নাট্যশাস্ত্রম্ অধ্যায় ১১

 || নাট্যশাস্ত্রম্ অধ্যায় ১১ ||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ একাদশোঽধ্যায়ঃ |
এতাশ্চার্যো ময়া প্রোক্তা যথাবচ্ছস্ত্রমোক্ষণে |
চারীসংযোগজানীহ মণ্ডলানি নিবোধত || ১||
অতিক্রান্তং বিচিত্রং চ তথা ললিতসঞ্চরম্ |
সূচীবিদ্ধং দণ্ডপাদং বিহৃতালাতকে তথা || ২||
বামবন্ধং সললিতং ক্রান্তঞ্চাকাশগামি চ |
মণ্ডলানি দ্বিজশ্রেষ্ঠাঃ ! ভূমিগানি নিবোধত || ৩||
ভ্রমরাস্কন্দিতে স্যাতামাবর্তং চ ততঃ পরম্ |
সমাক্রন্দিতমপ্যাহুরেডকাক্রীডিতং তথা || ৪||
অড্ডিতং শকটাস্যং চ তথাঽধ্যর্ধকমেব চ |
পিষ্টকুট্টং চ বিজ্ঞেয়ং তথা চাষগতং পুনঃ || ৫||
এতান্যপি দশোক্তানি ভূমিগানীহ নামতঃ |
আদ্যং পাদং চ জনিতং কৃৎবোদ্বাহিতমাচরেৎ || ৬||
অলাতং বামকং চৈব পার্শ্বক্রান্তং চ দক্ষিণম্ |
সূচীবামং পুনশ্চৈব পার্শ্বক্রান্তং চ দক্ষিণম্ || ৭||
সূচীং বামক্রমং দদ্যাদপক্রান্তং চ দক্ষিণম্ |
সূচীবামং পুনশ্চৈব ত্রিকং চ পরিবর্তয়েৎ || ৮||
তথা দক্ষিণমুদ্বৃত্তমলাতঞ্চৈব বামকম্ |
পরিচ্ছিন্নং তু কর্তব্যং বাহ্যভ্রমরকেণ হি || ৯||
অতিক্রান্তং পুনর্বামং দণ্ডপাদঞ্চ দক্ষিণম্ |
বিজ্ঞেয়মেতদ্ ব্যায়ামে ৎবতিক্রান্তং তু মণ্ডলম্ || ১০||
আদ্যং তু জনিতং কৃৎবা তেনৈব চ নিকুট্টকম্ |
আস্পন্দিতং তু বামেন পার্শ্বক্রান্তং চ দক্ষিণম্ || ১১||
বামং সূচীপদং দদ্যাদপক্রান্তঞ্চ দক্ষিণম্ |
ভুজঙ্গত্রাসিতং বামমতিক্রান্তং চ দক্ষিণম্ || ১২||
উদ্বৃত্তং দক্ষিণং চৈবাঽলাতং চৈবাত্র বামকম্ |
পার্শ্বক্রান্তং পুনঃ সব্যং সূচীবামক্রমং তথা || ১৩||
বিক্ষেপো দক্ষিণস্য স্যাদপক্রান্তং চ বামকম্ |
বাহ্যভ্রমরকং চৈব বিক্ষেপং চৈব যোজয়েৎ || ১৪||
বিজ্ঞেয়মেতদ্ব্যায়ামে বিচিত্রং নাম মণ্ডলম্ |
কৃৎবোর্ধ্বজানুচরণমাদ্যং সূচীং প্রয়োজয়েৎ || ১৫||
অপক্রান্তঃ পুনর্বাম আদ্যঃ পার্শ্বগতো ভবেৎ |
বামসূচীং পুনর্দদ্যাৎ ত্রিকঞ্চ পরিবর্তয়েৎ || ১৬||
পার্শ্বক্রান্তং পুনশ্চাদ্যমতিক্রান্তঞ্চ বামকম্ |
সূচীবামক্রমং কৃৎবা হ্যপক্রান্তশ্চ বামকম্ || ১৭||
