নাট্যশাস্ত্রম্ অধ্যায ১৯

.. নাট্যশাস্ত্রম্ অধ্যায ১৯ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্

অথ একোনবিংশোঽধ্যাযঃ .
ইতিবৃত্তং তু নাট্যস্য শরীরং পরিকীর্তিতম্ .
পঞ্চভিঃ সন্ধিভিস্তস্য বিভাগঃ সম্প্রকল্পিতঃ .. ১..
ইতিবৃত্তং দ্বিধা চৈব বুধস্তু পরিকল্পযেত্ .
আধিকরিকমেকং স্যাত্ প্রাসঙ্গিকমথাপরম্ .. ২..
যত্কার্যং হি ফলপ্রাপ্ত্যা সামর্থ্যাত্পরিকল্প্যতে .
তদাধিকারিকং জ্ঞেযমন্যত্প্রাসঙ্গিকং বিদুঃ .. ৩..
কারণাত্ফলযোগ্যস্য বৃত্তং স্যাদাধিকারিকম্ .
তস্যোপকরণার্থং তু কীর্ত্যতে হ্যানুষঙ্গিকম্ .. ৪..
কবেঃ প্রযত্নান্নেতৄণাং যুক্তানাং বিদ্ধ্যুপাশ্রযাত্ .
কল্প্যতে হি ফলপ্রাপ্তিঃ সমুত্কর্ষাত্ফলস্য চ .. ৫..
(লৌকিকী সুখদুঃখাখ্যা যথাবস্থা রসোদ্ভবা .
দশধা মন্মথাবস্থা ব্যবস্থাস্ত্রিবিধা মতা ..)৬..
সংসারে ফলযাগে তু ব্যাপারঃ কারণস্য যঃ .
তস্যানুপূর্ব্যা বিজ্ঞেযা পঞ্চাবস্থা প্রযোক্তৃভিঃ .. ৭..
প্রারম্ভশ্চ প্রযত্নশ্চ তথা প্রাপ্তেশ্চ সংভবঃ .
নিযতা চ ফলপ্রাপ্তিঃ ফলযোগশ্চ পঞ্চমঃ .. ৮..
ঔত্সুক্যমাত্রবন্ধস্তু যদ্বীজস্য নিবধ্যতে .
মহতঃ ফলযোগস্য স ফলারম্ভ ইষ্যতে .. ৯..
অপশ্যতঃ ফলপ্রাপ্তিং ব্যাপারো যঃ ফলং প্রতি .
পরং চৌত্সুক্যগমনং স প্রযত্নঃ প্রকীর্তিতঃ .. ১০..
ঈষত্প্রাপ্তির্যদা কাচিত্ফলস্য পরিকল্পতে .
ভাবমাত্রেণ তু প্রাহুর্বিধিজ্ঞাঃ প্রাপ্তিসম্ভবম্ .. ১১..
নিযতাং তু ফলপ্রাপ্তিং যদা ভাবেন পশ্যতি .
নিযতাং তাং ফলপ্রাপ্তিং সগুণাং পরিচক্ষতে .. ১২..
অভিপ্রেতং সমগ্রং চ প্রতিরূপং ক্রিযাফলম্ .
ইতিবৃত্তে ভবেদ্যস্মিন্ ফলযোগঃ প্রকীর্তিতঃ .. ১৩..
সর্বস্যৈব হি কার্যস্য প্রারব্ধস্য ফলার্থিভিঃ .
এতাস্ত্বনুক্রমেণৈব পঞ্চাবস্থা ভবন্তি হি .. ১৪..
আসাং স্বভাবভিন্নানাং পরস্পরসমাগমাত্ .
বিন্যাস একভাবেন ফলহেতুঃ প্রকীর্তিতঃ .. ১৫..
ইতিবৃত্তং সমাখ্যাতং প্রত্যগেবাধিকারিকম্ .
তদারম্ভাদি কর্তব্যং ফলান্তং চ যথা ভবেত্ .. ১৬..
পূর্ণসন্ধি চ কর্তব্যং হীনসন্ধ্যপি বা পুনঃ .
নিযমাত্ পূর্ণসন্ধি স্যাদ্ধীনসন্ধ্যথ কাঅরণাত্ .. ১৭..
একলোপে চতুর্থস্য দ্বিলোপে ত্রিচতুর্থযোঃ .
দ্বিতীযত্রিচতুর্থানাং ত্রিলোপে লোপ ইষ্যতে .. ১৮..
প্রাসঙ্গিকে পরার্থত্বান্ন হ্যেষ নিযমো ভবেত্ .
যদ্বৃত্তং সম্ভবেত্তত্র তদ্যোজ্যমবিরোধতঃ .. ১৯..
ইতিবৃত্তে যথাবস্থাঃ পঞ্চারম্ভাদিকাঃ স্মৃতাঃ .
অর্থপ্রকৃতযঃ পঞ্চ তথা বীজাদিকা অপি .. ২০..
বীজং বিন্দুঃ পতাকা চ প্রকরী কার্যমেব চ .
অর্থপ্রকৃতযঃ পঞ্চ জ্ঞাত্বা যোজ্যা যথাবিধি .. ২১..
স্বল্পমাত্রং সমুত্সৃষ্টং বহুধা যদ্বিসর্পতি .
ফলাবসানং যচ্চৈব বীজং তত্পরিকীর্তিতম্ .. ২২..
প্রযোজনানাং বিচ্ছেদে যদবিচ্ছেদকারণম্ .
যাবত্সমাপ্তির্বন্ধস্য স বিন্দুঃ পরিকীর্তিতঃ .. ২৩..
যদ্বৃত্তং তু পরার্থং স্যাত্ প্রধানস্যোপকারকম্
প্রধানবচ্চ কল্প্যেত সা পতাকেতি কীর্তিতা .. ২৪..
ফলং প্রকল্প্যতে যস্যাঃ পরার্থাযৈব কেবলম্ .
অনুবন্ধবিহীনত্বাত্ প্রকরীতি বিনির্দিশেত্ .. ২৫.
যদাধিকারিকং বস্তু সম্যক্ প্রাজ্ঞৈঃ প্রযুজ্যতে .
তদর্থো যঃ সমারম্ভস্তত্কার্যং পরিকীর্তিতম্ .. ২৬..
এতেষাং যস্য যেনার্থো যতশ্চ গুণ ইষ্যতে .
তত্ প্রধানং তু কর্তব্যং গুণভূতান্যতঃ পরম্ .. ২৭..
একোঽনেকোঽপি বা সন্ধিঃ পতাকাযাং তু যো ভবেত্ .
প্রধানার্থানুযাযিত্বাদনুসন্ধিঃ প্রকীর্ত্যতে .. ২৮..
আগর্ভাদাবিমর্শাদ্বা পতাকা বিনিবর্ততে .
কস্মাদ্যস্মান্নিবন্ধোঽস্যাঃ পরার্থঃ পরিকীর্ত্যতে .. ২৯..
যত্রার্থে চিন্তিতেঽন্যস্মিন্স্তল্লিন্ঙ্গোঽন্যঃ প্রযুজ্যতে .
আগন্তুকেন ভাবেন পতাকাস্থানকং তু তত্ .. ৩০.
সহসৈবার্থসম্পত্তির্গুণবত্যুপকারতঃ .
পতাকাস্থানকমিদং প্রথমং পরিকীর্তিতম্ .. ৩১..
বচঃ সাতিশযং ক্লিষ্টং কাব্যবন্ধসমাশ্রযম্ .
পতাকাস্থানকমিদং দ্বিতীঅযং পরিকীর্তিতম্ .. ৩২..
অর্থোপক্ষেপণং যত্র লীনং সবিনযং ভবেত্ .
শ্লিষ্টপ্রত্যুত্তরোপেতং তৃতীযমিদমিষ্যতে .. ৩৩..
দ্ব্যর্থো বচনবিন্যাসঃ সুশ্লিষ্টঃ কাব্যযোজিতঃ .
উপন্যাসসুযুক্তশ্চ তচ্চতুর্থমুদাহৃতম্ .. ৩৪..
[যত্র সাতিশযং বাক্যমর্থোপক্ষেপণং ভবেত্ .
বিনাশিদৃষ্টমন্তে চ পতাকার্ধং তু তদ্ভবেত্ ].. ৩৫..
চতুষ্পতাকাপরমং নাটকে কার্যযিষ্যতে .
পঞ্চভিঃ সন্ধিভির্যুক্তং তাংশ্চ বক্ষ্যাম্যতঃ পরম্ ..৩৬..
মুখং প্রতিমুখং চৈব গর্ভো বিমর্শ এব চ .
তথা নির্বহণং চেতি নাটকে পঞ্চ সন্ধযঃ .. ৩৭..
[পঞ্চভিঃ সন্ধিভির্যুক্তং প্রধানমনু কীর্ত্যতে .
