চতুর্থোঽধ্যাযঃ
নিষেকা
কুজেন্দু হেতুঃ প্রতিমাসম্ আর্তবং গতে তু পীডঋক্ষম্ অনুষ্ণদিধিতৌ |
অতোঽন্যথাস্থে শুভ পুংগ্রহেক্ষিতে নরেণ সংযোগম্ উপৈতি কামিনী || ১||
যথাস্তরাশির্মিথুনং সমেতি তথৈব বাচ্যো মিথুন প্রযোগঃ |
অসদ্ গ্রহালোকিত সংযুতে অস্তে সরোষেষ্টৈঃ স বিলাস হাসঃ || ২||
রবীন্দু শুক্রাবনিজৈঃ স্বভাগগৈর্গুরৌ ত্রিকোণোদয সংস্থিতেঽপি বা |
ভবত্যপত্যং হি বিবীজিনাম্ ইমে করা হিমাংশোর্বিদৃশাম্ ইবাফলাঃ || ৩||
দিবাকরেন্দ্বোঃ স্মরগৌ কুজার্কজৌ গদ প্রদা পুঙ্গলযোষিতোস্তদা |
ব্যয স্বগৌ মৃত্যুকরৌ যুতৌ তথা তদেকদৃষ্ট্যা মরণায কল্পিতৌ || ৪||
দিবার্ক শুক্রৌ পিতৃ মাতৃ সংজ্ঞিতৌ শনৈশ্চরেন্দূ নিশি তদ্বিপর্যযাত্ |
পিতৃব্য মাতৃ স্বসৃ সংজ্ঞিতৌ চ তাবথৌজযুগ্মঋক্ষ গতৌ তযোঃ শুভৌ || ৫||
অভিলষদ্বিরুদযঋক্ষম্ অসদ্ভির্মরণম্ এতি শুভদৃষ্টিম্ অযাতে |
উদযরাশি সহিতে চ যমে স্ত্রী বিগলিতোডু পতি ভূ সুতদৃষ্টে || ৬||
পাপদ্বয মধ্য সংস্থিতৌ লগ্নেন্দূ ন চ সৌম্য বীক্ষিতৌ |
যুগপত্ পৃথগ্ এব বা বদেন্ নারী গর্ভযুতা বিপদ্যতে || ৭||
ক্রূরে শশিনশ্চতুর্থগে লগ্নাদ্ বা নিধনাশ্রিতে কুজে |
বন্ধ্বন্ত্যগযোঃ ক্ষীণেন্দৌ নিধনায পূর্ববত্ || ৮||
উদযাস্তগযোঃ কুজার্কযোর্নিধনং শস্ত্র কৃতং বদেত্ তথা |
মাসাধিপতৌ নিপীডিতে তত্ কালে স্রবণং সমাদিশেত্ || ৯||
শশাঙ্ক লগ্নোপগতৈঃ শুভ গ্রহৈস্ত্রিকোণ জাযার্থ সুখাস্পদ স্থিতৈঃ |
তৃতীয লাভঋক্ষ গতৈশ্চ পাপকৈঃ সুখী তু গর্ভো রবিণা নিরীক্ষিতঃ || ১০||
ওজঋক্ষে পুরুষাংশকেষু বলিভির্লগ্নার্ক গুর্বিন্দুভিঃ পুংজন্ম
প্রবদেত্ সমাংশক গতৈর্যুগ্মেষু তৈর্যোষিতঃ |
গুর্বর্কৌ বিষমে নরং শশি সিতৌ বক্রশ্চ যুগ্মে স্ত্রিযং |
দ্ব্যঙ্গস্থ
বুধ বীক্ষণাচ্চ যমলৌ কুর্বন্তি পক্ষে স্বকে || ১১||
বিহায লগ্নং বিষমঋক্ষ সংস্থঃ সৌরোঽপি পুংজন্ম করো বিলগ্নাত্ |
প্রোক্ত গ্রহাণাম্ অবলোক্য বীর্যং বাচ্যঃ প্রসূতৌ পুরুষোঽঙ্গনা বা || ১২||
অন্যোন্যং যদি পশ্যতঃ শশি রবী যদ্যর্কি সৌম্যাবপি বক্রো বা
