নাট্যশাস্ত্রম্ অধ্যায ০৯ – ৩

কটিশীর্ষনিবিষ্টাগ্রৌ ত্রিপতাকৌ যদা করৌ .
পক্ষবঞ্চিতকৌ হস্তৌ তদা জ্ঞেযৌ প্রযোক্তৃভিঃ .. ২০১..
তাবেব তু পরাবৃত্তৌ পক্ষপ্রদ্যোতকৌ স্মৃতৌ .
অধোমুখতলাবিদ্ধৌ জ্ঞেযৌ গরুডপক্ষকৌ .. ২০২..
হংসপক্ষকৃতৌ হস্তৌ ব্যাবৃত্তপরিবর্তিতৌ .
তথা প্রসারিতভুজৌ দণ্ডপক্ষাবিতি স্মৃতৌ .. ২০৩..
ঊর্ধ্বমণ্ডলিনৌ হস্তাবূর্ধ্বদেশবিবর্তনাত্ .
তাবেব পার্শ্ববিন্যস্তৌ পার্শ্বমণ্ডলিনৌ স্মৃতৌ .. ২০৪..
উদ্বেষ্টিতৌ ভবেদেকৌ দ্বিতীযশ্চাপবেষ্টিতঃ .
ভ্রমিতাবুরসঃ স্থানে হ্যুরোমণ্ডলিনৌ স্মৃতৌ .. ২০৫..
অলপল্লবকারালাবুরোদ্বভ্রমণক্রমাত্ .
পার্শ্বাবর্তশ্চ বিজ্ঞেযাবুরঃ পার্শ্বার্ধমণ্ডলৌ .. ২০৬..
হস্তৌ তু মণীবন্ধান্তে কুঞ্চিতাবঞ্চিতৌ যদা .
খটকাখ্যৌ তু তৌ স্যাতাং মুষ্টিকস্বস্তিকৌ তদা .. ২০৭..
পদ্মকোশৌ যদা হস্তৌ ব্যাবৃত্তপরিবর্তিতৌ .
নলিনীপদ্মকোশৌ তু তদা জ্ঞেযৌ প্রযোক্তৃভিঃ .. ২০৮..
করাবুদ্বেষ্টিতাগ্রৌ তু প্রবিধাযালপল্লবৌ .
ঊর্ধ্বপ্রসরিতাবিদ্ধৌ কর্তব্যাবুল্বণাবিতি .. ২০৯..
পল্লবৌ চ শিরোদেশে সংপ্রাপ্তৌ ললিতৌ স্মৃতৌ .
কর্পূরস্বস্তিকগতৌ লতাখ্যৌ বলিতাবিতি .. ২১০..
করণে তু প্রযোক্তব্যো নৃত্তহস্তো বিশেষতঃ .
তথার্থাভিনযে চৈব পতাকাযাঃ প্রযোক্তৃভিঃ .. ২১১..
সংকরোঽপি ভবেত্তেষাং প্রযোগোঽর্থবশাত্পুনঃ .
প্রাধান্যেন পুনঃ সংজ্ঞা নাট্যে নৃত্তে করেষ্বিহ .. ২১২..
বিযুতাঃ সংযুতাশ্চৈব নৃত্তহস্তাঃ প্রকীর্তিতাঃ .
অতঃ পরং প্রবক্ষ্যামি করান্ করণসংশ্রযান্ .. ২১৩..
সর্বেষামেব হস্তানাং নাট্যহস্তনিদেশিভিঃ .
বিধাতব্যা প্রযত্নেন করণং তু চতুর্বিধম্ .. ২১৪..
অপবেষ্টিতমেকং স্যাত্ উদ্বেষ্টিতমথাপরম্ .
ব্যাবর্তিতং তৃতীযং তু চতুর্থং পরিবর্তিতম্ .. ২১৫..
আবেষ্ট্যন্তে যদঙ্গুল্যস্তর্জনাদ্যা যথাক্রমম্ .
অভ্যন্তরেণ করণং তদাবেষ্টিতমুচ্যতে .. ২১৬..
উদ্বেষ্ট্যন্তে যদঙ্গুল্যঃ তর্জন্যাদ্যা বহির্মুখম্ .