শেষাঃ প্রধানসন্ধীনামনুগ্রাহ্যনুসন্ধযঃ ].. ৩৮..
যত্র বীজসমুত্পত্তির্নানার্থরসসম্ভবা .
কাব্যে শরীরানুগতা তন্মুখং পরিকীর্তিতম্ .. ৩৯..
বীজস্যোদ্ঘাটনং যত্র দৃষ্টনষ্টমিব ক্বচিত্ .
মুখন্যস্তস্য সর্বত্র তদ্বৈ প্রতিমুখং স্মৃতম্ .. ৪০..
উদ্ভেদস্তস্য বীজস্য প্রাপ্তিরপ্রাপ্তিরেব বা .
পুনশ্চান্বেষণং যত্র স গর্ভ ইতি সংজ্ঞিতঃ .. ৪১..
গর্ভনির্ভিন্নবীজার্থো বিলোভনকৃতোঽথবা .
ক্রোধব্যসনজো বাপি স বিমর্শ ইতি স্মৃতঃ .. ৪২..
সমানযনমর্থানাং মুখাদ্যানাং সবীজিনাম্ .
নানাভাবোত্তরাণাং যদ্ভবেন্নির্বহণং তু তত্ .. ৪৩..
এতে তু সন্ধযো জ্ঞেযা নাটকস্য প্রযোক্তৃভিঃ .
তথা প্রকরণাস্যাপি শেষাণাং চ নিবোধত .. ৪৪..
ডিমঃ সমবকারশ্চ চতুঃসন্ধী প্রকীর্তিতৌ .
ন তযোরবমর্শস্তু কর্তব্যঃ কবিভিঃ সদা .. ৪৫..
ব্যাযোগেহামৃগৌ চাপি সদা কার্যৌ ত্রিসন্ধিকৌ .
গর্ভাবমর্শৌ ন স্যাতাং তযোর্বৃত্তিশ্চ কৈশিকী .. ৪৬..
দ্বিসন্ধি তু প্রহসনং বীথ্যঙ্কো ভাণ এব চ .
মুখনির্বহনে তত্র কর্তব্যে কবিভিঃ সদা .. ৪৭..
[বীথী চৈব হি ভাণশ্চ তথা প্রহসনং পুনঃ .
কৈশিকীবৃত্তিহীনানি কার্যাণি কবিভিঃ সদা ].. ৪৮..
এবং হি সন্ধযঃ কার্যা দশরূপে প্রযোক্তৃভিঃ .
পুনরেষাং তু সন্ধীনামঙ্গকল্পং নিবোধদত .. ৪৯..
সন্ধিনাং যানি বৃত্তানি প্রদেশেষ্বনুপূর্বশঃ .
স্বসম্পদ্গুণযুক্তানি তান্যঙ্গান্যুপধারযেত্ ..৫০..
ইষ্টস্যার্থস্য রচনা বৃত্তান্তস্যানুপক্ষযঃ .
রাগপ্রাপ্তিঃ প্রযোগস্য গুহ্যানাং চৈব গূহনম্ .. ৫১..
আশ্চর্যবদভিখ্যানং প্রকাশ্যানাং প্রকাঅশনম্ .
অঙ্গানাং ষড্বিধং হ্যেতদ্ দৄষ্টং শাস্ত্রে প্রযোজনম্ ..৫২..
অঙ্গহীনো নরো যদ্বন্নৈবারম্ভক্ষমো ভবেত্ .
অঙ্গহীনং তথা কাব্যং ন প্রযোগক্ষমং ভবেত্ .. ৫৩..
উদাত্তমপি তত্কাব্যং স্যাদঙ্গৈঃ পরিবর্জিতম্ .
হীনত্বাদ্ধি প্রযোগস্য ন সতাং রঞ্জযেন্মনঃ .. ৫৪..
কাব্যং যদপি হীনার্থং সম্যদঙ্গৈঃ সমন্বিতম্ .
দীপ্তত্বাত্তু প্রযোগস্য শোভামেতি ন সংশযঃ .. ৫৫..
[তস্মাত্ সন্ধিপ্রদেশেষু যথাযোগং যথারসম্ .
কবিনাঙ্গানি কার্যাণি সম্যক্তানি নিবোধত].. ৫৬..
উপক্ষেপঃ পরিকরঃ পরিন্যাসো বিলোভনম্ .
যুক্তিঃ প্রাপ্তিঃ সমাধানং বিধানং পরিভাবনা .. ৫৭..
উদ্ভেদঃ করণং ভেদ এতান্যঙ্গানি বৈ মুখে .
