নাট্যশাস্ত্রম্ অধ্যায় ০৯

.. নাট্যশাস্ত্রম্ অধ্যায় ৯ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ ষষ্ঠোঽধ্যায়ঃ .
অথ নবমোঽধ্যায়ঃ .
এবমেতচ্ছিরোনেত্রভ্রুনাসোষ্ঠকপোলজম্ .
কর্ম লক্ষণসংযক্তমুপাঙ্গানা.ম্ ময়োদিতম্ .. ১..
হস্তোরপার্শ্বজঠরকটীজঙ্ঘোরুপাদতঃ .
লক্ষণ.ম্ সম্প্রবক্ষ্যামি বিনিয়োগং চ তত্ত্বতঃ .. ২..
হস্তাদীনাং প্রবক্ষ্যামি কর্ম নাট্যপ্রয়োজকম্
যথা যেনাভিনেয়ং চ তন্মে নিগদতঃ শৃণু .. ৩..
পতাকস্ত্রিপতাকশ্চ তথা বৈ কর্তরীমুখঃ .
অর্ধচন্দ্রো হ্যরালশ্চ শুকতুণ্ডস্তথৈব চ .. ৪..
মুষ্টিশ্চ শিখরাখ্যশ্চ কপিত্থঃ খটকামুখঃ .
সূচ্যাস্যঃ পদ্মকোশশ্চ তথা বৈ সর্পশীর্ষকঃ .. ৫..
মৃগশীর্ষঃ পরো জ্ঞেয়ো হস্তাভিনয়য়োক্তৃভিঃ .
কাঙ্গুলকোঽলপদ্মশ্চ চতুরো ভ্রমরস্তথ .. ৬..
হংসাস্যো হংসপক্ষশ্চ সন্দংশো মুকুলস্তথা .
ঊর্ণনাভস্তাম্রচূডচতুর্বিংশতিরীরিতাঃ .. ৭..
অসংযুতাঃ সংযুতাশ্চ গদতো মে নিবোধত .
অঞ্জলিশ্চ কপোতশ্চ কর্কটঃ স্বস্তিকস্তথা .. ৮..
খটকাবর্ধমানশ্চ হ্যুৎসংগো নিষধস্তথা .
দোলঃ পুষ্পপুটশ্চৈব তথা মকর এব চ .. ৯..
গজদন্তোঽবহিত্থশ্চ বর্ধমানস্তথৈব চ .
এতে তু সংযুতা হস্তা ময়া প্রোক্তাস্ত্রয়োদশ .. ১০..
নৃত্তহস্তানতশ্চোর্ধ্ব গদতো মে নিবোধত .
চতুরস্রৌ তথোদ্বৃত্তৌ তথা তলমুখৌ স্মৃতৌ .. ১১..
স্বস্তিকৌ বিপ্রকীর্ণৌ চাপ্যরালখটকামুখৌ .
আবিদ্ধবক্রৌ সূচ্যাস্যৌ রেচিতাবর্ধরেচিতৌ .. ১২..
উত্তানাবঞ্চিতৌ বাপি পল্লবৌ চ তথা করৌ .
নিতম্বৌ চাপি বিজ্ঞেয়ৌ কেশবন্ধৌ তথৈব চ .. ১৩..
সম্প্রোক্তৌ করিহস্তৌ চ লতাখ্যৌ চ তথৈব চ .
পক্ষবঞ্চিতকৌ চৈব পক্ষপ্রদ্যোতকৌ তথা .. ১৪..
জ্ঞেয়ো গরুডপক্ষৌ চ হংসপক্ষৌ তথৈব চ .
ঊর্ধ্বমণ্ডলিনৌ চৈব পার্শ্বমণ্ডলিনৌ তথা .. ১৫..
উরোমণ্ডলিনৌ চৈব উরঃপার্শ্বার্ধমণ্ডলৌ .
মুষ্টিকস্বস্তিকৌ চাপি নলিনীপদ্মকোশকৌ .. ১৬..
অলপদ্মাবুল্বনৌ চ ললিতৌ বলিতৌ তথা .
সপ্তষষ্টিকরা হ্যেতে নামতোঽভিহিতা ময়া .. ১৭..
যথা লক্ষণমেতেষাং কর্মাণি চ নিবোধত .
প্রসারিতাঃ সমাঃ সর্বা যস্যাঙ্গুল্যো ভবন্তি হি .
কুঞ্চিতশ্চ তথাঙ্গুষ্ঠঃ স পতাক ইতি স্মৃতঃ .. ১৮..
এষ প্রহারপাতে প্রতাপন নোদনে প্রহর্ষে চ .
গর্বেঽপ্যহমিতি তজ্জ্ঞৈললাটদেশোত্থিতঃ কার্যঃ .. ১৯..
এষোঽগ্নিবর্ষধারানিরূপণে পুষ্পবৃষ্টিপতনে চ .
সংযুতকরণঃ কার্যঃ প্রবিরলচলিতাঙ্গুলির্হস্তঃ .. ২০..
স্বস্তিকবিচ্যুতিকরণাৎ পল্লবপুষ্পোপহারশষ্পাণি .
বিরচিতমুর্বীসংস্থং যদ্ দ্রব্য তচ্চ নির্দ্দেশ্যম্ .. ২১..
স্বস্তিকবিচ্যুতিকরণাৎ পুনরেবাধোমুখেন কর্তব্যম্ .
সংবৃতবিবৃতং পাল্যং ছন্নং নিবিডং চ গোপ্যং চ .. ২২..
অস্যৈব চাঙ্গুলীভিরধোমুখপ্রস্থিতোত্থিতচলাভিঃ .
বায়ূর্মিবেগবেলাক্ষোভশ্চৌঘশ্চ কর্তব্যঃ .. ২৩..
উৎসাহনং বহু তথা মহাজনপ্রাংশুপুষ্করপ্রহতম্ .
পক্ষোৎক্ষেপাভিনয়ং রেচককরণেন চাভিনয়েৎ .. ২৪..
পরিঘৃষ্টতলস্থেন তু ধৌতং মৃদিতং প্রমৃষ্টপিষ্টে চ .
পুনরেব শৈলধারণমুদ্ঘাটনমেব চাভিনয়েৎ .. ২৫..
এবমেষ প্রয়োক্তব্যঃ স্ত্রীপুংসাভিনয়ে করঃ .
পতাকাভ্যাং তু হস্তাভ্যামভিনেয়ঃ প্রয়োক্তৃভিঃ .. ২৬..
দশাখ্যশ্চ শতাখ্যশ্চ সহস্রাখ্যস্তথৈব চ .
অতঃ পরং প্রবক্ষ্যামি ত্রিপতাকস্য লক্ষণম্ .. ২৭..
পতাকে তু যদা বক্রাঽনামিকা ৎবঙ্গুলির্ভবেৎ .
ত্রিপতাকঃ স বিজ্ঞেয়ঃ কর্ম চাস্য নিবোধত .. ২৮..
আবাহনমবতরণং বিসর্জনং বারণং প্রবেশশ্চ .
উন্নামনং প্রণামো নিদর্শনং বিবিধবচনং চ .. ২৯..
মঙ্গল্যদ্রব্যাণাং স্পর্শঃ শিরসোঽথ সন্নিবেশশ্চ .
উষ্ণীষমুকুটধারণং নাসাস্যশ্রোত্রসংবরণম্ .. ৩০..
অস্যৈব চাঙ্গুলীভ্যামধোমুখপ্রস্থিতোত্থিতচলাভ্যাম্ .
লঘুপবনস্রোতোভুজগভ্রমরাদিকান্ কুর্যাৎ .. ৩১..
অশ্রুপ্রমার্জনে তিলকবিরচনং রোচনয়ালম্ভকং চ
ত্রিপতাকানামিকয়া স্পর্শনমলকস্য কার্যঞ্চ .. ৩২..
স্বস্তিকৌ ত্রিপতাকৌ তু গুরূণাং পাদবন্দনে .
বিচ্যুতৌ চলিতাবস্থৌ কার্যাবুদ্বাহদর্শনে .. ৩৩..
পরস্পরাগ্রসংশ্লিষ্টৌ কর্তব্যৌ নৃপদর্শনে .
তির্যক্ স্বস্তিকস্ম্বদ্ধৌ স্যাতাং তৌ গ্রহদর্শনে .. ৩৪..
তপস্বিদর্শনে কার্যাবূর্ধ্বৌ চাপি পরাঙ্মুখৌ .
পরস্পরাভিমুখৌ চ কর্তব্যৌ বরদর্শনে .. ৩৫..
উত্তানাধোমুখৌ কার্যাবগ্রে বক্ত্রস্য সংস্থিতৌ .
