ষড্বিংশোঽধ্যাযঃ
গোচরফল
সর্বেষু লগ্নেষ্বপি সত্সু চন্দ্র-
লগ্নং প্রধানং খলু গোচরেষু |
তস্মাত্তদৃক্ষাদপি বর্তমান্-
গ্রহেন্দ্রচারৈঃ কথযেত্ফলানি || ১||
সূর্যঃ ষট্ত্রিদশস্থিতস্ত্রিদশষট্সপ্তাদ্যগশ্চন্দ্রমাঃ
জীবস্ত্বস্ততপোদ্বিপংচমগতো বক্রার্কজৌ ষট্ত্রিগৌ |
সৌম্যঃ ষট্স্বচতুর্দশাষ্টমগতঃ সর্বেঽপ্যুপান্তস্থিতাঃ
শুক্রঃ খাস্তরিপূন্বিহায শুভদস্তিগ্মাংশুবদ্ভোগিনৌ || ২||
লাভবিক্রমখশত্রষু স্থিতঃ
শোভনো নিগদিতো দিবাকরঃ |
খেচরৈঃ সুততপোজলান্ত্যগৈঃ
ব্যার্কিভির্যদি ন বিদ্ধ্যতে তদা || ৩||
দ্যূনজন্মরিপুলাভখত্রিগঃ
চন্দ্রমাঃ শুভফলপ্রদঃ সদা |
স্বাত্মজান্ত্যমৃতিবন্ধুধর্মগৈ
বিধ্দ্যতে ন বিবুধৈর্যদি গ্রহৈহ্ || ৪||
বিক্রমাযরিপুগঃ কুজঃ শুভঃ
স্যাত্তদান্ত্যসুতধর্মগৈঃ খগৈঃ |
চেন্ন বিদ্ধ ইনসূনুরপ্যসৌ
কিন্তু ধর্মধৃণনা ন বিধ্দ্যতে || ৫||
স্বাম্বুশত্রুমৃতিখাযগঃ শুভো
জ্ঞস্তদা ন খলু বিধ্দ্যতে সদা |
স্বাল্মজত্রিতপ আদ্যনৈধন
প্রাপ্তিগৈবিবুধুভির্যদি গ্রহৈঃ || ৬||
স্বাযধর্মতনযাস্তসংস্থিতো নাকনাযকপুরোহিতঃ শুভঃ |
রিঃফরন্ধ্রখজলত্রিগৈর্যদা বিধ্দ্যতে গগনচারিভির্ন হি || ৭||
আসুতাষ্টমতপোব্যযাযগো বিদ্ধ আস্ফুজিদশোভনঃ স্মৃতঃ |
নৈধনাস্ততনুকর্মধর্মধীলাভবরিসহজস্থখেচরৈঃ || ৮||
জন্মন্যাযাসদাতা ক্ষপযতি বিভবান্ ক্রোধরোগাধ্বদাতা
বিত্তভ্রংশং দ্বিতীযে দিশতি ন সুখদো পঞ্চনামাগ্রহং চ |
স্থানপ্রাপ্তিং তৃতীযে ধননিচযমুদাকল্যকৃচ্চারিহন্তা
রোগাণ্ দত্তে চতুর্থে জনযতি চ মুহুঃ স্রগ্ধরাভোগবিঘ্নম্ || ৯||
বিত্তক্ষোভং সুতস্থো বিতরতি বহুশো রোগমোহাদিদাতা
ষষ্ঠেঽর্কো হন্তি রোগান্ ক্ষপযতি চ রিপূঞ্ছোকমোহান্প্রমাষ্টিং |
আধ্বানং সপ্তমস্থো জঠরগুদভযং দৈন্যভাবং চ তস্মৈ
রুক্ত্রাসাবষ্টমস্থঃ কলযতি কলহং রাজভীতিং চ তাপম্ || ১০||
আপদ্দৈন্যং তপসি বিরহং চিত্তচেষ্টানিরোধং
প্রাপ্তোন্যুগ্রাং দশমগৃহগে কর্মসিদ্ধিং দিনেশে |
স্থানং মানং বিভবমপি চৈকাদশে রোগনাশং
ক্লেশং বিত্তক্ষযমপি সুহৃদ্বৈরমন্ত্যে জ্বরং চ || ১১||
ক্রমেণ ভাগ্যোদযমর্থহাতিং জযং শ্লোকমরোগতাং চ |
সুখান্যনিষ্টং গদমিষ্টসিদ্ধিং মোদং ব্যযং চ প্রদদাতি চন্দ্রঃ || ১২||