ক্রমশঃ করণং বিপ্রাস্তদুদ্বেষ্টিতমুচ্যতে .. ২১৭..
আবর্ত্যন্তে কনিষ্ঠাদ্যা হ্যঙ্গুল্যোঽভ্যন্তরেণ তু .
যথা ক্রমেণ করণং তদ্ ব্যাবর্তিতমুচ্যতে .. ২১৮..
উদ্বর্ত্যন্তে কনিষ্ঠাদ্যা বাহ্যতঃ ক্রমশো যদা .
অঙ্গুল্যঃ করণং বিপ্রাস্তদুক্তং পরিবর্তিতম্ .. ২১৯..
নৃত্তেঽভিনযযোগে বা পাণিভির্বর্তনাশ্রযে .
মুখভ্রুনেত্রযুক্তানি করণানি প্রযোজযেত্ .. ২২০..
তির্যক্তথোর্ধ্বসংস্থো হ্যধোমুখশ্চাঞ্চিতোঽপবিদ্ধস্তু .
মণ্ডলগতিস্তথা স্বস্তিকশ্চ পৃষ্ঠানুসারি চ .. ২২১..
উদ্বেষ্টিতঃ প্রসারিত ইত্যেতে বৈ স্মৃতাঃ প্রকারাস্তু .
বাহ্বোরিতি করণগতা বিজ্ঞেযা নিত্যং নৃত্তপ্রযোক্তৃভিঃ .. ২২২..
হস্তানাং করণবিধির্মযা সমাসেন নিগদিতো বিপ্রাঃ .
অত ঊর্ধ্বং ব্যাখ্যাস্যে হৃদযোদরপার্শ্বকর্মাণি .. ২২৩..
আভুগ্নমথ নির্ভুগ্নং তথা চৈব প্রকম্পিতম্ .
উদ্বাহিতং সমং চৈব উরঃ পঞ্চবিধং স্মৃতম্ .. ২২৪..
নিম্নমুন্নতপৃষ্ঠং চ ব্যাভুগ্নাংসং শ্লথং ক্বচিত্
আভুগ্নং তদুরো জ্ঞেযং কর্ম চাস্য নিবোধত .. ২২৫..
স.ম্ভ্রমবিষাদমূর্চ্ছাশোকভযব্যাধিহৃদযশল্যেষু .
কার্যং শীতস্পর্শে বর্ষে লাজান্বিতেঽর্থবশাত্ .. ২২৬..
স্তব্ধং চ নিম্নপৃষ্ঠং চ নির্ভুগ্নাংসং সমুন্নতম্ .
উরো নির্ভুগ্নমেতদ্ধি কর্ম চাস্য নিবোধত .. ২২৭..
স্তম্ভে মানগ্রহণে বিস্মযদৃষ্টে চ সত্যবচনে চ .
অহমিতি চ দর্পবচনে গর্বোত্সেকে তু কর্তব্যম্ ..২২৮..
[দীর্ঘনিশ্বসিতে চৈব জৃম্ভণে মোটনে তথা .
বিব্বোকে চ পুনঃ স্ত্রীণাং তদ্বিজ্ঞেযং প্রযোক্তৃভিঃ ].. ২২৯..
ঊর্ধ্বোত্ক্ষেপৈরুরো যত্র নিরন্তরকৃতৈঃ কৃতম্ .
প্রকম্পিতং তু বিজ্ঞেযমুরো নাট্যপ্রযোক্তৃভিঃ .. ২৩০..
হসিতরুদিতাদিসংভ্রমভযশ্রমব্যাধিপীডিতার্থেষু .
নানাভাবোপগতং কার্যমুরো নাট্যযোগেষু .. ২৩১..
হসিতরুদিতেষু কার্যে শ্রমে ভযে শ্বসকাশযোশ্চৈব .
হিক্কাদুঃখে চ তথা নাট্যজ্ঞৈরর্থযোগেন .. ২৩২..
উদ্বাহিতমূর্ধ্বগতমুরো জ্ঞেযং প্রযোক্তৃভিঃ .
দীর্ঘোচ্ছ্বসনতা লোকে জৃম্ভনাদিষু চেক্ষ্যতে.. ২৩৩..সর্বৈঃ
সসৌষ্ঠবৈরঞ্গৈশ্চতুরস্রকৃতৈঃ কৃতম্ .