বডবানলসঙ্গ্রামমকরাণাং চ দর্শনে .. ৩৬..
অভিনয়াস্ত্বনেনৈঅব বানরপ্লবনোর্ময়ঃ .
পবনশ্চ স্ত্রিয়শ্চৈব নাট্যে নাট্যবিচক্ষণৈঃ .. ৩৭..
সংমুখপ্রসৃতাঙ্গুষ্ঠঃ কার্যো বালেন্দুদর্শনে .
পরাঙ্গ্মুখস্তু কর্তব্যো যানে নৃণাং প্রয়োক্তৃভিঃ .. ৩৮..
ত্রিপতাকে যদা হস্তে ভবেৎ পৃষ্ঠাবলোকনী
তর্জনী মধ্যমায়াশ্চ তদাসৌ কর্তরীমুখঃ .. ৩৯..
পথি চরণরচনরঞ্জনরঙ্গণকরণান্যধোমুখেনৈব .
ঊর্ধ্বমুখেন তু কুর্যাৎ দষ্টং শৃঙ্গং চ লেখ্যং চ .. ৪০..
পতনমরণব্যতিক্রমপরিবৃত্তবিতর্কিত তথ ন্যস্তম্ .
ভিন্নবলিতেন কুর্যাৎ কর্তর্যাস্যাঙ্গুলিমুখেন .. ৪১..
সংযুতকরণো ব স্যাদসংযুতো বা প্রয়ুজ্যতে তজ্জ্ঞৈঃ .
রুরুচমরমহিষসুরগজবৃষগোপুরশৈলশিখরেষু .. ৪২..
যস্যাঙ্গুল্যস্তু বিনতাঃ সহাঙ্গুষ্ঠেন চাপবৎ .
সোঽর্ধচন্দ্রো হি বিজ্ঞেয়ঃ করঃ কর্মাস্য বক্ষ্যতে .. ৪৩..
এতেন বালতরবঃ শশিলেখাম্বুকলশবলয়ানি .
নির্ঘাটনমায়স্তং মধ্যৌপম্যং চ পীনং চ .. ৪৪..
রশনাজঘনকটীনামাননতলপত্রকুণ্ডলাদীনাম্ .
কর্তব্যো নারীণামভিনয়য়োগোঽর্ধচন্দ্রেণ .. ৪৫..
আদ্যা ধনুর্নতা কার্যা কুঞ্চিতাঙ্গুষ্ঠকস্তথা .
শেষা ভিন্নোর্ধ্ববলিতা হ্যরালেঽঙ্গুলয়ঃ করে .. ৪৬..
এতেন সত্ত্বশৌণ্ডীর্যবীর্যধৃতিকান্তিদিব্যগাম্ভীয়্রম্ .
আশীর্বাদাশ্চ তথা ভাবা হিতসংজ্ঞকাঃ কার্যাঃ .. ৪৭..
এতেন পুনঃ স্ত্রীণাং কেশানাং সংগ্রহোৎকর্ষৌ .
সর্বাঙ্গিকং তথৈব চ নির্বর্ণনমাত্মনঃ কার্যম্ .. ৪৮..
কৌতুকবিবাহয়োগং প্রদক্ষিণেনৈব সংপ্রয়োগং চ .
অঙ্গুল্যগ্রস্বস্তিকয়োগান্ পরিমণ্ডলেনৈব .. ৪৯..
প্রাদ্ক্ষিণ্য< পরিমণ্ডলং চ কুর্যান্ মহাজনং চৈব . যচ্চ মহীতলরচিতং দ্রব্যং তচ্চাভিনেয়ং স্যাৎ .. ৫০.. আহ্বানে চ নিবারণনির্মাণে চাপ্যনেকবচনে চ . স্বেদস্যা চাপনয়নে গন্ধাঘ্রাণে শুভঃ শুভে চৈষ .. ৫১.. ত্রিপতাকহস্তজানি তু পূর্বং যান্যভিহিতানি কর্মাণি . তানি ৎবরালয়োগাৎ স্ত্রীভিঃ সম্যক্ প্রয়োজ্যানি .. ৫২.. অরালস্য যদা বক্রাঽনামিকাৎবঙ্গুলির্ভবেৎ . শুকতুণ্ডস্তু স করঃ কর্ম চাস্য নিবোধত .. ৫৩.. এতেন ৎবভিনেয়ং নাহং ন ৎবং ন কৃত্যমিতি চার্যে . আবাহনে বিসর্গে ধিগিতি বচনে চ সাবজ্ঞম্ .. ৫৪.. অঙ্গুল্যো যস্য হস্তস্য তলমধ্যেগ্রসংস্থিতাঃ . তাসামুপরি চাঙ্গুষ্ঠঃ সঃ মুষ্টিরিতি সংজ্ঞিতঃ .. ৫৫... এষ প্রহারে ব্যায়ামে নির্গমে পীডনে তথা . সংবাহনেঽসিয়ষ্টীনাং কুন্তদণ্ডগ্রহে তথা .. ৫৬.. অস্যৈব তু যদা মুষ্টেরূর্ধ্বোঙ্গুষ্ঠঃ প্রয়ুজ্যতে . হস্তঃ স শিখরো নাম তদা জ্ঞেয়ঃ প্রয়োক্তৃভিঃ .. ৫৭.. রশ্মিকুশাঙ্কুশধনুষাং তোমরশক্তিপ্রমোক্ষণে চৈব . অধরোষ্ঠপাদরঞ্জনমলকস্যোৎক্ষেপণং চৈব .. ৫৮.. অস্যৈব শিখরাখ্যস্য হ্যঙ্গুষ্ঠকনিপীডিতা . যদা প্রদেশিনী বক্রা স কপিত্থস্তদা স্মৃতঃ .. ৫৯.. অসিচাপচক্রতোমরকুন্তগদাশক্তিবজ্রবাণানি . শস্ত্রাণ্যভিনেয়ানি তু কার্যং সত্যং চ পথ্যং চ .. ৬০.. উৎক্ষিপ্তবক্রা তু যদানামিকা সকনীয়সী . অস্যৈব তু কপিত্থস্য তদাসো খটকামুখঃ .. ৬১.. হোত্রং হব্যং ছত্রং প্রগ্রহপরিকর্ষণং ব্যজনকঞ্চ . আদর্শধারণং খণ্ডনং তথা পেষণং চৈব .. ৬২.. আয়তদণ্ডগ্রহণং মুক্তাপ্রালম্বসংগ্রহং চৈব . স্রগ্দামপুষ্পমালা বস্ত্রান্তালম্বনং চৈব .. ৬৩.. মন্মথশরাবকর্ষ্ণপুষ্পবচয়প্রতোদকার্যাণি . অঙ্কুশরজ্বাকর্ষণস্ত্রীদর্শনমেব কার্যং চ .. ৬৪.. খটকাখ্যে যদা হস্তে তর্জনী সম্প্রসারিতা . হস্তঃ সূচীমুখো নাম তদা জ্ঞেয়ঃ প্রয়োক্তৃভিঃ .. ৬৫.. অস্য বিবিধান্ যোগান্ বক্ষ্যামি সমাসতঃ প্রদেশিন্যাঃ .. ঊর্ধ্বনতলোলকম্পিতবিজৃংভিতোদ্বাহিতচলায়াঃ .. ৬৬.. চক্রং তডিৎপতাকামঞ্জর্যঃ কর্ণচূলিকাশ্চৈব . কুটিলগতয়শ্চ সর্বে নির্দেশ্যাঃ সাধুবাদাশ্চ .. ৬৭.. বালোরগবল্যবধূপদীপবল্লীলতাশিখণ্ডাশ্চ . পরিপতনবক্রমণ্ডলমভিনেয়ান্যূর্ধ্বলোলিতয়া .. ৬৮.. বদনাম্যাসে কুঞ্চিতবিজৃম্ভিতা বাক্যরূপণে কার্যা . ভূয়শ্চোর্ধ্ববিরচিতা তারাঘোণৈকদণ্ডয়ষ্টিষু চ . বিনতাঃ চ পুনঃ কার্যা দংষ্ট্রিষু চ তথাস্যয়োগেন .. ৬৯.. পুনরপি মণ্ডলগতয়া সর্বগ্রহণং তথৈব লোকস্য . প্রণতোন্তেএ চ কার্যে হ্যাদ্যে দীর্ঘে চ দিবসে চ .. ৭০.. [শ্রবণাভ্যাসে বক্রা বিজৃম্ভণা বাক্যরূপণাবসরে ..] মেতি বদেতি চ যোজ্যা প্রসারিতোৎকম্পিতোত্তানা .. ৭১.. কার্যা প্রকম্পিত রোবদর্শন