চাণক্যানি বা কৌটিলীয়ানি নীতিসূত্রাণি – ১ম অধ্যায়
অথ প্রথমোঽধ্যায়ঃ ||
সা শ্রীর্বোঽব্যাৎ || ১||
সুখস্য মূলং ধর্মঃ || ২||
ধর্মস্য মূলমর্থঃ || ৩||
অর্থস্য মূলং রাজ্যম্ || ৪||
রাজ্যমূলমিন্দ্রিয়জয়ঃ || ৫||
ইন্দ্রিয়জয়স্য মূলং বিনয়ঃ || ৬||
বিনয়স্য মূলং বৃদ্ধোপসেবা || ৭||
বৃদ্ধসেবায়া বিজ্ঞানম্ || ৮||
বিজ্ঞানেনাত্মানং সম্পাদয়েৎ || ৯||
সম্পাদিতাত্মা জিতাত্মা ভবতি || ১০||
জিতাত্মা সর্বার্থৈঃ সংযুজ্যতে || ১১||
স্বামিসম্পৎ প্রকৃতিসম্পদং করোতি || ১২||
প্রকৃতিসম্পদা হ্যনায়কমপি রাজ্যং নীয়তে || ১৩||
প্রকৃতিকোপঃ সর্বকোপেভ্যো গরীয়ান্ || ১৪||
অবিনীতস্বামিভাবাদস্বামিভাবঃ শ্রেয়ান্ || ১৫||
সম্পাদ্যাত্মানমন্বিচ্ছেৎ সহায়ান্ || ১৬||
নাঽসহাস্য মন্ত্রনিশ্চয়ঃ || ১৮||
নৈকং চক্রং পরিভ্রমতি || ১৯||
সহায়ঃ সমো দুঃখসুখয়োঃ || ১৭||
মানী প্রতিমানিনমাত্মদ্বিতীয়ং মন্ত্রিণমুৎপাদয়েৎ || ২০||
অবিনীতং স্নেহমাত্রেণ ন মন্ত্রে কুর্বীত || ২১||
শ্রুতবন্তমুপধাশুদ্ধং মন্ত্রিণং কুর্বীত || ২১||
মন্ত্রমূলাঃ সর্বারম্ভাঃ || ২২||
মন্ত্রসংবরণে কার্যসিদ্ধির্ভবতি || ২৩||
মন্ত্রনিঃস্রাবঃ সর্বম্ নাশয়তি || ২৪||
প্রমাদাদ্ দ্বিষতাং বশমুপয়াস্যতি || ২৫||
সর্বদ্বারেভ্যো মন্ত্রো রক্ষিতব্যঃ || ২৬||
মন্ত্রসম্পদা হি রাজ্যং বিবর্ধতে || ২৭||
শ্রেষ্ঠতমাং মন্ত্রগুপিতমাহুঃ || ২৮||
কার্যাকার্য প্রদীপো মন্ত্রঃ || ২৯||
মন্ত্রচক্ষুষা পরচ্ছিদ্রাণ্যবলোকয়ন্তি || ৩১ |
মন্ত্রকালে ন মৎসরঃ কর্তব্যঃ || ৩১||
অকামবুদ্ধয়ো মন্ত্রতত্ত্বার্থদর্শিনো মন্ত্রিণঃ || ৩৪||
ষট্কর্ণো মন্ত্রশ্ছিদ্যতে || ৩২||
ত্রয়াণামৈকবাক্যেঽসম্প্রত্যয়ঃ || ৩৩||
আপৎসু স্নেহয়ুক্তং মিত্রম্ || ৩৫||
মিত্রসংগ্রহণে বলং সম্পদ্যতে || ৩৬||
বলবান্ অলব্ধলাভে প্রয়তেত || ৩৭||
অলব্ধলাভো নালসস্য || ৩৮||
অলসেন লব্ধমপি রক্ষিতুং ন শক্যতে || ৩৯||
ন চালসস্যয়ুক্তস্য রক্ষিতং বিবর্ধতে || ৪০||
ন ভৃত্যান্ পোষয়তি || ৪১||
ন তীর্থং প্রতিপাদয়তি || ৪২||
অলব্ধলাভাদিচতুষ্টয়ং রাজতন্ত্রম্ || ৪৩||
তচ্চ রাজ্যতন্ত্রমায়তং নীতিশাস্ত্রেষু || ৪৪||
রাজ্যতন্ত্রেষ্বায়ত্তৌ মন্ত্রাবাপৌ || ৪৫||
মন্ত্রং স্ববিষয়ে কৃত্যেষ্বায়ত্তম্ || ৪৬||
আবাপো মণ্ডলে সন্নিবিষ্টঃ || ৪৬||
সন্ধিবিগ্রহয়োর্যোনির্মণ্ডলম্ || ৪৮||
নীতিশাস্ত্রানুগো রাজা || ৪৯||
অনন্তরপ্রকৃতিঃ শত্রুঃ || ৫০||