উরঃ সমন্. তু বিজ্ঞেযং স্বস্থং সৌষ্ঠবসংযুতম্ .. ২৩৪..
এতদুক্তং ময সম্যগরসস্তু বিকল্পনম্ .
অত ঊর্ধ্বং প্রবক্ষ্যামি পার্শ্বযোরিহ লক্ষণম্ .. ২৩৫..
নতং সমুন্নতং চৈব প্রসারিতবিবর্তিতো .
তথাপসৃতমেবং তু পার্শ্বযোঃ কর্ম পঞ্চধা .. ২৩৬..
কটির্ভবেত্তু ব্যাভুগ্না পার্শ্বমাভুগ্নমেব চ .
তথৈবাপসৃতাংসং চ কিঞ্চিত্পার্শ্বনতং স্মৃতম্ .. ২৩৭..
তস্যৈব চাপরং পার্শ্বং বিপরীতং তু যুক্তিতঃ .
কটীপার্শ্বভুজাংসৈশ্চাভ্যুন্নতৈরুতং ভবেত্ .. ২৩৮..
আযামনাদুভযতঃ পাশ্বযোঃ স্যাত্ প্রসারিতম্ .
পরিবর্তাত্রিকস্যাপি বিবর্তিতমিহেষ্যতে .. ২৩৯..
বিবর্তিতাপনযনাদ্ ভবেদপসৃতং পুনঃ .
পার্শ্বলক্ষণমিত্যুক্তং বিনিযোগং নিবোধত .. ২৪০..
উপসর্পে নতং কার্যমুন্নতং চাপসর্পণে .
প্রসারিতং প্রহর্ষাদৌ পরিবৃত্তে বিবর্তিতম্ ..২৪১..
বিনিবৃত্তে ত্বপসৃতং পার্শ্বমর্থবশাদ্ভবেত্ .
এতানি পার্শ্বকর্মাণি জঠরস্য নিবোধত .. ২৪২..
ক্ষামং খল্বং চ পূর্ণং চ সম্প্রোক্তমুদরং ত্রিধা .
তনু ক্ষামং নত.ম্ খল্ব.ম্ পূর্ণমাধ্মাতমুচ্যতে .. ২৪৩..
ক্ষামং হাস্যেঽথ রুদিতে নিঃশ্বাসে জৃম্ভনে ভবেত্ .
ব্যাধিতে তপসি শ্রান্তে ক্ষুধার্তে খল্বমিষ্যতে .. ২৪৪..
পূর্ণমুচ্ছ্বসিতে স্থূলে ব্যাধিতাত্যশনাদিষু .
ইত্যেতদুদরং প্রোক্তং কট্যাঃ কর্ম নিবোধত .. ২৪৫..
অন্যে তু
ক্ষামং খল্বং সমং পূর্ণমুদরং স্যাচ্চতুর্বিধম্ .
ছিনা চৈব নিবৃত্তা চ রেচিতা কম্পিতা তথা .
উদ্বাহিতা চৈব কটী নাট্যে নৃত্তে চ পঞ্চধা .. ২৪৬..
কটী মধ্যস্য বলনাত্চ্ছিনা সংপরিকীর্তিতা .
পরাঙ্গ্মুখস্যাভিমুখী নিবৃত্তা স্যান্নিবর্তিতা .. ২৪৭..
সর্বতো ভ্রমণাচ্চাপি বিজ্ঞেযা রেচিতা কটী .
তির্যগ্গতাগতা ক্ষিপ্তা কটী জ্ঞেযা প্রকম্পিতা .. ২৪৮..
নিতম্বপার্শ্বোদ্বহনাত্ শনেইরুদ্বাহিতা কটী .
কটীকর্ম মযা প্রোক্তং বিনিযোগং নিবোধত .. ২৪৯..
ছিন্না ব্যাযামসম্ভ্রান্তব্যাবৃত্তপ্রেক্ষণাদিষু .
নিবৃত্তা বর্তনে চৈব রেচিতা ভ্রমণাদিষু .. ২৫০..
কুব্জবামননীচানাং গতৌ কার্যা প্রকম্পিতা .
স্থূলেষূদ্বাহিওতা যোজ্যা স্ত্রীণাং লীলাগতেষু চ .. ২৫১..