স্বেদরূপণে চৈব . কুন্তলকুণ্ডলাঙ্গদগণ্ডাশ্রয়েঽভিনয় .. ৭২.. গর্বেঽহমিতি ললাটে রিপুদর্শনে তথৈব চ ক্রোধে . কোঽসাবিতি নির্দেশেঽথ কর্ণকণ্ডুনয়নে চৈব .. ৭৩.. সংযুক্তা সংযোগে কার্যা বিশ্লেষিতা বিয়োগে চ . কলহে স্বস্তিকয়ুপতাং পরস্পরোৎপীডিতা বন্ধে .. ৭৪.. দ্বাভ্যাং তু বাত্মপার্শ্বে দক্ষিণতো নিননিশাবসানানি . অভিমুখপরাঙ্মুখাভ্যাং বিশ্লিষ্টাভ্যাং প্রয়ুঞ্জীত .. ৭৫.. পুনরপি চ ভ্রমিতাগ্ররূপা শিলাবর্তয়ন্ত্রশৈলেষু . পরিবেষণে তথৈব হি কার্যা চাধোমুখী নিত্যম্ .. ৭৬.. শ্লিষ্টা ললাটপট্টেষ্বধোমুখী শম্ভুরূপণে কর্যা . শকস্যাপ্যুত্তানা তজ্জ্ঞৈস্তির্যক্স্থিতা কার্যা .. ৭৭.. দ্বাভ্যাং সন্দর্শয়েন্নিত্যং সম্পূর্ণ চন্দ্রমণ্ডলম্ . শ্লিষ্টা ললাটে শক্রস্য কার্যা হ্যুত্তানসংশ্রয়া .. ৭৮.. পরিমণ্ডলং ভ্রমিততয়া মণ্ডলমাদর্শয়েচ্চ চন্দ্রস্য . হরনয়নে চ ললাটে শক্রস্যঽপ্যুগুত্তানা .. ৭৯.. যস্যাঙ্গুল্যস্তু বিততাঃ সহাঙ্গুষ্ঠেন কুঞ্চিতাঃ . ঊর্ধ্বা হ্যসংগতাগ্রাশ্চ স ভবেৎ পদ্মকোশকঃ .. ৮০.. বিল্বকপিত্থফলানাং গ্রহণে কুচদর্শনশ্চ নারীণাম্ . গ্রহণে হ্যামিষলাভে ভবন্তি তাঃ কুঞ্চিতাগ্রাস্তু .. ৮১.. বহুজাতিবীজপূরকমামিষখণ্ডং চ নির্দেশ্যম্ . দেবার্চনবলিহরণে সমুদ্গকে সাগ্রপিণ্ডদানে চ . কার্যঃ পুষ্পপ্রকরশ্চ পদ্মকোশেন হস্তেন .. ৮২.. মণিবন্ধনবিশ্লিষ্টাভ্যাং প্রবিরলচলিতাঙ্গুলিকরাভ্যাম্ . কার্যো বিবর্তিতাভ্যাং বিকসিতকমলোৎপলাবিনয়ঃ .. ৮৩.. অঙ্গুল্যঃ সংহতাঃ সর্বাঃ সহাঙ্গুষ্ঠেন যস্য চ . তথা নিম্নতলশ্চৈব স তু সর্পশিরাঃ করঃ .. ৮৪.. এষঃ সলিলপ্রদানে ভুজগতৌ তোয়সেচনে চৈব . আস্ফোটনে চ যোজ্যঃ করিকুম্ভাস্ফালনাদ্যেষু .. ৮৫.. অধোমুখীনাং সর্বাসামঙ্গুলীনাং সমাগমঃ . কনিষ্ঠাঙ্গুষ্ঠকাবূর্ধ্বো স ভবেৎ মৃগশীর্ষকঃ .. ৮৬.. ইহ সাম্প্রতমস্ত্যদ্য শক্তেশ্চোল্লাসনেঽক্ষপাতে চ . স্বেদাপমার্জনেষু চ কুট্টমিতে প্রচলিতস্তু ভবেৎ .. ৮৭.. ত্রেতাগ্নিসংস্থিতা মধ্যা তর্জন্যাঙ্গুষ্ঠকা যদা . কাঙ্গুলোঽনামিকা বক্রা যদাশ্চোর্ধ্বা কনীয়সী .. ৮৮.. এতেন তরুণফলানি নানাবিধানি চ লঘূনি . কার্যানি রোষজানি স্ত্রীবচান্যঙ্গুলিক্ষেপৈঃ .. ৮৯.. মরকতবৈদূর্যাদেঃ প্রদর্শনং সুমনসাং চ কর্তব্যম্ . গ্রাহ্যং মরালপদমিতি তজ্জ্ঞৈরেব প্রয়োগেষু .. ৯০.. আবর্তিতাঃ করতলে যস্যাঙ্গুল্যো ভবন্তি হি . পার্শ্বাগতবিকীর্ণাশ্চ স ভবেদলপল্লবঃ .. ৯১.. প্রতিষেধকৃতে যোজ্যঃ কস্য ৎবন্নাস্তি শূন্যবচনেষু . পুনরাত্মোপন্যাসঃ স্ত্রীণামেতেন কর্তব্যঃ .. ৯২.. তিস্রঃ প্রসারিতা যত্র তথা চোর্ধ্বা কনীয়সী . তাসাং মধ্যে স্থিতোঙ্গুষ্ঠঃ স করশ্চতুরস্মৃতঃ .. ৯৩.. নয়বিনয়নিয়মসুনিতুণবালাতুরসত্যকৈতবার্থেষু . বাক্যে যুক্তে পথ্যে সত্যে প্রশমে চ বিনিয়োজ্যঃ .. ৯৪.. একেন দ্বাভ্যাং বা কিঞ্চিন্মণ্ডলকৃতেন হস্তেন . বিকৃতবিচারিতচরিতং বিতর্কিতং লজ্জিতং চৈব .. ৯৫.. নয়নৌপম্যং পদ্মদলরূপণং হরিণকর্ণনির্দেশঃ . সংযুতকরণেনৈব তু চরেণৈতানি কুর্বীত .. ৯৬.. লীলা রতী রুচি চ স্মৃতিবুদ্ধিবিভাবনাঃ ক্ষমাং পুষ্টিং চ . সঞ্জ্ঞামাত্রং প্রণয়ং বিচারণং সঙ্গতং শৌচম্ .. ৯৭.. চাতুর্যং মাধুর্যং দাক্ষিণ্যং মার্দবং সুখং শীলম্ . প্রশ্নং বার্তায়ুক্তিং বেষং মৃদুশাদ্বলং স্তোকম্ .. ৯৮.. বিভবাবিভৌ সুরতং গুণাগুণৌ যৌবনং গৃহান্ দারান্ . নানাবর্ণাশ্চ তথা চতুরেণৈবং প্রয়ুঞ্জীত .. ৯৯.. সিতমূর্ধ্বেন তু কুর্যাৎ রক্তং পীতং চ মণ্ডলকৃতেন . পরিমুদিতেন তু নীলং বর্ণাশ্চতুরেণ হস্তেন .. ১০০.. মধ্যমাঙ্গুষ্ঠসন্দংশো বক্রা চৈব প্রদেশিনী . ঊর্ধ্বমন্যে প্রকীর্ণে চ দ্ব্যঙ্গুল্যৌ ভ্রমরে করে .. ১০১.. পদ্মোৎপলকুমুদানামন্যেষাং চৈব দীর্ঘবৃন্তানাম্ . পুষ্পাণাং গ্রহণবিধিঃ কর্তব্যঃ কর্ণপুরশ্চ .. ১০২.. বিচ্যুতশ্চ সশব্দশ্চ কার্যো নির্ভৎসনাদিষু . বালালাপে চ শীঘ্রে চ তালে বিশ্বাসনে তথা .. ১০৩.. তর্জনীমধ্যমাঙ্গুষ্ঠাস্ত্রেতাগ্নিস্থা নিরন্তরাঃ . ভবেয়ুর্হংসবক্ত্রস্য শেষে দ্বে সম্প্রসারিতে .. ১০৪.. শ্লক্ষ্ণাল্পশিথিললাঘবনিস্সারার্থে মৃদুৎবয়োগেষু . কার্যোঽভিনয়বিশেষঃ কিঞ্চিৎপ্রস্যন্দিতাগ্রেণ .. ১০৫.. সমাঃ প্রসারিতাস্তিস্রস্তথা চোর্ধ্বা কনীয়সী . অঙ্গুষ্ঠঃ কুঞ্চিতশ্চৈব হংসপক্ষ ইতি স্মৃতঃ .. ১০৬.. এষ চ নিবাপসলিলে দাতব্যে গণ্ডসংশ্রয়ে চৈব . কার্যঃ প্রতিগ্রহাচমনভোজনার্থেষু বিপ্রাণাম্ .. ১০৭.. আলিঙ্গনে মহাস্তম্ভদর্শনে রোমহর্ষণে চৈব . স্পর্শেঽনুলেপনার্থে যোজ্যঃ সংবাহনে চৈব .. ১০৮.. পুনরেব চ নারীণাং স্তনান্তরস্থেন বিভ্রমবিশেষাঃ . কার্যা যথারসং স্যুর্দুঃখে হনুধারণে চৈব .. ১০৯.. তর্জন্যঙ্গুষ্ঠসন্দংশস্ত্ব হ্যরালস্য যথা ভবেৎ . আভুগ্নতলমধ্যস্থঃ স সন্দংশ ইতি স্মৃতঃ .. ১১০.. সন্দংশস্ত্রিবিধো জ্ঞেয় হ্যগ্রজো মুখজস্তথা . তথা পার্শ্বগতশ্চৈব রসভাবোপবৃংহিতঃ .. ১১১.. পুষ্পাপচয়গ্রথনে গ্রহণে তৃণপর্ণকেশসূত্রাণাম্ . শল্যাবয়বগ্রহণাপকর্ষণে চাগ্রসন্দংশঃ .. ১১২.. বৃন্তাৎ পুষ্পোদ্ধরণং বর্তিশলাকাদিপূরণং চৈঅব . ধিগিতি চ বচনং রোষে মুখসন্দংশস্য কর্মাণি .. ১১৩.. যজ্ঞোপবীতধারণবেধনগুণসূক্ষ্মবাণলক্ষ্যেষু . যোগে ধ্যানে স্তোকে সংযুক্তকরণস্তু কর্তব্যঃ .. ১১৪.. পেশলকুৎসাসূয়াদোষবচনে চ বামহস্তেন . কিঞ্চিদ্ বিবর্তিতকরাগ্রঃ প্রয়ুজ্যতে পার্শ্বসন্দংশঃ .. ১১৫.. আলেখ্যনেত্ররঞ্জনবিতর্কবন্তপ্রবালরচনে চ . নিষ্পীডনং তথালক্তকস্য কার্য চ নারীভিঃ .. ১১৬.. সমাগতাগ্রাঃ সহিতা যস্যাঙ্গুল্যো ভবন্তি হি . ঊর্ধ্বা হংসমুখস্যেব স ভবেন্মুকুলঃ করঃ .. ১১৭.. দেবার্চ্চনবলিকরণে পদ্মোৎপলকুমুদরূপণে চৈব . বিটচুম্বনে চ কার্যো বিকুৎসিতে বিপ্রকীর্ণশ্চ .. ১১৮.. ভোজনহিরণ্যগণনামুখসংকোচপ্রদানশীঘ্রেষু . মুকুলিতকুসুমেষু চ তথা তজ্জ্ঞৈরেষ প্রয়োক্তব্যঃ .. ১১৯.. পদ্মকোশস্য হস্তস্য হ্যঙ্গুল্যঃ কুঞ্চিতা যদা . ঊর্ণনাভঃ স বিজ্ঞেয়ঃ কেশচৌর্যগ্রহাদিষু .. ১২০.. শিরঃ কণ্ডূয়নে চৈব কুষ্ঠব্যাধিনিরূপণে . সংহব্যাঘ্রেষ্বভিনয়ঃ প্রস্তরগ্রহণে তথা .. ১২১.. মধ্যমাঙ্গুষ্ঠসন্দংশো বক্রা চৈব প্রদেশিনী . শেষে তলস্থে কর্তব্যে তাম্রচূলকরেঽঙ্গুলী .. ১২২.. বিচ্যুতশ্চ সশব্দশ্চ কার্যো নির্ভৎসনাদিষু . তালে বিশ্বসনে চৈব শীঘ্রার্থে সংজ্ঞিতেষু চ .. ১২৩.. তথা কলাসু কাষ্ঠাসু নিমেষে তু ক্ষণে তথা . এশ এব করঃ কার্যো বালালাপনিমন্ত্রণে .. ১২৪.. অথবা অঙ্গুল্যঃ সংহিতা বক্রা উপর্যুঙ্গুষ্ঠপীডিতাঃ . প্রসারিতা কনীষ্ঠাচ তাম্রচূডঃ করঃ স্মৃতঃ .. ১২৫.. শতং সহস্রং লক্ষং চ করেণৈকেন যোজয়েৎ . ক্ষিপ্রমুক্তাঙ্গুলীভিস্তু স্ফুলিঙ্গান্ বিপ্রুষস্তথা .. ১২৬.. অসংযুতাঃ করা হ্যেতে ময়া প্রোক্তা দ্বিজোত্তমাঃ . অতশ্চ সংযুতান্ হস্তান্ গদতো মে নিবোধত .. ১২৭.. পতাকাভ্যাং তু হস্তাভ্যাং সংশ্লেষাদঞ্জলিঃ স্মৃতঃ . দেবতানাং গুরূণাং চ মিত্রাণাং চাভিবাদনে .. ১২৮.. স্থানান্যস্য পুনস্ত্রীণি বক্ষো বক্ত্রং শিরস্তথা . দেবতানাং শিরঃস্থস্তু গুরূণামাস্যসংস্থিতঃ . বক্ষস্থশ্চৈব মিত্রাণাং স্ত্রীণাং ৎবনিয়তো ভবেৎ .. ১২৯.. উভাভ্যামপি হস্তাভ্যামন্যোঽন্যং পার্শ্বসংগ্রহাৎ . হস্তঃ কপোতকো নাম কর্ম চাস্য নিবোধত .. ১৩০.. এষ বিনয়াভ্যুপগমে প্রণামকরণে গুরোশ্চ সম্ভাষে . শীতে ভয়ে চ কার্যো বক্ষঃস্থঃ কম্পিতঃ স্ত্রীভিঃ .. ১৩১.. অয়মেবাঙ্গুলিপরিঘৃষ্যমাণমুক্তস্তু খিন্নবাক্যেষু . এতাবদিতি চ কার্যো নেদানীং কৃত্যমিতি চার্থে .. ১৩২.. অঙ্গুল্যো যস্য হস্তস্য হ্যন্যোন্যান্তরনিস্সৃতাঃ . স কর্কট ইতি জ্ঞেয়ঃ করঃ কর্ম চ বক্ষ্যতে .. ১৩৩.. এষ মদনাঙ্গমর্দে সুপ্তোত্থিতবিজৃম্ভণে বৃহদ্দেহে . হনুধারণে চ যোজ্যঃ শঙ্খগ্রহণেঽর্থতত্ত্বজ্ঞৈঃ .. ১৩৪.. মণিবন্ধবিন্যস্তাবরালৌ স্ত্রীপ্রয়োজিতৌ . উত্তানৌ বামপার্শ্বস্থৌ স্বস্তিকঃ পরিকীর্তিতঃ .. ১৩৫.. স্বস্তিকবিচ্যুইতিকরণাদ্ দিশো ঘনাঃ খং বনং সমুদ্রাশ্চ . ঋতবো মহী তথৌঘং বিস্তীর্ণং চাভিনেয়ং স্যাৎ .. ১৩৬.. খটকঃ খটকে ন্যস্তঃ খটকাবর্ধমানকঃ . শৃঙ্গারার্থেষু যোক্তব্যঃ প্রণামকরণে তথা .. ১৩৭.. অন্যে - কুমুদীতালবৃন্তেষু কর্তব্যশ্ছত্রধরণে . ইতি .. ১৩৮.. অরালৌ তু বিপর্যস্তাবুত্তানৌ বর্ধমানকৌ . উৎসঙ্গ ইতি বিজ্ঞেয়ঃ স্পর্শস্য গ্রহণে করঃ .. ১৩৯.. সনিষ্পেষকৃতে চৈব রোমামর্ষকৃতেঽপি চ . নিষ্পীডিতঃ পুনশ্চৈব স্ত্রীণামীর্ষ্যাকৃতে ভবেৎ .. ১৪০.. মুকুলং তু যদা হস্তং কপিত্থঃ পরিচেষ্টয়েৎ . স মন্তব্যস্তদা হস্তো নিষধৌ নাম নামতঃ .. ১৪১.. সংগ্রহপরিগ্রহৌ ধারণং চ সময়শ্চ সত্যবচনং চ . সঙ্ক্ষেপঃ সংক্ষিপ্তং নিপীডিতেনাভিনেতব্যম্ .. ১৪২.. শিখরস্তু যদা হস্তো মৃগশীর্ষেণ পীডিতঃ . নিষধো নাম বিজ্ঞেয়ঃ স ভয়ার্তে বিধীয়তে .. ১৪৩.. গৃহীৎবাঅ বামহস্তেন কর্পুরাভ্যন্তরে ভুজম্ . দক্ষিণং চাপি বামস্য কর্পুরাভ্যন্তরে ন্যসেৎ .. ১৪৪.. স চাপি দক্ষিণো হস্তঃ সম্যঙ্ মুষ্টীকৃতো ভবেৎ . ইত্যেষ নিষধো হস্তঃ কর্ম চাস্য নিবোধত .. ১৪৫.. এতেন ধৈর্যমদগর্বসৌষ্ঠবৌৎসুক্যবিক্রমাটোপাঃ . অভিমানাবষ্টম্ভঃ স্তম্ভস্থৈর্যাদয় কার্যাঃ .. ১৪৬.. জ্ঞেয়ো বৈ নিষধো নাম হংসপক্ষৌ পরাঙ্গমুখৌ . জালবাতায়নাদীনাং প্রয়োক্তব্যোঽভিঘট্টনে .. ১৪৭.. অংসৌ প্রশিথিলৌ মুক্তৌ পতাকৌ তু প্রলম্বিতৌ . যদা ভবেতাং করণে স দোল ইতি সংজ্ঞিতঃ .. ১৪৮.. সংভ্রমবিষাদমূর্চ্ছিতমদাভিঘাতে তথৈব চাঽবেগে . ব্যাধিপ্লুতে চ শস্ত্রক্ষতে চ কার্যোঽভিনয়োগঃ .. ১৪৯.. যস্তু সর্পশিরাঃ প্রোক্তস্তস্যাঙ্গুলিনিরন্তরঃ . দ্বিতীয়ঃ পার্শ্বসংশ্লিষ্টঃ স তু পুষ্পপুটঃ স্মৃতঃ .. ১৫০.. ধান্যফলপুষ্পসদৃশান্যনেন নানাবিধানি যুক্তানি . গ্রাহ্যাণ্যুপনেয়ানি চ তোয়ানয়নাপনয়নে চ .. ১৫১.. পতাকৌ তু যদা হস্তাবূর্র্ধাঙ্গুষ্ঠাবধোমুখৌ . উপর্যুপরি বিন্যস্তৌ তদা স মকরঃ করঃ .. ১৫২.. সিংহব্যালদ্বিপিপ্রদর্শনং নক্রমকরমৎস্যানাম্ . যে চান্যে ক্রব্যাদা হ্যভিনেয়াস্তেঽর্থয়োগেন .. ১৫৩.. কূর্পরাংসোচিতৌ হস্তৌ যদাস্তাং সর্পশীর্ষকৌ . গজদন্তঃ স বিজ্ঞেয়ঃ কর্ম চাস্য নিবোধত.. ১৫৪.. এব চ বধুবরাণমুদ্বাহে চাতিভারয়োগে চ . স্তংভগ্রহণে চ তথা শৈলশিলোৎপাটনে চৈব .. ১৫৫.. শুকতুণ্ডৌ করৌ কৃৎবা বক্ষস্যভিমুখাঞ্চিতৌ . শনৈরধোমুখাবিদ্ধৌ সোঽবহিত্থ ইতি স্মৃতঃ .. ১৫৬.. দৌর্বল্যে নিঃশ্বসিতে গাত্রাণাং দর্শনে তনুৎবে চ . উৎকণ্ঠিতে চ তজ্জ্ঞৈরভিনয়য়োগস্তু কর্তব্যঃ .. ১৫৭.. মুকুলস্তু যদা হস্তঃ কপিত্থপরিবেষ্টিতঃ . বর্ধমানঃ স বিজ্ঞেয়ঃ কর্ম চাস্য নিবোধত .. ১৫৮.. সংগ্রহপরিগ্রহৌ ধারণং চ সময়শ্চ সত্যবচং চ . সংক্ষেপতস্তু সংক্ষিপ্তং নিপীডিতেনাভিনেতব্যম্ .. ১৫৯.. জ্ঞেয়ো বৈ বর্ধমানস্তু হংসপক্ষো পরাঙ্গমুখৌ . জালবাতায়নাদীনাং প্রয়োক্তব্যো বিঘাটনে .. ১৬০.. উক্তা হ্যেতে দ্বিবিধা হ্যসংযুতাঃ সংযুতাশ্চ সংক্ষেপাৎ . অভিনয়করাস্তু যে ৎবিহ তেঽন্যত্রাপ্যর্থতঃ সাধ্যাঃ .. ১৬১.. আকৃত্যা চেষ্টয়া চিহ্নৈর্জাত্যা বিজ্ঞায় তৎপুনঃ . স্বয়ং বিতর্ক্য কর্তব্যং হস্তাভিনয়নং বুধৈঃ .. ১৬২.. নাস্তি কশ্চিদহস্তস্তু নাট্যেঽর্থোঽভিনয়ং প্রতি . যস্য যদ্ দৃশ্যতে রূপং বহুশস্তন্ময়োষিতম্ ..১৬৩.. অন্যে চাপ্যর্থসংযুক্তা লৌকিকা যে করাস্ত্বিহ . ছন্দতস্তে নিয়োক্তব্যা রসভাববিচেষ্টিতৈঃ .. ১৬৪.. দেশং কালং প্রয়োগং চাপ্যর্থয়ুক্তিমবেক্ষ্য চ . হস্তা হ্যেতে প্রয়োক্তব্যাঃ নৃণাং স্ত্রীণাং বিশেষতঃ .. ১৬৫.. সর্বেষামেব হস্তানাং যানি কর্মাণি সন্তি হি . তান্যহং সংপ্রবক্ষ্যামি রসভাবকৃতানি তু .. ১৬৬.. উৎকর্ষণং বিকর্ষণং তথা চৈবাপকর্ষণম্ . পরিগ্রহো নিগ্রহশ্চাহ্বানং নোদনমেব চ .. ১৬৭.. সংশ্লেষশ্চ বিয়োগশ্চ রক্ষণং মোক্ষণং তথা . বিক্ষেপধূননে চৈব বিসর্গস্তর্জনং তথা .. ১৬৮.. ছেদনং ভেদনং চৈব স্ফোটনং মোটনং তথা . তাডনং চেতি বিজ্ঞেয়ং তজ্জ্ঞৈঃ কর্ম করান্ প্রতি .. ১৬৯.. উত্তানঃ পার্শ্বগশ্চৈব তথাঽধোমুখ এব চ . হস্তপ্রচারস্ত্রিবিধো নাট্যতত্ত্বসমাশ্রয়ঃ .. ১৭০.. সর্বে হস্তপ্রচারাশ্চ প্রয়োগেষু যথাবিধিঃ নেত্রভ্রূমুখরাগৈশ্চ কর্তব্যা ব্যঞ্জিঅতা বুধৈঃ .. ১৭১.. করণং কর্ম স্থানং প্রচায়ুক্তিং ক্রিয়াং চ সংপ্রেক্ষ্য . হস্তাভিনয়তজ্জ্ঞৈঃ কার্যো লোকোপচারেণ .. ১৭২.. উত্তামানাং করাঃ কার্যা ললাটক্ষেত্রচারিণঃ . বক্ষঃস্থাশ্চৈব মধ্যানামধমামধোগতা .. ১৭৩.. জ্যেষ্ঠে স্বল্পপ্রচারাঃ স্যুর্মধ্যে মধ্যবিচারিণঃ . অধমেষু প্রকীর্ণাশ্চ হস্তাঃ কার্যা প্রয়োক্তৃভিঃ .. ১৭৪.. লক্ষণব্যঞ্জিতা হস্তাঃ কার্যাস্তূত্তমমধ্যমৈঃ . লোকক্রিয়াস্বভাবেন নীচৈরপ্যর্থসংশ্রয়াঃ .. ১৭৫.. অথবান্যাদৃশং প্রাপ্য প্রয়োগং কালমেব চ . বিপরীতাশ্রয়া হস্তাঃ প্রয়োক্তব্যা বুধৈর্ন বা .. ১৭৬.. বিষণ্ণে মূর্চ্ছিতে ভীতে জুগুপ্সাশোকপীডিতে . গ্লানে স্বপ্নে বিহস্তে চ নিশ্চেষ্টে তন্দ্রিতে জডে .. ১৭৭.. ব্যাধিগ্রস্তে জরার্তে চ ভয়ার্তে শীতবিপ্লুতে . মত্তে প্রমত্তে