পার্শ্বক্রান্তং পুনশ্চাদ্যমতিক্রান্তং চ বামকম্ |
পরিচ্ছিন্নং চ কর্তব্যং বাহ্যভ্রমণকেন হি || ১৮||
এষ চারীপ্রয়োগস্তু কার্যো ললিতসঞ্চরৈঃ |
সূচীবামপদং দদ্যাৎ ত্রিকঞ্চ পরিবর্তয়েৎ || ১৯||
পার্শ্বক্রান্তঃ পুনশ্চাদ্যো বামোঽতিক্রান্ত এব চ |
সূচীমাদ্যং পুনর্দদ্যাদতিক্রান্তঞ্চ বামকম্ || ২০||
পার্শ্বক্রান্তং পুনশ্চাদ্যং সূচীবিদ্ধে তু মণ্ডলে |
আদ্যস্তু জনিতো ভূৎবা স চ দণ্ডক্রমো ভবেৎ || ২১||
বামসূচীং পুনর্দদ্যাৎ ত্রিকঞ্চ পরিবর্তয়েৎ |
উদ্বৃত্তো দক্ষিণশ্চ স্যাদলাতশ্চৈব বামকঃ || ২২||
পার্শ্বক্রান্তঃ পুনশ্চাদ্যো ভুজঙ্গত্রাসিতস্তথা |
অতিক্রান্তঃ পুনর্বামো দণ্ডপাদশ্চ দক্ষিণঃ || ২৩||
বামসূচীত্রিকাবর্তো দণ্ডপাদে তু মণ্ডলে |
আদ্যং তু জনিতং কৃৎবা তেনৈব চ নিকুট্টকম্ || ২৪||
আস্পন্দিতং চ বামেন হ্যুদ্বৃত্তং দক্ষিণেন চ |
অলাতং বামকং পাদং সূচীং দদ্যাত্তু দক্ষিণম্ || ২৫||
পার্শ্বক্রান্তঃ পুনর্বাম আক্ষিপ্তো দক্ষিণস্তথা |
সমাবর্ত্য ত্রিকং চৈব দণ্ডপাদং প্রসারয়েৎ || ২৬||
সূচীবামপদং দদ্যাৎ ত্রিকং তু পরিবর্তয়েৎ |
ভুজঙ্গত্রাসিতশ্চাদ্যো বামোঽতিক্রান্ত এব চ || ২৭||
এষ চারীপ্রয়োগস্তু বিহৃতে মণ্ডলে ভবেৎ |
সূচীমাদ্যক্রমং কৃৎবা চাঽপক্রান্তং চ বামকম্ || ২৮||
পার্শ্বক্রান্তস্ততশ্চাদ্যোঽপ্যলাতশ্চৈব বামকঃ |
ভ্রান্ত্বা চারীভিরেতাভিঃ পর্যায়েণাথ মণ্ডলম্ || ২৯||
ষট্সঙ্খ্যং সপ্তসঙ্খ্যং চ ললিতৈঃ পাদবিক্রমৈঃ |
অধিকুর্যাদপক্রান্তমতিক্রান্তং চ বামকম্ || ৩০||
অপক্রন্তঃ পুনশ্চাদ্যো বামোঽতিক্রান্ত এব চ |
পাদভ্রমরকশ্চ স্যাদলাতে খলু মণ্ডলে || ৩১||
সূচীমাদ্যক্রমং কৃৎবা হ্যপক্রান্তং চ বামকম্ |
আদ্যো দণ্ডক্রমশ্চৈব সূচীপাদস্তু বামকঃ || ৩২||
কার্যস্ত্রিকবিবর্তশ্চ পার্শ্বক্রান্তশ্চ দক্ষিণঃ |
আক্ষিপ্তং বামকং কুর্যাৎ দণ্ডপার্শ্বং চ দক্ষিণম্ || ৩৩||
উরুদ্বৃত্তং চ তেনৈব কর্তব্যং দক্ষিণেন তু |
সূচীবামক্রমং কৃৎবা ত্রিকং চ পরিবর্তয়েৎ || ৩৪||
অলাতশ্চ ভবেদ্বামঃ পার্শ্বক্রান্তশ্চ দক্ষিণঃ |
অতিক্রান্তঃ পুনর্বামো বামবন্ধে তু মণ্ডলে || ৩৫||