অন্তঃ শোকং স্বজনবিরহং রক্তপিত্তোষ্ণরোগং
লগ্নে বিত্তে ভযমপি গিরাং দোষমর্থক্ষযং চ |
ধৈরে ভৌমো জনযতি জযং স্বর্ণভূষংপ্রমোদং
স্থানভ্রংশং রুজমুদরজাং বন্ধুদুঃখং চতুর্থে || ১৩||
জ্বরমনুচিতচিন্তাং পুত্রহেতুব্যথাং বা
কলযতি কলহংস্বৈঃ পঞ্চমে ভূমিপুত্রঃ |
রিপুকলহনিবৃত্তিং রোগশান্তিং চ ষষ্ঠে
বিজযমথ ধনাপ্তিং সর্বকার্যানুকূল্যম্ || ১৪||
কলত্রকলহাক্ষিরুগ্জঠররোগকৃত্সপ্তমে
জ্বরক্ষতজরূক্ষিতো বিগতবিত্তমানোঽষ্টমে |
কুজে নবমসংস্থিতে পরিভবোঽর্থনাশাদিভি-
বিলম্বিতগতির্ভবত্যবলদেহধাতুক্ষযৈঃ || ১৫||
দুশ্চেষ্টা বা কর্মবিঘ্নঃ শ্রমঃ খে
দ্রব্যারোগ্যক্ষেত্রবৃদ্ধিশ্চ লাভে |
ভৌমঃ খেটো গোচরে দ্বাদশস্থো
দ্রব্যচ্ছেদস্তাপ উষ্ণামযাদ্যৈঃ || ১৬||
বিত্তক্ষযং শ্রিযমরাতিভযং ধনাপ্তিং
ভার্যাপ্তনূজকলহং যিজযং বিরোধম্ |
পুত্রার্থলাভমথ বিঘ্নমশেষসৌখ্যং
পুষ্টিং পরাভবভযং প্রকরোতি চান্দ্রিঃ || ১৭||
জীবে জন্মনি দেশনির্গমনমপ্যর্থচ্যুতিং শত্রুতাং
প্রাপ্নোতি দ্রবিণং কুটুম্বসুখমপ্যর্থে স্ববাচাং ফলম্ |
দুশ্চিক্যে স্থিতিনাশমিষ্টবিযুতিং কার্যান্তরাযং রুজং
দুঃখৈর্বন্ধুজনোদ্ভবৈশ্চ হিবুকে দৈন্যং চতুষ্পাদ্ভযম্ || ১৮||
পুত্রোত্পত্তিমুপৈতি সজ্জনযুতিং রাজামুকূল্যং সুতে
ষষ্ঠে মন্ত্রিণি পীডযন্তি রিপবঃ স্বজ্ঞাতযো ব্যাধযঃ |
যাত্রাং শোভনহেতবে বনিতযা সৌখ্যং সুতাপ্তিং স্মরে
মার্গক্লেশমরিষ্টমষ্টমগতে নষ্টং ধনৈঃ কষ্টতাম্ || ১৯||
ভাগ্যে জীবে সর্বসৌভাগ্যসিদ্ধিঃ
কর্মণ্যর্থাস্থনপুত্রাদিপিডা
লাভে পুত্রস্থানমানদিলাভো
রিঃফে দুঃখং সাধ্বসং দ্রব্যহেতোঃ || ২০||
অখিলবিষযভোগং বিত্তসিদ্ধিং বিভূতিং
সুখসুহৃদভিবৃদ্ধিং পুত্রলব্ধিং বিপত্তিম্ |
দিশতি যুবতিপীডাং সম্পদং বা সুখাপ্তিং
কলহমভযমর্থপ্রাপ্তিমিন্দ্রারিমন্ত্রী || ২১||
রোগাশৌচক্রিযাপ্তিং ধনসুতবিহতিং স্থানভৃত্যার্থলাভং
স্ত্রীবন্ধ্বর্থপ্রণাশং দ্রবিণসুতমতিপ্রচ্যুতিং সর্বসৌখ্যম্ |
স্ত্রীরোগাধ্বাবভীতিং স্বসুতপশুসুহৃদ্বিত্তনাশামযাতিং
জন্মাদেরষ্টমান্তং দিশতি পদবশেনার্কসূনুঃ ক্রমেণ || ২২||
দারিধ্রং ধর্মবিঘ্নং পিতৃসমবিলযং নিত্যদুঃখং শুভস্থে