একান্তরিতং মিত্রমিষ্যতে || ৫১||
হেতুতঃ শত্রুমিত্রে ভবিষ্যতঃ || ৫২||
হীয়মানেন স সন্ধিং কুর্বীত || ৫৩||
তেজো হি সন্ধানহেতুস্তদর্থিনাম্ || ৫৪||
নাতপ্তলোহং লোহেন সন্ধত্তে || ৫৫||
বলবান্ হীনেন বিগৃহ্ণীয়াৎ || ৫৬||
ন জ্যায়সা সমেন বা || ৫৭||
হস্তিনঃ পাদয়ুদ্ধমিব বলবদ্বিগ্রহঃ || ৫৮ |
আমপাত্রমাপেন সহ বিনশ্যতি || ৫৯||
অরিপ্রয়ত্নমভিসমীক্ষ্যাত্মরক্ষয়া বসেৎ || ৬০||
সন্ধায়ৈকতো বা যায়াৎ || ৫৮||
অমিত্রবিরোধাদাত্মরক্ষামাবসেৎ || ৫৯||
শক্তিহীনো বলবন্তমাশ্রয়েৎ || ৬১||
দুর্বলাশ্রয়ো দুঃখমাবহতি || ৬২||
অগ্নিবদ্ রাজানমাশ্রয়েৎ || ৬৩||
রাজ্ঞাঃ প্রতিকূলং নাচরেৎ || ৬৪||
নোদ্ধতবেশধরঃ স্যাৎ || ৬৬||
ন দেবচরিতং চরেৎ || ৬৫||
দ্বয়োরপীর্ষ্যতোর্দ্বৈধীভাবকুর্বীত || ৬৭||
ন ব্যসনপরস্য কার্যাবাপ্তিঃ || ৬৮||
ইন্দ্রিয়বশবর্তিনো নাস্তি কার্যাবাপ্তিঃ || ৬৯||
নাস্তি কার্যং দ্যুতপ্রবৃত্তস্য || ৭০||
মৃগয়াপরস্য ধর্মার্থৌ বিনশ্যতঃ || ৭১||
ন কামাসক্তস্য কার্যানুষ্ঠানম্ || ৭৩||
অর্থেষু পানব্যসনী ন গণ্যতে || ৭২||
অর্থদূষকং শ্রীঃ পরিত্যজতি || ৭৬||
অগ্নিদহাদপি বিশিষ্তং বাক্পারুষ্যম্ || ৭৪||
দণ্ডপারুষ্যাৎ সর্বজনদ্বেষ্যো ভবতি || ৭৫||
অমিত্রো দণ্ডনীত্যামায়ত্তঃ || ৭৭||
দণ্ডনীতিমনুষ্ঠন্ প্রজাঃ সংরক্ষতি || ৭৮||
দণ্ডঃ সর্বসম্পদা যোজয়তি || ৭৯||
দণ্ডাভাবে ত্রিবর্গাভাবঃ || ৮০||
দণ্ডভয়াদকার্যাণি ন কুর্বন্তি || ৮১||
দণ্ডনীত্যামায়ত্তমাত্মরক্ষণম্ || ৮২||
আত্মনি রক্ষিতে সর্বং রক্ষিতং ভবতি || ৮৩||
আত্মায়ত্তৌ বৃদ্ধিবিনাশৌ || ৮৪||
দণ্ডনীত্যাদি বিজ্ঞানে প্রণীয়তে || ৮৫||
দুর্বলোঽপি রাজা নাবমন্তব্যঃ || ৮৬||
নাস্ত্যগ্নের্দৌর্বল্যম্ || ৮৭||
দণ্ডেন প্রণীয়তে বৃত্তিঃ || ৮৮||
বৃত্তিমূলোঽর্থলাভঃ || ৮৯||
অর্থমূলৌ ধর্মকামৌ || ৯০||
অর্থমূলম্ কার্যম্ || ৯১||
যত্নপ্রয়ত্নাৎ কার্যসিদ্ধির্ভবতি স উপায়ঃ || ৯২||
উপায়পূর্বং কার্যং ন দুষ্করং স্যাৎ || ৯৩||
অনুপায়পূর্বং কার্যং কৃতমপি বিনশ্যতি || ৯৪||
কার্যার্থিনামুপায় এব সহায়ঃ || ৯৫||
কার্যং পুরুষকারেণ লক্ষ্যং সম্পদ্যতে || ৯৬||
পুরুষকারমনুবর্ততে দৈবম্ || ৯৭||
দৈবং বিনা অতিপ্রয়ত্নং করোতি যত্তদ্ বিফলম্ || ৯৮||
অনীহমানস্য বৃত্তির্ন সম্পদ্যতে || ৯৯||
পূর্বং নিশ্চিত্য পশ্চাৎকার্যমারভেত || ১০০||
ইতি চাণক্যসূত্রে প্রথমোঽধ্যায়ঃ ||