চোন্মত্তে চিন্তায়াং তপসি স্থিতে .. ১৭৮.. হিমবর্ষহতে বদ্ধে বরিণাপ্লবসংশ্রিতে . স্বপ্নায়িতে চ সংভ্রান্তে নতসংস্ফোটনে তথা .. ১৭৯.. ন হস্তাভিনয়ঃ কার্যঃ কার্যঃ সত্ত্বস্য সংগ্রহঃ . তথা কাকুবিশেষশ্চ নানাভবরসান্বিতঃ .. ১৮০.. যত্র ব্যগ্রাঅবুভৌ হস্তৌ তত্তদ্ দৃষ্টিবিলোকনৈঃ . বাচকাভিনয়ং কুর্যাদ্বিরামৈর্থদর্শকৈঃ .. ১৮১.. উত্তানঃ পার্শ্বগশ্চৈব তথাঽধোমুখ এব চ . প্রচারস্ত্রিবিধোঽঙ্গানাং নাট্যনৃত্তসমাশ্রয়ঃ .. ১৮২.. উত্তানো বর্তুলস্ত্র্যশ্রঃ স্থিতোঽধোমুখ এব চ . পঞ্চ প্রকারা হস্তস্য নাট্যনৃত্তসমাশ্রয়াঃ .. ১৮৩.. এবং জ্ঞেয়াঃ করা হ্যেতে নাভিনয়সংশ্রিতাঃ . অত ঊর্ধ্বং প্রবক্ষ্যামি হস্তান্ নৃত্তসমাশ্রয়ান্ .. ১৮৪.. বক্ষসোঽষ্টাঙ্গুলস্থৌ তু প্রাঙ্মুখৌ খটকামুখৌ . সমানকূর্পরাংসৌ তু চতুরস্রৌ প্রকীর্তিতৌ .. ১৮৫.. হংসপক্ষকৃতৌ হস্তৌ ব্যাবৃতৌ তালবৃন্তবৎ . উদ্বৃত্তাবিতি বিজ্ঞেয়াবথবা তালবৃন্তকৌ .. ১৮৬.. চতুরস্ত্রস্থিতৌ হস্তৌ হংসপক্ষকৃতৌ তথা . তির্যক্স্থিতৌ চাভিমুখৌ জ্ঞেয়ৌ তালমুখাবিতি .. ১৮৭.. তাবেব মণিবন্ধান্তে স্বস্তিকাকৃতিসংস্থিতৌ . স্বস্তিকাবিতি বিখ্যাতৌ বিচ্যুতৌ বিপ্রকীর্ণকৌ .. ১৮৮.. অলপল্লবসংস্থানাবুর্ধ্বাস্যৌ পদ্মকোশকৌ . অরালখটকাখ্যৌ চাপ্যরালখটকামুখৌ .. ১৮৯.. তথৈ মণিবন্ধান্তে হ্যরালৌ বিচ্যুতাবুভৌ . জ্ঞেয়ৌ প্রয়োক্তৃভির্নিত্যমরাল খটকাবিতি .. ১৯০.. ভুজাংসকূর্পরাগ্রৈস্তু কুটিলাবর্তিতৌ করৌ . পরাঙ্গমুখতলাবিদ্ধৌ জ্ঞেয়াবাবিদ্ধবক্রকৌ .. ১৯১.. হস্তৌ তু সর্পশিরসৌ মধ্যমাঙ্গুষ্ঠকৌ যদা . তির্যক্প্রসারিতাস্যৌ চ তদা সূচীমুখৌ স্মৃতৌ .. ১৯২.. সর্পশীর্ষৌ যদা হস্তৌ ভবেতাং স্বস্তিকস্থিতৌ . মধ্যপ্রসারিতাঙ্গুষ্ঠৌ জ্ঞেয়ৌ সূচীমুখৌ তদা .. ১৯৩.. রেচিতৌ চাপি বিজ্ঞেয়ৌ হংসপক্ষৌ দ্রুতভ্রমৌ . প্রসারিতোত্তানতলৌ রেচিতাবিতি সংজ্ঞিতৌ .. ১৯৪.. চতুরস্রো ভবেদ্বামঃ সব্যহস্তশ্চ রেচিতঃ . বিজ্ঞেয়ৌ নৃত্ততত্ত্বজ্ঞৈর্ধরেচিতসংজ্ঞকৌ .. ১৯৫.. অঞ্চিতৌ কূর্পরাংসৌ তু ত্রিপতাকৌ করৌ কৃতৌ . কিঞ্চিত্তির্যগ্গতাবেতৌ স্মৃতাবুত্তনবঞ্চিতৌ .. ১৯৬.. মণিবন্ধমুক্তৌ তু পতাকৌ পল্লবৌ স্মৃতৌ . বাহুশীর্ষাদ্বিনিষ্ক্রান্তৌ নিতম্বাবিতি কীর্তিতৌ .. ১৯৭.. কেশদেশাদ্বিনিষ্ক্রান্তৌ পরিপার্শ্বোত্থিতৌ যদা . বিজ্ঞেয়ো কেশবন্ধৌ তু করবাচার্যসম্মতৌ .. ১৯৮.. তির্যক্প্রসারিতৌ চৈব পার্শ্বসংস্থৌ তথৈব চ . লতাখ্যৌ চ করৌ জ্ঞেয়ৌ নৃত্তাভিনয়নং প্রতি .. ১৯৯.. সমুন্নতো লতাহস্তঃ পার্শ্বাৎপার্শ্ব বিলোলিতঃ . ত্রিপতাকোঽপরঃ কর্ণে করিহস্তঃ প্রকীর্তিতঃ .. ২০০.. কটিশীর্ষনিবিষ্টাগ্রৌ ত্রিপতাকৌ যদা করৌ . পক্ষবঞ্চিতকৌ হস্তৌ তদা জ্ঞেয়ৌ প্রয়োক্তৃভিঃ .. ২০১.. তাবেব তু পরাবৃত্তৌ পক্ষপ্রদ্যোতকৌ স্মৃতৌ . অধোমুখতলাবিদ্ধৌ জ্ঞেয়ৌ গরুডপক্ষকৌ .. ২০২.. হংসপক্ষকৃতৌ হস্তৌ ব্যাবৃত্তপরিবর্তিতৌ . তথা প্রসারিতভুজৌ দণ্ডপক্ষাবিতি স্মৃতৌ .. ২০৩.. ঊর্ধ্বমণ্ডলিনৌ হস্তাবূর্ধ্বদেশবিবর্তনাৎ . তাবেব পার্শ্ববিন্যস্তৌ পার্শ্বমণ্ডলিনৌ স্মৃতৌ .. ২০৪.. উদ্বেষ্টিতৌ ভবেদেকৌ দ্বিতীয়শ্চাপবেষ্টিতঃ . ভ্রমিতাবুরসঃ স্থানে হ্যুরোমণ্ডলিনৌ স্মৃতৌ .. ২০৫.. অলপল্লবকারালাবুরোদ্বভ্রমণক্রমাৎ . পার্শ্বাবর্তশ্চ বিজ্ঞেয়াবুরঃ পার্শ্বার্ধমণ্ডলৌ .. ২০৬.. হস্তৌ তু মণীবন্ধান্তে কুঞ্চিতাবঞ্চিতৌ যদা . খটকাখ্যৌ তু তৌ স্যাতাং মুষ্টিকস্বস্তিকৌ তদা .. ২০৭.. পদ্মকোশৌ যদা হস্তৌ ব্যাবৃত্তপরিবর্তিতৌ . নলিনীপদ্মকোশৌ তু তদা জ্ঞেয়ৌ প্রয়োক্তৃভিঃ .. ২০৮.. করাবুদ্বেষ্টিতাগ্রৌ তু প্রবিধায়ালপল্লবৌ . ঊর্ধ্বপ্রসরিতাবিদ্ধৌ কর্তব্যাবুল্বণাবিতি .. ২০৯.. পল্লবৌ চ শিরোদেশে সংপ্রাপ্তৌ ললিতৌ স্মৃতৌ . কর্পূরস্বস্তিকগতৌ লতাখ্যৌ বলিতাবিতি .. ২১০.. করণে তু প্রয়োক্তব্যো নৃত্তহস্তো বিশেষতঃ . তথার্থাভিনয়ে চৈব পতাকায়াঃ প্রয়োক্তৃভিঃ .. ২১১.. সংকরোঽপি ভবেত্তেষাং প্রয়োগোঽর্থবশাৎপুনঃ . প্রাধান্যেন পুনঃ সংজ্ঞা নাট্যে নৃত্তে করেষ্বিহ .. ২১২.. বিয়ুতাঃ সংযুতাশ্চৈব নৃত্তহস্তাঃ প্রকীর্তিতাঃ . অতঃ পরং প্রবক্ষ্যামি করান্ করণসংশ্রয়ান্ .. ২১৩.. সর্বেষামেব হস্তানাং নাট্যহস্তনিদেশিভিঃ . বিধাতব্যা প্রয়ত্নেন করণং তু চতুর্বিধম্ .. ২১৪.. অপবেষ্টিতমেকং স্যাৎ উদ্বেষ্টিতমথাপরম্ . ব্যাবর্তিতং তৃতীয়ং তু চতুর্থং পরিবর্তিতম্ .. ২১৫.. আবেষ্ট্যন্তে যদঙ্গুল্যস্তর্জনাদ্যা যথাক্রমম্ . অভ্যন্তরেণ করণং তদাবেষ্টিতমুচ্যতে .. ২১৬.. উদ্বেষ্ট্যন্তে যদঙ্গুল্যঃ তর্জন্যাদ্যা বহির্মুখম্ . ক্রমশঃ করণং বিপ্রাস্তদুদ্বেষ্টিতমুচ্যতে .. ২১৭.. আবর্ত্যন্তে কনিষ্ঠাদ্যা হ্যঙ্গুল্যোঽভ্যন্তরেণ তু . যথা ক্রমেণ করণং তদ্ ব্যাবর্তিতমুচ্যতে .. ২১৮.. উদ্বর্ত্যন্তে কনিষ্ঠাদ্যা বাহ্যতঃ ক্রমশো যদা . অঙ্গুল্যঃ করণং বিপ্রাস্তদুক্তং পরিবর্তিতম্ .. ২১৯.. নৃত্তেঽভিনয়য়োগে বা পাণিভির্বর্তনাশ্রয়ে . মুখভ্রুনেত্রয়ুক্তানি করণানি প্রয়োজয়েৎ .. ২২০.. তির্যক্তথোর্ধ্বসংস্থো হ্যধোমুখশ্চাঞ্চিতোঽপবিদ্ধস্তু . মণ্ডলগতিস্তথা স্বস্তিকশ্চ পৃষ্ঠানুসারি চ .. ২২১.. উদ্বেষ্টিতঃ প্রসারিত ইত্যেতে বৈ স্মৃতাঃ প্রকারাস্তু . বাহ্বোরিতি করণগতা বিজ্ঞেয়া নিত্যং নৃত্তপ্রয়োক্তৃভিঃ .. ২২২.. হস্তানাং করণবিধির্ময়া সমাসেন নিগদিতো বিপ্রাঃ . অত ঊর্ধ্বং ব্যাখ্যাস্যে হৃদয়োদরপার্শ্বকর্মাণি .. ২২৩.. আভুগ্নমথ নির্ভুগ্নং তথা চৈব প্রকম্পিতম্ . উদ্বাহিতং সমং চৈব উরঃ পঞ্চবিধং স্মৃতম্ .. ২২৪.. নিম্নমুন্নতপৃষ্ঠং চ ব্যাভুগ্নাংসং শ্লথং ক্বচিৎ আভুগ্নং তদুরো জ্ঞেয়ং কর্ম চাস্য নিবোধত .. ২২৫.. স.ম্ভ্রমবিষাদমূর্চ্ছাশোকভয়ব্যাধিহৃদয়শল্যেষু . কার্যং শীতস্পর্শে বর্ষে লাজান্বিতেঽর্থবশাৎ .. ২২৬.. স্তব্ধং চ নিম্নপৃষ্ঠং চ নির্ভুগ্নাংসং সমুন্নতম্ . উরো নির্ভুগ্নমেতদ্ধি কর্ম চাস্য নিবোধত .. ২২৭.. স্তম্ভে মানগ্রহণে বিস্ময়দৃষ্টে চ সত্যবচনে চ . অহমিতি চ দর্পবচনে গর্বোৎসেকে তু কর্তব্যম্ ..২২৮.. [দীর্ঘনিশ্বসিতে চৈব জৃম্ভণে মোটনে তথা . বিব্বোকে চ পুনঃ স্ত্রীণাং তদ্বিজ্ঞেয়ং প্রয়োক্তৃভিঃ ].. ২২৯.. ঊর্ধ্বোৎক্ষেপৈরুরো যত্র নিরন্তরকৃতৈঃ কৃতম্ . প্রকম্পিতং তু বিজ্ঞেয়মুরো নাট্যপ্রয়োক্তৃভিঃ .. ২৩০.. হসিতরুদিতাদিসংভ্রমভয়শ্রমব্যাধিপীডিতার্থেষু . নানাভাবোপগতং কার্যমুরো নাট্যয়োগেষু .. ২৩১.. হসিতরুদিতেষু কার্যে শ্রমে ভয়ে শ্বসকাশয়োশ্চৈব . হিক্কাদুঃখে চ তথা নাট্যজ্ঞৈরর্থয়োগেন .. ২৩২.. উদ্বাহিতমূর্ধ্বগতমুরো জ্ঞেয়ং প্রয়োক্তৃভিঃ . দীর্ঘোচ্ছ্বসনতা লোকে জৃম্ভনাদিষু চেক্ষ্যতে.. ২৩৩..সর্বৈঃ সসৌষ্ঠবৈরঞ্গৈশ্চতুরস্রকৃতৈঃ কৃতম্ . উরঃ সমন্. তু বিজ্ঞেয়ং স্বস্থং সৌষ্ঠবসংযুতম্ .. ২৩৪.. এতদুক্তং ময় সম্যগরসস্তু বিকল্পনম্ . অত ঊর্ধ্বং প্রবক্ষ্যামি পার্শ্বয়োরিহ লক্ষণম্ .. ২৩৫.. নতং সমুন্নতং চৈব প্রসারিতবিবর্তিতো . তথাপসৃতমেবং তু পার্শ্বয়োঃ কর্ম পঞ্চধা .. ২৩৬.. কটির্ভবেত্তু ব্যাভুগ্না পার্শ্বমাভুগ্নমেব চ . তথৈবাপসৃতাংসং চ কিঞ্চিৎপার্শ্বনতং স্মৃতম্ .. ২৩৭.. তস্যৈব চাপরং পার্শ্বং বিপরীতং তু যুক্তিতঃ . কটীপার্শ্বভুজাংসৈশ্চাভ্যুন্নতৈরুতং ভবেৎ .. ২৩৮.. আয়ামনাদুভয়তঃ পাশ্বয়োঃ স্যাৎ প্রসারিতম্ . পরিবর্তাত্রিকস্যাপি বিবর্তিতমিহেষ্যতে .. ২৩৯.. বিবর্তিতাপনয়নাদ্ ভবেদপসৃতং পুনঃ . পার্শ্বলক্ষণমিত্যুক্তং বিনিয়োগং নিবোধত .. ২৪০.. উপসর্পে নতং কার্যমুন্নতং চাপসর্পণে . প্রসারিতং প্রহর্ষাদৌ পরিবৃত্তে বিবর্তিতম্ ..২৪১.. বিনিবৃত্তে ৎবপসৃতং পার্শ্বমর্থবশাদ্ভবেৎ . এতানি পার্শ্বকর্মাণি জঠরস্য নিবোধত .. ২৪২.. ক্ষামং খল্বং চ পূর্ণং চ সম্প্রোক্তমুদরং ত্রিধা . তনু ক্ষামং নত.ম্ খল্ব.ম্ পূর্ণমাধ্মাতমুচ্যতে .. ২৪৩.. ক্ষামং হাস্যেঽথ রুদিতে নিঃশ্বাসে জৃম্ভনে ভবেৎ . ব্যাধিতে তপসি শ্রান্তে ক্ষুধার্তে খল্বমিষ্যতে .. ২৪৪.. পূর্ণমুচ্ছ্বসিতে স্থূলে ব্যাধিতাত্যশনাদিষু . ইত্যেতদুদরং প্রোক্তং কট্যাঃ কর্ম নিবোধত .. ২৪৫.. অন্যে তু ক্ষামং খল্বং সমং পূর্ণমুদরং স্যাচ্চতুর্বিধম্ . ছিনা চৈব নিবৃত্তা চ রেচিতা কম্পিতা তথা . উদ্বাহিতা চৈব কটী নাট্যে নৃত্তে চ পঞ্চধা .. ২৪৬.. কটী মধ্যস্য বলনাৎচ্ছিনা সংপরিকীর্তিতা . পরাঙ্গ্মুখস্যাভিমুখী নিবৃত্তা স্যান্নিবর্তিতা .. ২৪৭.. সর্বতো ভ্রমণাচ্চাপি বিজ্ঞেয়া রেচিতা কটী . তির্যগ্গতাগতা ক্ষিপ্তা কটী জ্ঞেয়া প্রকম্পিতা .. ২৪৮.. নিতম্বপার্শ্বোদ্বহনাৎ শনেইরুদ্বাহিতা কটী . কটীকর্ম ময়া প্রোক্তং বিনিয়োগং নিবোধত .. ২৪৯.. ছিন্না