দুর্ব্যাপারপ্রবৃত্তিং কলযতি দশমে মানভঙ্গং রুজং বা |
সৌখ্যান্যেকাদশস্থো বহুবিধবিভবপ্রাপ্তিমুত্কৃষ্টকীর্তিং
বিশ্রান্তি ব্যর্থকার্যাদ্বিসুহৃতিমরিভিঃ স্ত্রীসুতব্যাধিমন্ত্যে || ২৩||
দেহক্ষযং বিত্তবিনাশসৌখ্যে
দুঃখার্থনাশৌ সুখনাশমৃত্যূন্ |
হানিং চ লাভং সুভগং ব্যযং চ
কুর্যত্তমো জন্মগৃহাত্ক্রমেণ || ২৪||
ক্ষিতিতনযপতঙ্গৌ রাশিপূর্বত্রিভাগে
সুরপতিগুরুশুক্রৌ রাশিমধ্যত্রিভাগে|
তুহিনকিরণমন্দৌ রাশিপাশ্চাত্যভাগে
শশিতনযভুজঙ্গৌ পাকদৌ সার্বকালম্ || ২৫||
নক্ষত্রগোচরম্
রেখাহ্ সপ্তসমালিখেদুপরিগাস্তির্যক্তথৈব ক্রমা-
দীশাদগ্নিভমাদিতোঽপি গণযেদাদিত্যভস্যাবধি |
বেধা জন্মাদিনে মৃতির্ভযমথাধানাখ্যনক্ষত্রকে
কর্মণ্যর্থবিনাশং খলু রবির্দদ্যাত্সপাপো মৃতিম্ || ২৬||
এবং বিদ্ধে খচরৈঃ ক্রররন্যৈর্মরণম্ |
সৌম্যৈর্বিদ্ধে ন মৃতিবিদ্যাদেবং সকলং || ২৭||
আধনকর্মর্ক্ষবিপন্নিজর্ক্ষে
বৈনাশিকে প্রত্যরভে বধাখ্যে
পাপগ্রহো মৃত্যুভযং বিদধ্যা
দ্বেধেতথা কার্যহরঃ শুভাখ্যে || ২৮||
আদিত্যসঙ্ক্রান্তিদিনে গ্রহাণং
প্রবেশনে বা গ্রহণে চ যুদ্ধে |
উল্কানিপাতে চ তথাদ্ভুতে চ
জন্মত্রযং স্যান্মরণাদিদুঃখম্ || ২৯||
অসত্ফলঃ সৌম্যনিরীক্ষিতো যঃ
শুভপ্রদশ্চাপ্যশুভেক্ষিতশ্চ |
দ্বৌ নিষ্ফলৌ দ্বাবপি খেচরেন্দ্রৌ
যঃ শত্রুণা স্বেন বিলোকিতশ্চ || ৩০||
অনিষ্টভাবস্থিতখেচরেন্দ্রঃ
স্বোচ্চস্বগেহোপগতো যদি স্যাত্ |
ন দোষকৃচ্চোত্তমভাবগশ্চেত্
পূর্ণং ফলং যচ্ছতি গোচরেষু || ৩১||
গ্রহেশ্বরারুতে শুভগোচরস্থা
নীচারিমৌঢ্যং সমুপাশ্রিতাশ্রেত্ |
তে নিষ্ফলাঃ কিন্ত্বশুভাঙ্কসংস্থাঃ
কষ্টং ফলং সংবিদধত্যনল্পম্ || ৩২||
দ্বাদশাষ্টমজন্মস্থাঃ শন্যর্কাঙ্গারকা গুরুঃ |
কুর্বন্তি প্রাণসন্দেহং স্থানভ্রংশং ধনক্ষযম্ || ৩৩||
চদ্রাষ্টমে চ ধরণীতনযঃ কলত্রে
রাহুঃ শুভে কবিররৌ চ গুরুস্তৃতীযে |
অর্কঃ সুতেঽর্কিরুদযে চ বুধশ্চতুর্থে
মানার্থহানিমরণানি বদেদ্বিশেষাত্ || ৩৪||
অঙ্গগ্রহাঃ
বক্ত্রে ক্ষ্মা মূর্ঘ্নি চত্বার্যুরসি চ চতুরঃ সব্যহস্তে চতুষ্কং
পাদে ষড্বামহস্তে চতুরথ নযনে দ্বৌ চ গুহ্যে দ্বযং চ |
ভানুর্নাশং বিভুতিং বিজযমথ ধনং নির্ধনং দেহপীডাং