সূচীমাদ্যক্রমং কৃৎবা হ্যপক্রান্তং চ বামকম্ |
পার্শ্বক্রান্তঃ পুনশ্চাদ্যো ভুজঙ্গত্রাসিতঃ স চ || ৩৬||
অতিক্রান্তঃ পুনর্বাম আক্ষিপ্তো দক্ষিণস্তথা |
অতিক্রান্তঃ পুনর্বাম উরুদ্বৃত্তস্তথৈব চ || ৩৭||
অলাতশ্চ পুনর্বামঃ পার্শ্বক্রান্তশ্চ দক্ষিণঃ |
সূচীবামং পুনর্দদ্যাদপক্রান্তস্তু দক্ষিণঃ || ৩৮||
অতিক্রান্তঃ পুনর্বামঃ কার্যো ললিতসঞ্জ্ঞকঃ |
এষ পাদপ্রসারস্তু ললিতে মণ্ডলে ভবেৎ || ৩৯||
সূচীবামক্রমং কৃৎবা হ্যপক্রান্তশ্চ বামকম্ |
পার্শ্বক্রান্তং পুনশ্চাদ্যং বামপার্শ্বক্রমং তথা || ৪০||
ভ্রান্ত্বা চারীভিরেতাভিঃ পর্যায়েণাথ মণ্ডলম্ |
বামসূচীং ততো দদ্যাদপক্রান্তং চ দক্ষিণম্ || ৪১||
স্বভাবগমনে হ্যেতন্মণ্ডলং সংবিধীয়তে |
ক্রান্তমেতত্তু বিজ্ঞেয়ং নামতো নাট্যয়োক্তৃভিঃ || ৪২||
এতান্যাকাশগামীনি জ্ঞেয়ান্যেবং দশৈব তু |
অতঃ পরং প্রবক্ষ্যামি ভৌমানামিহ লক্ষণম্ || ৪৩||
আদ্যস্তু জনিতঃ কার্যো বামশ্চাস্পন্দিতো ভবেৎ |
শকটাস্যঃ পুনশ্চাদ্যো বামশ্চাপি প্রসারিতঃ || ৪৪||
আদ্যো ভ্রমরকঃ কার্যস্ত্রিকং চ পরিবর্তয়েৎ |
আস্কন্দিতঃ পুনর্বামঃ শকটাস্যশ্চ দক্ষিণঃ || ৪৫||
বামঃ পৃষ্ঠাপসর্পী চ দদ্যাদ্ ভ্রমরকং তথা |
স এবাস্পন্দিতঃ কার্যস্ত্বেতদ্ ভ্রমরমণ্ডলম্ || ৪৬||
আদ্যো ভ্রমরকঃ কার্যো বামশ্চৈবাড্ডিতো ভবেৎ |
কার্যস্ত্রিকবিবর্ত্তশ্চ শকটাস্যশ্চ দক্ষিণঃ || ৪৭||
উরুদ্বৃত্তঃ স এব স্যাদ্বামশ্চৈবাপসর্পিতঃ |
কার্যস্ত্রিকবিবর্ত্তশ্চ দক্ষিণঃ স্পন্দিতো ভবেৎ || ৪৮||
শকটাস্যো ভবেদ্বামস্তদেবাস্ফোটনং ভবেৎ |
এতদাস্পন্দিতং নাম ব্যায়ামে যুদ্ধমণ্ডলম্ || ৪৯||
আদ্যস্তু জনিতং কৃৎবা বামশ্চৈব নিকুট্টকম্ |
শকটাস্যঃ পুনশ্চাদ্য উরুদ্বৃত্তঃ স এব তু || ৫০||
পৃষ্ঠাপসর্পী বামশ্চ স চ চাষগতির্ভবেৎ |
আস্পন্দিতঃ পুনর্দক্ষঃ শকটাস্যশ্চ বামকঃ || ৫১||
আদ্যো ভ্রমরকশ্চৈব ত্রিকং চ পরিবর্তয়েৎ |
পৃষ্ঠাপসর্পী বামশ্চেত্যাবর্তং মণ্ডলং ভবেৎ || ৫২||
সমপাদং বুধঃ কৃৎবা স্থানং হস্তৌ প্রসারয়েৎ |
নিরন্তরাবূর্ধ্বতলাবাবেষ্ট্যোদ্বেষ্ট্য চৈব হি || ৫৩||