ব্যায়ামসম্ভ্রান্তব্যাবৃত্তপ্রেক্ষণাদিষু . নিবৃত্তা বর্তনে চৈব রেচিতা ভ্রমণাদিষু .. ২৫০.. কুব্জবামননীচানাং গতৌ কার্যা প্রকম্পিতা . স্থূলেষূদ্বাহিওতা যোজ্যা স্ত্রীণাং লীলাগতেষু চ .. ২৫১.. কম্পনং বলনং চৈব স্তম্ভনোদ্বর্তনে তথা . নিবর্তনং চ পঞ্চৈতান্যূরুকর্মাণি কারয়েৎ .. ২৫২.. নমনোন্নমনাৎপার্ষ্ণের্মুহুঃ স্যাদূরুকম্পনম্ . গচ্ছেদভ্যন্তরং জানু যত্র তদ্বলনং স্মৃতম্ .. ২৫৩.. স্তম্ভনং চাপি বিজ্ঞেয়মপবিদ্ধক্রিয়াত্মকম্ . বলিতাবিদ্ধকরণাদূর্বোরুদ্বর্তনং স্মৃতম্ .. ২৫৪.. পার্ষ্ণিরভ্যন্তরং গচ্ছেদ্যত্র তত্তু নিবর্তনম্ . গতিষ্বধমপাত্রণাং ভয়ে চাপি হি কম্পনম্ .. ২৫৫.. বলনং চৈব হি কর্তব্যং স্ত্রীণাং স্বৈরপরিক্রমে . সাধ্বসে চ বিষাদে চ স্তম্ভনং তু প্রয়োজয়েৎ ..২৫৬.. ব্যায়ামে তাণ্ডবে চৈব কার্যমুদ্বর্তনং বুধৈঃ . নিবর্তনং তু কর্তব্যং সম্ভ্রাদিপরিভ্রমে .. ২৫৭.. যথাদর্শনমন্যচ্চ লোকাদ্ গ্রাহ্যং প্রয়োক্তৃভিঃ . ইত্যূর্ব্রোর্লক্ষণং প্রোক্তং জঙ্ঘায়াস্তু নিবোধত .. ২৫৮.. আবর্তিতং নতং ক্ষিপ্তমুদ্বাহিতমথাপি চ . পরিবৃত্তং তথা চৈব জঙ্ঘাকর্মাণি পঞ্চধা .. ২৫৯.. বামো দক্ষিণপার্শ্বেন দক্ষিণশ্চাপি বামতঃ . পাদো যত্র ব্রজেদ্বিপ্রাঃ তদাবর্তিতমুচ্যতে .. ২৬০.. জঙ্ঘাস্বস্তিকয়োগেন ক্রমাদাবর্তিতং নয়েৎ . জানুনঃ কুঞ্চনাচ্চৈব নতং জ্ঞেয়ং প্রয়োক্তৃভিঃ . বিক্ষেপাচ্চৈব জঙ্ঘায়াঃ ক্ষিপ্তমিত্যভিধীয়তে .. ২৬১.. [নতং স্যাজ্জানুনমনাৎ ক্ষিপ্তং বিক্ষেপণাদ্ বহি]. উদ্বাহিতং চ বিজ্ঞেয়মূর্ধ্বমূদ্বাহনাদপি . প্রতীপনয়নং যত্তু পরিবৃত্তং তদুচ্যতে .. ২৬২.. আবর্তিতং প্রয়োক্তব্যং বিদূষকপরিক্রমে . নতং চাপি হি কর্তব্যং স্থানাসনগতাদিষু .. ২৬৩.. ক্ষিপ্তং ব্যায়াময়োগেষু তাণ্ডবে চ প্রয়ুজ্যতে . তথা চোদ্বাহিতং কুর্যাদাবিদ্ধগমনাদিষু .. ২৬৪.. তাণ্ডবেষু প্রয়োক্তব্যং পরিবৃত্তং প্রয়োক্তৃভিঃ . ইত্যেতজ্জঙ্ঘয়োঃ কর্ম পাদয়োস্তু নিবোধত .. ২৬৫.. উদ্ঘট্টিতঃ সমশ্চৈব তথাগ্রতলসঞ্চরঃ . অঞ্চিতঃ কুঞ্চিতশ্চৈব পাদঃ পঞ্চবিধ স্মৃতঃ .. ২৬৬.. স্থিৎবা পাদতলাগ্রেণ পার্ষ্ণির্ভূমৌ নিপাত্যতে . যস্য পাদস্য করণে ভবেদুদ্ঘট্টিতস্তু সঃ .. ২৬৭.. অয়মুদ্বেষ্টিতকরণে ৎবনুকরণার্থং প্রয়োগমাসাদ্য . দ্রুতমধ্যমপ্রচারঃ সকৃদসকৃদা প্রয়োক্তব্যঃ .. ২৬৮.. স্বভাবরচিতে ভূমৌ সমস্থানে চ যো ভবেৎ . সমঃ পাদঃ স বিজ্ঞেয়ঃ স্বভাবাভিনয়াশ্রয়ঃ .. ২৬৯.. স্থিরস্বভাবাভিনয়ে নানাকরণসংশ্রয়ে . চলিতশ্চ পুনঃ কার্যো বিধিজ্ঞৈঃ পাদরেচিতে .. ২৭০.. সমস্যৈব যদা পার্ষ্ণিঃ পাদস্যাভ্যন্তরে ভবেৎ . বহিঃ পার্শ্বস্থিতোঽঙ্গুষ্ঠস্ত্র্যশ্রপাদস্তু স স্মৃতঃ .. ২৭১.. ত্যক্ত্বা (কৃৎবা?)সমপদং স্থানমশ্বক্রান্তে তথৈব চ . স্যাদ্বিক্লবাদিষ্বর্থেষু ত্র্যশ্রঃ পাদো যথাবিধিঃ .. ২৭২.. অস্যৈব সমপাদস্য পার্ষ্ণিরভ্যন্তরে ভবেৎ . ত্র্যশ্রপাদঃ স বিজ্ঞেয়ঃ স্থানকাদিষু সংশ্রয়ঃ .. ২৭৩.. উৎক্ষিপ্তা তু ভবেৎপার্ষ্ণিঃ প্রসৃতোঙ্গুষ্ঠকস্তথা . অঙ্গুল্যশ্চাঞ্চিতাঃ সর্বা পাদেঽগ্রতলসঞ্চরঃ .. ২৭৪.. তোদননিকুট্টনে স্থিতনিশুম্ভনে ভূমিতাডনে ভ্রমণে . বিক্ষেপবিবিধরেচকপার্ষ্ণিকৃতাগমনমেতেন .. ২৭৫.. পার্ষ্ণির্যস্যাঞ্চিতা ভূমৌ পাদমগ্রতলং তথা . অঙ্গুল্যশ্চাঞ্চিতাঃ সর্বাঃ স পাদস্ত্বঞ্চিতঃ স্মৃতঃ .. ২৭৬.. পাদাগ্রতলসঞ্চারে বর্তিতোদ্বর্তিতে তথা . এব পাদাহতে কার্যো নানাভ্রমরকেষু চ .. ২৭৭.. উৎক্ষিপ্তা যস্য পার্ষ্ণী স্যাদঙ্গুল্যঃ কুঙ্চিতাস্তথা . তথা কুঞ্চিতমধ্যশ্চ স পাদং কুঞ্চিতঃ স্মৃতঃ .. ২৭৮.. উদত্তগমনে চৈব বর্তিতোদ্বর্তিতে তথা . উৎক্ষিপ্তা তু ভবেৎপার্ষ্ণিরঙ্গুষ্ঠাগ্রেণ সংস্থিতঃ .. ২৭৯.. বামশ্চৈব স্বভাবস্থঃ সূচীপাদঃ প্রকীর্তিতঃ . নৃত্তে নূপুরকরণে প্রয়োগস্তস্য কীর্ত্যতে .. ২৮০.. অতিক্রান্তক্রমে চৈব পাদমেতং প্রয়োজয়েৎ . পাদজঙ্ঘোরুকরণং কর্ম কার্য প্রয়োক্তৃভিঃ .. ২৮১.. পাদস্য করণং সর্ব জঙ্ঘোরুকৃতমিষ্যতে . যথা পাদঃ প্রবর্তেত তথৈবোরুঃ প্রবর্ততে .. ২৮২.. অনয়োঃ সমানকরণাৎ পাদচারী প্রয়োজয়েৎ . ইত্যেতদঙ্গজং প্রোক্তং লক্ষণং কর্ম চৈব হি .. ২৮৩.. অতঃ পরং প্রবক্ষ্যামি চারীব্যায়ামলক্ষণম্ .. ২৮৪..ইতি ভারতীয়ে নাট্যশাস্ত্রে অঙ্গাভিনয়ো নাম নবমোঽধ্যায়ঃ .