ্বো হ্যন্তঃপ্রজ্ঞস্তু তৈজসঃ |
ঘনপ্রজ্ঞস্তথা প্রাজ্ঞ এক এব ত্রিথা স্থিতঃ || ৪. ৩৪ ||
দক্ষিণাক্ষিমুখে বিশ্বো মনস্যতন্তস্তু তৈজসঃ |
আকাশে চ হৃদি প্রাজ্ঞস্ত্রিথা দেহে ব্যবস্থিতঃ || ৪. ৩৫ ||
বিশ্বো হি স্থূলভুঙ্নিত্যং তৈজসঃ প্রবিবিক্তভুক্ |
আনন্দভুক্তথা প্রাজ্ঞস্ত্রিথা ভোগং নিবোধ চ || ৪. ৩৬ ||
স্থূলং তর্পযতে বিশ্বং প্রবিবিক্তং তু তৈজসম্ |
আনন্দশ্চ তথা প্রাজ্ঞং ত্রিথা তৃপ্তিং নিবোধ চ || ৪. ৩৭ ||
ত্রিষু ধামসু যদ্ভোজ্যং ভোক্তা যশ্চ প্রকীর্তিতঃ |
বেদৈতদুভযং যস্তু স ভুঞ্জানো ন লিপ্যতে || ৪. ৩৮ ||
প্রভবস্সর্বভাবানাং সতামিতি বিনিশ্চযঃ |
সর্বং জনযতি প্রাণশ্চেতোংশূন্পুরুষঃ পৃথক্ || ৪. ৩৯ ||
বিভূতিং প্রসবন্ত্বন্যে মন্যন্তে সৃষ্টিচিন্তকাঃ |
স্বপ্নমাযাস্বরূপেতি সৃষ্টিরন্যৈর্বিকল্পিতা || ৪. ৪০ ||
ইচ্ছামাত্রং প্রভোস্সৃষ্টিরিতি সৃষ্টৌ বিনিশ্চিতাঃ |
কালাত্প্রসূতিং ভূতানাং মন্যন্তে কালচিন্তকাঃ || ৪. ৪১ ||
ভোগার্থং সৃষ্টিরিত্যন্যে ক্রীডার্থমিতিচপরে |
দেবস্যৈষ স্বভাবোযমাপ্তকামস্য কা স্পৃহা || ৪. ৪২ ||
আপ্তকামস্য দেবস্য তুর্যস্যোক্তস্য সুব্রত |
স্বরূপং প্রোচ্যতে সম্যঙ্নিদাঘ শৃণু তত্ত্বতঃ || ৪. ৪৩ ||
নান্তঃপ্রজ্ঞং বহিঃপ্রজ্ঞং ন প্রজ্ঞং নোভযাত্মকং |
ন প্রজ্ঞানঘনং প্রজ্ঞং নাপ্রজ্ঞং ন চ কেবলম্ || ৪. ৪৪ ||
ইদংত্বে নতদ্গ্রাহ্যমদৃশ্যং চপ্যলক্ষণম্ |
অচিন্ত্যাব্যবহার্যং চব্যপদেশং পৃথক্তযা || ৪. ৪৫ ||
একাত্মপ্রত্যযং সারং প্রপঞ্চোপশমং শিবং |
শান্তং চতুর্থমদ্বৈতং মন্যন্তে ব্রহ্মবাদিনঃ || ৪. ৪৬ ||
স আত্মা স হি বিজ্ঞেযঃ সর্বৈরপি মুমুক্ষুভিঃ |
তুর্যাত্মজ্ঞানহীনানাং ন মুক্তিস্যাদ্কদাচন || ৪. ৪৭ ||
নিবৃত্তেস্সর্বদুঃখানামীশানঃ প্রভুরব্যযঃ |
অদ্বৈতস্সর্বভাবানাং দেবস্তুর্যো বিভুস্স্মৃতঃ || ৪. ৪৮ ||