কম্পনং বলনং চৈব স্তম্ভনোদ্বর্তনে তথা .
নিবর্তনং চ পঞ্চৈতান্যূরুকর্মাণি কারযেত্ .. ২৫২..
নমনোন্নমনাত্পার্ষ্ণের্মুহুঃ স্যাদূরুকম্পনম্ .
গচ্ছেদভ্যন্তরং জানু যত্র তদ্বলনং স্মৃতম্ .. ২৫৩..
স্তম্ভনং চাপি বিজ্ঞেযমপবিদ্ধক্রিযাত্মকম্ .
বলিতাবিদ্ধকরণাদূর্বোরুদ্বর্তনং স্মৃতম্ .. ২৫৪..
পার্ষ্ণিরভ্যন্তরং গচ্ছেদ্যত্র তত্তু নিবর্তনম্ .
গতিষ্বধমপাত্রণাং ভযে চাপি হি কম্পনম্ .. ২৫৫..
বলনং চৈব হি কর্তব্যং স্ত্রীণাং স্বৈরপরিক্রমে .
সাধ্বসে চ বিষাদে চ স্তম্ভনং তু প্রযোজযেত্ ..২৫৬..
ব্যাযামে তাণ্ডবে চৈব কার্যমুদ্বর্তনং বুধৈঃ .
নিবর্তনং তু কর্তব্যং সম্ভ্রাদিপরিভ্রমে .. ২৫৭..
যথাদর্শনমন্যচ্চ লোকাদ্ গ্রাহ্যং প্রযোক্তৃভিঃ .
ইত্যূর্ব্রোর্লক্ষণং প্রোক্তং জঙ্ঘাযাস্তু নিবোধত .. ২৫৮..
আবর্তিতং নতং ক্ষিপ্তমুদ্বাহিতমথাপি চ .
পরিবৃত্তং তথা চৈব জঙ্ঘাকর্মাণি পঞ্চধা .. ২৫৯..
বামো দক্ষিণপার্শ্বেন দক্ষিণশ্চাপি বামতঃ .
পাদো যত্র ব্রজেদ্বিপ্রাঃ তদাবর্তিতমুচ্যতে .. ২৬০..
জঙ্ঘাস্বস্তিকযোগেন ক্রমাদাবর্তিতং নযেত্ .
জানুনঃ কুঞ্চনাচ্চৈব নতং জ্ঞেযং প্রযোক্তৃভিঃ .
বিক্ষেপাচ্চৈব জঙ্ঘাযাঃ ক্ষিপ্তমিত্যভিধীযতে .. ২৬১..
[নতং স্যাজ্জানুনমনাত্ ক্ষিপ্তং বিক্ষেপণাদ্ বহি].
উদ্বাহিতং চ বিজ্ঞেযমূর্ধ্বমূদ্বাহনাদপি .
প্রতীপনযনং যত্তু পরিবৃত্তং তদুচ্যতে .. ২৬২..
আবর্তিতং প্রযোক্তব্যং বিদূষকপরিক্রমে .
নতং চাপি হি কর্তব্যং স্থানাসনগতাদিষু .. ২৬৩..
ক্ষিপ্তং ব্যাযামযোগেষু তাণ্ডবে চ প্রযুজ্যতে .
তথা চোদ্বাহিতং কুর্যাদাবিদ্ধগমনাদিষু .. ২৬৪..
তাণ্ডবেষু প্রযোক্তব্যং পরিবৃত্তং প্রযোক্তৃভিঃ .
ইত্যেতজ্জঙ্ঘযোঃ কর্ম পাদযোস্তু নিবোধত .. ২৬৫..
উদ্ঘট্টিতঃ সমশ্চৈব তথাগ্রতলসঞ্চরঃ .
অঞ্চিতঃ কুঞ্চিতশ্চৈব পাদঃ পঞ্চবিধ স্মৃতঃ .. ২৬৬..
স্থিত্বা পাদতলাগ্রেণ পার্ষ্ণির্ভূমৌ নিপাত্যতে .
যস্য পাদস্য করণে ভবেদুদ্ঘট্টিতস্তু সঃ .. ২৬৭..
অযমুদ্বেষ্টিতকরণে ত্বনুকরণার্থং প্রযোগমাসাদ্য .
