নাট্যশাস্ত্রম্ অধ্যায় ১০

 || নাট্যশাস্ত্রম্ অধ্যায় ১০ ||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ দশমোঽধ্যায়ঃ |
এবং পাদস্য জঙ্ঘায়া ঊর্বোঃ কট্যাস্তথৈব চ |
সমানকরণে চেষ্টা সা চারীত্যভিধীয়তে || ১||
বিধানোপগতাশ্চার্যো ব্যায়চ্ছন্তে পরস্পরম্ |
যস্মাদঙ্গসমায়ুক্তাস্তস্মাদ্ব্যায়াম উচ্যতে || ২||
একপাদপ্রচারো যঃ সা চারীত্যভিসঞ্জ্ঞিতা |
দ্বিপাদক্রমণং যত্তু করণং নাম তদ্ভবেৎ || ৩||
করণানাং সমায়োগঃ খণ্ডমিত্যভিধীয়তে |
খণ্ডৈস্ত্রিভিশ্চতুর্ভির্বা সংযুক্তং মণ্ডলং ভবেৎ || ৪||
চারীভিঃ প্রসৃতং নৃত্তং চারীভিশ্চেষ্টিতং তথা |
চারীভিঃ শস্ত্রমোক্ষশ্চ চার্যো যুদ্ধে চ কীর্তিতাঃ || ৫||
যদেতৎপ্রস্তুতং নাট্যং তচ্চারীষ্বেব সঞ্জ্ঞিতম্ |
নহি চার্যা বিনা কিঞ্চিন্নাট্যেঽঙ্গং সম্প্রবর্ততে || ৬||
তস্মাচ্চারীবিধানস্য সম্প্রবক্ষ্যামি লক্ষণম্ |
যা যস্মিংস্তু যথা যোজ্যা নৃত্তে যুদ্ধে গতৌ তথা || ৭||
সমপাদা স্থিতাবর্তা শকটাস্যা তথৈব চ |
অধ্যর্ধিকা চাষগতির্বিচ্যবা চ তথাপরা || ৮||
এডকাক্রীডিতা বদ্ধা উরুদ্বৃত্তা তথাড্ডিতা |
উৎস্পন্দিতা চ জনিতা স্যন্দিতা চাপস্যন্দিতা || ৯||
সমোৎসরিতমত্তল্লী মত্তল্লী চেতি ষোডশ |
এতা ভৌম্যঃ স্মৃতাশ্চার্যঃ শৃণুতাকাশিকীঃ পুনঃ || ১০||
অতিক্রান্তা হ্যপক্রান্তা পার্শ্বক্রান্তা তথৈব চ |
ঊর্ধ্বজানুশ্চ সূচী চ তথা নূপুরপাদিকা || ১১||
ডোলপাদা তথাক্ষিপ্তা আবিদ্ধোদ্বৃত্তসঞ্জ্ঞিতে |
বিদ্যুদ্ভ্রান্তা হ্যলাতা চ ভুজঙ্গত্রাসিতা তথা || ১২||
মৃগপ্লুতা চ দণ্ডা চ ভ্রমরী চেতি ষোডশ |
আকাশিক্যঃ স্মৃতা হ্যেতা লক্ষণং চ নিবোধত || ১৩||
পাদৈর্নিরন্তরকৃতৈস্তথা সমনখৈরপি |
সমপাদা স্মৃতা চারী বিজ্ঞেয়া স্থানসংশ্রয়া || ১৪||
ভূমিঘৃষ্টেন পাদেন কৃৎবাভ্যন্তরমণ্ডলম্|
পুনরুৎসাদয়েদন্যং স্থিতাবর্ত্তা তু সা স্মৃতা || ১৫||
নিষণ্ণাঙ্গস্তু চরণং প্রসার্য তলসঞ্চরম্|
উদ্বাহিতমুরঃ কৃৎবা শকটাস্যাং প্রয়োজয়েৎ || ১৬||
সব্যস্য পৃষ্ঠতো বামশ্চরণস্তু যদা ভবেৎ |