তথা প্রতিমুখে চৈব শৃণুতাঙ্গানি নামতঃ .. ৫৮..
বিলাসঃ পরিসর্পশ্চ বিধূতং_ তাপনং তথা .
নর্ম নর্মদ্যুতিশ্চৈব তথা প্রগযণং পুনঃ .. ৫৯..
নিরোধশ্চৈব বিজ্ঞেযঃ পর্যুপাসনমেব চ .
পুষ্পং বজ্রমুপন্যাসো বর্ণসংহার এব চ .. ৬০..
এতানি বৈ প্রতিমুখে গর্ভেঽঙ্গানি নিবোধত .
অভূতাহরণং মার্গো রূপোদাহরণে ক্রমঃ .. ৬১..
সংগ্রহশ্চানুমানং চ প্রার্থনাক্ষিপ্তমেব চ .
তোটকাধিবলে চৈব হ্যুদ্বেগো বিদ্রবস্তথা ..৬২..
এতান্যঙ্গানি বৈ গর্ভে হ্যবমর্শে নিবোধত .
অপবাদশ্চ সংফেটো বিদ্রবঃ শক্তিরেব চ .. ৬৩..
ব্যবসাযঃ প্রসঙ্গশ্চ দ্যুতিঃ খেদো নিষেধনম্ ..
বিরোধনমথাদানং ছাদনং চ প্ররোচনা .. ৬৪..
ব্যবহারশ্চ যুক্তিশ্চ বিমর্শাঙ্গান্যমূনি চ .
সন্ধির্নিরোধো গ্রথনং নির্ণযঃ পরিভাষণম্ .. ৬৫..
দ্যুতিঃ প্রসাদ আনন্দঃ সমযো হ্যুপগূহনম্ .
ভাষণং পূর্ববাক্যং চ কাব্যসংহার এব চ .. ৬৬..
প্রশস্তিরিতি সংহারে জ্ঞেযান্যঙ্গানি নামতঃ .
চতুষ্ষষ্ঠি বুধৈর্জ্ঞেযান্যেতান্যঙ্গানি সন্ধিষু .. ৬৭..
[সম্পাদনার্থং বীজস্য সম্যক্সিদ্ধিকরাণি চ .
কার্যাণ্যেতানি কবিভির্বিভজ্যার্থানি নাটকে ].. ৬৮..
পুনরেষাং প্রবক্ষ্যামি লক্ষণানি যথাক্রমম্ .
কাব্যার্থস্য সমুত্পত্তিরুপক্ষেপ ইতি স্মৃতঃ .. ৬৯..
যদুত্পন্নার্থবাহুল্যং জ্ঞেযঃ পরিকরস্তু সঃ .
তন্নিষ্পত্তিঃ পরিন্যাসো বিজ্ঞেযঃ কবিভিঃ সদা .. ৭০..
গুণনির্বর্ণনং চৈব বিলোভনমিতি স্মৃতম্ .
সম্প্রধারণমর্থানাং যুক্তিরিত্যভিধীযতে .. ৭১..
সুখার্থস্যাভিগমনং প্রাপ্তিরিত্যভিসংজ্ঞিতা .
বীজার্থস্যোপগমনং সমাধানমিতি স্মৃতম্ .. ৭২..
সুখদুঃখকৃতো যোঽর্থস্তদ্বিধানমিতি স্মৃতম্ .
কুতূহলোত্তরাবেগো বিজ্ঞেযা পরিভাবনা .. ৭৩..
বীজার্থস্য প্ররোহো যঃ স উদ্ভেদ ইতি স্মৃতঃ .
প্রকৃতার্থসমারম্ভঃ করণং নাম তদ্ভবেত্ .. ৭৪..
সংঘাতভেদনার্থো যঃ স ভেদ ইতি কীর্তিতঃ .
[এতানি তু মুখাঙ্গানি বক্ষ্যে প্রতিমুখে পুনঃ].. ৭৫..
সমীহা রতিভোগার্থা বিলাস ইতি সংজ্ঞিতঃ .
দৃষ্টনষ্টানুসরণং পরিসর্প ইতি স্মৃতঃ .. ৭৬..
কৃতস্যানুনযস্যাদৌ বিধূতং হ্যপরিগ্রহঃ .
অপাযদর্শনং যত্তু তাপনং নাম তদ্ভবেএত্ .. ৭৭..
ক্রীডার্থং বিহিতং যত্তু হাস্যং নর্মেতি তত্স্মৃতম্
দোষপ্রচ্ছাদনার্থং তু হাস্যং নর্মদ্যুতিঃ স্মৃতা .. ৭৮..