সমগং দিনেশম্ অসমে চন্দ্রোদযৌ চেত্ স্থিতৌ |
যুগ্মৌজঋক্ষ গতাবপীন্দু শশিজৌ ভূম্যাত্মজেনেক্ষিতৌ
পুম্ভাবে সিত লগ্ন শীত কিরণাঃ ষট্ ক্লীবযোগাঃ স্মৃতাঃ || ১৩||
যুগ্মে চন্দ্র সিতৌ তথৌজ ভবনে স্যুর্জ্ঞার জীবোদযা
লগ্নেন্দূ নৃ নিরীক্ষিতৌ চ সমগৌ যুগ্মেষু বা প্রাণিনঃ |
কুর্যুর্তে মিথুনং গ্রহোদয গতান্ দ্ব্যঙ্গাংশকান্ পশ্যতি স্বাংশে
জ্ঞে ত্রিতযং জ্ঞগাংশক বশাদ্ যুগ্মং ত্বমিশ্রৈঃ সমম্ || ১৪||
ধনুর্ধরস্যান্ত্যগতে বিলগ্নে গ্রহৈস্তদংশোপগতৈর্বলিষ্ঠৈঃ |
জ্ঞেনার্কিণা বীর্যযুতেনদৃষ্টৈঃ সন্তি প্রভূতাপি কোশ সংস্থাঃ || ১৫||
কলল ঘনাঙ্কুরাস্থি চর্মাঙ্গজ চেতনতাঃ সিত কুজ জীব সূর্য চন্দ্রার্কি বুধাঃ পরতঃ |
উদযপ চন্দ্র সূর্য নাথাঃ ক্রমশো গদিতা ভবন্তি শুভাশুভং চ মাসাধিপতেঃ সদৃশম্ || ১৬||
ত্রিকোণগে জ্ঞে বিবলৈস্তথা পরৈর্মুখাঙ্ঘ্রি হস্তৈর্দ্বিগুণস্তদা ভবেত্ |
অবাগ্ গবীন্দাবশুভৈর্ভ সংধিগৈঃ শুভেক্ষিতশ্চেত্ কুরুতে গিরং চিরাত্ || ১৭||
সৌম্যঋক্ষাংশে রবিজরুধিরৌ চেত্ স দন্তোঽত্র জাতঃ কুব্জঃ
স্বঋক্ষে শশিনি তনুগে মন্দ মাহেযদৃষ্টে |
পঙ্গুর্মীনে যম শশি কুজৈর্বীক্ষিতে লগ্ন সংস্থে সংধৌ পাপে
শশিনি চ জডঃ স্যান্ ন চেত্ সৌম্যদৃষ্টঃ || ১৮||
সৌর শশাঙ্কদিবা করদৃষ্টে বামনকো মকরান্ত্য বিলগ্নে |
ধী নবমোদযগৈশ্চ দৃকাণৈঃ পাপযুতৈরভুজাঙ্ঘ্রি শিরাঃ স্যাত্ || ১৯||
রবি শশি যুতে সিংহে লগ্নে কুজার্কি নিরীক্ষিতে নযনরহিতঃ সৌম্যাসৌম্যৈঃ স বুদ্বুদ লোচনঃ |
ব্যয গৃহ গতশ্চন্দ্রো বামং হিনস্ত্যপরং রবির্ন শুভ
গদিতা যোগা যাপ্যা ভবন্তি শুভেক্ষিতাঃ || ২০||
তত্ কালম্ ইন্দু সহিতো দ্বি রসাংশকো যস্তত্ তুল্যরাশি সহিতে পুরতঃ শশাঙ্কে |
যাবান্ উদেতি দিনরাত্রি স মান ভাগস্তাবদ্ গতে দিন নিশোঃ প্রবদন্তি জন্ম || ২১||
উদযতি মৃদু ভাংশে সপ্তমস্থে চ মন্দে যদি ভবতি নিষেকঃ সূতিরব্দ ত্রযেণ |
শশিনি তু বিধিরেষ দ্বাদশে অব্দে প্রকুর্যান্ নিগদিতম্ ইহ চিন্ত্যং সূতি কালে অপি যুক্ত্যা || ২২||