তস্যাপসর্পণং চৈব জ্ঞেয়া সাধ্যর্ধিকা বুধৈঃ || ১৭||
পাদঃ প্রসারিতঃ সব্যঃ পুনশ্চৈবোপসর্পিতঃ |
বামঃ সব্যাপসর্পী চ চাষগত্যাং বিধীয়তে || ১৮||
বিচ্যবাৎ সমপাদায়া বিচ্যবাং সম্প্রয়োজয়েৎ |
নিকুট্টয়ংস্তলাগ্রেণ পাদস্য ধরণীতলম্|| ১৯||
তলসঞ্চরপাদাভ্যামুৎপ্লুত্য পতনং তু যৎ |
পর্যায়তশ্চ ক্রিয়তে এডকাক্রীডিতা তু সা || ২০||
অন্যোন্যজঙ্ঘাসংবেগাৎ কৃৎবা তু স্বস্তিকং ততঃ |
ঊরুভ্যাম্ বলনং যস্মাৎ সা বদ্ধা চার্যুদাহৃতা || ২১||
তলসঞ্চরপাদস্য পার্ষ্ণির্বাহ্যোন্মুখী যদা |
জঙ্ঘাঞ্চিতা তথোদ্বৃত্তা ঊরুদ্বৃত্তেতি সা স্মৃতা || ২২||
অগ্রতঃ পৃষ্ঠতো বাপি পাদস্তু তলসঞ্চরঃ |
দ্বিতীয়পাদো নির্ঘৃষ্টঃ যস্যাং স্যাদড্ডিতা তু সা|| ২৩||
শনৈঃ পাদো নিবর্তেত বাহ্যেনাভ্যন্তরেণ চ |
যদ্রেচকানুসারেণ সা চার্যুৎস্যন্দিতা স্মৃতা || ২৪||
মুষ্টিহস্তশ্চ বক্ষঃস্থঃ করোঽন্যশ্চ প্রবর্তিতঃ |
তলসঞ্চরপাদশ্চ জনিতা চার্যুদাহৃতা || ২৫||
পঞ্চতালান্তরং পাদং প্রসার্য স্যন্দিতাং ন্যসেৎ |
দ্বিতীয়েন তু পাদেন তথাপস্যন্দিতামপি || ২৬||
তলসঞ্চরপাদাভ্যাম্ ঘূর্ণমানোপসর্পণৈঃ |
সমোৎসরিতমত্তল্লী ব্যায়ামে সমুদাহৃতা || ২৭||
উভাভ্যামপি পাদাভ্যাং ঘূর্ণমানোপসর্পণৈঃ |
উদ্বেষ্টিতাপবিদ্ধৈশ্চ হস্তৈর্মত্তল্ল্যুদাহৃতা || ২৮||
এতা ভৌম্যঃ স্মৃতাশ্চার্যো নিয়ুদ্ধকরণাশ্রয়াঃ |
আকাশকীনাং চারীণাং সম্প্রবক্ষ্যামি লক্ষণম্ || ২৯||
কুঞ্চিতং পাদমুৎক্ষিপ্য পুরতঃ সম্প্রসারয়েৎ |
উৎক্ষিপ্য পাতয়েচ্চৈনমতিক্রান্তা তু সা স্মৃতা || ৩০||
ঊরুভ্যাং বলনং কৃৎবা কুঞ্চিতং পাদমুদ্ধরেৎ |
পার্শ্বে বিনিক্ষিপেচ্চৈনমপক্রান্তা তু সা স্মৃতা || ৩১||
কুঞ্চিতং পাদমুৎক্ষিপ্য পার্শ্বেনোৎপতনং ন্যসেৎ |
উদ্ঘট্টিতেন পাদেন পার্শ্বক্রান্তা বিধীয়তে || ৩২||
কুঞ্চিতং পাদমুৎক্ষিপ্য জানুস্তনসমং ন্যসেৎ |
দ্বিতীয়ং চ ক্রমাৎ স্তব্ধমূর্ধ্বজানুঃ প্রকীর্তিতা || ৩৩||
কুঞ্চিতং পাদমুৎক্ষিপ্য জানূর্ধ্বং সম্প্রসারয়েৎ |
পাতয়েচ্চাগ্রয়োগেন সা সূচী পরিকীর্তিতা || ৩৪||