উত্তরোত্তরবাক্যং তু ভবেত্প্রগযণং পুনঃ .
যা তু ব্যসনসংপ্রাপ্তিঃ স নিরোধঃ প্রকীর্তিতঃ .. ৭৯..
ক্রুদ্ধস্যনুনযো যস্তু ভবেত্তত্পর্যুপাসনম্ .
বিশেষবচনং যত্তু তত্পুষ্পমিতি সংজ্ঞিতম্ .. ৮০..
প্রত্যক্ষরূক্ষং যদ্বাক্যং বজ্রং তদভিধীযতে .
উপপত্তিকৃতো যোঽর্থ উপন্যাসশ্চ স স্মৃতঃ .. ৮১..
চাতুর্বর্ণ্যোপগমনং বর্ণসংহার ইষ্যতে .
কপটাপাশ্রযং বাক্যমভূতাহরণং বিদুঃ .. ৮২..
তত্ত্বার্থবচনং চৈব মার্গ ইত্যভিধীযতে .
চিত্রার্থসমবাযে তু বিতর্কো রূপমিষ্যতে .
যত্সাতিশযবদ্বাক্যং তদুদাহরণং স্মৃতম্ .. ৮৩..
ভাবতত্ত্বোপলব্ধিস্তু ক্রম ইত্যভিধীযতে .
সামদানাদিসংপন্নঃ সংগ্রহঃ পরিকীর্তিতঃ .. ৮৪..
রূপানুরূপগমনমনুমানমিতি স্মৃতম্ .
রতিহর্ষোত্সবানাং তু প্রার্থনা প্রার্থনা ভবেত্ .
গর্ভস্যোদ্ভেদনং যত্সাক্ষিপ্তিরিত্যভিধীযতে .. ৮৬..
সংরম্ভবচনং চৈব তোটকং ত্বিতি সংজ্ঞিতম্ .
কপটেনাতিসংধানং ব্রুবতেঽধিবলং বুধাঃ .. ৮৭..
ভযং নৃপারিদস্যূত্থমুদ্বেগঃ পরিকীর্তিতঃ .
শঙ্কা ভযত্রাসকৃতো বিদ্রযঃ সমুদাহৃতঃ .. ৮৮..
দোষপ্রখ্যাপনং যত্তু সোঽপবাদ ইতি স্মৃতঃ .
রোষগ্রথিতবাক্যং তু সংফেটঃ পরিকীর্তিতঃ .. ৮৯..
গুরুব্যতিক্রমো যস্তু স দ্রবঃ পরিকীর্তিতঃ .
বিরোধিপ্রশমো যশ্চ স শক্তিঃ পরিকীর্তিতা ..৯০..
ব্যবসাযশ্চ বিজ্ঞেযঃ প্রতিজ্ঞাহেতুসংভবঃ .
প্রসঙ্গশ্চৈব বিজ্ঞেযো গুরূণা পরিকীর্তনম্ .. ৯১..
বাক্যমাধর্ষসংযুক্তং দ্যুতিস্তজ্জ্ঞৈরুদাহৃতা .
মনশ্চেষ্টাবিনিষ্পন্নঃ শ্রমঃ খেদ উদাহৃতঃ .. ৯২..
ঈপ্সিতার্থপ্রতীঘাতঃ প্রতিষেধঃ প্রকীর্তিতঃ .
কার্যাত্যযোপগমনং বিরোধনমিতি স্মৃতম্ .. ৯৩..
বীজকার্যোপগমনমাতানমিতি সংজ্ঞিতম্ .
অপমানকৃতং বাক্যং কার্যার্থং চ্ছাদনং ভবেত্ .. ৯৪..
প্ররোচনা স বিজ্ঞেযা সংহারার্থপ্রদর্শিনী .
[প্রত্যক্ষবচনং যত্তু স ব্যাহার ইতি স্মৃতঃ .. ৯৫..
সবিচ্ছেদং বচো যত্র সা যুক্তিরিতি সংজ্ঞিতা .
জ্ঞেযা বিচলনা তজ্জ্ঞৈরবমানার্থসংযুত].. ৯৬..
[এতান্যবমৃশেঽঙ্গানি সংহারে তু নিবোধত].
মুখবীজোপগমনং সন্ধিরিত্যভিধীযতে .. ৯৭..
কার্যস্যান্বেষণং যুক্ত্যা নিরোধ ইতি কীর্তিতঃ .