কার্যকারণবদ্ধৌ তাবিষ্যেতে বিশ্বতৈজসৌ |
প্রাজ্ঞঃ কারণবদ্ধস্তু দ্বৌ তৌ তুর্যে ন সিদ্ধ্যতঃ || ৪. ৪৯ ||
নাত্মানং ন পরং চৈব ন সত্যং নাপিচনৃতং |
প্রাজ্ঞঃ কিংচ ন সংবেত্তি তুর্যং তত্সর্বদৃক্সদা || ৪. ৫০ ||
দ্বৈতস্যাগ্রহণং তুল্যমুভযোঃ প্রাজ্ঞতুর্যযোঃ |
বীজনিদ্রাযুতঃ প্রাজ্ঞস্সা চ তুর্যে ন বিদ্যতে || ৪. ৫১ ||
স্বপ্ননিদ্রাযুতাবাদ্যৌ প্রাজ্ঞস্ত্বস্বপ্ননিদ্রযা |
ন নিদ্রাং নৈব চ স্বপ্নং তুর্যে পশ্যন্তি নিশ্চিতাঃ || ৪. ৫২ ||
অন্যথাগৃহ্ণতস্স্বপ্নো নিদ্রা তত্ত্বমজানতঃ |
বিপর্যাসে তযোঃ ক্ষীণে তুরীযং পদমশ্নুতে || ৪. ৫৩ ||
অনাদিমাযযা সুপ্তো যদা জীবঃ প্রবুধ্যতে |
অজমদ্বৈতমস্বপ্নমনিদ্রং বুধ্যতে তদা || ৪. ৫৪ ||
প্রপঞ্চো যদি বিদ্যেত নিবর্তেত ন সংশযঃ |
মাযামাত্রমিদং দ্বৈতমদ্বৈতং পরমার্থতঃ || ৪. ৫৫ ||
বিকল্পো বিনিবর্তেত কল্পিতো যদি কেনচিত্ |
উপদেশাদযং বাদো জ্ঞাতে দ্বৈতং ন বিদ্যতে || ৪. ৫৬ ||
নিদাঘঃ |
ভগবন্ কথমদ্বৈতং ব্রহ্মদ্বৈবিধ্যবাদিনঃ |
ভবতোভিমতং তত্র সংশযো মে ভবত্যলম্ || ৪. ৫৭ ||
ঋভুঃ |
দ্বৈতপ্রপঞ্চশূন্যেস্মিন্ নির্গুণে পূর্ণচিদ্ঘনে |
ব্রহ্মণ্যদ্বৈতসংসিদ্ধির্যতো নান্যত্র সর্বধা || ৪. ৫৮ ||
অতস্সরূপারূপাভ্যাং ব্রহ্মদ্বৈবিধ্যবাদিনঃ |
মমৈবাদ্বৈতবাদিত্বন্নারূপাদ্বৈতবাদিনঃ || ৪. ৫৯ ||
দ্বৈতাদ্বৈতোভযাতীতে ব্য্বহারাদ্যগোচরে |
নীরূপে ব্রহ্মণি প্রাজ্ঞাঽদ্বৈতবাদঃ কথং ভবেত্ || ৪. ৬০ ||
দ্বৈতাচিদ্রূপকার্যস্যাদ্বৈতচিদ্রূপকারণাত্ |
নিবৃত্তিস্যাদ্যথাদীপাত্তমসো নত্বরূপতঃ || ৪. ৬১ ||
অতো নাদ্বৈতসিদ্ধিস্যাত্কথঞ্চিদপি সত্তম |
অরূপাগোচরব্রহ্মবাদিনাং তাদৃশে মতে || ৪. ৬২ ||
চিদ্রূপব্রহ্মতাদাত্ম্যং জীবস্য হি বিবক্ষিতম্ |
নারূপবাক্যদূরত্বাত্তন্নাদ্বৈতমরূপিণাম্ || ৪. ৬৩ ||
যদ্যপ্যরূপব্রহ্মত্বং জীবস্যান্তে প্রসিদ্ধ্যতি |