কটীতটে বিনিক্ষিপ্য চাদ্যমাবর্ত্তয়েৎ ক্রমাৎ |
যথাক্রমং পুনর্বামমাবর্তেন প্রসারয়েৎ || ৫৪||
চারয়া চানয়া ভ্রান্ত্বা পর্যায়েণাথ মণ্ডলম্ |
সমোৎসরিতমেতত্তু কার্যং ব্যায়ামমণ্ডলম্ || ৫৫||
পাদৈস্তু ভূমিসংযুক্তৈঃ সূচীবিদ্ধৈস্তথৈব চ |
এডকাক্রীডিতৈশ্চৈব তূর্ণৈস্ত্রিকবিবর্তিতৈঃ || ৫৬||
সূচীবিদ্ধাপবিদ্ধৈশ্চ ক্রমেণাবৃত্ত্য মণ্ডলম্ |
এডকাক্রীডিতং বিদ্যাৎ খণ্ডমণ্ডলসঞ্জ্ঞিতম্ || ৫৭||
সব্যমুদ্ঘট্টিতং কৃৎবা তেনৈবাবর্তমাচরেৎ |
তেনৈবাস্কন্দিতঃ কার্যঃ শকটাস্যশ্চ বামকঃ || ৫৮||
আদ্যঃ পৃষ্ঠাপসর্পী চ স চ চাষগতির্ভবেৎ |
অড্ডিতশ্চ পুনর্বাম আদ্যশ্চৈবাপসর্পিতঃ || ৫৯||
বামো ভ্রমরকঃ কার্য আদ্য আস্কন্দিতো ভবেৎ |
তেনৈবাস্ফোটনং কুর্যাদেতদড্ডিতমণ্ডলম্ || ৬০||
আদ্যং তু জনিতং কৃৎবা তেনৈব চ নিকুট্টকম্ |
স এব শকটাস্যশ্চ বামশ্চাস্কন্দিতো ভবেৎ || ৬১||
বিজ্ঞেয়ং শকটাস্যং তু ব্যায়ামে যুদ্ধমণ্ডলম্ |
পাদৈশ্চ শকটাস্যস্থৈঃ পর্যায়েণাথ মণ্ডলম্ || ৬২||
আদ্যস্তু জনিতো ভূৎবা স এবাস্কন্দিতো ভবেৎ |
অপসর্পী পুনর্বামঃ শকটাস্যশ্চ দক্ষিণঃ || ৬৩||
ভ্রান্ত্বা চারীভিরেতাভিঃ পর্যায়েণাথ মণ্ডলম্ |
অধ্যর্ধমেতদ্বিজ্ঞেয়ং নিয়ুদ্ধে চাপি মণ্ডলম্ || ৬৪||
সূচীমাদ্যক্রমং কৃৎবা হ্যপক্রান্তং চ বামকম্ |
ভুজঙ্গত্রাসিতশ্চাদ্য এবমেব তু বামকঃ || ৬৫||
ভুজঙ্গত্রাসিতৈর্ভ্রান্ত্বা পাদৈরপি চ মণ্ডলম্ |
পিষ্টকুট্টং চ বিজ্ঞেয়ং চারীভির্মণ্ডলং বুধৈঃ || ৬৬||
সর্বৈশ্চাষগতৈঃ পাদৈঃ পরিভ্রাম্য তু মণ্ডলম্ |
এতচ্চাষগতং বিদ্যান্নিয়ুদ্ধে চাপি মণ্ডলম্ || ৬৭||
নানাচারীসমুত্থানি মণ্ডলানি সমাসতঃ |
উক্তান্যতঃ পরং চৈব সমচারীণি যোজয়েৎ || ৬৮||
সমচারীপ্রয়োগো যস্তৎসমং নাম মণ্ডলম্ |
আচার্যবুদ্ধ্যা তানীহ কর্তব্যানি প্রয়োক্তৃভিঃ || ৬৯||
এতানি খণ্ডানি সমণ্ডলানি যুদ্ধে নিয়ুদ্ধে চ পরিক্রমে চ |
লীলাঙ্গমাধুর্যপুরস্কৃতানি কার্যাণি বাদ্যানুগতানি তজ্জ্ঞৈঃ || ৭০||
ইতি ভরতীয়ে নাট্যশাস্ত্রে মণ্ডলবিধানং নাম
একাদশোঽধ্যায়ঃ সমাপ্তঃ |

<