উপক্ষেপস্তু কার্যাণাং গ্রথনং পরিকীর্তিতম্ .. ৯৮..
অনুভূতার্থকথনং নির্ণযঃ সমুদাহৃতঃ .
পরিবাদকৃতং যস্যাত্তদাহুঃ পরিভাষণম্ .. ৯৯..
লব্ধস্যার্থস্য শমনং দ্যুতিমাচক্ষতে পুনঃ .
সমাগমস্তথার্থানামানন্দঃ পরিকীর্তিতঃ .. ১০০..
দুঃখস্যাপগমো যস্তু সমযঃ স নিগদ্যতে .
শুশ্রূষাদ্যুপসংপন্নঃ প্রসাদঃ প্রীতিরুচ্যতে .. ১০১..
অদ্ভুতস্য তু সংপ্রাপ্তিরূপগূহনমিষ্যতে .
সামদানাদি সংপন্নং ভাষণং সমুদাহৃতম্ ..১০২..
পূর্ববাক্যং তু বিজ্ঞেযং যথোক্তার্থপ্রদর্শনম্ .
বরপ্রদানসংপ্রাপ্তিঃ কাব্যসংহার ইষ্যতে .. ১০৩..
নৃপদেশপ্রশান্তিশ্চ প্রশস্তিরভিধীযতে .
যথাসন্ধি তু কর্তব্যান্যেতান্যঙ্গানি নাটকে .. ১০৪..
কবিভিঃ কাব্যকুশলৈ রসভাবমপেক্ষ্য তু .
সংমিশ্রাণি কদাচিত্তু দ্বিত্রিযোগেন বা পুনঃ .. ১০৫..
জ্ঞাত্বা কার্যমবস্থাং চ কার্যাণ্যঙ্গানি সন্ধিষু .
এতেষামেব চাঙ্গানাং সংবদ্ধান্যর্থযুক্তিতঃ .. ১০৬..
সন্ধ্যন্তরাণি সন্ধীনাং বিশেষাস্ত্বেকবিংশতিঃ .
সামভেদস্তথা দণ্ডঃ প্রদানং বধ এব চ .. ১০৭..
প্রত্যুত্পন্নমতিত্বং চ গোত্রস্খলিতমেব চ .
সাহসং চ ভযং চৈব হ্রীর্মাযা ক্রোধ এব চ .. ১০৮..
ওজঃ সংবরণং ভ্রান্তিস্তথা হেত্বপধারণম্ .
দূতো লেখস্তথা স্বপ্নশ্চিত্রং মদ ইতি স্মৃতম্ .. ১০৯..
[বিষ্কম্ভচূলিকা চৈব তথ চৈব প্রবেশকঃ .
অঙ্কাবতারোঽঙ্কমুখমর্থোপক্ষেপপঞ্চকম্ ..১১০..
মধ্যমপুরুষনিযোজ্যো নাটকমুখসন্ধিমাত্রসংচারঃ .
বিষ্কম্ভকস্তু কার্যঃ পুরোহিতামাত্যকঞ্চুকিভিঃ .. ১১১..
শুদ্ধঃ সংকীর্ণো বা দ্বিবিধো বিষ্কংভকস্তু বিজ্ঞেযঃ .
মধ্যমপাত্রৈঃ শুদ্ধঃ সংকীর্ণো নীচমধ্যকৃতঃ .. ১১২..
অন্তর্যবনিকাসংস্থৈঃ সূতাদিভিরনেকধা .
অর্থোপক্ষেপণং যত্তু ক্রিযতে সা হি চূলিকা .. ১১৩..
অঙ্কান্তরানুসাঅরী সংক্ষেপার্থমধিকৃত্য বিন্দূনাম্ .
প্রকরণনাটকবিষযে প্রবেশকো নাম বিজ্ঞেযঃ .. ১১৪..
অঙ্কান্ত এব চাঙ্কো নিপততি যস্মিন্ প্রযোগমাসাদ্য .
বীজার্থযুক্তিযুক্তো জ্ঞেযো হ্যঙ্কাবতারোঽসৌ .. ১১৫..
বিষ্লিষ্টমুখমঙ্কস্য স্ত্রিযা বা পুরুষেণ বা .
যদুপক্ষিপ্যতে পূর্বং তদঙ্কমুখমুচ্যতে ].. ১১৬..
অন্যান্যপি লাস্যবিধাবঙ্গানি তু নাটকোপযোগীনি .
অস্মাদ্বিনিঃসৃতানি তু ভাণ ইবৈঅকপ্রযোজ্যানি .. ১১৭..