পৃষ্ঠতো হ্যঞ্চিতং কৃৎবা পাদমগ্রতলেন তু |
দ্রুতং নির্যাতয়েদ্ভূমৌ চারী নূপুরপাদিকা || ৩৫||
কুঞ্চিতং পাদমুৎক্ষিপ্য পার্শ্বাৎপার্শ্বং তু দোলয়েৎ |
পাতয়েদঞ্চিতং চৈবং দোলপাদা তু সা স্মৃতা || ৩৬||
কুঞ্চিতং পাদমুৎক্ষিপ্য আক্ষিপ্য ৎবঞ্চিতং ন্যসেৎ |
জঙ্ঘাস্বস্তিকসংযুক্তা চাক্ষিপ্তা নাম সা স্মৃতা || ৩৭||
স্বস্তিকস্যাগ্রতঃ পাদঃ কুঞ্চিতস্তু প্রসারিতঃ |
নিপতেদঞ্চিতাবিদ্ধ আবিদ্ধা নাম সা স্মৃতা || ৩৮||
পাদমাবিদ্ধমাবেষ্ট্য সমুৎক্ষিপ্য নিপাতয়েৎ |
পরিবৃত্ত্য দ্বিতীয়ং চ সোদ্বৃত্তা চার্যুদাহৃতা || ৩৯||
পৃষ্ঠতো বলিতং পাদং শিরোঘৃষ্টং প্রসারয়েৎ |
সর্বতো মণ্ডলাবিদ্ধং বিদ্যুদ্ভ্রান্তা তু সা স্মৃতা || ৪০||
পৃষ্ঠঃ প্রসারিতঃ পাদো বলিতোঽভ্যন্তরীকৃতঃ |
পার্ষ্ণিপ্রপতিতশ্চৈব হ্যলাতা সম্প্রকীর্তিতা || ৪১||
কুঞ্চিতং পাদমুৎক্ষিপ্য ত্র্যশ্রমূরুং বিবর্তয়েৎ |
কটিজানুবিবর্তাচ্চ ভুজঙ্গত্রাসিতা ভবেৎ || ৪২||
অতিক্রান্তক্রমং কৃৎবা সমুৎপ্লুত্য নিপাতয়েৎ |
জঙ্ঘাঞ্চিতোপরিক্ষিপ্তা সা জ্ঞেয়া হরিণপ্লুতা || ৪৩||
নূপুরং চরণং কৃৎবা পুরতঃ সম্প্রসারয়েৎ |
ক্ষিপ্রমাবিদ্ধকরণং দণ্ডপাদা তু সা স্মৃতা || ৪৪||
অতিক্রান্তক্রমং কৃৎবা ত্রিকং তু পরিবর্তয়েৎ |
দ্বিতীয়পাদভ্রমণাত্তলেন ভ্রমরী স্মৃতা || ৪৫||
আকাশিক্যঃ স্মৃতা হ্যেতা ললিতাঙ্গক্রিয়াত্মকাঃ |
ধনুর্বজ্রাসিশস্ত্রাণাং প্রয়োক্তব্যা প্রয়োক্তৃভিঃ || ৪৬||
অগ্রগৌ পৃষ্ঠগৌ বাপি হ্যনুগৌ চাপি যোগতঃ |
পাদয়োস্তু দ্বিজা হস্তৌ কর্তব্যৌ নাট্যয়োক্তৃভিঃ || ৪৭||
যতঃ পাদস্ততো হস্তো যতো হস্তস্ততস্ত্রিকম্ |
পাদস্য নির্গমং জ্ঞাৎবা তথোপাঙ্গানি যোজয়েৎ || ৪৮||
পাদচার্যাং যথা পাদো ধরণীমেব গচ্ছতি |
এবং হস্তশ্চরিৎবা তু কটিদেশং সমাশ্রয়েৎ || ৪৯||
এতাশ্চার্যো ময়া প্রোক্তা ললিতাঙ্গক্রিয়াত্মকাঃ |
স্থানান্যাসাং প্রবক্ষ্যামি সর্বশস্ত্রবিমোক্ষণে || ৫০||
বৈষ্ণবং সমপাদং চ বৈশাখং মণ্ডলং তথা |
প্রত্যালীঢং তথালীঢং স্থানান্যেতানি ষণ্ নৃণাং || ৫১||