তথাপ্যদ্বৈতিতাং বক্তুং ন শক্যং দ্বন্দ্বহানিতঃ || ৪. ৬৪ ||
বাচ্যবাচকহীনে চ লক্ষ্যলক্ষণবর্জিতে |
কথমদ্বৈতশব্দোযং সাবকাশো ভবেন্মুনে || ৪. ৬৫ ||
নিদাঘঃ |
দেবতাপুরুষাদ্যৈর্হি বেদশব্দৈস্সমীর্যতে |
তস্যৌপনিষদত্বস্যাব্যভিচরোস্ত্যরূপিণঃ || ৪. ৬৬ ||
ততোস্য শব্দগম্যত্বাত্ প্রষ্টব্যত্বং মযা ভবেত্ |
বাচ্যত্বং চ ত্বযেত্যদ্য মন্যে শ্রীগুরুনাযক || ৪. ৬৭ ||
ঋভুঃ |
অরূপব্রহ্মবিষযাশ্শ্ব্দাস্সন্ত্যেব যদ্যপি |
তেনৌপনিষদত্বং চ কথঞ্চিত্তস্য সিদ্ধ্যতি || ৪. ৬৮ ||
তথাপি প্রশ্নযোগ্যত্বং বাচ্যত্বং বা ন সিদ্ধ্যতি |
রূঢ্যর্থমাত্রবত্ত্বেনালক্ষকত্বাদযোগতঃ || ৪. ৬৯ ||
যোগার্থবদ্ভিশ্শব্দৈর্হি লক্ষকৈর্বাচকৈশ্চ বা |
শিষ্যেভ্যঃ প্রোচ্যতে সত্যংবস্তু শ্রীগুরুমূর্তিভিঃ || ৪. ৭০ ||
অরূপবস্তুনঃ প্রশ্নঃ প্রতিষিদ্ধশ্শ্রুতৌ যতঃ |
যাজ্ঞবল্ক্যেন গার্গ্যৈ তন্নত্বং প্রষ্টুমিহার্হসি || ৪. ৭১ ||
তস্মাত্ তুরীযং সদ্ ব্রহ্ম যোগবৃত্ত্যৈব লক্ষণৈঃ |
সচ্চিদানন্দপূর্বৈস্ত্বং মদুক্তং বিদ্ধি মুক্তযে || ৪. ৭২ ||
জাগ্রত্যন্নমযং কোশং স্থূলদেহং চ বিদ্ধি বৈ |
স্বপ্নে প্রণমনোজ্ঞানমযাস্সূক্ষ্মবপুস্ততঃ || ৪. ৭৩ ||
সুষুপ্তৌ কারণং দেহমানন্দমযকোশকম্ |
তুরীযে ত্বশরীরং তচ্চিদ্রূপং কোশবর্জিতম্ || ৪. ৭৪ ||
স এব মাযাপরিমোহিতাত্মা শরীরমাস্থায করোতি সর্বম্ |
স্ত্র্যন্নপানাদি বিচিত্রভোগৈস্স এব জাগ্রত্পরিতৃপ্তিমেতি || ৪. ৭৫ ||
স্বপ্নেঽপি জীবস্সুখদুঃখভোক্তা স্বমাযযা কল্পিতবিশ্বলোকে |
সুষুপ্তিকালে সকলে বিলীনে তমোভিভূতস্সুখরূপমেতি || ৪. ৭৬ ||
পুনশ্চ জন্মান্তরকর্মযোগাত্স এব জীবস্স্বপিতিপ্রবুদ্ধঃ |
পুরত্রযে ক্রীডতি যস্তু জীবস্ততস্তু জাতং সকলং বিচিত্রম্ || ৪. ৭৭ ||
আধারমানন্দমখণ্ডবোধং যস্মিন্ লযং যাতি পুরত্রযং চ |
যত্সর্ববেদান্তরহস্যতত্ত্বং যত্পূর্ণচৈতন্যনিজস্বরূপং || ৪. ৭৮ ||