[ভাণাকৃতিবল্লাস্যং বিজ্ঞেযং ত্বেকপাত্রহার্যং বা .
প্রকরণবদূহ্য কার্যাসংস্তবযুক্তং বিবিধভাবম্].. ১১৮..
গেযপদং স্থিতপাঠ্যমাসীনং পুষ্পগণ্ডিকা .
প্রচ্ছেদকং ত্রিমূঢং চ সৈন্ধবাখ্যং দ্বিমূঢকম্ .. ১১৯..
উত্তমোত্তমকং চৈবমুক্তপ্রত্যুক্তমেব চ .
লাস্যে দশবিধং হ্যেতদঙ্গনির্দেশলক্ষণম্ .. ১২০..
আসনেষূপবিষ্টৈর্যত্তন্ত্রীভাণ্ডোপবৃংহিতম্ .
গাযনেঐর্গীযতে শুষ্কং তদ্গেযপদমুচ্যতে .. ১২১..
[যা নৃত্যত্যাসনা নারী গেযং প্রিযগুণান্বিতম্ .
সাঙ্গোপাঙ্গবিধানেন তদ্গেযপদমুচ্যতে ].. ১২২..
প্রাকৃতং যদ্বিযুক্তা তু পঠেদাত্তরসং স্থিতা .
মদনানলতপ্তাঙ্গী স্থিতপাঠ্যং তদুচ্যতে .. ১২৩..
[বহুচারীসমাযুক্তং পঞ্চপাণিকলানুগম্ .
চঞ্চত্পুটেন বা যুক্তং স্থিতপাঠ্যং বিধীযতে ].. ১২৪..
আসীনমাস্যতে যত্র সর্বাতোদ্যবিবর্জিতম্ .
অপ্রসারিতগাত্রং চ চিন্তাশোকসমন্বিতম্ .. ১২৫..
নৃত্তানি বিবিধানি স্যুর্গেযং গানে চ সংশ্রিতন্ .
চেষ্টাভিশ্চাশ্রযঃ পুংসা যত্র সা পুষ্পগণ্ডিকা .. ১২৬..
[যত্র স্ত্রী নরবেষেণ ললিতং সংস্কৃতং পঠেত্ .
সখীনাং তু বিনোদায সা জ্ঞেযা পুষ্পগণ্ডিকা .. ১২৭..
নৃত্তং তু বিবিধং যত্র গীতং চাতোদ্যসংযুতম্ .
স্ত্রিযঃ পুংবচ্চ চেষ্টন্তে সা জ্ঞেযা পুষ্পগণ্ডিকা].. ১২৮..
প্রচ্ছেদকঃ স বিজ্ঞেযো যত্র চন্দ্রাতপাহতাঃ .
স্ত্রিযঃ প্রিযেষু সজ্জন্তে হ্যপি বিপ্রিযকারিষু .. ১২৯..
অনিষ্ঠুরশ্লক্ষ্ণপদং সমবৃত্তৈরলঙ্কৃতম্ .
নাট্যং পুরুষভাবাঢ্যং ত্রিমূঢকমিতি স্মৃতম্ .. ১৩০..
পাত্রং বিভ্রষ্টসংকেতং সুব্যক্তকরণান্বিতম্ .
প্রাকৃতৈর্বচনৈর্যুক্তং বিদুঃ সৈন্ধবকং বুধাঃ .. ১৩১..
[রূপবাদ্যাদিসংযুক্তং পাঠ্যেন চ বিবর্জিতম্ .
নাট্যং হি তত্তু বিজ্ঞেযং সৈন্ধবং নাট্যকোবিদৈঃ].. ১৩২..
মুখপ্রতিমুখোপেতং চতুরশ্রপদক্রমম্ .
শ্লিষ্টভাবরসোপেতং বৈচিত্র্যার্থ.ম্ দ্বিমূঢকে .. ১৩৩..
উত্তমোত্তমকং বিদ্যাদনেকরসসংশ্রযম্ .
বিচিত্রৈঃ লোকবন্ধৈশ্চ হেলাহাববিচিত্রিতম্ .. ১৩৪..
কোপপ্রসাদজনিতং সাধিক্ষেপপদাশ্রযম্ .
উক্তপ্রত্যুক্তমেবং স্যাচ্চিত্রগীতার্থযোজিতম্ .. ১৩৫..
যত্র প্রিযাকৃতিং দৃষ্ট্বা বিনোদযতি মানসম্ .