দ্বৌ তালাবর্ধতালশ্চ পাদয়োরন্তরং ভবেৎ |
তয়োঃ সমস্থিতস্ত্বেকঃ ত্র্যশ্রঃ পক্ষস্থিতোঽপরঃ || ৫২||
কিঞ্চিদঞ্চিতজঙ্ঘং চ সৌষ্ঠবাঙ্গপুরস্কৃতম্ |
বৈষ্ণবং স্থানমেতদ্ধি বিষ্ণুরত্রাধিদৈবতম্ || ৫৩||
স্থানেনানেন কর্তব্যঃ সংল্লাপস্তু স্বভাবজঃ |
নানাকার্যান্তরাপেতৈর্নৃভিরুত্তমমধ্যমৈঃ || ৫৪||
চক্রস্য মোক্ষণে চৈব ধারণে ধনুষস্তথা |
ধৈর্যদানাঙ্গলীলাসু তথা ক্রোধে প্রয়োজয়েৎ || ৫৫||
ইদমেব বিপর্যস্তং প্রণয়ক্রোধ ইষ্যতে |
উপালম্ভকৃতে চৈব প্রণয়োদ্বেগয়োস্তথা || ৫৬||
শঙ্কাসূয়োগ্রতাচিন্তামতিস্মৃতিষু চৈব হি |
দৈন্যে চপলতায়োগে গর্বাভীষ্টেষু শক্তিষু || ৫৭||
শৃঙ্গারাদ্ভুতবীভৎসবীরপ্রাধান্যয়োজিতম্ |
সমপাদে সমৌ পাদৌ তালমাত্রান্তরস্থিতৌ || ৫৮||
স্বভাবসৌষ্ঠবোপেতৌ ব্রহ্মা চাত্রাধিদৈবতম্ |
অনেন কার্যং স্থানেন বিপ্রমঙ্গলধারণম্ || ৫৯||
রূপণে পক্ষিণাং চৈব বরং কৌতুকমেব চ |
স্বস্থানং স্যন্দনস্থানাং বিমানস্থায়িনামপি || ৬০||
লিঙ্গস্থানাং ব্রতস্থানাং স্থানমেতত্তু কারয়েৎ |
তালাস্ত্রয়োঽর্ধতালশ্চ পাদয়োরন্তরং ভবেৎ || ৬১||
তালাংস্ত্রীনর্ধতালাংশ্চ নিষণ্ণোরুং প্রকল্পয়েৎ |
ত্র্যশ্রৌ বক্ষঃস্থিতৌ চৈব তত্র পাদো প্রয়োজয়েৎ || ৬২||
বৈশাখস্থানমেতদ্ধি স্কন্দশ্চাত্রাধিদৈবতম্ |
স্থানেনানেন কর্তব্যমশ্বানাং বাহনং বুধৈঃ || ৬৩||
ব্যায়ামনির্গমশ্চৈব স্থূলপক্ষিনিরূপণম্ |
শরাণাং চ সমুৎক্ষেপো ব্যায়ামকরণে তথা || ৬৪||
রেচকেষু চ কর্তব্যমিদমেব প্রয়োক্তৃভিঃ |
ঐন্দ্রে তু মণ্ডলে পাদৌ চতুস্তালান্তরস্থিতৌ || ৬৫||
ত্র্যশ্রৌ পক্ষঃস্থিতৌ চৈব কটিজানূ সমৌ তথা |
ধনুর্বজ্রাসিশস্ত্রাণি মণ্ডলেন প্রয়োজয়েৎ || ৬৬||
বাহনং কুঞ্জরাণাং তু স্থূলপক্ষিনিরূপণম্ |
অস্যৈব দক্ষিণং পাদং পঞ্চ তালান্ প্রসার্য তু || ৬৭||
আলীঢং স্থানকং কুর্যাদ্ রুদ্রশ্চাত্রাধিদৈবতম্ |
অনেন কার্যং স্থানেন বীররৌদ্রকৃতং তু যৎ || ৬৮||
উত্তরোত্তরসঞ্জল্পো রোষামর্ষকৃতস্তু যঃ |
মল্লানাঞ্চৈব সম্ফেটঃ শত্রূণাং চ নিরূপণম্ || ৬৯||
তথাভিদ্রবণং চৈব শস্ত্রাণাং চৈব মোক্ষণম্ |
কুঞ্চিতং দক্ষিণং কৃৎবা বামং পাদং প্রসার্য চ || ৭০||
আলীঢপরিবর্তস্তু প্রত্যালীঢমিতি স্মৃতম্ |
আলীঢসংহিতং শস্ত্রং প্রত্যালীঢেন মোক্ষয়েৎ || ৭১||
নানাশস্ত্রবিমোক্ষো হি কার্যোঽনেন প্রয়োক্তৃভিঃ |
ন্যায়াচ্চৈব হি বিজ্ঞেয়াশ্চৎবারঃ শস্ত্রমোক্ষণে || ৭২||
ভারতঃ সাৎবতশ্চৈব বার্ষগণ্যোঽথ কৈশিকঃ |
ভারতে তু কটীচ্ছেদ্যং পাদচ্ছেদ্যং তু সাৎবতে || ৭৩||
বক্ষসো বার্ষগণ্যে তু শিরশ্ছেদ্যন্তু কৈশিকে |
এভিঃ প্রয়োক্তৃভির্ন্যায়ৈর্নানাচারীসমুত্থিতৈঃ || ৭৪||
প্রবিচার্য প্রয়োক্তব্যং নানাশস্ত্রবিমোক্ষণে |
ন্যায়াশ্রিতৈরঙ্গহারৈর্ন্যায়াচ্চৈব সমুত্থিতৈঃ || ৭৫||
যস্মাদ্ যুদ্ধানি বর্তন্তে তস্মান্ন্যায়াঃ প্রকীর্তিতাঃ |
বামহস্তে বিনিক্ষিপ্য খেটকং শস্ত্রফেটকম্ || ৭৬||
শস্ত্রমাদায় হস্তেন প্রবিচারমথাচরেৎ |
প্রসার্য চ করৌ সম্যক্ পুনরাক্ষিপ্য চৈব হি || ৭৭||
খেটকং ভ্রাময়েৎ পশ্চাৎ পার্শ্বাৎ পার্শ্বমথাপি চ |
শিরঃপরিগমশ্চাপি কার্যঃ শস্ত্রেণ যোক্তৃভিঃ || ৭৮||
কপোলস্যান্তরে বাপি শস্ত্রস্যোদ্বেষ্টনং তথা |
পুনশ্চ খড্গহস্তেন ললিতোদ্বেষ্টিতেন চ || ৭৯||
খেটকেন চ কর্তব্যঃ শিরঃপরিগমো বুধৈঃ |
এবং প্রচারঃ কর্তব্যো ভারতে শস্ত্রমোক্ষণে || ৮০||
সাৎবতে চ প্রবক্ষ্যামি প্রবিচারং যথাবিধিঃ |
স এব প্রবিচারস্তু খড্গখেটকয়োঃ স্মৃতঃ || ৮১||
কেবলং পৃষ্ঠতঃ শস্ত্রং কর্তব্যং খলু সাৎবতে |
গতিশ্চ বার্ষগণ্যেঽপি সাৎবতেন ক্রমেণ তু || ৮২||
শস্ত্রখেটকয়োশ্চাপি ভ্রমণং সংবিধীয়তে |
শিরঃ পরিগমস্তদ্বচ্ছস্ত্রস্যেহ ভবেত্তথা || ৮৩||
উরস্যুদ্বেষ্টনং কার্যং শস্ত্রস্যাংশেঽথবা পুনঃ |
ভারতে প্রবিচারোঽযং কর্তব্যঃ স তু কৈশিকে || ৮৪||
বিভ্রময়্য তথা শস্ত্রং কেবলং মূর্ধ্নি পাতয়েৎ |
প্রবিচারা প্রয়োক্তব্যা হ্যেবমেতেঽঙ্গলীলয়া || ৮৫||
ধনুর্বজ্রাসিশস্ত্রাণাং প্রয়োক্তব্যা বিমোক্ষণে |
ন ভেদ্যং নাপি তু চ্ছেদ্যং ন চাপি রুধিরস্রুতিঃ || ৮৬||
রঙ্গে প্রহরণে কার্যো ন চাপি ব্যক্তঘাতনম্ |
