চাণক্যনীতি – অধ্যায় ১৭
পুস্তকপ্রত্যয়াধীতং নাধীতং গুরুসন্নিধৌ |
সভামধ্যে ন শোভন্তে জারগর্ভা ইব স্ত্রিয়ঃ || ১৭-০১
কৃতে প্রতিকৃতিং কুর্যাদ্ধিংসনে প্রতিহিংসনম্ |
তত্র দোষো ন পততি দুষ্টে দুষ্টং সমাচরেৎ || ১৭-০২
যদ্দূরং যদ্দুরারাধ্যং যচ্চ দূরে ব্যবস্থিতম্ |
তৎসর্বং তপসা সাধ্যং তপো হি দুরতিক্রমম্ || ১৭-০৩
লোভশ্চেদগুণেন কিং পিশুনতা যদ্যস্তি কিং পাতকৈঃ
সত্যং চেত্তপসা চ কিং শুচি মনো যদ্যস্তি তীর্থেন কিম্ |
সৌজন্যং যদি কিং গুণৈঃ সুমহিমা যদ্যস্তি কিং মণ্ডনৈঃ
সদ্বিদ্যা যদি কিং ধনৈরপয়শো যদ্যস্তি কিং মৃত্যুনা || ১৭-০৪
পিতা রত্নাকরো যস্য লক্ষ্মীর্যস্য সহোদরা |
শঙ্খো ভিক্ষাটনং কুর্যান্ন দত্তমুপতিষ্ঠতে || ১৭-০৫
অশক্তস্তু ভবেৎসাধুর্ব্রহ্মচারী বা নির্ধনঃ |
ব্যাধিতো দেবভক্তশ্চ বৃদ্ধা নারী পতিব্রতা || ১৭-০৬
নান্নোদকসমং দানং ন তিথির্দ্বাদশী সমা |
ন গায়ত্র্যাঃ পরো মন্ত্রো ন মাতুর্দৈবতং পরম্ || ১৭-০৭
তক্ষকস্য বিষং দন্তে মক্ষিকায়াস্তু মস্তকে |
বৃশ্চিকস্য বিষং পুচ্ছে সর্বাঙ্গে দুর্জনে বিষম্ || ১৭-০৮
পত্যুরাজ্ঞাং বিনা নারী হ্যুপোষ্য ব্রতচারিণী |
আয়ুষ্যং হরতে ভর্তুঃ সা নারী নরকং ব্রজেৎ || ১৭-০৯
ন দানৈঃ শুধ্যতে নারী নোপবাসশতৈরপি |
ন তীর্থসেবয়া তদ্বদ্ভর্তুঃ পদোদকৈর্যথা || ১৭-১০
পাদশেষং পীতশেষং সন্ধ্যাশেষং তথৈব চ |
শ্বানমূত্রসমং তোয়ং পীৎবা চান্দ্রায়ণং চরেৎ || ১৭-১১
দানেন পাণির্ন তু কঙ্কণেন
স্নানেন শুদ্ধির্ন তু চন্দনেন |
মানেন তৃপ্তির্ন তু ভোজনেন
জ্ঞানেন মুক্তির্ন তু মুণ্ডনেন || ১৭-১২
নাপিতস্য গৃহে ক্ষৌরং পাষাণে গন্ধলেপনম্ |
আত্মরূপং জলে পশ্যন্ শক্রস্যাপি শ্রিয়ং হরেৎ || ১৭-১৩
সদ্যঃ প্রজ্ঞাহরা তুণ্ডী সদ্যঃ প্রজ্ঞাকরী বচা |
সদ্যঃ শক্তিহরা নারী সদ্যঃ শক্তিকরং পয়ঃ || ১৭-১৪
পরোপকরণং যেষাং জাগর্তি হৃদয়ে সতাম্ |
নশ্যন্তি বিপদস্তেষাং সম্পদঃ স্যুঃ পদে পদে || ১৭-১৫
যদি রামা যদি চ রমা যদি তনয়ো বিনয়গুণোপেতঃ |
তনয়ে তনয়োৎপত্তিঃ সুরবরনগরে কিমাধিক্যম্ || ১৭-১৬
আহারনিদ্রাভয়মৈথুনানি
সমানি চৈতানি নৃণাং পশূনাম্ |
জ্ঞানং নরাণামধিকো বিশেষো
জ্ঞানেন হীনাঃ পশুভিঃ সমানাঃ || ১৭-১৭
দানার্থিনো মধুকরা যদি কর্ণতালৈর্দূরীকৃতাঃ
দূরীকৃতাঃ করিবরেণ মদান্ধবুদ্ধ্যা |
তস্যৈব গণ্ডয়ুগ্মমণ্ডনহানিরেষা
ভৃংগাঃ পুনর্বিকচপদ্মবনে বসন্তি || ১৭-১৮
রাজা বেশ্যা যমশ্চাগ্নিস্তস্করো বালয়াচকৌ |
পরদুঃখং ন জানন্তি অষ্টমো গ্রামকণ্টকঃ || ১৭-১৯
অধঃ পশ্যসি কিং বালে পতিতং তব কিং ভুবি |
রে রে মূর্খ ন জানাসি গতং তারুণ্যমৌক্তিকম্ || ১৭-২০
ব্যালাশ্রয়াপি বিকলাপি সকণ্টকাপি
বক্রাপি পঙ্কিলভবাপি দুরাসদাপি |
গন্ধেন বন্ধুরসি কেতকি সর্বজন্তা
রেকো গুণঃ খলু নিহন্তি সমস্তদোষান্ || ১৭-২১