লাভং মৃত্যুং চ চক্রে জনযতি বিবিধান্ জন্মভাদ্দেহসংস্থঃ || ৩৫||
শীতাংশোর্বদনে দ্বযোরতিভযং ক্ষেমংশিরস্যম্বুধৌ
পৃষ্ঠে শত্রুজযং দ্বযোর্নযনযোর্নেত্রে ধনং জন্মভাত্ |
পঞ্চস্বাত্মসুখং হৃদি ত্রিষু করে বামে বিরোধং ক্রমাত্
পাদৌ ষট্সু বিদেশতাং জনযতি ত্রিষ্বর্থলাভং করে || ৩৬||
বক্ত্রে দ্বে মরণং করোত্যবনিজঃ ষট্ পাদযোবিগ্রহং
ক্রোডে ত্রীণি জযং চতুর্বিধনতাং বামে করে মস্তকে |
দ্বে লাভং চতুরাননেঽধিকভযং ক্ষেমংকরে দক্ষিণে
বার্দ্ধির্দ্বে নযনে বিদেশগমনং চক্রে স্বজন্মর্ক্ষতঃ || ৩৭||
মূঘ্নিং ত্রীণি মুখে ত্রযং চ করযোঃ ষট্ পঞ্চ কুক্ষৌ তথা
লিঙ্গে দ্বে দ্বিচতুষ্টযং চরণযোঃ প্রাপ্তেঽমরেন্দ্রাচিংতঃ |
শোকং লাভমনর্থমর্থনিচযং নাশং প্রতিষ্ঠাং তথা
দদ্যাদাত্মদিনাত্তথৈব ভৃগুজস্তদ্বদ্বুধোঽপি ক্রমাত্ || ৩৮||
ভূবেদবহ্নিগুণবেদশরাগ্নেত্র-
দস্ত্রং চ বক্ত্রকরপাদপদেষু হস্তে |
কুক্ষৌ চ মূর্ঘ্নি নযনদ্বযপৃষ্ঠোভাগে
ন্যস্য ক্রমেণ শনিসংযুতভান্নিজর্ক্ষাত্ || ৩৯||
দুঃখং চ সৌখ্যং গমনং চ নাশং
লাভং স্বভোগং সুখসৌখ্যমৃত্যূন্ |
বক্ত্রক্রমাদাহ ফলানি মন্দ-
স্যৈবং তমঃখেচরযোর্বদন্তু || ৪০||
যত্রাষ্টবর্গেঽধিকবিন্দবঃ স্যু-
স্তত্র স্থিতো গোচরতো গ্রহেন্দ্রঃ |
তদ্বত্ফলং প্রাহ শুভং ব্যযারি-
রন্ধ্রস্থিতো বাঽপি শুভং বিদ্ধত্তে || ৪১||
রবেদ্বদিশনক্ষত্রং ভূসুতস্য তৃতীযকম্ |
গুরোঃ ষট্তারকং চৈব শনেরষ্টমতারকম্ || ৪২||
এতেষাং চ পুরোলত্তা পৃষ্ঠোলত্তঃ প্রকীর্ত্তিতাঃ |
শুক্রস্য পঞ্চমং তারং চন্দ্রজস্য তু সপ্তমম্ || ৪৩||
রাহোস্তু নবম চৈব দ্বাবিংশং ভং হিমদ্যুতেঃ |
গ্রহস্থিতর্ক্ষাদ্গণযেল্লত্তাযাং জন্মভে ব্যথা || ৪৪||
রবেঃ সর্বার্থহানিঃ স্যাত্তমসোর্দুঃখমুচ্যতে |
মরণং জীবলত্তাযাং বন্ধুনাশো ভযাবহঃ || ৪৫||
শুক্রস্য কলহো ভ্রংশ অনর্থঃ শশিজস্য তু |
চন্দ্রস্য তু মহাহানির্লত্তামাত্রফলং ভবেত্ || ৪৬||
সর্বত্র লত্তাসাঙ্কর্যে দ্বিগুণত্রিগুণাদিকম্ |
বদেদ্দোষফলং নৄণাং গ্রহাল্লত্তাধিকক্রমাত্ || ৪৭||
সর্বতো ভদ্র চক্রোক্ত শুভবেধাঃ শুভাবহাঃ |
পাপবেধা দুঃখতরা গোচরেতাশ্চ চিত্তযেত্ || ৪৮||