এতস্মাজ্জাযতে প্রাণো মনস্সর্বেন্দ্রিযাণি চ |
খং বাযুর্জ্যোতিরাপঃ পৃথ্বী সর্বস্য ধারিণী || ৪. ৭৯ ||
যত্পরংব্রহ্ম সর্বাত্মা বিশ্বস্যাযতনং মহত্ |
সূক্ষ্মাত্সূক্ষ্মতরং নিত্যং তত্ত্বমেব ত্বমেব তত্ || ৪. ৮০ ||
জাগ্রত্স্বপ্নসুষুপ্ত্যাদিপ্রপঞ্চং যত্প্রকাশতে |
তদ্ ব্রহ্মাহমিতিজ্ঞাত্বা সর্ববন্ধৈঃ প্রমুচ্যতে || ৪. ৮১ ||
ত্রিষু ধামসু যদ্ভোজ্যং ভোক্তা ভোগশ্চ যদ্ভবেত্ |
তেভ্যো বিলক্ষণস্সাক্ষি চিন্মাত্রোহং সদাশিবঃ || ৪. ৮২ ||
ময্যেব সকলং জাতং মযি সর্বং প্রতিষ্ঠিতম্ |
মযি সর্বং লযং যাতি তদ্ ব্রহ্মাদ্বযমস্ম্যহম্ || ৪. ৮৩ ||
অণোরণীযানহমেব তদ্বন্মহানহং বিশ্বমিদং বিচিত্রম্ |
পুরাতনোঽহং পুরুষোঽহমীশো হিরণ্মযোঽহং শিবরূপমস্মি || ৪. ৮৪ ||
অপাণিপাদোঽহমচিন্ত্যশক্তিঃ পশ্যাম্যচক্ষুস্সশ্রুণোম্যকর্ণঃ |
অহং বিজানামি বিবিক্তরূপো ন চস্তি বেত্তা মম চিত্সদাঽহং || ৪. ৮৫ ||
বেদৈরনেকৈরহমেব বেদ্যো বেদান্তকৃদ্বেদবিদেবচহম্ |
ন পুণ্যপাপে মম নাস্তি নাশো ন জন্মদেহেন্দ্রিযবুদ্ধিরস্তি || ৪. ৮৬ ||
ন ভূমিরাপো মম বহ্নিরস্তি ন চনিলোমেঽস্তি ন চম্বরং চ |
এবং বিদিত্বা পরমার্থরূপং গুহাশযং নিষ্কলমদ্বিতীযম্ || ৪. ৮৭ ||
অখণ্ডমাদ্যন্তবিহীনমেকং তেজোমযানন্দঘনস্বরূপম্ |
সমস্তসাক্ষিং সদসদ্বিহীনং প্রযাতি শুদ্ধং পরমার্থতত্ত্বম্ || ৪. ৮৮ ||
শ্রী গুরুমূর্তিঃ |
এবং শ্রুত্বা নিদাঘস্স ঋভুবক্ত্রাদ্যদার্থতঃ |
ব্রহ্মৈবাহমিতি জ্ঞাত্বা কৃতকৃত্যোঽভবদ্বিধে || ৪. ৮৯ ||
যতস্ত্বং চ পরাত্মানং শ্রুতবানসি মন্মুখাত্ |
ত্বং চ ধন্যঃ পুনঃ পৃচ্ছ শ্রোতব্যান্তরমস্তিচেত্ || ৪. ৯০ ||
|| ইতি শ্রী গুরুজ্ঞানবাসিষ্ঠে তত্ত্বনারাযণে
জ্ঞানকাণ্ডস্য প্রথমপাদে ষষ্ঠোঽধ্যাযঃ এবং
শ্রী ঋভুগীতাখ্যোঽযং গ্রন্থস্সমাপ্তঃ ||
|| ॐ তত্সত্ ||
<
