চাণক্যনীতি – অধ্যায় ০৯
মুক্তিমিচ্ছসি চেত্তাত বিষয়ান্বিষবত্ত্যজ |
ক্ষমার্জবদয়াশৌচং সত্যং পীয়ূষবৎপিব || ০৯-০১
পরস্পরস্য মর্মাণি যে ভাষন্তে নরাধমাঃ |
ত এব বিলয়ং যান্তি বল্মীকোদরসর্পবৎ || ০৯-০২
গন্ধঃ সুবর্ণে ফলমিক্ষুদণ্ডে
নাকরি পুষ্পং খলু চন্দনস্য |
বিদ্বান্ধনাঢ্যশ্চ নৃপশ্চিরায়ুঃ
ধাতুঃ পুরা কোঽপি ন বুদ্ধিদোঽভূৎ || ০৯-০৩
সর্বৌষধীনামমৃতা প্রধানা
সর্বেষু সৌখ্যেষ্বশনং প্রধানম্ |
সর্বেন্দ্রিয়াণাং নয়নং প্রধানং
সর্বেষু গাত্রেষু শিরঃ প্রধানম্ || ০৯-০৪
দূতো ন সঞ্চরতি খে ন চলেচ্চ বার্তা
পূর্বং ন জল্পিতমিদং ন চ সঙ্গমোঽস্তি |
ব্যোম্নি স্থিতং রবিশাশিগ্রহণং প্রশস্তং
জানাতি যো দ্বিজবরঃ স কথং ন বিদ্বান্ || ০৯-০৫
বিদ্যার্থী সেবকঃ পান্থঃ ক্ষুধার্তো ভয়কাতরঃ |
ভাণ্ডারী প্রতিহারী চ সপ্ত সুপ্তান্প্রবোধয়েৎ || ০৯-০৬
অহিং নৃপং চ শার্দূলং বৃদ্ধং চ বালকং তথা |
পরশ্বানং চ মূর্খং চ সপ্ত সুপ্তান্ন বোধয়েৎ || ০৯-০৭
অর্ধাধীতাশ্চ যৈর্বেদাস্তথা শূদ্রান্নভোজনাঃ |
তে দ্বিজাঃ কিং করিট্ষ্যন্তি নির্বিষা ইব পন্নগাঃ || ০৯-০৮
যস্মিন্রুষ্টে ভয়ং নাস্তি তুষ্টে নৈব ধনাগমঃ |
নিগ্রহোঽনুগ্রহো নাস্তি স রুষ্টঃ কিং করিষ্যতি || ০৯-০৯
নির্বিষেণাপি সর্পেণ কর্তব্যা মহতী ফণা |
বিষমস্তু ন চাপ্যস্তু ঘটাটোপো ভয়ঙ্করঃ || ০৯-১০
প্রাতর্দ্যূতপ্রসঙ্গেন মধ্যাহ্নে স্ত্রীপ্রসঙ্গতঃ |
রাত্রৌ চৌরপ্রসঙ্গেন কালো গচ্ছন্তি ধীমতাম্ || ০৯-১১
স্বহস্তগ্রথিতা মালা স্বহস্তঘৃষ্টচন্দনম্ |
স্বহস্তলিখিতং স্তোত্রং শক্রস্যাপি শ্রিয়ং হরেৎ || ০৯-১২
ইক্ষুদণ্ডাস্তিলাঃ শূদ্রাঃ কান্তা হেম চ মেদিনী |
চন্দনং দধি তাম্বূলং মর্দনং গুণবর্ধনম্ || ০৯-১৩
দহ্যমানাঃ সুতীব্রেণ নীচাঃ পরয়শোঽগ্নিনা
অশক্তাস্তৎপদং গন্তুং ততো নিন্দাং প্রকুর্বতে |
দরিদ্রতা ধীরতয়া বিরাজতেকুবস্ত্রতা শুভ্রতয়া বিরাজতে
কদন্নতা চোষ্ণতয়া বিরাজতে কুরূপতা শীলতয়া বিরাজতে || ০৯-১৪
