চাণক্যনীতি – অধ্যায় ১৬
ন ধ্যাতং পদমীশ্বরস্য বিধিবৎসংসারবিচ্ছিত্তয়ে
স্বর্গদ্বারকপাটপাটনপটুর্ধর্মোঽপি নোপার্জিতঃ |
নারীপীনপয়োধরোরুয়ুগলা স্বপ্নেঽপি নালিংগিতং
মাতুঃ কেবলমেব যৌবনবনচ্ছেদে কুঠারা বয়ম্ || ১৬-০১
জল্পন্তি সার্ধমন্যেন পশ্যন্ত্যন্যং সবিভ্রমাঃ |
হৃদয়ে চিন্তয়ন্ত্যন্যং ন স্ত্রীণামেকতো রতিঃ || ১৬-০২
যো মোহান্মন্যতে মূঢো রক্তেয়ং ময়ি কামিনী |
স তস্যা বশগো ভূৎবা নৃত্যেৎ ক্রীডাশকুন্তবৎ || ১৬-০৩
কোঽর্থান্প্রাপ্য ন গর্বিতো বিষয়িণঃ কস্যাপদোঽস্তং গতাঃ
স্ত্রীভিঃ কস্য ন খণ্ডিতং ভুবি মনঃ কো নাম রাজপ্রিয়ঃ |
কঃ কালস্য ন গোচরৎবমগমৎ কোঽর্থী গতো গৌরবং
কো বা দুর্জনদুর্গমেষু পতিতঃ ক্ষেমেণ যাতঃ পথি || ১৬-০৪
ন নির্মিতো ন চৈব ন দৃষ্টপূর্বো
ন শ্রূয়তে হেমময়ঃ কুরংগঃ |
তথাঽপি তৃষ্ণা রঘুনন্দনস্য
বিনাশকালে বিপরীতবুদ্ধিঃ || ১৬-০৫
গুণৈরুত্তমতাং যাতি নোচ্চৈরাসনসংস্থিতাঃ |
প্রাসাদশিখরস্থোঽপি কাকঃ কিং গরুডায়তে || ১৬-০৬
গুণাঃ সর্বত্র পূজ্যন্তে ন মহত্যোঽপি সম্পদঃ |
পূর্ণেন্দুঃ কিং তথা বন্দ্যো নিষ্কলঙ্কো যথা কৃশঃ || ১৬-০৭
পরৈরুক্তগুণো যস্তু নির্গুণোঽপি গুণী ভবেৎ |
ইন্দ্রোঽপি লঘুতাং যাতি স্বয়ং প্রখ্যাপিতৈর্গুণৈঃ || ১৬-০৮
বিবেকিনমনুপ্রাপ্তা গুণা যান্তি মনোজ্ঞতাম্ |
সুতরাং রত্নমাভাতি চামীকরনিয়োজিতম্ || ১৬-০৯
গুণৈঃ সর্বজ্ঞতুল্যোঽপি সীদত্যেকো নিরাশ্রয়ঃ |
অনর্ঘ্যমপি মাণিক্যং হেমাশ্রয়মপেক্ষতে || ১৬-১০
অতিক্লেশেন যদ্দ্রব্যমতিলোভেন যৎসুখম্ |
শত্রূণাং প্রণিপাতেন তে হ্যর্থা মা ভবন্তু মে || ১৬-১১
কিং তয়া ক্রিয়তে লক্ষ্ম্যা যা বধূরিব কেবলা |
যা তু বেশ্যেব সামান্যা পথিকৈরপি ভুজ্যতে || ১৬-১২
ধনেষু জীবিতব্যেষু স্ত্রীষু চাহারকর্মসু |
অতৃপ্তাঃ প্রাণিনঃ সর্বে যাতা যাস্যন্তি যান্তি চ || ১৬-১৩
প্রিয়বাক্যপ্রদানেন সর্বে তুষ্যন্তি জন্তবঃ |
তস্মাত্তদেব বক্তব্যং বচনে কা দরিদ্রতা || ১৬-১৩
ক্ষীয়ন্তে সর্বদানানি যজ্ঞহোমবলিক্রিয়াঃ |
ন ক্ষীয়তে পাত্রদানমভয়ং সর্বদেহিনাম্ || ১৬-১৪
তৃণং লঘু তৃণাত্তূলং তূলাদপি চ যাচকঃ |
বায়ুনা কিং ন নীতোঽসৌ মাময়ং যাচয়িষ্যতি || ১৬-১৫
বরং প্রাণপরিত্যাগো মানভঙ্গেন জীবনাৎ |
প্রাণত্যাগে ক্ষণং দুঃখং মানভঙ্গে দিনে দিনে || ১৬-১৫
সংসারবিষবৃক্ষস্য দ্বে ফলেঽমৃতোপমে |
সুভাষিতং চ সুস্বাদু সঙ্গতিঃ সজ্জনে জনে || ১৬-১৮
জন্ম জন্ম যদভ্যস্তং দানমধ্যয়নং তপঃ |
তেনৈবাভ্যাসয়োগেন দেহী চাভ্যস্যতে পুনঃ || ১৬-১৯
পুস্তকস্থা তু যা বিদ্যা পরহস্তগতং ধনং |
কার্যকালে সমুৎপন্নে ন সা বিদ্যা ন তদ্ধনম্ || ১৬-২০