সঞ্জ্ঞামাত্রেণ কর্তব্যং শস্ত্রাণাং মোক্ষণং বুধৈঃ || ৮৭||
অথবাভিনয়োপেতং কুর্যাচ্ছেদ্যং বিধানতঃ |
অঙ্গসৌষ্ঠবসংযুক্তৈরঙ্গহারৈর্বিভূষিতম্ || ৮৮||
ব্যায়ামং কারয়েৎ সম্যক্ লয়তালসমন্বিতম্ |
সৌষ্ঠবে হি প্রয়ত্নস্তু কার্যো ব্যায়ামসেবিভিঃ || ৮৯||
সৌষ্ঠবে লক্ষণং প্রোক্তং বর্তনাক্রময়োজিতম্ |
শোভা সর্বৈব নিত্যং হি সৌষ্ঠবং সমুপাশ্রিতা || ৯০||
অচঞ্চলমকুব্জং চাসন্নগাত্রমথাপি চ |
নাত্যুচ্চং চলপাদঞ্চ সৌষ্ঠবাঙ্গং প্রয়োজয়েৎ || ৯১||
কটী কর্ণসমা যত্র কূর্পরাংসশিরস্তথা |
সমুন্নতমুরশ্চৈব সৌষ্ঠবং নাম তদ্ভবেৎ || ৯২||
নহি সৌষ্ঠবহীনাঙ্গঃ শোভতে নাট্যনৃত্তয়োঃ |
অত্র নিত্যং প্রয়ত্নো হি বিধেয়ো মধ্যমোত্তমৈঃ || ৯৩||
নাট্যং নৃত্তং চ সর্বং হি সৌষ্ঠবে সম্প্রতিষ্ঠিতম্ |
কটীনামভিচরৌ হস্তৌ বক্ষশ্চৈব সমুন্নতম্ || ৯৪||
বৈষ্ণবং স্থানমিত্যঙ্গং চতুরশ্রমুদাহৃতম্ |
পরিমার্জনমাদানং সন্ধানং মোক্ষণম্ তথা || ৯৫||
ধনুষস্তু প্রয়োক্তব্যং করণং তু চতুর্বিধম্ |
সংমার্জনং পরামর্ষমাদানং গ্রহণং ক্রিয়া || ৯৬||
সন্ধানং শরবিন্যাসো বিক্ষেপো মোক্ষণং ভবেৎ |
তৈলাভ্যক্তেন গাত্রেণ যবাগূমৃদিতেন চ || ৯৭||
ব্যায়ামং কারয়েৎ শ্রীমান্ ভিত্তাবাকালিকে তথা |
যোগ্যায়াং মাতৃকা ভিত্তিস্তস্মাদ্ভিত্তিং সমাশ্রয়েৎ || ৯৮||
ভিত্তৌ প্রসারিতাঙ্গন্তু ব্যায়ামং কারয়েন্নরম্ |
বলার্থং চ নিষেবেত নস্যং বস্তিবিধিং তথা || ৯৯||
স্নিগ্ধান্যন্যানি চ তথা রসকং পানকং তথা |
আহারেঽধিষ্ঠিতাঃ প্রাণাঃ প্রাণে যোগ্যাঃ প্রতিষ্ঠিতাঃ || ১০০||
তস্মাদ্যোগ্যাপ্রসিধ্যর্থমাহারে যত্নবান্ ভবেৎ |
অশুদ্ধকায়ং প্রক্লান্তমতীবক্ষুৎপিপাসিতম্ || ১০১||
অতিপীতং তথা ভুক্তং ব্যায়ামং নৈব কারয়েৎ |
অচলৈর্মধুরৈগাত্রৈশ্চতুরশ্রেণ বক্ষসা || ১০২||
ব্যায়ামং কারয়েদ্ধীমান্ নরমঙ্গক্রিয়াত্মকম্ |
এবং ব্যায়ামসংযোগে কার্যশ্চারীকৃতো বিধিঃ || ১০৩||
অত ঊর্ধ্বং প্রবক্ষ্যামি মণ্ডলানাং বিকল্পনম্ |

ইতি ভরতীয়ে নাট্যশাস্ত্রে চারীবিধানো নাম দশমোঽধ্যায়ঃ |

<