দ্রুতমধ্যমপ্রচারঃ সকৃদসকৃদা প্রযোক্তব্যঃ .. ২৬৮..
স্বভাবরচিতে ভূমৌ সমস্থানে চ যো ভবেত্ .
সমঃ পাদঃ স বিজ্ঞেযঃ স্বভাবাভিনযাশ্রযঃ .. ২৬৯..
স্থিরস্বভাবাভিনযে নানাকরণসংশ্রযে .
চলিতশ্চ পুনঃ কার্যো বিধিজ্ঞৈঃ পাদরেচিতে .. ২৭০..
সমস্যৈব যদা পার্ষ্ণিঃ পাদস্যাভ্যন্তরে ভবেত্ .
বহিঃ পার্শ্বস্থিতোঽঙ্গুষ্ঠস্ত্র্যশ্রপাদস্তু স স্মৃতঃ .. ২৭১..
ত্যক্ত্বা (কৃত্বা?)সমপদং স্থানমশ্বক্রান্তে তথৈব চ .
স্যাদ্বিক্লবাদিষ্বর্থেষু ত্র্যশ্রঃ পাদো যথাবিধিঃ .. ২৭২..
অস্যৈব সমপাদস্য পার্ষ্ণিরভ্যন্তরে ভবেত্ .
ত্র্যশ্রপাদঃ স বিজ্ঞেযঃ স্থানকাদিষু সংশ্রযঃ .. ২৭৩..
উত্ক্ষিপ্তা তু ভবেত্পার্ষ্ণিঃ প্রসৃতোঙ্গুষ্ঠকস্তথা .
অঙ্গুল্যশ্চাঞ্চিতাঃ সর্বা পাদেঽগ্রতলসঞ্চরঃ .. ২৭৪..
তোদননিকুট্টনে স্থিতনিশুম্ভনে ভূমিতাডনে ভ্রমণে .
বিক্ষেপবিবিধরেচকপার্ষ্ণিকৃতাগমনমেতেন .. ২৭৫..
পার্ষ্ণির্যস্যাঞ্চিতা ভূমৌ পাদমগ্রতলং তথা .
অঙ্গুল্যশ্চাঞ্চিতাঃ সর্বাঃ স পাদস্ত্বঞ্চিতঃ স্মৃতঃ .. ২৭৬..
পাদাগ্রতলসঞ্চারে বর্তিতোদ্বর্তিতে তথা .
এব পাদাহতে কার্যো নানাভ্রমরকেষু চ .. ২৭৭..
উত্ক্ষিপ্তা যস্য পার্ষ্ণী স্যাদঙ্গুল্যঃ কুঙ্চিতাস্তথা .
তথা কুঞ্চিতমধ্যশ্চ স পাদং কুঞ্চিতঃ স্মৃতঃ .. ২৭৮..
উদত্তগমনে চৈব বর্তিতোদ্বর্তিতে তথা .
উত্ক্ষিপ্তা তু ভবেত্পার্ষ্ণিরঙ্গুষ্ঠাগ্রেণ সংস্থিতঃ .. ২৭৯..
বামশ্চৈব স্বভাবস্থঃ সূচীপাদঃ প্রকীর্তিতঃ .
নৃত্তে নূপুরকরণে প্রযোগস্তস্য কীর্ত্যতে .. ২৮০..
অতিক্রান্তক্রমে চৈব পাদমেতং প্রযোজযেত্ .
পাদজঙ্ঘোরুকরণং কর্ম কার্য প্রযোক্তৃভিঃ .. ২৮১..
পাদস্য করণং সর্ব জঙ্ঘোরুকৃতমিষ্যতে .
যথা পাদঃ প্রবর্তেত তথৈবোরুঃ প্রবর্ততে .. ২৮২..
অনযোঃ সমানকরণাত্ পাদচারী প্রযোজযেত্ .
ইত্যেতদঙ্গজং প্রোক্তং লক্ষণং কর্ম চৈব হি .. ২৮৩..
অতঃ পরং প্রবক্ষ্যামি চারীব্যাযামলক্ষণম্ .. ২৮৪..
ইতি ভারতীযে নাট্যশাস্ত্রে অঙ্গাভিনযো নাম নবমোঽধ্যাযঃ .