মদনানলতপ্তাঙ্গী তচ্চিত্রপদমুচ্যতে .. ১৩৬..
দৃষ্ট্বা স্বপ্নে প্রিযং যত্র মদনানলতাপিতা .
করোতিবিবিধান্ ভাবাংস্তদ্বৈ ভাবিকমুচ্যতে .. ১৩৭..
এতেষাং লাস্যবিধৌ বিজ্ঞেযং লক্ষণং প্রযোগজ্ঞৈঃ .
তদিহৈব তু যন্নৌক্তং প্রসঙ্গবিনিবৃত্তহেতোস্তু ..১৩৮..
পঞ্চসন্ধি চতুর্বৃত্তি চতুঃষষ্ট্যঙ্গসংযুতম্ .
ষট্ত্রিংশল্লক্ষণোপেতং গুণালঙ্কারভূষিতম্ .. ১৩৯..
মহারসং মহাভোগমুদাত্তবচনান্বিতম্ .
মহাপুরুষসংচারং সাধ্বাচারজনপ্রিযম্ ..১৪০..
সুশ্লিষ্টসন্ধিসংযোগং সুপ্রযোগং সুখাশ্রযম্ .
মৃদুশব্দাভিধানং চ কবিঃ কুর্যাত্তু নাটকম্ ..১৪১..
অবস্থা যা তু লোকস্য সুখদুঃখসমুদ্ভবা .
নানাপুরুষসংচারা নাটকেঽসৌ বিধীযতে .. ১৪২..
ন তজ্জ্ঞানং ন তচ্ছিল্পং ন সা বিদ্যা ন সা কলা .
ন তত্ কর্ম ন বা যোগো নাট্যেঽসিম্ন্যন্ন দৃশ্যতে .. ১৪৩..
যোঽযং স্বভাবো লোকস্য নানাবস্থান্তরাত্মকঃ .
সোঽঙ্গাদ্যভিনযৈর্যুক্তো নাট্যমিত্যভিধীযতে .. ১৪৪..
দেবতানামৃষীনাং চ রাজ্ঞাং চোত্কৃষ্টমেধসাম্ .
পূর্ববৃত্তানুচরিতং নাটকং নাম তদ্ভবেত্. ..১৪৫..
যস্মাত্স্বভাবং সংত্যজ্য সাঙ্গোপাঙ্গগতিক্রমৈঃ .
প্রযুজ্যতে জ্ঞাযতে চ তস্মাদ্বৈ নাটকং স্মৃতম্. ..১৪৬..
সর্বভাবৈঃ সর্বরসৈঃ সর্বকর্মপ্রবৃত্তিভিঃ .
নানাবস্থান্তরোপেতং নাটকং সংবিধীযতে .. ১৪৭..
[অনেকশিল্পজাতানি নৈককর্মক্রিঅযাণি চ .
তান্যশেষাণি রূপাণি কর্তব্যানি প্রযোক্তৃভিঃ ].. ১৪৮..
লোকস্বভাবং সংপ্রেক্ষ্য নরাণাং চ বলাবলম্ .
সংভোগং চৈব যুক্তিং চ ততঃ কার্যং তু নাটকম্ .. ১৪৯..
ভবিষ্যতি যুগে প্রাযো ভবিষ্যন্ত্যবুধা নরাঃ .
যে চাপি হি ভবিষ্যন্তি তে যত্নশ্রুতবুদ্ধযঃ .. ১৫০..
কর্মশিল্পানি শাস্ত্রাণি বিচক্ষণবলানি চ .
সর্বাণ্যেতানি নশ্যন্তি যদা লোকঃ প্রণশ্যতি .. ১৫১..
তদেবং লোকভাষাণাং প্রসমীক্ষ্য বলাবলম্ .
মৃদুশব্দং সুখার্থং চ কবিঃ কুর্যাত্তু নাটকম্ .১৫২..
চৈক্রীডিতাদ্যৈঃ শব্দৈস্তু কাব্যবন্ধা ভবন্তি যে .
বেশ্যা ইব ন তে ভান্তি কমণ্ডলুধরৈর্দ্বিজৈঃ .. ১৫৩..
দশরূপবিধানং চ মযা প্রোক্তং দ্বিজোত্তমাঃ .
অতঃ পরং প্রবক্ষ্যামি বৃত্তীনামিহ লক্ষণম্ ..১৫৪..

ইতি ভারতীযে নাট্যশাস্ত্রে সন্ধিনিরূপণং নামধ্যায একোনবিংশঃ ..

<