চাণক্যনীতি – অধ্যায় ১০
ধনহীনো ন হীনশ্চ ধনিকঃ স সুনিশ্চয়ঃ |
বিদ্যারত্নেন হীনো যঃ স হীনঃ সর্ববস্তুষু || ১০-০১
দৃষ্টিপূতং ন্যসেৎপাদং বস্ত্রপূতং পিবেজ্জলম্ |
শাস্ত্রপূতং বদেদ্বাক্যঃ মনঃপূতং সমাচরেৎ || ১০-০২
সুখার্থী চেত্ত্যজেদ্বিদ্যাং বিদ্যার্থী চেত্ত্যজেৎসুখম্ |
সুখার্থিনঃ কুতো বিদ্যা সুখং বিদ্যার্থিনঃ কুতঃ || ১০-০৩
কবয়ঃ কিং ন পশ্যন্তি কিং ন ভক্ষন্তি বায়সাঃ |
মদ্যপাঃ কিং ন জল্পন্তি কিং ন কুর্বন্তি যোষিতঃ || ১০-০৪
রঙ্কং করোতি রাজানং রাজানং রঙ্কমেব চ |
ধনিনং নির্ধনং চৈব নির্ধনং ধনিনং বিধিঃ || ১০-০৫
লুব্ধানাং যাচকঃ শত্রুর্মূর্খানাং বোধকো রিপুঃ |
জারস্ত্রীণাং পতিঃ শত্রুশ্চৌরাণাং চন্দ্রমা রিপুঃ || ১০-০৬
যেষাং ন বিদ্যা ন তপো ন দানং
জ্ঞানং ন শীলাং ন গুণো ন ধর্মঃ |
তে মর্ত্যলোকে ভুবি ভারভূতা
মনুষ্যরূপেণ মৃগাশ্চরন্তি || ১০-০৭
অন্তঃসারবিহীনানামুপদেশো ন জায়তে |
মলয়াচলসংসর্গান্ন বেণুশ্চন্দনায়তে || ১০-০৮
যস্য নাস্তি স্বয়ং প্রজ্ঞা শাস্ত্রং তস্য করোতি কিম্ |
লোচনাভ্যাং বিহীনস্য দর্পণঃ কিং করিষ্যতি || ১০-০৯
দুর্জনং সজ্জনং কর্তুমুপায়ো নহি ভূতলে |
অপানং শাতধা ধৌতং ন শ্রেষ্ঠমিন্দ্রিয়ং ভবেৎ || ১০-১০
আপ্তদ্বেষাদ্ভবেন্মৃত্যুঃ পরদ্বেষাদ্ধনক্ষয়ঃ |
রাজদ্বেষাদ্ভবেন্নাশো ব্রহ্মদ্বেষাৎকুলক্ষয়ঃ || ১০-১১
বরং বনং ব্যাঘ্রগজেন্দ্রসেবিতং
দ্রুমালয়ং পত্রফলাম্বুসেবনম্ |
তৃণেষু শয়্যা শতজীর্ণবল্কলং
ন বন্ধুমধ্যে ধনহীনজীবনম্ || ১০-১২
বিপ্রো বৃক্ষস্তস্য মূলং চ সন্ধ্যা
বেদঃ শাখা ধর্মকর্মাণি পত্রম্ |
তস্মান্মূলং যত্নতো রক্ষণীয়ং
ছিন্নে মূলে নৈব শাখা ন পত্রম্ || ১০-১৩
মাতা চ কমলা দেবী পিতা দেবো জনার্দনঃ |
বান্ধবা বিষ্ণুভক্তাশ্চ স্বদেশো ভুবনত্রয়ম্ || ১০-১৪
একবৃক্ষসমারূঢা নানাবর্ণা বিহঙ্গমাঃ |
প্রভাতে দিক্ষু দশসু যান্তি কা তত্র বেদনা || ১০-১৫
বুদ্ধির্যস্য বলং তস্য নির্বুদ্ধেশ্চ কুতো বলম্ |
বনে সিংহো যদোন্মত্তঃ মশকেন নিপাতিতঃ || ১০-১৬
কা চিন্তা মম জীবনে যদি হরির্বিশ্বম্ভরো গীয়তে
নো চেদর্ভকজীবনায় জননীস্তন্যং কথং নির্মমে |
ইত্যালোচ্য মুহুর্মুহুর্যদুপতে লক্ষ্মীপতে কেবলং
ৎবৎপাদাম্বুজসেবনেন সততং কালো ময়া নীয়তে || ১০-১৭
গীর্বাণবাণীষু বিশিষ্টবুদ্ধি-
স্তথাপি ভাষান্তরলোলুপোঽহম্ |
যথা সুধায়ামমরেষু সত্যাং
স্বর্গাঙ্গনানামধরাসবে রুচিঃ || ১০-১৮
অন্নাদ্দশগুণং পিষ্টং পিষ্টাদ্দশগুণং পয়ঃ |
পয়সোঽষ্টগুণং মাংসাং মাংসাদ্দশগুণং ঘৃতম্ || ১০-১৯
শোকেন রোগা বর্ধন্তে পয়সা বর্ধতে তনুঃ |
ঘৃতেন বর্ধতে বীর্যং মাংসান্মাংসং প্রবর্ধতে || ১০-২০
